\id JOL - Huli Bible [hui] -Papua New Guinea 2011 (web version -2013 bd) 
\h YOELE 
\toc1 Yoele 
\toc2 Yoele 
\toc3 Yol 
\mt1 Yoele  
\imt1 Mbuga ogoha gilibu ngarunaga nemandi ogo  
\ip Mbuga ogoha Anduane Homogonaga bi mana \w latagi\w* haga Yoele ibuni dege agali ogobi ko lalu garea nale. Agali ogoni ibu Pesialime hongo howa haru heangi howa Isaraele wali agali ti Babilono dindi ngelalu Yuda dindini daibu hai heangi howa bi ogoni gili bini.  
\ip Yoele ibugua handalu hearia gaea timbuniore bialu pagaya aleme tomobi datanibi ira lini daga ale bu hearubi bibahende nai haya handala dindi ogoniha mo ko holene timbuniore tagira ibule biayuane hondowa ibugua bi ogoni lene. Ani bule biyane hondowa wali agali Anduane Homogola waitigi ho kamiru ti de handalu mamage ho halimu lalu lene. Áyu tinime mana ko ngaru bialu mine halu karuni nde mani Anduane Homogohanda Horo Mbira manda mandabu winigo tagira ibirangi wali agali tini hangu mo tene halu mine haga uruni pani mulene horo tagira ibulebira lalu lene.  
\ip Anidagonaga nde Anduane Homogohanda ti dara helo Yoele ibugua ibu dameneru lamialu bu mini beregedadaba lalu lamini. Mbiwia halu bi timbuni mbira lene ngago ai ogoni Ngode Datagaliwabehanda ibunaga wali agaliruha ibunaga Dinini wali agali wahe karuhabi wandari igiri daliahe karuhabi ngulebero lenego 2.28-32 uruniha howa gilibu nga. Anduane Homogohanda Abosolo mbuga biaruha ibunaga Dinini dalilayangi howa Pidahanda lalu, Anduane Homogonaga mana latagi haga agali Yoeleha howa bi abale lo winigo lola haragoni, lene. Bi ogoni Abosolo Be 2.1-42 howa gilibu ngago handabe.  
\iot Bu̱lu̱ baga buwa kuni gilibu ngago (1.1–2.17)  
\io1 Pagaya ale ibalu tomo nai henego \ior 2.18-27\ior*  
\io1 Anduane Homogohanda tomo lone anda ho helenego \ior 2.28–3.21\ior*  
\io1 Anduane Homogohanda ibu Horonaga manane walia henego  
\c 1  
\s1 Pagaya aleme mabuha tomo nai hayagola wali agalime dugu daraore binigo ogo  
\q1
\v 1 Anduane Homogohanda Peduele igini Yoelehondo bi ogodagua lamini.   
\q1
\v 2 Wali agali wahe kamiru-o tí hale hadaba.  
\q1 Yuda wali agali kamiru-o tíguabi hale hadaba.  
\q1 Áyu ogoni dege mbirale bulebirarunaga tíhondo hale harogoni.  
\q1 Mbirale uruni ale mbira áyu tí kamingibi abale tínaga mamali heneyangibi tagira ibinibe be naibibe.  
\q1 I̱na manda bialu koria naibiniore lo manda bido.   
\q1
\v 3 O biraruninaga tígua tínaga waneiginiru lamilimu.  
\q1 Tigua nde mani tinaga aguanene hama polebiraruhondo bi te ogoni la a̱i̱ a̱i̱ bialu helo lamilimu.   
\q1
\v 4 Pagaya ale dewaoreme tidi yalu ibalu mbirale yuni damenego bibahende naiore hene.  
\q1 Pagaya ale pigane ibiyarume nai nahe yu wahayaru wabuni halu mende ibiyarume nene.  
\q1 Halu tebone mane halubi tidi yalu ibugu biyarume lone naga bialu mbira yu wanahe naiore hene.   
