\id HAG - Huli Bible [hui] -Papua New Guinea 2011 (web version -2013 bd) 
\h HAGAI 
\toc1 Hagai 
\toc2 Hagai 
\toc3 Hag 
\mt1 Hagai  
\imt1 Mbuga ogoha gilibu ngarunaga nemandi ogo  
\ip Hagai ibugua Anduane Homogonaga bi mana \w latagi\w* henedagoni Yuda wali agali Babilono dindiha garabaya heneru golalu dai buwa Yarusalemeha heagola latagi halu hene. Ti dai buwa mali maru Yarusalemeha heane dege Anduane Homogonaga anda biago biadai nabi dege haabo hene. Ani howa bi mana latagi haga agali Hagai Segaraialame Serubabele Yosualanaga mini mo hongo halu libugua Anduane Homogonaga anda bo gialo wahene biago lone biadai bialu lotu lalu howa mana ko biaga wiaru mo wahai helonaga lene.  
\ip Hagaihanda lalu, Yuda wali agalime biabe ogoni birimiyagua nde biabe ogonime tíni baya hanguore mo mbiraore ho holeberemi. Ani beremigome Anduane Homogonaga bi mana latagi halu mbiwia haga ala heneruha howa bulebero lalu Anduane Homogo ibunime laga biniru heneneore tagira pugu bilonaga, lalu hene. Anduane Homogohanda tí mo bayale helaragola tíni holene bayale winidane handa walia holeberemi, lalu latagi halu hene.  
\iot Bu̱lu̱ baga buwa kuni gilibu ngago (1.1-15)  
\io1 Anduane Homogohanda ibunaga anda bia halimu lenego \ior 2.1-23\ior*  
\io1 Biamogo bulenebi mini mo dunu bia holenebi lalu laminigo  
\c 1  
\s1 Anduane Homogohanda ibunaga anda abaleore bia halimu lenego ogo  
\p
\v 1 Kini Dariusi ibu Pesia dindiha kini heane mali mendegonaga ege waraganenaga horo mbira layagola Anduane Homogohanda ibunaga bi mana \w latagi\w* haga agali Hagaiha howa bi ogo lamini.\f + \fr 1.1 \ft Ogoniha gilibu ngagoni Yasu ibu dindini ibulenego mali handari duriani pira kira (520) ngelo howa lene. Ogoni mali inanaga dagalalu howa ege halininaga horo pira kirani dira (Ogasa 29) hayagola lene.\f*\x + \xo 1.1 \xt Esr 4.24–5.2, 6.14\x* Ibugua bi ogoni agali Yudanaga gabumane haguane Serubabelebi agali \w loma\w* binigo mo miaga haguane timbuni Yosuabi libuhondo lamini. Serubabele ibu Sealadiele igini hene. Yosua ibu Yahosadaga igini hene.   
\p
\v 2 Ani heagola Anduane Homogo Hongo Haiheore kago ibugua Hagaihondo bi lamialu lalu, Wali agalime bi ogodagua laga, Anduane Homogonaga anda biago lone bulene wene dege nga, lagaya lamini.   
\p
\v 3 Ani lamialu Anduane Homogo Hongo Haiheore kago ibugua wali agalihondo ibunaga bi mana latagi haga agali Hagaiha howa bi latagi hene.  
\v 4 Ibugua ogodagua lene. I̱naga wali agaliru-o tíni andaga bayaleruha paluwa i̱naga anda mo ko hene ngelo kamigo aginagabe.\fig Inaga wali agaliru-o tíni andaga bayaleruha paluwa i̱naga anda mo ko hene ngelo kamigo aginagabe.|src="HK 18b.tif" size="2" ref="(1.4)" \fig*  
\v 5 Tíha ko tara tara tagira ibulene ngaru mitangi bialu holene nga.  
