\id TIT - Iatmul NT [ian] -Papua New Guinea 1975 (DBL 2014) 
\h Taitas 
\toc1 Taitas kat 
\toc2 Taitas 
\toc3 Tait 
\mt1 TAITAS  
\c 1  
\p
\v 1 Wun Pol wun. Wan pas wunayɨ pɨlɨwutaa kwiya. Wan Godna njɨvwa kwutɨga nyan wun. Jisas Kraist wan apma nyaangɨt yiga ambuk wun kat wandɨ maa yiga mbutɨgowun. Jisasnana nyaaangɨt klalaa Jisasnana kwondumba yiga mbutɨgowun. Wunai kwutɨga njɨvwa kɨngiyan. God waa nɨmba ndi God kat maawupmba yelavɨtnja vak kat wun kwunatɨgowun. Wan apma nyaangɨk kat ndina maawupmba yelavɨpmbandi walaa ndi kat mbutɨgowun. Wan apma vak kat yelavɨtnjeyan God yeta vak vla yetɨgiyandi.  
\v 2 Nyaangɨt mbutɨwa nɨmba njɨmbla njɨmbla apma vat yetɨnjeya vak kat yelavɨka lɨgandi. Tamba nglei God wan vak apma vak yetɨngweya vak ngwuk kat kwigiyowun wandɨ. Ndɨ woseka walɨga nyan ana dɨ.  
\v 3 Ngi kat tɨga God waa njɨmbla kɨngiyan apma vat klanjeya vak ndɨnai waa nyaangɨpmba mbutɨndɨ God. Nɨn kat kwunatɨga nyan God wun kat wandɨ mala ndɨnai waa nyaangɨt wun yiga ndinyangu kat mbutɨgowun.   
\p
\v 4 Wan pas Taitas mɨn kat pɨlɨwutaa kwiwa pasa. Ngi kat tɨga mɨn wuna nyan vla lɨgamɨn. Tat mɨn kat kwutaa Godna mbaapmamba taagawun. God kat kɨtamba yelavɨka nɨma sakwat nɨmbonala ndɨna mbaapmamba kɨtamba tɨgali. Nɨna nyaek God nɨn kat kwunatɨga nyan Jisas Kraist awagapma kwilɨmba vak klamangat wowun. Apma maawut sɨka yetɨngweya vak klangwangat wowun.   
\s1 TAITAS KRIT WALƗNJA NƗMBUPMBA KWUTNDA NJƗVWA  
\p
\v 5 Krit walɨnja nɨmbupmba lɨga Godna njɨvwa wun kwutambɨlaa yawun. Kwutambɨlaa yawa njɨvwa kwupmangat mɨn kat kwagalalaa yawun. Ngepma ngepma Jisasna mbaapma nɨmba kat vɨga lɨgiyaa nɨmba kat kɨta kɨta taagamɨn, tɨgandi. Tat mɨnogwinala lɨga wan nyaangɨt mɨn kat wupma mbukwun.  
\v 6 Mɨn kat waigowun angamat tɨga nyamba vɨlaa njambwi nyanat tɨndangat taagagiyamɨn. Kavle vat yiga yetɨlɨga nyan kat ke taagaga. Taagameya nyan taagwa kɨta klaa lɨgiyaa nyamba vɨlaa taagamba. Ndɨno wan nyana nyangu Jisasna mbaapmamba lɨnjeyan ndɨ kat taagagiyamɨn. Nat nɨmba ndi kat ngepmana vat kai waa kwagalalaa ndɨ sɨkwuka yambɨsɨk kwuka yetɨlɨga nyana waa wanjeyan waa nyan kat ke taagaga.  
\v 7 Kɨta nyan Godna njɨvwa kwuka nat nɨmba kat vɨga lɨvat wandeyan ndɨ wupma lɨgiyandɨ. Ndɨ kavle vat yiga ana yetɨgiyandɨ. Wun njambwi nyan wun waa ana yelavɨka lɨgiyandɨ. Nyingi maawut tɨgiyaa nyan ana lɨgiyandɨ wan njsvwamba. nɨma sakwat nɨma ngu kɨga nɨma vat tungwengwan yilɨga nyanwan njsvwamba ana lɨgiyandɨ. Sanya kat klavak kat nɨma vat yelavɨka lɨga nyan wan njɨvwamba ana lɨgiyandɨ.  
