\id JAS - Huli Bible [hui] -Papua New Guinea 2011 (web version -2013 bd) 
\h YAMESE 
\toc1 Yamesehanda Ngode Datagaliwabenaga wali agali dindi bibahendeni hearuhondo beba ogo gilibu wia hene 
\toc2 Yamese 
\toc3 Ya 
\mt1 Yamese  
\mt2 Yamesehanda Ngode Datagaliwabenaga wali agali dindi bibahendeni hearuhondo beba ogo gilibu wia hene  
\imt1 Mbuga ogoha gilibu ngarunaga nemandi ogo  
\ip Yamesehanda beba ogo gilibu wia henedagoni Ngode Datagaliwabenaga wali agali dindi bibahendeni purogo lo hearuhondo gilibu wia hene. Beba ogoniha bi gilibu ngarume Ngode Datagaliwabe mana inanaga miniha anda ibilo mini mo giga bia helo lalu bi dewa gilibu nga. Keriso hameiginime wali agali heba howa mana tigabi bia tagi holene nga.  
\ip Bi maru gilibu ngago uru. Dindini kama tambu homogo yagibanola holenebi ko mo bia holenebi bayale bulenebi talebu ki bulenebi mini mbiraore wulenebi biabe bulenebi hége haru holenebi lo guraga guraga nabi holenebi mini mo dindiha holenebi mine nahe holenebi ema nabi howa hibu lalu holenebi Ngode Datagaliwabehondo bi lolenebi urunidagua bialu holene nga, lalu gilibu nga.  
\ip Beba ogoniha bi galone duniniore gilibu ngago Ngode Datagaliwabehondo mini mbiraorewi karu tigua mana bayale biragome mini mbiraore wiyago mo walia haga ka, lalu gilibu nga.  
\iot Bu̱lu̱ baga buwa kuni gilibu ngago  
\io1 \ior 1.1\ior*  
\io1 Yamesehanda bi ala lenego \ior 1.2-8\ior*  
\io1 Mini mbiraore wulenebi mini gigabiwi holenebi \ior 1.9-11\ior*  
\io1 Homogo yagibanola holene \ior 1.12-18\ior*  
\io1 Ba hondolenebi mo pila holenebi \ior 1.19-27\ior*  
\io1 Bi mana hale halu bulenego \ior 2.1-13\ior*  
\io1 Wali agali talebu ki bulene nawigo \ior 2.14-26\ior*  
\io1 Mini mbiraore wulenebi biabe bia tagi holenebi \ior 3.1-18\ior*  
\io1 Keriso hameiginime tinaga hége haru holenego \ior 4.1–5.6\ior*  
\io1 Keriso hameiginime dindi mana ko hame lolene nawigo \ior 5.7-20\ior*  
\io1 Mana mbira mbira bulenego  
\c 1  
\p
\v 1 I̱ Yamese Ngode Datagaliwabenagabi Anduane Homogo Yasu Kerisonagabi biabe bia haga kogo howa Ngode Datagaliwabenaga wali agali dindi bibahendeni purogo lo kamiru tí mitangi bialu beba ogo gilibu wia haro.\x + \xo 1.1 \xt Md 13.55, Mg 6.3, Ab 15.13, Ga 1.19, 1 Pi 1.1\x*   
\s1 Mini mbiraore wulenebi mini gigabi wulenebi ogo  
\p
\v 2 I̱ hamene mbaliniru-o mo tandaga holene tara tara tí kamigoria íbu ngagola turuho halimu.\x + \xo 1.2 \xt Ab 5.41, Lm 5.3-5, Hi 10.34, 1 Pi 1.6, 4.13, 4.16\x*  
\v 3 Mo tandaga holene tara tara urunibi íbu ngagola tí agi mitangi beramibe hondolenaga ngago manda buwa Ngode Datagaliwabehondo mini mbiraore wirimigome bolangua ho halimulonaga nga. Genda dewa urunibi íbu ngagola yu howa hongo ho haabo holeberami.\x + \xo 1.3 \xt 1 Pi 1.7\x*  
\v 4 Hongo haabo howa hibulo kamigome mini bogabi baya buruguleorebi karulapeorebi holeberami.  
