\id PHP - Ipili NT [ipi] -Papua New Guinea 2008 (DBL 2014) 
\h Pilipai 
\toc1 Poloto Pilipai Tane Tupana Pepa Peyo Pee Leane Oko 
\toc2 Pilipai 
\toc3 Pl 
\mt1 PILIPAI  
\mt2 Poloto Pilipai Tane Tupana Pepa Peyo Pee Leane Oko  
\c 1  
\p
\v 1 Timoti, nalipa Jisasa Kataisana piape akali atoto, Gotena wandakali Pilipai tano okona atalaini tupapi, Pilipai sosa okona piape akali tupapi, ando atene akali tupapi, yakama pitakana pepa oko peyo epe leyapa.\x * \xo 1:1 \xt Ap 16:12-40\x*  
\v 2 Nanimana Akali Andane Jisasa Kataisa-la, Ayiane Gote-la, okolapo-mane yakama ondowa moyoto, yakamana yamapane oko mo tambo laya yakale lo pote leyapa.   
\s1 Poloto Gote Ando Wayu Pele Leane Oko  
\p
\v 3 Ole dindi lo nambato yakama nembo toto, nambana Gote oko ando wayu pele lalawane. Anu peakale nambato wuane piyawanepe.  
\v 4-5 Nanimato Gotena pii layene epene wamba ini bulupane yakama langema-angi tewa, yakama nanima towa atu potomane lo atama ipulu, andipa gii ateyama okona giau leyai. Tene okonena, nambato yakama towa epele andane wete wato, Goteto yakama moyakale lo pote lalawane.   
\p
\v 6-7 Nambato Gotena pii layene epene oko wandakali tupa lamawua ateyo-kola, akali minditupa-mane namba andi loto, kosimi lalaini. Utupane-mane namba kosimi leyai-kola, nambato Gotena pii lalawane okone pii enene mindi lalawane loto, Gotena pii layene epene oko mo tai laya alawane. Namba andi nalene, mee ateyo-angi, nambato wuane teke piyawane. Yakama pitaka-mane namba towa potomane lo ateyai-kola, Goteto nanima pitaka ondowa moyalane okonena, yakama pitaka nambana yamapane yene yame ateyai nembo talawane okone katu leya.\x * \xo 1:6-7 \xt 1Ko 1:8-9\x*   
\p
\v 8 Anu peakale nambato wuane leyope. Jisasa Kataisato wandakali tupa towa epelewa yamapane yo atalane pua teke, nambatopi yakama towa epelewa yamapane yo atoto, yakama andauwa lakae lo nembo tatawa ateyo oko Goteto andeya.   
\p
\v 9-11 Nambato yakama nembo tatawa atoto, yakama moyo wua lo pote lalawane: Jisasa Kataisato mana tika-pene kambua tupa yakamanga mina ika lola-kola, wandakali waka tupamane yakamana mana utupane andoto, Gotena gene oko laiyu loto, bala epelewa tama pua ateakale lo pote lalawane. Mana tika-pene kambua yakamanga yola-kola, Kataisa lapone epola-angi, yakamanga koo tene mindikipi mindi nayene, epene kilini lene wete atalapale nembo teyo. Wuane nembo toto, yakamato mana yame eya tupa pitaka yapa lo tale puato, mana epene tupa angu wato minu atapiai lakae lo nembo teyo. Yakamato wuane pimakale nembo toto, Kitisene mana epene tupa pitaka andoto, mana kuai lo molai-kola, wandakali yangone tupa pitaka towa epelewa yamapane yo atene mana okone yakamanga keato wete guleakale lo nambato pote lalawane.\x * \xo 1:9-11 \xt 1Tes 5:23\x*   
\s1 Polo Bala Katapusa Ateane Okomane Gotena Piape Moyane Oko  
\p
\v 12 Amene imalini yame, kenda-pene nambanga epeane tupamane Gotena pii layene epene oko lo tawe yolane asia oko pai nalene, asia lumbu tepa yane lo yakamato nembo talapale loto, nambato yakama langeyo.  
\v 13 Nambato Gotena pii layene epene oko wandakali tupa lamawua atewa-kola, akali minditupa-mane namba andi leaini. Andi leai-kola, gapomane akali kawane Sisa okona anda ando atalaini ami yame tupapi, wandakali waka tupapi, utupane pitaka-mane namba Poloto Kataisana piape piyawane mambele, namba katapusa ateya lo andeaini.\x * \xo 1:13 \xt Ap 28:30\x*   
\p
\v 14 Andipa namba katapusa ateyo okonena, Gote lo bilipi lene amene kambua tupamane Akali Andane oko lo bilipi leyo nayu loto, yuku naene, Gotena pii layene epene oko lamawua ateyai.   
