\id REV - Huitoto Murui NT -Peru 2008 (DBL -2013) 
\h APOCALIPSIS 
\toc1 Juan Ɨco Suille Rafuena Cuiafue 
\toc2 Apocalipsis 
\toc3 Ap 
\mt1 JUAN ƗCO SUILLE RAFUENA CUIAFUE 
\c 1  
\s1 Jesucristo ɨco suille rafue lluana cuetɨcue 
\p  
\v 1 Jesucristona cuetɨcue. Juandɨcue. Jesucristo facaina maɨjɨcabidɨcue. Ie dɨbeimo itɨnomo iena Jesucristo llollena, Jusiñamui naimɨena bie rafuena uiñotade. Jɨaɨruido ɨco ebena suille rafuena uiñotade. Cuena iena uiñotallena, iena cuemo llollena, ie jaɨenicɨ cue dɨne oretate.  
\v 2 Jusiñamui cuena birui uiñotaga rafuena jai cuetɨcue. Jesucristo cuemo birui lloga rafuena jai cuetɨcue. Nana birui cue cɨua rafuena jɨaɨ jai cuetɨcue.  
\v 3 Bie ɨco suille rafuena ado facacabidɨnodɨ caɨmare iitɨmacɨ. Biena cacacabidɨno iena ɨɨnuamona, caɨmare iitɨmacɨ. Bie rafue suillɨrui iaɨrei illa jira, iemo raise cacarei. 
\s1 Siete creyentiaɨ illanuaɨmo bie carta oredɨcue 
\p  
\v 4 Asia railla enɨruemo ite creyentiaɨ, omoɨ dɨne cue uai oredɨcue. Siete illanomo omoɨ illamona, bie rafue omoɨ uiñuana jitaidɨcue. Iena omoɨ uiñollena, biena cuetɨcue. Jusiñamui ie Joreño dɨga, Jesucristo dɨga, omoɨna duenaicabide. Omoɨna uri itatacabite. Iena omoɨ uiñocana mai omoɨ jai. Jusiñamui jaie jaca ite. Birui naimɨe jaca ite. Ɨco jaca iite. Ie Joreño naimɨe abɨmo illamona, omoɨna bie rafuena raise cacataite. Iena ɨɨnotaite.  
\v 5 Ie Moo uaina raise ɨɨnuamona, enɨruemo naimɨe illa facaise Jesucristo ie Moo rafuena raise atona llouide. Naimɨe fiodaite; iadedɨ naiemona jillode. Naimɨe dane fiodaiñena jira, nana illaɨcomɨnɨ naimɨe anamo jai itɨmacɨ. Caɨna jaca isiruite. Naimɨe fiodaillamona caɨna caɨ jeacɨnomona jai jillobitade.  
\v 6 Naimɨe fiodaillamona naimɨe comɨnɨna jaidɨcaɨ. Naimɨe anamo illaɨma isoi caɨna sedallena, caɨna itatate. Naimɨe comɨnɨna caɨ illa jira, naimɨe Moo Jusiñamui dɨga atona birui ñaɨredɨcaɨ. Ie muidona naimɨemo iobillacɨnona jaca caɨ fecacabillasa. Naimɨe caɨna sedajasa. Iena jitaidɨcue. 
\p  
\v 7 Ero, enɨruemo uillɨe motodo Jesucristo biite. Naimɨe bia, nana comɨnɨ naimɨena cɨoitɨmacɨ. Naimɨena jaie meinete naɨraɨdɨ naimɨena cɨoitɨmacɨ. Duere sefuillana jacɨnaillamona nana comɨnɨ eecuitɨmacɨ. Iese jaca suite. 
\p  
\v 8 Caɨ Nama Jusiñamui cuemo llote: “Jaca bue nia iñenia, jaie jaca itɨcue. Nana rana fɨnodɨcue. Nana ra cue uaido icana jaide. Birui itɨcue. Nana ra fuilla mei, jaca iitɨcue. Siño jitodɨcue”. 
\s1 Juan Cristona cɨode 
\p  
\v 9 Daajena Cristomo caɨ duilla jira, omoɨ amadɨcue isoidɨcue. Cristomo caɨ duillamona, birui duere sefuidɨcaɨ. Comɨnɨna ɨco naimɨe sedaia, nainomo iitɨcaɨ. Naimɨe caɨ comecɨaɨna ocuiñotajamona iemo birui ocuiridɨcaɨ. Jusiñamui uaina cue llua jira, Cristo rafuena cue llua jira, duere cue sefuillena, Patmos railla uiasimo birui itɨcue. Cárcelmo illa isoi duere sefuillena, illaɨcomɨnɨ bene cuena birui oredɨmacɨ.  
\v 10 Jusiñamuina cue sedajamona, naimɨe Joreño cuena namatajamona, ɨnɨñenamona nɨcaɨrilla isoi cue jɨnafo dɨne damɨe ado lluana cacadɨcue. Trompeta isoi ie uaidɨ fɨcɨrede.  
\v 11 Cuemo llote: 
\p —O cɨoacalle rafuena cueno. O cacaacalle rafuena cueno. Ie mei bie siete illanuaɨmo iena oreta: Efesomo, Esmirnamo, Pérgamomo, Tiatiramo, Sardimo, Filadelfiamo, Laodiceamo. Dɨese illanuaɨmo oreta —llote. 
\p  
\v 12 Cuemo llotɨmɨena cue cɨoillena, jɨnafo dɨne erodatɨcue. Siete oromona fɨnoca lamparínɨaɨ cɨodɨcue. Naga lamparín ie oromona fɨnoca raɨracomo raɨde.  
\v 13 Naie lamparínɨaɨ motomo ɨimana eruaɨdɨmɨena cɨodɨcue. Naimɨedɨ Cristo. Areroina jɨtade. Oromona fɨnoca cinturóna jɨtade.  
\v 14 Naimɨe ɨfotɨraɨ userede ɨniroi isoi eo userede. Naimɨe uisɨ irai boa isoi eruaɨde.  
\v 15 Naimɨe eɨllɨdɨ bronce eo dua isoi quenirede. Naimɨe uai aillue ille tua isoi eo fɨcɨrede.  
\v 16 Ie nabeillɨmo siete ucuduna llɨide. Naimɨe fuemo nagafebei eo jairede lloebɨ ite. Naimɨe uieco eo quenirede, jitoma eo llɨgaiñua isoi. 
\p  
\v 17 Naimɨena cue cɨuamona, naimɨe uicomo fiodaitɨmɨe isoi ana uaidɨcue; iadedɨ ie nabeillɨ dɨga cuena jetajamona raite: 
\p —Cuena jacɨruiñeno. Siño jitona cue illamona, jaie jaca itɨcue. Ɨco jaca iitɨcue.  
\v 18 Jaie fiodaitɨcue; iadedɨ naiemona jaie jillodɨcue. Jaca iitɨcue. Dane fiodaiñeitɨcue. Cue uai siñona jira, comɨnɨ fiodaillɨruina llotɨcue. Cuena ɨɨnoñedɨno fiodailla mei, naimacɨ joreñuaɨ illɨnona jɨaɨ llotɨcue.  
\v 19 O como cɨua rafuena cueno. Omo cue ja llolle rafuena cueno. O cɨolle rafuena jɨaɨ cueno.  
\v 20 Ailluena rafue omo lloitɨcue. Ona iena uiñotaitɨcue. Cue nabeillɨmo siete ucuduaɨna cɨodɨo. Bie siete ucuduaɨdɨ bie siete creyentiaɨ llofueraɨnɨ isoide. Bie siete lamparínɨaɨdɨ bie siete illanomo ite creyentiaɨ isoide. Bie creyentiaɨna ja ñaɨacadɨcue —raite. 
\c 2  
\s1 Cristo Efesomo ite creyentiaɨmo lloga rafue 
\p  
\v 1 Cristo cuemo llote: 
\p —Efesomo ite creyentiaɨmo llollena, nainomo ite llofueraɨmamo cue lluana cueno: “Cue nabeillɨmo siete ucuduaɨ ite. Siete oromona fɨnoca lamarínɨaɨ motomo itɨcue. Omoɨna ñaɨtɨcue. Omoɨ llofueraɨma cue anamo ite. Omoɨ motomo cue illamona, cuena nabaidomoɨ.  
\v 2 Omoɨ motomo cue illa jira, omoɨ illana raise uiñotɨcue. Omoɨ comecɨaɨ ocuiñocana icɨriñeno itomoɨ. Maraiñedɨcɨnona fɨnoraɨnɨ dɨga nabairiñedomoɨ. Omoɨ motomo damɨerie ‘Cristo oretagacaɨ’ raitɨnona facacɨamona, naimacɨ taɨnona lloraɨnɨna uiñotomoɨ.  
\v 3 Omoɨ comecɨaɨ ocuiñocana jaicabidomoɨ. Cue muidona duere sefuidomoɨ; iadedɨ iena sefuiruiñedomoɨ. Cuena ɨɨnocana nia jaidomoɨ.  
\v 4 Iese itomoɨ; iadedɨ omoɨ abɨ rafue cuemona birui janore ite. Creyentiaɨna omoɨ nano jailla facaise cuena eo isiruitomoɨ; iadedɨ birui iese cuena isiruiñedomoɨ.  
\v 5 Iemo omoɨ comecɨaɨna faca. Cue dɨbeimo dane raise i. Cuena omoɨ nano isiruilla facaiseconi omoɨ illa isoi, cue jitaillacɨnona birui omoɨ fɨno. Cue dɨbeimo omoɨ comecɨaɨ dane raise iñenia, omoɨna duere fɨnoitɨcue. Iemona omoɨ lamparín oni uitɨcue. Omoɨ creyentiaɨna ñaɨtɨcue. Cue dɨbeimo raise omoɨ iñenia, jɨaɨruido omoɨ illanomo creyentiaɨ iñeitɨmacɨ.  
\v 6 Omoɨna marecɨnona jɨaɨ lloitɨcue. Nicolaítas railla comɨnɨ fɨnoca rafuena gaɨñedomoɨ. Iena jɨaɨ gaɨñedɨcue. Eo maraiñede rafuena fɨnocana jaidɨmacɨ.  
\v 7 Jusiñamui Joreñomona cue lloga rafue ite, omoɨ creyentiaɨ iena. Bie rafue bu cacajia, iena jɨaɨ ɨɨnua. Cuena raise ɨɨnotɨnomo Jusiñamui illanomo ite riarana iitɨcue. Ie llillemona jaca iitɨmacɨ” cueno. 
\s1 Cristo Esmirnamo ite creyentiaɨmo lloga rafue 
\p  
\v 8 Cristo cuemo llote: 
\p —Esmirnamo ite creyentiaɨmo llollena, nainomo ite llofueraɨmamo cue lluana cueno: “Jaie jaca itɨcue. Enɨruemo jaie cue ia, fiodaitɨcue; iadedɨ naiemona jai jillodɨcue. Jaca iitɨcue.  
\v 9 Cue comɨnɨna omoɨ illa jira, duere sefuidomoɨ. Omoɨ duerenana uiñotɨcue. Benomo dueredomoɨ; iadedɨ Jusiñamuimona duenidomoɨ. Naimɨe dɨne ɨco omoɨ ia, buerenitomoɨ. Damɨerie omoɨna jeare ñaɨana uiñotɨcue. Naimacɨdɨ judíuaɨ comɨnɨ; iadedɨ cue dɨbeimo iñedɨmacɨ. Taɨfe anamo itɨmacɨ.  
\v 10 Ɨco omoɨ duere sefuia, jacɨruiñeno. Taɨfe cárcelmo omoɨmona damɨeriena itataite. Abɨdo danomo omoɨ jaillena, iese omoɨna duere fɨnoite. Diez dɨgarui duere sefuitomoɨ. Omoɨ ille dɨnori cuena ɨɨnocana omoɨ jai. Duere sefuillamona bu fiodaia, cue dɨga jaca iite.  
\v 11 Jusiñamui Joreñomona cue lloga rafue ite, omoɨ creyentiaɨ iena. Bie rafue bu cacajia, iena jɨaɨ ɨɨnua. Jusiñamuidɨ cuena raise ɨɨnotɨnona naimacɨ jeacɨno facaina ɨbana oñeite. Iraimo faɨfiñeitɨmacɨ; ia Jusiñamui dɨne jaca iitɨmacɨ” cueno. 
\s1 Cristo Pérgamomo ite creyentiaɨmo lloga rafue 
\p  
\v 12 Cristo cuemo llote: 
\p —Pérgamomo ite creyentiaɨmo llollena, nainomo ite llofueraɨmamo cue lluana cueno: “Nagafebei eo jairede lloebɨ cuemo ite.  
\v 13 Omoɨ illana uiñotɨcue. Taɨfe anamo itɨno motomo itomoɨ; iadedɨ cuena ɨɨnocana nia jaidomoɨ. Omoɨmona Antipas mɨcorɨna navui meinetɨmacɨ. Naimɨe mɨcorɨdɨ cue rafuena raise llofueuide. Naie facaise cuena faɨnonocaiñedomoɨ;  
\v 14 iadedɨ cuemona janore rafue omoɨ dɨga birui ite. Omoɨmona damɨeriedɨ Balaam mɨcorɨ llofuiacɨnodo jaidɨmacɨ. Balaam mɨcorɨ Balac mɨcorɨmo jaie llua jira, omoɨ jaiagaɨ jeacɨno fɨnodɨmacɨ. Balac comɨnɨmo omoɨ jaiagaɨ dɨga nabairillena llote. Ie jira omoɨ jaiagaɨ jiraraɨmo fecaca guillena naimacɨ dɨga guitɨmacɨ. Iemei naimacɨmona aɨnɨaɨna otɨmacɨ. Jusiñamuina ɨɨnoñedɨnomona aɨnɨaɨna otɨmacɨ. Naiemona jearede rafue comuide. Omoɨmona birui damɨerie iese isoidɨmacɨ. Cuena ɨɨnoñedɨnomona aɨnɨaɨna otɨmacɨ.  
\v 15 Omoɨmona damɨerie nicolaítas railla llofuiacɨnodo jɨaɨ jaidɨmacɨ. Naimacɨ llofuiacɨnodɨ uanaiñedɨcɨno.  
\v 16 Naie llofuiacɨnomona eneno mai omoɨ i. Iedo jaiñeno. Naie llofuiacɨnodo jaidɨnomo: ‘Omoɨ comecɨaɨ iuai dane meido’ llono. Iena naimacɨ fɨnoñenia, cue dɨbeimo naimacɨ raise iacaiñenia, cuemo ite lloebɨ dɨga cuena ɨɨnoñedɨnona duere fɨnoitɨcue.  
\v 17 Jusiñamui Joreñomona cue lloga rafue ite, omoɨ creyentiaɨ iena. Bie rafue bu cacajia, iena jɨaɨ ɨɨnua. Judíuaɨ jaiagaɨmo maná railla guille cue illa isoi, cuena raise ɨɨnotɨnomo monamo jai ite maná isoi iitɨcue. Biena ñaɨtɨcue. Imacɨ comecɨaɨna ocuiñotajacɨnona iitɨcue. Cue comɨnɨna naimacɨ illamona, naimacɨmo userede nofɨcɨna jɨaɨ iitɨcue. Nainomo mamecɨ ite. Danɨ naiena feiñotɨno naie mamecɨna uiñoitɨmacɨ” cueno. 
\s1 Cristo Tiatiramo ite creyentiaɨmo lloga rafue 
\p  
\v 18 Cristo cuemo llote: 
\p —Tiatiramo ite creyentiaɨmo llollena, nainomo ite llofueraɨmamo cue lluana cueno: “Jusiñamui Jitona cue illanona, bie rafue omoɨmo lloiacadɨcue. Cue uisɨ irai isoi boode. Cue eɨllɨ bronce eo dua isoi quenirede.  
\v 19 Omoɨ fɨnoca rafuena uiñotɨcue. Jusiñamuina omoɨ isiruillana uiñotɨcue. Jɨaɨe comɨnɨna omoɨ isiruillana uiñotɨcue. Cuena omoɨ ɨɨnuana uiñotɨcue. Jɨaɨe creyentiaɨna omoɨ canocabillana uiñotɨcue. Duere sefuidomoɨ; iadedɨ omoɨ comecɨaɨ ocuiñuana uiñotɨcue. Navui iese icana jaidomoɨ. Birui baɨ llɨaɨ jaidomoɨ;  
\v 20 iadedɨ cuemo omoɨ dɨga rafue ite. Omoɨ motomo maraiñede rɨño ite. Jezabelna ñaɨtɨcue. Naiñaiñona omoɨ oni dotañena jira, cuemo omoɨ dɨga rafue ite. ‘Jusiñamui rafuena jino llua uai cuemo ite’ naiñaiño llote. Uanaiñedɨcɨnona llofuecabilla jira, omoɨmona damɨeriena jɨfuete. Jearede rafuena llofuecabite. Omoɨ aɨñede rɨño dɨga illana llofuete. Omoɨ ɨniñede ɨima dɨga illana llofuete. Jiraraɨmo fecaca guille guillena llofuete. Iena guilla jira, omoɨmona damɨerie naie jiraraɨna sedade. Iese naiñaiño llofuecabite.  
\v 21 Naiñaiño comecɨ iuai meidollena are sedadɨcue; iadedɨ naiñaiño naie jearede rafuena faɨnonocaiacaiñede.  
