\id 2TH - Ignaciano NT -Bolivia 1980 (DBL -2013) 
\h 2 Tesalonicenses 
\toc1 Eta tápinane macartane ema Apóstole Pablo nayehe ena machamuriana ticavasanahi te avasare Tesalónica, ticaijare 2 Tesalonicenses 
\toc2 2 Tesalonicenses 
\toc3 2 Te 
\mt2 Eta macartane ema Apóstole Pablo nayehe ena machamuriana ticavasanahi te avasare Tesalónica, ticaijare 
\mt1 2 TESALONICENSES 
\c 1  
\p  
\v 1 Nuti Pablo, némecha­ji­ricahe eti nuchamuriana ecava­sanahi te Tesalónica. Téchajicahe ema Silas\f + \fr 1:1 \ft Ema Silas, eta máija­re­quene Silvano te náecha­ji­ri­ruva ena roma­noana.\f*, émapa ema Timoteo. Vímiama­recahi eta juca vicartane taicha eta iávahá­siraipa ema Tata Vicaiyaquene, táichavene eta éhisiraipa ema Viáquenu Jesucristo.  
\v 2 Nuvaraha macata­ji­ca­hehini ema Tata Vicaiyaquene, émapa ema Viáquenu Jesucristo; náijara­ca­hehini eta táurivaina eta epane­reruana. 
\s1 Ema Viya máicuñacayare ena ticapecaturarahiana te táitecapapa eta machaviraya ema Cristo 
\p  
\v 3 Nupara­pe­naveana, tatuparaca vihasu­lu­pa­ya­cha­paraca ema Viya, taicha visamai­ri­ricahi eta tápaju­si­ra­va­paipaicha eta esuapirahi ema Viya. Tajuru­si­ra­paipahi eta émuna­si­ra­ca­cairahi. Eta tacahe, vihasu­lu­pa­ya­cha­pa­racahi ema Viya.  
\v 4 Tájinarine tácuti eta vicaja­mu­rai­rahehi nayehe ena vichamuriana te viúruji­si­rávana te jácani víteca­pi­hapahi. Vimeta­ca­va­capahi eta táimiya­ni­rávahi eta éhisirahi, ecami­chi­ra­hivare tamutu eta nacatia­na­si­rahehi ena achaneana étapa eta ecata­ji­vairana, táichavene eta éhisirahi ema Viya.  
\v 5 Tímara­ra­ca­he­hisera ema Viya eta ecami­chirahi eta ecata­ji­vairahi. Máimerecahi éma eta máuriva, máitauchirahi tamutu. Éma tijaca­pa­heyare eta esiapi­rayare tayehe eta mávasa. 
\p  
\v 6 Máimahái­ne­paséra ema Viya eta máicuña­si­ra­va­cayare ena ticatia­na­ca­heanahi éti, taicha macarichu éma ticatu­pa­rahahi juésyarehi téchayarehi.  
\v 7 Étisera, ticana­ra­ca­heyare ema Viya eta ecata­ji­vairana, vicuti­ca­cainapa eta vinara­si­rayare te mamirahu ema Viya. Vinara­cainapa vimutu, te máitecapapa ema Viáquenu Jesús, mápechi­ravaya títeca, másiháiraya te anuma. Te jena sácheyare, mámaya­repahi ena mayeheana ángeleana, tíñehia­nai­napáipa máicha. Tacuti­napaipa eta ichapequene yucu eta máucupai­si­rayare.  
\v 8 Eta tímite­cayare éma, máicuña­cayare ena váhiquene návara­hahini náimati ema Viya, váhivare návara­hahini nasuapa eta máechaji­riruva.  
\v 9 Ena nani máehica­ra­hanahi ema Viáquenu Jesucristo, ticaqui­jia­nainapa eta te infierno. Váhivare nacami­chahini náimararaca eta mamira taicha táetaviuchahi eta máiñehivahi. Tájina náuchucui­raimahi.  
\v 10 Te jena sácheyare te máitecapapa ema Viáquenu, viárami­mí­cainapa ichape eta mayehe vimutu viti manere­ji­ruanahi. Tétavi­cavaya eta vicuna­chi­rainapa éma. (Éti apanava etiari­hi­yarehi, taicha esuapahi eta vímitu­ra­pianahi.) 
