\id 1TI - Huitoto Murui NT -Peru 2008 (DBL -2013) 
\h 1 TIMOTEO 
\toc1 Timoteomo Pablo Nano Oretaga Rabe 
\toc2 Primera Carta a Timoteo 
\toc3 1 Ti 
\mt1 TIMOTEOMO PABLO NANO ORETAGA RABE 
\c 1  
\s1 Pablo Timoteona uaiduacɨno 
\p  
\v 1-2 Timoteo, bie carta omo cuetɨcue. ¿Nɨgacɨno? ¿Nɨe isoidɨo? Pablodɨcue. Cristo Jesús oretagamɨedɨcue. Ie rafue llollena, naimɨe cuena orede Naimɨena cue cɨoillena, naimɨe isoi cue illena, naimɨe abɨdo billemo ocuiridɨcue. Jusiñamui cuena jɨaɨ orede. Naimɨedɨ caɨ Jilloitaraɨma. Cue llofuiacɨnomona Cristona o raise ɨɨnua jira, cue jito isoi cue mamecao. Caɨ Moo Jusiñamui, caɨ Nama Jesucristo dɨga, ona jai duenaite. Iena uiñocana mai o jai. Ona jai uri itatatɨiaɨmaiaɨ. Iena uiñocana mai o jai. 
\s1 Cristo rafuena taɨnona llofueraɨnɨ llofuiacɨnodo jaiñeno 
\p  
\v 3-4 Macedoniamo jaie jaidɨcuemo, Efesomo o fɨebicaillena omo llotɨcue. Nainomo dajerie Cristo rafuena raise llofueñedɨmacɨ; iadedɨ jɨaɨforie llofuetɨmacɨ. Dɨga ɨɨgaɨaɨna faca-facadɨmacɨ. Imacɨ usumatɨaɨ mamecɨdo siadocabitɨmacɨ. Iemona coninɨ uaina uaitasɨde. Jusiñamui jitailla isoi comɨnɨ marena illana llofueñedɨmacɨ. Jusiñamuina caɨ ɨɨnuamona, marena itɨcaɨ. Iena llofueñedɨmacɨ. Ie jira naimacɨ uaina llɨɨcaita.  
\v 5 Jusiñamuina comɨnɨ isiruillena, jɨaɨe comɨnɨna jɨaɨ naimacɨ isiruillena, Jusiñamui uaina llofuetɨcaɨ. Naimacɨ comecɨaɨ jeaninana jitaidɨcaɨ. Jusiñamuina raise naimacɨ ɨɨnuana jɨaɨ jitaidɨcaɨ. Ie jira Jusiñamui rafuena llofuecabitɨcaɨ.  
\v 6 Dajerie llofueraɨnɨ iese llofueñedɨmacɨ; iadedɨ jamai ñaɨtɨmacɨ.  
\v 7 Moisés mɨcorɨ jaie llogacɨnuaɨdo llofueiacadɨmacɨ; iadedɨ iena llofuiana uiñoñedɨmacɨ. Naie llogacɨnuaɨna ua uiñoñedɨmacɨ. 
\p  
\v 8 Iena raise llofuegana, Jusiñamuina uiñoñedɨnona naimɨena uiñotallena, mare. Iena uiñotɨcaɨ.  
\v 9-10 Moisés mɨcorɨ llogacɨnuaɨdɨ mareuidɨnomo jaɨnaɨaɨñede. Jɨaɨnomo jaɨnaɨaɨde: Jusiñamui uaina ɨɨnoñedɨnomo lloga uaina ɨɨnoraɨnidɨnomo, Jusiñamuina jitaiñedɨnomo, jeacɨno fɨnoraɨnɨmo, jeare ñaɨcabitɨnomo, Jusiñamuina enoidɨnomo, eina meinetɨnomo, moona meinetɨnomo, jɨaɨe comɨnɨna meinetɨnomo, aɨñede rɨño dɨga itɨnomo, ɨniñede ɨima dɨga itɨñaiñuaɨmo, daje isoide ɨima dɨga coninɨ aɨfuedotɨnomo, comena fɨɨdɨnomo, taɨno lloraɨnɨmo, taɨno lluana jɨfueridɨnomo, uanai rafue facaisena iñedɨnomo. Nana Cristo rafue facaina iñedɨnomo Moisés mɨcorɨ llogacɨnuaɨ ua jaɨnaɨaɨde;  
\v 11 ia naie rafue cuemo jai jaɨnaɨaɨñede. Ie mare rafuena cue llollena, Jusiñamui cuena jai orede. Maremɨena Jusiñamui illamona, naimɨe rafue jɨaɨ eo ebirede. 
