\id 2TI  
\h 2 TIMOTEO 
\toc1 In chabtal an dhutsadh úw xin abnaꞌ na Pablo abal na Timoteo 
\toc2 2 TIMOTEO 
\toc3 2 Ti. 
\mt2 In chabtal an dhutsadh úw xin abnaꞌ na Pablo abal na 
\mt1 Timoteo 
\c 1  
\s1 Na Pablo in dhutsuntsal na Timoteo 
\p  
\v 1 Nanáꞌ, xu bij Pablo, tin abatwálejil na Jesukristo, in abadh abal na Dios anchanꞌ tin leꞌnaꞌ. Anchanꞌ xan tin ulúmal na Dios ke neꞌech ti ku pidhaꞌ an ti xeꞌchintaláb xi yab in koꞌol in okʼontal xi xoꞌ i koꞌolich abal u kʼwajatich kʼal na Kristo Jesús.  
\v 2 Timoteo, tu dhutsuntsal jechéꞌ an ti úw, xi nanáꞌ tu chuꞌtal jelti jun u chakámil. U léꞌ ka bachʼwal an alwaꞌtaláb, an yajnantsixtaláb ani an kʼijidhtaláb xi tál ba na Dios an Tátaꞌláb ani ba ni Ajátik Jesukristo. 
\s1 Ka tʼilál echʼekʼi na Kristo 
\p  
\v 3 Echʼekʼi tam tu chalpayal bu ólábil akal i kʼij, u pidhál ti jalbintsixtaláb na Dios xin kʼwajat u tʼójontsal kʼal jun u alwaꞌ chalab jelt xan tin tʼajámal nu wejeꞌ pakéliltsik.  
\v 4 Tam u chalpayal nin jaꞌmál na wal, u léꞌ tʼajat tu chuꞌu abal kin kʼijidhmé.  
\v 5 Pos u chalpayal na tsubax belomtal xa koꞌol. Na pulek, xin bij Loyda ani na nánaꞌ Ewnise okʼoxtsik tin bachʼúmal jechéꞌ an belomtaláb ani u choꞌób alwaꞌ ke tatáꞌ anchanꞌ teye ta belom. 
\p  
\v 6 Jaxtám tu takʼyal abal ka óntsi ka éynaꞌ más chapik an awiltaláb xi ti pidhámal na Dios tam tu kʼwajbantsi an tu kʼubak ba na éb.  
\v 7 Pos na Dios yab tu pidhámal jun i ejattal jikʼelom, tu pidhámal an ti Tʼokat Ejattaláb abal ku likey, ku kʼanidhaxin ani abal ki ejto jeye ki kuxuy xowaꞌ in leꞌnál ni tʼuꞌúl.  
\v 8 Yab ka tidhenaꞌ ka tʼilaꞌ an Ajátikláb tin tamét an atiklábtsik, nibal ki tidhebé kʼal nanáꞌ tu kwenta abal in kʼwajat tin wikʼnél kʼal Jajáꞌ tin kwenta. Alwaꞌ más ki xeꞌchin ka tʼilaꞌ an alwaꞌ tʼilab maske ka bachʼu i yajtsiktaláb jelti xi nanáꞌ u bachʼwal, xantikʼi ti ki pidhaꞌ ti chápláb na Dios.  
\v 9 Na Dios tu loꞌo ani tu kaniy abal ki júnaꞌich jun i xeꞌchintaláb tʼokat, yab abal wawáꞌ i tʼajámal jun xataꞌ alwaꞌ. Tu kaniy abal Jajáꞌ anchanꞌ tin leꞌnaꞌ ani kʼal tin kwenta an alwaꞌtaláb xi tu pidhaꞌ kʼal tin kwentakʼi na Kristo Jesús. Na Dios tu pidhámal an ti alwaꞌtaláb asta tam ti yabél tujenek jechéꞌ an kʼayꞌlá.  
