\id MAL - Huli Bible [hui] -Papua New Guinea 2011 (web version -2013 bd) 
\h MALAGAI 
\toc1 Malagai 
\toc2 Malagai 
\toc3 Mal 
\mt1 Malagai  
\imt1 Mbuga ogoha gilibu ngarunaga nemandi ogo  
\ip Ngode Datagaliwabenaga anda Yarusalemeha ala podo wahenego lone biadai biyangi howa Malagai ibu Ngode Datagaliwabenaga mana \w latagi\w* haga hene. Malagai ibunaga genda ogo.  
\ip \w Loma\w* binigo mo miaga hearubi Isaraele wali agali hearubi tigua ala Ngode Datagaliwabehondo habo nalolene bi lowinigo yu puguini. Ai lone lo wilo ibugua hamelo hene. Isaraele wali agali hearume Ngode Datagaliwabenaga deni howa bayale ndo mangahebi mo kohebi ho hene. Loma binigo mo miaga hearubi wali agali hearubi tigua Ngode Datagaliwabehondo lomabu mulene winidagua nami gurunagabi holene mana lo winigoria nahagabi hene.  
\ip Anduane Homogo ibugua ibunaga wali agali dabaki bulebi ko para kago domo waholebi dai bulebira. Dai nabi howa ibugua ibunaga bi yalu piagame ala manda manda bilobi habo nalolene bi lowinigo latagi helobi bamba halu ibilolebira lalu gilibu nga.  
\iot Bu̱lu̱ baga buwa kuni uru gilibu ngago (1.1–2.16)  
\io1 Isaraele wali agalime ko binirunaga te gilibu nga. \ior 2.17–4.6\ior*  
\io1 Ngode Datagaliwabehanda dabaki bialu dara howa binirunaga te gilibu nga.  
\c 1  
\s1 Anduane Homogohanda Isaraele wali agali gubaliniho henego ogo  
\p
\v 1 Anduane Homogohanda ibunaga bi ogo Isaraele wali agali lamilo Malagaihondo lamini.  
\v 2 Anduane Homogohanda ibunaga wali agalihondo lalu, I̱na tí gubalini haho wiaabo ho harugoni, lene.\x + \xo 1.2 \xt Pig 25.21-26\x*\x + \xo 1.2 \xt Lm 9.13\x*\x + \xo 1.2 \xt Ais 34.5-17, 63.1-6, Yar 49.7-22, Ese 25.12-14, 35.1-15, Amo 1.11-12, Oba 1-14\x*  
\p Ani layagola tigua ladai bialu lalu, Í̠na ina gubalini haridago agini walia haribe, lalu ladai bini.  
\p Ani layagola Anduane Homogohanda ladai bialu lalu, Iso Yagabala libu hamenela hayago i̱na Yagababi ibunaga aguanenebi gubalini halu,  
\v 3 Isobi ibunaga aguanenebi gubalini nahe harugoni. Iso ibu dalu bare ngarunaga mbirale mbira anda habe nahe ko kede pugubu ngeledogoni. Ibunaga dindiru nogo biango gabuaru ti hangu bu helo embera ibilo ngelo wa kogoni, lene.   
\p
\v 4 Ani layago hondowa Iso aguanene Idomo hameigini tigua lalu, Inanaga tano dewa bu hayaru gialo bagabu wahayagodago lone daibu bimi̱ya, loleberemi. Ani lowa lone mo ngoai howa birimiyaguabi nde Anduane Homogo ibugua ladai bialu, Tígua ani bia handadaba. Bidamigola lone gialo waholiya, ladai bulebira. Ladai bialu lalu wali agali maru karume, Dindi ogoni mini dindi ko, lalu, Hameigini o padagoni Anduane Homogohanda handabe manga halu hondo wahene, lolebira, lalu Anduane Homogohanda ani ladai bulebira.   
\p
\v 5 Ogonidaguaore biraria Isaraele wali agali tininaga deoreme hondolebira. Hondowa lalu, Anduane Homogo ibu Isaraele hameiginihondo hangu ndo hameigini maru dindi taraha karuhondobi hongoho dege harada, lalu lolebira.   
