\id 2TI - Huitoto Murui NT -Peru 2008 (DBL -2013) 
\h 2 TIMOTEO 
\toc1 Timoteomo Pablo Ie Emodomo Oretaga Rabe 
\toc2 Segunda Carta a Timoteo 
\toc3 2 Ti 
\mt1 TIMOTEOMO PABLO IE EMODOMO ORETAGA RABE 
\c 1  
\s1 Uaiduacɨno 
\p  
\v 1-2 Timoteo, carta omo dane cuetɨcue. ¿Nɨgacɨno? ¿Nɨe isoidɨo? Pablodɨcue. Jusiñamui cuena jitailla jira, Cristo Jesús oretagamɨedɨcue. Comɨnɨmo jaca itatajacɨnona llollena, cuena oretate. Cristo Jesús caɨ ɨɨnuamona, naimɨe dɨga jaca iitɨcaɨ. Cue isiruiga jito isoidɨo. Caɨ Moo Jusiñamui, caɨ Nama Jesucristo dɨga, ona jai duenaite. Iena uiñocana mai o jai. Ona jai uri itatatɨiaɨmaiaɨ. Iena uiñocana mai o jai. 
\s1 Jusiñamuimo iobillacɨnona fecade 
\p  
\v 3 Mare cue comecɨmona cue usumatɨaɨ mɨcorɨaɨ isoi, Jusiñamuina sedadɨcue. Timoteo, nagarui Jusiñamuimo cue jɨɨia, o facaisena iobillacɨnona fecadɨcue.  
\v 4 Cue comecɨ caɨmareficaillena, ona eo cɨoacadɨcue. Navui cue o facadoia, o eiana comecɨtɨcue.  
\v 5 Cristo Jesús o ɨɨnuana dane jɨaɨ comecɨtɨcue. O usuño Loidadɨ ɨɨnote. O ei Eunicedɨ jɨaɨ ɨɨnote. Ie mei ɨɨnotɨo. Naimɨena o ɨɨnuana jai uiñotɨcue. 
\p  
\v 6 Ie jira o comecɨna dane ocuiño, Jusiñamui uai o llofuellena. Cue onollɨ o ɨfogɨmo navui jonetɨcue, ona fetollena, naimɨe uaina o llollena. Jusiñamuimona o baitajacɨnona naie facaiseconi feiñotɨo.  
\v 7 Jusiñamuidɨ comɨnɨna o jacɨruillana jitaiñede. Caɨ comecɨaɨna ocuiñotajanona, caɨna jɨaɨe comɨnɨna isiruitallena, caɨ comecɨaɨna eenotallena, ie Joreño caɨmo fecade.  
\v 8 Ie jira caɨ Nama rafuena o lluana meiruiñeno. Cárcelmo cue illa jira, cuena jɨaɨ meiruiñeno. Cristo Jesús rafue muidona duere sefuidɨcue. Naie rafue muidona duere o jɨaɨ sefuia, rairuioicaiñeno i. Jusiñamui o comecɨna ocuiñotaite.  
\v 9 Naimɨe isoi caɨ marena illena, caɨna fetuano, jeacɨnomona caɨna jillotate. Caɨ fɨnoca rafue muidona caɨna jillotañede; iadedɨ naimɨe jitailla jira, caɨna jillotate. Enɨrue nia fɨnoñena facaiseconi caɨna jaie duenaite. Cristo Jesús caɨna iena jai uiñotade.  
\v 10 Caɨ Jilloitaraɨmadɨ Cristo Jesús. Caɨmo Jesús jai bairia jira, Jusiñamui caɨna duenaillana jai uiñotɨcaɨ. Fiodaillamona naimɨe jai jillode. Iemona jɨaɨ jilloitɨcaɨ. Naimɨe mare rafuemona naimɨe caɨna Jusiñamui dɨbeimo jaca illacɨnona jai uiñotade.  
