\id EZK - Huli Bible [hui] -Papua New Guinea 2011 (web version -2013 bd) 
\h ESEGIELE 
\toc1 Esegiele 
\toc2 Esegiele 
\toc3 Ese 
\mt1 Esegiele  
\imt1 Mbuga ogoha gilibu ngarunaga nemandi ogo  
\ip Isaraele wali agalinaga waitigi Babilono agalime Yarusaleme balu karulai halu wali agali maru hearu Babilono dindiha garabayabu yalu pene. Ani piyangi tigua Esegiele ibubi ti haru garabaya bu yalu pene. Ibu Babilono dindini haru pu hearia Ngode Datagaliwabenaga mana \w latagi\w* haga howa ibugua wali agali ibu heba mandagi garabayabu hearuhondo bi mana lamialu hene. Ibu ani hearia dege wali agali maru Yarusalemeni yu wahene hearu ti heagoha mani bulebiragonagabi mbiwia halu latagi halu hene. Mbuga ogoniha bi galone waragaria gilibu wigi bidago uru  
\ib  
\io1 Mbira  
\io1 Ngode Datagaliwabehanda ibunaga wá taraore holenebi mini baya buruguleore holenebi de gandebaha howa Esegielehondo walia hene. Ani walia howa ibugua Esegiele ibunaga mana latagi haga helo dabo helene.  
\io1 Mende  
\io1 Ngode Datagaliwabehanda Yuda wali agali tiha mo ko holene timbuni wulebiragobi Yarusaleme gialobagabu waholebiragobi lalu de hondo halimu lenego nga.  
\io1 Tebone  
\io1 Dindi tara tarani wali agali marume Yuda wali agali mo hondo hayagonaga Ngode Datagaliwabehanda uruni ti pani mule lenego gilibu wini nga.  
\io1 Mane  
\io1 Esegiele ibugua lalu Ngode Datagaliwabehanda mani wali agali bu miniha mo palia holene yu holebiragobi bayale holene wulebiragobi lo nga lenego gilibu nga.  
\io1 Dauni  
\io1 Dindi tara taranaga haru haga agali haguane Gogohondo mo ko holene wulebirago mbiwia halu latagi hene.  
\io1 Waragane  
\io1 Isaraele wali agali tininaga dindi mo tigabu dai bialu Ngode Datagaliwabenaga anda lomabia hene timbuni biago lone bulebira lene.  
\ib  
\ip Yuda wali agali Babilono dindini hayadarume tinaga dindini Ngode Datagaliwabenaga anda loma bia hene biago helalu ibuwa dindi taraha pu kamagonida mandabu hene. Ani howa ti Ngode Datagaliwabe heba kamabe be tini hangu howa kamabe toba howa ti wá nale hope hene. Ani heagola Esegiele ibugua wali agali biarume Ngode Datagaliwabe ibu ti heba haabo kago manda bilobi ibunaga mana yutiga bilobi mo hongo halu hene. Ani lalu howa ibugua wali agali mbira hangu hangu hearunaga mini mo hongo halu mana tigabi ngaru hangu bialu halimu laga bialu hene.  
\ip Horo mbiru mbirungi Ngode Datagaliwabehanda Esegielehondo galone de gandebaha mo walia haga bini. Ani biyagola Esegiele ibugua de gandeba uruni garea lalu wali agali lamigi bini. Horo marungi ibunaga bi uruni ogo ale layada lalu wále ngagola iname hale halu howa turu haramali. Anigo ibunaga bi maru irane agibe tobahe galone taibi ngagola iname galone baya hangu handa walia naharamali.  
\iot Bulu baga buwa kuni gilibu ngago (1.1–3.27)  
\io1 Ngode Datagaliwabehanda Esegiele dabalu olenego \ior 4.1–24.27\ior*  
\io1 Yarusaleme mo ko holebirago mbiwia henego \ior 25.1–32.32\ior*  
\io1 Hameigini dindi tara tarani karu mo ko holebira lenego \ior 33.1–37.28\ior*  
\io1 Ngode Datagaliwabehanda Isaraele wali agali mo bayale holebero lenego \ior 38.1–39.29\ior*  
\io1 Kini Gogonaga hongo bo podolebirago mbiwia henego \ior 40.1–48.35\ior*  
\io1 Esegielehanda de gandeba handalu hearia Ngode Datagaliwabenaga anda bayaleore bulebiragonaga hendenego  
\c 1  
\ms1 Esegiele ibugua de gandeba mbira hendenego (1.1–7.27)  
\s1 Esegiele ibugua Ngode Datagaliwabenaga haru howa biragane dagia wiaria hendenego ogo  
\p
\v 1 Esegielehanda lalu, Babilono agalirume ina bo garabaya buwa Iba Keba peagoha mali pira tebirani (30) ege mane hayagola horo dauningi i̱na de gandeba handalu hewaria hari daligaha panga dugua hayagola Ngode Datagaliwabe hearia handaru.\x + \xo 1.1 \xt Mo 19.11\x*   
\p
\v 2 Horo ogoningi Babilonoalirume Yarusaleme lone puwa wai bialu tigua Yudanaga Kini Yahoiagini minu yalu ibinigo mali duria nigonihayagi howa de gandeba ogoni handaru.\x + \xo 1.2 \xt 2 Kin 24.10-16, 2 Bit 36.9-10\x*  
\v 3 I̱ Busi igini Esegiele \w loma\w* binigo mo miaga howa Iba Keba peago angeni hewaria Anduane Homogohanda i̱ olayuago hale halu ibunaga hongo holene i̱ha karula hayuane handaru.   
\p
\v 4 I̱na handa daga ho hewaria dalu puyabu beraliba heba timbuniore uyurahayagi howa ibiyago handaru. Hari beraliba ogoni hongo taraore howa hari daba bialu ira hungu ale deaore dege ibuwa kilikulu lalu purogo laya. Ogoni dombeneha mbirale ege to̱le̱ mini boronosi ngiringarale ale mbira hoaile wiaria handaru.  
\v 5 Ira hungu ale deagoha i̱na agali handalehe maria hearia handaru. Tinaga tingini agali handalehe dege howa\x + \xo 1.5 \xt Mo 4.6\x*  
\v 6 tinaga dengui maria degedege howa tinaga babaganebi maria degedege hearia handaru.  
\v 7 Tinaga ge tigabi degedege howa ge giba nogo bulumaganaga ale hearia handaru. Ai tinaga ge giba uruni ngaraleore ege to̱le̱ mini boronosi baya hangu domowa mbirale ha̱i̱ howa ngelene mbauleyane handaru.  
\v 8 Tinaga babagane hearu andaneha gi agalinaga ale hearia handaru.  
\v 9 Uruni ti bibahendeme tinaga babagane yanga lowa tini handa edene buwa babagane mendehayagi mo gimbu buwa nguni mo maria howa ti pole howa ho beregeda nabi ani kaore dege ibaga bialu tigatiga piagaya.   
\p
\v 10 Ti bibahendenaga haguane mbiraoreni dengui maria degedege howa uruni ti mbira taratara dege hea. Mbirago agali handaleheya. Dengui gi tigahayagi heago ibu budi gabua timbuni laiono handaleheya. Tebone gi lehayagi heago ibu nogo bulumaga dengui handalehe halu ere mbirahayagi heago ibu ega bodo hariawe timbuninaga dengui handalehe hearia handaru.\x + \xo 1.10 \xt Ese 10.14, Mo 4.7\x*  
\v 11 Tinaga dengui ogonibi haga winiyago ai tinaga babagane kiragome yanga lalu nguni mo gimbu gimbu buwa babagane kira mende degedegeme tininaga tingini dambi hagaya.  
\v 12 Tinaga de maria degedege hayarume de kagohayagi handai hagaya. Ani howa ti mbirahayagi pole manda biyagua ti beregedolene henge nawi howa ta nabi pupe hagaya. Uruni tigua ogonidagua biagaya.   
\p
\v 13 Agali handalehe uruni ti heago dombeneni ira hungu ale mbira pu íbu bialu hari daba ale biyaria handaru.\x + \xo 1.13 \xt Mo 4.5\x*  
\v 14 Ani handaga bialu hewaria agali handalehe uruni ti gerai lalu pu íbu biragola abaleore handabe nahe hari daba mege lalu poralidagua piagaya.   
\p
\v 15 I̱na handalu hewaria uruni ti heagoria dindini tinaga ge haga wiagoria garo ge ale mbira mbira wiaria handaru.\x + \xo 1.15 \xt Ese 10.9-13\x*  
\v 16 Tinaga garo ge ale maria uruni bibahende ogobi degedege wuwa ege to̱le̱ uruni ambuabi ale ti bayaleore ngiringarale dedaibi muni dewame miaga wia. Garo ge ale maria uruni wiago andaneha nde garo ge ale maria mende wiago uruni handa amu nana bu polenedagua wia.  
\v 17 Ani biyadagome garo ge ale uruni tigua gibuni maria wiago bibahendeha pu íbu biai helonaga ani wia.  
\v 18 Ainde garo ge ale uruni timbuni gibiore wiagola hondowa i̱ gi timbuniore haru. Ani handalu hewaria garo ge ale uruninaga aeane heago bibahendeha handai holene de emene emene dewaore hearia handaru.\x + \xo 1.18 \xt Mo 4.8\x*   
\p
\v 19 Agali handalehe uruni ti pu íbu biragola garo ge ale uruni tibi heba pu íbu biagaya. Agali handalehe uruni ti yagalo yalu piyagua garo ge ale uruni tibi nde yagalo yalu uruni poradagua piagaya.  
\v 20 Uruni ti poabirago bibahendeha piai hagaya. Ti piyadagua garo ge ale biaru tibi nde ani piyago irane agali handalehe mariali biaru tigua handaya howa haru hagaya.  
\v 21 Ainde ti poragoha ti haru mandagi ibaga biai halu ti mbirani hondo haragoria ti haru mandagi hondo haga. Ai uruni ti yagalalu daliga iraga hayagua nde garo ge ale uruni tibi yagalalu ti haru piaga. Irane agali handalehe mariali urunime ti haru kagome ani biaga.   
\p
\v 22 Ani hondowa dege handalu hewaria ndisibe ale timbuni mbira mo beregedowa tibinihayagi yaraga hayaria handaru. Ai ndisibe ale ogoni ngarale iba wa̱yu aleyagola hondowa gi timbuniore haru. Iba wa̱yu ale ngarale ogonime agali handalehe mariali biaru daliagani heago handaru.\x + \xo 1.22 \xt Mo 4.6\x*  
\v 23 Agali handalehe mariali biaru ti ndisibe handalehe wagororo timbuni biagonaga andaneha howa tinaga babagane yanga lowa hea. Ani howa tinaga babagane nguni bibahende mo gimbu bu helowa ela hagahaga biagola handaru. Ani howa babagane kira mende hayadagome tininaga tingini dambi hea.  
\v 24 Ai tigua yaga layagola hale halu hewaria tinaga babagane pilipala layagome iba solowara yaribu biyagola u timbuni kulunduga laga biyabe toba howa wai biaga ami agali dewaore wai bule manda manda buwa tidiyu hene mbaulaya. Ani bialu tigua babagane yibiyabu lalu piyagola hale halu hewaria Anduane Homogo Hongo Haiheore kagonaga bi layuabe toba haru. Ti mbirani pu nabi howa tinaga babagane paulo haya.\x + \xo 1.24 \xt Mo 1.4-15, 19.6\x*  
\v 25 Ani heagola agali handalehe mariali biaru togoni ndisibe ale timbuni wiyagoha howa bi lalu hayuago hale haru.   
\p
\v 26 Ndisibe ale biagoria daligaha kininaga biragane dagia ale mbira wia. Dagia ogoni baya dege lalu mindibinaga hari mindini ale ege to̱le̱me wabiniya. Kininaga dagia ogoriani mbirale mbira agali handalehe berea.\x + \xo 1.26 \xt Ese 10.1, Mo 4.2-3\x*  
\v 27 Ogoni ibunaga tingini daligaha ege to̱le̱ boronosi iraha deledagola ngarale wiraligobi hea. Dindihayagi wá hagane hale ale howa wá hangume mabu bupe hea.\x + \xo 1.27 \xt Ese 8.2\x*  
\v 28 Wá ogoni ibunaga yári tara tara ni domo harini ngaligobi hea. Wá holene timbuni o handarudagoni Anduane Homogo ibuni hea manda biru.   
\c 2  
\s1 Anduane Homogohanda ibunaga bi mana Esegiele \w latagi\w* haga helo dabenego ogo  
\p
\v 1 I̱na uruni hondowa i̱ ge duli hanga howa ma podalu dindini bulu paliru. Ani wiwaria mbiralinaga bime i̱ olowa lalu, Dindiali-o í̠la bi lole kogo heya, layuago hale haru.  
\v 2 Ai bi layuagome leaore dege Ngode Datagaliwabenaga Dinini ibugua i̱ha karula howa i̱ abale mo heya haya. Ani heyu howa ibugua bi lone layuago hale halu hewaria ogodagua layua.\x + \xo 2.2 \xt Ese 3.24, Dan 8.18\x*  
\v 3 Dindiali-o í̠na áyu i̱naga Isaraele wali agali karia pobelo i̱na dabo helaro. Tigua i̱nihondo manga howa mine halu erembira ngialu tinaga mamalirume binidagua dege bialu kagoni.  
\v 4 Tinaga embone giambe mini ndibulo wahene howa tigua i̱ mo yo handalu heagome i̱na bi larugo nahale hayago ai í̠na ti karia i̱naga bi yalu pobelo hameledo. Í̠na tihondo i̱ Anduane Homogo Bibahende Haru Haame Ho Haga kogome bi larogoni, labe.  
\v 5 Anigo i̱naga bi ogo hale hayaguabi nahale hayaguabi wali agali uruni tigua i̱naga bi \w latagi\w* haga agali mbira ibilayago ti heba íbu henego manda bulebira, lene.   
\p
\v 6 Anigo dindiali-o tigua í̠hondo bi laragolabi gi nahabe. Tigua í̠naga bi larego mo hengedalu í̠ni tinaga bime mo ko holebira. Ani biragola í̠ ti dombeneha howa tinaga bime í̠ mo tandaga holene alipiago dibidabulo ngagoha yupeho haradagua bulebere. Ani howa ti de hondowabi tinaga bi lararu hale howabi gi nahe habe.  
\v 7 Tigua i̱naga bi hale habe manga halu i̱ erembira ngiaga kago í̠ manda bibe. Í̠na i̱naga bi larego tigua hale hayaguabi nahale hayaguabi harugo lowa i̱na bi ogo la larudagua bibahende lamiai habe.\x + \xo 2.7 \xt Yar 1.7, 1.17, Ese 3.10-11, 3.17\x*   
\p
\v 8 Dindiali-o i̱na bi larogo baya hangu hale ha. Í̠na Isaraele wali agali karume i̱ erembira ngialu hagadagua nahabe. Ai í̠na ne ha̱lalu mbirale o ngerogo na, lalu bi lai hene.  
\v 9 Bi ogoni lai heagola handalu hewaria gi mbirame beba ale mbira i̱ hewagoha kaware yaede hayago handaru.\x + \xo 2.9 \xt Mo 5.1\x*  
\v 10 Beba ale ogoni handalu hewaria lunioreyago tigua mo bo bigi buwa kabu biniya. Ai gi biagome beba ale biago anga layagola handalu hewaria bi halu kirani gilibu wiaria handaru. Bi gilibu wiyadagoni handalu hewaria agalime bu miniha genda yu howa dugu taraore biniru dara howa iba gana dara holenenaga laga biniru gilibu wia. Beba ale biagoni bi hangume to̱latagi hearia handaru.   
\c 3  
\p
\v 1 Ani handalu hewaria Ngode Datagaliwabehanda i̱hondo lalu, Dindiali-o í̠na beba ale ogoni nabe. Nowa mani Isaraele wali agali karuhondo beba ale ogoniha bi gilibu ngaru lamule pobe, laya.\x + \xo 3.1 \xt Mo 10.9-10\x*   
\p
\v 2 Ani layagola i̱naga ne ha̱larugola ibugua beba ale biago noliya ngiya.  
\v 3 Ani ngialu howa lalu, Dindiali-o beba ale o ngerogoni tombeore helo nendabu nabe, laya. Ani layagola beba ale biago i̱na nalu hewaria dendebiore mone ibane aleya.\x + \xo 3.3 \xt Iba 19.10, 119.103, Yar 15.16\x*   
\p
\v 4 No hewagola Ngode Datagaliwabehanda i̱hondo ogodagua layago, Ai dindiali-o Isaraele wali agaliru karia puwa í̠hondo i̱na bi langiruruni bibahende lamiai hole pobe.  
\v 5 Pialu wali agali bi tara laga karuha ndo Isaraele wali agaliru hanguhondo lamule pobe larogoni.  
\v 6 Ai dindi timbuni ngagoha wali agalirume bi tara í̠ ala hale nahene ale laga laga biaga bu karuha pobe ledole nde wali agali dindi odaruniha karume í̠naga bi bibahende hale hai kale.  
\v 7 Anigo Isaraele wali agali ti mbiraorealime í̠na bi larego hale naholeorebira. Tigua i̱ninaga bibi hale nahagadago í̠naga bi agua hale helodabe. Irane tinaga mini giambe ho kagome i̱naga bi hale habe manga howa ti bibahendeme bi mo wahaga dege bu karuni.  
\v 8 Ani anigo áyu i̱na í̠naga embonebi tinaga mini giambe ogonibi dege helarugola í̠na i̱naga bi mana hongo howa gi nahe elahe howa lamialu holebere.  
\v 9 I̱na í̠ ege to̱le̱ baya tara mbira muni dewaoreme miaga mini daimono giambe hongo tarahe ngagobi helarogola í̠naga hongome tinaga hongo emene yu kago bope holebere. Aniore buleberogo tigua i̱naga bi mana mo wahaga kago manda bialu í̠na tihondo gi nahabe, lalu lene.   
\p
\v 10 Ani lowa Ngode Datagaliwabehanda laabo halu lalu, Dindiali-o i̱na bi larogo baya hanguore hale howa mbira embeda halu yu wanahabe.  
\v 11 Ai í̠naga damene Isaraele wali agali Babilono dindini tinaga waitigirume bo garabayabu yalu ibini biaru karia puwa Anduane Homogo Bibahende Haru Haame Ho Haga i̱ kogome i̱naga bi langerogoni tihondo lamibe. Bi ogoni tigua hale hayaguabi nahale hayaguabi harugo i̱naga bi ogoni tihondo latagi halu lamibe, lene.   
\p
\v 12 Mani howa Ngode Datagaliwabenaga Dinini ibugua i̱ mo yaragaore haya. Ani biyagola i̱ erembiraha bi mbira hongo howa layuago hale halu hewaria bi ogonime lalu, Anduane Homogo dahuliya andaga kago ibunaga hongo timbuni holenebi wá timbuniore holenebi ngagonaga ibu mini yaraga hadaba, layuago hale haru.  
\v 13 Ani hale halu hewaria agali handalehe mariali biaru yagalo yalu piyagola tinaga babagane biarume pilipala lama pialu tininaga babagane ngunime ela hagahaga biaore piayuago hale haru. Garo ge ale timbuni biarubi piayuane hale haru. Ai uruni ti pialu howa kulu timbuni lalu dindi dumbirumbi ale biayua.  
\v 14 Ani biyagola Anduane Homogonaga hongo holene i̱ha karula howa ibunaga Dinini ibugua i̱ mo yaraga halu yalu piyagola i̱ genda howa keba haru.  
\v 15 Ai Anduane Homogonaga Dinini ibugua i̱ haru halu Telabibi taono Iba Keba angeni Isaraele wali agaliru garabaya biabe ale bialu bu heagoria haru ibiya. I̱na mbirale tara tara o handarudarunime i̱naga bu mini mo tara howa genda bialu miniha biabe bulene hongo nahayagola ema nabi horo karu dindi ogoniha biraru, lalu Esegielehanda lene.   
\s1 Anduane Homogohanda Esegiele ibugua Isaraele wali agaliru mamageho helo dabo helenego ogo  
\r (Esegiele 33.1-9)  
\p
\v 16 Horo karu ogoni piai heagola Anduane Homogohanda i̱hondo bi lone ogodagua laya.  
\v 17 Dindiali-o i̱na í̠ Isaraele wali agali mamage habelo dabo helarogoni. I̱naga bi hongoheore tihondo lamibelo i̱na í̠hondo langigi bulebero.  
\v 18 Agali mbirame mana ko ngaru biragonaga ibu homolebira laruyagua bi ogoni í̠na agali ogonihondo ogodagua laya lalu lamialu, Ai í̠ nahome holeyagua mana ko bialu haridagoni wahalu mini beregedabe, lalu lamibe. Ani nalamiriyagua nde tinaga ko biyadagoni ngaore homolebira. Anigo ibu homayagonaga irane i̱ninaga deni í̠na nalamirigome hale nahe homayagoni manda bulebero.  
\v 19 Ai í̠na agali ko biaga kago lamidegola ibugua ko biyago wa nahayagua nde ibuni mo ko howa homolebira. Anidagua biyagua ogoni í̠ha bi nawi pani í̠ nahomolebere.   
\p
\v 20 Agali mbira mini tigabiwi kagome mana ko lone bia dai bialu kagoha i̱na ibu agi birabe hondole ba hondolene mbira ibilo warogola agali ogoni ibugua mana ko biyagua í̠na ibuhondo mana ko birago wahalu mini beregedabe lalu nalamiriyagua ibu ho ko halu homolebira. Homaragola i̱na mana bayale ibugua abale bialu hayago manda nabulebero. Ibugua mana ko áyu birago hondowa ibuni mo ko howa pani mialu home lelolebero. Anigo ibu homayagonaga irane í̠ni i̱naga deni agali ogoni lamia nabirigome homaya manda bulebero.\x + \xo 3.20 \xt Ese 18.24, 33.12-13\x*  
\v 21 Ai í̠na agali tigabi mbira kagohondo mana ko nabi habe laregola ibugua nabi howa tigabi dege bialu haabo hayagua ogoni ibu nahomolebira. Ani biragola í̠bi ibuhondo bi lamirigome nde nahome bayale dege holebere, lene.   
\s1 Anduane Homogohanda Esegielenaga bi ndibulo wa helenego ogo  
\p
\v 22 I̱ dindi ogoniha hewaria Anduane Homogonaga hongo i̱ha ibayuane handaru. Ani ibuwa ibugua i̱hondo lalu, Ai heyalu dindi ulini unu ngagoha pobe. Dindi ogoniha pu kegola i̱na í̠hondo bi languliya, laya.   
\p
\v 23 Ani laya handala i̱na dindi uliuli wiagoha pu howa handalu hewaria Anduane Homogonaga wá holene timbuni Iba Keba peagoha angeni ala hendenegobi dege handaru. Ani hondowa ai i̱ ge duli hanga howa ma podalu bulu paliru.  
\v 24 Ani bialu hewaria Ngode Datagaliwabenaga Dinini ibugua ibuwa i̱ hongo ngialu mo heya haya. Ani heyu hewagola Anduane Homogohanda lalu, Dindiali-o í̠ni dindi pialu andaga tamuha puwa panga payatagi howa birabe.  
\v 25 Ani bederia mani agali marume pu yalu ibuwa í̠ minu daba holebira. Ani biragola í̠na andaga yu wahalu tagira pialu wali agali hondo pobe nahe holebere.  
\v 26 Ani bedegola wali agali i̱naga bi mana mo wahaga karuhondo bi mana nalamibelonaga i̱na í̠naga hége ema nabibehelo helolebero.\x + \xo 3.26 \xt Ese 2.5-7, 24.27, Lg 1.20-22\x*  
\v 27 Anigo ai horo marungi wali agaliruhondo i̱naga bi mana lamibelo hamelo kongi bi baya hangu lamibelonaga i̱na í̠naga hége mo bayale halu bi lelolebero. Bi lalu howa bi ogoni Anduane Homogo Bibahende Haru Haame Ho Haga i̱ kogome laro lolebere. Í̠na ani laregola marume hale holebira. Marume í̠na bi larego hale howa donge halu erembira ngialu polebira. Ani bulebirago irane ti wali agali bi galone mo wahaga kagome ani bulebira, lalu lene.\x + \xo 3.27 \xt Ese 12.2-3, 24.27, 33.22\x*   
\c 4  
\s1 Yarusaleme bo gialo wahai holebira lalu latagi henego ogo  
\p
\v 1 Ngode Datagaliwabehanda lalu, Dindiali-o í̠na ege to̱le̱ ale dindime wabini podene mbira mo ngelowa ogoriani Yarusaleme tano ngago handalehe bigiya podalu gili bibe.  
\v 2 Ani buwa gili birigoria kawareni mbirale ami agalime wai bialu tano ho mabu bule biagadagua bibahende wabiai habe. Gana mbira tano ogoni wa mabu bialu pabe kagoria ami agali heyu howa wai bule dindi hono wima irigi hagadagua helalu bibe. Ami agalinaga balai anda tano ogoni kaware bu helalu mbirale hongohe guruyagu̱ bule lowa pu pongo biagadagua buwa ege to̱le̱ timbuni pu nguinini pongobia howa wai pabe bo gialaga ngagonaga bigiya wabu ngelalu bibe.  
\v 3 Ani bialu parabane mbira muwa í̠nila tanonaga bigiya wabu wirigola hengene ngagoria ngelabe. Ani bialu í̠ni tanoha handade howa wai bule nendebu haradagua bu habe. Wali agali bu karume í̠na berego de hondowa mani ami agali ibalu tinaga tano ngago karulolobada manda bilo manane ani bibe.   
\p
\v 4-5 Ani bialu mani í̠naga gi lehayagi paluwa wali agali Isaraele dindiha bu karume ko bibahende biyarunaga genda yu palibe. Ani paliaho ngene dege horo handari tebirani pira dira (390) bibahende palibe. Horo handari tebirani pira dira (390) uruni mali handari tebirani pira dira (390) Isaraele wali agali bibahende ko tinime biyagonaga genda yu holebiragonaga walia halu ani bibe.  
\v 6 Horo ogonidagua í̠na gi leha palialu horo ogoni piai haragola beregedalu gi tigahayagi palibe. Ani paluwa Yuda wali agalime ko biyagonaga horo pira mariani (40) genda yu palibe. Horo pira maria (40) ogoni mali pira mariani (40) Yuda wali agali tigua mana ko bialu hayagonaga pani genda yu holebiragonaga walia halu ani bibe.   
\p
\v 7 Í̠ ani paluwa mbirale bigiya ami agalime wai bialu Yarusaleme karulole bialu helarigo handaya habe. Ani bialu í̠ni wai bule nende biaho haradagua bu howa lalu, Tano ogo bo haealabaga bialu mo ko harogoni, laga bialu habe.  
\v 8 I̱na í̠ pume minu daba harogola í̠ hongo halu tingini beregedabe nahe holebere. Anidagua bialu kene dege í̠naga horo langirugo piai helabe.   
\p
\v 9 Ani bialu í̠na widi marubi bali marubi paboro tara tara kirabi tomo tara tara kira dege widi alebi uruni bibahende biamaga howa mo beregeda beregeda bialu mberedi wabuwa ogoni dege horo handari tebirani pira dira (390) nalu gi lehayagi palirigoria paliaho wiaabo habe.  
\v 10 Í̠na mberedi uruni genda magi emene dege gi mbira hangu (garama 230) horo bibahendengi nalu bolangua howa nanabe.  
\v 11 Iba naregobi nde manda buwa horo mbiru gabo be kira dege naga bibe. No bolangua nahabe.  
\v 12 Ani bialu wali agali ti to wahene lebolehe ngago mo wibe. Ti ogoni ira delowa mberedi ogoriani hirabe. Mberedi uruni hirarego wali agali bu karume de hendelo nalu habe, lalu lene.   
\p
\v 13 Anduane Homogohanda lalu, Í̠na mbirale uruni bu walia holeberego mani Isaraele wali agali tigua bialu holebira. Mani waitigime Isaraele dindi wai bialu karulai helo i̱na yupe harogola tigua ibalu dindi bo podai halu Isaraele wali agali dindi tara tara ngaruha garabaya bu yalu polebira. Tigua dindi tara uruniha pu howa tomo ko tara tara i̱naga deni dodohe nanolene ngago lo wirugoni nalu holebira, lalu lene.   
\p
\v 14 Bi uruni layagola hale howa i̱na ladai bialu lalu, Anduane Homogo Bibahende Haru Haame Ho Haga-o i̱na mana urunidagua nabulebero. Ani nabuleore. Í̠naga deni i̱ni mo dodohe nahagaore ndobe. Bamba i̱ igiri emeneni howa hama ibinigo áyu kogonibi i̱na nogo minana homenebi gabua marume bo wahene ngarubi mbira nanagaore kogoni. Mbirale nanolene lo winiru í̠naga deni dodohe lene ngago nanaruli, laru.\x + \xo 4.14 \xt LBM 17.15, Ais 65.4, Ese 20.49, Ab 10.14\x*   
\p
\v 15 Ngode Datagaliwabehanda lalu, Aniyagua nde mberedi hirarego wali agali time nahiri wahalu nogo bulumaga time hirabe, laya.\f + \fr 4.15 \ft Esegiele ibu wali agali heba waitigime dindi taraha garabaya bu yalu pu heagoria ira delolene nawidagola tigua wali agali dindi ogoria hearume biagadagua bialu nogo bulumaga time ira delaga hene.\f*   
\p
\v 16 Ibugua lalu, Dindiali-o i̱na Yarusaleme wali agali hina garime mo ko hai helolebero. Ani berogola wali agali bibahendeme mogo lai halu miniha genda yu hai holebira. Ani biragola wali agali tigua hina ibabi horo mbira mbirani nolene bayuwa mo tawe howa nalu holebira.  
\v 17 Tinaga hina ibabi mo ndia harogola tinaga bu miniha genda timbuni ho howa mana ko biyarunaga ti tingini obiore holebira, laya.   
\ms1 Esegielehanda de gandaba handalu hearia Ngode Datagaliwabenaga anda bayaleore bulebirago hendedenego (40.1–48.35)  
\c 5  
\s1 Esegielehanda ibunaga mandari podenego ogo  
\p
\v 1 Anduane Homogohanda laabo halu lalu, Dindiali-o í̠na ayu tibu ne gadeleore ngago mo yuwa í̠naga mandari angaribi podai habe. Ani bialu mandari angari uruni genda magi handagane ngagoria magi handalu halu tebo mo tale bibe.  
\v 2 Ala i̱na horo ogodagua palibe lalu langirugo bolangua halu piai hayagua heyabe. Manane ogoni Isaraele wali agali bu karuhondo waitigime Yarusaleme ibalu karulaya lalu mo walia holebere. Palialu heyuwa í̠naga mandari halu tebo talebu wirigo halu mbirago Yarusaleme mitangi bialu bigiya ege to̱le̱ ale dindime wabu wirigoriani delabe. Halu mende podo wirigo ege to̱le̱ ale mbalape wirigoha pu mabu bialu mendehayagi puwa í̠naga ayu tibu ne gadele biagome podopaya bibe. Halu tebonego puyabume pulo yalu pelo daliga baraga habe. Ani beregola i̱na i̱naga ayu tibu ne gadele ngago mo yalu mandari puyabume yalu porago talima poliya.  
\v 3 Anigo mandari emene mbira ngelo howa í̠ninaga aga ngunime paulo dambi habe.  
\v 4 Ani bialu mandari mbira mbira í̠naga agaha paulo dambi harigo yamigi bialu irani delaga bibe. Ani buleberegoni Isaraele wali agali dai holebiragonaga manane walia holebere, laya, lene.   
\p
\v 5 Ani lowa Anduane Homogo Bibahende Haru Haame Ho Haga kago ibugua i̱hondo langialu lalu, Í̠ Yarusaleme tano ngago de handa. Dindi bibahende wuyu mabu bidarunaga hanuniore Yarusaleme ngeledogoni.  
\v 6 Ani ngeledogoyu Yarusaleme wali agali tigua doga halu i̱naga bi mo wahalu ti koorene ko haya. Wali agali dindi tara taraha bu hearunaga mana ko wiago emene nira lowa Yarusaleme wali agalime ko timbuniore bialu ka. Yarusaleme wali agalime i̱naga bi larogo hale habe manga howa mana bulene nga lo wirugo pugualu haabo kagoni.  
\v 7 Ani bialu kago manda bialu i̱na tíhondo bi ogodagua laro, Yarusaleme wali agali tígua bi o larogo hale halimu. I̱ Anduane Homogo Bibahende Haru Haame Ho haga kogo i̱na tíhondo laro. Tígua i̱naga bi hale habe manga howa i̱naga bi mana lo ngogobi mo wahalu puwa hameigini tara tara dindi tí baba wiapara para bima pedarunaga mana ko ngago taluwa bialu kamigoni. Ani bialu tígua mine halu mana ko bialu kamigoni koorene ko wali agali dindi uruniha karume mana ko bialu karu bolangua howa bialu kami.  
\v 8 Anidagua bialu kamigo mitangi bialu Anduane Homogo Bibahende Haru Haame Ho Haga kogo i̱na tíhondo bi laro. I̱na tíhondo turu naheore howa tí baba waitigi ho kogoni. Anigo i̱na wali agali tara tara bibahende bu karunaga deni howa tí manani helolebero.  
\v 9 Tígua mana ko dewaore i̱na hame nalewago birimigonaga pani ala nginidaguabi ndo mani nguleberodaguabi ndo áyu ogoria timbuniore timbu nalimulo ngulebero.  
\v 10 I̱na tí pani nalimulo mo ngerongi aba ai̱yalame tinaga waneigini bo nalu waneiginime ti aba ai̱yalabi bo nalu holebira. I̱na tí pani nalimulo ngule ngogo ngerongi wali agali dewaore homai holebira. Ani bialu maru homa nabi yu wahene karu ti minalu dindi tara tara ngaruha purogo lelolebero.\x + \xo 5.10 \xt LBM 26.29, Dug 4.10, Ese 6.8, Amo 9.9, Seg 7.14\x*   
\p
\v 11 I̱ Anduane Homogo Bibahende Haru Haame Ho Haga Ngode Datagaliwabe haluhe kogome tíhondo heneneore bulego larogo i̱na tí pani nalimulo ngialu mo koore holebero. Anidagua buleberogo irane tígua mana ko ngubiore wiaru biaabo halu i̱ninaga deni i̱naga anda hewago mo mebia helarimigonaga pani ngulebero. Ani birimigonaga i̱na tíhondo dara nahe howa agalime tani pudu wahagadagua tí pani nalimulo ngialu pudu waholebero.  
\v 12 I̱na tí pani nolene ogoni halu tebo mo talebia holebero. Wabuni halu mbirago ti hina gari howa warago timbuniore balu tanoha homo wulebira. Wabuni halu mendego ti waitigi ibalu wai biagane ayu tibume tano pabe tagirahayagi dibu wulebira. Wabuni halu tebonego ti tíninaga dindi wahalu dindi tara tara ngaruha hama pugupugu bilo taliatogo lelarogola waitigi bu karume talima pugupugu bialu bai helolebero.   
\p
\v 13 Ani biragola i̱naga miniha keba tandagala nalu kogo ereba helonaga tíha biba helolebero. Mbirale o bulebira laroruni tagira ibirangi tígua i̱na bi áyu larogoni mitangi bialu i̱ Anduane Homogo mbirale bi pupu wulenaga gime wabini ngaru aria mbirame i̱naga henge aribia helo yupe nahaga henedane hondoleberemi.  
\v 14 Ainde tí mo ko hai hene ngamigola hameigini tara tara tí baba mandagi handa a̱i̱na̱i̱ padarume tí de hondowa lalu, Bo haealabaga bini o ngago de handa nabere. Anduane Homogohanda tinaga mana ko bialu heago hondowa ti pani nelo minida, lalu handa tara haga bulebira.   
\p
\v 15 I̱na tí baba tandaga timbuni ho kogo tí pani nalimulo mo ngiaore bulebero. Anidagua berogola hameigini tara tara bu karume tí pani naramigo hondowa ti gi timbuni holebira. Tigua tí ko ngubida lalu hondo oba halu mege bulebira.  
\v 16 I̱na hina gari tíha anda ibilarogola tomo mbira nolene nawi dege wiaabo holebira. Wali agali bu kamiru tí homai halimulonaga hina gari ogoni ibilarogola timume bogaragola tandaga biagadagua tí hina garime tandaga naabo halu homoleberemi.  
\v 17 I̱na hina gari ibilalu nogo biango gabua bu karubi ibilarogome tínaga waneigini bu karu bo gililoyu ibagabu ngelolebira. Ani bialu i̱na tíha warago timbunibi waitigi bu karume tí baba wai bialu bo wahai helobi ibilolebero. I̱ Anduane Homogo i̱na bi o ledogoniore, laya.\x + \xo 5.17 \xt Mo 6.8\x*   
\c 6  
\s1 Mbirale gime wabini wiaruhondo bi pupu wiaga hearu baba keba henego ogo  
\p
\v 1 Anduane Homogohanda i̱hondo lalu,  
\v 2 Dindiali-o í̠na Isaraele dindinaga hari wedaruha handa amu nana bialu i̱naga bi ogo tihondo lamibe.  
\v 3 Hari wedarubi dindi ulini panda panda ngarubi tihondo lamialu lalu, Anduane Homogo Bibahende Haru Haame Ho Haga kogo i̱na waitigi ibilarogola tigua dama mitangi bialu mbirale gime wabini bu ngaruhondo wali agalime bi pupu wule piaga ngaru bo gialabaga bilolebero.  
\v 4 Waitigi urunime ibalu nogo tara tara bo lomabu delaga dabu bu heledaru bo gialo wahai halu ira hagua ngabilo \w inisenesi\w* lomabu delaga dabu bu heledarubi bo gialo wahai holebira. Ani bialu tigua Isaraele wali agali bu karu tinaga mbirale dama mitangi bialu gime wabu ngaruhondo bi pupu wialu karia ti bo waholebira.  
\v 5 Ani bo wahowa tinaga tingini mbirale gime wabu ngagoria ngelowa Isaraele wali agali uruninaga kunibi tinaga lomabu delaga dabu kagoha wuyu mabu bu wima polebira.  
\v 6 Waitigime ibalu Isaraele dindinaga tanoru bo haealabaga biai halu wali agalime bi pupu wiaga anda bu heledarubi mo ko halu bo gialo wahai holebira. Tigua lomabu delaga dabu bu heledarubi mbirale dama mitangi bialu gime wabu ngarubi bo gingirulo wahai halu ira hagua ngabiaga inisenesi lomabu delaga dabu heledarubi bo gialo wahaiore holebira. Anidagua bilarogola Isaraele wali agali tigua mana ko bialu gime wabigi biyaru bibahende ereba hai holebira.  
\v 7 Waitigime Isaraele dindi bibahendeha piai halu Isaraele wali agali bu karu dewaore homelo bo wahaga bulebira. Anidagua biragola Isaraele wali agali maru homa nabi yu wahene bu karu tigua i̱ni Anduane Homogoore henedane manda bulebira.   
\p
\v 8 Ani bialu waitigime wali agali maru ba nabi helene karu i̱na ti hameigini tara tara dindi ngaruha purogo lelolebero.\x + \xo 6.8 \xt Ais 6.13, Yar 30.11, 44.14, 44.28, Ese 7.16\x*  
\v 9 Ani purogo lelarogola ti dindi kaundia uruniha garabaya pu howa tigua i̱ mitangi bu dai bialu tinime kagua bialu harimagome i̱ mo genda harimada lo manda bulebira. Tigua i̱ erembira ngialu mbirale gime wabini wiaru hamelo aribia howa o biaruhondo bi pupu wialu harimagobi iname mana ko ngubiore bialu harimadalo manda bialu taga timbuniore holebira.  
\v 10 Ani taga howa i̱ Anduane Homogo i̱na bi hongohe áyu larogoni bame ti mo gi halu ndo lenedane hondolebira, lalu Anduane Homogohanda lene.\x + \xo 6.10 \xt Yar 5.12-14, Ese 6.7\x*   
\p
\v 11 Anduane Homogo Bibahende Haru Haame Ho Haga kagome i̱hondo laabo halu lalu, Bu miniha genda halu geme dindi hongo howa hengedabe. Isaraele wali agalime mana ko ngubi dewaore biyarunaga dara howa dugu bibe. Heneneore tigua mana urunidagua bialu hayarume maru waitigime bo wahai halu maru hina garime homalu ti marubi warago tara baragome homai holebira.  
\v 12 Bibahendeore homai holene wulebira. Anigo maru dindi kaundiaha karu ti nde warago balu home lelolebero. Kawareni karu waitigi ibiragome bo wahalu yu wahene maru karu ti hina garime home lelolebero. I̱na urunidagua bialu i̱naga keba ho kogo tiha biba helolebero.  
\v 13 Waitigi tigua Isaraele wali agali homararunaga tingini maru mbirale gime wabu ngaruha waho ngelalu maru lomabu delaga dabu bu heledagoria wu mabu bu wialu maru hari nene ti bi pupu wiaga ngaruhabi dindi bare barenibi ira timbuni bu karu tenehabi ira maru yuni dewahe kagohabi tinaga tingini wahaga bulebira. Isaraele wali agalime gime wabini ngaruhondo bi pupu wialu mbirale bo lomabu delaga kago bibahendeha tinaga tingini uruni kaware wigi bulebira. Horo ogoningi Isaraele wali agali bibahende karume i̱ni Anduane Homogo henedalo manda biai holebira.  
\v 14 Aniore bulebira. I̱na tinaga dindi mo ko halu labu hai helolebero. Tinaga dindi lenego bibahendeore unurahayagi dindi ko wali agali nahaga ngagoria howa ibalu uyurahayagi Libila tano ngagoria mo ko hairi helalu labu hai helolebero. Dindi Isaraele wali agali haganego gibunihabi mbira yu wa nahelolebero. Anidagua berogola wali agali karu bibahendeme i̱ni Anduane Homogo heneneore henedalo manda biai holebira, lalu Anduane Homogohanda i̱hondo laya, lene.   
\c 7  
\s1 Isaraele wali agali ti hamaro bulene kaware nga lenego ogo  
\p
\v 1 Anduane Homogohanda i̱hondo langialu lalu,  
\v 2 Dindiali-o i̱ Anduane Homogo Bibahende Haru Haame Ho Haga kogo i̱na Isaraele wali agalihondo bi ogodagua laro. Áyu ogoni Isaraele wali agali dindi bibahendeha karu tinaga horo hamaro ogonida.   
\p
\v 3 Isaraele wali agaliru-o tí bi ogo hale halimu. Hamaro bulene horo tagira ibiragoni. Tígua mana ko birimirunaga pani nguleberogo ngerogola i̱naga bu miniha keba timbuniore ho hene kogo tí hondoleberemi. Tígua mana ko uruni bialu harimigonaga i̱na tí manani howa birimidaguaore mo tale bulebero. Ani bialu tígua mana ko ngubi bialu harimigonaga pani ngulebero.  
\v 4 I̱na tí mbirali yu wa nahe dara howa biamogo nabulebero. I̱ Anduane Homogoore henedane kogo handalimulo tígua mana ko urunidagua bialu harimigonaga i̱na pani ngulebero, laya lene.   
\p
\v 5 Anduane Homogo Bibahende Haru Haame Ho Haga kago ibugua lalu, Tíha mo ko holene nahendene ale taraore tí bo waholenaga ibugu ibugu bulebira.  
\v 6 Áyu tínaga horo hamaro bulene kawareore tagira ibiragoni. Áyu ogoniore tagira íbu ngagoni ndobe. Ai tínaga holene áyu ereba haragoni.  
\v 7 Wali agali Isaraele dindiha bu kamiru tí bi ogo hale haramine. Horo biago tagira ibiragonigo ai tí mo ko holobada. Ainde tígua turu hagabu howa hari nene bu ngaruha pialu bi pupu wigi beremili biaru nawuleberemida. Áyu tíni dege mo ngoaiho howa gi halu luluyu ibagabu holeberemida.   
\p
\v 8 I̱na tíhondo keba timbuniore halu tandaga harudago hadelo tí minu baore bolebero. Tígua mana ko uruni bialu harimigonaga ina tí manani helolebero. Ani helalu tígua mana ko ngubiore wiaru bialu harimigonaga pani karulapeore nalimulo ngulebero.  
\v 9 I̱na tíhondo dara howa biamogo nabi tí bayale halimulo helo wanaholebero. Tígua mana ko uruni bialu harimigonagaore i̱na pani ngulebero. Anidagua berogola tígua i̱ Anduane Homogo kogonigo mo ko holene uruni i̱nimeore ibilenedane hondoleberemi, laya lene.   
\p
\v 10 Ani lowa Anduane Homogohanda i̱hondo laabo halu lalu, Mo ko holene horo timbuni biago kaware áyu o ibiragoni ndobe. Isaraele wali agali bu karume ti damene bu karu mo ko halu haga ka. Ani bialu mine hagane mana ngago hangu bule hongo haabo haga ka.  
\v 11 Tigua mendeali bo waholene mana birarume mana ko dewaore mo yu anda ibaga nga. Anidagua bini ngagonaga i̱na tinaga mbirale bayale damene ngaru bibahende bo haealo wahai holebero. Tinaga munibi mbirale bayale damene ngarubi ti mini lene karubi i̱na tinaga mini mo dindiha halu hengedape harogola tinaga bayale winiru ereba hai halu mbira nawulebira.   
\p
\v 12 Mo ko holene horo ko biago kaware o ibiragoni ndobe. Horo ogoningi mbiralime mbirale yolo bialu karu ti turu holene nawi. Mbirale muni mialu karu tinaga bu miniha genda holene nawi. Irane tigua biraru habane nabulene wulebirago i̱na ti bibahende pani mialu minu baiore holebero.  
\v 13 Agali mbirame ibunaga mbirale yu kago mendealihondo dano helo lowa miyadagua dano hanga dai nabi dano ogoni ho kaore dege ibu homolebira. Ani bulubadagoni irane i̱naga keba holeneme ti bibahendeni ibira holebira. I̱na ti homelo bo wahai holebero lalu bi lo wirugo lone mo iriari nabulebero. Wali agali bibahendeme mana ko biyarunaga homai holebira.  
\v 14 Tigua wai bulenaga mbelo biguli pu laragola ami agali bibahende wai bule mo manda manda bu holebirago ai mbiralime abale pora bu ade halu wai bule napolebira. Ani bulebirago irane i̱naga keba holeneme agali uruni mo gi hai haragola ti wai napolebira, laya lene.   
