\id 1PE - Iyaa (YAK) NT en Kiyaka
\ide UTF-8
\h 1 Peetelo
\toc3 1Pe
\toc2 1 Peetero
\toc1 Mukaanda a Peetero wa tsiomi
\mt2 Mukaanda a Peetero wa tsiomi
\mt1 1 Peetero
\imt Kotili a mukaanda
\ip Mukaanda a Peetero watsiomi basonii nde kwaa bangaa Kristo. Babali mu bitinini bitaana bia Looma bili ku taanda, na bili ku peembi ya Esete ya Asia, yibubaata Turkia lolo. Bo bakidiaala kuu weti bieenyi. Mundaa bu bo bali bangaa Kristo (\xt 1.1; 2.11\xt*), bangaa tsi yii bakitsoro na bakimeengele bo. Bo bakifuundusu na bakikwaamisa bo kwahele a toono.
\ip Peetero li mu usonuu mukaanda wu, mu uhamisa imiini na ilimbisi kia bo. Nde li mu uhamisa bo mu udiaata weti baata ba Nziaambi asoolo.
\ip Mu mukaanda a Peetero wa tsiomi, nde li mu utsuu kwaa bangaa Kristo babamati mu mabuundu ma mupili na mupili. Mu taanga di, bo bamaabutuu libutuu lilinyatii. Bo a bali mu ubwadiaata pe weti bwakidiaata bakaa ba bo, so a buu pe, weti baata babadieengelele bo (\xt 1.13—2.4\xt*). \em Bo ka baata ba Nziaambi \em* (\xt 2.4-10\xt*). Bo utuu ukama mutimi mu mapasi na mu kwaamisa mundaa ti, bo bali na ilimbisi kili mu uha bo moonyi (\xt 1.3,13,21; 3.15\xt*).
\ip Nziaambi asiimbili Yiisu Kristo mu babakwa. Yii ni ndaa yili mu utuungu ilimbisi kia bangaa Kristo. Ilimbisi kii ili mu ubiti mu usiingi bituyi na kwaamisa weti bu Yiisu asiiri. Mu ngwanya Yiisu amoni pasi, bamutuyi na bamutuni. Ka nde a avutili mamabi mu mamabi pe. Ka bunu, nde asi ilimbisi kia nde mu Nziaambi (\xt 4.12-19\xt*).
\ip Mukaanda a Peetero wa tsiomi li mu uleele bu: moonyi na likwa la Yiisu Kristo bili ifwaani kwaa ba ngaa Kristo. Ifwaani ki ili mu umweese \em buni diafwaana udiaala itwaari nha kati a bangooyi na bangaa Kristo.\em* Mukaanda wu li mu uvulu uha mandoongi kwaa baata babavutuu mbisi (\xt 2.18—3.6\xt*). Ndiaatili a bo utuu ubaasila babamosi mu uyaaba buli imiini mu Kristo. Mutso libuundu, litoono na likiinzi la bana mu bana, bili mu usuungusu bakuutu, bafuru na pasi inama (\xt 5.1-7; 1.22—2.3\xt*). Ndiaatili ya pili yii, yili mu umweese kwaa babali ku mbari ti, a uli na ndaa so mosi pe, yibutuu usieembe bangaa Kristo.
\c 1
\s Mabwee
\p
\v 1 Me Peetero, tumu a Yiisu Kristo, ndi mu usonuu mukaanda wu. Me tsindii nde kwaa baata ba Nziaambi asoolo na bali mu udiaala weti bieenyi mu bitinini bia Ponte bia Ngalatia, bia ku Kapadoki, bia ku Asia na bia ku Bitinya. 
\v 2 Nziaambi Taayi akwisoolo beni weti buli minhana mia nde. Muheebili a nde li mu usa ti beni diba baata ba nde, paa beni ditumumu kwaa Yiisu Kristo, na paa makili ma nde matsiaamii matsieemese beni. Nyaala kolokolo na iyeenge bifwaabala kwaa beni.
