\id TIT - Sepik Iwam NT [iws] -Papua New Guinea 1989 (DBL 2014) 
\h Taitas 
\toc1 TAITAS 
\toc2 Taitas 
\toc3 Ta 
\mt1 TAITAS  
\ip Pol siya ta yokwowa Pasta Taitas siiram wɨnkika yɨpɨkɨn iikamɨm naɨngwo tɨbmiiyɨm mhɨuisɨm whɨrɨn Krit nɨkɨuwiyɨn solwara whɨii idopwoniya nɨdwomaiyɨn siir hɨranɨm sɨmiir kɨgrɨraowɨn. Taitas siya Juda inkam tani, siya Grik inkamkɨn. Bɨiya Pol Taitas sowa ɨrɨpar mɨriigo Jisɨs siir yaiwɨn kɨbiya saiir boɨnmɨmauuwa sowar namswoko mhɨugrɨbsɨm whɨrɨn Krit nɨkɨuwiyɨn solwara whɨi idopwoniya nɨdwomaiyɨn siir hɨriirɨn mɨ Pol siya siirɨn hɨr haiburgig iikamɨm naɨngwo tɨbmiiyɨm hɨranɨm sɨmiir kɨgrɨraowɨm. Mhoɨiya Pol siya ta yokwowa ha wɨnkiya Taitas siiram siir boɨnmauu wakaekiyam siyɨuɨn iikamɨm naɨngwo tɨbmiiyɨm sɨmiir kɨgrɨraowiyɨn. Ɨriig.  
\c 1  
\p
\v 1 Kara Polkɨn, ta yokwowa kara wɨnkika. Kara Adi Komii krɨmiir Wanɨn siir mɨiyan inkamkɨn mɨ ɨriipɨ hɨriinan kara Jisɨs Krais siir aposel inkamkɨn mɨ siyakɨsiyar nɨkropkikɨn kariirɨn, Adi Komii siirgɨsiir iikamɨm yɨpɨkɨ siya nɨmbinɨm sɨmiir naɨngwo tɨbmii aiir kiyɨrimdiyɨukikɨnɨm mɨ ta hɨriinan saiirsika mɨ yɨpɨkɨm siya nɨmbinɨm Adi Komii siirgɨsiirɨm naɨngwo tɨbmii kɨɨnɨm sɨmiirɨm.  
\v 2 Mɨ sɨma Adi Komii siir siyɨumwokɨsiyɨumwo ɨmiir nɨnoknɨnkɨni mɨ ta hɨriinan saiirsika mɨ sɨma wa nɨnoknɨnkɨni sɨmiir kwoɨn ɨmiirɨn sɨma wɨ omwaiya waiyayokiyokɨi, ɨiya Adi Komii siya tɨ nu ɨiirar nonkwokwokiyɨn siya krɨmiirɨn saiirar nɨmbingɨn tɨ dimɨn ɨiirɨmɨn. Krɨma ɨna nɨnoknɨnkɨnɨm Adi Komii siya bɨ nɨksɨsaeikɨn, dimɨn taemɨnɨm siyar boɨniyɨm pɨ kaimwokɨnar nwowi.  
\v 3 Mɨ ɨiya siya nɨmbina siya siir yaiya saiir bwamkɨbwamɨn siir tɨrkikɨn kwoɨnbudɨn hɨriiyar nwoyokiyokɨikaeyamiyɨn siir nanaaknɨnki haigɨnɨugɨn kariirsi. Mɨ Adi Komiiyɨn krɨmiir nanmaiwarkainan inkamɨn kariirɨn siya nɨmbingɨn siir yaiyɨm ɨkɨ iikamɨm sɨmiir boɨnmɨmauuɨm.   
\p
\v 4 Taitas, ta yokwowa kara kɨriiram wɨnkika. Tɨ dimɨn taemɨnɨm Adi Komii siirɨm krɨra wakaeyokna apiyɨm mɨ ta hɨriinan saiirsika, kara kɨriirɨn kariir yɨnisɨm asi nɨkɨuwi. Kara hɨnɨɨna naɨngwowi krɨriir Adi Komiiyɨn mɨ Jisɨs Krais inkamɨn iikam krɨmiir nanmaiwarkainaeiyɨn sowa naɨngwobumbu mɨ nongwomamaɨrni siyɨuɨn wɨ kɨriir hauuwi.   
