\id EZR - Huli Bible [hui] -Papua New Guinea 2011 (web version -2013 bd) 
\h ESERA 
\toc1 Esera 
\toc2 Esera 
\toc3 Esr 
\mt1 Esera  
\imt1 Mbuga ogoha gilibu ngarunaga nemandi ogo  
\ip Habo Nalolene Bi Bamba lo winigo gili binirume mbuga Bi Te Mendegobi Eserabi mbuga mbiraoreha ngelene. Bi Te mendego bi lo gombedaha hayagoria Esera ibugua lo yamialu lo gombedaha hayago Nehemaia ibugua lo yamiradagua bu wini.  
\iot Esera ibugua te lo ngagoni irane tebira uru nga.  
\io1 Mbira  
\io1 Pesia dindi handame haga Kini Sairusi ibugua Babilono howa Yarusaleme dindini dai bidaba layagola Yu wali agali tini dai binigo te lo nga.  
\io1 Mende  
\io1 Anduane Homogonaga anda bia dai buwa Ngode Datagaliwabehondo loma bia howa ibunaga mini Yarusaleme dindini howa yaraga haga winiyadagua yaraga halu hene.  
\io1 Tebone  
\io1 Mali dewaore peagola Esera ibugua Ngode Datagaliwabe mana lo ngago mandabiore howa handame haga kinime dabo helenego ibugua Yu wali agali maru haru halu Yarusaleme dai bini. Ani buwa tininaga mana manda bialu Ngode Datagaliwabenaga mana lowinigo bayuwa manda bilo lawai haga hene.  
\iot Bu̱lu̱ baga buwa kuni gilibu ngago (1.1–2.70)  
\io1 Babilononi garabaya howa pigane Yarusaleme dai binigo te lo nga. \ior 3.1–6.22\ior*  
\io1 Anduane Homogonaga anda biadai bialu Ngode Datagaliwabehondo lomabia hene. \ior 7.1–10.44\ior*  
\io1 Esera ibu wali agali maru baba garabaya howa dai bini.  
\c 1  
\s1 Kini Sairusihanda, Yuda wali agali tí Isaraele dindi dai bidaba, lenego ogo  
\p
\v 1 Pesianaga handame haga Kini Sairusi ibu hearia mali mbira peagola Anduane Homogo ibugua bulebero lalu Ngode Datagaliwabe mana \w latagi\w* haga Yaremaiaha howa lo winiyadagua lola hene. Anduane Homogo ibugua Kini Sairusinaga miniha howa bi ogobi gili bibe lalu mo walia hayago wali agali dindi bibahende kini ibugua hondo heagoria hongo howa lo pela layadagua lo pelene. Ani layagola ibugua bi lo pelene uru.\x + \xo 1.1 \xt Yar 25.11, 29.10\x*   
\pi1
\v 2 Pesianaga handame haga Kini Sairusihanda wali agali tígua bilimulo bi mbira laro. Anduane Homogo dahuliya andaganaga Ngode Datagaliwabe ibugua i̱na dindi bibahende handa gimbu buliya i̱hondo hongo ngiya. Ani bialu ibugua i̱hondo anda mbira Yuda dindiha Yarusalemeni bibe laya.\x + \xo 1.2 \xt Ais 44.28\x*  
\v 3 Ngode Datagaliwabe ibuninaga wali agali tí heba mandagi helo hame ledo. Tígua Yarusaleme dindini dai buwa Anduane Homogo Isaraelenaga Ngode Datagaliwabe kagonaga anda biadai bule poleberemi. Ngode Datagaliwabe ogoni ibunaga mini Yarusalemeni yaraga halu lotu lolene nga.  
\v 4 Ibunaga wali agali maru dai bilo mbirale tumagi kayagua tinaga nenegeme silibabi ngolobi maru nayi aleru milimu. Mbirale yalu pelo nogo hosibi dongibi milimu. Ani buwa Anduane Homogonaga andaha Ngode Datagaliwabehondo mbiraleru loma bia howa Yarusalemeni wilobi milimu, lalu bi lo pelene.   
\p
\v 5 Ani layagola agali haguane maru Yuda hameigini howabi maru Beniyamini hameigini howabi \w loma\w* binigo mo miaga hearubi \w Libaiali\w* hearubi wali agali maru Ngode Datagaliwabe ibunime tini gubaliniha hangu hangu elahaga bigi biyarubi tigua Anduane Homogonaga anda biago biadai bule pole manda manda bini.  
\v 6 Tinaga nenege hearume dabudabu dewa mialu biamogo bini. Ndisi silibame wabinirubi ngolobi tomo nolenebi dawalenebi dabudabu yalu pelo hosi dongibi maru maru dewa mini. Anduane Homogonaga andaha mbirale tara tara Ngode Datagaliwabenaga loma biaho wilobi mia dege bini.   
\p
\v 7 Kini Sairusi ibugua ndisi bebi gabo bebi Kini Nebugadenesahanda Yarusalemeni Anduane Homogonaga andaha wiaria ibunaga dama andaha wule mo yalu piyaru yadai bini.  
\v 8 Ibugua uruni muwa kininaga muni handaya ho haganaga haguane Mideredahondo mini. Ibugua ilumogo bialu bebani mo tiga bu howa Yuda gabumane haru haga heago Sesebasahondo mini. Ogodagua mini.   
\p
\v 9-10 Ndisi be ngolome wabiniru daga pira tebira (30).  
\m Ndisi be silibame wabiniru daga daosini mbira (1,000).  
\m Ndisi be tara ale maru winiru daga pira kirani dira (29).  
\m Ndisi be ngolome wabini emene dameneru daga pira tebira (30).  
\m Ndisi be silibame wabini emene dameneru daga handari mariani pira mbira (410).  
\m Tomo naganebi dawaganebi daga daosini mbira (1,000).   
\p
\v 11 Ngolome wabiniru silibame wabiniru maru tara tara wiaru heba bibahende daga lamaga howa daosini duriani handari maria (5,400) mini. Urunidagua ilumogo buwa miya handala Sesebasabi Babilono howa garabaya henerubi ti mandagi uruni mo yalu Yasusaleme dai bini.   
\c 2  
\s1 Isaraele wali agali garabaya howa golalu Yarusaleme dai binigo ogo  
\p
\v 1 Isaraele wali agali dewaore Babilono dindi yu wahalu tini dalu Yarusalemehabi Yuda dindi maru wiaruhabi hole dai bini. Bambaore Kini Nebugadanesa heangi ibugua wai bialu Yuda wali agali garabaya bu yalu Babilono penego ogoniha ti haabo hene.  
\v 2 Yudali agali haguane minu yalu penedaruni maru Serubabele Yosua Nehemaia imaru Seraia Lelaia Modegai imaru Bilisana Misiba Bigibai imaru Lehumu Bana imaru pu hene.  
\p Ani howa Isaraele wali agali garabaya pu henego golalu Yarusaleme dai biniru hameigini mbira mbiranaga daga ogodagua.   
\m
\v 3-20 Paroso aria daosini kirani handari mbirani pira kariani kira (2,172) hene.  
\m Sebadia aria handari tebirani pira kariani kira (372) hene.  
\m Ara aria handari kariani pira kariani duria (775) hene.  
\m Yasua Yoabala aguanene Pahadamoaba aria daosini kirani handari halirani pira mbirani kira (2,812) hene.  
\m Elama aria daosini mbirani handari kirani pira duriani maria (1,254) hene.  
\m Sadu aria handari dirani pira mariani duria (945) hene.  
\m Sagai aria handari kariani pira waragaria (760) hene.  
\m Bani aria handari waragariani pira mariani kira (642) hene.  
\m Bebai aria handari waragariani pira kirani tebira (623) hene.  
\m Asagada aria daosini mbirani handari kirani pira kirani kira (1,222) hene.  
\m Adonigama aria handari waragariani pira waragariani waragaria (666) hene.  
\m Bigibai aria daosini kirani pira duriani waragaria (2,056) hene.  
\m Adini aria handari mariani pira duriani maria (454) hene.  
\m Ade (ibu mini mende Hesegaia) aria pira dirani halira (98) hene.  
\m Besai aria handari tebirani pira kirani tebira (323) hene.  
\m Yora aria handari mbirani pira mbirani kira (112) hene.  
\m Hasama aria handari kirani pira kirani tebira (223) hene.  
\m Giba aria pira dirani duria (95) hene.   
\m
\v 21-35 Yuda wali agali o dai biyadaruni tinaga mamalinaga tano mini uru wigi binigoha dai bialu haga haga bini.  
\m Bedelehemeha handari mbirani pira kirani tebira (123).  
\m Nedobaha pira duriani waragaria (56).  
\m Anadodoha handari mbirani pira kirani halira (128).  
\m Asamabedeha pira mariani kira (42).  
\m Kiriada Yarimihabi Kebirahabi Berodohabi handari kariani pira mariani tebira (743).  
\m Lamahabi Gebahabi handari waragariani pira kirani mbira (621).  
\m Migimasaha handari mbirani pira kirani kira (122).  
\m Bedelehabi Aihabi handari kirani pira kirani tebira (223).  
\m Nebeha pira duriani kira (52).  
\m Magabisiha handari mbirani pira duriani waragaria (156).  
\m Elama mendeha daosini mbirani handari kirani pira duriani maria (1,254).  
\m Harimiha handari tebirani pira kira (320).  
\m Lodohabi Hadidihabi Onohabi handari kariani pira kirani duria (725).  
\m Yarigoha handari tebirani pira mariani duria (345).  
\m Senaha daosini tebirani handari waragariani pira tebira (3,630).  
\m Tano uruniha ti daibu haga haga bini.   
\p
\v 36-39 \w Loma\w* binigo mo miaga agali Yarusalemeni daibu henedaru tinaga minibi dagabi ogodagua.  
\m Yasua aguane Yadaia aria handari dirani pira kariani tebira (973) hene.  
\m Ime aria daosini mbirani pira duriani kira (1,052) hene.  
\m Pasahuru aria daosini mbirani handari kirani pira mariani karia (1,247) hene.  
\m Harimi aria daosini mbirani pira mbirani karia (1,017) hene.   
\p
\v 40-42 \w Libai\w* hameigini Yarusaleme daibu heneru minibi dagabi ogodagua  
\m Hodabia aguane Yasua Kadamielela aria pira kariani maria (74) hene.  
\m Anduane Homogonaga andaha iba gana laga biaga heneru Asaba aria handari mbirani pira kirani halira (128) hene.  
\m Anduane Homogonaga andaha mamage haga heneru Salumu ariabi Ade ariabi Talamono ariabi Agubu ariabi Hadida ariabi Sobai ariabi handari mbirani pira tebirani dira (139) hene.   
