\id 2PE - Ipili NT [ipi] -Papua New Guinea 2008 (DBL 2014) 
\h 2 Pita 
\toc1 Pitato Pepa Lapone Peyo Pee Peleane Oko 
\toc2 2 Pita 
\toc3 2Pi 
\mt1 2 PITA  
\mt2 Pitato Pepa Lapone Peyo Pee Peleane Oko  
\c 1  
\p
\v 1 Namba Saimone Pita. Namba Jisasa Kataisana aposolo akali atoto, balana piape pimawua atalawane. Bala nanimana Gote oko atoto, nanima molo-peke lalane. Wamba balato mana epene tika-pene mindi minuto, bilipi epene wete mindi nanima aposolo akali tupanga geane. Balato bilipi mindiki okonepene teke yakamanga geane mambele, nambato yakamana pepa oko peyo epe leyo.   
\p
\v 2 Yakamato nanimana Ayiane Gote-la, Akali Andane Jisasa-la, okone-lapona mana tupa wayumane nembo teyai-kola, okonelapo-mane yakama ondo wete wato, yakamana yamapane mo tambo wete laya yakale lo nambato pote lalawane.   
\s1 Gotena Mana Epene Tupa Wato Minu Atalapape Leane Oko  
\p
\v 3 Kataisato mana epene wetete mindi wato minuto, bala tanena tai-lene okomane nanima ee lo mea-kola, nanimato Gotena mana epene tika-pene tupa mana mema. Balato mana epene tika-pene utupane nanima langeane okomane, balato mana Goteto epele alane tupa wato minulane tai-lene oko nanima gea.  
\v 4 Enene, nanima yuunga wandakali tupamane mana koo tupa minaima lakae lo nembo talamane mana okomane nanima minu koyalane tekeko, yakamato mana koo utupane peya wanju atoto, balana mana epene tika-pene tupa angu wato minu atalapale loto, Goteto yakama moyokale lo potomisa pii mindi lo yata yane.   
\p
\v 5 Tene okonena, yakamato Gote lo bilipi loto teke, balana mana epene tika-pene tupa angu wato minu atamakale nembo toto, taimane makande pua atalapape. Mana epene tupa angu wato minu atoto, yakamato Gotena pii okona mana mia-makale nembo toto, taimane makande pua atalapape.  
\v 6 Yakamato Gotena pii okona mana wayumane moto, yakama tane pailo ando atamakale nembo toto, taimane makande pua atalapape. Yakama tane pailo ando atoto, kenda-pene tupa awua keato yo atamakale nembo toto, taimane makande pua atalapape. Kenda-pene awua keato yo atoto, yakamato Gotena mana epene tupa wato minu epoko pua atamakale nembo toto, taimane makande pua atalapape.\x * \xo 1:6 \xt Ga 5:22-23\x*   
\p
\v 7 Gotena mana epene tupa wato minu epoko pua atoto, yakamato wandakali yangone tupa towa epelewa atamakale nembo toto, taimane makande pua atalapape. Wandakali yangone tupa towa epelewa atoto, yakamato utupane towa yamapane yo atamakale nembo toto, taimane makande pua atalapape.  
\v 8 Anu peakale nambato yakama ando wuane pua atalapape leyope. Yakamato mana utupane moto, wayumane wato mineaindo, yakamato nanimana Akali Andane Jisasa Kataisana mana epene utupane wayumane nembo tolai-kola pulupeya. Yakamato balana mana utupane nembo tolai okonemane yakamanga dini kambua lulupeya.   
\p
\v 9 Yakamato wuane pulupeyai tekeko, wandakali minditupa-mane mana epene utupane wato mina napene kondolo-peyai. Wamba utupane-mane mana koo minea-kola, Goteto koo utupane apoto, utupane mo wenene gulaya yane tekeko, matili utupane-mane mangene epene Goteto wamba peane okone embesa olopeyai. Embasa wato, yakama lene koo atoto, mangene epene Goteto matili pulupeya tupa anda napulu-peyai. Tene okonena, utupane-mane Gotena mana epene tupa wato mina napene, kondolo-peyai.   