\s1 Jusiñamui caɨna duenailla jira, Pablodɨ iobide 
\p  
\v 12 Cuena fetua jira, caɨ Nama Cristo Jesúri iobidɨcue. Naimɨena cue ɨɨnollena, naimɨe cuena uiñuamona, cuena fetode, naimɨe rafue cue llollena. Iena llollena, cue comecɨna jɨaɨ ocuiñotade.  
\v 13 Jaie naimɨena jeare ñaɨtɨcue. Naimɨena ɨɨnotɨnona jɨaɨ duere fɨnodɨcue. Abɨna cue uiñoñena jira, naie facaiseconi naimɨena nia cue ɨɨnoñena jira cuena duenaillamona, naimɨe cuena fetode.  
\v 14 Cuena eo duenaite. Iemona naimɨena ɨɨnotɨcue. Naimɨena jɨaɨ isiruitɨcue. 
\p  
\v 15 Bie lluadɨ mare cue uiñuamona, nana comɨnɨ biena ɨɨnuana jitaidɨcue. Maraiñedɨnona naimacɨ jeacɨnomona jilloitallena, enɨruemo Jesucristo bite. Ero, nanoca jeacɨnona fɨnoraɨmadɨcue;  
\v 16 iadedɨ Jesucristo cuena duenaite. Naimɨena cue ɨɨnuamo jaie fecuise ocuiride. Nana jeacɨnona fɨnoraɨnɨmo fecuise ocuiride, naimɨena ɨɨnollena. Naimɨena caɨ ɨɨnuamona, Jusiñamui dɨga jaca iitɨcaɨ. Cuena duenailla jira, biruimona naimɨena ɨɨnoitɨnodɨ naimɨe naimacɨna duenaillana uiñoitɨmacɨ.  
\v 17 Jusiñamuidɨ nanocamɨe. Jaca fiodaiñeite. Naimɨena cɨonidɨcaɨ. Naimɨe damɨede. Jɨaɨena iñede. Naimɨena jaca iobicabillasa. Iena jitaidɨcue. 
\p  
\v 18 Ero, Timoteo, cue jito, omo rafue lloiacadɨcue. Nano o llofueraɨmana jaiacana facaise ailluena Cristo rafuena llofueraɨnɨdɨ ona jaie llotɨmacɨ: “Naimɨe raise marena llofueite” llotɨmacɨ. Iena comecɨanona, o comecɨ ocuiñocana o jai, Cristo rafuena rɨidocana o jaillena.  
\v 19 Cristona ɨɨnocana o jai. O comecɨna marena fɨnocana o jai. Dajerie naimacɨ comecɨaɨ iuaimo comecɨaɨna facañedɨmacɨ. Ie jira Cristona jai ɨɨnoñedɨmacɨ.  
\v 20 Iese ite Himeneo. Alejandro jɨaɨ jai daje isoide. Jai ɨɨnoñedɨaɨmaiaɨ. Ie mei iaɨmaiaɨna Taɨfe anamo jai itabicaitatɨcue, duere sefuillena. Iaɨmaiaɨ fueollena, Jusiñamuina jeare ñaɨñellena, iese itabicaitatɨcue. 
\c 2  
\s1 Nana comɨnɨ facaina jɨɨitɨcaɨ 
\p  
\v 1 Dɨga rafue omo lloitɨcue; iadedɨ daje rafue motomo ite. Nanoca rafue. Iena omo lloitɨcue. Jusiñamui dɨga omoɨ ñaɨa, nana comɨnɨ facaina jɨɨ. Naimacɨri iobillacɨnona Jusiñamuimo feca.  
\v 2 Uri caɨ illena, Jusiñamuina raise caɨ sedallena, Jusiñamui jitailla rafuena caɨ fɨnollena, illaɨcomɨnɨ facaina caɨ jɨɨ.  
\v 3 Iese caɨ jɨɨia, Jusiñamuimona mare. Naimɨedɨ caɨ Jilloitaraɨma.  
\v 4 Naimɨedɨ nana comɨnɨ naimacɨ jeacɨnomona jilluana jitaide. Uanaicɨnona naimacɨ uiñuana jɨaɨ jitaide.  