\p
\v 15-16 Akali utupanena minditupa-mane andeyai-kola, nambato Gotena pii layene epene oko enene wete eya lalawane mambele, namba katapusa ateya lo andeyai. Andoto, akali utupane-mane namba towa epelewa yamapane yo atoto, Kataisana pii oko wandakali tupa lamawua ateyai. Akali utupane-mane wuane pua ateyai tekeko, akali waka minditupa-mane namba Polona gene andane eya nembo toto, namba towa apiangu pua ateyai. Utupane-mane namba sia mina-makale nembo toto, Kataisana pii oko lamawua ateyai.   
\p
\v 17 Namba katapusa ateyo-kola, akali utupane-mane kuai lo nembo natene ato, kenda-pene minditupa tako pua gimakale nembo toto, Kataisana pii oko lamawua ateyai.  
\v 18 Akali utupane-mane kuai lo nembo natene, wuane peyai tekeko, mini koo paluto leaindopi, mini epene paluto leaindopi, utupane pitaka-mane Kataisana pii lamawua ateyai-kola, namba epele wete eyo.   
\s1 Nambato Yakama Moyo Atolopeyo Leane Oko  
\p
\v 19-20 Dee, matilipi namba epelewa teke atolopeyo. Anu peakale nambato wuane leyope. Goteto namba moyakale lo yakamato pote leyai-kola, Jisasa Kataisana Sipitisa okomane namba moyalane. Matilipi, balato namba moyola-kola, namba kote sia minalu, katapusa tepa alu, anana mee atolopeyo nembo teyo. Nambato wuane nembo teyo tekeko, namba yala olowane nembo toto, nambato mana epene tupa wato minuto, Kataisana piape pua atokale. Balana piape pua atoto, namba saka atewandopi, omape-pene guleandopi, namba yuku naene atoto, Kataisana gene oko laiyu lalawane pua teke, ole dindi lo laiyu lokale.\x * \xo 1:19-20 \xt 2Ko 1:10-11\x*   
\p
\v 21-22 Namba oma napene, saka atewando, nambato Kataisana piape puluwa-kola, piape okonemane dini epene minditupa lulupeya tekeko, namba omewando, namba Kataisa ateyanga poto, kuai lo wete atolopeyo. Tene okonena, namba saka atokalepe, omokalepe namba tane nembo nateyo.\x * \xo 1:21-22 \xt Ga 2:18-20\x*  
\v 23 Wuane nembo natene atoto, namba mini lapo palu ateyo. Namba Kataisa ateyanga poto, bala towa atu atepando, namba kuai lo wete atolopeyo nembo toto, namba Kataisa bala ateyanga puwa lakae lo nembo teyo.\x * \xo 1:23 \xt 2Ko 5:8\x*  
\v 24 Namba puwa lakae lo nembo teyo tekeko, namba oma napene saka atoto, yakama moyo piape pua atape-pene guleya nembo teyo.   
\p
\v 25-26 Namba dee lapone yakama towa atu atoto, Gotena piape puluwa-kola, yakamato Jisasa Kataisana gene oko wayumane laiyu lolopeyai. Yakamato wuane piyapale nembo toto, nambato yakamana bilipi oko mo tai laya oyale, Gotena piape tupa pukale. Wuane puluwa-kola, yakama epele wete olopeyai nayuto, andipa namba oma napene, yakama ateyainga peke loto, yakama moyo atolopeyo nembo teyo.   
