\id PHP - Ixil, Nebaj NT (ixi) -Guatemala 2010 (DBL -2013) \h FILIPENSES \toc1 U uꞌuj uvaꞌ itzꞌibꞌa bꞌen u Pablo te unqꞌa aa Filipos uvaꞌ ni niman u Jesús \toc2 Filipenses \toc3 Fil \mt1 U uꞌuj \mt2 uvaꞌ itzꞌibꞌa bꞌen u Pablo \mt1 te unqꞌa aa Filipos \mt2 uvaꞌ ni niman u Jesús \c 1 \s1 Ni taqꞌ bꞌen u Pablo itzii \p \v 1 Ineꞌ in Pablo tukꞌ u Timoteo uvaꞌ ikꞌam u Jesucristoeꞌ, as oꞌeꞌ uvaꞌ ni qꞌiilan bꞌen ex, jankꞌal ex uvaꞌ atoꞌk ex kꞌatz u Jesucristo tu u tenameꞌ Filipos, as ex unqꞌa iqꞌesal unqꞌa qitzꞌin qatzikeꞌ uvaꞌ niman tetz u Jesúseꞌ tukꞌ ex uvaꞌ ex lochonaal kꞌatz veqꞌesaleꞌ unpajte. \m \v 2 As aꞌ u Kubꞌaal Tiixheꞌ tukꞌ u Kubꞌaal Jesucristoeꞌ la aqꞌon vibꞌaꞌnileꞌ setiꞌ, tiꞌ uvaꞌ bꞌaꞌn etatin sevatzaj. \s1 Ni taqꞌ u Pablo taꞌntiixh tiꞌ unqꞌa niman tetz u Jesús \p \v 3 As tul ni vulsa ex sunkꞌuꞌl bꞌenameen, as ni vaqꞌ taꞌntiixh te u Tiixheꞌ setiꞌ. \m \v 4 As bꞌenameen chit nunnach Tiixh tukꞌ chiibꞌichil setiꞌ sekajayil, \m \v 5 tan neloch in tiꞌ ipaxsal u bꞌaꞌnla yoleꞌ tiꞌ u Cristo. As aꞌs exeꞌteꞌ tiꞌ elochat in tul kat enima u yoleꞌ uveꞌ kat val sete. As antel kuxh elochat in cheel tiꞌ ipaxsal u yoleꞌ. \m \v 6 As ootzimal svaꞌn uvaꞌ aꞌ u Tiixheꞌ kat xeꞌtisan u bꞌaꞌneꞌ tu vetaanxelaleꞌ. As yeꞌ la iyaꞌsa Aak ibꞌanataꞌ tu vetaanxelaleꞌ, tan la itzojpisa Aak ibꞌanat setiꞌ tu u qꞌiieꞌ uvaꞌ la ul u Jesucristo unpajte. \m \v 7 As aal chit bꞌaꞌneꞌ ni vitzꞌa uvaꞌ ech la ibꞌaneꞌ setiꞌ, tan xoꞌn chit ex sve. As neloch in tiꞌ unbꞌanat uveꞌ kat taqꞌ u Tiixheꞌ sve, kꞌuxh atoꞌk in tu u kaarsa tiꞌ unpaxsat u bꞌaꞌnla yoleꞌ tiꞌ u Cristoeꞌ, as moj at in vatz unqꞌa iqꞌesal unqꞌa tenameꞌ tiꞌ valat isuuchil uvaꞌ kam stiꞌ nunpaxsakat u bꞌaꞌnla yoleꞌ, as tiꞌ unkꞌuchataꞌ uvaꞌ jik chiteꞌ u yoleꞌ uveꞌ ni valeꞌ. \m \v 8 As ootzimal taꞌn u Tiixheꞌ uvaꞌ xoꞌn chit ex te u Jesúseꞌ. As echat nunbꞌaneꞌ tiꞌ unxoꞌnit ex unpajte. \m \v 9 As tul uvaꞌ nunnach Tiixh setiꞌ, as nunjaj te Aak uvaꞌ la yakꞌin u xoꞌniibꞌeꞌ sexoꞌl tiꞌ etootzitaꞌ uvaꞌ kam ni tokkat u xoꞌniibꞌeꞌ sevatzaj tukꞌ chit etaanxelal, \m \v 10 aqꞌal uvaꞌ ayaꞌl chit ekꞌuꞌl tiꞌ ebꞌanat u bꞌaꞌneꞌ. As yeꞌl umaj yol la chee setiꞌ tu u qꞌiieꞌ uvaꞌ la ul u Cristoeꞌ unpajte, tan jik chit etxumbꞌal kat ebꞌana. \m \v 11 As la toksa veꞌt unqꞌa tenameꞌ iqꞌii u Tiixheꞌ setaꞌn, tan tiꞌ uvaꞌ jik chit vetxumbꞌaleꞌ nebꞌan sevatzaj taꞌn vibꞌaꞌnil u Jesucristo. \s1 Vuntiichajileꞌ aꞌeꞌ u Cristoeꞌ \p \v 12 Vitzꞌin vatzik, nunsaꞌ uvaꞌ la etootzi uvaꞌ jankꞌal unqꞌa kꞌaxkꞌoeꞌ uvaꞌ kat unpalebꞌe, as kat txakoni tiꞌ uvaꞌ la inima unqꞌa tenameꞌ u bꞌaꞌnla yoleꞌ tiꞌ u Cristoeꞌ. \m \v 13 As ootzimal taꞌn unqꞌa soleꞌ uveꞌ ni xeeon in tzitzaꞌ tu u kaarsa as tukꞌ tu unqꞌa tenameꞌ uvaꞌ tiꞌ kuxh unpaxsat u bꞌaꞌnla yoleꞌ tiꞌ u Cristoeꞌ kat oksalkat in