\id 1JN  
\h 1 JUAN 
\toc1 An c’a’al u axi thuchanchat an ebchalabchic c’al an t’ocat abathuale Juan 
\toc2 1 JUAN 
\toc3 1 Jn. 
\mt1 An c’a’al u axi thuchanchat an ebchalabchic c’al an t’ocat abathuale Juan 
\c 1  
\s1 Tu pithal i it ejattalab a Cristo 
\p  
\v 1 Nan tu olchalchic al axe’ xi u abal c’uajatits jaja’ ax u bijiyab ti Cau tam ti yabaye ts’ejcath an eb ani an tsabal. Ja’its jaja’ ax tu pithal i it ejattalab. I ats’amal in cahuintal tam ti xe’tsin teje’ tsabal. I tsu’umal c’al i lej tsu’ux hual ani i tacchamal in inictal.  
\v 2 In tejhua’metha’ tim ba’ ti ejatlix tam ti xe’tsin ti inic teje’ tsabal. I tsu’umal ani i olnamalits abal ja’its in lej ey, ani ja’its jaja’ ax tu pithal i it ejattalab abal cu c’uajiy ets’ey c’al a Dios. Pel xe’ jaja’ c’uajatac c’al i Tata Dios ani chich teje’ tsabal abal ca tejhua’me c’al huahua’.  
\v 3 Jahua’ i tsu’umal ani i ats’amal c’al a Jesucristo, ja’its i olnal abal tata’chicte ca exla’, ani qui junax co’oy i t’ilomtalab c’al i Tata Dios ani c’al in Tsacamil Jesucristo.  
\v 4 C’al axe’ an cau ax nan tu thuchanchalchic quit jum putat culbe. 
\s1 A Dios ejtil an tajax 
\p  
\v 5 A Jesucristo tu exobchamalitschic abal in ey a Dios hualim ti t’ocat, ani jaxtam in ey ejtil an tajax ani yab ejtil an yic’uax. Jats an cau huahua’ tu olchalchicte.  
\v 6 Max i ulal i cua’al i t’ilomtalab c’al a Dios ani bel i t’ajale jahua’ yab t’ocat, pel u janamcau ani u c’uajile al an yic’uax.  
\v 7 Max i t’ajal t’ocat tam ojni u c’uajilits al an tajax ejtil a Dios u c’uajil al an tajax ani i junax cua’al i alhua’ t’ilomtalab c’al a Dios ti ichich. Ani max cu hualbin, a Dios ets’ey tu t’oquethanchal i ichich c’al in xits’al in Tsacamil Jesucristo.  
\v 8 I c’ambiyal i cuete’ ichich ani pel u janamcau max qui ulu yab pel u hualbith inic.  
\v 9 Max qui luju i hualab c’al a Dios, jaja’ tu paculanchal ani tu t’oquethanchal i ichich c’al patal jahua’ yab alhua’. Antsana’ tu t’ajchal cum pel in ey lej alhua’ inic ani jaye lej pututh tin cuenta am paculanchixtalab.  
\v 10 Max qui ulu iba yab u hualbinenec, i t’ajal ejtil max pel i janamcau a Dios ani yab i chubax cua’al t’aychithits in cahuintal a Dios ti ichich. 
\c 2  
\s1 Pel i ts’ejcaclome a Cristo 
\p  
\v 1 Ichich hual tsacamilchic, nan tu thuchanchal axe’ xi cau abal yab quit hualbin. Bel max quit hualbin, c’uajat an lej alhua’ inic Jesucristo ti ts’ejcaclome tin tamet i Tata ti eb.  
\v 2 Ja’its jaja’ ax tu calchinchi i hualab tam ti tsemets al an cruz. Yab expith ja c’al i hualab huahua’ ti tsemets, jaye c’al in hualab tim patal an inicchic. 
\p  
\v 3 Max i t’ajal jahua’ a Dios tu uchbiyal ti al in cahuintal, i tso’obits abal chubax i exlal a Dios.  
\v 4 Max qui ulu i exlal a Dios ani yab qui t’aja’ jahua’ tu uchbiyal, pel u janamcau ani yab i cua’al chubax t’aychithits in cahuintal a Dios ti ichich.  