\v 5 Nana naɨraɨaɨ imacɨ Jusiñamuidɨ jaca dajede. Comɨnɨ dɨga Jusiñamui facaisena ñaɨraɨma jaca dajede. Naimɨedɨ Cristo Jesús. Comɨnɨ Jusiñamui facaisena naimɨe ñaɨcabite. Comɨnɨ facaisena ñaɨraɨma jaca dajede. Naimɨedɨ Cristo Jesús. Naimɨe ɨimananona, comɨnɨ facaisena ñaɨrede. Ie muidona comɨnɨ dɨga Jusiñamui jai nabairede. Jusiñamui dɨga comɨnɨ jɨaɨ jai nabairedɨmacɨ.  
\v 6 Caɨ jeacɨnomona caɨ eneno illena, Jesucristo nana caɨ facaina jai fiodaite. Naimɨe jitailla facaiseconi Jusiñamuidɨ comɨnɨna bie rafuena jai uiñotade.  
\v 7 Bie rafue cue llollena, Jusiñamui cuena fetode. Judíuaɨñedɨnomo cue llollena, bie rafue naimacɨ ɨɨnollena, uanaicɨnona naimacɨ uiñollena, cuena orede. Taɨnona lloñedɨcue. 
\p  
\v 8 Ie jira naga roracomo ite ɨiñɨaɨ, caɨ comɨnɨ onollɨaɨ a ñuitacabilla isoi, comecɨaɨmo jeacɨno iñenanomona, Jusiñamuimo jɨɨana jitaidɨcue. Naimacɨ comecɨaɨmo icɨrillacɨno iñedemo, Jusiñamuimo jɨɨ. Naimacɨ comecɨaɨmo uaitajacɨno iñedemo, Jusiñamuimo jɨɨ.  
\v 9-10 Rɨñonɨaɨmo jɨaɨ lloitɨcue. Roracomo omoɨ jaia, abɨ ɨeduamo comecɨaɨna facañenamona, omoɨ ɨfotɨena fɨno. Jamai ebinai raillano, abɨ ɨeduamona abɨna fɨnora jɨtañeno. Jamai ebinai raillano, abɨ ɨeduamona eo raifide ɨniroina jɨtañeno; iadedɨ mare rafuena omoɨ fɨnuamona, ebinaitomoɨ. “Jusiñamuina ɨɨnotɨcaɨ” omoɨ raillanona, naimɨe jitailla isoi, marena omoɨ fɨnolle.  
\v 11 Rollena comɨnɨ ofia, ñaɨñenanomona, uaitañenamona omoɨ fueo.  
\v 12 Omoɨ ofia, omoɨ ɨiñɨaɨna llofuiana jitaiñedɨcue. Nainomo omoɨ ñaɨñena. Ɨiñɨaɨ omoɨ anamo illana jitaiñedɨcue. Iese omoɨ rɨñonɨaɨmo lloiacadɨcue.  
\v 13 Jusiñamui Adán mɨcorɨna nano fɨnua jira, iese llotɨcue. Adán mɨcorɨ fɨnua mei, Eva mɨcorɨna jɨaɨ fɨnode.  
\v 14 Taɨfedɨ Adán mɨcorɨna jɨfueñede; iadedɨ Eva mɨcorɨna jɨfuete. Ie mei naie rɨño jeacɨnona fɨnode.  
\v 15 Iemona jilloite; iadedɨ uruiaɨ jococana jaite. Rɨñonɨaɨdɨ Jusiñamuina ɨɨnoia, jɨaɨe comɨnɨna isiruia, Jusiñamui jitailla rafuena fɨnoia, ie abɨna eenoia, jilloitɨmacɨ. 
\c 3  
\s1 Creyentiaɨna sedaraɨnɨ illa rafue 
\p  
\v 1 Bicɨnodɨ uanaicɨno. Creyentiaɨna llofueraɨmana bu jaiacania, naimɨe comecɨmo mare jitaillacɨno ite.  
\v 2 Bie isoide llofueraɨmana jaiacadɨmɨena jitaidɨcue. Naga comɨnɨ naimɨe mare raillamɨe. Dañaiñona aɨredɨmɨe. Abɨ eenotɨmɨe. Ebena iñedɨmɨe. Ɨɨnogamɨe. Jɨaɨe comɨnɨ naimɨe jofomo riadedɨ, raise nafuecabitɨmɨe. Jusiñamui uaina raise llofuecabitɨmɨe.  
\v 3 Jɨfairuiñedɨmɨe. Fuiriraɨnidɨmɨe. Raɨre icɨriraɨnidɨmɨe. Ucubena nɨcɨdoñedɨmɨe.  