\p  
\v 11 Eta tacahe, tamutu sácheana te viyuja­ra­sirana, viyaseu­chahehi me Viya eta ímiya­ni­ravaina eta iúriva, taicha éti íchuare­ca­sivahi eta mayehe. Éneri­chuvare viyaseuchahe me Viya eta máijara­si­rahéna eta ítupa­ji­jiá­si­raváina tayehe eta juca émata­ne­repihi táichave­nénahi eta esuapa­ji­raivahi. Eta juca, ichape tacuri­sa­murecha ema Viya.  
\v 12 Tásiha, ena apamuriana achaneana nacuna­chayare ema Viáquenu Jesucristo táichavenehi eta náimairahi eta íchirahi éti eta táuriqueneana. Éneri­chuvare, éti ecuna­cha­ca­rénapa me Viya, taicha tétavi­cavahi eta máemuna­si­rahehi, émapa ema Viáquenu Jesucristo. 
\c 2  
\s1 Ema Achane Váinarajiquene 
\p  
\v 1-4 Puítiripa, nupara­pe­naveana, naririhi ena tépiyae­que­ne­ha­naripa ema Jesús, náimija­charipa matiari­hiripa, tichavaripa puiti. Vitupa­ra­cahecha vahi ecusuapa nácani tépiya­hi­ra­hia­napahi. Tayanapane nácahepuca: “Eta juca vimeta­ca­sivahi me Espíritu Santo”. Nácahepuca: “Ema Pablo tímitu­ca­havihi eta juca”. Te náepiyae­que­ne­ha­ha­vipuca náimecha­hepuca eta carta, náimija­cha­yarehi tásihaquene viyehe, váhique­nesera ecusua­pavane. Váhi tacuimi­pa­ne­re­recahe eta juca. Váhivare ecuarameca. Taicha te máitecapa yátupina ema Jesús, ticuru­ji­ca­há­vi­nu­mayare viti manere­ji­ruanahi. 
\p Nuvaraha numetacahe eta apana. Te tánehipaicha eta máitesiraya ema Jesús, ena achaneana vaipa napicau­chaimahi ema Viya. Náepuruinapa eta máechaji­riruva. Tásiha, tímere­ca­váinapa ema Achane Váinara­jiquene. Ema maca achane, macati­chainapa masama eta máijare ema Viya. Étaripa eta nasiña­rajiana ena achaneana, váipavare máuricaimahi. Macava­nai­ri­pinapa ena achaneana te tamutu avasareana náepuyu­mi­rau­chayare éma. “Nuti Víyanu. Núti ecasi­ñayare” macahénapa. Masapi­hainapa, ticaeja­ca­vainapa tayehe eta Templo. Téhesera támutupa, yátupi­que­nenapa eta máicuñayare muraca. 
\p  
\v 5 Échava­richuhi éti eta nímitu­si­ra­he­pa­racahi cape juca te návihai­chahahi eyehe. Numeta­cahehi eta táichara­ra­ca­va­yarehi.  
\v 6-7 Puiti ena achaneana, nararihipa tivaina­ra­ji­cha­va­na­paipahi. Vuíchahasera máisapahini ema Viya navayu­cha­vahini. Mararihi ema mavaneruhi tícheji­mi­ráu­cha­va­ca­ríchaha. Eta tacahe, vuíchaha máuchuji­cahíni máimere­ca­vahíni ema Achane Váinara­jiquene. (Éti ímatichuhi ema tícheji­mi­ráu­rucahi.) Tacahe, ema Viya máisapainapa térajicava ema tícheji­mi­ráu­rucahi.  
\v 8-10 Tásiha, mapaenu­ma­vainapa tímere­ca­vayare ema Achane Váinara­jiquene. Tuparai­ru­cayare mayehe ema Satanás. Éma, tijara­ca­yarehi eta máitupa­ji­jiá­si­ra­va­yarehi. Tamutuyare máimereca eta tiárami­careana tacutiyare yátupi­que­né­nahíni mayehé­nahíni ema Viya. Ema maca, máetaviu­chainapa eta mavayuaraiva nayehe ena achaneana. Éna, tísapa­va­nai­napaipa náehica eta táiñehi­queneana mavayua­ra­quia­napahi. Váhisera máyerémahi. Tiúcupai­ca­va­nénapa ema Viáquenu Jesús. Tiárami­ca­rénapa eta majarai­va­ya­repahi. Te máchajurapa, máquipai­cainapa macapa­cai­na­varepa ema Achane Váinara­ji­quenéni. Tacahe, ena nani achaneana máiture­vanahi témitie­que­ne­ha­nainapa. Ticaicu­ña­nainapa taicha vahi návara­hahini náehica eta yátupi­queneana tiúriana echáji­ri­ru­cavana. Te nasuapahini, tiúchucu­ha­nahini tayehe eta ecuñaraqui­­.  