\v 5 Max chubax i putuhualits c’al in uchbixtal a Dios tam ojni’ i bajumalits tu jum putat c’anithom c’al a Dios ani i tso’obits abal u chubax ts’at’bathits c’al a Dios.  
\v 6 Max qui ulu u junini’ ts’at’bathits c’al a Dios, pel i uchbil cu xe’tsin jant’ini’ ti xe’tsin a Jesucristo teje’ tsabal. 
\s1 An it uchbixtalab 
\p  
\v 7 Ebchalabchic, nan yab tu thuchanchal i it uchbixtalab. Pel i biyal cau tin cuenta an c’anithomtalab ax a ats’amal ma tam ta ts’i’quiyamalits ca bela’ a Cristo.  
\v 8 Aba ani’ pel i biyal cau, bel ejtil i it cau cum c’al a Cristo ani c’al tata’chic in cua’alits it in exbath. C’al in c’anithomtal a Cristo u talabethabits an yic’uaxtalab ti al i ichich ani u chi’thabits an lej chubax tajaxtalab. 
\p  
\v 9 Max qui ulu i cua’alits an tajaxtalab ti ichich ani i pojcal an ebchalabchic c’al a Cristo, i cua’ale i yic’uaxtalab ti ichich.  
\v 10 Max i c’anithal an ebchalabchic c’al a Cristo i cua’alits an tajaxtalab ti ichich ani yabats jale’ cu hualbin.  
\v 11 Max i pojcal an ebchalabchic c’al a Cristo i cua’ale i yic’uaxtalab ti ichich ani u xe’etse al an yic’uax. I ey ejtil u joc’tsi cum yab i exlal jun tu ne’ets. 
\p  
\v 12 Ichich hual tsacamilchic, nan tu thuchanchal axe’ xi cau cum a Dios ti paculanchamalits a hualab tin ebal a Jesucristo.  
\v 13 Tu thuchanchal yejtselabchic cum a bajumalits ca exla’ a Jesucristo axi c’uajatits tam ti yabaye ts’ejcath an eb ani an tsabal. Tu thuchanchal cuitolchic cum a atamalits an teneclab. Tu thuchanchal tsacamchic cum a bajumalitste ca exla’ i Tata Dios.  
\v 14 Tu thuchanchal yejtselabchic cum a exlalits a Jesucristo axi c’uajatits tam ti yabaye ts’ejcath an eb ani an tsabal. Tu thuchanchal cuitolchic cum a tsapnanchal in cahuintal a Dios ax a t’aychith cua’alits ta ichich ani a atamalits an teneclab. 
\p  
\v 15 Yab ca bina’chic a ichich ca c’anitha’ jahua’ yab alhua’ teje’ ti al an hualab c’ay’lal. Max ja’its nix ax i c’anithal, jats cum yab i c’anithal i Tata Dios.  
\v 16 Patal jahua’ yab alhua’ teje’ tsabal u tal tocat c’al an inic ani yab u tal c’al i Tata ti eb. Jats ax u le’nab c’al in hualbith anam t’u’ul, ani c’al in hualbith tsu’ux hual, ani c’al in hualbith ichich c’athatma’ c’al jahua’ teje’ tsabal.  
\v 17 Xo’ u talabethabits axe’ xi hualab c’ay’lal ani patal jahua’ yab alhua’ le’nab c’al an inic, ani expith ne’ets ca c’uajiy abal ets’ey jitats quin t’ajchi in culbetal a Dios. 
\s1 An chubaxtalab ani an janamtalab 
\p  
\v 18 Ichich hual tsacamilchic, im bajumalits an hora tam hue’its ne’ets ca taley an q’uij q’uicha. I ats’amalits abal ne’ets ca chich jun i inic axi lej c’athpich tomolnaxma’ c’al a Cristo tam antsana’ quim bajuhuits nix an hora. Ani cum hua’atsits yan jita’chic in tomolnalits a Cristo, jaxtam i tso’obits abal hue’its ne’ets ca taley an q’uij q’uicha.  
