\id 2TI - Ipili NT [ipi] -Papua New Guinea 2008 (DBL 2014) 
\h 2 Timoti 
\toc1 Poloto Timotina Pepa Lapone Peyo Pee Leane Oko 
\toc2 2 Timoti 
\toc3 2Ti 
\mt1 2 TIMOTI  
\mt2 Poloto Timotina Pepa Lapone Peyo Pee Leane Oko  
\c 1  
\p
\v 1 Namba Polo. Wamba Goteto potomisa pii mindi leane oko loto, Jisasa Kataisa lo bilipi lene wandakali tupa saka atapowa ateakale ataya wakale leaipia. Nambato balana potomisa pii okone wandakali tupa lamawua atola nembo toto, balato namba Jisasa Kataisana aposolo akali ata leane.  
\v 2 Andipa nambato nambana iwanane yamapane yene Timoti nimbana pepa oko peyo epe leyo. Nanimana Akali Andane Jisasa Kataisa-la, Ayiane Gote-la, okonelapo-mane nimba ondowa moyoto, nimbana yamapane mo tambo laya yakale lo pote leyo.\x * \xo 1:2 \xt Ap 16:11; 1Ti 1:2\x*   
\s1 Nimba Yala Naene, Gotena Piape Pua Atape Leane Oko  
\p
\v 3 Gotena wenonga koo tene mindi nambana yumbane tupanga yaa napene atoto, utupane-mane balana piape pimawua ateainipia. Wuane pua teke, Gotena wenonga koo tene mindi nambanga yaa napeya-kola, nambatopi balana piape pimawua atalawane. Utulu otongapi, nambato nimba nembo tolo-peke loto, pote loto, Gote ando wayu pele lalawane.\x * \xo 1:3 \xt Ap 23:1\x*   
\p
\v 4 Anu peakale nambato wuane piyawaepe. Wamba namba nimba tepa alu epewa-angi, nimbato ai lee oko nambato nembo tolo-peke leyo. Andipa nambato epele wete wakale nembo toto, nimba dee lapone andauwa lakae lo nemboto ateyo.  
\v 5 Wamba bulupane nimbana aputini Lowisa-la, nimbana angini Yunisa-la, okonelapo-mane Kataisa lo bilipi leyapa nayu lo pitiyapili pua teke, nimbatopi bala lo bilipi leyo nayu lele oko nambato andalawane. Nimbato Kataisa lo bilipi leyo nayu lalene okone nambato nembo tolo-peke loto, Gote ando wayu pele lalawane.\x * \xo 1:5 \xt Ap 16:1\x*   
\p
\v 6-7 Nimbato Kataisa lo bilipi leyo nayu lalene nembo toto, nambato nimbana nembo-tene oko mina ika loto, wua leyo: Goteto balana Oli Sipitisa nanimanga geane okone nanimato yukuwa atalapale lo gii napeane. Jia. Nanimato nanima tanena mana tupa kuai lo ando atoto, wandakali yangone tupa towa epelewa yamapane yo atalapale loto, Goteto nanima minu tai laya oyale, balana Oli Sipitisa oko nanima geane. Wamba nambato nimbana kawanenga kii yata ewa-angi, nimbato Gotena piape oko tailo pula loto, Goteto balana Oli Sipitisa oko nimbanga geane. Ita lungu andane teakale nembo toto, wandakali-mane ita tola oko po lalaini. Wuane pua teke, nimbato Gotena piape andane oko kuai lo pukale nembo toto, nimbato Oli Sipitisa okonena tai-lene okomane Gotena piape tupa tailo pua atape.\x * \xo 1:6-7 \xt 1Ti 4:14; Lom 8:14-16\x*   
\p
\v 8 Nanima yuku naene, balana piape tailo pua atalapale loto, Goteto balana Oli Sipitisa oko nanima gea okoni. Tene okonena, nanimana Akali Andane okona pii layene epene oko lamauyale nimba yala olene. Dee, nambato Akali Andane okona piape oko pimai-yawane mambele, namba andi latane ateyo okonena, nimba yala olene. Jia. Matili nimbato Gotena pii layene epene oko lamawua atole-kola, kenda-pene minditupa nimbanga epolopeya. Kenda-pene mindi nimbanga epola-angi, Goteto nimba minu tai laya olopeya-ko. Nambato kenda-pene tupa awua atalawane pua teke, nimbatopi kenda-pene tupa awua atoto, Gotena piape oko pua atape.   