\p
\v 43-54 Garabaya howa golalu dai binidaruni Anduane Homogonaga andaha biabe bialu haga agali urunaga aguane dai binigo uru.  
\m Siha Hasuba Tabaodo  
\m Keroso Siaha Padono  
\m Lebana Hagabaha Agubu  
\m Hagaba Samalai Hanana  
\m Gidele Gaha Leaia  
\m Lesini Negoda Gasama  
\m Usa Pasea Besai  
\m Asana Meunimi Nebisimi  
\m Bagabugu Haguba Hahu  
\m Basaludu Mehida Harasa  
\m Bagoso Sisera Tema  
\m Nesia Hadiba uruni aguaneneru daibu ha dege bini.   
\m
\v 55-57 Solomononaga biabe biahaga aria henerunaga aguanene garabaya golalu tini daluha daibu henedaru uru.  
\m Sodai Hasoberede Peruda  
\m Yala Dagono Gidele  
\m Sebadia Hadili Pogerede  
\m Hasebaimi Amila uruni aguaneneru haga bini.   
\p
\v 58 Anduane Homogonaga andaha agali biabe biaga aguanene henerubi Solomononaga biabe biahaga aguanene henerubi bibahende garabaya golalu dai buwa henego dagalamaga howa handari tebirani pira dirani kira (392) tini daluni dai bu hene.   
\p
\v 59-60 Ani howa Delaia hameigini Tobia hameigini Negoda hameiginiru ti bibahende dagalamaga halu handari waragariani pira duriani kira (652) hene. Ti bibahende Telemela tanohabi Teleharasa tanohabi Kerubu tanohabi Adana tanohabi Ime tanohabi tano uruniha howa daibu hene. Ani daibu howa agali hameigini uruni ti tininaga mamali hama ibinigo Isaraele hameigini henedaru aria mbirago mini labe nahe howa ti Isaraele aria kamabe tara kamabe toba howa dege hene.   
\p
\v 61 Loma binigo mo miaga agali maru heneru tigua ti mamalirunaga mini mbugaha agua ngabe hondole tai bialu hearia tinaga minigo mbira wiaria handa walia nahe dege hene. Agali mini taibu wahenedaru tinaga mini uru. Hobaiabi Hagosobi Basilai imaru hene.\f + \fr 2.61 \ft Bamba Basilai ogoni ibugua wali mbira Gileada tanoali mini Basilai mende henego wane bereago dabu bini. Ani buwa ibugua ibu imane Basilai ogoni tinaga mamali lowa hama ibini.\f*  
\v 62 Loma binigo mo miaga agali uruni tinaga mamali heneru mini nawiyago hondowa agali haguane henerume ti loma binigo mo miaga nahelo lene.\x + \xo 2.62 \xt Dag 16.39-40\x*  
\v 63 Ani heagola Yuda agali gabumane agali haguane heagome lalu, Agali uruni ti wali agalime Anduane Homogohondo tomo lomabu mini ngaru nanelo, lalu bi lowini. Agali haguane ogoni ibugua lalu, Loma binigo mo miaga agali haguane mbira íbu kangi ibugua Anduane Homogonaga hame ngago hale hole halaga biaga ege to̱le̱ kira mini Urimu Tumimula ngagoha howa hale helo. Ani hale howa ibugua agali uruni tigua loma binigo mo miaga holene nga layagua nde tigua biabe ogoni bialu helo. Ai nabilo layagua nde wahelo, lene.\f + \fr 2.63 \ft Urimu Tumimula bi ogolabo irane mbuga Haru Tagira Penego 28.30 handabe.\f*\x + \xo 2.63 \xt Dag 27.21\x*   
\m
\v 64-67 Isaraele wali agali garabaya golalu dai binidaruni bibahende daga lamaga halu daosini dege pira mariani kira halu handari tebirani pira waragaria (42,360) tini daluni daibu hene.  
\m Tinaga biabe biahaga wali agali bibahende daosini dege kariani handari tebirani pira tebirani karia (7,337) haru halu dai bini.  
\m Wali agali iba ganaru lalu ngida balu piliperu pulalu biaga handari kira (200) bibahende daibu hene.  
\m Tinaga nogo hosi handari kariani pira tebirani waragaria (736) haru halu ibini.  
\m Nogo hosi dongilame igini hono winiru mini muele laga handari kirani pira mariani duria (245) haru halu ibini.  
\m Nogo kamele handari mariani pira tebirani duria (435) haru halu ibini.  
\m Nogo dongi daosini dege waragariani handari kariani pira kira (6,720) haru dai bialu ibini.   
\p
\v 68 Ani ibalu Yarusalemeni Anduane Homogonaga anda heagoria anda ibugu bialu howa tini hameigini ibugu biyadagua agali haguane mbira mbirame Anduane Homogonaga anda biago biadai bilonaga turu halu munibi mbirale marubi bame migi bini. Tigua Anduane Homogonaga anda ogoni abale hene biagoria dege biadai bulene manda buwa ani bini.  
\v 69 Ani mialu howa mbirale dewa yu hearume dewa mialu emene yu hearume emene migi bini. Isaraele wali agalime anda ogoni bilonaga ngolo genda magi kilogarama handari duria (500) mialu muni siliba genda magi kilogarama daosini dege kirani handari halira (2,800) mo mogobu mini. Ani mialu loma binigo mo miaga agalime aga karulagane handari mbira (100) mo mialu bini.   
\p
\v 70 Ani bialu Libai hameigini loma binigo mo miaga bu hearubi wali agali marubi ti Yarusalemeha anda ibalu maru tano ogoniha hene. Ti maru emene kawareha pu hene. Wali agali iba ganaru lalu ngida balu pilipe pulalu biaga hearubi mamage haga agali hearubi Anduane Homogonaga andaha biabe biaga hearubi ti bibahende Yarusaleme tano kaware wiaruha haga haga bini. Ani heagola Isaraele wali agali maru ti nde tininaga tano wiyaruha hama pugu pugu bini.\x + \xo 2.70 \xt 1 Bit 9.2, Neh 11.3\x*   
\c 3  
\s1 Ngode Datagaliwabe mitangi bialu lotu lone lalu henego ogo  
\p
\v 1 Ege kane layagola Isaraele wali agali tinaga dindi winiyagoria daibu hene. Ani buwa ti bibahende Yarusaleme dindini ngoai hene.  
\v 2 Ngoai hearia Yahosadaga igini Yosuabi \w loma\w* binigo mo miaga ibu aria hearubi Seadeli igini Serubabelebi ibu hameigini hearubi tigua bo lomabu delolene dabu mbira Isaraelenaga Ngode Datagaliwabehondo nogo tara tara bo loma bia helo wabini. Ani binigo irane Ngode Datagaliwabe ibugua ani bilimu lalu ibunaga agali Mosese heneyangi Mana lo winigoha gilibu winigo nga.\x + \xo 3.2 \xt Har 27.1\x*  
\v 3 Garabaya golalu ibiyarume wali agali dindi ogoriani hearu hondowa gi howa dege tigua nogo tara tara bo lomabu delolene dabu ogoni ala wabu helenenaga gumuni wiagoria dege wabu helene. Ani wabu helowa tigua ogoriani mbirale bo loma bialu delaga winiyadagua lone egerebagi alendobi bo delaabo halu hene.\x + \xo 3.3 \xt Dag 28.1-8\x* \fig Bo lomabu delolene dabu ogoni ala wabu helenenaga gumuni wiagoria dege wabu helene.|src="LEAR 057.tif" size="2" ref="(3.3)" \fig*  
\v 4 \w Anda\w* Nemandaha Palu Holene Horo wiangi tomo turu halu nalimu lalu lo wiadagua tigua ani bule ngoai hene. Ani buwa horo uruningi nogo tara mbira mbira bo lomabu mulene mana lo wiadagua lone loma bigi bialu hene.\x + \xo 3.4 \xt Dag 29.12-38\x*  
\v 5 Ogoni biai howa tigua maru marunaga bo loma bialu delaga winiya ale loma buwa homane hangu hangu delai holenebi Ege Mbira Ngabulo kagonaga horongi loma biagane winiyadaguabi bini. Anduane Homogonaga horo mbira lomabu mule lowa tu wu winiyangi lomabu mini. Mialu Anduane Homogohondo bame turu halu miagarubi tigua yalu ibuwa mia dege bini.\x + \xo 3.5 \xt Dag 28.11–29.39\x*  
\v 6 Tigua Anduane Homogonaga anda gahenge wene bule howa Anduane Homogohondo ala lomabu delagane winiyagoria ege kanegonaga horo mbira layagola ogoriani lomabu delene.   
\s1 Anduane Homogonaga anda biadai bule teninigo ogo  
\p
\v 7 Wali agali tigua to̱le̱ dambu tiga biaga hearuhondobi anda biaga hearuhondobi biabe biyagonaga muni mini. Ani bialu wali agali Taia tanoni hearumebi Saidono tanoni hearumebi ira tamia hongohe Lebanononi dibayaru tihondo miyagola tigua tomo tara tararu ira lini ibaneru olibe lininaga welibi miniya. Ira uruni dibuwa iba solowarani yalu dindi Yobani anda ibule mandabu wini. O binidaruni Pesia handame haga Kini Sairusi ibugua bilimu layagola ani bini.  
\v 8 Yarusaleme dai buwa mali mendegonaga ege mende layagola tigua Anduane Homogonaga anda bule lowa bialu hene. Serubabelebi Yosuabi tinaga damenerubi loma binigo mo miaga hearubi \w Libaiali\w* hearubi wali agali garabaya howa golalu dai bini bibahende hearubi tigua anda biagoni bima lalu mandagi howa bialu hene. Libai agali mali pira kira (20) bolangua hene hearu tigua Anduane Homogonaga anda biago biadai bilo handaya howa ti helene.  
\v 9 Libaiali mbira ibu mini Yasuabi ibu iginirubi ibu damenerubi Kadamielebi ibu igini ti Yuda hameiginirubi tigua anda biyago bilo Libaiali hayaru baba hogimbu buwa handaya ho hene. Libaiali hameigini Henadada heneyarumebi biamogo bialu hene.   