\v 19 Talchic nixe’ ax in tomolnal a Cristo pel xe’chic nixe’ axi c’uajatac c’al huahua’ ax u belom c’al a Cristo. Max chubaxac tim belamal a Cristo, ma xohue’its jilc’onenecac c’al huahua’. Cum calejitschic, jats ti exlal abal yab chubax c’uajatac in ichich c’al huahua’. 
\p  
\v 20 Cum a Cristo ti pithamalitschicte an Espíritu Santo, jaxtam patal tata’chic a exlalits jahua’ pel i chubax cau.  
\v 21 Cum a exlalits an chubaxtalab, jaxtam nan tu thuchanchal axe’ xi cau ani iba abal yab a exlal. A alhua’ exlalits abal yab u calel i janamtalab c’al an chubaxtalab. 
\p  
\v 22 Pel u janamcau jitats quin ulu abal a Jesús yab ja a Cristo axi abnenec c’al a Dios. Pel i tomolnax c’al a Cristo jitats quin ulu abal yab ja in Tsacamil a Dios ani yab ja c’al in Tata ti eb ti abnenec.  
\v 23 Patal jitats antsana’ quin ulu tin cuenta in Tsacamil a Dios, yab in exlal a Dios tin Tata. Jitats quin olna’ abal a Cristo ja’its in Tsacamil a Dios jats ax in exlalits a Dios tin Tata. 
\p  
\v 24 Jaxtam ca lej t’ayath co’oychic ta ichich jahua’ it exobchinenec tin cuenta a Cristo ma tam ta ts’i’quiyamal ca bela’. Max antsana’ ta ca lejatna’ ta ichich, tam ojni’ ne’ets quit junini’ c’uajiy ts’at’bath c’al i Tata Dios ani c’al in Tsacamil Jesucristo.  
\v 25 Ja’its a Jesucristo ax in ulumalits abal ne’ets tucu pitha’ i it ejattalab abal ets’ey. 
\p  
\v 26 C’al axe’ xi u nan tu olchalchic abal hua’ats i exobchixchic in le’ ti c’ambiy.  
\v 27 Cum ti pithamalitschic a Jesucristo an Espíritu Santo axi ti exobchalits patal an cau, jaxtam yab a yejenchal jita’ tam inic ti exobchi. Cum lej chubax in exobchixtal an Espíritu Santo ani yab u janamcau, jaxtam quit junini’ c’uajiychic ts’at’bathits c’al a Cristo jant’ini’ tit exobchinenequits c’al an Espíritu Santo quit c’uajiy. 
\p  
\v 28 Ichich hual tsacamilchic, quit lej junini’ c’uajiy ts’at’bathits c’al a Cristo abal quit c’uajiy thacat a ichich ani yab quit tithebe tam ca chich jaja’ junil.  
\v 29 Cum a tso’obits abal ets’ey pel i alhua’ inic a Jesucristo, antsana’ ca tso’obna’ abal patal jitats in t’ajal alhua’ pel xe’ axi it ejatlithits c’al jaja’. 
\c 3  
\s1 In tsacamilchic a Dios 
\p  
\v 1 Qui lej t’aja’chic ti cuenta abal i Tata Dios tu lej c’athpich c’anithal cum tu uchal tu tsacamilchic, ani chubax ja’its pel i ey. Yab tu exlanchal i ey an inicchic axi yab im belal a Cristo jant’ini’ ti yab in exlanchal jaye in ey a Dios.  
\v 2 Lej ichich hual ebchalabchic, aba ani’ xo’ pelits i ey tu tsacamil a Dios, bel yabaye tu quithat tso’oblinchamal a Dios jahua’ ne’ets qui baju talbel. Expith i tso’obits abal ne’ets qui baju i ey ejtil in ey a Jesucristo tam ca chich jaja’ junil ani qui tsu’chi in lej hual.  
\v 3 Max i belal abal chubax antsana’ ne’ets qui baju ejtil in ey jaja’, ojni’ ne’ets qui luba’ qui baju tu t’ocat jant’ini’ ti t’ocat jaja’. 
\p  
\v 4 Patal jitats ca hualbin in q’uibchale quin tala’ putu c’al in uchbixtal a Dios, cum pel i hualabtalab max yab qui tala’ putu c’al in uchbixtal a Dios.  
