\id 1TI - Imbo-ungu NT [imo] -Papua New Guinea 1997 (DBL 2014) 
\h 1 Timoti 
\toc1 Poloni Iye Timoti Pipia Kumbe Lepa Topa Tirimu Ungumu 
\toc2 1 Timoti 
\toc3 1Ti 
\mt2 Poloni Iye Timoti Pipia Kumbe Lepa Topa Tirimu Ungumu  
\mt1 1 Timoti  
\imt1 I Ungu Torumumunga Ungu Pulu Mare  
\ip Poloni Kraistinga imbo Efesus kombuna moloringima Timoti tapu tepa nokopili nimbe yu purumu. Anjo molopalie Timoti Kraistinga imboma tapu tepa nokopa kondombalo mele mane tipelie i pipiamu topa mundurumu.  
\ip Goteni enonga tapu iyema toya toko molangei nimbe enge tipili.  
\c 1  
\ms1 Poloni Timotindo Nunge Ulu Tenioma Kinye Kraistinga Imbomani Ulu Tengema Kinye Wamongo Nokoko Kondowi Nimu Ungu Mare  
\s1 Poloni i pipiamu tombaindo oi pulu polopa torumu ungumu  
\p
\v 1 Na Pol, Jisasi Kraistini nanga kongonomu tendepuwi nimbe lipe mundurumu iyemu. Lino Tepa Lipe Mindili Nolemala Aulkena Wendo Ltimu Gote kinye lino paa tepa kondombalo nimbo konopu tipo nokopo moromolo iye Kraist Jisasi kinye na kanoko liko i kongonomu tendepuwi ningilina aku tepo andopo nimbo tiro iyemuni  
\v 2 nu Kraistinga iyemu molko kondani nimbo nani nu nokoro, nu kinye ilto Kraistinga iye talo morombolomunga nu nanga kandi malo Timoti i pipiamu topo tiro. Lapa Gote kinye linonga Awili Kraist Jisasi taloni nu kinye konopu noiko teko kondoko, nuni wali te ulu mare teko kenjinio kinye nu kondo kolko mindili nani naa ningo, nu konopu ame topili taka liko molani nengili.   
\s1 Ungu kolo tolima mane tirimele imbomani nimele unguma naa pilipo umbulu timolo ungumu  
\p
\v 3 Nani kombu Masedonia provins pumboindo nu enge nimbo walipo pilipolio kombu awili Efesus molani niu kano mele kinye nu akuna we molani nio. Iye mareni akuna kolo toko ungu lupema mane tiko moromele kani akuna we molko kano iyemando aku ulu naa teaio niwi nimbo nu walipo pilto.  
\v 4 Aku iyemani Juda imbomanga kangema toko anda kolepalemanga imbima tule teko toko kau moromele ungumani enonga konopuma topa beambo tipe, ungumanga pulumu pilingeindo we opa karaye kau tenge aulkemu akirindipe, Gotenga ungu paimboma pilinge aulkemu pipi tirimo kani enondo aku ulu naa teaio niwi. Kano iyemani mane tirimele ungumani Gote pimolo aulkemu naa akirindirimo. Gotenga ungumu kinye, yuni lino kinye tembo nimbe, nimbe panjirimu uluma kinye, Kraist Jisasi molopa linonga nimbe tenderimu mele akumu paimbo nimbo enge nimbo pimolo ulumuni kau aku taloni kau pimolo aulkemu akirindirimo.  
\v 5 Kano iyemani ningo kenjiko imboma teko embambo tirimele iyemando aku teko naa teaio niwi nio mele Kraistinga imboma nendo yando enongano konopu mondoko molangei nimbo kano iyemando aku teko niwi nio. Paimbo ningo enge ningo pimele ulumu paa paimbo teremele ulumu kinye, konopu kake teli ulumu kinye, konopuni pilkolio Goteni kanopa keri karomo ulu keri te konopuna naa peremo lepamo ningo pileli ulumu kinye, aku tepa konopu penga peremo imboma andi yando enongano konopu mondoli ulumundo nio.  
\v 6 Imbo mare aku tepa konopu pengama naa pepili molko aku ulu pengama tiye kolkolio we unguma kau ningo keke lepo toromele.  
\v 7 Mosesini Gotenga ungu manema pilipelie yando nimbe tirimu ungu manemanga mane tilima molamili nimele nalo ungu manemanga puluma naa pilko, enge ningo mane tingeindo nimele ungumanga puluma eno enongano wamongo naa pimele.   
\p
\v 8 Lino pimolo, Mosesini ungu mane tirimuma tumbi tipo pilipo, aku ungu manemanga ungu pulumu wambo pilipolio ulu akuma temolo kinye aku ungu manema paa penga nimbo pimolo.  
\v 9-10 Kano ungu manemani kongono wamba tepa teremo mele kanopolio kano ungu manema penga nimbo pimolomunga ungu pulumu i tepa: Goteni ungu manema timbeindo tumbi tiko moromele imboma pilko teangei nimbe naa tirimu. Ungu manema toko tangondoko kalambo naa nimele imboma kinye, Gotenga unguma liko umbulu tiko ulu pulu kerima teremele imboma kinye, Gotenga unguma naa pilko ulu kake telima pilipo teamili naa nimele imboma kinye, imbomani enonga anupili lapali toko kondoromele imboma kinye, imbo lupema toko kondoromele imboma kinye, wapu ulu kerinale teremele kango imboma kinye imbo yuma kinye, kombu awili Sodom imbomani iyema enongano ulu kerinali teko amboma enongano ulu kerinale teringi mele teremele imboma kinye, maket tepo kou liemili ningo imboma wapu ltimele imboma kinye, kolo toromele imboma kinye, kotena pungo paimbo nimolo ningo panjikolio kolo toromele imboma kinye, Gotenga unguma pilipo Kraistinga imboma teko molangei nimbo mane tirimolo ungu lupema peya topa tangondambaindo ulu kerima teremele imboma pali kinye, Mosesini tirimu ungu manemani aku ulu teko kenjiko moromele imboma pali nokopili nimbe Goteni aku ungu manema pepili nimbe, nimbe panjirimu.  