\p
\v 10 Agali biarume dindi mo tiga bialu gene hangayagola loma binigo mo miaga biaru tigua tininaga aga galonengi biagane winiyaru mo karulowa mbelo biguli pu laganeru giha yuwa tini holeneni hagahaga bini. Hameigini Asabalinaga Libai agali heneyaru ti bi ngilingele laga beledi ale winiyaru aria kira dege dege gime yu hene. Tigua Anduane Homogonaga mini yaraga ogodagua halimu lalu Kini Debidi halu heangi henerume lo winiyadagua lalu hene.\x + \xo 3.10 \xt 1 Bit 25.1\x*  
\v 11 Tigua Anduane Homogonaga mini yaraga howa iba gana ogodagua lalu, Anduane Homogo ibu bayaore ka. Ibugua Isaraele wali agalihondo gubalini ho wiaabo ka, lalu hene. Anduane Homogonaga anda biago bule dindi mo tiga bialu gene hangayagonaga turu howa bibahendeme hongo howa ga̱ lalu Anduane Homogonaga mini yaraga halu hene.\x + \xo 3.11 \xt 1 Bit 16.34, 2 Bit 5.13, 7.3, Iba 100.5, 106.1, 107.1, 118.1, 136.1, Yar 33.11\x*  
\v 12 Anda gene hangalu hearia alali loma binigo mo miaga hearubi Libaiali hearubi hameigini hangu hangu haguane hearubi tigua Anduane Homogonaga anda ala hene hendene biago mitangi bialu dugu timbuni bialu heagola maru hearume ti turu howa ga̱ lalu hene.\x + \xo 3.12 \xt Hag 2.3\x*  
\v 13 Ogonibi biyagola dugu biyabe be turu howa ga̱ layabe toba howa tale nabibehe hene. Tale nabibehedagoni ga̱ layagobi dugu biyagobi hongo howa daligaore biyagola udura amura hearume hale hai hene.   
\c 4  
\s1 Isaraelealime Anduane Homogonaga anda biadai nabilonaga waitigime madane binigo ogo  
\p
\v 1 Yuda Beniyaminila hameiginirunaga waitigi bu hearume hale halu hearia Isaraele wali agali Yarusaleme daibu howa tigua Anduane Homogo tinaga Ngode Datagaliwabenaga anda biadai bialu ka layane hale hene.  
\v 2 Ani layago hale howa tigua Serubabelebi Isaraeleali hameigini haguane mbira mbira hearubi hondo puwa tihondo lalu, Inabi nde tí haru mandagi howa Anduane Homogonaga anda bimi̱ya. Inabi nde tínaga Ngode Datagaliwabehondo lotu laga henego kama. Bamba Asirianaga Kini Esaradonohanda ina dindi ogoha hole pudaba layangi howa hama ibinigo iname tínaga Ngode Datagaliwabehondo lomaru bo mialu haga kamagoni, lene.\x + \xo 4.2 \xt 2 Kin 17.24-41\x*   
\p
\v 3 Ani layagola Serubabele Yosuala libuguabi agali haguane bu hearu tiguabi ladai bialu lalu, Tígua Anduane Homogo inanaga Ngode Datagaliwabe kagonaga anda ogoni nabuleberemi. Kini Sairusi ibugua bilimu lalu inahondo langiyadagua Anduane Homogo ina Isaraele wali agalinaga Ngode Datagaliwabenaga anda inaneme buleberema, lene.   
\p
\v 4 Ani ladai biyagola agali tara dindi ogoriani luore hene hearu tigua Yudali hearu handabe manga howa ti anda bialu hearia wahalu pelonaga mo gi haga bule manda bini.  
\v 5 Ani bulenaga tigua Pesianaga gabumane agali hearume Yudaliru anda bialu heago mo ko halu bo gialo wahelonaga muni mini. Tigua Kini Sairusi heangi howa anidagua bialu heane dege Pesia dindiha Dariusi ibu kini ha aribia hene.   
\s1 Waitigi hearume, Yudali tigua ko biya, lalu beba pelenego ogo  
\p
\v 6 Pesianaga Kini Dariusi homayagola Segesihanda Pesia dindinaga kini ha aribia hene. Ani heagola Yudanaga waitigi bu hearume Kini Segesihondo beba mbira gili buwa Yarusaleme wali agali bu karumebi Yuda dindi maruha bu karumebi ko biya lalu gilibu pelene.\x + \xo 4.6 \xt Esd 1.1\x*   
\p
\v 7 Ani pelo heagola Pesianaga Kini Segesi homene. Homayagola Adasegesi ibu kini ha aribia hene. Ani heagola Bisilamabi Midiredadabi Tabelebi ti baba biabe mandagi biaga hearubi tigua beba mende Aramaigi bi lalu gili buwa Pesia dindini kini hearia gilibu pelene. Ani gilibu pelayagola Pesia dindini howa Aramaigi bi laga hearume dagalowa kini hale helo bi lo beregedalu Pesia bi lalu lamini.   
\p
\v 8 Mani agali kira dindi ogoniha gabumane haru haga agali haguane Lehumu henego mende dindi ogoniha beba gili bia dagala biaga Simisai henego libuguabi nde Yarusaleme wali agali bu karume ko biya lalu beba mbira Kini Adasegesi hearia gilibu pelene. Beba gilibu pelalu howa bi ogodagua lowini.   
\pi1
\v 9 Kini-o bayale kebe. I̱ Lehumu dindi ogoha gabumane agali haguane kogomebi dindi ogonaga beba gili bia dagala biaga Simisai ibubi dindi ogoha agali haguane maru godi lalu mana dabaki biaga karumebi í̠naga agali haguane Eregeali karumebi Babilonoali karubi Elama dindiha Susa tanoali karumebi ina bibahendeoreme beba ogo gilibu wia harama.  
\v 10 Wali agali bamba agali kini hongohe mini lene Asubanibala ibugua tini dindiha howa tali tagi haya handala dindi ogoha tagira íbu heneru maru Samaria tanoha karu maru Iba Yuberedisi poragoha bu karu ti bibahendemebi nde bi ogoni lo mbira halu beba ogoni gilibu wia harama.   
\b  
\p
\v 11 Tigua beba ogodagua gilibu pelene.  
\pi1 Kini Adasegesi-o ina í̠naga biabe biahaga howa Iba Yuberedisi ange orayagi kamarume í̠nihondo bi mbira loaho howa bi ogo gilibu ibilarama.   
\pi1
\v 12 Kini-o iname bi ogodagua lalu larama. Yuda wali agali dindi í̠na handaya ho hene tara tara wiaruha howa daibu karu tigua tano mo ko hene biago lone biadai bialu ka. Wali agali bamba tano ogoniha henedaru tigua ko bialu kininaga bi mo wahaga hene. Ani biaga henego áyu tigua tano pabe lone biadai birago ai emene howa biamaro bibehe nga.  
\v 13 Anigo ai kini-o bi ogore bayuwa hale habe. Yuda wali agalime tano ogoninaga wai pabe hongohe bu mabu biyagua tigua í̠hondo dagisi muni nangulebira. Anidagua biragola í̠naga dindiha biabe bulenego muni nawi tubagi ho holebere.  
\v 14 Í̠nime inahondo mbiraleru ngialu bayuwa handayaho hariligodane Yudalime mani í̠ mo ko nahelonaga langerema. Anidagua bialu kane hondowa iname bi ogo í̠naga gilibu wia harama.  
\v 15 Ai í̠naga agali beba gili bia dagala biaga kagohondo gabumanenaga mbugaha bi bamba í̠ mamaliru heangi bini damene gilibu winidaru dagala labe. Ani dagalaragola hale halu keria wali agali Yarusaleme tano ogoniha henedaru ti ko mine haga mbira henedane hale holebere. Bamba ti mamaliru henedangi wali agali uruni tigua kini hearuhondo genda mo mialu agali dindi podene mbira handayaho haga hearuhondobi genda mo mia dege bini. Yarusaleme wali agali tigua kininaga bi mo wahaga bialu hearia kini ibugua tano ogoni bo gialo wahene.  
\v 16 Ani bini ngago ai kini-o iname bi ogodagua lawia harama. Ai tigua tano mo tiga bialu pabe hongohe biyagua nde Iba Yuberedisi abene orayagi dindi podene mbira ogoni í̠na handayaho naholebereda lalunaga lowia harama, lene.   
\b  
\p
\v 17 Tigua beba gilibu pelayadagoni hondowa Kini Adasegesi ibugua nde ladai bialu gili binigo ogo,  
\pi1 Gabumanenaga haguane agali Lehumubi beba gili bia dagala biaga Simisaibi libu baba biabe mandagi biaga Samaria tanoha kamirubi dindi podene maru wigi bidaruha hene Iba Yuberedisi abene orayagi haga kamirubi tí bibahendehondo horombe laro. Ai tígua bi lo ibilarimiyago ladai bero.   
\pi1
\v 18 Tígua bi gilibu ibilarimiyago marume dagalowa Pesia bi lowa dagalo beregedalu i̱ langiya.  
\v 19 Ani langiyagola i̱na agali beba gili bia dagala biaga hearuhondo lamialu, Tígua ogoni henenedabe taya bialu handadaba, laru. Ani larugola tigua handalu hearia Yarusaleme wali agalime mine halu kininaga bi mo wahalu haabo haga lalu gilibu wiaria handaya. Heneneore tano ogoniha agali ko dewaore bu heneya.  
\v 20 Bamba kini hongohe Yarusalemeni howa dindi dewa Iba Yuberedisi orayagi ibugua handameho haga heneya. Ani handayaho howa tigua wali agalihondo dagisi muni tara tara ngidaba laga heneya.  
\v 21 Ani heneyago ai tigua biabe biaruagoni mani i̱nime bilimu larogola bule áyu nabilimu laya lalimu.  
\v 22 Tigua biabe bialu howa mani i̱ni mo ko holene wuligo áyu ogoni abale ti karia pialu nabilimu lalu lamilimu laro, lene.   
\b  
\p
\v 23 Ani laya handala maru hearume Kini Adasegesinaga bi layago bebani gilibu yalu puwa Lehumu Simisaibi agali maru libu baba biabe mandagi biaga hearubi ti hearia yalu puwa hale helo dagalalu hene. Kininaga bi dagalayagola agali gabumane haguane uruni tigua hale hene. Hale halu abaleore ami agali hearu heba Yarusaleme pialu Yuda wali agaliru biabe bialu hayaru wahadaba lene.   
