\id TIT - Huli Bible [hui] -Papua New Guinea 2011 (web version -2013 bd) 
\h TAIDASA 
\toc1 Polohanda Taidasahondo beba ogo gilibu wia hene 
\toc2 Taidasa 
\toc3 Ta 
\mt1 Taidasa  
\mt2 Polohanda Taidasahondo beba ogo gilibu wia hene  
\imt1 Mbuga ogoha gilibu ngarunaga nemandi ogo  
\ip Taidasa ibu Yu agali ndo hene. Ibugua Kerisohondo mini mbiraore wu howa Polola Bi Mana Debene lawai hama ibaga bialu hene. Kiridi dindiha tano bibahendeni Keriso hameigini hearu hondo helo Polohanda Taidasahondo, Í̠ hondo habe, lalu helalu pene. Puwa mani Polohanda Taidasa biamogo bialu beba ogo gilibu wia hene.  
\ip Polohanda beba gili binidagoni irane tebira wiago hondowa mo walia halu gili bini.  
\io1 Mbira  
\io1 Keriso hameigini karu haru helo mbirali dabo helalu howa mana ogobi biagane holene nga manda buwa helabe, lalu gili bini.  
\io1 Mende  
\io1 Wali agalibi wandari igiribi garabaya biabe ale bia haga karubi urunihondo agua bialu habe ogodagua lalu habe lalu lawai habe, lalu gili bini.  
\io1 Tebone  
\io1 Keriso hameigini karume ogonidagua bialu holenebi mini mo palia hagane yu holenebi nenegene hinulenebi lowa marume handabe manga halu lai lalu karuhondo bi wai nabilimu lalubi Keriso hameigini karu mo tale bu baga nabilimu lalubi bayuwa hondo holene nga, lalu lamaro bialu gili bini.  
\iot Bu̱lu̱ baga buwa kuni gilibu ngago  
\io1 \ior 1.1-4\ior*  
\io1 Gili binigonaga irane \ior 1.5-16\ior*  
\io1 Keriso hameigini karu hondo hagane helo dabo helolenego \ior 2.1-15\ior*  
\io1 Keriso hameigini karume biabe tara tara bulenego \ior 3.1-11\ior*  
\io1 Keriso hameiginime bayale bulene mugubelo hondo holenego \ior 3.12-15\ior*  
\io1 Lamaro bialu lenego  
\c 1  
\s1 Polohanda Taidasahondo beba ogo gilibu wia hene  
\p
\v 1 I̱ Polo Ngode Datagaliwabenaga biabe biahagabi Yasu Kerisonaga \w abosolobi\w* kogoni. Wali agali Ngode Datagaliwabehanda dabayaru ti ibuhondo mini bilina ho haabo helobi bi mana henene yu tiga biai helobi i̱na ti biamogo buliya ibugua i̱ dabo helaya.  
\v 2 Haabo holene yule mini dunubia ho holene tene mana henene ngagoria nga. Haabo holene ogoni Ngode Datagaliwabe ibu mini bilinahe howa bibahende nawabi heangi, Ngulebero, lalu heneneore lowini.\x + \xo 1.2 \xt Lm 16.25, Kl 1.27, 2 Ti 1.1, 1.9, 1 Pi 1.20\x*  
\v 3 Ngode Datagaliwabehanda horo mbiru pongo bo winigo lola hayagola holene ogoni ibunaga bi mana langialu inahondo mo pani haya. Inanaga Pele Ngiaga Ngode Datagaliwabe ibugua bi mana i̱na wali agalihondo lamuliyanaga biabe ogoni i̱hondo ngiya.\x + \xo 1.3 \xt Eb 1.9-10, 1 Te 2.4, 1 Ti 1.1, 1.11, 2.3, 2 Ti 1.10, Ta 2.10, 3.4\x*   
\p
\v 4 Ngode Datagaliwabehondo mini mbiraore wu harabaligo manda buwa Taidasa-o i̱ igini henene kego i̱hondo beba ogo gilibu wia haro.\x + \xo 1.4 \xt Lm 1.7, 2 Ko 8.23, Ga 2.3, 2 Ti 1.2, 4.10\x*  
\p Aba Ngode Datagaliwabebi Pele Ngiaga Keriso Yasubi libugua í̠hondo biamogo bia holenebi mo palia holenebi ngilo hamelo ko.   