\s1 Isaraele wali agalime ko biyarunaga pani mulebero lenego ogo  
\p
\v 15 Anduane Homogohanda laabo halu lalu, Waitigime ibalu Yarusaleme ho mabu bupe hayada. Tanonaga pabe tagirahayagi wai birarume bo homelalu maru tanonaga pabe tamuhayagi karu ti hina garimebi warago tara tara baragomebi homai holebira.  
\v 16 Maru ti ibida polene henge handa walia hayagua nde ibida gerai lalu puwa hari tene ngaruha ha do holebira. Wali agali uruni tigua tinime ko bialu hayaru mitangi halu ega puyume bi laradagua ti dugu bialu howe dodowe laga bialu holebira.  
\v 17 Ani bialu howa tinaga gi geru hongo pirilape halu diriduru lalu holebira.  
\v 18 Tigua dara ho howa walia halu karulagane aga ngago mo karulo howa duru timbuni lalu holebira. Ani bialu tinaga mandari podo mbololo wahai haragola ti bibahendeme taga timbuni holebira.  
\v 19 Anduane Homogohanda tihondo ibunaga keba holene walia haragola tigua tinaga ngolo siliba urume tini mo wialu biamogo nabulubadane hondowa muni uruni ti nole ndodago lowa tigua hariga teneni ba a̱i̱na̱i̱ bialu yu wahai holebira. Tigua ngolo silibaru dimagoli timbuni ho heagola ogonidagua biyagome ti ko bilo mo bia henego mitangi bulebira.  
\v 20 Bamba tinaga yári ngolo silibarume wabu winigo karulo howa ti turuho haga hene. Ani bu howa tigua ngolo siliba urunime mbirale bi pupu wulenaga gime wabu wiaga hene. Tigua mana ogonidagua biyagola i̱na hame naleore howa tinaga ngolo siliba uruni tininaga deni mo nagaloneore hai helolebero, laya lene.   
\p
\v 21 Anduane Homogohanda laabo halu lalu, I̱na dindi tara agali koorene ko bu karu tí kamigoria íbu helarogola tigua Isaraele wali agalinaga dabudabu ngaru mo page biai holebira. Mo page bu yalu puwa mbirale ko tinime hameledaru ale bialu holebira.  
\v 22 Ani bialu agali uruni i̱naga anda bayale biagoha anda pialu tinime hameledago ale bialu i̱naga deni anda ogoni mebia halu mo ko holebira. I̱na tigua uruni nabilo hapai nahe helolebero.   
\p
\v 23 Isaraele wali agali tigua mbirale bibahende libilaba lalu mo ko hama ibaga bialu kagoni ndobe. Isaraele dindi bibahendeha tigua wali agali dewaore homelo balu tanoha mendeali kago bameore bo wahaga bialu ka. Anidagua bialu kagonaga horo áyu ti minu dariba holenaga pu seni wabulene karulape.  
\v 24 Anidagua bialu kagonaga i̱na agali i̱ mitangi nabiaga koorene ko karu tí kamigoha haru ibuleberogo tigua Isaraele dindiha ibalu wali agali tíni andagaha howa bo taliatagi halu anda uruni ti karulolebira. Ani bialu tigua Isaraele wali agalime Anduane Homogo mitangi bialu lotu laga anda karu bo gialo wahai helarogola Isaraele agali hongohe bu karu tigua gi timbuni halu tinaga mine holene ereba holebira.  
\v 25 Mo ko holene ko taraore mbira áyu Isaraele dindiha anda ibiragoni ndobe. Tigua mo palia holene hamelo karia handa walia naholebiraore.  
\v 26 Tiha mo ko holene dewaore tagira ibugu ibugu bialu bi diburibu ko tara tara laragobi hale holebira. Ani birago hondowa tigua gi timbuni howa Anduane Homogonaga bi mana \w latagi\w* haga agali kago hondo pialu i̱naga hame agua winidabe hondole hale haragola i̱na tinaga bi uruni hale howa ladai nabulebero. Ani bialu \w loma\w* binigo mo miaga bu karume ti lawai holene bi mbira nawulebira. Ani bialu \w agali\w* ala hene miniwi bu karume wali agali mini gigabi wulenebi bogabi holenebi talebu mulene mbira nawulebira.\x + \xo 7.26 \xt Man 32.23, Yar 4.20, Dug 2.9\x*  
\v 27 Anidagua biragola tinaga kini kago ibugua dara timbuniore halu kini igini kagome mini burugu lalu bu miniha mo ko hene holebira. Wali agali bu karume gi timbuni halu durulalu holebira. Tigua mana ko bialu hayaru bibahende mitangi bialu i̱na ti pani nelo miaiore holebero. Tigua wali agali maru karu manani íbu helowa mo dabaki birimidagua dege i̱na tínibi dabaki bulebero. Anidagua berogola tígua i̱ni Anduane Homogoore henedalo bayuwa manda buleberemi, laya lene.   
\ms1 Esegiele ibugua de gandeba mende hendenego (8.1–10.22)  
\c 8  
\s1 Yarusalemeni Isaraele wali agalime mbirale gime wabu wiaruhondo bi pupu wialu henego ogo  
\p
\v 1 Ina Babilono dindiha garabaya hemane mali waraganegonaga ege waraganeni horo dauni hayagola i̱ nde i̱ni andagaha berewaria Yuda agali haguane maru ibiniyagola i̱ baba mandagi birarima. Ani beremaria Anduane Homogo Bibahende Haru Haame Ho Haga kagonaga hongo i̱ha karula haya.  
\v 2 Ani karula hayagola i̱ handadaga halu de gandeba handalu hewaria agali handalehe mbira ira hungu bialuhe hearia de handaru. Ibunaga tingini mandibu nirayagi ira hungu ale bialu heagola ibunaga tingini lirayagi ege to̱le̱ boronosi bayale ngiringara lelo mbirale ha̱i̱ hene handalehe hearia de handaru.\x + \xo 8.2 \xt Ese 1.27\x*  
\v 3 Mbirale mbira ogonime ibunaga gi handalehe mbira dogola amu halu i̱naga mandarini yania hayane handaru. De gandeba dege handalu hewaria Ngode Datagaliwabenaga Dinini ibugua i̱ minu yalu hariha yagalalu Yarusaleme haru piya. Haru puwa Yarusaleme tanoni Ngode Datagaliwabenaga anda pabe buyu mabu bini hayagonaga panga haraba anda abene uyurahayagi heagoria helaya. Panga haraba ogoriani tamu hobane ogonihayagi Isaraele wali agalime mbirale dama mitangi bialu bi pupu wulenaga gime wabini mbira mo wiago Ngode Datagaliwabe ibugua ogoni hondowa ibu keba halu miniha tandaga timbuni haga.   
\p
\v 4 Ani pu howa i̱na Isaraele wali agalinaga Ngode Datagaliwabe ibu kago walia holenaga wá holene taraore hearia handaru. Wá tara ogoni abale mbira Iba Keba poragoria hewaria hendenegobi dege handaru.\x + \xo 8.4 \xt Ese 1.28\x*  
\v 5 Ani handalu hewaria Ngode Datagaliwabe ibugua i̱hondo bi lalu, Dindi agali-o dindi abene uyurahayagi de handa uyu habe, laya. Ani layagola i̱ de handa uyu halu hewaria lomabu delaga dabu panga haraba kawareni heleagoha mbirale dama mitangi bialu bi pupu wulenaga gime wabu wiaria handaru. Ngode Datagaliwabehanda mbirale ogoni hondowa keba halu tandaga timbuni hagago handaru.   
\p
\v 6 Ngode Datagaliwabehanda i̱hondo lalu, Dindiali-o Isaraele wali agali bu karume mana ko bialu karuni de hendedebe. Tigua mana ko o bialu kagonime i̱naga andaha nahe wahalu puwa kaundiaha habagiho heledagoni ndobe. Ani bialu mani tigua mana ko áyu bialu kadagua ndo ko timbuniore birane hondolebere, laya.   
\p
\v 7 Ngode Datagaliwabehanda bi ogoni lai halu ibugua ibunaga anda ege pabe bu mabu biago wahalu tagira pialu pabe timbuni heagonaga panga haraba heagoria i̱ haru piya. Haru puwa ibugua pabe ogoniha diri mbira wiago walia haya.  
\v 8 Ani mo walia howa ibugua i̱hondo lalu, Dindiali-o í̠na pabe ogoni bo gialole diri ogoni ala ba timbu ha, laya. Ani layagola i̱na diri biago ba timbu halu hewaria o biagoha panga mbira wiaria handaru.  
\v 9 Ibugua i̱hondo lone lalu, Ai ogoniha anda puwa mana ko ngubiore bialu kagoni handabe, laya.  
\v 10 Ani layagola i̱na anda ogoniha anda puwa handaru. Handalu hewaria nogombinaga bigiyaru ema bialu piaga tara tara Ngode Datagaliwabenaga deni dodoheru bibahendenaga bigiya damene anda tamu hobane ogoninaga hái heago bibahendeni gilibu wiame hearia handaru. Ani handalu Isaraele wali agalinaga dama mitangi bialu gime wabinigonaga bigiyabi wiaria handaru.  
\v 11 Ani handalu hewaria Isaraele wali agalinaga agali haguaneru pira karia (70) bereagoha Sabana igini Yasanaia ibu halu berearia handaru. Ti bibahendeoreme ira hagua ngabilo \w inisenesiru\w* delaga mbira mbira yu heago lomabu delayagola ira hagua irigi hayane handaru.  
\v 12 Ani biyagola Ngode Datagaliwabehanda i̱hondo lalu, Ainde Isaraele wali agalinaga agali haguane biaru tigua ohowa mana ko o bialu kagoni de hendedebe. Ti bibahende tamu hobane ogoniha anda pialu anda háini bigiya ko o ngarunihondo bi pupu wialu ka. Tigua lalu, Ogoni beremago irane Anduane Homogohanda mbirale iname bialu kamago nahandagaya. Ibu ina dindi yu wahalu piyagoni ndobe, laga ka. Tigua bi ogonidagua lalu mana ko uruni bialu haga ka, laya.   
\p
\v 13 Anduane Homogohanda i̱hondo laabo halu lalu, Ai tigua mana ko áyu bialu karuni bolangua halu ko timbunioreru bialu holebirago hondolebere, laya.  
\v 14 Ani lowa ibugua Anduane Homogonaga anda pabe bu mabu biago panga haraba uyurahayagi heagoria i̱ haru piya. Ani haru puwa ogoniha wali maru tigua dama mitangi bialu mbirale bi pupu wulenaga gime wabini mbira mini Tabusu wiago homaya lo mitangi buwa kiabu dugu bialu berearia handaru.   
\p
\v 15 Ani hondo hewagola Anduane Homogohanda i̱hondo lalu, Dindiali-o mbirale o biragoni hendedebe. Ogoni handa hendedegonigo áyu mana o bialu kagoni bolangua hene koorene ko bialu kanebi hondolebere, laya.  
\v 16 Ani lalu ibugua anda heagonaga panga haraba heago kawareni haru piya. Anda haraba ogoriani pangala lomabu delaga dabu heagola hengene wiagoria agali pira kirani duria (25) agima bereane de handaru. Tigua anda heagoha erembira muwa ni tagira ibiragohayagi de handa amuho biruwa ti ge duli hanga howa nihondo ma podalu bi pupu wialu berea.   
\p
\v 17 Ani biyagola Anduane Homogo ibugua i̱hondo lalu, Dindiali-o í̠na mbirale o bialu karuni de hendedebe. Yuda wali agali uruni ti mana ko ngubi uruni ale dege ndo bialu kagoni. Tigua Isaraele dindi bibahendeha wali agali bu karu mana ko tara tara mo bia haga bialu ko dewa biame halu kagoni. Tigua anidagua buwa i̱ mo keba halu mana ko uruni bame dege beremabe toba howa i̱naga andaha ibuwa áyu o bialu karuni biaabo haga ka. Tigua i̱naga anda ogoniha ko urunibi bialu kagome i̱ yo handalu mo tandaga timbuni haga kagoni.  
\v 18 Ani bialu kago i̱na keba timbuni ho kogoni tiha biba helolebero. I̱na ti dara howa biamogo nabulebero. Tigua i̱ hongo howa olalu i̱hondo bi lolebiragoyu i̱na tinaga bi larago hale naholebero, lalu langiya.   
\c 9  
\s1 Ngode Datagaliwabehanda Yarusaleme mo ko henego ogo  
\p
\v 1 Ngode Datagaliwabehanda bi hongo howa huaro lalu, Wali agali tano bu ngaruha homelo bo wahaga kamiru tí bibahende wai biaga ayu tiburu mo yalu ibai hadaba, layuago i̱na hale haru.  
\v 2 Ani layuagola agali waragariali Anduane Homogonaga anda panga haraba uyurayagi wiagoha howa abale ibini. Ti bibahendeme wai biagane ayu tibu ne gadele wali agali bo wahaga ale marubi yalu anda ibiya. Ani anda ibiyagola agali mbira nde ti haru mandagi anda ibiyago ibu aga bayale tara mbira mo karule howa pausi nu emene mbira ibunaga mandibuha yu hea. Beba gili biaga aleru nu ogoniha henearia handaru. Agali uruni bibahende ibalu bo lomabu delaga dabu boronosime wabu wini wiagoria kaware ha para ho hearia handaru.   
\p
\v 3 Ani heagola Isaraelealinaga Ngode Datagaliwabe ibu wá hongohe taraore howa agali handalehe maria biaruha howa tagira ibalu Anduane Homogonaga anda haneni wá hatagi haya. Ai Anduane Homogo ibugua agali aga bayale karule heago olowa  
\v 4 ibuhondo lamialu lalu, Í̠na Yarusaleme tanoha ibaga biai halu wali agali maru ti damenerume mana ko biragola handabe manga halu genda yu haga karunaga wanakuini magi mbira helaga bibe, laya.\x + \xo 9.4 \xt Mo 7.3, 9.4, 14.1\x*   
\p
\v 5 Ani layuago hale ho hewagola Ngode Datagaliwabehanda agali waragariali biaruhondo lamialu lalu, Tígua agali o poragonidagua pialu wali agali bibahende bo wahole pudaba. Tígua wali agali dara nahe howa mbiraoreli hangubi helo yupe nahalimu.  
\v 6 Wali agali wahe karubi wandari igiri daliahe karubi waneigini gali biru ngarubi waneigini ai̱ya bedaru bibahende bo wahai halimu. Agali haguane i̱naga andaha haga karu ala bo wahalu bama pialu marubi bo wahai halimu. Anigo wali agali tinaga wanakuini i̱naga magi mbira wiagua uruni dege nabe helalimu, lalu lamini. Ani laya handala tigua pialu agali haguane maru Anduane Homogonaga anda heagoha kaware haparaho haga hearu ala bo wahai hene.   
\p
\v 7 Ngode Datagaliwabe ibugua agali waragariali biaruhondo lamialu lalu, Wali agali i̱naga anda pabe bu yaanda henegohayagi haga karu bo wahai halimu. I̱ni deni i̱naga anda ko dodohe helonaga anidagua bilimu. Biabe ogoni biai halu tígua tanoha ibaga biai halu wali agali bibahendeore homelo bo wahaiore halimu. Ai biabe ogoni bule abale pudaba, lene. Ani laya handala ti abale pene.   
\p
\v 8 Puwa tigua wali agali bo wahole piyaru balu heagola i̱ hangu Anduane Homogonaga anda kaware heagoriani haru. Ani howa i̱ ge duli hanga halu dindini bulupalu wuwa i̱na bi dalimu lalu, Anduane Homogo Bibahende Haru Haame Ho Haga kego-o ainde í̠na Yarusaleme wali agali bu karunihondo keba timbuniore harida. Anidagua bialu í̠na Isaraele wali agali yu wahene maru Isaraele dindiha karu bibahende bo wahai holeberebe, laru.   
\p
\v 9 Ani hale harugola Ngode Datagaliwabe ibugua ladai bialu lalu, Yuda wali agali Isaraele wali agalibi tigua mana ko dewaore bialu hayagome tiha mo ko hene dewaore ngelo kagoni ndobe. Tigua manda bu handalu hearia Anduane Homogo i̱ ti dindi ngago wahalu piyada lo manda bialubi i̱na ti mitangi nabi embedaho wahayada lo manda bialubi i̱na ti handa nabi ka bada manda bialu hayiya. Ani manda bu howa tigua mana ko dewaore bialubi wali agali Yarusalemeha bu hearu bame bo wahalubi Yuda dindi bibahendeha hearu bo wahai haya.  
\v 10 Anidagua bialu hayagonaga i̱na ti dara halu mbiraoreli hangubi mbira helo yupe naholebero. Tigua wali agali maru heneruhondo mana biyadagua nde i̱na tihondobi biadai bulebero, lene.   
\p
\v 11 Ibugua bi lai hayagola agali aga bayale karule biago Anduane Homogo hearia íbu dai biyaria handaru. Dai buwa ibugua Anduane Homogohondo ibugua lalu, Í̠na biabe bia laridagua biaiore haru, layago hale haru.   
\c 10  
\s1 Anduane Homogonaga wá holene hongohe biagome ibunaga anda wahalu piyago ogo  
\p
\v 1 I̱na mbirale ndisibe ale timbuni agali handalehe maria biagoria daliga mo pagaho wiago handa amu haru. Handa amu halu hewaria mbirale ndisibe ale timbuni biagoria daligaha kininaga biragane dagia handalehe mbira ege to̱le̱ mindibi muni timbunioreme miaga ale mbirame wabini wiaria handaru.\x + \xo 10.1 \xt Ese 1.26, Mo 4.2\x*  
\v 2 Ani handalu hewaria Ngode Datagaliwabehanda agali aga bayale karule biagohondo lalu, Agali handalehe mariali biaru andanehayagi garo ge ale maria ngago dombeneha pialu í̠naga gi kirabalime ira hedo yule pobe. Hedo yuwa tano ngagoha ira dene ba a̱i̱na̱i̱ bima pobe, lalu lamiya.\x + \xo 10.2 \xt Mo 8.5\x*  
\p Ani lamiyagola agali aga bayale karule biagome ani bule piyago handaru.  
\v 3 Agali o biago anda pu hearia agali handalehe maria biaru ti Anduane Homogonaga anda heagonaga abene unurayagi hearia de handaru. Ani heagola ginu hagua timbuni mbirame Anduane Homogonaga anda pabe bu yaanda hene wiago bibahende dambi hai haya.  
\v 4 Ani biyagola agali handalehe mariali biaruha howa wá taraore holene hongo tagira pialu Anduane Homogonaga anda haneni wá hadali hayagola ginu haguame anda biagoha to̱latagi hai haya. Ani biyagola wá timbuni holene biagome anda pabe bu yaanda hene wiagohayagibi wá timbuni hongoheore haame ho heago handaru.  
\v 5 Ani heagola agali handalehe mariali biarunaga babaganeme pilipala layuago wali agali tanoha hearume hale hai habehe dege layua. Agali handalehe biarume pilipala layadagoni Anduane Homogo Hongo Haiheore kagonaga bi ale o layadagoniya.   
\p
\v 6 Anduane Homogohanda agali aga bayale karule biagohondo ira hedo yule pu layagola agali ogoni ibu puwa garo ge ale biarunaga mbirago heagoria pu haya.  
\v 7 Ani pu hearia agali handalehe biaru aria mbirago ibugua ira tini heago dombeneha deago ibunaga gime ira hedo yalu agali biagonaga gi kirabaliha hedo ya haya. Ani biya handala agali biago ibu ira hedo yalu piya.   
\p
\v 8 Ani piyagola handalu hewaria agali handalehe maria biarunaga babagane hearu andaneha agalinaga gi mbira mbira pani hearia handaru.  
\v 9 Ai mbirale garo ge ale biaru ti bibahende ogonibi dege dege howa garo ge ale uruni hoaile de daibi ege to̱le̱ ambuabi yolo dewaoreme miaga ngaligobi wiaria handaru.\x + \xo 10.9 \xt Ese 1.15-21\x*  
\v 10 Garo ge ale maria uruni wiago andaneha garo ge ale maria mende wiago uruni polenedagua handa amu nana bu wia.  
\v 11 Ani howa mbirale uruni ti mbira poa biragohayagi pole howa beregeda nabi kagoria howa pupe hagaya. Ani bialu agali handalehe maria uruni mbirahayagi pole howabi ti wanakui ho beregeda nabi kagoria howa pupe hagaya.  
\v 12 Ani bialu agali handalehe uruni tinaga tingini bibahende erembirahabi gihabi babaganehabi tinaga garo ge ale mbira mbira biarunaga bibahendeni de hondolene dewa hai hearia handaru.\x + \xo 10.12 \xt Mo 4.8\x*  
\v 13 Ani hondo hewagola bi mbirame, Garo ge ale uruni ibaga bialu howa mabu mabu bialu haga, layuane hale haru.   
\p
\v 14 Agali handalehe maria uruni ti hangu hangunaga dengui maria howa tara tara dege hea. Dengui mbirago nogo bulumaga handalehe howa mendego agali handalehe tebonego budi gabua timbuni laiono handalehe manego ega bodo hariawe handalehe dege dege hearia handaru.\x + \xo 10.14 \xt Ese 1.10, Mo 4.7\x*  
\v 15 Mbirale maria uruni de gandeba hondowa handarudagoni ala Iba Keba peago angeni howa hendenego dege lone handaru. Tigua heyalu harini dai dolope halu pialu howa  
\v 16 garo ge ale biarubi nde ti haru mandagi piagaya. Tigua babaganeme yagalalu poragola garo ge ale biarubi ti haru yagalalu mandagi dege piagaya.  
\v 17 Agali handalehe maria uruni ti ema nabi hondo heagola garo ge ale tibi ema nabi wiagaya. Ani biagadagoni irane agali handalehe maria biaru tigua garo ge ale urunime bulenego mo bia howa haru haga kagome ani biagaya.   
\p
\v 18 Uruni de hondo hewagola Anduane Homogonaga wá holene hongohe ibuninaga anda haneni hadali hayago dai bialu agali handalehe maria biaruni heagoria daligani pu haya.  
\v 19 Ani biyago handayaho hewagola agali handalehe biarume tinaga babagane yanga lowa yagalalu hariha iraga halu pialu hearia garo ge ale maria biaru tibi nde o piyagoha mandagi pumaga halu piya. Puwa Anduane Homogonaga andaha pabe bu yaanda hene pabe mende heagonaga panga haraba amu ni tagira ibiragohayagi wiagoria kaware pu haya. Ani pu heagola Anduane Homogonaga wá holene hongohe taraore ti heagoria daligaha hearia handaru.  
\v 20 Ani handalu hewaria agali handalehe maria uruni i̱na ala Iba Keba angeni Isaraele wali agalinaga Ngode Datagaliwabe kago andaneha hearia handarugo degeyane mandabu dege haru.   
\p
\v 21 Agali handalehe maria biaru mbira mbirago ibunaga dengui maria dege degehe halu tinaga babagane maria dege degehe hearia handaru. Ani bialu tinaga babagane maria hayadaru andaneha agalinaga gi handalehe maria dege dege haihe hea.  
\v 22 Abale i̱na Iba Keba peagoha hewaria mbirale maria handarudaruni tinaga dengui o uruni dege lone íbu hearia handaru. Mbirale uruni ti mbira poa biragoha pole howa tinaga tingini ho beregeda nabi kagoria howa tigatiga pupe halu piagaya, lalu Esegielehanda lene.   
\c 11  
\s1 Isaraelenaga haguane hearume ko biragonaga pani nolebira lenego ogo  
\p
\v 1 Ani bialu heago handalu hewaria Ngode Datagaliwabenaga Dinini ibugua i̱ minu yaraga halu Anduane Homogonaga anda pabe bu mabu bini heagonaga panga haraba ni tagira ibiragohayagi heagoria yalu pu helaya. Ani biyagola agali pira kirani duria (25) panga haraba heagoria kawareni berearia de handaru. Ani hondowa uruni aria agali kira Isaraele wali agalinaga haguane henego ti heba berearia handaru. Agali kirali ogonilabo Asu igini Yasanaiabi Benaia igini Peladaiabi berearia handaru.   
\p
\v 2 Ani hondo hewagola Ngode Datagaliwabehanda i̱hondo lalu, Dindiali-o agali o bedaruni tigua mana ko dege bulenaga hariga taya bialu haabo haga ka. Ani bialu howa tigua wali agali bu karuhondo bulene ngagonaga bi ko hangu lamialu haga ka.  
\v 3 Tigua lalu, Inaore wali agali bayaleore kamagonigo inanaga andaru abale biadai bulene nga ndobe. Tano ogoni todobene be tomo dawaga ale nga. Ina wali agali nogo mbirini ale howa todobene beha wiagadagua ina tano ogoha bayale kamagoni, laga ka.  
\v 4 Anigo dindiali-o í̠na tihondo bi ogodagua lolene nga. Tí wali agali bayale ndo kamigome tíniha mo ko holene anda ibulebira, labe laya.   
\p
\v 5 Anduane Homogonaga Dinini ibugua i̱ha karula howa Anduane Homogohanda i̱hondo lalu, Isaraele wali agalihondo bi ogodagua lamibe, laya. Isaraele wali agali tígua bi laramirubi tínaga miniha midagi bu kamirubi bibahende i̱na manda biaiho kogoni ndobe.  
\v 6 Tígua wali agali dewaore tano ogoha bo wahai harimirunaga tingini tanonaga hariga pedaruha wu to̱ledagoni hendedo.   
\p
\v 7 Anigo i̱ Anduane Homogo Bibahende Haru Haame Ho Haga kogome ogodagua laro. Heneneore tano ogo ibu todobene be aleore ngagola nogo mbirini baya ngabioreru todobene beha dawa ngago agibe. Nogo mbirini baya ngabi ale ogoni wali agali tígua bo wahai harimirunaga tingini ndobe. Ani birimigo tínibi nde i̱na tano ogoniha howa bo taliatagi holebero.  
\v 8 Tí waitigi bu karunaga wai biagane ayu tibu ngago hondowa tígua gi timbuni ho kamibe. Anigo waitigi bu karume tí bo wahole wai biagane ayu tibu mo yalu i̱na ibilolebero.  
\v 9 I̱na tí tano ogoniha howa haru tagira pialu agali dindi taraha howa ibirarunaga giha minu ya holebero. I̱na ogonidagua berogome tí pani nalimulo ngialu bo wahai helolebero.  
\v 10 Tigua ibalu tíni dindi tubaria ngamigoria howa bo waholebira. Anidagua biragola tí bibahendeme i̱ Anduane Homogo heneneore henedane manda buleberemi.  
\v 11 Todobene beni nogo mbirini dawedagola irame dapu nabi bayale wiagadagua tano ogonime tí bayale halimulo biamogo nabulebira. Isaraele dindi bibahende tínaga tubaria wirimidagoha kamiria i̱na ko birimirunaga pani ngulebero.  
\v 12 I̱na ani berogola tígua i̱ni Anduane Homogoore henedalo manda biai holeberemi. Tígua i̱naga mana wiago damene bia nabi i̱na bulene nga lo wirugobi talialu nabi puguaiore harimi. Ani birimigo tígua wali agali tara tí baba handa a̱i̱ na̱i̱ padarunaga mana ngago andaneha harimi, laya lene.   
\p
\v 13 Anduane Homogonaga bi ogoni mbiwia halu latagi halu hewagola agali haguane Peladaia heago homo ibira haya. Ani homayagola i̱na ge duli hanga ho biruwa ma podalu bi dalimu lalu ogodagua laru. Anduane Homogo Bibahende Haru Haame Ho Haga-o wali agali Isaraele dindiha yu wahene karu bo wahai hole hamelo kebe, laru.   
\s1 Ngode Datagaliwabehanda Isaraele wali agali tini dindiha haru dai bulebero lenego ogo  
\p
\v 14 Anduane Homogohanda i̱hondo lalu,  
\v 15 Dindiali-o Isaraele wali agali Yarusaleme tanoha bu karume í̠ lalubi Isaraele wali agali maru garabaya bu yalu dindi taraha pene karu lalubi tigua bi ogodagua laga ka. Wali agali garabaya minu yalu dindi taraha pu karume ti kaundiaore howa Anduane Homogo mitangi bialu lotu nalabehe kagoni. Anduane Homogo ibuni ti baba naheore. Ibugua dindi ogoni ina kamarume karuloloma̱ya ngiyagoni, lalu ka, laya.   
\p
\v 16 Anigo í̠na wali agali garabaya yalu pene í̠ heba kamiruhondo i̱na bi o larogo lamulene nga. Anduane Homogo i̱nime ti dindi tara tara wiaruha hama purogo lelaru. Heneneore ti dindi taraha tigimandi hangu garabaya kago howa i̱hondo bi lolene anda mbira nahe harimigola i̱ni ti heba haabo haga kogome tigua i̱ mitangi bialu lotu lalu helarugoni, laya lamibe.   
\p
\v 17 Anigo i̱naga wali agali í̠ heba garabaya kamiru ti hale helo i̱na bi o larogo latagi habe. Anduane Homogo Bibahende Haru Haame Ho Haga kogo i̱na Isaraele wali agali dindi tara tara wiaruha purogo lelarugo haru dai bialu dindi ala tíni harimigoria lone helolebero. Isaraele dindi ogoni tíninagaore wilimulo ngulebero.  
\v 18 Lone dai beremingi tígua mbirale dama mitangi bialu bi pupu wulenaga gime wabini ngarubi mana ko ngubi tara tara bialu harimigobi bibahende dindi ogoniha ngaru mo wahai holeberemi.  
\v 19 Ani beremigola i̱na mini gahengebi manda bulene gahengebi ngulebero. Abale tínaga mini giambe ege to̱le̱ ale harimigoni ndobe. Anigo áyu i̱na tínaga mini ko ngamiru mo wahai halu i̱na bi larodagua bilimulonaga mini bayale gahenge ngulebero.\x + \xo 11.19 \xt Iba 51.10, Yar 31.33, 32.39, Seg 7.12\x*  
\v 20 Ani berogola tígua i̱naga bi mana lowini ngogobi i̱na bulene nga lowirugobi hale halu taluwa bialu holeberemi. Ani bialu howa tí i̱naga wali agaliore holeberemi. I̱ nde tínaga Ngode Datagaliwabeore holebero.\x + \xo 11.20 \xt Iba 105.45, Yar 24.7, Ese 14.11\x*  
\v 21 Ani buleberogoyu wali agali maru dama mitangi bialu mbirale gime wabini ngaruhondo bi pupu wialu mana ko ngubi ngaru bialu haga karu dege pani mialu bo wahai holebero, lalu lamibe. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lene.   
\s1 Ngode Datagaliwabenaga wá holene Yarusalemeni winigo ereba henego ogo  
\p
\v 22 Ani biyagola emene howa mbirale agali handalehe mariali yagalo yu piyagola garo ge aleru ti heba mandagi piya. Ani piyagola Isaraele wali agalinaga Ngode Datagaliwabe kagonaga wá holene hongohe biagome ti daligani wá hadali haya.\x + \xo 11.22 \xt Ese 43.2-5\x*  
\v 23 Anidagua bialu wá holene timbuni ogonime Yarusaleme tano wahalu puwa ni tagira ibiragohayagi hari mbira wiagoria pu haya.  
\v 24 Ani bialu i̱ de gandeba dege handalu hewaria Ngode Datagaliwabenaga Dinini ibugua i̱ Isaraele wali agali Babilono dindi garabaya harimagoha lone haru dai biya. Ani biyagola de gandeba biago ereba haya.  
\v 25 Ani bialu mbirale bibahende Anduane Homogohanda i̱hondo mo walia hayaru i̱na Isaraele wali agali garabaya bu hearuhondo lamiai haru, lalu Esegielehanda lene.   
\c 12  
\s1 Esegielehanda garabaya howa binigo ogo  
\p
\v 1 Anduane Homogohanda i̱hondo ogodagua laya.  
\v 2 Dindiali-o áyu wali agali í̠ baba mandagi bu kamiruni ti i̱naga bi mo wahalu erembira ngiaga bu ka. Tinaga de kagoyu tinaga deme baya hangu handa nabiaga ka. Tinaga hale kagoyu i̱naga bi hale habe manga howa mo wahalu i̱ erembira ngiaga kagoni.\x + \xo 12.2 \xt Ais 1.23, 6.9-10, Yar 5.21, Md 13.13-14, Mg 8.18, Yo 9.39-41\x*   
\p
\v 3 Anidagua biaga bu karunigo ai dindiali-o áyu í̠na mbiralime ibunaga dindi yu wahalu dindi taraha garabaya biabe ale bu pole lowa manda manda bu hagadagua mbiraga nakaore tininaga deni ani bule pu. Í̠na ani berego wali agali karume de handalu irane ogo ale bira lo manda bilonaga mbira naledaore dege abale ti bu kagoria bolangua haga bialu ibaga bialu hole pu. Ani bialu porego hondowa ti mine haga bu karume í̠na mo walia halu berego tinaga minime manda nabulebira bada.  
\v 4 Horombe ni kaore í̠naga dabudabu mbirale uruni wali agali ti de hendelo kabubu manda manda bibe. Ani bialu alendo haragola ti handayaho kaore dege í̠naga dabudabu mo yalu dindi taraha garabaya biabe ale bu piagadagua pobe.  
\v 5 Wali agali bu karunaga deni í̠ninaga anda hái bo tidalu mbirale wiriru diri ogoniha howa mo yu tagira pobe.  
\v 6 Ani bialu ne̱ laragola ti de hondo kaore í̠naga mbirale kabubu wiriruni payani mo yalu dindi kaundiaha garabaya pole piagadagua í̠ni andaga yu wahalu harigani pialu habe. Harigani porego pialu howa wali agalime hendelo í̠naga dengui kabu biai howa hariga nahende arumaha piagadagua pobe. Í̠na anidagua beregome wali agalinaga miniha mo heya halu manane mbira mo walia holeberego anidagua bibe, laya.   
\p
\v 7 Anduane Homogohanda bi ogoni langiya handala puwa i̱na ibugua bibe layadagua biai haru. Horombe dabudabu wirudaru mo kabubu wialu howa alendo hayagola i̱ni andaga biagonaga háiha diri mbira tombelo wiru. Anda hái ayu namarume ndo gi hangume gialaru. Ani bialu diri emene ogoniha howa tagira piru. Alendo ne̱ lolene tiga biyagola i̱naga dabudabu kabubu wirugo payani mo yalu piru. Ani bialu pirugola wali agali bu hearume ti de handai haya.   
\p
\v 8 Horo mendengi egerebagi hayagola Anduane Homogo ibugua i̱hondo bi langialu lalu,  
\v 9 Dindiali-o Isaraele wali agali i̱naga bi mo wahaga bu hearunime í̠na birigoni agile biribe lalu í̠hondo hale haragola  
\v 10 i̱na Anduane Homogo Bibahende Haru Haame Ho Haga kogome i̱naga bi ogo í̠hondo langerogo lamibe. Bi o larogo kini igini kagobi wali agali Yarusalemeha haga bu kamirubi tí bibahende hale helo mbira mani bulebiragonaga bi ogo yido labe.  
\v 11 Í̠na wali agali í̠ baba kamirunihondo ogodagua lamibe. Mbirale í̠nime ti hendelo mo walia harigoni irane Yarusaleme wali agali bu kamiruha ogonibi ibulebiragonaga manane mo walia haru. Ai tínaga waitigirume ibalu wai buwa tí dindi tara ngagoha garabaya haru pole ibulebira.  
\v 12 Ani ibiragola tínaga kini kago iginime ibunaga dabudabu kabu bu ngaru mo yalu mbira ibida polebira. Agali marume tanonaga pabe kago bo tombelo wiragola kini igini ibu tanoha howa hariga ogoniha tagira pialu polebira. Pialu ibunaga dengui buyi howa pupe haragola ibugua hariga ogoha poroda lo manda nabi polebira.  
\v 13 Ani pialu karia i̱na gono baya hangu mo manda manda bu ngeledogoria pialu dolebira. Do ngagola hada yalu Babilono dindiha haru polebero. Haru pu heledogola ibugua dindi ogoni ogobiha pu haruda lalu manda nabiore bame hope holebira. Ani bialu ibu Babilono dindini halu homolebira.\x + \xo 12.13 \xt 2 Kin 25.7, Yar 52.11\x*  
\v 14 Wali agali ibu heba mandagi haga bu karu ti i̱na giligala lalu purogo lelolebero. Uruni ti ibunaga agali haguane dabo helene bu karubi ami agali ibuni mamage haga bu karubi ani bulebero. Ani bialu tinaga waitigime ibalu bo wahai helonaga i̱na ti poragoha talima pelolebero.   
\p
\v 15 Anigo i̱na ti hameigini tara tara karuhabi dindi kaundiahabi garabaya bu yalu purogo lelarogola tigua i̱ Anduane Homogoore kogoni manda bulebira.  
\v 16 Anigo waimebi hina garimebi waragorumebi Yuda wali agali bibahende bo wahai naholebero. Ti mbira mbira hangu nahomelo yu waholebero. Anidagua berogome mani Yuda wali agali tigua dindi taraha pu howa inaneme mana ko bialu harimadago lalu holebira. Te uruni larago hale howa wali agali tara karume Anduane Homogo heneneore i̱ni henedalo manda bilonaga ani bulebero, Anduane Homogohanda lalu Esegiele lamini.   
\s1 Esegielehanda manane walia halu duru lenego ogo  
\p
\v 17 Mani howa Anduane Homogo ibugua i̱hondo langialu lalu,  
\v 18 Dindiali-o í̠na tomo nalu howa duru lalu nabe. Iba nalu howabi gi howa mogolalu nabe.  
\v 19 Anidagua bialu howa í̠na wali agali dindi taraha bu karu lamialu i̱ Anduane Homogo Bibahende Haru Haame Ho Haga kogome Isaraele wali agali Yarusalemeni bu karu tiha mani bulebiragonaga ogodagua bulebira lalu bi larogo lamibe. Wali agali uruni tigua ti damene karu mo ko halu haabo hagayago ai tini tomo nalu howa duru lalu nolebira. Ibabi nalu bedaria tinaga waitigime ibalu tinaga mbirale bibahendeore dindi andabi bo labu haiore haragola tini gi howa mogolalu birulebira.  
\v 20 Tinaga tano áyu wali agali dewa bu kagoha bo gialo wahai haragola dindi bibahende mo ko hai hene embera ibalu wai labu dindi ona wulebira. Anidagua birangi Isaraele wali agali tigua i̱ni Anduane Homogoore henedalo manda bulebira, lamibe, lalu Anduane Homogohanda Esegielehondo lene.   
\s1 Anduane Homogonaga bi mana latagi haga agalime mbiwia hararu abaleore tagira ibulebira lenego ogo  
\p
\v 21 Anduane Homogohanda i̱hondo bi langialu lalu,  
\v 22 Dindiali-o Isaraele wali agalime bi lalu haabo haga mbira ngago ogo, Agalime mbiwia halu mbirale mbira bulebira larago lola harabe hondole dege kamaria lola nahe mali dewaore hondo haabo kamagoni, lalu haga.  
\v 23 Áyu Anduane Homogo Bibahende Haru Haame Ho Haga kogome bi laro. I̱na tinaga bi henene ndo laga uruni lone nalelo mo ereba hai helolebero. Bi uruni lalu hagadagua bi mende gahenge mbira la aribia halu helo ti lamibe. Bi gahenge ogo. Anduane Homogonaga bi mana latagi haga agali kago ibugua ogoale mbira bulebira lalu mbiwia hararu áyu ogoni dege tagira ibulene nga.   
\p
\v 24 Anidagua biagago ai agali maru Isaraele dindiha ti Anduane Homogonaga bi mana latagi halu mbiwia haga kama lalu tigua de gandeba mbira handaru lowa wali agali ke̱ howa latagi haga mbirali naholebira. I̱na bi urunialego mo ereba hai helolebero.  
\v 25 Ani bialu Anduane Homogo i̱nime Isaraele wali agaliruhondo bi lamulebero. Ani lamialu mbirale ibulebira lalu lo werogo abaleore tagira ibulebira. I̱naga bi mo wahalu i̱ erembira ngiaga kamiru-o bi o larogo hale hadaba. Tí áyu kamiruni hondo kamiore dege i̱na bulebero larugo bibahende tagira ibilolebero. I̱ Anduane Homogo Bibahende Haru Haame Ho Haga kogo i̱naga bi o lai harugoni, lalu Esegiele lamini.   
\p
\v 26 Anduane Homogohanda i̱hondo laabo halu lalu,  
\v 27 Dindiali-o Isaraele wali agali bu karu tigua lalu, Esegielehanda de gandeba handalu howa ogoale bulebira lalu mbiwia halu mani aweore bulebiragonaga laga ka, lalu karuni.  
\v 28 Anigo Anduane Homogo Bibahende Haru Haame Ho Haga kogo i̱na Isaraele wali agali tinaga bi uruni ogodagua ladai bero. I̱na emene mbira hondo ha nabi mbirale bulebira lalu langirugo bi larudagua áyu ogoni abale tagira ibilolebero. I̱ Anduane Homogo Bibahende Haru Haame Ho Haga kogo i̱na bi larugoni agua laya lalu lamibe, Anduane Homogohanda i̱hondo ani lene.   
\c 13  
\s1 Agali ke̱ howa bi mana latagi haga hearuhondo Anduane Homogohanda keba henego ogo  
\p
\v 1 Anduane Homogohanda i̱hondo lone lalu,  
\v 2 Dindiali-o í̠na Isaraelenaga agali bi mana \w latagi\w* haga bu karuhondo lai labe. Agali uruni tigua mani bulebiragonaga mbiwia ho wia hagago ogoni henene ndo tini hangu mitangi bialu laga ka. Tigua bi uruni tininaga miniha tagira ibirago bame dege lo paya biaga ka. Tigua Anduane Homogo i̱na bi larogo baya hangu hale helo lamibe.   
\p
\v 3 I̱ Anduane Homogo Bibahende Haru Haame Ho Haga kogo i̱na bi ogodagua laro. Agali mini nawi howa tini hangume bi mana latagi haga o bu karuni tiha mo ko holene íbu wulebira. Ti de gandeba henene nahandaga howa bi tininaga miniha tagira ibirago hangu latagi haga ka.  
\v 4 Isaraele wali agali kamiru tígua bi ogo hale hadaba. Anduane Homogonaga bi mana latagi haga kama lowa bi henene ngadagua ndo lalu karuni ti tano bo labu hene ngagoha biango dudu ibagabu hagagobi ka.  
\v 5 Tigua tanonaga wai pabe kago emene gialaho wigi bidagoha mamage nahaga. Tigua wai pabe lone bia aribia nahe dege ka. Ani bidago ai Anduane Homogo i̱na Isaraeleali pani mialu waitigi ti baba wai bule ibilarogola ti hongo halu heyu howa wai bibe nahe holeberemi.  
\v 6 Ani bialu agali uruni tigua de gandeba handarima layago henene ndo ti ke̱ howa mbiwia hayagobi henene tagira naibulebira. Tigua lalu, Iname Anduane Homogonaga bi mana latagi harama, laga kagoyu i̱na tigua bi ogo lalimu lalu mbira naleore. Anigo ai tininaga bi larago henene tagira polobabe tobaho howa latagi agua holedabe.  
\v 7 I̱na bi mana ke̱ howa latagi haga agali uruni tíhondo bi ogodagua laro. Tígua de gandeba handarimigo ai mbirale mbira tagira ibulebira laramiligo tínaga bi ogoni henene ndo ke̱ howa laga kami. Tígua wali agali bu karuhondo lamialu lalu, Bi ogo Anduane Homogonaga bi larama lalu latagi haramiligo i̱na bi uruni tígua latagi halimu lalu nalangi ndobe.   
\p
\v 8 Anigo i̱ Anduane Homogo Bibahende Haru Haame Ho Haga kogo i̱na tíhondo bi larogo hale hadaba. Tígua bi mana latagi halu wali agalihondo lamialu de gandeba handarima lalu kamiru henene ndo lalu kamigoni. Tígua wali agalihondo ke̱ harimigonaga i̱na tí baba keba timbuniore ho kogoni.  
\v 9 Bi mana latagi haga kama lowa ke̱ halu laramiligo de gandeba handarima lalu henene ndo laramiligobi i̱na tí pani nai halimulo ngule kogoni. I̱naga wali agali mo ngoaiho kangi ti heba mandagi naholeberemi. Ani bialu Isaraele wali agali bibahendenaga mini mbugaha gilibu ngagoria tínaga minibi nawulebiraore. Tí bo taliatagi harogola Isaraele dindiha lone dai nabuleberemi. Ani beremingi tígua i̱ Anduane Homogo Bibahende Haru Haame Ho Haga kogo henedane manda buleberemi, laya lene.   
\p
\v 10 Agali ke̱ howa bi mana latagi haga karume i̱naga wali agali bu karu mo hondo haga ka. Tigua wali agalihondo lamialu lalu, Mbirale bibahende bayale dege wiai kagoni, laga ka. Anigo mbirale bayale nawiore ndobe. I̱naga wali agalime pabe biyago nde hongo nahe haradagua bida. Anidagua bidagoria agali ke̱ howa bi mana latagi haga karu tigua wai pabe ogoni beni pele hiradambi halu howa lalu, Pabe hongoheoreda, laga ka.\x + \xo 13.10 \xt Yar 6.14, 8.11\x*\x + \xo 13.10 \xt Ab 23.3\x*  
\v 11 Ani laga kago ai agali ke̱ howa bi mana latagi haga uruni tihondo ogodagua labe. Wai pabe o kagoni gialapaya bulebira. I̱na iba dalu timbuni ibilalu dalu dindi kuni timbuni pabe ogoriani ibira halu puyabu hongoheme pabe bo gialope helolebero.  
\v 12 Ani biragola wai pabe kago podope haragola wali agali bibahendeme tíhondo lalu, Tígua wai pabe ogoni hongoheda larimigo hongo naheda. Tínaga beni pele hirarimigome ina wali agali mo hondo heneda, lolebira laya lene.   
\p
\v 13 Anduane Homogo Bibahende Haru Haame Ho Haga kagome bi ogodagua laragoni. I̱na keba timbuniore ho kogome i̱na iba dalu timbunibi dindi kuni puyabu hongohebi ibalu wai pabe ogoni bo gialabaga biai helonaga anidagua ibilolebero.  
\v 14 Ani bialu i̱na agali ke̱ howa bi mana latagi haga biarume wai pabe beni pele hirini kago bo gialo wahai harogola wai pabe gialabaga bu wulebira. Ani bidogola pabe henegoria dindi dege wulebira. Pabe podope harangi tí bibahende podo bai holebira. Anidagua birago hondowa tígua Anduane Homogo i̱niore henedane hondoleberemi larogoni, laya lene.   