\v 11 Taicha eta namasua­pirahi ema Viya, máisapa­yarehi ena nani achaneana nasuapa eta mavayua­raquiana ema Achane Váinara­jiquene.  
\v 12 Tacahe, namutuyare ticaicu­ña­nayare éna, taicha vahi návara­hahini nasuapa eta yátupi­queneana vímitu­rapiana. Navapi­naichucha eta náichiraya eta tamauri­queneana. 
\s1 Tiúchucuhanayare ena téhicanahi ema Viya taicha manerejiruanahi 
\p  
\v 13-14 Étisera, nupara­pe­naveana, máemuna­ruanahi ema Viya. Víti tatuparaca vihásu­lu­pa­ya­cha­pa­rá­cayare ema Viya íchavenehi éti, taicha manere­ji­ruhehi ema Viya te tépana­vainapa. Táitusiava, te esamapa eta vimeta­rairuhi, etupi­ruvapa ejacapahi; taicha esamapa eta máichuirahehi éma. Éma ticuchu­cu­ha­heyare taicha ímiya­navahi esuapa eta yátupi­queneana máimitu­rapiana ema Cristo. Émapa ema Espíritu Santo máimiyanava eta mávahá­si­rahehi, máijaracahe eta esantu­vai­na­paipaicha puiti juca ecaiju­heyare. Tásiha, ítuji­ca­vainapa esiapa tayehe eta mávihahi ema Viáquenu Jesucristo, ímahainapa eta majaraiva. 
\p  
\v 15 Tiuri puiti, nupara­pe­naveana, ímiyanava eta éhisiraina ema Jesucristo. Vahi ecuemi­tisica eta vímitu­ra­pianahi, te vimutu­richaha eta eyehe, étapa eta juca véchaji­ri­ru­vanahi te carta, vémeva­ta­ruanahi eyehe. 
\p  
\v 16 Nupara­pe­naveana, tétavi­cavahi eta máemuna­si­ra­havihi ema Viáquenu Jesucristo, émapa ema Tata Vicaiyaquene. Tayanapane vahi viúrihíni, énasera navarahahi ticuri­sa­mu­re­cha­ha­vianaya. Tásiha, vicune­vainapa eta viúrica­ca­revaya, máichecua­ra­qui­rénapa náicha.  
\v 17 Puiti nuvaraha esamavaini éti eta nacuri­sa­mu­re­chirahe te esamureana. Náetume­cha­varéni eta ímiya­ni­ravaya icha eta táuriqueneana, táurihi­varéni eta échaji­ri­si­ravana. 
\c 3  
\s1 Ema Pablo mayaseacavaca eta nayujarauchiraina me Viya 
\p  
\v 1 Títecapa, vivaraha vitupa­racahe puiti, eti nupara­pe­naveana: Eyaseu­chahavi te eyuja­ra­sirana mayehe ema Viya. Tasuápa­ca­re­vái­nahíni muraca nayehe ena achaneana eta vimeta­rairuana máechaji­ri­ruvana ema Viya, tácutihini eta esuapi­rá­vanehi éti. Táiteca­pau­cha­va­nehíni ena ticava­sanahi te tayere­hi­queneana te juca apaquehe.  
\v 2 Éneri­chuvare, eyaseu­chahavi macátiu­chi­ra­há­vi­nahíni ema Viya nayehe ena achaneana váinara­ji­queneána titupia­rahiana. Taicha camuriana ena masuapa­ji­rai­ra­hanahi me Viya.  