\s1 Anduane Homogohanda \w loma\w* binigo mo miagaru mo ko howaore talinigo ogo  
\p
\v 6 Anduane Homogo Hongo Haiheore kagome \w loma\w* binigo mo miagaruhondo lalu, Waneiginime ti aba ka manda biagadaguabi biabe bia hagarume ti anduane ka manda biagadaguabi i̱ tínaga Aba harugo tígua i̱naga mini mo yaraga naharamiligo aginagabe. I̱ tínaga Anduane harugo tígua i̱ hondowa mogo nale kamigo aginagabe. Loma binigo mo miagaru-o tíguaore i̱naga mini mo yo handalu kamigo howa, Ina í̠naga mini agua mo yo handarimayabe, lalu kamibe.  
\v 7 O agua birimi lalu langero.Tomo ko mebia hene wiaru í̠ ngerama lowa i̱naga lomabu miagane dagiani bu wirimigome i̱ mo yo handarimigoni. Ani larogola tígua, Iname í̠naga tomo agua mebia harimayabe, loleberemi. O abini Anduane Homogonaga lomabu miagane dagiani tomo ta nabi wulene nga manda buwa tí miniha mo yo handarimigome mebia harimi laro.\fig Tomo ko mebia hene wiaru í̠ ngerama lowa i̱naga lomabu miagane dagiani bu wirimigome i̱ mo yo handarimigoni.|src="HK 78b.tif" size="2" ref="(1.7)" \fig*  
\v 8 Nogo ega de koheru tingini koheru ge ibira heneru homabehe de mbomboleru yu ngoai howa i̱ ngeremigo ogoni ko ndo karulape beremalo manda bidamibe. Nogo ega i̱ o ngeremirunibi tínaga gabumane haguane kagohondo yupu milimu. Tínaga nogo ega urunibigo de hondowa ibugua tíhondo turu halu tígua mbirale mbira hale haramigola ngulebadago ngilo, lalu Anduane Homogohanda ani lene.   
\p
\v 9 Ogonigo loma binigo mo miaga kamiru tígua Ngode Datagaliwabehondo bi lamialu, Inahondo turu halu bayale bibe, lalu lamilimu. Gi yobi ko ogonibi muwa ai Ngode Datagaliwabe í̠na ina biamogo bia laramigola ibugua hale halu tí biamogo bulebirabe.  
\v 10 Anduane Homogo Hongo Haiheore kagome lalu, I̱naga lomabu miagane dagiani ira bame dela holo bialu kamigo wahalimulo tí mbiragome i̱naga anda panga payaore nabira mandabu ko. I̱ tí baba turu nahe ko. Tígua mbirale i̱naga lalu yalu ibirimidaruni i̱ nayamulebero, lene.\x + \xo 1.10 \xt Ais 1.11, Yar 6.20, Amo 5.21\x*  
\v 11 Ni tagira ibiragoria karume i̱naga mini dege mo yaraga hama penego amu ni paliragoria karume mo yaraga ho maro biragoria ko. Dindi bibahendeha karume mbirale ira hagua ngabilo mini \w inisenesi\w* i̱ nga holiya delalu nogo ega goaile mebia naheneru bo ngiraria ko. Hameigini o paluyu piaruaruni bibahendeme i̱naga mini daligaore lowa yaraga halu ani biaga ka, lene.  
\v 12 Ani biagago loma binigo mo miaga kamiru tígua i̱naga lomabu miagane dagia nagaloneda manda bialu tomoru ko tíni manga haramigo aleru i̱naga lalu lomabia haramigome tígua i̱ mo yo hondowaore kamigoni.  
\v 13 Anidagua larogola tígua ai ogoni erekuibidago wahabeheda lalu i̱hondo ngui yogo buleberemi. Nogo ega mbiralinaga heago tí bime hongo halu gingila mirimigo ogoni i̱ ngule lowa yalu eberemi. Marume kuduguru de mbombolo áyu dege tongolo mule ngaru i̱ ngule lowa mo yalu eberemili. Urunibi ngeremiruni hondowa i̱na tíhondo turu halu yamulebadalo manda bidamibe.  
\v 14 Nogo i̱naga lalu lomabiaho helene bayale biago ibu mo halu ko homo wahene biago i̱ mo aribia halu ngirago i̱naga gurunaga ogoni áyu homabe. I̱ ibu aleme mo yo handabe nahe handame haga kini gibiore dindi bibahendeni hameigini tara tara palu ngarume i̱ hondowa gi hai haga hene kogo, lalu Anduane Homogohanda ani lene.   
