\id ZEP - Huli Bible [hui] -Papua New Guinea 2011 (web version -2013 bd) 
\h SEBANAIA 
\toc1 Sebanaia 
\toc2 Sebanaia 
\toc3 Seb 
\mt1 Sebanaia  
\imt1 Mbuga ogoniha gilibu ngarunaga nemandi ogo  
\ip Sebanaia ibu Anduane Homogonaga bi mana \w latagi\w* halu henedagoni Kini Yosaiahanda Yuda wali agalime mana ko bialu hearu mo tiga bialu Anduane Homogonaga mana bayale hangu laga winidagua lalu helayago naheha Sebanaia ibugua ala latagi halu hene. 2 Kini 22-23 handabe.  
\ip Sebanaia ibugua Yuda wali agali hearuhondo lalu, Tígua mana ko bialu kamiruni wahadaba. Mana ko bialu haabo harimiyagua nde Anduane Homogohanda tí kamigoha genda timbuniore ibilolebira, lalu latagi hene.  
\ip Sebanaiahanda bi mende latagi halu lalu, Wali agali dindi tara tarani bu karu tigua Yuda wali agaliruhondo genda mo miaga karu ti mana ko bialu kagonaga Anduane Homogohanda pani nelo mulebira, lalu latagi hene. Yarusaleme mo ko halu gialabaga bulebirago mani wali agali tini mo dindiha howa bu mini beregedalu mana tigabi ngaru talialu bialu karu ti dege bayale holebira, lalu mbiwia henego gilibu nga.  
\iot Bu̱lu̱baga buwa kuni gilibu ngago (1.1–2.3)  
\io1 Anduane Homogonaga Horo ibirangi ko holene wulebirago \ior 2.4-15\ior*  
\io1 Dindi tara tara Yuda dindi kaware ngaru mo ko hai holebirago \ior 3.1-20\ior*  
\io1 Yarusaleme pani nalu mani mini beregedowa bayale holebirago  
\c 1  
\s1 Anduane Homogonaga Horo ibirangi wali agali dabaki bulebirago ogo  
\p
\v 1 Amono igini Yosaia ibu Yuda wali agalinaga kini heangi Anduane Homogohanda Sebanaiahondo bi mbira ogo lamini. Sebanaia ibu Kini Hesegaianaga damene ti darama mandagi hene. Sebanaia aba Kusi howa Kusi aba Gedalaia halu Gedalaia aba Amaria hene. Amaria ibu aba Hesegaia hene.\x + \xo 1.1 \xt 2 Kin 22.1–23.30, 2 Bit 34.1–35.27\x*   
\p
\v 2 Anduane Homogo ibugua Sebanaiahondo lamialu lalu, I̱na dindi bibahendeha mbirale ngaru bibahendeore mo ko hai holebero.  
\v 3 Ani bialu wali agalibi nogo biango tara tara bu karubi ega bedarubi ibaha wena bedarubi bibahende wali agalinaga mana ko bilo haru pubagi haga ngago damene mbira yu wahene nangelo bibahendeore mo wahaiore holebero. I̱ Anduane Homogo i̱na bi o ledogoniore.   
\p
\v 4 Wali agali Yuda dindihabi Yarusalemehabi karu bibahende homelo bo wahai holebero. Ani bialu mbirale dama mitangi bialu bi pupu wulenaga gime wabini mini Bala ngaru bibahendebi mbirale uruninaga \w loma\w* binigo mo miaga agali bu karubi bibahendeore bo wahai holebero. Wali agali mani holobadarume agali abogo mbira ogoria hene lalu manda nabilo balu bo mundulo wahaiore holebero.  
\v 5 Ani bialu wali agali tini anda dangini irigi howa ni ege yakundirunaga mini yaraga halu ge duli hanga howa bi pupu wiaga karubi bibahende bo wahai holebero. Ani berogola wali agali marume i̱hondo bi lalu howa heneneore iname Anduane Homogo talima pialu kamagoni lolebira. Ani lalu ha howa mani ti beregedalu puwa mbirale dama mitangi bialu gime wabini bi pupu wiaga mini Molege laga ngagoha puwa lalu, Iname heneneore laramago iname Molegeore talima poleberema laga ka. Ani laga karu bibahende bo wahai holebero.  