\q1
\v 5 Agali lulu iba nowa lulu yu haga kamiru-o ai heyu howa dugu bidaba.  
\q1 \w Waini\w* iba hambu nowa lulu yaga kamiru-o tínaga waini iba hambia aribia holene pu mbira mini \w gerebi\w* lini do aribia hayago pagaya aleme nai hayagonaga tí dugu bidaba.   
\b  
\q1
\v 6 Pagaya ale tidini dewaore ami agali ibiradagua ibalu inanaga dindi nahandabeheore dambi ho wa kagoni.\x + \xo 1.6 \xt Mo 9.8\x*  
\q1 Ti dewa hongoheoreni ami agalime daga labe nahe.  
\q1 Tinaga neru gadeleore budi gabua laiononaga ne alehe kagoni.   
\q1
\v 7 Tigua inanaga pu mbira lini daga mini gerebi irane mo ko halu pogebi bibahende naiore hayagoni.  
\q1 Ira uruninaga nagane hearu nai halu dongonebi heba bu nai hayagola irane pele hangu pana halu gabu hai hayagoni.   
\b  
\q1
\v 8 Wandarime igiri ibu poleore lalu lawinigo homaragola dara timbuniore halu dugu biagadaguaore dugu biai hadaba.   
\q1
\v 9 Lomabu mulene tomobi waini ibabi nawida.  
\q1 \w Loma\w* binigo mo miaga karume Anduane Homogonaga andaha puwa ibunihondo lomabu mulene nawidagola dugu biragoni.   
\q1
\v 10 Mabuha mbirale mbira nahe bameore dindi hangu ngagoni.  
\q1 Ani bidagonaga dindi ibubi nde dugu bialu ka.  
\q1 Dugu biragonaga irane mabuha tomo anda hagane damenego gerebi lini gau lalu olibe irabi bibahende gau lai hayagonaga dugu biragoni.   
\b  
\q1
\v 11 Agali mabuha biabe bialu e hangaga kamiru-o dara holene nga.  
\q1 Gerebi lini daga pu ale hondo hagaru-o tí dugu bidaba.  
\q1 Tínaga mabuha balowa wabiaga widi balirubi tomo damene bibahende ereba hai hayadago ai dugu daraore bidaba.   
\q1
\v 12 Pu mbira lini daga mini gerebibi pogebi bibahende gau lai hayada.  
\q1 Ira lini naga ale daga hearunibi bibahende gau lai hayadagoni.  
\q1 Ani biyadagome wali agalinaga turu holene ereba hayada.   
\q1
\v 13 Loma binigo mo miagaru-o tí lomabu mulene dabu biabe biaga kamiru-o tígua yayawi dindi dugu hiruwa dara halu dugu bidaba.  
\q1 Tígua daraho kamigo walia halu yayawi dindi dugu hiralu Anduane Homogo andaha puwa dugu dege bialu egabi lelolene nga.  
\q1 Waini ibabi tomobi tínaga Ngode Datagaliwabehondo lomabu mulene mbira nawidagonaga ani bulene nga.   
\q1
\v 14 Tígua wali agali lamialu agali haguane karubi Yuda wali agali karubi bibahendeme \w tomo\w* nane wahalu tí bibahende Anduane Homogo tínaga Ngode Datagaliwabenaga andaha mo ngoai howa ibuhondo bi lalu dugu bialu holene nga.   
\q1
\v 15 Anduane Homogo ibugua Horo ibunaga pongobo winigo áyu kaware ibiragonaga aniore bulene nga.\x + \xo 1.15 \xt Ais 13.6\x*  
\q1 Horo ogoningi Anduane Homogo Hongo Haiheore kagome mo ko holene timbuniore ibilolebira.  
\q1 Horo ogoningi inaha genda holene koore yu anda ibulebiragonaga i̱ dara ho kogoni.   
\b  
\q1
\v 16 Tomo mbirale ngaru mo koore harago hondowa iname mbirale mbira bibe nahe kamagoni.  