\v 10 Por xoꞌ, in xalkʼámich jechéꞌ an alwaꞌtaláb tam tin abaꞌ ka tsích ni Loꞌóxil Jesukristo, xin átantsi tin cháp an chemlá. Ani kʼal an alwaꞌ tʼilabkʼi, tu pidhaꞌ ki choꞌóbnaꞌ abal neꞌech ki kóꞌoy an xeꞌchintaláb xi yab in koꞌol in okʼontal ani yabich neꞌech ku kʼachey. 
\p  
\v 11 Jaꞌich kʼal tin kwenta jechéꞌ an alwaꞌ tʼilab tin bijyámal na Dios tin óltsix, tin abatwále ani abal ku okʼtsi xi yabtsik u judío.  
\v 12 Jaxtám ti exom u achʼál ejtal jechéꞌ an yajtsiktaláb kʼal jechéꞌ tin kwenta. Por yab u tidhenál, pos u choꞌóbich xitaꞌ nu belámal ani u choꞌób alwaꞌ ke Jajáꞌ in koꞌol i awiltaláb abal tin beletnaꞌ asta kin bajaw xowkʼi Jajáꞌ ti ka tsích juní. 
\p  
\v 13 Ka óntsi ka éynaꞌ an alwaꞌ okʼtsixtaláb xi tu pidhámal, ka óntsi ta belom ani ta kʼanidhax abal i kʼwajatich kʼal na Kristo Jesús.  
\v 14 Kʼal nin tolmixtal an Tʼokat Ejattaláb xi kʼwajat ba wawáꞌ, ka beletnaꞌ xowaꞌ ti punkʼuntsámal na Dios. 
\p  
\v 15 Jelt xan ta achʼámalich, ejtal xu kʼwajíltsik ban chabál xi Asia tin jilaꞌtsik; kʼal jajáꞌtsik taꞌ ti kʼwajat na Fijelo ani na Ermójenes.  
\v 16 Ke an Ajátikláb kin kóꞌontsi ti yajnantsixtaláb na Onesíforo ani nin kidhtal jeye, abal jajáꞌ yáníl tʼajat tin kʼijidhmédhámal ani yab in tidhenaꞌ tin álnaꞌ maske in balidh ban wikʼaxteꞌ.  
\v 17 Yab in tidhenaꞌ, xowaꞌ in tʼajaꞌ tokot tam ti tsích Roma, in óntsi tin aliy, asta tin elaꞌ.  
\v 18 Ke an Ajátikláb kin walkaꞌ kin elaꞌ an yajnantsixtaláb tam kin bajaw jachanꞌ an kʼij xowkʼi ti ka tsích juní. Tatáꞌ a choꞌób alwaꞌ xan tin tolmiy tam tin kʼwajay Efeso. 
\c 2  
\s1 Jun in alwaꞌ soldadojil na Jesukristo 
\p  
\v 1 Ani tatáꞌ Timoteo, xi tu chuꞌtal jelti jun u chakámil, ka bachʼu an chápláb xi tál ba na Kristo Jesús kʼal tin kwenta an alwaꞌtaláb xi ti pidhámal.  
\v 2 Xowaꞌ xa achʼámal u ulal tin tamét yán an atiklábtsik, jaꞌich jechéꞌ ka punkʼuntsi an payꞌlomlábtsik xi alwaꞌ iniktsik, xa chuꞌtal ke neꞌech kin tʼójontsi abal kin okʼtsi jeye kʼeꞌettsik. 
\p  
\v 3 Por tatáꞌ xi exom a tʼójontsal na Jesukristo, ka kuxuy an yajtsiktaláb jelti jun i alwaꞌ soldado.  
\v 4 Ni jun i soldado xi kʼwajat in tʼójontsal in okʼlékil in tʼajál kʼeꞌet i tʼojláb xi yab ka utsan kʼal jajáꞌ, pos tokot koꞌol kin exbay xowaꞌ ka utsan kʼal nin okʼlékil.  