\s1 Kataisana Pii Okomane Leya Pua Atalapape Leane Oko  
\p
\v 27 Nambato yakama andolo epewandopi, na-epewandopi, yakama nembo mindiki palu ateyai lolai oko ale wakale. Dee, wandakali-mane Gotena pii layene epene oko ale wato, bilipi leakale nembo toto, yakama pitaka potomane lo atoto, Gotena piape pua ateyai lolai okone nambato ale wakale teke. Wandakali-mane wuane lolai oko nambato ale yakale nembo toto, yakamato Kataisana pii layene epene okomane leya pua, Kitisene mana epene tupa wato minu atalapape.\x * \xo 1:27 \xt Ep 4:1; 1Tes 2:11-12\x*   
\p
\v 28-30 Wamba namba tandaka no atoto, Kataisana piape oko ayiawa wete pua atewa oko yakamato andeai okoni. Andipapi nambato wuane pua teke tandaka no atoto, balana piape pua ateya lene oko yakamato ale eyai. Yakamapi namba towa potomane lo atoto, tandaka no atoto, Kataisana piape oko ayiawa pua ateyama. Goteto yakama moyoto, yakamato Kataisa lo bilipi angu lalapape naleaipia. Jia. Yakamato Kataisana piape pua atoto, tandaka no atalapape leane teke. Goteto wuane lea-kola teke, yakamato yakama towa yanda-pene tupa ando yuku naene ateaindo, Kataisa towa yanda-pene wandakali utupane-mane andolai-kola, Goteto yakama moyoto, utupane minu koyolo-peya ya lo andolopeyai.\x * \xo 1:28-30 \xt Ap 16:19-40\x*   
\c 2  
\s1 Mindi Akalina Pangosa Gulo Atalapape Leane Oko  
\p
\v 1 Kataisa bala yakama towa atu atoto, yakamana mini, yamapa-la, okonelapo mo tai laya alanepe. Bala yakama towa epelewa yamapane yo atoto, yakamana mini mo tambo laya alanepe. Oli Sipitisa oko yakamanga ateya-kola, yakamato wandakali yangone tupa ondo wato, moyalainipe.  
\v 2 Wuane yando, yakamato namba mo epele wete piya oyale, mindi akali epele aka pua yamapane yoto, nembo-tene mindiki paluto, yamapa mindiki palu atalapape.   
\p
\v 3 Yakama tanena gene andane yakale nembo toto, yakama tane angu moyoyale piape pua ata na-piyapape. Jia. Yakamato wandakali yangone tupana pangosa atoto, utupane-mane yakama sia minu lipinga yale ateyai nemboto atalapape. \x * \xo 2:3 \xt Ga 5:26\x*  
\v 4 Wuane nembo toto, yakama mindiki-mindiki lo yakama tanena minditaka yolaini tupa angu kuai-lene yakale lo ando atamakale nembo na-talapape. Jia. Wandakali waka tupana minditaka yolaini tupa kuai-lene teke yakale nembo toto, utupane moyo ando ata maiyapape. \x * \xo 2:4 \xt 1Ko 10:23-26\x*   
\p
\v 5 Jisasa Kataisato nembo teane pua teke, yakamatopi nembo-tene okonepene teke palu atalapape.  
\v 6 Bala Gote enene ateane tekeko, balato Gote yale angu atokale nembo nateaipia. Jia. \x * \xo 2:6 \xt Jo 1:1-2; 17:4-5\x*  
\v 7 Bala Gote ateane mana okone tepa alu, yuu okona akali enene mindi gulo atoto, bala piape akali mee mindi gulo ateaipia. \x * \xo 2:7 \xt 2Ko 8:7-9; Jo 1:14\x*  
\v 8 Balato wuane pea-kola, wandakali-mane bala akali enene mindi ateya lo andeaini-pia. Bala Gotena pangosa gulo atoto, Gotena pii oko angu wato minu atama pulu, ita malamanda okona omeaipia. \x * \xo 2:8 \xt Ip 5:8; 12:2-3\x*   
\p
\v 9-11 Jisasato wuane peane okonena, ati kengapi, yuu okonapi, yuu pangosapi, utupanena atalaini tupa pitaka-mane Jisasana gene oko ale wato, aikini leka wato, bala Akali Andane oko ateya lape-pene. Utupane-mane wuane pulai okonemane, Ayiane Gotena gene oko laiyu leakale nembo toto, Goteto Jisasana gene oko laiyu loto, gene waka tupa pitaka sia minene gene andane wete mindi bala mayaepia. \x * \xo 2:9-11 \xt Ap 2:33-35; Ep 1:20-21; Ip 1:3-4; Lom 10:9-10; 14:10-12\x*   
\s1 Kaiyanda Tii Piyane Pua Yakamato Tii Piyawa Atalapape Leane Oko  
\p
\v 12-13 Nambana yamapane yene yame, wamba namba yakama towa atu atema-angi, ole dindi lo yakamato Gotena pii wato minu ateai okoni. Yakamato balana pii oko wato minuto, balato nembo teya pua piyapale nembo toto, bala tane yakamana yamapane pangosa piape puato, balana nembo-tene wato minulane tai-lene oko yakama giyane-ko. Andipa namba yakama towa atu ata napeyama-angi, Goteto yakama molo-peke leakale nembo toto, yakamato bala yuku amawua puti-puti peyo atoto, wua pua atamakale nembo talapape.   
