\id ZEC - Huli Bible [hui] -Papua New Guinea 2011 (web version -2013 bd) 
\h SEGARAIA 
\toc1 Segaraia 
\toc2 Segaraia 
\toc3 Seg 
\mt1 Segaraia  
\imt1 Mbuga ogoha gilibu ngarunaga nemandi ogo  
\ip Anduane Homogonaga bi mana \w latagi\w* haga agali Segaraia ibu Hagaila biabe mbiraorego ale dege biaga hene. Ibunaga mini hongohe howa Yuda wali agalime Anduane Homogonaga anda biago lone biadai bialu wali agalime mana bayale tigabi ngaru hangu bialu haga helo hamelo hene.  
\ip Anduane Homogohanda ti bayale holene mo wia holebira lalu Segaraia ibugua latagi halu hene.  
\ip Be 1-8 ngagoha howa mbirale mani bulebirarunaga mbiwia halubi Anduane Homogonaga bi mana latagi halubi ibugua bamba Anduane Homogonaga bi mana latagi haga agali Esegiele Danielelame latagi hene ngagobi dege nga. Segaraia ibugua de gandeba tara tara handaga binigoha manane tara tara dewaore mo walia haga biniru latagi halu hene.  
\ip Be 9-14 ngagoha howa mani Anduane Homogohanda wali agali bibahendeme tininaga mana bialu hayadagua mo talebu ki holebiragonagabi agali mbira Anduane Homogohanda ibunaga biabe bialu helo ibilolebiragonagabi ibugua mbiwia halu latagi hene. Bi manane maru mbuga ogoha gilibu wini ngaru Yasuhanda dindini howa bialu hayaru ibugua ogodaguaore bulebira lalu lo bambaho ngelenego nga.  
\iot Bu̱lu̱ baga buwa kuni gilibu ngago (1.1–8.23)  
\io1 Mo ko holenebi biamogo bulenebi mana ngago \ior 9.1-8\ior*  
\io1 Hameigini dewa dindi tara taraha Isaraele dindi kaware palima pedaruhondo pani mulene nga lenego \ior 9.4–14.21\ior*  
\io1 Pele Miaga Mbirali ibulebiragobi mo palia holene wulebiragobi mbiwia halu lenego  
\c 1  
\s1 Anduane Homogohanda ibunaga wali agali ibuni karia dai bulene nga lenego ogo  
\p
\v 1 Kini Dariusu ibu Pesia dindiha kini heane dege mali mbira howa mendegonaga ege halini\x + \xo 1.1 \xt Esr 4.24–5.1, 6.14\x* hayagola Anduane Homogohanda ibunaga mana \w latagi\w* haga Segaraiahondo bi ogo lamini. Segaraia ibu Beregaia igini howa Ido aguane hene.  
\v 2 Anduane Homogo Hongo Haiheore kago ibugua Segaraiahondo lalu, Bi ogo i̱naga wali agali bu karuhondo lamibe, lalu lamini. Ibugua lalu, I̱ Anduane Homogo kogoni howa i̱na tínaga mamaliruhondo keba timbuniore ho haru.  
\v 3 Anigo áyu i̱na tíhondo ogodagua laro. I̱na tí mo wialu biamogo buliyanaga ibalu tígua i̱ni kogoha dai bilimu.\x + \xo 1.3 \xt Yar 25.5, Mai 7.19, Mal 3.7, Lg 15.20, Ya 4.8\x*  
\v 4 Tínaga mamalirume bialu henedagua nabilimu. I̱naga bi mana \w latagi\w* haga agali hearume i̱naga bi mana lamialu, Tígua mana ko bialu kamiruni wahai halimu, lalu langiya tiraga tígua i̱naga bi mana ogoni hale naharimi.  
\v 5 Ai tínaga mamali uruni tini homai halu i̱naga bi mana latagi haga agali urunibi homai dege haya.  
\v 6 Anigo ogoaleore bulebirago lalu i̱naga bi mana latagi haga agali uruni tigua mbiwia hayadaruni tínaga mamali heangi tagira piyane de handai haya. Tigua i̱naga bi mana larugo hale nahayagome tiniha mo ko holene wiai haya. Ani biyagola mani lone tinaga bu mini beregedo howa lalu, Anduane Homogo Hongo Haiheore kago ibugua bule lalu lo wiyadaguaore henene mo ko halu minu bai hayagoni irane inaneme hadowa ho hemaria biya, laya lene.   
\s1 Anduane Homogonaga bi mana latagi haga agali heagome de gandebaha howa nogo hosi hendenego ogo  
\p
\v 7 Kini Dariusu ibu kini heane mali mendegonaga ege beane (11) hayagola ogoninaga horo pira kirani maria (24) tinaga ege mini Sebada laga winigo ogoningi Anduane Homogo ibunaga bi i̱hondo langiya.  
\v 8 Mbiraga de gandeba handalu hewaria Anduane Homogonaga dahuliyali mbira nogo hosi hone mbirani berearia handaru. Nogo hosi ogoni ibu dindi ulini panda panda wiagoha irabu dombeneha heagola nogo hosi maru ibunaga erembirahayagi bu hea. Hosi maru hone halu maru pagabua halu maru honeni pagabua bu ngibingabule hea. Ani bu heagoria dahuliyali maru hosi uruninaga erekunini birai hea.\x + \xo 1.8 \xt Mo 6.2-4\x*  
\v 9 Ani bereagola i̱na dahuliyali haguane heagohondo hale halu lalu, I̱naga Anduane-o de gandeba áyu hendedogonaga hosi biaru irane agibe lalu hale haru.  
\p Ani hale harugola ibugua lalu, De gandeba ogoninaga irane langerogo ogo.  
\v 10 Anduane Homogohanda uruni dindi bibahendeha de handama ibaga biai helo pelene, laya.   
\p
\v 11 Ani layagola dahuliyali biarume Anduane Homogonaga dahuliyali mbira biagohondo lamialu lalu, Iname dindi bibahendeha piai harimago ai wali agali dindi tara taraha bu hearu de handaiore howa tiha genda mbira nawi bayale dege hai hearia handarima, lalu lamiya.   
\p
\v 12 Anidagua layagola Anduane Homogonaga dahuliyali biagome lalu, Anduane Homogo Hongo Haiheore kego-o í̠na mali pira karia (70) bibahendeni wali agali Yarusalemeha karubi tano maru Yuda dindiha bu karubi ti bibahende baba keba haho wiaabo kego ainde ti lone dara howa biamogo angi buleberebe, laya.   
\p
\v 13 Ani layagola Anduane Homogohanda dahuliyali biagonaga bu miniha mo paliaho helonaga bi bayale lamiya.  
\v 14 Ani lamiyagola dahuliyali biagome i̱hondo lalu, Anduane Homogo Hongo Haiheore kago ibugua bi layago í̠na latagi habe lalu langiai haya. Anduane Homogohanda lalu, I̱naga tano timbuni Yarusalemebi Hari Saionobi hondowa i̱na dara ho howa mini dege dindiho kogoni.  
\v 15 Ani kogonigo ai hameigini dindi tara taraha bu karume tiha genda nawi bayale kago i̱na dege tihondo keba timbuni ho kogoni. Abale i̱naga wali agaliruhondo keba emene dege ho hewagola hameigini dindi tara taraha karu tigua i̱naga wali agali uruni mo tandaga nde emene dege holene winigoria ibalu bibahende bo hilo wahai halu mo ko timbuniore haya. Anigo i̱na tihondo keba timbuni ho kogoni.  
\v 16 Anigo áyu i̱na Yarusaleme wali agali bu karu dara howa biamogo bulenaga daibu kogoni. I̱naga anda biago lone biadai bialu Yarusaleme tanobi lone mo tiga bialu arema bulebira laya, lene.   
\p
\v 17 Ani lowa dahuliyali biagome i̱hondo bi mende langialu lalu, Anduane Homogo Hongo Haiheore kago ibugua lalu ibunaga tano ngaruha mbirale bayale damene ngago hangume mo to̱lai helarogola wali agali ti bayaleore holebira. Ani bialu Yarusaleme tano lone ibunaga tanoore ngelalu Yarusaleme wali agaliru tinaga bu miniha mo palia holene karulo howa ema nabi holebira laya, lene.   
\s1 Segaraiahanda de gandebaha howa nogo bulumaganaga ne gayane ale hendenego ogo  
\p
\v 18 Segaraia ibugua lalu, I̱na de gandeba mende handalu hewaria nogo bulumaganaga ne gayane ale maria hearia handaru.  
\v 19 Ani hondowa ai dahuliyali abale i̱la bi lalu haribago ibiyagola i̱na ibuhondo hale halu, Mbirale áyu hendedogoni irane agibe, laru.  
\p Ani hale harugola ibugua ladai bialu lalu, Nogo bulumaganaga ne gayane ale maria uruni abale Yuda dindibi Isaraele dindibi Yarusalemebi bibahende mo ko halu bo gialahole biaga hongo maria biarunaga manane heleda, lalu langiya.   
\p
\v 20 Ani layagola Anduane Homogohanda biabe biaga agali marialime hama timbuni yu hearu mo walia haya.  
\v 21 Ani yu hearu hondowa i̱na ibuhondo hale halu lalu, Agali uruni tigua biabe agi bule ibirabe, lalu hale haru. Ani hale harugola ibugua ladai bialu lalu, Agali uruni tigua dindi tara taraha bu karume Yuda wali agali mo ko howa bo wahai halu maru dindi tara taraha bo giligalalo purogo lelaga biaru mo gi howa mo durula halu tinaga hongo ngaru bo ereba hai helole ka laya, lene.   
\c 2  
\s1 Segaraia ibugua mbirale magi handagane pu wiaria hendenego ogo  
\p
\v 1 I̱na de gandeba dege handalu hewaria agali mbira magi handagane pu ona yuwa mbirale luni tubagi lalu mo manda bule yu hearia handaru.  
\v 2 Ani hondowa i̱na ibuhondo hale halu lalu, Í̠ ani porebe, laru. Ani larugola ibugua ladai bialu lalu, I̱na Yarusaleme tano ngagonaga lunaga magibi aranenaga magibi ogobida lo manda bulenaga magi hondole poro, laya.   
\p
\v 3 Ani layagola handalu hewaria dahuliyali i̱la bi lalu haribago ibu emene amura pialu hearia dahuliyali mende ibu piyagoha ibalu lola haya.  