tu u kaarsaeꞌ. \m \v 14 As tul kat tabꞌi veꞌt unqꞌa qitzꞌin qatzikeꞌ uvaꞌ ni niman u Jesúseꞌ uvaꞌ kat oksal in tu u kaarsa, as nimal chajaak kat yakꞌin veꞌt taama. As yeꞌ nixoꞌv veꞌt chajaak tiꞌ ipaxsal u bꞌaꞌnla yoleꞌ xoꞌl unqꞌa tenameꞌ. \p \v 15 As at unqꞌa qitzꞌin qatzikeꞌ uvaꞌ ni alon isuuchil u bꞌaꞌnileꞌ uvaꞌ kat ibꞌan u Cristo sqiꞌ. Pet nichꞌoꞌn taama sviꞌ, tan aꞌ nisaꞌ chajnaj uvaꞌ la enima kam uvaꞌ ni tal sete. Pet ech koj unkaꞌt unqꞌa qitzꞌin qatzikeꞌ, tan jik chit itxumbꞌal tul ni tal isuuchil u bꞌaꞌnla yoleꞌ tiꞌ u Cristoeꞌ. \m \v 16 As xoꞌn chit in ste. As ootzimal staꞌn uvaꞌ kꞌujlu kan in taꞌn u Tiixheꞌ tiꞌ unkꞌuchat vatz unqꞌa tenameꞌ uvaꞌ jik chit ni val u bꞌaꞌnla yoleꞌ tiꞌ u Cristoeꞌ. \m \v 17 As unqꞌa qitzꞌin qatzikeꞌ uveꞌ nichꞌoꞌn taama sviꞌ, tan aꞌ ni titzꞌa chajnaj uvaꞌ la oksal iqꞌii chajnaj, tan yeꞌl itxumbꞌal chajnajeꞌ jik koj tul nipaxsa u bꞌaꞌnla yoleꞌ. As ni tal chajnaj uvaꞌ aal la itxumunsa in chajnaj tukꞌ vitxumbꞌaleꞌ, uvaꞌ ni taleꞌ tul uvaꞌ at in tu u kaarsaeꞌ. \m \v 18 Pet yeꞌ kuxh vetz stiꞌ kam uvaꞌ ni titzꞌa unqꞌa qitzꞌin qatzikeꞌ sviꞌ. As kꞌuxh tukꞌ chꞌoꞌnchil aama as moj bꞌaꞌn itxumbꞌal nibꞌaneꞌ sviꞌ, as taꞌn yoleꞌ uvaꞌ aꞌ u bꞌaꞌnla yoleꞌ ni tal chajnaj tiꞌ u Cristo. As nuntxuqꞌtxun veꞌt stiꞌ. As yeꞌ la yaꞌ in tiꞌ unchiibꞌ tiꞌ u bꞌaꞌnla yoleꞌ tiꞌ u Cristoeꞌ, \m \v 19 tan ootzimal svaꞌn uvaꞌ kam kuxh la unpalebꞌe, as bꞌaꞌn la ibꞌan sve, tan nenach Tiixh sviꞌ. As niloch in u Tiixhla Espíritueꞌ uvaꞌ kat taqꞌ tzan u Jesucristo sve. \m \v 20 As aꞌ ni tal vaama uvaꞌ kꞌuxh kam kuxh la unpalebꞌe, as yeꞌ la chꞌixvu veꞌt in vatz u Tiixheꞌ tiꞌ voksat iqꞌii Aak, tan kꞌujleꞌl unkꞌuꞌl kꞌuxh kam kuxh la unpalebꞌe, tan kꞌuxh la alpu unyatzꞌpeꞌ as moj la chajpul in, as yeꞌl in la xoꞌv in tiꞌ valat u bꞌaꞌnla yoleꞌ. \m \v 21 As tul uvaꞌ at untiichajil vatz u txꞌavaꞌeꞌ, as tiꞌ voksat iqꞌii u Cristo la atinkat in vatz u txꞌavaꞌeꞌ. Pet asoj la yatzꞌpu veꞌt in, as aal bꞌaꞌneꞌ la ibꞌan sve. \m \v 22 Pet asoj latel txakon in setiꞌ tiꞌ elochpeꞌ tul uvaꞌ attel in vatz u txꞌavaꞌeꞌ, as yeꞌ vootzaj abꞌiste tuk unsaꞌ unpalebꞌetaꞌ, \m \v 23 tan at veꞌt kuꞌ in xoꞌl kaꞌvaꞌl uvaꞌ at tzan sviꞌ. As ni tal vaama uvaꞌ la bꞌen veꞌt in. As la kam in tiꞌ vatin kꞌatz u Cristoeꞌ, tan bꞌaꞌneꞌ la atin in kꞌatz Aak. \m \v 24 Pet asoj latel txakon in setiꞌ, as aal bꞌaꞌneꞌ la ibꞌan sete uvaꞌ la atin in vatz u txꞌavaꞌeꞌ. \m \v 25 As kꞌujleꞌl veꞌt unkꞌuꞌl uvaꞌ bꞌaꞌn la bꞌen ibꞌan sete uvaꞌ la atin in vatz u txꞌavaꞌeꞌ, tan lochel ex la unbꞌan ex, aqꞌal uvaꞌ la etaqꞌ yakꞌil tiꞌ enimat u Jesúseꞌ. As la yakꞌin veꞌt u chiibꞌichileꞌ tu vetaanxelaleꞌ. \m \v 26 As tul la oon in sexoꞌl unpajte, as yeꞌ la yaꞌ ex tiꞌ etoksat iqꞌii u Jesucristoeꞌ tiꞌ u bꞌaꞌnileꞌ uvaꞌ la bꞌanchu