\id 2TI - Iatmul NT [ian] -Papua New Guinea 1975 (DBL 2014) 
\h 2 Timoti 
\toc1 Timoti kat (vɨlɨlɨk wan) 
\toc2 2 Timoti 
\toc3 2Tim 
\mt1 2 TIMOTI  
\c 1  
\p
\v 1 Wun Pol wun wan pas pɨlɨwutaa kwiya. God wandɨ maa Kraist Jisas yeta vak kat ngepma ngepmamba la nɨmba kt yiga mbutɨwun. Kraist Jisas kwutɨnda njɨvwamba God nɨn kat apma vat yetɨneya vak kat kwivat wandɨ. Ngi kat tɨga wan vak yiga mbutɨwun.  
\v 2 Wan pas Timoti mɨn kat pɨlɨwutaa kwiwun. Wuna apma nyan vla lɨgamɨn. Nɨna nyaek Godnogwi nɨna njambwi apma vat yimbangat wowun. Yimbɨt mala apma vat tɨgiyamɨn waa wowun.   
\s1 WAN APMA NYAANGƗT MBUPMAK KAT NƗNA MBANGƗ ANA WUP YIGIYANDƗ  
\p
\v 3 Wunogwio wuna ngwat nyaetno God kat maawupmba yelavɨka lɨnɨn. Kavle savle maawut ana ndɨ kat yelavɨka lɨnɨn. Sɨva sɨva mɨn kat yelavɨtaa mɨn kat tɨga walaa God kat sɨvu kɨlɨgowun.  
\v 4 Mɨn kat kwagalawun mala nglalɨma vak kat tɨga yelavɨkwun mɨn kat. Nandinya ngan mɨn kat vɨvat nɨma vat yelavɨka lɨgowun. Mɨn kat vɨlaa solat sɨgiyowun mɨn kat.  
\v 5 God waa apma vak kat kwutaa lɨma vak vla tat mɨna mbaambu Lois kwutaa lɨlɨ. Mɨna nyɨmeo Yunis kwutaa lɨlɨ. God waa apma vak kat. Kwutaa lɨma vak vɨga lɨgowun.   
\s1 WAN APMA NYAANGƗK KAT KWUTAA LƗMANGAT MƗN KAT WAVAT YIGOWUN  
\p
\v 6 Tat mɨna nambumba wuna taamba taagwun. God mɨn kat apma vat kwindɨ. Kwinda vak ke kwagalama. Kwinda vapmba yetɨ mɨla.  
\v 7 Nat nɨmba kat vaaka yetɨneya vat God nɨn kat ana kwindɨ. Apma vat kwonduo woguga yetɨneya vat mɨna God nɨn kwindɨ. Nat nɨmba kat kwunaka woviyaguga yetɨneya vak God nɨn kat kwindɨ. Nɨn nɨna maawuk kat mɨna vɨga kwunaka yetɨnangat God nɨn kat kwindɨ.  
\v 8 Nɨna njambwi nyan waa nyaangɨk kat mɨna mbangɨ wup ke yindeya. Wun Godna njɨvwa kwutɨwangat tɨga kalabusmba lɨgowun. Tɨwa vak kat mbupmak kat mɨn mɨna mbangɨ wup ke yindeya. Wan apma nyaangɨt mbupmɨn mala nat nɨmba mɨno mɨn kat kavle vat yinjeya vak kat mɨn ke vaka nɨma vat yelavɨka. God mɨn kat ava kwilɨgandɨ.  
\v 9 God nɨn kat kwunatndɨ. Apma vapmba yetɨnangat nɨn kat wandɨ God. Nɨna apma njɨvwa kat tɨga vɨlaa ana kwunatndɨ. Ndɨna maawupmba mɨna yelavɨtaa nɨn kat awagapma mɨna kwunatndɨ. Tamba glei God yelavɨtndɨ. Ndi kat kwunapmak kat Kraist Jisas kat ay mɨla waigowun waa tamba yelavɨtndɨ God.  