\v 6 Wali agalime i̱ erembira ngialu i̱ni talima íbu nabi wahalu puabo howa tigua i̱hondo langialu, Ina haru bamba habe, lalu halebi naheore puabo haya. I̱na wali agali uruni tibi mo ko hai holebero laya, lene.   
\p
\v 7 Ainde Anduane Homogonaga Horo kaware hapara hayada. Ani manda buwa tígua ibu karia ibuwa mogo lalu bi nale halimu. Anduane Homogohanda wali agali nogo sibiru bo lomabu delagadagua ibunaga wali agaliru bo wahai hole manda manda bu kagoni ndobe. Ibugua anidagua bule kago wali agali maru de hondo ibilonaga ibugua ti lamialu lalu, Tí Anduane Homogo ibuninaga deni howa maname tíha ko mbira para nahe holenenaga biaga wiago ala bialu ibalimu, lene.  
\v 8 Anduane Homogohanda lalu, I̱naga wali agali bo wahai holene horo ogoni tagira ibirangi kininaga agali dunini karubi kini ibuni igini bu karubi wali agali Anduane Homogo ibuni kago manda nabi karume biaga mana ngaru bialu haga karubi ti bibahendeore pani nelo miai holebero.  
\v 9 Wali agali maru i̱ manda nabi bu karume lotu lagadagua lalu howa mbirale page bigi bialu wali agali homelo bo wahalu mbirale dama mitangi bialu bi pupu wule gime wabiniru andaha mo wiaga karubi ti bibahende pani nelo mialu minu bai holebero laya, lene.   
\p
\v 10 Anduane Homogohanda laabo halu lalu, Horo ogoni tagira ibirangi wali agali bibahende Yarusaleme tanonaga panga haraba mini Wena Panga laga kagoria íbu ngoai howa dugu bialu bu karia hale holeberemi. Yarusalemenaga tano gahenge ngagohayagibi dugu bialu karia dege hale holeberemi. Hari nene ngaruha howa tula hongohe lagalaga biaruanebi hale ha dege buleberemi.  
\v 11 Ani hale howa wali agali Yarusaleme tanonaga nira uliulihayagi kamiru tínaga agali haguane biyinaya biabe bialu haga biaruni homai hayadane hondoleberemigo mitangi bialu uruni tinaga dugu bu wia halimu.   
\p
\v 12 Ogoningi ina hale hedo yalu Yarusaleme tanoha ibaga bialu wali agali i̱naga mana ngogo hame nalaga howa hope haga karu ti taya bulebero. Tigua manda bu handalu karia mbirale bibahende tinime biai habehe kamabe tobaho karunigo anidagua nabibeheore ka. Tigua lalu, Anduane Homogohanda wali agali bayale karu biamogo bulene ngago nabiagaya. Wali agali ko biaga karu pani nelo mialu mo ko nahagaya. Anidagua bulene ngago nabi ibu bameore hagaya, ani laga beremiligo ai wali agali uruni i̱na bo wahai holebero.  
\v 13 Agali tara tara bu karume ibalu agali bi uruni laga karunaga mbirale ngaru mo yu piai halu tinaga anda bu karuni bo gialo wahai holebira. Tinaga anda gahenge bu helaga bidaruha tini napaluebira. Tinaga \w gerebi\w* mabuha gerebi hanga hengedago ai lini dalu pingidowa \w waini\w* iba hambialu na nabulebira, lalu Anduane Homogohanda lene.\x + \xo 1.13 \xt Man 28.30, 28.38-40, Amo 5.11, Mai 6.15\x*   
\p
\v 14 Anduane Homogohanda wali agali bibahende mo dabaki bulene Horo biago tagira ibulene kaware hapara haragoni. Horo ogoningi ami agali hongoheore ha heaguabi bibahendeore gi howa duru lalu dugu biai holebira.  
\v 15 Horo ogoni tagira ibirangi Anduane Homogonaga keba gibi holene wiapani haragola wali agali bibahendeoreme genda yu hai holebira. Ani bialu tinaga bu miniha mo ko hai kagola mbirale ngarubi mo ko hai holebira. Beralibame ni ge haragola dindiha aruma timbuni holebira.  
\v 16 Horo ogoningi pilipe biguliru pi̱pe̱ lalu ami agalime wai bule wai huaro laga laga bima tanoha anda ibalu wai bigi bigi bulebira. Tigua tanonaga ege pabe hongohe bu mabu bini karuha anda puwabi ami agali handa amu nana bu mamage haga anda pabe neneni bu heledaruha anda pu howabi wai hongo howa bulebira.   