\v 4 Naimɨe comɨnɨna raise sedadɨmɨe. Naimɨe anamo naimacɨ illanona, naimɨe uruiaɨ ie uaina raise ɨɨnotadɨmɨe. Ie isoidɨmɨe llofueraɨmana jaillana jitaidɨcue.  
\v 5 Iese naimɨe iñenia, ie anamo itɨnona naimɨe raise sedañenia, ¿nɨese jɨaɨe creyentiaɨna raise sedaite?  
\v 6 Como creyentena jaidɨmɨena creyentiaɨna llofueraɨmana fetoñeno, naie dɨga naimɨe abɨ ɨedoi raillano. Abɨ ɨeduamona, Taɨfe isoi jeacɨno fɨnoite.  
\v 7 Llofueraɨmana jaiacadɨmɨena creyenteñedɨno: “Mare” raiñenia, naimɨena fetoñeno. Iese naimɨena raiñenia, naimɨe joreñona jeare ñaɨtɨmacɨ. Iemei Taɨfe ramo jɨaɨ faɨte, naimɨe abɨdo danomo uaillena. Ie muidona naimɨe uaina jaca cacarefiñeitɨmacɨ. 
\s1 Diáconuaɨ illa rafue 
\p  
\v 8 Diáconuaɨ creyentiaɨ llofueraɨnɨ isoi marena illa. Ɨɨnouiganona illa. Jɨfairaɨeñena. Ucubena nɨcɨdoñena.  
\v 9 Naimacɨdɨ Cristona caɨ ɨɨnua rafuena jeanide comecɨaɨmona ɨɨnua.  
\v 10 Bu omoɨ fetoacania, naimacɨna nano facacɨ. Roracomo jɨaɨe rana nano maɨjɨta. Iena raise fɨnoia, diáconuaɨna jaite.  
\v 11 Diáconuaɨ aɨnɨaɨ jɨaɨ ɨɨnogañaiñuaɨna illa. Jɨaɨe comɨnɨ joreñona ñaɨñena. Jiroraɨnina. Naga rafuena marena raise fɨnua.  
\v 12 Nana diáconuaɨ aɨdɨ dañaiñoriede. Diáconuaɨ uruiaɨ naimacɨ uaina raise ɨɨnua. Diáconuaɨ imacɨ anamo itɨnona raise sedajana uiñua.  
\v 13 Diáconuaɨ marena maɨjɨia, comɨnɨ naimacɨmo iobillacɨnona fecaitɨmacɨ. Cristo Jesúna ɨɨnuano, naimɨena marefodo jɨaɨ lloitɨmacɨ. 
\s1 Jusiñamuina ɨɨnotɨno 
\p  
\v 14 Timoteo, raɨre o dɨne jaiacadɨcue; iadedɨ uicodo bie rafuena omo cuetɨcue.  
\v 15 Are cue riñenia, danɨ omoɨ creyentiaɨ dɨese ofia, Jusiñamui ie comɨnɨna marena omoɨ illana omoɨ uiñollena, omo cuetɨcue. Cajede Jusiñamuina jai sedadɨcaɨ. Uanaicɨnona rɨidotɨcaɨ.  
\v 16 Jusiñamui caɨna Cristona jai uiñotagafuedɨ jɨaɨe rafue baɨfemo faɨte. Iena caɨ uiñuanona, raitɨcaɨ: 
\q1 Enɨruemo Cristodɨ ɨimana jai bairede. 
\q1 Jusiñamui Joreñodɨ caɨna naimɨe uai siñonana uiñotade. 
\q1 Jusiñamui jaɨenisaɨ naimɨena jɨaɨ cɨodɨmacɨ. 
\q1 Jɨaɨe naɨraɨaɨmo naimɨena llotɨcaɨ. 
\q1 Iena cacajamona, ailluena comɨnɨdɨ dɨga naɨraɨmona naimɨena birui ɨɨnotɨmacɨ. 
\q1 Monamo naimɨe abɨdo jai jaide. 
\c 4  
\s1 Jɨaɨnodɨ jɨaɨforie rafuena lloitɨmacɨ 
\p  
\v 1 Jusiñamui Joreño caɨmo raise llote: “Jesucristo nia abɨdo biñena facaiseconi damɨerie creyentiaɨ Cristona faɨnonocaitɨmacɨ. Taɨfe dɨbeimo ite lloraɨnɨ lluana cacarefillamona, Janabamona ite lluacɨnodo jaitɨmacɨ. Taɨfemona ite lluacɨnodo jaitɨmacɨ”.  