\v 6 Tígua tomo dewa hangarimi tiraga emene hangu anda haya. Tí tomo maru ngami tiraga tí no karulapu nabulebira. Tínaga \w waini\w* ibabi nalu holene wia ngami tiraga tígua naramigola no karulapu nabuleberemi. Tínaga aga bu holene dewa wu kamigo ai dagare birangi tínaga aga urunime tí bu karulapu nabulebira. Muni biabe biaga maru karume muni dewa yu ka tiraga tinaga muni yaga paudi nu diriwiha hanaragola tagu wahai haradagua bialu abale ereba haga biaga.\x + \xo 1.6 \xt Man 28.38-40, Hos 8.7, Hag 2.16\x*  
\v 7 Anduane Homogo i̱ Hongo Haiheore kogome tíhondo bi ogodagua laro. Mbirale wali agali tíha ibirarunaga irane agidabe manda bulene nga.  
\v 8 Ai bi ogo hale hadaba. Tígua hari ngaruha puwa i̱naga anda lone biadai bule irabuha ira dibu pilimu. I̱ turuho holiya i̱naga anda ogoni lone bia halimu. Ani bialu i̱naga mini yaraga hene howa mini leneore holiya tígua i̱nihondo lotu lalu holeberemi.   
\p
\v 9 Tígua mabuha howa tomo dewa bu yalu íbu wulene manda bu kamiria tomo dewa nawiya. Tí tomo andaga bu yu íbu ngamiria i̱naga puyabume pulo wahai harugola tomo abale biba hayiya. Anidagua birudagoni irane tígua i̱naga anda giala holebu ngelo wahowa tigua tíninaga anda hangu hangu kamidagua bigibigi bialu kamigoni.  
\v 10 Irane ogonidagua beremigome iba dalu naibi gaea biaho wiaabo haya. Ani biyagome mabuha tomo dewa anda nahe ngagoni ndobe.  
\v 11 I̱nime iba dalu naibilonaga minu yu kogoni. Hari bare ngaruhabi widi mabu ngamiruhabi \w gerebi\w* mabu ngamiruhabi ira olibe mabu ngamiruhabi iba dalu naibilonaga i̱na hapai ho ko. Dindini tomo tara tara hengedamigohabi wali agali bu kamiruhabi nogo bulumaga bu karuhabi tínaga tomo tara tara hengedamiru bibahendehabi iba dalu naibilonaga henemane i̱nime hapai ho kogoni, laya lene.   
\s1 Wali agalime Anduane Homogonaga bi hale halu binigo ogo  
\p
\v 12 Yuda wali agali ti Serubabele Yosuala heba mandagi heagola bi ogo lamiyago ti bibahendeme hale hai hene. Ani hale howa Anduane Homogo tinaga Ngode Datagaliwabehanda bi layago hale howa gi timbuni halu ibuninaga bi mana latagi haga agali dabo helene Hagaihanda bi layago hale howa talialu bialu hene.  
\v 13 Ani heagola Hagai ibugua wali agali bu hearuhondo Anduane Homogonaga bi mana lamialu lalu, Anduane Homogohanda bi ogodagua leda. I̱ Anduane Homogo i̱ni tí heba mandagi haabo holebero, laya.  
\v 14 Ani layagola Anduane Homogohanda wali agali bibahendenaga mini mo heya hayagola tigua Anduane Homogonaga anda bialu hene. Serubabele Yosualabi wali agali libu heba mandagi bu hearu tigua Anduane Homogo Hongo Haiheore kagonaga anda ogoni bule bialu hene.  
\v 15 Tigua anda pigane tenialu binidagoni Dariusi ibu kini henego mali mendenaga ege waraganegonaga horo pira kirani maria (24) heagola tigua anda ogoni pigane bialu hene.\f + \fr 1.15 \ft Mali ogoni Yasu Keriso dindini ibulenego mali handari duriani pira kira (520) ngelowa bini. Áyu kamangi manda bialu ege dini mini Sebedembanaga horo pira kirani mbira (21) hayagola pigane bialu hene.\f*   
\c 2  
\s1 Anduane Homogonaga anda bayale taraore holebira lenego ogo  
\p
\v 1 Mali ogoninaga dege ege kanenaga horo pira kirani mbira (21) hayagola Anduane Homogohanda ibunaga bi mana \w latagi\w* haga Hagaiha howa lone latagi hene.  
