\id 1JN - Iatmul NT [ian] -Papua New Guinea 1975 (DBL 2014) 
\h 1 Jon 
\toc1 Jon pɨlɨwutna kɨta wan pas 
\toc2 1 Jon 
\toc3 1Jon 
\mt1 1 JON  
\mt2 JON PƗLƗWUTA KƗTA WAN PAS  
\c 1  
\s1 APMA VAT YINEYA VAK KAT KWILƗGA NYANA  
\p
\v 1-3 Ngwuk kat Jisas Kraist kat mbupmak yigowun. Tamba nat nɨmba kat mbutnja nyaangɨt ngwuk kat mbupmat yigowun. Tamba wan nyaangɨt tɨndɨ, ndi kat mbutndi. Kwo nyaangɨt ana ndɨ. Jisas Kraist kat nɨna mɨnimba kwuka vɨnɨn. Ndɨ kat vɨga kɨtamba yetɨnɨn. Ndɨ apma vat njɨmbla njɨmbla yineya vak kat mbuka kwilɨnda vak wuka vɨnɨn ndɨ kat. Wan vak mbuka kwilɨnda vak ndɨna nyaeknanamba klanda vatna. Wungi kat tɨga wan vak ngwuk kat mbutɨgowun. Mbutuwa nyaangɨt wutaa ngwutna maawupmba yelavɨka yetɨngweyan kɨta vat yetɨgiyanɨn. Nɨn Godnonala ndɨna nyan Jisas Kraistnonala kɨta vat yetɨlɨganɨn.  
\v 4 Mbutɨwa nyaangɨt wutaa ngwutna maawupmba yelavɨka yetɨngweyan nolin ngwandɨga solat sɨweya vat nɨma vat yigiyandɨ.   
\s1 GODNA VAK APMA VAK MƗNA LƗGANDƗ  
\p
\v 5 Ngwuk kat mbutɨwa nyaangɨt Kraistnanamba klalaa mbupmat yigowun. Wan nyaangɨt kɨngiyan. Godna vak apma vak mɨna lɨgandɨ. Kavle vat ana lɨgandɨ.  
\v 6 Kɨta nyan kavle vapmba yetɨga lɨga Godnonala kɨta vat yetɨlɨgowun waa wandeyan woseka waigandɨ. Woseka waga kavle vat yiga yetɨgiyandɨ.  
\v 7 God tɨga vla yetɨndeyan Godna yelangɨ nɨmbonala kɨta vat yetɨgiyandɨ. God tɨga vla yetɨndeyan Godna nyan Jisas kwuta njɨvwa dɨna kavle vak yiga yetɨnda vak aywaa sɨlɨmbwigiyandɨ.   
\p
\v 8 Kavle vak yetɨlɨga nyan ana wun. Apma vat mɨna yetɨlɨgowun waa kɨta nyan wandeyan dɨ apma maawut ana yelavɨka lɨgandɨ. Woseka walɨgandɨ. Woseka walɨnda nyaangɨtmba ndɨna maawut kavle vat mɨna yelavɨka lɨgandɨ.  
\v 9 Wun kavle vat mɨna yiga yetɨlɨgowun waa kɨta nyan God kat wandeyan ndɨna kavle vak kat God ngwaat sɨga kwunakiyandɨ. Ana kwunakiyowun waa God ana wandɨ. Wan apma vat yigiyandɨ. Kavle vak kat sɨlɨmbwigiyandɨ.  
\v 10 Kavle vat ana yiga yetɨlɨgowun waa kɨta nyan wandeyan God woseka walɨga nyana wandeya nyaangɨt vla lɨgandɨ. Wan kavle nyaangɨt waa nyan God waa nyaangɨtmba ana walɨgandɨ. God walɨga nyaangɨt wan wupma walɨnda nyaangɨtna. Ndinyangu aywaa kavle vat mɨna yetɨlɨgandi waa God walɨgandɨ.   
\c 2  
\s1 KRAIST GODNA KIMBUK MAAWUK KAT KWUNATƗGANDƗ  
\p
\v 1 Ngwuk wuna apma nyangu ngwuk. Kavle vat yilɨngwangat kai waa ngwuk kat wan nyaangɨt pɨlɨwutɨgowun. Ngwutna kɨta nyan kavle vat yindeyan nɨmamba ke yelavɨka lɨlɨngweya. Nɨn kat tɨga God kat ngambulɨga nyan Jisas Kraist ngilɨga. Ndɨ apma vat mɨna yiga yetɨliga nyana.  