\v 5 Anigo agi buabe toba ho harimiyagua Ngode Datagaliwabehondo bi lolene nga. Bi lalu howa mini gigabi wulene ngi lalu kagohondo ibugua nangule nale turu howa mo tago halu mulebira.\x + \xo 1.5 \xt 1 Kin 3.9-12, Min 2.3-6, Yo 15.7, 1 Yo 5.14-15\x*  
\v 6 Anigo ngi lalu kamigo howa Ngode Datagaliwabehondo mini mbiraore wuwa ngulebiraore manda bialu bi lalimu. Mbiralime ibuhondo bi lalu howa mini dewa wuwa bi layagua ibu puyabu pu laragola iba yaribu bialu pu íbu dai bu biagagobi ka.\x + \xo 1.6 \xt Mg 11.24, 1 Ti 2.8\x*  
\v 7-8 Ibugua mini dewa wuwa hariga mbiraoreni polene manda nabi hariga dewani polene manda bialu kagoni. Ogonibime Anduane Homogohondo mini mbiraore nawi howa mbira ngi laragola ngulebira mitangi bulene nawi.\x + \xo 1.7-8 \xt Ya 4.8\x*   
\s1 Yagibano karunagabi homogo karunagabi te ogo  
\p
\v 9 Mbirali ibu Keriso hameigini howa yagibano kayagua Ngode Datagaliwabehanda ibu mo yaraga haragola turu holene nga.\x + \xo 1.9 \xt Ya 2.5\x*  
\v 10 Mendeali ibu Keriso hameigini howa homogo kayagua Ngode Datagaliwabehanda ibunaga mbirale ngaru mitangi nabi ibu mo dindi haragola turu holene nga. Irane balawaya minane anda hararu gau lalu ereba hagadagua mbirale dewawi karu homolebira.\x + \xo 1.10 \xt Iba 37.2, 90.5-6, 1 Ko 7.31, 1 Pi 1.24, 1 Yo 2.17\x*\x + \xo 1.10 \xt Ais 40.6-7\x*  
\v 11 Balawaya dedago nime da ba haragola gau lalu dogolope hagadagua homogo karu uruninaga biabe bialu kaore homalu bibahende ngelalu polebira.   
\s1 Ba hondolenebi ko mo bia holenebi ogo  
\p
\v 12 Mo tandaga holene tara tara ngagola tígua ema nabi hongo howa hibu lalu haabo howa Ngode Datagaliwabehondo gubalini ho karuhondo holene gahenge Ngode Datagaliwabehanda, Ngulebero, layadagua ngulebiraore manda buwa tí turu holene nga.\x + \xo 1.12 \xt Min 3.11-12, 2 Ti 4.8, Hi 12.5, Ya 2.5, 1 Pi 5.4, Mo 2.10\x*  
\v 13 Mo tandaga holene ngagome mbirali ko mo bia haragola ibugua lalu, Ngode Datagaliwabehanda i̱ ko mo bia halu ka, lolene nawi. Ko ngagome Ngode Datagaliwabe ko mo bia habe nahe nga. Ngode Datagaliwabe ibugua mbirali ko mo bia nahaga ka.  
\v 14 Mbirali ibuni dimagoli haragome ko mo bia holene tene nga.\x + \xo 1.14 \xt Lm 7.7-10\x*  
\v 15 Ibuni dimagoli howa ko biaga. Ko biyago anda howa homolene wulebira.\x + \xo 1.15 \xt Iba 7.14, Lm 5.19-21\x*   
\p
\v 16 I̱ hamene mbalini turubiru-o tíni mo hondo nahalimu.  
\v 17 Ngode Datagaliwabe ibunime mbirale bibahende baya buruguleore ngaru turu halu bame ngiaga ka. Ngode Datagaliwabehanda hariha wá haga bibahende karu Wabiaga ibu ka. Ngode Datagaliwabe ibu tara nahagabi de handa tara nahagabi mo aruma nahabehebi kagoni.\x + \xo 1.17 \xt Mal 3.6, Md 7.11, Yo 3.27, Lm 11.29, 1 Ko 4.7\x*  
\v 18 Ngode Datagaliwabehanda bibahende wabuwa ina dunini holoma̱ya hame lowa ibunaga bi mana henene lolene ngagome mo gahenge ho helenego kama.\x + \xo 1.18 \xt Yo 1.13, Eb 1.12, Ya 2.3, 1 Pi 1.23, Mo 14.4\x*   
\s1 Bi mana hale halu bulene ngago ogo  
\p
\v 19 I̱ hamene mbalini turubiru-o mbira ogo mitangi bulene nga. Bibahendeme bi bayuwa hale hai hami̱ya. Anigo bi abale la nabi kebabi abale nahe hami̱ya.  