\v 11 Gotenga unguma mane tirimolo ungu paimbo akuma Goteni na kanopa lipe andoko ningo tiwi nimu unguma kinye tendeku tipe. Aku ungumu paa penga olandopamu, imbi paa peremo Gotenga ungumu.   
\s1 Poloni Goteni yu kondo kolorumumunga paa tereno nimu ungumu  
\p
\v 12 Jisasi Kraist linonga Awilimuni i kongono tenderomunga engemu tipelie na kanopa penga pilipe nanga kongonomu tiye naa kolopa manda tepa kondombalo nimbe pilipelie i kongono tenderomu na tirimumunga yundo paa tereno nio.  
\v 13 Paimbo oi yunge imbimu lipo ungu taka tondopo, yunge imboma kinye opa pule topo mindili tipo topo kondomboi teru nalo yu paimbo Gotenga Malo molopa Goteni lino nokopili nimbe maina lipe mundurumu iye Kraist molorumu mele pilipo tundupolio, Yunge temanemu toringi pilipolio kolo toromele nimbo enge nimbo pileru mele akumu tepo alowa terumunga yuni kanopalie na kondo kolopa mindili nopili naa nimu.  
\v 14 Nalo na Kraist Jisasi kinye peya tapu topo molorumbulu kala linonga Awilimuni na paa we kondo kolopalie, Yu paimbo nimbo enge nimbo pileli ulumu kinye imboma konopu mondoli ulumu kinye kano uluma Awilimuni na olandopa tirimu.   
\p
\v 15 Lino ulu pulu keri terimulu imboma lipe tapondopa, mindili nolemala aulkena wendo lipe yu kinye peya molopo kondomolo aulkena lipo mondambo nimbe Goteni maina lipe mundurumu iye nomi Kraist Jisasi maina mainye orumu. Aku ungumu paa paimbo ungumu. Imbomani konopu talo naa pepili paimbo aku ulu terimu ningo paa enge ningo pilko ipuki tiengei. Aku temolo kinye paa ku naa pemolo. Ulu pulu keri teremele imbomanga na ulu pulu keri awini terumunga na iye kiyendomu,  
\v 16 nalo Kraist Jisasini imboma konopu topele tangei nimbo taka lipo nokopo ame topili moro. Nani paimbo manda lipe tapondombalo ningo pilinge imboma paimbo kondo kolopo lipo tapondopo, koinjo molko kondoko kau punge ulu pulumu timbo ningo kanangei nimbelie na ulu pulu keri olandopa teru iyemu oi kondo kolopa tepo kenjirumunga mindili naa namboi nimbelie lipe tapondorumu.  
\v 17 Waliwalima molopa kau puli iye nomi kingimu molopa, kolopa naa kolombalo iyemu molopa, imbo teni naa karomo iyemu molopa, yu tendekumu kau paimbo Gote molopa, aku tepa moromo Gote yu kau imbi ola molopa enge pepa, enge nimbe pa tepa, aku tepa molopa kau pupili! Aku tepa kau nemili! I paa.   
\s1 Poloni Timotindo ulu kerima kamukumu mainye pupili ningo enge ningo kongono tewi nimu ungumu  
\p
\v 18-19 Nanga malo Timoti, Gotenga ungu nimbe mundulima Kraistinga iye mareni nu molonio mele oi ningo tiringi mele pilipolio nu paa aku teko teani nimbo, nimbo tiro. Imboma teko kenjiko molangei nimele melema mainye pumbe, Gotenga kongono tepo moromu enge pepili kani enge nimbo opa paa teambo ningolio nu tenio mele oi ningo tiringi ungu akuma pilko liko teani. Kraist Jisasi paimbo ningo enge ningo pino mele tiye naa kolko, waliwalima konopuni pilkolio Goteni kanopa keri pimo ulu keri te nanga konopuna naa peremo. Kongono teroma tepo kondoro lepamo ningo pilko molani! Aku ulu talo ambolkolio opa enge nimbo teambo ningo nu tenio mele oi ningo tiringi ungu akuma paa pilko liko teko molani. Imbo mareni kano ulu talo naa tembo kinye ulure molo ningimunga, nona andoli sip te nona kou teni topa bulturumo kinye paa keri lemo mele kano imboma aku teko mele ipuki teringi ulumu paa kamukumu keri lierimu.  
\v 20 Aku teringi imbomanga iye Himeneus kinye Aleksander kinye elo aku teko teringili kinye kuromanga nomi Satan mindili lipe tipili mindili nangili niu. Aku teko molko kenjikolio Gote ungu taka tondoko yunge imbimu teko naa kenjingele mele pilengili nimbo aku ulu teru.   
\c 2  
\s1 Kraistinga imboma maku toko molko Gote popo toko kapi ningo Yunge imbi liko ola mundundunge mele ungu mane te  
\p
\v 1 Manda, nani eno teangei nimbo ulumanga oi kumbe lepo enge nimbo teangei nimbo niomu i tepa, Imbomanga pali Gotendo unguma nindiko, konge tendeko, eno tapondopili nindiko, paa tereno ningo nengei.  
\v 2 Eno nokoromele iye nomi kingima kinye gavman imboma kinye akumanga Gote konge tendangei. Gote kanopa penga pimo uluma tepo molopo konopu kake tepili molopolio lino waye taka lipo molamili ningolio aku ulu teangei.  
