\id JON - Huli Bible [hui] -Papua New Guinea 2011 (web version -2013 bd) 
\h YONA 
\toc1 Yona 
\toc2 Yona 
\toc3 Yna 
\mt1 Yona  
\imt1 Mbuga ogoha gilibu ngarunaga nemandi ogo  
\ip Ngode Datagaliwabenaga bi mana \w latagi\w* haga maru henerume bi mana laminiru gilibu ngarubi ndo mbuga ogoniha Yona ibugua Ngode Datagaliwabenaga mana latagi haga howa lamia nabi wahalu ibida pole manda binigo te ogoni gilibu nga.  
\ip Dindi timbuni Niniba winigo ogoniha wali agali hearu ti Isaraeleali waitigi ho howa ti koorene ko bialu heago hondowa Ngode Datagaliwabehanda Yonahondo lalu, Wali agali uruni pani muleberogonaga í̠na bi mbiwia halu lamule pu, lene. Ani layagola Yona ibugua Ngode Datagaliwabehanda wali agali bibahendeore dara howa biamogo biaga ka mitangi buwa Niniba wali agalihondo pani namulebadago manda buwa bi lamule pobe manga hene. Ani manda bu hearia mbira tara tara nahendene ale Yonahondo binirunaga te gilibu nga. Mani Yonahanda bi mbiwia hayago lola naheyagola ibu keba henego te gilibu nga.  
\ip Bi ogoniha gilibu ngarunaga tene Ngode Datagaliwabe ibugua bibahende wabini ngaru anduane ibuni ka, lalu walia ho nga. Ibugua wali agali bibahendeore ta nabihondo gubalini halu dara howa biamogo biaga kago walia ho nga. Ibunaga wali agali karunaga waitigi karu bo wahole hame nale tibi gubalini howa biamogo bule hamelo kago walia halu gilibu nga.  
\iot Bu̱lu̱baga buwa kuni uru gilibu ngago  
\io1 \ior 1.1-17\ior*  
\io1 Ngode Datagaliwabehanda Yona olenenagabi Yona ibugua wahalu pole binigonagabi gilibu nga. \ior 2.1-10\ior*  
\io1 Yona mini beregedenegonagabi Ngode Datagaliwabehanda ibu pele minigonagabi gilibu nga. \ior 3.1-10\ior*  
\io1 Niniba dindi pialu Yonahanda bi latagi henegonaga gilibu nga. \ior 4.1-11\ior*  
\io1 Ngode Datagaliwabehanda Niniba wali agali dara henegonaga gilibu nga.  
\c 1  
\s1 Yonahanda Anduane Homogonaga bi layago hale howa mo wahenego ogo  
\p
\v 1 Horo mbirungi Anduane Homogohanda Amidai igini Yonahondo bi mbira lamini.\x + \xo 1.1 \xt 2 Kin 14.25\x*  
\v 2 Ibugua lalu, Niniba dindi timbuni amugoria wali agali ogoriani karume mana ko ngubiore bialu kago i̱ manda bu ko, laya lalu ga̱ lalu lamule pobe, lene.  
\v 3 Ani layago hale howa dege Yona ibu Anduane Homogonaga bi mo wahalu ibida polenaga hariga tara mendeha pudai bini. Ibu Yoba dindi dalipe halu hearia iba sibi mbira Sebena dindi pole lowa piyaria handa walia hene. Hondowa muni mialu maru berearu heba birule iba sibi biagoha ubanda hene. Ogoni Anduane Homogo yu wahalu pole manda buwa ani bini.\x + \xo 1.3 \xt Yos 19.46, 2 Bit 2.16, Iba 139.7-10, Iba 139.7-10, Yna 4.2, Ab 9.36\x*   
\p
\v 4 Ani bialu hearia Anduane Homogohanda puyabu hongoheore iba solowarani ibilene. Ani biyagola dalubi puyabubi iba yaribubi hongohe gibiore biyagome iba sibi biago podobaga bibahe wini.\x + \xo 1.4 \xt Iba 107.25\x*  
\v 5 Ani biyago hondowa iba sibi biagoria berearume gi timbuniore howa tini hangu hangunaga damame ti biamogo bilo lowa olagalaga bini. Ani bialu howa iba sibi biago yabia bilonaga mbirale maru ibaha mo ba pebe bini. Maru ti ani bialu heaha Yona ibu iba sibi tamu habaneha dalipe howa u palia hondo hene.\x + \xo 1.5 \xt Ab 27.18-19, 27.38\x*   
\p
\v 6 Ani biaria iba sibi hondo haga biagome puwa lalu, O biragoni nde ogo ale bira lole ndo ka̱lo padebe. Ai heyalu í̠naga dama olole pu. Ibugua ina dara halu nahomoloma̱ya biamogo bulebira badago, lene.\x + \xo 1.6 \xt Iba 107.28\x*   
\p
\v 7 Iba sibini biabe biaga biaru tini lamigimigi bialu lalu, Ai ina mogo lene gibi o biragoni nde ai hondowa binidabe handami̱ya tiari yama, lowa yarimiya. Yalu hemiria tiari Yona ibuha yagi pene.\x + \xo 1.7 \xt Yos 7.14-16, 1 Sml 10.20-21, Ab 1.26\x*  
\v 8 Ani piyago hondowa tigua Yonahondo lalu, Ai o biragoni langi naberego. O biragoni tene aiwa binigomedabe. Í̠ biabe agi biaga kebe. Í̠ dindi ani aligo kebe. Í̠ hameigini ago ariabe, lalu hale hene.   