\v 5 Aníl jeye, max jun xitaꞌ kʼwajat ti ubátʼ, yab neꞌech kin ejto kin átaꞌ xowaꞌ u átáb, max yab ka ubátʼin xan ti yejat kin tʼajaꞌ.  
\v 6 Xu tʼojnal ba jun i aleláb, jajáꞌ okʼox in tomnál kin bachʼu xowaꞌ in lujyal xantʼéy ka labey ba jachanꞌ an aleláb.  
\v 7 Ka chalpay alwaꞌ xowaꞌ tu utsál ani neꞌech ki pidhan ka exbay ejtil kʼal an Ajátikláb. 
\p  
\v 8 Ka chalpay na Jesukristo, xi waꞌchin bin kidhtal an wejeꞌ pulek takʼix Dabid ani ejech ti ít tam ti chemdhá. Anchanꞌ xan tin ulal an alwaꞌ tʼilab xu tʼilál.  
\v 9 Kʼal tin kwentakʼi jechéꞌ an alwaꞌ tʼilab u achʼál yán i yajtsiktaláb, asta in kóꞌyáb wikʼats jelti jun i inik xi atʼax, por nin káwintal na Dios yab jaꞌ kʼwajat wikʼats.  
\v 10 Jaxtám tu kuxyal ejtal jechéꞌ abal tin alwaꞌbíl xi takudhichtsik kʼal na Dios, abal kin bachʼutsik jeye an labidh tʼokat loꞌoxtaláb xi yab jaykʼi in koꞌol in okʼontal, xi neꞌech ki bachʼu abal u kʼwajatich kʼal na Kristo Jesús. 
\p  
\v 11 Jechéꞌ tsubax tʼajat: 
\q1 Max u kʼwajatich jelti max u chemnek junax kʼal Jajáꞌ, neꞌech jeye tám ku kʼwajay kʼal Jajáꞌ; 
\q1  
\v 12 max ki achʼaꞌ i yajtsiktaláb kʼal Jajáꞌ tin kwenta, neꞌech weye tu takʼix kʼal Jajáꞌ. 
\q1 Max ki ulu ke yab i exlál, Jajáꞌ neꞌech jeye kin ulu ke yab tu exlál. 
\q1  
\v 13 Max wawáꞌ yab ki tʼajaꞌ xowaꞌ i ulal, Jajáꞌ echʼekʼi Jaꞌ in tʼajál xowaꞌ in ulal, 
\q1 pos Jajáꞌ yab jaykʼi u jalkʼunal xan ti jeye. 
\s1 Jun i alwaꞌ tʼojnal 
\p  
\v 14 Ka witsʼkʼontsitsik jechéꞌ ani ka punkʼuntsi tin tamét an Ajátikláb abal yab ka kʼwajay ti káwlíxtsik kʼal tin kwentakʼi i tʼilabtsik. Pos jechéꞌ an káwlíxtaláb yab xataꞌ tu éynal, in ojtsalkʼi tin chalab xin achʼáltsik jechéꞌ.  
\v 15 Ka tʼajaꞌ alwaꞌ na tʼojlábil, abal ki ulich tin tamét na Dios jelti jun i alwaꞌ tʼójontsix, xi yab in koꞌol ni jun xataꞌ xantʼokʼál ti ka tidhebé, abal in éynál in lujtalkʼi an tsubax okʼtsixtaláb.  
\v 16 Yab ka tʼajaꞌ ti kʼij i tʼilabtsik xu tʼilnal techéꞌ ti kʼayꞌlá ani i aniꞌ tʼilabtsik xi yab xataꞌ in jalbíl. Pos xin tʼajáltsik anchanꞌ, yab in ejtowaltsik ka kʼwajay xan tin léꞌ na Dios  
\v 17 ani nin okʼtsixtal xi jechéꞌtsik, in junwal jelti an kʼacheltaláb xi neꞌech u kʼachel u kʼachel más. Jaꞌich jechéꞌ in tʼajáltsik na Imeneo ani na Fileto,  
\v 18 xin jilaꞌtsik kin belaꞌ an tsubaxtaláb abal in ulaltsik ke an ejexnich watʼenekich ani anchanꞌ, exom in ojtsal tin belomtal xi taltsik.  