\p
\v 15 Isaraele wali agaliru-o i̱ keba timbuniore kogo ainde i̱na wai pabe ogoni bo gialo wahai halu bi mana ke̱ howa latagi haga agali hearume pabe beni peleme hiradambi haga karu tinibi pani nelo mialu bo wahai holebero. Ani buwa i̱na tíhondo langero. Ai pabe biago bo gialapaya biai halu pabe ogoni beni hiraga biarubi homai haya lalu langulebero.  
\v 16 Ke̱ howa bi mana latagi haga agali uruni tigua Yarusaleme wali agali hearuhondo lamialu lalu, Mbirale bibahendeore bayale wiai ka, layago bibahende bayale ndo wiagola howa leneya. Ani wiagola i̱na mo ko hai harugoni. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lene.   
\s1 Wali hubibi biaga berearu Anduane Homogohanda talinigo ogo  
\p
\v 17 Anduane Homogohanda lalu, Dindiali-o Isaraele wali maru bedarume tini hangume manda bialu mbirale ogoale bulebira laga bedaruni talibe. Tigua bi laradaruni tininaga miniha howa tagira ibirago dege latagi haga bedagoni.  
\v 18 I̱ Anduane Homogo Bibahende Haru Haame Ho Haga kogome bi ogo í̠na wali urunihondo lamibe. Wali uruni tí ko biagaore bedamigo tíha mo ko holene íbu wulebira. Tígua hubibi nu emene mbira aga pume buwa wali agalinaga gi pagida ngagoha ya do helaga beremili. Ani bialu agame nu tangi buwa hubibi ogoniha wia haga beremili. Tígua hubibi o beremidagoni irane tí hongohe halu mendealigo bope howa tí andaneha bedagola tígua handayaho holenaga hubibi ani biaga bedami. Wali bedemiruni tígua tíni dege mitangi bialu i̱naga wali agali maru mo ko halu maru mo bayale halu bulene hamelo bedemigoni ndobe. Tínime mandabu handalu kamiria mana ogonibi bialu bedemigo bayaledabe.  
\v 19 Tígua wali agali bu karuhondo ke̱ howa ti mo hondo halu, Iname Ngode Datagaliwabenaga bi mana latagi halu kama, laramili. Anigo bi ogoni henene ndoyago. Tígua i̱ yo handalu i̱naga mini mo dindiha holenaga laramili. Tígua hubibi bialu wali agali maru homolene nawini homelo bo wahalu maru bayale ndo ko biaga karu nahome bayale helo biamogo beremili. Anidagua beremigola wali agalime tínaga mana ogoni hondowa ti turu howa tíhondo mberedi emene gaibini mbira balawa balime wabini mende lowa ogoni labome ti yolo biragola tígua nde mana ko uruni biaabo haga bedami.   
\p
\v 20 Anidagua biaga kamigo ai i̱ Anduane Homogo Bibahende Haru Haame Ho Haga kogo i̱na bi ogo laro. Tígua wali agali mende kago bope halu handaya ho holenaga hubibi gi pagidaha yaramiligo hondowa i̱ turu nahe ko. Wali agalime ega gono wiagadagua tígua wali agali mendeali kago hubibime bope ho helowa handayaho haga kamigonaga i̱ manga ho kogoni. Wali agali tígua handayaho kamiruni tí andaneha haabo nahelonaga i̱na tínaga gi pagida budu waholebero ndobe.  
\v 21 Ani bialu hubibi biaga nu tangi haguani dambi haga biago bibahende mo wahai holebero. Ani berogola i̱naga wali agali tí andaneha hayaruni ibida pelonaga i̱na tínaga hongo bope ho helolebero. Anidagua berogola tígua i̱ Anduane Homogo heneneore henedane manda buleberemi.   
\p
\v 22 Tígua ke̱ howa bi dewa lalu haramigome wali agali bayale bu hearunaga mini mo luluya harimi. Ani birimigo wali agali uruni mo ko helo hame naledogo tígua mo ko harimi. Ani bialu tígua wali agali ko biaga bu karu bayale helo biamogo nabirimigo tinaga mana ko biaga wiaru yu wanahe biaabo halu kagoni ndobe. Tigua mana ko bialu hagaru yu wahenedale nde tini bayale kale.  
\v 23 Anigo tígua wali agali karuhondo ke̱ howa mani bulebiragonaga mbiwia haramilirubi de gandeba handarima lalu henene ndo laramilirubi uruni mani nabilimulo áyu biba helarogoni. I̱naga wali agali i̱nime haru dai berogola tí andaneha naholebira. Ani berogola i̱ni Anduane Homogoore henedane manda biai holeberemi, laya lene.   
\c 14  
\s1 Mbirale gime wabini ngaruhondo bi pupu wulene nawi lenego ogo  
\p
\v 1 Isaraeleali agali haguane maru hearu tiha genda mbira wu howa tigua i̱ha birapara howa lalu, Anduane Homogonaga hame ngago hale ha, laya.  
\v 2 Ani layagola Anduane Homogohanda i̱hondo langialu lalu,  
\v 3 Dindiali-o agali uruni tigua dama mitangi bialu mbirale gime wabini ngaruhondo bi pupu wiaabo haga kagome tiha ko timbuni wu ka. Anigo tigua mbirale gime wabini uruni gubalini timbuni ho howa yu waholene hame nale ti bame dege íbu bedago tigua i̱hondo bi hale harago i̱na ladai bulebero mitangi bu bedabe.   
\p
\v 4 Anigo áyu agali haguane uruni tihondo Anduane Homogo Bibahende Haru Haame Ho Haga kogo i̱na bi o larogo tihondo lamibe. Isaraeleali mbirame dama mitangi bialu mbirale gime wabini ngagohondo bi pupu wulene mo tene howa ibuha ko ngago yu wahoa nahe Anduane Homogonaga bi mana \w latagi\w* haga kagohondo i̱naga hame ngogo hale ha lama ibiyagua nde i̱na ibuhondo bi mbira lamulebero. Ibugua dama mitangi bialu gime wabini dewa ngaruhondo bi pupu wulene mo tene hayagonaga i̱na hongo howa ladai bulebero.  
\v 5 Isaraele wali agali bu karu tigua dama mitangi bialu mbirale bi pupu wule gime wabini ngarume ti mo koore hayagola i̱ erembira ngialu piai hene. Ti ani biyagoyu i̱na i̱naga hame ngodagua ladai berogola tigua manda biyagua nde gime wabini ngaru wahalu puwa i̱ni hangu mitangi bialu holoba bada.   
\p
\v 6 Anidagua bulebirago áyu nde i̱na Isaraele wali agalihondo bi ogodagua lolene hameledo. I̱ Anduane Homogo Bibahende Haru Haame Ho Haga kogo i̱na tígua dama mitangi bialu mbirale gime wabini ko ngubi ngarunihondo bi pupu wirimigo wahalu i̱ni koria dai bilimu laro.   
\p
\v 7 Agali mbira ibu Isaraeleali heaguabi dindi tarali tí heba íbu hene heaguabi mbiragome i̱ erembira ngialu mbirale gime wabini wiaruhondo bi pupu wialu ibu mana konaga tene ngago yu waholene hame nale howa i̱naga bi mana latagi haga kagohondo i̱naga hame ngogo hale hole ibiyagua nde i̱ Anduane Homogo i̱ni hameore ngogo ibuhondo walia holebero.  
\v 8 I̱na nde ibula waitigi halu Isaraele wali agali tí heba nahelo bo taliatagi helolebero. I̱na o biagohondo ani berogola tí bibahende kamirume i̱ni Anduane Homogo henene henedane hondoleberemi.   
\p
\v 9 Anigo agali i̱naga bi mana latagi haga kagome i̱naga hame ogobi nga lalu ke̱ halu latagi helo mbiralime ibuhondo bime ladebodebo biyagua ogoninaga irane i̱nime ibunaga mini mo libilabalo heledogola ibugua bi ogoni latagi holebira. Ani latagi haragola i̱naga wali agali bu karu heba mandagi nahelo i̱na ibu bo taliatagi halu mo ko holebero.  
\v 10 I̱na agali bi mana latagi haga biagobi agali mende bi hale hole ibaga biagobi libu haru pani ogobi labolabo nelo mulebero.  
\v 11 I̱na ogonidagua bialu Isaraele wali agali tígua i̱hondo erembira nangilimulobi mana ko nabilimulobi i̱naga deni tí dodo nahe halimulonagabi hariga hangai halu anidagua bulebero. Anidagua berogola tí i̱naga wali agaliore holeberemi. I̱ nde tínaga Ngode Datagaliwabeore holebero. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lene.   
\s1 Anduane Homogohanda wali agali mbira mbiranaga ko ngaru hendedago ogo  
\p
\v 12 Anduane Homogohanda i̱hondo langialu lalu,\x + \xo 14.12 \xt LBM 26.14-35, 1 Kin 8.33-40\x*  
\v 13 Dindiali-o wali agali dindi mbira mbiraha haga karume mana ko bialu i̱hondo erembira ngialu mbirale tara mitangi bialu mo dununi hayagua nde i̱na dindi uruniha bu karu tinaga tomo nolene bereba halu hina gari pelolebero. I̱na wali agalibi tinaga nogo tara tara bu karubi bibahende tomo nolene bereba halu homai helolebero.  
\v 14 Noa Daniele Yobo imaru agali tigabi uruni dindi ogoriani kale tigua mana bayale biyagome tini hangu nahome kale. Anduane Homogo Bibahende Haru Haame Ho Haga kogo i̱na bi o ledogoniore, laya lene.\f + \fr 14.14 \ft Noanaga te mbuga Pigane Binigo 6-9 wialu Yobonaga tebi Danielenaga tebi libuninaga mbuga ngagoha gilibu nga. Ai te ogoriani gilibu ngago agali marume agali timbuni mini lene mende henego ibu mini Danele ogoni ibunaga te gilibu nga bada manda biaga.\f*   
\p
\v 15 Anigo i̱na wali agalinaga tomo nolene bereba holene ndo waharuyagua nde nogo gabuame wali agali dindi ogoniha karu bo wahai helo ibilolene manda bulebero. Anidagua berogola wali agali mbira dindi ogoniha polene gi howa napolebira.  
\v 16 Noabi Danielebi Yobobi dindi ogoniha henedale ti ani helowa tigua tinaga waneigini bu karubi mo wia nabi homai dege kale. Tebirali uruni tini hangu pele midale. Anidagua biragola dindi hangu ibira halu embera timbuni ngale. I̱ Anduane Homogo Bibahende Haru Haame Ho Haga howa Ngode Datagaliwabe haluhe heneneore kogobi i̱na bi ogoni heneneore ledogoni.   
\p
\v 17 Ani ndoyagua nde i̱na waitigi bu karu ibilalu waitigime wali agalibi nogo tara tara bu karubi bibahende bo wahai helo ibilolene manda bulebero.  
\v 18 Ani berongi Noa Daniele Yobo imaru ti dindi ogoriani henedalebi tinaga waneigini mo wialu biamogo bibe nahe dege kale. Agali tebira urunime tini hangu bayuwa helalu wali agali bibahende homai holene ngale. I̱ Anduane Homogo Bibahende Haru Haame Ho Haga howa Ngode Datagaliwabe haluhe heneneore kogobi i̱na bi heneneorego o ledogoni.   
\p
\v 19 Ani ndoyagua nde i̱naga miniha tandaga timbuniore ho kogo ereba helonaga warago ko taraore dindi ogoniha ibilalu wali agalibi nogo tara tarabi bibahende bo wahai holene manda bulebero.  
\v 20 Agali tigabi Noa Daniele Yobo imaru ti dindi ogoniha henedalebi nde tinaga waneigini mo wialu biamogo bibe nahe dege kale. Agali tebirali uruni ti mana bayale biyagome tini hangu nahome kale. I̱ Anduane Homogo Bibahende Haru Haame Ho Haga howa Ngode Datagaliwabe haluhe heneneore kogobi i̱na bi heneneorego o ledogoni.   
\p
\v 21 Anduane Homogo Bibahende Haru Haame Ho Haga kogome i̱na bi ogodagua laro. I̱na mbirale mo ko holene koorene ko tara tara maria uruni Yarusalemeha ibilalu wali agali bu karu pani mialu bo wahai helo ibilaga bulebero. I̱na waitigi ibilalubi hina gari ibilalubi gabua tara tara bu karume bo nelo ibilalubi warago ko ngaru ibilalubi urunime wali agali bo wahai helo ibilaga bulebero. I̱na uruni ale ibilarogome wali agalibi nogo hinini tara tarabi bibahende bo wahai holebero.\x + \xo 14.21 \xt Mo 6.8\x*  
\v 22 Anigo ai horo ogoningi Yarusaleme wali agali maru homa nabi heagua nde ti í̠ kegoria ibiyagua tigua mana ko bialu haga ngago í̠nime panigi hondolebere. Ani hondowa í̠na ti dara nahabe. Yarusalemeni wali agali tigua mana ko taraore bialu haga wiago hondowa i̱na ti pani mialu mo ko holene ibilarugo ogoni tigatigaore binida lo manda bulebere.  
\v 23 Ani bialu i̱na ti mo ko howaore pani nelo muleberogo bame ndo irane wiagola pani nelo minida lo manda bulebere. I̱ Anduane Homogo Bibahende Haru Haame Ho Haga kogo i̱na bi o ledogoniore, lalu Anduane Homogohanda Esegiele i̱hondo laya, lene.   
\c 15  
\s1 Anduane Homogohanda pu mbira lini daga mini \w gerebi\w* iranenaga bi yobage lalu lenego ogo  
\p
\v 1 Anduane Homogo ibugua i̱hondo bi lalu,  
\v 2 Dindiali-o pu mbira lini daga mini \w gerebi\w* kagoni ira mbira ogobi kabe. Gerebi pu ogoni ira maru irabuha bayale karubi kabe.  
\v 3 Gerebi irane ogonime mbirale galone mbira bibehebe. Gerebi gene mbirago dibalu todobene be delolenaga gemboge hangubi wabibe naheore.  
\v 4 Pu gerebi lini daga ogoni dibalu ira delo irani delolene hangu karulape nga. Ani bialu irani deledagola nguini labolabo dowa dombeni tigini nade wiagua nde ogonime yamialu galone mbira bibehebe.  
\v 5 Pu ogoni irame da nabi wiagolabi galone nabulene dege wini. Anigo irame dayagola ai mo koore hene galone mbira bibe naheore wiaga ndobe.   
\p
\v 6 Anduane Homogo Bibahende Haru Haame Ho Haga kogo i̱na bi ogodagua laro. I̱na ira maru irabuha karu helowa gerebi irane hangu ira delolene manda birudagua i̱na Yarusaleme tanoha wali agali bu karuhondo pani mulebero.  
\v 7 I̱na ti baba waitigi halu ti minu bai holebero. Ira pigane dayagome ti da nabigo ainde ira halu mende daragome ti daiore holebira. I̱na ti pani nelo miai harogola í̠bi Isaraele wali agali maru karu tiguabi i̱ni Anduane Homogo heneneore heneda lo manda buleberemi.  
\v 8 Yarusaleme wali agali tigua i̱ erembira ngialu i̱hondo mini bilina naheore hayagonaga i̱na tinaga dindi ngago mo ko halu dindi yamo embera hangu ngelolebero. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lene.   
\c 16  
\s1 Yarusaleme ibu walime agalini yu wahalu piagagobi nga lenego ogo  
\p
\v 1 Anduane Homogohanda i̱hondo laabo halu lalu,  
\v 2 Dindiali-o í̠na puwa Yarusaleme ibu mana ko ngaru bialu hayarunaga lamialu bi hongo howa lamibe.  
\v 3 Anduane Homogo Bibahende Haru Haame Ho Haga kogo i̱na Yarusalemehondo bi larogo ogodagua lamibe.  
\p Yarusaleme í̠ore wali ko aba ai̱yala mana ko biaga wane biragagobi í̠ ngegoni. Í̠ aba ibu Amoroali halu í̠ ai̱ya ibu Hidi wali berene. Í̠ni Kenana dindi howa taba henenego ngegoni.  
\v 4 Í̠ ai̱yahanda taba hanayangi í̠naga lumbipu napode helene. Í̠ ibame wayawaya balu doma nabi wahalu tinginini marasiniru ibimebi ha̱i̱ nahe wahalu agame mo kabu nabi ngelo wahalu biniya.  
\v 5 Mbiralime í̠ dara halu o larogoni damenego mbira nabiore winiya. Í̠ taba hanayangi howa tigua í̠ gubalini naheore howa bameore taniha hono wahalu piyaya.   
\p
\v 6 I̱ hariga ibalu handalu hewaria í̠ ona wiaria handa walia haru. Í̠ áyu dege ai̱yahanda hono wahalu pene darama bagabi ema bialu wiria handaru. I̱na í̠ homabelo hame nale howa i̱na lalu,  
\v 7 Í̠ore homa nabi bayale anda halu mbirale eganeru bayale taraore anda hagadagua í̠ anda halu timbu luni halu wandari bayaore birabelo handayaho howa biamogo biru. Ani biwagola wandari mabuage halu andu ibalu mandari bayale anda ho birari. Ani bira biruwa dege aga mbira nabi í̠ ti babe biraabo harigoni.   
\p
\v 8 Ai i̱ dai buwa handalu hewaria í̠ agali pobehe berego handaru. Ani berego hondowa i̱naga aga tohe dagarenaga biaga mbirame í̠ ti babe berego bia dambi helaru. Ani buwa i̱na í̠la habo nalolene bi mbira lo wialu í̠ i̱ one birabelo dabu buliya lalu lo wiru, lalu Anduane Homogo Bibahende Haru Haame Ho Haga kago ibugua bi ogoni lene.   
\p
\v 9 Ibugua lalu, I̱na í̠ha darama heago ibame waya waya bo wahalu ira olibe lini ibane baya wiago yuwa í̠naga tingini ha̱i̱ haru.  
\v 10 Ani buwa aga bayale tara gime yári bialu wabu wiagobi í̠naga ge su nogo dongone bayaleme wabini wiagobi mo karula haru. I̱na í̠ mo yári bia halu aga bayaleme í̠naga emboneni heda ale wialu í̠naga aga luni bayaleore wiwago mo ngialu biru.  
\v 11 Ani bialu yári bulene tara tara wiaru mo ngiaiore haru. Gi pagida gurubu geleme bene mo ngialu ma gagua wiarubi mo ngiru.  
\v 12 Ani bialu nguira dolenebi hale ira dolenebi mo ngiai halu biru. Ani buwa kuini walinaga manda baya tara wiagobi í̠naga haguaneni mo karula halu biru.  
\v 13 Ani birugola í̠ni yári bulene ngolobi silibabi dewaore wuwa í̠naga aga baya taraore pu bayale mbirame wabinigoria yári tara tararuhe wirigobi i̱na dege mo ngiru. Ani bialu tomo nabelo mberedi balawa bayalerume wabini wiarubi mone taranaga ibane dendebiorebi ira olibe lini ibanebi í̠ tomo uruni nalu birabelo ngiai harugome í̠ wandari baya taraore mbira biruwa kuini wali birarigoni.  
\v 14 Ani bereria wali agali dindi bibahendeha hearume hale halu hearia í̠ wandari baya taraore mbira beda lene birari. I̱nime í̠ mo yári bia harugome ani birarigoni lalu Anduane Homogo Bibahende Haru Haame Ho Haga kago ibugua bi ogoni lene.   
\p
\v 15 Ani birugola í̠na mitangi bialu heria i̱ bayaleore ani berene bedolo mitangi bu bedegoni. Ani mitangi bu bedegola agali bu karume í̠ore hame laiho kagoni. Ani kagola í̠ nde baya tingi howa mine halu agali í̠ bederia ibiraru baba tanabi kayu yu paliai hariya.  
\v 16 Ani bialu howa í̠naga aga bayale wiriruni mo yalu puwa mbirale dama mitangi bialu bi pupu wiaga gime wabini ngaru mo yári bia hari. Anidagua birigome agali maru ta nabi hearu ti í̠ni baba kayu yu palue dindi ogoniha ibilonaga ndole bialu harigo mana ogoni ko ngubiore bialu bayanda wali harigoni.  
\v 17 Ani bialu muni ngolo silibaru í̠ni yári bibelo ngirugo mo yalu puwa ogonime mbirale dama agali ka mitangi bialu wabu helowa ogonila mana ko wiaru bialu birari.  
\v 18 Ani buwa i̱na í̠ aga yári tarahe mo karula harugo mo yalu puwa mbirale dama agali ka mitangi bialu bi pupu wule wabu helene biago aga uruni mo karula hari. Ira olibe lini ibanebi ira hagua nga bilo delaga \w inisenesiru\w* i̱na ngirugobi mo yalu puwa mbirale gime wabini urunihondo bi pupu wialu lomabu delole piri.  
\v 19 I̱na í̠ tomo bayaleru nalu birabelonaga balawa bayalerubi olibe lini ibanerubi mone taranaga ibanebi ngirugoni. Ai tomo uruni mo yalu puwa í̠ni mo turu helonaga mbirale dama mitangi bialu gime wabini wiarunaga lomabu mule mo yalu piriya, lalu Anduane Homogo Bibahende Haru Haame Ho Haga kagome bi ogoni lene.   
\p
\v 20 Anidagua bialu iyanaga waneigini hono wiribaru haru halu puwa mbirale dama mitangi bialu gime wabini wiaruhondo bi pupu wialu bo lomabu mule pugu birigoni. Wali agali kayu yulenego mana ko ngubiore ngago í̠ni manda birigo buwa í̠naga bu miniha ogonime nakarulape degedagola í̠ni mo ko timbuniore holenego garibilo bedegoni.  
\v 21 Ai mana ko ngubiore ogoni bialu birulene hamelo biruwa i̱naga waneiginiru bu hearubi mbirale dama mitangi bialu gime wabini wiaruhondo bi pupu wialu bo lomabu delai harigoni.  
\v 22 Í̠ galiore hono wahene burupaleore ona wiria i̱na ogodagua mo mondo bialu hene lalu í̠ni langirugo hale howa nahalehe tingi halu puwa agali kayu yama ibaga bialu mana ko ngubiore ngarubi bialu biraabo haga bedegoni. Horo i̱na í̠ handa walia harudangi í̠ daramame dohego ona ema bialu wiria handa walia haru lalu langirugo mitangi nabi dege bedebe, lene.   
\s1 Yarusaleme bayanda wali ale lenego ogo  
\p
\v 23 Anduane Homogo Bibahende Haru Haame Ho Haga kagome laabo halu lalu, Í̠ keria mo ko holene ibulebira laro. Í̠na mana koorene ko uruni biai halu  
\v 24 hariga tene wiaruha pialu mbirale dama mitangi bialu gime wabiniruhondo bi pupu wulenaga anda bu helowa anda uruniha wali agali kayu yu paliaga bule bu helarigoni.  
\v 25 Í̠nime i̱ wali bayaore bedogonida lowa í̠na agali í̠ bedegoria pu bolangua hole poraru olalu íbu laga bialu í̠nila kayu yu paliaga biruwa í̠ha mana ko ogoni bulene bolanguaheore bedegoni.  
\v 26 Iyibiali tiha mana ko bulene miniha didi halu bolanguahe kaware hearu tigua ibalu í̠nila kayu yu palelo hadape ho bedegoni ndobe. Í̠na i̱ mo keba holenaga agali kayu yama ibaga bialu biraabo kegoni.   
\p
\v 27 Abale í̠na ani dege bialu berenego ai i̱na í̠naga mbirale bayale damene i̱nime ngini yu bereru bibahendeore mo wahai haru. Ani bialu Pilidialirume í̠ hame nale halu í̠naga mana ko bialu biraga wirunibi handabe manga timbuni haga karu tigua í̠ mo ko helo i̱na ti ibilarugoni.   
\p
\v 28 Agali í̠ baba kayu yu paliaga biaruni bibahendeme í̠naga hame wigo nakarulape degeyagola ainde Asiriali hearu baba kayu biri. Ani bialu bereria Asirialiru tiguabi í̠naga hame biba nahe dege.  
\v 29 Ani dege wigola ai Babilonoali agali biyinaya biaga hearu baba kayu biaga wali í̠ore birarigoni. Ani bialu heriabi í̠naga hame wigo biba nahe dege wiaabo ho nga.   
\p
\v 30 Anigo Anduane Homogo Bibahende Haru Haame Ho Haga kogo i̱na í̠hondo bi mbira langero. Í̠na mana ko uruni dege bialu biraabo kegome ai mana ko ogoni bulenego í̠ bayanda wali taga nahaga elaheore bedegoni.  
\v 31 Hariga tene wiaru bibahendeha mbirale dama mitangi bialu bi pupu wiaga wiaruhondo bi pupu wulebi wali agali kayu yu paluenebi anda dewaore bu helama pede. Ani bialu í̠ bayanda wali maru bedarubi ndo bede. Marume agali kayu biragome muni mbiraleru migi birago mo yagago í̠na ogonidagua agali kayu yalu howa tihondo muni mbiraleru ngi lalu mo yulene hame nale bede.  
\v 32 Í̠ walime ibu agalini gubalini nahe yu wahalu puwa agali tara bu karu baba kayu yama ibaga bialu biragagobiore bede.  
\v 33 Bayanda wali bibahende bedarume tinaga yolo mirago mo yaga beda. Anigo í̠ ogonidagua nabiaga biruwa agali dindi bibahendeha bu karume í̠ baba kayu yu palue ibilonaga í̠na ti mo turu halu mbirale bayaleru bame mo miriliya.  
\v 34 Í̠ agali mbirame mo bayanda wali berelayagola berene ndo í̠ taraore bede. I̱nimeore biraro lalu mbira ani bedane nahendene ale tara mbira í̠ biruwa agali kayu yaregonaga yolo mo ya nabiaga biruwabi agalime í̠ kayu bilonaga í̠nime agali yolo biaga bedegoni. Heneneore bayanda wali nahendene ale taraore mbira í̠ bedegoni, lalu Anduane Homogohanda lene.   
\s1 Anduane Homogohanda Yarusaleme bo haealabaga bialu mo ko holebira lenego ogo  
\p
\v 35 Anduane Homogohanda laabo halu lalu, Bayanda wali Yarusaleme-o i̱na bi larogo baya hangu hale habe.  
\v 36 Anduane Homogo Bibahende Haru Haame Ho Haga kogo i̱na bi ogodagua laro. Í̠ninaga aga golo wahalu í̠ni tingini agali í̠ dimagoli haga bu hearuha ya edede bima ibaga bialu birariya. Í̠na mana ko ngubi uruni bialu biruwa mbirale dama mitangi bialu gime wabini wiaruhondo bi pupu wialu í̠ni ti mirigoni. Ani buwa í̠naga waneiginirubi balu dama mitangi bialu gime wabini urunihondo bo lomabu mirigoni.  
\v 37 Ai í̠naga agali nenege uruni bibahende í̠na gubalini ho henebi maru hame nale hearubi bibahende mo mogo bialu í̠ni bedegoria ho mabu bule ibilolebero. Ani ibilalu ti í̠ bederia ho mabu bu helalu tinaga deni howa í̠naga aga bibahende golo wahai harogola aga nabiore bame ti babe holebere.  
\v 38 Í̠na dabu binigo mana pugualubi wali agali dewaliore homelo bo wahai harigonibi uruni bialu harigonaga i̱na í̠hondo keba timbuniore halu í̠ manani íbu helowa dabaki halu ko bialu haridagonaga í̠ homabelo bo waholebero.  
\v 39 Í̠naga agali nenege uruni tigua í̠ mo ko holebira. Tigua í̠na dama mitangi bialu mbirale gime wabiniruhondo bi pupu wulenaga anda í̠ agali kayu yu paliaga bu helariruni bibahendeoreme bo gialo wahai holebira. Ani bialu tigua í̠naga aga bayale bu bederubi ma gagua wu bederubi gi pagidarubi í̠na yári bu bederuni bibahende minu golo wahaiore haragola í̠na lone mo karulolene mbira nawi ti babe ona birulebere.   
\p
\v 40 Í̠naga agali nenege uruni tigua wali agali bu karuhondo ndelo miragola tigua í̠ ege to̱le̱me balu wai biaga ayu tibume dibalu í̠naga tingini poda bagabu waholebira.  
\v 41 Ani buwa tigua í̠naga anda bu helederu bibahende bo heda hai haragola wali dewaore biru ngarume í̠ha mbirale o bulubadaruni hondolebira. Í̠na mana urunidagua bialu agali bu karu í̠ andagaha í̠la yu paliaga bilo ndole bialu mbirale mbirale tihondo mialu ala birilidagua lone nabibelo i̱na yupe naholebero.  
\v 42 Anidagua berogome i̱na keba ala harugo mo ereba halu i̱naga bu miniha mo palia halu i̱naga keba holenebi henge lolenebi lone nawulebira.   
\p
\v 43 I̱na í̠ wandari mabuage berengi howa biamogo bialu handayaho hama ibirugo í̠na uruni birugo mo embeda halu mana ko dewaore bialu biraabo harigoni. Anidagua birigome í̠na i̱ mo keba hari. Anigo í̠na mana ko timbuniore bialu harirunaga pani nabelo ngirugoni. Í̠na mana ko dewaore uruni dege ndo í̠na agali bu hearu baba kayu yu palima ibaga bialu harigome biatago harigo aginaga biribe, lalu Anduane Homogo Bibahende Haru Haame Ho Haga kagome lene.\x + \xo 16.43 \xt Iba 78.42, Ese 9.10, 22.31\x*   
\s1 Wandarime ibu ai̱yanaga mana ngago taliaga lenego ogo  
\p
\v 44 Anduane Homogohanda laabo halu lalu, Yarusaleme-o wali agali mani holebiraru tigua í̠ mo ko hene ngago de hondowa, Wandari ibu ai̱yanaga mana hangu talialu biraga o bedagoni, lolebira.  
\v 45 Heneneore í̠naga mana berego handalu karia í̠ ai̱ya hagirume bialu biraga ngagobi dege bialu bederia hendedogoni. Í̠ ai̱ya ibu agalini waneiginirubi hame nalaga berene. Í̠ hagibunirume ti agalini waneiginirubi handabe manga ho biragadagua í̠ bedegoni. Í̠ ai̱ya ibu Hidi wali biralu í̠ aba ibu Amoroali halu binigo libu wane í̠ bedegoni.   
\p
\v 46 Dindi abene uyurayagi Samaria tano ngagoni ibu í̠ hagibuni wahene nga. Tano emene maru wu mabu bidaru ti ibu waneru ale nga. Ani bialu dindi abene unurayagi Sodomo tano ibu í̠ hagibuni heyogone ale wialu tano emeneru ti ibu waneru ale nga.  
\v 47 Abale í̠ hagibuni kira ogonilabo libugua mana ko ngaru hangu bialu biraabo hagadagua í̠nabi nde ogoni talialu birida. Anigo ai í̠naga mana ko biaga ngegome í̠naga hame wigo biba nahayagola í̠na mana ko timbuniore ngaru abaleore lone biatago halu í̠ hagibuni ogoni labome bialu berene ngarubi nira dege lowa bu bolangua harida.   
\p
\v 48 I̱ Anduane Homogo Bibahende Haru Haame Ho Haga kogo i̱na Ngode Datagaliwabe haluhe heneneore kogobi í̠hondo bi heneneore ogodagua laro. Í̠ hagibuni Sodomo halu ibu waneiginirume mana ko áyu í̠ni heba í̠ waneiginirume bialu bedamigonidagua ndo bialu berene.  
\v 49 Ibunibi ibu waneiginirubi ti tomo dewa karulape nalu howabi ti wai nabi bayale biragabi henegoyu tigua mine halu maru hearu mbirale nawi tubagiho hearia handayaho nahagabi mbirale mia nabiagabi hene.  
\v 50 Tinaga miniha giambe howa mine tara haga hene. Tigua mbirale i̱na hame nalaga wiaru bialu haga hene. Tigua mana ko uruni bialu heago hondowa i̱na ti bo wahai harugo í̠ manda bu ke.   
\p
\v 51 Samaria ibuguabi nde mana ko dewaore áyu í̠na bialu bedarunidagua nabiaga hene. Ai mana ko í̠na bialu bederuni ko ngubiore í̠ hagibuniru tigua bialu hayago bolangua howa bialu bedegoni ndobe. Mana ko í̠na bini í̠ hagibuniru tigua binirubi mo mandabu handalu keria í̠na binigo ko timbuni ngubiore bialu tigua biniru bame degedane hondolebere.  
\v 52 Ai í̠na mana ko damene bini ngeru baba í̠ hagibuniru tigua bini ngaru baba mo manda bu handalu koria í̠ha ko timbuniore í̠ hagibuniru tiha ko mbira nawi beda labehedane hendedogoni. Anigo í̠na birirunaga taga timbuniho birulene nga. Í̠nime mana ko tagabi wiaru bialu birarirunaga pani áyu noleberego í̠ni miniha genda yuwa tagaho birabe, lene.   
\s1 Sodomo Samariala lone mo bayale holebira lenego ogo  
\p
\v 53 Anduane Homogohanda laabo halu lalu, Yarusaleme-o áyu í̠ hagibuni kirali Sodomo Samariala libu waneiginiru heba bibahende mo ko hai hene ngagoni. Anigo mani i̱na libu lone mo bayale holebero. I̱na í̠bi mo bayale dege helarogola tí haru mandagi bayale holeberemi.  
\v 54 Ani howa í̠nime mana ko bialu birarirunaga taga halu birulebere. Ani bedego hondowa í̠ hagibuni kirali biagolabo libunaga ko genda wiyaru bame degedane hondolebira.  
\v 55 I̱na libubi libunaga waneiginirubi biamogo berogola ti bayale abale haraligobi lone hadai bulebira. Í̠nibi í̠ waneiginirubi tínde abale bayale haramiligobi dege lone hadai buleberemi.  
\v 56 Abale í̠ wali bayale bedobe toba howa mine ho biralu í̠na Sodomo ibu wali ko bedago mitangi bialu oba ho birarigoni.  
\v 57 Í̠ ani mine ho berengi mana ko í̠na bialu wiriru mo pani nahe birari. Ai mana ko bialu birarigo uruni pani ho ngagola í̠na Sodomohondo oba haridagua wali agali maru bu karume í̠ de hondowa oba halu ka. Idomo wali bedarubi Pilidia wali bedarubi wali maru kaware bedarubi tigua í̠ wali ko ngubi mbira o bedagoni lowa hondo mege bialu beda.  
\v 58 Ani biragola í̠na mana ko bialu agali kayu yama ibaga bialu birarigonagabi mana ko maru bialu birarigonagabi taga pani nalu genda yu birabelo mo ngulebero, lalu Anduane Homogohanda bi ogoni lene.   
\s1 Anduane Homogonaga habo nalolene bi gahenge wiaabo holebirago ogo  
\p
\v 59 Anduane Homogo Bibahende Haru Haame Ho Haga kagome laabo halu lalu, Yarusaleme-o i̱na í̠hondo bi mende langule yidogo. Abale í̠ wandari mabuage berengi i̱naga habo nalolene bi mbira í̠la lo wirugoni. Anigo bi ogoni lo wirugo í̠na mo nagalone halu puguarigoni. Anidagua birigonaga i̱na í̠hondo mana ko í̠ni birigonaga pani nabelo karulapeore ngulebero.  
\v 60 Ani bialu ala í̠ boga nabi wandari hibaria berengi i̱na í̠la habo nalolene bi lo wirugoni embeda nahe bulebero larudagua biaiore holebero. I̱na habo nalolene bi gahenge í̠la lo werogola bi ogoni wiaaboboore wulebira.\x + \xo 16.60 \xt Iba 106.45, Yar 32.40, 50.5\x*  
\v 61 Ani bialu í̠ hagibuni wahene heyogonebi kirabali ogoni labo í̠ni bedegoha haru daibu berelarogola í̠ni wane aleore bu hinu birulebere. Bi áyu larogoni habo nalolene bi lo wirugoha nale winigo ai i̱ninaga hameme ani bulebero. I̱na ani berongi í̠na mana ko bialu birariruni mitangi bu dai buwa í̠ni taga timbuni halu birulebere.  
\v 62 I̱na habo nalolenenaga bi gahenge lo wia aribia harogola í̠na i̱ Anduane Homogoore henedane hondolebere.\x + \xo 16.62 \xt Hos 2.19-20\x*  
\v 63 Ani hondo bedegola i̱na í̠naga mana ko bialu birariruni bibahende mo embeda halu wahai holebero. Ani berongi í̠na í̠nime mana ko biaga wirigo mitangi bu dai bialu taga timbuni howa bi lolene mbira labe nahe bi biba hene birulebere. Anduane Homogo Bibahende Haru Haame Ho Haga kogo i̱na bi ogoni larugoni, lene.   
\c 17  
\s1 Ega bodo hariawe kirala \w gerebi\w* iranela bi yobage lalu lenego ogo  
\p
\v 1 Anduane Homogohanda i̱hondo lalu,  
\v 2 Dindiali-o í̠na Isaraele wali agali bu karuhondo bi yobage mbira lamibelo hameledo.  
\v 3 Bi ogo Anduane Homogo Bibahende Haru Haame Ho Haga kogome tihondo larogo manda bilo lamibe. Ega bodo hariawe timbuniore mbira bereago ogoni ibunaga babagane timbuni yula amunana bialu iriniru yári baya taraorebi berea. Ega odagonime Lebanononaga hari wiaruha yagalo yu pialu ira tamia mbira heagonaga mane puguaya.  
\v 4 Pugu yalu agali biyinaya biaga hearu daluha puwa tano mbira wiagoria ngelaya.  
\v 5 Ani ngelalu ega biagome lone yagalalu Isaraele dindiha puwa pu mbira lini daga mini \w gerebi\w* egene emene anda halu heago dugu yaya. Dugu yalu puwa dindi bayale ira anda holene iba dewa bere wiagoha hangaya.  
\v 6 Ani hengeagola pu mbira lini daga mini gerebi biagoni anda halu ginigene yuloyu pugu pugu biya. Ginigene uruninaga maneme ega bodo hariawe biago bereagoha anda hadaga haya. Ani bialu ibunaga pini dindiha hongohe anda piai hayagola gerebi irane ogoninaga ginigene yunibi dewaore haya.   
\p
\v 7 Ai ega bodo hariawe timbuni mende berene. Ogoni ibunaga babagane lu timbuni irini dewahe berea. Ani bereagoria pu gerebi biago dindi ibu hayago turu nahe howa ibunaga pinibi gene maganebi ega bodo hariawe mende ogoni bereagohayagi handa dai biai helaya. Gerebi o biagome manda bialu hearia ega mende ogoni ibugua iba dewaore ngulubabe toba haya.  
\v 8 Anigo pu ogoni ibuni henedagoha dindi bayaleore wini. Dindi ogoniha iba dewa biralu dindi ibane bere bayaleore wiagoria ibu bayale anda halu gene magane dewaore halu gerebi linibi dewa dalu ibu duniniore mbira habehe wini.   
\p
\v 9 Ani winigo ai Anduane Homogo Bibahende Haru Haame Ho Haga kogo i̱na mbira ogodagua hale haro. Pu lini daga mini gerebi irane ogoni ibu anda halu bayale holebirabe. Naholebira ndobe. Ega bodo hariawe pigane berene biagome keba timbuni halu pu ogoni irane heba dugualu gerebi lini dedaru do hilu wahai halu mane anda hama polene kago ni dedagoria mo yogobia holebira. Agali hongo nahemebi hameigini emene karumebi gerebi irane ogoni duguabehe bame holebira.  
\v 10 Pu ogoni ibu dindi bayaleoreni hangayagoyu ainde ibu bayale anda halu timbuni hoa nahaya. Ani biyago puyabu poboyogobiore hongohe ni tagira ibiragohayagi howa ibiragome pu gerebi lini daga biago irane ogoni puloba haragola ibuni ngagoria dege wialu gabu holebira, laya lene.   
\s1 Bi yobage layagonaga garea lo minigo ogo  
\p
\v 11 Anduane Homogohanda i̱hondo laabo halu lalu,  
\v 12 Wali agali doga halu bi hale nahaga bu karunihondo gerebi ira ogoninaga bi yobage irane manda bidamibe lalu hale habe. Bi yobage o larugonaga irane ogo. Babilonoalinaga kini heagome Yarusalemeni ibalu Yuda kini heagobi ibunaga ami agali haguane bu hearubi bibahende garabaya bu yalu Babilono piai haya.\x + \xo 17.12 \xt 2 Kin 24.15-20, 2 Bit 36.10-13\x*  
\v 13 Ibu Yuda dindiha heangi Babilono kini heago ibugua Yuda kini aria mbira heagola habo nalolene bi mbira lowini. Ibugua lalu, Agali ogo ibu Yuda dindiha kini gahenge helo, laya. Ani lowa ibugua kini gahenge ogonihondo ibu Babilono kini kago andaneha haabo hole lalu bi hongohe mbira lowia halu mo lahaya. Ani bialu Babilono kini biago ibuni dalu Babilono dai bialu howa ibugua Yudanaga agali haguane maru hearu garabaya bu yalu haru piai hene.  
\v 14 Ibugua ani binigo irane Yuda dindi hongo halu lone irigi nahelobi Yuda kini biagola habo nalolene bi lo wiyago habo nale wiaabo helonagabi ani bini.  
\v 15 Ani binigoyu Yuda kini biago ibugua bule lalu bi lo wiyago nabi habo lene. Ibugua Iyibi kini heagohondo bi lo pelalu nogo hosiru haru halu ami agali dewaorebi haru halu i̱ biamogo bule ibalimu, lene. Ani layagome kini ogoni ibu hongo holebirabe. Ibugua Babilono kininaga bi mo wahayagonaga Babilono kini kagome ibalu ibuni pani nelo mialu bolebira.   
\p
\v 16 I̱ Anduane Homogo Bibahende Haru Haame Ho Haga kogo i̱ Ngode Datagaliwabe haluhe heneneore kogobi bi tigatiga larogo. Yuda kini ogoni ibu Babilono garabaya pialu ogoniha homolebira. Ani bulebiragonaga irane ogodagua. Babilono kini kagome ibu kini helo dabo helayagoyu ibugua habo nalolene bi lo wiyago habo lalu Babilono kini kagohondo ogoaleore bule lalu bi hongohe lo wiyagobi habo lalu biya.  
\v 17 Ani biyagonaga Babilono ami agali bu karume ibalu Yarusaleme wai pabe kawareni heyu howa wai bulenaga dindi dugu wima irigi halu Yarusaleme ho hagira bulebira. Ani buwa tigua Yarusaleme baba wai bialu wali agali dewaore bo wahai holebira. Ani birangi Iyibi kininaga ami agali hongo gibiorehe bu karume ibalu Yuda biamogo nabibehe holebira.  
\v 18 Yuda kini kago ibunime habo nalolene bi lo wiyagobi ogoale buleore lalu bi lo wiyagobi pugualu mo habo layagonaga ibuni pani noleneore wulebira. Pani ogoni nanolenaga ibu ibida polene henge nawulebira.   
\p
\v 19 I̱ Anduane Homogo Bibahende Haru Haame Ho Haga kogo i̱ Ngode Datagaliwabe haluhe heneneore kogobi bi tigatigaore larogo. I̱na kini ogonihondo pani mulebero laro. Ibugua habo nalolene bi hongohe lo wialu howa lalu heneneore laro lalu i̱naga minini howa lo wiyago lo wuwa talialu bulene wiago nabiya.  
\v 20 Anidagua biyagonaga i̱na ibu gono hongohe mbira ngogoha do ngaria hadoleberogo ani hela. I̱na ibu Babilono haru puwa pani nelo muleberogo irane ibugua buleore lalu habo nalolene bi i̱naga minini howa bi lo wiyago wuwa i̱hondo mini bilina naheore haya.  
\v 21 Ani bialu waitigi ibirarume ibunaga ami agali wai mana mandabiore karu ti bo wahai holebira. Ani biragola ami agali maru homa nabi yu wahene hayadaru ti ibida pugupugu bialu piai holebira. Anidagua biragola Isaraele wali agali tígua bi ogo Anduane Homogo i̱nimeore lenedane manda buleberemi, laya lene.   
\s1 Anduane Homogohanda Isaraele biamogo buleore lowinigo ogo  
\p
\v 22-23 Anduane Homogo Bibahende Haru Haame Ho Haga kagome lalu, I̱na ira tamia luniore mbira kagonaga mane podowa Isaraele dindiha hari nene daligaore maru karu bolangua haihe kagoria hongolebero. Ani hangarogola ira ogoni ibu anda halu timbuni holebira. Gene magane luni purogole howa liniru dewa dolebira. Ani biragola ibu ira tamia duniniore mbira holebira. Ega tara tara bedarume ira ogoniha ni gumba birule íbu ngoai holebira. Ani íbu ngoaiho biruwa tinaga andaru ira ogoni maganeni bulebira.  
\v 24 Anidagua birago hondowa ira dindi bibahendeni karume i̱ Anduane Homogo i̱naore ira luore karu tubagi helo mane gaibu wahalu tubagi bu karu mo lu helaga henedalo hendelo anidagua bulebero. Ani bialu ira yunihe karu mo gabu halu ira gabuni karu mo gahenge haga kagonidalo manda bulebira. I̱ Anduane Homogo i̱na bi o ledogoni buleore lalu larugo biai holebero, lalu Anduane Homogohanda laya lene.   
\c 18  
\s1 Wali agalime ko biyagonaga pani tini hangu hangu mulene nga lenego ogo  
\p
\v 1 Anduane Homogohanda i̱hondo lalu, Isaraele wali agalihondo bi ogodagua latagi habe laya.  
\v 2 Isaraele wali agaliru tígua bi yobage mbira ogodagua laramili.\x + \xo 18.2 \xt Yar 31.29\x*  
\q1 Aba ai̱yarume pu mbira mini \w gerebi\w* lini emene gani dedaru do nagagoyu  
\q1 ai waneigini tigua wene gani uruninaga lini nolene kau haga,  
\m lalu laramiligo irane aginaga laramilibe.   
\p
\v 3 Anduane Homogo Bibahende Haru Haame Ho Haga koho i̱ Ngode Datagaliwabe haluhe heneneore kogobi howa tíhondo heneneore laro. Tígua bi ogoni laramiligo lone nale wahaiore holeberemi.  
\v 4 Wali agali bibahendenaga holene i̱nime yu kogoni. Aba ai̱yalabi waneiginirubi bibahendeorenaga holene i̱nimeore yu kogoni. Ani bidogo mbiralime ko ngago biyagua biagago ibuniore homolebira.\x + \xo 18.4 \xt Ese 18.20, Lm 6.23\x*   
\p
\v 5 Agali mbira ibu tigabiore howa ibunaga manabi tigabi dege biaga heagua ogoni ibu bayaleore ka laramali.  