\s1 Taitas siir mɨiya nu Krit siya mɨriiya  
\p
\v 5 Mɨ ɨiya kara warɨ mhɨuisɨmɨn Krit whɨi solwara bopwoniya waraur dɨdwomaiyɨn siir haiburgigɨn mɨ mɨiyɨm iikamɨm naɨngwo tɨbmiiyɨm sɨmaka mɨriiyamɨn ɨni hɨriiyar ikɨ okiyɨm. Mɨ kara kɨriirɨm niyopnɨsugikɨn tɨ dimɨn ɨmiirɨn kɨra sɨbgu whɨndirɨraerar haigɨnɨuwɨm. Mɨ ɨriipɨ hɨriinan kɨra kam nhɨrmi tɨ okmwɨn okwo haigɨnɨu wara iikamɨm yɨpɨkɨ Adi Komii siir inɨg ɨiir hangiriyɨu hainaniyɨm warɨ om ɨmiir nwowɨm sɨmiir kɨgrɨraowam.  
\v 6 Tɨ bɨiyan kamɨm bɨiya sɨma siyɨu biyɨe tɨr karamae nwowɨm mɨ tariinan ɨriipɨ hɨriinan mɨ sɨma wigɨm ɨrara ɨrara donkwona mɨ sɨmiir yɨnisɨsɨmɨm Krais siir yai ɨmiir wakaeyokna ap mɨ ta hɨriinan saiirsika iikam nhɨrɨm sɨma wɨ dimɨn biyɨe whɨr hansɨryɨskai rani sɨmiirɨn mɨ wɨ ha boɨn tani, sɨmiir yɨnisɨsɨm sɨma siyɨu biyɨeyar tɨrikɨm mɨ sɨmiir kwoɨnaɨrgar prɨinaɨngwo apdirɨraerarikɨm mɨ sɨma sɨmiir yopii admi yaimɨn dimɨn ɨmiir bɨ wakaeyoknaeikɨm. Mɨ sɨma ta saiir hɨriinan kɨpi nwo.  
\v 7 Mɨ inkamɨn Adi Komii siir dimɨn taemɨnɨm sɨmiir kɨgrɨraowan bɨi nwowi mɨ siya bɨiya siyɨu mɨiyɨk ɨmiir tɨrkɨn mɨ ɨni tariinanar yadɨgniyɨn. Siya nantamyɨryɨran inkam kɨpi nwo siya kwoɨn haugɨhauga whiyɨesauan inkam kɨpi nwo, siya op wain kɨrɨe kɨrɨeyɨm sɨmiirɨn hɨriihɨrii kɨpi mɨ kwiyae mɨ siya yaii nɨniinansaowan inkam kɨpi nwo, siya umɨr haiyarama kɨpi naɨngwo ta hɨriinana saiirsika siya wɨ siyɨu biyɨe asi tɨri. Nɨɨngakɨɨnga.  
\v 8 Mɨ siya iikamɨm nu maeyau nhɨrankɨm nɨtɨm yɨpɨkɨ siyɨu mɨiyɨk ɨmiir wakaeyokna apɨm naɨngwowɨm sɨmiir whɨndirɨraerar haigɨnɨugɨm mɨ siya, siya siya kɨgrɨraonaei mɨ ta hɨriinan saiirsika siya wɨ Adi Komii siir yai ɨmiirar nwokɨ wakaeyokna apɨm mɨ siya siir kwoɨn ɨiirar sɨbgu kɨntɨmdɨnuna mɨ siya wɨ wadɨe nwokɨ owɨm.  
\v 9 Siya sɨbgu donkworɨnukrɨpkai yai mɨiyɨk mɨiyɨkɨm bɨiya krɨma nɨisiimauuwɨm sɨmiir mɨ ta hɨriinan saiirsika siya iikamɨm sɨmiirɨn tɨ yai kɨbi kɨbiyɨm sɨmiir nwokɨ owɨmwarkaiyɨuwɨm mɨ sɨmiir whɨnkɨnsiis haigɨnɨu mɨ siya iikamɨm yɨpɨkɨ tɨ yai mɨiyɨk ɨmiir nap karam nwowɨm sɨmiir kwoɨn ɨmiir kiyai mɨ ta hɨriinan saiirsika sɨma wa nɨnoknɨnkɨnɨm dimɨn biyɨe sɨma tɨrɨm. Ɨriig.   