\v 4 Lola hayagola dahuliyali ala ibiyago ibugua dahuliyali mende mani ibiyago lamialu lalu, Í̠na gerai lalu puwa agali mbirale magi handaga pu yu haragohondo lamialu, Yarusalemeha wali agali dewaorebi nogo bulumaga dewaorebi ho dame bu holebirago ai tano ogoni timbunioredagola tigua tanonaga pabe bibe nahe holebira.  
\v 5 Ani bu holebirago ai Anduane Homogo ibuni ira hungu ale bialu Yarusaleme tanonaga wai pabe kagoha howa ibunime tano ogoni handayaho holebira. Ani howa ibuni Yarusalemeha haabo kagola ibunaga wá taraore holenebi hongo timbuni holenebi wiame hai holebira lamibe, lalu lamini.\x + \xo 2.5 \xt Ais 26.1, 60.19, Seg 9.8, Mo 21.23\x*   
\s1 Anduane Homogohanda Yuda wali agali tini daluha lone dai bidaba lenego ogo  
\p
\v 6-7 Anduane Homogohanda ibunaga wali agaliruhondo lalu, I̱na tí dindi tara tara wiaruha talu purogo lelarugonigo ai áyu Babilono tano ngago yu wahalu Yarusaleme dai bidaba, laya.  
\v 8 Ani lowa lalu, Mbiralime tí bolene manda biyagua nde i̱ bole manda biragoni, lene. Hameigini dindi tara taraha karume Anduane Homogo ibunaga wali agali mo ko hayaru tihondo i̱na bi ogodagua lamuliya Anduane Homogo Hongo Haiheore kago ibugua i̱hondo langialu lalu,  
\v 9 Tígua i̱naga wali agali bu karu mo ko halu barimiyagua i̱nime nde tí baba wai bulebero. Ani bialu wali agali ala tínaga garabaya biabe biaga biarunime tí mo ko halu bo wahai holebira laya lalu lamibe, lene.  
\p Ai mbirale uruni bulebira layagoore birangi wali agali bibahendeme Anduane Homogo Hongo Haiheore kago ibunime i̱ dabalu ibunaga bi ogoni latagi hole henemane pu lenedane hondolebira.   
\p
\v 10 Anduane Homogohanda laabo halu lalu, Yarusaleme wali agaliru-o i̱ni ibalu tí heba mandagi haabo holeberogonaga tígua turu howa iba gana lalu halimu, laya.   
\p
\v 11 Horo ogoningi wali agali dindi bibahendeha bu karu tibi nde Anduane Homogo kagoha ibalu ibunaga wali agali dege hai holebira. Ani bialu ibuni tí heba mandagi haabo kagola tígua heneneore ibunime i̱ dabalu tí kamiria ibileneoreda lo manda buleberemi.\x + \xo 2.11 \xt Ais 2.2-3, 60.3\x*  
\v 12 Ani bialu Yuda wali agali ti Anduane Homogonaga dindi wiabagi hene ngagoria howa ti ibunaga deni duniniore holebira. Ani bialu Anduane Homogo ibugua tano maru ngaru gubalini hagago emene nira lowa Yarusaleme tano gubalini timbuniore ho holebira.   
\p
\v 13 Anduane Homogo ibu ibuni haga ngagoha howa ina kamaria ibulebirago iname ibunaga deni howa bi mbira nale ema nabi dungulo hami̱ya, lalu Segaraiahanda lene.\x + \xo 2.13 \xt Hab 2.20\x*   
\c 3  
\s1 Segaraiahanda de gandebaha howa \w Loma\w* Binigo Mo Miaga Haguane Timbuni hearia hendenego ogo  
\p
\v 1 Anduane Homogohanda i̱hondo \w Loma\w* Binigo Mo Miaga Haguane Timbuni Yosua heago de gandebaha mo walia haya. Yosua ibu Anduane Homogonaga dahuliyali mbira heago heba mandagi hebiria handaru. Ani hebiria dama Heyolabe ibubi Yosuanaga gi tigahayagi hearia howa ibugua Yosuahanda ko ogo biya lole manda bu hearia handaru.\x + \xo 3.1 \xt Esr 5.2, Mo 12.10\x*  
\v 2 Ani hebigola Anduane Homogohanda dama Heyolabehondo lalu, I̱ Anduane Homogo i̱na í̠hondo bi mbira larogo. Í̠na bi mbira lole kegoniore nalabe. I̱na Yarusaleme gubalini timbuniore ho kogome í̠ langerogo í̠naga ne hariga hangai howa bi naleore habe laro. Mbiralime ira dateboni ira dalu kagola ba hundia halu duguaede hagadagua bialu agali Yosua ogoni mo wialu haru dai birugo ndobe, laya.\x + \xo 3.2 \xt Yu 9\x*   
\p
\v 3 Yosua ibu dahuliyali biago heagoria kaware hapara howa ibunaga aga ko dodohe bu heneyagobi bu haabo hea.  
\v 4 Ai dahuliyali ogoni ibugua dahuliyali maru hearuhondo lamialu lalu, Agali ogoni aga ko karulo kago golo wahadaba, laya. Ani lowa ibugua Yosuahondo lalu, Ai bi o larogo hale habe. Í̠ha ko ngaru aga dodohe ogo heba i̱na mo wahai harogoni. Ani bialu aga gahengeru mo karula holebero, laya.   
\p
\v 5 Ani lowa ibugua dahuliyali maru biaruhondo lalu, Ainde tígua labolabo bayale mbira Yosuanaga haguaneni bo bialu manda ale mo karula halimu, laya. Anduane Homogonaga dahuliyali biago ibu kaware heagola maru tigua labolabo bayale Yosuanaga haguaneni bo bialu mo karula haya. Ani bialu ibunaga aga gahengebi mo karula haya.   
\p
\v 6 Mani howa dahuliyali biagome Yosuahondo lamialu lalu,  
\v 7 Anduane Homogo Hongo Haiheore kago ibugua bi ogodagua lara. Í̠na i̱ hame ledodagua bialu i̱naga bi mana lo ngagobi baya hangu talialu howa í̠na biabe bialu habelo ngerogobi bialu hariyagua nde i̱naga andaha biabe bialu mbirale ngaru bibahende handayaho habelo helolebero. Ani helarogola dahuliyaliru tigua i̱ni kogoria kaware ibugu bialu hagadagua í̠bi nde i̱ kogoria kaware íbu holebere.  
\v 8 Yosua í̠ \w Loma\w* Binigo Mo Miaga Haguane Timbuni kegonigo ai i̱na bi larogo hale harene. Loma binigo mo miaga agali maru bu kamiru tíbi nde hale halimu. Mani mbirale bayale tagira ibulebiragonaga manane tí kamigoni. Ai hale hadaba. I̱naga biabe biahaga agali mbira ibiloleberogo ibunaga mini Ira Dibini Tilinini Andaho Aribia Hene lolebira.\x + \xo 3.8 \xt Yar 23.5, 33.15, Seg 6.12\x*  
\v 9 I̱na ege to̱le̱ mbira de kariahe Yosuanaga wanakuihayagi werogo de handadaba. I̱na bi mbira ege to̱le̱ ogoriani gilibu wulebero. Anidagua buwa i̱naga dindi ogoriani wali agali karunaga ko ngaru bibahende horo mbiru hanguni domo wahai holebero.\x + \xo 3.9 \xt Seg 4.10\x*  
\v 10 Horo ogoni wubagiho ngeledogo tagira ibirangi tínaga nenege mbira mbira handa a̱i̱na̱i̱ bu padaru tíni haru mandagi hole ololeberemi. Olowa tínaga \w gerebi\w* mabu bu hengedemigohabi tínaga poge hengedemigonaga gumbahabi bira palia bu holeberemi. Ani howa tínaga bu miniha mo palia holene karulowa turu haga buwa dungulo holeberemi, lalu dahuliyali biagome laya lene.\x + \xo 3.10 \xt Mai 4.4\x*   
\c 4  
\s1 Lamu hale wiagane irane wiaria hendenego ogo  
\p
\v 1 Dahuliyali ala i̱la bi lalu haribagome i̱ hewaria ibalu i̱ paliahondo haradagua biwaria barila haya.  
\v 2 Ani buwa ibugua i̱hondo hale halu lalu, Í̠na agile dege hendedebe, laya.\x + \xo 4.2 \xt Har 25.31-40\x*  
\p Ani layagola i̱na ibuhondo ladai bialu lalu, I̱na lamu hale wiagane irane mbira ngolome wabini ngaria hendedo. Lamu hale wiagane ogoninaga nguni daligahayagi ndisi be weli bedaore mo paga howa ngane hendedo. Lamu hale wiagane irane mbiraore ogoriani howa lamu karia ho gebaga bigi bidago odaruni ti hale delole iba be mbiraore ogoniha howa dege purogo lagadane hendedo.  
\v 3 Ai weli be wiaga biagonaga lene mende mendehabi ira olibe kira kane hendedo, lalu dahuliyali biagohondo ladai biru.\x + \xo 4.3 \xt Mo 11.4\x*  
\v 4 I̱na uruni hondowa ai irane agibe lalu ibuhondo hale haru.   
\p
\v 5 Ani hale halu hewaria ibugua ladai bialu lalu, Í̠na uruni manda nabi kebe, layagola i̱na ibuhondo ladai bialu lalu, Agali haguane-o i̱ manda nabiore kogoni, laru.   
\s1 Anduane Homogo ibugua mbirale mbira buleore bero lalu Serubabelehondo bi mbira lowinigo ogo  
\p
\v 6 Ani larugola dahuliyali biago ibugua ladai bialu, Bi ogo agali haguane Serubabele kagohondo lamibe, laya. Bi ogoni Anduane Homogohanda lalu, Í̠na biabe berego bialu í̠naga ami agali kegonaga hongonibi í̠ninaga hongonibi ndo bialu holebere. I̱ dinininaga hongo í̠ha kagome biabe berego bayale bialu holebere.\x + \xo 4.6 \xt Esr 5.2, Hos 1.7\x*  
\v 7 Í̠ poregoha mbirale taibi hari timbuni wedarubime hapai hayaguabi i̱nime mo waholebero. Ani bialu kogola í̠na i̱naga anda gialo wahene biago lone bia dai bulebere. Anda ogoni bule pigane bialu howa anda háinaga ege to̱le̱ dunini wia maro bialu kegola wali agali tigua hondowa lalu, Anda ogoni bayaleoreda, laga bialu hongo howa ga̱ ladagadaga bialu holebira, laya.   