\v 8 Nat nɨmba kat ndɨna ngaymba kalilaa kwunaka lɨgiyaa nyan ndɨ wan njɨvwamba lɨgiyandɨ. Apma vak mɨna yiga yetivat walɨga nyan wan njɨvwamba lɨgiyandɨ. Kɨta nyan ndɨna mbangɨ waigaa vak kat kai waa kwagalalaa yetɨgiyaa nyan wan njɨvwamba lɨgiyandɨ. Kɨta nyan ndɨna maawupmba tɨgiyaa kavle vak kat kai waa kwagalalaa yetɨgiyaa nyan wan njɨvwamba tɨgiyandɨ. Nat nɨmba kat apma vat yetɨga God yeta vak vla yetɨgiyaa nyan wan njɨvwamba lɨgiyandɨ.  
\v 9 Wan apma nyaangɨt wutaa maawupmba yelavɨka kwutaa lɨgiyaa nyan wan apma njɨvwa kwukiyandɨ. Wan apma nyaangɨk kat kaiwalɨga nɨmbana maawut kwunakiyandɨ kɨngi vat tɨga nyan.  
\v 10 Kan mbambala lɨga nɨma sakwat nɨmba wan apma nyaangɨt wupmak kat ndi kai walɨgandi. Ndina nat nɨmba walɨgandi. Juda mbangɨ pɨtɨga vak vla ngwula mbangɨ apɨk ngwula waa walɨgandi.  
\v 11 Mɨn wamɨn mala wan ngambulɨnja kavle nyaangɨt kiyak waa kwagalagandi. Nɨma sakwat nsmba ndina maawupmba yelavɨka yetɨlɨnja vak kat ndi ndina maawuk kat kavle yilɨgandi. Ndinamba sanya klavat wan kavle nyaangɨt woseka waga mbutɨgandi. Wan kavle nyaangɨt mbutɨnja vat ana nglaatndɨ. Kavle vatna.  
\v 12 Wan kavle nɨmbana mbaapmamba yetɨlɨga kɨta nyan, nyaangɨt ngambulɨga nyan ndi kat wandɨ. Kritmba lɨga nɨmba njɨmbla njɨmbla woseka walɨga nɨmba ndi. Kavle maawut yelavɨka nyingi yiga tɨndi. Njɨvwa kwutapman kwo lɨga yelavɨka nyingi yiga tɨndi. Njɨvwa kwutapman kwo lɨga nɨmamba kɨlɨga nɨmba ndi waa ndina kɨta nyan wandɨ.  
\v 13 Wanda nyaangɨt woseka ana wandɨ. Ngi kat tɨga wan kavle nɨmba kat nɨmamba kai awa. Apma nyaangɨt wutaa maawupmba yelavɨka kwutaa lɨmbandi walaa ndikat nɨmamba ambuk.  
\v 14 Juda walɨnja wupuseput kwagala ngwula waa ndi kat ambuk. Apma nyaangɨk kat kai walɨga nɨmba waa nyaangɨk kat wupmak kat kai awa waa ndi kat ambuk.  
\v 15 Kɨta nyan ndɨna maawupmba Godna apma vak kat yelavɨka lɨndeyan wan kɨpmana nda ndɨna maawuk kat nglambi ana kwukiyandɨ. Ndɨna maawupmba Godna apma vak kat yelavɨtapman tɨga kɨpmana nda kat mɨna yelavɨka lɨndeyan wan kɨpmana nda ndɨna maawuk kat nglambi kwukiyandɨ. Kɨpmana nda ndɨna maawuk kat gwandɨndɨ maa ndɨna maawut kavle sɨka lɨgandɨ. Tɨndangat tɨga ndɨna maawut nglambio lɨgandɨ.  
\v 16 Wan nɨmba Godna sɨ wuka Godna mɨndama vɨga lɨganɨn waa ndi woseka wandi. God waa vapmba ana yɨga yetɨlɨgandi. Vɨlɨganɨn. Ndi kavle vat yiga yetɨlɨgandi. Ndi God kat kai walɨgandi. Apma vat yiga ana alɨpsɨga yetɨgiyandi.   