\s Mbutili yinyatii yili mu uha ilimbisi
\p
\v 3 Dibilani Nziaambi, Taayi a Pfumu a bisi Yiisu Kristo! Mu bunene ba ngebe a nde mu bisi, nde maabwaha bisi idiingi kiinyatii mu Yiisu Kristo wa siimbii mu babakwa. Nde ayilii buu, paa bisi dibaa ilimbisi kili moonyi. 
\v 4 Bisi sa dikwabaa ilimbisi kii, mundaa ti bisi sa ditolo mukobo wu Nziaambi aswee kwaa baba nde. Mukobo wu utuu pe ufuu, so ubiiyi, so usumuu bubwe ba nde. Nziaambi wadisweehele nde mu mayulu. 
\v 5 Ni litu la nde lili mu ukebe beni mu imiini kia beni mu Yiisu, natee bu liyobolo likaayabina mu taanga diatsieelele. 
\v 6 Diluulu mu kinya, so bu beni diafwaana umono ngebe mu taanga dikee mu mapasi ma mutindi na mutindi. 
\v 7 Woolo lo makulu libaafuu, ka bunu, bubaayesine lo mu mbaa. Bumosi ka, imiini kia beni kiavulu woolo tala, bali mu uyesene kio mu umweese ndutu a kio. Ni buu beni dikaayaka mbilili, likiinzi na buzitu kwaa Nziaambi, mu taanga di Yiisu Kristo akaayiri avutuu. 
\v 8 Beni diatoono nde, so bu diahele umono nde. Beni diasa imiini kia beni mu nde, so bu beni dikeni a diamono nde pe. Ni mubuu, beni dialuulu mu kinyi ya buzitu, yili so bwa utuu pe ubiindili. 
\v 9 Mundaa ti, beni dimaaholo musieende a imiini kia beni: ni liyobolo la miwuumu mia beni.
\s Mibili miayaabisi liyobolo mundaa a bisi
\p
\v 10 Mibili miayii na miakengisi bubwe mundaa yatala liyobolo. Na mio miabili mundaa bweese ba Nziaambi ataasila beni. 
\v 11 Bo bakisa mifuri mu uyaaba mataanga na makuulu mamubwaanina na biliimbi biayaabisa Muheebili a Kristo. Mundaa ti, Muheebili wuu wali mu bo, akikwayaabisa mapasi ma Kristo afwaana umono, na buzitu ba nde akaabaa nha mbisi. 
\v 12 Nziaambi amweesi kwaa mibili ti, a mundaa bo makulu pe bo bakibili, ka mundaa beni. Mu taanga di bayiisi beni Ndaa Yimbwe mu kuulu ya basiali, bo bali mu utsuu mu mo, mu lituu la Muheebili wa ngira wu batsindii wamati ku yula. So batumu, batoono umono mandaa maa.
\s Nziaambi aloombi kwaa bisi mu uba na ndiaatili yafwaana
\p
\v 13 Ni mu buu, diyilimi na diba likanda, di ba na nziaabili. Disa ilimbisi kia beni kioosi mu bweese ba Nziaambi akaaha kwaa beni, mu taanga di Yiisu Kristo akaa monuu. 
\v 14 Ditumumu Nziaambi weti baana babakuluu. A diduku pe manzala mamabi ma beni diali na mo, mu taanga di beni diali kutso bundimbi. 
\v 15 Ka diba babangira mu ndiaatili a beni yoosi, weti bu Nziaambi wata beni mbila ali ka wangira. 
\v 16 Mundaa ti Mabasonuu ma Ngira mali mu uleele: «Beni sa diba babangira, mundaa ti me ndi Wangira\x + \xo 1.16 \xo*\xt Mik 19.2\xt*\x*.» 