\v 2 Ibugua Hagaihondo lamialu lalu, Tínaga gabumane agali haguane Serubabelehondobi \w loma\w* binigo mo miaga haguane timbuni Yosuahondobi wali agaliruhondobi ogodagua lamibe.  
\v 3 Bamba i̱naga anda bayaleore henego tí marume mitangibu kamibe. Anigo áyu tígua handalu kamiria anda ogoni mo ko halu gialabaga bini nagaloneore ngaria hendedamibe.\x + \xo 2.3 \xt Esr 3.12, Seg 4.10\x*  
\v 4 Ani ngaria hondowa tínaga bu miniha genda dege dindiho holene nawi. I̱ni tí heba haabo kogonigo biabe ogoni bialu halimu.  
\v 5 Bamba tí Iyibi dindi yu wahalu tagira ibalu ibirimingi i̱ tí heba mandagi haabo holebero lalu lo wirugoni. Áyubi nde i̱naga Dinini ibu tí heba haabo kago tí gi nahe halimu.\x + \xo 2.5 \xt Har 29.45-46\x*   
\p
\v 6 Anduane Homogo Hongo Haiheore kogome lu nahe emeneore howa mbirale bibahende ngarunaga dindi haribi iba solowara timbuni bedarubi i̱na mo ema bia hai holebero.\x + \xo 2.6 \xt Yol 3.16, Hag 2.21, Hi 12.26\x*  
\v 7 Dindi bibahendeha gabumane haru haga agali haguane bu karubi mo durula hai holebero. Ani berogola wali agali hameigini dindi tara taraha bu karume tinaga munibi mbirale bayale tara tara ngarubi bibahende mo yalu ibalu i̱naga andaha wialu wu to̱lolebira.\x + \xo 2.7 \xt Ais 60.4-9, Dan 2.44\x*  
\v 8 Muni ngolo silibabi dindi bibahendeha bu ngarubi i̱naga dege wiai ka.\x + \xo 2.8 \xt 1 Bit 29.14-16\x*  
\v 9 I̱naga anda gahenge ogoni ala hayagonibi ndo baya taraore mbira ona holebira. Ani kagola i̱naga wali agali dindi ogoniha karu mbirale bayale tara tara bu ngaru mo mialu tinaga bu miniha mo palia holenebi mo karula holebero. I̱ Anduane Homogo Hongo Haiheore kogonigo i̱na bi o ledogoniore, laya lamibe, lene.   
\s1 Mana ko ngubi wiarume wali agalinaga lomabu mulene wiaru mo ko henego ogo  
\p
\v 10 Kini Dariusi ibu kini henego mali mendegonaga ege dininaga horo pira kirani maria (24) hayagola Anduane Homogo Hongo Haiheore kago ibugua ibunaga bi mana \w latagi\w* haga agali Hagaihondo bi ogo lamini.  
\v 11 Ibugua lalu, Í̠na \w loma\w* binigo mo miaga bu karuhondo tinaga bu miniha agua wu henedabe hondole tihondo bi ogo hale habelo hamelo ko.  
\v 12 Mbiralime nogo lomabu miniru bo delene ngagonaga mbirini mbira ibunaga agame mo kabu bu yalu piyagua aga ogonime mberedibi tomo dawa wini ngarubi \w waini\w* ibabi olibe lininaga welibi tomo marubi uruni mbirago agame ela hayagua ela harago mo lomabu miniru aria dege halu i̱ninaga wiabagi heneore wulebirabe lalu hale habe, lene.  
\p Ani laya handala Hagai ibugua loma binigo mo miaga bu hearuhondo bi ogoni hale hayagola tigua ladai bialu lalu, Ndo anidagua bulene karulapeore, lene.   