\v 2 Naie lloraɨnɨdɨ: “Uanaicɨnona llotɨcaɨ” raitɨmacɨ; iadedɨ taɨno llocabiitɨmacɨ. Naimacɨ comecɨaɨ jai taɨnomo iite.  
\v 3 Ɨima rɨño ie aɨna ollena rairuitɨmacɨ. Rɨño ɨima ie ɨnina ollena rairuitɨmacɨ. Dajerie guille rana fɨmaidoitɨmacɨ. Jusiñamui iena fɨmaidoñede; ia creyentiaɨ uanaicɨnona uiñuanona, iobillanona guillena, naimɨedɨ naga rana fɨnode.  
\v 4 Nana Jusiñamui comuitaga guille radɨ mare. Iobillano iena caɨ feiñuanona, guitɨcaɨ.  
\v 5 Jusiñamui llua jira, Jusiñamuimo caɨ jɨɨia, nana guille radɨ jai mare. Iemona maraiñede rafue jaca caɨmo comuiñeite. 
\s1 Jesucristo rafuedo raise ɨɨnocana jai 
\p  
\v 6 Timoteo, cue lluana creyentiaɨmo o lloia, Jesucristo dɨbeimo raise maɨjɨdɨo. Cristo uaina ɨɨnocana o jailla jira, mare llogacɨnodo o jailla jira, raise maɨjɨdɨo.  
\v 7 Jamai rafuemo, jamai ɨɨgaɨaɨmo o comecɨna facañeno; iadedɨ Jusiñamui jitailla rafuena fɨnocana o jai.  
\v 8 Maɨrillena o abɨ llarocaiadedɨ, mare; iadedɨ Jusiñamui rafuena o facajia, eo mare. Abɨ llarocaja baɨfemo Jusiñamui uaidɨ eo faɨte. Jusiñamui rafuedɨ o comecɨna birui ocuiñotaite. Jusiñamui dɨne jɨaɨruido o jaillena, o comecɨna marena jɨaɨ raise fɨnotaite.  
\v 9 Bie lluacɨnodɨ uanaicɨno. Ie jira iena caɨ ɨɨnua.  
\v 10 Caɨ jillobillena, cajede Jusiñamuimo ocuiridɨcaɨ. Ie jira duere sefuillano maɨjɨdɨcaɨ. Jeacɨnomona Jusiñamuidɨ nana comɨnɨna jillobitaacade. Naimɨena ɨɨnotɨnona jai jillotate. 
\p  
\v 11 Nana creyentiaɨmo cue lluana raise llofue.  
\v 12 Naimacɨna o llofueia, coniruena nia o illamona: “O afemo itɨcaɨ” naimacɨ raiadedɨ, damamai iese raitɨmacɨ. Mare illacɨnodo o jai. Ie mei iese raiñeitɨmacɨ. Marena o ñaɨamona, marena o illamona, jɨaɨe comɨnɨna o isiruillamona, Jusiñamuina o ɨɨnuamona, o jeanide rafuena o fɨnoñenamona, naimacɨdɨ fueoitɨmacɨ.  
\v 13 O dɨne nia cue riñenia, creyentiaɨ ofia, Jusiñamuina cuegafuiaɨna ado faca. Iena llono. Iena llofue.  
\v 14 Creyentiaɨna llofueraɨnɨ navui ofidemo, Jusiñamuimona o baitajacɨnona o feiñollena, naimacɨ onollɨaɨ o ɨfogɨmo jonetɨmacɨ onollɨaɨ o ɨfogɨmo jonetɨmacɨ. Naie facaiseconi Jusiñamui naimacɨna naicɨnona ona llotatate. Naicɨnona birui faɨnonocaiñeno.  
\v 15 Iena eo uiuicai, nana comɨnɨ Cristona ɨɨnocana o jaillana uiñollena.  
\v 16 O comecɨna raise eeno. Marena raise llofue. Cristo uaina ɨɨnocana o jai. Iese o jaia, jeacɨno fɨnuamona jilloitɨo. Iese ona cacadɨno jɨaɨ jilloitɨmacɨ. 
\c 5  
\s1 Timoteo afemo itɨno dɨga ie illa rafue 
\p  
\v 1-2 Eimɨiaɨna illamona, o afemo itɨnona rɨire llofueñeno; iadedɨ o moomo o llua isoi, naimacɨna fecuise llofue. O anafemo itɨnona o amatɨaɨmo o llua isoi, llofue. O afemo itɨñaiñuaɨna o eimo o llua isoi, llofue. O anafemo itɨñaiñuaɨna o mirɨñotɨaɨmo o llua isoi, llofue. Naiñaiñuaɨmo jeare comecɨna facañeno.  