\v 3 Aku uluma penga ltemo. Lino Tepa Lili Gote aku uluma kanopa penga pimo.  
\v 4 Gote yuni imboma pali mindili nolemala aulkena wendo ongo na kinye peya molko kondonge aulkena pungo, ungu tukumemu pilko ambolonge lemo paa konopu lepa moromo.  
\v 5 Akumunga ungu pulumu i tepa, Gote tendekumu kau moromo; iye tendekumu kau Gote kinye lino maina imboma kinye linonga tuku tingina moromo, aku iyemu yu Kraist Jisasi.  
\v 6 Goteni wai panjirimu wali Kraistini yu imbomanga pali kolo wangopa kolorumu ulumuni imboma kot kamukumu pame tepa kololi ulumunga wendo ltimu. Aku ulu terimumuni Goteni imboma waye tepa limbei teremona lipo manjirimolo.  
\v 7 Kraistini nanga ungumu pungo ningo tindiko, nanga kongonomu tendepuwi nimbe na lipe mundurumu akumunga pulumu Gote kinye imboma kinye popo tiko molonge aulkemu akirindimbeindo kolorumu kanomu. Kolo naa toro. Paimbo nio. Juda imbo naa moromele imbo lupema paimbo ningo enge ningo pilinge ulu paimbomu eno mane tiemboi nimbe na lipe mundurumu.   
\p
\v 8 Aku kani kombu lupe lupemanga pali Kraistinga imbomani Gote popo toko kapi ningeindo maku toko molonge kinye linonga kangi konopuma pali Gotenga ningo konopu kake tepili molonge imboma Gote kinye ungu nemili ningolio, mumindili kolko opa karaye tenge ulu te naa pepili ki ola munduko Gote kinye ungu nengei.   
\s1 Ambomani ulu pengama teko molko kondangei nimbe ungu mane tirimu  
\p
\v 9 Ambomanga ungu te i nio. Iyemani lino kanoko eio konopu leangei ningo wale pakoli pengama naa pakangei. Au nombe nombe naa tondaio. Enonga pinyendima au tiko, kou goloni teli melema kinye kulumbu penga kou mone olandopa purumoma kinye, akumani enonga kangima au tiko wale pakoli kou olando pulima pakoko, naa teangei. Enonga mandana pakoromele mele aku teko pakangei.  
\v 10 Imbomani lino kanoko penga kanangei ningolio ulu tumbi nilima kau teangei. Aku uluma Gotenga amboma moromolo ningo yunge ungumu pilko moromele amboma au tinge mele pengama.   
\p
\v 11 Kraistinga imbo maku toko molongena amboma taka liko molko unguma naa ningo, Gotenga unguma wamongo pilko, unguma pilko liko molangei.  
\v 12 Ambomani iyema naa nokoko, Gotenga unguma mane naa tiengei nio. Ungu naa ningo taka liko molko pilengei.  
\v 13-14 Goteni iye Adam oi kumbe lepa tepa, altopa ambo Ipu terimu. Pele kuromanga nomi Sataneni kolo topa kondi torumu unguma Adameni paimbo nimo nimbe kumbe lepa pilipe naa ltimu. Ambomuni kolo toromo ungumu paimbo nimo nimbelie Goteni nimu ungumu topa tangondopa ulu pulu kerimu terimu. Akumunga amboma aku teko taka liko molangei.  
\v 15 Aku paimbo nalo amboma Kraist Jisasi molopa tenderemo mele paimbo ningo enge ningo pimele mele tiye naa kolko waliwalima enge ningo pilko kau molko, waliwalima imboma konopu mondoko, lino Gotenga amboma molamili ningo yuni ulu kake telima nimbe karomo uluma teko, enonga imbima teko mainye munduko taka liko molkolio, bakulu menge kinye Goteni eno molko kondangei nimbe lipe tapondombalo.   
\c 3  
\s1 Kraistinga imbo talapemanga nokoli iyema teko molonge ungumu  
\p
\v 1 I ungu tukume nimboi. Iye teni Kraistinga imbo talapemu nokamboi konopu lemo lemo kongono tukumemu konopu mondoromo.  
\v 2 Akumunga Kraistinga imbomanga nokoli iyemu molombalo iyemu yu iye paa tumbi nili iye te molopa, imbomani kanoko keri pilinge ulu te yu kinye naa peli iyemu molopili. Nokoli iye molombalo iyemu yu ambo tendekumunga iyemu molopili. Yu molopa kondopa, ulu pengama kau konopu kimbo tipe, konopu lepa kondombalo imbomani yu kanoko penga pilko yunge unguma liko awili tinge ulu pengama kau tepa, yunge ulkena onge imboma tukundo wangei nimbe nokopa kondopa, Gotenga unguma imboma paa pilengei nimbe tumbi tipe mane timbelo ulumu lipe manjipe, aku tepa iyemu molopili.  
\v 3 No nomba keke lepo naa topa, imboma kinye mumindili welea naa kolopa opa naa tepa, imboma kinye taka lipe molopa, kou mone olandopa konopu naa mondopili.  
\v 4 Yunge ambomu kinye bakuluma nokopa kondopa, yunge bakuluma yunge unguma taka liko pilko liko tenge tiko teangei mele mane tipili.  
\v 5 Iye teni yunge ambomu kinye bakuluma manda naa nokopa kondomo lemo Gotenga imbo talapemu nokombalo kongonomu manda naa tembalo.  
\v 6 Kraistinga imbo talapemu kokele tukundo ombalomuni yu iye pengamu konopu lepalie yu none tembalo aku wali Goteni oi Satan kot tendepa mainye mundurumu mele iye akumu aku tepa kot tendembalo kani kokele tukundo ombalo iye nokoli kongono manda naa tembalo.  