\p
\v 9 Ani layagola Yonahanda ladai bialu lalu, I̱ Hiburu tene ko, lene. Anduane Homogo hari daligabi dindibi iba solowarabi wabini dahuliya andaga kago mitangi bialu ibu mini yaraga haruli, lene.  
\v 10 Ani lowa Yona ibugua, I̱ Anduane Homogo wahalu pole pialu hewariago o biragoni i̱ hondowa bira, lalu lamini. Ani layagola hale howa iba sibi biagoria berearume gi timbuniore howa Yonahondo lalu, Ogoni hiriribiore bialu harida, lene.   
\p
\v 11 Ani lalu heagola dalu puyabubi iba yaribubi biyagoni bia timbuore hayagola tigua Yonahondo lalu, Gibiore o biragoni nabilo iname í̠hondo agi bulene ngabe, lene.   
\p
\v 12 Ani layagola Yonahanda ladai bialu lalu, Ai uru-o dalu puyabubi iba yaribubi gibi o biraruni tene i̱ hondowa bialu ngago uruni nabilo tí bayale pole i̱ iba solowara nigoniha minu bape hadaba, lene.   
\p
\v 13 Ani layagoni hale howa dege agali biarume nde iba sibi biagoni hongo howaore tanguima pialu iba angeni ubade hole manda bini. Ani bule lowa biyariabi nabibeheore halu dalu puyabubi iba yaribu biyagobi gibiore halu iba angeni ubade habe naheore bini.  
\v 14 Ani dege bialu ai hongo piai hayagola ai wahalu Anduane Homogohondo bi lalu au lene. Anduane Homogo-o iname agali ogo homelo ibaha minu bape haramagonaga í̠na ina nde homoloma̱ya pani ngia dai buleni. O beremagoni bibahende tene í̠na howa beregoni iname ndo berama, lamini.  
\v 15 Ani lowa tigua Yona minu muwa iba solowaraha bape hene. Aniore biagola dalu puyabubi iba yaribubi timbu gibi o bialu wiyagoniore nabi nimulope hene.  
\v 16 Ani biyago hondowa agali biarume Anduane Homogo hondowa gi timbuniore howa ibuhondo mbirale bo lomabia howa delalu tigua Anduane Homogo ibunaga biabeore bialu hole lalu bi lo wini.   
\p
\v 17 Anduane Homogohanda wena timbuniore mbira dabowa ogonime Yona mo mbedogo bilene. Ani biyagola Yona ibu horo tebiru mbi tebiru lowa wena tombeha wiai hene.\x + \xo 1.17 \xt Md 12.40\x*   
\c 2  
\s1 Yonahanda Anduane Homogohondo wena tombeha wuwa bi lenego ogo  
\m
\v 1 Unuraore wena tombeneni wuwa Yonahanda Anduane Homogo ibunaga Ngode Datagaliwabehondo bi lamini.   
