\id HAB - Huli Bible [hui] -Papua New Guinea 2011 (web version -2013 bd) 
\h HABAGUGU 
\toc1 Habagugu 
\toc2 Habagugu 
\toc3 Hab 
\mt1 Habagugu  
\imt1 Mbuga ogoniha gilibu ngarunaga nemandi ogo  
\ip Bi mana \w latagi\w* haga Habagugu ibugua Anduane Homogonaga mana lalu henedagoni Babilonoali ti hongoheore heangi lalu hene. Babilono wali agali tigua Isaraele wali agaliruhondo mana koore bialu maru bo wahaga bigi biyago hondowa Habagugu ibugua genda timbuniore howa Anduane Homogohondo lalu,  
\ip – wali agali ko timbuni biaga karume mana bayale biaga karu bo wahelo henge muwa í̠ handa tara ho kego aginaga kebe, lene. 1.13b  
\ip Habagugu ibugua Anduane Homogohondo bi ogoni hale henedagoni bambaore hale hene. Anduane Homogo ibu bi ogoni hale howa dege horo mbiru ibuni pongo bo winiangi lola helo mana ko birago mo tiga buliya lo manda bu hene. Ibugua bi ladai binigo ogo.  
\ip Wali agali mini tigabiwi Anduane Homogohondo mini mbiraore wu karu ti haabo holebira, lalu gilibu nga. 2.4b  
\ip Bi bibahende lo wiaruagoni wali agali mana ko biaga karunaga ko ogobi anda ibulebira lalu lo nga. La maro bialu iba gana mbira lenego ogodagua lo nga. Anduane Homogo nahendene ale biaga hongohe gibi kagonaga mini yaraga halubi Habagugu ibunaga mini mbiraore ogobi ngo lalubi walia ho nga.  
\iot Bu̱lu̱ baga buwa kuni gilibu ngago (1.1–2.4)  
\io1 Habaguguhanda Anduane Homogohondo lai lalu maru hale hayagola Anduane Homogo ibugua bi ladai binigo \ior 2.5-20\ior*  
\io1 Mana ko biaga hearuha ko anda ibulebira lenego \ior 3.1-19\ior*  
\io1 Habaguguhanda Anduane Homogohondo bi lenego  
\c 1  
\p
\v 1 Anduane Homogohanda ibunaga bi mana \w latagi\w* haga Habaguguhondo mana walia halu bi laminigo ogo.   
\s1 Habaguguhanda genda ho howa Anduane Homogohondo bi lenego ogo  
\p
\v 2 Habaguguhanda lalu, Anduane Homogo-o í̠ biamogo bibelonaga olaabo harugo i̱na agira halu lone ololiyadabe. Ko biaga karume ina bo waholilono í̠hondo biamogo bia lalu dugu bialu agira halu ololiyadabe.  
\v 3 Mana tigatiga ndo o biragoni agi bulenaga i̱ deni mo ngeledebe. Mana tigatiga ndo urunibi biragola í̠na handayaho kegoni mbira bia nabi aginaga handayaho kebe. I̱ kogoria howa handalu koria wali agali mo ko holenebi tinaga mbirale ngago mo ko holenebi lai lalu bagabaga bulenebi wiame kane hendedo.  
\v 4 \w Mana\w* lo wini ngago hongo nahe gedaore halu mana tigabi bulene wiagoria bia nabi wahaga biya. Wali agali ko biagame mana lo winigo dabaga hearu mo yo handalu wali agali bayale biaga karu hengedope halu mana biagoni tini hame ledago hangu bule mo beregedo nga, lalu lamini.   
\s1 Anduane Homogohanda bi ladai binigo ogo  
\p
\v 5 Bi ogoni hale howa Anduane Homogohanda ibunaga wali agaliruhondo lalu, Wali agali dindi maru tí kamiruha palia mabu bidaru bayuwa de handaya halimu. Handayaho kamiria i̱na tihondo mbirale mbira berogola tígua ogoni hale halu mogo timbuni loleberami.\x + \xo 1.5 \xt Ab 13.41\x*  
\v 6 I̱na Babilono wali agali hongo gibihe karuhondo hongo mia tago holebero. Dindi tara tara karulole tigua wai hanalu tagira pora.\x + \xo 1.6 \xt 2 Kin 24.2\x*  
\v 7 Wali agali dindi tara tarani karume ti de hondowa gi timbuniore haga. Ani biradagome mana lo ngago mitangi nabi mine tara halu tininaga hame ledago biaga ka, lalu lene.   