\v 10 Mbambala God yelavɨtnda vak vɨlɨganɨn. Nɨn kat kwunatna nyan Kraist Jisas yalaa kavle vat yiga yetɨlɨna vak kat Kraist Jisas tamba kwulatndɨ. Wan apma nyaangɨt mbuka njɨmbla njɨmbla apma vat yetɨneya vak nɨn kat mbutndɨ.  
\v 11 Wan apma nyaangɨt mbuka yiga ndinyangu kat vɨsɨmogwiwangat God wun kat wandɨ, yiwun.  
\v 12 Ngi kat tɨga nat nɨmba kavle vat yetɨla nɨmba wun kat kavle vat yilɨgandi. Wan njɨvwa kwutɨwa njɨvwa wun kat God kwindɨ mala kwutɨwun, mandɨt nyaangɨt wun kat ana waigandɨ. Yelavɨka vɨga lɨgowun. Wungi kat tɨga wan njɨvwa kwupmak kat wuna mbangɨ ana wup yigandɨ. Wan kwutɨma njɨvwa kwuka lɨga ngɨni njambwi nyan yaigan nandinya ndɨ kat vɨwun, wuna njɨvwa njɨlɨgiyandɨ.  
\v 13 Wunamba wupma apma nyaangɨpmba yiga yetɨ mɨla. Wan Kraist Jisas waa nyaangɨk kat kwutaa yetɨma vak kat ke kwagalaga. Kraist Jisas nat nɨmba kat yɨga kwunaka woviyaguga yetɨlɨnda vapmba mɨno wupma yetɨ mɨla.  
\v 14 Godna waagan mɨna maawupmba lɨgandɨ. Ndɨ mɨna maawupmba lɨga wan apma nyaangɨt mɨn kat vɨsɨmogwilɨgandɨ. Wan nyaangɨk kat mɨna maawut ke sɨlawoka. Mɨn yelavɨtsɨmbla yetɨgiyamɨn.   
\p
\v 15-16 Esiamba la nɨmba wun kat kai waa kwagalandi. Vɨga yelavɨka lɨgamɨn. Ndina vɨlɨlɨk palɨ Fiselas Hemosenis mbɨtno wun kat kai waa kwagalambɨ. Wun kat senmba tulaa kalabusmba yiga taaganja vak kat ndɨ ndina mbangɨ ana wup yindɨ wun kat. Njambwi nyan God ndɨno ndɨna ngaymba lɨga nɨmba kat nɨma vak yelavɨka kwunatndangat wowun.  
\v 17 Wan nyan Onesiforas rom walɨnja ngepma wun kat kwaka yiga wun kat vɨndɨ.  
\v 18 Efesas walɨnja ngepmamba lɨwa njɨmbla wan nyan wun kat nɨma sakwat apma vat yinda wun kat. Vɨga yelavɨka lɨgamɨn. Njambwi nyan yaiga nandinya Jisas Kraist wandɨ maa God ndɨ kat apma vat yindangat wowun.   
\c 2  
\s1 KRAIST JISASNA SOLDIA VLA LƗGANƗN  
\p
\v 1-2 Mɨn wuna nyan, mɨno wupma lɨgiyamɨn. Kraist Jisas awagapma kwinda apma vat klalaa mɨn tagula ava lɨgiyamɨn. Mɨn nɨma sakwat nsmbana nɨndɨmba laataa lɨmɨn mɨn kat mbukwa nyaangɨt nat apma nɨmba kat yiga ambuk. Nat nɨmba kat sɨmagagiyaa nɨmba kat vɨlaa ambup mɨla. Ndino mbupma nyaangɨt nat nɨmba kat mbupmba ndi. Ndina maawupmba mbup mbutandi.  
\v 3 Nɨn Kraist Jisasna soldia vla lɨganɨn maa kavle nɨmba ndi vat yilɨga nɨn kat. Mɨn kat vat yivat yindi wana vaatɨmeya. Mɨn tamba soldia mɨn.  