\v 3 Naiñaiñuaɨna canollena, fecɨñuaɨ comɨnɨ iñenia, naiñaiñuaɨna cano.  
\v 4 Fecɨñomo uruiaɨ ia, naimacɨ naiñaiñona canua, naiñaiño naimacɨmo duilla jira. Einamacɨna illamona, iemona naiñaiñodɨ ɨbana oite. Iese itena, Jusiñamuimona mare.  
\v 5 Fecɨñomo uruiaɨ iñenia, da Jusiñamuimo naiñaiño ocuiride, naimɨe naiñaiñona canollena. Jusiñamuimo nagarui jɨɨcabite. Bie isoide fecɨñuaɨna cano;  
\v 6 iadedɨ Jusiñamuimo duiñede rana ebiruiga fecɨñona canoñeno. Jusiñamui anamo naiñaiño jai raise iñenamona, Jusiñamuimona naiñaiñodɨ jai fiodaitɨñaiño isoide. Fiodaite comɨnɨna jaca canoñedɨcaɨ.  
\v 7 Ie jira creyentiaɨmo biena llono, fecɨñuaɨna jeare bu ñaɨ raillanona. 
\p  
\v 8 Ie comɨnɨna canoñedɨmɨe Cristo uaina jai faɨnonocaide. Naimɨedɨ Cristona ɨɨnoñedɨmɨe baɨfemo eo jearedɨmɨe.  
\v 9 Creyentiaɨna sedaraɨnɨna canolle fecɨñuaɨ mamecɨaɨna o joneia, iese jone: Jai jionaidɨñaiñuaɨ dɨese mamecɨ jone. Dajede ɨniredɨñaiñuaɨ mamecɨna jone.  
\v 10 Mare rafue naiñaiñuaɨ fɨnocabilla jira, jɨaɨe comɨnɨdɨ naiñaiñuaɨdɨ mareñaiñuaɨ raillañaiñuaɨ. Ie uruiaɨ raise sedadɨñaiñuaɨ. Comɨnɨna nafuecabitɨñaiñuaɨ. Jɨaɨ creyentiaɨna abɨna ɨedoñeno canocabidɨñaiñuaɨ. Duidɨnona canocabidɨñaiñuaɨ. Dɨese mare rafuena fɨnocabidɨñaiñuaɨ mamecɨ jone.  
\v 11 Fecɨñuaɨ dɨese mamecɨ o joneia, nia jionaiñede fecɨñuaɨ mamecɨaɨna joneñeno. Naiñaiñuaɨ nano llotɨmacɨ: “Ɨnina dane oñeitɨcaɨ. Da Cristona sedaitɨcaɨ” llotɨmacɨ. Ie mei uri iñenanomona, ɨimana nɨcɨduamona, ɨnina jitaitɨmacɨ. Ie jira naiñaiñuaɨ mamecɨ joneñeno.  
\v 12 Naiñaiñuaɨ navui lluacɨnona jai faɨnonocailla jira, jɨaɨe comɨnɨ naiñaiñuaɨ joreñuaɨna ñaɨtɨmacɨ.  
\v 13 Naiñaiñuaɨ dɨga jofomo macariruillamona, rairaɨedɨmacɨ. Eo ñaɨllaredɨmacɨ. Naiñaiñuaɨ ñaɨñenacɨnuaɨdo ñaɨtɨmacɨ.  
\v 14 Nia jionaiñede itɨñaiñuaɨ iese iñellena, naiñaiñuaɨ ɨnina dane uana jitaidɨcue. Ie mei uruiaɨrenitɨmacɨ. Naiñaiñuaɨ jofona sedaitɨmacɨ. Ie mei budɨ naiñaiñuaɨna jeare ñaɨñeite.  
\v 15 Cristona dajerie faɨnonocaida, Taɨfe dɨbeimo jai jaidɨmacɨ.  
\v 16 Creyente comɨnɨmona fecɨño iade, da naimɨe naiñaiñona canua. Jɨaɨe creyentiaɨmo naiñaiñona canolle rana jɨcañena. Ie muidona comɨnɨnide fecɨñuaɨna canorenitɨmacɨ. 
\p  
\v 17 Creyentiaɨna llofueraɨnɨ marena maɨjɨia, raise ɨbauiga. Naimacɨ lloia, naimacɨ jɨaɨ llofueia, eo raise ɨbauiga.  