\p
\v 8 Ai Anduane Homogohanda bi mende langiyago ogo.  
\v 9 Ibugua lalu, Serubabelehanda i̱naga anda ogoni bulenaga dindi gumuni godo tiga bialu gene wedago ibunioreme biai holebira. I̱naga anda ogoni biai kagola i̱naga wali agaliru tigua i̱nime í̠ ti karia pu layada lo manda biai holebira.  
\v 10 Biabe ogoni biai nahedagola i̱naga wali agalirume tinaga bu miniha genda ho holebira. Anigo Serubabele ibugua anda pigane tenialu bulenaga pu luni anda magi manda bulenaga yu howa bialu kago hondowa wali agali tigua turu timbuni ho holebira, laya lalu dahuliyali biagome lene.\x + \xo 4.10 \xt Mo 5.6\x*  
\s1 Lamu hale wiaganebi ira olibe kirabi de hendenegonaga irane laminigo ogo  
\p Dahuliyali biagome i̱hondo lalu, Lamu karia uruninaga manane Anduane Homogonaga de karia howa dindi bibahendeore ibugua handame haga ka, laya.   
\p
\v 11 Ani layagola i̱na ibuhondo hale halu lalu, Lamu hale wiagane gene mende mendehayagibi ira olibe kira kago irane agibe.\x + \xo 4.11 \xt Mo 11.4\x*  
\v 12 Ira olibenaga magane kira olibe lininaga weli piagane baibo harigawi ngolome wabinigoha mandagi kago ogoninaga iranebi langibe, laru.   
\p
\v 13 Ani hale halu hewaria ibugua ladai bialu lalu, Í̠ uruni manda nabi kebe, layagola, i̱na ibuhondo ladai bialu lalu, Agali haguane-o i̱ manda nabiore kogoni, laru.   
\p
\v 14 Ani larugola ibugua lalu, Ira olibe kira ogoni libu agali kira dindi bibahendenaga Anduane Homogo kagome ibunaga biabe bilo dabalu libunaga haguaneni olibe weli odo wialu helenego ka, lalu langiya.   
\c 5  
\s1 Mbuga mbira yagalo yu piyaria hendenego ogo  
\p
\v 1 I̱na lone dege handalu hewaria mbuga mbira yagalo yu piyaria de handaru.  
\v 2 Ani hondo hewagola dege dahuliyali biagome i̱hondo hale halu lalu, Í̠na mbirale mbira agile ngane de hendedebe, laya. Ani layagola i̱na ladai bialu lalu, I̱na mbuga timbuni mbira yagalo yu porane hendedo. Lunaga magi mita pira yangalenaga magi mita duria aledane hendedogoni, laru.   
\p
\v 3 Ani larugola ibugua i̱hondo lalu, Mbuga ogoniha Anduane Homogohanda wali agali Yuda dindiha bu karu ko helonaga ha holene bi gilibu nga. Mbuga ogoninaga mbirahayagi gilibu ngago ogo pageali dindi ogoriani karu bibahende bo batagi hai holebero lalu gilibu nga. Mendehayagi gilibu ngago ogo wali agalime ogoale bule lalu ke̱ howa lo wiaga karu tibi bo batagi holebero lalu gilibu winigo nga.  
\v 4 Anduane Homogo Hongo Haiheore kagome lalu, I̱na ha holene bi ogoni wali agali page biaga karubi i̱naga minini howa bi lo wialu ke̱ howa lo wiaga karubi uruni ti andagaha mo yaanda hai holebero. Anidagua berogola bi ogonime ti andagaha howa page biagabi ke̱ hagabi bu karu bibahende mo ko hai holebira, lalu laya.   
\s1 Wali mbira mbasigedi nuha berearia hendenego ogo  
\p
\v 5 Dahuliyali biagome i̱ hewaria lone ibuwa lalu, Ai mende ibirago de handa, laya.   
\p
\v 6 Ani layagola i̱na ibuhondo lalu, O ibiragoni agilebe, laru. Ani larugola ibugua ladai bialu lalu, Mbasigedi nugo ogonime wali agali dindi ogoriani bu karume ko biyagonaga manda bulene manane ogoni, laya.   
\p
\v 7 Mbasigedi nu ogoninaga panga aeaneme payini wia. I̱na handayaho hewagola tigua mbasigedi nu biagonaga panga duguayagola wali mbira ogoniha berearia handaru.   
\p
\v 8 Ani handarugola dahuliyali biagome lalu, Wali o bedagoni wali agali bibahendeme mana ko bialu kamigonaga manane beda. Ani lalu wali biago mbasigedi nu biagoha lone he̱laanda halu panga payaanda haya.  
\v 9 Ani biya handala i̱na handadaga halu hewaria wali kira babagane hongoheore ega bodo hariawenaga babagane alehe i̱ hewaria yagalo yu ibiya. Ibalu libugua mbasigedi nu wali bereago heba mo yalu piyago handaru.   
\p
\v 10 Ani piyago hondowa i̱na dahuliyali biagohondo hale halu, Libugua mbasigedi nu ogoni agohayagi yalu porabe, laru.  
\v 11 Ani larugola dahuliyali biagome ladai bialu lalu, Libugua Babilono dindiha damanaga anda timbuni mbira bulenaga mo yalu pora. Libugua damanaga anda ogoni biai howa tigua mbasigedi nu ogoni Babilono wali agalirume tinaga bi pupu ogonihondo wialu helo mo ngelolebira, laya.   
\c 6  
\s1 Garo ale karisi maria wiaria hendenego ogo  
\p
\v 1 De gandeba lone handalu hewaria wai biagane garo ale mini karisi maria ege to̱le̱ boronosi hari kira heago hengeneha ibiyane de handaru.  
\v 2 Nogo hosi hone hearume karisi mbirago gililalu hosi mindi hearume karisi mendego gililalu hearia handaru.\x + \xo 6.2 \xt Mo 6.4-5\x*  
\v 3 Ani bialu nogo hosi pagabua hearume karisi tebonego gililalu nogo hosi honeni pagabua ngibingabule hearume karisi manego gililalu hearia handaru.\x + \xo 6.3 \xt Mo 6.2\x*  
\v 4 Ani biyago hondowa i̱na dahuliyali biagohondo hale halu lalu, Agali haguane-o garo ale karisi uruni irane agibe, laru.   
\p
\v 5 Ani hale harugola dahuliyali biagome ladai bialu lalu, Karisi maria uruni ti dinini mariali dahuliya andagaha hagago nde áyu ogoni dindi bibahendenaga Anduane Homogo kagoria howa ibiragoni.\x + \xo 6.5 \xt Mo 7.1\x*  
\v 6 Karisi mbira nogo hosi mindirume gililo yu porago ogoni abene uyurahayagi Babilono dindi pole pora. Karisi mende nogo hosi pagabuarume gililo yalu porago ogoni dindi ni paliragohayagi pole pora. Ani pialu karisi tebone nogo hosi honeni pagabua ngibingabule karume gililo yu porago ogoni dindi abene unurahayagi pole poragoni.  
\v 7 Nogo hosi hongo gibihe urunime tagira ibalu ti dindi bibahendeha ala pugu bule biyagola dahuliyali biago ibugua lalu, Ai karulape tí dindi bibahende abi ngabe hondole pudaba, laya handala hosi biaru abale piai haya.  
\v 8 Ani piyagola dahuliyali biago ibugua i̱ olowa i̱hondo lalu, Nogo hosi uyurahayagi piyarume Anduane Homogohanda keba ala hayago mo palia hayagoni, laya.   
\s1 Anduane Homogohanda Segaraiahondo lalu, Kininaga manda Yosua mo karula ha, lenego ogo  
\p
\v 9 Anduane Homogohanda i̱hondo bi ogo langialu lalu,  
\v 10 Í̠na agali mini Heledai Tobiya Yadaia imaru Babilono dindi wahalu Yarusaleme daibu karia í̠ pialu tigua mbirale ngolo silibaru mo turu halu bame ngule yidago mo yabe. Mo yalu Sebanaia igini Yosaia andaga abale pu, laya.  
\v 11 Pialu tigua ngolo silibaru ngiragome í̠na kininaga manda mbira wabibe. Wabu yalu puwa Yahosadaga igini \w Loma\w* Binigo Mo Miaga Haguane Timbuni Yosuanaga haguaneni mo karula habe.  
\v 12 Ani karula halu howa ibuhondo bi au lamibe. Anduane Homogo Hongo Haiheore kagome lalu, Agali mbira mini Ira Dibini Tilinini Andaho Aribia Hene kago ibu dindi ibuni kagoha bayaleore haabo howa ibugua i̱naga anda lone biadai bulebira, lamibe.\x + \xo 6.12 \xt Yar 23.5, 33.15, Seg 3.8\x*  
\v 13 Ibugua i̱naga anda bialu kini mini lene howa ibunaga wali agaliru baya hangu haru howa handayaho holebira. Ani bialu ibugua loma binigo mo miaga agalibi ibu dege howa kininaga biragane dagia ngagoria biruwabi ibugua biabe kira mo mbiraore howa bayaleore bialu holebira, laya lalu lamibe, lene.   
\p
\v 14 Kininaga manda ogoni Anduane Homogonaga andaha wiaabo holebira. Ani ngago hondowa wali agali bibahende tigua Heledai Tobiya Yadaia imaru Sebanaia igini Yosaiabi mitangibu dai bialu turuore ho holebira.   
\p
\v 15 Agali dindi kaundiaha haga haga bidaru tibi nde ibalu Anduane Homogonaga anda ogoni lone biadai bule lowa bialu karu tigua biamogo bialu holebira. Anda ogoni biai harangi Anduane Homogo Hongo Haiheore kago ibunime i̱ heneneore dabalu tí kamiria pu laya handala ibinida lo manda buleberemi. Tígua Anduane Homogo tínaga Ngode Datagaliwabe kagonaga bi ledago baya hangu talialu biai harimiyagua nde mbirale uruni heneneore tagira ibai holebira, lalu Segaraia i̱na larogoni.   
\c 7  
\s1 Anduane Homogohanda \w tomo\w* nane haga mana ke̱ howa biaga heagohondo keba henego ogo  
\p
\v 1 Dariusu ibu kini heane mali tebira howa manegonaga ege dini mini Kisilebe lagago ogoni hayagola ege ogoninaga horo manengi Anduane Homogohanda i̱hondo bi mbira langiya.   