\v 11 Bie rafuena llollena, cuena fetode. Cuena oretaja jira, biena llofuetɨcue.  
\v 12 Ie jira duere sefuidɨcue; iadedɨ cue illana meiruiñedɨcue. Cue ɨɨnogamɨena cue uiñua jira, naimɨe bille dɨnori naimɨedɨ nana cuemo naimɨe jai iga rafuena cue llofuellena, cuena raise eenoite.  
\v 13 Cue llua isoi o i. Uanaicɨnona llotɨcue. Cristo Jesús ɨɨnocana o jai. Jɨaɨe comɨnɨna isiruicana o jai, Cristo Jesúmo o jaɨnaɨaɨlla jira.  
\v 14 Jusiñamui Joreño caɨmo illa jira, omo naimɨe lloga uanaicɨnona faɨnonocaiñeno uiuicai. Uanaicɨnona o faɨnonocaiñellena, naimɨe ona canoite. 
\p  
\v 15 Dɨga Asiamo ite comɨnɨdɨ cuena faɨnonocaidɨmacɨ. Naimacɨmona Figelo cuena faɨnonocaide. Hermógenes cuena jɨaɨ faɨnonocaide.  
\v 16 Onesíforo daje isoiñede. Dɨga icaiño naimɨe cue comecɨna ocuiñotade. Cuena meiruiñede. Caɨ Namadɨ Onesíforo jofomo itɨno duenaillasa.  
\v 17 Romamo Onesíforo navui ria, cuena isire jenuano, cuena baite.  
\v 18 Efesomo jaie cue ia, naimɨe cuena jɨaɨ canode. Iena raise uiñotɨo. Caɨ Nama ɨco abɨdo bia, caɨ Namamona naimɨe ɨba feiñuana jitaidɨcue. 
\c 2  
\s1 O maɨjɨa rafuena raise fuido 
\p  
\v 1 Cuena faɨnonocaidɨno isoi iñeno; iadedɨ cue jito, Cristo Jesús ona canuano, Cristo dɨbeimo o comecɨna ocuiñocana jai.  
\v 2 Dɨga comɨnɨmo cue lluana navui cacadɨo. O uaina ɨɨnotɨnomo cue lluana llono, iena jɨaɨe comɨnɨna naimacɨ llofuellena.  
\v 3 Cristo Jesús rafue muidona duere o sefuia, rairuioicaiñeno i. Caɨ Nama rafuena o rɨiduamona, naimɨe soldado isoidɨo.  
\v 4 Ie illaɨma uai naimɨe ɨɨnoiacania, soldadodɨ soldadoñede rafuena maɨjɨacaiñena. Ie illaɨma iobitallena, ie illaɨma ocuica rafuena fɨnoacanite. Ie isoide. Da Cristo Jesús rafuena o fɨno, naimɨena iobitallena.  
\v 5 Reglamientos llua isoi naimɨe raise jɨfanoñenia, jɨfanoraɨmadɨ bue isoide rana cɨoiñede. Ie isoide. Ɨbana o feiñollena monamo o jaɨa, Cristo Jesús lluado raise o jai.  
\v 6 Illɨmo duere maɨjɨraɨmadɨ maɨjɨa jira, naiemona naie guilledɨ oga. Ie isoide. Duere o maɨjɨ, ɨbana feiñollena.  
\v 7 Cue lluamo o comecɨna facacabi. Caɨ Nama ona canoite, iena uiñollena. 
\p  
\v 8 Jesucristo fiodaillamona jillode. Iena comecɨ. Naimɨe usumadɨ David mɨcorɨ. Jesucristona cue llua jira,  
\v 9 maraiñedɨmɨe isoi cárcolmo duere jai sefuidɨcue; iadedɨ Jesucristo rafue nia llocana jaide.  
\v 10 Ie jira Jusiñamui fetocano facaina duere sefuidɨcue, Cristo Jesúna naimacɨ ɨɨnuamona naimacɨ jilloillena, monamo naimacɨ jaca illena.  