\p
\v 2 Anduane Homogo-o ai mini burugulo wuwa i̱na í̠ olarugo hale halu ladai biri. Unuraore homa dindiha hewaria í̠na i̱ biamogo bia lalu yi lalu kogoni í̠ hale ho kegoni.\x + \xo 2.2 \xt 1 Sml 30.6, Iba 18.4-6, 22.24\x*   
\p
\v 3 Í̠na i̱ iba solowara uli gibiore unuraha nalene hiriribi wiagoria minu bape harigoni. Ogoriani iba gibi berearume i̱ biruyu mabu bialu iba yaribu timbuni hongohe ibilarirume i̱ yu mabu bu hinaga bialu hayagoni.\x + \xo 2.3 \xt Iba 42.7, 88.6\x* \fig Line drawings GNB with refs; p 1005 NOTE 2 FACING PAGES|src="" size="0" ref="Yona 2.3" \fig* \fig Line drawings GNB with refs; p 1006 A.B.S. 1976 ISBN 0 564 00311 5|src="" size="0" ref="Yona 2.3" \fig*   
\p
\v 4 I̱na manda bialu hewaria ainde í̠naga wanakui nahondoleneniore minu wahalu í̠naga anda baya burugule biagobi hondo dai nabuliyanagaore birida, lene.\x + \xo 2.4 \xt 1 Kin 8.38, Iba 31.22\x*   
\p
\v 5 Ai iba berearume i̱ berewagoria ibalu namu lalu solowara berearume i̱ bira dambiore ho wahayagoni. Iba gagua wiarumebi ibalu i̱naga haguane hubabu mabu biyagoni.\x + \xo 2.5 \xt Iba 69.1, Dug 3.54\x*   
\p
\v 6 I̱ dindi nalene hari pini panga paya tagiho wiaho wiaabo haga mbiraha pupe ho harugoni. Ani bu hewago hondowa Anduane Homogo i̱naga Ngode Datagaliwabe-o í̠na i̱ unura homoleneha hewaria haru dai bu helarigoni.   
\p
\v 7 I̱ homolene anda ibayuago hondowa ai Anduane Homogo í̠hondo bi langirugoni. Ani birugola í̠na í̠naga anda baya burugule biagoria howa hale harigoni.\x + \xo 2.7 \xt Iba 18.6\x*   
\p
\v 8 Maru ti mbirale nahabane bi pupu wule gime wabinigohondo bi pupu wiaga karume tinaga galone mbira bia holiya larego bia naholebira manda buwa í̠naga bi mo wahaga.   
\p
\v 9 Anigo i̱na í̠naga mini yaraga halu iba gana lalu mbirale mbira í̠hondo bo lomabia ho ngulebero. Ani bialu i̱na mbirale bule laruru biaore bulebero. Gini miaganebi biamogo biaganebi haru halu tagira ibaganebi pele miaganebi Anduane Homogo ibuha nga, lalu lene.   
\p
\v 10 Ani layagola Anduane Homogohanda wena timbuni biagohondo, Yona ede iba angeni puwa magu tagu batagiha, lene. Ani laya handala wena biagome puwa Yona iba angeni magu tagu batagihe lene.   
\c 3  
\s1 Yonahanda Anduane Homogohanda bi layago hale halu binigo ogo  
\p
\v 1 Anduane Homogohanda Yonahondo bi ala layadagua dege lone lamini.  
\v 2 Ibugua lalu, Áyu Niniba dindi timbuni nai ngagoria puwa í̠na bi abale lo yalu pobelo langirugoni áyu wali agali ogoriani karuhondo lamule pu, lene.  
\v 3 Ani laya handala Yona ibu Anduane Homogohanda bi layago hale halu Niniba dindi pene. Dindi ogoni timbuni gibiore ogoriani pu banga bialu pialu heane horo tebiru pene.  
\v 4 Yona ibu dindi timbuni ogoriani pu banga bialu pialu heane horo mbira piai haga bini. Pialu howa ibugua, Niniba dindi horo pira maria (40) piai haragola bo heda hai holebira laya, lalu lamini.\x + \xo 3.4 \xt Md 12.41, Lg 11.32\x*   
\p
\v 5 Ani lamiyagola Niniba wali agali hearume Ngode Datagaliwabenaga bi \w mana\w* lamiyago henene layadalo manda bini. Ani manda buwa tigua tini hangu hangu hina \w tomo\w* nane wali agali emenebi timbunibi ta nabi bibahendeore tigua ko ngubi ogobi bialu harima lalu walia hole danga dugu hiruwa birama polene nga, lo manda bini.   
\p
\v 6 Niniba wali agali kini heago ibu hale halu hearia Niniba wali agali bibahende emenebi timbunibi hearu danga dugu hiralu tomo nane birai ka layago hale howa ibubi ibunaga haru hagane dagia ngelalu ibunaga aga biaganebi golo wahowa danga dugu hiralu beha berene.  
\v 7 Ani bialu ibugua Niniba wali agali bibahendehondo lo yogo lene. Bi ogo kinibi ibunaga biabe biaga karubi tigua lo wia harago, Mbiralime mbirale mbira nanoleore bira, lalu, wali agali bibahendemebi nogo bulumagamebi nogo sibimebi mbiraligome mbira hina ibabi nanoleore bira, lene.  
\v 8 Wali agali bibahendebi nogo damene bibahendebi danga dugu hirai holene nga, lalu lamini. Bibahendeoreme tini hangu hangume mana ko bu walia halu hayarubi bi ko ngubi ogobiore kama lalu bu walia haga hayarubi uruni wahai harama lalu Ngode Datagaliwabehondo bi laho wulene nga, lene.  