\p
\v 14-16 Gotena pii oko wato mina na-piyaini wandakali tupamane balana mana epene tika-pene tupa awua tepa wato, mana koo kambua minu atalaini tekeko, Kataisa bala lapone epola-angi, nambato yakama moyoyale piape pewane tupa mee katapusa piape pua apia napewa lo namba tanena gene oko laiyu lokale. Nambato wuane pula nembo toto, yakamato wandakali koo utupanena tombenenga atoto, ati kenga kaiyanda tupamane tii piyawa atalaini pua teke, yakamatopi wandakali utupane tii piyawa atoto, Gotena pii okomane wandakali tupa saka atapowa ateakale lo ataya alane lalapape. Pii okone wandakali utupane lamawuato, yakamato tii piyawa atamakale nayuto, yakamanga koo tene mindi nayene, Gotena andopane yame epene tika-pene atamakale nembo toto, pii-mane yanda napene, mulu-mulu nalene, yakamana piape pulaini tupa pua atalapape. \x * \xo 2:14-16 \xt Dan 12:3; Pl 1:9-11; 1Tes 2:17-20\x*   
\p
\v 17 Yakamato Gote lo bilipi loto, namba moyoyale minditaka epe lapiai tupa Gote lo opa maiyene guleya. Nambato yakama moyoyale Gotena piape pua atolowa-kola, wandakali-mane namba peyo ome leaindo, nambato nambana tundupa oko Gote lo opa mauluwa-kola teke pulupeya. Nambana opa okone yakamana opa okone towa tako peando, nambato yakama pitaka towa epelewa atape-pene.  
\v 18 Wuane pua teke, yakamatopi namba towa epele wato, epele wete wa atalapape. \x * \xo 2:18 \xt Pl 3:1; 4:4\x*   
\s1 Poloto Timoti Epeakale Lokale Leane Oko  
\p
\v 19 Andipa yakama wua pua ateyai lene oko ale wato, namba epele wakale nembo teyo. Tene okonena, Akali Andane Jisasato katu leando, nambato Timoti bala yakama ateyainga wamba ini epeakale lokale.  
\v 20-21 Akali bala yale mindi namba towa atu wali ata napeyama. Wandakali waka namba towa atu ateyama tupa pitaka-mane yakama tanena minditaka yalaini tupa angu kuai-lene yakale lo ando atoto, Jisasa Kataisana piape oko pimakale nembo natalaini. Timoti bala angu namba towa nembo-tene mindiki palu atoto, yakama moyauwa lakae lo nembo talane. \x * \xo 2:20-21 \xt 2Ti 4:9-12\x*   
\p
\v 22 Iwanane-mane ayiane moyo piape piyane pua teke, wamba Timoti bala namba towa atu Gotena pii layene epene okona piape pua atepa. Okone angi, yakamato balana mana epene okone andoto, balato Gotena piape oko kuai lo piyae-ya lo andeai okoni.  
\v 23 Tene okonena, jasa okomane namba andayo aki leyape lo nambato wamba ini ale alu, matili Timoti bala yakama ateyainga wamba ini epeakale lokale.  
\v 24 Dee, matili Akali Andane okomane namba epolane asia mindi lumbu tepa ola-kola, nambatopi yakama wamba ini andolo epokale nembo teyo.   
\s1 Poloto Ipapo-taitasa Epeakale Leyo Leane Oko  
\p
\v 25 Matili nambato wuane pukale tekeko, andipa nambato akali Ipapo-taitasa bala yakama ateyainga peke leakale lokale. Wamba Ipapo-taitasato namba moyakale loto, yakamato bala namba atewanga epeakale leai-kola, bala nambana amene gulo atoto, namba towa potomane lo atepa. Potomane lo atoto, nalipato Jisasa towa yanda-pene wandakali tupa towa yanda pimawua atepa. \x * \xo 2:25 \xt Pl 4:18\x*   
\p
\v 26-27 Matili Ipapo-taitasa bala siki andane mindi moto, omape-pene gulea-kola, Goteto bala ando wato, mo atu yane. Bala omapia-yale, kenda-pene okone nambanga ipupia-yale tekeko, kenda-pene okonepi tako pua nambanga na-epeakale nembo toto, Goteto nambapi ondo wato, Ipapo-taitasa okona siki okone mo atu yane. Pilipai tane wandakali yakamato bala siki oma-yene eya lene okone angu ale wato, mini kendawa ateyai nembo toto, Ipapo-taitasa balapi mini kenda wato, yakama andauwa lakae lo nembo teya.  