\v 11 Bie lluacɨnodɨ uanaicɨno: 
\q1 Naimɨe dɨbeimo caɨ jaillamona, naimɨe dɨga jaca iitɨcaɨ. 
\q1  
\v 12 Naimɨe muidona caɨ duere sefuia, naimɨe dɨga iitɨcaɨ, ie comɨnɨna naimɨe sedalle facaiseconi. 
\q1 Naimɨena caɨ janoia, naimɨe caɨna jɨaɨ janoite. 
\q1  
\v 13 Naimɨe raise caɨ ɨɨnoñenia, naimɨe uai meidoñena muidona, naimɨedɨ nia ɨɨnogamɨe. 
\s1 Timoteo illa rafue 
\p  
\v 14 O comɨnɨmo biena dane llono, iena comecɨllena. Jusiñamui facaina naimacɨmo llono: Uaina jamai uaitañeno, mare rafuena naicɨnomona comuiñena jira, naicɨnona cacadɨno comecɨaɨna maretañena jira.  
\v 15 Marena maɨjɨ, Jusiñamui ori iobillena. O meiruiñellena, naimɨe o maɨjɨa jɨbuia, marena maɨjɨ. Uanaicɨno o uiñuamona, naimɨe uaina marena raise llofue.  
\v 16 Jamai ñaɨana cacarefiñeno. Comɨnɨ jamai ñaɨnoicaia, Jusiñamui jitailla rafuena fɨnocana jaiñedɨmacɨ.  
\v 17 Dɨga rafue naiemona comuide. Mocollonaitate duico caɨ abɨmo illa isoi, naie rafue llocana jaide. Himeneo naie rafuedo jaide. Fileto dajedo jɨaɨ jaide.  
\v 18 Uanaicɨnona faɨnonocaidɨaɨmaiaɨ. Coco ɨɨnua isoi, llofueñedɨiaɨmaiaɨ. “Caɨ fiodaia, caɨ abɨ ɨco jilloñeite” llofuetɨiaɨmaiaɨ. “Cristona caɨ ɨɨnua facaise jai jillodɨcaɨ. Caɨ fiodaia, caɨ joreño jaca iite” llofuetɨiaɨmaiaɨ; iadedɨ caɨ abɨ ɨco jillollena ɨɨnoñedɨiaɨmaiaɨ.  
\v 19 Ie ia Jusiñamui comɨnɨ jaca ɨɨnocana jaidɨmacɨ. Ie comɨnɨmo Moisés mɨcorɨ jaie lluamona, iaɨmaiaɨ fɨnoca rafuena jɨaɨ ñaɨte: “Jusiñamuidɨ ie comɨnɨna uiñote. ‘Jusiñamuina ɨɨnotɨcue’ raitɨmɨedɨ maraiñede rafuemona eneno illasa” llote. Ie jira iaɨmaiaɨmona eneno o i. 
\p  
\v 20 Ero, ucuberedɨmɨe jofomo dɨga guillɨrue joneuilla ra jai ite. Eo jitairede rana jai ite. Janore jitairede rana jɨaɨ jai ite.  
\v 21 Ie isoide. Jusiñamui dɨbeimo itɨnomona naga isoide comɨnɨ ite; iadedɨ jeacɨnomona eneno bu ia, Jusiñamui naimɨena fetoite, ie eo jitaille rafuena fɨnollena. Jusiñamui dɨbeimo raise maɨjɨite.  
\v 22 Ie jira coniruenɨ comecɨaɨ jitailla maraiñede rafuemona eneno o i. Marena i, Jusiñamui jitailla isoi. Jesucristona ɨɨnocana jai. Nana comɨnɨna isirui. Uri i. Mare comecɨaɨmona nana caɨ Namana sedadɨno dɨga iese i.  
\v 23 Jamai ebena rafuemo iñeno. Naiemona icɨrillacɨnodɨ comuide. Iena uiñotɨo.  