\v 5 A tso’obits tata’chic abal chich a Jesucristo teje’ tsabal ca tsemets abal tucu paculanchi i hualab, ani yab hua’ats ni jun i hualabtalab c’al jaja’.  
\v 6 Max cu junini’ c’uajiy ts’at’bath c’al jaja’ yab ne’ets cu hualbin. Max cu xe’tsin hualbibil, jats cum yabaye i tsu’umal a Jesucristo ani yabaye i exlamal.  
\v 7 Ichich hual tsacamilchic, ca lej t’aja’ ti cuenta abal ni jita’ yab ti c’ambiy tin cuenta an hualabtalab. Max i t’ajal alhua’, jats cum alhua’ i ichich jant’ini’ in ichich a Cristo.  
\v 8 Max cu xe’tsin hualbibil, jats cum pel tu c’al an teneclab, cum c’al jaja’ jats ti ts’i’quinenec an hualabtalab ani jats expith bel in t’ajal. Chich in Tsacamil a Dios abal quin talabethanchi jahua’ in t’ajal an teneclab. 
\p  
\v 9 Max chubax pel tu tsacamil a Dios yab ne’ets cu xe’tsin hualbibil, cum tu pitha’its a Dios i ichich ejtil jaja’ in ichich ani pel tu tsacamil yabats i ejtohual cu xe’tsin hualbibil.  
\v 10 Antsana’ i tso’ob jita’ pel in tsacamil a Dios ani jita’ pel in tsacamil an teneclab. Max yab cu xe’tsin bolith ani jaye max yab qui c’anitha’ an ebchalabchic c’al a Cristo, yab pel tu tsacamilchic a Dios. 
\s1 Cu c’anitháxin 
\p  
\v 11 An cau ax a ats’amalchic ma tam ta ts’i’quiyamal ca bela’ a Cristo jats axe’, cu c’anitháxin jun c’al xi jun.  
\v 12 Yab qui t’aja’ ejtil in t’aja’ a Caín tam tin tsemtha’ in ebchal, cum in ey jaja’ ejtil in ey an oc’ox teneclab. In tsemtha’ in ebchal tin ebal am pa’ixnomtalab abal in t’ajamal lej alhua’, ani a Caín iba in t’ajamal alhua’. 
\p  
\v 13 Ebchalabchic, yab ca jic’pa’ max ti pojcal an inicchic axi yab im belal a Cristo.  
\v 14 Cum i c’anithal an ebchalabchic c’al a Cristo i tso’obits abal a Dios tu pithamalits i it ejattalab ani yabats u xe’ets ejtil max u tsemenec al i hualabtalab. Max yab i c’anithal an ebchalabchic c’al a Cristo, antsana’ tu xe’etse ejtil max u tsemenec al i hualabtalab.  
\v 15 A Dios tu tsu’tal ejtil max pel tu tsemthom inic max i pojcal an ebchalabchic c’al a Cristo, ani i tso’ob abal i tsemthom inic yab in cua’al i it ejattalab c’al a Dios.  
\v 16 Cum a Jesucristo im bina’ tim ba’ ca tsemets ti al an cruz tin ebal huahua’, antsana’ tu tejhua’methanchamal an c’anithomtalab axi lej chubax. Antsana’ pel i uchbilhue qui jum putat bina’ ti ba’ ani ma cu tsemtha abal qui tolmiy an ebchalabchic c’al a Cristo.  
\v 17 Max i cua’al jant’o teje’ tsabal ani yab qui yajnanchi an ebchalabchic c’al a Cristo ax in cua’al i yejenchixtalab, jolat qui ulu i c’anithal a Dios cum yab chubax i c’anithal.  
\v 18 Ichich hual tsacamilchic, yab expith qui uluq’ui i c’anithal an ebchalabchic c’al a Cristo, jaye qui chubax c’anitha’ ani qui tolmiychic. Tam ojni’ ne’ets qui tejhua’metha’ abal huahua’ u c’anithom. 
\p  
\v 19 Max antsana’ i chubax c’anithal an ebchalabchic c’al a Cristo, i tso’obits abal chubax pel tu c’al a Dios ani i ats’al chubaxmethachits i ichich tin tamet a Dios.  