\s1 Kiridini howa Taidasanaga biabe bulene winigo ogo  
\p
\v 5 Biabe biai nahe bulene maru wiago biai habelo i̱na í̠ Kiridi dindini habe lalu piru. Í̠na bialu habe larugo ogo. Tano bibahendeha Keriso hameigini karu haru helo \w agali\w* ala hene miniwi karu mbira mbira dabo helabe, laru.  
\v 6 Agali ala hene miniwi uruni ti kagua nabiagamebi one mbira hangu beremebi tinaga waneiginime Keriso mana yu tiga biaga howa kagua nabi aba ai̱yalanaga bi larago hale hagamebi agali ogonibigo helolene nga, laru.\x + \xo 1.6 \xt 2 Ti 2.24-26\x*\x + \xo 1.6 \xt 1 Ti 3.2-7\x*  
\v 7 Agali Ngode Datagaliwabenaga wali agali haru holebirago mana tiga tiga biagago hangume haru helo dabo helabe. Ti mine nahagabi abale keba nahagabi lulu yule \w waini\w* iba timbuni nanagabi gungu nabiagabi muni dibaudu nahagabi helolene nga.\x + \xo 1.7 \xt LBM 10.9, 1 Ko 4.1, Eb 5.18, 1 Pi 5.2\x*  
\v 8 Tigua wali agali nenege hinagabi bayale bibahende ngago bulene hame lagabi mini haru hagabi mini tigabiwibi Ngode Datagaliwabehondo tini loma bia henebi tinginime hame lagaru bibahende haru hai hagamebi holene nga.  
\v 9 Tigua bi mana heneneore lameramaligoni hangu hongo howa yu holene nga. Ogonibi howa tigua bi mana henene bayuwa lawai haragome wali agalinaga mini mo hongo halubi maru bi mana hame nalaga karu ti nakarulape harimadane hendelo walia halubi holebira.\x + \xo 1.9 \xt 1 Ti 1.10, 1.15, 2 Ti 1.13, 2.15, 4.3, Ta 2.1\x*   
\s1 Kiridi dindini ke̱ haga agali dewa ka, lenego ogo  
\p
\v 10 Agali dewa mana henenego yu tiga nabiaga howa tigua bi nahabane ale la gimbu bialu wali agali mo hondo halu ka. Ogoni Yuali \w dongone\w* podo mabu biaga karume ani biaga ka.\x + \xo 1.10 \xt 1 Ti 1.6, 4.7\x*  
\v 11 Tigua muni dimagoli howa mana ko nakarulape ngaru hangu lawai halu damene dewa bu karu mo gura hangu hangu helo mini burugula halu ka. Agali urunibime bi larago nalalimu lolene nga.\x + \xo 1.11 \xt Md 23.14, Yo 10.12, 1 Ti 6.5, 2 Ti 3.6, 1 Pi 5.2\x*  
\v 12 Bamba Kiridiali mbira tininaga mana \w latagi\w* halu mbiwia haga henegome lalu, Kiridiali ke̱ hagabi nogo gabua ale ko hagabi tomo timbuni nagimbu buwa biabe manga hagabi ka, lene.  