\v 9 Aguani beramigola Ngode Datagaliwabehanda mini wiadai bialu tihondo kebaho wiyago hadadai bialu ti nahome helolebira badago, lalu lamini.   
\p
\v 10 Ngode Datagaliwabehanda handalu hearia wali agali tigua tininaga mana ko ngubi bu walia haga biaruni yu wahai halu mini beregedai hayago hondowa ibugua ti bo heda hai holebero lalu lo wiyagoni mini wiadai bialu wahene.\x + \xo 3.10 \xt Har 32.14, 1 Kin 21.27-29, Yar 18.8, Amo 7.3, 7.6\x*   
\c 4  
\s1 Yonahanda keba holenebi Ngode Datagaliwabenaga dara howa biamogo bulenebi winigo ogo  
\p
\v 1 Ani biyago hondowa Yonahanda bu miniha genda timbuni howa keba holene tagira ibini.  
\v 2 Ani biyagola ibugua Anduane Homogohondo bi agua lamini. Anduane Homogo-o i̱na abale pigane andaga yu wahalu nape howa í̠na ogonidaguaore bulebere ndo laruyabe, lene. Ogonidaguaore bulebere manda buwa i̱na Sebena dindi ibida pora bialu pole lowa pialu haruyagoni. I̱na manda bialu hewaria í̠ Ngode Datagaliwabe gubalini holenebi dara howa biamogo bulenebi to̱lo tagihe harigo manda biru. Ani bialu horo bibahendengi keba abale nahe howa bayale dege bialu horo bibahendengi mini wiadai bialu pani namule birili.\x + \xo 4.2 \xt Har 34.6-7, Yol 2.13\x*  
\v 3 Áyu Anduane Homogo-o i̱ homoliya waharene. I̱ ha ndo homaruyagua nde haru, lene.\x + \xo 4.3 \xt 1 Kin 19.4\x*   
\p
\v 4 Anduane Homogohanda ibuhondo ladai bialu lalu, Í̠na keba haregoni í̠ ai howa keba harebe, lene.   
\p
\v 5 Ani laya handala Yona ibu uyu ni tagira ibiyagohayagi dindi timbuni biago yu wahalu pu tagi howa bira do hene. Ibu Niniba dindini agi birabe hondo birule lowa ibugua andira ale emene mbira abale buwa berene.  
\v 6 Ani buwa berearia Anduane Homogohanda ma tumbu ale mbira Yona ibu andane gumbaha turu howa berelo lowa andaho daga helene. Yonahanda aguani biyago hondowa turu howa ka̱i̱ timbuni lo wini.\fig Anduane Homogohanda ma tumbu ale Yona ibu andane gumbaha turu howa berelo lowa andaho daga helene.|src="LEAR 017.tif" size="2" ref="(4.6)" \fig*  
\v 7 Ani biaria horo mendengi egerabagiore egabi lole muna biyagola Ngode Datagaliwabehanda tonge mbirahondo, Ma tumbu ale o kagoni no podo peha, layagola no podope halu gaulene.  
\v 8 Ai ni tagira ibalu dayagola Ngode Datagaliwabehanda puyabu poboyogobiore mbira uyu ni tagira ibiyagoha howa ibilene. Ani biyagola ogonime Yonanaga haguaneni tandagabigome daba hayagola Yona odo ibira hole bini. Ani biyagola ibugua lalu, Homolene karulape. I̱ ha ndo homaore biruyagua karulapeda, lene.   
\p
\v 9 Anigo Ngode Datagaliwabehanda ibuhondo lalu, Ma tumbu ale ogoninaga í̠na keba holene nawigoria keba harebe, lene.  
\p Yonahanda ladai bialu lalu, I̱na keba holene irane dewa ngane hondowa keba harogo keba halu homolene haru, lene.   
\p
\v 10 Anduane Homogohanda Yonahondo lalu, Ma tumbu ale anda hayago mbi mbirani hangu anda halu mbi mendeni ereba hayago í̠na ogoninaga mbirale mbira nabigo, lene. Ani bialu í̠na mo anda henebi ndo biagoria í̠ dara bame aginaga harebe, lene.  
\v 11 Dara ogoni emene lowa dara timbuniore i̱na Niniba wali agali dindi timbuni karunaga agua holobodabe, lene. Maniore handalu hewaria dindi ogoriani wali agali daosini dege handari mbirani mendegonaga pira kira (120,000) agima nira lowa bolangua howaore waneiginiru tinaga gi tiga ogo gi le ogo lowa bayuwa manda nabi lowa tibi nogo damenerubi dindi ogoriani kagoni, lene.