\q1 Anduane Homogo inanaga Ngode Datagaliwabe andaga pu poleberamago ogonihabi turu holene mbira nawi dege.   
\q1
\v 17 Dindiha yobi iba nabere ngagome tomo egeneru hengederia anda naholebira.  
\q1 Anigo tomobi mani nolenenaga do holene nawi.  
\q1 Ani biragome tomo bu yu mogobu ngelaga anda karubi tabuanda hai holebira.   
\q1
\v 18 Nogo bulumaga karu tibi nde datani nolene nahedagola ha̱a̱ lama lulu yalu ibaga bialu ka.  
\q1 Nogo sibi karubi nde tomo garibi lowa obi ona bu hama pedagoni.   
\q1
\v 19 Anduane Homogo-o ira datani karubi bibahende irame bo daradagua bialu gau lai hayadagonaga i̱na í̠ olarogo.   
\q1
\v 20 Ainde datani karubi gau lai halu iba bedarubi hundiai hayagola ema bialu piaga karume í̠hondo dugu bu ngialu kagoni.   
\c 2  
\s1 Anduane Homagonaga Horo ogobi ibulebira lalu manane pagaya ale ibinigo ogo  
\q1
\v 1 Anduane Homogohanda Horo pongo bo winigo abaleore ibiragoni.  
\q1 Ani bidago tígua Hari Saiono biagoriani puwa mbelo mini biguli pu ladaba.  
\q1 Ngode Datagaliwabenaga hari loma bia hene ngagoria mbelo bolene nga.  
\q1 Horo ogoningi Yuda wali agali ti bibahendeore gi howa duru laga bialu holene nga.   
\q1
\v 2 Anduane Homogonaga Horo ogoni tagira ibirangiore ko arumahe mbira ngagola dara holene wulebira.\x + \xo 2.2 \xt Har 10.14, Amo 5.18-20\x*  
\q1 Horo ogoningi ginu hagua mindibime bu dambi holebira.  
\q1 Ani biragola pagaya ale biarunime hari nene ngarunaga abale tidu yalu egerebagi ni tagira ibiralidagua bialu ami agali ibiradagua bialubi tagira ibulebira.  
\q1 Áyu biragoni ale nabinigo manibi nde nabulebira.   
\b  
\q1
\v 3 Ani ibuwa dangiha bo daralidagua tomobi datani karubi abaleore nai haragoni.  
\q1 Ti ge napeni ngaruha Idene mabu ale baya taraore ngagoni.  
\q1 Ti anda pialu nai hene ngaruha mbirale bibahendenaga yuni damene nai kagola dindi yobi hangu ona taulodaga ho ngagoni.  
\q1 Pagaya ale urunime mbirale yuni lenego mbira yu wanahe naiore holebira.   
\q1
\v 4 Pagaya ale ibiraruni nogo hosi handalehe ibiragoni.\x + \xo 2.4 \xt Mo 9.7-9\x*  
\q1 Ti wai biaga ami agalinaga hosi ibiradagua ibiragoni.   
\q1
\v 5 Ti hari bare ege to̱le̱ ngarunaga poragola wai biagane garo ale nogo hosime gililaga mini karisi pora biagadagua bialu dangi gabuni yobu wahe ngaruha bo daragola tilitola lalu lirilere laralidagua laragoni.  
\q1 Ti naina tidu yalu ibiraha ami agali wai bule ibiralidagua ibiragoni.   
\q1
\v 6 Ani bialu kaware hapara halu ibirago hondowa wali agalime gi taraore halu amburiho howa hiririho wima peda.   
\q1
\v 7 Pagaya ale biaruni abale ibalu ami agalime biagadagua tanonaga pabe karunaga iraga iraga bialu ka.  
\q1 Iralu mendehayagi dalialu puwa ami agalime tidu yalu piagadagua tidu yalu mandagi duguni pialu howa maru putara halu nape mandagi duguniore pialu ka.   