\v 13 Ibugua bi ogoni lenego heneneore lene. Irane ogonigo ti Ngode Datagaliwabe mana hangu yu tiga biaabo helo í̠na ti hongo howa talialu lamibe.\x + \xo 1.13 \xt 2 Ti 4.2, Ta 2.2\x*  
\v 14 Yualinaga mamali tebi agali degeme mana wabu wini ngarubi ti wahai helo ani talibe. Agali urunime mana henene ngaru hame nale wahai halu mana nakarulape ogoni lawai hagane tene ti ka.\x + \xo 1.14 \xt 1 Ti 4.7, 2 Ti 4.4\x*  
\v 15 Mini tigabiwi karume mbirale bibahende ngago tigabi dege mitangi biaga ka. Anigo Yasuhondo mini mbiraore nawi karume bibahende ngago ko dege mitangi biaga ka. Tinaga minibi mandabi ko hai hene ka.\x + \xo 1.15 \xt Md 15.11, Lg 11.39-41, Lm 14.14, 14.20, 14.23, 1 Ko 6.12\x*  
\v 16 Tigua bi degeme lalu, Ina Ngode Datagaliwabe mana manda biaihe kama, lagago tigua mana bia tagi haragome, Ina Ngode Datagaliwabe mana manda nabi kama, lalu walia haga. Tigua wali agalihondo handabe manga hagabi mana tigabi bibahende ngaru wahagabi ogonibi howa ti bayale mbira nabibehe holebira.\x + \xo 1.16 \xt Lm 1.28, 2 Ti 3.5, 3.8, 1 Yo 1.6, 2.4, Yu 4\x*   
\c 2  
\s1 Wali agali wahe howa bulene nga lenego ogo  
\p
\v 1 Í̠na Ngode Datagaliwabe bi mana henene lowini ngago bayuwa lawai halu habe.\x + \xo 2.1 \xt 1 Ti 1.10, 6.3, 2 Ti 1.13, Ta 1.9\x*  
\v 2 Agali waheruhondo ogodagua lawai habe. Bayuwa mitangi bialubi mini wialubi mini haru halubi Yasuhondo mini mbiraore henene wiaabo ha gubalini ha hibu laabo halubi ani bialu holene nga, lalu lamigi bialu habe.  
\v 3 Wali waheruhondobi nde bi ogodagua lalu lawai habe. Diburibu lalu nalagabi \w waini\w* ibame mini mo dariba nahelobi Ngode Datagaliwabehanda hame ledadagua bialu birulene nga. Tigua mana bayale biawai halu\x + \xo 2.3 \xt 1 Ti 3.11, 2 Ti 2.9-10, 1 Pi 3.3-4\x*  
\v 4 wali daliaherume tinaga agalinibi waneiginibi gubalini holene nga.  
\v 5 Ti mini haru helobi mini gahenge wilobi andaga bayuwa hondo berelobi agalinime bi larago mo wa nahelobi ani bigi bilo lawai holene nga. Ani bialu bedayagua maru karume, Ngode Datagaliwabe mana ko nakarulapeda, lolene henge nawulebira.\x + \xo 2.5 \xt Eb 5.22, Kl 3.18, 1 Ti 2.11, 6.1, 1 Pi 3.1, 3.5\x*   
\s1 Agali daliaherume bulene nga lenego ogo  
\p
\v 6 Agali daliaheruhondo, Mini haru holene nga, lalu ogodagua lamibe.  
\v 7 Í̠nime mbirale bibahende berego bialu howa mana bayale berego marume hendelo biawai halu habe. Mana lawai halu howa í̠ mini bilinahebi tigabibi habe.\x + \xo 2.7 \xt Eb 6.24, 1 Ti 4.12, 1 Pi 5.3\x*  
\v 8 Í̠ baba waitigi ho karume í̠ gurulene henge handa walia nahelo bi galone hangu lamialu habe. Tigua ina guralu bi ko lolene henge handa walia nahe howa taga pani nolebira.\x + \xo 2.8 \xt 1 Ti 6.3, 2 Ti 3.14, 1 Pi 2.12, 2.15\x*   
\s1 Garabaya biabe ale bia haganaga bulene nga lenego ogo  
\p