\v 18 Moisés mɨcorɨ jaie cuegafuiaɨ iena llote: “Trigo oni juillena jurareta saisɨia, ie fuena maɨñeno, ie guillena”. Guillamona ɨbana jai ote. Cristo jaie llote: “Maɨjɨdɨmɨedɨ ɨbauiga”.  
\v 19 Creyentiaɨ llofueraɨmana damɨe llogɨdoia, iena cacarefiñeno. Mena comɨnɨ, nɨbaɨ daje amani comɨnɨ iese naimɨena llogɨdoia, iemo cacarei.  
\v 20 Creyentiaɨ llofueraɨnɨmona bu jeacɨnona fɨnocabia, nana creyentiaɨ uicomo naimɨemo rɨire llono, jɨaɨe creyentiaɨ daje isoi iñellena.  
\v 21 Dacɨnodo naga jeacɨno fɨnoraɨmamo llono. Nagamɨemo rɨidoñeno llono. Fecuise damɨemo lloñeno, naimɨedɨ o nabaina jira. Jusiñamui caɨna cɨode. Jesucristo caɨna cɨode. Jusiñamui fetoca jaɨenisaɨ caɨna jɨaɨ cɨodɨmacɨ. Ie jira dacɨnodo llono.  
\v 22 Jeacɨno naimɨemo ia, naimɨe jeacɨno facaisena o iñellena, creyentiaɨ llofueraɨmana jaillena, buna raɨre fetoñeno. Jeacɨnomona oni eneno o i.  
\v 23 Eo o duia, da jɨnuina jiroñeno. O duicabilla jira, janore vino jiro, o jebe manollena.  
\v 24 Jeacɨno dajerie fɨnoia, iena uiñotɨcaɨ, juez isoi Jusiñamui iena nia lloñenia. Jeacɨno jɨaɨno fɨnoia, iena uiñoñedɨcaɨ; iadedɨ jɨaɨruido Jusiñamui lloia, iena uiñoitɨcaɨ.  
\v 25 Ie isoide. Mare rafue bu fɨnoia, iena uiñotɨcaɨ; iadedɨ birui iena caɨ uiñoñenia, jɨcarena fɨnoñena jira, jɨaɨruido iena uiñoitɨcaɨ. 
\c 6  
\p  
\v 1 Jusiñamuina ɨɨnote maɨjɨraɨnɨdɨ naimacɨ patrones eo ɨɨnua. Ie mei Jusiñamuina ɨɨnoñedɨno Jusiñamuina jeare ñaɨñeitɨmacɨ. Caɨ llofuiacɨnona jamaiñeitɨmacɨ.  
\v 2 Jesucristona naimacɨ patrones ɨɨnoia, maɨjɨraɨnɨ naimacɨ uaina jɨaɨ ɨɨnua. Naimacɨ comecɨaɨ facañena: “Patrón creyentena illa jira, danɨ conima caɨ isiruilla jira, raise maɨjɨñeitɨcaɨ”; ia: “Raise maɨjɨitɨcaɨ” comecɨaɨna facaja. 
\s1 Uanaiñedɨcɨnona lluacɨno 
\p  
\v 3-4 Caɨ llogacɨnodɨ uanaicɨno. Caɨ Nama Jesucristona llotɨcaɨ. Bie llogacɨnomona naimɨe jitaille isoi caɨ illanona, raise uiñotɨcaɨ. Jɨaɨcɨnodo bu llofueia, abɨ ɨedote. Abɨ uiñoñede. Uai eo uaitaiacade. Ie meinoconi comɨnɨ abɨna uradoidɨmacɨ. Daajena comecɨaɨna lloiñedɨmacɨ. Jɨaɨe comɨnɨ joreñona ñaɨtɨmacɨ. Caɨ fɨɨena bɨtɨmacɨ.  
\v 5 Uai uaitatɨmacɨ, naimacɨ comecɨaɨ maraiñeno illa jira. Uanaicɨnona jai uiñoñedɨmacɨ. “Cristo uai lluamona, ailluena ucubena oitɨcaɨ” raillanomo comecɨaɨna facadɨmacɨ. “Iemona caɨmare iitɨcaɨ” raillanomo comecɨaɨna facadɨmacɨ.  
\v 6 Ie iadedɨ iese iñede. Cristona eo raise caɨ ɨɨnuamona, caɨmo dɨese ite ra dɨga caɨmare itɨcaɨ. 
\p  
\v 7 Caɨ jeicɨia, jaca buenidɨcaɨ. Caɨ fiodailla mei, caɨ rana uiñeitɨcaɨ. Caɨ radɨ benomo fɨebicaite.  