\v 20 Wali agalinaga keba holene ngagome Ngode Datagaliwabenaga tigabi bulene ngago mo bia nahaga.\x + \xo 1.20 \xt Min 10.19, 17.27, Aga 5.1-2, 7.9\x*   
\p
\v 21 Anigo ko bulene bibahende ngaru wahai halimu. Ngode Datagaliwabehanda bi mana tínaga bu habaneha hangayago manga nahe howa bayuwa yu tigabu halimu. Ani birimiyagua Ngode Datagaliwabenaga pele mulene yu holeberami.\x + \xo 1.21 \xt 1 Ko 15.2, Kl 3.8, Hi 2.3, 1 Pi 1.9, 2.1\x*   
\p
\v 22 Bi mana ogoni hale dege harimiyagua tíni mo hondo harami. Hale halu bulene nga manda bilimu.\x + \xo 1.22 \xt Md 7.21, 7.26, Lg 6.46, Lm 2.13, 1 Yo 3.7\x*  
\v 23-24 Mbiralime iba wa̱yu̱ handalu puwa mani ibunaga dengui abi kobe toba halu embeda haga. Ogonidagua mbiralime bi mana hale howa bia nabiyagua ibu ogonibi ka.\x + \xo 1.23-24 \xt Lg 6.47, Ya 2.14\x*  
\v 25 Ngode Datagaliwabe bi mana baya buruguleore lowini ngagome wali agali golope haga. Mana ogoni mbiralime bayuwa mitangi bu haabo hayagua bi mana embeda nahe bulene ngadagua bialu ibugua Ngode Datagaliwabenaga turu holene handa walia holebira.\x + \xo 1.25 \xt Yo 13.17, Lm 8.2, 2 Ko 3.18, Ya 2.12\x*   
\p
\v 26 Mbiralime, I̱ Keriso hameigini ko, lowa ibunaga hége haru nahaga kayagua ibuni mo hondo hara. Mana yu kogo bamedago lowa ani laga ka.\x + \xo 1.26 \xt Iba 34.13, 39.1, 141.3, 1 Pi 3.10\x*  
\v 27 Aba Ngode Datagaliwabehanda Keriso hameigini henemanebi tigabibi kayagua ti ogobiore holebira manda bu ka. Wali dalo bedarubi waneigini hono wahene karubi ti genda yu kagola biamogo bia holene nga. Ani bialu howa dindi mana ko ngarume tí mo pila holigo hondo wandialu halimu.\x + \xo 1.27 \xt Ais 1.16-17, 58.6-7, Md 25.36, Lm 12.2, 1 Yo 5.18\x*   
\c 2  
\s1 Iname wali agali talebu ki bulene nawigo ogo  
\p
\v 1 I̱ hamene mbaliniru-o Anduane Homogo Yasu Keriso ibu mini daliga lowa Anduane Homogo kago ibuhondo mini mbiraorewi kamiru tígua wali agali tale bialu homogo karuhondo turu halu yagibano karuhondo handabe manga halu bulene nawi.\x + \xo 2.1 \xt Man 1.17, Min 24.23, Md 22.16, Ab 10.34, Ya 2.9\x*  
\v 2 Agali kira mendego ibu gi magibi aga bayalebi biai howa mendego ibu yagibano aga ko buda pugubi buwa libu tínaga lotu lagane andaha ibiyagua  
\v 3 tígua agali aga bayalebi kagohondo lalu, Biragane bayale ogoria birule íbu, lalu agali mende aga budu pugubi biagohondo lalu, Í̠ kegoriani hoa biyagua nde habe. Biruabiyagua nde ogoriani birabe,  
\v 4 laramiligo tínaga mini ko ngamigome wali agali talebu ki bialu kami.   
\p
\v 5 I̱ hamene mbalini turubiru-o tí hale halimu. Yagibano karume Ngode Datagaliwabehondo mini mbiraore wulene timbuni yu tiga bilobi Ngode Datagaliwabehanda handame ho kagoria ti helobi ibugua ti dabo helene. Ibuhondo gubalini ho karu ibugua handame ho kagoria ti holebira lalu lowini.\x + \xo 2.5 \xt Md 5.3, Yo 7.48, 1 Ko 1.26-28, 1 Ti 6.18, 2 Ti 4.8\x*  
\v 6 Agali kira larugo yagibano biagohondo tígua handabe manga halu mo taga haramili. Homogo karume tí handabe manga halu, Godi lo ma, laga ndobe.\x + \xo 2.6 \xt Ab 13.50, 18.12, 1 Ko 11.22, Ya 5.6\x*  
\v 7 Tigua tí Yasu Kerisonaga mini bayale karulo kamigo hondowa tí mege biaga ka ndobe.   