\v 6 Agali ogonibi kago ibugua Isaraele wali agalinaga mbirale gime wabiniruhondo bi pupu nawiagabi urunihondo mbirale bo lomabu miyago nanagabi ka. Agali tigabi ogonibime hogorale buwa agali mendeali one kayu nayagabi wali egengi biruwa ililibu bedangibi mandagi nahaga ka.\x + \xo 18.6 \xt LBM 20.18\x*  
\v 7 Ibugua agali mende mo hondo nahe ibunaga mbirale ngarubi mo page nabiaga ka. Agali mbirala dano heneyagua o biago ibuniore yamialu maru tagoha nalaga ka. Ani bialu howa maru tomo nawi karu tomo nelo mialu aga nabi karu aga bilo talebu miaga.\x + \xo 18.7 \xt Har 22.25\x*  
\v 8 Ibunaga nenegerume ibunila dano mbira ho heneyagua emene tago halu ngi nale miyagobiore mo yalu dai biaga ka. Wali agali maname dabaki helo ibiraru bibahende tigabi ngadaguaore tiga biaga ka.\x + \xo 18.8 \xt LBM 19.15\x*  
\v 9 Agali ogonibi ka ibugua i̱naga bi mana ngogoore talialu baya hanguore biaga ka. Agali mana urunibi biaga kago ibu mini tigabiore howa bayale haabo holebira, lalu Anduane Homogo Bibahende Haru Haame Ho Haga kagome laya, lalu Esegielehanda lene.\x + \xo 18.9 \xt LBM 18.5, Ese 20.11, Amo 5.4\x*   
\p
\v 10 Ai agali tigabi ogonibi kago ibu igini mbira hayagua ogoni ibugua anda howa agali mendealinaga mbirale ngaru mo page bialu agali homelo balu mana ko ngaru  
\v 11 ibu abahanda nabiagadagua biyagua nde ibuni homolene wulebira. Agali igini ogoni ibugua mbirale gime wabiniruhondo bo lomabu miniru naga howa agali mendeali one bedaru kayu yagabi howa  
\v 12 yagibano karu mo hondo hagabi agali mendealime ibuhondo dano hole miraru maru mo do hagabi mbirale gime wabiniruhondo bi pupu wiagabi uruninaga andaha puwa mana ko ngubi ngaru biagabi  
\v 13 ibunaga dano henerume miadai biragola bolangua howa ngi lagabi kayagua ibu bayale holebirabe. Ani ndoyago ibunime mana i̱na hame naledogo bialu kagome ibuni homolene wulebira laro.   
\p
\v 14 Anigo ai agali mende ko biaga kago ibu igini heagua ogonime anda halu wahe howa ibu abahanda mana ko ngaru biagadagua nabiyagua ogoni ibu bayale holebira.  
\v 15 Agali ogonibi kagome Isaraele wali agalinaga mbirale gime wabiniruhondo bi pupu nawiaga howa urunihondo mbirale bo lomabu mini ngaru nanagabi agali mende one kayu nayagabi ka.  
\v 16 Ibugua agali mendeali mo ko nahagabi tinaga mbirale ngaru mo page nabiagabi mbiralime mbirale dano hene tingi howa ohalu mbira namo yagabi ka. Ibugua mendeali tomo garibilo karu talebu mialu aga nawi karu talebu mialu biagabi ka.  
\v 17 Ibugua mana ko ngaru mbira nabiagabi muni dano heneru bolangua howa ngi nalagabi ibugua i̱ninaga bi mana ngoru talialu biaiore haga kayagua ibu bayaleore holebira. Heneneore ibu abahanda mana ko ngaru dewa biai hayagonaga ibu igini homolene nawulebira.  
\v 18 Ibu abahanda wali agali dewa mo ko howa tinaga mbirale wiaru mo kayu bialu mana ko dewa biaga henego ai ibuni urunidagua biyagome ibu homolene karulape wini.   
\p
\v 19 Anigo tí Isaraele wali agalime i̱hondo bi ogodagua hale halu ai abame ko biyagonaga pani iginime no aribia naharagoni agidabe laramili. Ai i̱na tihondo ogodagua ladai bero. Igini ibugua mana tigabi ngago bialu howa i̱naga mana ngoru talialu biyagua ibu bayale holebira.  
\v 20 Agali ko biaga karu dege homolene wulebira. Aba ibugua kagua biragonaga iginime pani na aribia holene nawi. Igini ibugua kagua biragome ibu abahanda pani na aribia holenebi nawi dege. Agali mana tigabi biaga karu ti nde tinaga mana tigabi biyarunaga yolo bayale ngaru mo yu holebira. Mana ko ngaru biaga karu ti nde tini mana ko biyarunaga yolo pani nolene ngaru nalu genda yu holebira.\x + \xo 18.20 \xt Man 24.16, Ais 3.10-11, Ese 18.4, Lm 2.9\x*   
\p
\v 21 Anigo agali mbirame mana ko ngaru yu wahalu mini beregedalu dai buwa i̱naga mana tigabi ngaru talialu biadai biyagua nde agali ogonidagua birago ibu nahome bayaleore holebira.\x + \xo 18.21 \xt Ese 18.27, 33.12, 33.16-19\x*  
\v 22 Ibugua ko bibahende biyaru Anduane Homogohanda domo waharagola mana tigabi biaabo hayagonaga ibu holene gahenge yu holebira.  
\v 23 I̱ Anduane Homogo Bibahende Haru Haame Ho Haga kogome tíhondo hale harogo. Tígua manda beramigola agali ko biaga karu mbira homayagua i̱na turu haga kobe toba kamibe. Ani ndoyago agali ko biaga mbira kago mini beregedowa ko biaga biago wahayagua i̱na ogoni hondowa turu haruli.\x + \xo 18.23 \xt Ese 33.11, 1 Ti 2.4, 2 Pi 3.9\x*   
\p
\v 24 Anigo agali bayale biaga mbirame mana bayale bialu hayago wahalu mana ko i̱na hame naledogo biyagua agali ogoni ibu bayale holebirabe. Ani ndoyago i̱na ibu mana bayale abale bialu hayago mitangi nabulebero. Ibugua i̱ erembira ngialu mana ko biragonaga ibuni homolebira.\x + \xo 18.24 \xt Ese 3.20, 33.12-13, 33.18, 2 Pi 2.20\x*   
\p
\v 25 Anigo tígua ogodagua laramili. Anduane Homogo ibugua o biragonidaguago lehe bira laramiligoni. Anigo Isaraele wali agaliru-o i̱na bi larogo baya hangu hale hadaba. Tígua manda beramigola i̱na berogo lehedabe. Ani ndoyago tíni mana beramigo lehe bialu kami.  
\v 26 Ai agali mbira mana bayale bialu hagame lone mana ko ngaru biadai biyagua nde agali ogoni ibugua mana ko uruni biyagonaga ibu homolene wulebira.  
\v 27 Ani bialu agali ko biagame mini beregedalu mana bayale biadai biyagua ogoni ibu mani bayale biyagome nahomolebira.  
\v 28 Irane ibunime handalu hearia mana ko bialu hayaru leheyane handalu mana ko uruni wahalu tigabi ngaru bialu hayagonaga ogoni ibu homa nabi bayale holebira.  
\v 29 I̱na nde mana ogonidagua berogola Isaraele wali agali tígua lalu, Mana ogonidagua birago tigabi ndo bira laramiligo. Ai tígua manda bialu kamiria i̱naga mana ogoni tiga nabidabe. Ndoyago tíninaga mana tiga nabi kooreyago.   
\p
\v 30 I̱ Anduane Homogo Bibahende Haru Haame Ho Haga kogo i̱na Isaraele wali agali tíhondo bi ogo langero. I̱na tínaga mana hangu hangu birimigodaguaore dabaki bulebero. Aniore bule ngogo ai tígua mana ko bialu kamiru wahai halu mini beregedolene nga. Tígua mana ko birimiru wahalu mini beregedarimiyagua nde ko birimigome tí mo ko naholebira.  
\v 31 Isaraele wali agali tí aginaga homole hamelo kamibe. Tígua mana ko bialu kamiru wahalu mini ala tawe ngamirubi wahalu mini gahengebi gubalini holene gahengebi karulo holene ngagoni.  
\v 32 I̱ Anduane Homogo Bibahende Haru Haame Ho Haga kogoni howa i̱na wali agalibi waneiginibi mbirali homelo hame nale kogoni. Anigo nde tíni mana ko bialu kamiru wahalu mini beregedowa mana bayale ngaru bialu halimu, lalu Anduane Homogohanda laya lalu Esegielehanda lene.   
\c 19  
\s1 Esegielehanda dugu daraore bia henego ogo  
\p
\v 1 Anduane Homogo ibugua i̱hondo lalu, Isaraele kinibi Yuda kinibi libunaga dugu daraore bia halu iba gana ogobi labe, laya.   
\q1
\v 2 Í̠ ai̱ya ibu gabua laiono timbuniore hene.  
\q2 Ibugua laiono wangabe dewa bu hearu ti dege dombeneha howa  
\q2 ibu iginiru bayuwa handayaho hayagola ti bayale anda hai haya.   
\q1
\v 3 Ibu igini mbiraore wangabe timbuni anda hayagola  
\q2 ibugua igini ogoni nogo tara tara gabua taya helo biawai haya.  
\q1 Ibu laiono hongoheore howa agalibi bo nagane helo biawai haya.   
\q1
\v 4 Hameigini tara tara dindi tarani bu hearume laiono ogonime mana biaga ngago hale hai haya.  
\q2 Tigua ibalu laiononaga gundu uli tombo wiyagola laiono uli ogoniha pilaya.  
\q2 Tigua ibu ne harigaha wena langame helowa Iyibi dindiha gililo yalu piya.   
\q1
\v 5 Ai̱yahanda ibu igini dai bilo maliaho biraabo heagola igini biago dai nabiya.  
\q2 Dai nabiya handala ibu igini dege mende heago  
\q2 ibu laiono dalua bayale dege helo dabo helene.   
\q1
\v 6 Laiono igini ogoni andaho heagola  
\q1 ibu laiono maru hearu baba mandagi ibaga bu haya.  
\q1 Ibugua nogo tara tararu bolene mana bu manda bialu howa  
\q2 nogo gabua tara tara taya bialu agalibi bo nagane dege hene.   
\q1
\v 7 Ibugua tinaga wai pabe anda hongohe hearubi  
\q2 tano wiarubi bo gialo wahai haga bialu hene.  
\q1 Ibugua bi hongo howa layagola  
\q2 wali agali bibahende hearume gi hai haga hene.   
\q1
\v 8 Hameigini tara tara dindi tara wiaruha howa laiono ogoni baba wai bule íbu ngoai hene.  
\q2 Tigua gono wiago mo tigabu ngelo howa  
\q2 gonoha dayagola hadene.   
\q1
\v 9 Tigua ibu wena langame hende howa  
\q2 mbogoyi mbiraha minu berelowa Babilono kini hearia yalu pene.  
\q1 Ibu pora bialu tagira napelo  
\q2 ibu garabaya anda hongohe wiagoha helo helene.  
\q1 Wali agali Isaraele dindi hari ngaruha hearume  
\q2 ibunaga bi hongo howa laruane lone hale nahelo ani bini.   
\b  
\q1
\v 10 Kini ogonilabo libu ai̱ya ibu pu mbira lini daga mini \w gerebi\w*  
\q2 iba angeni hengene mbira haraligobi bereneya.  
\q1 Pu gerebi ogoni iba bayale bereagoria hengenego  
\q2 timbuni anda howa gene maganeni yuni dewahe gerebi linibi dewaore deneya.   
\q1
\v 11 Pu gerebi ogoninaga gene magane hongoheore halu  
\q2 kininaga halimbu hongohe ngaligobi haya.  
\q1 Irane ogoni luniore halu hari beraliba ela habehe haya.  
\q2 Ibu luniore halu magane yunibi timbuni dewaorebi heago  
\q2 bibahende hearume de handai hene.   
\q1
\v 12 Pu gerebi ogonibi heagola agali bu hearume keba howa  
\q2 irane ogoni minu dugualu dindini bape haya.  
\q1 Tigua ani biyagola ni tagira ibiragohayagi howa  
\q2 puyabu poboyogobi ibiyagome gerebi lini deago bibahende yogo bialu gaulai haya.  
\q1 Agali urunime ira magane hearu dandape hai halu  
\q2 magane bibahende irani delai haya.   
\q1
\v 13 Mani tigua pu gerebi ogoni dugu yalu puwa  
\q2 dindi ko yobini iba nabiraga wiagoha hangaya.   
\q1
\v 14 Ogoninaga teneha howa  
\q2 ira datagi halu gene magane yuni linibi irame dai haya.  
\q1 Ibunaga magane bayale mbira hongohe ndo howa  
\q2 kininaga halimbu wabibehe mbira naheneya.  
\m Bi ogoni dugu daraore binigo tigua iba gana lalu haabo haga winigo nga.   
\c 20  
\s1 Isaraele wali agali ti doga howa Anduane Homogo talima nape henego ogo  
\p
\v 1 Ina Babilono pu hemagola mali kanegonaga ege daunini horo pini hayagola Isaraelealinaga agali haguane bu hearu i̱ berewaria kaware íbu biraya. Tiha genda mbira wiagola Anduane Homogonaga hame hale hole i̱hondo haleha laya.  
\v 2 Ani layagola Anduane Homogohanda i̱hondo langialu lalu,  
\v 3 Dindiali-o i̱ Anduane Homogo Bibahende Haru Haame Ho Haga kogo i̱na agali haguane urunihondo bi o larogo tihondo lamibe laro. Tígua i̱naga hame ngogo hale holenaga ibirimibe. I̱ Ngode Datagaliwabe haluhe heneneore kogobi i̱na tíhondo tigatigaore larogo bameore ibirimida laro. Tígua bi hale haramiru aria mbiraore hangubi mbira ladai nabulebero. I̱ Anduane Homogo Bibahende Haru Haame Ho Haga kogo i̱na bi o ledogoniore, laya.   
\p
\v 4 Dindiali-o agali o bedaruni manani helai habelo hameledo. Agali uruni ti mamalinaga mana ko ngubi bialu haga wiyaru mo mitangi bia habe.  
\v 5 Tihondo bi o larogo lamibe. I̱na bamba tínaga mamali Isaraele hearu ti i̱ninaga wali agaliore helo dabarungi i̱na mbirale mbira tihondo buleore lalu bi hongoheore lo wirugoni. Ti Iyibi dindini heangi i̱ni ogobi ko lowa mo walia halu Anduane Homogo tínaga Ngode Datagaliwabe kogoni lalu lamiru.\x + \xo 20.5 \xt Har 6.2-8\x*  
\v 6 Ogoningi howa i̱na ti Iyibi dindi yu wahalu dindi mbira ti mule lalu bi hongohe lo wirugoria haru halu ibule laru. Dindi ogoni ibane bere baya tomo mbirale ngaru anda hai holene nga laru. Dindi tara tara bu ngaruha dindi ogonibi mbira nawi baya gibiore mbira nga laru.  
\v 7 Ani bialu i̱na tihondo ogodagua lamiru. Tíni hangu hangu kamigoha howa Iyibi wali agalinaga dama mitangi bialu mbirale gime wabinigohondo bi pupu wulenaga hame lalu ngelo kamiruni wahai halimu. Tígua mbirale ko urunihondo bi pupu nawilimu. Anidagua bialu kamigome Anduane Homogo tíninaga Ngode Datagaliwabe i̱naga deni mo dodo nahalimu, laru.  
\v 8 I̱na tihondo ogonidagua lamirugoyu tigua doga halu bi ogoni hale nahaya. Ti bibahendeme i̱na bi larugo mo wahalu Iyibi wali agalinaga dama mitangi bialu gime wabini wiaru wahoa nahaya. Anidagua bialu hayagonaga ti Iyibi dindiha heangi i̱na i̱ miniha keba timbuni halu tandaga harudago tiha biba helole manda birugoni.  
\v 9 Ainde ani nabi waharudago irane i̱na ala Isaraele wali agali lamialu, I̱na tí Iyibi dindi yu wahalu dindi ogoha haru ibulebero, lalu lo wirugola wali agali Isaraeleali baba mandagi haga hearunaga deni howa larugoyane bulebirugo nabi waharu. I̱na buleore lalu bi lo wirugo mo habo laruyagua nde i̱nime tinaga deni i̱naga mini mo dindiha holilono waharu.   
\p
\v 10 Ani larugoyane i̱na Isaraele wali agali Iyibi dindi wahalu haru tagira pialu dindi ko iba dalu naibaga wiagoha haru ibiru.  
\v 11 Ani haru íbu helowa i̱na mana buleneru lamialu i̱naga bi \w mana\w* lowini ngorubi lawai halu biru. Wali agali bu karume bi mana ogoni hale halu taluwa bialu hayagua tiha bayale holene wulebira.\x + \xo 20.11 \xt LBM 18.5\x*  
\v 12 Ani bialu i̱na ti baba habo nalolene bi lo wirudagonaga manane mbira walia halu \w Sabada\w* horo mo ngelaru. I̱ Anduane Homogo i̱nime ti mo dabobagi howa i̱naga wali agaliore helayadalo manda bilonaga horo ogoningi ti biabe tara tara nabi ha̱lo halu i̱ mitangi bialu holene wini.\x + \xo 20.12 \xt Har 31.13-17\x*  
\v 13 Anigo ai dindi ko iba dalu naibaga wiagoha howabi nde tigua doga halu i̱naga bi hale nahaya. Dindi ko wali agali nahaga wiagoha howa tigua i̱naga bi hale habe manga halu tini bayale holenaga mana ngago taluwa bialu holene biago pugualu Sabada horonaga manabi puguaya. Anidagua biyagola i̱naga bu miniha keba timbuni halu tandaga harugo tiha biba hole manda biru.  
\v 14 Ainde ogonidagua nabirudago irane wali agali bu karunaga deni i̱naga mini mo dindiha holobada manda bialu ti bo wa nahe waharu. Wali agali tara tara uruni ti handayaho heaore i̱na Isaraele wali agali Iyibi howa haru tagira ibirugo mitangi bialu ti pani mialu bo wahai nahe waharu.  
\v 15 Anigo Isaraele wali agali dindi ko iba dalu naibaga wiagoha íbu heangi i̱na tihondo bi hongo howa lamialu, I̱na tí dindi ibane bere bayale dindi maru ngaru ogonibi mbira nawiore larugo dindi ogoniha halimulo haru pole larugoha ai haru napolebero, laru.\x + \xo 20.15 \xt Dag 14.26-35\x*  
\v 16 I̱na bi ogoni larugo irane tigua i̱na mana bulene nga laruru talialu bia nabi hayagonagabi i̱naga bi lo winigo ngoru puguayagonagabi laru. Tigua dama mitangi bialu mbirale gime wabini wiaruhondo bi pupu wulene dege hamelo howa i̱naga bi mana pugualu Sabada horonaga manabi pugua dege bialu hene.   
\p
\v 17 I̱na ani larugoyu ti dindi ko iba dalu naibaga wiagoria howa homai helo bo wahai holene winigo ai i̱na ti dara hodai bialu bo wanahe waharu.  
\v 18 Ani nabi howa i̱na tinaga waneigini daliahe hearuhondo lamialu lalu, Tínaga mamalirume mana bialu haga wiyaru nayalimu. Ani bialu wali agali tara bu karunaga dama mitangi bialu mbirale gime wabini ngaruhondo bi pupu wialu i̱naga deni tíni dodohe nahalimu.  
\v 19 I̱ Anduane Homogo tínaga Ngode Datagaliwabe kogo tígua i̱naga bi lowini ngoru hale halu mana bulene ngorubi baya hangu taluwa bialu halimu.  
\v 20 I̱na \w Sabada\w* horo ogoni i̱naga wiabagi ho wirugo mitangi bialu tígua horo ogoniore i̱naga nga manda bialu halimu. Horo ogoni i̱na habo nalolene bi lo wirugonaga manane ngelalu tígua horo ogoningi biabe nabi ha̱lo howa i̱ni Anduane Homogo tínaga Ngode Datagaliwabeore henedane manda bilimulo wirugoni, laya lene.   
\p
\v 21 I̱na wali agali urunihondo anidagua larugoyu tinimebi i̱hondo doga haabo halu hene. Tigua i̱naga bi lowinigo wahalu tini bayale holenenaga i̱naga mana bulene ngaru taluwa bialu nahe pugualu haabo hene. Ani bialu tigua Sabada horonaga mana lo wirugo puguaore bialu heagola i̱naga bu miniha keba timbuni howa tandaga harugo tiha biba halu dindi ko wali agali nahaga wiagoria howa bo wahai holene winigo waharu.  
\v 22 Ogonidagua manda bialu waharudagoni irane wali agali tara tara bu hearunaga deni i̱naga mini mo dindiha holobayane mitangi bialu bia nabi waharu. Wali agali tara uruni ti handayaho heaore i̱na Isaraele wali agali Iyibi dindini howa haru tagira ibirugoni mitangi bialu ti bo wa nahe waharugoni.  
\v 23 Anigo i̱na bi mende hongohe lo wiru. I̱na ti bo talia togolalu dindi tara tara wiaruha hama purogo lelolebero manda biru.\x + \xo 20.23 \xt LBM 26.33\x*  
\v 24 I̱na bi ogoni larugo irane tigua i̱naga mana bulene ngoru mo wahayagobi i̱naga bi lowiniru puguayagobi Sabada horonaga mana lowinigo puguayagobi tinaga mamalinaga dama mitangi bialu gime wabini wiaruhondo bi pupu wialu hayagobi tigua ko uruni biyarunaga i̱na bi ogonidagua lo wirugoni.   
\p
\v 25 Ani buwa i̱na bi mana tarabi lo wialu mana bulene tara alebi lamirugo urunime ti bayale helonaga ndo lo wirugoni.  
\v 26 Tigua dama mitangi bialu mbirale gime wabini wiaruhondo bi pupu wialu mbirale lomabu mule hame ledadagua bilaru. Ani bialu tinaga igiri wahene hayago dama mitangi bialu gime wabini urunihondo bo lomabu migi bilo helaru. Tigua mana uruni bialu helo waharudagoni irane ti mogolo handalu tinime mana ko bialu hayarunaga pani nalu helobi i̱ni Anduane Homogo heneneore henedane hendelobi ani biru, laya lene.   
\p
\v 27 Anduane Homogohanda i̱hondo laabo halu lalu, Dindiali-o i̱ Anduane Homogo Bibahende Haru Haame Ho Haga kogo i̱na Isaraeleali karuhondo bi larogo lamibe. Tinaga mamali biarume mana ko tara mende ale bialu tigua i̱naga bi larugo mo wahalu i̱naga minibi mo yo handalu biya.  
\v 28 I̱na dindi tihondo ngulebero lalu lo wirugoria haru íbu helewagola tigua ira timbuni hearubi hari timbuni wearubi de hondowa dindi ogoniha dama mitangi bialu mbirale gime wabini wiaruhondo bi pupu wialu lomaru bu mialu holene bayale mbira winidalo manda biya. Ani manda bialu tigua nogo dewabi \w waini\w* iba dewabi yalu ibuwa tigua lomabu miyagome i̱ mo keba timbuniore haya.  
\v 29 Anidagua bialu heagola i̱na tihondo ogodagua hale haru. Tígua irane aginaga hari nene daligaore ngagoha puwa dama mitangi bialu mbirale gime wabini ngaruhondo bi pupu wule aginaga pialu kamibe, laru. Ani larugoni irane Isaraele wali agali tigua hari neneha bi pupu wule piaga uruni mini Hari Neneha laga wini.  
\v 30 Ogoni manda bialu ai Isaraele wali agali tihondo bi la larogo lamibe. Tínaga mamalirunaga dama mitangi bialu mbirale gime wabini ngaru hangu bi pupu wule tíguabi talima pialu kamigonida. Tígua mana ko uruni talialu bialu haabo kamigo irane agibe.  
\v 31 Áyubi tígua dama mitangi bialu mbirale gime wabini urunihondo lomaru bu mialu haabo kami. Ani bialu tínaga waneiginirubi mbirale gime wabini urunihondo bo lomabu mialu irani delaga kamigoni. Tígua mana ogonibi bialu kamigome tínibi nde i̱naga deni dodohe dege kami. Anidagua bialu howa Isaraele wali agaliru tí i̱ koria i̱naga hame ngogo hale ho ibulene nawi howa tí bame dege eberemili. I̱ Anduane Homogo Bibahende Haru Haame Ho Haga kogo i̱ Ngode Datagaliwabe haluhe heneneore kogobi i̱na áyu tíhondo tigatigaore laro. I̱na tígua hale haramigo ale mbira ladai nabulebero.  
\v 32 Tíore hameigini tara dindi tara taraha bu karu ale dege hoa howa ira karuhondo bi pupu wia ege to̱le̱ ngaruhondo bi pupu wia bigi bialu holene hamelo kamigoni. Anigo i̱na tí urunidagua kamigo bialu halimulo yupe naholebero.   
\s1 Isaraele wali agalime mana ko bialu hayarunaga pani mulene winidagua nami wahenego ogo  
\p
\v 33 I̱ Anduane Homogo Bibahende Haru Haame Ho Haga kogo i̱ Ngode Datagaliwabe haluhe heneneore kogobi i̱na tíhondo bi heneneore hongohe mbira ogodagua laro. I̱na tíhondo keba howa i̱naga hongo timbuni kogome tí minu balu tandaga mo ngulebero.  
\v 34 Áyu tí dindi tara tara bu ngaruha garabaya pu haga haga bu kamigo i̱na haru dai bialu dindi mbiraoreni mo mogobu helolebero. Ani heledogola tígua i̱naga hongobi bu miniha keba howa tandaga holenebi panigi handa walia holeberemi.  
\v 35 I̱na dindi mo mogobu heloleberodago ko yobi iba dalu naibaga ngago ogoni mini Hameigini Tara Taranaga Dindi Yobi laga nga. Dindi ogoriani kamiria i̱na tí dengui handade halu tígua mana ko bialu harimigonaga manani helalu pani ngulebero.  
\v 36 Bamba tínaga mamaliru Sainai dindi ko iba dalu naibaga wiagoria howa i̱na ti manani helowa pani mirudagua ngulebero. I̱ Anduane Homogo Bibahende Haru Haame Ho Haga kogome i̱na bi ani laro.   
\p
\v 37 Dindi ogoniha íbu kamigola i̱na tí haru howa habo nalolene bi lo wirugo tígua talialu bialu halimulo mo bia holebero. Ani bialu mana tí hangu hangume bialu harimidadagua mo dabaki bulebero.  
\v 38 I̱na maru mana ko biaga karubi doga haga karubi bibahende tí kamiru baba mandagi nahelo ti dindi áyu kagoria i̱na bo taliatagi hai holebero. Doga halu mana ko biaga bu karu ti Isaraele wali agalinaga dindi dai naibilolebero. I̱na anidagua berogo hondowa tígua i̱ Anduane Homogoore henedane hondoleberemi.   
\p
\v 39 Anduane Homogo Bibahende Haru Haame Ho Haga kogome Isaraele wali agali tíhondo i̱na bi ogoni laro. Tíni hame ledamidagua bidaba. Tígua dama mitangi bialu mbirale gime wabini ngaruhondo bi pupu wule talima polene mitangi bu kamiyagua nde ogoni talima pilimu. Anigo tígua ogoni talima pirimiyagua nde i̱naga wali agali bu karu baba mandagi naholeberemi. Tínaga dama mitangi bialu mbirale gime wabini ngaruhondo bi pupu wialu mbira lomabu mialu hemiyagua nde mana ogoni beremigome i̱naga mini tigabi ngogo yo handaganego ani bulene nawiore.  
\v 40 I̱naga wali agali tí bibahende tíninaga dindi ngagoria dai biai howa tígua i̱naga hari timbuni loma biahene Isaraele dindini wedagoria pialu i̱ mitangi bialu lotu lalu holeberemi. Ani kamigola i̱na tíhondo turu timbuni holebero. Ani howa tígua i̱nihondo tínaga loma bayaleru bu yu ibalu i̱hondo mbirale bayaleru i̱ mo turu halu yu ibugu buleberemi.  
\v 41 Ainde tí dindi tara tarani purogolo kamiria howa bibahende i̱na mo mogo bialu i̱ninaga hari kagoria haru dai buwa i̱hondo loma bayale ngabiore bu yu ibuwa delaramigola turu harulidagua tíhondo turu howa i̱naga bu miniha dungulo holebero. Anidagua berogola hameigini tara dindi tara taraha bu karume ti de hondowa i̱ mini baya burugule tigabioredalo manda biai holebira.  
\v 42 I̱na tí bamba tínaga mamaliruhondo dindi ngulebero lalu bi lo wirugoria daibu kamingi tígua i̱ Anduane Homogo henene henedane hondoleberemi.  
\v 43 Ani hondowa tígua mana ko ngubiore wiaru bialu harimigome tíni mo ko henedane mitangi bu dai buleberemi. Ani buwa mana koorene ko uruni bialu harimigonaga taga timbuni ho holeberemi.  
\v 44 I̱ninaga mini bayale mini leneore kogo mitangi bialu tí mana koorene ko bialu harimigonaga i̱na pani ngulene winidagua nangi tí dara howa waharudane hondoleberemi. Ani hondowa tígua i̱ni Anduane Homogo heneneore henedane hondoleberemi. I̱ Anduane Homogo Bibahende Haru Haame Ho haga kogo i̱na bi o ledogoniore, laya lene.   
\s1 Dindi abene unurahayagi ira datagi holebira lenego ogo  
\p
\v 45 Anduane Homogohanda i̱hondo langialu lalu,  
\v 46 Dindiali-o í̠na dindi abene unurahayagi handa daliho howa ibuhondobi ibunaga irabu karuhondobi lai lalu habe.  
\v 47 Irabu ngaruhondo lalu, Anduane Homogo Bibahende Haru Haame Ho Haga kago ibugua bi o larago hale ha, labe. I̱na ira mbira delarogome í̠naga irabu ngeruha ira gahengeyaguabi gabuniyaguabi bibahende dai holebira. Ani dalu kagola mbirame ba hundia habe nahe holebira. Ira ogoni dama pialu dindi abene uyurahayagibi dama polebira. Ani daragome wali agali bibahendenaga tingini poboyogo holebira.  
\v 48 Ani darago hondowa wali agali mbirame iba odo hundia habe nahedagola tigua ira ogoni Anduane Homogo ibunime hedope heneda lowa wali agali bibahendeme manda biai holebira, laya lene.   
\p
\v 49 Anduane Homogohanda bi ogoni lai hayagola i̱na ibuhondo ladai bialu lalu, Anduane Homogo Bibahende Haru Haame Ho Haga-o ainde i̱na bi ogoni latagi ha nalabe. Wali agali bu karume i̱ mini lalu i̱na bi yobage ogoni ale dege laabo haruligonaga ti hale habe manga haga ka, lalu ladai biru.   
\c 21  
\s1 Anduane Homogohanda ayu tibume Yarusaleme wali agali dibai holebero lenego ogo  
\p
\v 1-2 Anduane Homogohanda i̱hondo langialu lalu, Dindiali-o í̠na Yarusalemeha de handa dai bu howa tigua ko biyagonaga godini dabaki halu tihondo, Tí mana ko biagaore kami, lalu lamibe. Tigua dama mitangi bialu mbirale gime wabini ngaruhondo bi pupu wule íbu ngoai haga dindi ngaru hondowa i̱na turu naharuligo í̠na tihondo, Mana koorene ko ogoni, lalu lamibe.  
\v 3 Í̠na Isaraelealihondo bi hongo howa lalu Anduane Homogo i̱na bi o larogo lamibe. I̱ Isaraele wali agali tí baba waitigi howa tí wali agali bayale biaga hemiyaguabi ko biaga hemiyaguabi tanabi i̱na i̱naga wai biaga ayu tibu ngagome tí bo wahai holebero.  
\v 4 I̱na ayu tibume tí dindi abene unurahayagi howa bo wahama pialu uyurahayagi tagira polebero.  
\v 5 Anidagua berogola wali agali bibahendeme i̱ Anduane Homogo i̱naga wai biaga ayu tibu yupe nahe yaragaho haabo koria hondolebira. I̱na tí pani ngialu bo wahai holebero, laya.   
\p
\v 6 Ani lowa Anduane Homogo ibugua laabo halu lalu, Dindiali-o wali agali bibahendenaga deni howa í̠naga gubalinini tandaga timbuni howa dugu biradagua bibe.  
\v 7 Wali agali tigua í̠hondo irane aginaga dugu bialu kebe layagua nde í̠na tihondo ogodagua lamibe. Genda timbuniore ibulubadagonaga dugu bialu ko. Genda ogoni tagira ibirangi tínaga bu miniha gi timbuni halu tínaga gi hongo nahe halu tí mini burugu lalu gebi duru lalu holeberemi. Ogonidagua bulene horodagoni abale tagira ibiragoni ndobe. Bi ogoni Anduane Homogo Bibahende Haru Haame Ho Haga kago ibugua bi o ledagoni laro, lene.   
\p
\v 8 Ani lowa Anduane Homogohanda i̱hondo laabo halu lalu,  
\v 9 Dindiali-o bi manane mbira áyu langerogo ti hale helo latagi habe. I̱ Anduane Homogo i̱na bi larogo tihondo lamibe. Ayu tibu mbira wiago ne gadelelo tigua nage wuwa mbiraleme baya hangu ha̱i̱ heneya.  
\v 10 Ayu tibu ogonime bo wahelonaga baya hangu nage wiagola ne gadeleore wialu ngiringarale hari daba ale helo tigua ha̱i̱ heneya. I̱naga wali agali ti turu haga bialu bayale holeberemabe toba ho kabe. Ani ndoyago. I̱na tihondo bi hongohe lamialu gewa tibume barugoyu tigua doga halu haabo kagoni.   
\p
\v 11 Wai biagane ayu tibu ne gadele ogoni mbiraleme ha̱i̱ howa agali dibule manda manda bu nga. Tigua ayu tibu nage wialu ha̱i̱ ho ngelowa bo wahaga kagonaga giha mo ya holebira.  
\v 12 Dindiali-o ayu tibu ne gadele ogonime Isaraeleali haguane bu karubi i̱naga wali agali bu karu bibahendebi bo wahai holebirago í̠na dara halu dugu daraore bibe. Wali agalime dara ho hagadagua howa dugu bialu habe.   
\p
\v 13 I̱na i̱naga wali agaliru ba handalu kogola ai tigua mana ko bialu kago wahalu mini beregeda nabiyagua nde mbirale o larogoni bibahende tiha tagira ibulebira, laya lene.   
\p
\v 14 Dindiali-o i̱naga bi ogo tihondo latagi halu í̠na gi habe babe. Ani baregola ayu tibu ogonime wali agali mo gi halu tini bagabaga bialu dewaore bo wahai holebira.  
\v 15 Ayu tibu ogonime wali agali mo gi hagabi dewa bo wahagabi nga. Anigo i̱na tanonaga pabe panga haraba ngaru bibahende ngagoria ayu tibu ogoni hari daba ale ngiringaralegome wali agali bo wahai hole manda manda bu ngo.  
\v 16 Ayu tibu ne gadele ngego í̠na dindi bibahendeha pialu gi tigahayagibi gi lehayagibi bama pialu wali agali bo wahai habe.  
\v 17 Anidagua beregola i̱na gi habe balu i̱naga miniha keba harugo biba holebero. I̱ Anduane Homogo i̱na bi o ledogoniore, laya lene.   
\s1 Babilono kinime Yarusalemela wai bule ibulebira lenego ogo  
\p
\v 18 Anduane Homogohanda i̱hondo laabo halu lalu,  
\v 19-20 Dindiali-o í̠ hariga dindi mbirahayagi howa ibalu hariga pu gebage bidago manda bibe. Hariga gebagane mbirago ibu Amono dindiha tano timbuni Laba ngagoha polene nga. Hariga mendego Yuda dindiha tano timbuni wai pabe hongohe bu mabubi tano hongohe biagoha polene nga. Ani purogo lolene ha gebage ngagoria mo walia hagane manane kira helabe. Mo walia hagane manane mbirago Laba polene hariga pedagohayagi mo walia howa helalu mende Yarusaleme polene hariga pedagohayagi mo walia ho helabe. Ai Babilono kini kago ibugua ibunaga ami agaliru heba ayu tiburu yalu hariga ibidadagua ibalu ha gebage ngagoria tagira ibulebira.  
\v 21 Ani ibalu ogoriani howa kini ibu hariga agoha poledabe manda nabi howa halaga bulebira. Pigane ibunaga timu yidaru mo gigia lolebira. Ibugua halaga uruni bialu howa ibunaga dama mitangi bialu mbirale gime wabini ngaru bi pupu wialu hale halubi nogo lomabu mule bo ngagonaga buni ngago begelo hondolebira.  
\v 22 Ani bialu howa timu gi tigame yamiyagome Yarusalemehayagi polene walia holebira. Ani manda bialu tigua Yarusaleme puwa wai pabe panga kago bo gialalu tanoha anda puwa wali agali tanoha karu bo wahai holenaga mbirale mbira guruyagu̱ ale wabulebira. Wabiai howa ami agali bu karume hongo howaore hoaro lalu mbirale mbira guruyagu̱ ale biagome wai pabenaga panga kago bo gialole hongo howa yupe haragola panga biago bo haealabaga bulebira. Ani bialu tigua Yarusaleme tano bo gialopaya bule gana walu tini heyu howa wai bulenaga dindi dugu wima irigi holebira.  
\v 23 Í̠na Isaraele wali agaliruhondo bi ogoni latagi haregola tigua bi ogoni hale nahe bame degeda lo manda bialu, Babilono kini kago andaneha hole lalu habo nalolene bi lo wirimago ai ibugua ina baba wai nabulubadalo, manda bulebira. Anigo tigua mana ko dewaore bialu hayagonaga Babilono kini kagome ti garabaya bilo ibilolebero. Ani ibirago de hondowa tigua mitangi bu handalu karia tinime mana ko bialu harimagonaga mbirale uruni anda ibiyadalo manda bulebira.  
\v 24 Ai Isaraele wali agaliru-o Anduane Homogo Bibahende Haru Haame Ho Haga kogo i̱na tíhondo bi mbira ogodagua laro. Tígua mana ko dewa biaabo halu kamigo i̱na embeda naholebero. Tígua mana ko panigi bibahende handai hene bialu kamigome tíha ko ngelo kamigo wali agali bibahendeme manda biaiho ka. Tígua ko birimirunaga pani nolene ngelo kamigo i̱na tí waitigi bu karunaga giha ya holebero.   
\p
\v 25 Isaraelealinaga kini kego í̠na i̱naga mana pugualu mana ko ngaru bialu haga kegoni. Í̠ mana ko bialu harigonaga pani nabelo ngulene horo biago kaware íbu ngagoni ndobe.  
\v 26 I̱ Anduane Homogo Bibahende Haru Haame Ho Haga kogo i̱na bi o ledogoniore. Ai í̠na kininaga manda karulo kegoni golo wahalu labolabo í̠naga emboneni bo bidegonibi golo ngelalu bibe. Ala wiyadagua mani nawulebira. Áyu ina bibahende mo iriari bialu agali haguane bu karu mo dindiha halu agali mini nalene bu karume agali haguane ha aribia halu mo yaraga helolebira.  
\v 27 Mbirale tara bamba nahendeneru ale bialu i̱na Yarusaleme bo gialo wahai halu mo ko hole manda bu ko. Ani bialu dindi mo ko hene wiaabo kane dege agali mbira ibilolebero. I̱na agali ogoni dabenego ibugua Yarusaleme tano handayaho howa haru helo ibuhondo mulebero, laya lene.   
\s1 Ayu tibu ne gadeleme Amono wali agali dibu waholebira lenego ogo  
\p
\v 28 Anduane Homogohanda i̱hondo laabo halu lalu, Dindiali-o Amono wali agali karume Isaraele wali agalihondo bi ko laragonaga í̠na mbiwia halu tihondo bi ogo latagi habe. I̱ Anduane Homogo Bibahende Haru Haame Ho Haga kogome tihondo bi ogodagua laro.\x + \xo 21.28 \xt Yar 49.1-6, Ese 25.1-7, Amo 1.3-15, Seb 2.8-11\x*  
\p Wai biagane ayu tibu ne gadele ngagome mbirali bo waholenaga nga. Ayu tibu ogoni baya hangu nage wialu mbiraleme ha̱i̱ hayago ngiringaralalu hari daba ale migimege laradaguabi ngagome agali dibule manda manda bu nga.   
\p
\v 29 Amonoali tígua mbirale de gandebaha hondo bolangua howa lalu, Ayu tibu ogoni iname yuwa wali agali i̱naga bi mo wahalu mana ko biaga karu homelo bo wahai holeberema, lalu kami. Anigo tígua de gandeba handarimigobi mbiwia halu kamigobi bibahende ke̱ dege halu kami. Heneneore wali agali uruni pani nelo mulene kaware íbu ngagonigoyu pani nelo bo waholenedagoni tígua naboleberemi.   
\p
\v 30 Ayu tibu ibuni andaneha yadai bidaba. Tíni dindiniore kamigola i̱na tígua bialu harimidadagua tí manani helolebero.  
\v 31 Irame dangi bo daralidagua i̱na tí baba keba halu miniha tandaga ho kogome tí dolebira. Agali ko mendeali kago mo ko dege haga karume tí mo ko helo ibilolebero.  
\v 32 Ira dedagoria ira gabuni karu balu delaragola irame dalu do mundu lagadagua bialu tí bo wahai helolebero. Tínaga darama tíni dalu ngamigoria polebira. Ani homaramigola wali agali mani holobadarume tínaga mini abogo dindi ogoria hene lalu mbira nalolebira. I̱ Anduane Homogo i̱na bi o ledogoniore, laya lene.   
\c 22  
\s1 Yarusaleme wali agalime mana ko dewa bialu henego ogo  
\p
\v 1 Anduane Homogohanda i̱hondo langialu lalu,  
\v 2 Dindiali-o í̠na Yarusaleme wali agali bu karume wali agali dewaore bo wahai hayarunaga manani dabaki habe. Tigua mana ko ngubiore biaabo hayarunaga manani helalu bi hongo howa lamibe.  
\v 3 I̱ Anduane Homogo Bibahende Haru Haame Ho Haga kogo i̱na bi o larogo lamibe. Yarusaleme wali agali tígua wali agali tíni aria bu hearu dewaore homelo bo wahai harimigobi dama mitangi bialu mbirale gime wabini wiaruhondo bi pupu wialu harimigobi i̱naga deni tí dodoheore kamigoni. Ani bialu harimigonaga pani ngialu tíni mo ko holene horo biago kaware hapara haragoni ndobe.  
\v 4 Tígua mana ko uruni bialu harimigonaga tíni pani nolene nga. Tígua dama mitangi bialu mbirale gime wabu wirimigome tíni mo ko halu i̱naga deni dodohe kamigoni. Anigo ai tigimandi dege howa tíha mo ko holene ibulebirago nde kaware ibiragoni ndobe. Irane ogoninaga i̱na hameigini tara tara dindi taraha bu karume tíore hondo oba halu mege bialu helo heledo.  
\v 5 Wali agali kaundiaha karumebi kawareni bu karumebi tigua tí hondowa manda bialu tíore wali agali mana ko tara tara ngaru bialu haga kamigo lalu mege gibi bulebira.   
\p
\v 6 Isaraele wali agali tínaga agali haguane bu karu tigua mitangi bialu mbirale tinime hameledago ale damene bibahende biai habehe kama lo manda biaga ka. Ani manda buwa tigua wali agali homelo bame bo wahaga bialu kagoni ndobe.  
\v 7 Wali agali Yarusalemeha bu kamiru aria mbiraoreli hangumebi aba ai̱yalanaga bi hale haga naheore. Tígua wali agali dindi taraha howa tí baba íbu hene karu mo hondo haga kami. Tígua wali agalini homene dalo bedarubi waneigini aba ai̱yala homene karubi mo ko halu biaga kami.\x + \xo 22.7 \xt Har 20.12, 22.21-22, Man 5.16, 24.17\x*  
\v 8 Tígua i̱ mitangi bialu lotu lole loma bini ngagoha bame nagalone lalu mo yo handaga kami. Ani bialu tígua \w Sabada\w* horonaga mana ngago puguaiore harimi.\x + \xo 22.8 \xt LBM 19.30, 26.2\x*  
\v 9 Agali tí kamiru aria marume wali agali bame karu godime ibu homelo bo waholene nga lelo ke̱ halu ibugua mana ko biya laga kami. Ani bialu ti marume dama mitangi bialu mbirale gime wabini wiaruhondo bi pupu wialu nogo loma bialu bo mini ngarunaga mbiriniru nagane kami. Maru tí wali agali kayu yama ibaga biaga kami.  
\v 10 Maru tígua tí aba one kayu yaga kami. Maru tígua wali egengi bedago haru palue hongo timbuni haga kami.\x + \xo 22.10 \xt LBM 18.7-20\x*  
\v 11 Marume agali mende one baba ko biaga ka. Marume tí igini one bedaru bababi tí aba one mende wane bedarubi haru paliaga kami.  
\v 12 Marume tí damene bu karu bo wahelonaga ndelalu muni mo yaga kami. Marume dano ho henego dano hangalu maru bolangua howa ngi lalu mo yaga kami. Ani bialu marume tí damene karu mo gi howa muni gingila miaga ka. Ani bialu harimigome tígua i̱ embedaho waharimi, lalu Anduane Homogo Bibahende Haru Haame Ho Haga kagome bi ogoni layagoni.\x + \xo 22.12 \xt Har 22.25, 23.8, LBM 25.36-37, Man 16.19, 23.19\x*   
\p
\v 13 Ibugua laabo halu lalu, Agali mbirale page biaga kamirubi wali agali bame homelo bo wahaga bu kamirubi tí baba i̱na keba timbuni ho kogoni. Ani howa i̱na gi habeme hongo howa tola balu tí pani ngulebero.  
\v 14 Anidagua berongi tígua gi timbuniore halu hongo ereba haragola heyabe nahe holeberemi. I̱ Anduane Homogo kogo i̱na bi o ledogonidagua buleore bero.  
\v 15 I̱na tí dindi tara tara ngaruha pilimulo taliatogo lolebero. Ani bialu tínaga mana ko biaga ngamiru bibahende mo wahai helolebero.  
\v 16 Hameigini tara tara dindi taraha karunaga deni tí koorene ko howa tíninaga mini mo dindiha haragola tígua i̱ni Anduane Homogo henedaneore manda biai holeberemi, laya lene.   