\q1
\v 8 Maru ti polene ngagoha pu pugua nabiaga.  
\q1 Pabe karu gialalu anda poragola mbiralime harigani hapai habe nahe.   
\q1
\v 9 Tigua tano ngarunaga gerai anda puwa pabe karu pora bialu anda pialu tano tamuha anda piaga.  
\q1 Ani anda puwa wali agali andaga karunaga windoha pagealime anda poralidagua bialu tamuha anda pugu bira.   
\b  
\q1
\v 10 Ti pialu kagola dindi harila ema biaga.\x + \xo 2.10 \xt Mo 8.12\x*  
\q1 Ni egela aruma halu yakundibi wá nahaga.   
\q1
\v 11 Anduane Homogohanda ibunaga ami olaragola tinaga bi hari kulu laradagua laga.\x + \xo 2.11 \xt Mo 6.17\x*  
\q1 Ani laragola ami agali hongohe dewaoreme ibunaga bi larago hale halu ibugua bia laradagua biaga.  
\q1 Ayaliore-o Anduane Homogonaga Horo ogoningi mo ko holene timbu gibiore tagira ibulebirago mbirali ogoni lola nahe yopialu ai ibu polobadabe.   
\s1 Anduane Homogohanda wali agalihondo, Mini beregedalimu, lenego ogo  
\q1
\v 12 Anduane Homogohanda lalu,  
\q1 Aniore biai holebirago ai tígua heneneore mini beregedalu i̱ni kogoha dai biai hadaba.  
\q1 Tígua \w tomo\w* nane wahalu ko birimigonaga dara howa dugu bima i̱ni koria dai bidaba.   
\q1
\v 13 Ko birimigonaga darahe tingi howa ke̱ halu aga bidamiru bame budulene nakarulape.\x + \xo 2.13 \xt Har 34.6-7, 2 Sml 1.11, Iba 86.5, 86.15, Yna 4.2\x*  
\q1 Ani ndo tínaga bu miniha howa ko birimigonaga dara heneneore halimu, lene.  
\b  
\q1 Anduane Homogo tínaga Ngode Datagaliwabe karia dai bulene nga.  
\q1 Ibuha dara holene to̱laihe howa tíhondo mana bayale ngadagua dege biaga kagoni.  
\q1 Ibugua inaore gubalini ho howa bibahendengi inahondo mana tigabi bulene ngaru dege biaabo halu haga kagoni.  
\q1 Bibahendengi ibugua ina mana lalu pani ngulene hame lowa ha ndo ibugua iname ko birimaru domo waholene hamelo ka.   
\q1
\v 14 Anigo tígua Anduane Homogo tínaga Ngode Datagaliwabe karia dai birimiyagua nde ibugua halu mende mitangi bialu tíhondo bayale bialu tomo dewa lone mo anda holebira.  
\q1 Ani biragola nde iname tomoru \w waini\w* ibarubi ibuhondo lomabu mulene karulapeore yu holeberama.   
\q1
\v 15 Hari Saiono neneni howa mbelo biguli pu lolene nga.  
\q1 Tí bibahende tomo nane tí íbu ngoai holene nga, lalu wali agali lamilimu.   
\q1
\v 16 Wali agali dewaliore olalu mo ngoai howa Anduane Homogohondo mitangi bialu ibuhondo lotu lolenaga manda manda bilimu, lalu lamilimu.  
\q1 Wali agali wahebi wandari igiribi waneigini gali wene andu nalu bedarubi bibahendeore íbu ngoai hadaba, lalimu.  
\q1 Wandari igiri wene dabu bu hene heaguabi uruni bibahende tini andaga yu wahalu ibaiore holene nga, lalimu.   
\q1
\v 17 \w Loma\w* binigo mo miaga karu tibi nde Anduane Homogonaga anda tamuha biabe biahagaru tigua anda harabani lomabu delaga dabu ngago hengeneni howa dugu bialu bi ogodagua lolene nga.  