\s1 Anduane Homogonaga anda lone binigo ogo  
\p
\v 24 Bamba Kini Sairusi heangi howa Yudali tigua Anduane Homogonaga anda bialu hayagoni tinaga waitigi bu hearume wahadaba layagola Yarusalemeha anda bialu hayago waho hene. Anda biala ha ho dege biane Kini Dariusi ibu Pesia dindinaga kini mali kirani haru hene.\x + \xo 4.24 \xt Hag 1.1, Seg 1.1\x*   
\c 5  
\p
\v 1 Mali ogoningi dege bi mana \w latagi\w* haga Hagai Ido igini Segaraiala libugua Yuda dindihabi Yarusaleme tanohabi Anduane Homogonaga bi mana latagi halu hene.\x + \xo 5.1 \xt Hag 1.1, Seg 1.1\x*  
\v 2 Seadeli igini Serubabelebi Yahosadaga igini Yosuabi libugua bi mana latagi haga agali kirali biago labonaga bi layago hale halu libugua agali maru hearu haru howa Yarusalemeni Anduane Homogonaga anda biago lone bialu hene. Ani bialu hebigola bi mana latagi haga agali biagolabo libugua biabe biamogo bialu hene.\x + \xo 5.2 \xt Hag 1.12, Seg 4.6-9\x*   
\p
\v 3 Ani bialu hemigola Iba Yuberedisi abene orayagi dindi mbira mbira wiarunaga haru haga gabumane haguane mbira mini Tadenai heagobi Seda Bosenai ibu ami agaliru haru haga agali haguane heagobi libu heba biabe mandagi biaga agali maru hearubi tigua hale halu hearia Isaraeleali biarume biabe bialu ka layane hale hene. Ani hale halu tigua abale Yarusaleme pene. Puwa tigua agali Anduane Homogonaga anda bulenaga biabe bialu hearuhondo hale halu lalu, Tígua anda ogoni bialu harimidaruni tí aiwa bilimu layabe.  
\v 4 Agali biabe ogoni handayaho haga ai ima dege kamibe mini langidaba, lene.  
\v 5 Tigua ani layagola Ngode Datagaliwabe ibunime Yudanaga agali haguane biaru baya hangu handayaho heagola Pesianaga agali haguane biarume tinaga biabe bialu hearu nabidababe labe nahe hene. Ani labe nahe howa tigua nabidababe lalu agi buabe tobaho howa tigua Kini Dariusi hearia beba mbira gili bialu Yudali biarume bialu hayadaruninaga ogodagua bira lalu gilibu pelene.  
\v 6-7 Ani gilibu pelowa kini ibunaga bi ladai bilo hondo hene.  
\p Tigua kinihondo bi gilibu pelenedagoni ogoale bira lalu beba gilibu pelene.  
\pi1 Kini Dariusi-o í̠ bayaleore haabo habelo.  
\v 8 Kini-o ina Yuda dindiha puwa handalu hemaria tigua tininaga Ngode Datagaliwabe hongohe kagonaga anda biago lone bialu hearia handarima. Tigua ege to̱le̱ timbuniru podo yu ibalu urunime anda bialu irarume baya hangu ala dunga haga bialu anda ndo baya taraore mbira bialu ka.   
\pi1
\v 9 Anidagua bialu heagola iname tinaga agali haguane hearuhondo hale halu lalu, Tígua Ngode Datagaliwabenaga anda bialu kamirubi biabe maru bialu kamirubi aiwa bilimu layabe, lalu hale harima.  
\v 10 Ani lalu, Agali biabe ogoni bilo handayaho haga uruni tinaga mini í̠ langulenaga ai ima dege kabe, lalu hale harima.   
\pi1
\v 11 Ani hale harimagola Yudali biaru tigua ladai bialu lalu, Ina Ngode Datagaliwabe dindi hari bibahende ngaruni handayaho haga kagonaga biabe biahaga kama. Bambaore inanaga kini hongoheore mbira henegome anda ogoni bini. Ani binigo inanaga waitigi bu hearume bo gialabaga bialu mo ko hai henego ainde lone biadai bialu kamagoni.  
\v 12 Anidagua bialu kamagoni irane ogodagua. Inanaga mamali hearume Ngode Datagaliwabe dahuliya andaga kago mo keba halu hene. Ani mo keba halu heagola ibugua Kaladeali Nebugadanesa Babilononaga kini heagome ina baba wai bilo ibilaya. Ani ibilayagola ibugua ibalu ina mo ko howa bai halu bo podahana haya. Ani buwa Anduane Homogonaga anda heago bo gialo wahai halu wali agali bibahende Babilono dindiha helo garabaya buwa haru piaiore haya.\x + \xo 5.12 \xt 2 Kin 25.8-12, 2 Bit 36.17-20, Yar 52.12-15\x*  
\v 13-14 Ani bialu Kini Nebugadanesa ibugua Ngode Datagaliwabenaga biabe bulenaga mbirale ngolomebi silibamebi wabini Anduane Homogonaga loma bia howa ibunaga andaha wiaga wiaru bibahende Babilonoha mo yu piai howa ibunaga mbirale dama mitangi bialu gime wabini Babilono dindiha wiaru bi pupu wiaga andaha ngelole mo yu piai haya. Ani biagola mani Sairusi ibu Babilononaga kini ha aribia haya. Ibu mali mbirani kini pigane howa Anduane Homogonaga anda ogoni bule pudaba laya. Ani lowa Kini Sairusi ibugua inanaga mbirale bibahende bi pupu wiaga andaha wiago mo yalu penedaruni inanaga agali haguane mbira mini Sesebasa heagohondo miadai biai haya. Ani buwa Kini Sairusi ibugua Sesebasa dabalu ibilenedagoni ibugua Yuda dindinaga gabumane haru haga howa handayaho habe laya.\x + \xo 5.13-14 \xt Esr 1.2-11\x*  
\v 15 Ani lowa kini ibugua Sesebasahondo lamialu lalu, Mbirale uruni Yarusaleme mo yalu dai bialu Anduane Homogonaga anda abale henedagoriaore helo bia aribia halimu, laya.  
\v 16 Ani laya handala yalu ibinigo ai Sesebasa ibugua mbirale uruni anda gahenge ogoniha ngelolenaga ibuni nde Yarusaleme íbu howa ibunime biabe ogoni handayaho halu Anduane Homogonaga anda ogoni bialu kamagoni. Abale biai nahe wene bulene ngelowa dege bialu kamagoni, lalu ladai biya.   
\pi1
\v 17 Yudali biaru tigua bi ogonidagua layago ai Kini-o karulapeyagua nde í̠naga beba gili bia dagala biaga karuhondo Kini Sairusinaga bi ogoni henenedabe hondole gabumanenaga mbugaha dabalu handadaba labe. Ani handaragola Yudali uruni tinaga bi henene layada hawa layada lalu tigatiga handa walia holebere. Ani hondowa anda ogoni bilo lalubi ndo nabilo lalubi bi ladai bibe, lene.   
\c 6  
\s1 Kini Sairusihanda Anduane Homogonaga anda biadai bilimu lalu gilibu winiyago handa walia henego ogo  
\p
\v 1 Ogoni layagola Kini Dariusihanda lalu, Babilononaga kinirume biniru mbugani gilibu wiagaha Anduane Homogonaga anda bilimu lene lo ngabe hondole hai bidaba, lene.  
\v 2 Hai bialu hearia Babilononi handa walia nahe howa dindi timbuni Egebadana ogoni Mediahayagi beba mbira gilibu wiagoha bi ogobi lo wiaria handa walia hene.   
\pi1
\v 3 Sairusi ibugua mali pigane handame haga heneyangi Yarusalemeni Anduane Homogonaga anda bilonaga bi ogo leneyane hendene. Anduane Homogonaga anda ogoni nogo tara tara bo loma bia ho mulenebi irani bo delolenebi anda ogoni helo gumuni mo tiga bialu biadai bilimu. Anduane Homogonaga anda ogoni daliganaga magi mida pira kirani karia (27) holebira. Aranenaga magi mida pira kirani karia (27) dege holebira.  
\v 4 Anda hái bulenenaga to̱le̱ tongo tebira para howa ira tongo mbira para holebira. Uruni bibahendenaga yolo kininaga muni anda howa yolo mo mulebira.  
\v 5 Ndisi be tara tara ngolomebi silibamebi wabini Yarusalemeni Anduane Homogonaga andaha wiaria Kini Nebugadanesa ibu mo yalu Babilono dindini winiyarubi mo yalu dai buwa Yarusaleme Anduane Homogonaga andaha wiagadagoria ngelo yu dai bilo, lalu lo wiane hendene.   
\s1 Kini Dariusi ibugua, Biabe birimidagoni biaabo halimu, lenego ogo  
\p
\v 6 Bi ogoni lo wiago hondowa Dariusi ibugua ogodagua ladai bini.  
\pi1 Iba Yuberedisi ange ni paliragohayagi gabumane agali haru haga Tadenaibi Seda Bosenaibi libu heba biabe mandagi biaga kamiru tihondo larogo, Anduane Homogonaga anda biragoha hapai nahe henge milimu.  
\v 7 Yuda dindinaga gabumane agali haru hagabi agali tininaga haguanerubi heba tini Anduane Homogonaga anda abale henedagoria bia dai bilo.  
\v 8 Áyu i̱na tigua anda ogoni bilo biamogo bilimu lalu bi hongohe langero. Biabe biaga uruni tinaga hame lararu ale mulene wali agali Iba Yuberedisi ange ni paliragohayagi karu tigua muni dagisi kinihondo miragome yolo bulebira. Ani biragome biabe bialu kago pugu holo nabulebira.  
\v 9 Horo bibahendengiore \w loma\w* binigo mo miaga agali Yarusalemeni karume Ngode Datagaliwabe dahuliya andaga kagohondo bo lomabu delole hame ledama lara ale miai halimu. Nogo bulumaga iginibi sibibi sibi iginibi ladi ale mini widibi ibibi \w waini\w* ibabi olibe lininaga welibi milimu.  
\v 10 Tígua ogonibi beramigola uruni tigua Ngode Datagaliwabe dahuliya andaga kagohondo nogo tara tara bayale ibu turu haga aleru milobi ibuhondo i̱nagabi i̱ iginidarunagabi bi la haragola ina mo gumbila helo.  
\v 11 I̱na bi hongohe mende larogome mbiralime bi larogo aribia haga biyagua ibuninaga anda ira mbira gialo muwa ngunihayagi de howa ibuni ogonime nogoba helo. Ani buwa ogoni ibunaga andabi ko ngubi wahagane ale helo.  
\v 12 Ngode Datagaliwabe ibunaga mini Yarusalemeni yaraga helo lenedagome kinibi hameigini dindi tara tararubi mbiralime bi o larogo mo aribia haragobi Anduane Homogonaga anda gialo wahole manda birago ibubi bope helo lalu bi ogoni Dariusi i̱na laro. I̱naga bi ogoni bibahende hale halu biloore laro, lene.   
\s1 Anduane Homogonaga anda loma bia henego ogo  
\p
\v 13 Ogonibi layagola gabumane agali haru haga Tadenaibi Seda Bosenaibi haru haga marubi ti bibahendeme handame haga Kini biagome layadagua bini.  