\s1 Anduane Homogonaga keba holene ira hungu ale bialu ka lenego ogo  
\p
\v 17 Anduane Homogohanda i̱hondo laabo halu lalu,  
\v 18 Dindiali-o Isaraele wali agalime mana ko bialu kago i̱ manga ho kogoni. Tiore agalime ira timbuniore bo delowa ege to̱le̱ irani delalu do gede halu iba harago siliba yamialu ko ale ngaru wahaga ngaligobi ka.  
\v 19 Ainde i̱ Anduane Homogo Bibahende Haru Haame Ho Haga kogo i̱na Isaraele wali agalihondo bi o larogo hale hadaba. Wali agali bu kamiruni tí siliba bayale yamulenaga irani delowa maru ko ale ngaru habane nabulenego wahagagobi tí kami. Ani kamigonaga i̱na tí bibahende Yarusaleme haru piai halu mo mogo bu helolebero.  
\v 20 I̱naga bu miniha lembo timbuni ira hungu ale bialu kagoni ndobe. Ani buwa i̱na tí irani agali ege to̱le̱ siliba yamulenaga ege to̱le̱ tara tara maru irame do taulope helo ira timbuniore dedagoha delagadagua delolebero. Agalime ira dene dedagome ege to̱le̱ elaragola ira hungu hongohe daragome siliba ibu do iba halu piagadagua i̱naga lembo holene ogonime tí dolebira.  
\v 21 Anigo i̱na tí Yarusalemeni mo ngoai ho helowa irani delolebero. I̱naga bu miniha keba holene ira hungu ale bialu kagome tí bibahende daiore holebira.  
\v 22 Tí Yarusalemeni howa siliba irani delaragola elagadagua tíbi i̱naga keba holeneme elaragola tígua Anduane Homogo kagonaga keba holene ogobiore winidalo manda biai holeberemi, laya lene.   
\s1 Isaraele agali haguane hearume mana ko bialu henego ogo  
\p
\v 23 Anduane Homogohanda laabo halu lalu,  
\v 24 Dindiali-o Isaraele wali agali tigua mana ko hangu bialu haabo kagome tinaga dindi i̱naga deni ko dodohe ngagonigo lamibe. Ani bialu kagonaga i̱na keba timbuniore howa ti pani nelo mialu ti dindiha iba dalu naibaga dindi ko wilolebero.  
\v 25 Laionome nogo gabua mbira bowa minu budu migimigi bialu bi hongo howa ngororo lalu hagadagua tinaga agali haguane karume ani bialu ka. Agali uruni tigua tinaga damene bu karu bo wahowa dindi anda ngaru ti ho aribia halu muni ngarubi ti aribia haga ka. Anidagua biragola agali dewa bo wahayarunaga one dalo bedaru mbiralime handayaho holene nahe tini hangu birulebira.  
\v 26 \w Loma\w* binigo mo miaga karume mana tigabi bulene ngago pugualu i̱ mitangi bialu lotu lalu howa biagane ngago bame nagalone degeda lo manda bialu yo handaga ka. Mbirale i̱ninaga wubagi helene ngarubi bame wini ngarubi ta nabi nagalone degeda lo manda biaga ka. Ani bialu howa tigua wali agalihondo i̱naga deni mbirale ogo dodohe ogo dodo nahe nga lalu lawai nahaga ka. Ani bialu tigua \w Sabada\w* horo mana ngago nagalonedago lalu yo handaga ka. Tigua mana urunidagua bialu haga kagome Isaraele wali agali bibahendeme i̱naga mini mo dindiha helaga ka.\x + \xo 22.26 \xt LBM 10.10\x*  
\v 27 Gabumane agali haguane bu karuni ti biango dudume nogo balu budu migimigi bialu nalu hagagobi ka. Agali haguane urunime muni dabudaburu dewaore wulene hamelo howa ti damene bu karu bame homelo bo wahalu uruninaga dabudabu wiaru ti aribia halu karulo haga ka.  
\v 28 Ani bialu kagola bi mana \w latagi\w* haga agali bu karu tigua wali agalime mana ko bialu karu hondowa donge halu dago nabiaga ka. Pabe hongo nahe gedaore kago wali agalime pabe bayale hongohe kabe toba helo beni peleme hiragadagua tigua wali agalime ko biraru mo yihaga ka. Tigua ke̱ howa de gandeba handarima laragobi ke̱ howa mbiwia halu mbirale bulebira laragobi tagira naibaga. Agali uruni tigua bi lalu, Anduane Homogo Bibahende Haru Haame Ho Haga kagonaga bi latagi harama, lagago ai i̱ Anduane Homogo kogo i̱na tihondo bi ogo latagi halimu lalu mbira nalami ko.   
\p
\v 29 Agali mbirale dewawi karume tini damene bu karu mo hondo howa muni mbirale emene yu karuni mo page biaga ka. Ani bialu howa tigua yagibano karubi wali agali dindi taraha howa Isaraele dindiha íbu hene karubi tihondo ko biaga ka.  
\v 30 Wai pabe bo gialo wahenego lone hongohe biadai bilo i̱na agali mbira taya bialu haru. Agali ogonime ibu waitigi anda ibulilono wai pabe gialo ngagoria howa wai hongo howa bialu helo taya biruria mbira naheya. I̱nioreme Isaraele wali agali ti baba waitigi halu i̱na tinaga Isaraele dindi bibahende bo haealabaga bule ngogo ai agali ogonibi mbira heagua nde anidagua nabulebero. Anigo agali ogonibi bulene mbira naheya.\x + \xo 22.30 \xt Iba 106.23, Yar 5.1, Ese 13.1-7\x*  
\v 31 Anidagua biyagonaga i̱na ti baba keba timbuni ho kogo howa ti pani nelo mialu irame dangi bo daraligobi delo pani mulebero. Mana ko tinime biyagonaga pani nelo mulebero. I̱ Anduane Homogo Bibahende Haru Haame Ho Haga kogo i̱na bi o ledogoniore, lalu Anduane Homogohanda laya lene.   
\c 23  
\s1 Wali hagibuni kirame agali yama ibaga biya lalu bi yobage lenego ogo  
\p
\v 1 Anduane Homogohanda i̱hondo lalu,  
\v 2 Dindiali-o bamba wali kira berenego libu hagibunila bereneya.  
\v 3 Libu wandari mabuage bereangi Iyibi dindiha bereneya. Ani biruwa igiri agali bu hearu baba mandagi ibagabu biruwa libu agali kayu biaga bayanda wali bereneya.  
\v 4 Wandari wahenedago ibu mini Ohola bereneyago ogoni ibu Isaraele dindiha tano timbuni Samaria ngago manda bialu leda. Ibu hagibunigo mini Oholiba berenego ogoni ibu Yuda dindiha tano dunini Yarusaleme ngago manda bialu leda. Ani bereagola kirabali i̱na dabu binigo ai libugua i̱naga waneigini hono wiya.   
\p
\v 5 Ohola ibu i̱ one biruwa ibugua agali kayu yama ibaga bialu ibu lawini Asiriala dimagoli hama ibaga bu biragaya.  
\v 6 Ibu lawini uruni ti agali haguanebi ami agali haru haga haguanebi howa tigua aga tagalitayabi handalehe bayale wiaru karulo haga hene. Ami agali uruni tigua nogo hosini biruwa wai biagaya. Ohola ibugua ti igiri daliahe bayale biaru de hondowa ibunaga miniha dimagoli timbuni ho bereneya.  
\v 7 Ani biruwa ibu Asiria ami agali uruninaga bayanda wali biruwa ibugua Asirianaga dama mitangi bialu mbirale gime wabini wiaruhondo bi pupu wialu berearia ibuni i̱naga deni dodoheore bereneya.   
\p
\v 8 Ibugua bayanda wali Iyibi dindini wandari mabuage bereangi agali yama ibaga biaga winidagua bialu biraabo heneya. Ogoningi agali bu hearu ti hameleadagua bima haru ibagabu haga heneya.  
\v 9 Ani biaabo halu berearia i̱na nde Asirialiru ibuni dimagoli ho berene biaru tigua ibu mo ko helonaga tiha ibilarugoni.  
\v 10 Ani ibilarugola tigua ibalu ibunaga labolabo minu golo wahai howa tibabe bereleneya. Ani bereagola tigua ibunaga waneigini bu hearu haru piai halu Ohola ibuni ayu tibu ne gadele wiagome homelo dibu waheneya. Ani biyagola wali maru biru wiarume Oholanaga te hale howa lalu, Ibunime mana ko biyagonaga pani nedagoni ndobe, laga biya.   
\p
\v 11 Ainde ibu hagibuni Oholiba ibugua Oholaha genda tagira piyaru de hondowa ibu mogo nale bereneya. Ibugua agali baba kayu gibi yama ibaga bialu ibu hagibuni Oholahanda biyagobi ndo bu bolangua haga bereneya.  
\v 12 Oholiba ibuguabi nde agali haguanebi ami haru haga agali haguane bu hearubi bibahende hondo dimagoli timbuni haya. Agali uruni ti bibahende igiri daliahe dege howa aga baya ogobi dege dege karulowa tigua nogo hosini biruwa wai biagaya. Ainde Oholiba ibunaga bu miniha birabe nahayagola abale heyalu puwa igiri biaru baba mandagi paliyiya.  
\v 13 Ai i̱na deme hondo hewagola ibu hagibunime ko biyago ale dege bialu berearia handaru. Mana libugua bialu biraga wiago ko dodoheore biaga winiya.   
\p
\v 14 Anigo Oholiba ibugua mana ko timbuniore bu bolangua ho berene. Ibugua Babilonoali agali haguane timbuni bu hearunaga bigiya gilibu wiago hendeneya. Agalime tanonaga ege to̱le̱ pabe heagoria bage tara tara podalu bigiya wabu helowa beni daramabime hiriniya.  
\v 15 Agali haguane uruni tigua mandibu wialu aga bayale mo yári biahene mbirame tinaga emboneni bo biniya.  
\v 16 Ainde Oholiba ibugua Babilono agali haguane de hondowa agali bayaleoreyagola ibu dimagoli timbuni ho berene. Ani biruwa ibugua agali hearia Babilono bi lo pelalu ibu baba palimi̱ya ibalimu lalu lowia hene.  
\v 17 Ani layiya handala agali biaru tigua ibu bereria ibuwa tinaga hame wiago Oholibaha biba howa Oholiba mo koore hayagola ibuni i̱naga deni ko dodoheore berene. Tigua ibu yagayaga bialu heagola mani nde Oholiba ibugua ti handabe manga hene.  
\v 18 Oholiba ibu wali koorene ko berene. Ibugua mana ko biyago ha do howa ndo tanabi bialu wali agali bibahendenaga deni ko biyago hondowa tigua ibu bayanda walida lo manda biai hene. Ani biya handala i̱na ibu hagibuni biago handabe manga harudagua ibuhondobi handabe manga timbuni harugoni.  
\v 19 Ani mangaho hewago helowa ibugua agali kayu yaabo haga berene. Bamba ibu Iyibi dindiha bereangi bayanda wali biruwa agali kayu yama ibaga bialu biraga wiyago manda bu bereneya.  
\v 20 Ani biruwa ibu miniha ibunaga agali Iyibi dindini hayaru mitangi bu biraabo heneya. Agali uruni ti dimagoli gibi howa tinaga tingini nogo donginaga ale halu ibane timbuni nogo hosinaga ale ibagaya.  
\v 21 Oholiba í̠ wandari mabuage bereangi Iyibi dindini biruwa bialu biraga wirigo dege biaabo holene hame lo bedegonida. Ani beregola agalime í̠ mo gini bia haga haga bialu mandagi haru palirigoni, laya lene.   
\s1 Anduane Homogohanda wali mini Oholibahondo pani minigo ogo  
\p
\v 22 Anduane Homogohanda laabo halu lalu, I̱ Anduane Homogo Bibahende Haru Haame Ho Haga kogo i̱na Oholiba í̠hondo bi ogo laro. Í̠ nenege agali uruni manga ho bedegoni i̱ manda bidogo ainde harugo i̱na ti í̠ baba mo keba halu í̠hondo koore bilo ibilolebero.  
\v 23 I̱na agali haguanebi ami agali haru haga timbunirubi igiri daliaherubi minalu ibiloleberogo Babilono howabi Kaladia howabi Pegodo hameigini karubi Soa howabi Koa howabi Asiria howabi dindi uruni bibahendeha howa tinaga nogo hosini biralu i̱na ti haru halu ibulebero. Bamba í̠na agali uruni baya taraore heago de hondowa dimagoli ho biraga birarigoni.  
\v 24 Ainde áyu tigua dindi abene uyurayagi yu wahalu í̠ni baba wai bilo ibilolebero. Tigua ami agali heba ibalu wai biagane garo ale nogo hosime gili laga mini karisibi tinaga tomobi wai biagane ale yaga garo ale karisi heba dewaore ibulebira. Tigua wai biagane dabudabu marubi yalu wai pole mo karulagane gaba manda karulalu wai humbibi mo yalu ibuwa tigua í̠ ho hagira bu holebira. Ani bidagola i̱na tinaga giha minu ya harogola tigua í̠ bope halu tinaga mana ngagoria howa í̠ godini dabalu minu bolebira.  
\v 25 Í̠ i̱ erembira ngirigonaga i̱na í̠hondo keba timbuni ho kogoni. Ani birigonaga i̱na agali ibilaroru tigua í̠ minu belolebero. Tigua í̠naga nguibi halebi minu podalu í̠ waneiginiru minu yu piai holebira. Wali agali maru í̠naga dindiha yu wahene karu nde agali urunime ayu tibu ne gadele yidagome dibalu maru irani bo delolebira.  
\v 26 Ani buwa í̠naga aga karulo keru golo wahai halu ma gagua alemebi í̠naga gi pagidabi bibahende golo yai holebira.  
\v 27 I̱na mbirale urunidagua berogola í̠na bamba Iyibi dindiha biruwa koorene ko bialu agali kayu bima ibaga bialu biraga wirigo áyu bialu biraabo kego nabibelonaga i̱na mbirale uruni biaiore holebero. Ani berogola í̠na dama mitangi bialu mbirale gime wabini ngaruhondo bi pupu wulenaga hame nale Iyibi dindibi lone mitangi nabi holebere.   
\p
\v 28 I̱ Anduane Homogo Bibahende Haru Haame Ho Haga kogome bi ogodagua laro. Agali í̠na handabe manga harirubi hame nale erembira mirirubi i̱na tinaga giha í̠ minu ya holebero.  
\v 29 Agali urunime í̠ hame nale handabe manga howa tigua í̠na biabe bialu mbirale mo wini ngeru page bu yalu polebira. Ani biragola í̠ mbirale mbira nayiore bame bayanda wali aga nabi tibabe bedaria biragagobi birulebere. Í̠na mana ko dewaore bialu biraabo harigo  
\v 30 ainde í̠ha genda urunibi ibirane hondolebere. Í̠na hameigini tara tara dindi taraha karu dimagoli howa tinaga dama mitangi bialu mbirale gime wabini wiaruhondo bi pupu wialu harigome i̱naga deni í̠ni mo dodohe bayanda wali bedarume tini mo dodohe biragagobi bede.  
\v 31 Í̠ hagibuninaga mana ko bini wiago taluwa bialu birarigodago i̱na í̠ hagibuni pani nelo mirudagua í̠ nabelo ngulebero.   
\p
\v 32 I̱ Anduane Homogo Bibahende Haru Haame Ho Haga kogo i̱na bi ogodagua laro. Í̠na í̠ hagibuninaga gabo beha nenegobi nalu holebere. Gabo be ogoni uli timbuniwi ngagoni. I̱na gabo be ogoniha \w waini\w* iba hambu to̱lo ngerogola nowa í̠ luluyu ibagabu kego hondowa wali agali tara tara bu karume í̠ mege bialu hondo oba holebira.  
\v 33 Waini iba ogoni í̠ hagibuni Samaria ibu nalu no luluyu hayagobi dege nabelo ngulebero. Gabo be ogoniha bedago naregome í̠naga bu miniha genda yu howa luluyu ibagabu holebere. Gabo be ogoniha gi timbuniore holenebi mo ko holenebi nga.  
\v 34 Í̠na be ogoniha bedago no biba holebere. Nai howa í̠na gabo be bo pambu lowa gingirulo paya bini dodene ngago mo yuwa ogonime dege í̠ninaga andu podalu birulebere. I̱ Anduane Homogo Bibahende Haru Haame Ho Haga kogome bi o ledogoniore, laya lene.   
\p
\v 35 I̱ Anduane Homogo Bibahende Haru Haame Ho Haga kogome í̠hondo bi ogodagua laro. Í̠na i̱ embeda halu erembira ngialu puwa dimagoli halu bayanda walinaga biabe bialu harigonaga pani nalu genda ya tandaga na bialu birulebere, laya lene.   
\s1 Anduane Homogohanda wali ko kira ogonilabo manani howa pani minigo ogo  
\p
\v 36 Anduane Homogohanda i̱hondo langialu lalu, Dindiali-o í̠na wali kira mana ko ngubiore ngaru biaga Oholabi Oholibabi manani howa libuhondo ko biribi labe.  
\v 37 Libu wali ko bayanda wali biruwa agali kayu bu ibaga biaga wali agali homelo bame bo wahagabi beda. Libugua dama mitangi bialu mbirale gime wabini ngaru baba kayu biaga beda. Libugua i̱naga waneigini taba honowa mbirale gime wabini ngaruhondo ti bo lomabu migi biribi.  
\v 38 Libugua ogoni hangu ndo mana ko marubi bia dege biya. Libugua i̱naga anda hewagobi mo mebia haya. Ani bialu i̱ninaga \w Sabada\w* horo wiabagi henegonaga mana wiwagobi puguaya.  
\v 39 Libunaga waneiginiru dama mitangi bialu mbirale gime wabini wiaruhondo libugua bo lomabu mialu dai buwa i̱naga anda hewagoha anda ibini. Ani biyagome i̱naga anda mo dodo halu mebia ho helaya.   
\p
\v 40 Ani bialu libugua mana ko ngubi marubi bini wia dege bida. Libugua agali dindi tara kaundiaha hearuhondo bi lo pelalu ibalimu layagola hale halu agali biaru ibigi ibiniya. Wali biago labome wayawaya balu libunaga deni ambua hare bialu mani magaguaru wialu gi pagidaru wialu bini.  
\v 41 Ani bialu libugua dagia mbira mo yári biaho ngelowa libuni berene. Ani buwa libugua tomo baya dendebi maru tebolo mbira libuni dagia birayago kawareni mo wiapara ho ngelowa ogoriani tomo uruni mo wini. Libugua ira hagua ngabilo delaga \w inisenesirubi\w* olibe lini ibaneru i̱na libu mirurubi tebolo ogoriani mo ngelaribi.  
\v 42 Ani biyagola agali lulu iba naga dindi ko iba dalu naibaga wiagoha howa haru ibiniru badi balu tomoru nalu biruwa tigua turu halu bi ladadaga birimi. Agali uruni tigua wali biago labonaga gini gi pagida wia halu kuini walinaga manda muwa libunaga haguani mo karula haya.  
\v 43 I̱na deme hondowa mitangibu handalu hewaria bambaore howa wali kira ogoni labome dabu binigo pugualu puwa áyu bayanda wali berearia agali uruni ti libu andaga peneya.  
\v 44 Agali uruni tigua bayanda wali kira Ohola Oholibala baba mandagi palue puabo haga heneya.  
\v 45 Libugua dabu bini mana pugualu wali agali bame homelo bo wahalu biaga bedago ainde agali mini tigabi karu tigua libu ko bialu birayagonaga manani helowa libuni homolene karulape lolebira.   
\p
\v 46 I̱ Anduane Homogo Bibahende Haru Haame Ho Haga kogo i̱na bi ogodagua laro. Libu pani mialu minu bole agali dewaore haru ibidaba. Tigua ibuwa wali kira ogonilabo mo gi halu libunaga mbirale ngaru gingila miai helo.  
\v 47 Ani bialu agali ibirarume libu ege to̱le̱me balu wai biagane ayu tibu ne gadele ngagome dibalu homeleladaba. Tigua libu waneiginiru bo wahai halu libunaga anda bu karu bo heda hai heladaba.  
\v 48 I̱na anidagua berogola wali maru bedarume de hondowa tigua mitangi bialu wali kira ogoni labome agali kayu bialu birayadagua nabule lelo hameledo. Ani bialu dindi ogoha wali agali kayu yaga mana ngago mo wahai holebero.  
\v 49 Ogolabo hagibunila-o libugua agali kayu dewaore bialubi dama mitangi bialu mbirale gime wabini wiaruhondo bi pupu wialubi biraribigonaga pani nalibulo ngulebero. Anidagua berogola libugua i̱ni Anduane Homogo Bibahende Haru Haame Ho Haga henedalo hondoleberebi, lalu Anduane Homogohanda laya lalu Esegielehanda lene.   
\c 24  
\s1 Yarusaleme todobene be ale nga lenego ogo  
\p
\v 1 Ina garabaya hemaria dege mali dininaga ege pini hayagola ege ogoninaga horo pini dege ogoningi Anduane Homogohanda i̱hondo langialu lalu,  
\v 2 Dindiali-o horo áyu ogoni howa Babilononaga kini kagome Yarusaleme tano ho hagira bialu ka. Ani bialu ka larogoni Isaraele wali agali bu karume í̠naga bi larego henenedalo manda bilonaga horo egebi ogongiore lalu bebani gilibu wibe.\x + \xo 24.2 \xt 2 Kin 25.1, Yar 52.4\x*  
\v 3 Isaraeleali mine haga bu karunihondo bi yobage ogo Anduane Homogo Bibahendenaga Haru Haame Haga kogo i̱nime bi o larogoni lamibe. Todobene beha iba berelalu irani delabe.  
\v 4-5 Nogo sibi bayale mbira bowa payane mbirini modawane ge kuni mbirinirubi be ogoniha bayuwa dawabe. Kuni mbirinibi dende biaga alego todobene ogoniha dawa to̱lalimu. Kuniru baya hangu do golelo be tibiniha dawalu iba pobo halu kidikodo laga bilo ira timbuni delaga bibe.   
\p
\v 6 Anduane Homogo Bibahendenaga Haru Haame Haga kogome i̱na bi ogodagua larogoni. Yarusaleme wali agalime wali agali bameore homelo bo wahaga kamigonaga tíha mo ko holene timbuniore wulebira. Yarusalemeore todobene be boronosime wabini ale wuwa tibiniha ko dodohe mbiralime wayawaya bialu domabe naheore ngaligobi ngegoni. Nogo mbirini kuniru bayale damene beha dawayago mbira mbira dugu yamigi bialu mbiraore hangubi berelo wa nahabe.  
\v 7 Tígua mana ko birimada lalu gi nahe howa hariga teneni ta nabi howa bialu haga ka. Agali bo wahene ngagonaga darama dindi dugu dambi nahe bame ege to̱le̱ ngagoria odo payabu ngelo wahagadagua mana ko ta nabi bialu haga ka.  
\v 8 Anigo darama i̱na henemane ani ege to̱le̱ni odo payabu ngelo waharuli. Darama ogoni hondowa i̱na tígua mana ko birimida lowa keba halu tí mo ko holenaga ani biruli, laya.   
\p
\v 9 Anduane Homogo Bibahende Haru Haame Ho Haga kogome ogodagua laro. Yarusaleme wali agalime wali agali bameore homelo bo wahaga kamigonaga tíha mo ko holene timbuniore wulebira. Tano ogoni i̱na bo heda hole ira dewa bo alugumu bu wima irigi holebero.  
\v 10 Ira bo alugumu bu wirugo ira hedope howa todobene be daligani delolebero. Todobene ogoniha iba bedago dalu kidikodo laho ngane dege beha iba bedago do hundialu nogo mbirini kunibi beha dawedago da dege bialu do dapialu mbirale todobeneha bedaru do ereba hai helolebero.  
\v 11 Ani bialu todobene be ogoni ibuni hangu irani daho ngane dege do kundi bialu daramabiore wulebira. Ani ngagola todobene ibu ko dodohe ala wiyago ai irame dodo uruni dapialu daiore howa todobene be ogoni dodo mbira para nahe wilonaga delo hameledo.  
\v 12 Anigo irame beha dodo karu dai naholobadago i̱na biabe ogoni erekuibini bameore bialu haruda.  
\v 13 Yarusaleme wali agaliru-o be hagua binidagoni manane tínaga mana ko damene dodohe ngelo kamigoni. I̱na tínaga ko uruni domo wahole bialu hewaria tínime domo waholene manga harimi. Anigo i̱naga keba holene timbuniore ngogome tíha mo tandagaore haragola ti lone ko dodo nahe holeberami. Ani birangi i̱naga keba holene ogoni ereba holebira.  
\v 14 Anduane Homogo i̱nimeore bi ogoni larugoni. I̱na tíhondo bulene ngogo áyu berogoni. Tígua mana ko dodohe birimigoni i̱na mo embeda naholebero. Tí darabi naholebero dege. I̱na tí manani howa dabaki halu ko tínime bialu harimidagonaga pani karulape nalimulo ngulebero. I̱ Anduane Homogo Bibahende Haru Haame Ho Haga kogo i̱na bi ogoni larogoni, laya lalu Esegielehanda lene.   
\s1 Esegiele one homenego ogo  
\p
\v 15 Anduane Homogohanda i̱hondo lalu,  
\v 16 Dindiali-o í̠na í̠ one dara halu mitangiho kegoni i̱ manda bia bidogoni. Anigo ai harugo lowa í̠ni hanguore helalu i̱na í̠ one mo ereba helolebero. Ani berogola í̠na bi nale í̠ one dara howa dugu nabibe.  
\v 17 Wali agali maru bu karume í̠na dugu berego hale nahelo. Mbirali homaragola walia hole biaga mana damene wiyaruni bibahende nabi wahabe. Ani bialu í̠naga aga haguaneni karulaga wirigo wa nahe ge subi karulalu bibahende mo karulagadagua karulo habe. Denguibi bu yi nahabe. Duguanda howa tomo naga mana ngadagua nane wahabe. Mana wiyadagua í̠naga damenerume tomo yalu ibiyagua nayalu ibalimu labe, lene.   
\p
\v 18 Ani layagola howa egerebagi wali agaliru baba bi lamiai ho hewane dege horo ogoni alendo hayagola i̱ one ibu homaya. Homayagola horo mendengi ogodagua bibe lalu Anduane Homogohanda langiyadagua biru.  
\v 19 I̱na urunidagua bialu hewaria wali agali bu hearu tigua i̱hondo hale halu lalu, Í̠na dara halu duguanda howa biaga mana wiyago nabi kegoni irane agibe. Í̠na inahondo mbirale mbira mo walia holenaga bialu kebe, laya lene.   
\p
\v 20 Ani hale hayagola i̱na tihondo ladai bialu lalu, Anduane Homogo ibugua i̱hondo lalu,  
\v 21 Bi ogo Isaraele wali agali tihondo Anduane Homogo ibugua ogodagua laya labe. Tígua i̱ninaga anda kago handaya howa turu halu anda ogoni hongoheore ka laramili. Anigo i̱na anda ogoni bo gialo waholebero. Ani bialu tínaga waneigini Yarusalemeha yu wahene karu waiha bo waholebira.  
\v 22 Ani biragola manane Esegiele ibugua biyadagua buleberami. Tígua tínaga dengui bu yi nahe wahalubi duguandaha daraho biruwa tí damenerume tomo nagadaguabi nanoleberami.  
\v 23 Agame haguaneni karulalu ge subi bialu ibaga bialu poleberami. Wali agali homaragola uruninaga dara halu dugu biagadaguabi nabuleberami. Irane tínaga mana ko bialu hene ngamiru hangu mitangitangi bialu haabo howa tínaga miniha genda yu kamigome tínaga tingini biako halu obiore holeberami. Ani howa tíninagabi nde dugu bigibigi bialu holeberemi.  
\v 24 Ani beramigola Esegiele ibugua manane walia halu biyadagua tígua bialu holeberemi. Tíha mbirale uruni tagira ibirangi i̱ni Anduane Homogoore henedane hondoleberemi laya, lalu Esegielehanda lene.   
\p
\v 25 Anduane Homogohanda i̱hondo laabo halu lalu, Dindiali-o i̱naga anda ti dege dombeneha kagome tí bayale hongohe kamabe toba haga kami. Tígua anda ogoni gubalini timbuni howa turu halu ogoni hangu mitangi biaabo haga kamigoni. Anigo i̱naga anda ogoni gialo wahai halu ti waneiginirubi bo wahai holebero.  
\v 26 Ani berogola horo ogoningi agali mbira homa nabi yu wahene kagome abale gerai lalu í̠ keria mbirale uruni biyagonaga te langule ibulebira.  
\v 27 Ai horo ogoningi dege í̠naga ne hariga ndibulo haabo harigo i̱na mo karulape helarogola bi lone lolebere. Ani berogola í̠na agali bi yalu ibiragohondo bi latagi halu lamulebere. Í̠na bi lalu kego hondowa Isaraele wali agali tigua i̱ni Anduane Homogoore henemane henedane hondolebira, laya lalu i̱hondo lene.   
\c 25  
\s1 Amono dindi mo ko holebira lenego ogo  
\p
\v 1 Anduane Homogohanda i̱hondo lalu,\x + \xo 25.1 \xt Yar 49.1-6, Ese 21.28-32, Amo 1.13-15, Seb 2.8-11\x*  
\v 2 Dindiali-o í̠na Amono dindiha handa amu howa mbiwia halu, Tí mo ko holebira, labe.  
\v 3 Amono wali agali tihondo í̠na bi ogodagua lamibe. Anduane Homogo Bibahende Haru Haame Ho Haga kago ibugua bi larago hale halimu, labe. I̱naga anda hewago mebia hayagobi Isaraele dindi bo haealabaga biyagobi Yuda wali agali bu hearu dindi kaundiaha garabaya bu yalu piai hayagobi hondowa tígua turu timbuni ho harimi.  
\v 4 Ani bialu harimigonaga i̱na agali maru ni tagira ibiragohayagi howa ibilalu tí baba wai bialu tínaga dindi ngamigo karulo helolebero. Tínaga mabuha tomo hengedemiru ti aribia howa bu nalu holebira. Ani bialu nogo bulumaga angibuni karunaga andu ibane tínaga winigo tigua hambu naga bulebira.  
\v 5 I̱na Laba tano timbuni ngago mo labu halu datani timbuni andaho ngeledogola dindi ogoni nogo kamele bu karume datani nalu holene wulebira. Ani bialu Amono dindi bibahende nogo sibi hangu hinalu holene wulebira. Ani ngelarogola tígua i̱ni Anduane Homogoore henedane hondoleberemi.   
\p
\v 6 I̱ Anduane Homogo Bibahende Haru Haame Ho Haga kogo i̱na bi ogodagua laro. Tígua Isaraele wali agali handabe manga timbuni ho howa Isaraele dindi bo haealabaga bialu bo labu hayangi tígua turu timbuni howa gi habe balu mali ligiligi bialu harimi.  
\v 7 Anidagua bialu harimigonaga i̱na hameigini tara tara dindi taraha karu tí daluha ibilarogola tigua tínaga mbirale ngamiru page bialu tí minu bai holebira. I̱na tíha mo ko holene ibilarogola tínaga dindiha hameigini abogo padagoni lene napalueberemi. Ani berogo hondowa tígua i̱ Anduane Homogo heneneore henedane hondoleberemi, laya lene.   
\s1 Moaba dindi mo ko holebira lenego ogo  
\p
\v 8 I̱ Anduane Homogo Bibahende Haru Haame Ho Haga kogo i̱na bi ogodagua laro. Moaba wali agali bu karubi Sia wali agali bu karubi tigua mitangi bialu Yuda wali agali bu karu ti hameigini maru kagobi dege ka lene.\x + \xo 25.8 \xt Ais 15.1–16.14, 25.10-12, Yar 48.1-47, Amo 2.1-3, Seb 2.8-11\x*  
\v 9 Ani lenego i̱na tinaga waitigi bu karu ibilalu tigua Moaba dindiha dindi tubarini tano timbini dunini ngamigoria wai bilo ibilolebero. Ani ibilarogola tigua tano hongohe uru Bede Yasimodobi Balameonobi Kiriadaimibi tano bayale uruni bibahende bo hilo wahai halu bo labu holebira.  
\v 10 Agali waitigi uruni ni tagira ibiragohayagi howa ibalu Moaba dindiha karubi Amono dindiha bu karubi uruni baba wai bialu ti bope halu tinaga dindi ngago karulo holebira. Anidagua biragola Moaba dindiha Amono dindihabi hameigini abogo padagoni lene napaluebira.  
\v 11 Anidagua bialu i̱na Moabali bo haealabagabu wahai kogola tigua i̱ni Anduane Homogo henene henedane hondolebira, laya lene.   
\s1 Idomo dindi mo ko holebira lenego ogo  
\p
\v 12 I̱ Anduane Homogo Bibahende Haru Haame Ho Haga kogo i̱na bi ogodagua laro. Idomo wali agali tigua Yuda wali agalihondo mana ko wiaru biadai biyagonaga pani nolene nga.\x + \xo 25.12 \xt Ais 34.5-17, 63.1-6, Yar 49.7-22, Ese 35.1-15, Amo 1.11-12, Oba 1-14, Mal 1.2-5\x*  
\v 13 Ani nolene ngagonaga i̱na laro. I̱na Idomo dindi bo haeala hole bialu wali agali bibahendebi tinaga nogo tara tara bu karubi bibahendeore bo wahai holebero. Temana tano ngagoria howa bama pialu uyura Dedana tano ngagoria bama tagira pialu wali agali bibahende waitigime bo wahai halu dindi labu wulebira.  
\v 14 I̱na Idomo tinaga mana ko biyagonaga pani nelo mialu i̱naga Isaraele wali agali bu karume ti baba wai bule pudaba lolebero. Anidagua berogola Idomo wali agali tigua i̱naga keba holene timbuni tiha ibira manda bulebira. Anidagua bialu Idomo wali agali tigua ko biyagonaga pani nelo i̱nime minidalo manda bulebira. I̱ Anduane Homogo Bibahende Haru Haame Ho Haga kogo i̱na bi o ledogoniore, lene.   
\s1 Pilidia dindi mo ko holebira lenego ogo  
\p
\v 15 I̱ Anduane Homogo Bibahende Haru Haame Ho Haga kogo i̱na bi ogodagua laro. Bambaore howa Pilidiali tigua Isaraeleali handabe manga halu waitigi haabo haga ka. Tigua Isaraelealime ko biyagonaga paipai bialu mo ko haga bialu haabo ka.\x + \xo 25.15 \xt Ais 14.29-31, Yar 47.1-7, Yol 3.4-8, Amo 1.6-8, Seb 2.4-7, Seg 9.5-7\x*  
\v 16 Anidagua bialu kagonaga i̱na ogodagua laro. I̱na Pilidia wali agali pani nelo mialu iba solowara ange ange paluyu pedarubi bo hilo wahai holebero.  
\v 17 Tigua mana ko bialu hayaru bibahendenaga paipai biadai bialu pani timbuniore nelo merogola i̱na ti baba keba timbuni ho harugo ti miniha manda bulebira. Anidagua berogola tigua i̱ Anduane Homogo henene henedalo manda bulebira, laya lene.   
\c 26  
\s1 Taia tano mo ko holebira lenego ogo  
\p
\v 1 Ina garabaya pu hemane mali beanenaga horo mbira\f + \fr 26.1 \ft Hiburu bi lo ngagoha ege ogoalene lalu gilibu wia nabiniya.\f* layagola Anduane Homogohanda i̱hondo ogodagua laya.\x + \xo 26.1 \xt Ais 23.1-18, Yol 3.4-8, Amo 1.9-10, Seg 9.1-4, Md 11.21-22, Lg 10.13-14\x*  
\v 2 Dindiali-o Taia wali agali bu karume turu howa bi ladaga halu lalu, Yarusaleme tanoore bo haealabaga bialu bo labu helayago ainde wali agali dindi tara tara ngaruha howa ti baba biyinaya bule mbirali naibulubada. Ogoniha piagaru ai ina kamaria hangu ibiragola muni dabudabubi dewa wu holeberema ndobe, lalu ka.   
\p
\v 3 Ani lalu kago ai i̱ni Anduane Homogo Bibahende Haru Haame Ho Haga kogo i̱na bi ogo laro. Taia wali agaliru tí baba waitigi i̱ haro. Ani howa i̱na hameigini tara tara dindi taraha howa waitigi dewaore iba solowara bedago angeni iba yaribu timbuniore bu yalu ibuwa dambi hagadagua bialu tí baba wai bule ibilolebero.  
\v 4 Ani ibilarogola tigua ibalu tínaga tano wai pabe hongohe ege pabe bu mabubupe kamiru bo gialopaya bialu wai pabe daligani mamage haga anda bu heledemiru bo gialo wahai halu bulebira. Ani biragola i̱na tínaga tanoha dindi ngago dugu wahai harogola ege to̱le̱ kelekele hangu tagira íbu wulebira.  
\v 5 Ani ngagola agali wena baga bu karume tinaga wena nu yobilonaga dindi ege to̱le̱ kelekele ogoriani yalu ibuwa yobia haga bulebira. I̱ Anduane Homogo Bibahende Haru Haame Ho Haga kogo i̱na bi o ledogoniore. Hameigini tara tara dindi taraha bu karume ibalu tí minalu mo ko howa bai holebira.  
\v 6 Ani buwa tigua Taia tano iba dege dombeneha ngago kawareni dindi timbuni iba angeni wuyu pedagoha tano dewa bu ngaruha wali agali bu karu bibahendeore bo hilo wahai holebira. Anidagua biragola hondowa Taia wali agali tígua i̱ Anduane Homogo henene henedane hondoleberemi.   
\p
\v 7 I̱ Anduane Homogo Bibahende Haru Haame Ho Haga kogo i̱na ogodagua laro. I̱na kini mbira hongohe daligaore kago haru ibulebero. Kini ogoni ibu Babilononaga kini Nebugadenesa kago i̱na haru eberogola ibugua Taia wali agali tí baba wai bulebira. Ibugua agali dewaorebi nogo hosi dewaorebi wai biagane garo nogo hosime gili laga mini karisi dewaorebi ami agali nogo hosini biruwa wai biagane dewabi dindi abene uyurahayagi howa haru ibulebira.  
\v 8 Ani ibalu tigua Taia dindi timbuninaga tano kaware iba ange bu ngaruha wali agali kamiru bo wahai holebira. Ani buwa tigua gana walu tano pabe kagoha heyu howa wai bulenaga dindi dugu wima irigi holebira. Ani bialu howa tinaga wai humbiha tini hage howa wai bulenaga wai pabe haradagua bilowa ogoniha wai bulebira.  
\v 9 Ani bialu howa tigua wai pabe bo gialolenaga mbirale mbira hongohe guruyagu̱ ale mo yu íbu pongo bia howa yupe haragola tanonaga wai pabe kago bo gialolebira. Ani bialu kuluba hongohe ngagome wai pabe daligani mamage haga anda bu heledemirubi gialolebira.  
\v 10 Ani bialu tinaga nogo hosi urunime tanoha hariga ngadagua gerai lalu pugupugu biragola tanoha be abalu timbuni taularagome anda bu karu dambi hai holebira. Ami agalime nogo hosini biralubi hosime gililaga garo ale karisini heyu halubi tanoha abale anda piai holebira. Wai pabenaga panga kagoria anda pialu howa dindi kulu lalu hongo howa bi ua laga biragola wai pabe ema bialu holebira.  
\v 11 Ami agali nogo hosini biralu pialu howa tigua wai biagane ayu tibu ne gadele yiagome wali agali tanoha bu karu diba amu nana bima polebira. Anda gene hongohe tanoha bu karu dindini dugu ibira hai holebira.  
\v 12 Waitigi urunime tínaga muni mbirale ngamirubi biyinaya bulenaga dabudabu ngamirubi bibahende mo yai holebira. Ani bialu tínaga wai pabe hongohe karu bo gialapaya biai halu tínaga anda hongohe karubi bo gialo wahai holebira. Ege to̱le̱bi ira bayale podene ngarubi dindi ngarubi bibahende iba solowara bedagoha bape hai holebira.  
\v 13 Anidagua biragola tígua ngida ale baga kamiru nabe iba gana laga kamirubi nale dege holeberemi.\x + \xo 26.13 \xt Mo 18.22\x*  
\v 14 Tínaga dindini ege to̱le̱ dege ibira halu dindi mbira nawulebira. Ege to̱le̱ ogoni ngagoria agali wena baga karume tinaga wena nu yobia haga wulebira. Ani biaga ngagola mani tano ogoriani lone biadai bibe nahe wulebira. I̱ Anduane Homogo Bibahende Haru Haame Ho Haga kogo i̱na bi o ledogoniore, laya, lene.   
\p
\v 15 I̱ Anduane Homogo Bibahende Haru Haame Ho Haga kogo i̱na Taia wali agali bu karuhondo bi ogodagua laro. Waitigi urunime tínaga tano ngago bo gialabaga bialu howa hoaro laragobi kilingulu laragobi bibahende wali agali iba angeni paluyu pedarume hale holebira. Ani bialu waitigime tí minu baragola yiya lalu dugu bigibigi beremigobi tigua hale howa mogo timbuniore lowa duru lagalaga bialu holebira.  
\v 16 Tíha mo ko holene ogoni anda ibirago hale howa hameigini tara tara dindi tara iba solowara bedago ange ange ngagoria paluyu pedarume mogo timbuni lalu tinaga kini karume biragane dagia ngago ngelalu daluwa kininaga aga bayale karulo bedaru golo wahai halu dindini biruwa duru lalu birulebira.\x + \xo 26.16 \xt Mo 18.9-10\x*   
\p
\v 17 Ani biruwa tínaga tano bo gialo waharagonaga dara howa duguore bialu iba gana ogodagua lolebira.  
\q1 Tano mini lene timbuni winigo ai bo gialo wahai hayada.  
\q2 Ibunaga iba sibi timbuni biaru ibani puíbu biyaru tinaga biyinaya biabe nabi ngagoni.  
\q1 Wali agali tano ogoniha hearu ti bamba iba solowara bedagoria ibuwa  
\q2 iba sibi dewa wialu ti iba solowara biabe bulene mugube tara tara yu howa ti duniniore haya.  
\q1 Wali agali tara tara iba solowara angeha palima pedarume í̠naga wali agali mo gi timbuni haya.   
\q1
\v 18 Tano bo gialabaga biai hayagola horo ogoningi  
\q2 wali agali iba dombeneha paliaga bu hearu  
\q2 tigua gi timbuni howa tini duru lagalaga bialu holebira,  
\m lalu wali agalime dara howa dugu bigi bialu iba gana ogonibi lolebira, lene.   
\p
\v 19 I̱ Anduane Homogo Bibahende Haru Haame Ho Haga kogo i̱na bi ogodagua laro. Taia í̠ore tano wali agali mbira nahe ngaligobi ngelolebero. Ani bialu iba solowara timbuni bedagome bira dambi helarogola í̠ iba andane dindihaore wulebere.  
\v 20 Ani bialu i̱na í̠ dindihaore homayarunaga andagaha bape harogola í̠ wali agali ala homaga biyaru heba mandagi holebere. I̱na í̠ tano maru bo gialo wahai hayaru heba dindi andaneha wuwa homayaru heba wiaabo holebere. Ani biragola wali agali mbira í̠ha lone nahe í̠bi nde dindi ogoria lone nawulebere.  
\v 21 I̱na í̠ore bo haealabaga bu waharogola wali agali tara bu karume i̱na í̠hondo birugoni de hondowa gi timbuni holebira. I̱na í̠ bo gialabagabu wahai harogola wali agalime í̠ de hondole taya bialu karia de nahondolebira. I̱ Anduane Homogo Bibahende Haru Haame Ho Haga kogo i̱na bi o ledogoniore, laya, lene.\x + \xo 26.21 \xt Mo 18.21\x*   
\c 27  
\s1 Esegielehanda Taia tano ko holebiragonaga dugu daraore binigo ogo  
\p
\v 1 Anduane Homogohanda i̱hondo lalu,  
\v 2 Dindiali-o Taia tano ngago bo gialopaya biai holebiragonaga í̠na dugu daraore bialu iba gana lolene nga.  
\v 3 Tano ogoni iba solowara bedago kawareni ngagome dindi tara tarani hameigini tara tara padaru baba biyinaya bialu haga nga. I̱ Anduane Homogo Bibahende Haru Haame Ho Haga kogo i̱na bi o larogo latagi halu iba gana labe.  
\q1 Taia í̠na lalu,  
\q1 I̱ duniniorebi tano bayaleorebi mbira ngo, laga ngegoni.   
\q2
\v 4 Í̠naga dalu iba solowara ngegoni. Agali tano í̠ wabiagarume í̠ baya taraore iba sibi ale wabu wini.   
\q1
\v 5 Tigua ira bayale guraya aleru Hari Hemono weagoha howa dibalu  
\q2 kambu laga buwa iba sibi ale ogoni wabiya.  
\q1 Ira tamia Lebanono dindiha howa dibu yalu ibuwa  
\q2 iba sibi he̱lo yalu pelonaga labolabo pongobia hole helaga biya.   
\q1
\v 6 Basana dindiha howa ira bai ale hearu dibu pelowa iba talu tanguiaga ira mbalape wabu wiya.  
\q2 Ira bayale tara mbira dindi Saibarasa ngagoha howa dibu yu ibalu ogonime iba sibinaga dagia dindiha pelowa dunguaya.  
\q2 Nogo elebana kagonaga ne gayane mo wuwa ogonime iba sibinaga tamuha mo yáribia haya.   
\q1
\v 7 Labolabo baya taraoreru Iyibi dindiha howa mo yu ibuwa  
\q2 ogonime iba sibi he̱lelonaga labolabo helaya.  
\q1 Labolabo uruni bayale helo mo yáribia halu aga tara tara lebu para hagabi wiaru mo yu ibugu biya.  
\q2 Labolabo ogoni pongobia heago kaundiaha howa handaga wini.  
\q1 Aga bayale mindibi tagalitayabi dindi Saibarasa iba dombeneha ngagoria howa mo yu ibuwa  
\q2 iba sibiha agali biabe biagaru holene wiagohayagi dariba haga biya.   
\q1
\v 8 Agali iba sibi ogoni yu ibaga biagaru ti Saidono tanoalibi Abada tanoalibi hene.  
\q2 Taia í̠naga agali manda timbuniwi karu ti iba sibiha biabe biaga helene.   