\c 2  
\s1 AVƗT NDU AVƗT TAAGWA KAT WANDA NYAANGƗT  
\p
\v 1 Mbupmeya nyaangɨt kapma nyaangɨtna. Apma nyaangɨtna. Mɨn ndikat God waa apma nyaangɨpmba ndi kat vɨsɨmogwiga ambup mɨla.  
\v 2 Avɨt ndu kat wupma ambup mɨla. Nɨma ngu nɨmamba ke kɨga waga ndi kat ambuk. Ndina mbangɨ waiga vak kat yigumba kwulapmak kat vɨga lɨgiyandi. Ngwut tagula maawutno lɨga nɨmba ngwuk alɨ ngwula waa awa ndi kat. Wan apma vat ngwutna maawupmba yelavɨka agwuk ngwula waga awa ndi kat. Nat nɨmba kat kwunaka woviyaguga alɨ ngwula waga awa ndi kat. Wan apma nyaangɨt ke kwagalangwa ndi kat waa ambuk.  
\v 3 Avɨt taagwa kat ndino ndi kat wupma ambup mɨla. God kat yelavɨka waga ambut ndi kat. Nɨma ngu nɨmamba ke kɨga waga awa ndi kat. Nat nɨmba kat wan apma vat ndi kat yiga ɨsɨmogwi ngwula waga awa ndi kat.  
\v 4 Avɨt taagwa wan apma vapmba yetɨnjeyan kwandɨ lagwa ndinai yetɨga vak vɨlaa ndinalan nyangu kat apma vak kwunaka ndinai yetɨga vla yetɨgiyandi.  
\v 5 Avɨt taagwa yetɨga vak vla ndino kwandɨ lagwa wupma tagula maawutno lɨga yetɨgiyandi. Kwandɨ lagwa avɨt taagwa yetɨga vap vla yetɨnjeyan ndi ana sɨkwuka yambɨsɨk kwuka yetɨgiyandi. Ngayna njɨvwa kat ndi apma vat kwukiyandi. Nat nɨmba kat ndi ana kavle yigiyandi. Ndina lan nyan waigaa nyaangɨt ndi wukiyandi. Wan apma vapmba yetɨlapman yinjeyan nat nɨmba ndi kat waigandi. Ndi God waa nyaagɨpmba yetɨlɨga nɨmba ndi. God waa nyaangɨt kavle nyaangɨtna waa waigandi.   
\s1 KWANDƗ NDU KAT WANDA NYAANGƗT  
\p
\v 6 Mɨn kwandɨ nyangu nɨmba kat mbukiyamɨn. Ngwutna mbangɨ waiga vak kat kwulapmak kat vɨga alɨ ngwula waga ndi kat awa.  
\v 7 Mɨno apma vat yiga yetɨ mɨla. Yetɨmɨn mala mɨnai lɨgiya vak kat vɨlaa nat nɨmba waigandi. Ndɨ apma vat yetɨgandɨ waa waigandi. God waa nyaangɨt ndi kat vɨsɨmogwimeya njɨmbla ke ndi kat mandɨp vapmba mbuka. Ke sɨka ke kasega mbuka wan apma nyaangɨt.  
\v 8 Apma vat ndi kat mbupmeyan nat nyan kavle vatna mbupma waa ana waigandɨ. Apma vat ndi kat mbupmeyan mbupma nyaangɨt wupmak kat kai waiga nyan mɨn kat kai ana waigandɨ. Mɨnai waigaa apma nyaangɨt wutaa ndɨna tɨpwi wup yindɨ, ana kai waigandɨ.   
\s1 SANYA KLALAPMAN KWO NJƗVWA KWUTƗGA NƗMBA KAT WANDA NYAANGƗT  
\p
\v 9 Mɨn sanya klalapman kwo njɨvwa kwutɨga nɨmba kat mɨn ambup mɨla. Ngwula njambwi nyan waiga nyaangɨt awuk ngwula waga awa ndɨ kat. Kgwutna njambwi nyan waiga nyaangɨpmba njɨvwa agwuk ngwula waga awa ndi kat. Ndɨ kat ke kai wangwa waga awa ndi kat.  