\v 14 Yu wali agalinaga haguane biarume anda biagoni ala bigi bialu bayuwa bini. Anduane Homogonaga bi mana \w latagi\w* haga agali kira Hagai Segaraialame mo hongo hayagola tigua ani bini. Isaraelenaga Ngode Datagaliwabehanda layadagua ani buwa Pesianaga handame haga Kini Sairusi Adasegesila ala henerumebi Dariusi heagomebi tigua bi hongoheme bilimu layadagua bialu biai hene.\x + \xo 6.14 \xt Hag 1.1, Seg 1.1\x*  
\v 15 Handame haga Kini Dariusi ibugua handame ho hearia mali waragane layangi tininaga ege daga mini Ada layagola horo tebonengi Anduane Homogonaga anda ogoni bu maro bini.  
\v 16 Ani biai howa Isaraele wali agalibi loma binigo mo miaga biarubi \w Libaiali\w* biarubi wali agali maru maru garabaya ale howa dai bini hearubi heba ti bibahendeme turu timbuni halu Anduane Homogonaga anda biagoni Ngode Datagaliwabehondo loma bia hene.  
\v 17 Loma biyadagoni nogo bulumaga wangabe handari mbirabi (100) nogo sibi handari kirabi (200) sibi igini dalua handari mariabi (400) bo mini. Ani buwa wali agali tini ko biyaru domo wahelo lowa nogo meme wangabe pira mbirani kira (12) bo mini. Pira mbirani kira (12) bo minidagoni irane Isaraele hameigini pira mbirani kira hayagonaga manda buwa bo mini.  
\v 18 Mosese heneyangi agua bilimu lalu Mana lowinigo gilibu ngadagua tigua loma binigo mo miaga hearubi Libaiali biarubi Yarusaleme Anduane Homogonaga anda biagoria howa bulene winigo bilo mo manda manda bini.   
\s1 Horo Bolangua Halu Penegonaga Tomo nenego ogo  
\p
\v 19 Mali mbira howa ege mbirangi horo pira mbirani maria (14) hayagola wali agali garabaya biabe ale bialu hene dai biyaru tigua \w Bolangua\w* Halu Penegonaga Horo mitangi bialu tomo nene.\x + \xo 6.19 \xt Har 12.1-20\x*  
\v 20 Loma binigo mo miaga hearubi Libaiali hearubi tigua ilili bulene wiadagua ilili bialu Ngode Datagaliwabenaga deni ko domo wahowa gagahe hene. Ani buwa Libaiali biaru tigua nogo sibi igini dalua damene biaru \w Bolangua\w* Halu Penegonaga Horo mitangi bialu wali agali bibahende garabaya biabe ale bialu howa daibiyarunagabi loma binigo mo miaga biarunagabi Libaiali tininagabi bo lomabia hene.  
\v 21 Nogo tara tara dalua bo loma biyaruni Isaraele wali agali garabaya biabe ale bialu howa daibu henerumebi wali agali dindi ogoriani hene tininaga mana ko wiaru wahai halu Anduane Homogo Isaraelenaga Ngode Datagaliwabe mini yaraga halu ibunaga lotu lole ibiyaru baba ti mandagi nalu hene.  
\v 22 Horo karuni \w Mberedi\w* Yidi Nahe Nolenenaga Horo hayagola tigua ogoningi turu howa tomo nalu hene. Tigua turu henedagoni Anduane Homogohanda Asirialinaga kini biago mini mo beregedayagola ibugua Isaraele wali agali Anduane Homogonaga anda biyago bilo biamogo biyagonagabi ti turu hene.   
\c 7  
\s1 Esera ibu Yarusalemeni anda ibinigo ogo  
\p
\v 1-5 O binidaruni biaha mali dewaore pialu Pesianaga handame haga Kini Adasegesi heangi agali mbira ibu mini Esera Babilono dindini hene. Ibunaga mamali \w loma\w* binigo mo miaga haguane timbuni Arono heneya aria hene. Esera ibu Seraia igini Seraia ibu Asaria igini Asaria ibu Hiligaia igini Hiligia ibu Salumu igini Salumu ibu Sadogo igini Sadogo ibu Ahidubu igini Ahidubu ibu Amaria igini Amaria ibu Asaria mende igini Asaria ibu Meraiodi igini Meraiodi ibu Serahia igini Serahia ibu Usi igini Usi ibu Bugi igini Bugi ibu Abisua igini Abisua ibu Piniasa igini Piniasa ibu Eleasa igini Eleasa ibu Arono igini hene. Agali uruni ti Esera mamali hene.   
\p
\v 6-7 Esera ibu Anduane Homogo Isaraelenaga Ngode Datagaliwabehanda Mana lowinigo Mosesehondo miyagoore manda timbunibi howa lawai haga hene. Anduane Homogohanda Esera biamogo biyagola Esera ibugua kini biagohondo hale hayaru bibahende miai hene. Handame haga Kini Adasegesi ibugua Babilono heane mali kane layagola Esera ibugua Babilono howa Yarusaleme pole Isaraele wali agali maru heba pene. Piyadaruni loma binigo mo miaga marubi \w Libaiali\w* marubi Anduane Homogonaga anda iba gana lagabi Anduane Homogonaga anda mamage hagabi biabe biagabi ti heba pene.  
\v 8-9 Tigua ege piganegonaga horo mbira layagola Babilono wahalu Yarusaleme pole tagira pialu pene. Anduane Homogo ibugua ti biamogo biyagola abale ege daunigonaga horo mbira layagola Yarusalemeni anda pene.  
\v 10 Agali Esera ogoni ibugua Anduane Homogonaga Mana lowinigo lawai haga howa mana ogonime ledadaguaore bayuwa bule hongo howa lomanda biaga hene. Ani buwa ibugua Isaraele wali agali hearume Mana bulenebi nabulenebi lo ngadagua bilo lawai haga hene.   
\s1 Kini Adasegesihanda beba Eserahondo gilibu minigo ogo  
\p
\v 11 Esera ibugua loma binigo mo miagabi Anduane Homogohanda Mana lowinigo Isaraelealiruhondo minigo manda biaihe howa lawai hagabi heago hondowa handame haga Kini Adasegesihanda Eserahondo beba mbira gili buwa minigome bi ogo lowini.   
\pi1
\v 12 I̱ handame haga Kini Adasegesi kogo i̱na loma binigo mo miaga agali Esera dahuliya andaganaga Ngode Datagaliwabe Mana lowinigo lawai hagabi í̠hondo beba ogo gili bu ibilaro.   
\pi1
\v 13 I̱na bi hongohe lo ibilarogome ogobi laro. I̱na dindi bibahende handa gimbu bu kogoria Isaraele wali agali bibahende karubi loma binigo mo miaga karubi Libaiali karubi tigua Yarusaleme dai bule manda bidarume í̠ heba dai bilo.  
\v 14 I̱ heba i̱naga ganisolo agali kariali biarubi mandagi lo mbiraore halu tínaga Ngode Datagaliwabe ibugua Mana lowini ngago tíhondo handayaho halimu lalu ngiyago wali agali Yarusalemeha karubi Yuda dindi bibahendeha karubi tigua mana ogoni bayuwa layadagua bialu handaya howa au kabe hondole pilimu larama.  
\v 15 I̱bi i̱naga ganisolo biarubi iname Isaraelenaga Ngode Datagaliwabe ibunaga anda Yarusalemeha kago ibuhondo ngolobi silibabi mu winigo mirimago mo yalu pobelo hame ledama.  
\v 16 Babilono wali agali dindi bibahendeni hearume silibarubi ngolorubi ilu wiyaruni Isaraele wali agali tinimebi tinaga loma binigo mo miagamebi tinaga Ngode Datagaliwabe andaha wilo miyarubi bibahende mo yalu pobe.   
\pi1
\v 17 Muni uruni bayuwa podaga buwa ogonime nogo bulumaga wangaberu nogo sibi wangaberu sibi igini daluaru ladi ale tara tarabi \w waini\w* ibabi uruni yolo buwa Yarusalemeni tinaga Ngode Datagaliwabe andaha bo lomabu mulene dabuni mo milimu.  
\v 18 Ngolobi silibabi maru uruni bialu ibira harago í̠nabi í̠naga hameiginirumebi Ngode Datagaliwabe ibunaga hameni howa bua birago ale tígua bilimu.  
\v 19 Ndisi tara tara tomo yagane alebi dawagane bebi ngiyaru damenego Ngode Datagaliwabehondo muwa Yarusaleme Anduane Homogonaga andaha yalu puwa ogoriani biabe bulene ngaru bule Ngode Datagaliwabe Yarusalemeni kago ibuhondo milimu.  
\v 20 Anduane Homogonaga andaha bulene mbira ndia hayagua kininaga muni wiaga biagoha muni maru ngilo.   
\pi1
\v 21 Iba Yuberedisi ange ni paliragohayagi tinaga hondo haga karuhondo i̱na bi hongohe lalu dahuliya andaga Ngode Datagaliwabe kagonaga Mana lowinigo lawai hagabi loma binigo mo miagabi Esera ibugua mbirale mbira tihondo hale hayagua hale harago damene abaleore milimu.  
\v 22 I̱na magi o ngelarogo bolangua nahe unuyagi milimu. Silibanaga genda daosini tebirani handari maria (3,400) kilo mialu ladi ale mini widi nu handari duria (500) agima mialu waini iba lida magi daosini kira (2,000) mialu olibe lininaga weli lida magi daosini kira (2,000) mialu bulene nga. Ani bialu ibi tíninaga hame laradagua mo milimu.  
\v 23 Dahuliya andaganaga Ngode Datagaliwabehanda ibunaga anda bilonaga mbirale hameledaru bayuwa Eserahondo miai halimu. Ogonibi beremigome Ngode Datagaliwabehanda i̱hondobi mani i̱ homedoha handame haga kini aribia hararubi heba keba nahelo ani bilimu.  
\v 24 Tígua loma binigo mo miaga karubi Libaiali karubi Anduane Homogonaga andaha iba gana laga karubi mamage haga karubi biabe biaga agali karubi biabe maru anda ogoniha bialu karubi ti bibahendehondo dagisi muniore ngi nalalimu, lene.   