\p
\v 10 Amene imalini yame, Goteto yakama balana yame tupa atalapale lata wato, ee lo meane mambele, yakamato balana yame atamakale lo wayumane makande pitawa atalapape. Yakamato wuane pua ateaindo, matili-matilipi yakamato bala awua tepa alu, yuunga peaka napulu-peyai.  
\v 11 Yakamato bala awua tepa naene, balana yame atolai-kola, yakama molo-peke lolane Akali Andane Jisasa Kataisana yuu epene yapowa yalane okona polane asini oko Goteto wayumane lumbu tepa olopeya.  
\v 12 Nambato pii enene leyo utupane yakamato nembo toto, bilipi leyama nayu leyai tekeko, yakamato pii utupane embesa naene, nembo tatawa atalapale nembo teyo. Wuane nembo toto, ole kambuanga nambato yakamana nembo-tene oko mina ika lauwa lakae lo nembo teyo.   
\p
\v 13-14 Ole ukupini mindilapo namba saka atalu, nambana umbaini oko tepa olopeyo. Nanimana Akali Andane Jisasa Kataisato wuane lo namba langeane okonena, nambato katulo wuane pulupeyo nembo teyo. Wuane nembo toto, namba yuu okona saka ateyo angi, ole kambuanga nambato yakamana nembo-tene oko mina ika lewando, okone kuai lolopeya nembo teyo.\x * \xo 1:13-14 \xt 2Ko 5:1; Jo 21:18-19\x*  
\v 15 Dee matili namba omolowa-kola, yakamato pii nambato leyo utupane nembo tatawa atalapale nembo toto, andipa nambato piape taimane pukale.   
\s1 Nanimato Potopesa Akali Tupana Pii Epene Oko Yatawa Ateyama Leane Oko  
\p
\v 16 Wamba nanimato yakama languato, nanimana Akali Andane Jisasa Kataisa oko bala tai-lene wete ateya lo yakama langema okoni. Wuane loto, nanimato bala lapone peke lolopeya lo yakama langema tekeko, nanimato pii okonelapo yakama langema-angi, nanimato mee wandakali mindina nembo-tenenga ato ika leane pii temane mindi ale wato yakama langi napemane. Jia. Wamba nanimato lee-mane andema-kola, Gotena tii-pene okola, balana tai-lene okola, Jisasanga epeanga andalu, matili yakama langema.\x * \xo 1:16 \xt Mt 17:1-5\x*   
\p
\v 17-18 Aposolo akali tepo nanima Jisasa towa atu Gotena yuu wangiane epene wete okona atema-angi, nanimato okone lee-mane andema. Andema-kola, Gote tii-pene wete okomane ati kenga atoto, pii mindi Jisasa andayo leane oko loto, akali oo ateya oko nambana iwanane oko. Nambato bala towa epele wete wato, yamapane yo atalawane leane. Ayiane Goteto wuane leane okonemane Jisasa gene andane mindi maiya-kola, nanimato ale ema. Pii okone ale wato, nanimato Gotena tii-pene oko Jisasanga epea-kola, nanimato andema.\x * \xo 1:17-18 \xt Mt 17:5\x*   
\p
\v 19-21 Dee, wamba potopesa akali tupamane Gotena pii enene wete pepa pelene eya tupa nanimato yatawa ateyama teke. Wamba potopesa akali utupane-mane mee yakama tanena nembo-tene okomane potopesa pii mindikipi mindi naleainipia. Jia. Oli Sipitisa okomane potopesa akali utupanena nembo-tene oko mina ika loto, Gotena pii pepa pelene eya oko utupanenga maiya-kola, utupane-mane potopesa pii utupane leainipia. Tene okonena, wandakali mindimane bala tanena nembo-tene oko wato minuto, potopesa pii pepa pelene eya tupana tene tupa lapanawa nalape-pene ya lo yakamato bulupane nembo talapape. Utulu pangosa lamu mindi tii pua yo waa lalane pua teke, potopesa akali tupamane Gotena pii lo yata yaini tupa tii pima-pima pulu, upa pitane kaiyanda oko bala epoto, yakamana nembo-tene tupana mo tii pula-angi giau lolopeya. Yakamato potopesa akali utupanena pii leaini tupa nemboto minatawa ateaindo, okone kuai lolopeya.\x * \xo 1:19-21 \xt 2Ti 3:16-17; 1Pi 1:10-12\x*   
\c 2  
\s1 Owato Potopesa Tupamane Mana Koo Minalaini Leane Oko  
\p