\v 24 Jusiñamui facaina llofueraɨmadɨ raɨre icɨriñena. Nana comɨnɨna nabairilla. Marena fecuise llofuega. Rɨicaiñena.  
\v 25 Naimɨe uaina jitaiñedɨnona fecuise llofuega. Ie mei Jusiñamui naimacɨ comecɨaɨ iuaina nɨbaɨ meidotaite, uanaicɨno dɨbeina uiñollena.  
\v 26 Ie mei abɨ uiñuanona, Taɨfe anamona jilloitɨmacɨ. Taɨfedɨ naimacɨna ie anamo jai itatate. 
\c 3  
\s1 Jusiñamui dɨbeimo iñedɨnomona abɨna rairui 
\p  
\v 1 Bie lluacɨnomo comecɨna raise faca. Jesucristo abɨdo bille facaise iaɨrei ia, creyentena illena eo sefuirenite.  
\v 2 Naie facaiseconi comɨnɨ danɨ imacɨ abɨna isiruitɨmacɨ. Ucubena ollena eo nɨcɨdoitɨmacɨ. Abɨna ɨedoitɨmacɨ. Abɨna birɨitɨmacɨ. Jusiñamuina eo jeare ñaɨtɨmacɨ. Naimacɨ moo uaina, naimacɨ ei uaina ɨɨnoñeitɨmacɨ. Jɨaɨe comɨnɨmo iobillacɨnona jaca fecañeitɨmacɨ. Jusiñamuina jaca jitaiñeitɨmacɨ.  
\v 3 Jɨaɨe comɨnɨna duenaiñeitɨmacɨ. Comecɨaɨna jaɨaɨrenitɨmacɨ. Jɨaɨe comɨnɨ joreñona eo jeare ñaɨtɨmacɨ. Naimacɨ comecɨaɨna eenoñeitɨmacɨ. Ebe isoi naga rana duere fɨnoitɨmacɨ. Mare rafuena jitaiñeitɨmacɨ.  
\v 4 Naimacɨ nabaiñɨaɨna janoñeitɨmacɨ. Jɨaɨe comɨnɨmo comecɨaɨna facañeitɨmacɨ. Eo abɨna ɨedoitɨmacɨ. Naimacɨ comecɨaɨ jitailla rafuena fɨnoacanitɨmacɨ. Jusiñamui rafuena isiruiñeitɨmacɨ.  
\v 5 “Jusiñamuina sedadɨcaɨ” raitɨmacɨ; iadedɨ Jusiñamui uaina jamaitɨmacɨ. Bie isoide comɨnɨ dɨga nabairiñeno.  
\v 6 Naimacɨmona dajerie jɨaɨe jofuemo macaritɨmacɨ, naie jofuemo ite rɨñonɨaɨna jɨfuianona llofuellena. Dɨga jearede rafuena fɨnuano, naie rɨñonɨaɨ ebena itɨmacɨ. Naimacɨ comecɨaɨ iuaillaɨ raɨre meidocana uitɨmacɨ.  
\v 7 Naga lloraɨma lluamo naiñaiñuaɨ cacareidɨmacɨ; iadedɨ uanaicɨnona jaca uiñoñedɨmacɨ.  
\v 8 Naimacɨ comecɨaɨ eo maraiñede. Jusiñamui uaina ɨɨnoñedɨmacɨ. Jannes, Mambres dɨga, Moisés mɨcorɨ lloga uai jaie uaitatɨiaɨmaiaɨ. Ie isoi bie comɨnɨ uanaicɨnona birui jɨaɨ jitaiñedɨmacɨ.  
\v 9 Nana comɨnɨ naimacɨ rafue jamai ebe isoi fɨnoca rafue uiñuamona, Jannes iaɨmaiaɨ Mambres rafue jaie fuilla isoi, naimacɨ rafue raɨre fuite. 