\v 19 Por na Dios in kʼwajbámalich jelti jun i likat akanláb, an lej tsubaxtaláb xin koꞌol jun i exól xin ulal enchéꞌ: “An Ajátikláb in exláltsik xi Jajáꞌ in dhabal.” Ani “ejtal xin ólantsalichtsik na Jesukristo, yabich yejat kin tʼajaꞌtsik i walastaláb.” 
\p  
\v 20 Ba jun i atá púlek, yab tokotkʼi waꞌach xataꞌ xi tʼajadh kʼal i oro o kʼal i plata, waꞌach jeye xataꞌ xi tʼajadh kʼal i teꞌ o kʼal i kʼutʼ; taltsik exbadhkʼi xowkʼi tu éynal por taltsik abal ka éyná echʼekʼi.  
\v 21 Anchanꞌ jeye, abal jun xitaꞌ ka éyná jelti alwaꞌ tʼojnal juniniꞌkʼi abal an Ajátikláb, yejat ka kʼwajay tʼokat ani yab yejat kin tʼajaꞌ xowaꞌ yab alwaꞌ; anchanꞌ neꞌech tám ka ejtowat ka éyná kʼal xowaꞌkichkʼi xi alwaꞌ. 
\p  
\v 22 Ka kuxuy jeye xantʼéy in chalpayal yab alwaꞌ tam jún bél kwitóle, ka óntsi ka tʼajaꞌ xowaꞌ lujat, ka óntsi ka belaꞌ na Jesukristo, ka kʼanidhaꞌ xi kʼeꞌettsik ani ki kʼwajay alwaꞌ kʼal xin ólantsaltsik an Ajátikláb kʼal jun in ejattal tʼokat.  
\v 23 Yab ka tʼajaꞌ ti kʼij i káwlíxtaláb xi yab xataꞌ ti alwaꞌ nibal xataꞌ in jalbíl; a choꞌóbich abal jachanꞌ, in tʼajál i péjéxtaláb.  
\v 24 Pos jun in tʼojnálil an Ajátikláb yab yejat ka xeꞌchin ti péjéx, yejat kin kʼakʼnaꞌ ejtalkʼitsik, u awil ti okʼtsix ani kin kuxuy xowaꞌkich.  
\v 25 Kin tawnaꞌ kʼal jun i chaꞌat ejattaláb xu tomnaxtsik abal kin chuꞌu max na Dios, kin pidhaꞌichtsik jeye kin chalpách kin jilaꞌ ti walablom ani kin exbaytsik an tsubaxtaláb,  
\v 26 abal anchanꞌ, kin lamaꞌichtsik nin wal ani ka kaléch xon tu kóꞌyáb wikʼats kʼal an lej atʼax ti tʼajtsinal kʼál xan ti ka leꞌná. 
\c 3  
\s1 Xan ti neꞌech ka kʼwajay an atiklábtsik tam in okʼontalich an kʼij 
\p  
\v 1 Yejat jeye ka choꞌóbnaꞌ ke tam in okʼontalich jechéꞌ an kʼij, neꞌech ka waꞌchin i kʼijtsik xi yajtsik.  
\v 2 An atiklábtsik tokot neꞌech kin kʼanidhaꞌ jajáꞌkʼitsik tinbáꞌ, neꞌech ti chʼeꞌnetsik, neꞌech kin tʼekʼaꞌtsik tinbáꞌ kʼal tin kwenta xantʼéy in éy ani neꞌech kin pojkaꞌ xi kʼeꞌettsik. Neꞌech jeye kin odhbijiytsik na Dios ani an iniktsik, yab neꞌech kin tʼajaꞌ ti kʼij nin tátaꞌtsik, yabtsik neꞌech kin pidhnál i jalbintsixtaláb ani yabtsik neꞌech kin leꞌnaꞌ kin tʼajaꞌ xowaꞌ in léꞌ na Dios.  