\v 7 Kraistinga imbo talape tawendo moromele imbomani iye te kanoko imbi keri tirimelemuni nokoli kongono temo lemo Sataneni ungu keri nindirimelemuni aku iyemu melu mele lepa poimbelo. Akumunga nokoli iye molombalo iyemu tawendo molonge imbomani yu kanoko penga pilko yu iye toya tolimu ninge iyemu aku Kraistinga imbo talape nokoli iyemu molopili.   
\s1 Kraistinga talapemanga tapu iyema teko molonge ungumu  
\p
\v 8 Kraistinga imbo talapemunga tapu iye molongema eno kape i teko mele molko kondangei. Imbomani eno kanoko penga pilko enonga unguma liko awili tiko, eno linonga tapu iyema molonge lemo paa ninge uluma tekolio kongono tengeindo wamongo pilko taka liko tenge iyema molko; konopuna ungu lupe liko manjiko kerena ungu lupe ningo aku ulu naa teko, imbo marendo ungu lupe ningo marendo alowa teko ungu lupe ningo naa teko; no enge nili awini nongo keke lepo naa toko, Kraistinga imbomanga kongono tendepolio kou mone awini limbo konopu lengei iyema naa molangei.  
\v 9 Aku iyema lino Jisasi Kraistini linonga nimbe tenderimu lipe tapondoromo mele paimbo nimbo enge nimbo pimolo imboma Goteni ungu lopeke terimuma nimbe para tirimu ungu paimboma paa ambolonge iyema molangei. Enoni ungu paimboma ambolongeindo konopuni pilkolio Goteni kanopa keri pimo ulu te konopuna naa peremo, kongono teroma tepo kondoro lepamo ningo pilkolio, ungu paimboma ambolangei.  
\v 10 Tenge uluma oi manda manjiko kanokolio, eno molko kondoko, imbomani kanoko keri pilinge ulu te eno kinye naa pepili molonge lemo Kraistinga imbo talapemunga tapu iyema manda molonge.   
\p
\v 11 Enonga amboma kape, imbomani kanoko keri pilinge uluma naa teko, uluma tenge mele wamongo teko pilko taka liko teko molonge amboma molko, imbo tenga ungu umbulkondo naa nindiko, molko kondoko, enonga kongonoma toya toko pilko teko kondonge amboma molangei.   
\p
\v 12 Kraistinga imbo talapemunga tapu tembalo iyemu yu ambo tendekumunga iyemu kau molopili. Yunge ambo bakuluma nokopa kondopa, yunge bakulumani yunge unguma wamongo pilko liko, liko awili tiko molonge mele mane tipe kondopili.  
\v 13 Kraistinga imbo talapemunga tapu teko kondonge iyema imbomani liko awili tiko enonga imbima kapi nimele kape, Kraist Jisasi paimbo ningo pimele mele olandopa enge ningo pilkolio, aku teko enge ningo pimele mele pipili naa kolko imboma tumbi tiko ningo tinge.   
\s1 Poloni Timoti i pipiamu topa tirimumunga ungu pulumu  
\p
\v 14 Nu kanambo nimbo nu moronona nondopo paa wambo konopu lepolio nalo i pipiamu oi nu timboindo toro.  
\v 15 Nalo ulu teni na pipi timbelo kinye manda nondopo naa ombonje kani nimbolio Gotenga imbo moromelema teko molonge mele pileni nimbo i pipiamu oi topo tiro. Aku imboma koinjo molopa kau puli Gotenga imbo talapemu. Aku talapemu ungu paimbomu lipe tapondopa enge nimbe pepili nimo talapemu. Ungu tukume akumu ulkemu mele, Gotenga imbo talape akumu ungu tukumemunga ulke timumuni angimo aku tepa enge tirimo.   
\s1 Gotenga ungu pulumu aku ulu paa olandopa  
\p
\v 16 Oi Gotenga ungu te yuni mane tirimu ungu lopeke terimumu kinye mona nimbe para tirimu aku ungumuni lino Gotenga imboma molopo yuni kanopa penga pimo uluma temolo mele lipe ondoromo aku ungumunga ulu pulumu paa enge nilimu, imbomani aku ungumunga pulumu manda teko mainye naa mundunge. Aku ungu pulumu i tepa,  
\q1 Yu maina iye te omba mona molorumuna imbomani kanoringi. Yu ulu pengama tepa molopa kondorumu mele Mini Kake Telimuni lipe ondorumu.  
\q1 Mulu kombuna enselemani yu kanoringi. Yunge temanemu mai kombuna pali yunge imbomani toko tilko andoringi.  
\q1 Imboma kano temanemu pilkolio paimbo ningo enge ningo pileringi.  
\q1 Goteni yu mulu kombuna olando lipe, yu oi iye enge nilimu molorumu kombu enge nili pa telina mepa pumbe mondorumu.   
\c 4  
\s1 Imbo mareni kolo toko nimele ungumani imbomanga konopuma tepa beambo tindirimo ungumu  
\p
\v 1 Kinye ulu mare wendo oromomunga ungu mare Mini Kake Telimuni i tepa tumbi tipe nimbe para tirimo. Altopa wendo ombalo walimanga kolo toli kuromani ungu ningema kinye, kuro mareni mane tinge unguma kinye, imbo mareni pilkolio Kraist paimbo ningo enge ningo pilinge ulumu tiye kolonge.  
\v 2 Aku unguma iye topele mapele tolimani kolo toko mane tirimele. Aku iyemanga konopu naa pepa, enonga konopuni naa pilko ulu pulu keri teremelema naa pilko moromele.  