\s1 Timoteo uanaicɨnona ɨɨnuanona jailla 
\p  
\v 10 Timoteo, cuena uiñotɨo. Cue llofuiana uiñotɨo. Cue illana uiñotɨo. Cue jitailla rafuena uiñotɨo. Cristona cue ɨɨnuana uiñotɨo. Icɨriñeno fecuise llotɨcue. Comɨnɨna isiruitɨcue. Duere cue sefuia, cue comecɨna ocuiñotɨcue. Iena uiñotɨo.  
\v 11 Antioquíamo, Iconiomo, Listramo cuena duere fɨnodɨmacɨ. Duere sefuidɨcue; iadedɨ nana naiemona cue Nama cuena jillobitade.  
\v 12 Jusiñamui jitailla rafuena fɨnuano, Cristo Jesús uaido jaidɨnodɨ duere sefuitɨmacɨ.  
\v 13 Ie facaiseconi maraiñedɨnodɨ maraiñede rafuena fɨnocana jaitɨmacɨ. Jɨfueraɨnɨ daje isoi jɨfuericana jaitɨmacɨ. Naimacɨdɨ abɨdo naimacɨna jɨaɨ jɨfueitɨmacɨ. Iese jaitɨmacɨ;  
\v 14 iadedɨ cue llofuia uaido ɨɨnocana odɨ jai. Cuemona jai fueotɨo. O usuñomona jai fueotɨo. O eimona jai fueotɨo. Ie jira uanaicɨnona jaie ɨɨnotɨo.  
\v 15 O uruenamona Jusiñamuina mare cuegafuiaɨna cacadɨo. Naie cuegafuiaɨ caɨ jilluana caɨmo llote. Cristo Jesúna caɨ ɨɨnuamona, jillobidɨcaɨ. Iena caɨmo jai llote.  
\v 16 Comɨnɨ nana naie cuegafuiaɨna cuetɨmacɨ; iadedɨ Jusiñamui jitailla isoi, naga cuetɨmɨe cuete. Ie jira nana naie cuegafuiaɨ Jusiñamuimona ite. Comɨnɨmona iñede. Ie jira naie cuegafuiaɨmona uanaicɨnona uiñotɨcaɨ. Caɨ maraiñedɨcɨnona caɨmo llote. Caɨ comecɨaɨ marena illena, Jusiñamui jitailla isoi, caɨmo llote.  
\v 17 Iese llote, naimɨemo caɨ duillamona, nana Jusiñamui rafuena caɨ raise uiñollena. Raise uiñuamona, Jusiñamui rafuena raise llofuerenitɨcaɨ. Naga Jusiñamui jitailla rafuena jɨaɨ raise fɨnorenitɨcaɨ. 
\c 4  
\p  
\v 1 Jɨaɨruido Cristo Jesúdɨ illaɨmana enɨruemo abɨdo biite. Illaɨma isoi ie comɨnɨna sedajite. Naimɨena ɨɨnoñenamona nia cajedɨnona duere fɨnoite. Jai fiodaitɨnona jillotajanona, naimɨena ɨɨnoñenamona, naimacɨna duere fɨnoite. Jusiñamuidɨ birui caɨna jaca cɨode. Cristo Jesús birui caɨna jaca cɨode. Iena cue uiñuamona, bie uai omo lloitɨcue.  
\v 2 Naimɨena ɨɨnoñedɨnona Cristo duere fɨnoñellena, naimɨe rafuena naimacɨmo jaca llono. Comɨnɨ o dafaɨfia, comɨnɨ ofia, comɨnɨ o dɨne ria, naimacɨmo iena lloitɨosa. Naimacɨ jitaia, llono. Jitaiñenia, jɨaɨ llono. Jeacɨnona bu fɨnoia, naimacɨmo llono. Marena naimacɨ illena, naimacɨmo llono. Fecuise jaca llofue.  