\v 3 Yab neꞌech kin kʼanidhaꞌ nin at kidhábtsik, yab neꞌech ti pakwlantsix nibal neꞌech kin walkaꞌ ka pakwlantsat, neꞌechtsik ti jánum káw, yab neꞌech kin ejto kin kuxuytsik xowaꞌ in leꞌnál, neꞌech ka atʼaxmétsik tʼajat ani neꞌech kin pojkaꞌtsik ejtal xowaꞌ alwaꞌ.  
\v 4 Neꞌech jeye kin chinat ólnaꞌ xowaꞌ in utsámal jun xitaꞌ ke yab neꞌech kin ólnaꞌ, yabtsik neꞌech kin chalpay okʼox xowaꞌ in tʼajál, neꞌech kin tʼekʼaꞌtsik tʼajat tinbáꞌ, tokot neꞌech kin aliytsik xowaꞌkʼi jajáꞌtsik in kulbetnál ani yabtsik neꞌech kin aliy a Dios.  
\v 5 Neꞌech kin wáynaꞌtsik ke in tʼajál xowaꞌ in léꞌ na Dios, por neꞌech kin pojkantsi tin awiltal. 
\p Yab ki junkun níwéꞌ kʼal jachanꞌ an atiklábtsik.  
\v 6 Taltsik xi jechéꞌ in kidhtaltsik, u ochel ban atátsik ani in kʼambiyal an uxumtsik xi walbidhtsik tʼajat ani xin leꞌnál tʼajat xowaꞌkich xi yab alwaꞌ.  
\v 7 Jechéꞌ an uxumtsik echʼekʼi in léꞌ kin witʼaꞌtsik xowaꞌ u okʼtsixnáb, por yabtsik in ejtowal kin exbay an tsubaxtaláb.  
\v 8 Ani anchanꞌ, jelti an dhimantsik xu bijyáb ta Janes ani ta Jambres in tomnaꞌtsik na Moisés, anchanꞌ jeye jechéꞌ an iniktsik tin pojkáltsik an tsubaxtaláb. Jechéꞌ an iniktsik yab alwaꞌ in chalab in koꞌol ani xalkʼátsik kʼal na Dios abal yab tsubax tu belomtsik.  
\v 9 Por yab neꞌech kin ejto kin tʼajaꞌ xataꞌ lej yán, kom neꞌech ka chuꞌtattsik kʼal an atiklábtsik xu kʼwajíl ban kʼayꞌlá ke yabtsik chalpadh, anchanꞌ jelt xan tin tamu xi cháb an dhimantsik xi tomná kʼál na Moisés. 
\s1 Na Pablo in utsaꞌ jun i punkʼuntsixtaláb tayílich na Timoteo 
\p  
\v 10 Por tatáꞌ Timoteo a wéwnámal alwaꞌ nu okʼtsixtal, xan ta chuꞌtal in kʼwajíl, xowaꞌ nu léꞌ ka tʼajan, xan tin belom, xan tu koꞌol an chaꞌattaláb, xan tin kʼanidhax ani xan tu kuxyal xowaꞌkich.  
\v 11 Ani a choꞌób jeye xan tin kajnadh ani xan tu achʼámal i yajtsiktaláb, jelti an yajtsiktaláb xu tamu ban bitsowtsik xi Antiokía, xi Ikonio ani xi Listra, por an Ajátikláb tin tolmiy ku kuxuy ejtal jechéꞌ.  
\v 12 Aníl jeye, ejtaltsik xin léꞌ ka kʼwajách jelt xan tin léꞌ na Kristo Jesús, neꞌech jeye ka atʼantsik;  
\v 13 por xi atʼaxtsik ani u kʼambixtsik más jaꞌ kʼibenek xowaꞌ neꞌech in tamwal, neꞌech ti kʼambixtsik ani neꞌech jeye ka kʼambiyattsik. 