\v 3 Váhisera táeñama­va­ca­rehini eta máurivahi ema Viya eta viyehe, yátupihi eta máitauchirahi tamutu. Tétume­cha­heyare éma eta ímiya­na­vairaya. Tijanea­ca­he­yareva mayehe ema Váinaraji.  
\v 4 Víti vicasi­ñavahi eyehe eta esuapi­ra­haviya tamutu eta vitupa­ra­ru­heanahi taicha éti éhicahi ema Viáquenu, táicha esuaparipa eta táinapu­reanahi vitupa­ra­ru­heanahi cape juca.  
\v 5 Máimica­ta­ca­hehini ema Viya eta ímatiraina eta máemuna­si­rahehi. Máijara­ca­he­varéni eta ecaye­heraya paciencia, ácutihini ema Cristo. 
\s1 Tatuparaca vicaemataneyare 
\p  
\v 6 Nupara­pe­naveana, te natiari­hi­napuca ena echamu­rianahi plújuana, váhipuca náesachahi ticaema­taneana, te váhipuca návara­hahini náetume­cha­vahini, nasuapahini eta vímitu­ra­pianahi, vivanecahe éti te máijare ema Viáquenu Jesucristo: Vahi ecueme­ñahava nayehe.  
\v 7 Écharichuhi éti eta etupa­rahahi ítusiraina ítáti­ji­rícava, éhisi­ra­yarehi eta viyehe­re­pianahi víti te viávihaichaha eta ara eyehe. Vahi plújuhá­vimahi.  
\v 8 Váhivare vinicai­ri­hihini te epenana. Víti vicaema­tanehi muraca eta vítáti­ji­rí­si­ravahi. Tamutu sácheana, yátiana, vicaema­tanehi, taicha vahi vávara­hahini vétsepa­ná­ra­ca­hehini eta vinica­que­nerepi.  
\v 9 Tatupa­ra­ca­hinéni viyasea­ca­hehini eta énisi­ra­ha­vi­nahíni, vivara­ha­hisera vímecha­he­yarehi eta vicaema­ta­ne­raivana, apaesa étaina­ri­chuhíni éhica éti.  
\v 10 Étaripa te vinasi­que­neichaha eta eyehe, vivane­cahehi: Vahi ecuenica mácani vahi mavarahahi ticaematane.  
\v 11 Puítiri­pasera visamai­ri­ricahi eta natiari­hirahi ena echamuriana tinere­ji­ca­vanahi plújuana. Vahi náesachahini ticaema­taneana, tinicai­ri­hianahi. Tímiapi­ta­vai­ri­ca­va­na­paipahi te pétiana.  
\v 12 Étihi íchanahi eta juca, vivanecahe te máijare ema Viáquenu Jesucristo: Yátupina táuri eta ecáema­ta­néraina, eviyayare eta ecamu­nu­queneana.  
\v 13 Éti apamuriana nupara­pe­naveana, vahi ecuinajica eta táurivahi eta ecaema­ta­nerana.  
\v 14 Te natiari­hi­napuca nácani vahi nacusuapa eta vivanai­ri­pianahi te juca carta, ecauneyare éna. Tásiha, emetacapa ena echamuriana vaipa nacucachane éna, apaesa nátsirihaichu ena nani eta namasua­pa­ji­raivahi.  
\v 15 Váhisera ecuca­ti­chavaca, econse­ja­cha­va­cachucha taicha echamu­rianahi éna. 
\s1 Ema Pablo mayujarauchahi ena machamuriana 
\p  
\v 16 Tiuri puiti, nuyaseacahi ema Viáquenu ema tiúricha­ha­virahi, máimiya­na­vahíni máijara­cahéni eta iúrivaya te epane­reruana, tijuricati tájahapuca ícharacava te sácheana, taicha mavarahahi eta iúrivaya. Ámutuhíni mávahá­ca­hehíni ema Viya. 
\p  
\v 17 Nuti Pablo, nútija­ca­ruvapa nájucha eta juca táichecua­raquihi eta nucartane, apaesa ímati eta táimahihi eta nuyehe letra nuvahu­ru­pajihi. 
\p  
\v 18 Nuyaseu­cha­he­pa­racahi emutu éti me Viáquenu Jesucristo, táetaviu­chahini eta iúrica­ca­revaya máicha. 
\p Tamutupa eta juca néchaji­ri­ruvahi ­ eyehe.