\v 1 Wamba potopesa akali utupane-mane Gotena pii enene oko leaini tekeko, owato potopesa akali minditupa Isatale tane wandakali tupana tombenenga ateainipia. Wuane pua teke, andipapi owato potopesa akali minditupa Kitisene wandakali yakamana tombenga atolopeyai teke. Akali Andane okomane wandakali utupane kambo molo-peke leane tekeko, wandakali utupane-mane Akali Andane oko masia mawua atalaini. Wuane pua atoto, utupane-mane langa-langa puato, Gotena pii mana yakama langeyama loto, wandakali tupana bilipi oko minu koyoyale owato pii mana tupa yakama langu atolopeyai. Wuane pua atolai okonemane utupane yakama tane kapoyale minu koyolo-peyai. \x * \xo 2:1 \xt Mt 24:11; Ju 3-4\x*   
\p
\v 2 Wandakali utupane-mane mana koo mindipene-mindipene tupa wato minu atolai-kola, wandakali kambua-mane wandakali utupanena mana koo utupane wato minu atolopeyai. Utupane-mane wuane pua atolai okonena, wandakali waka minditupa-mane Gotena pii mana enene oko andayo pii koo loto, lamba lolopeyai.  
\v 3 Owato pii mana lalaini tisa utupane-mane yakama Kitisene yamena munipi, minditaka yolaini tupa kambua miaima lakae lo nembo toto, owato pii kambua lolopeyai. Utupane-mane wuane pulupeyai tekeko, wamba wete Goteto gii mindi yata wato, okone angi nambato wandakali koo utupane kosimi loto, minu koyawakale leaipia. Wuane lalu, Gote bala limu pali napene, wandakali utupane kosimi lokale lo gii yata yane okone epeakale lo mee maliyo ateya.   
\p
\v 4 Anu peakale Goteto wandakali utupane katulo minu koyolo-peya leyope. Wamba enjole minditupa-mane mana koo tupa minu ateai-kola, utupane-mane mee wuane pua ateakale lo Goteto ando konda nayaepia. Jia. Balato utupane kote andane mindi matili leakale nembo toto, utupane yuu koo okona mee andi latane ateakale loto, andi lo aindaka leaipia. \x * \xo 2:4 \xt Ju 6\x*   
\p
\v 5 Dee, wuane pua teke, wandakali wamba wete ateaini tupamane Gote masia mawua ateai-kola, Goteto wandakali utupane-mane mee wuane pua ateakale lo ando konda nayaepia. Jia. Balato ipa lii andane mindi epeakale leane okomane utupane pitaka peyo ome leane tekeko, akali Nowa balato Gotena mana epene tika-pene tupa mana lamawua atea-kola, Goteto balapi, balana yame wandakali yanasa tupapi, utupane angu moyo ando ateaipia. \x * \xo 2:5 \xt Jen 6:1–7:24; 2Pi 3:6\x*   
\p
\v 6 Goteto Sotomo, Gomota-la, tano okonelapo koya yakale loto, ita-mane yangea-kola, tano okonelapo sia pete angu guleaipia. Goteto tano okonelapo ita-mane yangeane okonemane wandakali matili bala masia mawua atolaini tupa mana lamawuato, yakamato wuane pua ateaindo, nambato wuane pua teke yakamapi yangokale lo mana lamai-yaepia. \x * \xo 2:6 \xt Jen 19:24; Ju 7\x*   
\p
\v 7-8 Wamba Sotomo tane wandakali ateaini tupamane Gotena loo tupa kalo puato, pamuku mana waka-waka tupa minu atoto, mana koo kambua tupa minu ateainipia. Wuane pua ateai-kola, ole dindi lo akali tika-pene Lote bala Sotomo tano okonena atoto, utupane-mane mana koo miniaini utupane balato lee-mane andaka, pii koo leaini tupa alene-mane ale aka pua ateaipia. Wuane pua atoto, akali tika-pene Lote bala mini kendawa atoto, balana yamapanenga tandaka andane wete pea-kola, ateane okonena, Goteto Sotomo tane wandakali tupa minu koya-angi, balato akali tika-pene Lote okone molo-peke leaipia. \x * \xo 2:7-8 \xt Jen 19:1-16\x*   
\p
\v 9 Kenda-pene utupane Gote wato minu atalaini wandakali utupanenga epea-kola, Akali Andane okomane wandakali utupane katulo molo-peke leaipia. Balato utupane molo-peke leane okonena, Akali Andane okomane Gote wato minu atalaini wandakali tupa molo-peke lalane asini tupa andalane lo nanimato andeyama. Wuane tekeko, wandakali minditupa-mane mana koo tupa wato minu atolai-kola, Akali Andane okomane wandakali koo utupane tandaka maima pulu, matili wandakali yapa lo tale pulupeya gii okona giau lolopeya.   