\p  
\v 14 Por tatáꞌ, ka óntsi ki kʼwajay jelt xan ta ejtómalich, kom a choꞌóbich ke jaꞌich na tsubax ani a choꞌób alwaꞌ xitaꞌ ti okʼtsámal.  
\v 15 A exlál jeye an Tʼokat Dhuslab asta ta chipíl, xi neꞌech kin ejto ti ki chalpadhmédhaꞌ abal ka bajaw an loꞌeltaláb ke jaꞌich kʼal tin kwentakʼi na belomtal xa koꞌol ba na Kristo Jesús.  
\v 16 Ejtal xowaꞌ kʼwajat dhutsadh ban Tʼokat Dhuslab, a Dios in chalab ani alwaꞌ abal ka okʼtsixná, abal ka tawnaxná, abal ka kʼwiyaxná ani abal ka takʼixná ani anchanꞌ, ka júnájich jun i xeꞌchintaláb lujat,  
\v 17 pos xitaꞌkʼi xin belálich na Dios, kin choꞌóbnaꞌ kidhat abal kin witʼaꞌ kin tʼajaꞌ ejtal xowaꞌ alwaꞌ. 
\c 4  
\p  
\v 1 Tin tamét na Dios ani an Ajátikláb Jesukristo, xi neꞌech ka tsích jelti jun i Pulek Takʼix abal kin lújundhaꞌ xi chemnektsik ani xi ejattsik, tu punkʼuntsal tʼajat  
\v 2 ka tʼilaꞌ an alwaꞌ tʼilab; ka witsʼkʼontsaltsik tam waꞌach xan ti ani xontikʼi ti ka ejto. Ki kʼwiyxin, ki tawnaxin ani ki takʼxin kʼal yantam i chaꞌattaláb ani i okʼtsixtaláb.  
\v 3 Pos neꞌech kin bajaw an kʼij tam an atiklábtsik yab neꞌech kin leꞌnaꞌ kin achʼaꞌtsik an alwaꞌ okʼtsixtaláb, tokot neꞌech kin aliytsik yán i okʼtsixtsik abal ka okʼtsin xowaꞌ jajáꞌkʼitsik in kulbetnál kin achʼaꞌ.  
\v 4 Neꞌech kin kuxuknaꞌtsik an tsubaxtaláb ani neꞌech kin belaꞌtsik más xowaꞌkichkʼi in aniꞌ tʼilábil i wejéꞌlábtsik.  
\v 5 Por tatáꞌ Timoteo, yab ka kʼibdhaꞌ ni jaykʼi na alwaꞌ chalab, ka kuxuy ejtal an yajtsiktaláb, ka óntsi ka tʼilaꞌ an alwaꞌ tʼilab ani ka óntsi ka tʼajaꞌ alwaꞌ nin tʼojlábil na Dios.  
\v 6 Pos exomich ti kʼunel xowkʼi ti neꞌech kin kʼwajbá jelti jun i pikbantsixtaláb abal a Dios; exomich in bajwal an ora xowkʼi ti neꞌech kin chemdhá.  
\v 7 U tʼajámalich alwaꞌ an tʼojláb xowaꞌ tin punkʼuntsámal na Dios, jelt xan tin tʼajál nin tʼojlábil jun i alwaꞌ soldado; u okʼyámalich ejtal xowaꞌ yejat ku tʼajaꞌ ani yab u jilámal tin belom.  
\v 8 Ani xoꞌ, tin aytsímich xowaꞌ u átámal abal in kʼwajinek in lujtalkʼi, xi neꞌech kin pidhan tam kin bajaw an kʼij kʼal an Ajátikláb xu lújundhom in lujtalkʼi. Ani yab tokot nanáꞌkʼi neꞌech ti kin pidhaꞌ, neꞌech jeye ka pidhantsik ejtal xi kʼwajattsik in aytsím kʼal yantam i kʼanidhaxtaláb tam ka tsích juní. 