\pi1
\v 25 Esera í̠ha í̠naga Ngode Datagaliwabehanda mini bayale gigabi wia hayagome gabumane agali hondo hagarubi godi hale hagarubi dabo helabe. Tigua wali agali Iba Yuberedisi ange ni paliragohayagi í̠naga Ngode Datagaliwabe Mana lowini ngago biaga karu haru helo ani dabo helabe. Mana lowinigo ogoni manda nabi karuhondo bayuwa manda bilo lawai habe.\x + \xo 7.25 \xt Man 16.18, Mal 2.7, Md 23.2-3\x*  
\v 26 Wali agali marume Ngode Datagaliwabenaga mana lo ngago mo wahayaguabi dindi bibahende i̱ handame ho kogonaga mana lo ngago mo wahayaguabi ogoni ibu pani abaleore mulene nga. Pani ogoni bo homelolene ngayaguabi dindi mendeha bo pelolene ngayaguabi ibunaga mbirale ngaru mo garabaya biyaguabi ibuni garabaya biyaguabi urunidagua mbira bulene nga.\x + \xo 7.26 \xt Esr 6.11-12\x*  
\m Bi ogoni lalu Kini Adasegesihanda gilibu mini.   
\s1 Esera ibugua Ngode Datagaliwabenaga mini yaraga henego ogo  
\p
\v 27 Esera ibugua lalu, Anduane Homogo ina mamalirunaga Ngode Datagaliwabe kago ibunaga mini yaraga hama. Ibugua kininaga mini mo heya halu kini ibugua Anduane Homogonaga anda Yarusalemeni biyago mo baya bialu kagoni.  
\v 28 Ngode Datagaliwabe ibunaga biamogo bia holeneme i̱ dara halu biamogo biya. Ani buwa kini biagobi ibunaga ganisolo agali biarubi haru haga agali maru biarumebi biamogo timbuni biya. Anduane Homogo i̱naga Ngode Datagaliwabe ibugua i̱ biamogo bialu hongo ngiyagola i̱na Isaraele hameigini dewa biarunaga haguane Yarusaleme dai bima larugola ti i̱ heba dai buleberema layagoni, lene.   
\c 8  
\s1 Yudali Yarusaleme dai binirunaga mini ogo  
\p
\v 1 Mini ogoha gilibu ngaruni Adasegesi ibu kini heangi Esera i̱ni heba Yudali hameigini mbira mbira henedagua agali haguane heba dai bigi binigo mini uru   
\p
\v 2-3 Piniasa hameigini Gesomobi Idama hameigini Danielebi Debidi hameigini Segania igini Hadusubi Paroso hameigini Segaraiabi ibuni hameigini maru agali handari mbirani pira duriabi (150) uruni bibahende Esera heba Yarusaleme dai bini.  
\v 4 Pahadamoaba hameigini Serahia igini Elioenai ibu heba agali handari kira (200) dai bini.  
\v 5 Sadu hameigini Yahasiele igini Segania ibu heba agali handari tebira (300) dai bini.  
\v 6 Adini hameigini Yonadana igini Ebede ibu heba agali pira duria (50) dai bini.  
\v 7 Elama hameigini Adalia igini Yasaia ibu heba agali pira karia (70) dai bini.  
\v 8 Sebadia hameigini Maigele igini Sebadaia ibu heba agali pira halira (80) dai bini.  
\v 9 Yoaba hameigini Yahiele igini Obadaia ibu heba agali handari kirani pira mbirani halira (218) dai bini.  
\v 10 Bani hameigini Yosibia igini Selomidi ibu heba agali handari mbirani pira waragaria (160) dai bini.  
\v 11 Bebai hameigini Bebai igini Segaraia ibu heba agali pira kirani halira (28) dai bini.  
\v 12 Asagada hameigini Hagadana igini Yohanana ibu heba agali handari mbirani pira (110) dai bini.  
\v 13 Adonigama hameigini Elibeledebi Yuelebi Semaiabi agali pira waragariaru (60) ti agali tebira biaru heba dai bini ndo emene maha dai bini.  
\v 14 Bigibai hameigini Udaibi Sagubi libu heba agali pira karia (70) hene. Hameigini uruni bibahende Yaruseleme dai biai hene.   
\s1 Eserahanda \w Libai\w* hameigini maru hearu hai buwa Anduane Homogonaga andaha biabe bilo dabo heleneru ogo  
\p
\v 15 I̱ Esera i̱na agali uruni Ahaba tanoha iba dalialu piaga hariga wiagoria howa agali bibahende mo mogo bialu balai anda buwa horo tebiru ogoriani harima. Ani howa handalu hewaria \w loma\w* binigo mo miaga agali maru ogoriani bu hearia handarugo ai \w Libai\w* hameigini mbira nahandaru.  
\v 16 Ani nahende howa i̱na agali haguane dirali olalu i̱ni koria ibidaba laru. Agali ibiyadaruni tinaga mini Eliese Ariele Semaia Elenadana Yaribi Elenadana mendebi Nadana Segaraia Mesulama imaru uruni bibahende olalu íbu ngoai hadaba laru. Ani bialu agali kira mana bayale lawai haga Yoiaribi Elenadanalabi ibidaba laru.  
\v 17 Ani ibiyagola tigua Kasibia dindiha agali haguane mbira mini Ido ibu Anduane Homogonaga anda handaya ho haga heneru aria kago hondo pudaba laru. Ani hondo puwa agali maru ibu heba biabe bialu haga hayadarubi haru halu Anduane Homogonaga andaha biabe bimi̱ya ibalimu laru.  
\v 18 Ngode Datagaliwabehanda ina dara timbuni howa biamogo biyagome tigua Mali hameigini Libaiali mbira mini Serebaia henego ibilaya. Ibu agali bayaleore howa ibugua biagaru bibahende tigabi hangu biaabo haga hene. Ani henego ai ibu iginirubi ibu hamenerubi pira mbirani halira (18) henego uruni bibahende haru halu ibai haya.  
\v 19 Ani ibiyagola Ido ibugua nde agali kirali Hasabia Yasaiala libu Merari hameigini henego ibilalu libu dameneru pira kira (20) haru halu ibiniya.  
\v 20 Ani bialu agali maru handari kirani pira kira (220) Anduane Homogonaga andaha biabe biaga hearubi ibilalu biya. Bamba Kini Debidi halu ibunaga agali haguane heneru ti heangi ibugua agali uruni aria Libai hameiginiru baba biabe biamogo mogo bialu helo dabo helene. Agali uruni henedaru tinaga mini marunaga mini wiagadagoha gilibu winigo nga, lalu Eserahanda lene.   
\s1 Esera halu wali agali bibahendeme \w tomo\w* nane haga mana bialu Ngode Datagaliwabehondo bi lalu henego ogo  
\p
\v 21 Esera ibugua Iba Ahaba peago kawareni dege howa wali agali bibahende hearuhondo lamialu lalu, Ina bibahendeme \w tomo\w* nane haga mana bialu Ngode Datagaliwabenaga deni inane mo dindiha howa ibuhondo lalu, Ina Yarusaleme pole poramagoha inanebi inanaga waneiginirubi mbirale yidamarubi harigani baya hangu handayaho habe, lama laro, laya.  
\v 22 Esera i̱na tihondo lamialu, Ina harigani haru pelo ami agali hosini biralu ina haru pelo i̱na kinihondo ngi lolene taga howa ngi nalarudagoni irane ala i̱na kini heba mandagi howa ibuhondo bi ogodagua laru. Inanaga Ngode Datagaliwabe ibugua wali agali ibuniore talima pialu haga karu baya hangu handayaho haga ka. Anigo wali agali maru ibuhondo erembira mialu poraruhondo keba timbuni halu tini pani nelo mialu mo ko howaore baga ka, lalu kini lamiru. Ani lamu howa mani ibuhondo ami agali maru ina harigani mamage helo ngi lolene taga biya handala waharu.  
\v 23 Ani birugo ai áyu iname tomo nane howa ina hariga poramagoha baya hangu haru habe lalu Ngode Datagaliwabehondo bi lamirimagola ibugua hale halu harigani pialu hemagola handaya ho halu biamogo biaore biya, lalu Eserahanda lene.   
\s1 Anduane Homogonaga andaha wilonaga mbirale mbirale mua howaore miniru handayaho helo agali dabo heleneru ogo  
\p
\v 24 Serebaia Hasabiala heba loma binigo mo miaga agali piralibi ibidaba laru.  
\v 25 Ani íbu hemigola kini ibuguabi kini biamogo biaga hearumebi ibunaga agali haguane hearumebi Isaraele wali agali bu hearumebi ngolo silibaru mbirale tara tara Anduane Homogonaga andaha biabe bule mo wulene ngigi biyaruni bibahende i̱na genda magi hondowa loma binigo mo miaga hearu tigua handayaho helo talebu ta haru.  
\v 26-27 Mbirale tigua handayaho helo mo ta harudaruninaga genda magi ogodagua. Muni siliba timbuni genda maginaga tono pira kirani kira (22) wialu ngolonaga genda magi kilogarama daosini tebirani handari maria (3,400) mialu ndisi be silibame wabini handari mbirabi (100) miru. Ndisi be mbira mbiranaga genda magi kilogarama pira tebirani maria (34) ale dege dege miru. Ani bialu ndisi be ngolome wabini pira kirabi (20) mialu ndisi be uruninaga genda magi emene kilogarama halira ale dege degebi miru. Ani bialu ndisi be kira boronosime baya taraore wabinigo yolo timbunime mibehe winigobi miru. Yolo ngolome wabini ndisi be kira miaga winidagua dege mibehe wiagobi mirugola mo yaga biya.\f + \fr 8.26-27 \ft Tono mbira genda magi 1,000 kilogarama\f*   
\p
\v 28 I̱na mbirale uruni bibahende loma binigo mo miaga agali homberiali hearuhondo mo talebu tahalu howa tihondo lalu, Ai tígua Anduane Homogo ina mamalirunaga Ngode Datagaliwabenaga biabe bia hole lomabia hene ha kamigonigo hale hadaba. Ai ndisi be ngolo silibarume wabini Anduane Homogo turu halu mua howaore miniru uruni bibahende ibuninagaore wiabagi ho ngagoni.  
\v 29 Mbirale uruni baya hanguore yalu puwa Anduane Homogonaga andaha yu anda poleberemi. Yalu puwa loma binigo mo miagarunaga haru haga karubi Libai hameigini haru haga karubi Isaraele wali agali haru haga karubi uruni bibahendenaga deni ngolo silibabi ndisi berubi genda magi lone handadai buwa tihondo mo milimu, laru.  
\v 30 Bi uruni lai halu loma binigo mo miaga bu hearubi Libai hameigini aria bu hearubi tigua ngolo silibabi ndisi be biarunibi mo yai halu ina haru Yarusaleme puwa Anduane Homogonaga andaha yalu ibirima, lalu Eserahanda lene.   