\p
\v 10 Wandakali utupanena minditupa-mane Gotena pii layene oko angini mindi jia ya nayuto, atapene tene moto, yakama tanena nembo-tene oko wato minalaini. Utupane-mane ati kenga enjole epene wete ateyai tupa ando lamba loyale, aŋakopi mindi yuku aa na-piyaini. Yakamana nembo-tene koo oko ika leya-kola, utupane-mane pamuku piyaini. Gotena wenonga mana koo wato minalaini wandakali utupane kalato atene atoto, yole koo wete mindi molopeyai. \x * \xo 2:10 \xt Ju 7-8,16\x*   
\p
\v 11 Enjole tupa yakamanga tai-lene andane wete yene atoto, wandakali utupane sia minu atalaini. Tene okonena, enjole utupane-mane Akali Andane okona wenonga atoto, katulo wandakali utupane lamba loto, kosimi lapia-yale tekeko, utupane-mane wuane na-piyaini. \x * \xo 2:11 \xt Ju 9\x*   
\p
\v 12 Wandakali-mane yia kapuapi, peango anatopepi, okonetaka tupa wato minuto, peyo ome leakale nembo toto, Goteto yia kapuapi, peango anatopepi, utupane yuu okona ateakale leaipia. Yia peango tupa mini napalene atoto, minditaka mindi pimakale nembo teyai tupa mee wuane pua teke atalaini. Wuane piyaini pua teke, owato potopesa akali utupane yakama yia peango ima mini napalene atalane okonepene atoto, minditaka mindi pimakale nembo talaini tupa mee wuane pua teke atalaini. Wuane pua atoto, utupane-mane minditaka nembo natalaini tupa ando lamba lo atalaini. Wandakali utupane-mane mana koo utupane minalaini okonena, Goteto utupane minu koyolo-peya. \x * \xo 2:12 \xt Ju 10\x*   
\p
\v 13 Wandakali utupane-mane mana koo minalaini okonena, Goteto paini yole koo mindi utupane mawuato, minu koyolo-peya. Otonga nai teya-kola, yakama towa atu tomo no atoto, wandakali utupane-mane yakama andakasa wato, tomopi, ipa taipi, utupanena kambua tupa epelewa nalaini. Wandakali utupane-mane mana koo okone minalaini okonemane yakama mo kalato ataya wato, Kitisene wandakali waka yakamana gene tupa minu koyalaini.   
\p
\v 14 Wandakali utupane-mane mana koo minalaini utupane konda na-piyaini. Jia. Ole dindi lo utupane-mane pamuku piyaini mana oko mina-makale nembo toto, ai gitisa lalaini. Wandakali mindimane Gote lo bilipi leyo nayu naleando, wandakali utupane-mane bala gitisa lo moto, mana koo tupa mineakale lalaini. Utupane-mane wandakali waka mindina minditaka yatawa ateyai tupa miauwa lakae lo nembo tatawa atalaini. Wandakali utupane-mane mana koo utupane wato minalaini okonena, Goteto utupane minu koyolo-peya.   