\v 28 Wuaneko, bala yakama ateyainga epola oko andoto, yakamato epele olai-kola, namba mini kendawa ateyo okone mee gulolo-peyako. Nambato bala yakama ateyainga epe lauwa lakae lo nembo teyo.   
\p
\v 29-30 Wamba yakamato katulo namba moyolo naepeai-kola, Ipapo-taitasa balato namba moyolo epea okoni. Epoto, bala tane kuai lo atokale nembo natene, namba moyo Kataisana piape oko pua atoto, bala omape-pene gulea-ko. Yakamato akali okonepene tupana gene tupa laiyu lape-pene. Tene okonena, Ipapo-taitasa bala yakama ateyainga epola-angi, yakamato bala Akali Andane okona piape piyane nembo toto, bala towa epele andane wete wato, nimba wayu epeleya lo bala lamialapape.   
\c 3  
\s1 Akali Koo Tupamane Yakama Minu Koyolaini, Waiwa Ando Atalapape Leane Oko  
\p
\v 1 Amene imalini yame, yakamato Akali Andane oko nembo toto, epelewa atalapape. Wamba nambato pii minditupa pepa peyo epe lewa tekeko, pii okonemane yakama moyolo-peya nembo toto, andipa namba kepa naene, pii mindiki okone teke dee lapone pepa peyo epe loto, wua leyo:   
\p
\v 2-3 Gotena Oli Sipitisa oko nanimanga eya-kola, nanimato Gote lo lotu loto, Jisasa Kataisana gene oko laiyu lalamane. Nanimato wuane piyamane okonena, Gotena wenonga nanima yala-pene umbaini katene gulo atalamane. Umbaini katene gulo ateyama-kola, akali mindimane nanimana yala-pene umbaini oko kateaindo, mana okone bala mee umbaini kenga yoto, nanima katulo moya napulu-peyako. Peango anatope gulene akali tupamane mana koo mindi minuto, Pilipai tane akali yakamana yala-pene umbaini oko katiyapa lalaini okomane yakamana bilipi oko minu koyolaini. Waiwa ando atalapape. \x * \xo 3:2-3 \xt Lom 2:28-29\x*   
\p
\v 4 Wandakali minditupa-mane kopeta nembo toto, Goteto wandakalina umbaini kenga mana okonepene tupa andoto, utupane yapa lo tale pulupeya nembo talaini tekeko, Goteto wandakalina umbaini kenga mana tupa andoto, utupane yapa lo tale piyae pia-yale, balato namba Polona gene oko laiyu loto, namba akali waka tupa sia minuto, akali epene tika-pene wete ateya lapia-yale nembo teyo. \x * \xo 3:4 \xt 2Ko 11:16-19\x*   
\p
\v 5 Namba angini-mane namba mandu yatawa pituto, ole yanasa pea-kola, ole kitupane okona nambana yala-pene umbaini oko kateainipia. Namba Benjamene yame atoto, namba Isatale tane mindi ateyo. Nambana yumbane yame tupa pitaka Iputu yame angu ateainipia. Namba akali Patasai mindi atoto, Patasai yamena mana wato minuto, Juta yamena loo yene tupa pitaka kuai lo wete wato minu atewane. \x * \xo 3:5 \xt Lk 1:59; 2Ko 11:22; Ap 23:6-8\x*  
\v 6 Nambato Juta yamena loo yene tupa kuai lo wete wato minu atewa-kola, wandakali mindimane katulo nambanga koo tene mindi yata nayaini. Jia. Nambato Gotena piape oko tika pua peyo nembo toto, kenda-pene andane tupa sosa okona wandakali tupanga maiki pua atewane. \x * \xo 3:6 \xt Ap 8:1-3\x*   
\p
\v 7 Wamba nambato mana utupane nembo toto, nambato akali waka tupa sia minuto, akali epene tika-pene wete ateyo nembo tewa tekeko, andipa nambato piape Kataisato peane tupa nembo toto, namba tane mana wamba minu atewa utupane pitaka angini mindi jia ya lo nembo teyo. \x * \xo 3:7 \xt Mt 13:44,46\x*  
\v 8 Jisasa Kataisa bala nambana Akali Andane oko atoto, namba wayumane wete moyalane lo nayuto, bala towa atauwa lakae lo nembo teyo. Wuane nembo toto, nambato minditaka waka taka eya tupa pitaka angini mindi jia ya lo nembo toto, utupane masia mawua ateyo.   