\v 4 Soldia kwo lɨga nɨmba kwutɨga njɨvwa ana kwutɨgandɨ. Wan njɨvwa kwagalalaa ndɨna njambwi nyan walɨga njɨvwa mɨna ndɨ kwutɨgandɨ. Ndɨna njambwi yelavɨtɨga maawupmba njɨvwa kwutɨgandɨ.  
\v 5 Kwulaka yilɨga nyan ndɨna maawupmba yelavɨka pɨlɨndeyan ndɨ wan nyan apma wenga nda ana klaigandɨ. Wanjeya vapmba yelavɨka pɨlɨga kwulaka tata yindeya ndɨ wan nyan apma wenga nda klaigandɨ.  
\v 6 Kɨta nyan ambugat kwutaa naandeyannda apma vat wokega sɨk wagwundɨ, ndɨ wan nyan ndɨna lak tatak ndɨna ambuna nda klandeyan wovuna.  
\v 7 Mɨn kat mbutɨwa nyaangɨt yelavɨp mɨla. Njambwi nyan mɨn kat apma maawut wawa vak kat yelavɨka yetɨmeya maawut kwigiyandɨ.   
\p
\v 8 Jisas Kraist kat ndɨno ndɨ kat nɨma sakwat kavle vak yalɨndɨ. Wan vak kat mɨna maawut ke tɨvɨga. Jisas ndɨ Devitna mbaapmamba la nɨmbana mbaapmamba yalaa tɨndɨ. Ndɨ kat sɨndi, Wundumbu yilaa lɨga laatndɨ. Njɨmbla njɨmbla wan nyaangɨt mbutɨgowun.  
\v 9 Wuno wun kat nɨma sakwat kavle vat wun kat yalɨndɨ. Wan apma nyaangɨt mbutɨwangat wun kat kwutaa man taamba ngilaa kalabusmba taagandi. Kavle nɨmba kat nginja vak vla wun kat ngilaa kalbusmba taagandi. God waa nyaangɨt mbutɨwa nyaangɨk kat kai wandi maa ana ngɨlɨndɨ.  
\v 10 Wun kat nɨma vat yinjeya vak kat wun nɨmamba ana yelavɨka lɨgowun. God wandɨ lɨga nɨmba kat tɨga wan njɨvwa kwutɨgowun. Kraist Jisas ndi kat kwigiyaa apma vat yetɨnjeya vak klanjangat wowun. Wan vak klalaa ndi njɨmbla njɨmbla Godnogwinala kɨta vat apma vat yetɨgiyandi.  
\v 11 Tamba wanja nyaangɨt wan apma nyaangɨt kɨngiyan. Jisas kiya vak vla kiyavak kat nɨn ana vakiyanɨn. Ngɨni kiyalaa njɨmbla njɨmbla ndɨnogwinala apma vat tɨgiyanɨn.  
\v 12 Ndɨ kat kwagalalapman yineyan ndɨnogwinala tɨga nat nɨmba kat vɨga lɨgiyanɨn.  
\v 13 Jisasna njɨvwa kwukiyanɨn waa walɨneya nyaangɨk kat kai walaa kalɨtaa mandɨp vak yineyan ndɨ Jisas nɨn kat mandɨp mandɨp vak ana yigiyandɨ. Wanda nyaangɨpmba mɨna yigiyandɨ nɨn kat.   
\s1 GODNA NJƗVWA KWUTƗGA NƗMBA GOD NDI KAT VƗGA LƗGANDƗ  
\p
\v 14 Mɨn kat mbukwa nyaangɨt nat nɨmba kat ambuk. Kaawa viya nɨmamba nyaangɨt ngambulɨnja vak kat God wutaa kai walɨgandɨ. Kai walɨnda vak ndi kat awamba wan vak ke yetɨnja waa awa. Wan kavle nyaangɨt wutaa ndina maawut kavle yigiyandɨ.  
\v 15 God mɨn kat kwiya njɨvwa mɨn apma vat kwuka alɨ. Apma vat kwupmeya ngɨni God kat vɨlaa mɨna mbangɨ ana wup yigiyandɨ. God waa apma nyaangɨt yigumba ndinyangu kat savagu ambup mɨla.  