\v 22 Naiñaiño duere sefuillena, naiñaiñona duitaitɨcue. Naimacɨ comecɨaɨ iuai naimacɨ meidoñenia, naiñaiño llofuiacɨnodo jaidɨnona jɨaɨ eo duere fɨnoitɨcue.  
\v 23 Naiñaiño dɨbeimo itɨnona meineitɨcue. Nana creyentiaɨdɨ nana comɨnɨ comecɨaɨ iuaillaɨna cue uiñuana jɨaɨ uiñoitɨmacɨ. Nana comɨnɨ comecɨaɨ facajacɨnona cue uiñuana jɨaɨ uiñoitɨmacɨ. Ie jira omoɨ fɨnolle rafue dɨese cuemona duere sefuitomoɨ.  
\v 24 Jezabel llofuiacɨnodo jaiñedɨnomo ja lloitɨcue. Taɨfe come uiñoñega rafuena uiñote. Iena nia uiñoñedomoɨ. Omoɨmo jɨaɨe rafuena lloñeitɨcue;  
\v 25 iadedɨ cue nia abɨdo biñenia, cuemona omoɨ uiñoga rafuena ɨɨnocana mai jai.  
\v 26 Cue Moomona cue uaina feiñotɨcue. Cuena raise ɨɨnuamona, abɨdo cue bia, cue jitaillacɨnona fɨnocabidɨnomo cue uaina iitɨcue. Naie facaise cue uai dɨga cue anamo ite naɨraɨaɨna raise sedaitɨmacɨ.  
\v 27 Naimacɨna rɨire raise sedaitɨmacɨ, cue jitailla rafue naimacɨ fɨnollena. Iena naimacɨ fɨnoñenia, naimacɨna duere fɨnoitɨmacɨ, lloedosi dɨga, nogo eo llailla isoi.  
\v 28 Cuena ɨɨnotɨnomo monairaɨcuduna jɨaɨ iitɨcue.  
\v 29 Jusiñamui Joreñomona cue lloga rafue ite, omoɨ creyentiaɨ iena. Bie rafue bu cacajia, iena jɨaɨ ɨɨnua” cueno. 
\c 3  
\s1 Cristo Sardimo ite creyentiaɨmo lloga rafue 
\p  
\v 1 Cristo cuemo llote: 
\p —Sardimo ite creyentiaɨmo llollena, nainomo ite llofueraɨmamo cue lluana cueno: “Jusiñamui Joreño cuemo ite. Naimɨe Joreño omoɨna canocabide. Omoɨna sedacabide. Siete ucuduaɨ cuemo jɨaɨ ite. Omoɨ llofueraɨmana ñaɨtɨcue. Omoɨ fɨnoca rafuena uiñotɨcue. ‘Cristona raise ɨɨnotɨcaɨ’ raitomoɨ; iadedɨ omoɨ comecɨaɨmona raise iñedomoɨ.  
\v 2 Cue dɨbeimo raise dane i. Cuena dane raise ɨɨnocana jai. Cuena jai faɨnonocaiacadomoɨ. Jusiñamui omoɨ fɨnoca rafueri iobiñede.  
\v 3 Cue rafuena jaie cacajamona, iena ɨɨnotomoɨ. Iedo dane jai. Omoɨ comecɨaɨ iuaina dane meido. Cue dɨbeimo dane raise omoɨ iacaiñenia, fɨɨriraɨma bainino billa isoi, omoɨna duere fɨnollena, ebena biitɨcue. Omoɨ dɨne cue billɨruina uiñoñeitomoɨ.  
\v 4 Omoɨmona damɨerie jearede rafuena fɨnocana jaiñedɨmacɨ. Jusiñamuimona naimacɨ comecɨaɨ marena jira, cue dɨne naimacɨ illena, userede ɨniroina jɨtaitɨmacɨ.  
\v 5 Cuena ɨɨnocana jaidɨnodɨ userede ɨniroina jɨtaitɨmacɨ. Cuemo ite rabenicomona naimacɨ mamecɨaɨna doñeitɨcue. Cue illanomo jaca iitɨmacɨ. ‘Naimacɨdɨ cue comɨnɨ’ cue Moomo lloitɨcue. Naimɨe jaɨenisaɨmo iena jɨaɨ lloitɨcue.  
\v 6 Jusiñamui Joreñomona cue lloga rafue ite, omoɨ creyentiaɨ iena. Bie rafue bu cacajia, iena jɨaɨ ɨɨnua” cueno. 
\s1 Cristo Filadelfiamo ite creyentiaɨmo lloga rafue 
\p  
\v 7 Cristo cuemo llote: 
\p —Filadelfiamo ite creyentiaɨma llollena, nainomo ite llofueraɨmamo cue lluana cueno: “Mareuidɨmɨedɨcue. Uanaicɨnona jaca llotɨcue. David mɨcorɨ jitona cue illamona, illaɨmana cue illa jira, siño uai cuemo ite. Ie muidona cue jitailla dɨese comɨnɨna feiñotɨcue. Jusiñamui illanomo naimacɨ illena, naimacɨna feiñotɨcue. Cue jitailla dɨese comɨnɨna feiñoñedɨcue.  
\v 8 Omoɨ fɨnoca rafuena uiñotɨcue. Omoɨna cue canua jira, jaca buna cue rafuena omoɨ lluana itatanide. Jamai bue isoidomoɨ; iadedɨ cue rafuena ɨɨnocana jaidomoɨ. Cuena janoñedomoɨ.  
\v 9 Omoɨ dɨne damɨerie Taɨfe anamo itɨmacɨ. Naimacɨdɨ judíuaɨ; iadedɨ cue dɨbeimo iñedɨmacɨ. Taɨnona llocabitɨmacɨ. Ero, omoɨ dɨne naimacɨna cue bitatajamona, omoɨna cue isiruillana uiñoitɨmacɨ. Cue dɨbeimo naimacɨ jailla mei, cuemo iobillacɨnona fecaitɨmacɨ.  
\v 10 Nana cuena ɨɨnoñedɨnona ɨco eo duere fɨnoitɨcue. Iemona cuena naimacɨ ɨɨnoñenana uiñoitɨcue. Omoɨ duere sefuiñellena, naie facaisemona omoɨna jillotaitɨcue.  
\v 11 Enɨruemo ebena abɨdo biitɨcue. Cuemona ɨbana omoɨ feiñoñeni raillano, cue dɨbeimo ɨɨnocana omoɨ jai. Cue dɨbeimo raise omoɨ jaiñenia, cuemona jɨaɨmɨe omoɨ facaina ɨbana feiñoite.  
\v 12 Cuena raise ɨɨnotɨno comecɨaɨna ocuiñotaitɨcue. Cue illanomo jaca iitɨmacɨ. Cuemo naimacɨ duilla jira, cue jɨaɨe mamecɨna naimacɨ abɨmo cueitɨcue. Jusiñamui mamecɨna naimacɨ abɨmo cueitɨcue. Jusiñamui illano mamecɨna naimacɨ abɨmo cueitɨcue. Naimɨe illanodɨ comue Jerusaléna mamecɨrede. Naimɨemona, monamona ɨco ana biite.  
\v 13 Jusiñamui Joreñomona cue lloga rafue ite, omoɨ creyentiaɨ iena. Bie rafue bu cacajia, iena jɨaɨ ɨɨnua” cueno. 
\s1 Cristo Laodiceamo ite creyentiaɨmo lloga rafue 
\p  
\v 14 Cristo cuemo llote: 
\p —Laodiceamo ite creyentiaɨmo llollena, nainomo ite llofueraɨmamo cue lluana cueno: “Siño Jitodɨcue. Cue lloga uaina jaca fɨnocabidɨcue. Uanaicɨnona jaca llocabitɨcue. Cue uaido Jusiñamui nana fɨnode. Nana comuitate.  
\v 15 Omoɨ fɨnoca rafuena uiñotɨcue. Cue rafuedo jaillana nia faɨnonocaiñedomoɨ; ia cue rafuedo eo raise jaiñedomoɨ. Janore ɨɨnocana jaidomoɨ.  
\v 16 Omoɨ fɨnoca rafuena cue gaɨñena jira, cuemona omoɨna oni dotaitɨcue.  
\v 17 ‘Ucuberedɨcaɨ’ raitomoɨ. ‘Raruiaɨredɨcaɨ. Nana caɨ jitailla ra caɨmo ite’ raitomoɨ. Cuemona iese iñedomoɨ. Cuemona dueredomoɨ; ia iena uiñoñedomoɨ. Cuemona caɨmare iñedomoɨ. Cuena omoɨ raise ɨɨnoñena jira, uisɨnidɨno isoidomoɨ. Taɨmɨedomoɨ isoidomoɨ.  
\v 18 Ie jira omoɨna dajerie rafuena llofueitɨcue. Cuemona omoɨ eo duerena jira, omoɨ comecɨaɨ raise iñena jira, omoɨmo fɨebidɨcɨnona cuemo jɨca. Cuemona ono. Omoɨ duenillena, cuemona eo mare oro isoide rana ono. Omoɨ taɨmɨeñelle isoiñellena, cuemona omoɨ meiruiñellena, userede ɨniroi isoide ra cuemona ono. Omoɨ uisɨna cɨoille isoillena, cuemona manue ono. Omoɨ comecɨaɨna ñaɨtɨcue. Cuena raise omoɨ ɨɨnoia, buena omoɨ comecɨaɨmo fɨebiñeite.  
\v 19 Cue isiruigano cue dɨbeimo raise illena, naimacɨmo rɨire llocabitɨcue. Cue uaina naimacɨ ɨɨnollena, naimacɨna jɨaɨ duere fɨnocabidɨcue. Ie jira cue dɨbeimo raise omoɨ i. Jeacɨno omoɨmo ia, iena faɨnonocai.  
\v 20 Ero, nase tutɨcue isoidɨcue. Bu cuena cacajia, cue fo billena cuena uaidoia, nasena bu econoia, fo jaitɨcue. Naimɨena nabaillanona, naimɨe dɨga guitɨcue. Omoɨ comecɨaɨna ñaɨtɨcue. Cue rafuena omoɨ cacaja mei, iena omoɨ ɨɨnoia, cuena feiñoitomoɨ. Iemona coninɨ nabaitɨcaɨ.  
\v 21 Enɨruemo cue Moo jitailla rafuena jaie cue fuidua mei, naimɨe ecɨmo abɨdo jai itɨcue. Cueri naimɨe iobillamona, illaɨmana cue illamona, naimɨe ecɨmo jai itɨcue. Ie isoide. Cuena raise ɨɨnotɨno monamo cue ecɨmo itataitɨcue. Cue comɨnɨna naimacɨ illa jira, naimacɨna iobitallena, cue ecɨmo naimacɨna nabaitɨcue.  
\v 22 Jusiñamui Joreñomona cue lloga rafue ite, omoɨ creyentiaɨ iena. Bie rafuena bu cacajia, iena jɨaɨ ɨɨnua” cueno. 
\c 4  
\s1 Juan Jusiñamui illanomo cɨua rafue 
\p  
\v 1 Dallu illanona monamo cue eruaɨa, jɨaɨe rafuena cɨodɨcue. Nainomo Jusiñamui illanomo econoga nasena cɨodɨcue. Aillɨ cue dɨga ñaɨtɨmɨedɨ cuena uaidote. Naimɨe uai trompeta isoi fɨcɨrede. Llote: 
\p —Monamo bi. Jɨaɨruido suille rafuena omo acataitɨcue. 
\p  
\v 2 Jusiñamui Joreño anamo cue illamona, nɨcaɨrilla isoi Jusiñamui illanona cɨodɨcue. Nainomo naimɨe ana raɨllana cɨodɨcue.  
\v 3 Naimɨe eo quenirede. Eo raifide ebirede nofɨcɨna eruaɨde. Jaspe railla nofɨcɨna eruaɨde. Jaspe enefebecodo cɨode. Cornalina railla nofɨcɨna eruaɨde. Cornalina jiaɨrede. Naie illano ecɨmo ameona cɨodɨcue. Ameo mocorena jira, esmeralde railla nofɨcɨna eruaɨde.  
\v 4 Naie illano ecɨmo veinticuatro raɨrabɨcɨ jɨaɨ ite. Nainomo userede ɨniroina jɨtajanona veinticuatro einamacɨ ana raɨdɨmacɨ. Naimacɨ ɨfogɨmo oromona fɨnoca nuicɨrai ite.  
\v 5 Jusiñamui illanomona boricabide. Jɨaɨ gurucabide. Bue isoi eo fɨcɨrede. Naie illano uicomo siete reɨtɨraɨ boode. Naie reɨtɨraɨdɨ Jusiñamui Joreño mamecɨdo nainomo boode.  
\v 6 Jusiñamui illano uicomo vidriona eruaɨde joraina cɨodɨcue. Eo quenirede. Naimɨe illano ecɨmo cuatro cajedɨno ite. Dɨga uisɨ naimacɨ uiecomo ite. Dɨga uisɨ naimacɨ emodomo ite.  
\v 7 Damɨe leónna eruaɨde. Jɨaɨmɨe jurareta jitona eruaɨde. Jɨaɨmɨe ie uieco come uiecona eruaɨde. Jɨaɨmɨe feede majaiñona eruaɨde.  
\v 8 Nagamɨiaɨmo seis iaico ite. Ailluena uisɨ naimacɨ iaicuaɨmo ite. Naimacɨ abɨmo uisɨ jɨaɨ eo ite. Nagarui ɨnɨñeno jaca llotɨmacɨ: 
\q1 Mare, mare, mare. 
\q1 Caɨ siño Nama Jusiñamuidɨ eo mareuidɨmɨe. 
\q1 Jaie jaca ite. Birui ite. Ɨco jaca iite. 
\p  
\v 9 Naimacɨ iese llua jira, Jusiñamuina iobitadɨmacɨ. Naimɨemo iobillacɨnona naimacɨ iese fecaia,  
\v 10 naie veinticuatro einamacɨ Jusiñamui uicomo ana bɨtadajanona, naimɨemo iobillacɨnona jɨaɨ fecadɨmacɨ. Naimɨeri iobillanona, naimacɨ nuicɨraina naimɨe dɨne faɨanona,  
\v 11 rotɨmacɨ: 
\q1 Caɨ Nama Jusiñamui, ona eo iobitaiacadɨcaɨ. 
\q1 Odɨ mareuidɨo. 
\q1 Nana rana comuitatɨo. 
\q1 Nana comɨnɨna comuitatɨo. 
\q1 O jitailla jira, naimacɨ itɨmacɨ. 
\q1 Ie jira iobillacɨnona omo fecacabidɨcaɨ. 
\c 5  
\s1 Juan Jusiñamui illanomo ferɨnoga rabe illana cɨode 
\p  
\v 1 Jusiñamui illanomo cue nia eruaɨa, naimɨe nabellɨmo ferɨnoga rabe illana cɨodɨcue. Nagafebeimo cuega rafue jai ite. Siete nitaca ra illamona, naie rabe raise ɨbaibide.  
\v 2 Jusiñamui ie nanoca jaɨenicɨ ado lluana cacadɨcue. Naimɨe jɨcanote: 
\p —¿Bumo ite uaidɨ nitaca rabe econollena, naie rabena facallena? 
\p  
\v 3 Monamo itɨnomona, enɨrue itɨnomona, jai fiodaitɨnomona, bumo ie uai iñede, naie rabe oni econollena. Naie rabe facanidɨmacɨ.  
\v 4 Jaca bumo naie uai iñena jira, eo eedɨcue.  
\v 5 Naie facaise naie veinticuatro einamacɨmona damɨe cuemo llote: 
\p —Mai eeñeno. Judá naɨraɨ ie Leónna mamecɨredɨmɨedɨ iena econorede. Naimɨedɨ David mɨcorɨ comɨnɨ imɨe. Ie dɨbeimo iñedɨnona jai emodofilla jira, naimɨemo uai ite, naie siete nitaca rana oni suiñollena, naie rabena econollena. 
\p  
\v 6 Naie facaiseconi Toɨca Llaudana cɨodɨcue. Jusiñamui illano uicomo naimɨe ite. Naie cuatro cajedɨno naimɨe ecɨmo ite. Naie veinticuatro einamacɨ naimɨe ecɨmo jɨaɨ itɨmacɨ. Faga llaudana eruaɨde; iadedɨ jai jilluamona naidaide. Naie Toɨca Llaudadɨ Cristo. Naie Llaudamo siete sigaɨ ite. Siete uisɨ naimɨemo jɨaɨ ite. Naie uisɨdɨ Jusiñamui Joreño mamecɨdo ite. Nana comɨnɨna canollena, naimacɨmo Cristodɨ Jusiñamui Joreñona jai orede.  
\v 7 Naie facaise Jusiñamui ie nabellɨmona naie rabena ote.  
\v 8 Iena naimɨe ua mei, naie cuatro cajedɨno, naie veinticuatro einamacɨ dɨga, naimɨena sedallena, naimɨe uicomo ana bɨtadatɨmacɨ. Nagamɨemo guitarrana eruaɨde arpa ite. Nagamɨemo oromona fɨnoca copa ite. Naga copamo caɨmare soride ra boode. Naie radɨ Jusiñamuimo comɨnɨ jɨɨacɨno mamecɨdo ite.  
\v 9 Llaudana sedallena, naimacɨ arpas taillanona, comue ruana rotɨmacɨ: 
\q1 O marena jira, o uai ite, naie rabe econollena. 
\q1 Ie nitaca rana oni suiñoitɨo. 
\q1 Jɨaɨno jaie ona meinetɨmacɨ. 