\p
\v 9-10 Wamba Goteto yuu ati-la yakale nalene atea-angi, balato nanima mee ondowa moyoto, Kataisato piape pula mambele, Goteto nanima bala tanena yame tupa gulaya wakale nembo teaipia. Goteto wuane nembo teane okonena, matili Jisasa Kataisato nanima molo-peke loyale, wandakali omalaini mana okona tai-lene oko mo mee gulaya yaepia. Jisasato wuane peane okonena, nanimato mana epene mindi mina napema-kola teke, Goteto nanima balana wandakali epene tika-pene tupa atalapale loto, nanima ee lo molo-peke leaipia. Wandakali omalu, malinga ika lalu, dee lapone oma napene, saka atapowa atalaini lo wandakali-mane nembo teakale loto, Goteto balana pii layene epene okomane mana utupane nanimanga lo pana yaepia.\x * \xo 1:9-10 \xt Ep 2:8-10; Tai 3:4-7; Ip 2:14-15\x*   
\p
\v 11 Nambato balana pii layene epene okone lamawua atoto, balana mana epene tupa wandakali lamawua atape loto, Jisasa Kataisato namba balana aposolo akali ate leane.\x * \xo 1:11 \xt 1Ti 2:7\x*  
\v 12 Balato namba balana aposolo ate leane mambele, nambato Gotena piape okone pua atewa-kola, akali minditupa-mane namba katapusa peaini. Katapusa peai-kola, nambato kenda-pene okone awua atoto teke, Jisasa lo bilipi leyo nayu lalawane. Piape Jisasato namba wamba geane okone bala tane ando atola-kola, balana piape okone koya napene atoto, bala dee lapone epolopeya oto okona giau lolopeya. Wuane pulupeya nembo toto, namba katapusa atoto, kenda-pene okone awua ateyo tekeko, namba yala naeyo.   
\p
\v 13 Wamba nambato nimba languato, nimbato Jisasa Kataisa lo bilipi leyo nayu loto, balapi, wandakali yangone tupapi, utupane pitaka towa epelewa yamapane yo atape lo langewa okoni. Nimbato Gotena pii tika-pene nambato nimba langewa tupa pitaka nembo tatawa atoto, mana epene utupane wato minu atape.  
\v 14 Nimbato Gotena pii layene epene oko lamawua atola loto, Goteto piape oko nimba gea-kola, Oli Sipitisa okomane nimba moyo atolo-peyako. Nimbato Gotena pii okone kuai lamawakale lo ando atape.\x * \xo 1:14 \xt 1Ti 6:20-21\x*   
\p
\v 15 Namba katapusa atewa-kola, akali Pika-lasapi, Emonge-nesapi, dee Esia potopinjia okona Kitisene wandakali waka tupa pitaka-mane namba masia geaini oko Timoti nimbato nembo tele okoni.   
\p
\v 16-17 Utupane-mane namba masia geaini tekeko, akali Onesi-potasa balato namba Lomo tano okona katapusa ateya lene ale wato, namba andolo epeane. Epoto, balato ayawa wete namba aiya pima epoko puato, matili namba andeane. Andalu, namba katapusa ateya nembo toto, bala yala naene, ole kambuanga katapusa anda okona epoto, namba mo epele aya yane. Tene okonena, Akali Andane okomane Onesi-potasana yame tupa pitaka ondowa moyakale lo nambato loma yalawane.  
\v 18 Wamba Onesi-potasato Epesasa tano okona atoto, namba moyo piape kambua peane oko Timoti nimbato nembo tele okoni. Balato wuane peane okonena, matili Akali Andane okomane wandakali tupa yapa lo tale pula-angi, balato Onesi-potasa ondo yakale lo nambato pote lalawane.   