\c 2  
\p
\v 1 Anduane Homogo Hongo Haiheore kagome \w loma\w* binigo mo miagaruhondo lalu, Ai o larogo tígua bilimulonaga laro, lene.  
\v 2 Tígua beramigo i̱naga mini yaraga helo hangu bilimu. Tígua i̱na bi larogo hale halu nabirimiyagua nde i̱na tí ha holebero. Mbirale tí hanaho haga bidamigo i̱na mo ko haga bulebero. Tínaga pini i̱na minu tongo lolebero. Tínaga gelo minu habo lolebero ndo abale minu habo larugoni. Ani birugo irane tígua i̱naga bi larogo bu gubaliniha mo pe nahe mo yo hondowa bame dongone degeme hale halu kamigonaga.  
\v 3 Tínaga waneiginiru minu balu ti nogo kumburayubi i̱ bo ngirimirunaga ti to ngagoha tíninaga dengui ogoniha minu guyulebero. Ani bialu tínibi nogo ti to ngagoha halimulo minu helolebero.  
\v 4 Ani berogo hondowa i̱na tíhondo bilimu lalu laruyagua henene bulene winida manda buleberemi. I̱na loma binigo mo miaga Libai aguanene karu lamialu buleore lowa habo nalolenebi lo wirugo ereba naholebira, lalu lene.\x + \xo 2.4 \xt Dag 3.11-13\x*   
\p
\v 5 I̱na tihondo habo nalolene bi lo wialu bulebero larugo ti dindini mbira mo ko nahe miniha dungulo holeberemi. Tigua i̱ hondowa gi helonaga i̱na tihondo bi ogobi lowiru. Horo odaruningi tigua i̱ hondowa gi halu mogo laya.\x + \xo 2.5 \xt Dag 25.12\x*  
\v 6 Tigua i̱ denibi ko mbira nabi i̱ baba girigura nabi bayaleore harima. Tini hangu mana bayale bia ndo maru ko bialu hearubi nabilo mana bayale buleneha haru dai biya.\x + \xo 2.6 \xt Man 33.10, Yar 23.22, Ya 5.20\x*  
\v 7 Wali agalime Ngode Datagaliwabe bayuwa manda bilo lawai holenego loma binigo mo miaga tinaga biabe nga. Wali agalime i̱naga hame ledogo manda buleyagua loma binigo mo miaga ti Anduane Homogo Hongo Haiheore kagonaga bi yalu piaga kago wali agalime ibunaga ne harigaha howa latagi harago agi larabe hale holene nga, lalu lene.   
\p
\v 8 Ani bulene winigo loma binigo mo miaga tí kamirume hariga tigatiga wiago ngelalu naleagoha pubagiho kami. Tígua mana lawai harimigome wali agali dewa ko bilo mo bia harimi. I̱na tíhondo habo nalolene bi lo wirugobi puguarimi.  
\v 9 Tígua i̱na hame ledodagua naberemili. Ani bialu tígua i̱naga wali agalihondo mana lawai halu howa maruhondo turu halu maruhondo manga haramili. Wali agali bibahendehondo ta nabi ogobi degedege naberemili. Ani beremiligonaga i̱na Isaraele wali agalime tí mo yo hendelo lalu tinaga ge waraha tí berelolebero, lalu Anduane Homogo Hongo Haiheore kagome lene.   
\s1 Wali agalime Ngode Datagaliwabe wahalu penego ogo  
\p
\v 10 Ina bibahende kamago Aba mbiraore hangu ndoyagoda. Ngode Datagaliwabe mbiraorehanda ina wabini ndoyagoda. Ani bini kamayagua nde habo nalolene bi inane lo wigi birimago puguaga bialu kamago aginagabe. Ani bialu Ngode Datagaliwabehanda inanaga mamali heba habo nalolene bi lowini wiago mebia halu mo yo handalu pugua dege bialu kamago aginagabe.  