\v 2 Ndɨ nɨna kavle vak kat wenga kwiga Godna kimbuk maawut kwunatndɨ. Nɨna kavle vak kat mɨna ana kwunatndɨ. Kɨpmamba ngepma ngepmamba lɨga nɨmbana kavle vak kat aywaa kwunatndɨ.   
\p
\v 3 Kɨta nyan Godna sɨ wuka ndɨna mɨndama vɨga tɨnda vak anda vapmba vɨgiyadɨ. Wupma vɨgiyandɨ. God waa nyaangɨtmba yetɨgiyaa nyan ndɨ Godna sɨ wuka ndɨna mɨndama vɨga lɨga nyana.  
\v 4 Godna sɨ wuka ndɨna mɨndama vɨga lɨgowun waa kɨta nyan walaa God waa nyaangɨt kat kai wandeyan wan nyan woseka walɨga nyana. Woseka walɨnja vapmba walɨgandɨ.  
\v 5 Kɨta nyan God waa vapmba yetɨndeya ndɨ God kat apma vapmba woviyaguga lɨndɨ. God waa vapmba yetɨndeyan ndɨ Godnonala kɨta vat tɨndangat vɨgiyandɨ.  
\v 6 Kɨta nya Godnonala kɨta vapmba yetɨgowun waa walaa Jisas yeta vap vla yetɨndeyan nglaatndɨ.   
\s1 KUPI NYAANGƗTNA  
\p
\v 7 Wuna apma nɨmbangwuk kat kapma vat tɨga nyaangɨt ana pɨlɨwutɨgowun. Tamba la nyaangɨtna pɨlɨwutɨwa. Tak wan nyaangɨt wukngwuk.  
\v 8 Ngwuk kat nat samat kupi nyaangɨtna pɨlɨwupmak yiwa. Wan kupi nyaangɨtmba yetɨga tat Jisas yalaa ngwuk kat apma vat yindɨ. Apma vat yinda vat kulun waa kavamba lɨga kembanda vak vla lɨgandɨ. Nɨn kat kulun wala la kavle vat tamba ngɨlɨvat yigandɨ. Apma vat tamba yandɨ.  
\v 9 Kɨta nyan ndɨna kɨta mbaapma nyan kat kai walɨndeyan ndɨ kulun waa kavamba yetɨlɨga nyan vla lɨgandɨ. Wun apma vapmba yetɨlɨgowun waa wandeyan ndɨ woseka waigandɨ.  
\v 10 Kɨta nyan ndɨna kɨta mbaapma nyan kat kwunaka woviyaguga lɨndeyan ndɨ wan nyan kemba lɨga kavamba yetɨlɨga nyan vla lɨgandɨ. Ndɨ kavle vak ana yetɨlɨga nyana. Ndɨnai yetɨlɨga vak wan nat nɨmbana maawut ana kavle yigiyandɨ.  
\v 11 Kɨta nyan ndɨna kɨta mbaapma nyan kat kai walɨndeyan ndɨ kavle maawut yelavɨka yetɨlɨga nyana. Apma vat yindeya yambɨ kai. Mɨni kiya la yetɨlɨga nyan vla lɨgandɨ. Apma vat yiga yetɨndeya yambɨ kat ana vɨlɨgandɨ.   
\p
\v 12-14 Ngwutna nat nɨmba mat nyangu vla lɨgangwuk. God Jisas kwutna njɨvwa vɨlaa ngwula kavle vat yilɨngwa vat yilɨngwa vat sɨlɨmbwindɨ. Gwuk God kat vɨga lɨgangwuk. Mbambala nglei ngwula maawupmba wan vak klangwuk. Ngwuk kat pɨlɨwutɨgowun. Ngwutna nat nɨmba nɨma nɨmba vla lɨgangwuk. Tamba la nyan God ndɨna sɨ wuka ndɨna mɨndama vɨga lɨgangwuk. Ngwutno ngwuk kat pɨlɨwutɨgowun. Ngwutna nat nɨmba kwandɨ nyangu vla lɨgangwuk. Ngwuk Seten kat kwulakngwuk. Ngwuk kwonduo lɨga nɨmba ngwuk. God waa nyaangɨt ngwula maawupmba lɨgandɨ.  