\p
\v 8 Ngode Datagaliwabehanda Handame Ho kagonaga mana lowinigo ibunaga \w mbugani\w* longago ogo, Í̠na í̠ni gubalini ho harilidagua maru karu ta nabi gubalini ho habe, lalu gilibu nga. Ani lo ngadagua bialu kamiyagua ogoni bayaleore berami.\x + \xo 2.8 \xt LBM 19.18, Md 19.19, 22.39, Lm 13.8-9, Ga 5.14\x*  
\v 9 Mbirali kagohondo handabe manga ho kamiyagua Mosese heneyangi \w Mana\w* lowini ngago pugualu ko berami.\x + \xo 2.9 \xt Man 1.17\x*  
\v 10 Ngode Datagaliwabehanda bi mana lowini ngago mbiralime mana ogoni mbira hangu puguayagua ibugua bi mana bibahende ngago puguai haragoni.\x + \xo 2.10 \xt Man 27.26, Md 5.19, Ga 3.10\x*  
\v 11 Ngode Datagaliwabehanda lalu, Wali agali kayu nayabe, lalu bi mende, Homelo nababe, lene. Tí wali agali kayu nabi howa mbirali homelo barimiyagua Ngode Datagaliwabehanda bi mana bibahende lowinigo puguai harimi.\x + \xo 2.11 \xt Har 20.13-14, Man 5.17-18, Lm 13.9\x*  
\v 12 Ngode Datagaliwabe bi mana lowini ngagome wali agali golope hagago mana ogonime tí tale bulebirago tígua bi laramigobi mana beramigobi hondowa halimu.\x + \xo 2.12 \xt Ga 6.2, Ya 1.25-26, 1 Pi 2.16\x*  
\v 13 Mbiralime wali agali maruhondo dara howa biamogo nabiyagua ogoninaga Ngode Datagaliwabehanda dabi ki birangi ibu dara naholebira. Anigo mbiralime wali agali dara halu biamogo bialu hayagua Ngode Datagaliwabehanda daba ki birangi ogoni ibu dara holebira.\x + \xo 2.13 \xt Min 21.13, Md 5.7, 18.32-35, 25.41-42, 1 Yo 4.17-19\x*   
\s1 Mini mbiraore wu howa bulene ogo  
\p
\v 14 I̱ hamene mbaliniru-o, Ngode Datagaliwabehondo mini mbiraore wu ko, lowa mana bayale biatagi naharimiyagua mana ogonibi beramigome tíni pele mibehedabe.\x + \xo 2.14 \xt Md 7.21, 7.26, Ya 1.23\x*  
\v 15 Keriso hameigini marume agabi tomo nolenebi nawi kagola\x + \xo 2.15 \xt Yob 31.19-20, Lg 3.11, 1 Yo 3.17\x*  
\v 16 o biaruhondo aga tomobi nami howa tihondo lalu, Tí tomo karulape nalu aga bayale bialu turu halu hondo halimu, larimiyagua bayale beramibe.  
\v 17 Tí Ngode Datagaliwabehondo mini mbiraorewi kamiyagua nde mana beramigome walia halu biatagi halimu. Ibuhondo mini mbiraore wu howa mana bayale biatagi naharimiyagua mini mbiraore wulene ogoni hangu galone naholebira.\x + \xo 2.17 \xt Ya 2.20, 2.26\x*   
\p
\v 18 Mbiralime lalu, Mbirali ibu Ngode Datagaliwabehondo mini mbiraore wu haga ka mendeali ibu mana bayale bialu haga ka, lolebira. Ani laragohondo i̱na agua ladai bero. Mbiralime Ngode Datagaliwabehondo mini mbiraore wu ko lowa mana bayale nabiyagua i̱na ibu mini mbiraore wu ka agua manda buleberobe. I̱ nde mana bayale berogome Ngode Datagaliwabehondo mini mbiraore wu ko, lalu walia holebero.\x + \xo 2.18 \xt Ga 5.6, Ya 3.13\x*  
\v 19 Ngode Datagaliwabe ibu mbiraore kago manda biribe. Bayuwa manda birida. Dama karu ti nde anidagua dege manda bialu mogo lowa gi halu ka. Í̠ mini nawi kegoni.\x + \xo 2.19 \xt Md 8.29, Lg 4.34, Ab 16.17\x*  
\v 20 Ngode Datagaliwabehondo mini mbiraore wu howa mana bayale biatagi nahayagua ogoni galone ndo berego manda nabi kebe.  
\v 21 Inanaga mamali Abarahamahanda ibu igini Aisaga Ngode Datagaliwabehondo bo lomabu miaga dabuni mule biyagola Ngode Datagaliwabehanda, Ibu mini tigabiwi ka, lene.\x + \xo 2.21 \xt Pig 22.1-14\x*  
\v 22 Ibugua mini mbiraore wu howa Ngode Datagaliwabehanda bia layadagua biatagi hayagome Ngode Datagaliwabehondo mini mbiraore ogobi wu ko lalu walia hene.\x + \xo 2.22 \xt Hi 11.17-18\x*  
\v 23 Ani biyagola Anduane Homogonaga \w mbugani\w* bi lowinigo lola henego ogo, Abarahamahanda Ngode Datagaliwabehondo mini mbiraore wu heago hondowa Ngode Datagaliwabehanda, Ibu agali mini tigabiwi ka, lowa, I̱naga nenegeore ka, lalu gilibu nga.\x + \xo 2.23 \xt Pig 15.6, 2 Bit 20.7, Ais 41.8, Lm 4.3, 4.9, 4.22, Ga 3.6\x*  
\v 24 Anigo mbiralime Ngode Datagaliwabehondo mini mbiraore wirago hangume ndo mana bayale birago hondowabi Ngode Datagaliwabehanda, Ibu mini tigabiwi dege ka, lolebira.   