\v 3 Aku iyemani mane tikolio ningeindo, iyema ambo naa liko amboma iye naa pangei ningo, langi mare imbi tikolio aku langima kalaro moromo kani mi toko naa naio ninge. Nalo langi akuma Goteni lino Jisasi yu paimbo nimbo enge nimbo pilipo, ungu paimboma pilipo limolo imbomani nangei nimbe terimu. Aku langima lipo Gote kinye paa tereno nimbo nomolo kinye ulure molo.  
\v 4-5 Goteni terimu melema pali pengama. Gotenga ungumu kinye linoni Gote kinye ungu nimolo ungu taloni langi kinye melema pali Gotenga mele kake telima lembalo akumunga langi akuma tiye kolko naa nonge kinye manda molo. Gote kinye paa tereno ningo liko nonge kinye manda lipo nomolo.   
\s1 Timoti Kraistinga kongono tendeli iye pengamu molombalo nimu  
\p
\v 6 I nio mele nunge Kristen angenali aku teko teangei ningo mane tinio kinye nu Kraist Jisasinga kongono tendeli iye pengamu molonio. Lino ungu pengama paimbo nimbo enge nimbo pimolo unguma kinye Kraistinga ungu puluma mane tirimuluma kinye oi kape altopa kape pilko liko teko moronoma pilko liko tenio kinye nu kinye enge nimbe pepili molonio.  
\v 7 Ungu timborimbo ungumu Gotenga ungumu topa mainye mundumbei teremoma kinye kange kerima toromele akuma umbulu tiko, Goteni kanopa penga pimo uluma kau pilipo teambo ningo aku uluma wamongo teko pilko kondoko teko molowi.  
\v 8 Paimbo kangimu enge nipili nimbo ulu mare teremolo kinye akumu penga. Aku teremolo kinye kangimu paimbo enge nimomunga paimbo lino alaye kolte lipe tapondoromo. Nalo Goteni kanopa penga pimo uluma wambo pilipo temolo ulu akumu paa olandopa pengamu. Aku temolo ulumuni lino lipe tapondopa, kinye ya maina moromolo mele kinye pele mulu kombuna molomolo mele kinye timbelomunga akumu paa olandopa kani Goteni kanopa penga pimo uluma wamongo pilko teko molowi.   
\p
\v 9 I nio ungu akumu paimbo. Aku ungumu imbomani konopu talo tepa naa pepili kamukumu pilko ipuki tinge.  
\v 10 Waliwalima koinjo molopa kau puli Goteni imboma pali Tepa Lipe Mindili Nolemala Aulkena Wendo Ltimo Iyemu yuni paimbo lino yu ipuki timolo imboma lipe tapondopa mindili nolemala aulkena wendo ltimo. Aku teremomunga lipo manjipolio, Yuni lino lipe tapondopa tepa kondombalo nimbo nokopo molopolio lino yunge kongonoma enge nimbo paa mindili nombo teremolo.   
\p
\v 11 I ungu nioma pali Kraistinga imboma pali ningo tiko, teangei ningo mane tiko molowi.  
\v 12 Nu iye kokelemu, nalo imbomani nu iye yumu molo, nu lipe manjili naa peli iyemu konopu leko nunge ungumu umbulu timolo konopu naa leangei. Nunge ungumu pilko liengei ningo molowi. Nuni ungu pengama ningo, molko kondoko teko andoliko, imboma paa konopu mondoko, Kraist ipuki tiko, Goteni ulu kake telima nimbe karomo uluma teko, aku tekolio Kraist paimbo ningo enge ningo pimele imboma na molopo tembo mele manda leko molko tenge mele kanangei ningo aku ulu tewi.  
\v 13 Na oi welea naa ondu lemo, nuni Gotenga bukuna ungu moromoma imboma pilengei kambu toko, aku ungumanga ungu puluma imboma ningo tiko, Kraistinga imboma teko molonge mele mane tiko molowi.  
\v 14 Kraistinga imbo talapemunga tapu iyemani nu ambolko Goteni yunge kongonomu teko kondani nimbe lipe tapondopili ningi kinye Gotenga nimbe munduli ungumu iye teni pilipelie yando nu nimbe tirimu kinye Goteni nu kongono teani nimbe enge tirimu akumu nu tiye naa kolowi.   
\p
\v 15 Aku engemu ambolko kondoko kongonoma enge ningo tewi. Aku kongonoma teko kondoko molonio mele imbomani pali kanangei.  
\v 16 Nu molonio mele kinye, nuni imboma mane tinio unguma kinye, aku ulu talo nokoko kondowi. Tiye naa tepili enge ningo aku teko tenio kinye aku teko teniomunga Goteni nu kape nunge ungumu pilinge imboma kape peya lipe tapondopa mindili nolemala aulkena wendo lipe yu kinye peya molko kondonge aulkena lipe mondombalo.   
\c 5  
\ms1 Ambo Waima Kinye Tapu Iyema Kinye Kongono Kendemande We Tendeli Imboma Kinye Timoti Yu Kinye Enoni Teko Molangei Unguma Poloni Timoti Mane Tirimu  
\s1 Poloni Timotindo imboma kanokolio nanga pulu ltemo imbo kandima ningo kanowi nimu ungumu  
\p
\v 1 Kinye Kraistinga imbo talapena moromelema kinye tenio uluma nemboi. Iye anda te iri naa towi. Tepa kenjimbelo kinye kanokolio nunge lanie kinye nino mele aku teko ulu toya topo teamili ningo tiwi. Nunge angenali nokorono mele aku teko iye kokelema nokowi.  
\v 2 Nunge aminye kinye tereno ulumu aku teko amboma kinye tewi. Goteni kanopa penga pimo uluma nunge keminyeli kinye tereno ulu aku mele ambo wenepoma kinye tewi.   