\v 10 Njambwi nyana nda ke sɨkwukngwa waga awa ndi kat. Apma maawut sɨka yetɨnjeyan ndina njambwi nyan ndi kat ana kɨlɨpangɨ yigiyandɨ. Njɨmbla njɨmbla apma vapmba yiga yetɨnjeyannat nɨmba yetɨnja vak vɨlaa God mɨn kat kwunatɨga nyan ndɨnai waa nyaangɨt mbutɨna nyaangɨk kat wutaa woviyaguga lɨgiyandi.   
\s1 KRAIST YAIGA NANDINYA KAT KAWIGA LƗGANƗN  
\p
\v 11 God nɨn kat awagapma kwunatɨnda vat tamba ndiyangu kat aywaa yandɨ. Tamba vɨga wuka lɨganɨn.  
\v 12 Wan vak nɨn kat apma nyaangɨt mbutɨgandɨ. Kɨpmana nda kat yelavɨkngwa vak kwagala ngwula waa mbutɨgandɨ. God yeta vat vla yetɨ ngwula waa mbutɨgandɨ. Wan kɨpma yetɨngwa njɨmbla apma vat yelavɨka apma maawut sɨka wan God yeta vak vla yetɨ ngwula waa mbutɨgandɨ.  
\v 13 Nɨn maawut viyalɨndɨ, nɨma njambwi nyan yaiga njɨmbla kat kawiga lɨganɨn. Nɨn kat kwunatɨga nyan Jisas Kraist ngɨni apma vapmba yaigandɨ. Ndɨ kat kawiga lɨganɨn.  
\v 14 Ndɨ Jisas Kraist yalaa nɨn kat tɨga kiyandɨ. Kavle vat yetɨna vak kat Jisas Kraist kiyalaa God kat nɨn kat tɨga wenga kwindɨ. Ndɨnai kiwya apma maawupmba yetɨnan aywaa ndɨna nyangu nɨn. Apma vapmba yetɨvak yelavɨka woviyaguga lɨnangat Jisas nɨn kat kiyalaa kwunatndɨ.   
\p
\v 15 Mɨn kat mbukwa nyaangɨt nat nɨmba kat yiga ambuk. Mbupmeya vatna kwondu ngi lɨga. Ndi kat ambuk. Kavle vapmba yetɨlɨga nɨmba kat kaiwaga ambuk. Apma vapmba yetɨlɨga nɨmba kat apma vat yetɨlɨgangwuk waga ambuk. Mɨna nyaangɨt wutapman yinjeyan wan kavle vatna. Wan nyaangɨt wukaandi wowun mɨn kat.   
\c 3  
\p
\v 1 Mɨn ndi kat awamba. Gavmana njambwi nyan waiga nyaangɨt awupmbangwuk waga ndi kat awamba mɨn. Wutaa wan nyaangɨpmba yetɨmbangwuk waa ndi kat awamba mɨn. Ngepma kwunatɨnja apma njɨvwa aywaa agwupmba ngwuk waga ndi kat awamba mɨn.  
\v 2 Nat nɨmba kat ndi kat kavle nyaangɨt ke ngambungweya waga ndi kat awamba mɨn. Kwundimba ke nɨmamba walea kwundimba walinja waga awamba mɨn ndi kat. Apma maawut sɨka nat nɨmba kat aywaa kwunapmba ngwuk waga ndi kat awamba.  
\v 3 Nɨnagwi nɨno tak kavle maawupmba yelavɨka yetɨnɨn. Nɨn God kat kaiwaa nat nɨmba kat kaiwaa yetɨla nɨmba nɨn. Nɨna mbangɨ waiga vat mɨna wuka yetɨnɨn. Nat nɨmba kat njɨka waga ndi kat tɨpmwigwula yiga yetɨlɨnɨn. Nat nɨmba nɨn kat kai walɨndi. Nɨn awat sowat kai walɨnɨn.  
\v 4 Wan kavle vat yiga yetɨlɨna njɨmbla God nɨn kat vɨga woviyaguga lɨga nɨn kat yalaa kwunatndɨ.  
\v 5 Apma vat yiga yetɨlɨna vak kat vɨlaa ana kwunatndɨ. Kavle savle yetɨna vak kat vɨlaa nɨn kat miwa yilaa God nɨn kat awagapma kwunatndɨ. Godna nyangu laataa lɨnɨn maa God nɨna kavle vak kat lɨmbwindɨ. God ndɨna waagan nɨn kat kwindɨ mala apma kupi maawut sɨka yelavɨka apma vat yetɨganɨn.  