\p
\v 10 Siya tɨ dimɨn ɨmiirar tɨr. Dimusi rani, iikam whɨekakɨm sɨma pɨ boriisopi Adi Komii siir yai aiir wakaeyɨm. Sɨma yaiyɨm yaimwoni boɨn karamae nwowiyɨm sɨmiirarar boɨnikɨm mɨ iikamɨm sɨmiirɨn pɨ sɨmar mɨ ɨksɨsaei. Mɨ tɨ iikamɨm nɨksɨsaeiyɨm yɨm tɨ sɨma tɨ hɨnɨɨna boɨniyɨm, kɨma kɨmiir mɨoɨs ɨmiir kɨtiyopnɨr hai mɨ ta hɨriinan saiirsika kɨma wɨ Adi Komii siirar nwokɨ sɨbgu wakaeyokna apɨm.  
\v 11 Kɨra mɨ bɨiyan kam ɨkɨm waraur nwowɨm kɨma sɨmiir dɨkɨdu sɨma hɨriinan dimɨn bibiyɨeyɨm sɨmiir kɨpi nomboboɨn. Tɨ kamɨm sɨma yai bibiyɨe ɨmiirar boɨnikɨm iikam ɨmiir nɨksɨsaeyɨm. Sɨma iikamɨm sɨmiir kwoɨn ɨmiir kiyaiyam mɨ iikam nhɨrɨm om nhɨranɨm sɨmiir kwoɨn ɨmiir warar mɨ kiyaiigɨm mɨ sɨmiirar mɨ onkwobumbunɨnkɨn haigɨnɨuwigɨm. Sɨma yai biyɨe ɨmiirar boɨnikɨm mɨ tɨ dimɨn ɨmiirar tɨrikɨm mɨ ta hɨriinan saiirsika sɨma wɨ umɨr nwokɨ haiyɨm iikam nhɨrɨm sɨmiir maeyau hɨrankɨn.  
\v 12 Bɨiyan kamɨm sɨmiir nwɨrɨn om Krit hɨranɨn yɨpɨkɨ kwoɨn mɨiyɨk sɨma nwowiyɨn, siyakɨsiyar boɨnɨnkɨikiikɨn mɨ siya ɨna boɨnɨn. Krit hɨran kamɨm sɨma nɨksɨsaeyakɨ waiwiigɨm ɨinokɨinokɨn, sɨmiir kwoɨnɨm mɨiyɨk rani mɨ siyɨu bibiyɨeyɨm sɨma tɨriyɨm ɨni siyɨuɨm niimauan wraisuɨm sɨma dirɨraerariyɨm ɨni sɨmiir hɨriinan ywowɨm. Sɨma nhakɨu kɨrɨekɨm mɨ naeyarar naeikɨm.  
\v 13 Tɨ yaiyɨm tɨ inkamɨn siya boɨnkiyɨm kaimwokɨmaɨrgɨm kɨra sɨmiir dɨkwao boɨn mɨ sɨma wɨ siir yai ɨmiir nwokɨ sɨbgu wakaeyokna aɨngwo tɨbmii apɨm.  
\v 14 Mɨ ta hɨriinan saiirsika sɨma wɨ Judami iikam sɨmiir wanmi siyɨuɨm sɨmiir wakaeyokna ap rani mɨ ɨriipa hɨriinan sɨma wɨ iikamɨm yɨpɨkɨ Adi Komii siir siyɨu ɨmiir haimriiyɨugigɨm sɨma wɨ sɨmiir siyɨu ɨmiir nap tani.  
\v 15 Iikam nhɨrɨm sɨmiir kwoɨnɨm dimɨn whɨrkɨ kɨmbu karamae nwowɨm yɨm sɨma hɨnɨɨna boɨni tɨ dimɨn taemɨn whɨekakɨm dimɨn whɨrkɨ bɨ kɨmbu mɨmɨnkɨm mɨ sɨmiirɨn kɨpi haiya mɨ iikamɨm yɨpɨkɨ Jisɨs Krais siiram naɨngwo tɨbmii karamae nwowɨm mɨ yɨpɨkɨ iikamkɨm sɨmiir kwoɨnɨm nɨnaɨngwoyɨmiyokɨm mɨ kiprɨdkikaiyɨm mɨ biyɨe ha nwowɨm mɨ kwoɨn biyɨe ha naɨngwowi, sɨma hɨnɨɨna boɨni dimɨn whɨrkɨ wadɨe bɨ swokɨ omɨmɨnkɨn. Dimusi rani, sɨmiir kwoɨnɨn mɨiyɨk rani.  