\q1
\v 9 Agali maru iba sibi ogoninaga tamuha ira maru goba halu diri wigi birago wagaya haga ti Bibiloso tanoali mandabi hene.  
\q2 Iba sibi ogoni manane Taia tano í̠ manda bialu nga.  
\q2 Iba sibi dindi tara tara ngaruha howa í̠ daluha ibalu  
\q1 tinaga biabe biaga agaliru í̠naga tanoha biyinaya anda heagoha anda pialu  
\q2 mbirale tara tara ngaru yolo migi biaga hene.   
\p
\v 10 Agali maru Pesia dindi howabi Lidia dindi howabi Libia dindi howabi ti í̠naga ami agali hayagoni. Ani howa tinaga wai biaga humbiru ami agalinaga gaba mandaru ami agali hagaha golo derela ho haga bu haya. Agali uruni tigua wai bialu í̠ mini lene habelo mo hela haya.  
\v 11 Abadali ami bu hearu tigua í̠naga wai pabe bu mabu bini kagoria mamage halu ami agali maru Gamadali hearu tigua wai pabe daligani mamage haga anda bima iraga hene heagoria howa waitigi ibulilono mamage haga hene. Ani howa tinaga wai humbi biaru ami agali hagaha golo derela ho haga bu haya. Agali uruni tigua í̠ mo bayale heagola í̠ tano baya taraore mbirago wirigoni ndobe.   
\p
\v 12 Í̠na Sebena wali agali baba biyinaya bialu harigoni. Ani bialu howa tigua silibarubi aeanerubi gabarubi sodarubi dewaore í̠naga mbirale dewa ngeruni yolo bialu ngigi biya.  
\v 13 Wali agali Girigi dindiha howabi Tubala dindiha howabi Mesege dindiha howabi ibugu biyaru í̠ baba biyinayaru bialu í̠naga mbirale wua heru tihondo mialu tigua wali agali garabaya biabe ale bia hagaru helalu mbirale tara tara boronosime wabini wiaru ngigi biya.  
\v 14 Í̠na Togama tano wali agali bababi nde biyinaya bialu í̠naga mbirale wiru ibu mialu nogo hosi biabe biaganebi agali biralu wai bu piaganebi nogo dongibi yolo bigi birigoni.  
\v 15 Dedana wali agali bu hearu bababi nde biyinaya bialu harigoni. Wali agali hameigini tara tara iba solowara bedago ange ange palima pedarubi biyinaya bialu tigua nogo elebananaga ne gayanebi ira mindibi mini ebonibi bibahende í̠na ngeru ti hameledago ale yolo bialu ngigi biya.  
\v 16 Siria wali agali bu hearume nde labolabo mindibi tagalitaya ale marubi labolabo mbiragoria aga yári tara tara bayaru lebu para howa mo yáribia haga binirubi aga pele bayaleorebi ege to̱le̱ tara tara emeralabi koralabi lubibi muni dewame miaga wiarubi í̠naga mbirale tara tara bayale wiaru yolo bialu í̠hondo ngigi biya.  
\v 17 Yuda wali agali Isaraele wali agalirubi tigua nde widi dewabi mone taranaga ibanebi olibe lini welibi tomo mo dendebia haga tara tara wiarubi yalu í̠naga ngeru tini hameleda ale yolo bule ibugu biya.  
\v 18 Damasagasa tanoha wali agali bu hearume í̠ baba biyinaya bialu tigua \w waini\w* iba Helebono tanoha howa wabinigobi nogo sibinaga irini Sahara dindi wiagoha hearumebi yalu ibalu í̠hondo ngigi biya.  
\v 19 Wali agali Dana hameigini bu hearumebi Girigi wali agali Usala dindiha bu hearumebi í̠ baba biyinaya bialu tigua aeanerubi tomo mo dende biahaga tara tararubi pauda mbira mini sanda wiarubi ira mini kasianaga ibanebi yunibi linibi tara tara wabini wiarubi gambe tara mbira ngabi baya tara mbirabi tigua yalu ibalu í̠na ti hameledago ale mo mibelo ibugu biaga hene.  
\v 20 Ani bialu Dedana wali agali bu hearume balangiya tara nogo hosinaga erekunini biralu howa mo wiagaru yalu ibalu tini hameledago ale í̠na ngeru yolo bule yalu ibugu biaga hene.  
\v 21 Arebia agali bu hearumebi Keda dindiha howa agali haguane bu hearumebi nogo sibi iginibi sibi wangaberubi nogo memerubi haru ibalu tinaga hameledaru í̠na ti mibelo yolobu ibugu biaga hene.  
\v 22 Agali biyinaya biaga Seba dindiha howabi Lama tanoha howabi tigua ngolobi pauda tara tara nga bayale biaga tara tara wiarubi ege to̱le̱ tara tara muni dewame miaga wiarubi yalu ibalu tini hameleago í̠na wu heru mibelo yolo bule yalu ibugu biaga.  
\v 23 Agali Harana tanoha howabi Kane tanoha howabi Idene tanoha howabi biyinaya biabe biaga agali Seba dindiha howabi Asuru tanoha howabi Kilimada tanoha howabi tigua í̠ baba biyinaya biabe biaga hene.  
\v 24 Tigua aga baya taraorebi labolabo tagalitaya alebi labolabo maru yári tara tara lebu para henebi pu payini timbuni tarabi balangiya anda tamuha biraganeni dungua hagane alebi yalu ibugu biya. Balangiya uruni taraore mo yaribia haga bini wiarubi yalu ibalu í̠na ti hameledaru ale ngago yolo bule mo yalu ibugu biya.  
\v 25 Ani bialu iba sibi timbuni wiarume í̠naga dabudabu tara tara wiaru mo yalu dindi tara tara wiaruha pugu biya.\x + \xo 27.25 \xt Mo 18.11-19\x*  
\p Í̠ni nde iba sibi timbuni ale ibani wuwa dabudabu tara tara dewaore wu to̱ledagoni.  
\v 26 Agali iba talu yaga hearume í̠ hongo howa yalu iba solowara bereago hanuni pu wigola puyabu hongohe ni ibiragohayagi howa ibalu í̠ bo haealabagi halu mo ko hai haya.  
\v 27 Í̠ mo ko hayangi í̠naga munibi dabudabubi yári tara tarabi í̠naga iba sibiha biabe biaga agalibi iba sibiha gabenda biabe biaga agalirubi biyinaya biabe biagarubi í̠naga ami agalirubi agali maru í̠ni heba haga heneru bibahende ibaha homai harimida.  
\v 28 Agali iba sibiha biabe biaga bibahende bu hearume ga̱ hongo howa layuagome iba angeni dindi wiaru birilagimbu biya.   
\p
\v 29 Agali iba sibiha biabe biaga hearu tigua iba sibi ibani ngelalu tagira piai halu iba angeni pu haya.  
\v 30 Ti bibahendeme í̠naga daraore halu dugu timbuni bialu haya. Tigua dara ho kama walia halu biagane mana ngadagua dindi abalu tinaga haguani dugu hiralu be abalu wiagoria palu beregedaga bialu haya.  
\v 31 Tigua í̠naga dara howa tinaga mandari podo mbololo wahai haya. Tinaga bu miniha tandaga timbuni howa dugu tara bialu daraho howa karulagane agaru karulo haya.  
\v 32 Tigua agali homenenaga dara howa dugu biaga wiadagua dugu bialu ogodagua iba gana lene.  
\q1 Taia-o tano mbira í̠ mo ko haradagua mende agoha mo ko hene ngabe.  
\q1 Í̠ iba solowara bedago dombeneha wialu bi nale ngegoni.   
\q1
\v 33 Í̠naga dabudabu wiruni iba sibime yalu dindi tara tara ngaruha piai helarigola  
\q2 hameigini tara tara ala burupale hearume  
\q1 mbirale uruni mialu mo yu howa turu haya.  
\q1 Kini karume mbirale í̠naga wirume biyinaya biabe bialu  
\q2 ti mo homogoore haya.   
\q1
\v 34 Ai áyu í̠ni iba solowaraha mo ko ho wialu  
\q2 ibaha namu lai haya.  
\q1 Agali í̠ha biabe biaga hearu bibahendebi  
\q2 í̠naga dabudabu wiaru bibahendebi  
\q1 í̠ni heba iba solowaraha ereba hai harimi.   
\p
\v 35 Wali agali iba solowara ange ange paluyu pearume í̠ mo ko haya layago hale howa ti mogo timbuniore laya. Tinaga kini hearubi mogolo howa gi timbuni ho hayago tinaga denguini mo walia haya.  
\v 36 Í̠ dindini nahe bo haealabaga bialu pu erebaore hai helaya. Anidagua bialu agali biyinaya biabe biaga dindi bibahendeha bu hearume í̠ mo ko hene wiago de hondowa ti gi timbuni howa lo mitangi bialu, Inabi nde ogonidagua buligo giba, lalu ka, laya lene.   
\c 28  
\s1 Taianaga kini kago mo ko holebira lenego ogo  
\p
\v 1 Anduane Homogohanda i̱hondo bi lalu,  
\v 2 Dindiali-o Anduane Homogo Bibahende Haru Haame Ho Haga kogome i̱na bi o langerogo Taianaga kini kagohondo í̠na lamibelo hameledo. I̱naga bi ogodagua laro. Taianaga kini-o í̠na í̠ninaga mini mo yaraga halu lalu, I̱ni daliga timbuniore wali agalime i̱ mitangi bialu bi pupu wiaga mbira kogoni, laga ke. Í̠naga dindibi nde mbirale mitangi bialu bi pupu wiagaru dindi mbaule iba solowara dege dombeneha wu kegoni. Í̠na bi henene anidagua la larigonigo henene í̠ mbirale bi pupu wiaga uruni ale ndo í̠ bame agali dege kegoni.\x + \xo 28.2 \xt Iba 9.20, Ais 14.13, 31.3, 2 Te 2.4\x*  
\v 3 Í̠nime manda bu handalu keria í̠naga mini gigabi ngego Danielenaga wu henego bolangua halu timbuniore wu howa mbirale wia do hene ngaru manda biaihe kobe tobaho kegoni.  
\v 4 Í̠naga mini gigabi ngegome muni ngolo silibaru hangu dewa mo wu howa ai homogo kegoni.  
\v 5 Ani mo ngelo howa muni urunime biyinaya bialu muni igini wiyagola dewaore wu kegoni. Ani howa í̠naga muni dewa wu kegonaga balagala howa mine timbuniore halu kegoni.   
\p
\v 6 Anigo i̱ Anduane Homogo Bibahende Haru Haame Ho Haga kogome í̠hondo bi langerogo. Í̠na mine howa mitangibu handalu keria í̠naga mini gigabiwi mbirale gime wabini mitangi bialu bi pupu wiaga karu aria mbira i̱ kobe toba ho kegoni.  
\v 7 Ani mitangi bialu kegonaga i̱na í̠naga waitigi koore bu karume í̠ni baba wai bilo ibilolebero. Ani ibilarogola tigua í̠naga manda timbuni ngegome mo wini ngeruni bibahende bo gialabaga bialu mo yu piai holebira.  
\v 8 Ani bialu í̠ni mo ko howa í̠ninaga dindi iba solowara dege dombeneha ngegoria homolebere. Ani homalu í̠ni homenerunaga dindi humbirini andaha pu holebere.  
\v 9 Anigo tigua í̠ bole ibirangi í̠na tihondo lamialu, Wali agalime i̱hondo bi pupu wiaga mbirale mbira i̱ kogoni, loleberebe. Anigo ogonidagua nalolebere. Í̠na í̠ bo wahaga biaru de handade halu í̠ bame agali damene bu karuni ale dege harudane hondolebere.  
\v 10 Í̠naga waitigirume ibalu í̠ bo waharagola í̠ agali uruninaga giha howa biango homaradagua bulebere. Anduane Homogo Bibahende Haru Ho Haame Haga kogome i̱na tí ani bidaba lalu lamirugoni laro, laya lalu Esegielehanda lene.   
\s1 Taianaga kini mo ko holebira lenego ogo  
\p
\v 11 Anduane Homogo ibugua i̱hondo laabo halu lalu,  
\v 12 Dindiali-o í̠na Taianaga kini kagonaga dugu bialu ibuhondo bi ogodagua lamibe. Taianaga kini-o Anduane Homogo Bibahende Haru Haame Ho Haga kagome bi ogo í̠hondo larago hale habe. Ala í̠ agali tigabi bayaleore wali agali maru bolangua hene mbira harigoni. Í̠naga mandabi timbuniore bu howa í̠ agali bayaleore mbira harigoni.  
\v 13 Í̠ Ngode Datagaliwabenaga Idene mabu ale bayale biagoha harigoni. Ani bialu í̠naga yári bayale ege to̱le̱ tara yolo timbunime miaga mini ngoloru ngibingabu lo helaga bini wiaru mo karulo hari. Ege to̱le̱ uruni mini lubiru tobasaru daimonoru beriliru kanelianaru yasabaru sabaearu emeralaru ganederu ege to̱le̱ uruni bibahende í̠ dindini nahengi i̱na í̠naga mo manda manda bu wiru.  
\v 14 Kini-o i̱na í̠ dahuliyali mamage haga haradagua helowa í̠na i̱naga hari loma bia hene wiagoria pu howa ege to̱le̱ ngiringarale tara tara wiagoria ibagabu harigoni.  
\v 15 I̱na í̠ dindi ogoria pigane helarungi í̠ bayale ko mbira í̠ha nawiore helaru. Ani helewagola mani i̱naga deni howa mana ko dewaore bialu hari.  
\v 16 Í̠na dindi dewaoreha biyinaya biame halu howa wali agali bu hearu baba biyinaya uruni timbuni helonaga bia hami̱ya ibidaba lowa mana ko bialu wali agali bo wahaga kegoni. Í̠ dahuliyali mamage haga ale harigoni hegola i̱naga deni í̠ ko dodoheore hayagola i̱na i̱naga hari loma bia hene biagoria howa í̠ bo taliatagi harugola í̠ taga halu pirigoni. Ani birugola í̠ ege to̱le̱ baya ngiringarale biaru ngagoria lone naholebere.  
\v 17 Í̠ni manda bu handalu heria í̠naga dengui bayaleyagola í̠nime balagala halu í̠ni mini mo yaraga halu harigoni. Ani bialu í̠naga manda timbuni wu howa ainde manda timbuni ogonime í̠ninaga mini mo yaraga holene ngabe tobaho harida. Irane ogoninagaore i̱na í̠ bope harugola dindini wiria kini maru karume í̠ hondo oba halu helonaga biru.  
\v 18 Taianaga kini-o í̠na biyinaya biabe bialu howa mana ko dewa bialu harigome lotu anda bu hearu i̱naga deni mo dodoheore helari. Ani birigola i̱na tano uruniha ira hedope halu bo heda hewagola tano uruni dai halu be abalu hangu ibira hene ngaria wali agalime hendedagoni.  
\v 19 Í̠ mo ko hai hene kegonigo ai dindini naholebereore. Dindi tara taraha wali agali í̠ mandabi bu karume í̠ha ogonidagua biya larago hale howa tihabi buligo lowa ti mogo timbuniore lo kagoni, Anduane Homogohanda laya, lalu Esegielehanda lene.   
\s1 Saidono tano mo ko holebira lenego ogo  
\p
\v 20 Anduane Homogohanda i̱hondo lone lalu,\x + \xo 28.20 \xt Yol 3.4-8, Seg 9.1-2, Md 11.21-22, Lg 10.13-14\x*  
\v 21 Dindiali-o í̠na handa amu ho howa Saidono tanohondo í̠ha mo ko holene wulebira lalu lamibe.  
\v 22 Anduane Homogo Bibahende Haru Haame Ho Haga kogome i̱na Saidono wali agali bu karuhondo mbirale buleberorunaga bi lamibe. Saidono-o i̱nime tí baba waitigi halu mo ko hai halu tíha i̱naga mana tigabi bayale biaga ngoru mo walia halu berogola tígua i̱naga mini yaraga halu holeberami. Wali agali tara tara bu karume i̱na Saidono wali agalihondo ogonidagua berogo hondowa tigua i̱ni Anduane Homogoore henedalo manda biai holebira.  
\v 23 I̱nime warago ko timbuniore tara tararu tí kamiruha ibilolebero. Ani bialu tínaga waitigi bibahende ibai helarogo tigua Saidono baba wai bialu wali agali dewaore bo wahai holebira. Ani biragola bo wahenerunaga darama tanoha harigani iba poradagua pialu holebira. Ani berogo hondowa Saidono wali agali tígua i̱niore Anduane Homogoore henedane hondoleberemi, laya lalu lamibe, lene.   
\s1 Anduane Homogohanda Isaraele wali agali mo bayale holebero lenego ogo  
\p
\v 24 Anduane Homogo i̱na bi laabo halu ogodagua laro. Isaraele wali agalinaga waitigi bu karuni ti igibu ani ale howa wali agali kenda poradagua biaga bu ka. Anigo mani lone ani nabulebira. Horo ogoningi Isaraele wali agalibi waitigi bu karubi ti bibahendeme i̱ Anduane Homogo Bibahende Haru Haame Ho Haga kogo i̱niore henene henedane hondolebira, lene.   
\p
\v 25 Anduane Homogo Bibahende Haru Haame Ho Haga kogo i̱naore larogo, I̱na Isaraele wali agali dindi tara tara ngaruha garabaya pu helaruruni bibahende haru dai bialu tininaga dindi tene wiyagoria helolebero. Ani berogo hondowa hameigini tara tara bu karume i̱ taraore howa mana bayale tigabi biaga kogoni manda bulebira. Isaraele wali agali tininaga dindi henene ngelo lowa i̱na i̱naga biabe biahaga Yagabahondo mirugoria ibalu haabobo bu holebira.  
\v 26 Ani howa tinaga anda bialu tinaga \w gerebi\w* maburu hangalu ti bayaleore helo helolebero. Ani kagola tinaga waitigi abale Isaraele wali agali ti mo ko halu haga bu hayaruni pani mialu ti minu bolebero. Anidagua berogola Isaraele wali agali tigua i̱ni Anduane Homogoore tinaga Ngode Datagaliwabe henedalo manda bu holebira, lalu Anduane Homogohanda lene.   
\c 29  
\s1 Iyibi dindi mo ko holebira lenego ogo  
\p
\v 1 Ina garabaya hemane mali pininaga ege nde pini dege layagola ege ogoninaga horo hombene (12) hayagola Anduane Homogohanda i̱hondo bi ogodagua laya.\x + \xo 29.1 \xt Ais 19.1-25, Yar 46.2-26\x*  
\v 2 Dindiali-o í̠na Iyibinaga kini kagoha handa amu howa ibuhondo i̱naga bi hongo howaore la halu, I̱na í̠bi í̠naga wali agalibi Iyibi dindini hai kamiru tí bibahendeha mo ko holene ibilolebero.  
\v 3 Í̠na i̱ Anduane Homogo Bibahende Haru Haame Ho Haga kogo i̱na bi o larogo ibuhondo lamibe. Iyibinaga kini-o í̠ waitigi i̱ kogoni. Í̠ore Iyibini iba pugua ngagoha guru abagua timbuni mbira palu wiradagua bide. Í̠na iba Naili timbuni porago í̠nime wabirigo í̠ninagaore pora laga ke.  
\v 4 Ani bidego ai i̱na í̠naga neha wena hugume hende howa wena bedaru í̠naga dongone o ligilaga ledagoha hanaho ngeloliya hondo habe. Ani buwa i̱na í̠ gilila mialu í̠ni heba wena í̠ha para haga bidaru heba ibaha howa gilila mulebero.\x + \xo 29.4 \xt 2 Kin 19.28, Ese 38.4\x*  
\v 5 Ani bialu i̱na í̠ni heba wena urunibi dindi ko iba dalu naibaga ngagoha bape holebero. Ani berogola í̠naga tingini dindini bame ibiraho ngagola mbiralime mo hora nahe wiaabo holebira. Ani ngagoria nogo gabua bu karumebi ega bedarumebi ibuwa í̠naga tingini nalu birulebira.  
\v 6 Ani birago hondowa Iyibi wali agali bibahendeme i̱niore Anduane Homogo henene henedane hondoleberemi.\x + \xo 29.6 \xt Ais 36.6\x*  
\p Anduane Homogo ibugua lalu, Isaraele wali agali karume mitangi bialu Iyibiali tígua ibalu wai biamogo bialu mo wulebirabe tobaho hemiria ai wai biamogo bule naibirimi. Kini-o í̠ halimbu hongohe ale ndo kegoni.  
\v 7 Isaraele agalirume í̠ halimbu yalu ibaga bule handalu hearia í̠ gambe hale gabuni ale heneyago ai tigua halimbu yamialu poramalo manda bialu hearia poda pialu tininaga adogeha nogoba haya. Tigua í̠ hongo howa yu ha hearia ai habola pialu pilowa tininaga erene podaya.  
\v 8 Ani biyagonaga i̱ Anduane Homogo Bibahende Haru Haame Ho Haga kogo i̱na laro. I̱na waitigiru ibilalu tigua Iyibi tí baba wai bule ibuwa wali agali bu karubi nogo tara tara bu karubi bibahende bo wahai holebira.  
\v 9 Ani biragola Iyibi dindi mo ko howa bo labu hai harago de hondowa tígua i̱ni Anduane Homogo heneneore henedane hondoleberemi.  
\p Kini í̠na lalu iba Naili porago í̠nime wabialu pelene pora larigo iba ogoni í̠ninagaore lalu kegoni.  
\v 10 Bi ogoni ko mbira larigo ai i̱na í̠la waitigi halu iba Naili poragobi waitigi dege haro. Ani howa i̱na Iyibi dindi bibahende mo ko howa bo labu hai halu Migidolo tano uyurahayagi ngagoria howa pialu unurahayagi Asawana tano ngago Sudana dindila tubari ngagoria tagira pelolebero.  
\v 11 Anidagua berogola mali pira mariani (40) Iyibi dindiha wali agali lenego mbira naholebirago nogo tara tarabi pialu karia nahondolebere.  
\v 12 I̱na Iyibi dindi balu bo haealabaga biai halu Iyibi dindini tano wima pedarubi bo haealabaga biai halu berogola dindi hangu wiaho ngane dege mali pira maria (40) polebira. Ani bialu i̱na Iyibi wali agali balu bo taliatogo larogola ti wali agali tara tara bu karu dombeneha purogo lalu piai holebira, laya.   
\p
\v 13 I̱ Anduane Homogo Bibahende Haru Haame Ho Haga kogo i̱na bi ogodagua laro. Mali pira maria (40) piai haragola i̱na Iyibi wali agali dindi tara tara wiaruha minalu purogo lelarugoria howa lone tini dindiha helo haru dai biai holebero.  
\v 14 Ti lone daibu howa Iyibi dindinaga abene unurahayagi dege helolebero. Ani bialu Iyibi dindi abale hongohe wiagagobi ndo wulebira.  
\v 15 Ti i̱na mo nagalone ho helarogola tigua hongohe howa dindi mende ngaru ala handayaho howa haru hagane wiyadagua nahe ti hongo nahe holebira.  
\v 16 Anigo Isaraele wali agalime Iyibiali o biraruni hondowa tigua mitangi bialu Iyibime ti biamogo bule ibabe larimagonaga mana ko birimada lo manda bialu Isaraele tigua ogonidagua lone nabulebira. Ani bialu Isaraele tigua i̱ni Anduane Homogo Bibahende Haru Haame Ho Haga henedane hondolebira, laya lene.\x + \xo 29.16 \xt Ais 30.2-3, 36.4-6\x*   
\s1 Kini Nebugadenesahanda Iyibi bope holebira lenego ogo  
\p
\v 17 Ina garabaya dege hemane mali pira kirani karia (27) hayagola mali ogoninaga ege mbiranaga horo mbira layagola Anduane Homogo ibugua i̱hondo langialu lalu,  
\v 18 Dindiali-o Babilononaga Kini Nebugadenesahanda ibunaga ami agaliru haru ibalu Taia tanoha wai bialu haya. Kini ibugua ibunaga ami agali bu hearu mbirale wai biagane aleru gendabi wiaru ya hadaba layagola tigua yu hearia tinaga haguani mandari piai halu paya gondolalu darama ibiya. Anigo kinibi ibunaga ami agali biarubi tigua biabe erekuibi ogoni biyagoyu ti mbirale bayale mbira mo ya nabi biabe bame dege bu wahole bialu hayiya.  
\v 19 Anidagua biyago ainde Anduane Homogo Bibahende Haru Haame Ho Haga kogo i̱na bi ogo laro. I̱na Iyibi dindi ngago Nebugadenesahondo mo mulebero. Ani berogola ibugua Iyibi dindi bo haealabaga bu wahalu Iyibi dindiha mbirale bayale ngaru ibubi ibunaga ami agali biarubi tigua biabe erekuibi bialu hayagonaga yolo ale mo yalu polebira.  
\v 20 Kini Nebugadenesabi ibunaga ami agali bu karubi tigua wai bialu hayago i̱naga biabe bia hayagonaga yolo biadai bialu i̱na tihondo Iyibi dindi mo mulebero. I̱ Anduane Homogo Bibahende Haru Haame Ho Haga kogo i̱na bi o ledogoniore.   
\p
\v 21 Mbirale uruni birangi i̱na Isaraeleali ti lone hongo helo mo hongo holebero. Ani bialu Esegiele í̠na Isaraele wali agali bu karuhondo bi latagi habelo helarogola tigua i̱ni Anduane Homogo henene henedane hondolebira, lalu Anduane Homogohanda laya lene.   
\c 30  
\s1 Anduane Homogohanda Iyibi mo ko holebira lenego ogo  
\p
\v 1 Anduane Homogo ibugua i̱hondo lalu,  
\v 2 Dindiali-o i̱ Anduane Homogo Bibahende Haru Haame Ho Haga kogo i̱na bi ogo larogo í̠na mbiwia halu bi dalimu latagi habelo hameledo. Mo ko holene timbuni gibi ibulebirago daraba.  
\v 3 Horo ogoni kaware ibiragoni. Anduane Homogo ibugua wali agali bibahendeme ko biyarunaga pani nelo miai holenaga abale tagira ibiragoni ndobe. Harini aruma holenebi wali agali mo ko holenebi horo ogoni tagira ibiragonida.  
\v 4 Horo ogoningi waitigime Iyibi dindiha ibalu wai bulebira. Sudana dindini wali agali karuha genda timbuniore tagira ibulebira. Iyibi dindiha waitigime wali agali dewaore bo wahai halu tinaga mbirale dabudabu ngaru bibahende mo yalu pialu dindi ogoni bibahende bo haealabaga biai holebira.   
\p
\v 5 Wai ogoni birangi ami agali dewaore Sudana dindiha howabi Libiaha howabi Lidiaha howabi Arebiaha howabi Kubuha howabi homalu i̱ninaga wali agali karu aria Isaraelealibi wai ogoniha homolebira.   
\p
\v 6 I̱ Anduane Homogo i̱na ogodagua laro. Iyibi agali mo wialu wai bialu karia waitigime uruni tini abene uyurahayagi Migidolo tano ngagoria howa bama pialu unurahayagi Asawana tano ngagoria bairi holebira. Iyibialiru tigua hongo howa mine halu parali ho haga winigo ai tinaga hongo ogoni biba halu ereba holebira. I̱ Anduane Homogo Bibahende Haru Haame Ho Haga kogo i̱na bi o ledogoniore.  
\v 7 I̱na Iyibi dindi bo haealabaga biai halu tano ngarubi bo gialahole bialu bo labu helolebero.  
\v 8 I̱na Iyibi dindiha ngago damene bo heda hai halu hameigini tara tara Iyibi biamogo bialu karubi bo wahai halu berogola Iyibi wali agali tigua i̱ni Anduane Homogo heneneore henedalo hondolebira.   
\p
\v 9 Horo ogoningi i̱na Iyibi balu howa Sudana wali agali tigua tiha mo ko holene mbira ibuluba ndoda lowa hope karia agali maru bi lo yalu iba sibi poragoria pelolebero. Ani pelarogola tigua bi te Iyibi dindiha bialu ka lalu larago hale howa Sudana wali agali bu karu ti gi halu mogo lowa duru lalu holebira. Emene tigi mbira hangu howa i̱na urunidagua bulebero.   
\p
\v 10 I̱ Anduane Homogo Bibahende Haru Haame Ho Haga kogome ogodagua laro. Babilonoalinaga Kini Nebugadenesa kago ibugua Iyibi dindiha munibi mbirale ngarubi bibahende mo yu piai helo i̱na ibuninaga ami agaliru haru halu ibilolebero.  
\v 11 Babilonoali kini biagobi ibunaga ami agali koore urunibi tigua ibalu Iyibi dindi mo ko halu bo haealabaga bu wahai helolebero. Tigua Iyibi wali agali ayu tibume dibu gaibu paya bidagola homene tingini dewaore Iyibi dindini bu wulebira.  
\v 12 Ani bialu i̱na iba Naili porago mo hundia hai howa agali mini koore karume Iyibi dindi karulelo tinaga giha ya holebero. Agali uruni ti dindi taraha howa ibalu Iyibi bo haealo wahai holebira. I̱ Anduane Homogo i̱na bi o ledogoniore.\x + \xo 30.12 \xt Ais 19.4-6\x*   
\p
\v 13 I̱ Anduane Homogo Bibahende Haru Haame Ho Haga kogo i̱na bi ogo laro. Iyibi dindini Membisi tano ngagoha dama mitangi bialu mbirale bi pupu wulenaga gime wabu ngaru bibahende i̱na bo haealo wahai holebero. Ani bialu Iyibinaga kini kago bo taliatagi harogola Iyibi wali agali haru holene mbirali nahedagola ti gi timbuni ho helolebero.  
\v 14 I̱na Iyibi dindi abene unurahayagi wai labu dindi ngelolebero. Ani bialu dindi abene uyurahayagi Soana tano ngagobi bo heda hai holebero. Tebese tano timbuni ngago ko biyarunaga pani mulebero.  
\v 15 I̱na Pelusiumu tano Iyibi dindinaga wai pabe hongohe bu mabu bidagoha wali agali karu i̱naga keba timbuni holene ti manda bilolebero. Tebese tanoha munibi mbirale tara tara ngarubi bibahende mo wahai holebero.  
\v 16 I̱na Iyibi dindi bo heda hai howa Pelusiumu tanobi genda tandagala timbuni yu holebira. Tebese tanonaga wai pabe bidago bo gialo wahai howa tano ogoniha iba li timbuni ibulebira. Membisi tano ngagohabi genda tandagala yu haabo holebira.  
\v 17 Ani bialu Heliobolisi tanohabi Bubasidisi tanohabi igiri daliahe bu karu bibahende waitigirume bo wahai holebira. Wali agali maru tano kira ogonilaboha haga karu ti dindi taraha garabaya bu yalu piai holebira.  
\v 18 Iyibiali tigua hongo howa mine halu parali ho haga winigo ai tinaga hongo ogoni mo wahai harongi Tabanese tanoha aruma hai holebira. Ani bialu beraliba mindibi timbunime Iyibi dindi dambi hai holebira. Anidagua biragola waitigiru ibalu wali agali Iyibi dindiha karu minu garabaya bu yalu dindi tara tara ngaruha purogo lolebira.  
\v 19 I̱na Iyibi wali agali pani nelo ogonidagua merogola tigua i̱niore Anduane Homogo heneneore henedalo manda bulebira, laya lene.   
\s1 Iyibi kininaga hongo ereba henego ogo  
\p
\v 20 Ina Babilono dindiha garabaya hemane dege mali beane (11) hayagola ege mbiragonaga horo kane layagola Anduane Homogohanda i̱hondo bi ogodagua laya.  
\v 21 Dindiali-o i̱na Iyibinaga kini biagonaga gi bo polaru. Ani birugola ibugua hongo howa wai biagane ayu tibu ngago yu howa wai lone bilo ibunaga gi dabi helonaga kabu bulene mbira naheore.  
\v 22 Ani kago i̱ Anduane Homogo Bibahende Haru Haame Ho Haga kogo i̱na bi ogo larogo, I̱ Iyibi kini kagola waitigi kogoni. I̱na ibunaga gi bo tagalene kago heba gi mende bayale kagobi kirabali bo tagalolebero. Ani berogola wai biagane ayu tibu ibu gini yidago ibira holebira.  
\v 23 Anidagua bialu Iyibi wali agali balu dindi tara tara ngaruha purogo lelolebero.  
\v 24 Ani bialu i̱na Babilono kini kagonaga gi kirabali lone mo hongo howa i̱naga wai biagane ayu tibu ibunaga giha mo ya holebero. Ani buleberogoyu Iyibi kini kagonaga gi kirabali bo tagalarogola tandaga timbuni nalu holebira. Ani nalu howa ibuni Babilono kini kagonaga wanakuihayagi howa dugu timbuniore bialu homolebira.  
\v 25 I̱na heneneore larogo Iyibiali kini kagonaga hongo mo wahai halu Babilonoali kini kago mo hongo holebero. I̱naga wai biagane ayu tibu ngogo Babilono kini kagohondo mo merogola ibugua Iyibihayagi ya amu haragola nde Iyibi wali agali karu tigua i̱ni heneneore Anduane Homogo henedane hondolebira.  
\v 26 I̱na Iyibi wali agali bibahende bo taliatogo larogola ti dindi tara tara bu ngaruha purogo lai holebira. Anidagua berongi tigua i̱ni Anduane Homogoore henedalo manda biai holebira, laya lene.   
\c 31  
\s1 Anduane Homogohanda lalu Iyibi kini ira tamia ale lenego ogo  
\p
\v 1 Ina garabaya hemaria mali beane (11) hayagola ege tebonegonaga horo mbira layagola Anduane Homogo ibugua i̱hondo lalu,  
\v 2 Dindiali-o í̠na Iyibi kini kagobi ibunaga wali agali bu karubi tihondo bi ogodagua lamibe. Iyibialiru tíore hongo gibihe kamigoni. Hongohe tí kamigobi mende ai kabe.  
\v 3 Iyibi hongo timbunihe howa ira tamia Lebanono irabuha kaligobi hene. Ira ogoni ibunaga gene magane timbuniruhe ibu andaneha bayale gumbahe wini. Ira ogoni ibu luore li beraliba daligaore ela howa ira tara tara karu bolanguahe hene.  
\v 4 Iba bayale bereagome ira ogoni mo anda halu dindi andaneha howa iba duguadaga halu puwa ira timbuniore anda hene. Iba urunime ira maru hearu mo anda haga biaga berene.  
\v 5 Iba dewa bereagome ira ogoni mo anda hayagola ibu andaho timbuore halu ira maru hearubi ndo lu timbuniore hene. Ibunaga gene magane timbuni luni yunibi dewahe hene.  
\v 6 Ira ogoninaga maganeha ega tara tara berearume tinaga anda bigibigi biagaya. Nogo gabua bu hearubi ema bialu piaga tara tara berearubi ira ogoninaga gumba bayale wiagoha ti igini wu ngoai hagaya. Hameigini tara tara dindi tara ngaruha hearume ira timbuni ogoninaga andaneha biru ngoai hagaya.  
\v 7 Ainde ira ogoni duniniore mbira heneya. Ira ogoni timbuniore howa ibunaga gene maganeru lu andaho hene. Ibunaga piniru dindiha unuraore pialu dindi iba dewa bereagoria piyagola lu timbuni amura pugupugubi haya.  
\v 8 Ira tamia bayale timbuni ogonibi mbira Ngode Datagaliwabenaga mabu Idene dindi biagoha naheore. Ira tamia ogoninaga gene maganeru ira maru mabuha hearunaga gene maganeru hearubi ndo ibu timbuni luore heneya. Mabu ogoniha ira bayale maru hearu nira dege lowa ira tamia mbiraore ogoni ibu timbuniore hene.\x + \xo 31.8 \xt Pig 2.9\x*  
\v 9 I̱nime ira ogoninaga gene magane mo dewaore harugola ira baya burugule mbira hene. Ngode Datagaliwabenaga mabu Idene dindiha ira maru bu hearume ira mbiraore ogoni de hondowa ti hengelo hene.   
\p
\v 10 Ira maru bu hearu nira lowa ira tamia ogoni ibu luniore halu li beraliba ela howa mine haga hene. Ani henego i̱ Anduane Homogo Bibahende Haru Haame Ho Haga kogo i̱na ira ogoni timbu bayaleore henego ibuha mani tagira ibulebiragonaga laro.  
\v 11 Ira o biago ibu mine hayagola i̱na ibu erembira mialu kini hongohe mbiranaga giha mo ya haru. Ani birugola ainde kini o biago ibugua ira ogoni ibunime ko bialu hene wiagonaga pani nelo mulebira.  
\v 12 Dindi tara agali ko bu karume ibalu ira tamia timbuni ogoni dibu ibira haragola dindini wiaabo holebira. Ira ogoni podarangi gene magane timbuni biaru hari bibahende ngaruhabi dindi ulini ngaruhabi podo ibira haga bialu gingirulobaga biai holebira. Ani bidagola hameigini tara tara dindi taraha howa íbu heneru ti ira ogoninaga andane gumba heagoha biraga biaru ti ibida pugupugu bulebira.  
\v 13 Ira tamia ogoni dindini dibupe hene ngagoria egaru ibalu birulebira. Nogo gabua karubi ema bialu piaga maru bedarubi ibalu ira ogoni ngagoria obenenibi gene magane ngarunagabi birama ibulebira.  
\v 14 Mani ira lu timbuni ogonibi mende naholebira. Ira maru holobadaru teneha mo anda holene iba bayale bereaguabi luore ogonibi anda halu li beraliba daligahaore elahe mbira naholebira. Ira bibahende ti abale agali homagadagua pola hole bialu homene dinini andaga peneru heba piai holebira.   
\p
\v 15 I̱ Anduane Homogo Bibahende Haru Haame Ho Haga kogo i̱na bi ogo laro. Ira timbuni ogoni ibu homalu homene dininiru hagaha porangi iba dindi andaneha bedarume ira homayagonaga dara howa bira dambi ho helolebero. Ani bialu iba poraru tagira napelo hariga hangai holebero. Anidagua bidogola iba dindini biraga bedaru hundiai holebira. Ira ogoni homayagonaga Lebanono dindiha hari wedarume daraho kago mo walia halu aruma hai helolebero. Ira maru bu karubi nde ira mbiraore ogoninaga dara ho halu tinibi gabu hai holebira.  
\v 16 I̱na ira timbuni ogoni homene dininiru hagaha bape harogola dindi bibahendeha ema bialu dumbirumbi biame holebira. Ani berogola ira bayale maru Idene mabuha hene biarubi ira bayale maru Lebanono dindiha hene biarubi ti homene dininiru hagaha pu karume ira luni ogoni bape harogo de hondowa tinaga bu miniha dungulo holebira.  
\v 17 Agali ira timbuni ogoninaga andane gumba heagoha biraga howa agali ira ogoni biamogo bigi biaga heneru tibi nde ira ogoni ibuni heba homene dininiru hagaha hole piai holebira. Ti puwa agali maru ayu tibume dibayagola homaga bini biaru heba mandagi pu holebira.   
\p
\v 18 Iyibi dindinaga kini kagobi ibunaga wali agali bu karubi ti ira tamia lu timbuni ogonibi ka. Idene mabuha ira bayale luni henerubi ibu ale mbira naheore. Anigo ira timbuni ogoni ibu ira maru Idene mabuha heneru ale dege halu ibu homene dininiru hagaha hole polebira. Ibu puwa agali mini kowi hene homenerubi agali waiha hearia bene homenerubi ti heba mandagi hole polebira. I̱ Anduane Homogo Bibahende Haru Haame Ho Haga kogo i̱na bi o ledogoniore, lene.   
\c 32  
\s1 Iyibi kini ibu abagua ale lowa ko holebira lenego ogo  
\p
\v 1 Ina garabaya hemaria mali hombene (12) hayagola mali ogoninaga ege hombeneni (12) horo mbira layagola Anduane Homogo ibugua i̱hondo lalu,  
\v 2 Dindiali-o í̠na Iyibi kini kagonaga dara howa ibuhondo bi darabi ogodagua labe. Kini-o í̠na mitangi bialu hameigini tara tara bu karu bibahende dombeneha howa í̠ laiono gabua ale hetingi hariligoni. Anigo í̠ laiono ale ndogo í̠ abagua ale timbuni mbira ibaha biruwa ibaga bialu ge dege dindi halu bedaria iba bayale bedago mo ganguluma bia hagagobi kegoni ndobe.  
\v 3 Anigo ai Anduane Homogo Bibahende Haru Haame Ho Haga kogo i̱na í̠hondo bule ngogo ogo. Hameigini tara tara dewaore dindi taraha howa íbu ngoai haragola i̱na haru ibalu i̱naga wena nu ngogo bape harogola wena nu ogoniha í̠ do ngeria wali agali urunime nu heba ibaha howa dindini gililo mu ngelolebira.  
\v 4 Ani ngeledagoria i̱na í̠ nuha howa dindini tagupe ho ngelaragola ega bedarumebi nogo gabua bu karumebi ema bialu piaga tara tara biru ngarumebi dindi bibahendeha howa í̠ nai helonaga olo ngoai holebero. Anidagua berogola tigua í̠ nalu no karulape howa bibahende tombe hai holebira.  
\v 5 Ani bialu í̠naga tingini togo bidago podowa maru hari ngaruha bape halu maru dindi ulini ngaruhabi mo bape harogola wu to̱ladaga holebira.  
\v 6 Ani bialu i̱na í̠naga darama dindi uli uli ngaruhabi hari bare bare ngaruhabi odo paya biai helolebero.  
\v 7 I̱na í̠ bo homa howa hari daligaha buyi hai howa yakundinaga wá holenebi mo hundiai holebero. Ni nadelo hari beralibame ni mo gehai harogola egebi nadolebira.\x + \xo 32.7 \xt Ais 13.10, Md 24.29, Mg 13.24-25, Lg 21.25, Mo 6.12-13, 8.12\x*  
\v 8 Anidagua bialu i̱na wá holene hariha haga bu karu bibahende mo hundiai helarogola í̠naga dindi ngego bibahendeha aruma hai holebira. I̱ Anduane Homogo Bibahende Haru Haame Ho Haga kogo i̱na bi o ledogoniore.   
\p
\v 9 I̱na í̠ mo ko haiore haya lalu te ogoni dindi bibahende í̠ni manda nabini ngaruha lo yogo larogola hale hararume gi howa mogo timbuni lalu holebira.  
\v 10 I̱na í̠hondo buleberogo hondowa hameigini tara tara dindi taraha karu dewaoreme mogolai holebira. I̱ninaga wai biagane ayu tibu yidogome í̠ mo ko howa dibidogola kini karume gi timbuniore howa mogo lolebira. Í̠ ko howa dindini ibira harengi kini karu tigua lo mitangi bialu inahondobi nde o biyadadagua buligo lalu gi holebira.   
\p
\v 11 Iyibi kini-o i̱ Anduane Homogo Bibahende Haru Haame Ho Haga kogo i̱na í̠hondo bi ogodagua laro. Babilono kini kagome í̠ baba wai bule ibulebira.  
\v 12 Ami agali kooreru dindi odagoniha howa ibalu í̠naga wali agali bibahende bo hilo wahai helolebero. Iyibi wali agaliru tínaga turu haga ngamiru bibahende mo ko hai helolebero.  
\v 13 Tínaga nogo bulumaga bu karu bibahende tini iba naga bedaruha nalu karia bo hilo wahai helolebero. Anidagua bidogola agalibi nogo bulumagabi ibaha pialu karia iba bedaru geme mo ganguluma bulene mbira naholebira.  
\v 14 Ani bidogola iba bibahende gagahe bayaleore lone berelo mo ema bia nahe berelolebero. Iba porarubi yaribu nabi hendore pialu pelo pelolebero. I̱ Anduane Homogo Bibahende Haru Haame Ho Haga kogo i̱na bi o ledogoniore.  
\v 15 I̱na í̠naga wali agali bibahende bo wahai halu í̠naga dindi ngaru bibahende mo ko hai helarogola ogoniha mbirale nawi wai labu dindi ngago de hondowa Iyibi wali agali tigua i̱ni Anduane Homogoore henedalo manda biai holeberemi.  
\v 16 I̱na bi ogoni laroru dindi tara tara ngaruha wali bedarume hale halu í̠ dara howa í̠naga dugu ogonidagua bia holebira. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lene.   
\s1 Wali agali homene dininiru pu hagagoha kagonaga bi lenego ogo  
\p
\v 17 Ina garabaya hemaria mali hombene (12) ogoninaga ege hombene (12) dege horo nguini (15) hayagola Anduane Homogohanda i̱hondo lalu,  
\v 18 Dindiali-o Iyibi wali agali dewaore daga labe nahe o bu karuninaga dugu bia habe. Ani bialu wali agali dindi tara tara hongohe ngaruha howa homayaru baba homene dininiru hagagoha ti mandagi hole pelo warape habe.  
\v 19 Iyibialiruhondo bi ogodagua labe. Tígua manda bu handalu kamiria tíni wali agali bu karu bolangua howa tí bayale duniniore kamabe tobaho kamibe. Wali agali mana ko bialu howa homayaru heba mandagi hole tí homene dininiru pu hagagoha abale daliape halu pudaba, labe.   
\p
\v 20 Dindiali-o ai Iyibi ami agali bu karu bo wahai holenaga wai biagane ayu tibu manda manda bu wia. Ti baragola agali maru waime bene homayaru baba mandagi hole pelo waha.  
\v 21 Ani pu kagola agali wai biagane haguane homene dininiru pu hagagoha abale pu hene biarume Iyibi wali agaliru ti biamogo biaga biaru ibirago de hondowa turu holebira. Tigua turu howa Iyibi agaliruhondo bi dalimu lalu, Agali mini kowi heneru tinaga waitigime bayagola homene dininiru hagagoha o íbu kagoni ndobe, lolebira.   
\p
\v 22 Asiria dindinaga ami agaliru bibahende waime benerunaga dinini ti homene dinini pu hagagoha pu hea.  
\v 23 Asiriali nahome howa wali agali tara tara bu hearu bibahende mo gi hai haga heneya. Ani heneyago ai ami agali uruni ti waime beneru tinaga dinini unuraoreha pu hea.   
\p
\v 24-25 Elama dindinaga ami agali waime benerunaga dinini ti dindi ogoniha dege pu hea. Ami agali uruni ti waitigi agalime bo waheneru tini homa nabi heangi tigua wali agali dewa mo gi haga heneya. Ani heneyago ai ti homalu agali \w dongone\w* podo mabu biagane mana wiago nabiaga heneru heba homene dininiru pu hagagoha pu hea.   