\s1 An punkʼuntsixtaláb xi utsan jajáꞌkʼi na Timoteo 
\p  
\v 9 Ka tʼajaꞌ abal ki tsích jikʼat ti kin álnaꞌ;  
\v 10 pos na Demas tin jilámal abal in leꞌnaꞌ más xowaꞌ waꞌach techéꞌ ti kʼayꞌlá ani kʼale ban bitsow xi Tesalónika. Na Kresente kʼale ban chabál xi Galasia ani na Tito ban chabál xi Dalmasia.  
\v 11 Tokot na Lukas techéꞌ kʼwajat kʼal nanáꞌ. Ka aliy na Markos ani ka tsiꞌdhaꞌ jeye, abal jajáꞌ neꞌech kin ejto ti kin tolmiy kʼal nin tʼojlábil na Dios.  
\v 12 Na Tíkiko u abaꞌ ban bitsow xi Efeso.  
\v 13 Tam ki tsích, ti kin tsiꞌdhantsi an tu wát xu jilámal Troas bin kʼimáꞌ na Karpo; ti kin tsiꞌdhantsi jeye an ti dhutsadh úwtsik, por u yéntsal más ti kin tsiꞌdhantsi an ti ótʼtsik xi dhutsuntsidh. 
\p  
\v 14 Na Alejandro, an lejkix patʼáltsik, tin tʼajtsámalich tʼajat yán xataꞌ yab alwaꞌ; por neꞌech ka pidhan kʼal an Ajátikláb xowaꞌ in lujyal kʼal tin kwenta xowaꞌ in tʼajámal.  
\v 15 Ka kóꞌoy teye tʼajat i kwenta kʼal jajáꞌ, pos jajáꞌ yab tʼajat in léꞌ kin chuꞌu ki tʼilaꞌ an tsubaxtaláb. 
\p  
\v 16 Tam ti jidhtal in kʼwajay ku loꞌo tubáꞌ tin tamét an awiltalábtsik, ni jun xitaꞌ yab tin tolmiy; ejtaltsik tin jiloloy kwetém. Nanáꞌ u konyal abal ka pakwlantsattsik kʼal na Dios abal anchanꞌ tin tʼajaꞌtsik.  
\v 17 Por an Ajátikláb kʼwajay kʼal nanáꞌ ani tin pidhaꞌ ti chápláb abal ku ejto ku okʼoy ku tʼilaꞌ an alwaꞌ tʼilab ani kin achʼaꞌtsik jeye ejtal xi yabtsik u judío. Anchanꞌ tin loꞌo an Ajátikláb abal yab xataꞌ kin tʼajtsin kʼal an atʼax, maske in kʼwajay jelti max kʼunatich tʼajat bin wiꞌ an padhum.  
\v 18 Ani neꞌech jeye ti kin loꞌo kʼal ejtal xowaꞌ yab alwaꞌ ani neꞌech ti kin belkóm abal kin kʼwajay neye walkʼiꞌ xon ti neꞌech ti takʼix. ¡Ke an labidh tʼokattaláb kin kóꞌoy Jajáꞌkʼi malilíl i kʼij! Anchanꞌ ka tʼajan. 
\s1 An chapnédhomtaláb ani an lábtʼajaxtaláb xi tin okʼontal 
\p  
\v 19 Ti kin chapnédhantsi an ta Priska ani na Akila. Ti kin chapnédhantsi jeye ejtal xu kʼwajíltsik bin kʼimáꞌ na Onesíforo.  
\v 20 Na Erasto jilkʼon ban bitsow xi Korinto ani na Trófimo u jilaꞌ u yaꞌul ban bitsow xi Mileto.  
\v 21 Ka tʼajaꞌ abal ki tsích tam yabél chamay. Ti abtsaltsik ti chapnédhomtaláb na Ewbulo, na Pudente, na Lino, na Klawdia ani ejtal an kidháblábtsik.  
\v 22 Ke an Ajátikláb Jesukristo ka kʼwajay kʼal tatáꞌ ani ka bachʼwaltsik echʼekʼi nin alwaꞌtal na Dios. Anchanꞌ ka tʼájan.