\v 17 Mu makuundu ma beni, beni dili mu uta Nziaambi mu «Taayi». Nde li mu ufuundusu weti bwafwaana, muutu-muutu weti buli biyiluu bia nde. Ni mu buu, beni badili bieenyi nha tsini a toto nha, nyaala ndiaatili a beni yita imbaangi mu likiinzi li beni dili na lo mu nde. 
\v 18 Ni mu buu, beni diayaaba mu ki tala bakuuli beni mu ndiaatili a bakaa ba beni yahele a ndutu, yi basiisili beni. Kuulili yii, a yali mu kuulu ya bisii bibifuu weti mboongo na woolo pe. 
\v 19 Ka beni diakuulii mu makili ma tala ma Kristo, wuli weti ma limeme la tsieeme lahele na ipii, na lahele na keri. 
\v 20 Nziaambi akwisoolo nde mu ndaa yii, tswaamina nzilimini a tsi. Na mundaa beni Nziaambi amweesi nde mu taanga diatsieelele. 
\v 21 Ni mundaa Kristo beni bangaa imiini mu Nziaambi, wasiimbili nde mu babakwa, na waha nde buzitu. Ni mu buu, beni dibaa usa imiini na ilimbisi mu Nziaambi.
\p
\v 22 Beni dimaatsieeme bu diatumumu ngwanya, mu utonosono kwahele a lisi kutso likaya weti baana ba nguu. Ni mu buu, dihama mu utonosono bana mu bana, mu mutimi watsieeme. 
\v 23 Beni diamaabutuu libutuu lilinyatii. A mu libutu li fuu pe, ka mu libutu lili mu uhele ufuu, mundaa Mandaa ma Nziaambi ma li moonyi mu taanga dioosi. 
\v 24 Mundaa ti, basonuu: «Pasi nyutu li weti itiiti, na buzitu ba nde boosi weti ifulu kia matsiee. Itiiti ili mu ukanya na ifulu ili mu ubwa. 
\v 25 Ka mandaa ma Pfumu mali mu uba mu bilimi na bilimi\x + \xo 1.25 \xo*\xt Yes 40.6-8\xt*\x*.» Ka bunu, mandaa maa, ni ma Ndaa Yimbwe yi bayaabisi kwaa beni.
\c 2
\s Buni mwaana a Nziaambi afwaana uyiluu
\p
\v 1 Ni mu buu, dinyaala mandaa moosi mamabi, mayele mamabi na lisi kutso likaya. Dinyaala ka musoyi na tsa. 
\v 2 Beni dili weti bibabaana bimaabutuu. Ni mu buu, ditoono kwa laa mandaa ma Nziaambi, weti bu imwamwaana kiatoono unywa mabeene ma nguu a nde, paa beni dikulu natee ku liyobolo la beni. 
\v 3 So beni dimaabiimbi ti Pfumu li wumubwe\x + \xo 2.3 \xo*\xt Mkg 34.9\xt*\x*.
\s Likutunu lilinyatii mutso nzo a Nziaambi yinyatii
\p
\v 4 Diswesuu kwaa Pfumu, manya la moonyi. So bu baata babumi manya lii, lo lili latala nha misi mia Nziaambi, na ni nde asoolo lo. 
\v 5 Diswesuu kwaa nde, paa basalila beni ka weti mamanya ma moonyi, mu utuungu nzo ya muheebili. Beni sa dituungu kaba la bangaanga ba Nziaambi ba ngira. Beni sa diha nde bungori ba muheebili a nde akaayaka mu kinya mu kuumbu a Yiisu Kristo. 
\v 6 Mundaa ti nde li mu uleele mu Mabasonuu:
\q1 «Mono me maasuusu manya la ibwa mu Siooni.
\q1 Me maasoolo lo, lo latala lili.
\q1 Na wu usuusu imiini kia nde mu lo,
\q1 a umono tsionyi so hoolo pe.»
\m
\v 7 Manya li, lili na tala yalaa kwaa beni ba dia sa imiini. Ka kwaa baba hele usa imiini, weti buli mu uyaabisa Mabasonuu ma Ngira:
\q1 «Manya libatuungi babumi,
\q1 limaakituu manya la mutswe la tala la ibwa.»