\c 2  
\p
\v 1 Nambana iwanane Timoti, ole dindi lo Jisasa Kataisato nimba ondowa moyoto, nimba minu tai laya yakale atape.  
\v 2 Wamba nambato wandakali kambua tupana wenonga atoto, Gotena pii layene epene oko wandakali utupane lamawua atewa-angi, nimbato pii okone alewa atee okoni. Andipa piape kuai lo piyaini akali minditupa-mane pii okone wandakali waka tupa lamai-yakale nembo toto, nimbato akali minditupa yapa lo moto, pii okone akali utupane mana lamaipe.   
\p
\v 3-4 Akali mindimane ami piape piyane yando, balato piape waka mindi tako pua napiyane. Jia. Balana ami piape okone ando atalane akali okomane epele yakale nembo toto, balato ami piape okone angu nembo tatawa atoto, piyane. Nimba Jisasa Kataisana ami yanda yene epene mindi gulo atoto, balana piape okone angu puato, kenda-pene epalane tupa nanimato awua atalamane pua, nimbatopi awua atape. \x * \xo 2:3-4 \xt 2Ti 1:8\x*   
\p
\v 5 Dee, wandakali-mane minditaka epene moyale atete puato, asia tai lalaini mana oko wato minalane. Balato mana okone kuai lo wato mina napene, asia tai leando, balato sia minuto teke, minditaka epene okone katulo mia napulu-peya. Tene okonena, akali mindimane asia tai leando, wandakali-mane asia tai lalaini mana oko wato minuto, balato asia tai lape-pene. \x * \xo 2:5 \xt 2Ti 4:8\x*   
\p
\v 6 Akali mindimane akali waka mindina ee mindi masiawa pimaiyu, ee okonena tomo yola-angi, tomo utupanena minditupa balana yole gulo yola-kola, balato minditupa ini bulupane mandu nape-pene. \x * \xo 2:6 \xt 1Ko 9:4-7\x*  
\v 7 Akali Andane okomane nimba moyola-kola, pii nambato nimba langeyo utupane pitakana tene tupa nimbato katulo nembo tolopele-ko. Nimbato pii nambato leyo utupane nembo tatawa atape.   
\p
\v 8 Nimbato pii nambato leyo utupane nembo toto, Jisasa Kataisa nembo tatawa atape. Bala Dapiti yame okonena mandiyene. Bala omea-kola, Goteto bala malinga ika laya yane loto, nambato Gotena pii layene epene oko wandakali tupa lamai-yawane. \x * \xo 2:8 \xt 1Ko 15:4; Lom 1:3\x*  
\v 9 Tene okonena, wandakali minditupa-mane namba akali koo ya loto, kenda-pene kambua namba guato, namba andi leaini. Andi leai-kola, koo piyaini akali tupa andi latane atalaini pua teke, nambapi andi latane ateyo tekeko, Gotena pii layene epene oko andi latane ata napeya. Jia. \x * \xo 2:9 \xt Ep 3:1,13; Pl 1:12-14\x*   
\p
\v 10 Wamba Goteto wandakali minditupa balana yame ateakale lata ya-kola, Jisasa Kataisato piape peane mambele, wandakali utupane bala towa atu ati kenga yuu tii-pene okona atapowa ateakale nembo toto, nambato kenda-pene nambanga epalane tupa pitaka awua atalawane.   