\q1 O fiodailla jira, o dɨaillamona, Jusiñamui dɨbeimo naga naɨraɨmona comɨnɨna itatatɨo. 
\q1 Naimacɨ jeacɨnomona jillotatɨo. 
\q1  
\v 10 Naimacɨna jai fetodɨo. 
\q1 O comɨnɨ naimacɨ illamona, Jusiñamui dɨga atona ñaɨcabitɨmacɨ. 
\q1 Naimɨe anamo jɨaɨruido enɨruemo ite comɨnɨna sedaitɨmacɨ. 
\q1 Ie jira naie rabena oni suiñoredɨo. 
\p  
\v 11 Iemei dane eruaɨllamona, naimɨe ecɨmo eo ailluena Jusiñamui jaɨenisaɨna cɨodɨcue. Naie cuatro cajedɨno ecɨmo, naie veinticuatro einamacɨ ecɨmo itɨmacɨ. Dɨga illa jira, facanide.  
\v 12 Ado llotɨmacɨ: 
\q1 Bie Toɨca Llauda isoidɨmɨe jaie fiodaite; ia jai jillode. 
\q1 Naimɨe eo mareuidɨmɨena jira, Jusiñamui ie uai naimɨemo jai illamona, Jusiñamui nana naimɨemo jai illamona, Jusiñamui naimɨena eo abɨna uiñotajamona, naimɨena jɨaɨ iobitaiacadɨcaɨ. 
\q1 Naimɨena caɨ ɨɨnuanona, naimɨemo iobillacɨnona fecaacadɨcaɨ. 
\p  
\v 13 Iie facaise nana comɨnɨ, nana Jusiñamui comuitaga ra dɨga, lluana cacadɨcue. Monamo itɨno, enɨrue itɨno, jai fiodaitɨno, monaillaimo itɨno lluana cacadɨcue. Llotɨmacɨ: 
\q1 Jusiñamuina jaca caɨ iobicabillasa. Toɨca Llauda isoidɨmɨena jaca caɨ iobicabillasa. Iobillacɨnona jaca fecaacadɨcaɨ. Caɨna jaca sedallesa. 
\p  
\v 14 Naie cuatro cajedɨno raitɨmacɨ: 
\p —Ie isoi jɨaɨ lloiacadɨcaɨ. 
\p Ie facaise naie Llauda isoidɨmɨena sedallena, naie veinticuatro einamacɨ ana bɨtadatɨmacɨ. 
\c 6  
\s1 Juan siete nitaca ra oni suiñuana cɨode 
\p  
\v 1 Toɨca Llauda isoidɨmɨemo iobillacɨnona naimacɨ fecaja mei, Llauda isoidɨmɨe daje nitaca ra oni suiñuana cɨodɨcue. Naie cuatro cajedɨnomona damɨedɨ gurua uai isoi lluana cacadɨcue. Naimɨe llote: 
\p —Mai bi. 
\p  
\v 2 Naimɨe llua mei, userede caballo billana cɨodɨcue. Caballo emodo itɨmɨemo sɨcuira ite. Illaɨmana jira, naimɨe ɨfogɨmo nuicɨrai jɨide. Ie bacauai anafefitallena, oni jaide. 
\p  
\v 3 Iemei Llauda isoidɨmɨe jɨaɨe nitaca ra oni suiñode. Suiñua mei, naie cuatro cajedɨnomona jɨaɨmɨe llote: 
\p —Mai bi. 
\p  
\v 4 Naimɨe llua mei, jiaɨrede caballo billana cɨodɨcue. Caballo emodo itɨmɨemo are lloebɨ illamona, Jusiñamui jitailla jira, caballo emodo itɨmɨe enɨruemo itɨnona uri itatañede. Naimacɨ uri iñena jira, coninɨ icɨrilla jira, coninɨ meinetɨmacɨ. 
\p  
\v 5 Iemei Llauda isoidɨmɨe jɨaɨe nitaca ra oni suiñode. Suiñua mei, naie cuatro cajedɨnomona jɨaɨmɨe llote: 
\p —Mai bi. 
\p Naimɨe llua mei, jitɨrede caballo billana cɨodɨcue. Aime guille facaise illa jira, caballo emodo itɨmɨe onollɨmo ra facaradɨ ite.  
\v 6 Naie cuatro cajedɨno motomona damɨe llote: 
\p —Guille raise iñena jira, comɨnɨ aime guitɨmacɨ. Daje kilo trigo ie core darui maɨjɨa ua ucube dɨese raifide. Iemona llomenicona fɨnoia, dacaiño guille raifi ite. Tres kilos cebada ie core darui maɨjɨa ua ucube dɨese raifide. Iena damɨe oia, iemona llomenicona fɨnoia, dacaiño amani guille raifi ite. Illɨmo riara nia ite; ia iena ɨballena ucube baiñede. Ie muidona aime guitɨmacɨ —llote. 
\p  
\v 7 Iemei Llauda isoidɨmɨe jɨaɨe nitaca ra oni suiñode. Suiñua mei, naie cuatro cajedɨnomona jɨaɨmɨe llote: 
\p —Mai bi. 
\p  
\v 8 Naimɨe llua mei, llɨaɨ usereoide caballona cɨodɨcue. Ie emodo itɨmɨe mamecɨdɨ Fiodaitadɨmɨe. Jusiñamui uai naimɨemo illa jira, naimɨe jailla mei, ailluena fiodaitɨno itɨmacɨ. Jobairillemona, aime guillemona, duicomona, rɨirede ocainaɨaɨmona fiodaitɨmacɨ. Atuedo meinetasɨñeite; iadedɨ eo ailluena meinetasɨite. Rɨaɨ uaimona ie cuarta facaina comɨnɨ fiodaitɨmacɨ. 
\p  
\v 9 Iemei Llauda isoidɨmɨe jɨaɨe nitaca ra oni suiñode. Suiñua mei, Jusiñamuimo caɨmare soride boode rana jobaisoillanona cɨodɨcue. Naie illano anamo comɨnɨ joreñuaɨna cɨodɨcue. Jusiñamui rafuena naimacɨ llua jira, “Jusiñamui comɨnɨdɨcaɨ” naimacɨ llua jira, Jusiñamuina ɨɨnoñedɨno naimacɨna meinetɨmacɨ. Jai fiodaillamona naimacɨ joreñuaɨ Jusiñamui illanomo jai itɨmacɨ.  
\v 10 Jusiñamuimo ado llotɨmacɨ: 
\p —Caɨ Nama, siño jitodɨo. Mareuidɨmɨedɨo. O uaina jaca fɨnodɨo. ¿Nɨruido caɨna meinetɨnona duere fɨnoitɨo? ¿Nɨruido ɨbana oitɨo? 
\p  
\v 11 Jusiñamui comɨnɨna illamona, naimacɨmo Jusiñamuidɨ userede areroina jɨtallena fecade. Llote: 
\p —Janore jisa seda. Ɨbana nia oñeitɨcue. Cue dɨbeimo omo maɨjɨa isoi, cue comɨnɨna nia meineitɨmacɨ. Naimacɨna meinia mei, ɨbana oitɨcue. 
\p  
\v 12 Iemei Llauda isoidɨmɨe jɨaɨe nitaca ra oni suiñuana cɨodɨcue. Suiñuanona, aillue ñuisaño suide. Jitoma eo jitɨreficaide. Fɨvuidɨ dɨruena eruaɨde. Jiaɨrede.  
\v 13 Rɨirede aɨfɨ riara ana llutaja isoi, monamona enɨruemo ucuaɨ llude.  
\v 14 Ferɨnoga rabe oni uilla isoi, mona iñebicaide. Naga anedu, naga uiasi dɨga jɨaɨ oni jaide.  
\v 15 Ie jira illaɨcomɨnɨ, jamai bue isoiñedɨno, ucuberedɨno, patrón anamo itɨno, patrón anamo iñedɨno, ua nana comɨnɨ jacɨruillamona reiritɨmacɨ. Damɨerie nofɨcɨ moto ifomo reiritɨmacɨ. Damɨerie anedu motomo reiritɨmacɨ.  
\v 16 Anedumo llotɨmacɨ. Nofɨcɨmo llotɨmacɨ: 
\p —Caɨna ɨbaillena, caɨ emodomo ana uai. Jusiñamui rɨicaillafuemona caɨna reirita. Llauda isoidɨmɨe rɨicaillafuemona caɨna reirita.  
\v 17 Iaɨmaiaɨ rɨicaillarui jai ite. Naiemona buna jillobinide —llotɨmacɨ. 
\c 7  
\s1 Juan ailluena Israel comɨnɨ Jusiñamui sello dɨga nitajana cɨode 
\p  
\v 1-2 Naie facaise jɨaɨe ɨco suille rafuena cɨodɨcue. Cuatro Jusiñamui jaɨenicɨna cɨodɨcue. Damɨe jitoma billanomo ite. Jɨaɨmɨe jitoma jaillanomo ite. Jɨaɨe iaɨmaiaɨ beicɨmo itɨiaɨmaiaɨ. Aɨfɨ biñellena itɨmacɨ. Ie muidona monaillai dɨne aɨfɨ iñede. Aɨfɨ iñena jira, amenaɨaɨ niraɨriñede. Enɨruena monaillai dɨga maraiñeno fɨnollena naimacɨmo uai ite. Naie facaise jɨaɨe jaɨenicɨ jitoma billanomona billana cɨodɨcue. Naimɨedɨ caɨ cajede Jusiñamui ie sellona uite. Jɨaɨe jaɨenisaɨmo ado llote: 
\p  
\v 3 —Enɨruena aɨfɨ dɨga maraiñeno nia fɨnoñeno. Monaillaina maraiñeno nia fɨnoñeno. Amenaɨaɨna maraiñeno nia fɨnoñeno. Jusiñamui dɨbeimo itɨno uiecuaɨ itofiaɨ sello dɨga nia caɨ nitañenia, enɨruena maraiñeno fɨnoñeno. 
\p  
\v 4 Ailluena comɨnɨ sello dɨga nitade. Ciento cuarenta y cuatro mil dɨese nitajana cacadɨcue. Nana naimacɨ Israel comɨnɨmona itɨmacɨ.  
\v 5 Judá mɨcorɨ comɨnɨmona doce mil ite. Rubén mɨcorɨ comɨnɨmona doce mil ite. Gad mɨcorɨ comɨnɨmona doce mil ite.  
\v 6 Aser mɨcorɨ comɨnɨmona doce mil ite. Neftalí mɨcorɨ comɨnɨmona doce mil ite. Manasés mɨcorɨ comɨnɨmona doce mil ite.  
\v 7 Simeón mɨcorɨ comɨnɨmona doce mil ite. Leví mɨcorɨ comɨnɨmona doce mil ite. Isacar mɨcorɨ comɨnɨmona doce mil ite.  
\v 8 Zabulón mɨcorɨ comɨnɨmona doce mil ite. José mɨcorɨ comɨnɨmona doce mil ite. Benjamín mɨcorɨ comɨnɨmona doce mil ite. Dɨese nitade. 
\s1 Juan ailluena comɨnɨ userede ɨniroina jɨtajana cɨode 
\p  
\v 9 Naie facaise ailluena comɨnɨna cɨodɨcue. Ailluena jira, naimacɨna facadonidɨcue. Naga naɨraɨaɨmona itɨmacɨ. Naga jɨaɨe ñaɨa uaido ñaɨtɨno itɨmacɨ. Jusiñamui uicomo itɨmacɨ. Toɨca Llauda isoidɨmɨe uicomo itɨmacɨ. Userede ɨniroina jɨtadɨmacɨ. Naimacɨ onollɨmo raforuaɨ ite.  
\v 10 Ado llotɨmacɨ: 
\q1 Bie Llauda isoidɨmɨe jaie fiodaillamona, caɨ jeacɨnomona Jusiñamui caɨna jai jillotate. 
\p  
\v 11 Naie facaise nana Jusiñamui jaɨenisaɨ naɨmɨe ecɨmo naidaillana cɨodɨcue. Naie veinticuatro einamacɨ ecɨmo, naie cuatro cajedɨno ecɨmo jɨaɨ naidaidɨmacɨ. Naie facaise Jusiñamui uicomo ana bɨtadajanona, naimɨena sedadɨmacɨ.  
\v 12 Raitɨmacɨ: 
\q1 Bie comɨnɨ isoi omo iobillacɨnona jɨaɨ fecaacadɨcaɨ. 
\q1 Odɨ mareuidɨmɨedɨo. Abɨna eo uiñotɨo. Odɨ jaca siño jitodɨo. 
\q1 Ie jira iese llotɨcaɨ. 
\q1 Ona jaca caɨ iobitajasa. 
\p  
\v 13 Naie facaise naie veinticuatro einamacɨmona damɨe cuemo jɨcanote: 
\p —¿Userede ɨniroina jɨtadɨnodɨ nɨmacɨ? ¿Nɨnena bitɨmacɨ? 
\p  
\v 14 Uai otɨcue: 
\p —Uiñoñedɨcue. Cuemo llono. 
\p Naimɨe uai ote: 
\p —Bimacɨdɨ eo duere sefuilla facaise Jusiñamuina ɨɨnoñedɨno meinegano. Naimacɨ ɨniroina jai jocoritɨmacɨ. Llauda isoidɨmɨe jaie fiodailla jira, naimɨe dɨruedo jocuamona, naimacɨ ɨniroi jai userede. Naimacɨ ɨniroina llotɨcue; ia naimacɨ comecɨaɨna jɨaɨ ñaɨtɨcue. Llauda isoidɨmɨe fiodailla jira, naimacɨ comecɨaɨ jai jeanide.  
\v 15 Ie jira Jusiñamui uicomo itɨmacɨ. Nainomo naimɨena jaca sedaitɨmacɨ. Naimɨena jaca iobitaitɨmacɨ. Naimɨe ocuilla rafue jaca fɨnoitɨmacɨ. Naimacɨna naimɨe raise nabaillamona, naimacɨna raise eenoite.  
\v 16 Dane duere sefuiñeitɨmacɨ. Nana naimacɨ jitailla ra naimacɨmo iite. Aime dane guiñeitɨmacɨ. Naimacɨ jiroacalle ra jaca iite. Eo ecasillamona dane duere sefuiñeitɨmacɨ. Iemona dane usitañeitɨmacɨ.  
\v 17 Jusiñamui illanomona Llauda isoidɨmɨe naimacɨna raise sedaja jira, raise marena iitɨmacɨ. Naimacɨna naimɨe raise sedajamona, jaca iitɨmacɨ. Jusiñamui naimacɨna raise duenaillamona, duere sefuillamona dane eeñeitɨmacɨ. Dane sunaiñeitɨmacɨ. 
\c 8  
\s1 Juan Llauda isoidɨmɨe iraɨe nitaca ra oni suiñuana cɨode 
\p  
\v 1 Toɨca Llauda isoidɨmɨe iraɨe nitaca ra oni suiñuanona, media hora monamo tɨɨ raiñoicaide.  
\v 2 Iemei siete Jusiñamui jaɨenicɨ naimɨe uicomo illana cɨodɨcue. Nagamɨemo daje trompetana fecade.  
\v 3 Naie facaise jɨaɨe jaɨenicɨ billanona, Jusiñamuimo caɨmare soride ra jobaisoillano ecɨmo naidaide. Naie jobaisoillanodɨ oromona fɨnoca. Ie onollɨmo oromona fɨnoca cucharón eruaɨde ra ite. Ailluena caɨmare soride ra naimɨe feiñua mei, iena jobaide. Ie facaise nana Jusiñamuina ɨɨnotɨno jɨɨacɨno Jusiñamuimo jaide.  
\v 4 Jobaillamona Jusiñamui uicomo a jaide. Nana Jusiñamuimo jɨɨacɨno dɨga a jaide.  
\v 5 Naie facaise Jusiñamuimo jobaisoillanomona boode reɨcɨ jaɨenicɨ uanona, cucharóna eruaɨde ramo iena jonianona, enɨruemo iena ana dotade. Ie jira gurucabide. Bue isoi eo fɨcɨrede. Naganomo boricabide. Ñuisaño suide. 
\s1 Juan trompetas fillana cacade 
\p  
\v 6 Iemei naie siete jaɨenicɨ naimacɨ trompetas fillena llɨnote.  
\v 7 Damɨe ie trompetana fite. Filla jira, monamona janorede hielo, boode ra dɨga, dɨrue dɨga, enɨruemo uaide. Atuedo enɨrue booñede; ia ailluena boode. Rɨaɨ uaimona ie tercera facaina boode. Nainomo nana amenaɨaɨ boode. Nainomo nana raitɨcɨño boode. 
\p  
\v 8 Jɨaɨe jaɨenicɨ ie trompeta fite. Filla jira, Jusiñamui anedu isoide boode ra monaillaimo faɨte.  
\v 9 Iemona monaillai dɨruena jaide. Atuedo iese jaiñede; ia ailluena iese jaide. Rɨaɨ uaimona ie tercera facaina dɨruena jaide. Ie muidona ie tercera facaina llɨcɨaɨ fiodaite. Nainomo ite botemona ie tercera facaina jɨaɨ anabaite. 
\p  
\v 10 Jɨaɨe jaɨenɨcɨ ie trompetana fite. Filla jira, monamona aillue boode ucudu enɨruemo uaide. Iemona ie tercera facaina illenɨaɨ, ie tercera facaina jorainɨaɨ dɨga erɨreficaide.  
\v 11 Ie muidona naie ucudu Ajenjona mamecɨrede. Rɨaɨ uai oni dobaiñuamona “Erɨredɨmɨe”. Iemona jɨnui erɨreficaide. Iena jiruamona, ailluena comɨnɨ fiodaitɨmacɨ. 