\p
\v 25 Bayanda wali mbira kayu bule muni ngi laga mini Lahaba berenego ibugua Isaraele agali kirali taya ibiyago labo yo pialu pelo lowa ibu andaga bira do helalu hariga tarani dai bilo walia hayagome ibubi mini tigabiwi holene yini.\x + \xo 2.25 \xt Yos 2.1-21, Hi 11.31\x*   
\p
\v 26 Anigo mbiralinaga tinginibi dininibi mandagi naheyagua nde ibu homene ka. Ogonidagua Ngode Datagaliwabehondo mini mbiraore wulenebi mana bayale bulenebi mo mbiraore nahayagua Ngode Datagaliwabehondo mini mbiraore wulene degego homene ale ka.\x + \xo 2.26 \xt Ya 2.17\x*   
\c 3  
\s1 Iname hége haru holenego ogo  
\p
\v 1 I̱ hamene mbaliniru-o tí lawai hagane hole garere nabilimu. Daba ki birangi Keriso hameigini bibahende dabolebira. Dabalu howa lawai hagane kamaru inahondo hongo howaore dabolebira.\x + \xo 3.1 \xt Md 23.8, 23.14, Lg 6.37, 12.47, 1 Pi 5.3\x*  
\v 2 Ina bibahendeme kagua dewa beramali. Mbiralime bi ko nalaga kayagua ibu baya burugule howa ibunaga mini tinginibi haru hai haga ka.\x + \xo 3.2 \xt 1 Kin 8.46, Min 20.9, Md 12.37, 1 Yo 1.8\x*  
\v 3 Agalime nogo hosi gabua mo dambola howa nogo hosi ne hanganeha ege pu magui howa pume pongo buwa biabe hame ledamadagua bilo iname hosi haru haramali. \fig Agalime nogo hosi gabua mo dambola howa nogo hosi ne hanganeha ege pu magui howa pume pongo buwa biabe hame ledamadagua bilo iname hosi haru haramali.|src="HK 4D.tif" size="2" ref="(3.3)" \fig*  
\v 4 Iba sibi piagane mana manda bimi̱ya. Puyabu hongo howa pu laragola iba sibi timbuni ngago yagane agalime ibuni poa biragoha pole ira mbalape emeneme mo tiga biaga.  
\v 5 Hége emene koore howa bi biabe dege timbuniore biaga ka.  
\p Ira dene emeneme irabu timbuni ngago bo dai haga.\x + \xo 3.5 \xt Iba 12.3, 73.8-9, Min 12.18, 15.2\x*  
\v 6 Hége ira dene ale ka. Ko bulene dewa ngaru hége ibuha howa tagira ibaga. Hégeme tingini bibahende tomia biai haga ka. Hégenaga hungu biagane tene heli dindiha nga.\x + \xo 3.6 \xt Min 16.27, Md 12.36-37, 15.11, 15.18-19, Mg 7.15, 7.20, 7.23\x*  
\v 7 Nogo ega tara tarabi dindini tombene piagane tara tarabi wena tara tarabi bibahendeore wali agalime mo dambola hagago  
\v 8 hége mo dambola habe nahe ka. Hége koorene ko ka. Hégeme bibahende tomia biai haga.\x + \xo 3.8 \xt Iba 140.3, Lm 3.13\x*  
\v 9 Inanaga hégeme Anduane Homogo ina Abahondo ka̱i̱ laramali. Ani buwa hége ogoni degeme agali Ngode Datagaliwabehanda ibuni ale helo wabini karubi ha haramali.\x + \xo 3.9 \xt Pig 1.26, 5.1, 9.6, 1 Ko 11.7\x*  
\v 10 Ne hariga mbiraoreha howa ka̱i̱ lolenebi ha holenebi tagira ibaga. I̱ hamene mbaliniru-o mana ogonibi karulape ndo.  
\v 11 Iba gendo mbiraoreha howa iba kaubi dendebila ibagabe.  
\v 12 I̱ hamene mbaliniru-o pogeme hai dagabe. Pu mbira lini daga mini \w gerebi\w* iraneme pogoli dagabe. Ogonidagua dege ibi iba kaubi bedagoha iba dendebi hambibehebe.   