\v 16 Sɨma hɨnɨɨna boɨnikɨm sɨma Adi Komii siir yai ɨmiirar wakaeyokna apikɨm mɨ tɨ dimɨnɨm sɨma tɨriiyɨm krɨmiirɨn sɨma nɨisiimauuwi sɨma siir yai ɨmiir wakaeyokna ap rani. Sɨma Adi Komii krɨmiir Wanɨn siir yai ɨmiir bɨ swokɨ wakaeyokna apikɨm mɨ Adi Komii siir whwonkam ɨdan sɨma ɨni biyɨekɨbiyɨe ywowɨm mɨ sɨma wɨ dimɨn mɨiyɨksɨm whɨr swokɨ tɨrmɨmɨn tani. Nɨɨngakɨɨnga. Ɨriig.   
\c 2  
\s1 Mɨ kɨra yai mɨiyɨkmɨiyɨk ɨmiirara wakaeyokna ap  
\p
\v 1 Taitas kɨra iikamɨm ɨinokɨinokɨn dimɨn taemɨnɨm yɨpɨkɨ iikamɨm Adi Komii krɨmiir Wanɨn siirɨm naɨngwo tɨbmiiyɨm, sɨma naɨngwo tɨbmiiyɨm sɨmiirɨn, siyɨumwokɨsiyɨumwowɨm sɨmiirgɨsɨmiirara sɨbgu omwomwarkaiyɨu.  
\v 2 Mɨ kɨra kamɨm waipɨu nwowɨm sɨmiirɨn hɨnɨɨna boɨnmauu, sɨma op kɨrɨe kɨrɨeyɨm kwiyae whaowaeiyɨm sɨmiir kɨpi kwiyae. Mɨ sɨma sɨmiir kwoɨnɨm sɨbgu kɨntɨmdɨnu mɨ sɨma Adi Komii siirɨm daɨngwo tɨbmii kɨɨn ɨski. Mɨ sɨma iikam nhɨrmiyam ha timɨ aɨngwokwonanae mɨ iikam nhɨrkɨm sɨma dimɨn biyɨe tɨr haigɨnɨuwi sɨmiirɨn mɨ yɨm sɨma ha donkworɨnukrɨpkai sɨmiir naɨngwo tɨbmii aiirɨn.  
\v 3 Mɨ kɨra wigɨm waipɨu nwowɨm sɨmiirɨn sɨbgu boɨnmɨmauu, dimɨn taemɨnɨm sɨma tɨriiyɨm ɨkɨ wigɨm yɨpɨkɨm Adi Komii siir yai aiir wakaeyokna apiyɨm sɨmiir hɨriinan mɨriiyɨm. Mɨ sɨma hɨnda tɨnda kɨpi prɨiyam prɨiyam yai iikam nhɨrmi kinaopɨtkaigaiyɨuwam mɨ sɨmiir kwoɨnɨm op biyɨeya kwiyae whaowaeiya saiir kwiyaeyam kɨpi naɨngwo mɨ sɨma sɨbgu dɨnoknɨnkɨn mɨ wig nhɨrɨm sɨmiir dɨisiimauu siyɨu mɨiyɨk ɨmiir.  
\v 4 Mɨ sɨma wig kopak mɨ nhɨrɨm waipɨu nwo karamae nwowɨm sɨma sɨmiir dɨisiimauu siyɨuɨn sɨmiir yɨnkamam naɨngwokwonanaeiyɨn siir.  
\v 5 Mɨ ɨriipɨ hɨriinan wigɨm waipɨu nwo karamae nwowɨm sɨma hɨriinana timɨ o mɨ wɨ sɨma nwokɨ ɨisiimauuwɨm wig kopak ɨmiirɨn siyɨu mɨiyɨkɨn. Sɨma, sɨmasɨma sɨbgu kɨgrɨraona. Mɨnam, sɨma mɨi mɨiyɨkmɨiyɨk sɨmiir omakanau hɨrar mɨriiyɨm mɨ dimɨn taemɨn mɨiyɨkmɨiyɨkɨm iikam nhɨrmi tɨram mɨ sɨmiir kami yai ɨmiir wakaeyokna api mɨ ta hɨriinana iikam nhɨrɨm sɨma Adi Komii siir yai aiirɨn wɨ kɨpi mɨngigin.   