\p
\v 9-11 Nambato Kataisa angu nemboto minatawa atama pulu, omolawa-kola, matili Goteto namba malinga ika laya yakale nembo teyo. Wuane nembo toto, wamba Kataisa bala tandaka nalu omeane wuane pua teke, nambapi tandaka nalu omokale. Omolowa-kola, Goteto Kataisa bala malinga ika laya yane pua teke, balato nambapi malinga ika laya ola-angi, nambato balana tai-lene oko andokale nembo teyo. Wuane pukale nembo toto, nambato Gotena loo tupa pitaka wato minu atolowa mana okonemane namba akali epene tika-pene gulolo-peyo nembo nateyo. Jia. Nambato Kataisa bilipi lo atolowa-kola, Goteto namba akali epene tika-pene ateya lolopeya nembo toto, nambato Kataisa towa mina mindiki lo atokale. \x * \xo 3:9-11 \xt Lom 3:21-23; 6:2-7; 8:17\x*   
\s1 Yakamato Nambana Mana Oko Wato Minalapape Leane Oko  
\p
\v 12 Nambato Kataisana mana epene tika-pene tupa pitaka mia yiake loto, namba akali epene tika-pene gulo ateyo naleyo. Jia. Namba Jisasa Kataisana yame atola lo balato namba minea-kola, nambato balana mana epene tika-pene tupa wato minu atokale nembo toto, piape tailo pua ateyo. \x * \xo 3:12 \xt 1Ti 6:12,17-19\x*  
\v 13 Amene imalini yame, nambato Kataisana mana tupa kuai lo wato minalawane naleyo tekeko, nambato mangene wamba pewane tupa embesa wato, mangene matili pukale tupa nembo tatawa atoto, piape tailo pua ateyo.   
\p
\v 14 Jisasa Kataisato namba moyo piape peane mambele, Goteto namba ati kenga yuu epene okona epola loto, ee lo meane. Balato wuane peane okonena, nambato ati kenga pataisa epene eya okone mokale nembo toto, maki okonena peakaiyu loyale asia tai leyo. \x * \xo 3:14 \xt 1Ko 9:24-25\x*  
\v 15 Kitisene tai atalamane wandakali nanima pitaka wuane teke pimakale nemboto atamakale. Yakamato nembo-tene waka mindi palu ateaindo, Goteto okone yakama andawa lolopeya. \x * \xo 3:15 \xt 1Ko 2:6\x*  
\v 16 Goteto wuane pulupeya nembo toto, andipa nanimato Kitisene mana epene wamba mema tupa wato minu atamakale.   
\p
\v 17-19 Amene imalini yame, wamba ole kambuanga nambato pii yakama langewa okone teke andipapi namba ai lo atoto, dee lapone teke yakama langulu-peke leyo. Wandakali kambua-mane yuu okona minditaka eya tupa angu nembo toto, mana yala-pene tupa minu atoto, yakama tanena gene tupa laiyu lalaini. Wandakali utupane-mane yakamana umbainina epele ene tupa yakamana gote gulo minu atoto, Kataisana ita malamanda oko towa yanda-pene gulo atalaini. Wuane piyaini wandakali utupane yakama yuu koo ita too atapowa atene okona alu pulupeyai. Pilipai tane wandakali yakamato mana koo okonepene tupa wato mina na-piyapale nembo toto, nanimato mana epene minditupa yakama andawa loto, yakamato wua pua atalapape lema-kola, wandakali minditupa-mane mana epene utupane wato mineai. Yakamato wandakali utupanena mana epene utupane wayumane andoto, nambana mana epene utupane wato minu atalapape. \x * \xo 3:17-19 \xt 1Ko 4:16; Lom 16:17-19\x*   
\p
\v 20 Ati kenga yuu epene oko nanimana yuu tene oko eya. Matili Akali Andane Jisasa Kataisa bala ati kenga yuu epene okone tepa alu, nanima lamolo epolopeya lo maliyo ateyama. \x * \xo 3:20 \xt Ep 2:5-7,19\x*  
\v 21 Bala epola-angi, balana tai-lene okomane balato minditaka eya tupa pitaka balana pangosa yakale lolopeya. Wuane loto, balana tai-lene okomane nanimana umbaini tai nalene ateya tupa mo lawua puato, bala tanena umbaini epene wete ateya okonepene teke gulaya olopeya. \x * \xo 3:21 \xt 1Ko 15:28,42-53\x*   
\c 4  
\p
\v 1 Amene imalini yame, nambato leyo pua, yakamato Akali Andane okone tai-lene moto, Kitisene tai atalapape. Nambato Gotena piape pua atewa okonemane yakama Kitisene guleaini okonena, yakama nambana pataisa epene okonetaka gulo ateyai-kola, nambato yakama nembo toto, epele wete eyo. Tene okonena, nambato yakama towa epelewa yamapane yo atoto, yakama andauwa lakae lo nembo teyo. \x * \xo 4:1 \xt 1Tes 2:17-20\x*   
\p
\v 2 Wanda Yutiya, Sindike-la liyamba lapotaka Akali Andane okona yame peteyapi. Tene okonena, liyambato pii yanda napene, nembo mindiki angu palu pitiyapale lo nambato liyamba tailo langeyo.  