\v 16 God kat kai walɨnja nyaangɨt kwagala. Ke wuka. Wan nyaangɨt wan God kat kai wanjeya nyaangɨt wukiya nɨmba kavle vat yetɨnjeya vak nɨman yigiyandɨ.  
\v 17 Wan nɨmba ngambulɨga kavle nyaangɨt wutɨga nɨmbana maawupmba kawiya vla kɨlɨgandɨ. Kavle vat ngambulɨga nɨmbanala tɨlɨgambɨk vɨlɨlɨk palɨ Haimenias Failitas.  
\v 18 Wumbɨt vɨlɨlɨk palɨ apma nyaangɨk kat kai waa kwagalalaa mandɨt nyaangɨpmba ngambulɨmbɨt. Wumbɨt nyan kupma wambɨt. Kiya nɨmba tamba laatndi waa wambɨt. Nat nɨmba wan nyaangɨt wutaa ndina maawut nyɨm nyɨm walɨndɨ, wan apma nyaangɨt kwagalavat nat nɨmba wandi.  
\v 19 Wan mbaapma nɨmba ana alɨpsɨga Godna mbaapma nɨmba kat kwulaiyandi. Godna mbaapma nɨmba taunja kwaalɨk tɨga vla lɨgandi. Wan njambiya taaga nyan, God, anda nɨmba ndi wuna mbaapmamba lɨga nɨmba. Anda nɨmba ndi nat mbaapmamba lɨga nɨmba waa vɨga God njambiya taagalɨgandɨ. Kɨta nyan wuna mbaapmba wuleilaa tɨndeyan ndɨ wan nyan kavle vak kat kwagalagiyandɨ waa walaa God njambiya taagalɨgandɨ.   
\p
\v 20 Nɨma ngaymba nɨma sakwat aw yaanjɨ lɨgandɨ. Nat aw yaanjɨ golmba kwutnjana. Nat aw yaanjɨ silvamba kwutnjana. Nat aw yaanjɨ mimba kwutnjana. Nat aw yaanjɨ kɨpmamba kwutnjana. Nat aw yaanjɨmba apma nda naangalaa nat aw yaanjɨmba kavle nda naangandi.  
\v 21 Ngwula kɨta nyan kavle vak kat kwagalalaa apma vapmba yetɨnjeyan wan apma nda naaganjeya aw yaanjɨ vla lɨgiyandɨ. Wan ngayna njambwi nyan vɨlaa wan apma aw klalaa wan apma nda naagagiyandɨ. Ngwutno nɨmbun nɨma sakwat apma njɨvwa njambwi nyan njɨvwa kwukiyangwuk.  
\v 22 Mɨn kwandɨ nyangu yetɨga kavle vak yetɨ mɨla. God waa apma nyaangɨpmba mɨn nɨmamba kwutaa yetɨ mɨla. Nat nɨmba kat vɨga yetɨga woviyaguga alɨ mɨla. Nat nɨmba kat vɨga yetɨga woviyaguga alɨ mɨla. Waliavak yilɨnja vak kwagala mɨla. Nat nɨmba ndina apma maawupmba yelavɨtaa njambwi nyan kat wagalalɨgandi. Ndinogwinala kɨta vat yetɨ mɨla.  
\v 23 Kwo kavle nyaangɨk kat kaawa viyaa ngambulɨnja nyaangɨt wan nyaangɨt kat mɨn ke wuka. Kwagala mɨla. Wungi vat kavle nyaangɨt waliavat ngambulɨnja nyaangɨtna. Mɨn ke wuka.  
\v 24 Njambwi nyana njɨvwa kwutɨga nyan waliaga viyavak kat mɨn mɨna maawupmba ana yelavɨka lɨgiyamɨn. Mɨn kwo yetɨgiyamɨn. Mɨn apma vat mɨna nɨma sakwat nɨmba kat kwunaka yetɨ. Ndi kat wan apma nyaangɨt vɨsɨmogwiga yetɨlɨgiyamɨn. Wan kavle vat yetɨnjeya vak kat mɨna maawupmba wana ndi kat kɨmbut ygia yelavɨtɨmeya.  