\v 15 Wan kɨpmamba lɨga vak kat nɨmamba ke yelavɨka yetɨga. Kɨta nyan wan kɨpmana vak kat nɨmamba yelavɨka yetɨndeyan God kat nɨmamba ana yelavɨk kiyandɨ.  
\v 16 Wan kɨpmana vat kɨngiyan. Kavle nda klavat walɨnja vat. Kavle vat vɨvat walɨnja vat. Wun nɨma nyan wun wun apma vat yetɨga nyan wun waawalɨnja vat. Wan vak God kwiya vak ana ndɨ. Kɨpmana vatna.  
\v 17 Kɨpmana vat ngɨni aywaa ngɨlɨga yiga kwo vatnat tɨgiyandɨ. Klavat walɨnja vat ngɨni ngɨlɨga yiga kwo vatnat tɨgiyandɨ. Kɨta nyan God waa vapmba yetɨndeyan wan nyan njɨmbla njɨmbla apma vat tɨgiyandɨ.   
\s1 KRAIST KAT KAI WALƗGA NYANA  
\p
\v 18 Wuna nyangu, kɨpmana vat ngɨlɨgiya njɨmbla tamba ngwaya. Kraist kat kai waiga nyana yaiga njɨmbla tamba ngwaya. Wupma wukngwuk. Mbamala nɨma sakwat nɨmba Kraist kat kai walɨgandi. Ndina vak vɨlaa kɨpmana vat ngɨlɨgiya njɨmbla tamba ngwaya waa yelavɨtɨgangwuk.  
\v 19 Kraist kat kai walɨga nɨmba tat nɨnagwinala yetɨndi. Nɨna mbaapma nɨmba ana ndi. Kwo nɨmba ndi. Nɨna mbaapma nɨmba tɨga yinjan nɨn kat ana kagalgedi. Nɨn kat kwagalanjangat vɨlaa nɨna mbaapma nɨmba ana ndi waa wɨnɨn.   
\p
\v 20 Gwuk kapma vat tɨga nɨmba ngwuk. Godna waagan ngwuk kat taviga apma maawut kwindɨ.  
\v 21 Ngwuk Godna vak ana vɨga lɨgangwuk waa ana waigowun. Vɨga lɨgangwuk. Godna vak woseka waa vak ana ndɨ waa vɨga lɨgangwuk. Wungi kat tɨga ngwuk kat pɨlɨwutɨgowun.   
\p
\v 22 Jisas God waa nyan ana ndɨ Kraist ana ndɨ waa walɨga nyan ndɨ woseka walɨga nyana. Ndɨ Kraist kat kai walɨga nyana. Godnogwi ndɨna nyan kat kai walɨga nyana.  
\v 23 Jisas God waa nyan ana ndɨ waa kɨta nyan wandeyanwan nyan Godnonala kɨta vak ana yetɨlɨgandɨ. Jisas God waa nyana waa kɨta nyan wandeyan wan nyan Godnonala kɨta vat yetɨlɨgandɨ.  
\v 24 Tak wukngwa apma nyaangɨt ngwutna maawupmba taaga. Wan apma nyaangɨt ngwula maawupmba lɨndeyan Godnogwi ndɨna nyanonala kɨta vat yetɨgiyangwuk.  
\v 25 Tak God nɨn kat wandɨ. Njɨmbla njɨmbla apma vat yetɨngweya vak gwuk kat kwigiyowun waa wandɨ God.   
\p
\v 26 Nat nɨmba ngwutna maawuk kat kavle vat yivat wandi. Ngwutna maawut kwunapmak kat kdinai yetɨga vak ke vɨga waa ngwuk kat pɨlɨwutɨgowun.  
\v 27-28 God dɨna waagan gwuk kat kwindɨ, tavilaa ngwula maawupmba lɨgandɨ. Wun manda kat ngwula maawuk kat kwunapmak pɨlɨwutɨgowun. Godna waagan ngwula maawuk kat kwunaka gwuk kat apmavat aywaa sɨmagalɨgandɨ. Ngwuk kat sɨmagalɨnda vak woseka wa vak ana ndɨ. Savagu lɨga vatna. Ngwuk kat sɨmaganda vapmba ndɨnogwinala kɨta vat yetɨ. Kɨta vat yetɨngweyan yaiga njɨmblamba ngwutna mbangɨ wup ana yigiyandɨ. Ndɨ kat vɨga an vakiyangwuk.  
\v 29 Jisas Kraist apma vat mɨna yetɨlɨndɨ. Vɨga wutɨgangwuk. Kɨta nyan apma vat yetɨlɨga ntyan tɨndeyan Jisas Kraist njanga nyanat tɨgandɨ waa vɨga wutɨgangwuk.   