\s1 Mini gigabi wulene dahuliya andaga tawe ngago ogo  
\p
\v 13 Tí kamigoha mini gigabiwi manda timbunibi mbira ai kabe. Mini gigabiwi mbira kayagua mine nahe ibuni mo dindiha halu mana bayale biragome walia holebira.\x + \xo 3.13 \xt Ga 6.4, Ya 1.21, 2.18\x*  
\v 14 Anigo tínaga bu miniha henge lolenebi bi ko lolenebi habua bulenebi wu kamiyagua, Mini gigabiwi kogo, laramigome henene lolene ngago mo ko haramigo nalalimu.\x + \xo 3.14 \xt Lm 2.17, 2.23, 13.13\x*  
\v 15 Mini ogonibi wulene dahuliya andaga tawe ndo dindi tawe damanaga mini koha howa íbu nga.\x + \xo 3.15 \xt Pb 3.19, Ya 1.5, 1.17\x*  
\v 16 Henge lolenebi habua bulenebi ngagoria mini mo mbiraore naholenebi ko bibahende bulenebi wulebira.\x + \xo 3.16 \xt 1 Ko 3.3, Ga 5.20\x*  
\v 17 Anigo mini gigabiwi holene dahuliya andaga howa íbu ngagome mini wálewi holenebi mo palia holenebi hogorale bu holenebi nenege hinulenebi dara halu biamogo bulenebi mana bayale biatagi holenebi nga. Mini gigabiwi holene ogoni wali agali hoba migimigi nabiagabi tombene hondo kihe nahagabi nga.\x + \xo 3.17 \xt Lm 12.9, 1 Ko 2.6-7, 1 Pi 1.22, 1 Yo 3.18\x*  
\v 18 Ani buwa mo palia haga kagome mo palia holene egene hongolebira. Anda haragola ibuhabi wali agali maruhabi mini tigabi holenenaga lini dolebira.\x + \xo 3.18 \xt Min 11.18, Ais 32.17, Md 5.9, Pb 1.11, Hi 12.11\x*   
\c 4  
\s1 Dindi mana ko ngaru hame lolene nawigo ogo  
\p
\v 1 Tí lai lalu gungu bialu kamigo agiha howa tagira ibagabe. Tíni mini ko ngamigoha howa tagira ibaga ndobe.\x + \xo 4.1 \xt Lm 7.23, Ga 5.17, 1 Pi 2.11\x*  
\v 2 Tígua mbirale ngago hame lowa henge lalu nayido agini homelo baramili. Marume mbirale yu karunaga henge lowa lai lalu gungu bialu kami. Anigo Ngode Datagaliwabehondo ngi nalarimigome nayi kamigoni.  
\v 3 Tígua ngi lalu howa mini ko wuwa tíni hangu mitangi bialu Ngode Datagaliwabehondo ngi larimigome nayi kamigoni.\x + \xo 4.3 \xt Iba 66.18, Ais 1.15, Mai 3.4, Seg 7.13, 1 Yo 3.22\x*  
\v 4 Tí wali agali mini tigabiwi ndo mini kirawi kami. Dindi mana ko ngaru nenege hinalu kamiyagua Ngode Datagaliwabela waitigi tínime haru anda eberamigo nahende kamibe. Halu mende laro. Tí dindi mana ko ngaru nenege hinalu kamiyagua Ngode Datagaliwabela waitigi tínime haru anda eberamigoni.\x + \xo 4.4 \xt Yo 15.19, 17.14, Lm 8.7, Ga 1.10, 1 Yo 2.15\x*  
\v 5 Anduane Homogonaga \w mbugani\w* bi o lo ngago bame lo ngabe, Ngode Datagaliwabehanda dinini inanaga bu habaneha helayagome ina henge lalu hamelo ka, lalu gilibu nga.\x + \xo 4.5 \xt Pig 6.5, Har 20.3-5, Dag 11.29, Min 21.10\x*  
\v 6 Anigo Ngode Datagaliwabehanda ina biamogo bulene nawi howa guaileore biamogo biahaga ka. Anduane Homogonaga mbugani bi lo ngago ogo, Mine haga karu Ngode Datagaliwabehanda ti he̱la dai biaga ka. Tini mo dindiha haga karu ibugua biamogo biaga, lalu gilibu nga.\x + \xo 4.6 \xt Iba 138.6, Min 3.34, Lg 14.11, 1 Pi 5.5\x*   
\p
\v 7 Anigo tígua Ngode Datagaliwabehanda bia laradagua bilimu. Tígua dama Heyolabehondo, Mangaba, larimiyagua ibugua tí wahalu ibida polebira.\x + \xo 4.7 \xt Eb 4.27, 6.11-12, 1 Pi 5.7\x*  
\v 8 Ani buwa Ngode Datagaliwabe kagoria kaware hapara ho harimiyagua ibugua tí kamigoria kaware hapara ho holebira. Mana ko biaga kamigo wahai halimu. Tombene hondo kihe kamirume bu mini wále wu hole ko ngamigo wahai halimu.\x + \xo 4.8 \xt 2 Bit 15.2, Ais 1.16, Seg 1.3, Mal 3.7, Ya 1.8, 1 Yo 3.3\x*  
\v 9 Ko birimigo mitangi bialu dara halu dugu bilimu. Oba halu kamiru dugu bia aribia holene nga. Turu ho kamigo dara ho aribia holene nga.  