\p
\v 11-12 Anu peakale nambato wuane piyawanepe. Nambato Gotena pii pepa pelene eya mindi nembo toto, kenda-pene utupane pitaka awua atalawane. Pii okonemane loto, nanimato Jisasa lo nembo toto, kenda-pene nanimanga epola tupa awua atemando, matili nanima bala towa atu kiŋi gulolo-peyama layene eya. Nanimato bala masia mawua atemando, balatopi nanima masia teke gulupeya. Nanima bala towa atu omemando, matili nanima bala towa atu saka atapowa atolo-peyama. \x * \xo 2:11-12 \xt 2Ko 4:10-11; Mt 10:32-33\x*   
\p
\v 13 Balato minditaka mindi pukale lolane okone mo lawa puato, mindi pipi napiyane. Nanimato Gotena pii oko wato minu atamakale loto teke, wato minu ata napene kondemando, Jisasato minditaka mindi pukale lolane tupa lawa napene, enene piyane. Gotena pii pepa pelene eya tupamane wuane layene eya. \x * \xo 2:13 \xt Lom 3:3-4; Tai 1:2\x*   
\s1 Nimbato Mana Koo Tupa Masia Mawua Atape Leane Oko  
\p
\v 14 Wandakali-mane pii utupane nembo tolo-peke leakale loto, nimbato wandakali utupanena nembo-tene mina ika laya wato, pii utupane lamawua atape. Pii yanda piyaini mana okomane Gotena pii alewa pitiyaini wandakali tupa moya napiyane. Jia. Mana okonemane utupane minu koyalane. Tene okonena, Timoti nimba Gotena wenonga atoto, pii mindi Gotena wandakali tupa lamaiyo nayu lamawuato, yakamato pii mee mindi atete puato, pii yanda na-piyapape lo lamaipe. \x * \xo 2:14 \xt 1Ti 6:4-5; Tai 3:9\x*  
\v 15 Nimbato Gotena pii enene oko kuai lo lamawua ateendo, nimba yala na-olopele. Jia. Goteto nimba piape akali epene mindi atele leakale nembo toto, nimbato balana piape taimane pua atape. \x * \xo 2:15 \xt 1Ti 4:6\x*   
\p
\v 16-17 Tete koo wete mindimane anda yama-yama poto, wandakali tupana umbaini minu yolane. Wuane pua teke, wandakali mindimane Gote masia mawua atoto, pii mee tene na-atene tupa wandakali waka tupa lamawuato, utupanena bilipi oko minu koyalane. Pii tene na-atene okonepene tupamane wandakali tupa minakasa eya-kola, wandakali utupane Gote masia maiyaini asini koo okona puma-puma piyaini. Nimbato pii okonepene tupa peya wanju atape. Akali Aimeniasa, Piletasa-la, okonelapo-mane pii okonepene tupa lalapele. \x * \xo 2:16-17 \xt 1Ti 1:18-20; 4:7-10\x*   
\p
\v 18 Akali okonelapo-mane Gotena pii enene oko mo lawa puato, nanima wamba malinga ika lema mambele, nanima dee lapone katulo ika nalolo-peyama lalapele. Liyambato wuane leapi okonemane wandakali minditupana bilipi oko minu koyalapele.  
\v 19 Goteto balana anda puyale atoto, anda pingina ate lea-kola, anda pingina okone keato gulo ateya. Gotena pii pepa pelene eya mindimane anda pingina oko andayo, Akali Andane okomane balana wandakali tupa andalane layene eya. Dee, Gotena pii pepa pelene eya waka mindimane anda pingina okone andayo, Akali Andane okona yame ateyama lalaini wandakali yakama pitaka-mane mana koo tupa masia maiyu, waka atalapape layene eya. \x * \xo 2:19 \xt Jo 10:14-15; 1Ko 8:1-4; Ais 52:11\x*   
\p
\v 20 Akali gene yene mindina anda okona sisopenepi, disapi, okonetaka tupa golo-mane waa-penepi, silipa-mane waa-penepi, okonetaka tupa angu nayalane. Jia. Okonetaka minditupa ita-mane waa-penepi, yuu-mane waa-penepi, utupane pitaka yalane teke. Wandakali-mane pene koo yale tupa moto, piape mee teke tupa piyaini. Wandakali-mane pene epene wete tupa moto, piape epene wete tupa piyaini.  
\v 21 Wandakali mindimane mana koo tupa pitaka masia mawua ateando, wandakali okone bala pene epene wete okonepene teke gulo atolopeya. Balato piape epene tupa pitaka puyale mandeke pitawa atoto, Akali Andane okona piape epene tupa katulo pulupeya.   