\s1 Ambo waima nokonge ungumu  
\p
\v 3 Ambo waima imbo mareni eno liko naa tapondongema paa liko tapondoko nokani.  
\v 4 Nalo ambo wai te yunge bakuluma molo yunge bamupilima molonge lemo aku imbomani Gotenga ungumu pilipo teamili ningolio oi kumbe leko enonga imbo pulu lemoma nokoko, aku imboma eno bakuluma moloringi kinye lapali anupilini eno nokoringimunga enoni kinye aku teko pundu toko aku ambo waima liko tapondoko nokangei. Aku teko teremele uluma Goteni kanopa penga pimomunga aku ulu teangei.  
\v 5 Ambo wai te yu imbo teni nokombalo imbo te naa moromomunga yu paimbo ambo wai pinyewe akoli moromo ambo akumu Goteni na paimbo lipe tapondopa nokombalo nimbe pilipelie ipu leli tangoli kape Gote kinye ungu nimbe liko tapondowi nimbe konge tepa moromo. Aku tenge ambo waima liko tapondoko nokonio kinye aku paa.  
\v 6 Ambo wai te yu yunu konopuni pilipe wapera topa uluma teremo ambo akumu yu paimbo we moromo nalo ambomu kololi imbo mele moromo.  
\v 7 Aku ambo waima kinye enonga imboma kinye imbomani kanoko keri pilinge uluma naa teangei ningo eno aku teko mane tiwi.  
\v 8 Imbo teni yunge anumu lapa talo kinye kemulupili angenupili mele te molo ltemo molo umbuni te peremo kinye naa lipe tapondopa nokopa, yunge pulu ltemo imbo wema kinye naa nokomo lemo aku teremo imbomu aku tepa teremomunga yu Kraist paimbo nimbe enge nimbe pimo mele tiye kolopa umbulu tipe, paa tepa kenjirimo. Kraistinga imbo naa molko tawendo moromele imbomani teko kenjirimele ulumu mandopa, aku imbomuni tepa kenjirimo mele olando.   
\p
\v 9 Kraistinga imbo talapena moromele ambo waimanga imbima pipiana mondamili ningolio, ambo wai mare, paa amboi leko, iye tendekumu kau purumuma aku ambo waimanga imbi mondangei.  
\v 10 Aku ambo waima enoni oi teringi mele pilengei! Oi enonga bakuluma langi tiko nokoko kondoko, imbo ponengema ulkena wangei ningo nokoko kondoko, Kraistinga imbomanga kongono kendemande tendeko, umbuni peremo imboma liko tapondoko, aku teko ulu pengama enge ningo teko moloringi mele ningo tinge pilinge ambo waimanga imbima kau mondangei.   
\p
\v 11-12 Nalo kokele ambo waimanga imbi naa mondangei. Eno Kraist konopu mondoko pimele mele iye te lupe konopu mondoko pilinge ulumuni tepa mainye mundumbelo kinye oi kokele ambo waima molkolio Kraistinga kongonomu kau tendepo molomolo ningo, ningo panjiringi ungu tiye kolonge kinye Goteni eno teko kenjiringi nimbelo kani enonga imbima ambo waimanga imbima kinye popo tiko naa mondangei.  
\v 13 Ulu te i teko teremelela. Eno imboma kinye we unguma nimbo kopu tepo molamili ningo imbomanga ulkemanga andokolio kongono naa teko tiye kololi ulumu kau pilko liko teremele. Aku kau molola. Imbomani ulu te teremele mele naa kanoko imbomanga anjo anjo we nindiko temane toko tilko andoko, imbo mare ulu teko ungu nimelema paa pilemili ningo andoko waliko pilko komu tendeko moromele. Imboma ungu kiyengo ningo nimelema wapu pilko anjo pungo ningo tirimele. Aku ulu teremele mele lino kanopo keri pimolo uluma eno andoko teremele.  
\v 14 Aku ulu teremelemunga nani kokele ambo waima tenge ulu i tepo nio: Eno altoko iye pungo, bakulu meko, enonga iyema kinye bakuluma kinye nokangei. Aku tenge kinye linonga opa pule imbo teni enoni teko molonge ulu te kanokolio lino Kraistinga imbomanga umbulkondo ungu keri te manda naa nindinge.  
\v 15 Mare oi moloringi mele oi tiye kolko umbulu tiko kuromanga nomi Satan lombili purumele.   
\p
\v 16 Ambo te Kraist paimbo nimbe enge nimbe pimo ambo te yunge pulu lemo ambo mare ambo waima moromelema aku ambomu yuni eno lipe tapondopa nokopili. Kraistinga imbo talapemuni aku ambo waima nokongeindo umbuni te naa tepili. Kraistinga imbo talapemuni imbo te naa nokoromo ambo waima kau nokamili ningo aku ulu teangei.   
\s1 Kraistinga imbomani enonga tapu iyemani kongono teko kondoromelema nokoko kondangei nimu ungumu  
\p
\v 17-18 Gotenga bukuna ungu te nimbe moromo kani aku teko teangei. Aku ungumuni nimbeindo,  
\q1 Rais wit mongoma wendo pupili ningo kongi kaoma wit unjoma andoko kambulunge kinye eno wit mare naa nangei ningo kerema pipi tinge wali manda naa tembalo kani pipi naa tiengei, \rq (Lo 25:4)\rq*  
\m aku tepa ungu te moromo. Ungu te moromola, akumuni nimbeindo,  
\q1 Kongono teremele imboma melema liengei,  
\m nimbe moromola. Akumunga Kraistinga imbo talapemu paa nokoko kondoromele tapu iyema Kraistinga imbomani wale pakoko mele awinima tiengei. Gotenga ungumu ningo tiko, imboma mane tirimele tapu iyema kiyendo moromele ningo aku teko mele awinima tiengei.  