\q1 Anduane Homogo-o í̠naga wali agali kamaru dara habe.  
\q1 Wali agali hameigini dindi tara tara howa íbu karu tigua ina erembira ngialu mege bialu lalu, Tínaga Ngode Datagaliwabe agoha kabe, loligo ina biamogo bia lolene nga,  
\m lalu Yoelehanda lene.   
\s1 Anduane Homogohanda tomo mo anda ho helenego ogo  
\q1
\v 18 Anduane Homogohanda wali agalime mini beregedayago hondowa ibunaga dindi mitangi halu ibunaga wali agali dara howa biamogo bini.   
\q1
\v 19 Ibugua tihondo lalu,  
\q1 Áyu ina tomo dewabi waini iba dewabi olibe lini ibane dewabi tíhondo ngerogola tomo nolene dewaore nalu holeberami.  
\q1 Ani berogola wali agali hameigini dindi tara taraha bu karume tí erembira nangulebira.   
\q1
\v 20 Pagaya ale unurayagi howa ibini bedaruni bibahende ti i̱na wara pelalu maru dindi ko dalu naibaga ngagoha wara pelolebero.  
\q1 Wabuni mbira ala íbu berene bedaru ti iba solowara mini Homene Iba bedagoha warape halu maru mani íbu bedaru ti iba solowara mini Medidereniana bedagoha warape holebero.  
\q1 Maru biru wahene bedaru homaragola ngu taraore bulebira.  
\q1 Pagaya ale biarume tíhondo ko biyagonaga i̱na ti pani mulebero.   
\b  
\q1
\v 21 Dindi-o í̠ gi nahabe.  
\q1 Áyu í̠ miniha hadape howa turu howa dungulo holene nga. Irane Anduane Homogo i̱ni kogome biamogo birudagonaga ani bulene nga.   
\q1
\v 22 Ema bialu piaga biru kamiru-o  
\q1 Datani dewaore lone anda haragoni ti gi nahalimu.  
\q1 Ira lini daga karume lini dewa dalu pogerubi pu mbira mini \w gerebirubi\w* lini dewaore deda.\fig poge ... lini dewaore deda.|src="HK Series 3 page 8 (Figs).tif" size="1" ref="(2.22)" \fig*   
\b  
\q1
\v 23 Wali agali Saiononi kamiru-o  
\q1 Anduane Homogo tínaga Ngode Datagaliwabe i̱na tí biamogo timbuniore bialu harugonaga turu halu dungulo hadaba.  
\q1 Tígua tomo hongolene tu hayangibi ege pigane hayangibi tomo anda helonaga iba dalu karulapeore ibilarugoni.   
\q1
\v 24 Widi gandulo yu mogo buwa iraneru yuniru bu wahaga ngagoria widi lini dewa ibira heneru bu paya paya bu wulebira.  
\q1 Ani bialu gerebi lini pingidagane uli wene ngaruha hengedalu pingidaragola ibane dewaore biru to̱lowa pugula tagi tagi bialu holebira. Oilbe linibi dambiragola ibane dewaore biru to̱lowa pugula tagi tagi bialu holebira.   
\q1
\v 25 I̱nime pagaya ale uruni ti ami agali ibiradagua ibilarurume tínaga tomo hengemiruni bibahende nai helarugo ai mali dewa niruniha howa nalu hayarunaga áyu ngia dai biai holebero.\x + \xo 2.25 \xt Yol 1.4\x*   
\q1
\v 26 Tomo nolene dewaore wu kamigola to̱latagiore holebira.  
\q1 Ani howa tíhondo bayale bialu harugonaga i̱hondo turu halu Anduane Homogo tínaga Ngode Datagaliwabe i̱ kogo i̱naga mini yaraga halu holeberami.  
\q1 Ani bialu kamigola wali agali dindi tara taraha haga karume Yuda tí handape naholebira.  