\p
\v 6 Mɨ ɨriipa hɨriinan, hɨriinan siyɨu kaimwowɨn siirar tɨ swokɨ ɨisiimauu yainan whran ɨmiirɨn mɨ yɨm wɨ sɨmiir kwoɨn ɨmiirar nwokɨ kɨntɨmdɨnunam.  
\v 7 Taitas, kɨra ɨriipɨ hɨriinan mɨi mɨiyɨk aiirar timɨ sɨbgu mɨrii. Mɨ kɨra hɨriinan tɨri mɨ yainan whran ɨmiirɨn kɨra wɨ siyɨu mɨiyɨk ɨmiirar nɨisiimauuwi sɨma napamɨn. Mɨ ɨriipɨ hɨriinan kɨra sɨmiirɨn yai kɨbikɨbi ɨmiirar boɨnmɨmauuwi  
\v 8 Mɨ kɨra yai mɨiyɨk mɨiyɨk ɨmiirara boɨnmɨmauu. Mɨ kɨra hɨriinan boɨni mɨ inkamkɨ kɨriirɨn wɨ ha boɨn tani, tɨ yaiyɨm kɨra boɨnmɨmauuɨm yɨm kaimwo rani. Mɨ kɨra ɨriipɨ hɨriinana swokɨ boɨn mɨ ɨkɨ iikam nhɨrɨm ɨo whwonkam kɨriir nanaowiyɨm sɨma wɨ yai bibiyɨe krɨmiir boɨn tani. Nɨɨngaka.   
\p
\v 9 Mɨ kɨra kamɨm yɨpɨkɨ whɨsarii mɨi sɨbmɨriiyɨm sɨmiirɨn hɨnɨɨna boɨnmauu, sɨma, sɨmiir bɨiyan kamɨm sɨmiir yai ɨmiir wakaeyokna dirɨraerar dimɨn taemɨnɨm sɨma boɨniyɨm, maɨrgɨmaɨrga sɨmiir nwowaigɨnɨuwam. Mɨ sɨma wɨ kamɨm sɨmiir kɨgrɨraowiyɨm sɨmaka kɨpi swokɨ antamyɨriyɨrmɨmɨn. Nɨɨngakɨ, nɨɨngakɨɨnga.  
\v 10 Mɨ ɨriipɨ hɨriinan sɨma sɨmiir bɨiyan kamɨm sɨmiir dimɨn taemɨn ɨmiir kɨpi tauae hai. Mɨ hɨriinan tɨrni hɨnɨɨn aka mɨ sɨma sɨmiir bɨiyan kam ɨmiirɨn hɨnɨɨna dɨisiimauu, tɨ kamɨm sɨmaɨrgɨm yɨpɨkɨ ɨinokɨinokɨn mɨi mɨiyɨkarar mɨriiyɨm. Mɨ sɨma hɨriinan tɨri yaiyɨm krɨma boɨnmɨmauuwɨm Adi Komiiyɨn iikam krɨmiir nanmaiwarkainan siirɨm mɨ iikamɨm sɨmiir whwonkam ɨda wɨ wadɨeyar nwowi.   
\p
\v 11 Mɨ Adi Komii siir naɨngwobumbuwa bɨdi yɨmbiniya iikam whɨekakɨm sɨmiir nanmaiwarkainam ɨiya sɨma dimɨn biyɨeyɨm sɨmiir aowa nikɨ owa saiirsi.  
\v 12 Tɨ dimɨnɨn tɨsi bɨdi yɨmbiyamɨn, yɨo krɨmiirɨn hɨnɨɨna nɨisiimauugɨn, nu tɨran dimɨn bibiyɨeyɨm inkam ɨma tɨriyɨm, krɨma digɨumii sɨmiir haimriiyɨugig. Mɨ krɨma krɨmasiyar mɨntaraona tɨ siyɨu mɨiyɨkɨn krɨma tɨriyɨn, inkamɨn yɨpɨkɨn Adi Komii siir wakaeyokna dirɨraerariyɨn siir hɨriinan. Mɨ krɨma hɨriinan siyɨuɨn mhoɨiya ɨriipɨ hɨriinan ɨiirar tɨrkrɨpkaii mɨ wɨ ɨiya Jisɨs siya nɨtana saiirar nwokɨ dɨgɨm.  