\v 25 Mbutɨma nyaangɨk kat wupmak kat kai walɨgiya nɨmba ke ndi kat njɨka waga. Ndi kat yigumba tangaka ndina maawut kwunakiyamɨn. Kupi maawut yelavɨtaa wama apma nyaangɨpmba kwutaa lɨnjangat God anagandɨ ndi kat waigaa.  
\v 26 Wan nɨmba mbambala Setena nyaangɨt tamba wuka lɨgandi. Seten ndi kat tamba kwutaa lɨgandɨ. Mandɨt kupi maawupmba yelavɨtnjeyan Seten kat kwagalalaa apma vat yetɨgiyandi.   
\c 3  
\s1 NGƗNI LA LƗGA NANDINYAMBA KAVLE VAT YAIGANDƗ  
\p
\v 1 Yaiga ngɨni la lɨga nandinya nɨma sakwat kavle vat yaigandɨ. Wuka yelavɨpmangat wowun.  
\v 2 Wan njɨmbla tɨgiyaa nɨmba ndi ndina mbangɨ kat mɨna kwunaka ndina mbangɨ kat mɨna woviyaguga lɨgiyandi. Nat nɨmba kat ana vɨga woviyaguga lɨgiyandi. Nɨma vat sanya kat maawut viyalɨndɨ yelavɨka lɨgiyandi. Nɨn apma nɨmba nɨn waa waigandi. Nat nɨmbana sɨ viyesendagiyandi. Nat nɨmba kat njɨka waigandi. Ndina nyaek nyɨme waa nyaangɨk kat wupmak kat kai waigandi. Ndi ana sɨvu kɨgiyandi nat nɨmba kat. God waa vapmba yetɨvak kat ndi kai waigandi.  
\v 3 Nɨn mbak waala kat yilɨna kavle vak vla ndi nat nɨmba kat wupma yigiyandi. Nat nyan ndina kavle maawut kwunapmat wandeyan ndi kai waigandi. Ndi nat nɨmba kat watsoga waigandi. Ndi namwiya nɨmba ndi. Apma vak yetɨvak kat ndi kai waigandi.  
\v 4 Ndi kwundi kamwin kwi namwiya nɨmba ndi. Nat nɨmba kat yelavɨtapman ndi ndina mbangɨ mɨna yelavɨka yetɨlɨgiyandi. Nɨn apma nɨmba nɨn waa ndi yelavɨtɨgiyandi. Ndi God kat ana yelavɨka woviyaguga lɨgiyandi. Ndi ndina mbangɨ kat mɨna yelavɨka yetɨlɨgiyandi.  
\v 5 Nat nɨmba yetɨnja vak kat vɨlaa God waa vapmba yetɨgandi waa yelavɨkiyandi. Ndi ndina maawupmba ana God waa vak yetɨlɨgandi. Mandɨp mandɨp waga mandɨp vapmba yiga yetɨlɨgandi. Wungi vat kavle vat yiga yetɨlɨga nɨmba kat mɨn kai waa kwagala mɨla.  
\v 6-7 Wundi kavle vapmba yeta nɨmbana nat nɨmba kavle nyaangɨt yi ya mbuka yetɨlɨgandi nat nɨmba kat. Ndi ngay wuleilaa maawut sɨtapma ta taagwa kat wan kavle nyaangɨt wuleiga ndi kat mbutɨgandi. Ndi kat mbutɨnja nyaangɨt ndina maawupmba lamba ngwandɨlaa tɨgandi. Ndi woviyaguga wan nyaangɨk kat tɨgandi. Wundi taagwa kɨta nyaangɨt mɨna wutɨga tsaagwa ana ndi. Mandɨt mandɨt nyaangɨt wutɨga taawa ndi. Ndi tagula maawutno ana lɨgandi. Ndi kavle maawut sɨka lɨga tagwa ndi. Wan kavle vapmba yetɨnjeyan apma nyaangɨtna angwa ndina maawut ana ngwandɨndɨ, yelavɨkiyandi.  