\c 3  
\s1 GODNA NƗMBA  
\p
\v 1 God nɨn kat wuna nyangu ngwut wandɨ, ndɨna nyanga vla lɨganɨn. Nin kat vɨga woviyaguga lɨndangat wuna nyangu ngwuk walɨgandɨ. Wanda vak kat ngwuk yelavɨk ngwula. Tak Jisas yandɨ, kɨpmamba la kwo nɨmba yilɨnda vak ana vɨga lɨndi. Wungi kat tɨga mbambala nɨn ndɨna yelangɨ nɨmba yilɨna vak ana vɨga lɨgandi.  
\v 2 Kɨta mbaapma nɨmba, mbambala nɨn Godna nyangu nɨn. Ngɨni tɨneya vak ana vɨga lɨganɨn. Kɨta nda mɨna vɨga lɨganɨn. Kraist yaiga njɨmbla Kraist tɨga vla tɨgiyanɨn. Wan njɨmbla Kraist yilɨnda vat vɨga lɨgiyanɨn.  
\v 3 Wan yaiga vak kat maawumba yelavɨka yetɨneyan apma maawut yelavɨka lɨgiyanɨn. Kraist yelavɨka lɨga vla yelavɨka lɨganɨn.   
\p
\v 4 Kɨta nya kavle vat yiga yetɨlɨndeyan dnɨ God kat kai walɨga nyana. Kavle vat yilɨnja vak God kat kai walɨnja vat kɨta vatna.  
\v 5 Jisas kavle vak yiga yetɨlɨnja vak kat kwunapmat yandɨ. Vɨlɨgangwuk. Ndɨ kavle vak yilɨga nyan ana ndɨ.  
\v 6 Kɨta nyan Kraistnogwinala kɨta vat yetɨndeyan kavle vat ana yiga yetɨlɨgiyandɨ. Kɨta nyan kavle vat yiga yetɨlɨndeyan ndɨ Godna sɨ wuka ndɨna mɨndama ana vɨga lɨgandɨ. Godna vak ana vɨga lɨgandɨ.   
\p
\v 7 Mat nyangu, ngwutna maawut nat nɨmba yaa kavle yilandi. Kɨta nyan apma vat yiga yetɨlɨndeyan God ndɨ kat wunai lɨga vla lɨgamɨn waa waigandɨ God. Wan nyan Kraist tɨga vla lɨga nyana.  
\v 8 Kavle vat yiga yetɨlɨga nyan ndɨ Setena nyana. Ndɨna njambwi nyan Seten tamba la njɨmblakavle vak mɨna yiga yetɨlɨndɨ. Kan njɨmbla nɨmbun. Seten yeta kavle vak kat Godna nyan Jisas kwulapmat yandɨ.  
\v 9 God njanga nyan kavle vat ana yiga yetɨlɨgiyandɨ. Ndɨ Godna vak ndɨna maawutmba ngwandɨlaa lɨgandɨ. God ndɨ kat njanda mandɨt maawut klandɨ. Wungi kat tɨga kavle vat ana yiga yetɨlɨgiyandɨ.  
\v 10 Yiga yetɨlɨnjeya vak kat vɨlaa sɨga nagugiyanɨn. Anda nɨmba Godna nɨmba. Anda nɨmba Setenana nɨmba waa sɨga nagugiyanɨn. Kavle vat yiga yetɨlɨgiyaa nyan Godna nyan ana ndɨ. Ndɨna kɨta mbaapma nyan kat kai walɨga nyan ndɨ Godna nyan ana ndɨ.   
\s1 AWAT SOWAT KWUNAKA WOVIYAGUGA ALƗ  
\p
\v 11 Awat sowat kwunaka woviyaguga lɨneyan apma vala. Wan nyaangɨt tak wutɨngwa nyaangɨtna.  
\v 12 Wupma Ken ya vak vla ke yiga. Ndɨ kavle nyana. Ndɨna yakwa ndu kat vatnyandɨ. Manda kat ndɨ kat vatnyandɨ. Ken ndɨnai yila vat kavle vatna. ndɨna sambu yila vat apma vatna. Ngi kat tɨga nyambwun laataa sambu kat tɨpmwigwula yiga vatnyandɨ.   