\q1 Ani biragola i̱naga wali agali kamiruni tí lone taga naholeberami.   
\q1
\v 27 Ani biragola Isaraele wali agaliru-o tígua i̱ni tí kamigoha mandagi ho kogoni manda bialu i̱ Anduane Homogo tínaga Ngode Datagaliwabeore kogo i̱ ale mendeali nahedane manda biai holeberami.\x + \xo 2.27 \xt Ais 45.5, Ese 37.26-28, 39.22, 39.28, Yol 3.17\x*  
\q1 Ani bialu kamigola wali agali dindi tara taraha haga karume tí handape nahe i̱naga wali agali kamiruni tí lone taga naholeberami,  
\m lalu Anduane Homogohanda lene.   
\s1 Anduane Homogohanda lalu, I̱naga Dinini wali agali bibahendehondo mulebero, lenego ogo  
\q1
\v 28 Anduane Homogohanda laabo halu lalu,\x + \xo 2.28 \xt Seg 12.10, Yo 7.39\x*\x + \xo 2.28 \xt Ab 2.17-21\x*  
\q1 Mani i̱ninaga Dinini wali agali bibahendeha odope hai holebero.  
\q1 Ani berogola tínaga waneigini karume i̱naga bi mana \w latagi\w* halu holebira.  
\q1 Tínaga agali wahe karume emaga handalubi tínaga igiri daliahe karume de gandeba handalubi holebira.   
\q1
\v 29 Horo uruningi i̱naga biabe biahaga wali bedaruhabi agali bu karuhabi ti bibahendeha i̱ninaga Dinini odope hai holebero.\x + \xo 2.29 \xt 1 Ko 12.13, Ga 3.28, Kl 3.11\x*   
\b  
\q1
\v 30 Anduane Homogo ibugua laabo halu lalu,\x + \xo 2.30 \xt Md 24.29, Mg 13.24, Lg 21.11, 21.25\x*  
\q1 Dindinibi hari daliganibi Horo ogoni ibulebiragonaga manane tara tara i̱na mo walia holebero.  
\q1 Bo wahenerunaga darama timbuni dindini bu payabu wialu ira hungu haguala emene ndo bulebira.   
\q1
\v 31 Anduane Homogonaga Horo mani ibule ngelowa ni ala hundu ereba halu ege daramabi darama ale dolebira.\x + \xo 2.31 \xt Ais 13.9-10, Mal 4.5, Md 24.29, Mg 13.24-25, Lg 21.25, Mo 6.12-13\x*  
\q1 Uruni biai kagola nde Anduane Homogonaga Horo tagira ibulebira.  
\q1 Horo ogoningi wali agali dindini karume gi taraore halu holebira.   
\q1
\v 32 Anigo maru karume Anduane Homogo i̱ mini lalu i̱hondo,\x + \xo 2.32 \xt Ais 11.11, 11.16, Oba 17, Mai 4.7, Lm 9.27, 10.13, 11.26\x*  
\q1 Ina biamogo bialu gi mia, lalu olalu karu i̱na ti biamogo bulebero.  
\q1 Anduane Homogo i̱nime larudagua wali agali Yarusalemeni karu aria mbirago yu wa naholebero.  
\q1 Wali agali i̱nime dabo heleneru ti bayaleore holebira,  
\m lalu Anduane Homogohanda lene.   
\c 3  
\s1 Anduane Homogohanda wali agali bibahende dabaki bulebirago ogo  
\q1
\v 1 Anduane Homogohanda lalu,  
\q1 Horo ogoningi wali agali Yarusalemeha karubi Yuda dindiha karubi ti bibahendeore i̱na mo bayale hai helolebero.   
\q1
\v 2 Ani helowa dindi ulini mbira mini Mana Ko Birago Dabaki Biaga laga ngagoria wali agali hameigini bibahende dindi tara tarani bu karu i̱na haru ibai howa mo mogo bu helolebero.  