\v 8 Tamba wumbit vɨlɨlɨk palɨ mbɨla sɨ Janis Jambris Moses kat kai wambɨt. Wundi kavle nɨmba wumbɨt nyan kai wamba vla ndino wan apma nyaangɨk kat kai walɨgandi. Ndina maawut kavle savle yetɨlɨnja vat mɨna yelavɨka lɨgandi. Ndina maawupmba God waa apma nyaangɨt ana yelavɨka lɨndi.  
\v 9 Wan yetɨlɨnja kavle vat nɨman ana yigiyandɨ. Kwo kavle vatnat tɨgiyandɨ. Kavle vat yiga yetɨlɨnja vak ngɨni la nat nɨmba ndina mɨnimba vɨlaa yelavɨkiyandi. Yetɨlɨnja vak kwo vatnat tɨgandɨ waa yelavɨkiyandi. Tamba wumbɨt nyan yiga yeta kavle vak kat vɨlaa mbɨk kavle nyan mbɨk waa mbɨk kat wandi.   
\s1 GOD WAA APMA NYAANGƗT MAAWUPMBA YELAVƗKA KWUTAA ALƗ MƗLA  
\p
\v 10 Tamba mɨnogwinala lɨga wan apma nyaangɨt vɨsɨmogwiwa vat vɨga wupmɨn. Yetɨwa vak vɨmɨn. Wuna maawupmba lɨga vat aywaa mbukwun mala vɨga wuka lɨgamɨn. God kat maawupmba yelavɨka kwutaa yetɨwa vak vɨmɨn. Mandɨp mandɨp vak yilapman yetɨwa vak vɨmɨn. Nat nɨmba kat kwunaka woviyaguga yetɨwa vak vɨmɨn. Tagula maawutno tɨwa vat vɨmɨn.  
\v 11 Wun kat nɨma vat yinja vak vɨmɨn. Wun kat nɨma vat yinjangat tɨga wan kwutaa yetɨwa apma vat ana kwagalawun. Antiok Aikoniam Listra walɨnja ngepma kuvupmba la nɨmba wun kat nɨma vak kavle yivat yilɨnja vak kat vɨlaa ana vaaka yiwun. Njambwi nyan wun kat kwunatndɨ mala kwo lɨwun.  
\v 12 Kɨta nyan Kraist Jisasnogwinala kɨta vat apma vat yetɨvat wandeyan nat nɨmba wan nyan kat kai waa nɨma vat yigyandi.  
\v 13 Wundi kavle nɨmba woseka walɨga nɨmba ndi kavle vat yigiyandi. Ndinai njɨtɨga kavle vat nat nɨmbana maawut kavle yilɨgandɨ. Ndino ndina maawut nɨmbun kavle yigiyandɨ.  
\v 14 Mɨn kapma vapmba lɨga nyan mɨn. Mɨna waamba wutaa maawupmba yelavɨka kwutaa lɨma nyaangɨt mɨn ke kwagalaga.  
\v 15 God wandɨ, tamba pɨlɨwutnja nyaangɨt mat nyan tɨga mɨn wan nyaangɨt mɨn wuka lɨma nyaangɨtna. Wan apma nyaangɨt wutaa Kraist Jisas kat mɨna mbangɨ wiyo waavi taagandɨ, lɨmeyan njɨmbla njɨmbla wan apma vat yetɨmeya vat klaigamɨn.  
\v 16 God wandɨ, tamba pɨlɨwutnja nyaangɨt ndina yelavɨk vapmba ana pɨlɨwutnji. God ndina maawupmba ngwandɨlaa wandɨ mala wan nyaangɨt pɨlɨwutndi. Wan tamba pɨlɨwutnja apma nyaangɨt apma vatna angwa vɨsɨmogwilɨgandɨ. Kavle vat yiga yetɨnjeyan wan apma nyaangɨt nɨn kat kai walaa kwunatɨgandɨ. Apma vat tɨneya vat nɨn kat vɨsɨmogwilɨgandɨ.  