\p
\v 22 Iwana patanepi, wana mapokaepi, utupane-mane mana koo tupa mina-makale nembo talaini tekeko, nimbato mana koo utupane minuluwane. Tika ando atape. Wandakali minditupa-mane yakamana angini umbainipi, nembo-tenepi, utupane pitaka Gote mawua atoto, Akali Andane okona gene oko loto, loma yalaini. Nimbato wandakali utupanena mana epene okone wato minuto, Gote lo bilipi leyo nayu loto, wandakali yangone tupa towa mini epene palu atape. Mini epene palu atoto, nimbato wandakali utupane towa epelewa yamapane yoto, mana epene tika-pene tupa wato minu atape. \x * \xo 2:22 \xt 1Ti 6:11\x*   
\p
\v 23-24 Akali Andane okona piape akali tupamane mana epene Goteto epele alane tupa lamaulane mana tupa andape-pene. Utupane-mane wandakali tupa towa pii yanda napepe-pene. Jia. Utupane-mane wandakali pitaka towa tambo-tambo lo atape-pene. Wandakali mindimane Akali Andane okona piape akali mindinga kenda-pene mindi maiyando, balato wuane peakale lo ando kondape-pene. Wandakali minditupa-mane mini napalene gulo atoto, pii tene na-atene minditupa tipa peyai-kola, pii okonepene tupamane pii yanda piyaini mana oko mina ika lalane-ko. Wandakali mindimane Gotena piape akali mindi towa pii yanda puyale, pii okonepene mindi bala tipa peando, balato akali okonena pii yano peya napene, masia maipe-pene. \x * \xo 2:23-24 \xt 1Ti 4:7-10\x*   
\p
\v 25-26 Wandakali-mane balana nembo-tene wato mineakale nembo toto, Sataneto nongo minditupa yata alane. Gotena pii tanga lalaini wandakali tupamane Satanena nongo utupanena lua atalaini. Goteto wandakali utupane moyando, utupane yakama Gotena pii enene oko wayumane nembo toto, yamapane peke loto, Satanena nembo-tene koo okone masia malupeyai. Wuane peakale nembo toto, Akali Andane okona piape akali tupamane Gotena pii tanga lalaini wandakali utupanena nembo-tene oko mo tika puyale, pii tenga-mane tambo lo mana lamaipe-pene.   
\c 3  
\s1 Koo Piyaini Wandakali Tupa Towa Asia Peya Wanju Atape Leane Oko  
\p
\v 1 Yuu oko koyo puyale pula-angi, wandakali minditupa-mane mana koo kambua minulai-kola, kenda-pene kambua epolopeya oko nimbato nembo tatawa atape. \x * \xo 3:1 \xt 1Ti 4:1-2\x*  
\v 2 Okone angi, wandakali minditupa-mane yakama tane angu epelewa yamapane yoto, wandakali waka tupana lipinga yale ateyama nembo toto, yakama tanena gene tupa laiyu lo atolopeya. Utupane-mane Gote ando wayu pele nalene atoto, ayiane anginipi, utupanena pii tanga loto, Gotena mana epene tupa pitaka masia mawua atolopeyai. Utupane-mane Gotepi, wandakali yangonepi, utupane pitaka ando lamba lo atolopeyai. Utupane-mane muni epelewa yamapane yo atolopeyai.   
\p
\v 3 Utupane-mane yakamana tundupa mindiki tupa towa epelewa yamapane yo ata napulu-peyai. Utupane-mane yakamana umbaini okona epele ene tupa kuai lo ando ata napulu-peyai. Utupane-mane yataka wato, yakamana yangone tupa layangama epoko puato, utupane minu koyoto, taimane peyama epoko pulupeyai. Wuane puato, utupane-mane Gotena mana epene tupa pitaka yanda pimawua atolopeyai.   
\p
\v 4 Wandakali utupane-mane yakama tane angu gene andane yene ateyama nembo toto, yakamana nembo-tene koo tupa pitaka wamba kapoyale wato minuto, wandakali yangone tupa towa yanda-pene akali tupanga ene pitulu-peyai. Utupane-mane Gote towa epelewa yamapane yo ata napulu-peyai. Jia. Utupane-mane yuu okona mana epele-pene tupa angu epelewa atolopeyai.  