\v 10 Tígua Anduane Homogo deni howa tíni mo dindi halimu. Ani beramigola ibugua tí mo yaraga holebira.\x + \xo 4.10 \xt Yob 5.11, 22.29, Md 23.12, 1 Pi 5.6\x*   
\s1 Keriso hameigini maru karume birago daba ki bulene nawigo ogo  
\p
\v 11 I̱ hamene mbaliniru-o tíni guraga guraga nabilimu. Mbiralime Keriso hameigini gurayaguabi ibugua birago daba ki biyaguabi ogonime Mosese heneyangi \w Mana\w* lowini ngago guralu daba ki bialu ka. Mana lowini ngago daba ki birimiyagua tígua Mana lowini ngago hale halu biaga ndo tí daba ki biaga kami.\x + \xo 4.11 \xt Lg 6.37, Lm 2.1, Eb 4.31, 1 Pi 2.1\x*  
\v 12 Ngode Datagaliwabe ibu mana lowini ngago tenebi daba ki biagabi ibu dege ka. Ibuni degeme holene ngiagabi holene yamiagabi ka. Tígua wali agali tale bialu dabaga agalime daba ki biagadagua beramigo tí ai kama manda bidamibe.\x + \xo 4.12 \xt Md 10.28, Lm 2.1, 14.4, 14.13\x*   
\s1 Mine holene nawigo ogo  
\p
\v 13 Áyu yawibi i̱na dindi mbiraha puwa biyinaya bialu mali mbira hondo holebero, lalu kamiru tíhondo bi larogo hale hadaba.\x + \xo 4.13 \xt Lg 12.18-20\x*\x + \xo 4.13 \xt Min 27.1\x*  
\v 14 Yawi agi bialu holedabe tí manda nabi kami. Ginu ngago tígua de handaramigola abale ereba hagagobi tí kamigoni.\x + \xo 4.14 \xt Iba 39.5, 39.11, 102.3, Ya 1.10, 1 Pi 1.24\x*  
\v 15 Tígua ogodagua labehe. I̱na ogobi mendebi bialu holiya Anduane Homogo ibugua hame ledayagua nde ani bialu holebero, laramine.\x + \xo 4.15 \xt Ab 18.21, 1 Ko 4.19, Hi 6.3\x*  
\v 16 Ani ndo tínime mine halu kudaga bi lagimbu bialu kamigo ko berami.  
\v 17 Mbiralime bayale bulene mbira ngago manda buwa bia nabi hayagua nde ko bialu ka.\x + \xo 4.17 \xt Lg 12.47, Yo 9.41, 15.22, Lm 1.20-21, 2.17-18, 2.23\x*   
\c 5  
\s1 Homogo karunaga bi lo ngago ogo  
\p
\v 1 Homogo kamiru tí hale hadaba. Mo ko holene dewa tínaga wulebirago mitangi bialu yi lalu dugu bilimu.\x + \xo 5.1 \xt Min 11.28, Lg 6.24, 1 Ti 6.9\x*  
\v 2 Dabudabu do harimigo goba haya. Aga tara tara wirimigo bombome naya.\x + \xo 5.2 \xt Yob 13.28, Ya 2.2\x*\x + \xo 5.2 \xt Md 6.19\x*  
\v 3 Muni kuni ngolo silibabi wirimigo hagua biai haya. Hagua bidago hondowa tí ko birimigo lalu walia holebira. Irame dagadagua muni hagua bidagome tínaga tingini dolebira. Hamaro bulene horo kaware ngago ngelowa mbirale tara tara do harimi.  
\v 4 Mabu biabe bia hayaru mo hondo howa tinaga yolo nami ngamigome ko birimigo walia hara. Biabe bia hayaru maru mo hondo harimigonaga tigua bi larago Anduane Homogo Hongo Haiheore kagome hale halu ka.\x + \xo 5.4 \xt Man 24.14-15, Yar 22.13, Mal 3.5\x*  
\v 5 Dindi ogoria howa tíni hangu mitangi bialu nogo habahe kagola bo nolene tu haralidagua tí homolene kaware nga manda nabi howa bibahende ta nabi hame ledamidagua biai halu kami.\x + \xo 5.5 \xt Yar 12.3, 25.34, Amo 6.1, 6.4, Lg 16.19, 16.25, 1 Ti 5.6\x*  
\v 6 Ko nabi hayaru, Ko biya, lowa tigua nde ladai bulene henge nawi heagola homelo bo waharimi.   