\v 20 Max i ats’al jolbith ti cuete’ ichich ani qui tsalpay abal yab tu c’al a Dios, bel qui t’aja’ ti cuenta abal a Dios in cua’al in c’athpich tsap ani i ichich iba. In tala’ ejtiyal patal a Dios.  
\v 21 Ichich hual ebchalabchic, max yab i ats’al tu jolbith i ejtohual cu utey qui tauna’ a Dios c’al i ichich lej thacat.  
\v 22 Ani jaja’ ne’ets tucu pitha’ patal jahua’ qui conchi cum i putuhual c’al in uchbixtalchic ani i t’ajchal in culbetal.  
\v 23 In uchbixtalchic jats qui bela’ in Tsacamil Jesucristo ani cu c’anitháxin jun c’al xi jun.  
\v 24 Max i putuhual c’al in uchbixtalchic a Dios, u junini’ c’uajat huahua’ c’al a Dios ani jaja’ junini’ c’uajat ti ichich. I tso’obits abal a Dios antsana’ c’uajat ti ichich cum tu pithamalits an Espíritu Santo taja’ ca c’uajiy. 
\c 4  
\s1 An cau axi chubax ani axi iba 
\p  
\v 1 Ichich hual ebchalabchic, yab ca belchi patal jahuaquitsq’ui tam cau quit uchan c’al ax in ulalchic pithach i cau c’al a Dios. Ca t’aja’ ti cuenta ca exla’ max chubax jununul c’al in cahuintal a Dios, cum hua’ats yantalam i inicchic xe’ets ti janamcau. In ulalchic abal in olnal in cahuintal a Dios ani yab ja ax in olnal.  
\v 2 Ne’ets ca ejtouchic ca exla’ jita’ axi chubax in cua’alits an Espíritu Santo tin ichich, max in olnal abal abnenequits a Jesucristo c’al a Dios ani hua’tsin ti inic teje’ tsabal.  
\v 3 Yab in cua’al an Espíritu Santo tin ichich jitats quin ulu abal yab abnenec a Jesús c’al a Dios ani yab hua’tsin ti inic teje’ tsabal, tocat in cua’al jununul in tsalap c’al nixe’ xi lej c’athpich tomolnaxma’ c’al a Cristo axi ne’ets ca chich. A ats’amalitschic abal ne’ets ca chich jaja’ ani hua’atsits jita’chic xe’ets in tsalap jununul c’al jaja’. 
\p  
\v 4 Ichich hual tsacamilchic, pel ti c’alchic a Dios ani a atamalits nixe’ xi janamcauchic ax in ulalchic pel i caulomechic c’al a Dios. A Dios axi c’uajat ta ichich tata’chic más in cua’al in c’athpich tsap, ani yab ejtil in tsap an teneclab axi c’uajat tin ichich jaja’chic.  
\v 5 Cum in tsalapchic jats axi teje’ tsabal jaxtam in t’iloxnal jahua’ teje’ tsabal, ani jaxtam u ats’anchab in cahuintal c’al an inicchic axi jaye expith in tsalapnal jahua’ teje’ tsabal.  
\v 6 Pel huahua’ ojni’ tu tsacamil a Dios ani tu ats’anchal huahua’ i cahuintal jitats exlom c’al a Dios. Axi yab exlom c’al a Dios, yab tu ats’anchal i cahuintal. Antsana’ i ejtohual qui exla’ jita’ ax in lej cua’al an chubaxtalab tin ichich ani jita’ ax in cua’al expith i c’ambixtalab. 
\s1 Tu c’anithal a Dios 
\p  
\v 7 Ichich hual ebchalabchic, cu c’anitháxin jun c’al xi jun c’al an c’anithomtalab ax tu pithal a Dios. Max u c’anithom, jats cum pel tu tsacamilchic a Dios ani i exlal a Dios.  
\v 8 Max yab u c’anithom, jats cum yabaye i exlal a Dios ax in ey lej c’anithom.  
\v 9 A Dios in tejhua’metha’ abal pel ti c’anithom c’al huahua’ tam tin aba’ ca chich teje’ tsabal in juncats Tsacamil abal cu it ejatliyat c’al jaja’.  