\v 5 Wandakali utupane-mane Gotena mana epene tupa angini mindi jia ya loto, mana utupane mee umbaini kenga-mane angu wato minu atolopeyai. Tene okonena, nimbato wandakali okonepene tupa atolainga mandaka gulo puu napene, waka atape. \x * \xo 3:5 \xt Mt 7:15-21; Tai 1:16\x*   
\p
\v 6-7 Ole dindi lo wanda minditupa-mane mana waka-waka tupa miaima lakae lo nembo talaini tekeko, utupane-mane Gotena pii enene oko katulo mana mia na-piyaini. Gotena mana oko mia napene atoto, wanda utupane-mane mana koo tupa mina-makale nembo toto, mana koo kambua miniyai-kola, utupanena mana koo okonemane yakamana nembo-tene oko mo kenda piya alane. Wuane peya-kola, akali koo minditupa-mane gitisa pii minditupa wanda utupane lamawuato, utupanena andaka kolandaka loto, wanda utupanena nembo-tene oko tangu mia-maiyane.   
\p
\v 8 Wamba Mosesato Gotena piape pua atea-kola, akali Janisa, Jambitisa-la, okonelapo-mane Mosesa yanda pimawua ateaini. Wuane pua teke, andipa akali koo ateyai tupana nembo-tene oko koyeya-kola, utupane-mane Gote lo bilipi leyama nayu nalene, Gotena pii enene oko towa yanda pimawua atalaini. \x * \xo 3:8 \xt Ek 7:11\x*  
\v 9 Wamba Isatale tane wandakali tupamane andeai-kola, Janisa, Jambitisa-la, okone-lapona mana oko kee ene ya lo andeaini-pia. Wuane pua teke, matili wandakali pitaka-mane andolai-kola, akali utupane yakama kee ene gulo atoto, mana koo utupane mineyai lo andoto, akali utupanena mana koo utupane lo tawe nayolopeya. Jia.   
\s1 Nimbato Gotena Pii Duli Lo Minatawa Atape Leane Oko  
\p
\v 10 Koo piyaini wandakali utupane-mane wuane pulupeyai tekeko, nimbato nambana mana tupa andelene. Nambato Gote lo bilipi leyo nayu loto, wandakali yangone tupa towa epelewa yamapane yo atoto, Gotena pii mana tupa lamawua atalawane. Dee, kenda-pene kambua nambanga epeya-kola, nambana nembo-tene tai atoto, namba kepa naene, Gotena piape pua atalawane.  
\v 11 Andiyoko tanepi, Aikoniame tanepi, Lisata tanepi, wandakali utupane-mane kenda-pene andane tupa nambanga giki peai-kola, namba tandaka no atewa oko Timoti nimbato nembo tele okoni. Wandakali utupane-mane kenda-pene andane tupa nambanga giki peai-kola, Akali Andane okomane namba moyoto, kenda-pene utupane pitaka mo apea. \x * \xo 3:11 \xt Ap 13:14-52; 14:5,8-20\x*   
\p
\v 12 Matilipi wandakali minditupa Jisasa Kataisa towa atu atoto, Gotena mana epene tupa wato minu atamakale nemboto atolai-kola, Gote towa yanda-pene wandakali tupamane kenda-pene andane tupa Kitisene wandakali utupane pitaka maiki pulupeyai. \x * \xo 3:12 \xt Mt 16:24-26; Jo 15:20; Ap 14:22\x*  
\v 13 Okone angi, Sataneto mana koo minalaini wandakali tupa minakasa ola-kola, wandakali utupane-mane wandakali yangone tupa minakasa olopeyai. Wuane pima polai-kola, wandakali utupanena mana koo okone koo wete gulolo-peya.   
\p
\v 14-15 Wamba nimba iwanaŋa aŋakonga ato tewa, nimbato Gotena pii pepa pelene eya tupa ale wato, mana mo atee okone nimbato nembo tele okoni. Pii pepa pelene eya utupane-mane nimba mana langeya-kola, nimbato Jisasa Kataisa lo bilipi lalene mambele, Goteto katulo nimba molo-peke lolopeya-ko. Nimbato mana nanimato nimba langema oko nembo toto, Gotena pii layene epene nimbato wamba mana moto, bilipi leyo nayu lee okone duli lo minatawa atape.   