\s1 Wali agali Yarusaleme dai binigo ogo  
\p
\v 31 Ege mbiranaga horo hombeane (12) layagola ina Iba Ahaba yu wahalu Yarusaleme pole piaga hariga wiadagua pirima. Ani pialu hemagola Ngode Datagaliwabe ibunime ina harigani baya hanguore handayaho haya. Ani handayaho heagola inanaga waitigi bu hearumebi pageali bu hearumebi mbira harigani howa ina balu inanaga mbirale yalu ibirimarubi mbira gingila mia nabi bayale ibalu anda ibirima.  
\v 32 Ani ibalu Yarusalemeni anda ibuwa horo tebiru ha̱lo̱ harima.  
\v 33 Horo maneni ngolo silibabi ndisi be biarubi bibahende Anduane Homogonaga andaha yalu puwa genda magi handarima. Genda magi agiradabe handai howa mbirale uruni loma binigo mo miaga agali Uria igini Meremodo henegobi Piniasa igini Eleasa henegobi Libai hameigini aria kira Yasua igini Yosabadabi Binui igini Noadiabi tihondo miai harima.  
\v 34 Mirimagola tigua mbirale uruni bibahende baya hangu dagalayagola bibahendeore wiai heneya. Ani wiagola mbirale uruninaga daga mbuga mbirani gili bialu mo winidagua wiaabo helo ani birima.   
\p
\v 35 Agali Babilono dindiha garabaya golalu dai biyadaruni ti Yarusalemeni anda íbu howa tigua Anduane Homogo ina Isaraele wali agalinaga Ngode Datagaliwabehondo nogo maru loma bialu irame dai helonaga bo mule haru ibiya. Tigua Isaraele hameigini homberia (12) henego manda bialu bulumaga wangabe homberia (12) haru ibiya. Nogo sibi wangabe pira dirani waragaria (96) haru halu ibuwa sibi igini hungubalua pira kariani kariabi (77) haru halu ibuwa lomabu bo delaya. Nogo meme wangabe homberia (12) tininaga ko biniru domo wahai helonaga loma bialu bo delaya. Loma uruni bibahende irame dai helo bo delai haya.  
\v 36 Ani bo delai halu Babilononaga Kini Adasegesi ibugua beba mbira i̱hondo gilibu ngiyagola mo yalu ibinigo ai i̱na gabumane Iba Yuberedisi abene orayagi haru haga heagobi ibunaga agali haguane bu hearuhondobi ti hendelo lowa yalu pudaba laru. Agali haguane uruni tigua beba ogoni hondowa iname Anduane Homogonaga anda loma biahene ogoni baya hangu buluma̱ya biamogo bialu haya, lalu Eserahanda lene.   
\c 9  
\s1 Yudali hearume dindi tara wali berearu dabu binigo ogo  
\p
\v 1 Eserahanda laabo halu lalu, Iname loma uruni delai howa inanaga agali haguane bu hearume ibuwa i̱hondo langialu lalu, Isaraele wali agalirubi inanaga \w loma\w* binigo mo miaga agalirubi \w Libai\w* hameiginirubi tigua wali agali tara ina aria ndo hearu hondowa tini hangu habagi nahe ta nabi mandagi haya. Tigua Kenana wali agalirubi Hidi wali agalirubi Perisi wali agalirubi Yabusu wali agalirubi Amono wali agalirubi Moaba wali agalirubi Iyibi wali agalirubi Amoro wali agalirubi ti bibahende mana koorene ko biagadagua bialu hene ka.  
\v 2 Ani bialu inanaga agali haguane Yudali bu hearume dindi uruniha wali berearu dabu bigi biyagome ina wali agali Ngode Datagaliwabe ibuninaga loma biaho helene harimagoni ina ko halu dindi tara wali agali biaru haradagua bidama. Agali haguane hearubi haru haga hearubi tigua mana ko urunidagua bialu heagola hondowa wali agali maru hearumebi ti biyadagua talialu bialu ka, lalu i̱ langiya.   
\p
\v 3 Tigua bi ogoni layago hale howa i̱na i̱naga bu miniha genda timbuniore haru. Genda howa i̱ninaga aga bu hewago lerelalu mandari angaribi minu dogai halu i̱ minibi naibiore bame ona biru wiru.  
\v 4 Ani berewane dege alendo halu alendonaga loma bo delolenengi haya. Wali agali hearume manda bialu tigua mana ko biyagonaga Isaraele wali agalinaga Ngode Datagaliwabehanda ina baba keba timbuni haga kago manda bialu ti gi ho haya. Ani gi howa ti dewaliore i̱ berewagoria íbu ngoai ho birarimagoni.   
\p
\v 5 Ani biraabo howa loma bo delolenengi hayagola i̱ aga minu lerelene biago bu berenego biwaore heyalu ge duli hanga ho biruwa i̱naga gi kirabali Anduane Homogo i̱naga Ngode Datagaliwabehondo dogoladaga haru.\x + \xo 9.5 \xt Har 9.29, 9.33\x*  
\v 6 Ani bu biruwa i̱na Ngode Datagaliwabehondo bi agua laru, I̱naga Ngode Datagaliwabe-o i̱na taga timbuniore ho kogoni. Ai i̱na í̠ kegoria ibalu í̠hondo bi labe naheore ko lo manda bido. Iname ko dewaore bialu harimada. Ani birimagome inanaga mana ko uruni dewaore wu to̱lalu hari daliga ela habehe wiyada.\x + \xo 9.6 \xt 2 Bit 28.9, Esr 9.13-15, Mo 18.5\x*  
\v 7 Inanaga mamali alaore henedangi howa í̠naga wali agaliruore heneru tigua mana ko dege bima ibalu henego áyu inamebi nde mana ko timbuniore bialu harimada. Ani bialu hemagola inanaga waitigi kini bu hearu ibilarigola tigua ibuwa inanaga mbirale wu hemaru ti mo yai halu inanebi inanaga kinirubi loma binigo mo miagarubi minu bai halu maru garabayabu yalu ti daluha piai haya. Ani biyagola bamba inanaga mamalirume taga timbuni henedagua inabi nde tagaho dege kamagoni.   
\p
\v 8 Anigo Anduane Homogo inanaga Ngode Datagaliwabe-o í̠na ina lone mitangi bu dai bialu dara howa ina wali agali emene mbira mbira o daibu kamaruni hangu garabaya harimago golalu i̱ninaga dindi baya gibi Yarusalemeni hole dai bidaba lari. Ina agali hameigini taranaga biabe biahaga hene harimago í̠na ina biamogo birigome bayale kamagoni.\x + \xo 9.8 \xt Esr 9.13, 9.15, Ais 22.23\x*  
\v 9 Heneneore ina hameigini tara bu karunaga garabaya biabe biahaga hemaria í̠na ina yu wahalu embeda nahaga haabo kegoni. Í̠nime ina dara timbuni howa Pesianaga kini bu hearume ina baba turu ho helo tinaga mini mo paliaho helari. Anidagua birigome iname dai bialu í̠naga anda loma bia hene abale gialo wahayago lone biadai bule ibuluma̱ya haru dai biri. Iname anda ogoni buluma̱yanaga hongo holene í̠na karulapeore ngialu baya hangu handayaho kegola ina Yarusalemehabi Yuda dindi maruhabi bayaleore kamagoni.   
\p
\v 10 Anigo inanaga Ngode Datagaliwabe-o í̠na mbirale bayale uruni bialu kegoni helowa iname í̠naga mana lowini ngeru pugualu ko bialu haabo haga kamagonidago iname bi agi lolebe. Ina taga timbuni ho kamagoni.  
\v 11 Í̠naga bi mana \w latagi\w* haga agali hearu tigua í̠ninaga bi mana wiaruni mo yu howa inahondo langialu haya. Tinaga ne harigaha howa í̠nime inahondo bi ogodagua lari. Tínaga dindi áyu pialu karuloleberemigo i̱naga deni bayale ndo nga. Anidagua larogoni irane wali agali dindi ogoniha haga karume mana koorene ko ngubiore ngaru mo tene howa dindi ogoni bibahendeha bialu haga nga, lari.  
\v 12 Anidagua biaga kago tígua dindi ogoniha wali bedaruni dabu nabilimu. Tí wali bedamirubi agali dindi ogoniha karu dabu bilo namilimu. Ti bayale helo biamogo bulenebi tigua mbirale mbira bule bialu karu biamogo bulenebi uruni bibahende nabilimu laro. Tígua i̱naga bi larogo hale halu taluwa bialu harimiyagua nde tí dindi ogoniha bayale halu hongoheore holeberemi. Ani bialu mani tínaga waneigini aguanene holebiraru tigua dindi ogoniha bayale haabo holebira, lalu larigoni ndobe.\x + \xo 9.12 \xt Har 34.11-16, Man 7.1-5\x*   
\p
\v 13 Heneneore inanaga Ngode Datagaliwabe-o í̠na inahondo bi ogonidagua langirigo mo wahowa iname mana ko liahe wiaru dege bialu harima. Ani bialu hemaria í̠nime ina bibahende mana lalu pani ngiri. Ani bialu ina mo ko halu bo amo lolene winigo ai ani nabi í̠naga wali agali dara timbuni ho howa ina emene mbira mbira hangu helo yupe hari.  
\v 14 Ani birigo ai ina yu wahene emene kamarume í̠naga bi lo winidaru lone mo wahowa dindi tara wali agali mana ko tara tara biaga bu karu dabu bigi bialu harimayagua ogoni mana ko timbuni buleberemada mandabu kama. Iname wali agali ogonidagua dabu bigi bialu harimayagua nde í̠na inahondo keba timbuniore halu wali agali emene yu wahene kamaruni bibahende bo wahai holebereda mandabu kamagoni. Ani bo wahai haregola ina aria lenego mbiraore hangubi mbira naholobada.  
\v 15 Anduane Homogo ina Isaraele wali agalinaga Ngode Datagaliwabe-o í̠ mini bayale tigabiore howa í̠na emene mbira mbira hangu yu waharigo ina o kamagoni. Ai ina bibahende wali agali yu wahene kamarumebi mana ko dege biaga kamago í̠ni kegoria kaware ibabe naheore kamagoni, lalu Eserahanda Ngode Datagaliwabehondo bi ani lamaro bini.\x + \xo 9.15 \xt Dan 9.14, Lm 3.19, 1 Ko 15.17\x*   
\c 10  
\s1 Yuda wali agalime wali agali tara baba dabu bulene nawiore lenego ogo  
\p
\v 1 Esera ibu Anduane Homogonaga anda lomabia hene heagoha harabani howa ibugua Ngode Datagaliwabehondo bi lalu dindini bulu paluwa dugu bialu mana ko bialu heneru bibahende latagi hai hene. Ani lalu hearia Isaraele wali agalibi waneiginirubi dewali íbu ngoai halu Esera ho mabu buwa tibi nde ko biyarunaga dara howa dugu bigibigi bialu hene.  