\p
\v 2 Bedele tano wali agali tigua agali kirali Sarese Legemelegela tinaga agali maru hearu haru halu Anduane Homogo Hongo Haiheore kagonaga anda pudaba lalu lamini. Agali biaruni tigua Anduane Homogohondo wali agali uruni biamogo bia lalu tinaga bi lahole pene.  
\v 3 Tigua \w loma\w* binigo mo miaga agali hearuhondobi Anduane Homogonaga bi mana \w latagi\w* haga hearuhondobi bi mbira hale hole piyago ogo. Anduane Homogonaga anda mo ko ho wiane dege mali dewaore piyada. Anigo iname ogoninaga kiabu dugu bialubi ege dauni haragola \w tomo\w* nane hagabi wirimagonigo ai ogonidagua bialu haabo hami̱yabe, lalu hale hole pene.   
\p
\v 4 Ani piyagola mani Anduane Homogo Hongo Haiheore kago ibugua i̱hondo lalu,  
\v 5 Í̠na wali agali bibahende dindi ogoha karuhondobi loma binigo mo miaga agali bu karuhondobi bi ogodagua lamibe. Mali pira karia (70) uruni harimagoni tígua ege dauningibi ege kanengibi kiabu dugu bialu tomo naneore harimigoni. Ani bialu ha harimigonigo uruni tígua Anduane Homogo i̱naga mini yaraga howa ndo bialu harimigoni.  
\v 6 Tígua tomoru nalu howabi tíninaga tombe hangu to̱lelonaga nalu haramiligoni ndobe laya, lalu lamibe, lene.   
\p
\v 7 Bamba Anduane Homogonaga bi mana latagi haga hearuha howa bi ogonidagua dege lamialu haga hene. Yarusaleme bayale wialu uruniha mbirale bibahende bayale dege wiangi howa latagi halu hene. Horo uruningi Yarusalemeni wali agali dewaore heagolabi Yarusalemeha tano emene kaware ngaruha wali agali dewaore bu heangibi tano abene unurayagi dewaore paleangibi ni paliragohayagi hari bare emene wima pedaruha wali agali dewaore palu heangibi bi ogoni dege latagi halu hene.   
\s1 Anduane Homogohanda Yuda wali agali garabaya bu yalu pelenegonaga irane Segaraia laminigo ogo  
\p
\v 8 Anduane Homogo ibugua Segaraiahondo bi ogodagua laya.  
\v 9 Ala i̱na i̱naga wali agali bu hearuhondo bi ogo lamirugoni. Tígua mana bayale tigabi ngaru dege bialu halimu. Tínaga damene karu dara halu biamogo bialu halimu.\x + \xo 7.9 \xt Har 22.21-22, LBM 19.17-18, 25.35, Man 10.17-19, 15.11, Yar 7.5-6, 22.3\x*  
\v 10 Wali maru agalini homene dalo bedarubi waneigini ti ai̱ya abala homene biru karubi wali agali dindi tara howa tí baba íbu hene karubi wali agali maru mbirale tubagi howa burupale karubi bibahendehondo mo ko nahalimu larugoni. Ani bialu tíni dameneore karu mo ko nahalimu lalubi abale langiru.   
\p
\v 11 Anidagua larugo lelowa dege wali agalime i̱ erembira ngialu i̱naga bi hale nahaya. Tinaga mini ndibu lalu  
\v 12 tinaga bu habaneha giambe ege to̱le̱ ale haya. Tigua Anduane Homogo Hongo Haiheore kagonaga bi hale nahaya. Ala i̱na i̱naga bi mana latagi haga agali ibilarugoni tiha howa i̱naga Dinini ibugua bi latagi hayagola wali agali tigua hale nahayagonaga i̱ keba timbuniore ho harugoni.  
\v 13 Tigua i̱naga bi hale nahayagonaga i̱nabi nde tigua i̱hondo bi layago hale naharu.  
\v 14 Ani biyagonaga puyabu hongohe ibalu datani mbirale ngaru puloyu piagadagua i̱na ti dindi tara taraha garabayabu yu piai helarugoni. Anidagua birugola tinaga dindi bayale wiago mo ko halu wali agali mbira ogoniha naheore ngelarugoni, laya lalu Segaraiahanda lene.   
\c 8  
\s1 Anduane Homogo Yarusaleme mo bayale hole lalu bi lowinigo ogo  
\p
\v 1 Anduane Homogo Hongo Haiheore kago ibugua bi ogo Segaraiahondo lamini.  
\v 2 Ibugua lalu, I̱na Yarusaleme wali agali gubaliniore ho kogo howa i̱na ti biamogo bua ho haabo harugoni. I̱na ti gubalini ho haore bidogome tinaga waitigi bu karuhondo keba timbuniore ho kogoni.  
\v 3 I̱naga tano loma bia hene Yarusalemeni daibu holebero. Wali agali tara bu karume i̱naga wali agali Yarusaleme tanoni bu karuni de hondowa lalu, De handa naberego. Yarusaleme wali agali bu karume Anduane Homogo heneneore talima pialu kagoni ndobe, lolebira. Hari Saiono Anduane Homogo Hongo Haiheore kogonaga ngago wali agali bibahendeme hari ogoni Anduane Homogonaga lomabia heneore nga lolebira.  
\v 4 Tano ogoniha wai bulenebi genda tara maru ngaru ariabi mbira naibulebiraore. Wali agali tano ogoniha haga karu ti hadege bialu hodagua halu halimburu yu howa tanoha hariga ngarunaga birulebira. Tano ogoniha ti bayale dege hai holebira.  
\v 5 Waneigini dewaore andaho howa tano ogoninaga harigani gini bialu bu holebira.\fig Tano ogoniha ti bayale dege hai holebira. Waneigini dewaore andaho howa tano ogoninaga harigani gini bialu bu holebira.|src="HK 81f.tif" size="2" ref="(8.4-5)" \fig*   
\p
\v 6 Wali agali yu wahene emene hangu bu karume i̱na ogo ale mbira bulebira larogoni nabibeheore lo manda bu holebira. Anigo i̱ Anduane Homogo Hongo Haiheore kogome mbirale mbira nabibehe nawi. I̱na mbirale bibahende biai habehe kogoni.  
\v 7-8 Ainde waitigirume ibalu i̱naga wali agaliru minu garabaya bu yalu maru dindi ni tagira ibiragohayagi pialu maru nde ni paliragohayagi pialu biya. Ani yalu piyagoha howa i̱na i̱naga wali agali uruni lone haru dai berogola ti Yarusalemeni holebira. Ani kagola ti i̱naga wali agali helalu i̱ni tinaga Ngode Datagaliwabe howa i̱na mana tigabi ngaru hangu bialu holeneme handayaho halu haru haabo holebero.\x + \xo 8.7-8 \xt Yar 3.17, Ese 11.20, Seb 3.20, Seg 10.10\x*   
\p
\v 9 Tígua biabe hongo howaore bialu holene nga. I̱naga anda biago pigane bialu hemingi i̱naga bi mana \w latagi\w* haga agali biarume bi latagi hayaru manda bilimu. Áyubi nde tí bi mbiraore ogoni aria dege hale haramigoni.  
\v 10 Anduane Homogonaga bi mana latagi haga agali uruni tigua bi latagi nahe heangi marume wali agali garabaya biabe ale bialu helo yolo bulenebi nogo bulumagame biabe bilonaga yolo bulenebi uruni nawiyagola bame hene. Tinaga damene dege hearuni mo waitigi haga birugola tini baya hangu ha nabi gi ho harimi.  
\v 11 Anigo áyu i̱na wali agali yu wahene emene bu karuni baba mana tara mende ale bialu holebero.  
\v 12 Tinaga bu miniha mo palia holene karulo helo merogola tigua tini mabuha tomoru hangalu haga haga bulebira. Iba dalu ibilarogola ti mabuha pu kuabu ale mbira lini daga mini \w gerebiru\w* anda halu lini bayaleru dalu tomo tara tararubi anda hai holebira. I̱naga wali agali yu wahene emene karu baba howa mbirale bayale urunidagua bialu holebero.  
\v 13 Yuda wali agalirubi Isaraele wali agali bu kamirubi tígua bi larogo hale hadaba. Hameigini dindi tara taraha hearume tí mo ko hene wiago hondowa tini ha halu lalu, Tíore bayale ha ndo Yuda wali agaliru Isaraele wali agalirubi homo da hai hayadagua tíbi homo ereba halimu, lalu ha haga biya. Anigo ai i̱na Yuda wali agalibi Isaraele wali agalibi haru daibu heledoru mo bayale holebero. Ani heledogola hameigini dindi tara taraha haga o biarume tí hondowa ogodagua tini laga laga bialu lalu, Tíore Yuda wali agalibi Isaraele wali agalibi ti bayale kagobi dege bayale halimulo hameledema laga bulebira. Ani lolebirago ai tígua gi nahe howa hongo ho halimu, laya lene.   
\p
\v 14 Anduane Homogo Hongo Haiheore kago ibugua lalu, Bamba tínaga mamalirume i̱ mo keba hayagola i̱naga miniha mo iriari bulene manda nabi howa i̱na ti mo ko holene manda birudagua ti mo ko halu bo wahai haru.  
\v 15 Anigo áyu Yarusalemebi Yuda bibahendebi mo bayale hai hole manda manda bu kogoni. Anidagua buleberogo ai tí gi nahe hongo ho holene nga.  
\v 16 Ani howa tígua bialu holene ngago ogo, Mendeali kagohondo bi henenego hangu laabo holene nga. Godi lole bi hale halu howa tiga tiga kirabalinaga hanuni howa mbirago ibu bi manda bu yu haabo nahelo abale mo tiga bulene nga.\x + \xo 8.16 \xt Eb 4.25\x*  
\v 17 Wali agali mende karu mo ko holene mitangi nabi holene nga. Tígua godi lole pu howa ke̱ howa nalalimu. Bi ke̱ howa lolenebi godi lalu howa tiga tiga ndo mendeali mo hondo howa lolenebi keba halu guraga bulenebi uruni aleru bibahende i̱na hame naleore kogoni, laya lene.\x + \xo 8.17 \xt Min 3.29, Seg 5.3-4, 7.10\x*   
\p
\v 18 Anduane Homogo Hongo Haiheore kago ibugua Segaraiahondo bi mende lamini.  