\v 11 Yuda wali agalime Ngode Datagaliwabehondo bi lowinigo pugualu mana ko taraore Yarusalemenibi dindi bibahendenibi biame halu ka. Tigua Anduane Homogonaga anda ibu gubalini ho kago mebia haya. Yu agalimebi dindi tara wali tinaga damahondo bi pupu wiaga berearu dabu biya.  
\v 12 Mana ko urunibi biaga karu Anduane Homogohanda ne dugu waharadagua bilo. Ani biragola ti wali agali marume Anduane Homogo Hongo Haiheore kagonaga lomabia hene yu ngoai haradagua tigua nahelonaga ani dugu waholebiraore.   
\p
\v 13 Ai tígua ko mendebi ogo beremili. Tígua mbirale lomabia hene yu ngoai haramigo Anduane Homogo ibu turu halu yamia nabiya. Nabiyagola tíni gendani deiba ibu dugu bia kiabu dugu bia bigi beremigoni. Deiba bondolopebe beremigome iba goroyane birama iraga haragome Anduane Homogonaga lomabu miagane dagia namu laragoni.  
\v 14 Ani nayamiragola ai aginaga nayami manga halu waharuadabe laramigoni. O waharuagoni irane tí igirini howa tí one pigane dabu birimingi tí onehondo bi lo wirimigo puguarimigonaga wahaya. Libu nde mini mbiraore halu pialu tí onehondo bi napugulene lo wirimiru puguarimi. Wali mende mitangi nahole lalu Ngode Datagaliwabe deni howa larimiru puguarimi.  
\v 15 Ngode Datagaliwabehanda í̠ í̠ onela libu tingini dininila mo mbiraore ndo hayagoda. Ibugua libu ogonidagua mo mbiraore hayago irane aginaga biyabe. O biyadagoni irane libu waneigini haragola ti Ngode Datagaliwabenaga waneigini henene helonaga bini. Anigo tí mbiralime ibu onehondo bi lowinigo pugulamini de hondo halimu.  
\v 16 Isaraele wali agalinaga Anduane Homogo Ngode Datagaliwabe kagome lalu, Onene agalinila wahalu pugupugu bulenegoore i̱ handabe mangabali, lene. Agalini mbiragome mana ko handabe mangabi ogonibi birago hondowa i̱ handabe mangabali. Wali mbiraore í̠ one ogoni hangu mitangi halu hole lalu lowirigo puguleni de hondo habe, lalu lene.   
\s1 Godi lolene horo hapara hayada lenego ogo  
\p
\v 17 Tínaga bime Anduane Homogo mo erekui bia halu kami. Ani larogola tígua, Iname Anduane Homogo agua bialu mo erekui bia halu harimabe, loleberemi. Tígua, Anduane Homogo Hongo Haiheore kagome ko biaga kamaru bibahende bayale dege leda. Ibugua ina bibahende hamelai ka, lalu kamigome mo erekui bia halu kamigoni. Mana tigabi biaga Ngode Datagaliwabe hayuago a kagobe, lalu kamigome mo erekui bia halu kami.   
\c 3  
\p
\v 1 Ani larimigonaga Anduane Homogo Hongo Haiheore kagome agua lara. I̱naga bi yalu piagame i̱ni maha ibuliyanaga ibugua ala manda manda bule bamba helolebero. Ani buwa tí Anduane Homogo hai bialu kamigoni ibuni abale ibunaga andaha ibulebira. Bi yalu tí de hondoaho kamigo ibu ibalu i̱na habo nalolene bi lo ngagonaga mana langulebira, lalu ka.\x + \xo 3.1 \xt Md 11.10, Mg 1.2, Lg 1.76, 7.27\x*   
\p
\v 2 Ibu ibulebirago ibiragola horo ogoningi heyu haabo habehe ibu ai holebirabe. Ibu hapani haragola dére haabo habehe mbirali holebirabe. Ibiragola ibu dodo domaga sobo hongohe ale holebira. Ege to̱le̱ aeaneru hiru tiga biaga ira hongohe daganegobi holebira.\x + \xo 3.2 \xt Ais 33.14, Seg 13.9, Yol 2.11, Md 3.10-12, 1 Ko 3.13-15, Mo 6.17\x*  
\v 3 Ibu godi hale halu daboki biragola muni siliba irani delowa ko para kago dai halu bayaleorego do ibira helo delagadagua dabolebira. Ngolobi silibabi irani delowa ko para kago irame do ereba helo delagadagua Anduane Homogonaga bi yalu piagago ibugua Libai hameigini \w loma\w* binigo mo miaga karu ogonidaguaore bi maname hiru tiga bulebira. Anduane Homogohondo mbirale yu ibalu mulene alego ngadagua milonaga tigua ani bulebira.  