\v 3 Wamba Kelemenepi, namba towa atu piape mindiki pemane wandakali waka tupapi, nanimato Gotena pii layene epene oko wandakali tupa lamawua atema-angi, wanda Yutiya, Sindike-la, okonelapo nanima towa potomane loto, piape mindiki okone teke masiawa pua peteapili leyo. Wandakali utupane pitakana gene tupa Gotena wandakali saka atapowa atolane gene yalane buku okona gene peya-yene eya. Andipa wanda okonelapo liyamba nembo mindiki palu peteakale, namba towa atu piape mindiki pua atepa akali nimbato okonelapo moyape lo tee leyo. \x * \xo 4:3 \xt Lk 10:20\x*   
\p
\v 4 Ole dindi lo yakamato Akali Andane oko nembo toto, epele wete wa atalapape. Nambato dee lapone teke yakama languato, yakama epelewa atalapape leyo.  
\v 5 Yakamato mana epene tupa miniyai lo wandakali pitaka-mane andeakalenga, yakama tenga-mane tambo lo atalapape. Akali Andane oko bala dee lapone epolane gii oko wamba mandaka guleya. \x * \xo 4:5 \xt Ip 10:24-25; Jem 5:7-9\x*   
\p
\v 6 Tene okonena, kenda-pene mindi yakamanga epolopeya nembo toto, yakamato nembo kambua mia na-piyapape. Jia. Ole dindi lo Goteto yakama moyalane nembo toto, yakamato bala wayu pele lalapape. Wuane lalu, balato yakama dee lapone moyakale lo pote loto, yakamanga kenda-pene yolane tupa pitaka bala lamai-yapape. \x * \xo 4:6 \xt Mt 6:25-34; Kol 4:2-4\x*  
\v 7 Yakamato wuane pua pote lolai-kola, Gote balato yakamana yamapane mo tambo laya olopeya. Goteto nanimana yamapane oko mo tambo laya oyale wua piyane lo nanimato katulo anda na-piyamane tekeko, yakama Jisasa Kataisa towa atu atoto, yakamana mini yamapa-la, okonelapo epene palu atolopeyai. \x * \xo 4:7 \xt Ais 26:3; Jo 14:27; Kol 3:15\x*   
\p
\v 8 Amene imalini yame, andipa nambato pii oko lokoyo puato, wua leyo. Mana minditupa angini yalane. Mana minditupa gene yene yalane. Mana minditupa tika-pene yalane. Mana minditupa epele-pene yalane. Mana minditupa kuai-lene yalane. Dee, mana minditupa epene wete eya-kola, nanimato mana utupane laiyu lalamane. Yakamato mana utupane nembo tatawa atalapape.   
\p
\v 9 Wamba namba tane mana epene minditupa wato minuto, yakamato mana utupane wato minalapape lo mana langewa-kola, yakamato nambana pii oko ale wato, nambana mana utupane lee-mane andoto, mana meai. Yakamato mana okonepene tupa pitaka nembo tatawa atoto, wato minu atalapape. Yakamato wuane peaindo, yamapane mo tambo laya alane Gote oko yakama towa atu atolopeyai. \x * \xo 4:9 \xt Lom 16:20\x*   
\s1 Yakamato Wayu Peai Lo Leane Oko  
\p
\v 10 Wamba yakamato namba moya-makale nembo teaini tekeko, okone angi yakamato namba moyo minditaka epe lolane asini mindi yaa napea. Ana minditupa pupia-kola, yakamato nembo tolo-peke loto, namba moyapia mambele, nambato Akali Andane oko towa epele wete wato, bala ando wayu pele leyo.  