\p
\v 13 Ani layagola Hagaihanda tihondo bi mende hale halu lalu, Ai mbiralime homene tingini ngago ela hayagua nde wali agali ogoni ibu Anduane Homogonaga deni mebia hene dodohe kago ina manda bidamagoni. Anigo agali homa tingini ela hayagome ibugua tomo maru ngago ela hayagua tomo ogonibi nde mebia hene dodohe dege ngabe, lalu hale hene. Ani hale hayagola loma binigo mo miaga agali biaru tigua ladai bialu lalu, E̱ tomo urunibi nde dodo hene dege wulebira, lene.\x + \xo 2.13 \xt Dag 19.11-22\x*   
\p
\v 14 Ani layagola Hagaihanda lalu, Anduane Homogohanda au laya. Yuda wali agali bibahende bu karunime mbirale bialu karuni ti ogonibi dege ka. Tininaga minibi mana tigua bialu karubi bibahende dodo hai hene dege bialu ka. Anidagua bialu kagome tigua lomabu delaga dabuni loma damene bibahende bu yalu ibiraru i̱naga deni mebia hene dodohe dege bu yalu ibaga.   
\s1 Anduane Homogohanda, Isaraele wali agali biamogo bulebero, lalu lowinigo ogo  
\p
\v 15 Anduane Homogohanda ogodagua laya, Tígua i̱naga anda biago lone bia dai nabi hemingi biyago damene bayuwa mitangi budai ala bilimu.  
\v 16 Tígua tomo dewaore alugumu bu wiagoria puwa nu mariaore honoleberemada lo mitangi bu yalu pialu hemiria nu maria biago nahene nu kira hangu hanarimigoni. Tígua waini iba biraga iba be timbuni wabu peho berelaga wiagoha puwa waini be pira mbira bibahende hambiai hole lo manda bialu hemiria be pira uruni hambiai habe nahe be maria hangu hambirimi.\x + \xo 2.16 \xt Hag 1.6, 1.10-11, Seg 8.10-12\x*  
\v 17 I̱na puyabu poboyogobi mbira ibilalu mabuha tomo mo ko holene tara tarabi ibilalu biru. Ani bialu dalu dindiguni heba ibilarugola mabuha tomo hengemigo damene bibahende mo ko hai haya. Ani birugo hondowa tígua mini beregeda nabirimigoni.  
\v 18 Áyu ogoni ege dininaga horo pira kirani maria (24) hayagola i̱naga anda bule dindi mo tiga bialu gene mo manda manda bu wirimigoni. Ani birimigome ai áyu ogoni howa agi birabe hondole bayuwa de hondo halimu.  
\v 19 Heneneore tomo wiaga anda timbuni bu heledamigoha tomo nabuwibi pu mbira lini daga mini \w gerebirubi\w* ira lini maru pogerubi pomegaranederubi oliberubi bibahendeore lini nade dege hai ka. Ani bidagoyu tí biamogo bulenaga i̱na áyu howa bialu holebero, lalu Anduane Homogohanda lene.   
\s1 Anduane Homogohanda lalu, Serubabele mini lene helolebero, lenego ogo  
\p
\v 20 Horo ogoningi dege Anduane Homogohanda bi halu mende Hagaihondo lamini.  
\v 21 Anduane Homogo ibugua lalu, Yuda wali agalinaga agali haguane Serubabelehondo lamialu, I̱na mbirale bibahende dindiha ngarubi hariha karubi bibahende mo emabia hai holebero.  
\v 22 I̱na kini bu karunaga hongo bope hai harogola tinaga hongo holene mbira nawulebira. Tinaga wai biaga garo ale nogo hosime gililo yalu piaga karisi ngarubi tinaga ami agali karisini heyu howa wai bu piaga karubi bibahende bo haealabaga biai holebero. Ani bialu tinaga nogo hosi karu bo wahai harogola ami agali nogo hosini biralu wai bu piaga karume tini dege dege homelo baga baga bulebira.  
\v 23 Anidagua birangi i̱na i̱naga biabe bia haga agali Serubabele í̠ dabalu i̱ninaga agaliore mbira í̠ howa i̱naga wali agaliru haru haga habelo dabo helolebero. I̱na í̠ hangu dabo helarogola í̠ i̱naga gi hondoneni gi magi ale holebere. I̱ Anduane Homogo Hongo Haiheore kogo i̱na bi o ledogoniore, lalu Anduane Homogohanda Hagaiha howa lene.