\m
\v 8 Bali mu ubwaleele ka mu Mabasonuu ma Ngira:
\q1 «Lo ni manya li baata bukubu baka, na lilibwiisi bo\x + \xo 2.8 \xo*\xt Yes 28.16\xt*\x*.»
\m Baata ba bali mu ukubu mabaka, mundaa ti bo bali mu ubisi utumumu mandaa ma Nziaambi. Na maa, ni mandaa mafwaana uyilimi kwaa bo.
\p
\v 9 Ka beni ifuumbu kibasoolo, ni kaba la bangaanga ba Nziaambi mutini. Beni dili ifuumbu kia ngira, na beni baata ba Nziaambi abaa. Nde maata beni mbili paa beni dimata ku pimisi, na diyoo ku liyalila la nde lili mu ungeyene, paa beni diyaabisa biyiluu bia nde biavulu bubwe. 
\v 10 Tsiomi beni a diali pe baata ba Nziaambi, ka mu taanga di, beni ka baata ba nde. Tsiomi, Nziaambi a ali na ngebe a beni pe, ka mu taanga di, nde ka na ngebe a beni\x + \xo 2.10 \xo*\xt Ose 1.6-9; 2.1-25\xt*\x*.
\s Bunyanga mu isala kia Nziaambi
\p
\v 11 Me ndi mu uhamisa beni banduu ba me ba litoono, beni bali bieenyi na bayooyi a kuulu nha tsini a toto nha. A dikangama mu manzala ma musunyi mamabi, mali mu udwaanisa miwuumu mia beni. 
\v 12 So bangooyi bali mu usa beni weti so beni dili baata bali mu uyiluu mandaa mamabi, diba na ndiaatili yimbwe nha kati a bo. Diyiluu buu, paa ti, so bo batoori nha mbuu ya ufuundu beni mu uyiluu mamabi, bo sa bayaaba mamabwe ma beni dili mu uyiluu, na ubili Nziaambi mu iluumbu ki nde akaayiri avutuu.
\p
\v 13 Mundaa a Pfumu, ditumumu pasi litumu la tsi, so yaba mutini wuli na litumu nha yulu a boosi. 
\v 14 Ditumumu kwaa batumi ba nde atsinduu, mu usieembe bayilii a mamabi, na mu ubili bayilii a mamabwe. 
\v 15 Mu ngwanya, litoono la Nziaambi lili ti, beni diyiluu mandaa mamabwe, mundaa uwurusu minywa mia binzinzi bahele uyaamba utsuu kwaa beni. 
\v 16 Diba weti baata bali bunyanga. Ka a disalila bunyanga ba beni pe, mu uba weti livuungu mu ufuu biyiluu bia beni bibibi. Ka didiaata weti bafwaana kwaa basiali ba Nziaambi. 
\v 17 Dikiinzi baata boosi, ditoono baana ba nguu mu imiini. Dibatila Nziaambi boomo na diha buzitu kwaa mutini.
\s Ifwaani kia Kristo
\p
\v 18 Beni mabooyi, dikuluu mu likiinzi loosi kwaa bapfumu ba beni. Dikuluu kwaa babali mu uyiluu mamabwe, na kwaa babali mu uyiluu mamabi. 
\v 19 Yili ndaa bweese nha kulu a Nziaambi, mbiiti muutu li mu ukama mutimi mu mapasi mahele ufwaana ma nde ali mu umono, mundaa ti nde ayaaba ti Nziaambi li na nde. 
\v 20 Ni mu buu, ki mbilili beni dibaa so beni dikami mutini mu bikoti bi butete beni, so beni dia yiluu bubi? Ka, so beni diyiluu bubwe, beni dili mu umono pasi mu ilimbisi, yii yili vutili a matoondo mu misi mia Nziaambi.