\p
\v 26 Mesege dindinaga ami agaliru Tubala dindinaga ami agalirubi ti waime benerunaga dinini pu hagagoha dege pu hea. Ami agali uruni ti nahome heangi tigua wali agali bu hearu mo gi haga heneya. Ti ani bialu henego ai ti dongone podo mabu biagane mana winigo nabiaga heneru heba homene dininiru pu hagagoha pu hea.  
\v 27 Agali maru ami agali uruni hora haga hayadaruni tigua ami agali uruni baya hangu hora ha nabi agali yagibano bu karu hora hagadagua yu hora haya. Tigua bamba agali tara henerume tinaga ami agali hora hagadagua naheneya. Bamba agali henerume tinaga agali haguaneru homaragola tinaga wai biagane ayu tibu ngago ibuni homaliha mo haguanda ho ngelalu humbibi tinaga tinginini dambi howa horo haga wini. Mesege hameigini Tubala hameiginila homa nabi heangi wali agali dewaore mo gi timbuni haga henegome libuha pani nolene wiaabo holebira.   
\p
\v 28 Iyibiali ti nde mo ko halu bo haealabaga birangi ami agali ti waime benerunaga dinini pu hagagoha dege pu holebira. Agali uruni ti dongone podo mabu biagane mana nabiaga heneru aria tibi nde waime bene.   
\p
\v 29 Idomo hameigininaga agali haguanerubi kinirubi bibahende homene dininiru pu hagagoha pu ha dege bia. Bamba Idomo hameiginiru ti wai biaga ami agali hongoheore henego ainde ti homalu ami agali dongone podo mabu biagane mana winigo nabiaga heneru heba homene dininiru pu hagagoha pu hea.   
\p
\v 30 Dindi abene uyurahayagi kini agali haga henerubi Saidono hameiginirubi ti dindi ogoniha dege pu hea. Bamba ti hongoheore heangi tigua wali agali tara tara bu hearu mo gi hai haga hene. Ani bialu haga henego áyu ti homalu ami agali maru waime bene biaru baba mandagi pu howa tini taga pani timbuni nalu hea. Agali homene uruni ti dongone podo mabu biagane mana winigo nabiaga dege hene. Uruni tibi wali agali maru homene dininiru pu hagagoha pu hene karu heba howa taga pani nalu hea.   
\p
\v 31 Iyibialinaga kini biago ibugua ibunaga ami agali waime bo wahenego hangu ndo ami agali maru waime beneru tibi homene dininiru pu hagagoha pu kago hondowa ibunaga bu miniha emene dungulo holebira. I̱ Anduane Homogo Bibahende Haru Haame Ho Haga kogo i̱na bi o ledogoniore.   
\p
\v 32 I̱nime mo heya hewagola Iyibi kini kagome wali agali hameigini tara tara padaru dewaore mo gi ho helaru. Anigo ai kinibi ibunaga ami agalirubi waitigime bo wahai haragola ti homalu homene dininiru pu hagagoha pu howa agali maru waime beneru heba mandagi holebira. Agali uruni bibahende ti dongone podo mabu biagane mana winigo nabiaga dege heneru aria pu hea. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lalu Esegielehanda lene.   
\c 33  
\s1 Anduane Homogohanda Esegiele ibu mamage helo dabenego ogo  
\r (Esegiele 3.16-21)  
\p
\v 1 Anduane Homogohanda i̱hondo bi ogodagua langiya.  
\v 2 Dindiali-o í̠na wali agalihondo mamage holenenaga mana ogobi nga lalu lamibe. I̱na dindi mbiraha howa waitigi baba wai bule ibilarogola hale howa tigua agali mamage helonaga dabo helaga.  
\v 3 Ai waitigi ibiragola agali mamage haga urunime mbelo biguli mbira wai ibira lalu pu lolebira.  
\v 4 Mbiralime mbelo biguli ogoni pularago hale halu ha do hole ibida pu nabi karia waitigime ibu bo wahayagua nde ibuninaga koyane.\x + \xo 33.4 \xt Har 9.19-21, Hi 11.7\x*  
\v 5 Ibu ibida nape donge ho hayagome homaya. Agali ogonime donge nahe biguli pulayago hale halu ibida pedale nde ibu nahomedale.  
\v 6 Anigo mamage ho haga kagome waitigi ibirago hondowa biguli pu nalayagua nde wali agali bibahende bo wahai holebira. Anidagua biyagua nde tini kagua biyagonaga pani homolene winigo homolebira. Ani bialu i̱naga deni howa agali mamage haga biago ibugua bia ko hayagome ibubi pani nolene wulebira.\x + \xo 33.6 \xt Ais 56.10-11, Ese 3.18, 18.20, 18.24\x*   
\p
\v 7 Anigo ai dindiali-o i̱na í̠ Isaraele wali agalirunaga mamage habelo dabo helarogoni. I̱na wali agalihondo bi hongohe mbira í̠hondo ala langerogo í̠na ti hale helo latagi habe.\x + \xo 33.7 \xt Yar 1.17, 26.2, Ese 3.17, Ab 5.20\x*  
\v 8 I̱na handalu koria agali mbirame ko mbira biyagonaga ibu homolebira laruyagua o biagohondo í̠na lalu, Bayale holene yu habelo mana ko bialu kegoni wahalu mini beregedabe, lalu ibu nalamiriyagua nde ibunaga ko ngago wiaabo kaore homolebira. Ani ngaore homayagua nde bia ko hagabi madane biagabi tene í̠ holebere laro.  
\v 9 Anigo agali ogoni í̠na lameregola ibu mini beregeda nabi howa homayagua nde ibuninaga koyane. Ibuni mana ko biyagome homolebira. Anidagua biyagua í̠ha bi dai bulene henge nawi howa í̠ homolene nawulebira, lalu lene.\x + \xo 33.9 \xt Ese 3.19-21, Ab 13.40-41, 13.46\x*   
\s1 Anduane Homogohanda mbirali mana ko biagaru homelo hame nalagago ogo  
\p
\v 10 Anduane Homogohanda i̱hondo lone lalu, Dindiali-o i̱naga bi ogo Isaraele wali agali karuhondo tígua bi ogodagua laramili lalu lamibe. Tígua lalu, Iname ko birimagome bu miniha genda timbuni ho halu inanaga tingini obiore kamagoni. Ai ina agua bialu bayale holeberemadabe, lalu laramiligoni labe.  
\v 11 Isaraele wali agaliruhondo bi ogodagua lamibe. I̱ Anduane Homogo Bibahende Haru Haame Ho Haga Ngode Datagaliwabe haluhe heneneore kogobi agali mana ko biaga karuni aria mbira homayagua i̱ turu naharuli. Agali ogoni ibu mana ko ngaruha handa tara ho howa homa nabi bayale helogo turu haruli. Ai Isaraelealiru-o hale hadaba. Tígua ko beremiligo wahalu i̱ni koria dai bidaba. Tí aginaga tíni homolene hariga tai bialu kamibe.\x + \xo 33.11 \xt 2 Sml 14.14, Ese 18.23, 18.31, 2 Pi 3.9\x*   
\p
\v 12 Dindiali-o ai Isaraele wali agaliru bi ogo lamibe. Agali mbira ibu abale bayale henego mani ko biadai biyagua i̱na ibunaga mana bayale abale bialu hayago mitangi nabulebero. Ibu biamogo bulene mbira nawulebira. Ai agali mende ibu abale ko bialu henego mani ko biyaruni erembira mialu mana bayale biyagua ogoni ibu pani nelo namulebero. Anigo agali mbira bayale henego lone mana ko biyagua i̱na abale bayale biyaruni mitangibu dai bialu ibu bayale helo wa naholebero.  
\v 13 I̱na agali tigabi kagohondo í̠ bayale holebere laruyagua agali tigabi ogoni ibuni lo manda bialu i̱na mana tigabi birurunime i̱ni yopialu poleberogodago lowa mani mana ko ngaru lone biyagua nde ibugua mana bayale abale biyaru i̱ manda nabuleberoore. Ibugua mani mana ko bu aribia hayagua ibuni homolene wulebira.\x + \xo 33.13 \xt Ese 3.20, 18.24\x*  
\v 14 Ai i̱na agali ko biaga kagohondo í̠ homolebere laruyagua agali o biagome mana ko bialu henego wahalu mini beregedalu bayale biadai biyagua nde  
\v 15 ibu nahomolebira. Ibugua mbirale mbira dano hole lowa mendealinaga mo yinibi mbirale mo page binirubi lone yadai bialu i̱naga mana ngago baya hangu talialu biyaguabi mana ko ngaru wahayaguabi ogoni ibu nahomolebira.  
\v 16 Ibugua kagua bialu hayaruni i̱na domo waholebero. Ani bidogola mani ibunime mana tigabi biyagome yopialu nahome bayale holebira.   
\p
\v 17 Anigo ai dindiali-o í̠ damene bu karunime lalu, Anduane Homogo ibugua mana lehe ko biaga ka lagago ai ani ndoyago. Isaraele wali agali tínime bia ko haga kami.  
\v 18 Agali mbirame ala mana tigabi buwa mani mana ko bialu hayagua nde ibuni homolene wulebira.  
\v 19 Ani buwa agali mana ko biaga mbirame mini beregedalu mana tigabi bayale ngaru bialu hayagua ibu bayale holebira.  
\v 20 Anigo tí Isaraele wali agalirume lalu, Anduane Homogohanda mana birago lehe bira laramiligo ai hale haramine. Mani tínime mana bialu harimirunaga manda buwa i̱na tí dabaki buleorebero, lalu Anduane Homogohanda lene.   
\s1 Yarusaleme bo gialo wahaya layane hale henego ogo.  
\p
\v 21 Mali homberiani (12) ina garabaya biabe bialu henego ai mali hombeanegonaga ege pini hayagola ege ogoninaga horo dauningi agali mbira i̱ hewaria ibuwa lalu, Yarusalemeore bo gialabagabu wahaya, lalu langiya. Waitigirume ibuwa Yarusaleme bo gialo wahalu hea handala agali ogoni ibu i̱ langule pora bialu ibida ibiniya.\x + \xo 33.21 \xt 2 Kin 25.3-10, Yar 39.2-8, 52.4-14\x*  
\v 22 Ege pinigonaga horo mane layagola alendo Anduane Homogonaga hongo holene i̱ha karula hayuane handaru. Ani hondo hewaria horo mendengi egerebagiore agali ogoni i̱ hewaria anda ibiyagola Anduane Homogohanda i̱naga hége mo tiga biyagola bi bayale labehe haru.   
\s1 Isaraele wali agalime ko biniru ogo  
\p
\v 23 Anduane Homogohanda i̱hondo ogodagua laya.  
\v 24 Dindiali-o Isaraele wali agalirunaga tano wiaru bibahendeore bo gialabaga biaiore hayago ai wali agali uruniha bu karume bi ogodagua lagaya. Abarahama ibu agali mbiraoreli howa dindi timbuni ogoni ibu karulai hene. Ai áyu ogoni ina wali agali dewaore bu kamago nde heneneore dindi ogoni bibahende inanaga wilo nginioreda, laga ka.   
\p
\v 25 Ti ani lalu kago í̠na tihondo bi ogo lamibelo hameledo. Anduane Homogo Bibahende Haru Haame Ho Haga kogome bi ogodagua laro. Tígua mana ko wiaru dewaore bialu nogo egaru nole bo dawalu howa darama pelo wa naharamili. Ani bialu mbirale gime wabiniruhondo bi pupu wialubi agali homelo bo wahalubi haramili. Anigo tígua agua bialu dindi ogo tí karulolene mitangi bu kamibe.  
\v 26 Tí wai hangu bialubi mana ko ngubi ngaru dege bialubi haga kamigoni. Tí damene one bedarubi kayu yalu beremiligo ai agua bialu tígua dindi ogoni karulo holeberemibe. Tígua nakarulo holeberemiore ndobe, laya.   
\p
\v 27 Ani lowa lalu, I̱ Anduane Homogo Bibahende Haru Haame Ho Haga Ngode Datagaliwabe haluhe heneneore kogobi tínaga waitigi agalirume tano bo gialobagabu wahene biaruha wali agali bu karu bo hilo wahai hole ibulebira. Wali agali maru yu wahene tanoha ndo tagiraha karu ema bialu piaga gabua karume bo nai halu maru ibida puwa egeanda ngaruha ha do haga bidaria warago koore ngarume balu homelai holebira.  
\v 28 Aniore bidagola dindi uruniha mbirali mbira naheore ngelalu dindi ogoni mo koore holebero. Isaraele wali agali tí hongoheore howa mine hagago ai tínaga hongo ogoni maro bilolebero. Aniore bidogola Isaraele dindini hari nene ngaruha irabu teha polene gi timbuni tagira ibilarogola wali agalime uruniha lone ibaga bibe nahe holebira.  
\v 29 Tigua mana ko ngubi wiaru hangu bialu hayagonaga i̱na pani mialu tinaga dindi ogoni mbirali nahe labu dindiore ngelarogola ogoningi tigua i̱ Anduane Homogoore henedane manda biaiore holebira, laya lalu Esegielehanda lene.   
\s1 Anduane Homogonaga bi mana \w latagi\w* haga heagome bi layagola wali agalirume hale nahe henego ogo  
\p
\v 30 Anduane Homogo ibugua i̱hondo lalu, Dindiali-o í̠ damenerume tano biagonaga paberuhabi tini andaga haraba ngaruhabi lola howa tini degedege lagalaga bialu í̠ mitangi bialu lalu, Iname bi mana \w latagi\w* haga agali biago karia puwa Anduane Homogohanda áyu bi agi layadabe hale hole ma, laga ka.\fig Wali agali tano biagonaga paberuhabi tini andaga haraba ngaruhabi lola howa tini dege dege laga bialu hene.|src="HK 15a.tif" size="2" ref="(33.30)" \fig*  
\v 31 Ani lowa wali agali uruni tigua í̠naga bi hale hole íbu ngoai haga bialu howa galone manda bule ndo bame haleme hale hangu holebira. Tigua í̠ bi mana larego talialu nabiaga. Tinaga ne hambume mo turu holene bi lalu tinaga bu miniha muni dewa yu holeneru dege manda biaga.  
\v 32 Í̠na bi larego dege agalime ga̱wa̱ hiliyularu laragola baya hangu ema nabi biruwa haleho wiagadaguabi agalime wandari lawule iba gana bayale laragola hale hagadaguabi hale haga. Hale howa tigua bi ogoni emeneorebi talialu bia nabiagaore ka.  
\v 33 Anigo mani bi larego heneneore tagira piai harago hondowa bi o larigoni mana heneneore i̱ninaga bi wiago lenedane hondolebira, lalu Anduane Homogohanda laya lene.\x + \xo 33.33 \xt 1 Sml 3.20, Ese 2.5\x*   
\c 34  
\s1 Anduane Homogohanda Isaraele dindiha haru haga hearu manani helenego ogo  
\p
\v 1 Anduane Homogo ibugua i̱hondo ogodagua laya.  
\v 2 Dindiali-o í̠na Isaraele wali agali haru haga karu manani haru pu helowa mbiwia halu ogodagua labe. Isaraele wali agali haru hagaru-o i̱ Anduane Homogo Bibahende Haru Haame Ho Haga kogome tíhondo bi larogo hale hadaba. Tíha mo ko holene timbuniore wulebira. Tí nogo sibi haru haga ale howa Isaraele wali agali ti sibi ale karu tígua baya hangu tiga handalu biamogo nabi howa tíni hangu mitangi bialu harimigoni.  
\v 3 Tígua sibi andu iba nalu sibi irinime aga wabini ngarubi bialu sibi bayale habatigi karu balu naga kami. Ani bialu howa tígua sibi uruni baya hangu handayaho ha nabiaga kamigoni.  
\v 4 Tígua sibi hongo nahe karu biamogo nabiagaore kamigoni. Tígua sibi warago bo ngaru biamogo bialu dere bu karu marasini ha̱i̱ nahaga howabi mbira pu ereba hayago taya bima ibaga bialu haru dai nabiaga tí kamigoni ndobe. Tígua tínaga hongome sibi tandaga nelo balu holene dege manda biagaya.  
\v 5 Sibi uruni tinaga haru haga nahedagola ti giligala lalu pugupugu bidaria mbirale ema bialu piaga gabua karume balu nai haga.\x + \xo 34.5 \xt Dag 27.17, 1 Kin 22.17, 2 Bit 18.16, Ais 56.9, Yar 12.9, Md 9.36, Mg 6.24\x*  
\v 6 Anigo i̱naga sibiru ti pialu hari wiaruha pu wandialu dindi bibahende wiaruha purogo layagola agalime sibi dara halu hai bulenebi handa walia halu haru dai bulenebi mbirali naheya.   
\p
\v 7 Haru haga agali kamiru-o i̱na tíhondo bi o langerogo hale hadaba.  
\v 8 Anduane Homogo i̱ Ngode Datagaliwabe haluhe heneneore kogonibi bi larogo hale haramine. Heneneore i̱naga sibi bu karuni tinaga haru haga mbira naheore howa mbirale ema bialu piaga gabua karume balu nai hayagoni. Ai agali maru i̱naga sibiru haru helo dabo helarurunime sibi maru pu gabua hayaru handa walia nahaya. Irane tini hangu mitangi bialu sibiru haru nahe wahayagome.  
\v 9 Anidagua birimidago ai haru haga kamiru-o i̱na bi larogo haleore hadaba.  
\v 10 Hale naharimiyagua Anduane Homogo Bibahende Haru Haame Ho Haga i̱ni kogome larogo ti baba áyu waitigi ho kogoni. Ani howa i̱naga sibiru i̱ni kogoha haru dai bulebero. Ani buwa i̱na tíhondo i̱naga sibi haru hagane harimigo nahe wahalu pudaba lolebero. Ani larogola tígua i̱naga sibiru bo nolene mbira naholebira, lalu Anduane Homogohanda lene.   
\s1 Anduane Homogo ibuni nogo sibi haru haga tigabi bayaleore kago ogo  
\p
\v 11 Ani lowa lalu, Anduane Homogo Bibahende Haru Haame Ho Haga kogo i̱na ogodagua laro. I̱nime nogo sibi pu ereba hayadaru taya bialu handa walia howa lone haru dai buwa baya hangu handayaho holebero.  
\v 12 Sibi haru haga agalime ginu hagua timbuni wialu aruma harangibi sibi pu ereba hayadaru taya dege bialu haru dai biagadagua i̱na i̱naga sibi dewa pialu ho giligalalo hagahaga bidaru haru dai bulebero.\x + \xo 34.12 \xt Ais 40.11, Ese 30.3, Yol 2.2\x* \fig Sibi haru haga agalime ginu hagua timbuni wialu aruma harangibi sibi pu ereba hayadaru taya dege bialu haru dai biagadagua i̱na i̱naga sibi dewa pialu ho giligalalo hagahaga bidaru haru dai bulebero.|src="Lear 076.tif" size="2" ref="(34.12)" \fig*  
\v 13 Ti puwa dindi tara ngaruha hagahaga bidago i̱nime damu pialu tini dalu Isaraele dindiha haru dai bulebero. Ani berogola tini daluni howa dindi bayale iba angeange ngaruhabi hari barebare ngaruhabi turu hagabu haabo holebira.\x + \xo 34.13 \xt Ais 65.9-10, Yar 23.3, Ese 28.25\x*  
\v 14 Ani howa Isaraele dindiha hari barebarebi dindi ulinibi tani bayale andaho karu nalu holebira.\x + \xo 34.14 \xt Iba 23.2, Yar 33.12\x*  
\v 15 Ani helowa i̱naga sibi haru haga i̱niore holebero. Ti ha̱lo berelonaga henge bayale ngaruha haru polebero. I̱ Anduane Homogo Bibahende Haru Haame Ho Haga kogo i̱nime bi o ledogoniore.   
\p
\v 16 Nogo sibi maru pu ereba hayago i̱nime taya bima pialu handa walia howa haru dai bulebero. Maru tinaga tinginini dereme bogo pailo waheneyaguabi uruni i̱nime marasini ha̱i̱ halu hubua bulebero. Maru warago bo wiaguabi nde i̱nime mo dabi holebero. Anigo ai sibi timbuni maru hongoheni habahe karu i̱na bolebero. Irane i̱ sibi haru haga tigabi howa mana biaga ngadagua ani bulebero.\x + \xo 34.16 \xt Mai 4.6, Md 18.11, Mg 2.17, Lg 5.32\x*   
\p
\v 17 Ai i̱naga sibiru-o i̱ Anduane Homogo Bibahende Haru Haame Ho Haga kogome tíhondo bi ogodagua laro. Tígua mana beremigo ko bayalebi i̱na hangu hangu dabolebero. Dabalu talebuki buwa nogo meme tí mendehayagi helalu nogo sibi tí mendehayagi helolebero.  
\v 18 Tí marume tani bayale karu tíni nalu tombe ho howa maru karu nanelonaga hengedo hole beremiligo irane aginagabe. Tígua iba bayale gagahe bedaru tíni nalu mani ibaha dalipe howa iba bayale gagahe bedago mo ganguluma bia haga beramiligo aginagabe.  
\v 19 Ai i̱naga sibi maru karume tígua tani nalu hengedo waharimigo nalu iba tí nowa mo ganguluma bia haramigobi naga ka. Tígua mana urunidagua bialu kamiruni liahe beramigoni.   
\p
\v 20 Ani bialu kamigodago ai Anduane Homogo Bibahende Haru Haame Ho Haga kogo i̱na sibi hongohe timbuni habahe kamirubi sibi hongo nahe kamirubi heba talebuki buwa mana tínime beremigoria howa dabaki holebero.  
\v 21 Ai sibi hongohe kamiru tígua sibi hongo nahe karu amu dindi gibuniha hengeda amu ho helowa sibi maru karu heba mandagi henego nahelonaga waratagi haga kami.  
\v 22 Ani birimigoyu i̱na sibi uruni i̱ni kogoha haru dai bulebero. Ani berogola mbiralime ti lone mo ko naholebiraore. I̱na i̱naga sibi memeru ani helowa mana tinime bialu kagoria ko bayalebi talebuki holebero. Tale bialu bayale karu ti mendehayagi helalu ko karu ti mendehayagi helolebero.  
\v 23 Ani helowa i̱naga biabe bia haga agali Debidi aguanene mbira dabowa i̱naga sibi uruni baya hangu handayaho helo dabo helolebero.\x + \xo 34.23 \xt Mo 7.17\x*  
\v 24 Ani helowa Anduane Homogo i̱ni tinaga Ngode Datagaliwabe holebero. Ani kogola Debidi aguanene ogoni ibu tinaga handame howa haru haga kini holebira. Anduane Homogo i̱nime bi ogoni lo werogoni.\x + \xo 34.24 \xt Ese 37.24\x*  
\v 25 Ani bialu ti bayale helonaga habo nalolene bi hongohe ti baba lo ngelolebero. Ani buwa i̱na ema bialu piaga gabua i̱naga sibi bo naga karu ti dindi ogoniha nahelo bo taliatagi hai holebero. Ani berogola dindi koore wali agali habe nahe irabu tiagi ko wiyaruni i̱naga sibi uruni ti dindi ogoni bu hinu bayaleore howa irabu urunihabi bu holebira.\x + \xo 34.25 \xt Ais 11.6-9, Yar 23.6, Hos 2.18\x*   
\p
\v 26 Ani buwa i̱na ti mo bayale hole i̱naga hari loma bia hene biagonaga ni uliuli wia banga bidarubi bibahende ti mo bayale hai helolebero. Iba dalu ibirangi dindi uruniha iba dalu dewa ibilalu dindi bayale helo mo gomba holebero.  
\v 27 Ira lini daga karume dewaore dolebira. Tinaga mabuha tomo dewaore anda holebira. I̱naga wali agaliru garabaya biabe ale dindi taraha bialu hayaru i̱nime golalu haru dai biai harogola tininaga dindi henene wiyagoha dai buwa turu timbuni ho holebira. Ani daibu hai kagola tigua i̱ni Anduane Homogoore henedane manda biai holebira.  
\v 28 Ani kagola dindi tarali i̱ mitangi nabiaga karume ti lone mo ko halu ba nabulebira. Mbirale ema bialu piaga gabua karu tibi lone naibulebira. Tinaga waitigi karume ti mo gi nahe bayaleore holebira.  
\v 29 I̱na tinaga dindi ngaru mo gumbila harogola dindi bene bere bayale howa tomo bayale dewa anda haga bulebira. Tinaga dindini hina gari lone napolebira. Wali agali dindi taraha karume tomo dewa bu payabu ngago hondowa lone mege nabulebira.  
\v 30 Ani berogola Isaraele wali agali karume Anduane Homogo i̱ni heneneore ti baba howa biamogo bialu henedane handalu ti i̱naga wali agaliore kago manda biai holebira. Anduane Homogo Bibahende Haru Haame Ho Haga kogo i̱na bi ogoni larogoni.\x + \xo 34.30 \xt Ese 34.24, 37.27\x*   
\p
\v 31 I̱naga wali agaliru-o tí sibi ale howa tí tomo nalu halimulo karulape ngiaabo haruli. Tí i̱naga wali agaliore kamigoni. I̱ nde tínaga Ngode Datagaliwabe kogoni, lalu Anduane Homogo Bibahende Haru Haame Ho Haga kagome bi ogoni lene.\x + \xo 34.31 \xt Iba 100.3, Yo 10.11\x*   
\c 35  
\s1 Anduane Homogohanda Idomo wali agali pani mulebero lenego ogo  
\p
\v 1 Anduane Homogohanda i̱hondo lalu,\x + \xo 35.1 \xt Ais 34.5-17, 63.1-6, Yar 49.7-22, Ese 25.12-14, Amo 1.11-12, Oba 1-14, Mal 1.2-5\x*  
\v 2 Dindiali-o í̠na Idomo dindiha handa amu howa, Í̠ha mo ko holene wulebira, lalu lamibe.  
\v 3 I̱ Anduane Homogo Bibahende Haru Haame Ho Haga kogo i̱na bi ogo Idomohondo laro. Idomo dindiha hari wedemiru tí waitigi i̱ kogoni. I̱na tí pani ngialu dindi labu hangu ngelolebero.  
\v 4 Tínaga tano ngamirubi bo haealabaga bialu tínaga dindibi labu hangu ibira holebira. Ogonibi ngagola tígua i̱ni Anduane Homogoore henedalo manda biai holeberemi.   
\p
\v 5 Bamba howa Idomo wali agali tígua Isaraele wali agali baba waitigi ho harimi. Ani hemigola Isaraelealime ko biyarunaga pani nolene winingi tígua Isaraele waitigiru biamogo bialu Isaraeleali baba wai bialu harimigoni.  
\v 6 Anidagua bialu harimigonaga i̱ Anduane Homogo Bibahende Haru Haame Ho Haga howa Ngode Datagaliwabe haluhe henemane kogobi i̱na bi ogodagua laro. I̱na tí waitigime bo wahai helo ibilarogola tí mbirago yo pialu napoleberemiore. Tígua waitigiru homelo bo wahole gi nahe bo wahaga bialu haga harimigo ainde waitigime tíni homalimulo bo wahole gi nahe howa bo waholebira.  
\v 7 I̱na Idomo dindi bo haealabaga bialu labu hangu ngelalu wali agali Idomoha puíbu biraru bibahendebi bo wahaiore holebero.  
\v 8 I̱na Idomo wali agali waime bo wahenerunaga tingini bu ngarume hari karu dambi hai halu dindi ulini ngaruhabi homene tingini wu to̱lai helolebero.  
\v 9 I̱na tínaga dindi ngagoria mbirale mbira nahelo bo labu hai harogola dindi ogoniha wali agali mbira lone naholebiraore. Anidagua berogola tígua i̱ni Anduane Homogo henene henedalo manda biai holeberemi.   
\p
\v 10 I̱ Anduane Homogo kogo i̱na Isaraele wali agaliru Yuda wali agalirubi tinaga Ngode Datagaliwabe howa ti heba haabo haga kogoni. Ani kogola tígua hameigini kira urunibi tinaga dindibi karulami̱ya larimi.  
\v 11 Anidagua larimigo ainde i̱ Anduane Homogo Bibahende Haru Haame Ho Haga howa Ngode Datagaliwabe haluhe henemane kogobi i̱na laro. Tígua i̱naga Isaraele wali agali karuhondo keba howa henge lalu harimigobi handabe manga timbuniho harimigobi ogoni birimigonaga pani nalimulo ngulebero. I̱na tíhondo pani ogoni mo ngerogo de hondowa Isaraele wali agalime tinihondo ko birimirunaga pani ngerogo manda biai holebira.  
\v 12 Anidagua berogola Idomo wali agali tígua Isaraele dindi ngagonaga bi ko lalu, Isaraele dindiha hari wedaru mo ko hai hayago ai iname dindi ogoni karulo hami̱ya, larimigo Anduane Homogo i̱nime hale haru.  
\v 13 Idomo tígua mine howa i̱hondo mege bialu bi ko lalu harimigo i̱ manda bu kogoni.   
\p
\v 14 I̱ Anduane Homogo Bibahende Haru Haame Ho Haga kogo i̱naore bi ogo laro, Wali agali dindi bibahende bu karume í̠ hondowa turu helonaga i̱na í̠ mo ko hai holebero.  
\v 15 Tígua Isaraele wali agali ti i̱ninaga wali agaliore heago waitigime mo ko halu bo haealabaga biyagola de hondowa turu timbuni harimi. Anidagua birimigonaga i̱nabi nde Idomo wali agali tíniha mo ko holene ogonibi dege anda ibilolebero. Tínaga Hari Sia kagobi dindi bibahende ngamigobi mo ko halu labu wiai holebira. Anidagua birago de hondowa Isaraele wali agali tigua i̱ni Anduane Homogo henene henedalo manda bulebira, lalu Anduane Homogohanda laya lene.   
\c 36  
\s1 Anduane Homogo ibunime Isaraele wali agali mo bayale holebero lenego ogo  
\p
\v 1 Anduane Homogohanda i̱hondo lalu, Dindiali-o í̠na Isaraele dindiha hari wedaruhondo i̱na bi o larogo hale helo lamibe.  
\v 2 I̱ Anduane Homogo Bibahende Haru Haame Ho Haga kogo i̱na bi ogodagua laro. Isaraele wali agali tí waitigi bu karume tí mege bialu lalu, Bayaleoredago ai hari Isaraele dindiha karuni inanaga kagoni ndobe, laga bialu kagoni.   
\p
\v 3 Anidagua lalu karume i̱niore Anduane Homogo Bibahende Haru Haame Ho Haga kogo i̱na bi o larogo í̠na mbiwia halu latagi habe. Agali waitigi dindi tara tara wiaruha howa ibalu tigua Isaraele baba wai bialu dindi bibahende mo ko halu bo labu halu dindi karulai howa ti mege bialu bi ko lalu haya.  
\v 4 Anidagua lalu hayago ainde Isaraele dindiha hari wedemirubi dindi ulini bugubugu ngamirubi iba emene emene pugupugu bialu poramirubi tígua i̱ Anduane Homogo Bibahende Haru Haame Ho Haga kogo i̱na bi o larogo hale halimu. Isaraele dindiha tano ngamirubi dindi maru wima pedemirubi waitigime balu mo labu hai hene ngamiru tíguabi i̱na bi o larogo hale halimu. Hameigini dindi kawareni palia para para biarume tí mo ko halu bo labu ho ngelowa mege bialu haya.  
\v 5 Ani lalu hayagonaga i̱ Anduane Homogo Bibahende Haru Haame Ho Haga kogo i̱na Idomo hameigini karu bababi hameigini dindi maruha karu bababi keba timbuni ho ko. Tigua i̱ mo nagalone halu i̱naga dindi wiwagoha mo ngubia halu i̱naga dindi ngogoha nogo bulumaga sibiru hinalu holene dataniru bayale andaho kago hondowa karulai haya.   
\p
\v 6 Anidagua biyago ai dindiali-o í̠na mbiwia halu i̱naga bi ogodagua latagi habe. Isaraele dindiha hari wedemirubi dindi ulini bugubugu ngamirubi iba emene emene pugupugu bialu pedemirubi tígua i̱naga bi ogo hale halimu. Wali agali tara uruni tigua i̱naga dindi ngogo mebia howa i̱naga wali agali hondo oba halu mege biyagonaga i̱ Anduane Homogo Bibahende Haru Haame Ho Haga kogo i̱na tihondo keba timbuni ho kogoni.  
\v 7 Ani biyagonaga i̱ Anduane Homogo Bibahende Haru Haame Ho Haga kogo i̱na heneneore larogo hameigini uruni hengedape halu mo taga holebero.  
\v 8 Anigo ai Isaraele dindiha hari wedemiru tíha ira dewa andaho howa yuni mabialu lini dewaore dalu holeberemi. Emeneore howa i̱naga Isaraele wali agali ti tini dindiha hole lone dai bu harangi ira ogoninaga lini bayale dedaru do naga bialu holebira.  
\v 9 Hari wedemiru tíhayagi i̱ kogo i̱na tínaga dindi lone alialu eru hangalu helo handaya holebero.  
\v 10 I̱na Isaraele wali agali hameigini bibahende mo dewa howa Isaraele dindi í̠ha helai helolebero. Ani howa tigua í̠ha tano bo gialapaya bini ngaruni lone bia dai buwa karulai holebira.  
\v 11 Ani bialu Isaraele dindi í̠ha wali agalibi nogo tara tarabi mo dewa holebero. Ani berogola Isaraele dindinaga tano bibahendeni wali agali abale hagadagua ndo dewaore howa waneiginibi dewa holebira. Ani kamigola i̱na wali agali dindi ogoriani abale henedarume mana bayale bialu hayaru bolangua howa tí bayaleore bialu helolebero. Anidagua berogola tígua i̱ni Anduane Homogo henene henedalo manda biai holeberemi.\x + \xo 36.11 \xt Yar 31.27, Ese 35.9, 37.6, 37.13\x*  
\v 12 Ani bialu i̱naga Isaraele wali agali bu karu i̱naga dindi ngoruha helo ti haru daibulebero. Ani haru daibialu dindi ogoni bibahende Isaraele wali agali tinaga dindi wialu waneigini bu karu ti lone tomo garibi nale bayale helolebira.   
\p
\v 13 I̱ Anduane Homogo Bibahende Haru Haame Ho Haga kogo i̱na bi ogodagua laro, Wali agali bu karume lalu, Ina daluha dindi ngagome inanaga agali haguane karu bo ereba hai halu inanaga waneigini bu karubi bo wahai hagaya, laga ka.  
\v 14 Tigua ogonidagua lagagoyu ainde i̱na lalu áyu ogoni howa Isaraele dindi ngagome agali haguane karubi tinaga waneigini bu karubi mo ko naholebiraore. I̱ Anduane Homogo Bibahende Haru Haame Ho Haga kogo i̱na bi o ledogoniore.  
\v 15 Ai wali agali tara tara bu karume Isaraele dindi ngamiru hondowa oba halu mege bialu mo taga holene mbira nawulebira. Dindi o ngamiru tígua i̱naga wali agaliru lone mo ko halu mana ko ngagoha mo pila mbira holene nawulebira. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lalu Esegielehanda lene.   
\s1 Anduane Homogohanda Isaraele wali agali mo gahenge holebero lenego ogo  
\p
\v 16 Anduane Homogohanda i̱hondo ogodagua langialu lalu,  
\v 17 Dindiali-o Isaraele wali agali tini dindi ogoria heangi tigua mana ko ngubiore dodohe nabulene wiaru hangu biaabo halu hayagome dindi ogo mo ko hayagoni. I̱ninaga deni walime egengi ilili bu biruwa taga ho biragagobi ti hayagoni.  
\v 18 Tigua agali dewa homelo bo wahalubi mbirale gime wabini wiaruhondo bi pupu wialubi howa Isaraele dindi i̱naga deni mo dodo halu mo ko hayagoni. Ani biyagonaga i̱na tihondo keba timbuni howa pani miadai bialu minu barugoni.  
\v 19 Ani buwa tigua mana ko bialu hayagonaga i̱na tinaga dindi yu wahalu dindi taratara wiaruha purogo lelarugoni.  
\v 20 Isaraele wali agali ti dindi taratarani pugupugu biyagoha tigua mana ko bialu hayago hondowa wali agali taratara hearume i̱naga mini bayale tigabi mo dindiha halu hene. Tigua i̱ habane nabulene nagaloneore kagonilo manda buwa mo yo handalu lalu, Isaraele wali agali ti Anduane Homogonagaore karuni howa irane aginaga tinaga dindi andaru wahayadabe. Tinaga Anduane Homogo ibugua ti biamogo nabiyadabe, laga bialu hene.  
\v 21 I̱na hale halu hewaria dindi bibahende Isaraele wali agaliru pu heagoha wali agali hearume bi urunidagua lalu heago ai bi layaruni aleme i̱naga mini bayale tigabiorego tigua mo dindiha halu helaga binigo mitangi bialu i̱ genda yu harugoni.   
\p
\v 22 Anigo í̠na Isaraele wali agali bu karuhondo bi ogodagua lamibe. Anduane Homogo Bibahende Haru Haame Ho Haga kogo i̱nime bi ogodagua larogo bayuwa hale halimu. Isaraele wali agali tigua mana ko bialu kamigo hondowa wali agali taratara hearume i̱naga mini bayale tigabi mo nagalone halu kagoni. Ani bialu kago i̱na mbira bule ngogo Isaraele wali agali tí mitangi bialu ndo i̱naga mini bayale tigabi tígua mo dindiha harimigo i̱ni miniore ogoni mitangi bialu mo yaraga helonaga bulebero.  
\v 23 Ani berogome wali agali taratara uruni tihondo i̱naga mini bayale tigabiore kogo manda bilo walia holebero. Ani walia harogola tigua i̱naga mini ogoniore yaraga holebira. Isaraele wali agali tígua mana ko bialu i̱ mini mo dindiha halu mo nagalone harimigo mani i̱na mini bayale tigabibi biabe hongoheru berogobi hondowa wali agali taratara karume i̱ Anduane Homogoore henedalo manda bulebira. Ai bi ogoni Anduane Homogo Bibahende Haru Haame Ho Haga kogome larogoni.  
\v 24 I̱na tíhondo urudagua bulego tí dindi tarataraha ho giligalalo kamiruni tíninaga dindini halimulo haru dai biai holebero.\x + \xo 36.24 \xt Ais 43.5-6, Ese 34.13, 37.21\x*  
\v 25 Haru dai bu helowa i̱na iba gagaheoreme tí dodo mbira para nahe halimulo dodo doma holebero. Tígua mana ko ngubi ngaru bialu harimirubi mbirale gime wabiniruhondo bi pupu wialu harimirubi wahai howa i̱naga deni tí dodo mbira para nahe domeneore halimulo ani bu helolebero.  
\v 26 Ani buwa mini ala tawe mo wahai halu mini gahenge wia aribia howa helolebero. I̱na tínaga mini ege to̱le̱ giambehe ale ala winigo mo wahalu mini gahenge i̱na bia larodagua bilimulonaga wia aribia helolebero.\x + \xo 36.26 \xt Seg 7.12\x*  
\v 27 Ani buwa i̱naga Dinini tínaga bu miniha haabo helo helolebero. Ani helowa tígua i̱naga bi mana ngaru talialu bialu halimulo i̱na tínaga bu mini mo heya holebero.  
\v 28 Ani berogola dindi i̱na bamba tínaga mamaliruhondo mirugoria daibu holeberemi. Ani daibu kamigola i̱ tínaga Ngode Datagaliwabeore holebero. Tí nde i̱naga wali agaliore holeberemi.\x + \xo 36.28 \xt Ese 11.19-20\x*  
\v 29-30 Ani kamigola i̱na tí biamogo bialu kogola tígua mana ko dodohe ngaru lone nabuleberemi. Ani beremigola tínaga mabu ngamiruha tomo bayaleru anda hai helolebero. Ira lini daga ale karume dewaore dolebira. Ani dedagola tígua tomo nolene mbira tumagi nahe kamigo hondowa wali agali tara tara karume tí mege nabulebira.\x + \xo 36.29-30 \xt Ese 11.20, 37.14\x*  
\v 31 Ani howa tígua abale mana ko ngubi bialu harimiru mitangibu dai buwa, Iname koorene ko bialu harimadago, lalu tíni taga timbuniore halu holeberemi.  
\v 32 Ai Isaraele wali agaliru-o Anduane Homogo Bibahende Haru Haame Ho Haga kogome i̱na bi ogo larogo baya hangu hale hadaba. I̱na mbirale bigi bule ngogo tí biamogo bialu bayale halimulonaga ndo bulebero. Tínime ko bialu harimiru bibahende mitangi bialu taga timbuni halimulonaga bulebero, lalu lene.   
\p
\v 33 Anduane Homogo Bibahende Haru Haame Ho Haga kogo i̱nime bi ogodagua laro. I̱na tínaga ko birimigo domo waharogola tí bayale dodo nahe howa nde tínaga waitigirume abale tínaga mabu anda paberu bo gialo wahalu labu hayaru daibu howa lone biadai bilimulo helolebero.  
\v 34 Agali tara marume ibaga bialu howa handalu heria tínaga dindi embera ibai heneyane handayagoni. Anigo ai i̱na tínaga maburu lone hangadaba lolebero.  
\v 35 Ani berogola dindi tarali karume ogodagua lolebira. Abale dindi ogo ko embera labu hene wiyago ai nde áyu bayaleore Idene mabu ale hayada, lolebira. Abale tano uruni gialo bagabu wahene wiyago ai áyu Isaraele wali agali tinaga tano biaruni pabe hongoheore lone bu yu mabu biyada. Isaraele wali agali ti tano uruniha lone daibu hayada, lolebira.  
\v 36 Ai Isaraele wali agali tí tíninaga dindini daibu kamigo hondowa wali agali maru tí kamigoha mandagi hapara ho karume manda bialu Anduane Homogo i̱nime tano uruni bo gialo wahayago lone biadai bialu mabu embera labuore wiyaru lone hangadai biyada, lolebira. Anduane Homogo i̱nime aniore bule lo wirugo buleorebero, lene.   
\p
\v 37 Anduane Homogo Bibahende Haru Haame Ho Haga kogo i̱nime bi ogodagua laro. Ainde i̱naga Isaraele wali agalirume i̱hondo ina biamogo bia larimiyagua i̱na tínaga bi laramigo hale howa tínaga waneiginiru nogo sibi haradagua mo dewa ho helolebero.  
\v 38 Ani berogola nogo sibi ale dewaore halu horo i̱nime wiabagi helenengi Yarusalemeni i̱nihondo bo lomabu delole haru ibiraligobi tí holeberemi. Ani howa tínaga tano lone biadai bini biaruha wali agali dewaore palu to̱lolebira. Ai urunidagua heneneore tagira ibai haragola tígua Anduane Homogo i̱niore henedalo manda buleberemi, laya lalu Esegielehanda lene.   
\c 37  
\s1 Esegielehanda homa kuni gigialo wiaria hendenego ogo  
\p
\v 1 Anduane Homogo ibunaga hongo i̱ha karula howa ibu Dinini ibugua i̱ dindi ulini mbiraha homa kuni dewa bu wiaruha haru puwa helaya.  
\v 2 Ibugua i̱ dindi ulini ogoniha haru ibaga biyagola handalu hewaria homa kuni dewaore bu wiaria handaru. Agali kuni wiyadaruni bamba tawe gigialeoreyane de handarugoni.  
\v 3 Ani handalu hewagola Anduane Homogohanda i̱hondo bi ogodagua laya. Dindiali-o í̠na manda bialu keria agali kuni nai ngaruni lone agali hodai bibehebe be nabibehebe, lalu hale haya.  
\p Ani layagola nde i̱na ibuhondo ladai bialu lalu, Anduane Homogo Bibahende Haru Ho Haame Haga kego-o bi uruni larigo i̱ manda nabidogo í̠nime hangu mandabu kegoni ndobe, laru.   
\p
\v 4 Ani larugola Anduane Homogo ibugua i̱hondo ogodagua langiya. Ainde í̠na homa kuni o bu ngarunihondo mbiwia halu bi ogodagua lamia. Tihondo lalu, Anduane Homogonaga bi ogo hale hadaba.  
\v 5 Anduane Homogo Bibahende Haru Haame Ho Haga kogo i̱na bi ogo larogoni. I̱nime tíha buhe̱ pulaanda harogola tí lone wali agali déreore holeberemi.\x + \xo 37.5 \xt Iba 104.30\x*  
\v 6 Heneneore i̱na tínaga gungubunirubi tingininaga mbirinirubi helai howa dongoneme hadambi helolebero. Ani buwa tíha buhe̱ pulaanda halu tí dére ibagabu hai helolebero. Ani bidogola nde tígua i̱ Anduane Homogoore henedane manda buleberemi, lalu ani labe laya.   
\p
\v 7 Anduane Homogo ibugua labe layadagua laru. Ani lalu hewaore dege mbira ngilingele layuane hale haru. O layadagoni homa kuni bu wiyadarunime leneya. Ani hale howa handalu hewaria homa kuni bu wiyadaruni tini henedadagua hadai bigibigi bialu kirikaru lowa naina agali tingini howa wima pearia handaru.  
\v 8 Ani handalu dege hewaria kuni biarunaga gungubunirubi mbirinirubi hai howa dongoneme hadambi heleagola agaliore wima peagoyu ai buhe̱ dege nale wima pearia handaru.   
\p
\v 9 Ani handalu hewaria Anduane Homogohanda i̱hondo ogodagua laya. Dindiali-o í̠na i̱ninaga bi ogo puyabuhondo ogodagua lamia. I̱ Anduane Homogo Bibahendenaga Haru Haame Haga kogo i̱nime lalu, Puyabu í̠na bibahendeha howa pulame halu ibuwa agali bo wahene o ngaru lone heyu helonaga buhe̱ pulaanda ha, labe. Ani biragola ti lone dére halu ibagabu helo, laya.   
\p
\v 10 Ani layagola i̱na Anduane Homogohanda bi labe layago latagi harugola puyabu bibahendeha howa agali biaruha buhe̱ pulaanda hayagome agali biaru mo dére halu heyuwa naina heyu hama piya. Ai uruni ti dewali mandagi howa wai biaga ami agali haradagua biane handarugoni.\x + \xo 37.10 \xt Mo 11.11\x*   
\p
\v 11 Ani heagola Anduane Homogo ibugua i̱hondo ogodagua langiya. Ai dindiali-o Isaraele wali agali tí homa kuni gigiale urunibi howa tígua lalu, Inanaga kuni gabuho wahene kamagonidago ina lone bayale holene henge nawi kamago ainde pu ereba hene ina harimadagoni, lowa tínaga bi ogonibi lalu kamigoni.  