\v 6 Jisas Kraist nɨn kat kwunatndangat God nɨmamba ndɨna waaga nɨn kat kwindɨ mala nɨna mbangɨmba tavilaa lɨndɨ.  
\v 7 Tavilaa lɨndɨ maa God nɨn kat awagapma kwunaka walɨgandɨ. Ngwuk wunai lɨga vla lɨgangwuk waa walɨgandɨ. Wandɨ maa ndɨna nyangu vla tɨganɨn. Tɨga lɨga njɨmbla njɨmbla apma vat yetɨneya vak kat klavak kat yelavɨka kawiga lɨganɨn.   
\p
\v 8 Wan mɨn kat wawa nyaangɨt mɨn kat woseka wawa nyaangɨt ana ndɨ. Wan nyaangɨt nat nɨmba kat nɨmamba mbupmangat walaa mɨn kat mbukwun. God kat yelavkɨa kwutaa la nɨmba apma njɨvwa kwuka yetɨnjangat ambup mɨla wowun. Apma maawut sɨka apma njɨvwa kwuka yetɨnjan ndi nat nɨmba kat kwunaka yetɨgiyandi.  
\v 9 Kaawa viyaga kwo ngambulɨnjeya kavle nyaangɨt mɨn kwagala mɨla. Ke wuka. Tamba la ngwat walangana sɨ kat mɨn ke ngambuga. Nat nɨmba kat kwundimba ke waliavat wameya. Moses kwinda nyangɨk kat wutaa kwundimba ke waliavat wameya. Wan vak kat wutaa waliavat wameyan mɨn apma vat ana lɨgiyamɨn.  
\v 10 Ngwula kɨta nyan kwundimba waliavat njɨmbla njɨmbla ngambulɨndeyan ndɨ kat mɨn ndɨna maawut kwunapmak ndɨ kat awamba. Wan vak ke ngambuma waa ndɨ kat awa. Njamba vɨli wan vat ndɨ kat wamɨn mala wupmak kat kai wandeyan ngɨni ke ndɨ kat ngambuga. Ndɨ kat kwagala. Dɨnogwinala mɨn ke kɨta vat yetɨga.  
\v 11 Ngi vat nyan apma vat kwagalalaa kavle vapmba yetɨlɨga nyana. Ndɨna maawupmba yelavɨtɨnda vak God yelavɨka lɨga maawup vla ana ndɨ yelavɨtɨgandɨ. Tamba vɨlɨgamɨn.   
\p
\v 12 Kɨmbɨt wunogwi kɨta vat tɨgambɨt nyan Atemis Tikikas mbɨtna kɨta nyan kat wowun mala mɨnai lɨga kava yaigandɨ. Mɨnai lɨga kava yandɨ maa ndɨ kat kwagalalaa wumba lɨndɨ awat mɨn wunai lɨga kavat yagwa mɨla. Yipma yigiya njɨmbla Nikopolismba lɨgiyowun. Wupma yagwamba mɨn.  
\v 13 Mɨnogwi lɨga mbɨt vɨlɨlɨk palɨ Sinas lona nyaangɨt sɨmogwi lɨga nyano, Apoloso mbɨk mɨn kat kwagalalaa yivat tɨgambɨt. Mbɨk kat kwutaa yimbeya kwanda kwanda nda apma sakwat agwimɨla mbɨk kat.  
\v 14 Nɨna mbaapma nɨmba nat nɨmba kat kwunaka ndi apma njɨvwa kwutnjangat wowun. Kwanda kwanda lapman yetɨga nɨmba kat kwanda kwanda kwinjangat wowun. Apma vat yiga kwuka yetɨnjeyan njɨvwa nɨma yigiyandɨ waa mɨn kat wowun.   
\p
\v 15 Wunogwinala kɨta vat tɨga nɨmba mɨn kat apma nandinya walɨgandi. Nɨnagwi kɨta mbaapma lɨga mɨn kat woviyaguga lɨga nɨmba ndi kat apma nandinya waa awamba mɨn. God ngwuk kat awagapma kwunatɨndɨ maa apma vat yetɨ ngwula.