\p
\v 21 Ni mundaa yii Nziaambi ata beni mbili. Mundaa ti, Kristo, nde makulu amoni pasi mu beni. Nde asiisi beni ifwaani, paa beni diduku bitaambi bia nde. 
\v 22 Nde a ayilii masumu pe, na ndaa so mosi ya pia a yapali mu munywa a nde so hoolo pe\x + \xo 2.22 \xo*\xq Nde a ayilii masumu pe, na ndaa so mosi ya pia a yapali mu munywa a nde so hoolo pe. \xq*\xt Yes 53.9\xt*\x*. 
\v 23 Bu batuyi nde, nde a avutili mu ituyi pe. Bu bamweesi nde pasi, nde a afweengi muutu pe. Ka nde ayeelili mapasi ma nde mu mio mia wuli mu ufuundisi wa suungunu. 
\v 24 Nde makulu abiti masumu ma bisi mu nyutu a nde makulu nha yulu a muti wa kuruwa, paa ti, so diakwa mu masumu, bisi diba moonyi mu libweeye la nde. Mundaa ti, ni mu maputu ma nde beni diabeelii. 
\v 25 Ninha, beni diali weti bindombo biadiimbili\x + \xo 2.25 \xo*\xq biadiimbili \xq*\xt Yes 53.4-6\xt*\x*. Ka mu taanga di, beni dimaavutuu kwaa wuli mukebi na mukali a beni.
\c 3
\s Makweele ma bangaa Kristo
\p
\v 1 Bumosi ka kwaa beni bakaasa, ditumumu balumi ba beni\x + \xo 3.1 \xo*\xq beni \xq*\xt Efe 5.22,24; Kol 3.18\xt*\x*. Diyiluu buu paa ti, so uli na babamosi nha kati a bo bali mu uhele usa imiini mu mandaa ma Nziaambi, bakiingili mayele mu ndiaatili a beni yimbwe. Mu buu, beni a dibwaba na so tsata a uyiisi bo mandaa ma Nziaambi pe. 
\v 2 Ndili a ndiaatili a beni ya likiinzi na yatsieeme, yakuu kwaa bo mu usa imiini. 
\v 3 Bubwe ba beni a bafwaana umonuu ndili mu milwaata ya ku mbari pe: naanga diba kutu, ulwaata bilungu bia woolo so bikutu bibibwe.
\p
\v 4 Ka bubwe ba beni bafwaana uba ba ku kati a mutimi. Bo ni bubwe ba muheebili wa iyeenge na buleembi, babali na tala yalaa nha misi mia Nziaambi na babuhele ufuu. 
\v 5 Buu ni bwali amonuu bubwe ba bakaasa bangaa imiini, babakisa ilimbisi mu Nziaambi, mu taanga a tsi kulu. 
\v 6 Weti Saara wakitumumu kwaa Abraami na akita nde «pfumu a me\x + \xo 3.6 \xo*\xq pfumu a me \xq*\xt Mba 18.12\xt*\x*». Ngwanya, so beni dili mu uyiluu mamabwe kwahele a umono boomo mu ndaa so mosi, beni dili baana ba nde.
\p
\v 7 Bumosi ka kwaa beni balumi, bu beni dili mu udiaala na bakari ba beni, diafwaana uba na nziaabili ti beni diavulu bo mu mifuri. Dikiinzi bo, mundaa ti bo bafwaana ukaba na beni, mukobo wa moonyi a bweese ba Nziaambi. Diyiluu buu, paa ti ndaa so mosi ihele uba ibaa mu makuundu ma beni.
\s Umono pasi mu ndaa mamabwe
\p
\v 8 Nha tsieelele, diyuhusunu na diba na matsimi mamosi beni boosi. Diyiluu uluulu mu litoono weti baana ba nguu. Diba bangaa kinya na bangaa buleembi bana mu bana. 