\v 2 Ani bialu heagola Elama hameigini Yahiele mbira henego igini Segania ibugua Eserahondo lalu, Iname Ngode Datagaliwabenaga mana lo wiago pugualu hameigini tara tara Ngode Datagaliwabe mitangi nabiaga hearu aria wali berearu dabu birimagoni. Ani birimagoyu ina Isaraele wali agali kamarume mana ko ogoni domo wahelonaga bulene mbiraore hangu nga.  
\v 3 Bulene mbiraore ogoni iname buleore lalu bi hongohe mbira Ngode Datagaliwabenaga deni howa lo wialu iname dindi tara tara wali dabu birimarubi waneigini hayadarubi bibahende haru halu tini aba ai̱ya andaga dai biai helami̱ya. Ai í̠nabi agali maru Ngode Datagaliwabenaga mana talima pialu haga kamirubi tígua ina kamaruhondo ogoale bidaba lalu langilimu. Ani langeremigola iname langeremidagua bialu Ngode Datagaliwabenaga bi mana lo ngago bialu holeberama.  
\v 4 Genda áyu ogoni mo tiga bulene biabe ogoni í̠naga ngagoni. Ani ngago ai í̠na gi nahe abale heyalu mo tiga bia. Ani beregola ina í̠ heba kamarunime mini mo mbiraore halu í̠na inahondo bidaba lalu larego biai holeberema, lalu Esera lamini.   
\p
\v 5 Ani layagola Esera ibugua bi hongohe mbira \w loma\w* binigo mo miaga agali haru haga hearuhondobi \w Libai\w* hameigini haru haga hearuhondobi Isaraeleali haru haga hearuhondobi Segania ibugua layadaguaore bule lalu Ngode Datagaliwabehondo lo widaba layagola tigua anidagua buleore lai hene.  
\v 6 Ani laya handala Esera ibu Anduane Homogonaga anda harabani birayago heyalu Eliasibi igini Yahohanananaga tamu hobane mbira heagoha anda pene. Ani pu howa Isaraele wali agali hearume mana ko timbuni biyagonaga daraore timbuni howa dugu bialu hene. Ani bialu howa ibugua horo ogoningi hobane ogoniha tomobi ibabi naneore biraabo hene.   
\p
\v 7-8 Ani heagola Yuda agali haguane bu hearume bi ogo yalu pudaba lene. Wali agali garabaya golalu dai bini Yarusalemehabi Yuda dindi bibahendehabi bu karu Yarusalemeni hangu íbu ngoai hadaba lole pudaba, lene. Tigua lalu, Horo tebiru bolangua nahelo abaleore Yarusalemeni íbu ngoai halimu. Mbirali ibu naibi dongeho hayagua ogoni ibunaga mbirale wu karu ina karulai halu ibuni ina Isaraele wali agali bu kamaru aria ndo lalu bo taliatagi hami̱ya, lene.  
\v 9 Tigua bi uruni yalu peagola Yuda hameigini bu hearubi Beniyamini hameigini bu hearubi horo tebiru biago bolangua naheaore Yarusalemeni ibuwa ege dininaga horo pira mende (20) layagola ti bibahende Anduane Homogonaga anda haraba wali agali ngoai haga wiagoria íbu ngoai ho hene. Ani ngoai ho hearia iba dalu timbuniore ibiyagome agali íbu ngoai ho hearu bibahende damu wahayagola dagare howabi bi galoneore mbira lolebirayane mitangi howabi duru laga laga bialu bu hene.   
\p
\v 10 Ani ngoai ho heagola loma binigo mo miaga Esera ibugua heyu howa lalu, Tígua dindi tara tara wali agali Ngode Datagaliwabe mitangi nabiaga hearu dabu bigi birimidagome Ngode Datagaliwabenaga bi mana lowini wiaru puguai harimida. Ani birimidagome ina Isaraele wali agali bibahendenaga mana ko tígua mo timbuniore harimida.  
\v 11 Anidagua birimidago ai hale hadaba. Anduane Homogo tí mamalirunaga Ngode Datagaliwabe ibunihondo lapani halimu. Lapani halu mana bayale ibu hameledadagua taluwa bialu halimu. Anidagua bialu howa dindi tara wali agali tí daluni karu heba mandagi nahalimu. Ani bialu dindi tara tara wali tígua dabu bini bedaru wahalu tini dalu pudaba lalimu, lene.   
\p
\v 12 Ani layagola wali agali biaru tigua bi hongo howa ladaga halu lalu, Í̠na bi ogoni heneneore larigo iname ogonidagua buleberema, lai hene.  
\v 13 Anidagua bia bimi̱yagoyu ai ina dewaliore kamago iba dalume damu wakago ina tagirani dalu damuyu howa mana ko dewaore birimadaru abale mo tiga bibe naheda.  
\v 14 Anidago ai inanaga agali haguane bu karu tinime mbirale uruni mo tiga bule Yarusalemeni helo. Tigua agali maru dindi tara tara wali Ngode Datagaliwabe mitangi nabiaga berearu dabu bu hayadaruni tinime horo mbira mbirangi Yarusaleme ibalu mo tiga bilo. Ani mo tiga bule ibalu tininaga tanoha agali haguane karubi godi hale halu mo tale biaga karubi haru halu ibugu bilo. Iname ogonidagua birimayagua Ngode Datagaliwabehanda keba ho hayago naholebirago anidagua bimi̱ya, lene.  
\v 15 Bi ogoni layagola hale howa agali bibahendeme anidagua bimi̱ya lalu e̱ lai heagola agali kiralime dege e̱ nale hene. Agali kira ogoni labo Asahele igini Yonadanala Tigiba igini Yahesiala libugua e̱ nalene. Ani nale heagola agali kira mende Mesulama Libai aria Sabedaila libuguabi agali kira Yonadana Yahesialame bi layago dege lo hongo halu hene.   
\p
\v 16 Tigua agali mariali bi mo wahaga uruni ti ani helowa agali maru tigua tinaga genda ogoni agali haguanerume mo tiga bilo lalu hene. Agali haguane uruni Esera halu tinaga mini mbuga mbiraha gilibu wini. Ani buwa ege pininaga horo pigane layagola agali mbira mbira dindi tara wali Ngode Datagaliwabe mitangi nabiaga berearu dabu bu hayadaruni tinaga mana uruni mo tiga bule ibidaba lalu olaga bini.  
\v 17 Tigua biabe ogoni ege tebirani bu maro bini.   
\s1 Agali maru dindi tara wali dabu bu henerunaga mini uru  
\p
\v 18 Loma binigo mo miaga agaliru wali tara dabu bu henerunaga mini uru. Yosua ibu hamenerunaga hameigini aria Yahosadaga igini Masea Eliese Yaribi Gedalia imaru ti wali tara dabu bu hene.  
\v 19 Agali uruni tigua ti one waholeore lalu bi lowini. Ani lowialu tinime ko bu harimada lo manda bialu tigua nogo sibi wangabe mbira dege dege tinaga ko bialu hayadarunaga Ngode Datagaliwabehanda domo wahelonaga loma bialu bo delole haru ibini.   
\p
\v 20 Ani bialu Ime hameigini aria Hanani Sebadiala libubi ani bini.   
\p
\v 21 Harimi hameigini aria Masea Elaya Semaia Yahiele Usia imaru tibi nde ani dege bini.   
\p
\v 22 Pasuru hameigini aria Elioenai Masea Isimaele Nedanele Yosabada Elasa imaru tibi ani bini.   
\p
\v 23 Libaiali aria dindi tara wali Ngode Datagaliwabe mitangi nabiaga berearu dabu bu henedaru tinaga mini uru. Yosabadabi Simaibi Kelaia ibu mini mende Kelida ibubi Pedahia Yuda Eliesebi tigua nde ani dege bini.   
\p
\v 24 Agali iba gana lalu ngida ba pilipe la bigi biaga howa dindi tara wali Ngode Datagaliwabe mitangi nabiaga bereago dabu bu henego ibu mini Eliasibi hene.  
\p Anduane Homogonaga anda mamage haga agali tebirali Salumu Teleme Uri imaru tibi nde anidagua dege dabu bu hene.   
\p
\v 25 Isaraeleali maru wali tara dabu bu henerunaga mini uru. Paroso hameigini aria Lamia Isia Malagiya Miyamini Eleasa Malagiya mendebi Benaiabi uruni tibi dabu bu hene.   
\p
\v 26 Ani heagola Elama hameigini aria nde waragariali Madania Segaraia Yahiele Abadi Yaremodo Elaya imaru tibi nde ani dabu bu hene.   
\p
\v 27 Sadu hameigini aria nde waragariali dege Elioenai Eliasibi Madania Yaremodo Sabada Asisa imaru tibi ani dabu bu hene.   
\p
\v 28 Bebai hameigini aria tibi nde mariali henego ti mini Yahohanana Hanania Sabai Adalai uruni ti dabu bu hene.   
\p
\v 29 Bani hameigini aria waragariali Mesulama Malugu Adaia Yasubu Seala Yaremodo uruni hene.   
\p
\v 30 Pahadamoaba hameigini aria halirali Adana Kelala Benaia Masea Madania Besalele Binui Manase uruni hene.   
\p
\v 31-32 Harimi hameigini aria nde Eliese Isiya Malagiyabi Semaia Simeono Beniyaminibi Malugu Semariabi uruni ti dabu bu hene.   
\p
\v 33 Hasumu hameigini aria nde Madenai Madada Sabada Elibelede Yaremai Manase Simai imaru tibi dabu bu hene.   
\p
\v 34-37 Bani hameigini aria Madai Amarama Uele Benaia Bedia Keluhi Bania Meremodo Eliasibi Madania Madenai Yosu imaru tibi dabu bu haga bini.   
\p
\v 38-42 Binui hameigini aria nde Simai Selemia Nadana Adaia imaru hene. Ani bialu Maganadebai Sasai Sarai Asarele Selemia imaru hene. Ani bialu Semaria Salumu Amaria Yosebe imarubi uruni ti bibahende dabu bu hene.   
\p
\v 43 Nebo hameigini aria nde Yaiele Madidia Sabada Sebina Yadai Yoele Benaia imaru uruni ti hene.   
\p
\v 44 Agali mini o daga larimaruni bibahendeme dindi tara wali Ngode Datagaliwabe mitangi nabiaga berearu dabu bu henego wali waneiginirubi bibahende, Tíni dalu wahalu pudaba, lai hene.