\v 11 Nambanga minditaka mindi jia eya-kola, nambato pii okone naleyo. Jia. Minditaka mindi nambanga yandopi, nayandopi, namba katulo atokale lo mana mewane.   
\p
\v 12 Alu mindi angi nambanga minditaka kambua eya-kola, nambato tomo kambua no atalawane. Alu mindi angi nambanga minditaka jia eya-kola, nambato nonowa atalawane. Tomo kambua no atewandopi, nanene mee atewandopi, ole dindi lo namba mini epene palu atalawane.  
\v 13 Kataisato namba minu tai laya eya-kola, balana tai-lene okomane nambato minditaka pitaka taka katulo piyawane. \x * \xo 4:13 \xt 2Ko 12:10\x*  
\v 14 Nambato wuane piyawane tekeko, wamba kenda-pene mindi nambanga epea-kola, yakamato mana epene mindi minuto, namba towa potomane lo atoto, namba moyai okoni.   
\p
\v 15 Wamba nambato Gotena pii layene epene oko bulupane tewa yakama langiyu, Masetonia potopinjia oko tepa alu pewa-angi, Pilipai tane Kitisene wandakali yakamato angu namba towa potomane loto, nambato Gotena piape oko pua atape leai. Wuane loto, yakamato namba moyoto, minditaka geai okone yakama tane nembo teyai okoni. Yuu waka mindina Kitisene wandakali tupamane wuane pua namba moya napeai. \x * \xo 4:15 \xt 2Ko 11:7-9\x*   
\p
\v 16 Dee, matili namba Tesalonaika yuu okona po atoto, Gotena piape pua atewa-angi, nambanga minditaka jia yo atewa-kola, ole kambuanga yakamato namba moyo minditaka epe leai okoni.  
\v 17 Andipa wuane pua teke yakamato minditaka namba giyapale lo tee leya nembo na-talapape. Jia. Yakamana mana epene okone yakamanga andane gulo yola-kola, Goteto yakama towa epele wato, minditaka mindi wete tako pua yakama geakale nembo toto, nambato pii okone leyo.   
\p
\v 18 Yakamato nambana minditaka epe leaini tupa akali Ipapo-taitasa balato mandu epoto, namba geane. Nambato utupane moto, andipa nambanga minditaka kambua eya-kola, ateyo. Nambana yano mindi wamba yakamanga yane nembo teaindo, andipa yakamato minditaka nambana epe leai utupane-mane nambana yano yakamanga yane oko sia minuto, kambua epe leai. Yakamato minditaka epe leai utupane opa tunduma-pene mindi Gote maiyene okonetaka gulea-kola, Goteto yakama towa epele eya.   
\p
\v 19 Epele wato, yakama Jisasa Kataisa towa mina mindiki lene ateyai nembo toto, nambana Gote okomane balana minditaka epene kambua wete yalane tupana minditupa moto, yakamanga minditaka jia yolane tupa pitaka mo katu laya olopeya.  
\v 20 Balato wuane pulupeya okonena, matili-matilipi, nanimana Ayiane Gote okonena gene oko laiyu lo atamakale. Enene.   
\s1 Pii Lokoyo Pua Leane Oko  
\p
\v 21 Jisasa Kataisa bilipi lene wandakali yakama Gotena wandakali ateyai. Nambato yakama pitaka mindiki-mindiki lo kuai lo atalapape leya lo yakamato utupane lamai-yapape. Kitisene amene namba towa wali ateyama tupamanepi yakama ando kuai lo atalapape leyai.  
\v 22 Dee, Gotena wandakali wali atalaini tupa pitaka-manepi yakama ando kuai lo atalapape leyai teke. Dee, Lomo tane gapomane akali kawane Sisana andaka piape piyaini Kitisene wandakali tupamanepi, namba taimane languato, yakama kuai lo atalapape leyama oko nimbato Pilipai tane wandakali tupa lamaipe lapiai.  
\v 23 Akali Andane Jisasa Kataisato yakamana tandini oko towa atu atoto, yakama ondowa moyo ateakale lo nambato pote leyo.