\p
\v 17 Anduane Homogo ibugua ogodagua laya, Wali agali bibahendeme i̱hondo mana ko biyagonaga i̱na ti mo ko holenaga ko tara tara ti kagoria íbu ngelolebero. Ani berogola tinaga de kohe ale howa arumaha hariga taya bialu hagagobi holebira. Ani bialu kagola tinaga darama iba pora biradagua bialu homaga bulebira. Ani homaga birarunaga tinginirubi dindini wu togo bialu biango ti to wahene ngaru ngu biradagua ngu bialu wulebira, laya lene.\x + \xo 1.17 \xt Man 28.29, Iba 83.10, Yar 9.22\x*   
\p
\v 18 Horo ogoni tagira ibirangi Anduane Homogonaga keba holene timbuni winigo tagira ibiragola muni ngolo silibarume biamogo bialu tini mbira mo wibe naheore wulebira. Ibunaga keba holene ira hungu ale bialu dindi anda bibahendehaore dai helolebira. Ani bialu wali agali dindini bu karubi bibahende bo wahaiore holebira, lene.   
\c 2  
\s1 Isaraele wali agali tí mini beregedolene nga, lenego ogo  
\p
\v 1 Wali agali dindi ogoria bu hene kamiruni tínime mana tara tara bialu kamirunaga taga nahagaoreya. Tíni nde manda bialu ko birimirunaga taga ho holene nga.  
\v 2 Taga nahe kamiria Anduane Homogohanda ibunaga tandaga holene mo heya haragola tí balawaya bayale dedago lu daho wiaabo nahe abale do taulope hagadagua tí mo ko halu ibunaga tandaga holene ngagome tí irame bo heda haradagua buligo de hondo holene nga.  
\v 3 Wali agali mine nahe tini mini mo dindiha howa Anduane Homogonaga bi mana hale howa mo wa nahaga kamiru tí ibuni karia ibulene nga. Tíni mo dindiha howa mana tigabi ngaru hangu bialu holene nga. Ani bialu harimiyagua nde Anduane Homogohanda wali agali keba halu ti pani nelo mirangi tí heba mandagi namaga naholeberemi.\x + \xo 2.3 \xt Ais 26.20, Amo 5.6, 5.14-15\x*   
\s1 Dindi maru Yuda dindi kaware wia para para bu ngaru mo ko hai holebira lenego ogo  
\p
\v 4 Anduane Homogohanda Pilidia dindi mo ko harangi Gasa tanoha wali agali mini lenego mbiraore hangubi mbira naholebiraore. Asagelono tanohabi naholebiraore. Wali agali Asadodo tanoha karu tinaga waitigime horo mbiru hanguni balu bo togolalu Egerono tanoha karubi bo taliatagi hai halu bulebira.\x + \xo 2.4 \xt Ais 14.29-31, Yar 47.1-7, Ese 25.15-17, Yol 3.4-8, Amo 1.6-8, Seg 9.5-7\x*  
\v 5 Pilidia wali agali maru iba solowara bedago angeangeha paluyu pedamiru Anduane Homogohanda tí mana ko biagaore ka lene kamigo ai ibugua tí mbiraoreali hangubi mbira yu wanahe bo wahaiore holebira.  
\v 6 Tínaga dindi bayale iba angeange wima pedamiruni mani dangi anda holebira. Anda ani ho ngagola agali nogo sibi hinalu haga karume tinaga andira emeneru dindi ogoriani bu howa tinaga nogo sibiru hinalu holebira.  
\v 7 Ani bialu ai Yuda hameigini emene yu wahene karume tínaga dindi ngamiruni maruhayagi ti karulo holebira. Ani karulo howa Yudalirunaga nogo sibiru dindi uruniha hinalu tini Asagelono tanoha palu holebira. Ani bialu Anduane Homogo Yuda wali agalirunaga Ngode Datagaliwabehanda tini mo bayale halu ibuni ti heba mandagi howa ti tininaga dindi ngagoria helo lone mo bayale ho helolebira.   