\p
\v 13 Mbambala kɨpmamba lɨga kwo lɨga nɨmba kwutɨngwa njɨvwa kat kai waa tɨpmwigula yiga lɨgandi. Ngwuk nɨma sakwat vak ke yelaɨtɨga. Wan vak ndinai ya vatna.  
\v 14 Nɨn nɨna kɨta mbaapma nɨmba kat kwunaka woviyaguga lɨganɨn. Kavle vat yetɨlɨnja vak kwagalaa apma vat yetɨlɨnja vapmba yetɨlɨganɨn waa yelavɨtɨganɨn. Anda vapmba vɨga yelavɨtɨganɨn. Kɨta mbaapma nɨmba kat woviyaguga lɨnangat vɨga yelavɨtɨganɨn. Kɨta nyan nat nyan kat kwunaka woviyaguga tɨlapman yindeya dnɨ kavle vat yetɨlɨga nyana.  
\v 15 Kɨta nyan ndɨna kɨta mbaapma nɨmba kat kai wandeyan wan nyan ndu nyan vatnya lɨga nyan vla lɨgandɨ. ndɨ njɨmbla njɨmbla ama vat yetnɨjeya vak ndɨna maawupmba ana kwutaa lɨgandɨ.  
\v 16 Woviyaguga lɨnja vatna angwa kɨngiyan. Jisas woviyaguga nɨn kat tɨga kiyandɨ. Ngi kat tɨga nat nɨmba kat kwunapmak tɨga kiyaneyan wovuna.  
\v 17 Kɨta nyan nɨma sakwat do lɨndɨ. Ndɨna kɨta mbaapma nyan kwanda kwanda nda lapman nyana. Ndɨ kat kwivak kat kai wandeyan God nɨn kat woviyaguga lɨnda vamba ana yilɨgandɨ.  
\v 18 Mat nyangu, nat nɨmba kat kwunapmak kat kwundimba kwo mbak walanɨn. Ndi kat kwunak kiyanɨn.   
\s1 GOD KAT ANA VAAKIYANƗN  
\p
\v 19 Nat nyan kat kwunatneyan nɨn apma vat tɨganɨn waa yelavɨk kiyanɨn. God yetɨna vak kat ana kai waigandɨ waa yelavɨk kiyanɨn.  
\v 20 Nɨna maawut waiga nyaangɨt mɨn kavle nyan mɨn waa wandeya nyaangɨk kat ke wuka. God waiga nyaangɨt mɨna awut. ndɨ njambwi nyana. Nɨna maawutmba lɨga waiga vat nɨma vak ana ndɨ.  
\v 21 Nɨna maawupmba lɨga kavle nyaagɨt mɨn kavle nyan mɨn waa walapma yindeyan wovuna. Ngi kat tɨga God kat ana vakiyanɨn.  
\v 22 Godnanamba wagalaneya da klaiganɨn. Ndɨnai waa nyaangɨtmba yetɨga ndɨnai yelavɨka lɨga vapmba yetɨneyan wagalaneya nda klaiganɨn.  
\v 23 Ndɨnai waa nyaangɨt kɨngiyan. Godna nyan Jisas Kraist kat gwutna mbangɨ wiyo waavi taakandeyan wovuna. Awat sowat kwunaka woviyaguga alɨ ngwula waa wandɨ God.  
\v 24 Wan nyaangɨtmba yetɨneyan Godnogwinala kɨta vat yetɨgiyanɨn. Wan nyaangɨtmba yetɨneyan nɨn kat kwinda waagan nɨna maawupmba lɨgiyandɨ. Godna waagan nɨna maawupmba lɨndeyan Godnogwinala kɨta vat yetɨna vak vɨlɨganɨn.   
\c 4  
\s1 ANDA NYAANGƗT GOD WAA NYAANGƗT. ANDA NYAANGƗT KRAIST KAT KAI WALƗNJA NYAANGƗT  
\p
\v 1 Wuna nyangu, wukngwa nyaangɨt aywaa ke maawupmba kwutaa yetɨga. Wan nyaangɨt Godna nyaangɨtna? E? Godna nyaangɨt ana ndɨ? Waa maawupmba yelavɨk ngwula. Nɨma sakwat nɨmba kɨpmamba lɨgandi. Wun God waa nyaangɨt kiyalɨga nyan wun waa woseka walɨgandi.  
\v 2 Ngwuk yelavɨkngwuk. Anda nyaangɨtna Godna nyaangɨt. Godna nyan Jisas Kraist yalaa ndinyanguna mbangɨ klalaa kɨpmamba lɨndɨ waa wanjeyan Godna nyaangɨtna waa yelavɨk kiyangwuk.  
\v 3 Kɨta nyan yandan wan nyaangɨt ana mbutndɨ Godna nyaangɨt ana ndɨ. Ndɨna nyaangɨt Jisas Kraist kat kaiwalɨnda nyaangɨtna. Jisas Kraist kat kai walɨnja vak ngɨni yaigandɨ waa wowun gwuk kat. Wan vak mbambala samat tamba yandɨ.   
\p
\v 4 Mat nyangu ngwuk Godna nyangu ngwuk. Ngwuk Jisas Kraist kat kaiwalɨga nɨmba kat ngwuk kwulak kiyangwuk. Ngwula maawupmba lɨga nyan nɨma nyana. Ndina maawupmba lɨga nyan mat nyana.  
\v 5 Ndi wan kɨcpmana nɨmba ndi. Ndi kɨpmana vat mɨna ngambulɨgandi. Wan kɨpmamba lɨga kwo nɨmba ndinai walɨgavat wutɨgandi.  
\v 6 Nɨn Godna nɨmba nɨn. Godna nɨmba nɨnai walɨga nyaangɨt wutɨndi. Kɨta nyan nɨnai walɨga vak wutapman yigiyaa nyan Godna nyan ana ndɨ. Nɨn yelavɨk kiyanɨn. Kandana apma maawut tɨga nyan. kandana kavle maawut tɨga nyan. Wutnjeya nyaangɨt wutaa yelavɨk kiyanɨn. Ndi kana nyaangɨtna wutnjeya waa yelavɨk kiyanɨn.   
\s1 GOD WOVIYGUGA NAMWIYA NYANA  
\p
\v 7 Wuna nyangu, ngwuk awat sowat woviyaguga alɨ ngwula. Awat sowat woviyaguga lɨneya vat God kwiya vatna. Kɨta nyan nat nɨmba kat woviyaguga lɨndeyan wan nyan Godna nyana.  
\v 8 Kɨta nyan nat nɨmba kat woviyaguga lɨlapman yindeyan Godna nyan ana ndɨ. Ndɨ God woviyaguga yeta vak vla ana yetɨlɨndɨ. God woviyagu namwiya nyana.  
\v 9 Tɨnda vak nɨn kat sɨmogwilɨgandɨ. God tamba ndɨna kɨta nyan kat kɨpma ay wandɨ mala ngaga yandɨ. Apma vat tɨneya vak sɨmagavat ngaga yandɨ. God ndɨ kat ay wandangat nɨn kat woviyaguga lɨnda vak vɨlɨganɨn.  
\v 10 Nɨn God kat ana nɨmamba woviyaguga lɨnganɨn. God nɨn kat nɨmamba woviyaguga lɨgandɨ. Woviyaguga lɨndangat ndina kavle vak yiga yetɨnja vak kat wuna kimbuk maawut mɨna lak yiga kwunak wandɨ mala ngaga yandɨ.  
\v 11 Wuna nyangu, God nɨn kat nɨmamba woviyaguga lɨneya vat nglaatndɨ.  
\v 12 Kɨta nyan ana God kat vɨga lɨgandɨ. Awat sowat woviyaguga lɨneyan God nɨna maawupmba yetɨlɨgandɨ. God nɨna maawupmba lɨga nat nɨmba kat kwunapmak kat yilɨganɨn ndɨnai waa nyaangɨtmba. Waa nyɨɨngɨtmba.   
\p
\v 13 Anda vapmba Godna yelangɨmba yiga tɨneya vak vɨgiyanɨn. Anda vapmba God nɨna maawupmba yalaa tɨndeya vak vɨgiyanɨn. Ndɨna waagan nɨn kat kwindɨ. Ndɨna waaganwan vak nɨn kat sɨmogwilɨgandɨ.  
\v 14 Kɨpmamba lɨga nɨmba kat kwunapmak kat God ndɨna nyan kat kwindɨ. kwindɨ, yandɨ mala vɨnɨn. Vɨna vak mbutɨganɨn ngwuk kat.  
\v 15 Jisas Godna nyana waa kɨta nyan wandeyan God ndɨna maawupmba yetɨlɨgandɨ. Ndɨ Godna yelangɨmba lɨgandɨ.  