\p
\v 16-17 Gotena wandakali tupamane balana piape epene tupa pitaka puyale makande pitawa atape-pene. Utupane-mane makande pitawa ateakale nembo toto, Goteto akali minditupana nembo-tene mina ika lea-kola, akali utupane-mane balana pii pepa pelene eya tupa pitaka pepa peleaini-pia. Balana pii okonemane wandakali nanima moyo mana languato, yakamato mana koo tupa mina napene kondalu, mana epene tika-pene tupa angu wato minu atalapape lalane. Wuane loto, balana pii pepa pelene eya okonemane nanimana mana koo tupa mo tika puato, asia epene oko andawa lalane. \x * \xo 3:16-17 \xt Lom 15:1-4\x*   
\c 4  
\s1 Kenda-pene Awua Atoto, Gotena Piape Pua Atape Leane Oko  
\p
\v 1 Matili Jisasa Kataisa bala dee lapone epola-angi, bala kiŋi gulo atoto, wandakali omenepi, sakapi, utupane pitaka yapa lo tale pulupeya. Wuane pulupeya nembo toto, Jisasa Kataisa-la, Gote-la, okone-lapona wenonga nambato pii leyo nayu loto, nimbato piape wua pua atape leyo.  
\v 2 Wandakali-mane Gotena pii oko ale amakale lo mandeke pitane ateaindopi, mandeke napene ateaindopi, nimbato Gotena pii oko lamawua atape. Nimbato Gotena piape oko puyale wamba ini kepa naene, wandakali tupana mana mo tika puato, yakamato mana koo tupa kondalu, Gotena mana epene tupa wato minu atalapa lo mana lamawua atape.   
\p
\v 3 Matili wandakali-mane Gotena pii tika-pene okone ale aa napimakale loto, pii yakama tane epele alaini okonetaka tupa ale aima lakae lo nembo tolopeyai. Wuane nembo toto, wandakali utupane-mane pii okonepene tupa mana lamai-yaini akali tisa kambua yapa lo molopeyai. \x * \xo 4:3 \xt 1Ti 4:1-2\x*  
\v 4 Wuane piyu, wandakali utupane-mane Gotena pii enene oko ale oyale kepawa masia mawuato, tisa utupanena mee pii temane tupa epelewa ale olopeyai.  
\v 5 Wandakali utupane-mane wuane pulupeyai tekeko, ole dindi lo Timoti nimba tane mana kuai lo wete ando atoto, kenda-pene nimbanga epola tupa awua atape. Nimbato Gotena pii layene epene oko wandakali tupa lamawua atoto, piape Goteto nimba geane tupa pitaka peyo nayu pua atape.   
\p
\v 6 Namba omolane oto oko mandaka gulo epeya-ko. Wandakali-mane minditaka Gote lo opa maiyaini pua teke, namba omolowa-angi, nambana tundupa oko Gote lo opa maiyene okonepene gulolo-peya. \x * \xo 4:6 \xt Pl 2:17\x*  
\v 7 Nambato Jisasa lo bilipi lalawane oko awua tepa naene, bilipi leyo nayu loto, Satane towa yanda tailo puato, sia minewa. Nambato Gotena asini epene okona tai lewane oko tai lama-lama ipulu, koyo pua epolane maki okona peakaiyu leyo. \x * \xo 4:7 \xt 1Ti 6:12\x*   
\p
\v 8 Tene okonena, Jisasato yole epene mindi namba gukale lo makande piyene eya. Matili yuu oko koyo pula-angi, wandakali kuai lo tale piyane Akali Andane okomane yole epene okone namba giyu, namba akali epene tika-pene ateya lolopeya. Balato yole okone namba angu gii napulu-peya. Jia. Akali Andane okomane yole epene okonepene tupa bala panakame epola oko andaima lakae lo maliyo atolai wandakali tupa pitakanga malupeya. \x * \xo 4:8 \xt 1Ko 9:24-25\x*   
\s1 Poloto Timoti Nimba Wamba Ini Ipupe Leane Oko  
\p