\p
\v 8 Anduane Homogo Hongo Haiheore kago ibugua lalu, I̱na hale ho hewaria wali agali Moaba dindiha padarumebi Amono dindiha padarumebi tigua i̱naga wali agaliru mege bialu hege lalubi hemiru hale haru. Ani lalu howa bi hongo howa lalu, Tínaga dindi ngamigo karuloleberema, laya.\x + \xo 2.8 \xt Ais 15.1–16.14, 25.10-12, Yar 48.1-47, 49.1-6, Ese 21.28-32, 25.1-11, Amo 1.13-15\x*  
\v 9 Ani layago ai Anduane Homogo haluhe i̱ Isaraele wali agalirunaga Ngode Datagaliwabe kogo i̱nimeore larogo, Moaba wali agalirubi Amono wali agalirubi bibahendeore Sodomo wali agali Gomora wali agalirubi homayadagua homai holebira. Ani homai haragola dindi uruniha nigi hangu andaho holebira. Ani bialu dindiha ibi duguagane uli hangu wialu dindi ogoni mo koore henego ogonibi dege wiaabo holebira. Ai i̱naga wali agali yu wahene emene dagalene hangu karume ti baba wai buwa tinaga mbirale yu karu balu gingila mialu tinaga dindi ngarubi karulai holebira, laya lene.\x + \xo 2.9 \xt Pig 19.24\x*   
\p
\v 10 Moaba wali agali Amono wali agalirubi tigua mine halu ti hangu hongo hetingi hayagonagabi tigua Anduane Homogo Hongo Haiheore kagohondo bi ko layagonagabi ibugua tini pani nelo mialu bulebira.  
\v 11 Anduane Homogohanda ti mo gi taraore holebira. Ibugua dindi bibahendenaga dama mitangi bialu bi pupu wiaga ngaru bibahendeore mo nagalone hai helolebira. Ani biragola wali agali dindi bibahendeha bu karume tininaga dindi hangu hangu ngaruha haga haga buwa Anduane Homogo hangu mitangi bialu ibuhondo lotu lalu holebira.   
\p
\v 12 Wali agali bibahende Sudana dindiha kamiru tí bibahendeore Anduane Homogohanda bo wahai holebira.\x + \xo 2.12 \xt Ais 18.1-7\x*   
\p
\v 13 Ani bialu Anduane Homogo ibuninaga hongo timbuniore kagome wali agali dindi abene uyurayagi Asiria ngagoha padarubi mo ko hai holebira. Ani bialu tinaga tano dunini timbuni Niniba ngagobi mo ko halu bo gialabaga biragola mo ko hene dindi ko ege kelekele mbirale mbira anda naholene wialu wali agali mbira nahe wulebira.\x + \xo 2.13 \xt Ais 10.5-34, 14.24-27, Nah 1.1–3.19\x*  
\v 14 Ani ngagola nogo sibi bulumaga memerubi hangu halu ema bialu piaga tara tara maru bu karubi ti palu ngoai haga wulebira. Waitigime ira tamia dibu pelo mbara lowa anda bini ngaru bibahende bo gialabagabu wahai haragola dindini podope hene wiagoriani ega maru bi lalu birulebira. Anidagua bini ngagoria ega umi tara tara mbiraga biraga bedarume anda gialo wahene kagoria íbu biralu windo haga ngagoria biruwa bi lagalaga bialu birulebira. \fig ... ega umi tara tara ... anda gialo wahene kagoria íbu biralu windo haga ngagoria biruwa bi lagalaga bialu birulebira.|src="HK 9a.tif" size="1" ref="(2.14)" \fig*  
\v 15 Ninibali tigua mitangi bialu ina mo ko holene nawi hongohe wayali kamagonida manda bialu turuho haga ka. Ani bialu dindi maruha tano ngaru bame dege lowa tinaga tano ogoni timbuni duniniore ngabe toba haga ka. Ani manda bu ha kagonigo ai mo ko holene tara tara Ninibaha anda ibulebira. Ani bialu dindi mo ko halu mo labu hene mbira ngagola mbirale ema bialu piaga damene dére biru karu ti hangu dindi dege ho wulebira. Ani ngagola dindi ogoniha bolangua halu pole maru porarume dindi ogoni hondowa tini mogo lalu duru timbuniore lolebira.   
\c 3  
\s1 Anduane Homogohanda Yarusaleme wali agalinaga ko domo wahenego ogo  
\p
\v 1 Yarusaleme-o í̠ mo ko hene mbira o ngegoni. Í̠naga wali agali bu karunaga mana koore Anduane Homogonaga deni ko ngubiore bialu ka. Tigua ibunaga bi mo wahalu tininaga damene bu karu mo ko halu ka.  