\v 16 God ya vak vɨlaa God nɨn kat woviyaguga lɨnda vak kat vɨlɨganɨn. God nɨn kat woviyaguga lɨnda vak kat wutaa nɨna mbangɨ wiyo waavi laagalɨgandɨ. God nɨn kat woviyagu namwiya nyana. Kɨta nyan nat nɨmba kat woviyaguga lɨndeyan ndɨ Godnonala kɨta vat yetɨlɨgandɨ. God ndɨna maawupmba yetɨligandɨ.  
\v 17 God nɨna maawupmba lɨga nɨna mbangɨmba lɨndɨ, God kat woviyaguga lɨganɨn. God tɨga vla tɨga nɨmba nɨn. Ngi kat tɨga yaiga nandinya God sɨga nagugiya nandinyamba God kat ana vakiyanɨn.  
\v 18 God kat maawupmba yelavɨka woviyaguga lɨneyan nɨna mbangɨ ana vak vak yigiyandɨ. God kat woviyaguga lɨneya vak vatɨnjeya vak kat kwulatɨgandɨ. God wun kat sɨgiyandɨ waa waiga nyan ndɨ vakiyandɨ. God wun kat woviyaguga lɨgandɨ waa waiga nyan ndɨ ana vakiyandɨ.   
\p
\v 19 God kat kwo ana woviyaguga lɨganɨn. Tat nɨn kat woviyaguga lɨndangat tɨga awat ndɨ kat woviyaguga lɨganɨn.  
\v 20 Kɨta nyan God kat wun woviyaguga lɨgowun waa walaa ndɨna wakwa nyan kat kai wandeyan wan nyan woseka walɨgandɨ. Ndɨna yakwa nyan kat ndɨna mɨndama kat viɨga lɨgandɨ. Ndɨ kat kai walɨgandɨ. Mɨndama vɨlapman yindeya nyan God wan nyan anda vapmba ndɨ kat woviyaguga lɨgandɨ. Ana alɨpsɨga woviyaguga lɨgiyandɨ.  
\v 21 Wawa nyaangɨt kwo ana walɨgowun. God wandɨ, walɨgowun. God wandɨ.  
\li1 Kɨta nyan wun kat mɨna ana woviyaguga lɨgiyandɨ.  
\li1 Ndɨ ndɨna wakwa nɨmba kat ndino aywaa  
\li1 woviyaguga lɨgandɨ.  
\p waa wandɨ God.   
\c 5  
\s1 GOD KAT YELAVƗTAA KƗPMAMBA LƗGA VAK KAT KWULAK KIYANƗN  
\p
\v 1 Jisas God njana nyana waa yelavɨkiyaa nɨmba ndi Godna nɨmba ndi. Kɨta nyan nɨna nyaek God kat woviyaguga lɨndeyan Godna nyangu kat aywaa woviyaguga lɨgiyandɨ.  
\v 2-3 God kat woviyaguga lɨga ndɨnai waa nyaangɨtmba yetɨneyan ndɨna nyangu kat woviyaguga lɨgiyanɨn. Kɨmbɨk vat kɨta vap mbɨt. God kat woviyaguga lɨneya vat. God waa nyaangɨtmba yetyɨneya vak. Bɨt kɨta vat bɨt. God nɨn kat wagalanda njɨvwa vali lɨga njɨvwa ana ndɨ.  
\v 4 God njana nɨmba kɨpmamba lɨga kavle vak kat kwulak kiyandi. Jisas Kraist nɨnagwinala tɨgandɨ waa yelavɨtnjeyan wan kavle vak kat kwulak kiyandi.  
\v 5 Jisas God njana nyana waa kɨta nyan yelavɨtndeyan wan nyan kɨpmamba lɨga kavle vak kat kwulak kiyandɨ.   
\s1 JISAS GOD NJANA NYANA WAA WALƗGA NƗMBA  
\p
\v 6 Jisas Kraist ngaga yalaa ngu yagulaa tɨga kiyandɨ. Ngu mɨna yaguvat ana yandɨ. Ngu yagulaa kiyavat yandɨ.  
\v 7 Jisas God njana nyan tɨndangat Godna waagan ana woseka walɨgandɨ.  
\v 8 Jisas God njana nyana waa mbutɨkandi kuvut da. Godna waagan mbutɨkandɨ. Jisas ngu yagua njɨmbla nyɨnangwutmba lɨgalɨga kwundi wandɨ. Jisas kiyanda njɨmbla God njana nyanat tɨndangat vɨndi. Wundi kuvut nda kɨta nyaangɨt mɨna mbutɨnkandi. Mandɨp mandɨp nyaangɨt ana mbutɨkandi.  