\v 9 A divutulu mamabi mu mamabi pe, a so itari mu itari pe. Ka divutulu: « Nyaala Nziaambi asieme we\x + \xo 3.9 \xo*\xq asieme we \xq*\xt Mat 5.44\xt*\x*!» Mundaa ti, Nziaambi bu ata beni mbili ni mu uha beni lisieme. 
\v 10 Ni mu buu, mono bu Mabasonuu ma Ngira mali mu uleele:
\q1 «Watoono idiingi na umono biluumbu bia kinya,
\q1 nyaala anyaala tsa.
\q1 Na anyaala ka utsuu mandaa ma pia.
\q1
\v 11 Nyaala atakuu na mamabi na ayiluu mamabwe.
\q1 Nyaala nde asaa iyeenge mu mukonono.
\q1
\v 12 Mundaa ti Pfumu anaa misi mia nde nha yulu a baata balibweeye.
\q1 Nde ayilimi mu uyuu makuundu ma bo.
\q1 Ka Pfumu abele boosi bali mu uyiluu mandaa mamabi\x + \xo 3.12 \xo*\xt Mkg 34.13-17 \xt*\x*.»
\p
\v 13 Na kaayiluu beni mamabi, so beni dili na litoono mu uyiluu mamabwe? 
\v 14 Ka, so beni dimoni pasi mundaa ti beni dili mu uyiluu libweeye, beni dili dialuulu mu kinyi! A diba na boomo dia baata pe, na a diviinzili mitimi mia beni pe. 
\v 15 Mu mitimi mia beni, dikiinzi Kristo weti wu basieeme. So bafuulu beni mu ubiindili ilimbisi kia beni, diba babayilimi mu mataanga moosi mu ukala kio. 
\v 16 Ka diyiluu buu mu buleembi na likiinzi. Diba na matsimi matsieeme, paa babali mu utuu ndiaatili a beni yimbwe ya bangaa Kristo, bamono tsionyi. 
\v 17 Mundaa ti yavulu bubwe mu umono pasi bu dili mu uyiluu mandaa mamabwe, so lii ni litoono la Nziaambi. Ka a mu uyiluu mandaa mamabi pe.
\s Likwa la Yiisu na mbiingili a nde
\p
\v 18 Mu ngwanya, Kristo ka akwiri mbala ndila mosi mu masumu ma baata. Nde walibweeye, akwi mu baata mu bangaa matoono, paa abiti beni kwaa Nziaambi. Badusi nde mu nyutu a nde ya imuutu. Ka Muheebili wa Ngira abwiha nde moonyi. 
\v 19 Mu lituu la Muheebili wuu, nde ayeni ka mu uyaabisa Ndaa Yimbwe kwaa miheebili miali miakangama mu perese. 
\v 20 Miheebili mii ni miheebili mia baata babali batemini Nziaambi tsi kulu, bu nde akikama mutimi mu ukebe Nowa mu taanga di nde akituungu nzaasa. Ndili a mwaana baata pwoombo kele babakoti mu nzaasa na bavuyi mu nyaamba a maamba. 
\v 21 Yo lili ifwaani kia libootuu lili mu uyobolo beni, mu taanga ndi, lo a lili pe tsieemini a mviindi dia nyutu pe, ka mu usiingi mbili a Nziaambi mu matsimi masuungunu, nde li mu ukuulu beni munda Yiisu Kristo a siimbii mu babakwa. 
\v 22 Nde ayene ku yula, na adiaala nha koo kia babaala kia Nziaambi, ku batumu ba Nziaambi, bapfumu bakimi na tuu dia mayulu bali ku tsini a litumu la nde.
\c 4
\s Baata bamaakiingili mayele
\p
\v 1 Kristo amoni pasi mu nyutu a nde, ni mu buu, beni ka dili mu umono mapasi weti nde. Mundaa ti, muutu wamaamono pasi mu nyutu a nde, amaakabuu na masumu. 
\v 2 Umatuu mu taanga di, beni diafwaana ubiti idiingi kia beni kia musunyi kimaasaala nha tsini a toto nha, weti buli litoono la Nziaambi. Ka, a weti buli manzala ma musunyi pe. 