\p
\v 15-16 Wamba akali Beyo iwanane Belame lene okomane mana koo mindi minuluwa okonemane yole epene mindi mokale nembo toto, epele wete yaepia. Yia dongi tupamane wandakali-mane pii lalaini pua na-lalaini tekeko, potopesa akali Belameto kee ene atoto, mana koo mindi minuyale pea-kola, yia dongi mindimane wandakali-mane pii lalaini pua loto, Belame laiya loto, nimbato mana koo minuyale pele okone mina napii leaipia. Yia dongi okonemane pii okone leane okonemane Belameto mana koo minuyale peane okone mina napeakale loto, asini kando leaipia. Wamba akali Belameto Gotena asini epene tika-pene oko awua tepa alu, mana koo minalaini asini okone watama peaipia. Wuane pua teke, owato potopesa akali utupane-mane akali Belamena mana koo okone wato minu atalaini. \x * \xo 2:15-16 \xt Nam 22:7,28-35; Ju 11; Lap 2:14-15\x*   
\p
\v 17-19 Mana mindimane bala bosa lo ando ateakale lo wandakali mindimane ando konda yando, wandakali okone bala mana okonena katapusa piape piyane wandakali atola-kola pulupeya. Mana koo lamayaini wandakali utupane-mane mana koo tupamane yakama bosa lo ando ateakale lo ando kondalaini mana okonemane, utupane yakama mana koo utupanena katapusa piape piyaini. Wandakali utupane yakama tane wuane piyaini tekeko, utupane yakama luawa atoto, wandakali waka tupa lamawuato, mana nanimato minalamane tupa yakamato wato minu ateaindo, yakama andi latane ata napene, mee anana atolopeyai. Anana atoto, yakamato minditaka mindi pimakale nembo tolaini tupa katulo pulupeyai lalaini. Wandakali utupane-mane gitisa pii lalaini okonemane, wandakali epapu teke aitene mana tupa awua tepa alu, Kitisene wenene ateyai utupanena nembo-tene koo oko mina ika lamayaini. Wuane peyai-kola, Kitisene wenene utupane-mane pamuku piyaini mana okopi, mana koo mindipene-mindipene tupa wato minu atalaini. Mana koo lamayaini wandakali utupane-mane wandakali waka tupa wuane pua minu koyalaini okonena, koo piyaini wandakali utupane yakama ipa tae tee peya-kola, kapu-tene yalane okonepene ateyai. Dee, popo andane mindi epoto, mole tupa mindisa awua puku peya-kola, kingi na-epalane wuane pua teke, owato potopesa akali utupane-mane wandakali waka tupa moya napene, minu koyalaini. Tene okonena, Goteto wandakali utupane yakama yuu koo undupi-lene wete mindina atama peakale loto, yuu koo okone makande pua yata yaepia. \x * \xo 2:17-19 \xt Ju 12-13\x*   
\p
\v 20-21 Wamba wandakali utupane-mane mana koo tupa wato minu atoto, utupane yakama kopeta ateaini tekeko, matili nanimana Akali Andane Jisasa Kataisa balato nanima molo-peke leane lo utupane-mane mana meaini. Mana okone mialu, utupane-mane Gotena loo epene wete tupa ale wato, balana mana tika-pene tupa wayumane mana meaini. Mana meaini utupane-mane wandakali utupane moyo Gotena asia epene oko andawa lea-kola, wandakali utupane-mane yuu okona mana koo kalato atene tupana asia peya wanju ateaini. Wuane tekeko, andipa wandakali utupane-mane Gotena loo epene wete tupa masia mawuato, mana koo kalato atene tupa wato minulu-peke lapiai-kola, mana koo utupane-mane wandakali utupane andi lolo-peke lapia. Wuane pipia-kola, andipa wandakali utupane kopeta wete ateyai. Wamba wandakali utupane-mane Gotena mana epene wete tupa mia napeai-yale, andipa utupane yakama kopeta wete ateyai pua ata napipiai-yale. \x * \xo 2:20-21 \xt Mt 12:45; Lk 12:47-48\x*   
\p
\v 22 Pii kokoli enene mindimane wandakali utupane-mane mana mineaini okone lapana wato, yia-mane balana umbaini wasa-wasa pelene gulatane ateya-kola teke, yuu tala koo tupana yongo-yongo pangulu-peke lalane. Dee, pii kokoli enene waka mindimane loto, peango tupamane miangu tangu apoto, dee lapone nolo-peke lalaini. Koo pulu-peke lalaini wandakali tupamane wuane teke peyai-kola, piyane. \x * \xo 2:22 \xt Man 26:11\x*   
\c 3  
\s1 Akali Andane Oko Bala Epolopeya Leane Oko  