sve. \p \v 27 As kꞌuxh abꞌiste kuxh veꞌt la unpalebꞌe, as ebꞌantaj unqꞌa jikla txumbꞌaleꞌ echeꞌ uvaꞌ ni tal u bꞌaꞌnla yoleꞌ tiꞌ u Jesucristoeꞌ. As kꞌuxh la oon in tiꞌ bꞌen vilat ex as moj yeꞌle, as aꞌ nunsaꞌ uvaꞌ la vabꞌi uvaꞌ vatzul kuxh etxumbꞌal sevatzaj tiꞌ eyaꞌlut etibꞌ tiꞌ enimat u bꞌaꞌnla yoleꞌ tiꞌ u Cristoeꞌ. \m \v 28 As yeꞌ la xoꞌv ex te unqꞌa uxhchileꞌ uveꞌ nichꞌoꞌn taama setiꞌ. Tii etaama la ebꞌaneꞌ, tan ech ikꞌuchateꞌ uvaꞌ la el iqꞌii unqꞌa uxhchileꞌ. Pet ech koj ex, tan la oksal eqꞌii, tan aꞌ u Tiixheꞌ la bꞌanon. \m \v 29 As aqꞌel veꞌteꞌ sete uvaꞌ la enima u Cristo. As jit kuxh tiꞌ ekꞌujbꞌaꞌt ekꞌuꞌl stiꞌ la enimakat. Pet tiꞌ epalebꞌet u kꞌaxkꞌoeꞌ unpajte echeꞌ uvaꞌ kat ibꞌan Aak, \m \v 30 tan unqꞌa kꞌaxkꞌoeꞌ uveꞌ nepalebꞌe taꞌn unqꞌa uxhchileꞌ uveꞌ nichꞌoꞌn taama setiꞌ, as eela tukꞌ unqꞌa kꞌaxkꞌoeꞌ uveꞌ kat etil unpalebꞌetaꞌ tul atik in sexoꞌl. As at sekꞌuꞌl uvaꞌ nitel unpalebꞌe u kꞌaxkꞌoeꞌ cheel. \c 2 \s1 Niyolon u Pablo tiꞌ tok iqꞌii u Cristo \p \v 1 As ootzimal svaꞌn, vitzꞌin vatzik, uvaꞌ niyakꞌin etaanxelal tan tiꞌ uvaꞌ atoꞌk ex kꞌatz u Cristoeꞌ. As nechiibꞌeꞌ, tan xoꞌn ex te Aak. As unvatzul kuxh vetxumbꞌaleꞌ tukꞌ u Tiixhla Espíritueꞌ. As nitxum tibꞌ evatz sevatzaj. \m \v 2 Estiꞌeꞌ nunjaj bꞌaꞌnil sete, tiꞌ uvaꞌ la eyakꞌinsa u chiibꞌichileꞌ tu u vaanxelaleꞌ. As eela koj chit eyoloneꞌ sevatzaj. As eela koj chit exoꞌnit etibꞌ sevatzaj. As unvatzul koj chit etxumbꞌal la ibꞌaneꞌ. \m \v 3 Yeꞌ la ebꞌan umaj txumbꞌal uvaꞌ la ok exoꞌl staꞌn. As yeꞌ la etoksa jeꞌ eqꞌii tiꞌ uvaꞌ kam la ebꞌaneꞌ. Pet tukꞌ mutxkin aamail la etoksa iqꞌii unqꞌa qitzꞌin qatzikeꞌ uvaꞌ at sexoꞌl, tan at itxumbꞌaleꞌ taꞌn u Cristoeꞌ. \m \v 4 As jit kuxh uveꞌ la ebꞌaneꞌ kam uvaꞌ bꞌaꞌn sete. Pet aꞌ la ebꞌaneꞌ kam uvaꞌ bꞌaꞌn te unqꞌa qitzꞌin qatzikeꞌ. \m \v 5 As ech vetxumbꞌaleꞌ la ibꞌaneꞌ echeꞌ vitxumbꞌal u Jesucristo uvaꞌ kat ibꞌana. \q1 \v 6 As tul Tiixh Aak. As yeꞌ kat ijeꞌsa tibꞌ Aak tiꞌ toksat iqꞌii \q1 tukꞌ u tijleꞌmeꞌ uvaꞌ Tiixh Aak. \q1 \v 7 Pet kat inima Aak uvaꞌ ech Aakeꞌ naj kat ibꞌana. \q1 As kat ok veꞌt Aak echeꞌ umaꞌl u kꞌam, \q1 tan ech veꞌt Aakeꞌ echeꞌ vatz txꞌavaꞌilla aama kat ibꞌana. \q1 \v 8 As tul echik veꞌt Aakeꞌ echeꞌ umaꞌl uxhchil, \q1 as yeꞌ kat ijeꞌsa tibꞌ Aak tiꞌ toksat iqꞌii. \q1 Pet niman yol Aak kat ibꞌana, techal kat yatzꞌpu veꞌt Aak vatz umaꞌl u kurus. \q1 \v 9 Estiꞌeꞌ nim kat toksakat u Tiixheꞌ iqꞌii Aak tiꞌ unqꞌa veeꞌ skajayil. \q1 As kat toksa u Tiixheꞌ iqꞌii vibꞌii u Jesús tiꞌ unqꞌa uxhchileꞌ skajayil, \q1 \v 10 kꞌuxh eyen tu almikaꞌ, moj vatz u txꞌavaꞌeꞌ, pet moj jaqꞌ u txꞌavaꞌeꞌ. \q1 Estiꞌeꞌ la qaaebꞌ veꞌt unqꞌa uxhchileꞌ skajayil vatz u Jesúseꞌ. \q1 \v 11 As la tal unqꞌa tenameꞌ uvaꞌ aꞌ u Jesucristo u Bꞌooqꞌoleꞌ. \q1 As ech toksat unqꞌa