\p
\v 8 Ibugua laabo halu lalu, Tinaga wai biagane hosime gerai budi gabua ale timbuni mini lebadime lagadagua ndo bolangua hai howa gerai gibiore laga ka. Biango tara dudu aleme garibi lo howa biaganego emene lowa tinaga wai biagane hosime wai tandagabiore biaga ka. Agali hosini biralu ibiradaruni dindi ona kawareni howa ndo ibaga. Hosi urunime poa halu tinaga gi gindibame dindi godalu haga. Tinaga hosi ega bodo hariaweme mbirale balu nole ibira hagadagua ti abaleore bo ibaga.   
\p
\v 9 Babilononaga ami agali ti mini mende nawi dindi ti karulalu wali agalibi minu ibiragola wali agalirume gi timbuniore ho haga. Tigua wali agali abale balu minu garabaya binidaruni dagalabe nahe ibani iba mu wiraligobi ka.  
\v 10 Tigua dindi uruninaga kiniru hondo yo handalu kininaga agali haguane karubi hondo oba haga kagoni. Ege to̱le̱ wai pabe wedaruni dindi alu yu tono buwa togo wialu bagane agali ibaga.  
\v 11 Agali ko uruni tinaga hongo timbuni kama lalu hongo ogoni mo dunini howa balagala hagaruni tigua wai biraha gialope halu puyabu poradagua puabo holebira, lalu lene.   
\s1 Habaguguhanda genda ho howa Anduane Homogohondo bi halu mende lenego ogo  
\p
\v 12 Habaguguhanda lalu, Anduane Homogo-o í̠ Ngode Datagaliwabe haabo henego kegoni. Í̠ i̱naga Ngode Datagaliwabe baya burugule haluhe haabobo henego kegoni. Anduane Homogo i̱naga bi Ngode Datagaliwabebi i̱naga humbibi kego howa í̠na Babilonoali hearu dabowa iname ko birimagonaga tigua ina belo hongo mialu dabariya.  
\v 13 Anigo Babilonoali uruni agali ko ke̱ hagabi mana ko timbuni biagabi biaru ti í̠naga biabe ogoni bilo dabaribe. Í̠naga deme ko ngago nahandaga howa wali agalime ko biraruhondo handa tara haga harigo howa dege wali agali ko timbuni biaga karume mana bayale biaga karu bo wahelo henge muwa í̠ handa tara ho kego aginaga kebe.\x + \xo 1.13 \xt Iba 5.5, Yar 12.1\x*   
\p
\v 14 Wena ibaha puíbu biaga bedaru alebi honabi mone dewaore wabuni piaga bedaru alebi hondo haga nahe hagadagua wali agali ogonibi ka mitangi bu kego aginagabe.  
\v 15 Babilonoalirume wali agali wena pume baradagua bialu nume daba howa minagadagua minalu buwa turu timbuni halu mambolo bama ibaga.  
\v 16 Tigua wena nume wena dewa minu ya heneyago lalubi nu o biarunime ti mo homogo ho haga lalubi ka. Ani laga karume wena nu mo dunini halu urunihondo bi pupu wiaga ka.   
\p
\v 17 Tigua tinaga wai biagane ayu tibu ne gadelehe ngago yuwa wali agali tara tara paluyu pedaru dara nahe howa bame bo paya bialu haabo helo heloleberebe, lalu Habaguguhanda Anduane Homogohondo ani lene.   
\c 2  
\p
\v 1 Anduane Homogohondo i̱na genda ho howa bi lamirugoni ibugua agi ladai birabe hondolebi mani bi agi loliyanaga langirabe hondolebi i̱na i̱naga mamage holenaga anda mbira luni daliga bu kagoria iraga howa hondo harogoni.\fig ... i̱na i̱naga mamage holenaga anda mbira luni daliga bu kagoria iraga howa hondo harogoni.|src="Lear 074.tif" size="2" ref="(2.1)" \fig*   
\s1 Anduane Homogohanda Habaguguhondo bi halu mende ladai binigo ogo  
\p
\v 2 Anduane Homogo ibugua ladai bialu lalu, Manane í̠hondo walia hole kogo í̠na dindi dongoma mbaraleni bayuwaore gilibu ngelabe. Dagalaragome hai nabi abale dagalelo wále tigatiga gilibu ngelabe.  