\v 3 Ngwanya, tsikulu, beni dialabisi taanga dialaa mu uyiluu manzala ma bangooyi. Beni diadiaati kutso tsoongili, manzala mamabi, lidia, kolili a mala, miyaati, na kuundila biteyi. 
\v 4 Na mu taanga di, bangooyi bali mu ukimuu mu beni, mundaa ti beni a dili mu ubwaba itwaari na bo pe, mu idiingi kia bo kialuulu mu biyiluu bibi, na bo bali mu utuu beni kwa laa. 
\v 5 Ka bo sa bayala mutata mu biyiluu bia bo kwaa Nziaambi. Nde amaayilimi mu ufuundusu babali moonyi na babakwa. 
\v 6 Ni mu buu bayaabisa ka Ndaa Yimbwe kwaa babakwa. Paa ti, so bu bafuundisi bo mundaa idiingi kia ku tsini a toto, weti baata boosi, bo ka na kuulu mu taanga di, ya uba na idiingi weti buli litoono la Nziaambi mundaa a Muheebili.
\s Usalila bungori ba Nziaambi ali mu uha mu libuundu
\p
\v 7 Manini a mandaa moosi ka bebele. Didiaata mu mayele, na diba likanda paa beni dituu ukuundu. 
\v 8 Nha kati a tsiomi, diyiluu utonosono bana mu bana. Mundaa litoono lili mu umaasa masumu mamalayi. 
\v 9 Diyakasana bana mu bana, kwahele a minhunhunyu. 
\v 10 Pasi muutu mu beni ayaki kwaa Nziaambi bungori ba buweese mu usalila bamabaayi. Ni mu buu, beni sa disala isala weti bakebi bababwe ba bweese ba Nziaambi ba mupili na mupili. 
\v 11 Nyaala muutu wuli na bungori ba utsuu, asalila bo mu uyiisi mandaa ma Nziaambi. Wuli na bungori ba ubaasila bambaayi, nyaala asalila bo mu mifuri mioosi mi Nziaambi ali mu uha nde. Bwafwaana ti, mu mandaa moosi, diha buzitu kwaa Nziaambi, mu Yiisu Kristo ngaa buzitu na lituu mu taanga dioosi. Ameni!
\s Mbaa ya Nziesini
\p
\v 12 Bambaayi ba me ba litoono, a dikimuu pe nha beni dili nha tso mbaa ya nziesini, weti so ndaa ya kimi-kimi yiyirili beni. 
\v 13 Ka bunu, diyaanga wa beni mu uba itwaari mu pasi di Kristo amoni. Mu yii, bu Kristo akaamonuu mu buzitu ba nde, beni ka diluulu mu kinyi. 
\v 14 So batuyi beni mu ndaa kuumbu a Kristo, diba na kinyi, mundaa ti Muheebili a Nziaambi wa buzitu li nha yulu a beni. 
\v 15 So muutu mosi nha kati a beni moni pasi, yinyaala uba mundaa ti nde mudusi a baata, muyibi, muyilii a mamabi, so mundaa ti nde akoto mu mandaa ma bangani. 
\v 16 Ka so muutu moni pasi mundaa ti nde ngaa Kristo, nyaala ahele umono tsionyi. Ka abili Nziaambi mundaa ti nde li na kuumbu «ngaa Kristo».
\p
\v 17 Mu taanga di pfuundisi ya tisomi yimaato. Na pfuundisi sa yikwabaanduu mu nzo a Nziaambi. Ka so pfuundisi yibaandii mu bisi, manini buni yikaaba, nha nde akaatete boosi bali mu utemenene mandaa ma Ndaa Yimbwe ya Nziaambi? 
\v 18 Weti buli mu uleele Mabasonuu ma Ngira:
\q1 «So walibweeye yobii mu pasi,
\q1 buni bukaaba kwaa wumubi na ngaa masumu\x + \xo 4.18 \xo*\xt Mts 11.31\xt*\x*?»