\p
\v 1-2 Nambana yamapane yene yame, wamba Gotena potopesa akali tupamane mangene Goteto matili pulupeya tupana pii lapanawa leainipia. Wuane leai-kola, matili yakamana aposolo akali tupamane pii yakama molo-peke lalane Akali Andane Jisasato leane tupa yakama languato, wua piyapape leai okoni. Andipa yakamato pii akali utupane-mane wamba leaini tupa nembo tolo-peke lapiai lakae lo nembo toto, nambato yakamana nembo-tene epene oko lapone mina ika loto, yakamana pepa lapone oko peyo epe leyo. \x * \xo 3:1-2 \xt Ju 17\x*   
\p
\v 3-4 Wamba aposolo akali utupane-mane pii mindi yakama languato, yuu oko koyo puyale pula-angi, lamba lalaini wandakali minditupa atolopeyai leai okoni. Yakamato pii okone bulupane nembo talapape. Lamba lalaini wandakali utupane-mane yakamana nembo-tene koo oko wato minuto, yakama ando lamba loto, wua lolopeyai: Wamba Jisasato potomisa pii mindi leane oko loto, namba peke lokale leane tekeko, wamba wete Goteto yuu ati-la yakale leane gii okonena atoto, andipa ateyama okona giau loto, minditaka eya tupa pitaka lawa napene, mee wamba yane okonepene teke eya okonde. Nanimana yumbane tupa oma yiake leaini tekeko, bala peke naleya okonde lolopeyai. \x * \xo 3:3-4 \xt 1Ti 4:1-2; Ju 18; Mt 24:48\x*   
\p
\v 5 Goteto minditaka wamba mo lawa peane tupa wayumane nembo tolo-peke nalene ato, utupane-mane wuane lolopeyai. Wamba wete Goteto ati lipi oko ateakale lalu, yuu oko ipa tupana tombenenga yakale lalu, peaipia. \x * \xo 3:5 \xt Jen 1:6-9\x*  
\v 6 Wuane piyu, matili Goteto ipa lii andane mindi epeakale lea-kola, ipa lii epeane okonemane minditaka wamba yuu okona yane tupa pitaka wetete minu koyaepia. \x * \xo 3:6 \xt Jen 7:11; 2Pi 2:5\x*  
\v 7 Dee, andipa Goteto pii mindiki okonemane teke yuu ati-la, okolapo mee yakale lo ando ateya tekeko, matili Goteto bala masia mawua atolaini wandakali tupa kosimi loto, minu koyola-angi, balato yuu ati-la, okonelapo ita-mane yangokale lo maliyo ateya.   
\p
\v 8-9 Balato okonelapo yangokale lo maliyo ateya okonena, wandakali minditupa-mane loto, Akali Andane oko bala peke lokale lo potomisa pii leane tekeko, bala wamba ini peke naleya, okonde lalaini. Utupane-mane wuane lalaini tekeko, nambana yamapane yene yame, yakamato pii mindiki oko embesa naene, wua lo nembo talapape: Akali Andane okomane andeya-kola, oto mindiki angu mali tausene mindi gulalane. Dee, balato andeya-kola, mali tausene mindi ole mindiki angu gulalane nembo toto, balato mangene minditupa wamba ini kapoyale napiyane. Tene okonena, wandakali-mane loto, Akali Andane okomane mangene mindi pukale lo potomisa pii leane okone balato wamba ini pii napeya, okonde nalape-pene. Jia. Balato wandakali mindikipi mindi alu napeakale nembo toto, yakama towa wamba ini kepa na-alane. Jia. Wandakali pitaka yamapane peke leakale lo maliyo atoto, bala ati kenga atala yuunga ini kapoyale peke naleya. \x * \xo 3:8-9 \xt Sam 90:4; Ip 2:3; 1Ti 2:4-5\x*   
\s1 Yakamana Bilipi Oko Auwa Tepa Olaini, Tika Ando Atalapape Leane Oko  
\p
\v 10 Andipa Akali Andane oko bala wamba ini naepene, mee maliyo ateya tekeko, pake nalane akali mindi bala oko angi epolopeya lo nanimato nembo natene atoloma-kola, bala epalane. Wuane pua teke, Akali Andane bala oko angi epolopeya lo nanimato nembo natene atoloma-kola, bala epolopeya. Okone angi, ati lipi oko tula andane loto, alu pulupeya. Wuane pula-angi, ati lipi okona minditaka eya tupa pitaka ita-mane taa yiake lola-kola, alu pulupeyai. Dee, yuu okopi, yuu okona minditaka yakale lene eya tupapi, utupane pitaka taa yiake loto, alu pulupeyai. \x * \xo 3:10 \xt Lk 12:39; 1Tes 5:1-2; Mt 24:29,35\x*   
\p
\v 11 Matili minditaka eya utupane pitaka ita-mane taa yiake loto, alu pulu-peyako. Andipa yakama tane Gote mawuato, yakamato Gotena mana epene tupa wato minu atape-pene.  