\v 19 Ibugua lalu, Tígua ege maneru dauniru kaneru piniru tagira ibugu biragola ege uruninaga horo mbiru mbirungi tíha genda tagira ibiyago mitangi howa tí \w tomo\w* nane haga wirimigo. Ai mani horo uruni Yuda wali agali tínaga horo tíni mo ngoaiho howa turu hagabu holene mbira wia aribia holebira. Ani bu holeberemigo mitangi bialu áyu howa tígua bi henene lolenegobi wali agali mende kago baba turu hagabu hangu holenegobi manda bialu gubalini ho halimu, lalu lamini.   
\p
\v 20 Anduane Homogo Hongo Haiheore kago ibugua laabo halu lalu, Mani howa wali agali tano dewaore bu ngaruha howa Yarusaleme íbu ngoai holebira.  
\v 21 Wali agali tano mbiraha haga karu tigua wali agali tano mendeha haga karuhondo ogodagua lalu, Iname Anduane Homogo Hongo Haiheore kago mitangi bialu lotu lalu ibuhondo ina biamogo bia lole Yarusaleme poromago tíbi nde ina haru mandagi maibidaba, laga bulebira.  
\v 22 Wali agali dewaore hongohe dindi timbuni tara tara ngaruha howa Yarusalemeha ibuwa tigua Anduane Homogo Hongo Haiheore kago mitangi bialu lotu lalu ibuhondo ina biamogo bibe lole ibugu bulebira.   
\p
\v 23 Horo ogoningi hameigini dindi tara tara ngaruha howa agali pirali ibalu tigua Yudali mbira kago minu yania howa ibuhondo lalu, Ngode Datagaliwabe ibu tí Yuda wali agali baba ka layane hale harima. Ani hale howa inabi nde tí baba ho mbiraore hoa biragonaga ibirima, lolebira lene.   
\c 9  
\s1 Anduane Homogohanda hameigini dindi tara tarani padaru pani mulebira lenego ogo  
\p
\v 1 Anduane Homogo ibugua Segaraiaha howa mbiwia halu bi au laya. Anduane Homogohanda dindi mbira mini Hadaraga ngagobi Damasagasa tano ngagobi hondowa ti pani mule manda manda bu ngelowa hondo ka. Ani ngelowa Isaraele hameigini dindi tara taraha bu karubi ti Anduane Homogohanda pani agi mirabe hondole handayaho ka.\x + \xo 9.1 \xt Ais 17.1-3, Yar 49.23-27, Amo 1.3-5\x*  
\v 2 Ani hondo howa dindi Hadaraga ogoniha dege dindi emene mbira mini Hamada ngagobi Taia tanobi Saidono tanobi wali agali dindi uruniha bu karume Anduane Homogohanda tihondo pani agi mirabe hondole handayaho holebira. Taia wali agali Saidono wali agalibi tinaga mini manda bogarubi mugube taratara ngaru ngelowa dege tibi Anduane Homogohanda handayaho holebira.  
\v 3 Taia tano ogoni ege paberu bu mabubi hongohe mbira nga. Tigua ngolo silibaru dewaore dindini abalu wiame kadagua wu kagoni.  
\v 4 Ani bidagoyu Anduane Homogohanda mbirale uruni bibahende mo wahai holebira. Ibugua Taia wali agalinaga mbirale ngaru bibahende iba solowara bedagoha mo bape hai halu tinaga waitigime tano ngago bo heda hai helo helolebira.   
\p
\v 5 Wali agali Asagelono tanoha bu karume mbirale uruni birago hondowa ti gi timbuniore ho holebira. Mani tinaga tanobi bo heda dege haragola tano ogoniha wali agali mbira naholebira. Gasa tanoha wali agali bu karu tiguabi nde mbirale uruni birago hondowa ti tandaga timbuniore holebira. Ani bialu tinaga kinibi nde homolebira. Egerono tano wali agali tiguabi nde mbirale uruni birago handaya ho karia mani tiniha genda uruni ale dege tagira ibulebira. Tigua mitangi bialu Taia wali agali bu karume ti biamogo bulubadago manda bialu mini dunubia ho henego ai ereba holebira.\x + \xo 9.5 \xt Ais 14.29-31, Yar 47.1-7, Ese 25.15-17, Yol 3.4-8, Amo 1.6-8, Seb 2.4-7\x*  
\v 6 Wali agali dindi tara tara bu ngaruha howa ibugu bialu Asadodo tanoha dege íbu holebira. Anduane Homogohanda lalu, Pilidiali uruni mine hagaore bu kago i̱na ti mo dindiha halu bope holebero.  
\v 7 Bope howa tigua Isaraele wali agalime ilili biaga mana ngago talialu nogo egaru darama bedaore nanaga howa Yuda wali agalirume tomo nolenebi nanolenebi mana biagadagua tibi nde anidagua bulebira. Ani bu howa Pilidia wali agali yu wahene emene hangu hearu ti i̱naga wali agali karuha hatago howa ti Yuda hameigini aria dege holebira. Bamba Yabusu hameiginime i̱naga waneigini baba hamaga halu ho mbiraore henedagua Egerono wali agali karu tibi i̱naga wali agali baba ho mbiraore holebira.\f + \fr 9.7 \ft Yabusu hameigini ogoni ti Yarusaleme dindi aba hene. Mani Debidihanda Yarusaleme tano karulayangi Yabusu hameigini ti Isaraele wali agali baba mandagi haga hene. Yosua 15.63 handabe.\f*   
\p
\v 8 I̱naga dindi i̱nime handaya ho kogola ami agali bu karume dindi ogoniha pu íbu bialu holene nawulebira. I̱naga wali agaliru ti tandaga nalu henego manda buwa marume ti lone mo ko halu bope holilono i̱nime handayaho haabo holebero, laya lene.   
\s1 Kini mbira mani ibulebira lenego ogo  
\q1
\v 9 Saiono tano wali agaliru-o turu hadaba.\x + \xo 9.9 \xt Md 21.5, Yo 12.15\x*  
\q1 Yarusalemeni kamiru-o  
\q2 turu halu bi hongo howa ladaga halu hadaba.  
\q2 Tínaga kini tí kamiria o ibiragonigo de handadaba.  
\q1 Ibugua ibunaga waitigiru bope howa ibu mini lene timbuniore kagoyu  
\q2 ibuninaga mini mo yaraga nahaga howa  
\q1 ibu mini mo dindiha halu nogo dongi mbirani biralu ibiragoni.  
\q2 Nogo dongi hungubalua mbirani biralu ibiragoni.   
\q1
\v 10 Anduane Homogohanda laabo halu bi ogodagua laya.\x + \xo 9.10 \xt Iba 72.8\x*  
\q1 Wai bu piaga nogo hosime gili laga karisiru i̱na mo wahai holebero.  
\q2 Wai biaganaga nogo hosi Yarusalemeni karubi Isaraele dindiha nahelo  
\q1 i̱na mo wahai holebero.  
\q1 Tinaga wai biagane danda yu karu bibahendeore podo wahai holebero.  
\q2 Tínaga kini ogoni ibugua hameigini tara tara dindi bibahendeha bu karu  
\q2 wai nabilo mo palia hai halu turu hagabu bayale helo helolebira.  
\q1 Kini ibunime dindi haru holobadagoni  
\q2 solowara iba ange mende mendehayagibi bibahende handame howa haru holebira.  
\q1 Dindi timbuniore Iba Yuberedisi poragoha pu bolangua halu  
\q2 amuraore dindi wiamaro bidaruha heba haru haame holebira, lene.   
\s1 Anduane Homogohanda ibunaga wali agali pele mialu haru dai bulebira lenego ogo  
\q1
\v 11 Anduane Homogohanda lalu,\x + \xo 9.11 \xt Har 24.8\x*  
\q1 Yuda tí baba habo nalolene bi mbira i̱na lo wirugo  
\q2 tínaga mamalirume bulumagaru bo loma biyarunaga darama pugulalu piyarume  
\q2 habo nalolene bi ogoni lowirugo mo hongo haya.  
\q1 Ani biyagome i̱na tí dindi mendeha  
\q2 tagira pialu pobe nahe garabayaore kamiria gololebero.  
\q1 Gundu uliha biruwa tagira pobe naheore wiagoha  
\q2 iba noa halu hége lebola howa tongolalu kamiria golope haga bulebero.   
\q1
\v 12 I̱na ani buleberogo tí mini dunubia hodai bialu  
\q2 i̱ andaneha hole tíni dalu wiyadagoha daibu halimu.  
\q1 Tí ani birimiyagua bayale holeberemi.  
\q2 Tí genda timbuniore yu harimigonaga bi ogodagua laro.  
\q1 I̱na tínaga genda uruni mo wahai halu  
\q2 tí biamogo timbuniore bolangua howa bulebero.   
\q1
\v 13 I̱na Girigiali karu baba wai bule  
\q2 Yudali karu mo danda halu  
\q1 Isaraeleali karu mo timu halu buwa wai bulebero.  
\q1 Yarusalemeali karu wai biaga mo ayu tibu ne gadeleore ngaligobi helalu  
\q2 urunime i̱na Girigiali karu baba wai bulebero,  
\m lalu Anduane Homogohanda lene.   
\b  
\q1
\v 14 Anduane Homogohanda ibunaga wali agali karuha deme hendeneore hapani howa  
\q2 ibugua danda timu tegelalu waitigi kagoha bo pelalu  
\q2 ibunaga timuru hari daba ale bima wigiwaga lalu abale polebira.  
\q1 Anduane Homogo Bibahende Haru Haame Ho Haga kago ibugua mbelo mini biguli pulolebira.  
\q2 Unurahayagi howa puyabu hongoheru iba dalu heba ibulebira.   
\q1
\v 15 Anduane Homogo Hongo Haiheore kagome ibunaga wali agali mamage howa baya hangu handayaho holebira.  
\q2 Handayaho halu tigua tinaga waitigi karu bibahende bo hengedai holebira.  
\q1 Tigua wai huaro laraha lulu iba no howa laradagua hongo howa lama pialu  
\q2 tinaga waitigiru bo payapaya biai holebira.  
\q2 Waitigirunaga darama pelolebira.  
\q1 Tinaga darama ogoni lomabu delaga dabuni mbirale bo mialu  
\q2 darama hambuwa odope hagadagua bulebira.   