\v 4 Anidagua biragola Yuda wali agalibi Yarusaleme wali agalibi tigua mbirale mbirale Anduane Homogohondo mule yalu ibiragola Anduane Homogo ibu turu halu yamulebira. Ala ani biaga wiyadagua bulebira.   
\p
\v 5 Anduane Homogo Hongo Haiheore kagome lalu, I̱ tí kamigoria ibuwa tí bibahende hangu hangu baba godi lami̱ya ibulebero. Ibuwa wali agali tomia biagarubi wali agali kayu biagarubi tindule lalu ndinde lagarubi biabe bidagola yolo bulene ngadagua ndo emene badane biagarubi wali dalorubi waneigini hono wahenerubi dindi kaundialirubi urunibinaga ngaru mo hondo howa gurunaga karume tibi i̱ hondowa gi nahaga karubi bibahende i̱ baba godi lai holeberema, lene.   
\s1 Mbirale \w pini\w* dege dege damenego mulenenaga lenego ogo  
\p
\v 6 I̱ Anduane Homogo kogo ho mende haga nabiaga kogoni. Ani kogo Yagaba aguanene kamiru tí i̱na yu waore ndo ko.  
\v 7 Tí tínaga mamali tí nahemiha ala henerume i̱naga mana lo wiwago pugualu tini hame layadagua biyagobi dege tíguabi ani bialu kamigoni. Tígua i̱ kogohayagi de handa daibu halimu. I̱na nde tíha de handa daibu holiya. Anidagua larogola tígua, Iname í̠ keria dai bulenaga agi bulene ngabe, loleberemi.  
\v 8 O larogo hale halimu, Mbiralime Ngode Datagaliwabenaga ngago ohowa guru nolene karulapebe lowa hale haro. Ogonidagua nabibehego tígua i̱naga guru nalu kamigoni. Ani larogola tígua, Ina agua guru narimayabe, loleberemi. Mbirale \w pini\w* dege dege ngulenebi lomabia ho ngulenebi ogonihayagi i̱naga tí guru nalu kamigoni.  
\v 9 Tí wali agali bibahendeme i̱naga guru nalu kamigo tí bibahende ha hai haro.  
\v 10 I̱naga andani tomo dewa bu wilo tomo pini dege dege wirimidaru bibahende mo yu ngoai howa wilimu. Tígua i̱ abidabe hondole bahanda bia handalimu. I̱na dahuliya andaganaga haraba panga windo dugupe howa mbirale tara tara bayale bayale bu ngoru tí bu payabu wu halimulo hombedape haroria hondoleberemigo ani bia handalimu, lene.\x + \xo 3.10 \xt LBM 27.30, Dag 18.21-24, Man 12.6, 14.22-29, 2 Kin 7.2, 1 Bit 26.20, 2 Bit 31.10, Neh 10.38, 13.12\x*  
\v 11 Tinaga tomo hengedemiru timamume nolani hondo holebero. Pu mbira lini daga mini \w gerebi\w* hengedemirume lini do ndili ndulilo gogobelopeho wulebira.  
\v 12 Ani bidago hondowa hameigini tara tara dindi bibahendeha karume hondowa tíore baya turubi haramida lolebira. Tinaga dindi bayaore hoabidane hondowa ani laga bulebira, lalu lene.   
\s1 Anduane Homogohanda, I̱naga wali agali dara howa biamogo bulebero, lenego ogo  
\p
\v 13 Anduane Homogohanda lalu, Tígua i̱ lahiralu bi hiriribiru maru laga birimiria hale haru. Ani larogola tígua, Iname í̠ lalu mbira agi larimayabe loleberemi.  
\v 14 Agua larimigo. Ngode Datagaliwabenaga biabe bia holene ogoni galone nawiyago wahabeheya, lalu hemigoni. Iname ibugua bia laradagua hangu biaaboha ai Anduane Homogo Hongo Haiheore kagohondo inanaga ko birimaruni lapani halu uruni kagua birimaya lolene uruni nde galone nawiyago wande habeheya, lalu hemigoni ndobe.  