\v 17 Wan Godna apma nyaangɨt kwutaa yetɨna nyaangɨt nɨn kat kwondu kwindɨ. Wan kwondu klalaa nɨn Godna nɨmba nɨn ndɨna njɨvwa nɨn apma vat kwukiyanɨn.   
\c 4  
\p
\v 1 Mɨn kat kɨta nyaangɨt mbupmat yigowun. Mbukweya nyaangɨpmba kwutaa yetɨmba. Godno Kraist Jisaso wan yilɨma vat mɨn kat vɨlɨgambɨt. Samat tɨga Kraist Jisas ngaga yalaa kiya nɨmba kwo lɨga nɨmba kat aywaa ndi kat sɨga nagugiyandɨ. Sɨga naguga ndina njambwi nyanat tɨga ndi kat vɨga lɨgiyandɨ. Wan njɨmbla yimeya vat vɨlaa sɨga nagugiyandɨ.  
\v 2 Wan apma nyaangɨt nat nɨmba kat ambup mɨla. Nat nɨmba wan nyaangɨk wupmak kat kai waa lɨnjeyan wan kwutaa lɨma nyaangɨt ndi kat ambup mɨla. Nat nɨmba wan nyaangɨt wupmak walɨnjeyan ndi kat ambup mɨla. Mɨn ndi kat ambup mɨla mandɨt maawut klambandi. Kavle vapmba yetɨnjeyan wan vak kwagala ngwula waa ndi kat awa. Ngwuk apma vapmba yetɨ njwula waa awa. Ndi kat asɨk gleimba wana kavle maawut yelavɨtaa njɨka walɨmeya ndi kat. Ndi kat vɨsɨmogwimeya apma vat ke kwagalaga wan vat.  
\v 3 Ngɨni lɨgiyaa njɨmbla tɨgiyaa nɨmba wan apma nyaangɨt wuka yetɨvak kat kai waigandi. Ndina maawupmba yelavɨka yetɨnjeya kavle vak kat mbukiya nɨmba kat wupmak kat kwaka yigiyandi. Ndi kat mɨna wukiyandi.  
\v 4 Wan apma nyaangɨt wupmak kat kai walaa woseka walɨnja kavle nyaangɨt mɨna wukiyandi.  
\v 5 Mɨn wan apma nyaangɨt mɨcn kwutaa yetɨ mɨla. Nat nɨmba mɨn kat nɨma vat yivat tɨnjeyan ke nɨmamba yelavɨka. Wan apma nyaangɨt nat nɨmba kat yiga ambup mɨla. God mɨn kat kwiya njɨvwa mɨn nɨmamba kwuka yetɨ mɨla.   
\p
\v 6 Wun wuna njɨvwa tamba ngɨlɨvat yigandɨ. Wun kat tamba vatnya tamba kiyaa mɨna lɨgandi. God kat kwilɨnja nɨma ngu salatɨga vap vla wunkat vatnyandi, wuna yelogwen wupmasalakiyandɨ nɨma ngu vla.  
\v 7-8 Wun kɨta nyan kwulaka walealɨga nyan vla lɨgowun. Wun kwulaka tambat yilɨga nyan vla lɨgowun. Wan apma vat yetɨlɨwa vat ana kwagalawun. kwutaa lɨgowun. Ngi kat tɨga ngɨni Godnanamba apma wenga klaigowun. Ngɨni njambwi nyan yaiga nandinyamba kɨpmana nɨmba aywaa yetɨlɨnja vak vɨlaa lɨga apma vat sɨga nagugiyandɨ. Wan nandinyamba wun kat waigandɨ. Wun kat mɨna kɨta nyan wun kat ana waigandɨ. Yandeya njɨmbla kat kawiga lɨga woviyaguga lɨga nɨmba kat ndi kat aywaa wunai lɨga vla lɨgangwuk waa waigandɨ.   
\s1 NAT NYAANGƗT  
\p
\v 9 Nat njɨvwa mɨn kat kematnandɨ. Wun kat vɨvat kwiyatapman yagwambamɨn.  