\s1 Ema nabi howa hibu lalu Ngode Datagaliwabehondo bi lolenego ogo  
\p
\v 7 I̱ hamene mbaliniru-o Anduane Homogo dai bilo tagi ema nabi howa hibu lalu halimu. Agalime tomo hongowa anda helonaga dalu ibilo ema nabi malia ho hagago mitangi bilimu.\x + \xo 5.7 \xt Man 11.14, Yar 5.24, Hos 6.3, Yol 2.23, Seg 10.1, Lg 21.19\x*  
\v 8 Anduane Homogo dai bulene horo kaware ngago tí turu halu mini dunubia ho howa ema nabi halimu.\x + \xo 5.8 \xt Lm 13.11-12, Pb 4.5, Hi 10.25, 10.37, 1 Pi 4.7\x*   
\p
\v 9 I̱ hamene mbaliniru-o Ngode Datagaliwabehanda daba ki bialu howa, Tígua kagua birimi, loligo tíni guraga guraga nabilimu. Daba Ki Biaga henemane ibu panga tagirahayagi howa tamuha ibule kago handalimu.\x + \xo 5.9 \xt Md 24.33, 1 Ko 4.5, Ya 4.11\x*  
\v 10 Ngode Datagaliwabe mana \w latagi\w* haga agali bamba henerume Anduane Homogo mini lowa ti tandaga halu ema nabi howa hibu lalu henego manda bimi̱ya.\x + \xo 5.10 \xt Md 5.12, Hi 11.35\x*  
\v 11 Tandaga timbuni halu ti hongo haabo howa turu holene handa walia hene laramali. Yobo te hale harimigoni. Ibugua Ngode Datagaliwabe mitangi bialu ema nabi howa hibu lalu haabo hayagola Anduane Homogohanda ibuhondo biyago manda bidami. Anduane Homogo kagome wali agali de hondowa dara timbuni halu biamogo biaga ka.\x + \xo 5.11 \xt Har 34.6, Yob 1.21-22, 2.10, 42.10, Iba 94.12, 103.8, 111.4, Md 5.10-11\x*   
\p
\v 12 I̱ hamene mbaliniru-o ai galone timbuniore laro. Dahuliya andaga mini lalubi dindi mini lalubi mbirale tara ngago mini lalubi wanakui minalu bi nalalimu. Ngode Datagaliwabehanda, Í̠ kagua lari, loligo e̱bi ndobi ogoni dege lalimu.\x + \xo 5.12 \xt Md 5.34-37\x*   
\p
\v 13 Tí kamigo mbirali genda yu kayagua Ngode Datagaliwabehondo bi lolene nga. Ani buwa mbirali ibu turu hayagua Ngode Datagaliwabe mini yaraga halu iba gana lolene nga.\x + \xo 5.13 \xt Eb 5.19, Kl 3.16\x*  
\v 14 Mbirali kamigo warago bayagua ibugua Keriso hameigini \w agali\w* ala hene miniwi karu ololene nga. Tigua o biago mini lalu Ngode Datagaliwabehondo bi lalu Anduane Homogo minini howa ibunaga tinginini olibe lininaga weli odo wulene nga.\x + \xo 5.14 \xt Mg 6.13, 16.18\x*  
\v 15 Tígua Ngode Datagaliwabehondo mini mbiraore wuwa bi larimigome mbirali warago bo wiyago Anduane Homogohanda mo dabi holebira. Ani biragola ibugua ko biyago Ngode Datagaliwabehanda domo wahai holebira.\x + \xo 5.15 \xt Ais 33.24, Md 9.2, Mg 16.18\x*  
\v 16 Wali agali maru kamigo dabi helo ko birimigo hangu hangu lapani hagahaga bialu ti mini lalu Ngode Datagaliwabehondo bi la haga bialu halimu. Mbirali mini tigabiwi kagome Ngode Datagaliwabehondo bi layagua Ngode Datagaliwabehanda hongo tara walia holebira.\x + \xo 5.16 \xt Man 9.18-20, 1 Sml 12.18, 1 Kin 13.6, Iba 34.15, Yo 9.31\x*  
\v 17 Elaya ibu ina kamagobi dege howa ibugua dalu naibilo lalu Ngode Datagaliwabehondo mini dunubia ho howa bi layagola mali tebirani manegonaga ege waragaria dalu naibi gaea biaabo ho wini.\x + \xo 5.17 \xt 1 Kin 17.1, 18.1, Lg 4.25, Ab 14.15\x*  
\v 18 Ani biyagola howa ibugua Ngode Datagaliwabehondo bi lone lalu, Dalu ibila, layagola dalu ibalu dindi bayale halu tomo anda haga bini.\x + \xo 5.18 \xt 1 Kin 18.42-45\x*   
\p
\v 19-20 I̱ hamene mbaliniru-o galone ogo ala manda bilimu. Tí kamigo mbiralime mana henene ngago wahalu poragola mendealime hariga tigabini haru dai biyagua homolene ngagoria pu karia haru dai bulebira. Mana ko biaga karume ko dewa biyago Ngode Datagaliwabehanda domo wahai helo haru dai biyagome ibu biamogo bini.\x + \xo 5.19-20 \xt Md 18.15, Ga 6.1\x*\x + \xo 5.19-20 \xt Iba 51.13, Min 10.12, Lm 11.14, 1 Ko 9.22, 1 Ti 4.16, 1 Pi 4.8\x*