\p  
\v 12 Jɨaɨe jaɨenicɨ ie trompetana fite. Filla jira, jitoma, fɨvui dɨga, ucuaɨ dɨga, fuiride. Iemona aremona cuatro horas raise usenide. Naɨona cuatro horas eo jitɨrede. 
\p  
\v 13 Iemei jaɨenicɨ ado cuirioillana cacadɨcue. Monamo feianona llote: 
\p —Enɨruemo itɨno ua eo duere ja sefuitɨmacɨ. Daje amani jaɨenicɨ imacɨ trompetana nia fiñede. Iena naimacɨ fia, comɨnɨ eo duere sefuitɨmacɨ. 
\c 9  
\p  
\v 1 Jɨaɨe jaɨenicɨ ie trompeta fite. Filla jira, naie facaise monamona enɨruemo damɨe ucudu mamecɨdo jai uaillana cɨodɨcue. Naimɨemo Jusiñamui daje llavena fecade. Enɨrue eo ana ite ifo nase ie. Nainomo Taɨfe comɨnɨ, Janaba comɨnɨ dɨga itɨmacɨ.  
\v 2 Llave dɨga naie ifo ie nasena econote. Ie facaise ifomona eo ailluena uillɨe jino bite. Ie muidona jitoma raise bainide. Mona jitɨreficaide.  
\v 3 Uillɨemona fioduaɨna eruaɨllanona, Taɨfe comɨnɨ, Janaba comɨnɨ dɨga jino billanona, nana enɨruemo bitɨmacɨ. Jusiñamui llua jira, acaido isoi fioduaɨ eruaɨdɨnodɨ maitɨmacɨ.  
\v 4 Raitɨcɨño naimacɨ guillena, ibena naimacɨ guillena Jusiñamui rairuide. Naimɨe jitailla jira, naimɨe sello dɨga nitañeganona duere finodɨmacɨ.  
\v 5 Jusiñamui jitailla jira, cinco fɨvui naimacɨna duere fɨnoitɨmacɨ; ia comɨnɨna meineñeitɨmacɨ. Acaido isoi isire maitɨmacɨ. Eo isirenite.  
\v 6 Iese ɨco suia, eo duere comɨnɨ sefuilla jira, fiodaillana jitaitɨmacɨ. Naimacɨ abɨna meineacanitɨmacɨ. Fiodaiacanitɨmacɨ; ia fiodainitɨmacɨ. 
\p  
\v 7 Fioduaɨdɨ jobaime dɨne jaide caballuaɨna eruaɨdɨmacɨ. Naimacɨ ɨfogɨmo oromona fɨnoca nuicɨrai eruaɨde radɨ ite. Naimacɨ uiecuaɨ comɨnɨna eruaɨdɨmacɨ.  
\v 8 Naimacɨ ɨfotɨe arena illanona, rɨño ɨfotɨena eruaɨde. Naimacɨ isiduaɨ leones isiduaɨna eruaɨde.  
\v 9 Naimacɨ abɨaɨmo ico isoi ra ite. Lloeomona fɨnoca rana eruaɨde. Naimacɨ feiamona, ailluena caballuaɨna jobairillanomo jaillena rɨire sonode carretas isoi fɨcɨredɨmacɨ.  
\v 10 Naimacɨ omacaɨ acaido isoide. Naie dɨga maillanona, cinco fɨvui comɨnɨna duere fɨnoitɨmacɨ.  
\v 11 Naimacɨ illaɨmadɨ naie ana ifona sedadɨmɨe. Judíuaɨ uaimona naimɨe mamecɨdɨ Abadón. Griego uaimona naimɨe mamecɨdɨ Apolión. Oni dobaiñuamona naimɨe mamecɨdɨ Comɨnɨna Fuidodɨmɨe.  
\v 12 Daje duere sefuilla rafue jai fuite. Mena nia suiñede. 
\p  
\v 13-14 Naie facaise jɨaɨe jaɨenicɨ ie trompeta fite. Jusiñamui uicomo ite caɨmare soride ra jobaisoillano ite. Oromona fɨnoca. Nainomo cuatro sigaɨ ite. Nainomona jaɨenicɨmo damɨe llote: 
\p —Eufrates railla ille fuedo cuatro maɨga jaɨenicɨna suiño —llote.  
\v 15-16 Iena fɨnode. Naimacɨ anamo eo ailluena soldaduaɨ ite. Doscientos millones soldaduaɨ illana fɨdɨdɨcue. Bie facaise, bie hora, birui, bie fɨvui, bie año, Jusiñamui jitailla facaise ailluena comɨnɨna meinetɨmacɨ. Atuedo meineñedɨmacɨ. Rɨaɨ uaimona ie tercera facaina meinetɨmacɨ.  
\v 17 Soldaduaɨ caballos emodo itɨmacɨ. Soldaduaɨ jogobemo ra ite. Daje facaise eo jiaɨrede. Daje facaise mocorede. Daje facaise borarede. Caballos ɨfogɨaɨ leones ɨfogɨaɨna eruaɨde. Naimacɨ fuemona boode radɨ, uillɨe dɨga, azufre boa isoi jino bite.  
\v 18-19 Naimacɨ fuemona bite rado ailluena comɨnɨna meinetɨmacɨ. Ie tercera facaina meinetɨmacɨ. Caballos omacaɨ jaiona eruaɨdɨmacɨ. Naimacɨ omacaɨmo jaiona eruaɨde ɨfogɨ itɨmacɨ. Ailluena comɨnɨna jɨaɨ duere fɨnodɨmacɨ. 
\p  
\v 20 Iese ie tercera facaina meinetɨmacɨ; ia fɨebidɨno naimacɨ jeacɨnomona naimacɨ comecɨaɨ iuaina jaca meidoñedɨmacɨ. Taɨfena nia sedaacadɨmacɨ. Janabana nia sedaacadɨmacɨ. Oromona, platamona, broncemona, nofɨcɨmona, amenamona fɨnoca jiraraɨaɨna nia sedaacadɨmacɨ. Naie isoide radɨ cajeñena jira, jaca cɨoiñede. Naie isoide radɨ jamai rana jira, jɨaɨ jaca buena cacaiñede. Jaca macariñede. Cajeñede; ia iena sedacabidɨmacɨ.  
\v 21 Coninɨ meinecabitɨmacɨ. Aimanɨaɨ dɨne jaicabidɨmacɨ. Naimacɨ aɨñede rɨño, naimacɨ ɨniñede ɨima dɨga icabitɨmacɨ. Rana fɨɨcabidɨmacɨ. Jeacɨnona fɨnocana nia jaidɨmacɨ. 
\c 10  
\s1 Juan Jusiñamui jaɨenicɨ, econoga rabenico dɨga, billana cɨode 
\p  
\v 1 Ie facaise Jusiñamui illanomona enɨruemo jɨaɨe jaɨenicɨ billana cɨodɨcue. Naimɨemo Jusiñamui uai eo ite. Uillɨe motomo naimɨe ite. Naimɨe ɨfogɨ afemo ameo ite. Naimɨe uieco jitoma isoi quenirede. Naimɨe ɨdaɨ eo boode amena isoi eruaɨde.  
\v 2 Naimɨe onollɨmo econoga rabenico ite. Enɨruemo naimɨe ria, naimɨe nabei eɨllɨ monaillai emodomo naidaide. Ie jarɨfebei eɨllɨ enɨruemo naidaide.  
\v 3 León eo ɨrilla isoi, ado llote. Naie facaise siete gurua ñaɨa isoidɨno uai cacadɨcue.  
\v 4 Naimacɨ lluana cacaja mei, iena cueiacadɨcue; iadedɨ monamona damɨe cuemo llote: 
\p —Naie lluana lloñeno. Iena cueñeno. 
\p  
\v 5 Naie jaɨenicɨ ie nabei onollɨ mona dɨne ñuitajanona,  
\v 6 Jusiñamuimo llote: 
\p —Jaca itɨo. Monana nainomo ite ra dɨga fɨnodɨo. Enɨruena nainomo ite ra dɨga jɨaɨ fɨnodɨo. Monaillai nainomo ite ra dɨga jɨaɨ fɨnodɨo. Cue baɨfemo o faɨa jira, uanaicɨnona cue lluana uiñotɨo. O lloga uaina jaca suite.  
\v 7 Iraɨe jaɨenicɨ ie trompeta ja fiite. Filla mei, bie facaise Jusiñamui ie facaina lloraɨnɨ mɨcorɨaɨmo jaie lloga rafue suite. Comɨnɨ naie rafue jaie raise cacaiñedɨmacɨ; ia iena ja raise cacaitɨmacɨ —llote. 
\p  
\v 8 Monamona cuemo aillɨ llotɨmɨe dane llote: 
\p —Jaɨenicɨ onollɨmo econoga ite rabenicona llɨnuai. 
\p  
\v 9 Ie jira jaɨenicɨ dɨne cue jaillanona: 
\p —Iena cuemo ine —llotɨcue. 
\p Uai ote: 
\p —Iena ono. Iena mai guiño. Cɨifo isoi o fuemo iena cacaitɨo; iadedɨ o jebemo erɨrede ra isoi iena cacaitɨo. 
\p  
\v 10 Llɨnua mei, iena guitɨcue. Cɨifo isoi naɨmerede rana cacadɨcue; ia guilla mei, erɨrede ra isoi cue jebemo ite.  
\v 11 Cuemo dane llote: 
\p —Omo cue llolle rafuena lloitɨo. Ailluena comɨnɨmo ɨco suille rafuena lloitɨo. Illaɨcomɨnɨmo ɨco suille rafuena lloitɨo. 
\c 11  
\s1 Juan menamɨe Jusiñamui rafuena lluana cacade 
\p  
\v 1 Cuemo Jusiñamui radosina fecade. Jerusalémo ie jofona facallena, cuemo fecade. Llote: 
\p —Mai jai. Cue jofomo nɨga metros ite facajai. Atona ruica jɨaɨ faca. Nainomo cuemo jobaisoillanona jɨaɨ faca. Nɨga comɨnɨ naie jofomo ite jɨaɨ faca.  
\v 2 Cue jofo ecɨmo ite taɨbɨrɨna facañeno. Naie illano judíuaɨñedɨnomo jaɨnaɨaɨde. Cue jitailla jira, Jerusaléna naimacɨ emodofillamona, daje amani años abɨmo atomonado iena duere fɨnoitɨmacɨ.  
\v 3 Naie facaise menamɨemo cue uaina iitɨcue. Iaɨmaiaɨ cue llolle rafuena daje amani años abɨmo atomonado lloitɨiaɨmaiaɨ. Comɨnɨ comecɨ iuai meiduana iaɨmaiaɨ jitailla jira, sunaillamona, ebinide ɨniroina jɨtaitɨiaɨmaiaɨ —llote. 
\p  
\v 4 Iaɨmaiaɨ mena olivos railla riara mamecɨdo itɨiaɨmaiaɨ. Enɨrue Namana Jusiñamui illanona, naimɨe uicomo mena ite lamparín ie raɨraco mamecɨdo itɨiaɨmaiaɨ.  
\v 5 Iaɨmaiaɨna duere bu fɨnoacania, naimɨena meineitɨiaɨmaiaɨ. Iaɨmaiaɨ fuemona boode ra billanona, naimɨena meinetɨiaɨmaiaɨ Iaɨmaiaɨna duere fɨnodɨno iese fiodaitɨmacɨ.  
\v 6 Iaɨmaiaɨ Jusiñamui rafue llolle facaiseconi nocɨ deitañellena, iaɨmaiaɨmo Jusiñamui uai iite. Jɨnui dɨruena jaitallena iaɨmaiaɨmo uai iite. Iaɨmaiaɨ jitaicabilla facaise, dɨga isoide rafue fɨnuamona comɨnɨna duere fɨnoitɨiaɨmaiaɨ;  
\v 7 iadedɨ Jusiñamui rafue iaɨmaiaɨ llua mei, eo ana ite ifomona ocainana eruaɨllanona, Taɨfe jino biite. Jino billanona, iaɨmaiaɨ dɨga fuirite. Iaɨmaiaɨna anafefitaja mei, iaɨmaiaɨna meineite.  
\v 8 Raɨafomo joneñeitɨmacɨ; iadedɨ iaɨmaiaɨ abɨ Jerusalén naɨsomo jamai fɨebite. Jerusalén comɨnɨ jearede rafue fɨnua jira, Jusiñamui rafuena naimacɨ jitaiñena jira, Sodoma jaie ite naɨraɨ isoidɨmacɨ. Egipto jaie ite naɨraɨ jɨaɨ isoidɨmacɨ. Jerusalémo Jesúna jaie jɨaɨ meinetɨmacɨ.  
\v 9 Raɨafomo iaɨmaiaɨ joniana rairuitɨmacɨ. Darui amani abɨ atomonado ailluena comɨnɨ, naga naɨraɨaɨmona iaɨmaiaɨna jɨbuisaɨbitɨmacɨ.  
\v 10 Nana enɨruemo ite comɨnɨ iaɨmaiaɨ fiodaillari iobitɨmacɨ. Iaɨmaiaɨmona comɨnɨ duere sefuilla jira, iaɨmaiaɨ jai fiodailla jira, iobitɨmacɨ. Rafuena fɨnuanona, danɨ coninɨna rana fecaitɨmacɨ.  
\v 11 Darui amani abɨ atomonado illanona, fiodaillamona iaɨmaiaɨna Jusiñamui dane jillotaite. Ie muidona naidaitɨiaɨmaiaɨ. Nana iaɨmaiaɨna cɨodɨno eo jacɨnaitɨmacɨ.  
\v 12 Naie facaise monamona damɨe iaɨmaiaɨna uaiduana cacadɨiaɨmaiaɨ. Llote: 
\p —Bene mai bi. 
\p Ieconi iaɨmaiaɨna enoidɨmacɨdɨ uillɨe motomo monamo iaɨmaiaɨ jaillana cɨodɨmacɨ.  
\v 13 Naie facaise aillue ñuisaño suide. Ie jira janore facai Jerusalén goide. Rɨaɨ uaimona ie décima facai goide. Naiemona siete mil comɨnɨ fiodaitɨmacɨ. Fiodaiñedɨno jacɨnaillamona: 
\p —Jusiñamuidɨ ua siño jito —lloitɨmacɨ.  
\v 14 Mena duere sefuilla facaise jai fuite. Nia daje suiñede; ia raɨre suite. 
\s1 Juan iraɨe trompeta fillana cacade 
\p  
\v 15 Naie facaise jɨaɨe jaɨenicɨ ie trompetana fite. Monamo itɨno ado llotɨmacɨ: 
\q1 Jusiñamui, Cristo dɨga, illaɨma isoi, enɨruemo ite comɨnɨna biruimona jaca sedaite. 
\q1 Naie comɨnɨ naimɨe anamo raise iitɨmacɨ. 
\m  
\v 16 Naie veinticuatro einamacɨ Jusiñamui ecɨmo illanona, naimɨe uicomo ana bɨtadajanona naimɨena sedadɨmacɨ.  
\v 17 Llotɨmacɨ: 
\q1 Jusiñamui, caɨ Nama, omo iobillacɨnona fecaacadɨcaɨ. 
\q1 Siño jitodɨo. O jitailla rafuena jaca fɨnodɨo. 
\q1 O uaido bie comɨnɨna jai sedadɨo. 
\q1  
\v 18 Ona naimacɨ ɨɨnoñenamona, o dɨga icɨritɨmacɨ; iadedɨ naimacɨna emodofidɨo. 
\q1 Bie facaise jai fiodaitɨno jillotajamona, ona naimacɨ ɨɨnoñena jira, naimacɨmona ja ɨbana oitɨo. 
\q1 Jearede rafuena naimacɨ fɨnua jira, naie facaise ona ɨɨnoñedɨnona duere fɨnoitɨo. 
\q1 O dɨbeimo maɨjɨdɨno, o facaina lloraɨnɨ, nana ona ɨɨnotɨno omona ɨbana feiñoitɨmacɨ. 
\q1 Nɨbaɨ jamai bue isoidɨmacɨ. 
\q1 Nɨbaɨ jamai bue isoiñedɨmacɨ; iadedɨ omona ɨbana feiñoitɨmacɨ. 
\p  
\v 19 Naie facaise monamo ite Jusiñamui sedajano nase econuana cɨodɨcue. Naie fo ite cajóna cɨodɨcue. Ieconi boricabide. Bue isoi eo fɨcɨrede. Gurucabide. Ñuisaño suide. Monamona nocɨ deilla isoi, ailluena hielo ana llude. 
\c 12  
\s1 Juan daje riñona, eo aillue jaio dɨga, cɨode 
\p  
\v 1 Naie facaise monamo daje rɨñona cɨodɨcue. Naiñaiñona cue cɨuamona, Jusiñamuidɨ enɨruemo itɨnomo ɨco suille rafuena cue uiñuana jitaide. Naiñaiño ɨniroidɨ jitoma isoi bairede. Naiñaiño eɨllɨ anamo fɨvui ite. Naiñaiño ɨfogɨmo nuicɨrai isoi doce ucuduaɨ ite.  
\v 2 Jai uruesite. Jocoacana jira, como isirede.  