\v 10 Qui t’aja’ ti cuenta abal huahua’ yab i oc’ox c’anitha’ a Dios. Jaja’ tu oc’ox c’anitha’, ani jaxtam in aba’ in Tsacamil abal ca tsemets ti al an cruz abal tucu calchinchi i hualab. 
\p  
\v 11 Ichich hual ebchalabchic, cum antsana’ tu c’anithal a Dios, jaxtam cu c’anitháxin jun c’al xi jun.  
\v 12 Aba ani’ ni jita’ yab jayq’ui’ in tsu’umal a Dios, bel a Dios c’uajat ti ichich huahua’ max u c’anitháx ani ja’its jaja’ ax tu tolmiyal cu jum putat c’anitháxin.  
\v 13 Cum tu pithamalits an Espíritu Santo, jaxtam i tso’obits abal huahua’ u junini’ c’uajat c’al a Dios ani jaja’ junini’ c’uajat ti ichich.  
\v 14 I tsu’umal in Tsacamil a Dios ani i olnal abal a Dios in aba’ teje’ abal quin jec’ontha’ an inicchic c’al an hualabtalab.  
\v 15 Max i olnal abal a Jesús pelits in Tsacamil a Dios, u junini’ c’uajat huahua’ c’al a Dios ani jaja’ junini’ c’uajat ti ichich. 
\p  
\v 16 Antsana’ i tso’obits ani i belalits abal lej chubax a Dios tu c’anithal cum pelits in ey ti c’anithom. Ani max u c’anithom huahua’, jats cum u junini’ c’uajat c’al a Dios ani jaja’ junini’ c’uajat ti ichich.  
\v 17 Jaxtam u jum putat c’anithom huahua’ ani i ne’thal thacat i ichich tin cuenta an q’uicha tam ti a Dios ne’ets tucu ts’ejca’. Aba ani’ u c’uajat huahua’ teje’ tsabal, bel u c’uajat jaye tin tamet a Dios ti eb jant’ini’ ti c’uajat a Jesucristo tin tamet a Dios.  
\v 18 Cum jun ti hua’ats i c’anithomtalab yab hua’ats i jiq’ueltalab, jitats jum putat c’anithom yab in ejtohual quin co’oy i jiq’ueltalab tin ichich. Lej yajchic an jiq’ueltalab, ani max u jiq’uel i tso’ob abal yabaye i bajumalits tu jum putat c’anithom c’al a Dios ani c’al an inicchic. 
\p  
\v 19 Cum a Dios tu oc’ox c’anitha’, jaxtam i c’anithal a Dios.  
\v 20 Pel u janamcau huahua’ max qui ulu i c’anithal a Dios ani max i pojcale an ebchalabchic c’al a Cristo. Max yab i c’anithal i ebchal ax i tsu’tal, ni abal jay yab ne’ets qui ejtou qui c’anitha’ a Dios axi yab i tsu’tal.  
\v 21 In uchbixtal a Dios ax tu pitha’ jats axe’: Max i c’anithal a Dios, qui c’anitha’ an ebchalabchic c’al a Cristo jaye. 
\c 5  
\s1 Yab cu atan c’al jahua’ yab alhua’ teje’ al an hualab c’ay’lal 
\p  
\v 1 U it ejatlithits huahua’ c’al a Dios max i belal abal a Jesús ja’its a Cristo axi abnenec teje’ tsabal c’al a Dios. Max i c’anithal i tatalab teje’ tsabal, ne’ets qui c’anitha’ in tsacamilchic jaye.  
\v 2 Max i c’anithal a Dios ani qui t’aja’ jahua’ jaja’ tucu uchbiy, i tso’obits abal ne’ets qui c’anitha’ in tsacamilchic jaye.  
\v 3 Qui chubax c’anitha’ a Dios ani ne’ets qui lejat putu c’al in uchbixtalchic, ani yab q’uibat jahua’ tu uchbiyal qui t’aja’.  
\v 4 Max u it ejatlithits c’al a Dios ani i belalits a Jesús, yab tu atal jahua’ yab alhua’ teje’ ti al an hualab c’ay’lal.  
\v 5 Expith max i belal abal a Jesús ja’its in Tsacamil a Dios, yab ne’ets cu ejtohuat cu atan c’al jahua’ yab alhua’. 