\v 13 Mɨ ɨriipɨ hɨriinanar swokɨ tɨri mɨ krɨma maɨrgɨmaɨrga nwokwokɨni ɨi kɨbiya Jisɨs Krais siya swokɨ ɨuuniyana saiiramɨn. Mɨ tɨ inkamɨn yɨpɨkɨ krɨmiir nanmaiwarkainaeiyɨn mɨ krɨmiir Adi Komiiyɨn, siya wɨ siir dimɨn kɨbiyɨn paenan nɨuyaeiyɨn saɨkar nɨmbini.  
\v 14 Mɨ siya krɨmiirsi naokɨn, krɨmiirɨn dimɨn biyɨe siir kɨrɨe komiiya krɨmiir kiyopsɨmsɨbgi haigɨnɨuwa saiir hɨrankɨ nanmaiwarkainam. Mɨ siya tɨ hɨriinan saiirsi tɨrkikɨn krɨmiir mhɨi kwoɨnɨm wɨ dimɨn whɨrkɨ kɨmbu karamae nwokɨ owɨm mɨ krɨma wɨ siirgɨsiir iikam nwowɨm. Mɨ krɨma wɨ siir dimɨn mɨiyɨk mɨiyɨkɨm sɨmiir tɨram nwokɨ aɨngwowɨm mɨ krɨmiir kwoɨnɨm wɨ kɨrɨeya nwowɨm siir dimɨn mɨiyɨkmɨiyɨkɨm sɨmiir tɨrɨm.   
\p
\v 15 Taitas, kɨra hɨriiyar boɨnmɨmauuyokiyokɨi tɨ dimɨn taemɨn ɨmiirɨn, whɨsarii rani, kɨra kɨrɨe komiiya Adi Komii siir hɨrankɨ haigɨn. Mɨ ta hɨriinana saiirsika iikam ɨmiirɨn siir kɨrɨeni dɨisiisiimauu tɨ dimɨn taemɨn hɨnɨɨn ɨmiirɨn, iikam nhɨrmi yai wakaesi dɨmiiyɨu mɨ iikam nhɨrmi whɨnkɨnsiis haigɨnɨuwiyɨm mɨ kɨriir whwomɨsɨn kɨpi ninansiina mɨ sɨma digɨumii kɨriir kɨpi haimriiyɨu kɨriir yai aiir wakaesi mɨ sɨma kɨriirɨn ha kɨpi naɨngwo kɨra inɨg karamae inkamkɨn. Nɨɨngaka. Ɨriig.   
\c 3  
\s1 Krɨma whɨekakarɨn dimɨn mɨiyɨkmɨiyɨkɨm sɨmiirarar kɨgna dirɨraerar  
\p
\v 1 Taitas tɨ iikamɨm Adi Komii krɨmiir Wanɨn siir isid ɨiir nwowɨm, kɨra sɨmiirɨn tɨ swokɨ boɨnworwokai, sɨma sɨmiir gavman ɨiirɨn kɨpi swokɨ aɨngwo owouu, inkam yɨpɨkɨ sɨmiir kou nwowiyɨn. Sɨma sɨmiir yai ɨmiirar wakaeyokna. Sɨma sɨmiir kwoɨnɨm sɨbgu kisɨsop haigɨnkwokɨn mɨi mɨiyɨkmɨiyɨk whɨekakɨm sɨmiir mɨriiyam.  
\v 2 Mɨ ɨriipɨ hɨriinan, sɨmiirɨn domwarkaiyɨu, sɨma yai bibiyɨe iikam nhɨrmi kɨpi boɨn mɨ sɨma yaii mɨn kɨpi mɨ ɨnii mɨ sɨmiir kwoɨnɨm hiinsɨma dwo mɨ ɨrɨpa nongwomamaɨr aeyɨm daɨngwo iikam nhɨrɨm sɨmaka.  
\v 3 Mɨ bɨdibɨdiniyarɨn krɨma Adi Komii siir dimɨn taemɨn ɨmiir bɨ sɨbgu ɨnomoknɨnkɨnkɨm mɨ sɨmiir bɨ wakaeyokna apkɨm. Mɨ krɨma habwwowhaenankɨm mɨ siir yai aka asi nantamyɨriyɨrkɨm. Mɨ krɨmiir kwoɨn bibiyɨeyɨm sɨma kiyainamkɨn dimɨn biyɨe tɨram mɨ tɨ hɨriinan siyɨu ɨiir nwowam. Mɨ krɨma whɨsarii mɨi prɨimɨriiyan iikam nwokɨm. Dimusi rani, krɨmiir kwoɨn bibiyɨeyɨm sɨmar nikɨ kiyopsɨmsɨbgi haigɨnɨugikɨn. Mɨ krɨma iikam nhɨrmi siyɨu bibiyɨe asi tɨryokiyokɨigɨm. Mɨ krɨma sɨmiirɨn kwoɨn bibiyɨe asi naɨngwokɨm. Dimusi rani, sɨma krɨmiiram bɨ mɨ naɨngwokɨm mɨ nɨm ɨriipɨ hɨriinan sɨmiiram bɨ mɨ aɨngwokɨm. Ɨriipɨ hɨriinan, tɨ hɨriinan siyɨuɨn krɨma krɨmarɨn ɨrni nwɨrniyɨn ɨni sau omomnan ywowɨm.  