\v 3 Jɨaɨruido dajerie uanaicɨnona jitaiñeitɨmacɨ. Jɨaɨfuena jitaitɨmacɨ. Naimacɨmo danɨ naimacɨ cacaacana rafuena llollena, dɨga llofueraɨnɨna jenoitɨmacɨ.  
\v 4 Uanaicɨnona faɨnonocaida, ɨɨgaɨaɨ icɨnuaɨdo facajitɨmacɨ.  
\v 5 Timoteo, o comecɨna eeno. Duere o sefuia, rairuioicaiñeno i. Jesucristo rafuena llocana o jai. O llofuiacɨnona marena fuido. 
\p  
\v 6 Jai iaɨrei ite cue meinellɨrui.  
\v 7 Caɨ Nama rafuena llocana cue jaillano, iena marena jai rɨidotɨcue. Cue illa dɨnori jai fuiacade. Caɨ Namana faɨnonocaiñedɨcue.  
\v 8 Caɨ Namamona marena cue illa jira, monamo ɨbana feiñoitɨcue. Iemo jai ocuiridɨcue. Iena caɨ Nama cuejena eenote. Naimɨe abɨdo billɨruimo iena feiñoitɨcue. Caɨna raise uiñuamona, dama cuemo fecañeite; iadedɨ nana naimɨe abɨdo billena jitaidɨnomo ɨbana jɨaɨ fecaite. 
\s1 Pablo damɨeriena ñaɨa rafue 
\p  
\v 9 Timoteo, raɨre cue dɨne bi.  
\v 10 Binɨemo ite rafuena Demasdɨ eo ebiruilla jira, Tesalónicamo naimɨe jaillano, cuena faɨnonocaide. Galaciamo Crescentedɨ jai jaide. Dalmaciamo Tito jai jaide.  
\v 11 Dama Lucas cue dɨga ite. Marcos o dɨga atɨ. Cuena canollena, naimɨena jitaidɨcue.  
\v 12 Efesomo Tíquicona oredɨcue.  
\v 13 O bia, cue fɨebide ɨniroina atɨ. Troasmo Carpio jofomo fɨebide. Cue libros atɨ, cue rabiaɨ dɨga.  
\v 14 Alejandro raillamɨe navui cuena jeare fɨnode. Naimɨedɨ lloeomona rana fɨnoraɨma. Caɨ Nama naimɨemo ɨba oite.  
\v 15 Naimɨemona o abɨ rairui. Naimɨe cue lluana eo jitaiñede. Iena uaitate.  
\v 16 Illaɨcomɨnɨ dɨne cue rafue nano cue rɨidoia, jaca buna cue facaina rɨidoñede. Nana cuena faɨnonocaidɨmacɨ. Jusiñamuidɨ naimacɨmo ɨba uana jitaiñedɨcue.  
\v 17 Caɨ Nama cue facaina ite. Cue comecɨna ocuiñotade, nana judíuaɨñedɨnomo naimɨe uai raise cue llollena. Naimɨe muidona cue fiodaisaillanomona jillobidɨcue.  
\v 18 Caɨ Nama naga maraiñede rafuemona cuena eenoite, monamo ie comɨnɨna sedajanomo cue raise rillena. Iobillacɨno naimɨemo jaca fecacabillasa. Iena jitaidɨcue. 
\s1 Fuiduacɨno 
\p  
\v 19 Dɨga comɨnɨmo cue uai oredɨcue: Priscamo, Aquilamo, Onesíforo jofomo itɨnomo.  
\v 20 Corintomo Erasto fɨebide. Miletomo Trófimo duide faɨnonocaidɨcue.  
\v 21 Rollime nia iñenia, cue dɨne bi. Dɨga comɨnɨ omo naimacɨ uai oredɨmacɨ: Eubulo, Pudente, Lino, Claudia, ua nana creyentiaɨ. 
\p  
\v 22 Caɨ Nama o comecɨ ocuiñotajasa. Naimɨe nana omoɨna duenaillasa. Mai. Pablodɨcue.