\v 19 Imbo teni nimbeindo, tapu iye teni i tepa tepa kenjimo nimbelo wali naa piliwi! Imbo talo molo yupokoni paimbo aku tepa temo ninge kinye kau paimbo aku tepa temo lepamo ningo pilinio!  
\v 20 Tapu iye mareni ulu pulu keri mare paimbo tenge lemo we imboma pilko molangei eno mane tiko ningo amenge tewi. Aku ningo amenge tenio wali we tapu iyema pilkolio pipili kolko lino aku tepo naa teamolo konopu leangei kani tewi.   
\s1 Timoti yunge tembalo uluma nokopa kondopili nimu ungumu  
\p
\v 21 Nani nundo nio ungumu Gote kinye Kraist Jisasi kinye Gotenga enselema kinye akumani paimbo nio ningo molangei nani nundo enge nimbo nimboindo, nuni tewi nio mele paa aku teko tumbi tiko tewi nio. Imboma nokoko teangei ninindo eno kinye pali tendeku tiko nokani. Imbo mare konopu mondonio imboma molo nunge pulu ltemo imboma kau taka liko nokoko, wema enge ningo nokoko, aku ulu naa tewi nio.   
\p
\v 22 Nuni iye te liko Gotenga tapu iye te molopili ningo yu ki ola noiko kongonona welea naa mondowi. Iyema wamongo kanoko moke tekolio kanoko liwi. Mako tonio iye mareni pele ulu pulu keri teko mongo lenge aku wali nu kape umbuni menio akumunga wamongo kanoko tapu iyema mako towi. Ulu pengama kau teko, Goteni ulu kake telima nimbe karomo uluma tewi.   
\p
\v 23 Nalo tumbi tipo molambo ningo imbo no norono mele aku teko kau naa nowi. Nu kuro takiraki topa nunge olona manda naa teremo kani kuro pora nimbe kangi enge nipili ningo wain alaye kolte nowi.   
\p
\v 24 Tapu iye mareni ulu pulu keri teremelema neya para ltemo akumunga kotena oi naa pangei kot pimo iyemuni oi teko kenjirimele mele tumbi tipe pimo. Iye mareni ulu pulu keri lopeke teko teremelema oi tumbi tipe para naa lembalo nalo pele kotena mona lembalo.  
\v 25 Aku tepala, imbo mareni ulu pengama teremelema tumbi tipe mona ltemo mareni teremelema lopeke tepa peremo, nalo altopa lopeke tepa naa pembalo. Akuma pali mona lembalo.   
\c 6  
\s1 Kongono we tendeli imbomani enonga nokoli imboma liko awili tinge ungumu  
\p
\v 1 Kraistinga iyema moromele imbo kendemande kongono we tendeli imbomani enonga kongono nokoli imbo akuma pengama ningo enonga unguma tenge tiko, liko awili tiko molangei. Kongono nokoli iyema kinye tawendo moromele imbomani tepo kenjimolo mele kanokolio Gotenga imbimu kinye, Kraist ipuki tipolio teremolo ulumu naa ningo kenjengei.  
\v 2 Kendemande imboma enonga kongono nokoli imboma Kraistinga imboma moromele kinye eno kape lino kinye angenupili moromolomunga enonga unguma pilipo naa limolo kinye ulure molo ningo, enonga unguma umbulu tiko kongono tumbi tiko naa tenge kinye keri. Aku ulu naa teaio! Kongono nokoli imboma linonga angenupilima, enonga unguma pilipo lipo kongono tepo kondomolo kinye eno molko kondonge ningo enonga kongono ningema wamongo teko kondangei. I nu mane tiro mele imboma paa aku teko teangei ningo enge ningo mane tiwi.   
\s1 Kou mone konopu mondoromelemunga ungu pulu te  
\p
\v 3 Linonga Awili Jisasi Kraistinga ungu akumu ungu paimboma kau peremo, kolo toli ungu te naa peremo. Akumu Goteni lino i teko molko kondangei nimbe mane tirimo ungumu kinye, kano unguma iye teni tiye kolopa ungu te lupe kolo topa mane timo lemo  
\v 4 yu kalambo naa nimbe yunu pimo mele unguma kau ungu penga paimboma nimbe kano unguma kau konopu mondopa na lipe manjili peremo iyemu moro nimbe pimo nalo yu konopu naa peremo, ungu tendekure kape wamba naa pimo. Konopu tiembo nimbe yu ungumanga pulumu imboma kinye keri kuru lipe ungu melenale teremo. Aku tepa teremo ulumani i tepa: Uluma imboma teangei nimo, imbo mareni anjo yando imbi olandopa moromo imboma kanokolio eno kinye konopu keri panjiko, imboma kinye irinale teko, imbomanga ungu umbulkondo nindiko, imbo teni ungu te nimo kinye molo ulu te teremo kinye konopu awini kimbo tiko,  
\v 5 waliwalima konopu tumbi tipe naa peremo imboma kinye irinale teremele. Aku teko teremele iyema ungu paimboma konopuna naa peremo. Enonga konopuni pilkolio, Gotenga kongono tendemolo kinye mele awinima limolo konopu ltemele.   
\p
\v 6 Goteni tirimo uluma manda teremo nimbe konopu kimbo timo lemo paimbo Gotenga kongono tendembalo imbomu aku ulu tembalomunga mele penga awini limbelo.  
\v 7 Lino ama kameni meringi wali melte naa mepo we orumulu kano. Altopo kolomolo wali aku tepo melte mepo naa pumolola.  
\v 8 Wale pakoli kinye langima kape lemo lemo manda moromolo nimolo.  