\v 3 Áyu ogoni ndo awe lola holebiragonaga manda buwa gilibu ngelabe. Anigoyu horo langeroru bulubadagoni abale ibalu walia harogo damene bibahende larodagua lola hai holebira. Hendore bigi bini mbau lolebiragoyu mbira pugu wanahe biaiore holebira.\x + \xo 2.3 \xt Hi 10.37\x*  
\v 4 Bi o larogo gilibu wia. Ko biaga karu yo pialu napolebira. Anigo wali agali mini tigabiwi Anduane Homogohondo mini mbiraore wu karu ti haabo holebira, lalu, Bi kira ogoni gilibu wia, lene.\x + \xo 2.4 \xt Lm 1.17, Ga 3.11, Hi 10.38\x*   
\s1 Ko biagaru kagoria ko anda ibulebira lenego ogo  
\p
\v 5 Homogorume dewaore wulenaga ke̱ halu miaga ka. Agali urunime dimagoli halu mine howa tini hangu mitangi bialu homogo hole hai hangu bialu kane homa ibugua harula nalagadagua tigua homogo timbuniore hole hame dege laga ka. Babilonoali uruni ti ogonidagua biaga karume wali agali tara tara paluyu pedarunaga dindi ngaru karulama puabo haga ka.  
\v 6 Dindi karulenegonaga wali agali karume ti handaya ho haga karuhondo mo yo hondowa mege bialu bi ogobi lolebira. Tigua agali ko biagaruhondo lalu, Tíninaga wini ndo mendealinaga winiru page biaga kamiru ko timbuni tí kamigoria tagira ibulebira. Tí dano ho hene karuhondo hongo howa ngiadai bialu ngia tago halu ngidaba laabo halu tíni ke̱ howa mali agira halu mo homogo ho holeberamibe, lolebira.   
\p
\v 7 Tí ala dano ho harimirume ti abaleore wayali ha aribia holebira. Ani wayali howa dano aribia halu danoali biaru tigua tíhondo abaleore yadai bialu ngia tago hadaba, lolebira. Tínaga waitigiru abaleore ibuwa ti mo mogola howa tínaga mbirale wirimiru heba mo yalu piai holebira.  
\v 8 Wali agali dindi tara tarani paluyu pedaru tinaga mbirale wiaru tí karulai halu wali agali ogoriani hearubi bo wahai halu tano wiarubi bo haealo bagabu wahai harimi. Ani birimigoyu wali agali ogoningi yu wahene biarume tíbi balu mbirale wirimidaruni ti karulalu mo yalu piai holebira.   
\p
\v 9 Ko timbuni tí kamigoria tagira ibulebira. Agali maru homelo bo wahalu mbirale dewaore page bialu mini wirimirume tínaga dameneru mo homogo ho heledami. Ani bu heledamigo tí kamigoria ko mbira anda ibulani hondowa tí bayaore awadaga holenaga andarubi hagirarubi hongoheore bu heledamigoni.  
\v 10 Anigo tígua koorene ko urunibi birimigome taga gibi holene tínaga dameneru heagoha yu anda ibirimi. Wali agali dindi tara tarani paluyu pearu bo mburi lalu birimigome tínibi nde bo mburi lolebira.  
\v 11 Anda hongo timbuniore helo anda hai pabe ege to̱le̱me bima irigi harimi. Ege to̱le̱ pabe birimirume, Tí koore bialu harimi, lalu anda dabira karumebi ani dege lambare bulebira.   
\p
\v 12 Ko timbuni tí kamigoria tagira ibulebira. Tagira ibulubadago irane tígua tano timbuni bulenaga wali agali garabaya biabe ale bilalu dewa homayagonaga daramani bialu harimi. Tínaga tano hongohe helo mana ko timbuni birimigome tano ogoni bu helarimi.  
\v 13 Dindi tara tara karularimigo wali agali hearume tínaga garabaya biabe ale bia hayago biabe ogoni nagalone holebira. Tígua bibahende biyaruni hagua hungula bialu do mundu lai holebira. Anduane Homogo Hongo Haiheore kagome ani bulebira.  
\v 14 Iba solowara to̱lo tagi howa birame kadagua wali agali dindi bibahendeni karume Anduane Homogonaga mini daliga taraore ngagobi ibu hongo gibiorehe kagobi wali agali bibahendeme manda biai holebira.\x + \xo 2.14 \xt Iba 22.27, Ais 11.9, Seg 14.8-9\x*   
\p
\v 15 Ko timbuniore tí kamigoria tagira ibulebira. Hameigini tara tara kaware bu hearu tihondo lembo timbuni howa mo ko halu ogodagua birimi. Tígua wali agalime \w waini\w* iba mo na howa lulu yu halu agaru golo wahowa taga nahe hagadagua tínibi ogonibi dege howa handaya ho harimi.\x + \xo 2.15 \xt Pig 9.22, Hos 7.5\x*  
\v 16 Ogonidagua dege Anduane Homogohanda tíbi taga halimulo mini lene timbuni kamiruni bame halu mo dindiha haragola tínibi pani nalu taga ho holeberami. Taga holene ogonime tí ala mini lene harimigo mo wahalu tí mo dindiha helolebira.  
\v 17 Tígua Lebanono dindini irabu timbuni wiaru dibu ibira harimidagua Anduane Homogo ibugua tíbi nde dibu ibira helolebira. Nogo gabua tara tara irabu ogoniha ibaga bialu piaga biaru barimi. Ani barimigo nogo uruni ariame tí halu mbira mo gi̱la halu bolebira. Uruni bulubadaruni irane tígua wali agali dewaore dindi bibahendeni hearubi bo wahaga bialu tanobi mo ko harimigome ko ogonibi tí kamigoria tagira ibulebira.   
\p
\v 18 Tígua tínaga dama lowa gime wabinigome mbirale mbira agi biagabe. Bame agali gime wabini ogonime mbirale mbira nabiaga. Mbirale gime wabini bi nalaga ogonibime wabiagane kego í̠ biamogo agua bulebirabe.  
\v 19 Ko timbuni tí kamigoria tagira ibulebira. Ira gombedo minibi to̱le̱ gaibu mini ngaruhondobi hale holebada lowa bi hongo howa lalu, Heya, laga kami. Mbirale irame wabini ngarume, Galone ngaruni ogo ale nga, lalu tí walia hagabe. Ngolomebi silibamebi yári biaho berelagago ogoniha holenenaga buhe nawiaga ndobe.   
\p
\v 20 Anigo Anduane Homogo ibu ogonibi ndo ka. Ibu ibuninaga anda loma bia henegoha kago wali agali dindi bibahendeni kamirume ibu kagoria howa ema nabi bi nale halimu, lalu Anduane Homogohanda Habaguguhondo lamini.\x + \xo 2.20 \xt Seg 2.13\x*   
\c 3  
\s1 Habaguguhanda iba gana lalu Anduane Homogohondo bi lenego ogo  
\p
\v 1 Bi mana \w latagi\w* haga Habaguguhanda Anduane Homogohondo bi lalu iba gana lole howa ngida ale balu lenego ogo.   
\q1
\v 2 Anduane Homogo-o í̠na bini layaru hale howa\x + \xo 3.2 \xt Yob 42.5-6, Iba 44.1, 119.120, Yar 10.7\x*  
\q1 í̠ timbuni gibi taraore ke manda buwa i̱na bi agi ale loabe toba ho ko.  
\q1 Bamba í̠na biabe hongohe tara tara bialu hariru áyu ina kamangi biabe urunibi lone bibe.  
\q1 Inahondo keba holene irane ngagoyu ai í̠na dara halu biamogo bibe.   
\b  
\q1
\v 3 Ngode Datagaliwabe ibu Idomo dindihayagi howa lone ibira.  
\q1 Ibu baya buruguleore howa Parananaga dindi hombene hombene ngaruha howa ibira.  
\q1 Ibunaga wá holene timbuniore hari daligaha dungame halu  
\q1 ibunaga mana baya buruguleore buleneme dindini mbirale bibahende ngarumebi karumebi ibunaga mini yaraga haralo handabeheore nga.   
\q1
\v 4 Ibunaga wá holene egerebagi ni tagira ibiraligobi howa  
\q1 ngiringarame ibunaga gi hongo ya do kagoha howa tagira ibaga.   
\q1
\v 5 Ibugua warago tara tararu ala bambaha lalu homa í̠na maha talima ibabe laga.   
\q1
\v 6 Ibu hondo kagola dindi dumbirumbi bialu  
\q1 ibugua emene de leneme hangu handaragola wali agali dindini karu bibahende duru lai haga.  
\q1 Hari haabo hole mbaule wedaruni podobaga bialu  
\q1 dindi hombene bambaore wini o ngaruni ibuni ibalu penego áyu ogoni dindiha anda pu bereba helolebira.   
\b  
\q1
\v 7 Kusana dindini wali agali hearuni giho hearia handaru.  