\m
\v 19 Ninha, nyaala boosi babumono pasi weti buli litoono la Nziaambi, bayeelele miwuumu mia bo nha mioo mia Nziaambi, Muyilii a bioosi na wanambita mu mandaa ma nde. Na nyaala ahama mu uyiluu mamabwe.
\c 5
\s Ubuungulu mukaanga a Nziaambi
\p
\v 1 Mu taanga di, me ndi mu utsuu kwaa babali bakuutu ba libuundu nha kati a beni. Me ka ndi mukutu a libuundu weti bo. Me ndi mbaangi mu mapasi ma Kristo na me sa ba itwaari mu buzitu bakaamonuu. Mono ma me loombi kwaa bo. 
\v 2 Beni bakuutu ba libuundu, beni dili weti bakebi ba mameme. Dibuungulu mukaanga wu Nziaambi aha kwaa beni. Diba likanda mu ukebe nde kwahele a ti babamuu beni, ka mu mutimi wu mubwe weti buli litoono la Nziaambi. Diyiluu buu, mu litoono la ngwanya, ka a mu nzala a mboongo pe. 
\v 3 A ditumu pe mu mifuri, baata ba Nziaambi aha kwaa beni mu ukebe. Ka diba bifwaani bibibwe kwaa mukaanga a mameme. 
\v 4 Na, mu taanga di Mukuutu a bakebi ba mameme akaamonuu, beni sa diholo iburu kia buzitu kikaabaangeyinanga taanga dioosi. 
\v 5 Bu mosi ka, kwaa beni bafuru, ditumumu kwaa bakuutu ba beni. Na beni boosi, dikuluu bana nha kulu a bana. Mundaa ti, Mabasonuu ma Ngira mali mu uleele: «Nziaambi abele bangaa liwaa, ka nde li mu umweese bweese ba nde kwaa babakuluu\x + \xo 5.5 \xo*\xt Mts 3.34\xt*\x*.»
\p
\v 6 Ni mu buu, dikuluu ku tsini a koo kia Nziaambi kia lituu, paa nde anaangila beni mu taanga di nde akese. 
\v 7 Diyeelele minyoongo mia beni mioosi nha yulu a nde, mundaa ti nde li mu ukebe beni. 
\v 8 Disa mayele, na diba likanda! Mundaa ti, mutaata a beni, mukuutu a miheebili mimibi, li mu uyoowuungu weti kosi, mu usaa muutu wu nde ukaka na udia. 
\v 9 Ditemenene nde mu uhama mu imiini. Dilibili moonyi ti baana ba nguu ba beni, mu tsi yoosi, bali mu umono mapasi na beni. 
\v 10 Beni dikeni mu ubwamono pasi mu mwaana taanga hoolo. Ka Nziaambi waluulu mu bweese ba mupili mupili, ata beni mu ukaba buzitu ba bilimi na bilimi, mu itwaari na Yiisu Kristo. Nde makulu, sa akuusu beni na uhamisa beni. Nde sa abwatuungu beni nha yulu a bibwa biahama. 
\v 11 Kwaa nde ni lituu la bilimi na bilimi. Ameni!
\s Mabwee matsieelele
\p
\v 12 Silvani, wu me li mu uholo weti mwaana a nguu a me wa ngwanya, abaasila me mu usonuu beni mwaana mukaanda wu. Me yiliaangi buu, mu uhamisa beni na mu uta imbaangi ti, beni diayiluu unambata mu bweese ba Nziaambi ba ngwanya. 
\v 13 Libuundu lili nha Babilooni nha, li Nziaambi asoolo lili weti beni, itwaari na mwaana a me Malako, beheeri beni mabwee. 
\v 14 Dibihisini beni na beni mu ubumbusunu mu litoono, weti baana ba nguu mu iyeenge. Dinyaala iyeenge iba na beni boosi bali bangaa Kristo!