\v 3 Ie facaise monamo jɨaɨmɨena cɨodɨcue. Naimɨedɨ Taɨfe. Naimɨe illamona jɨaɨe rafue suillena uiñotɨcue. Naimɨedɨ eo aillue jaiona eruaɨde. Jiaɨrede. Siete ɨfogɨ naimɨemo ite. Diez sigaɨ naimɨemo ite. Naga ɨfogɨmo nuicɨrai ite. Rɨaɨ uaimona naimɨedɨ dragón.  
\v 4 Naimɨe omacaɨ dɨga ailluena ucuaɨna enɨruemo ana butade. Rɨaɨ uaimona ie tercera facaina butade. Ie uruena gutallena, rɨño uicomo naidaita naiñaiño jocollena sedade.  
\v 5 Naiñaiño ɨimana jocode; ia jaio naimɨena gutañede. Nana naɨraɨaɨ naimɨe anamo ɨco illanona, naimacɨna ie jitaillacɨnona fɨnotajamona, naimacɨna eo rɨire sedaite. Naimacɨna naimɨe nia sedañenia, monamo Jusiñamui ie illanomo naimɨena uite. Ie ecɨmo Jusiñamui naimɨena itatate.  
\v 6 Iemei naie rɨño jofue iñenanomo raɨre jaide. Nainomo Jusiñamuidɨ ie illɨnona jai fɨnode, naiñaiño ie. Daje amani años abɨmo atomonado naiñaiñona sedaite. 
\p  
\v 7 Naie facaise monamo Jusiñamui jaɨenisaɨdɨ jaiona eruaɨdɨmɨe dɨga fuiridɨmacɨ. Jaiona eruaɨdɨmɨe jaɨenisaɨ dɨga jɨaɨ fuiridɨmacɨ. Jusiñamui jaɨenisaɨ illaɨma mamecɨdɨ Miguel.  
\v 8 Naimacɨ dɨnena emodofidɨmacɨ. Jaio ie jaɨenisaɨ anafefilla jira, Jusiñamui illanomo naimacɨ illano jai iñede.  
\v 9 Enɨruemo jaiona eruaɨdɨmɨe ie jaɨenisaɨ dɨga dotadɨmacɨ. Naie jaiodɨ Taɨfe. Satanás. Jaiona Taɨfe jaie jaillanona, eo ailluena comɨnɨna jai jɨfuete.  
\v 10 Monamo damɨe ado lluana jai cacadɨcue: 
\p —Jusiñamui lloga uai jai suide. Ie comɨnɨna raise jillotate. Naimɨe uai eo siño. Ie uai Cristomo illanona, Cristodɨ comɨnɨna raise sedaite. Enɨruemo Taɨfena jai dotaja jira, Jusiñamuina bu raise ɨɨnoñenia, jeacɨnona bu fɨnoia, Jusiñamui uicomo birui naimɨe fɨnocabilla isoi, Taɨfe caɨna llogɨdoñeite.  
\v 11 Toɨca Llauda isoidɨmɨe naimacɨri fiodailla jira, naimɨe rafuena naimacɨ lluamona, Taɨfena emodofidɨmacɨ. Fiodaitɨmacɨna, naie rafuena llocana jaiacadɨmacɨ.  
\v 12 Ie muidona iobi. Monamo omoɨ illanona, iobi; iadedɨ enɨruemo bu ia, monaillaimo bu ia, eo duere sefuite. Enɨruemo Taɨfe jai illa jira, naimɨemona duere sefuitɨmacɨ. Naimɨe eo icɨrite. Nainomo naimɨe are iñellena uiñote. Naimɨe icɨrillamona enɨruemo itɨno eo duere sefuitɨmacɨ —llote. 
\p  
\v 13 Enɨruemo jaiona eruaɨdɨmɨe dotajamona, naiñaiñona duere fɨnollena, naimɨedɨ ɨimana jai jococa rɨñona racade.  
\v 14 Naimɨemona jilloillena, Jusiñamui mena iaico, majaiño iaico isoi, naiñaiñomo ite. Feianona, jofue iñenanomo daje amani años abɨmo atomonado illena nainomo jaide. Naiñaiñona Jusiñamui eenollena, nainomo jaide.  
\v 15 Ie facaise jaiona eruaɨdɨmɨe fuemona eo ailluena jɨnui bite. Ille isoi tote, naiñaiñona corobaitallena;  
\v 16 ia enɨrue bojuamona, nana jɨnui nainomo ana jaide. Enɨrue naiñaiñona canua jira, naiñaiño corobaiñede.  
\v 17-18 Naie facaise jaiona eruaɨdɨmɨe rɨño dɨga icɨrillamona, naiñaiño comɨnɨ dɨga jobairiacade. Nana Jusiñamui llogacɨno ɨɨnotɨno dɨga, nana “Jesúmo duidɨcaɨ” raitɨno dɨga, jobairiacade. 
\c 13  
\s1 Juan mena rɨirede ocainana cɨode 
\p  
\v 1 Naie facaise monaillai fuemo cue naidaillanona, daje rɨirede ocaina monaillaimona billana cɨodɨcue. Naimɨemo diez sigaɨ ite. Naga sigaɨmo nuicɨrai raɨde. Naimɨemo siete ɨfogɨaɨ ite. Ie ɨfogɨaɨmo Jusiñamuina jeare ñaɨa mamecɨ ite.  
\v 2 Naie ocaina abɨ janallarina eruaɨde. Ie eɨllɨ oso eɨllɨna eruaɨde. Ie fue león fuena eruaɨde. Enɨruemo itɨnona sedallena, naimɨemo aillue jaiona eruaɨdɨmɨedɨ ie siño uaina fecade.  
\v 3 Naimɨemo ite ɨfogɨmona daje jai bofede. Fiodaitena eruaɨde; ia naiemona jai jillode. Naimɨeri raijicaillamona, nana enɨruemo ite comɨnɨ naimɨe dɨbeimo jaidɨmacɨ.  
\v 4 Ocainamo ie uaina aillue jaiona eruaɨdɨmɨe fecaja jira, jaiona sedajanona, iobillacɨnona naimɨemo fecadɨmacɨ. Ocainana jɨaɨ sedajanona, iobillacɨnona fecadɨmacɨ. Raitɨmacɨ: 
\p —Naimɨe siño jito. Naimɨena buna emodofinide. 
\p  
\v 5 Naimɨemo Taɨfe uai illa jira, abɨna uradoillamona, Jusiñamuina eo jeare ñaɨte. Taɨfe jitailla jira, cuarenta y dos fɨvui iese nana comɨnɨna sedade.  
\v 6 Jusiñamuina eo jeare ñaɨcabite. Naimɨe illanona eo jeare ñaɨcabite. Nana Jusiñamui ecɨmo itɨnona eo jeare ñaɨcabite.  
\v 7 Taɨfe uai naimɨemo illa jira, Cristona enɨruemo ite ɨɨnotɨno dɨga jobairite. Naimacɨna emodofide. Iemona nana comɨnɨ naga naɨraɨaɨmona naimɨe anamo itɨmacɨ.  
\v 8 Nana Jusiñamui rabenicomo cueñega mamecɨaɨ dɨese ocainana sedaitɨmacɨ. Jusiñamuidɨ naimacɨ mamecɨaɨna naimɨemo ite rabenicomo enɨruena nia fɨnoñena facaise jaca cueñede; ia Toɨca Llauda isoidɨmɨe fiodailla jira, Jusiñamui naimɨena ɨɨnotɨno mamecɨaɨna naie rabenicomo jai cuete. Naimɨe illanomo jaca illena, naimacɨ mamecɨaɨna cuete. 
\p  
\v 9 Omoɨ jeforena jira, raise fueollena, bie rafuemo cacarei.  
\v 10 Duere sefuillena, naie facaise cárcelmo Cristona ɨɨnotɨnona joneitɨmacɨ. Naimacɨna meinia mei, naimacɨna meinetɨno Jusiñamuimona daje isoi ɨbana feiñoitɨmacɨ. Ie muidona Cristona ɨɨnotɨno comecɨaɨ ocuiñocaida ɨɨnocana jailla. 
\p  
\v 11 Naie facaise jɨaɨe rɨirede ocaina enɨruemona billana cɨodɨcue. Toɨca Llauda isoi naimɨemo mena sigaɨ ite. Aillue jaio isoi ñaɨte.  
\v 12 Monaillaimona bite ocaina uai enɨruemona bite ocainamo jɨaɨ ite. Ie uai dɨga, nana comɨnɨna monaillaimona bite ocainana sedatate.  
\v 13 Eo siño rafuena fɨnocabite. Comɨnɨ cɨoillena, monamona enɨruemo boode ra ana bitatate.  
\v 14 Siño rafuena fɨnuamona, Taɨfe jitailla jira, enɨruemo itɨnona jɨfuete. Iena naimacɨ sedallena, comɨnɨna monaillaimona bite ocaina joreño fɨnuana ocuide. Monaillaimona bite ocaina lloebɨ dɨga navui bofiamona jai jillode.  
\v 15 Joreño fɨnua mei, enɨruemona bite ocaina iena ñaɨtatate. Iena bu sedañenia, ocaina naimɨena meiniana ocuide.  
\v 16 Nana comɨnɨmo naimɨe númerona cuetatate. Número cuetatañenia, naimɨe mamecɨna cuetatate. Ie nabeillɨmo cuetatañenia, ie uiecomo cuetatate. Jamai bue isoidɨnomo cuetatate. Jamai bue isoiñedɨnomo cuetatate. Ucuberedɨnomo cuetatate. Ucubenidɨnomo cuetatate. Patrón anamo itɨnomo cuetatate. Patrón anamo iñedɨnomo cuetatate.  
\v 17 Iese bumo iñenia, rana ɨbanide. Rana fecanide. Bie mamecɨdɨ bie ocaina ie mamecɨ. Mamecɨna cuetatañenia, naimɨe ie númerona cuetatate.  
\v 18 Iena raise cacaillena, iemo omoɨ comecɨaɨna faca. Abɨna uiñotɨmɨe bie númerona uiñoite. Come mamecɨdo iite. Bie númerodɨ seiscientos sesenta y seis. 
\c 14  
\s1 Juan 144,000 comɨnɨ ruana cacade 
\p  
\v 1 Naie facaise Jerusalémo Sion railla anedu muidomo Toɨca Llauda isoidɨmɨe naidaillana cɨodɨcue. Naimɨe dɨga ciento cuarenta y cuatro mil comɨnɨ itɨmacɨ. Naimacɨ uiecuaɨ itofiaɨmo naimɨe mamecɨ, ie Moo mamecɨ dɨga, jai cuega.  
\v 2 Monamona damɨe ñaɨana cacadɨcue. Aillue ille surua isoi, eo fɨcɨrede. Eo gurua isoi jɨaɨ fɨcɨrede. Ailluena comɨnɨ arpas tailla isoi, naimɨe ñaɨana cacadɨcue.  
\v 3 Jusiñamui illanomo bie ciento cuarenta y cuatro mil comɨnɨ comue ruana rotɨmacɨ. Naie cuatro cajedɨno nainomo ite. Naie veinticuatro einamacɨ nainomo itɨmacɨ. Danɨ bie ciento cuarenta y cuatro mil comɨnɨ bie comue ruana rotɨmacɨ. Jɨaɨno iena fueonidɨmacɨ. Bie ciento cuarenta y cuatro mil comɨnɨ enɨruemona naimacɨ dɨbeimo iñedɨnomona jai jillodɨmacɨ.  
\v 4 Bie ciento cuarenta y cuatro mil comɨnɨ jearede rafuena ebiruiñedɨmacɨ. Llauda isoidɨmɨe rafuena ɨɨnocana jaidɨmacɨ. Llauda isoidɨmɨe fiodailla jira, enɨruemo itɨnomona naimacɨdɨ nano jillodɨno Jusiñamui iena, Llauda isoidɨmɨe iena.  
\v 5 Cristo rafuedo jeacɨnona fɨnocabiñeno raise jaidɨmacɨ. 
\s1 Juan daje amani jaɨeniaɨ rafue lluana cacade 
\p  
\v 6 Naie facaise mona motomo jaɨenicɨ feiana cɨodɨcue. Naga naɨraɨmo, nana enɨruemo itɨnomo mare rafuena lluaide.  
\v 7 Ado llote: 
\p —Jusiñamuina ɨɨnuanona naimɨena seda. Naimɨemo iobillacɨnona feca. Naimɨemo ɨɨnoñedɨnona ja duere fɨnoite. Monana, enɨrue dɨga, monaillai dɨga, ille dɨga, naimɨe fɨnua jira, naimɨena seda. 
\p  
\v 8 Jɨaɨe jaɨenicɨ billanona llote: 
\p —Babilonia railla naɨraɨ illano eo aillue; iadedɨ ja iñeite. Nainomo itɨno ja fuitɨmacɨ. Jeacɨnona nainomo itɨno eo fɨnua jira, jɨaɨe naɨraɨaɨna jeacɨnona jɨaɨ eo fɨnotatɨmacɨ. Babiloniamo jaie itɨno isoi, Jusiñamuimona duere sefuitɨmacɨ. 
\p  
\v 9 Naie facaise jɨaɨe jaɨenicɨ billanona, ado llote: 
\p —Monaillaimona bite ocainana bu sedaia, ie joreñona bu sedaia, ie uieco itofemo, ie onollɨmo ocaina cuetataga ra bumo ia,  
\v 10 Jusiñamui rɨicaillafuemona, naimacɨna duenaiñenamona, jaca eo duere sefuitɨmacɨ. Irai motomo jaca duere sefuitɨmacɨ. Azufre boa isoi irai boode. Jusiñamui jaɨenisaɨdɨ Llauda isoidɨmɨe dɨga, iena cɨoitɨmacɨ.  
\v 11 Naie irai illano jaca bouamona, ie uillɨe jaca baireite. Nainomona naie duere sefuidɨno jaca jilloñeitɨmacɨ. Iese naimacɨ fiodaiñeno jaca duere sefuitɨmacɨ —llote. 
\p  
\v 12 Bie rafue suille facaise Jusiñamui lloga uaina raise ɨɨnuanona, Jesús dɨbeimo raise illanona, comecɨaɨ ocuiñocana naimacɨ jaille. 
\p  
\v 13 Iemei monamona Jusiñamui Joreño llote: 
\p —Biena cueno: “Biruimona Jesúna ɨɨnuamona, meineganodɨ caɨmare iitɨmacɨ. Jesús dɨbeimo naimacɨ illamona, navui duere sefuidɨmacɨ. Iemona uri iitɨmacɨ. Ieri Jusiñamuimona ɨbana feiñoitɨmacɨ”. 
\s1 Juan Jusiñamui enɨruemo itɨnona duere fɨnua rafuena cacade 
\p  
\v 14 Naie facaise monamo cue eruaɨa, userede uillɨena cɨodɨcue. Uillɨe emodo Cristo raɨde. Ɨimana eruaɨde. Naimɨe ɨfogɨmo oromona fɨnoca nuicɨrai ite. Ie onollɨmo jairede lloebɨ ite.  
\v 15 Jusiñamuina sedajanomona jɨaɨe jaɨenicɨ billanona, Cristomo ado llote: 
\p —O lloebɨ dɨga enɨruemo ite riarana cota, iena ollena. Jai einaite —llote. 
\p Iese llote; ia comɨnɨna duere fɨnollena ñaɨte. Naimacɨ duere fɨnua facaisena ñaɨte.  
\v 16 Jaɨenicɨ llua isoi, ie lloebɨ dɨga Cristo cotade. Nana iena fɨnode. Comɨnɨna duere fɨnode.  
\v 17 Jusiñamuina sedajanomona naie facaise jɨaɨe jaɨenicɨ bite. Naimɨe onollɨmo jairede lloebɨ jɨaɨ ite.  
\v 18 Ieconi Jusiñamuimo jobaisoillanomona jɨaɨe jaɨenicɨ bite. Enɨruemo boode ra dotaja uaidɨ naimɨemo ite. Lloebɨredɨmɨemo ado llote: 
\p —Jai einailla jira, naimacɨna o ollena, o lloebɨ dɨga illɨmo ite uvaɨaɨna tɨno. 
\p Iese llote; iadedɨ comɨnɨna duere fɨnollena ñaɨte.  
\v 19-20 Jaɨenicɨ llua isoi, ie lloebɨ dɨga tɨnode. Uvas ua mei, Jerusalén ecɨmo iji ollena ifomo dotade. Naie iji jino eo tote. Comɨnɨna ñaɨtɨcue. Jusiñamui rɨicaillafue anamo eo duere sefuitɨmacɨ. Eo dɨaitɨmacɨ. Trescientos kilómetros dɨrue enɨrue emododo toite. Caballo ɨfogɨ facaise a llerite. 
\c 15  
\s1 Juan siete jaɨenisaɨ comɨnɨna duere fɨnoacana cɨode 
\p  
\v 1 Naie facaise monamo jɨaɨe rafuena cɨodɨcue. Ieri eo raijicaidɨcue. Iena cue cɨuamona, Jusiñamuidɨ enɨruemo itɨnomo suille rafuena cue uiñuana jitaide. Siete jaɨenisaɨna cɨodɨcue. Nagamɨe comɨnɨna duere fɨnoacade. Naimacɨ fɨnoacalle rafue dɨga, Jusiñamuidɨ comɨnɨna duere fɨnuana fuite. Iemona ie rɨicaillɨfue saite. 