\v 4 Mɨ tɨ siir hɨriinan siyɨu mɨiyɨkɨn, krɨmiir nanmaiwarkainan inkamɨn Adi Komii siya, siya iikamɨm krɨmiir nɨisiimauugɨn, siya inkam wadɨeyaɨrgɨn mɨ siya krɨmiiram naɨngwokwonanaeikɨn mɨ siya Jisɨs siir yɨkrop ɨuungi krɨmiir whɨnkɨnsiis haigɨnɨuwɨm.  
\v 5 Mɨ ɨiya siya krɨmiir nanmaiwarkaina, siya ɨkɨ krɨmiir mɨi mɨiyɨk mɨiyɨkɨm krɨma mɨriiyɨm sɨmiirsi bɨ nanmaiwarkainakɨn. Nɨɨngaka. Dimusi rani, siir naɨngwobumbu kɨrɨe komiiya krɨmiirsi nwowa mɨ ta hɨriinan saiirsika siya krɨmiir asi nanmaiwarkainakɨn. Mɨ ta hɨriinan saiirsika Adi Komii siir naeyɨuɨn siya haiyoprimdiyɨumiigikɨm tɨ dimɨn bibiyɨeyɨm krɨmiir kwoɨnau nwokaiyɨm. Mɨ ta hɨriinan saiirsika, krɨmiir kwoɨnɨm dimɨn whɨrkɨ kɨmbu karamae asi nwokɨm. Mɨ ɨriipɨ hɨriinan mɨiya Adi Komii siir naeyɨu ɨeya mɨriiya, siya mɨnam tɨrkɨn krɨmiir kwoɨnɨm sɨmiir kisɨna haigiyɨm iikam wɨnan nwowam mɨ yaeya kwoɨn wɨn nwowam, Adi Komii siir pɨugan anakar.  
\v 6 Mɨ ta hɨriinan saiirsika inkamɨn krɨmiir nanmaiwarkainan Jisɨs Krais Adi Komii siya krɨmiirɨn siirgɨsiir naeyɨu ɨiirar hauugikɨn.  
\v 7 Mɨ ɨriipɨ hɨriinan, tɨ dimɨn taemɨnɨm Adi Komii siir naɨngwobumbuwa saeya tɨrɨm krɨmiir, siir whwonkam ɨda dimɨn whɨrkɨ kɨmbu karamae nwowi mɨ ta hɨriinana saiirsika, krɨma wɨ saɨka nwoyokiyokɨikaeyami, krɨmiir kwoɨnka naɨngwowiya saiir hɨriinan.  
\v 8 Mɨ tɨ dimɨn taemɨnɨm yɨpɨkɨ kara boɨnanɨm kɨriir, yɨm yaimwokɨyaimwowaɨrgɨm. Mɨ kara kɨriirɨn mɨnam naɨngwowi kɨra tɨ iikamɨm naɨngwo tɨbmiiyɨm sɨmiirɨn hɨriiyar dowomwarkaiyɨukrɨpkai mɨ sɨma, sɨma sɨmasiyar mɨntaraona mɨ tɨ hɨriinankɨnɨuwi sɨma mɨi mɨiyɨkmɨiyɨk ɨmiirarar mɨrii. Mɨ tɨ yaiyɨm yɨm wɨ dɨgar nwowi iikamɨm sɨmiir whɨnkɨnsiis haigɨnɨuwɨm.  