\v 9 Kwo nɨmba waiga vat wutɨganɨn. God waa nyaangɨt ndina nyaangɨk kat kwulatɨgandɨ. Ngi kat tɨga ndɨna nyaangɨt wukiyanɨn. God wandɨ.  
\p Jisas wunai njana nyana waa wandɨ.  
\v 10 Kɨta nyan Jisas kat ndɨna mbangɨ wiyo waavi laagandeyan wan nyan Jisas God njana nyana waa maawupmba yelavɨk kiyandɨ. Kɨta nyan God waa nyaangɨk kat kai wandeyan wan nyan God kat mɨn woseka walɨgamɨn waa walɨga nyana. Wan nyan God ndɨna nyan kat walɨnda nyaangɨk kat kai wandɨ.  
\v 11 God waa nyaangɨt kɨngiyan.  
\p Wuna nyan kwiwun maa ngwuk kat njɨmbla njɨmbla waa wandɨ God.  
\v 12 Godna nyan kat kwutaa la nɨmba njɨmbla njɨmbla apma vat tɨndjeya vat klandi. Godna nyan kat kwutapman la nɨmba njɨmbla njɨmbla apma vat tɨnjeya vat ana klandi.   
\s1 NJƗMBLA NJƗMBLA APMA VAT YETƗNEYA VAT KLAMƗN WAA YELAVƗK KIYANƗN  
\p
\v 13 Ngwuk Jisas God waa nyana waa yelavɨtɨga nɨmba ngwuk. Ngwuk kat wan pas pɨlɨwutɨgowun. Pɨlɨwukwa nyaangɨt vɨlaa njɨmbla njɨmbla apma vat yetɨneya vak tamba klanɨn waa yelavɨk kiyangwuk.  
\v 14 Godna yelavɨk vapmba wagalaneyan nɨnai waiga vat God wukiyadɨ. Wutndeyangat nɨna mbangɨ ana kɨlɨpangɨ yigiyandɨ.  
\v 15 Nɨnai waiga vat wutɨgandɨ. Vɨlɨganɨn. Ngi kat tɨga wagalaneya nda kwigiyandɨ. Vɨlɨganɨn.   
\p
\v 16 Kɨta nyan ndɨna kɨta mbaapma nyan kwo kavle vat yetɨndeyan wan nyan God kat wagalgiyandɨ. Wuna kɨta mbaapma nyan kat kwunak waa wagalgiyandɨ. Wagalandeyan God ndɨ kat kwunatndɨ, apma vat tɨgiyandɨ. Nat nɨmba ana kwo kavle vat yetɨlɨgandi. Ndi God kat kai walaa kavle vat yiga yetɨlɨgandi. God kat ndi kat manda kat wagalgiyangwuk. Ndi kat ana alɨpsɨga kwunakiyandɨ.  
\v 17 Kɨta nyan kavle vat yiga yetɨndeyan ana nglaatndɨ. Nat nɨmba God kat kai walapman kwo kavle vat yiga yetɨlɨnjeyan nɨma glei vat ana ndɨ. God ndɨ kat alɨpsɨga kwunak kiyandɨ.   
\p
\v 18 God njana nɨmba ana kavle vat yiga yetɨlgandi. God njana nyan Jisas dina lak kwalɨgandɨ. Ngi kat tɨga wan kavle nyan Seten ana ndi kat ngway tolala kwutaa lɨgiyandɨ.  
\v 19 Nɨn god njana nɨmba nɨn. Wan kɨpmamba lɨga kwo nɨmba kat wan kavle nyan Seten ndi kat kwutaa lɨgandɨ.   
\p
\v 20 Godna nyan ngaga yalaa nɨn kat apma maawut kwindɨ. Nɨn kat kwinda maawupmba Godna sɨ wuka ndɨ kat yelavɨka lɨganɨn. Nɨn Godnonala kɨta lulu lɨganɨn. Dɨ apma vat tɨga nyana. Nɨn ndɨna nyan Jisas Kraistonala kɨta lulu lɨganɨn. Ndɨ ndɨno apma vat tɨga nyana. Jisas Godna. Ndɨ njɨmbla njɨmbla apma vat tɨneya vak kwilɨga nyana.   
\p
\v 21 Mat nyangu, waagan kait kwunatɨnja vak kwagala ngwula.