\p  
\v 2 Aillue joraina eruaɨde rana jɨaɨ cɨodɨcue. Quenirede. Uifɨnide. Boode ra dɨga tamiana eruaɨde. Jorai fuemo monaillaimona bite ocainana emodofidɨnona cɨodɨcue. Ocaina joreño anamo jai iñedɨmacɨ. Ie cuetataga número anamo jai iñedɨmacɨ. Naimacɨ onollɨmo Jusiñamui arpas illanona, naimacɨna taillanona,  
\v 3 jai emodofilla jira, Moisés mɨcorɨ ie ruana rotɨmacɨ. Moisés mɨcorɨ Jusiñamui facaina jaie maɨjɨuide. Jeacɨnomona naimacɨ jɨaɨ jai jillua jira, Toɨca Llauda isoidɨmɨe ie ruana jɨaɨ rotɨmacɨ: 
\q1 Eo siño ebirede rafuena fɨnodɨo. 
\q1 Jusiñamuina o illanona, jaca siño jitodɨo. 
\q1 Mare rafuena jaca fɨnocabidɨo. O lloga uai jaca fɨnodɨo. 
\q1 Naga naɨraɨ o anamo jai itɨmacɨ. 
\q1  
\v 4 Caɨ Nama, nana comɨnɨ ona jacɨruillamona, ona ɨɨnoitɨmacɨ. 
\q1 O marena jira, omo iobillacɨnona fecaitɨmacɨ. 
\q1 O duere fɨnoca rafue muidona nana comɨnɨ ona sedaitɨmacɨ. 
\p  
\v 5 Jusiñamuina sedajanomo dane eruaɨdɨcue. Ie fo itɨcuartomo cɨodɨcue.  
\v 6 Naiemona siete jaɨenisaɨ billana cɨodɨcue. Nagamɨe comɨnɨna duere fɨnoacade. Eo userede linomona fɨnoca ɨniroina jɨtade. Oromona fɨnoca cinturones naimacɨ jogobemo jɨtade.  
\v 7 Naie cuatro cajedɨnomona damɨe naga jaɨenicɨmo oromona fɨnoca copana fecade. Copamo Jusiñamui enɨruemo itɨnona eo duere fɨnollɨcɨno ite isoide. Jusiñamui jaca illa jira, ie lloga uai suicana jaite.  
\v 8 Jusiñamui ebirede siño uai illamona, ie sedajanomo uillɨe eo illana cɨodɨcue. Bie siete jaɨenisaɨmo ite rafue nia suiñena jira, Jusiñamuina sedajanomo buna fo jainide. 
\c 16  
\s1 Juan enɨruemo copas oni totajanona cɨode 
\p  
\v 1 Ie sedajanomona Jusiñamui naie siete jaɨenisaɨmo ado llote: 
\p —Cue rɨicaillafue omoɨ copamo illa jira, enɨruemo itɨnona duere fɨnollena, omoɨ copas oni tota. 
\p  
\v 2 Daje jaɨenicɨ iena fɨnode. Enɨruemo ite comɨnɨna duere fɨnode. Monaillaimona bite ocaina cuetataganona jɨaɨ duere fɨnode. Ocaina joreñona sedadɨnona duere fɨnode. Naimacɨ abɨaɨmo jodollaɨaɨna comuitate. Iemona duere sefuidɨmacɨ. 
\p  
\v 3 Iemei jɨaɨe jaɨenicɨ ie copa oni totajamona, monaillaina duere fɨnode. Nana monaillaidɨ fiodaitɨno dɨrue isoi jaide. Eo jearedena eruaɨde. Nana nainomo ite cajedɨno fiodaitɨmacɨ. 
\p  
\v 4 Iemei jɨaɨe jaɨenicɨ ie copa oni totajamona, nana illiaɨ, nana jorainɨaɨ dɨga, duere fɨnode. Dɨruena jaide. 
\p  
\v 5-6 Naie facaise nana jɨnuina sedacabide jaɨenicɨ llote: 
\p —Jusiñamui, o jaca mareuidɨmɨedɨo. Ona ɨɨnotɨnona enɨruemo itɨno meinia jira, o facaina lloraɨnɨna naimacɨ meinia jira, naimacɨna o raise uiñuamona, naimacɨna duere fɨnodɨo. O comɨnɨna naimacɨ meiniamona, naimacɨ fɨnua isoi, ɨbana oitɨo. O comɨnɨna naimacɨ meinia jira, dɨruena ja jiroitɨmacɨ. 
\p  
\v 7 Jusiñamuimo caɨmare soride ra jobaisoillanomona jɨaɨe jaɨenicɨ llote: 
\p —Caɨ Nama Jusiñamui, ua siño jitodɨo. Naimacɨ fɨnocabilla isoi naimacɨna jai duere fɨnodɨo. 
\p  
\v 8 Naie facaise jɨaɨe jaɨenicɨ ie copa oni totajamona, jitomana duere fɨnode. Eo llɨgaiñotajamona, enɨruemo itɨno eo usidɨmacɨ.  
\v 9 Eo usidɨmacɨ; iadedɨ Jusiñamuina jeare nia ñaɨtɨmacɨ. Naimacɨna duere fɨnollena, naimɨemo uai illana uiñotɨmacɨ; ia naimɨe dɨbeimo naimacɨ comecɨaɨ iuaina meidoiacaiñedɨmacɨ. Jeacɨnona fɨnuana faɨnonocaiacaiñedɨmacɨ. Naimɨemo iobillacɨnona fecaacaiñedɨmacɨ. 
\p  
\v 10 Naie facaise jɨaɨe jaɨenicɨ ie copamona ie duere sefuillacɨnona monaillaimona bite ocaina sedajano dɨne totade. Ie muidona nana enɨrue jitɨreficaide. Eo duere sefuillamona, comɨnɨ imacɨ iɨfena aɨnitɨmacɨ.  
\v 11 Duere sefuillamona, Jusiñamuina jeare ñaɨtɨmacɨ. Naimacɨ abɨaɨmo ite jodollaɨaɨ isirede; iadedɨ naimacɨ comecɨaɨ iuaina meidoñedɨmacɨ. Jeacɨnona fɨnuana faɨnonocaiñedɨmacɨ. 
\p  
\v 12 Naie facaise jɨaɨe jaɨenicɨ ie copamona ie duere sefuillɨcɨnona Eufrates railla ille dɨne totade. Ie muidona naie aillue ille safenaite. Safenaillamona, jitoma billanomo ite naɨraɨaɨ illaɨcomɨnɨ, imacɨ soldaduaɨ dɨga, ruica dɨne raise birenitɨmacɨ. 
\p  
\v 13 Naie facaise aillue jaio fuemona, monaillaimona bite ocaina fuemona, naimɨe facaina lloraɨma fuemona, daje amani jananɨaɨ billana cɨodɨcue. Nagamɨemona daje janaba bite. Nai jananɨaɨ jerocɨna eruaɨde.  
\v 14 Taɨfemona bite. Siño rafuena fɨnocabite. Nana illaɨcomɨnɨ, imacɨ soldaduaɨ dɨga uaidollena, naimacɨna oreite. Danomo ofillena illaɨcomɨnɨna uaidoite. Jusiñamui dɨga jobairillena, danomo ofitɨmacɨ. Naimɨe dɨga jobairillamona, Jusiñamui ua siño jitona nana comɨnɨ uiñoitɨmacɨ.  
\v 15-16 Armagedón railla illanomo ofitɨmacɨ. Naie illano mamecɨdɨ judíuaɨ uai mamecɨ. Ieconi caɨ Nama cuemo llote: 
\p —Fɨɨriraɨma isoi ebena biitɨcue. Cue billemo ocuiridɨmɨe iocɨre iite. Cue billemo naimɨe ocuiria, cue bia, naimɨe cue jitaillacɨnona fɨnuamona, naimɨe meiruiñeite. 
\p  
\v 17 Naie facaise jɨaɨe jaɨenicɨ jafaicɨ dɨne ie copamona ie duere sefuillɨcɨnona totade. Ieconi ie sedajanomona Jusiñamui llote: 
\p —Bie duere sefuillɨcɨno dɨga, comɨnɨna cue duere fɨnoacanacɨno ja fuite. 
\p  
\v 18 Ieconi boricabide. Bue isoi eo fɨcɨrede. Gurucabide. Eo aillue ñuisaño suide. Comɨnɨ comuilla facaisemona iese ñuisaño jaca suiñede.  
\v 19 Iemona nanoca naɨraɨ illano daje amani facaina goide. Nana jɨaɨe illanuaɨ jɨaɨ goidɨmacɨ. Jusiñamuidɨ Babilonia railla naɨraɨna raise uiñuamona, nana ie rɨicaillafuemona iena eo duere fɨnode.  
\v 20 Naɨe ñuisañomona naga uiasi jai cɨoiñena. Naga anedu jɨaɨ cɨoiñena.  
\v 21 Monamona nocɨ deilla isoi, hielo jɨaɨ ana jurude. Naga hielo cuarenta kilos nɨbaɨ merede. Comɨnɨmo baillanona, eo duere sefuidɨmacɨ. Eo duere sefuillamona, Jusiñamuina nia jeare ñaɨtɨmacɨ. 
\c 17  
\s1 Juan eo maraiñede rɨñona duere sefuillana cɨode 
\p  
\v 1 Naie facaise naie siete copas dɨga ite jaɨenisaɨmona cue dɨne damɨe billanona cuemo llote: 
\p —Cue dɨga bi. Eo maraiñede rɨño duere sefuillana omo acataitɨcue. Monaillai emodomo naiñaiño jai raɨde isoide. Naiñaiñodɨ nanoca naɨraɨ illano mamecɨdo ite. Nana illaɨcomɨnɨ naie naɨraɨ anamo itɨmacɨ.  
\v 2 Naiñaiñona sedajamona, naiñaiño dɨga, illaɨcomɨnɨdɨ jearede rafuena fɨnocabidɨmacɨ. Naiñaiñona nabaillamona, enɨruemo ite comɨnɨ jearede rafuena eo ebiruitɨmacɨ —llote. 
\p  
\v 3 Nɨcaɨrilla isoi, jaɨenicɨ cue joreñona uillanona, jofue iñenanomo cue joreñona uite. Eo jiaɨrede rɨirede ocaina emodomo naie rɨño raɨllana cɨodɨcue. Jusiñamuina eo jearede ñaɨacɨno ocaina abɨmo eo ite. Ocainamo siete ɨfogɨaɨ ite. Diez sigaɨ jɨaɨ ite.  
\v 4 Naie rɨño jiduirede ɨniroi, jiaɨrede ɨniroi dɨga jɨtade. Eo raifide quenirede ra dɨga, naiñaiño abɨ eo fɨnobide. Dajerie ra oromona fɨnoca. Dajerie perlas railla ramona fɨnoca. Ie dɨga ie abɨ eo fɨnobide. Naiñaiño onollɨmo oromona fɨnoca copana uite. Nainomo eo maraiñede jearede rafuena fɨnocana uite isoide.  
\v 5 Jusiñamui naiñaiño fɨnoca rafuena uiñotaiacana jira, naiñaiño uiecomo mamecɨ jai cuetataga: “Nanoca Babilonia raillañaiñodɨcue. Cuemona eo jearede rafue comuicana jaicabide. Cue muidona comɨnɨ jearede rafuena fɨnocabide”.  
\v 6 Naiñaiñodɨ ailluena Jusiñamuimo duidɨnona, ailluena ua Jesúna ɨɨnotɨnona meinetajana eo ebiruite. Naiñaiñona cue cɨoia, eo raijicaidɨcue.  
\v 7 Jaɨenicɨ cuemo jɨcanote: 
\p —¿Bue ñe raijicaidɨo? Naiñaiñomo ite rafuena omo lloitɨcue. Naiñaiñodɨ ocaina emodomo raɨde. Naie ocaina rafuena jɨaɨ lloitɨcue.  
\v 8 Naie ocaina navui ite; ia birui jai iñede. Ɨco enɨruemona, eo ana ite ifomona, dane biite; iadedɨ faɨfite. Ieri Jesucristona ɨɨnoñedɨno raijicaitɨmacɨ. Jesucristona naimacɨ ɨɨnoñena jira, monamo Jusiñamuidɨ ie rabenicomo enɨrue nia fɨnoñena facaise naimacɨ mamecɨaɨna jaca cueñede. Naimɨe illanomo jaca iñeitɨmacɨ.  
\v 9 Ocaina rafuena omo ja lloitɨcue. Jusiñamui ona uiñotajanona iena cacaitɨo. Bie siete ɨfogɨdɨ siete anedu mamecɨdo ite. Rɨño nainomo raɨde.  
\v 10 Ie siete ɨfogɨdɨ siete illaɨcomɨnɨ mamecɨdo ite. Naimacɨmona cinco illaɨcomɨnɨ jai iñede. Damɨe comɨnɨna birui sedade. Jɨaɨmɨe comɨnɨna nia sedañede. Comɨnɨna naimɨe sedaia, are naimacɨna sedañeite. Dallu sedaite. 
\p  
\v 11 ’Ifomona bite ocainana dane lloitɨcue. Comɨnɨna jɨaɨ sedaite; ia bie siete illaɨcomɨnɨ sedajacɨnomo duite. Comɨnɨna naimɨe sedaja mei, naimɨe faɨfite.  
\v 12 Ie diez sigaɨdɨ diez illaɨcomɨnɨ mamecɨdo ite. Diez naɨraɨna sedaitɨmacɨ; iadedɨ nia sedañedɨmacɨ. Comɨnɨna dallu sedallena, ocainamona naimacɨ uaina feiñoitɨmacɨ.  
\v 13 Daje isoi comecɨna lloitɨmacɨ. Ocainana nabaitɨmacɨ. Naimɨe jitailla rafuena fɨnuanona, naimɨe anamo iitɨmacɨ.  
\v 14 Toɨca Llauda isoidɨmɨe dɨga jobairitɨmacɨ; ia Llauda isoidɨmɨe ie comɨnɨ dɨga emodofite. Llauda isoidɨmɨe nana illaɨcomɨnɨ baɨfemo faɨa jira, nanoca imɨena jira, naimacɨna emodofite. Ie comɨnɨna naimɨe fetode. Naimɨena ɨɨnotɨmacɨ. Jai emodofitɨmacɨ —llote. 
\p  
\v 15 Jaɨenicɨ nia llote: 
\p —Rɨño monaillai emodomo raɨllana aillɨ cɨodɨo. Monaillaidɨ nana comɨnɨ mamecɨdo ite. Naga naɨraɨ mamecɨdo ite.  
\v 16-17 Naie diez illaɨcomɨnɨdɨ, ocaina dɨga rɨñona enoitɨmacɨ. Naiñaiñona duere fɨnoitɨmacɨ. Jusiñamui jitailla jira, naimɨe jitailla rafue fuidollena, naimɨe lloga uai suillena, naimacɨ comecɨna daje isoi lloitaite. Ocaina anamo naimacɨna itataite. Rɨñona iese fuidoitɨmacɨ. Naiñaiño ɨniroina oni dotatajanona, naiñaiño taɨñaiñona iite. Naiñaiñona meineitɨmacɨ. Ie llɨcɨsina rɨitɨmacɨ. Ja muidomo iraimo naiñaiñona dotaitɨmacɨ. Iese naiñaiñona duere fɨnuanona, naiñaiñona fuidoitɨmacɨ.  
\v 18 Bie rɨñodɨ nanoca naɨraɨ illano mamecɨdo ite. Naie naɨraɨ anamo nana enɨruemo ite illaɨcomɨnɨ iitɨmacɨ —llote. 
\c 18  
\s1 Juan Babilonia railla naɨraɨ illano goilla rafuena cɨode 
\p  
\v 1 Ie facaise monamona jɨaɨe jaɨenicɨ ana billana cɨodɨcue. Naimɨe uai siño. Naimɨe uai siñona jira, enɨruena llɨgaiñote.  
\v 2 Ado llote: 
\p —Iena Jusiñamui duere fɨnuamona, Babilonia naɨraɨ illano jai nana goide. Comɨnɨ nainomo jai iñedɨmacɨ. Nainomo Taɨfe jaɨenisaɨ birui itɨmacɨ. Jananɨaɨ nainomo birui itɨmacɨ.  
\v 3 Nia goiñenia, bie naɨraɨ jeacɨnona eo fɨnuamona, nana naɨraɨaɨ iena ebiruitɨmacɨ. Bie naɨraɨna nabaillamona, nana illaɨcomɨnɨ jearede rafuena jɨaɨ fɨnocabidɨmacɨ. Jearede rafuemona nana rana fecaraɨnɨ bie naɨraɨmona ailluena ucubena ganacabidɨmacɨ —llote. 
\p  
\v 4 Naie facaise monamona damɨe llote: 
\p —Cue comɨnɨ, bie naɨraɨmona birui mai eneno oni i. Jeacɨnona omoɨ fɨnoi raillano, naie facaise omoɨ duere sefui raillano, birui eneno mai oni i.  
\v 5 Bie naɨraɨ jeacɨno eo fɨnocana jaidɨmacɨ; iadedɨ iena Jusiñamui uiñuamona, naimacɨna jai duere fɨnoacade.  
\v 6 Jusiñamui, naimacɨ fɨnua dɨese ɨbana ono. Naimacɨna ua eo duere fɨno.  
\v 7 Jeacɨno fɨnuamona iobidɨmacɨ. Iemona abɨ ɨedotɨmacɨ. Jeacɨno fɨnuana eo ebiruitɨmacɨ. “Illaɨcomɨnɨdɨcaɨ. Nana caɨ jitailla ra caɨmo ite. Fecɨño isoi duere jaca sefuiñeitɨcaɨ” comecɨaɨna facadɨmacɨ;  
\v 8 iadedɨ caɨ Nama Jusiñamui naimacɨna ebena eo duere fɨnoite. Duicomona, sure illamona, aime guillamona fiodaitɨmacɨ. Naimacɨ jofue booite. Jusiñamui siño jitona jira, naimacɨna raɨre fuidoite —llote. 