\v 2 Tigua Anduane Homogonaga bi hale holene mangaho howa ibugua ti mo tiga bilobi hame nale dege ka. Tigua Anduane Homogohondo mini mbiraore nawi howa ibuhondo ti biamogo bilonaga bi nale haga.  
\v 3 Yarusalemenaga agali haguane hearu ti laiono gabuame tomo garibi lo howa bi hongo howa lalu kaligobi halu agali godi hale haga karu tibi nde biangome nogo ega kuniru nalu howa ai maru yawi nole ngela nabi noa dege howa nalu haraligobi ka.  
\v 4 Mana \w latagi\w* haga agali karume biabe bialu hararu henene tiga tiga bia ndo tigua maru karuhondo ke̱ howa mo ko holenaga dege bialu haya. Ani bialu kagola \w loma\w* binigo mo miaga agali bu karumebi nde mbirale lomabia howa wubagi hene wiaru ilili biaga wiadagua nabi mo hilahole bialu Ngode Datagaliwabenaga bi mana ngagome tini biamogo bilonaga dege mo tiga bialu haga.  
\v 5 Ani anigo Anduane Homogo ibu Yarusalemeha haabo ka. Ibugua mana bayale ngaru hangu biaabo haga ka. Mana ko ngaru ibu nabiagaore ka. Ibunaga wali agalime birago tiga tiga howaore mo tale biaga ka. Anigo wali agali ko tano ogoniha bu karume mana ko tiga nabi ngaru bialu haabo howa tini taga nahagaore bu kagoni.   
\p
\v 6 Anduane Homogohanda lalu, Hameigini dindi tara taraha hearu bo ereba hai halu i̱na tinaga tano hongohe wiarunaga wai pabe hongohe hearu bo gialo wahai haru. Tinaga ami agalirume mamage howa handa amu nana bu haga anda wai pabe neneni bu helearu bo gialo wahai harugola áyu mo ko hai hene nga. Tanoha wali agali yu wahene mbiraore hangubi nahe wialu tanoha hariga timbuni pedadagua mbirali mbira pialu kariabi nahondoleberemi.  
\v 7 Ainde i̱naga wali agali bu karume i̱na mana bayale tigabi bialu kogo hondowa tigua i̱ andaneha halu i̱nime ti mo tiga buliya holebira mitangi bu haru. Tigua i̱naga bi mana lamirugo baya hangu minime manda bu kale nde i̱na ti mo ko nakole. Anigo tigua i̱naga bi mana lowini wiaruni mo wahai halu mana ko ngubi wiaru abale bialu haga wiago bolangua howa ko bia timbuore haga, lalu laya.   
\p
\v 8 Anduane Homogohanda wali agali ibunaga bi mana talialu karuhondo lalu, Tí mini dege dindiho nahalimu. I̱na wali agali dindi bibahendeha bu karu dabaki buleberogo hondole halimu. Irane i̱na wali agali dindi tara tara bibahendeha bu karuhondo keba howa mo ko hai holene manda bu henego ko. I̱na wali agali dindi tara tarani bu karu bibahende haru íbu mogo bialu ti mo ko hai helolebero. I̱naga keba holene ira hungu daradagua biragome dindi bibahende dai holebira.   
\p
\v 9 Ani bialu horo ogoningi i̱na wali agali dindi bibahendeha bu karunaga mini mo beregedai holebero. Ani berongi tinaga mini gahenge wia aribia ho howa i̱ hangu mitangi bialu i̱nihondo bi lalu holebira. Tinaga mini mo mbiraore howa i̱naga bi mana lowini ngaru talialu holebira.  
\v 10 Ani bialu i̱naga wali agali i̱nime Sudana dindi ngagoha pu heledorubi dindi maruha pu heledorubi tigua i̱ninaga lomaru mo yalu ibulebira.  
\v 11 Heneneore i̱naga wali agaliru tígua i̱naga bi mo wahalu ha harimigonigo ai i̱na mbirale uruni berongi tígua mana ko bialu harimigonaga taga ho holene nawulebira. I̱nime wali agali mine halu balagala haga bu karu bo pelai holebero. Anidagua berogola tigua i̱naga hari nene biagoriani Yarusaleme tano ngogoria howa i̱nihondo lone mine naholeberemi.  
\v 12 I̱na wali agali maru Yarusalemeha helo waholeberoru ti mbirale dewa nawi howa tini mo dindiha ho holebira. Ani howa tigua i̱ni koria ibalu i̱na ti biamogo bia lalu hale halu holebira.  