\v 9 Garabaya biabe ale biahaga karume tinaga anduane mo turu halu tigua bia laradagua bialu bi la dai nabi howa bibahende biai holene nga.\x + \xo 2.9 \xt 1 Ti 6.1-2\x*  
\v 10 Ti anduanenaga mbirale ngago kayu nabi howa bayale hangu biaabo halu mini bilinahe karia marume hondowa inanaga Pele Ngiaga Ngode Datagaliwabe mana, Bayaleoreda, lelo biawai halu howa walia habe.\x + \xo 2.10 \xt Md 5.16, Pb 2.15, Ta 1.3\x*   
\p
\v 11 Ngode Datagaliwabehanda wali agali bibahende pele mulene yu helo ibunaga biamogo bia holene walia hene.\x + \xo 2.11 \xt Yo 1.9, Lm 5.15, 1 Pi 5.12\x*  
\v 12 Ngode Datagaliwabehondo, Mangaba, lalu erembira mialu ko bibahende bulenebi waholoma̱ya biamogo bia holene ogonime ina biawai haga. Mini haru holenebi tigabi holenebi Ngode Datagaliwabe mo tene holenebi dindini kamago howa ina ani bialu holoma̱ya biamogo biaholene ogonime ina biawai haga.\x + \xo 2.12 \xt Lm 6.19, Eb 1.4, Kl 1.22, 1 Te 4.7, 1 Yo 2.16\x*  
\v 13 Ina dindini ani bialu howa inanaga Yasu Keriso ibu Ngode Datagaliwabe timbuni howa Pele Ngiaga kago ibunaga wá taraore holene hapani helo hondo kama. Horo turubi ogoni hondole mini dunubia ho kama.\x + \xo 2.13 \xt 1 Ko 1.7, Pb 3.20, Kl 3.4, Hi 9.28, 1 Yo 3.2\x*  
\v 14 Ina ko bulene wiagoria hemaria pele ngialu golope holebi ibunaga wali agali dege howa bayale bulene hame lalu ina mini gahengewi hangu holoma̱yabi ibugua ani homo aribia hene.\x + \xo 2.14 \xt Har 19.5, Man 4.20, 7.6, 14.2, Iba 130.8, Ese 37.23, Ga 1.4, 1 Pi 2.9\x*   
\p
\v 15 Mana ogoni wali agalihondo lawai halu habe. Ani lawai halu howa mini mo hongo halubi talialubi ani bigi bialu lolene ngadagua Ngode Datagaliwabenaga hongoni howa lalu habe. Wali agalime í̠ mo yo hendelo nabialu habe.\x + \xo 2.15 \xt 1 Ti 4.12, 2 Ti 4.2\x*   
\c 3  
\s1 Mana bayale bule hongo ho holene ngago ogo  
\p
\v 1 Keriso hameigini í̠ aria karu lone mo mitangi bia halu í̠na tihondo ogodagua lamibe. Tigua gabumane haru haga hongohe karume mana lo ngadagua bilobi mana bayale bibahende bulene manda bu helobi lamibe.\x + \xo 3.1 \xt Lm 13.1-7, Kl 1.10, Hi 13.21, 1 Pi 2.13-14\x*  
\v 2 Tihondo agua lamibe, Mbiraligo guraga nabilimu. Bi gungu nabi howa mo palia halubi nenege hinalubi wali agali bibahendehondo gedaore howa bayale bialubi holene nga, lalu lamibe.\x + \xo 3.2 \xt Eb 4.2, 4.31, Pb 4.5, Kl 3.12, 2 Ti 2.24-25\x*  
\v 3 Au lamibe, Ala iname mini nawi howa mana pugualubi ko bialu tinginime hame lagane ko tara tara dewa wiarume dariba hayagola harima. Ani bialu howa iname wali agalihondo ko mitangi bialubi nayido agini henge lalubi harima. Wali agali marume inahondo handabe manga hayagola iname nde tihondo handabe manga ho harima.\x + \xo 3.3 \xt 1 Ko 6.11, Eb 2.1-2, 5.8, Kl 1.21, 1 Pi 4.3\x*  
\v 4 Ani bialu hemagola dege ina Pele Ngiaga Ngode Datagaliwabehanda ibunaga biamogo bia holenebi gubalini holenebi inahondo walia halu pele ngiya.\x + \xo 3.4 \xt 1 Ti 2.3, Ta 1.3, 2.11\x*  