\p  
\v 9 Bouamona uillɨe naimacɨ cɨoia, sunaillamona, naie naɨraɨ dɨga nabairite illaɨcomɨnɨ eo eeitɨmacɨ.  
\v 10 Duere sefuillena naimacɨ jacɨruilla jira, aremona lloitɨmacɨ: 
\p —Ero, Babilonia eo aillue naɨraɨ illano; iadedɨ duere fɨnuamona ua raɨre fuite —lloitɨmacɨ. 
\p  
\v 11 Naimacɨ rana naie naɨraɨ jai oñena jira, rana fecaraɨnɨ eo sunaillamona eo eeitɨmacɨ.  
\v 12 Iese fecacabidɨmacɨ: oro, plata, abɨ fɨnollena raifide ra, dɨga eo mare raifide ɨniroi, dɨga caɨmare soride rabɨcɨaɨ, elefante sigaɨnɨaɨ, jofona nille ra, bronce, lloeona, mare nofɨcɨ,  
\v 13 guille caɨmaretade ra, caɨmare soride ra, vino, guille ie aceite, mare harina, core, juraretaɨaɨ, toɨca llaudaɨaɨ, caballos, carretas, comɨnɨ. Vendellena, comɨnɨna atɨcabidɨmacɨ.  
\v 14 Sure illamona lloitɨmacɨ: 
\p —Caɨmona omoɨ comecɨaɨ jitailla rana ja oñeitomoɨ. Omoɨ ebiruiga rana ja oñeitomoɨ. 
\p  
\v 15 Duere sefuillena naimacɨ jacɨruilla jira, nainomona ucubena jai oñenamona, rana fecaraɨnɨ aremona ado eo eeitɨmacɨ. Sunaitɨmacɨ.  
\v 16 Lloitɨmacɨ: 
\p —Naie naɨraɨ eo duere sefuidɨmacɨ. Nia duere sefuiñenia, eo mare rana, mare ɨniroi dɨga ebiruitɨmacɨ. Eo raifide abɨna fɨnolle rana eo ebiruitɨmacɨ. Oromona fɨnoca ra, perlamona fɨnoca rana eo ebiruitɨmacɨ;  
\v 17 iadedɨ nana naie naɨraɨ, ie raifide ra dɨga, jai raɨre fuite —lloitɨmacɨ. 
\p Nana botes imacɨ capitanes, nana botemo maɨjɨuidɨno dɨga, nainomo jaidɨno dɨga, botedo rana fecaraɨnɨ dɨga,  
\v 18 aaremona uillɨena cɨuamona, naie naɨraɨ bouana fɨdɨano, lloitɨmacɨ: 
\p —Naie naɨraɨ nana jɨaɨ naɨraɨaɨ baɨfemo navui faɨte. Jɨaɨe naɨraɨ ie isoi ebinide. 
\p  
\v 19 Sure illamona, naimacɨ ɨfogɨmo imuicɨna faɨanona, eeitɨmacɨ. Lloitɨmacɨ: 
\p —Bie naɨraɨ eo duere sefuide. Bie naɨraɨmona boteredɨnodɨcaɨ navui ailluena ganadɨcaɨ. Bie naɨraɨ jai raɨre fuite. 
\p  
\v 20 Naie facaise monamona damɨe llote: 
\p —Monamo itɨno, naie naɨraɨ fuillari mai iobi. Jusiñamui comɨnɨna jai jaidomoɨ. Naimɨe facaina navui maɨjɨdomoɨ. Naimɨe rafuena navui llofueuidomoɨ. Naie naɨraɨmona duere sefuidomoɨ; iadedɨ omoɨ facaina Jusiñamui ɨbana jai ote. 
\p  
\v 21 Naie facaise jɨaɨe jaɨenicɨmo siño uai illanona, eo aillue nofɨcɨ llɨnuanona, monaillaimo iena faɨte. Llote: 
\p —Bie nofɨcɨ dane caɨ cɨoiñena isoi, Babilonia railla naɨraɨ dane iñeite. Jusiñamui iena eo rɨire fuidoite.  
\v 22 Nainomo buna dane roñeite. Buna guitarrana eruaɨde arpas jaca taiñeite. Buna firacaɨna jaca fiñeite. Buna trompetana jaca fiñeite. Nainomo buna rana jaca niñeite. Rana jaca fɨnoñeite. Buna jaca doberiñeite. Llomenicona fɨnollena, buna dane maɨjɨñeite.  
\v 23 Nainomo naɨona lamparínɨaɨ dane booñeite. Rafue dane iñeite. Eo caɨmare iobitaja rafue dane iñeite. Ɨraɨsiñeitɨmacɨ. Saiñeitɨmacɨ. Naie naɨraɨ rana fecaraɨnɨdɨ navui nanoca fecaraɨnɨ. Naimacɨna Taɨfe canua jira, ailluena naɨraɨaɨna navui jɨfuecabidɨmacɨ.  
\v 24 Naie naɨraɨ ailluena Jusiñamuina ɨɨnotɨnona meinetɨmacɨ. Ailluena Jusiñamui facaina lloraɨnɨna meinetɨmacɨ; iadedɨ naimacɨna Jusiñamui duere fɨnua jira, ua eo mare —llote. 
\c 19  
\p  
\v 1 Ie facaise monamo eo ailluena comɨnɨ ado lluana cacadɨcue. Jusiñamuimo llotɨmacɨ: 
\q1 Ona caɨ iobitajasa. Caɨna jai jillotatɨo. 
\q1 O uai ebirede. Odɨ siño jitodɨo. 
\q1  
\v 2 O anamo itɨnona raise uiñuamona, uanaicɨnona o uiñuamona, naimacɨna duere jai fɨnodɨo. 
\q1 Naie jearede rafuena fɨnode rɨñona jai duere fɨnodɨo. 
\q1 Naie rɨño ailluena comɨnɨna jearede rafuena fɨnotate. 
\q1 Ailluena o facaina maɨjɨdɨnona jai meinetade; 
\q1 iadedɨ ɨba jai otɨo. 
\p  
\v 3 Iemei dane llotɨmacɨ: 
\p —Ona caɨ iobitajasa. Duere sefuillena, naie naɨraɨ jaca boode. Naimacɨ jaca duere sefuitɨmacɨ —llotɨmacɨ. 
\p  
\v 4 Naie veinticuatro einamacɨ, naie cuatro cajedɨno dɨga, Jusiñamui ecɨmo ana bɨtadajanona, naimɨena sedadɨmacɨ. Llotɨmacɨ: 
\p —Omoɨ lluacɨno mare. Ie isoi jɨaɨ lloiacadɨcaɨ. Jusiñamuina caɨ iobitajasa. 
\p  
\v 5 Jusiñamui illanomona damɨe llote: 
\q1 Nana caɨ Jusiñamuina facaina maɨjɨdɨno iobitajasa. 
\q1 Nana naimɨena ɨɨnotɨno naimɨena iobitajasa. 
\q1 Jamai bue isoidɨno naimɨena iobitajasa. 
\q1 Jamai bue isoiñedɨno naimɨena iobitajasa. 
\s1 Juan Toɨca Llauda isoidɨmɨe aɨna ua rafuena cacade 
\p  
\v 6 Naie facaise monamo eo ailluena comɨnɨ lluana cacadɨcue. Ailluena jɨnui surua isoi fɨcɨrede. Eo gurucabilla isoi fɨcɨrede. Llotɨmacɨ: 
\q1 Caɨ Nama Jusiñamuina caɨ iobitajasa. 
\q1 Naimɨe siño jito. Nana comɨnɨna birui jai sedade. 
\q1  
\v 7 Eo iobidɨcaɨ. Naimɨemo iobillacɨnona eo caɨ fecajasa. 
\q1 Llauda isoidɨmɨe ie aɨna ua rafue facaise jai suide. 
\q1 Naiñaiño jai fɨnobide. 
\q1  
\v 8 Mare ɨniroi naiñaiñomo jai ite. Eo userede. Quenirede. Jeanide 
\m llotɨmacɨ. Iese ɨniroina llotɨmacɨ; ia Cristo, ie comɨnɨ dɨga, jaca illena ñaɨtɨmacɨ. Ie aɨ dɨga, ɨni ie rɨño jaca caɨmare illa isoi, nana naimɨe comɨnɨ dɨga, naimɨe caɨmare jaca iite. Naie mare ɨniroidɨ, Jusiñamui jitaillacɨnona fɨnuamona, naimɨe ɨɨnotɨno imacɨ mare fɨnoca rafue isoide. 
\p  
\v 9 Jaɨenicɨ cuemo llote: 
\p —Biena cueno: “Llauda isoidɨmɨe aɨna ua rafue dɨne uaidoganodɨ caɨmare iitɨmacɨ”. —Iemei llote: 
\p —Jusiñamui iena llua jira, uanaicɨnona omo llotɨcue. 
\p  
\v 10 Jaɨenicɨ uicomo eɨllɨmo ana bɨtadatɨcue, naimɨena sedallena; ia cuemo llote: 
\p —Dama ite. Cuena sedañeno; ia dama Jusiñamuina seda. Jesús ie dɨbeimo itɨnona uanaicɨnona jai uiñotade. Ie jira naga o dɨga naimɨena ɨɨnotɨno isoi, Jusiñamui facaina jɨaɨ maɨjɨdɨcue. Naga Jusiñamui facaina maɨjɨdɨmɨe Jusúna llocabite. Ie muidona dama Jusiñamuina seda. 
\s1 Juan userede caballo emodomo itɨmɨena cɨode 
\p  
\v 11 Naie facaise mona ecorillana cɨodɨcue. Nainomo userede caballona cɨodɨcue. Naie emodomo itɨmɨemo mena mamecɨ ite. Ɨɨnogamɨena mamecɨrede. Uanaicɨnona Llocabitɨmɨena jɨaɨ mamecɨrede. Naimacɨna raise uiñuamona, naimɨe dɨbeimo iñedɨnona duere fɨnollena, naimacɨ dɨga jobairite.  
\v 12 Naimɨe uisɨdɨ irai isoide. Illaɨmana jira, naimɨe ɨfogɨmo ailluena nuicɨraɨ ite. Naimɨemo cuega mamecɨna buna uiñoñede. Dama naimɨe iena uiñote.  
\v 13 Naimɨe jɨtaca ɨniroi ie dɨbeimo iñedɨno dɨruemo mutaca. Jusiñamuina naimɨe uiñotaja jira, Jusiñamui Uairedɨmɨena mamecɨrede. Naimɨedɨ Jesucristo.  
\v 14 Naimɨe jɨnafona soldaduaɨ isoi Jusiñamui facaina itɨno monamona billana jɨaɨ cɨodɨcue. Eo mare userede jeanide ɨniroina jɨtadɨmacɨ. Userede caballuaɨ emodomo itɨmacɨ.  
\v 15 Enɨruemo ite naɨraɨaɨna emodofillena, naimɨe fuemo jairede lloebɨ ite. Naimacɨna emodofilla mei, naimacɨna naimɨe jitaillacɨnona fɨnotallena, naimacɨna eo rɨire sedaite. Jusiñamui siño jitona jira, naimɨe rɨicaillɨfue anamo itɨnona eo duere fɨnoite.  
\v 16 Naimɨe ɨniroimo, naimɨe ɨdaɨmo jai cuega: “Nanoca Illaɨma. Nanoca Nama”. 
\p  
\v 17 Naie facaise jaɨenicɨ jitoma llɨgaiñuanomo cɨodɨcue. Nana inonɨaɨna uaidote: 
\p —Llɨcɨsina mai rɨaɨbi. Jusiñamuidɨ ailluena comɨnɨna ja meiniamona rɨlle eo iite.  
\v 18 Naimacɨna emodofillamona, ailluena llɨcɨsi ja iite. Ailluena comɨnɨna ja meineite. Illaɨcomɨnɨ itɨmacɨ. Soldaduaɨ illaɨcomɨnɨ itɨmacɨ. Caballuaɨ itɨmacɨ. Caballuaɨ emodomo jaicabidɨno itɨmacɨ. Dɨga comɨnɨ ite. Jamai bue isoidɨno itɨmacɨ. Jamai bue isoiñedɨno itɨmacɨ. Patrones anamo itɨno itɨmacɨ. Patrones anamo iñedɨno itɨmacɨ. Naimacɨ llɨcɨsi mai rɨaɨbi —llote. 
\p  
\v 19 Naie facaise monaillaimona bite rɨirede ocainadɨ enɨrue illaɨcomɨnɨ dɨga ofide. Naimacɨ soldaduaɨ jɨaɨ ofidɨmacɨ. Userede caballo emodomo itɨmɨe dɨga, naimɨe dɨbeimo itɨno dɨga jobairiacadɨmacɨ.  
\v 20 Userede caballo emodomo itɨmɨe ie dɨbeimo itɨno dɨga naimacɨna emodofide. Ocainana gaɨtadɨmacɨ. Naimɨe facaina taɨnona lloraɨmana jɨaɨ gaɨtadɨmacɨ. Naie lloraɨma ocaina uai dɨga comɨnɨna jɨfuecabite. Siño rafuena fɨnuamona, ocaina cuetataga ra itɨnona, ie joreñona sedadɨnona jɨfuecabite. Naie iaɨmaiaɨna gaɨtaja mei, eo boode iraimo iaɨmaiaɨna cajena dotadɨmacɨ. Azufre boa isoi irai boode.  
\v 21 Caballo emodomo itɨmɨedɨ ie fuemo ite lloebɨ dɨga iaɨmaiaɨ soldaduaɨna meinete. Jaɨenicɨ llua isoi, inonɨaɨ naimacɨ llɨcɨsina rɨtɨmacɨ. Iemona eo monidɨmacɨ. 
\c 20  
\s1 Juan mil años Taɨfe maɨana cɨode 
\p  
\v 1 Naie facaise monamona jaɨenicɨ billana cɨodɨcue. Enɨruemo eo ana ite ifo llave naimɨemo ite. Aillue lloeo ie onollɨmo ite.  
\v 2 Aillue jaiona eruaɨdɨmɨena gaɨtade. Naimɨedɨ Taɨfe. Rɨaɨ uaimona Satanás. Jɨaɨcɨ dragón. Mil años iese illena lloeo dɨga naimɨena maɨte.  
\v 3 Ana ite ifomo naimɨena dotade. Llave dɨga ifona ɨbaide. Comɨnɨna ramo faɨñellena, naimacɨna jeacɨnona fɨnotañellena, naimɨe uaina itatañede. Mil años comɨnɨna jɨfuenide. Mil años fuilla mei, dallu naimɨena jino oretaite, comɨnɨna ramo faɨllena. 
\p  
\v 4 Ie mei monamo dɨga jueces illanuaɨna cɨodɨcue. Jusiñamui uai dɨga nainomo itɨnodɨ maraiñede rafue fɨnodɨnomo jamai duere sefuillɨcɨnona lloitɨmacɨ. Ie facaise jai meineganona jɨaɨ cɨodɨcue. Eo duere sefuilla facaise “Jesús comɨnɨdɨcaɨ” naimacɨ llua jira, Jusiñamui uaina naimacɨ llua jira, naimacɨ ɨfogɨaɨna jaitajanona, naimacɨna meineganodɨmacɨ. Monaillaimona bite ocainana sedañedɨmacɨ. Ie joreñona sedañedɨmacɨ. Ie cuetataga ra naimacɨ uiecomo, naimacɨ onollɨmo iñede. Navui fiodaitɨmacɨ; ia iemona bie facaise jai jillobitɨmacɨ. Imacɨ abɨaɨ dɨga Jusiñamui naimacɨna jillotaite. Cristo dɨga mil años enɨruemo itɨnona sedaitɨmacɨ.  
\v 5 Naimacɨdɨ nano jillodɨno. Naie mil años nia fuiñenia, jɨaɨe jai fiodaitɨno nia jilloñeitɨmacɨ; ia mil años fuilla mei, jilloitɨmacɨ.  
\v 6 ¡Nano jillodɨno caɨmare marena iitɨmacɨ! Dane fiodaiñenamona Jusiñamui illanomo jaca iitɨmacɨ. Faɨfiñeitɨmacɨ. Comɨnɨna sedajanona, comɨnɨ Jusiñamuina raise uiñollena, comɨnɨ Cristona raise uiñollena, naimacɨna canoitɨmacɨ. Cristo dɨga mil años naimacɨna sedaitɨmacɨ. 
\p  
\v 7 Bie mil años fuilla mei, Jusiñamuidɨ ana ite ifomona Taɨfe jino oretaite.  
\v 8 Nana enɨruemo ite naɨraɨaɨna jɨfuiaɨbite. Gog railla illaɨcomɨnɨna, Magog railla naɨraɨaɨ dɨga, jɨfueite. Naimacɨ naɨraɨaɨna ofitaite. Eo ailluena naimacɨ illa jira, conillɨena caɨ facadonina isoi, naimacɨna facadonidɨcue. Jusiñamuina ɨɨnotɨno dɨga jobairillena, ofitɨmaci.  
\v 9 Danomo ofillanona, Jusiñamuina ɨɨnotɨnona cɨrɨbitaitɨmacɨ. Jerusaléna, Jusiñamui isiruiga naɨraɨna, cɨrɨbitaitɨmacɨ. Naie facaise monamona boode ra billanona, jobairiacadɨnona fuidoite.  