\v 10 Wan Dimas ndɨ kɨpmana nda kat woviyaguga lɨga wun kat tamba kai waa kwagalandɨ. Ndɨ Tesalonaika walɨnja ngepmat yindɨ. Kresens Galesia walɨnja ngepmat yindɨ. Taitas Dalmesia walɨnja ngepmat yindɨ.  
\v 11 Luk mɨna wunagwinala lɨgandɨ. Yameya njɨmbla wan nyan kat Mat kat kwutaa agiya. Ndɨ wunogwinala kɨta vat tɨga alɨpsɨga njɨvwa kwukiyandɨ.  
\v 12 Wun Tikias kat wowun. Efesas walɨnja ngepmat yindɨ.  
\v 13 Tak alagumba kwusowa waavwi Troas walɨnja ngepmamba laapmiga taagala kwagalalaayawun. Kɨta nyan Kapas wan waavwi kat vɨga lɨndɨ. Yameya njɨmbla wan waavwi kwutaa agiyambamɨn. Wuna buk wuna pepa kwutaa agiyambamɨn. Nɨma maawut yelavɨka lɨgowun wat pepa kat Kiyatapman agiya.  
\v 14 Alesanda bras walɨnja kapa kwutɨga nyan wun kat nɨma vat kavle vat yindɨ. Ngɨni njamwi nyan ndɨ kat kavle vat yigiyandɨ.  
\v 15 Mɨno wan nyan Aleksanda kat yigumba vɨga lɨgiyamɨn. Wan mbutɨna apma nyaangɨk kat ndɨ kaiwalɨga nyana.  
\v 16 Tat kotmat laataa yiwa sɨva nat nɨmba wunogiwnala ana yindi. Wun kat kwagalandi. Wun kapma yiga laataa lɨga kotwun. Wun God kat wagalawun. Wun kat kwagala nɨmba ndi kat ke nɨma vat yiga waa God kat wagalawun.  
\v 17 Kotmat yiga wuleilaa laataa lɨwa njambla njambwi nyan wunogwinala lɨndɨ. Wun kat kwunaka wun kat ava kwindɨ mala man nyaangɨt apma vak ngambuwun kotmba. Yisola la Juda na ndi nat nɨmba ndi aywaa ngambulɨwa nyaangɨt wutndi. Wan kotmat laataa lɨwa nandinya wun kat ana vatnyaga kavle yindi. Kwo lɨwun.  
\v 18 Wun yelavɨka lɨwun. Wun kat njambwi nyan vɨga lɨgiyandɨ waa yelavɨka lɨgowun. Kavle vak wun kat ana kwulaiyandɨ waa yelavɨka lɨgowun. God vɨga lɨnda ngepma nyɨnangwutnat wun kat kaligiyandɨ waa yelavɨka lɨgowun. God njɨmbla njɨmbla apma vat mɨna tɨlɨgandɨ. Apma vatna.   
\p
\v 19 Priskagwi Akwila kat apma nandinya waa mbɨk kat awa. Onesiforasna ngaymba lɨga nɨmba kat vɨlaa apma nandinya waga ndi kat awa.  
\v 20 Irastas Korin walɨnja ngepmamba lɨndɨ, ndɨ kat kwagalalaa yawun. Trofimas walɨnja nyan ndɨ kat Mailitas walɨnja ngepmamba yelogwen kat tɨndɨ, kwagalalaa yawun.  
\v 21 Yipma yilɨga njɨmbla yalapman kangan walɨga nandinyamba yagwa mɨla. Kɨta njɨvwa mɨn kat kematandɨ. Wunogwinala lɨga nɨmba mɨn kat apma nandinya wandi. Yubyulas. Pyudens, Lainas, Klodia, Jisasna mbaapmamba njɨvwa kwuka yetɨlɨga nat nɨmba mɨn kat apma nandinya wandi.  
\v 22 Njambwi nyan wan mɨna maawut kwunatndangat wagalawun. God awagapma ngwuk kat kwunatndangat wowun.