\v 13 Isaraele wali agali yu wahene emene dagalene hangu karuni tigua wali agali tara karuhondo ko mbira nabi holebira. Ani howa wali agali tini damene bu karuhondo ke̱ halu mo hondo naholebira. Ti bayale holene hanguha kagola tinaga waitigime ti mo gi holenebi mbira nawulebira, lalu Anduane Homogo ibugua laya lene.\x + \xo 3.13 \xt Mo 14.5\x*   
\s1 Turu holenenaga iba gana ngago ogo  
\q1
\v 14 Isaraele wali agaliru-o tígua turu halu iba gana hongo howa ladaba.  
\q2 Yarusaleme wali agaliru-o tínaga bu miniha dungulo howa turu hadaba.   
\q1
\v 15 Anduane Homogohanda lalu, Tí mo ko holebero, layago  
\q2 áyu bi ani layagoni wahalu wahayiya.\x + \xo 3.15 \xt Man 32.4, Iba 92.15, Seb 3.17\x*  
\q2 Ibugua tínaga waitigi bu hearu bo taliatagi hai hayada.  
\q1 Anduane Homogo Isaraele wali agalinaga kiniore kago  
\q2 ibu tí heba mandagi haabo kagoni.  
\q1 Ani kago ai tígua mbirale mbirahondo gi ho holene nawiore.   
\q1
\v 16 Horo mbira tagira ibulebirago  
\q2 ogoni ibirangi tigua Yarusalemehondo lalu,  
\q1 Yarusaleme wali agaliru-o tígua gi nahe halimu.  
\q2 Tígua bame mogo lalu gi holene nawulebiraore.   
\q1
\v 17-18 Anduane Homogo tínaga Ngode Datagaliwabe ibuni tí heba mandagi haabo ka.\x + \xo 3.17-18 \xt Man 30.9, Ais 62.5, Yar 32.41\x*  
\q1 Ibunaga hongo gibiore kagome tí biamogo biragola  
\q2 tígua wai bialu wayali holeberemi.  
\q2 Wali agalirume tinaga horo timbuni wigi binigo tagira ibirangi turuho howa iba gana lagadagua  
\q1 Anduane Homogohanda tíhondo turu howa iba gana lolebira.  
\q2 Ibugua tíhondo gubaliniore ho howa mo palia holene bi lolebira, laya lalu lene.  
\b  
\m Anduane Homogohanda lalu,  
\q1 I̱na Yarusaleme wali agali tí mana lalu minu barugola  
\q2 tínaga horo timbuni lotu lole mo ngoaiho haga wimiru talialu bibe nahe kamigoni.  
\q1 Tígua i̱nihondo lotu lone lalu habe nahe kamigome tíni mo tagaore henego kamigoni.  
\q1 Anigo áyu i̱na tí lone haru dai bulebero.   
\q1
\v 19 Horo ogoningi tí bope haga waitigi biaruni i̱na mo ko hai holebero.  
\q1 Isaraele wali agali ti nogo sibi pugu pugu biagadagua pugu pugu binigo  
\q2 tinaga ge ko henego tini kagoha haga haga biagadagua  
\q1 Isaraele wali agali dindi tara tara ngaruha pu haga haga bidamigo  
\q2 i̱na tíninaga dindi henene ngagoria halimulo haru dai bulebero.  
\q1 Áyu wali agali bu karu bibahendenaga deni howa tí taga timbuni ho kamigonigo  
\q2 mani i̱na tínaga taga holene uruni mo wahai halu tí mini lene helolebero.  
\q1 Ani heledogola wali agali dindi bibahendeha karume tínaga mini mo yaraga holebira.   
\q1
\v 20 Horo ogoningi tí dindi tara tara ngaruha pu haga haga bidamigoria howa  
\q2 i̱na tí lone gi mialu tíninaga dindini halimulo haru dai bulebero.  
\q1 Haru dai buwa tí mini leneore heledogola  
\q2 wali agali dindi bibahendeha bu karume tínaga mini mo yaraga holebira.  
\q1 Horo ogoningi tínaga biabe buleneru bibahende mo bayale hai helarogola  
\q2 tínaga holene bayaleore wulebira.  
\m I̱ Anduane Homogo i̱na bi o ledogoniore, lalu Anduane Homogohanda laya lalu Sebanaiahanda lene.