\s1 Olnab in Tsacamil a Dios 
\p  
\v 6 Ja’its a Jesucristo axi che’nec teje’ tsabal ani pujan. Ja’its jaja’ ax in huac’la’ in xits’al tam ti tsemets ti al an cruz. Yab expith chich ani pujan, jaye in huac’la’ in xits’al tam ti tsemets ti al an cruz. Antsana’ tu olnab a Jesucristo c’al an Espíritu Santo axi ets’ey pel in ey hualim in olnal i cau axi lej chubax.  
\v 7 Hua’ats ox i olnom ti eb ax in junat olnal i cau antsana’ tin cuenta a Jesucristo. Pel i Tata Dios, ani pel jaja’ ax u bijiyab ti Cau, ani pel an Espíritu Santo.  
\v 8 Hua’ats jaye ox i olnom teje’ tsabal. Pel an Espíritu Santo, ani pel im pujantal a Jesucristo, ani pel in tsemtal a Jesucristo. Aniye jaye axe’ xi oxlom in junat olnal i cau tin cuenta a Jesucristo.  
\v 9 I belchal in olnomtal i inic teje’ tsabal, ani más in lej tomnal qui belchi in c’athpich chubax olnomtal a Dios tin cuenta in Tsacamil.  
\v 10 Max i belal in Tsacamil a Dios, ojni’ i bats’umalits ti ichich in olnomtal a Dios. Max yab i belchal in olnomtal a Dios tin cuenta in Tsacamil, ojni’ i t’ajal ejtil max u janamcau a Dios.  
\v 11 Cum in olnamalits a Dios abal tu pithamalits i it ejattalab abal ets’ey tin ebal in Tsacamil.  
\v 12 Ani i cua’alits i it ejattalab max c’uajat ti ichich in Tsacamil a Dios Jesucristo. Max yab c’uajat, yab i cua’al i it ejattalab. 
\s1 An ts’alabchixtalab 
\p  
\v 13 Nan tu thuchanchal tata’chic ax a belamalits in Tsacamil a Dios, abal c’al axe’ xi cau jats ta ca lej tso’obna’ abal a cua’alits i it ejattalab abal ets’ey. 
\p  
\v 14 Lej thacat i ichich c’al a Dios, cum i tso’obits abal tu ats’al jahuaquitsq’ui qui conchi in culbetal.  
\v 15 Ani max i tso’obits abal a Dios tu lej ats’anchal i conchixtal, i tso’obits jaye ti lej ichich abal ne’ets tucu pitha’. 
\p  
\v 16 Max qui tsu’u i ebchalab c’al a Cristo quin t’aja’ i hualabtalab c’al yab ca tsemets, qui conchi a Dios ca paculanchat ani ne’ets ca jilan ca c’uajiy ejate. Hua’ats i hualabtalab ca t’ajan c’al ca tsemets, ani yab u ulal abal qui conchi a Dios abal quim paculanchi nixe’.  
\v 17 Aba ani’ patal pel i hualabtalab max qui t’aja’ jahua’ yab alhua’, bel hua’ats i hualabtalab ca t’ajan yab c’al ca tsemets. 
\p  
\v 18 I tso’obits abal yabats u xe’ets hualbibil axi it ejatlithits c’al a Dios, cum u lej beletnab c’al in Tsacamil a Dios ma yab u tacnal c’al an teneclab. 
\p  
\v 19 I tso’obits abal huahua’ pel tu c’al a Dios ani axi yab exlom c’al a Dios u tala’ abatnab c’al an teneclab. 
\p  
\v 20 I tso’obits jaye abal lej chubax che’nequits in Tsacamil a Dios teje’ tsabal, ani ja’its jaja’ ax tu pithamalits an tsalpathtalab abal qui exla’ a Dios axi expith chubax. Tu pithamalits i it ejattalab abal ets’ey ani xo’ u ts’at’bathits huahua’ c’al in Tsacamil a Dios Jesucristo axi lej chubax pel a Dios.  
\v 21 Jaxtam ichich hual tsacamilchic, ca lej t’aja’ ti cuenta yab ca c’ac’na’ i pil dios axi yab chubax. Amén.