\q1 Ani íbu kagola tigua i̱naga wali agali hearuhondo mana ko biyagonaga i̱na ti dabalu pani mulebero.  
\q1 Agali uruni tigua i̱naga Isaraele wali agali hearu dindi tara tara kaundia wiaruha waratagi halu purogo lelowa i̱naga dindi wirurubi ti dege karulai hayagonaga ani bulebero.   
\q1
\v 3 Agali uruni bibahendeme Isaraele wali agaliru ai ibu mirabe hondole tigua tadu bialu tadume mbira mbira migi migi biya.  
\q1 Tigua Isaraele wali agalirunaga waneigini bu hearu garabaya biabe ale biahaga helo muni muwa muni urunime wali kayu yaga berearu kayu yule yolo bialu \w waini\w* ibaru yolo bigi bini.   
\p
\v 4 Taia tano wali agali kamirubi Saidono tano wali agali kamirubi wali agali Pilidia dindi bibahendeha kamirubi tígua i̱hondo mbira agi bule beremibe. I̱na birugo ko ale biruyane tígua i̱hondo pani ngule mandabu kamibe. Ani mandabu kamiyagua nde tígua birimigonaga i̱na tíhondo pani ala biadai bulebero.\x + \xo 3.4 \xt Ais 14.29-31, 23.1-18, Yar 47.1-7, Ese 25.15–28.26, Amo 1.6-10, Seb 2.4-7, Seg 9.1-7, Md 11.21-22, Lg 10.13-14\x*  
\v 5 Tígua i̱naga mbirale bayale muni ngolo silibarubi wiwaru bibahende mo yalu puwa tínaga gime wabini biarunaga andaha yalu puwa mo wiai kamigoni.  
\v 6 Tígua Yarusalemeha howabi Yuda dindiha howabi wali agali bibahende dindi tara kaundiaha haru puwa Girigiali hearume yolo ngilo muni taguialu uruninaga garabaya biabe ale biahaga helo pelarimigoni.  
\v 7 Ani birimiruni ti dindi uruni wahalu dai bilo i̱nime haru dai biai holebero. Tígua urunihondo birimidadagua i̱na tíniha bia dai bulebero.  
\v 8 Ai tígua birimigodagua Yuda wali agali tigua nde tíninaga waneigini karu minalu kaundiaore Sabea dindiha howa ibirarume muni ngiragola tinaga garabaya biabe ale biahaga helo dindi kaundia uruniha pelai holebira. I̱ Anduane Homogo i̱na bi o ledogoniore, lene.   
\b  
\q1
\v 9 Yoelehanda Anduane Homogonaga bi ogodagua lamialu,  
\q1 Bi ogo wali agali dindi tara tara bibahendeni karu lamialu  
\q1 Wai bule manda manda bu halimu.  
\q1 Ami agaliru wai bu pole olo mogo buwa manda manda bu hadaba lalimu.   
\q1
\v 10 Dindi aliaga aeane ngamiru hiruwa bo tiga bialu wai biagane ayu tibu wabilimu.\x + \xo 3.10 \xt Ais 2.4, Mai 4.3\x*  
\q1 Tomo gandu laga ayu tibu yu kamiru hiruwa bo tiga bialu yandare wabilimu.  
\q1 Agali hongo nahe mbira kayagua ogoni ibunde wai bule hongo howa holene nga.   
\q1
\v 11 Wali agali dindi tara tarani kamiruni bibahende abaleore ibalu dindi ulini unu ngagoria mo mogo bu hadaba laya,  
\m lalu Yoelehanda lene.  
\b  
\q1 Ai Anduane Homogo-o í̠naga wai biaga ami agali biaru abale agali uruni baba wai bilo ibilabe, laro.   
\b  
\q1
\v 12 Anduane Homogohanda lalu,  
\q1 Wali agali hameigini dindi tara tara bibahendeha bu karu abale ibalu dindi ulini mbira mini Mana Ko Birago Dabaki Biaga laga unu biagoria mo mogo bu hadaba.  