\v 9-12 Akali Dimasa bala yuu okona minditaka eya tupa epele wete wato, namba tepa alu, Tesalonaika tano okona pea. Akali Ketesenasa bala Galesia potopinjia okona pea. Taitasa bala Dalamesia disitiki okona pea. Nambato akali Tikikasa bala Epesasa tano okona peakale lewa. Andipa Luku nalipa angu ateyapa-ko. Nimba epolane asia mindi yando, Timoti nimba wamba ini ipupe. Maki balato namba moyo Gotena piape oko piyane-ko. Nimbato bala lamialu, atu ipulupape. \x * \xo 4:9-12 \xt 2Ko 8:23; Ap 15:37-39; Kol 4:14\x*   
\p
\v 13 Wamba namba Totasa tano oko tepa alu epewa-angi, nambana umbaininga pulane sakesa luu mindi buku minditupa towa akali Kapusa okona andaka yakale epewaepia-ko. Nimba epole-angi, utupane pitaka mo awua ipu-gipe. Buku sipisipi umbaini-mane waa-pene tupa yakale embesa olene. Mo awua ipu-gipe. \x * \xo 4:13 \xt Ap 20:6\x*   
\s1 Akali Andane Okomane Namba Molo-peke Lolopeya Leane Oko  
\p
\v 14-15 Kopapi, batasapi, aenepi, okonetaka-mane minditaka waa piyane akali Aleke-sandato Gotena pii nanimato lalamane oko laa napene kondalapa loto, kenda-pene kambua namba geane. Aleke-sandato mana koo minia okonena, matili Akali Andane okomane paini yole koo mindi bala malupeya. Akali koo okonemane kenda-pene mindi nimba gulane. Waiwa ando atape. \x * \xo 4:14-15 \xt 1Ti 1:18-20; Sam 62:12; Lom 2:6\x*   
\p
\v 16 Wamba gapomane wenonga wandakali-mane namba kosimi leai-angi, akali mindikipi mindimane namba moyo ata napeai. Jia. Wandakali pitaka-mane namba awua tepa alu, peai-kola, nambato pote loto, Gote nimbato akali utupane-mane mana koo mineaini okone nembo natape lewa.  
\v 17 Nambato Gotena pii oko wandakali yame waka tupa lamalu-wakola, wandakali pitaka-mane pii okone ale yiake leakale nembo toto, Akali Andane oko bala namba towa atu atoto, namba minu tai laya yane. Alu mindi pusi kapua andane wete gene layone lene tupamane namba neai-yale tekeko, Akali Andane okomane namba molo-peke leane.   
\p
\v 18 Wuane pua teke, matili wandakali-mane namba kenda-pene gulai-angi, Akali Andane okomane namba molo-peke lolopeya. Dee, namba omolowa-angi, balato namba ati kenga balana yuu epene okona atama ipu lolopeya. Matili-matilipi nanimato balana gene oko laiyu lamakale. Enene.   
\s1 Pii Lokoyo Pua Leane Tupa  
\p
\v 19 Nambato wanda Pitisilapi, akali Akuwilapi, Onesi-potasa okona yame tupapi, utupane ando kuai lo atalapape leyo oko nimbato utupane lamai-gipe. \x * \xo 4:19 \xt Ap 18:2; 2Ti 1:16-17\x*  
\v 20 Akali Etasatusa bala namba towa atu naepene, Kotini tano okona atea. Akali Topimasa bala siki pelea andala, nambato bala Mailitasa tano okona ateakale lo tepa alu epewane. \x * \xo 4:20 \xt Ap 19:21-22; 20:4; Lom 16:23\x*   
\p
\v 21 Nimba wamba ini epolane asia mindi yando, pipiya peyoto, aisa andane epalane ana oko naepola-kola, nimba wamba ini ipupe. Akali Yupulusapi, Putenesapi, Lainasapi, wanda Kolotiyapi, dee Kitisene wandakali waka tupapi, utupane pitaka-mane nimba kuai lo atape leyai.  
\v 22 Akali Andane oko bala nimbana tandini oko towa atu atoto, yakama pitaka ondowa moyo ateakale lo pote leyo.