\v 10 Comɨnɨna eo jɨfuecabite; ia ie facaise Jusiñamuidɨ Taɨfena eo boode iraimo dotaite. Azufre boa isoi irai boode. Nainomo monaillaimona bite ocainana jaie dotade. Naimɨe facaina taɨnona lloraɨma jaie dotade. Nainomo ua jaca duere sefuitɨmacɨ 
\s1 Juan aillue raɨrabɨcɨna cɨode. Nainomona Jusiñamui duere fɨnollɨcɨnona lluana cacade 
\p  
\v 11 Naie facaise aillue userede raɨrabɨcɨna cɨodɨcue. Illaɨmana naimɨe illamona, nainomo Jusiñamuina jɨaɨ cɨodɨcue. Naimɨe siño illamona, mona enɨrue dɨga jai iñede.  
\v 12 Naie facaise Jusiñamui uicomo nana fiodaitɨno naidaillana cɨodɨcue. Jamai bue isoiñedɨno itɨmacɨ. Jamai bue isoidɨno itɨmacɨ. Naimacɨmo juez isoi Jusiñamui llollena, itɨmacɨ. Ie rabenicuaɨmo naimacɨ jai fɨnoca rafuena jɨbuide. Naimacɨ fɨnoca rafue nainomo jai cuega. Iemei Jusiñamui jɨaɨe rabenicona jɨbuide. Naimɨe dɨga jaca ille comɨnɨ mamecɨaɨ nainomo jai cuega. Naimacɨ mamecɨaɨ nainomo iñenia, naimacɨ fɨnoca rafue dɨese Jusiñamui naimacɨmo duere sefuillena llote.  
\v 13 Monaillaimo ite corobaitɨno abɨaɨ, joreñuaɨ dɨga, jilloitɨmacɨ. Raɨgano abɨaɨ joreñuaɨ dɨga jilloitɨmacɨ. Naimacɨ fɨnoca rafue dɨese Jusiñamui naimacɨmo duere fɨnollena lloite.  
\v 14 Naimacɨ abɨaɨ naimacɨ joreñuaɨ dɨga iraimo dotaite. Jaca faɨfitɨmacɨ. Naiemona jaca jilloñeitɨmacɨ. Jusiñamuimona eneno jaca itɨmacɨ.  
\v 15 Monamo ite rabenicomo cueñega comɨnɨ mamecɨaɨ dɨese itɨnona iraimo dotaite. 
\c 21  
\s1 Juan comue monana, comue enɨrue dɨga cɨode 
\p  
\v 1 Birui ite mona, birui ite enɨrue dɨga jai iñede. Monaillai jɨaɨ jai iñede. Iemei comue mona cɨodɨcue. Comue enɨruena jɨaɨ cɨodɨcue.  
\v 2 Comue naɨraɨ illanona cɨodɨcue. Comue Jerusaléna cɨodɨcue. Jusiñamui illanomona, Jusiñamuimona bite. Naimɨemona billa jira, naie naɨraɨ eo mare. Eo ebirede fɨnobide rɨño ie ɨnina ua facaise isoi, eo ebirede.  
\v 3 Jusiñamui illanomona damɨe ado llote: 
\p —Comɨnɨ motomo Jusiñamui illano jai ite. Naimacɨ dɨga naimɨe iite. Naimɨe comɨnɨnitɨmacɨ.  
\v 4 Naimacɨ illanomo naimɨe iite. Naimacɨna naimɨe nabaillamona, naimɨe jitailla jira, naimacɨna caɨmadoite. Dane eeñeitɨmacɨ. Fiodaiñeitɨmacɨ. Sunaiñeitɨmacɨ. Duere sefuiñeitɨmacɨ. Birui ite rafuemo comecɨaɨna naimacɨ nainomo facañena jira, ie facaise sunaiñeitɨmacɨ —llote. 
\p  
\v 5 Jusiñamui llote: 
\p —Ero, nana ra comuena birui fɨnoitɨcue. Cue lluacɨno uanaicɨnona jira, cue lluacɨnona cue fɨnua jira, bie rafuena cueno. 
\p  
\v 6 Iemei cuemo llote: 
\p —Bie rafue jai fuite. Jaca bue nia iñenia, jaie jaca itɨcue. Nana rana fɨnodɨcue. Nana ra cue uaido icana jaide. Nana rana fuilla mei, jaca iitɨcue. Jaca siño jitodɨcue. Naimacɨ illena comɨnɨ jɨnuina eo jiroacana isoi, cuena ɨɨnotɨno comecɨaɨ eo caɨmare itataitɨcue. Ɨbatañeno cue dɨga illena, naimacɨna jaca itataitɨcue.  
\v 7 Cuena raise ɨɨnotɨnona iese itataitɨcue. Jaca naimacɨ Jusiñamuinitɨcue. Naimacɨ jaca cue comɨnɨnitɨmacɨ.  
\v 8 Jɨaɨno jaca eo boode iraimo jaca iitɨmacɨ. Azufre boa isoi irai booite. Naiemona jaca jilloñeitɨmacɨ. Cuemona eneno jaca iitɨmacɨ. Dɨese nainomo iitɨmacɨ: abɨdo danomo jaidɨno, cuena raise ɨɨnoñedɨno, jearede rafue fɨnocabidɨno, comɨnɨna meinetɨno, aɨñede rɨño dɨga icabitɨno, ɨniñede ɨima dɨga icabitɨno, aiñɨnɨaɨ, jiraraɨna sedacabidɨno, taɨnona llocabitɨno —llote. 
\s1 Juan comue Jerusaléna llote 
\p  
\v 9 Naie facaise naie siete jaɨenisaɨmona damɨe cue dɨne bite. Naie jaɨenisaɨ imacɨ copamo comɨnɨna duere fɨnollɨcɨnona navui ite isoide. Naimɨe cuemo llote: 
\p —Cue dɨga mai bi. Ɨima ie aɨna jai ua isoi, Toɨca Llauda isoidɨmɨe ie comɨnɨna jai ote. Ie aɨ isoidɨmacɨ. Llauda isoidɨmɨe jai oga comɨnɨ illanona omo acataitɨcue. 
\p  
\v 10 Nɨcaɨrilla isoi, Jusiñamui Joreño cue joreñona eo a ite aillue anedumo uite. Nainomona, Jusiñamuimona, monamona Jerusalén billana cɨodɨcue. Jusiñamui iena jira, eo mare.  
\v 11 Nainomo Jusiñamui illa jira, naie illano eo quenirede. Eo mare raifide nofɨcɨ isoi quenirede. Jaspe railla nofɨcɨna eruaɨlla jira, enefebecodo cɨode.  
\v 12 Ie llaɨgafo eo a ite. Eo jedacɨede. Doce nasiaɨ ite. Naga nasemo daje jaɨenicɨ ite. Israel mɨcorɨ uruiaɨ mamecɨaɨ naie nasiaɨmo cuega. Doce uruiaɨ illa jira, naga naserie daje mamecɨ cuega.  
\v 13 Jitoma bicabillano dɨne eruaɨde llaɨgafomo daje amani nase ite. Jitoma jaicabillano dɨne eruaɨde llaɨgafomo daje amani nase ite. Naga beicɨ dɨne eruaɨde llaɨgafomo daje amani nase ite.  
\v 14 Naie llaɨgafo anamo doce nofɨcɨ ite. Nainomo Toɨca Llauda isoidɨmɨe ie doce llofueoicaigano mamecɨaɨ cuega. 
\p  
\v 15 Cue dɨga ñaɨte jaɨenicɨmo oromona ra facara ite. Naie naɨraɨ facallena ite. Ie nase, ie llaɨgafo dɨga, facallena ite.  
\v 16 Naie naɨraɨna naɨmɨe facajamona, nagafebei daje isoi illana uiñotɨcue. Dos mil doscientos kilómetros nagafebei are ite. Dos mil doscientos kilómetros nagafebei a ite.  
\v 17 Ie llaɨgafona jɨaɨ facade. Sesenta y cuatro metros a ite. Comɨnɨ facaja isoi, jaɨenicɨ iena facade. 
\p  
\v 18 Ie llaɨgafo jaspe railla nofɨcɨmona fɨnoca. Bie naɨraɨ dɨfai oromona fɨnoca. Enefebecodo cɨode.  
\v 19 Dɨga eo quenirede nofɨcɨna eruaɨde ra llaɨgafomo ite nofɨcɨmo jai nitade. Nano jaspe. Enefebecodo cɨode. Iemei zafiro. Mocorede. Jɨaɨe ágata. Mocorede. Jɨaɨe esmeralda. Mocorede.  
\v 20 Jɨaɨe ónice. Jiaɨrede userede dɨga faɨga. Jɨaɨe cornalina. Jiaɨrede. Jɨaɨe crisólito. Orona eruaɨde. Jɨaɨe berilo. Mocorede. Jɨaɨe topacio. Borarede. Jɨaɨe crisoprasa. Mocorede. Jɨaɨe jacinto. Jiduirede. Jɨaɨe amatista. Jiduirede. Naie llaɨgafo anamo ite nofɨcɨaɨ doce dɨga ite.  
\v 21 Ie doce nasiaɨdɨ perlas. Userede. Naga nase daje perlamona fɨnoca. Bie naɨraɨ naɨsuaɨdɨ dɨfai oro. Enefebecodo cɨode. 
\p  
\v 22 Bie illanomo Jusiñamuina sedajanona cɨoiñedɨcue. Nana bie illanodɨ naimɨe sedajano. Caɨ Nama Jusiñamui, Toɨca Llauda isoidɨmɨe dɨga, nainomo illa jira, iaɨmaiaɨ uicomo sedaitɨcaɨ.  
\v 23 Jusiñamui siñona jira, nainomo comɨnɨ jitomana jitaiñeitɨmacɨ. Fɨvuina jitaiñeitɨmacɨ. Jusiñamui, Llauda isoidɨmɨe dɨga, iena llɨgaiñoite.  
\v 24 Nana comɨnɨ iaɨmaiaɨna nabaicana jaitɨmacɨ. Nana illaɨcomɨnɨ iaɨmaiaɨ dɨne billanona, iaɨmaiaɨmo iobillacɨno jaca fecaitɨmacɨ.  
\v 25 Bie naɨraɨ nasiaɨ jaca ɨbaiñeite. Nainomo naɨonadɨ jaca iñeite.  
\v 26 Iaɨmaiaɨmo iobillacɨnona fecallena, nana comɨnɨ nainomo biitɨmacɨ.  
\v 27 Nainomo jeacɨno jaca iñeite. Jearede rafue fɨnodɨno nainomo biñeitɨmacɨ. Taɨnona lloraɨnɨ biñeitɨmacɨ. Danɨ Llauda isoidɨmɨemo ite rabenicomo cuega mamecɨaɨ itɨnodɨ nainomo biitɨmacɨ. Bie rabenicomo Jusiñamui illanomo jaca iitɨno mamecɨaɨ jai cuega. 
\c 22  
\p  
\v 1 Naie facaise jaɨenicɨ cuena daje ille acatate. Nainomo ite jɨnui jiruamona comɨnɨna jaca itataite. Uifɨnide. Jusiñamui, Llauda isoidɨmɨe dɨga, illanomona tote.  
\v 2 Nanoca naɨso motodo tote. Nagafebelle dɨne jaca itataite amenaɨaɨ ite. Naga fɨvui llɨsillamona, naga fɨvui llɨsilla ite. Ie ibiaɨ illamona, comɨnɨ caɨmare marena itɨmacɨ.  
\v 3 Jeacɨno nainomo iñena jira, Jusiñamui jaca buna duere fɨnoñeite. Jusiñamui, Llauda isoidɨmɨe dɨga illamona, naimɨe comɨnɨ naimɨena jaca sedaitɨmacɨ.  
\v 4 Naimɨena marefodo cɨoitɨmacɨ. Naimɨemo naimacɨ duillamona, naimacɨ uiecuaɨ itofiaɨmo naimɨe mamecɨ cueite.  
\v 5 Nainomo naɨonadɨ iñeite. Lamparína jitaiñeitɨmacɨ. Jitomana jitaiñeitɨmacɨ. Caɨ Nama Jusiñamui naimacɨna llɨgaiñoite. Illaɨcomɨnɨ isoi jaca iitɨmacɨ. 
\s1 Juan Jesucristo billɨrui iaɨrei illana cacade 
\p  
\v 6 Jaɨenicɨ cuemo llote: 
\p —Bie lluacɨnodɨ uanaicɨno. Naimɨe facaina lloraɨnɨmo ie rafuena llollena, ie uaina itatate. Naimɨena ɨɨnotɨnona ɨco suille rafuena ja uiñotaiacade.  
\v 7 “Raɨre biitɨcue” Cristo llote. 
\p Bie rabenicomo ite ɨco suille rafuena ɨɨnotɨnodɨ caɨmare iitɨmacɨ. 
\p  
\v 8 Juandɨcue. Bie rafuena cacadɨcue. Iena cɨodɨcue. Iena cue cacaja mei, iena cue cɨua mei, iena cuemo acataga jaɨenicɨ uicomo ana bɨtadatɨcue. Naimɨena sedaacadɨcue;  
\v 9 iadedɨ cuemo llote: 
\p —Dama ite. Cuena sedañeno. O dɨga, naimɨe facaina lloraɨnɨ isoi, bie rabenicomo ite llogacɨnona ɨɨnotɨno isoi, naimɨe dɨbeimo jɨaɨ maɨjɨdɨcue. Dama Jusiñamuina seda.  
\v 10 Bie rafue suillɨrui iaɨrei illa jira, iena jino llono. Iena uiñota.  
\v 11 Bie rafuena bu ɨɨnoñenia, naimɨe jitailla jira, maraiñede rafue naimɨe fɨnoacania, iena nia fɨnoite. Jearede rafue bu fɨnoacania, iena nia fɨnoite; ia bie rafuena naimɨe ɨɨnoia, naimɨe jitailla jira, mare rafue naimɨe fɨnoacania, mare rafuena fɨnocana jailla. Jusiñamui jitaillacɨnona bu fɨnoacania, naimɨe jitaillacɨnona nia fɨnocana jailla. 
\p  
\v 12 Jesucristo cuemo llote: 
\p —Ero, raɨre biitɨcue. Naimɨe fɨnoca rafue dɨese nagamɨemo ɨbana fecaitɨcue.  
\v 13 Jaca bue nia iñenia, jaie jaca itɨcue. Nana rana fɨnodɨcue. Nana ra cue uaido icana jaide. Nana rana fuilla mei, jaca iitɨcue. Jaca siño jitodɨcue.  
\v 14 Naimacɨ ɨniroina naimacɨ jocoia, caɨmare iitɨmacɨ. Naimacɨ comecɨna ñaɨtɨcue. Ie jeacɨnona oni dotacamɨe jaca itataite amena llɨsillamona lliite. Cue comɨnɨna naimɨe illamona, Jusiñamui illanomo ie nasedo jaicabite;  
\v 15 ia naimacɨna jeacɨnona naimacɨ faɨnonocaiñenia, Jusiñamui illanomo maraiñede rafuena fɨnocabidɨno, aima dɨne jaicabidɨno, aɨñede rɨño dɨga icabitɨno, ɨniñede ɨima dɨga icabitɨno, comɨnɨna meinetɨno, jiraraɨna sedacabidɨno, tainona llocabitɨno duiñeitɨmacɨ.  
\v 16 Creyentiaɨna bie rafuena uiñotallena, cue jaɨenicɨ o dɨne jai oretatɨcue. David mɨcorɨ ie jitodɨcue. Monairaɨcudu bairia isoi, Jusiñamui jitaillacɨnona cue fɨnollena, baireitɨcue —llote. 
\p  
\v 17 Bie facaise Jusiñamui Joreñodɨ, Cristo jai oga aɨ railla comɨnɨ dɨga, naimɨena nia ɨɨnoñedɨnona uaidote: 
\p —Bie rafuena mai cacarei. Iena mai ɨɨno. Iena bu ɨɨnoia, jɨaɨmɨemo iena lluai: Iena mai cacarei. Iena mai ɨɨno. 
\p Jiroacadɨmɨemo llotɨcue: 
\p —Mai jiruaɨbi. Bie jɨnua raifiñede. Biena o jiroacania, jaca iitɨo. Iese llotɨcue; ia ie comecɨna ñaɨtɨcue. Bie rafue ɨɨnuana ñaɨtɨcue.  
\v 18 Bie ɨco suille rafue ite rabenicona bu facajia, naimɨemo rafuena lloiacadɨcue. Bie rafue baɨfemo bu lloia, bie rafuena bu meidoia, bie rabenicomo ite duere fɨnuacɨno isoi, Jusiñamui naimɨena duere fɨnoite.  
\v 19 Bie rafuena bu jamaia, Jusiñamui naimɨena duere fɨnoite. Jaca illena Jusiñamui ie mamecɨna ie rabenicona jaca cueñeite. Comue Jerusalémo jaca duiñeite. Naiena jai llotɨcue. 
\p  
\v 20 Cristo raite: 
\p —Bie rafue jaca suite. Ua raɨre biitɨcue. 
\p Iena raɨre suillena jɨaɨ jitaidɨcue. Caɨ Nama Jesús raɨre billena eo jitaidɨcue.  
\v 21 Naimɨe duenaillacɨnona nana Jesucristona ɨɨnotɨno uiñocana jaillana jitaidɨcue. Macaɨbaite. Juandɨcue.