\v 12 Wuane puato, yakamato Gotena gii okone wamba ini kapoyale ipupia lakae lo nembo toto, maliyo atalapape. Gii okone epola-angi, ati lipi oko ita-mane taa yiake lola-kola, alu pulupeya. Wuane pula-angi, ita-mane tolane okone toto andane wete pula-kola, yuu oko koyalu, mee ipa yale yolopeya.   
\p
\v 13 Matili yuu ati-la andipa eya okolapo wuane pua koyolo-peyapi tekeko, wamba Goteto potomisa pii mindi leane oko loto, matili nambato yuu ati-la wenene mindi yakale lolowa-kola, yuu wenene okonena wandakali atolai utupane-mane mana epene tika-pene tupa angu wato minu atolopeyai leaipia. Goteto yuu wenene mindi yakale lokale leane okone yata yakale lo nanimato maliyo ateyama. \x * \xo 3:13 \xt Ais 65:17; 66:22; Lap 21:1,27\x*   
\p
\v 14 Nambana yamapane yene yame, Goteto wuane peakale lo yakamato maliyo atoto, bala yanda pimawua ata napene, bala towa yamapane mindiki palu atalapape. Wuane pua atoto, balana wenonga yakamanga koo tene mindi nayene, yakama kilini lene epene wete atamakale nembo toto, yakamato piape taimane pua atalapape. Yakamato wuane pua atolai-kola, matili Akali Andane oko bala epola-angi, yakamato mana epene minu atolaini utupane balato andolopeya.   
\p
\v 15 Akali Andane okomane wandakali kambua tupa molo-peke lokale nembo toto, bala yuunga kapoyale peke naleya lo yakamato nembo talapape. Wamba Goteto nanimana yamapane yene amene Polo balanga nembo-tene epene mindi maya-kola, balato pii nambato pepa peleyo mindiki okonepene teke mindi pepanga peyo epe loto, yakama langea okoni. \x * \xo 3:15 \xt Lom 2:4\x*   
\p
\v 16 Pii nambato pepa peyo epe leyo okonepene teke loto, Polo balatopi balana pepa tupa pitakana pii okonepene tupa teke loto, peyalane. Pii balato pepanga peyo yata yane eya utupanena minditupana tene tupa ayiawa wete andape-pene guleya-kola, Gotena pii tupa wayumane mana mia napene wandakali atalaini tupamane pii utupanena tene tupa tatake alaini. Wandakali utupanena bilipi oko tai ya napeya-kola, utupane-mane Polona pii tupapi, Gotena pii waka pepa pelene eya tupapi, pii utupane pitakana tene enene oko lamai napene, pii waka tupa lamawua atalaini. Tene okonena, matili Goteto wandakali utupane minu koyolo-peya.   
\p
\v 17 Nambana yamapane yene yame, Gotena loo tanga lalaini wandakali utupane-mane epoto, owato pii mana minditupa yakama langulu-peyai oko yakamato nemboto ateyai okoni. Utupane-mane wuane puato, yakama kilau lo molai-kola, yakamato yakamana bilipi oko awua tepa olomane. Tika ando atalapape. \x * \xo 3:17 \xt Mk 13:33; 1Ko 10:12-13\x*  
\v 18 Yakamato wuane pulumane lo ando atoto, nanima molo-peke lalane Akali Andane Jisasa Kataisa balato wua puato, yakama ondo wete alane lo yakamato wayumane wete mana mo atalapape. Mana okone mo atoto, andipapi, matilipi, wandakali-mane balana gene oko laiyu lo atape-pene. Enene.