\q1 Ani íbu kamigola tígua mana birimigonaga Anduane Homogo i̱nime dabaki buliya.   
\q1
\v 13 Wali agali o karuni ti ko ngubiore kagoni.\x + \xo 3.13 \xt Ais 63.3, Hos 6.11, Md 13.39, Mo 14.14-20, 19.15\x*  
\q1 Ti ani kago manda buwa wali agalime tomo widi boga bialu gandu lagadagua bialu agalime pu mbira mini \w gerebi\w* lini \w waini\w* iba wabiaga ege to̱le̱ uli timbuni ngagoha ngelowa pingidole geme hengeda hagadagua halimu.  
\q1 Waini iba biru to̱latagi halu piagadagua uruni tiha mana ko to̱lai howa koorene ko henego kagoni, lene.   
\b  
\q1
\v 14 Wali agali daosini dewa dagalabe naheore dindi ulini mbira mini Mana Ko Birago Dabaki Biaga laga ogoria godi lolenaga íbu ngoai ho ka.  
\q1 Dindi ogoriani Anduane Homogonaga Horo haragola ibunime dabaki bulene kaware ngagoni.   
\q1
\v 15 Ani ibiragola ege nibi hundiai halu yakundibi lone nadolebira.   
\s1 Anduane Homogohanda ibunaga wali agaliruhondo bayale bulebirago ogo  
\q1
\v 16 Anduane Homogo ibugua Hari Saiono biagoria howa bi timbuni lowa Yarusaleme howa ibunaga bi laragome hari kilikulu laradagua bialu bi laruagome dindi haribi ema bialu birila gimbu biai holebira.\x + \xo 3.16 \xt Amo 1.2\x*  
\q1 Ani biragola Anduane Homogohanda ibunaga wali agali karu ibunime handayaho kagola ti mo ko nahe bayale holebira.   
\q1
\v 17 Ibugua lalu, Isaraelealiru-o i̱na ani berogola tígua i̱ni Anduane Homogo tínaga Ngode Datagaliwabeore henedane hondowa manda biai holeberami.  
\q1 Hari Saiono i̱ninaga loma bini ngagoriani kogoni.  
\q1 Yarusaleme i̱ninaga tano loma biniore ngelolebero.  
\q1 Ani ngeledogoria waitigirume Yarusaleme ogoni lone ibalu karu nalolebira.   
\b  
\q1
\v 18 Ani berongi hari bibahendeni gerebi lini daganenaga irane karume anda haame holebira.  
\q1 Hari bare bare ngaruha nogo bulumagarume dewaore haame holebira.  
\q1 Yuda dindiha dalu karulape ibalu iba bayaleore piaho wiaabo holebira.  
\q1 Ogoningi iba mbira Anduane Homogo andaga biagoha howa dugua tagi halu unurayagi dindi ulini mini Ira Agasia Buguni laga bu ngagoha pupe halu dindi ogoni mo gomba halu polebira.   
\b  
\q1
\v 19 Iyibi dindi ko howa gaea timbuni bialu Idomo dindibi wali agali mbira nahe dindi dabulu wulebira.  
\q1 Dindi kira ogonialime Yuda wali agali ko mbira tiha nawi hearu baba wai buwa bameore bo wahai hayagonaga ani bulebira.   
\q1
\v 20-21 Anduane Homogo i̱na agali uruni tigua irane nawini wali agali bameore bo wahayagonaga i̱na tihondo pani mialu paipai biadai bulebero.  
\q1 Agali mana yole biaga uruni aria mbirago yopialu napelolebero.  
\q1 Anigo Yarusalemenibi Yuda dindiruhabi wali agali haabo holebira.  
\q1 Ani bidagola Anduane Homogo i̱ni Hari Saiononi haabo holebero,  
\m lalu Anduane Homogohanda ibunaga mana latagi haga Yoeleha howa bi ogoni latagi hene.