\v 9 Mɨ kɨma yai biyɨe nɨɨnga saiir kɨpi whrɨe boɨn mɨ kɨma kɨmiir yɨdiwi wanwiyaeyɨm bɨiyanɨm sɨmiir hɨriinan kɨpi boɨnanae. Mɨ kɨma Moses siir siyɨu komiiyɨn siir yaiyɨm sɨmiirsi kɨpi nɨnkɨnwamwarkɨi boɨn. Mɨ tɨ hɨriinan yaiyɨm yɨm wɨ iikamɨm sɨmiir whɨnkɨnsiis haigɨnɨu rani mɨ wɨ sɨmiir haiprɨdkikai haigɨnɨuwi mɨ wɨ hɨk sɨmiir hauuwi mɨ yɨm tɨ hɨriinan yaiyɨm yɨm naekak rani.  
\v 10 Mɨ yɨpɨkɨ inkamkɨ tɨ yai nae karamaeyɨm sɨmiir wakaena dirɨraerari yɨo wɨ iikamɨm yɨpɨkɨ iikamɨm naɨngwo tɨbmiiyɨm wɨ sɨmiir nɨinɨkibɨri yapa yapa nwowam mɨ mhoɨiya tɨ iikamɨm sɨmiirɨn ɨdɨp ɨdɨpɨn wɨ kwɨsaɨrnana boɨnmauu wakaei. Mɨ ta saiir mhoɨiyan sɨma wɨ kɨriir yai aiir wakaeyokna rani mɨ kɨma whɨekakarɨn digɨumii wɨ tɨ iikamɨm sɨmiir haimriyɨugigi.  
\v 11 Mɨ kɨra tɨ hɨriinan iikamɨm sɨmiir bɨdiyar yɨnoknɨnkɨnɨn sɨmiir kwoɨnɨm uridyɨu biyɨekɨ bɨdi kwɨrii ɨdwokaiyɨm. Mɨ tɨ hɨriinan mɨi biyɨeyɨm ɨinokɨinok sɨma mɨriiyɨm yɨm ha nɨisiimauuwi sɨmiir kwoɨnɨm whɨrua nwo rani, ɨni hindara haiprɨdkikaiyɨm. Ɨriig.   
\s1 Mɨ yaiisɨsɨm nhɨr ɨkɨm  
\p
\v 12 Taitas kara wɨ om komii Nikopolis hɨr nwowi mɨ ta naop ɨiya wɨ saeya dɨgi. Mɨ kara Atimas Tikikas, siirɨn wɨ hanɨɨngɨ nɨkropki kɨriiramɨn. Mɨ kara ha naɨngwowi kɨra siyɨuam tɨ hansɨr kariiram nɨtam.  
\v 13 Mɨ kɨra Sinas siir whɨnkɨnsiis haigɨnɨu yɨpɨkɨ om komii Roman siyɨu komiiyɨn siir dimɨn taemɨn ɨmiir nɨnoknɨnkɨnɨm. Mɨ kɨra Apolos siir warar timɨ whɨnkɨnsiis haigɨnɨu. Mɨ kɨra sowiir siyɨu mɨnɨm mɨ dimɨn taemɨnɨm sowa hanguguwɨm sowa hainamam sɨmiir wara whɨndirɨraerar haigɨnɨugi.  
\v 14 Mɨ krɨmiir iikamɨm sɨma siyɨuɨn siyɨu mɨiyɨk tɨriyɨn siir dɨnoknɨnkɨn mɨ iikam nhɨrɨm dimɨn taemɨnɨm sɨmiir kiyopsɨbgi haigɨnɨuwiyɨm mɨ yɨpɨkɨ hɨkak sɨmiirsi nwowiyɨm sɨmiir whɨnkɨnsiis haigɨnɨu. Mɨ sɨma hɨriinan tɨri mɨ wɨ paeyɨn paenidgɨ bud karamae nwowiyɨn siir hɨriinan nwo rani mɨ yɨm sɨma wɨ paeyɨn paenid budiyɨn mɨ ha naokɨngugunankaiiyɨn wɨ siir hɨriinan nwowi mɨ sɨma wɨ Adi Komii siir siyɨu ɨiirar sɨbgu wakaeyokna api.   
\p
\v 15 Taitas iikam whɨekakɨm yɨpɨkɨ kanakar nwowɨm sɨma kɨriir nokboɨn maɨrgɨmaɨrgikɨm. Mɨ krɨmiir nomiiyauɨm yɨpɨkɨ Adi Komii krɨmiir Wanɨn siir pɨugananɨm sɨmiir warar mɨ ɨkboɨn maɨrgɨmaɨrgikɨm. Mɨ kara Adi Komii siir naɨngwobumbuwa saiiram srɨigɨn saeya wɨ kɨmakar nwowi. Ɨriig.