\v 8 Ie jirari, caɨ guille ia, caɨ ɨniroi ia, caɨmare bene caɨ illa.  
\v 9 Eo ucuberedɨnona jaiacadɨnona Taɨfe eo ramo faɨte. Taɨfe uaina ɨɨnuanona ucube ollena, ucuberedɨnona jaiacadɨnodɨ dɨga maraiñede rafuena fɨnodɨmacɨ. Ja muidomo imacɨ abɨ faɨfitɨmacɨ.  
\v 10 Ucubena ebiruillanona, ucuberedɨnona jaiacadɨno naga jeacɨnona fɨnocabidɨmacɨ. Ucube ollena, dajerie Cristona jai faɨnonocaidɨmacɨ. Ie muidona eo duere sefuidɨmacɨ. 
\s1 Jusiñamui uaina ɨɨnocana jai 
\p  
\v 11 Ero, Timoteo, odɨ Jusiñamui fetocamɨedɨo. Nana cue como lloga rafuemona oni eneno o i. Mare rafuedo o jai. Jusiñamui jitailla rafuena fɨnocana o jai. Jesucristona ɨɨnocana o jai. Jɨaɨe comɨnɨna isirui. Mare rafue dɨbeimo o comecɨna jone. Rɨicɨnodo comɨnɨna llofueñeno.  
\v 12 Jeacɨno dɨbeimo o iñellena, Jesucristona ɨɨnuanona, llocana o jai. Jaca itatajacɨnona marena raise ɨɨno. Jusiñamui ona fetode, o jaca illena. Navui dɨga comɨnɨmo Jesucristona o ɨɨnuana marefodo llotɨo.  
\v 13 Ie isoide Jesucristo. Poncio Pilato dɨne jaie naimɨe itemo, marefodo: “Imɨedɨcue” llote. Jusiñamuidɨ nana rana cajetade. Naimɨe caɨna jaca cɨode. Jesucristo caɨna jɨaɨ jaca cɨode. Ie jira uanaicɨnona omo llotɨcue.  
\v 14 Caɨ Nama Jesucristo nia abɨdo biñenia, nana omo cue llogacɨnuaɨ ɨɨno. Jearede rafuena fɨnoñeno, jɨaɨe comɨnɨ naie llogacɨnuaɨna uaitañellena.  
\v 15 Naimɨe jitaillɨrui Jusiñamuidɨ enɨruemo Jesucristona dane oretaite. Jusiñamuidɨ maremɨe. Nanocamɨe. Caɨ nanoca caɨ moto illaɨma. Caɨ nanoca Nama.  
\v 16 Da jaca naimɨe fiodaiñeite. Eo isire llɨgaiñote ra dɨnomo naimɨe ite. Nainomo jaca bu iaɨrei rinide. Bu naimɨena jaca cɨonide. Naimɨedɨ jaca siñonasa. Naimɨemo iobillacɨnona jaca caɨ fecacabillasa. Iena jitaidɨcue. 
\p  
\v 17 Eo ucuberedɨnomo llono: “Abɨna ɨedoñeno. Ucubedɨ fuirede. Ie jira ucubena uamo ocuiriñeno; iadedɨ Jusiñamuimo ocuiri”. Caɨ comecɨaɨ jaɨsillena, naimɨedɨ caɨmo rana eo raise fecacabide.  
\v 18 Ucuberedɨnomo jɨaɨ llono: “Omoɨ ucube dɨga mare rafuena fɨno. Jɨaɨe comɨnɨmo ucubena caidɨñeno fecajana cano”.  
\v 19 Ie muidona iese naimacɨ fɨnoia, monamo naimacɨ isiruiga rana iite, jɨaɨruido iena. Iese naimacɨ jaia, jaca itatajacɨnona marena raise ua uiñoitɨmacɨ. 
\s1 Fuiduacɨno 
\p  
\v 20 Timoteo, cue omo llogacɨnona faɨñeno raise uiuicai. Jamai rafuemo cacarefiñeno. “Uanaicɨnona eo uiñotɨcaɨ” dajerie raitɨmacɨ; iadedɨ uiñoñedɨmacɨ. Naimacɨ ñaɨana cacarefiñeno.  
\v 21 Dajerie iena cacajano, Cristona nia uiñoñedɨmacɨ. Jusiñamui ona duenaillasa. Jaca dɨnori omo rafuena llotɨcue. Mai. Pablodɨcue.