\b  
\q1
\v 16 Horo ogoningi nogo sibi haru hagame ibunaga sibiru nogo gabuame balu nole ibiragola pele miagadagua  
\q2 Anduane Homogohanda ibunaga wali agali pele mialu haru daibulebira.  
\q1 Kininaga mandani ege to̱le̱ ngarale tara tararume ngiringaralo wiagadagua  
\q1 ti Anduane Homogonaga dindini bayale holebira.   
\q1
\v 17 Dindi ogoni nde baya taraore abi wulubada.  
\q1 Wandari igiri daliaheru nde ti dindi bayale ogoniha howa  
\q2 widiru \w waini\w* iba bayale ngaru nalu howa bayaleore hongo howa anda haga bulebira,  
\m lalu Anduane Homogo ibugua Segaraiaha howa mbiwia halu lene.   
\c 10  
\s1 Anduane Homogohanda ibunaga wali agaliru biamogo bulebero lenego ogo  
\p
\v 1 Tínaga mabuha tomo hengedemiru anda holene tu haragola Anduane Homogohanda iba dalu ibilelo ibuhondo ibila lalimu. Anduane Homogohanda hari beraliba ibilaragola ogoniha howa iba dalu ibira haga. Anidagua biragome tomo mbiraleru wali agali bibahendenaga anda hai haga.  
\v 2 Wali agali marume mbirale dama mitangi bialu gime wabini ngaruhondobi maru halaga biaga karuhondobi mani ogoale bulebira lalu langi laga biaga. Ani bialu karia urunime ke̱ howa bi tindule dege lalu ladai biaga. Marume emaga hendenegonaga irane latagi howa bi dewa ke̱ halu laga. Ani lalu tí bayale holeberemi laragola ogoni henene ndo laragome tí genda yu haabo haga. Wali agali ani genda yu howa nogo sibi haru haga nahedagola sibiru ti pugupugu bialu hagahaga biagadagua bialu haga. Ti haru haga mbira nahedagola ti genda yu haabo haga.\x + \xo 10.2 \xt Md 9.36, Mg 6.34\x*   
\p
\v 3 Anduane Homogohanda lalu, Dindi taralime i̱naga wali agali haru kagonaga keba timbuni ho kogo i̱na ti pani mialu bolebero. Yudali ti i̱naga wali agaliore kago i̱ Anduane Homogo Hongo Haiheore kogonigo i̱na ti baya hangu handayaho holebero. Yudali ti i̱naga wai biaga nogo hosi hongohe kaligobi holebira.  
\v 4 Yuda hameigini uruniha howa kinirubi haru haga agali haguanerubi ami agali haru bamba hagarubi tagira íbu hai howa tigua i̱naga wali agali bayuwa haru holebira.  
\v 5 Ani howa Yuda wali agali tigua tinaga waitigiru balu wayali holebira. Tigua ami agalirume wai bialu tinaga waitigiru tanonaga hariga piaga waru ngagoria bo hengedo wahene ngaligobi ngelolebira. Anduane Homogo ibuni ti heba howa hongo karulape miragola Yudali tigua tinaga waitigi nogo hosini biralu wai ibiraru bibahende bo hilo wahaiore haga bulebira.   
\b  
\q1
\v 6 Anduane Homogohanda lalu,  
\q1 I̱na Yuda wali agaliru mo hongoho helalu  
\q1 Isaraele wali agaliru haru dai bulebero.  
\q1 Tiore dara timbuniho kogodago  
\q1 i̱na ti bibahendeore tininaga dindi wiyagoria lone helo haru dai biai holebero.  
\q1 I̱na ani bu heledogola ti bo batagi hene ale ndo holebira.  
\q2 I̱ Anduane Homogo tinaga Ngode Datagaliwabeore kogonigo  
\q2 i̱na tinaga bi lararu hale haga bulebero.   
\q1
\v 7 Ainde Isaraelealiru ti hongohe ami agali ale howa  
\q2 agalime \w waini\w* iba nowa turu hagagobi turu timbuni hai holebira.  
\q1 Tinaga aguanene mani holebirarume o binidagoni hondowa  
\q1 Anduane Homogohanda tinaga mamaliru biamogo timbuni ogoni biyadago  
\q2 mitangi bialu turu timbuniho holebira.   
\b  
\q1
\v 8 I̱na i̱naga wali agaliru bibahende olalu  
\q2 mo mogobu helolebero.  
\q1 I̱na ti haru dai bialu  
\q2 wali agali dewaore abale hagadagua dege mo dewa ho helolebero.   
\q1
\v 9 I̱na ti dindi tara tara kaundia wiaruha garabaya bu helarugoyu  
\q2 tigua dindi kaundia uruniha howa i̱ni kogo embeda nahe mitangi biaabo holebira.  
\q1 Wali agali uruni tinaga waneigini heba bayale howa  
\q2 ti bibahende mo mogo bialu tininaga dindi tene ngagoria dai bulebira.   
\q1
\v 10 Wali agali Iyibi dindiha pu karubi Asiria dindiha pu karubi bibahende i̱na haru dai biai holebero.  
\q2 Haru dai buwa i̱na tininaga dindiore ngagoria helolebero.  
\q1 I̱na tinaga dindi mo yangalalu Gileada dindi ngagohabi Lebanono dindi ngagohabi wu dogola amu helolebero.  
\q2 Dindi uruniha wali agali ho to̱lowa holebira.   
\q1
\v 11 Tigua mani genda yu howa iba li aleme wiapai hayagua  
\q2 Anduane Homogo i̱na ti biamogo bialu ibame namu nalelo bope holebero.  
\q2 Iba Naili porago hundiradagua bialu tinaga genda i̱na mo ereba holebero  
\q1 Asiriali bu karunaga mine holenego i̱na bo ibira dege holebero.  
\q2 Iyibiali tinaga hongo timbuni holenebi mo ereba holebero.   
\q1
\v 12 I̱na i̱naga wali agaliru bayale helonaga mo hongo holebero.  
\q2 Tigua i̱ni andaneha haabo howa i̱naga mini yaraga halu  
\q2 bi mana lo ngadagua biaiore halu haabo holebira.  
\m I̱ Anduane Homogo i̱na bi o ledogoniore.   
\c 11  
\s1 Kini ko hearu ira gabuni ale ka lenego ogo  
\q1
\v 1 Lebanono wali agaliru-o  
\q2 tínaga ira tamia bu karuni irame dai helo wahadaba.   
\q1
\v 2 Ira tamia biaru podo ibira hai ho nga.  
\q2 Ira mini lene uruni podalu mo ko hai ho ngagoni.  
\q1 Ira guraya ale kamiru tígua dugu bia hadaba.  
\q2 Irabu wiago dibai hayadagonaga  
\q1 Basana dindiha ira mini oga kamiru tíguabi nde dugu bia hadaba.   
\q1
\v 3 Haru haga bu karu tinaga hongo holene biba halu  
\q2 mini lene timbuni ala henego ereba hayago  
\q2 dugu hongo howa biaruago hale hadaba.  
\q1 Iba Yodana angeha budi ale gabua timbuni mini laiono ti irabuha ha do haga ngaru dibu wahai harago  
\q2 ha do holene taya bialu ngororo lama ibaruago hale hadaba. \fig Iba Yodana angeha budi ale gabua timbuni mini laiono ti ... ha do holene taya bialu ngororo lama ibaruago hale hadaba.|src="HK 11e.tif" size="2" ref="(11.3)" \fig*   
\s1 Haru hagane kira ka lenego ogo  
\p
\v 4 Anduane Homogo i̱naga Ngode Datagaliwabehanda i̱hondo ogodagua laya. Nogo sibi anduaneme sibiru bole biagadagua í̠na ani bialu habe.  
\v 5 Nogo sibi anduane karume sibi baramago mana liahe ndo berema lomanda biaga. Tigua sibi bayago podalu muni muwa lalu, Ina muni dewawi kamagonigo Anduane Homogo kagonaga mini yaraga hama, laga ka. Nogo sibi uruninaga haru haga karu tiguabi nde sibiru dara nahaga ka.   
\p
\v 6 Anduane Homogohanda lalu, Wali agali dindini bu karu ti i̱na dara naholebero. I̱na ti bibahende hangu hangu tininaga kini giha minu yahaga bulebero. Ani berogola nogo sibi anduaneme sibiru bagadagua haru haga karume ti mo ko haga bialu kagola i̱na ti biamogo nabulebero, laya.   
\p
\v 7 Nogo sibi bolene bu karunaga haru haga i̱ harugoni. I̱na nogo sibi haru haganaga halimbu kira yu harugoni. Halimbu mendego mini Dara Holene Irane Nawini Dara Holene. Mendego mini Mandagi Mo Mbiraore Holene. I̱na halimbu kira ogonilabo yu howa i̱naga nogo sibiru haru harugoni.  
\v 8 Haru haga agali tebirali i̱ heba biabe mandagi biaga hearume i̱ handabe manga hayagola i̱na ti ege mbirago dege andaneha howa bo duguaru.  
\v 9 Ani bialu i̱na nogo sibi urunihondo lalu, I̱ tínaga haru haga naholebero. Nogo sibi homelo dabo helene karu ti homelo. Maru mo ko helonaga dabo helene karu tibi mo ko helo. Maru yu wahene karu tibi nde tini bo wahagahaga bilo, larugoni.  
\v 10 Ani lowa i̱na halimbu mendego mini Dara Holene Irane Nawini Dara Holene laga biago podaki haru. Ani podowa hameigini dindi tara taraha karu baba Anduane Homogohanda habo nalolene bi lowinigo i̱na habo larugoni.  
\v 11 Ani birugoningi habo nalolene bi ogoni biba hayagoni. Agali maru nogo sibi muni taguialu hinulene yolo bialu hayaru tigua i̱ hondowa mandabu handalu hearia Anduane Homogohanda mbirale i̱nime bialu harugonaga bi langiragoni lo manda biya.  
\v 12 Ani buwa i̱na tihondo lamialu, Tígua i̱hondo yolo nguleyagua nde ngialu nanguleyagua nde wahalu tínime hame ledamidagua bilimu, laru. Ani larugola tigua i̱na biabe birugonaga yolo muni siliba pira tebira (30) hangu ngiya.\x + \xo 11.12 \xt Md 26.15\x*\x + \xo 11.12 \xt Md 27.9-10\x*   
\p
\v 13 Ani biyagola Anduane Homogohanda i̱hondo langialu lalu, Muni ogoni mo yalu agali dindime mbirale tara tara wabiaga kagohondo mo mibe, laya. Ani laya handala muni ogoni agali bu hearume i̱ habane nabulene kabe toba howa i̱ yolo ngiyago yalu puwa i̱na Anduane Homogonaga andaha agali mbirale wabiaga heagohondo miru.  