\v 15 Tígua lalu, Iname handaga birimagola wali agali minehe karu ti turuhe haga bia. Agali mini kowi karu tigua mbirale bigi birago bu debe haga bialu ko biraru hondowa Ngode Datagaliwabehanda ti pani mia nabiragola hayaho yu pugu bialu hea, lalu ani laga bialu hemigoni, lene.   
\p
\v 16 Ani layagola wali agali Anduane Homogohondo giho haga hearu tini dege dege laede̱ne̱ bialu heago Anduane Homogo ibu haleho hene. Ibunaga deni mbuga mbira winiyago ogoriani wali agali Anduane Homogohondo giho halu ibugua laradagua biaga hearunaga mini gilibuwi winiya.  
\v 17 Anduane Homogo Hongo Haiheore kagome lalu, Uruni ti i̱naga wali agali holebira. Horo mbiru i̱na tagira ibuwa biabe berongi uruni ti i̱ninaga wali agaliore holebira. Abame ibu igini ibunila howa biabe bia hagago dara halu biamogo biagadagua i̱na i̱naga wali agali uruni dara howa biamogo bulebero, lene.\x + \xo 3.17 \xt Man 7.6, Iba 103.13, Ta 2.14, 1 Pi 2.9\x*  
\v 18 Ani berogola i̱naga wali agalime lone hondowa mini tigabiwi karuhondo agua biaga winida mini kowi karuhondo agua biaga winidalo hondolebira. Ani bialu i̱naga biabe bia haga karuhondo agua biaga winida i̱naga biabe bia nahaga karuhondo agua biaga winida lalu horo ogoningi handaga bulebira, lene.   
\c 4  
\s1 Anduane Homogonaga Horo biago tagira ibira lenego ogo  
\p
\v 1 Anduane Homogo Hongo Haiheore kagome lalu, Horo mbira biago tagira ibirangi wali agali mineherubi ko biagarubi bibahende irame gambe aea daradagua do mundu lolebira. Horo ogoningi ti bibahende do munduore lalu mbiraligo yu wanaholebira.  
\v 2 Ani bulebirago ai i̱na bi larogo hale halu biaga kamigo tí i̱naga pele mulene hongome tíni nime daba haradagua daba halu ni doroneme mo dabi holene yu anda ibulebira. Ani birago hondowa ti nogo bulumaga igini hungubalua hara pai henego panga dugupe haragola turu howa a̱e̱a̱ ka̱e̱a̱ bu hagadagua holeberemi.\x + \xo 4.2 \xt Mal 3.16, Lg 1.78, Eb 5.14, 2 Pi 1.19, Mo 2.28\x*  
\v 3 Horo mbiru i̱na tagira ibuwa biabe bulubodangi tígua wali agali ko biaga karu bope halu holeberemigo uruni tínaga ge habeme abalu hengedaradagua buleberemi, lene.   
\p
\v 4 I̱naga biabe bia hagane Mosesehanda mana langigi biyago manda bilimu. I̱na Hari Sainaini howa mana lowinigobi bulene nabulenebi Isaraele wali agali tígua bilimulo Mosesehondo lamirugo ibugua tí langiyago baya hangu manda bilimu, lene.   
\p
\v 5 Anduane Homogonaga Horo timbuni hiriribi ogoni tagira naibidaha bi mana \w latagi\w* haga Elaya tí kamiria pu lolebero.\x + \xo 4.5 \xt Md 11.14, 17.10-13, Mg 9.11-13, Lg 1.17, Yo 1.21\x*  
\v 6 Elaya ibugua ibuwa igini taribunilabi wane angibunilabi mandagi lone mo biamagaho helolebira. Ani mo biamaga nahe ngaore horo ogoni tagira ibiyagua tínaga dindi bibahende bo mburi lolene wuligonaga ala ani mo biamagaho helolebira, lene.\x + \xo 4.6 \xt Ais 11.4, Seg 5.3, 14.12, Lg 1.17, Mo 19.15\x* \fig Blank even-numbered page before Deterocanon Title Page|src="" size="0" ref="Malagai 4.6" \fig*