\v 5 Ibugua ina pele ngiyago irane iname biabe bayale mbira birimagonaga ndo ibunaga dara holene wiagome ina pele ngiya. Ngode Datagaliwabe Dinini ibugua ina wayawaya bialu mini gahenge taba hanalu holene gahengebi ngiya.\x + \xo 3.5 \xt Yo 3.3-5, Lm 11.6, Eb 5.26, 2 Ti 1.9, 1 Pi 3.21\x*  
\v 6 Ngode Datagaliwabehanda Pele Ngiaga Yasu Keriso togoni howa ibu Dinini inaha to̱lai helo ngiya.\x + \xo 3.6 \xt Yol 2.28, Ab 2.17-18, 2.33, Lm 5.5\x*  
\v 7 Ani biyago irane Ngode Datagaliwabe ibugua Kerisonaga biamogo bia holeneme inahondo, Tí mini tigabiwi kami, laragola ina minime dunubia ho howa haabo holene yu hole kama.\x + \xo 3.7 \xt Lm 3.24, 8.23-24, Ga 2.16, Ta 2.11\x*  
\v 8 Bi ogoni heneneore lo nga.\x + \xo 3.8 \xt 1 Ti 1.14-15, Ta 2.14\x*  
\p Ngode Datagaliwabehondo mini mbiraorewi karume biabe bayale biaabo helo í̠na mana ogoni hongo howa lamialu haabo habelo hamelo ko. Biabe bayale ogonibi biragome wali agali bibahende biamogo bilonaga bulene nga.  
\v 9 Galone ndoni lai lolenebi mamali dewaru mini lo bila holenebi lai gungu bulenebi \w Mana\w* lowinigonaga bi gungu bulenebi urunibi galone nabulene lagago í̠na urunidagua lalu kagoria nahe wandialu habe.\x + \xo 3.9 \xt 1 Ti 1.4, 2 Ti 2.14-16, 2.23, Ta 1.14\x*  
\v 10 Mbiralime Keriso hameigini karu talebu ki bule bi nakarulape mbira layagua halu kibi lo tiga bialu lamibe. Lameregola ibu hale nahayagua wahalu tagira pu labe.\x + \xo 3.10 \xt Md 18.15-17, 2 Ko 13.2, 2 Te 3.6, 3.14, 2 Ti 3.5, 2 Yo 10\x*  
\v 11 Agali ogonibi ibugua kagua biragome ibuni miniha ko ngagobi walia haga.\x + \xo 3.11 \xt Ab 13.46, 1 Ti 6.3-5\x*   
\s1 Bi galone maru lamaro bialu lenego ogo  
\p
\v 12 Ademasadabe be Tiyagasadabe hondowa i̱na mendealigo í̠ keria pu lagua. Libu mendealigo, Pu, laragola í̠na i̱ Nigobolisi tanoni koria ibuleore manda bibe. Ira yuni gilope howa dagare ibagane hororu birangi Nigobolisi tanoni holebero manda bu kogoni.\x + \xo 3.12 \xt Ab 20.4, Eb 6.21-22, Kl 4.7-8, 2 Ti 4.12\x*  
\v 13 Mana bayale mo wála halu lamiaga Senasa ibubi Abolosobi libu ibaga bialu polebira. Libu harigani pialu karia buru pale holigo í̠na libu biamogo bule manda buwa habe.\x + \xo 3.13 \xt Ab 18.24, 1 Ko 3.5-6, 16.12\x*  
\v 14 Keriso hameigini ina aria habane nabulene nahelo horo bibahendeni biabe bayale hangu bialu wali agali maru buru pale karu henene biamogo bulene nga manda bilo lamibe.\x + \xo 3.14 \xt Md 7.19, Lm 15.28, Eb 4.28, Pb 1.11, Kl 1.10, Ta 2.14\x*   
\p
\v 15 Wali agali i̱ heba kamaru bibahendeme, Tí mitangi biaabo halu haramali, layiya lalu lamibe. Wali agali Ngode Datagaliwabe mana yu tiga bu karuhondo iname, Tí mitangi biaabo halu kamago, layiya lalu lamibe. Ngode Datagaliwabenaga biamogo bia holene tíha wiaaboboore wilo hamelo ko.