\v 9 Imbo mareni mele pulumu noipo imbo kamakomu molamili konopu lekolio kano teli melema lingei teremelemunga kuromanga nomi Sataneni eno kondi topa tepa kenjimbelo. Aku iyemuni konopu aku tepa ltemelemu enonga konopuna melu mele ltemo. Mele pulumu konopu liko mundukolio eno keke lepo toko molko kenjiko kombu kerina kamukumu punge.  
\v 10 Kou mone konopu mondoli ulu akumu ulu pulu keri awini wendo oromomunga pulumu. Imbo mareni kou mone liemboa ningo konopu paa awini liko mundukolio Kraist ipuki tirimelemu tiye kolkolio konopuna tukundo mindili awili nongo moromele.   
\s1 Poloni Timoti yu tepa molombalo ulumu mane tirimu ungumu  
\p
\v 11 Nalo, nu Gotenga iyemu kani ulu pulu kerima tiye kolko kowa pungolio ulu penga ima kau konopu kimbo tiko teko molani: Ulu tumbi nilima kinye, Gotenga ulu tukumemu kinye, ipuki tili ulumu kinye, imboma konopu mondoli ulumu kinye, ulu pengama teni enge ningo angilko umbuni meko tiye naa kololi ulumu kinye, taka liko mololi ulumu kinye, aku tepa uluma kau tepo molambo ningo molowi.  
\v 12 Imbo te mele pengamu limbeindo imboma kinye peya keri kuru liko lkirimele kinye paa enge nimbe lkipe tiye naa koromo mele Kraistinga iye paimbo ningo enge ningo pilino iyemu moronomunga paa aku teko mele pengamu liembo ningo keri kuru paa liko enge ningo lkiwi! Nu koinjo molopa kondopa kau puli ulu pulumu paa lipo ambolambo ningo enge ningo lkiko tiye naa kolko molani. Koinjo molopa kondopa kau puli ulu pulu nio kanomu imbo awini pilko molangei nuni paimbo ningo enge ningo pilerinu mele ningo para tirinu kinye Goteni koinjo molopa kondopa kau puli ulu pulumu tiemboi lieni nimbe nu oi alako torumu kanomundo nio.  
\v 13 Goteni melema pali koinjo pupili nimo iyemu kinye, Jisasi Kraistini Pontius Pailatenga kumbekerena angilipe yunge ungu pulu paimbomu pipili naa kolopa tumbi tipe nimbe para tirimu iyemu kinye, pilko kanoko molangili i kongonomu nu paa tenio mele nimbo tipolio nimboindo,  
\v 14 nu Gotenga kongono tendani nimbo nu mako torumulu mele pilko Gotenga ungumu nokoko kondoko molowi! Aku ungumu imbomani kanoko keri naa kanangei. Nani ulu te tembo kanoko keri naala kanangei ningo kalaro mololi uluma kinye ulu kerima kinye naa teko Gotenga kongonomu kau teko kondoko molani. Linonga Awili Jisasi Kraist mona yando ombalo konopu leko nu aku uluma tiye naa kolko teko kau molani.   
\s1 Poloni Gote kapi nimu ungumu  
\p
\v 15 Jisas yando ombalo waimu Goteni oi mako torumu aku walimunga puwi nimbelo kinye mona yando ombalo. Gote yu molopa kondoli ulu pulumu peremo iyemu. Lino nokoromele imbomanga engema mandopa, yuni lino nokoromo engemu olandopa. Iye nomi kingimanga pali yu iye nomi king awili olandopamu. Imbo awilimanga yu iye awili olandopamu.  
\v 16 Kololi ulu pulumunga yu kau manda naa kolombalo, waliwalima molopa kau purumo. Yu moromona pa enge nimbe teremomunga lino akuna manda tukundo naa pumolo. Oi imbo teni yu naa kanorumu. Kinye imbo teni yu manda naa kanombalo. Gote yunge imbi olandopa moromomu kinye yunge engemu kape waliwalima pepa kau pupili. I paa.   
\s1 Poloni imbo kamakomando Gote kau ipuki tiko, imboma kou mone tiko tapaio nimu ungumu  
\p
\v 17 Ya maina mele awini noirimele imbo kamakomando i teko mane tieni: Aku melema keri lembalo kani kalambo naa ningo, mele awini noirimomunga manda molomolo naa nengei. Lino konopu tipo molamili nimbe mele penga awini tirimo timbelo Gote paimbo lino nokopa kondombalo ningo enge ningo pilko nokoko molangei niwi.  
\v 18 Aku imbo kamakomando i teko mane tieni: Imboma tapoko, ulu penga awini teko, mele noirimele melema konopu kimbo tiko naa molko, imbo mele molo lembaloma mare toya toko moke teko tiengei niwi.  
\v 19 Aku tenge kinye eno altoko manda molonge ulumunga mele enge awinima noinge aku wali paa molko kau punge ulu pulu paimbomu liko ambolonge.   
\s1 Timotini yunge kongonomu wamba nokopili ungumu  
\p
\v 20 Timoti, Goteni nu kongono tirimumu wamongo nokoko kondowi. Mai kombumunga ungu wema, imbomani Gote naa liko manjikolio nimele unguma kinye, kolo toli ungumani Gotenga ungumu beambo timbei teremo unguma kinye, naa pilko, umbulu tiwi. Aku ungumando kolo toko enonga lipe manjili peremomani nimbo tirimolo nimele.  
\v 21 Aku unguma imbo mareni paimbo unguma ningo enge ningo pileringimunga Gotenga ungu tukumemu oi enge ningo ipuki tiringi mele tiye kolko aulke tune tane ningi kani nu kano unguma umbulu tiko naa piliwi! Goteni eno kinye konopu noipe molopili molangei. Aku peya nio.