tenameꞌ iqꞌii u Tiixheꞌ. \s1 Ni taqꞌ u Pablo itxumbꞌal unqꞌa niman tetz u Jesús \p \v 12 As la val sete, vitzꞌin vatzik, ex uvaꞌ xoꞌn ex sve: Ech la ebꞌaneꞌ echeꞌ kat ibꞌan u Cristo. As kam enimat u Tiixheꞌ bꞌenameen uvaꞌ atik in sexoꞌl, as echat la ebꞌaneꞌ cheel, tan tiꞌ uvaꞌ nexoꞌva Aak. As kꞌuxh yeꞌl in sexoꞌl, as ayaꞌloj chit ekꞌuꞌl tiꞌ ebꞌanat u bꞌaꞌneꞌ, as tiꞌ ekꞌuchataꞌ uvaꞌ qꞌalpumal veꞌt ex taꞌn u Tiixheꞌ, \m \v 13 tan Aakeꞌ ni oksan xeꞌ etaama uvaꞌ la esaꞌ ebꞌanat u bꞌaꞌneꞌ. As Aakeꞌ la lochon ex tiꞌ ebꞌanataꞌ unpajte, aqꞌal uvaꞌ la ebꞌaneꞌ kam uvaꞌ nisaꞌ Aak setiꞌ. \p \v 14 As jankꞌal uvaꞌ la ebꞌaneꞌ, as yeꞌ la eyol veꞌteꞌ. As mitaꞌn tukꞌ yaaibꞌ la ebꞌankat, \m \v 15 aqꞌal uvaꞌ yeꞌl umaj vaꞌlexhla yol la alpu setiꞌ. As jik chit etxumbꞌal la ebꞌaneꞌ, tan ex veꞌt meꞌal ikꞌaol u Tiixh. As ech ekꞌuchat veꞌt u bꞌaꞌneꞌ vatz unqꞌa uxhchileꞌ uvaꞌ vaꞌlexh vitxumbꞌaleꞌ echeꞌ itxijun unqꞌa txꞌumileꞌ vatz u almikaꞌeꞌ. \m \v 16 As ebꞌantaj u bꞌaꞌneꞌ xoꞌl unqꞌa tenameꞌ tiꞌ ekꞌuchat u bꞌaꞌnla yoleꞌ uveꞌ ni aqꞌon etiichajil kꞌatz u Tiixheꞌ. Estiꞌeꞌ la chiibꞌ in setiꞌ tu u qꞌiieꞌ uvaꞌ la ul u Cristo unpajte, tan la ekꞌucheꞌ uvaꞌ yeꞌ kat el iqꞌii u vaqꞌoneꞌ uvaꞌ kat unbꞌan sexoꞌl. \m \v 17 As ootzimal svaꞌn uvaꞌ kꞌujleꞌl ekꞌuꞌl tiꞌ u Tiixheꞌ, as u aqꞌoneꞌ uveꞌ nebꞌan tiꞌ Aak, as eela tukꞌ umaj oy uveꞌ nebꞌan vatz Aak. Asoj la kam in tiꞌ valat viyol u Tiixheꞌ sete, as la txuqꞌtxun in setukꞌ sekajayil. As ech la ibꞌan vunkamebꞌaleꞌ echeꞌ nibꞌanchu tukꞌ u vino uvaꞌ ni peqꞌlikbꞌen tiꞌ u oyeꞌ uveꞌ ni toksal vatz u Tiixheꞌ taꞌn u nachol Tiixheꞌ. \m \v 18 As la chiibꞌ veꞌt ex, tan tiꞌ uvaꞌ ayaꞌl chit ekꞌuꞌl tiꞌ Aak. As la chiibꞌ veꞌt ex sviꞌ unpajte, tan ayaꞌl chit unkꞌuꞌl tiꞌ unnimat Aak. \s1 Nichaj bꞌen u Pablo u Timoteo tukꞌ u Epafrodito tu u Filipos \p \v 19 Asoj la ibꞌan u Kubꞌaal Jesucristo bꞌaꞌnil, as tuk unchaj bꞌen u qitzꞌin qatzikeꞌ u Timoteo tiꞌ bꞌen iyakꞌinsat ex, as tiꞌ tul iyakꞌinsat veꞌt in unpajte tul la vabꞌi yol setiꞌ. \m \v 20 As yeꞌl umaꞌtoj uxhchil sunkꞌatz uvaꞌ ech itxumbꞌaleꞌ echeꞌ u Timoteo, tan ni tok u Timoteo ilil setiꞌ. \m \v 21 Pet ech koj unjoltu unqꞌa uxhchileꞌ, tan aꞌ kuxh u tetzeꞌ ni titzꞌa. As nu koj titzꞌa setiꞌ echeꞌ uvaꞌ ni titzꞌa u Jesucristoeꞌ setiꞌ. \m \v 22 As ootzimaleꞌ setaꞌn uvaꞌ bꞌaꞌn itxumbꞌal u Timoteo nibꞌaneꞌ, tan niloch in tiꞌ ipaxsal u bꞌaꞌnla yoleꞌ tiꞌ u Cristo echeꞌ ilochat umaj kꞌaola ibꞌaal. \m \v 23 Estiꞌeꞌ ni valeꞌ uvaꞌ tuk unchaj bꞌen u Timoteo sexoꞌl. Pet lanal vileꞌ kam tuk elojkat in. \m \v 24 As kꞌujleꞌl unkꞌuꞌl tiꞌ u Kubꞌaaleꞌ uvaꞌ Aak tuk bꞌanon bꞌaꞌnil uvaꞌ yeꞌ la bꞌalaxtu veꞌt in tiꞌ bꞌen vilat ex unpajte. \p \v 25 Pet ni vitzꞌa uvaꞌ la unbꞌaxsa bꞌen u qitzꞌin qatzikeꞌ u Epafrodito sexoꞌl uvaꞌ ni