\v 14 Ani buwa i̱na halimbu mendego mini Mandagi Mo Mbiraore Holene laga biago podaki harugola Isaraele Yudala hameigini mandagi ndo hangu hangu paligi paligi bu hene.   
\p
\v 15 Ani biwagola Anduane Homogo ibugua i̱hondo langialu lalu, Ai í̠ nogo sibi haru haga halu mende hole habe. Ani howa sibi haru haga agali bayale ndo habane nabulene ale hole habe.  
\v 16 I̱na i̱naga wali agali nogo sibi ale karu haru helonaga agali mbira dabo heledogoni. Ani helarugola ibugua i̱naga wali agali uruni bayuwa haru nahaga. Ibugua sibi ti ko haragola biamogo nabiagabi nogo sibi pu ereba hararu olalu taya nabiagabi sibinaga dere bidaru dabi helo kabu nabiagabi ti bayale helonaga tomo namiagabi haga. Ani nabiaga howa ibugua sibi haba tigi karu balu mbirini damenego nai halu gi hondone ge hondonebi budalu mbirini karu bibahende nai holenaga ani biaga holebira.  
\v 17 Nogo sibi haru haga agali ogoni ibugua nogo sibi haru hayaru bibahende yu wahai hayagonaga ibuni mo ko holeneore wulebira. Ibu waitigirume ibalu ibunaga hongo bope hai holebira. Anidagua biragola ibunaga gi homalu ibunaga de tiga ko halu ndibulo wahene holebira, lalu Anduane Homogohanda laya, lene.   
\c 12  
\s1 Anduane Homogohanda mani Yarusaleme biamogo bulebira lenego ogo  
\p
\v 1 Anduane Homogohanda dindi haribi wabialu wali agali bibahende bu kamarunaga holene ngiaga kago ibugua Isaraele wali agali karunaga mbiwia halu bi ogodagua laya. Ibugua lalu,  
\v 2 I̱na Yarusaleme \w waini\w* iba gabo beha hambu berelenego ale helolebero. Ani heledogola hameigini tara tara dindi Yarusaleme kawareni bu karume ibuwa waini iba be biagoha howa naradagua biragola tini lulu iba nowa luluyu hagadagua holebira. Waitigi o ibirarume Yarusaleme ho hagira bialu Yuda dindiha tano maru ngarubi heba ho hagira biai holebira.  
\v 3 Horo ogoni tagira ibirangi i̱na Yarusaleme mo yaraga habe nahe ege to̱le̱ gendabi ale ngelolebero. Dindi bibahendeha wali agali hameigini tara tara paluyu pedarume mo mogo bialu Yarusaleme baba wai bule ibalu karia agalime ege to̱le̱ gendabi yaraga habe nahe wiagadagua ngagome tini mo koore howa pugu bulebira.  
\v 4 Horo ogoningi i̱na waitigirunaga nogo hosiru mo gi hai harogola agali nogo hosini bedaru lulu yalu purogo lolebira. I̱na Yuda wali agali bayuwa handayaho howa waitigirunaga nogo hosi karunaga de mo ndibulai helolebero.  
\v 5 Ani berogola Yuda hameigininaga agali haguane bu karu tigua mbirale uruni birago de hondowa tini dege dege laga laga bialu lalu, Anduane Homogo Hongo Haiheore Ngode Datagaliwabe kago ibugua ibunaga wali agali Yarusalemeha bu karuhondo hongo miaga kagoni, lolebira.   
\p
\v 6 Horo uruningi i̱na Yuda dindiha agali haguane bu karu ira hungu bibehe dangi yuni gaule alebi widi bogabinaga yuni gabuni ngagoria ira hungu abale kulu lalu hundia habe nahe dai haraligobi ti holebira. Ani howa tigua hameigini tara tara tinaga waitigi dindi kawareni palia para para bidaru bibahende bo wahai holebira. Ani biragola Yarusaleme tano ibuni ngagoria bayale wiaabo holebira.   
\p
\v 7 Anduane Homogo i̱nime Yudanaga ami agali bu karu tigua wai bialu wayali howa helolebero. Ani berogome ti mini lene timbuni Debidi aguanene hama ibinirubi Yarusalemeali hama ibinirubi tigua Yuda maru uruni mini lene bolangua naholebira.  
\v 8 Horo ogoningi Anduane Homogo i̱na wali agali Yarusalemeha karu i̱nime hapai halu humbi haradagua bulebira. I̱na agali maru wai bulene hongo nahe bu karu mo hongo harogola tibi nde wai biaga hongohe howa pari wayali Kini Debidi ale dege holebira. Ani kagola Debidi aguanene mani holebirarume ti nde Anduane Homogonaga dahuliyali ale howa tigua Yarusalemeni karu haru halu Ngode Datagaliwabe ibugua haru hagadagua haru holebira.  
\v 9 Horo uruningi i̱na hameigini dindi tara tarani howa Yarusaleme baba wai bule ibiraru mo ko halu bo wahai holebero, laya lene.   
\s1 Agali bowa mani dara howa dugu bulebira lenego ogo  
\p
\v 10 Anduane Homogo ibugua laabo halu lalu, I̱na Debidi aguanene bu karubi Yarusaleme wali agali bu karubi tiha dara howa biamogo bulenebi i̱nihondo bi loa holenebi to̱lai ho helolebero. Tigua agali mbira tinime bo wiyagoria ngago hondowa agali ibu igini mbiraore hangu henego homaragola dugu hongo howa bialu hagadagua tigua bialu holebira. Agalime ibu igini wahene hono winigo homaragola dugu timbuniore biagadagua tiguabi ani bulebira.\x + \xo 12.10 \xt Md 24.30, Mo 1.7\x*  
\v 11 Ani bialu horo uruningi Yarusalemeha dugu timbuniore bulebirago dama mitangi bialu bi pupu wule gime wabini mini Hadadarimononaga dugu dindi tigabi Megido ngagoriani dugu biagadagua bialu holebira.\f + \fr 12.11 \ft Dindi Kenanabi Siriabi wali agali hearume dama mitangi mbirale gime wabini mbira mini Hadadarimono ogoni ibu mini mende Bala wini. Tigua dama ogonime tomo tara tara mo anda haganaga dama ka laga hene. Mali mbirani tomo tara tara anda nahe gau lai hayagua nde wali agali maru hearume dama o biagobi homaga biaga lalu ibunaga dugu hongo howa yiyi lalu haga. Ani bialu mani ibu holene mo karulalu heyaya manda biaga wini.\f*  
\v 12 Wali agali bibahende tini damenema andaga hangu hangu padadagua dugu bigi bigi bialu holebira. Debidi aguanene bu karu ti onerubi Nadana aguanene bu karu ti onerubi  
\v 13 Libai aria bu karu ti onerubi Simei aria bu karu ti onerubi  
\v 14 maru hama ibinirunaga aguanene bu karu ti onerubi ti bibahendeme dugu bialu holebira. Anda mbira mbiraha paliaga bidadagua mo mogo buwa wali ti tini kadagua handa edene bu howa dugu bialu agali nde tini hangu anda mendeha bu howa dugu bialu holebira, lalu Anduane Homogohanda Segaraiaha howa mbiwia halu lene.   
\c 13  
\p
\v 1 Anduane Homogo Hongo Haiheore kagome lalu, Horo uruni tagira ibirangi iba tara mbira dugualu piagobudaga halu helolebero. Wali agali Debidi aguanene bu karubi wali agali maru Yarusalemeni haga bu karubi tigua mana ko timbuniore biyarubi dama mitangi bialu gime wabini wiaruhondo bi pupu wiyarubi iba duguaraga haragonime mana ko uruni biyago bibahende domo wahai holebira, laya lene.\x + \xo 13.1 \xt Iba 51.2, 51.7, Ais 1.16-18, Ese 36.25, Yo 1.29\x*   
\s1 Ke̱ howa mbiwia halu bi mana \w latagi\w* haga karu mani ereba hai holebira lenego ogo  
\p
\v 2 Anduane Homogohanda laabo halu lalu, Horo uruniangi mbirale dama mitangi bialu bi pupu wule gime wabini dindi bibahendeha ngaru i̱na mo wahai harogola mbiralime uruni mitangi bu haabo nahe embedaho wahaiore holebira. Ani bialu ke̱ howa mbiwia halu bi mana \w latagi\w* haga bu karu bibahende biba hai helolebero. Wali agalinaga mini ko ngaru mo wahai harogola tigua dama mitangi bialu bi pupu wule gime wabini ngaruhondo bi pupu wua nahe wahai holebira.  
\v 3 Ani kagola mbiralime ke̱ howa mbiwia halu bi mana latagi haabo hayagua ibu aba ai̱yalame ibuhondo lalu, Í̠na bi ogoni Anduane Homogonaga bi larogo lalu henene ndo tindule lalu í̠ninaga bi hangu laregome í̠ homolebere, lolebira. Agali o biagome ke̱ howa mbiwia halu ibuninaga bi latagi hayagua nde ibuni aba ai̱yalame ibu homelo nabime nogoba halu bo waholebira.\x + \xo 13.3 \xt Man 18.20\x*  
\v 4 Horo uruningi bi mana latagi haga agali mbiragome de gandeba handarago latagi hole taga holebira. Anduane Homogonaga bi mana latagi hagame aga karulo hagadagua ibugua wali agali mo hondo holenaga aga ogoni karu nale holebira.  
\v 5 Agali ogoni ibugua lalu, I̱ Anduane Homogonaga bi mana latagi haga agali ndo i̱ mabuha biabe bialu haruli. I̱ igiri emeneni howa mabu biabe biaabo haga hene kogoni, laga bulebira.  
\v 6 Ani laragola mbiralime ibuhondo hale halu lalu, Í̠naga galu kunini motudu ngagoni agua binibe, lalu hale hayagua ibugua tihondo ke̱ howa ladai bialu lalu, I̱ nenege mbira andaga pu hewaria nogoba henego motudu ogoni, lolebira, laya lene.\f + \fr 13.6 \ft Agali marume ke̱ howa bi mana latagi haga tinaga tingini nabime minu podene motudu wi haga. 1 Kini 18.28 ngago handabe. Anidagua bidagola wali agali maru karume o biarunaga galu kunini nabime podene motudu ngago hondowa ibu bi mana latagi haga agali mbirada laga biaga. Ani hendeda tiraga ibugua ke̱ howa ibu agali ogoni ndo laga.\f*   
\s1 Anduane Homogohanda nogo sibi haru haga kago bolene nga lenego ogo  
\p
\v 7 Anduane Homogo Hongo Haiheore kago ibugua lalu,\x + \xo 13.7 \xt Md 26.31, Mg 14.27\x*  
\q1 Wai biagane ayu tibu ne gadele-o í̠ heya.  
\q2 Í̠ heyalu agali i̱naga biabe bia halu haru haga kago babe.  
\q1 Nogo sibi bu karu ibida purogo lelo nogo sibi haru haga kago bo wahabe.  
\q1 I̱na i̱naga wali agaliru baba wai bulebero.   
\q1
\v 8 Dindi ogoha wali agali bu karuni halu tebira mo tale buwa  
\q2 haluki kago bo hilo wahai halu  
\q2 tebonego yu waholebero.   
\q1
\v 9 I̱na wali agali halu tebone talebu helarugo tiha ko mbira ngabe hondole  
\q2 ngolo silibaru bayale dodo mbira para nahe ngelonaga irani delaradagua bulebero.  
\q1 I̱na ani bu helowa tigua i̱ mini olaragola  
\q2 i̱na tinaga bi lararu hale holebero.  
\q1 Hale howa i̱na tihondo lamialu lalu,  
\q1 Tí i̱naga wali agaliore kamigoni, lolebero.  
\q2 Tigua nde, Í̠ Anduane Homogo inanaga Ngode Datagaliwabeore kegoni, lalu latagi holebira,  
\m lene.   
\c 14  
\s1 Waitigirume Yarusalemeni wai bulebira lenego ogo  
\p
\v 1 Anduane Homogonaga horo mbira tagira ibulebira. Horo ogoni tagira ibirangi Yarusaleme wali agali tínaga muni mbirale ngamiruni waitigime ibalu mo yulebira. Mo yuwa tíni handaya ho kamiore dege tíninaga deni howa talebu yagayaga bulebira.  
\v 2 Anduane Homogohanda dindi bibahendeha howa hameigini tara tara haru ibalu ti Yarusaleme baba wai bulebira. Tigua Yarusaleme bope howa tí andagaha mbirale ngamiru bibahende mo yai halu wali bedaru minade halu kayu yaga bialu holebira. Wali agali karu bibahende halu ki mo tale buwa wabuni mbirago garabaya haru pialu wabuni mendego Yarusalemeni helo waholebira.  
\v 3 Ani biragola Anduane Homogo ibugua ala wai birangi biaga wiyadagua dindi bibahendeha howa ibiyaru uruni baba wai bulebira.  
\v 4 Horo uruni tagira ibirangi Anduane Homogo ibuni Yarusaleme tano kaware ni tagira ibiragohayagi Hari Olibe nene ngagoria holebira. Ani kagola Hari Olibe kago hanuni kambuluki howa amura haga haga biragola dindi ulini panda panda ona wu yu polebira. Hari hanuni kambuluki haragola mendego uyurayagi ha uyu halu mendego unurayagi ha unu holebira.\x + \xo 14.4 \xt Ese 47.1-10, Mai 1.3-4, Hab 3.6, Seg 4.7, 14.8\x*  
\v 5 Ani kagola dindi tigabi panda panda hanuni wupe kagoria tí ogonidagua pialu ibida yo pialu poleberemi. Bamba Yuda dindiha Kini Usia heangi dindi dumbirumbi biyagola tínaga mamaliru ibida penedagua áyu dindi ulini panda panda ogoni wu yu pialu dindi mini Asala mbira ngagoria tagira pedago tí ogonidagua puabo holeberemi. Ani poramigola horo ogoningi Anduane Homogo i̱naga Ngode Datagaliwabe kagome ibunaga dahuliyaliru haru hai halu ibulebira.   
\p
\v 6 Ani bialu horo uruni ibiragola dagare bulenebi kewaro ibira holenebi nawulebira.  
\v 7 Alendohayagi aruma naholebira. Anidagua biragola horombe mbiragada lolene nawi wá haabo holebira. Mbirale uruni tagira ibulene ogoangilo Anduane Homogo ibuni hangu manda bu ka.\x + \xo 14.7 \xt Ais 60.19, Md 24.36, Mo 21.23, 22.5\x*   
\p
\v 8 Horo ogoningi iba gagahe bayaleore Yarusalemeha howa dugualu pialu holebira. Iba gene kira pu tale bialu gene mende iba kuyama mini Iba Homene bedagoha pupe halu mendego pialu solowara timbuni Medidereniana bedagoha pu mogo bulebira. Iba ogonime hundia nabi dalungibi gaea timbuni birangibi duguaho wialu pialu haabo holebira.\x + \xo 14.8 \xt Ese 47.1, Yol 3.18, Yo 7.38, Mo 22.1\x*  
\v 9 Ani bialu Anduane Homogo ibugua dindi bibahendenaga handameho haga kini holebira. Wali agali bibahendeoreme ibu Anduane Homogoore ka lowa ibunaga mini mbiraore hangu lalu ibu hanguhondo mitangi bialu lotu lalu holebira.\x + \xo 14.9 \xt Ais 2.2-4, 45.21-24, Seg 9.9, 14.16-17\x*   
\p
\v 10 Yarusalemeni dindi ngago dondole tigabiore Yarusalemenaga tano abene uyurayagi Geba tano ngagoria howa wu yu pialu unurayagi Limono tano ngagoria tagira polebira. Yarusaleme tano ibu dege hari hombeneni wiaabo holebira. Yarusaleme tanonaga pabe dege ala pene wiyago wiaabo holebira. Tanonaga pabe panga mini Beniyamininaga Panga laga ngagoria howa pialu pabe panga mini Paulaga kagoria panga ala dugu wini ngagoria tagira polebira. Amuna pabe neneni mamage haga agalinaga anda daliga bini mini Hananelenaga laga kagoria howa pialu kininaga \w waini\w* iba wabiaga \w gerebi\w* lini pingidaga ege to̱le̱ uli ngagoria tagira polebira.  
\v 11 Ani pedagola Yarusaleme wali agali tiha mo ko holene mbira nawi howa ti gi nahe bayale haabo holebira.\x + \xo 14.11 \xt Mo 22.3\x*   
\p
\v 12 Dindi bibahendeni hameigini tara tara karu Yarusaleme wali agali baba wai biaga bu karuha Anduane Homogohanda warago ko taraore ibilolebira. Warago ko ogonime ogodagua bulebira. Wali agali tini heyu kaore tinaga de hégeru tingini bibahende togo biai holebira.   
\p
\v 13 Anidagua bialu Anduane Homogohanda wali agali uruni mo luluya holebira. Ani mo luluya ho heledagola tini dege dege mandagi karu minu yania halu bo wahaga bulebira.  
\v 14 Ani birangi Yudali bu karume Yarusaleme wali agali bolilono mo wialu wai bulebira. Ani bialu tigua hameigini dindi tara tara ngaruha wali agali bu karunaga muni ngolo silibabi aga bayale ngarubi mo yai holebira.   
\p
\v 15 Waitiginaga balai anda bu kagoria nogo hosiru kameleru dongiru bibahende yani timbuni biame halu homai holebira.   
\s1 Dindi bibahendeha hameigini tara tara karume Anduane Homogo mitangi bialu lotu lolebira lenego ogo  
\p
\v 16 Yudali tinaga waitigi bu karu bo wahai kagola mani yu wahene emene karu tigua mali bibahendeni Yarusaleme ibaabo halu holebira. Anduane Homogo Hongo Haiheore kago ibuni tinaga kini ka lowa tigua ibuhondo mitangi bialu lotu lalu holebira. Ani howa tigua Anda \w Nemandaha\w* Palu Holene Horo tagira ibirangi bulene mana wini ngadagua talialu bialu holebira.\x + \xo 14.16 \xt LBM 23.39-43\x*  
\v 17 Ani bialu hameigini tara tara marume dindi mbiraha howa Anduane Homogo Hongo Haiheore kago ibu inanaga kini kago mitangi bialu lotu lole naibaga heagua tinaga dindiha iba dalu naibulebira.  
\v 18 Anigo Iyibi wali agalirume Anda Nemandaha Palu Holene Horo tagira ibirangi bulene mana wini ngadagua Anduane Homogo mitangi bialu lotu lole naibiyagua dindi maru ngaruha wali agali lotu lole naibaga bu hearuha mo ko helonaga ibugua warago ko ibilagadagua Iyibi wali agali tihabi nde ani ibilolebira.  
\v 19 Tigua Anduane Homogo mitangi bialu lotu ogoni labe manga hayagua Iyibi wali agalibi hameigini tara tara dindi bibahendeha bu karubi bibahendeore pani tandaga mbiraore ogoni ale dege nai holebira.   
\p
\v 20 Ani birangi tinaga nogo hosi mani mbelo emene mbira pongobia ho ngaruni bi ogo gilibu wulebira. Ogo Anduane Homogonaga loma bia ho nga, lalu gilibu wulebira. Anduane Homogonaga andaha todobene be bu ngarubi dunini dege wialu ibuninagaore ndisi be loma bininaga nogo darama hambu wiaga timbuni lomabu delaga dabuni ngaligobi dege wulebira.\x + \xo 14.20 \xt Har 28.36-38, Ais 23.18, Ese 46.20\x*  
\v 21 Ani bialu Yarusalemeha Yuda dindi bibahendehabi todobene be damene ti andagaha ngaru bibahendeore Anduane Homogo Hongo Haiheore kago ibunaga lomabu wiai holebira. Mani howa wali agalime tinaga nogo sibi bulumagaru bo lomabu miragola nogo mbiriniru todobene be tininaga ndo Anduane Homogonaga loma bia hene uruniha dawalebira. Horo ogoningi howa mbiralime mbirale yolo bilo Anduane Homogonaga andaha yalu polene nawulebira, lalu Anduane Homogohanda Segaraiaha howa bi ogoni mbiwia halu latagi hene.\x + \xo 14.21 \xt Ese 44.9, Seb 1.11, Seg 9.8\x*