\q1 Midiana dindini wali agalibi gi howa durulo heane handaru.   
\q1
\v 8 Anduane Homogo-o í̠na puyabu ibilalu  
\q1 puyabume iba porarubi iba solowarabi hongo howa mo yaribu bia helarigoni.  
\q1 Ani birigoni iba urunihondo keba howa biribe.  
\q1 Beraliba porarunaga biru yalu piaga harigo kegoni.  
\q1 Í̠naga wali agali karunaga wai bia hole howa iba dalu timbuni ibule  
\q1 beraliba mindibi ngarunaga mo garo ale mini karisi bu hinalu ibuwa  
\q1 í̠naga wali agali mo wayali helariligoni.   
\q1
\v 9 Í̠na danda yamuwa timurume bogole manda manda buwa harigoni.  
\q1 Í̠naga timu hari dabaha howa ibiyagola dindi gaibu baga buwa  
\q1 iba timbuniru uruniha pelo mo ibira harigoni.   
\q1
\v 10 Hari timbuni wedarume í̠ hondowa duru lalu mogo timbuni lowa  
\q1 iba timbuni hariha howa dalidali biyagoni.  
\q1 Iba dindiha berearumebi tula lalu hegene damindini bo laya.   
\q1
\v 11 Í̠naga timuru ala pugupugu buwa hari daba ale piyaru handalubi  
\q1 í̠naga yandare didone piyago handalubi  
\q1 ni egela libu ema nabi hondo hene.   
\q1
\v 12 Í̠na dindi bibahendeni hearu baba lembo timbuni howa  
\q1 ami wai bule poradagua pialu  
\q1 wali agali í̠na dindi tara tarani hearu hengedo paya bu hari.   
\q1
\v 13 Anidagua birigome í̠ninaga wali agalibi  
\q1 kini í̠na dabenegobi heba pele mialu biamogo biri.  
\q1 Mini kowi hearunaga haru haga koore timbuni biaga heagobi ibunaga talima piaga hearubi bo hilo bagabu wahari.   
\q1
\v 14 Puyabu hongo howa ibagadagua ami agali haguaneme ibuninaga ami haru halu ibuwa ina balu purogo lelole ibalu hearia  
\q1 í̠na ibuninaga yandare yiniyago yamuwa emboneni yandare harigoni.  
\q1 Tigua mine halu ina mo ko howa balu bo purogo lelole hearia í̠na ani biri.   
\q1
\v 15 Í̠na iba solowarani nogo hosirunaga biru yalu pirigola  
\q1 iba mbolia baragaraga biya.   
\b  
\q1
\v 16 I̱na bi uruni hale howa mogo timbuni lo ko.  
\q1 Ani buwa bi hai bialu ne hambu duru lalu  
\q1 i̱naga dongone gimbu binihayagi homowa amburi biyagola  
\q1 ge ibubi nira duru lalu ka.  
\b  
\q1 Ngode Datagaliwabe ibunaga horo harangi inahondo ko biraru ibugua ti pani mialu belo  
\q1 i̱ ema nabi hendore hondo holebero.   
\b  
\q1
\v 17 Pogeru lini da nabiyaguabi  
\q1 Pu mbira mini \w gerebi\w* lini nade hayaguabi  
\q1 Ira mini olibe lini ko hai hayaguabi  
\q1 Mabuni tomo bibahende gau lai hayaguabi  
\q1 Nogo sibiru homai hayaguabi  
\q1 Nogo bulumagaru nahe tinaga anda bame tabuanda hayaguabi   
\q1
\v 18 Uruni bibahende ani biyaguabi waha i̱ turu halu holebero.\x + \xo 3.18 \xt Yob 13.15, Ais 41.16\x*  
\q1 Irane i̱naga Anduane Homogo Ngode Datagaliwabe ibugua i̱ pele ngiaga ka manda buwa turu halu holebero.   
\q1
\v 19 Anduane Homogo Bibahende Haru Ho Haame Haga kago\x + \xo 3.19 \xt 2 Sml 22.34, Iba 18.33\x*  
\q1 ibugua i̱ hongo ngiaga.  
\q1 Ibugua nogo tara mini dia ge hongoheme hagadagua i̱ mo heleda.  
\q1 Ani bialu dindi hari daliga neneni pialu koria  
\q1 ibugua i̱ pi naloliya haru haga ka,  
\m lalu Habuguguhanda bi ogoni Anduane Homogohondo lai hene.