lochon in tiꞌ talpu u bꞌaꞌnla yoleꞌ tiꞌ u Cristo xoꞌl unqꞌa tenameꞌ uveꞌ nichꞌoꞌn taama sqiꞌ, tan exeꞌ kat chajon tzan tiꞌ ul ilochat in tiꞌ uvaꞌ kam nisaꞌvit sviꞌ. \m \v 26 As nitxum ex u Epafrodito. As nitxumun veꞌt taama setiꞌ, tan ootzimal veꞌt staꞌn uvaꞌ kat etabꞌi uvaꞌ kat ipalebꞌe umaꞌl u chꞌoꞌm tzitzaꞌ. \m \v 27 As an chiteꞌ, tan kat ipalebꞌe u chꞌoꞌmeꞌ. As bꞌiit kuxh yeꞌ kat kami. As kat itxum u Tiixheꞌ ivatz. As kat itxum Aak unvatz, tiꞌ uvaꞌ yeꞌ la ul umaꞌt txumuꞌm sviꞌ unpajte. \m \v 28 Estiꞌeꞌ techal chit tuk unchaj veꞌt bꞌen u Epafrodito sexoꞌl, aqꞌal uvaꞌ la txuqꞌtxun ex tul la etil tooneꞌ. As yeꞌ la txumun veꞌt vaama setiꞌ, tan at sunkꞌuꞌl uvaꞌ la txuqꞌtxun veꞌt ex tul uvaꞌ la ooni. \m \v 29 As achaꞌv ekꞌulataꞌ tukꞌ chiibꞌichil, tan qitzꞌin qatzik qibꞌeꞌ stukꞌ kꞌatz u Tiixheꞌ. As la chit exoꞌni aak tukꞌ unkaꞌt unqꞌa qitzꞌin qatzikeꞌ uvaꞌ ech itxumbꞌaleꞌ echeꞌ aak, \m \v 30 tan tukꞌ kuxh unbꞌiite uvaꞌ yeꞌ kat kami tiꞌ ilochoneꞌ tiꞌ talpu u bꞌaꞌnla yoleꞌ tiꞌ u Cristo. As kat ipalebꞌe kꞌaxkꞌo tul kat echaj tzan tiꞌ ul ilochat in, tan yeꞌ kat uch etuleꞌ tiꞌ unlochpeꞌ. \c 3 \s1 Ni tal u Pablo uvaꞌ yeꞌl itxaꞌk uvaꞌ nik ibꞌan naꞌytzan \p \v 1 Vitzꞌin vatzik, chiibꞌojtaj ex tiꞌ u Kubꞌaal Jesús. As yeꞌxhkam niyan sve tiꞌ untzꞌibꞌat bꞌen unqꞌa yoleꞌ sete unpajte, tan la iloch ex tiꞌ ichee etxumbꞌal vatz unqꞌa uxhchileꞌ uvaꞌ nichꞌoꞌn taama setiꞌ. \m \v 2 As la etil etibꞌ vatz unqꞌa uxhchileꞌ uvaꞌ ech vitxumbꞌaleꞌ echeꞌ unqꞌa txꞌiꞌeꞌ, tan aꞌ kuxh u vaꞌlexheꞌ nibꞌaneꞌ tiꞌ talat sete uvaꞌ la tzokꞌax el unbꞌiil vechiꞌoleꞌ. \m \v 3 As oꞌeꞌ vitenam u Tiixheꞌ. As eela kuxh stukꞌ uvaꞌ tzokꞌel veꞌt el unbꞌiil u kuchiꞌoleꞌ taꞌn u Tiixhla Espíritueꞌ, tan aꞌ u Tiixhla Espíritueꞌ ni lochon oꞌ tiꞌ kunimat u Tiixheꞌ. As nu kuchiibꞌ veꞌteꞌ uvaꞌ at veꞌt ok oꞌ kꞌatz u Jesucristoeꞌ. As yeꞌ ni qoksa kuqꞌii tiꞌ umaj txumbꞌal uvaꞌ nu kubꞌan vatz u txꞌavaꞌeꞌ, tiꞌ qok jikla aamail vatz u Tiixheꞌ. \m \v 4 As kꞌuxh nik valeꞌ uvaꞌ bꞌaꞌn in vatz u Tiixheꞌ tiꞌ uveꞌ nik unbꞌaneꞌ, as jitꞌeꞌcheꞌ. Pet asoj at umaj uxhchil ni itzꞌan uvaꞌ bꞌaꞌn vatz u Tiixheꞌ tiꞌ uveꞌ nibꞌaneꞌ, as at paleꞌ vuntxumbꞌaleꞌ nik unbꞌaneꞌ tiꞌ uveꞌ nibꞌan u uxhchileꞌ, \m \v 5 tan kat tzokꞌax el unbꞌiil vunchiꞌoleꞌ tul kat ibꞌan vaaxil qꞌii vitzꞌebꞌeꞌ. As in tiaal Israel, tan in tiaal u Benjamín. As yeꞌl umaj uxhchil uvaꞌ jit tiaal Israel xoꞌl unqꞌa qꞌesla unbꞌaaleꞌ. As chusel vibꞌ sbꞌaꞌn tiꞌ unqꞌa yoleꞌ uvaꞌ tzꞌibꞌamal kan taꞌn u Moisés, tan inik fariseo. \m \v 6 As ayaꞌlik chit unkꞌuꞌl nik unxoꞌni u chusbꞌaleꞌ uvaꞌ alel kan taꞌn unqꞌa qꞌesla unbꞌaaleꞌ. Estiꞌeꞌ nik unlaqꞌbꞌa unqꞌa niman tetz u Jesús, tan vaꞌlexhik chit u chusbꞌaleꞌ sunvatz uvaꞌ nimamalik staꞌn uvaꞌ nik valeꞌ. As nik unnima u tzaqꞌiteꞌ uvaꞌ tal kan u Moisés, tan aꞌeꞌ la oksan in jikla aamail vatz u Tiixheꞌ uvaꞌ nik valeꞌ. \m \v 7 As jankꞌal unqꞌa txumbꞌaleꞌ uvaꞌ nik unbꞌan naꞌytzan uvaꞌ nik oksan in jikla aamail vatz u Tiixheꞌ uvaꞌ nik valeꞌ, as cheel yeꞌl veꞌt itxaꞌk sunvatz, tan kat vootzi veꞌt u Cristoeꞌ. \m \v 8 As yeꞌl itxaꞌk sunvatz jankꞌal unqꞌa txumbꞌaleꞌ uvaꞌ nik unbꞌan naꞌytzan, tan yeꞌ la lejon tiꞌ uveꞌ kat vootzi u Kubꞌaal Jesucristoeꞌ. As tiꞌ uvaꞌ tan kat vootzi veꞌt Aak, as estiꞌeꞌ uvaꞌ kat vaqꞌ veꞌt kan unqꞌa txumbꞌaleꞌ uvaꞌ nik unbꞌaneꞌ. As ni vitzꞌa veꞌteꞌ uvaꞌ ech unqꞌa txumbꞌaleꞌ uvaꞌ nik unbꞌaneꞌ echeꞌ chꞌis sunvatz, aqꞌal uvaꞌ la yakꞌin veꞌt in kꞌatz u Cristoeꞌ. \m \v 9 As ni valeꞌ uvaꞌ la ootzil in uvaꞌ at veꞌt ok in kꞌatz Aak. As jit aꞌ ni valeꞌ uvaꞌ kat ok in jikla aamail tiꞌ unnimat u tzaqꞌiteꞌ uvaꞌ tzꞌibꞌamal kan taꞌn u Moisés. Pet tiꞌ u Cristo uvaꞌ kꞌujleꞌl chit unkꞌuꞌl stiꞌ, as estiꞌeꞌ kat okkat in jikla aamail uvaꞌ kat taqꞌ u Tiixheꞌ sqe. As tan tiꞌ uvaꞌ jik chit inimat u Cristo viyol u Tiixheꞌ skajayil. \m \v 10 As kat vaqꞌlu veꞌt kan unqꞌa txumbꞌaleꞌ uvaꞌ nik unbꞌan bꞌaxa, tiꞌ uvaꞌ la yakꞌin veꞌt in kꞌatz u Cristoeꞌ. As la yakꞌin veꞌt viyakꞌil u Tiixheꞌ sunkꞌatz uvaꞌ kat ulsan taama u Cristoeꞌ. As la unpalebꞌe u kꞌaxkꞌoeꞌ echeꞌ uvaꞌ kat ibꞌan Aak. As la vaqꞌ vibꞌ kamoj tiꞌ voksat iqꞌii u Cristoeꞌ echeꞌ uvaꞌ kat ibꞌan Aak sqiꞌ, tul kat kam Aak. \m \v 11 As kꞌujleꞌl unkꞌuꞌl tiꞌ uvaꞌ tul la kam in, as la tulsa u Tiixheꞌ vaama unpajte. \p \v 12 As jit aꞌ ni valeꞌ uvaꞌ kat olebꞌyu veꞌt in tiꞌ unlejat vitxumbꞌal u Cristoeꞌ. Pet yeꞌl in oonoj in tiꞌ uvaꞌ kam nisaꞌ Aak sviꞌ. As ni vaqꞌ yakꞌil tiꞌ unbꞌanataꞌ, tan estiꞌeꞌ kat imolokat in Aak. \m \v 13 Vitzꞌin vatzik, yeꞌxhkam ni valeꞌ uvaꞌ kat olebꞌyu veꞌt in. Pet aꞌ kuxh nunbꞌaneꞌ, tan nunsotzsa unqꞌa veeꞌ sunkꞌuꞌl uvaꞌ kat palyak kan. As nunyaꞌlu vibꞌ tiꞌ voon tu uvaꞌ kꞌajelkat svaꞌn, \m \v 14 tan nunkꞌaj vibꞌ tiꞌ vooneꞌ tu uvaꞌ ni valkat vooneꞌ, tan kat imolo in u Tiixheꞌ tiꞌ uvaꞌ la unlej vitxumbꞌal u Jesucristo, tan at veꞌt ok in kꞌatz Aak. As aꞌ la atinkat in kꞌatz Aak. \m \v 15 Estiꞌeꞌ ni val sete uvaꞌ jankꞌal oꞌ uvaꞌ at veꞌt kutxumbꞌal taꞌn u Tiixheꞌ, as unvatzul kuxh koj kutxumbꞌal tiꞌ kulejat vitxumbꞌal u Cristo. Pet asoj vaꞌlen txumbꞌal netitzꞌa veꞌteꞌ, as aꞌ u Tiixheꞌ la kꞌuchun veꞌt isuuchil sete. \m \v 16 As palojtaj oꞌ stuul, tan techal la kunima jankꞌal uvaꞌ ootzimal veꞌt sqaꞌn taꞌn u Tiixheꞌ. \p \v 17 Vitzꞌin vatzik, ebꞌantaj echeꞌ uvaꞌ nunbꞌaneꞌ. As eteesataj etexhlal tiꞌ kaꞌt unqꞌa qitzꞌin qatzikeꞌ uvaꞌ ni teesa texhlal sviꞌ. \m \v 18 As jatpajux kuxh val sete uvaꞌ nimal unqꞌa uxhchileꞌ ati uvaꞌ tukꞌ vitxumbꞌaleꞌ ni teesakat iqꞌii u chusbꞌaleꞌ uvaꞌ nimamal sqaꞌn tiꞌ uvaꞌ kat kam u Cristoeꞌ vatz u kuruseꞌ as tiꞌ toksat oꞌ Aak jikla aamail. As tukꞌ oqꞌel tuk val sete unpajte: \m \v 19 Tan aꞌ kuxh ni toksakat taama tiꞌ ibꞌanataꞌ kam uvaꞌ ni tachva vichiꞌoleꞌ. As ni toksa jeꞌ iqꞌii tiꞌ ibꞌanat unqꞌa veeꞌ uvaꞌ chꞌixubꞌal chittuꞌ. Pet alel veꞌt kan stiꞌ uvaꞌ la bꞌen tu u kꞌaxkꞌoeꞌ, tan aꞌ kuxh unqꞌa vatz txꞌavaꞌilla txumbꞌaleꞌ ni titzꞌa. \m \v 20 Pet ech koj oꞌ, tan echen veꞌt u qatinbꞌaleꞌ tu almikaꞌ uvaꞌ la elkat chꞌuꞌl u qꞌalpun qetzeꞌ uvaꞌ nu kutxꞌebꞌ tul unpajte. As aꞌeꞌ u Kubꞌaal Jesucristo. \m \v 21 As Aakeꞌ la jalpun u kuchiꞌoleꞌ uvaꞌ tetz kuxh u vatz txꞌavaꞌeꞌ, aqꞌal uvaꞌ ech veꞌt u kuchiꞌoleꞌ echeꞌ vichiꞌol Aakeꞌ uvaꞌ kat ok iqꞌii tul kat ul taama Aak unpajte. As viyakꞌil Aakeꞌ la ibꞌanbꞌe tiꞌ ijalpul u kuchiꞌoleꞌ echeꞌ nibꞌan Aak tiꞌ tilat isuuchil unqꞌa veeꞌ skajayil. \c 4 \s1 Ni tal u Pablo uvaꞌ la chiibꞌ unqꞌa niman tetz u Jesús \p \v 1 Vitzꞌin vatzik, xoꞌn ex sve. As nunsaꞌ vilat ex. Nuntxuqꞌtxun setiꞌ. As tiꞌ u aqꞌoneꞌ uvaꞌ kat unbꞌan sexoꞌl la aqꞌpukat vuntxꞌajaꞌmeꞌ. Tan tiꞌ uvaꞌ unvatzul veꞌt u kutxumbꞌaleꞌ la kubꞌaneꞌ tiꞌ kulejat vitxumbꞌal u Jesucristo, as yeꞌ la eyaꞌsa enimat u Kubꞌaal Jesús. \p \v 2 As la val te u Evodia tukꞌ te u Síntique uvaꞌ unvatzuloj chit vitxumbꞌal chaꞌmaeꞌ svatzaj la ibꞌaneꞌ, tan at veꞌt ok chaꞌma kꞌatz u Kubꞌaal Jesús. \m \v 3 As tuk unjaj bꞌaꞌnil see, axh uvaꞌ axh unmool uvaꞌ kꞌujleꞌl chit unkꞌuꞌl seeꞌ, tiꞌ uvaꞌ laloch chaꞌma tiꞌ iyaꞌsat chaꞌma u yaaibꞌeꞌ, tan bꞌaxa ayaꞌl chit ikꞌuꞌl chaꞌma kat iloch in tiꞌ ipaxsal u bꞌaꞌnla yoleꞌ, echeꞌ kat ibꞌan u Clemente tukꞌ kaꞌt unqꞌa qitzꞌin qatzikeꞌ uvaꞌ kat lochon in. As tzꞌibꞌamal veꞌt vibꞌiieꞌ tu uꞌujeꞌ uveꞌ tetz u tiichajileꞌ kꞌatz u Tiixheꞌ. \p \v 4 Txuqꞌtxunoj ex sevatzaj bꞌenameen, tan at veꞌt ok ex kꞌatz u Kubꞌaal Jesucristo. As la val unpajte: Txuqꞌtxunoj ex sevatzaj. \m \v 5 As ex bꞌaꞌnla aama la ibꞌan vatz unqꞌa tenameꞌ skajayil, tan txantu kuxh tul veꞌt u Kubꞌaal Jesús unpajte. \m \v 6 As yeꞌ kuxh exaansa etaama. As kꞌuxh kam kuxh la epalebꞌe, as enachtaj Tiixh tiꞌ ejajat bꞌaꞌnil te Aak. As la etaqꞌ taꞌntiixh te Aak unpajte. \m \v 7 As aꞌ u Tiixheꞌ la aqꞌon sete tiꞌ uvaꞌ bꞌaꞌn etatineꞌ sevatzaj, as at pal u bꞌaꞌnileꞌ uveꞌ nibꞌan Aak sete tiꞌ vitxumbꞌal unqꞌa uxhchileꞌ. As Aakeꞌ ni lochon vetaanxelaleꞌ tukꞌ vetxumbꞌaleꞌ, tan at veꞌt ok ex kꞌatz u Jesucristoeꞌ. \s1 La titzꞌa unqꞌa niman tetz u Jesús u bꞌaꞌn \p \v 8 Vitzꞌin vatzik, tuk untzojpisa veꞌt unqꞌa yoleꞌ uvaꞌ nuntzꞌibꞌa bꞌen sete. As tuk val sete, etitzꞌataj as enimataj unqꞌa txumbꞌaleꞌ uvaꞌ jik chittuꞌ. As ebꞌantaj u bꞌaꞌnla aamaileꞌ vatz unqꞌa uxhchileꞌ. As jankꞌal unqꞌa jikla txumbꞌaleꞌ uvaꞌ yeꞌl paav nichee stiꞌ, tukꞌ unqꞌa txumbꞌaleꞌ uvaꞌ bꞌaꞌn ni talpu stiꞌ, tukꞌ unqꞌa txumbꞌaleꞌ uvaꞌ bꞌaꞌn te u Tiixheꞌ, as tukꞌ unqꞌa txumbꞌaleꞌ uvaꞌ achaꞌv vatz unqꞌa tenameꞌ, as aꞌeꞌ la etitzꞌa. As la enima. \m \v 9 As ebꞌantaj jankꞌal unqꞌa uvaꞌ kat unchus sete, as ebꞌantaj u bꞌaꞌneꞌ echeꞌ uveꞌ kat etil sviꞌ. Asoj ech la ebꞌaneꞌ, as Aakeꞌ la atin sexoꞌl tiꞌ taqꞌat Aak sete tiꞌ uvaꞌ bꞌaꞌn etatin sevatzaj. \s1 Ni taqꞌ u Pablo taꞌntiixh tiꞌ u lochbꞌaleꞌ uvaꞌ kat aqꞌax ste \p \v 10 As nuntxuqꞌtxuneꞌ. As ni vaqꞌ taꞌntiixh te u Kubꞌaal Jesúseꞌ setiꞌ, tan kat etitzꞌa veꞌt in unpajte tiꞌ unlochpeꞌ. As kꞌuxh nik esaꞌ elochat in uvaꞌ bꞌaxa, as yeꞌ nik tucheꞌ. \m \v 11 As jit tiꞌ uvaꞌ nisaꞌvit lochbꞌal sviꞌ ni valkat u yoleꞌ sete. Pet kꞌuxh kam kuxh nunpalebꞌe, as chiannallu chit veꞌteꞌ sve tiꞌ u vatineꞌ. \m \v 12 As kꞌuxh at vetz, as kꞌuxh yeꞌl vetz ati; as kꞌuxh la txꞌaꞌn in sbꞌaꞌn, as kꞌuxh la unkuy unvaꞌy; as chiannallu chit veꞌt sve kam nunbꞌaneꞌ. As kꞌuxh nimal vetz ati, as moj yeꞌl vetz ati; as eela kuxh ni taqꞌ sve, tan chiannallu chit sve tiꞌ u vatineꞌ. \m \v 13 As kajayil kuxh la untxꞌoleꞌ tukꞌ vibꞌaꞌnil u Cristo uvaꞌ ni yakꞌinsan u vaanxelaleꞌ. \p \v 14 As kꞌuxh yeꞌ nisaꞌvit lochbꞌal sviꞌ uvaꞌ ni valeꞌ, as bꞌaꞌn kat ebꞌan sve tiꞌ unlochpeꞌ, tul nunpalebꞌe unqꞌa kꞌaxkꞌoeꞌ. \m \v 15 As ootzimal setaꞌn, vitzꞌin vatzik, ex aa Filipos, uvaꞌ yeꞌ kat iloch in unjoltu unqꞌa qitzꞌin qatzikeꞌ tu unqꞌa tenameꞌ, tul kat el veꞌt in tu u Macedonia as tul uvaꞌ kat unpaxsa veꞌt u bꞌaꞌnla yoleꞌ sexoꞌl bꞌaxa. Pet ex kuxheꞌ kat lochon in tiꞌ uvaꞌ kam nik isaꞌvit sviꞌ. \m \v 16 As tul atiktel in tu u Tesalónica, as jatpajul kuxh kat eloch in vatz unqꞌa veeꞌ kam nik isaꞌvit sviꞌ. \m \v 17 As jit tiꞌ uvaꞌ la etaqꞌ umaꞌtoj lochbꞌal sve ni valkat u yoleꞌ tiꞌ u lochbꞌaleꞌ. Pet aꞌ ni valeꞌ uvaꞌ la taqꞌ u Tiixheꞌ etxꞌajaꞌm tiꞌ u bꞌaꞌnileꞌ uveꞌ nebꞌan sve. \m \v 18 As nim u lochbꞌaleꞌ uvaꞌ kat etaqꞌ tzan sve tiꞌ u Epafrodito. As yeꞌxhkam nisaꞌvit veꞌt sviꞌ cheel. Pet atiltele. As ech velochbꞌaleꞌ echeꞌ umaj txꞌumtxꞌulla tzꞌakabꞌal uvaꞌ la oksal vatz u Tiixheꞌ, tan nichiibꞌ Aak tiꞌ uveꞌ nebꞌaneꞌ. \m \v 19 As aꞌ u Tiixheꞌ la aqꞌon sete kam uvaꞌ nisaꞌvit setiꞌ. As yeꞌ la iyaꞌsa Aak ilochat ex, tan nimal unqꞌa bꞌaꞌnileꞌ at xeꞌ u Jesucristoeꞌ. \m \v 20 As qoksataj iqꞌii u Tiixheꞌ setukꞌ tiꞌ chit ibꞌeneꞌ. Ech la ibꞌaneꞌ. An chiteꞌ. \s1 Nitzojpu veꞌt iyolon u Pablo te unqꞌa aa Filipos \p \v 21 As la etal untzii te unqꞌa qitzꞌin qatzikeꞌ skajayil uvaꞌ ni niman u Jesucristo. As unqꞌa qitzꞌin qatzikeꞌ uvaꞌ at sunkꞌatz, as ni taqꞌ bꞌen itzii sete unpajte. \m \v 22 As ni taqꞌ bꞌen unqꞌa qitzꞌin qatzikeꞌ skajayil itzii sete, as tukꞌ unqꞌa qitzꞌin qatzikeꞌ uvaꞌ ni taqꞌonvu tu vikabꞌal u ijlenaaleꞌ. \p \v 23 As aꞌ vibꞌaꞌnil u Kubꞌaal Jesucristo la atin sekꞌatz sekajayil. An chiteꞌ.