\v 12 Anigo Anduane Homogo Bibahende Haru Haame Ho Haga kogo i̱naga bi ogo Isaraele wali agaliruhondo mbiwia halu bi ogodagua latagi labe. Anduane Homogo i̱nime tí homaliha ngamiria dugu yalu tíninaga dindi tene biagoha haru dai bulebero.  
\v 13 Ai i̱nime tí homaliha ngamiria duguarogola i̱naga wali agali tígua Anduane Homogo i̱nioreda lowa manda buleberemi.  
\v 14 Ani bialu i̱naga Dinini tíha helarogola tínaga holene hadai bialu dére holeberemi. Ani kamigola i̱na tíninaga dindiha haru dai berogola bayaleore holeberemi. I̱na tí ani haru dai bu helarogola tígua i̱nime bulebero lalu lo wirugo heneneore biyada lalu manda buleberemi. I̱ Anduane Homogohanda bi ogonidagua larogoni, lene.\x + \xo 37.14 \xt Ese 36.27\x*   
\s1 Yudali Isaraelealibi ti mo mbiraore holebira lenego ogo  
\p
\v 15 Anduane Homogo ibugua i̱hondo lalu,  
\v 16 Dindiali-o í̠na kanogo mbira mo yalu ibuwa ogoriani bi ogo gili bibe. Yuda hameiginibi Isaraele hameigini maru Yuda dindini mandagi karubi, ogoni gili bibe. Ani bialu kanogo mende yalu ibuwa ogorianibi gii bialu, Yosebe igini Eberaimi hameiginibi Isaraele hameigini maru ti heba mandagi karubi, ogoni gili bibe, lalu laya.  
\v 17 Ai bi ogoni gili biai howa kanogo ngunigo laboni kanogo mbiraore ale helo mo gimbu bu yu habe.  
\v 18 Ani yu kegola í̠naga dameneru tigua hale halu, Manane ogoni aginaga yu kebe, layagua í̠na tihondo ogodagua lamibe.  
\v 19 Anduane Homogo Bibahende Haru Haame Ho Haga kogome i̱na Yosebenaga kanogobi Yudanaga kanogo ogola mo mbiraore hole yu holebero. Ani buwa i̱ninaga gime kanogo mo mbiraore howa yagadagua kirabali ogoni i̱naga giha yu holebero, ani laya labe.   
\p
\v 20 Dindiali-o í̠na kanogo ogonilabo kirabali wali agalime hendelo gime yu ibagabu habe.  
\v 21 Ani yu howa bi ogodagua lamibe. I̱ Anduane Homogo Bibahende Haru Haame Ho Haga kogome Isaraele wali agali dindi tara tara bibahende ngaruha pu giligalalo karuni mo mogo bialu tini dindini helo haru dai biai holebero, laya labe.\x + \xo 37.21 \xt Ese 36.24\x*  
\v 22 Ani haru dai berogola ti mo mbiraore halu damenebi mbiraore hangu howa ti Isaraele dindi hari ngaruha mandagi helo helolebero. Ani helalu tinaga haru haga kini mbiraore dege helo helolebero. Ani howa ti dindi kirani haru haga kini kira ala hayadagua naholebira.  
\v 23 Tigua mbirale gime wabini ngaruhondo bi pupu lone nawi wahalu mana ko ngubi bialu haga wiyarunibi wahai holebira. Anidagua biragome ti i̱naga deni dodo mbira lone para nahe bayale holebira. Tigua mana ko wiaru ala bialu hayaruni i̱na domo wahai halu mo bayale hai holebero. Ani berogola ti i̱naga wali agali halu i̱ni nde tinaga Ngode Datagaliwabe holebero.  
\v 24 Ani howa i̱naga biabe bia haga Debidinaga aguanene mbirame tinaga handame haga kini holebira. Ti mo mbiraore ho kagola agali mbiraore ogoni ibugua hangu ti haru holebira. Ani bialu ti mini bilinahe howa tigua i̱naga bi mana baya hangu talialu bialu holebira.\x + \xo 37.24 \xt Ese 34.24\x*  
\v 25 Ani bialu howa i̱na dindi bamba tinaga mamali ala henego i̱naga biabe bia haga Yagabahondo mirugoria dai buwa tibi tinaga waneigini aguanenerubi ogoniha haabo holebira. Ani kagola Debidinaga aguanene mbirame tinaga handame haga kini haaboore holebira.  
\v 26 Ani howa i̱na ti bayaleore haabo helonaga habo nalolene bi hongoheore mbira ti baba lo wulebero. I̱na tininaga dindini haru daibu helarogola ti palia timbu halu dewaore holebira. Ani kagola i̱naga anda ti karia dombeneha haaboore holebira.  
\v 27 I̱nibi ti haru mandagi howa ti i̱naga wali agali halu i̱ nde tinaga Ngode Datagaliwabe holebero.\x + \xo 37.27 \xt 2 Ko 6.16, Mo 21.3\x*  
\v 28 I̱na i̱naga anda Isaraele wali agaliru dombeneha kago hondowa wali agali dindi tarataraha karume Isaraele wali agali karu ti i̱ninagaore helayadalo manda bulebira, lalu Anduane Homogohanda laya lene.   
\c 38  
\s1 Anduane Homogohanda Kini Gogohondo bi lolene nga lenego ogo  
\p
\v 1 Anduane Homogohanda i̱hondo lalu,  
\v 2 Dindiali-o í̠na Magogo dindiha Gogo karia de handa amu habelo hameledo. Gogo ibu Mesege dindi Tubala dindilanaga kini timbuni ka. Í̠na Gogo ibu mo ko holene nga lalu bi latagi habe.\x + \xo 38.2 \xt Mo 20.8\x*  
\v 3 Ibuhondo bi ogodagua labe. Mesege hameigini Tubala hameigini kago labonaga kini timbuni dunini kego í̠na bi ogo hale habe. I̱ Anduane Homogo Bibahende Haru Haame Ho Haga kogo i̱na í̠la waitigi ho kogoni.  
\v 4 I̱na í̠ mo beregedalu í̠naga ne hanganeha wena hugume hende howa í̠naga ami agali heba gililo yu dai bulebero. Í̠naga ami agaliru dewaore karubi nogo hosirubi ami agali maru nogo hosini biralu piagaru ti aminaga agaru mo karulalu wai humbi yalu wai biagane ayu tiburu yu karubi tí bibahende gililo yu dai bulebero.\x + \xo 38.4 \xt Ais 43.17, Ese 39.2, Dan 11.40\x*  
\v 5 Pesiali amirubi Sudanali amirubi Libiali amirubi bibahende tigua ege manda karulalu humbiru yu howa í̠ heba mandagi holebira.  
\v 6 Ani bialu Gome dindinaga ami agali wai hongo howa biaga karubi Bede Togama dindi abene uyurahayagi tanonaga ami agali bu karubi í̠ heba dege holebira. Dindi tara taranaga ami agalirubi í̠ heba holebira.  
\v 7 Kini Gogo í̠ wai bule manda manda bu habe. Í̠naga ami agali í̠na haru haga bu karu tibi nde wai bule manda manda bu helo í̠na ti bayuwa handayaho habe.  
\v 8 Mali dewaore howa wai bu pole mo mogo bule manda manda bu habe. Mali dewaore pedagola dindi mbira bamba mo ko ho winigo ai áyu tinaga tano lone mo tiga bialu biadai buwa waitigiru gi holene ereba halu dungulo kago ti baba wai bu pobelo pu lolebero. Wali agali uruni ti dindi taraha garabaya pu henego áyu i̱na ti lone haru dai binigo ai Isaraele dindi hari bare bare ngaruha daibu heledogoni.  
\v 9 Kini Gogo í̠nibi í̠naga ami agali bu karubi ami agali maru dindi taraha howa haru íbu hene karubi tígua wali agali tinaga dindi dai bu karu baba wai bule poleberemi. Ani poramingi tí dewaore howa iba dalu timbuni puyabu heba ibagadagua ibalu dindi bibahende karulai halu ginu hagua aleme tinaga dindi ngago bibahende bu dambi hai holeberemi.   
\p
\v 10 I̱ Anduane Homogo Bibahende Haru Haame Ho Haga kogo i̱na Gogo í̠hondo bi ogo laro. Í̠na ti baba wai bule porengi í̠naga bu mini abaleore heyalu ohalu bulene mbira manda manda bulebere.  
\v 11 Wali agali uruni ti baba wai bulene mbira nahebe toba howa tiha mo ko holene mbira naanda ibulebirabe tobaho karia í̠na wai bule anda polebero, lo mitangi bulebere. Tinaga tano ngagoha mbirali ibuligonaga wai pabe bu mabu nabi kagoni manda bulebere.  
\v 12 Ani manda bialu í̠na wai bule anda puwa tinaga dabudabu bayale tara tara ngaru í̠ karulole manda bulebere. Wali agali uruni ti dindi taraha pu henego ai lone dai buwa tinaga tano lone biadai biai halu tinaga nogo sibi bulumagarubi mbirale bibahende bayale dameneru wua ka. Ani bialu tinaga dindi maru ngaru ti dege dombeneha nga.  
\v 13 Tígua dindi ogoni bole eberemingi hameigini maru Seba dindiha padarubi Dedana hameigini padarubi Sebena dindiha biyinaya biabe biaga bu karumebi tí eberemigo de hondowa tíhondo hale halu lalu, Í̠naga ami agali bu karu mo mogo bialu wai bule ibuwa tinaga mbirale ngaru karulai holeberemibe. Ngolo dewa ngarubi siliba ngarubi nogo bulumaga bu karubi mbirale maru tara tara ngarubi tígua mo yai holeberemibe. Anidagua bulenego bayaleoreda, lolebira.   
\p
\v 14 Ai dindiali-o í̠na Kini Gogohondo i̱naga bi ogodagua lamibelo hameledo. Kini Gogo í̠na bi ogo hale ha. Anduane Homogo Bibahende Haru Haame Ho Haga kogo i̱naga Isaraele wali agali ti tininaga dindiore ngagoria bayale kangi í̠na ogodaua manda bulebere.  
\v 15 Í̠na ami agali dewaore haru halu í̠naga dindi uyurahayagi wahalu tígua wai bule ibuleberemi. Ami agali uruni ti dindi tara tara ngaruha howa íbu hene karu bibahende nogo hosini biralu í̠ni heba mandagi ibuleberemi.  
\v 16 Tígua i̱naga Isaraele wali agali baba wai bule ibuleberemi. Eberemingi tí dewaore hari beraliba aleme dindi bibahendeha ho namulai kamiria ti hondolebira. Kini Gogo-o í̠na ani bibelo mo bia holeberogo irane hameigini tara tara dindi taraha padarume i̱naga mini tigabi mana bayaleoredane hondowa i̱ kogoniore manda bilo ani bulebero. Hamaro bulene horo kaware ngelowa mbirale uruni tagira ibulebira.  
\v 17 Bamba i̱naga biabe biahalu bi mana \w latagi\w* haga Isaraeleali bu hearume mani buleberogonaga mbiwia helo i̱na lamigi bialu lalu, Mani howa i̱na tínaga waitigi mbira haru halu ibulebero, laga bialu harugo waitigi ogoni Kini Gogo í̠ kegoni manda bialu larugoni. Ani birugola tigua mali dewaoreni biabe ogoni bialu howa bi latagi halu hene. Anduane Homogo Bibahende Haru Haame Ho Haga kogo i̱na bi o ledogoniore, laya lene.   
\s1 Anduane Homogohanda Kini Gogo pani mulebero lenego ogo  
\p
\v 18 I̱ Anduane Homogo Bibahende Haru Haame Ho Haga kogo i̱naore laro. Kini Gogo ibugua Isaraele baba wai bule ibirangi i̱na ibula keba timbuniore holebero.  
\v 19 I̱naga miniha keba timbuniore howa i̱na bi ogo laro. Horo ogoningi Isaraele dindi bibahendeni dumbirumbi bialu dindi ema biai holebira.  
\v 20 Anidagua biragola ibaha wena bedarubi ega bedarubi nogo tara tara emene timbuni bu karubi wali agali dindi bibahendeni karubi i̱ ogonibi kogonaga mogolalu durulo haiore holebira. Hari wedaru podai halu dindi ngaruni gaibu baga bialu mo ko haiore holebira. Tanonaga wai pabe egeme bu mabu bini hongohe karu podai halu dindini haealapaya biai holebira.  
\v 21 I̱na Kini Gogo mo gi halu ko holene dewa ibuha ibilolebero. I̱ Anduane Homogo Bibahende Haru Haame ho haga kogo i̱na bi ogodagua laro. I̱na Isaraele dindini hari bare bare ngaruha wai timbuni mo bia halu ibunaga ami agalirume tinaga ayu tibume tini degedege bagabaga bialu homelaga bulebira.  
\v 22 I̱na Gogo ibuha warago tara tara ibilalu waibi nde ibila dege bialu ibu pani nelo mulenaga ani bulebero. I̱na iba dalu dindiguni heba timbuniore ibilalu ege to̱le̱ do kundibiore hariha howa ibira helalu urunime ibubi ibunaga ami agali karubi agali dindi taraha howa ibu biamogo bule íbu karubi ti bibahende bo wahai holebero.  
\v 23 I̱na ogonidagua berogome hameigini tara tara dindi taraha karu bibahende i̱ni tinaga hongo haihe howa mini tigabi mana bayaleore biaga kogo mo walia holebero. Ani berogola tigua i̱ni Anduane Homogo henene ogobiore henedalo manda bulebira, lene.   
\c 39  
\s1 Anduane Homogohanda kini agali mini Gogo bope henego ogo  
\p
\v 1 Anduane Homogo i̱na Bibahende Haru Haame Ho Haga kogo laro, Dindiali-o í̠na Mesege dindibi Tubala dindibi ogonilabonaga Kini Gogo timbuni kago ibu mo ko holene nga hongo howa lalu ogodagua latagi habe. Kini Gogo-o i̱na í̠la waitigi ho kogoni.  
\v 2 I̱na í̠ mo beregedalu dindi abene unurahayagi handadai bilolebero. Ani bialu í̠ni dindi abene uyurahayagi ngago wahalu i̱na haru ibalu Isaraele dindiha hari bare bare ngaruha haru eberogola í̠na Isaraele baba wai bulebere.  
\v 3 Ani buwa i̱na í̠naga danda timu gi leha yu kegoni bo haealabaga bialu í̠naga yandare gi tigaha yu kegonibi bo haealabaga berogola dindini ibira hai holebira.  
\v 4 Í̠nibi í̠naga ami agali bu karubi ami agali maru í̠ biamogo biaga haru ebererubi tí bibahende Isaraele dindiha hari bare bare ngagoha homai holeberemi.  
\v 5 Homai haramigola tínaga tingini dindini bame wima pedaria ega bodo hariawe bedarumebi nogo gabua tara tara bu karumebi ibalu nai holebira. I̱ Anduane Homogo Bibahende Haru Haame Ho Haga kogo i̱na bi o ledogoniore.  
\v 6 Ani bialu i̱na Magogo dindi ngagohabi wali agali iba solowara bedago ange ange wai nabi palima pedagohabi ira hedope holebero. Anidagua berogola wali agali urunime i̱ni Anduane Homogo heneneore henedalo manda bulebira.  
\v 7 I̱naga Isaraele wali agali karume i̱naga mini baya buruguleorewi kogo manda biai helo i̱na mo walia holebero. Ani walia harogola tigua i̱naga mini ogoniore lone bope halu mo dindiha habe nahe holebira. Ani biragola hameigini tara tara dindi taraha karu tigua i̱ Anduane Homogo kogo i̱ore Isaraele wali agalinaga Ngode Datagaliwabe mini tigabi baya buruguleore kalo manda biai holebira.\x + \xo 39.7 \xt Ese 36.20, 38.16, 38.23\x*   
\p
\v 8 I̱ Anduane Homogo Bibahende Haru Haame Ho Haga kogome ogodagua laro. Mbirale mbira bulebira larugoni bibahende horo mbiru tagira ibai holebira.  
\v 9 Anidagua biragola wali agali Isaraele dindi tanoha haga karume tagira pialu waitigime wai biagane ale yu wahene dindini ngaru ira delolenaga mo ilu wima polebira. Tigua wai humbibi danda timurubi yandarerubi wai biaga kangorubi uruni bibahende ira delole mo wulebira. Tigua uruni delalu kane dege mali karia polebira.  
\v 10 Wali agali ti mali karia uruniha irabuhabi dangite ngaruhabi ira taya nabi howa ti ira karulape mbirale wai hamani mini biaruni delalu holebira. Ogonidagua bialu Isaraele wali agalinaga waitigi bu karume ala tininaga mbirale bayale wiaru mo pagebu yu piai henedagua ai Isaraele wali agali tigua nde waitiginaga mbirale wiaru mo page bialu ogoningi pani miadai bulebira. I̱ Anduane Homogo Bibahende Haru Haame Ho Haga kogo i̱na bi o ledogoniore.   
\s1 Kini Gogobi ibunaga ami agalirubi tinaga homali winigo ogo  
\p
\v 11 Anduane Homogo ibugua bi ogodagua lalu, Mbirale uruni tagira ibirangi i̱na Isaraele dindiha dindi hobane mbira Kini Gogo halu ibunaga ami agaliru hora hole tu wiabagi howa ngelolebero. Dindi podene ogoni mini Ibaga Biagarunaga Dindi Ulini laga winigo ogoni Homene Iba bereago ni ibiragohayagi dindi winigo ti ogoriani hora holebira. Hora howa mani dindi ogoninaga mini tara wialu Gogo Ami Agalirunaga Dindi Ulini laga wulebira.  
\v 12 Isaraeleali tigua ami agali uruni mo hora halu kane dege ege karia polebira. Tigua agali homene tingini uruni mo hora hai kagola dindi ogoni i̱naga deni dodo nahe bayale wulebira.  
\v 13 Isaraeleali bibahendeme biabe ogoni biamogomogo bulebira. I̱ wai wayali harugonaga wali agalime i̱naga mini yaraga harangi agali biabe ogoni bini karunaga minibi yaraga holebira. I̱ Anduane Homogo Bibahende Haru Haame Ho Haga kogo i̱na bi o ledogoniore.  
\v 14 Ege karia uruni piai kagola Isaraeleali tigua agali maru Isaraele dindi bibahendeha ibaga biai halu agali bo wahenedaru arianaga kuni maru ngabe hondole taya bima pelo dabo helolebira. Handa walia hayagua dindi ogoni i̱naga deni dodo nahe ngelonaga mo hora holebira.  
\v 15 Agali uruni tigua taya bima pialu karia homa kuni maru handa walia hayagua tigua nga lalu mo walia halu hada bu wima polebira. Agali marume maha ibalu kuni uruni mo yalu dai bialu dindi mini Gogo Ami Agalirunaga Dindi Ulini laga wiyagoha hora holebira.  
\v 16 Tigua agali waime bene uruninaga kuni wu gialo ngaru mo hora hai haragola Isaraele dindi i̱naga deni lone dodo nahe bayale wulebira. Mani tano timbuni mbira wulebirago ogoni mini Ami Agali Tidini Dewa laga wulebira.   
\p
\v 17 Anduane Homogo Bibahende Haru Haame Ho Haga kagome i̱hondo ogodagua laya. Dindiali-o í̠na ega biru ngarubi nogo gabua tara tara karubi urunime i̱na loma mbira bo ngerogo nelo ti bibahende olo mogo bibe. Loma ogoni timbuniore Isaraele dindiha hari nene bu ngaruha ega nogorume mbirinibi daramabi dewaore wulebirago nelo olo mogo bibe.\x + \xo 39.17 \xt Mo 19.17-18\x*  
\v 18 Ami agali dewaorenaga mbirinibi dindi bibahendenaga kini henerunaga daramabi dewaore nolebira. Ami agali urunibi kinirubi ti nogo sibi meme bulumaga habaheru bagadagua bo waholebira.  
\v 19 Ami agalirubi kinirubi uruni i̱na ti loma ale bo ngerogola nogo ega biru karume habane ngaru nalu no karula pialu nabe manga holebira. Uruninaga darama na dege bialu lulu iba naradagua bialu no luluyu haradagua bulebira.  
\v 20 I̱naga tomo nagane dagiani biruwa tigua nogo hosirunaga mbirini dewaore nalu agali nogo hosini biralu penerunaga mbirinibi nalu ami agali wai biaga hongo gibihe bu henerunaga mbirinibi nalu tiore tombeho holebira. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lene.   
\s1 Anduane Homogohanda Isaraele wali agali biamogo bulebero lenego ogo  
\p
\v 21 Anduane Homogohanda laabo halu lalu, I̱na mana tigabini howa i̱naga hongo kogome wali agali bibahendeoreme mana ko biyarunaga pani nelo mulebero. Ogonidagua berogo hondowa hameigini tara tara dindi taraha karume i̱ninaga mini yaraga holebira.  
\v 22 Ani berogola horo ogoningi howa Isaraele wali agali tigua i̱ni Anduane Homogo tinaga Ngode Datagaliwabeore henedalo manda bulebira.  
\v 23 Hameigini tara tara dindi taraha bu karu tigua Isaraele wali agalirume i̱naga bi mo wahalu mana ko dewaore biyarunaga i̱na ti dindi taraha garabaya pelarugo manda biai holebira. Ani buwa i̱na Isaraele wali agali erembira miwagola waitigi bu hearume ti baba wai bialu bope howa homelo bo wahai helo ibilarugoni.  
\v 24 Tigua mana ko dewa tara taraore bialu mana maru i̱naga deni dodohe wiaru bialu hayagobi pani nelo mialu ti erembira mirugoni.   
\p
\v 25 I̱ Anduane Homogo Bibahende Haru Haame Ho Haga kogo i̱na bi ogodagua laro. I̱na Yagabanaga aguanene Isaraele wali agali bu hearu pani nelo mialu harugo ai dara howa ti bayale helo biamogo bulebero. Anidagua berogola mbiralime i̱ mini lene kogo bope halu mo dindiha naholebira.  
\v 26 Isaraele wali agali ti tininaga dindi ngagoria dai buwa mini dungulo kangi ti kagoha mbiralime mo gi naholebira. Anidagua biragola tigua mana ko tinime ala bialu hayarunaga taga timbuni ho henego embeda holebira.  
\v 27 Hameigini tara tara dindi taraha karume i̱ mini tigabi baya burugule kogo hendelo i̱na i̱naga wali agali ti waitiginaga dindi tara ngagoha garabaya pu karia lone haru dai bialu tini dindioreni helolebero.  
\v 28 Ani berogola i̱naga wali agali Isaraele tigua i̱ni Anduane Homogo tínaga Ngode Datagaliwabeore henedalo manda bulebira. Tigua ani manda bulebirago irane i̱na ti dindi taraha garabaya bu yalu pelarugo mitangi bu dai bialu tini dindi winigoria helo lone haru daibu helarogonaga manda bulebira. Ti mbirali embedaho wahalu haru dai nabi ndo bibahendeore haru dai biai holebero.  
\v 29 Ani bialu i̱na Isaraele wali agalihondo i̱naga Dinini mialu lone ti erembira namulebero. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lalu Esegielehanda lene.   
\c 40  
\s1 Anduane Homogohanda de gandebaha Esegiele Yarusaleme haru penego ogo  
\p
\v 1 I̱na garabaya hemane dege mali pira kirani duria (25) hayagola mali ogoningi ege mbira ogonaga horo pini layagola Anduane Homogonaga hongo i̱ha karulayuane handaru. Waitigime Yarusaleme tano karulenedangi howa mali pira mbirani maria (14) pene. Horo ogoningiore Anduane Homogohanda i̱ haru halu piya.  
\v 2 De gandebaha Anduane Homogohanda i̱ Isaraele dindiha hari nene daligaore mbira wiagoria haru pu helaya. Hari nene ogoriani howa dindi abene unurahayagi de handa dai bialu hewaria anda dewa buhe tano ale mbira wiaria handaru.\x + \xo 40.2 \xt Mo 21.10\x*  
\v 3 Anduane Homogo ibugua anda buhe ogoniha i̱ kaware haru piyagola handalu hewaria agali mbira ege to̱le̱ boronosi handalehe ngiringarale hearia handaru. Agali ogoni ibu tanonaga ege to̱le̱ pabe heago panga harabani howa ibugua pu mbira mida magi manda biagane labolabome wabinibi mende mida magi manda biagane dege irame wabinibi ogonilabo yu hearia handaru.\x + \xo 40.3 \xt Mo 11.1, 21.15\x*   
\p
\v 4 Ani handalu hewaria agali ogoni ibugua i̱hondo langialu lalu, Dindiali-o i̱na í̠hondo mbirale mo walia haga bulenaga í̠ ogoria haru ibiru. Anigo áyu i̱na mbirale mo walia harogo bayuwa de hondowa bi larogobi hale howa mani í̠na Isaraele wali agali karume hale helo lamiai habe.   
\s1 Esegiele ibugua ege pabe haraba ni tagira ibiragohayagi wiago hendenego ogo  
\p
\v 5 I̱na Anduane Homogonaga anda heago de handalu hewaria anda ogoni ege pabe bu mabu bupe hearia de handaru. Ani hondo hewagola agali biago ibugua mbirale mida magi manda biagane irame wabini biago yamiya. Mida magi manda biagane ogoni lunaga magi mida tebirahe winiyago mo yalu agali biago ibugua ogonime Anduane Homogonaga anda ege pabe heagonaga mida magi manda biya. Ani manda buwa handalu hearia daliganaga mida magi tebira halu aranenaga mida magi tebira dege hayane handaru.\x + \xo 40.5 \xt 1 Kin 6.1-38, 2 Bit 3.1-9\x*  
\v 6 Ege pabe ogoninaga haraba tebira dege wia. Ani bialu haraba mbira mbira wiadagua hobane mbira mbira tamuha howa haraba wiagoha bu gimbu bigi biaria handaru. Mbirali ibu Anduane Homogonaga anda kagoha anda pole pialu hobane odaruni bolangua halu puwa nde Anduane Homogonaga andaha anda polebira. Agali biago ibu ege pabe heago ni tagira ibiragohayagi pialu haraba mbiragonaga egageria wiagoria irigi halu piya. Ani puwa ibugua haraba o wiagonaga arane yangale mida magi manda biaga yu hayagome manda bu handalu hearia mida magi tebira wia.  
\v 7 Haraba ogoriani anda pialu howa mendehayagi hobane tebira mendehabi hobane tebira dege agali mamage haga biarunaga heneyago handa edene bima peagola hanuni bugu hama bame wali agali puíbu bulene henge wia. Ani wiagola agali magi manda biaga biagome tamu hobane uruni mida magi handalu hearia bibahende mida tebira dege dege haya. Ani bialu anda tamu hobane mbira mbiranaga anda hái heago mida manda bialu hearia mida kirani tebone habehe dege wia. Hanuni bugu hama wali agali ti puíbu biaga wiadagoni wuyu pialu tamu hobane timbuni mbira wiagoha tagira pea. Ani wiagoria agali mbirale mida manda bu handaga biagome anda tamu hobane timbuni biagonaga haraba heagoria hái heago mida manda bu handalu hearia mida magi tebira dege wiane handaya.  
\v 8-9 Ani handalu anda tamuha hobane timbuni ogoniha anda puwa hobane ogoni mida manda bu handalu hearia arane timbuninaga magi mida maria wia. Hobane ogoninaga abene mbiraha haraba mbira wiago ogoni Anduane Homogonaga anda tamuhayagi anda polene haraba wia. Ani wiagola agali biagome puwa haraba wiaria ege pabe ogoni mida manda bu handalu hearia mida magi mbira hangu haya.  
\v 10 Tamu hobane harabani hayaru uruni agali mamage haga biarunaga hayaruni hobane waragaria howa tamuha mbiraore ogobi dege dege hea. Hanuni bugu hama wali agali puíbu biaga biago tubari wuwa mendehayagi hobane tebira mendehabi tebira dege hea. Ani bialu anda hobane hearu magi mbiraore ogobi dege dege hea.   
\p
\v 11 Ani biai halu agali biago ibugua ege pabe timbuni heagonaga haraba wiagoria puwa haraba mida magi manda biya. Haraba yangalenaga mida magi waragariani bolanguahe haya. Anigo ege pabe panga dugua amu nana biyagola emene hodai bialu mida magi duria hangu haya.  
\v 12 Ani bialu tamu hobane agali mamage haga biarunaga heagoha haneni ege pabe emene tubagi maru bu helea. Ani heagola agali biagome ogoninaga magi manda bialu hearia luninaga magi emene tubagi dege sendimida pira duria (50) halu aranebi nde sendimida pira duria (50) dege haya. Tamu hobanehabi nde lunagabi arane yangalenagabi mida magi tebira dege dege hea.  
\v 13 Ani bialu agali biagome mamage haga hearunaga tamu hobane heagonaga tibiha windo heagoria howa handama pialu tamu hobane mendehayagi windo heagoria puwa lunaga mida magi manda bu handaya. Ani handalu hearia anda ogoninaga mida magi homberiani (12) maru bolanguahe haya.  
\v 14 Ani bialu mani ibugua tamu hobane timbuni heago mida magi manda bule piya. Manda bialu hearia lunaga magi mida pira hea. Haraba erembirahayagi wiago wali agali mo ngoaiho haga Anduane Homogonaga anda heago tagirani wu mabu biago pole tagira piaga wia.  
\v 15 Anduane Homogonaga anda ege pabe heago bugu hama hayagonaga luni magi mida pira kirani duria (25) bibahende hea.  
\v 16 Ege pabe ogoninaga anda hobane bibahende heagoha windo mbira mbira wiai hea. Ani bialu hobane hoba amunana bini heagohabi windo wia dege bia. Ani bialu ayage ale yunihe kagonaga bigiya windo kawareni wabu wigi bia.   
\s1 Ege pabe bu yaanda heneha wali agali ngoai haga hama timbuni winigo ogo  
\p
\v 17 Agali biago ibugua i̱ haru halu ege pabe timbuni Anduane Homogonaga anda ege pabe bu yaanda hene wiagoha wali agali ngoaiho haga wiagoria haru piya. Ani piyagola handalu hewaria anda hobane pira tebira (30) bibahende wali agali ngoaiho haga wiagoria ege pabe timbuni heagoha bu gimbu bini hearia handaru. Ege pabe andane ogoniha wali agali ibaga bu holene wiagoria ege to̱le̱ dugu wima pea. Hariga poleneni ege to̱le̱ dugu wiyadagoni anda hobane emene biarunaga hanehayagi wia.  
\v 18 Ege pabeha bu gimbu bini biaru heagoria ani wima puabo hea. Hariga ibaga bu holene ege to̱le̱ dugu wima piyadagoni lunaga mida magi hobane tebira biaru tamuha bugu hama dombeni wiagobi dege wia. Wali agali mo ngoai ho holene hama timbuni ogoni dindiha ngelowa Anduane Homogonaga anda daligani hea.   
\p
\v 19 Wali agali ngoai hagane hama timbuni ogoni ege pabe mende Anduane Homogonaga anda bu mabu biago tagirahayagi wia. Ege pabe mende ogoni andaneha ngoai hagane hama mendebi wiago ogoni ibu emene daligani wia. Ege pabe mende ogoninaga abene ni tagira ibiragohayagi ege pabe biagonaga haraba mbira wia. Haraba wiago labo dombeneha hama wiago agali biagome mida magi manda biya. Ibugua ege pabe timbuni dunini heagonaga haraba wiagoria howa manda bialu mendehayagi haraba ege pabe emene tamuha heagonaga haraba wiagoria tagira pialu handalu hearia hama biago mida magi pira duria (50) wiaria handaya.   
\s1 Ege pabe haraba abene uyurahayagi wiago hendenego ogo  
\p
\v 20 Ani bialu agali biago ibu abene uyurahayagi puwa ege pabe timbuninaga haraba wiago mida magi manda biya.  
\v 21-22 Ani manda bu handalu hearia ogonibi mida magi tamuha tagirahabi bugu hama wali agali puíbu biaga biago agali mamage haga biarunaga tamu hobane mende mendehabi tebira dege dege hea. Uruni magi mbiraore abale ni tagira ibiragohayagi ege pabe dunini heagonaga ege pabe panga heagobi tamu hobane hearubi mida magi ogobi dege dege hearia hendene. Uruninaga magi lunaga mida pira kirani duria (25) hea arane yangalenaga magi mida homberiani (12) emene bolanguahe handaya. Anda polenenaga haraba egageria ge halu iradali bulene karia wia.  
\v 23 Abene ogoniha dege Anduane Homogonaga anda heagoria ege pabe panga mende dugu wiyagobi dege wiaria handaru. Panga ogonibi mende ni tagira ibiragohayagi wiagobi dege wiaria handaru. Ani wiago hondowa agali biago ibugua ege pabe ogonilabo hengeneha wiago mida magi handaya. Abale mende ni tagira ibiragohayagi wiago manda biyadagua dege manda bialu hearia ogonihabi mida magi mbiraore dege pira duria (50) wiaria handaya.   
\s1 Ege pabe haraba abene unurahayagi wiago hendenego ogo  
\p
\v 24-26 Ani bialu agali ogonime lone haru halu ege pabe haraba wiago abene unurahayagi heagoha haru piya. Haraba ogoninaga hobane timbuni heagoha pole ge halu anda polene egageria karia wiaria handaru. Ani buwa ibugua haraba biagoha anda pialu anda hobanebi bugu hamabi bibahendenaga magi handalu hearia magi mbiraore abale handayagobi dege wiaria handaya. Lunaga magi mida pira kirani duria (25) halu arane yangalenaga magi mida pira mbirani kira (12) wiaria handaya.  
\v 27 Abene unurahayagi pabe haraba mende wiaria handaru. Ani handalu hewaria agali biago ibugua haraba ogonilabo hengeneha bugu hama wiago abale ni tagira ibiragohayagi mida magi manda biyadagua dege manda biya. Ani manda bu handalu hearia hama ogoni mida magi mende abale handayagobi dege mida pira duria (50) wiaria handaya.   
\s1 Ege pabe mende tamuhayagi heagonaga haraba hendenego ogo  
\p
\v 28 Ani bialu agali biago ibugua i̱ haru halu ege pabe mendenaga haraba tamuhayagi bu mabu bini wiagoha anda pialu hama timbuni mende wali agali Anduane Homogonaga anda heago hanehayagi ngoaiho haga wiagoria piriba. Ege pabe mende ogoninaga haraba ubanda tagi biaga wiagoriabi anda bini degeya. Ani heagoria ai agali biago ibugua ege pabe haraba abene unurahayagi wiago mida magi mandabu handalu hearia ogoniha magi bibahendeore abale tagirahayagi handayarubi dege hearia handaya.  
\v 29-30 Mamage haga agalinaga tamu hobane hama pearubi hobane hanuni wiagobi tamu hobaga bini biarubi bibahende hobane halu mende pigane tagirahayagi hayagobi dege hai hearia handaru. Tamu ogoniha windo marubi dugu wigi bia. Ogoninaga mida magi luni pira kirani duria (25) wialu arane yangalenaga mida magi pira mbirani (12) emene bolanguahe wia.  
\v 31 Anda ogoninaga hobane timbuni heago wali agali ngoai haga hama wiago tagirahayagi ngelowa agali mamage haga biarunaga hobane hearu ti Anduane Homogonaga anda heago hapara howa hea. Ani bialu mamage haga agali uruninaga tamu hobane uruniha anda hobaki haga bini headagua anda gene ale mbira wabu helaga bia. Ani bialu anda hái heagoria gene ale wabu helaga biyadagoria ayage ale yuniruhe bigiya wabu helaga bia. Ani bialu anda ogoniha howa ge halu wali agali ngoai haga hama timbuni wiagoha iradali bigi bialu polene egageria halira wabu wigi bia.   
\p
\v 32-34 Ani bialu agali biago ibugua i̱ haru halu ni tagira ibiragohayagi Anduane Homogonaga anda heago kawareni wali agali ngoaiho haga hama timbuni wiagoria piya. Ani buwa ege pabe halu mende tamuha heago haraba wiagonaga mida magi manda biya. Anda ogonibi hobane bu hearubi bibahendenaga mida magi maru biarunaga heagobi dege hea. Anda ogoninaga bugu hama wali agali ngoaiho haga timbuni wiago kawareni wialu mamageali bu hearunaga tamu hobane wiaru Anduane Homogonaga anda heago kawareni hapara ho hea. Ani heagoria hobane hobaki henenaga anda gene aleru wabu helaga bia. Ani bialu anda hái heagoria gene ale wabu helaga biyadagoria ayage ale yuniruhe bigiya wabu helaga bia. Anda ogoniha howa ge halu wali agali ngoai haga bugu hama wiagoria iradali bigi bialu polene egageria halira wabu wigi bia.   
\p
\v 35-37 Ani bialu agali biago ibugua i̱ haru halu ege pabe mende tamuha heagonaga harabani anda abene uyurahayagi heagoha haru piya. Ani puwa ibugua anda ogoni mida magi handalu hearia anda tamuhabi tagirahabi abale manda biyagobi dege hearia handaya. Anda ogoninaga bugu hama wali agali ngoaiho haga wiagohayagi mbirale anda gene aleru wabu helaga bia. Ani bialu anda hái heagoria gene ale wabu helaga biyadagoria ayage ale yuniruhe bigiya wabu helaga bia. Ani bialu mamageali bu hearunaga hobane Anduane Homogonaga anda heago kawareni hapara howa hea. Anda ogoniha howa ge halu wali agali ngoai haga bugu hama wiagoria iradali bigi bialu polene egageria halira wabu wigi bia.   
\s1 Lomabu mule manda manda biaga dabu bia hearia Esegiele ibu hendenego ogo  
\p
\v 38 Pabe mendegonaga uyurahayagi haraba wiagoria anda mbira damini bu hea. Ani bialu anda damini ogoninaga panga haraba hobane timbuni heagoria duguatagi hea. Anda damini ogoniha mbirale loma irani delole howa wayawaya bu manda manda biaga hea.  
\v 39 Ani bialu anda damini ogoniha dabu maria heago kira abene mendehayagi halu kira abene mendehayagi halu bia. Ani bialu lomabu delaga dabu ogoriani loma irani dai helo delolenebi ko biniru domo wahelonaga lomabi mana ko bero mitangi nabi howa binigonaga mo tiga bialu lomabu delolenebi bibahende ogoriani balu manda manda bu wiaga dabu hea.  
\v 40 Anda damini ogoni tagirahayagi hayadagoria lomabu delaga dabu maria mende anda polene egageria wiagoria kawareni dabu kira egageria mendehayagi kira mendehayagi lowa bu helea.  
\v 41 Lomabu delole bo manda manda bulene dabu halira bu helea. Dabu maria anda damini tamu heagoha halu maria mende tagirahayagi halu bia.  
\v 42 Ani bialu lomabu delaga dabu maria lone ha dege biago ogoni ege to̱le̱me wabiniya. Dabu ogoni daliganaga sendimida magi pira duria (50) halu lunagabi aranenagabi sendimida magi pira kariani duria (75) halu bia. Dabu ogoriani nogo egaru lomabu delolenaga bo podole howa daba nabiru manda manda bu wiagaya.  
\v 43 Anda damini ogoniha mbirale garayabi anda hái heagoria helama pea. Mbirale garayabi ogoni luninaga sendimida magi karia howa emene bolanguahe helea. Ani bialu nogo bo loma binirunaga mbiriniru dabuni podo wiagaya.   
\s1 Esegiele ibu \w loma\w* binigo mo miaga agali hearunaga tamu hobane hendenego ogo  
\p
\v 44 Ani handalu hewaria agali biago ibugua i̱ haru halu Anduane Homogonaga anda haneni wali agali ngoai haga hama wiagoria haru piya. Ogoniha agali iba gana laga hearunaga anda hobane kira hearia handaru. Hobane mende ege pabe haraba anda polenenaga abene uyurahayagi heagonaga dege hane unurahayagi handa daibu hea. Ani bialu hobane dege mbira ege pabe haraba ni tagira ibiragohayagi howa anda ibaga wiagonaga anda heago hane dindi abene uyurahayagi handa daibu hea.  
\v 45 Ani hondo hewagola agali biago ibugua i̱hondo langialu lalu, Anda hobane abene uyurahayagi kago \w loma\w* binigo mo miaga agali Anduane Homogonaga andaha biabe biaga karu tinaga ka.  
\v 46 Ani bialu anda hobane mbira abene unurahayagi kago loma binigo mo miaga agalime lomabu delaga dabu kagoria biabe biaga karu tinaga hea. Loma binigo mo miaga agali uruni ti bibahende Libai hameigini Sadogo aria dege hagaya. Loma binigo mo miaga agali Sadogo hameigini hangume Anduane Homogonaga andaha kaware puwa ibunaga biabe bialu holene nga, laya lene.   
\s1 Libu Anduane Homogonaga andaha anda penego ogo  
\p
\v 47 Agali biago ibugua Anduane Homogonaga anda haneni wali agali ngoaiho haga wiagonaga mida magi mandabu handalu hearia lunagabi aranenagabi mida pira duria (50) dege haya. Ani bialu lomabu delaga dabu biago Anduane Homogonaga anda haneni wali agali ngoai haga hama wiagoria dombeneni hea.  
\v 48 Ibugua i̱ haru halu Anduane Homogonaga anda tamuha haru anda pialu tamu hobane mbira heneyagoha anda piriba. Ani puwa ibugua hobane ogoninaga haneni howa tamu ogoninaga mida magi manda biya. Ani mandabu handalu hearia mida kirani bolanguahe haya. Ani bialu harabani mida magi manda bialu hearia mida kariani emene bolanguahe haya. Ani bialu ege pabe haraba nebone tohe wiagonaga mida magi manda bu handalu hearia mida mbirani bolanguahe dege dege hea.  
\v 49 Ege pabe haraba wiagoria anda hobane timbuni heagonaga magi luninaga mida pira wialu arane yangalenaga mida duriani maru bolanguahe hea. Ani bialu Anduane Homogonaga anda hobane ogoniha howa egageria wali agali ngoai haga hama wiagoha daliape ho wia. Haraba ogoni wiagoria anda gene timbuni kira lene labolaboha hea.   
\c 41  
\p
\v 1 Anda hobane ogoninaga erembirahayagi \w Hobane\w* Loma Bia Hene hea. Ani bialu ibugua bugu hama wiagonaga arane manda bialu hearia mida tebira halu  
\v 2 luninaga magi mida duria hea. Ani bialu ege pabe emene mbira haraba wiagoria howa bima pialu anda hobanenaga gimbuni pauleagoria howa magi mida kirani bolangua hene hea. Ege pabe mende haraba mendehayagi wiagobi nde magi mida mbiraore ogonibi dege hea. Ani hondowa tamu hobane Loma Bia Hene biago magi mandabu handalu hearia luninaga mida pira kira (20) halu arane yangalenaga magi mida pira hea.   
\p
\v 3 Ani handalu puwa \w Hobane\w* Loma Bia Heneore anda tibihaore heagoha anda puwa haraba magi mandabu handaya. Haraba biagonaga magi manda bialu hearia magi mida tebira hea. Ani bialu Loma Bia Heneore hobane ogoniha anda polenaga mida mbira hangu hea. Ani bialu ege pabe wiagoria howa pialu anda hobane hairi heagonaga magi mida tebirani bolanguahe hea. Ani bialu ege pabe mende panga mendehayagibi nde magi mida mbiraore ogonibi dege hea.  
\v 4 Ibugua anda hobane uruni mida magi ogoni mandabu handalu hearia bibahendeha mida pira dege dege wia. Ani manda buwa ibugua i̱hondo lalu, Tamu hobane ogoni Hobane Loma Bia Heneore, laya lene.   
\s1 Anduane Homogonaga anda heagoha hobane dewa bu gimbu bu migi biaria hendenego ogo  
\p
\v 5-6 Anduane Homogonaga anda heagoha anda hobane emene dewa Hobane Loma Bia Hene heagobi Hobane Loma Bia Heneore heagobi kirabaliha ho mabubupe hea. Agali biago ibugua anda hobane emene urunibi Hobane Loma Bia Hene Loma Bia Heneorela tubariha anda hobane heago mida magi manda bu handaga bini. Ani manda bialu hearia anda manda dindihayagi magi mida tebira haya. Anigo manda dombeni daligahayagila anda bu gimbu gimbu biradagua buwa bu yulatagi henegome libu ogobi labolabo ndo hea. Anda hobane emene uruni ti anda bu gimbu bima irigi henegonaga dabu tebone wiagoria hangu hene. Anda hobane dindihayagi hayadarunaga dabu dindini dege heneya. Ani bialu anda daliga bia dambi henedagonaga gene anda hobane dindiha hayago ibunaga tamu dindini hope hene hea. Ani bialu hobane dombeni hayadago ibunaga dabu tamu hobane hayadagonaga gene dindiha heagonaga anda gene heagoria bu paga hea. Gene uruni anda dindiha pigane heago dangini hengene hea. Ani bialu anda tebone daligaore bia dambi hene heago ibu gene mende dombeni heago dangini hongowa anda bu gimbu bima irigi heneya. Tigua Anduane Homogonaga anda heago mandaha hariga tombelo wuwa dabira baedene buwa bu gimbu bigi nabulenaga ogonidagua biniya. Anda pigane dindihaore heagobi dombeni heagobi daligaore bia dambi heagobi bibahendenaga hobane pira tebira (30) dege dege hea.  
\v 7 Anda hobane dindiha heagonaga tamuha dabu biago tohenaga magi mida kira hea. Ani bialu daliga anda mende tebonela bia dambi hene heagonaga ge haga hama wiago timbuni toheore wialu anda daligadagoha irigi halu polenebi nde dabu egageria bima irigi hene hea.  
\v 8-11 Ani bialu Anduane Homogonaga anda ogoniha hobane maru heagohayagi hobane timbuniore heagoha wali agali ogonihayagi puíbu bilonaga panga kira dugua ho wia. Anda manda ogoni ibu tohenaga magi mida kirani bolanguahe hea. Panga haraba ogoni mendego anda abene uyurahayagi dugua uyu halu mendego abene unurahayagi dugua unu hea. Ani bialu wali agali ibagabu holene Anduane Homogo anda heagonaga manda manda hama wu mabu bia. Hama ogoni arane yangalenaga magi mida kirani bolanguahe wialu ogoni daligani Anduane Homogo anda heago wali agali ibagabu haga wiagoria handa li ni wia. Ani bialu ogoninaga magi mida tebira hea. Ani heagola Anduane Homogonaga anda ogoni dindihayagi manda manda hama bayale wu mabu bupe ho wia. Hama arane yangale timbuninaga magi mida pira halu anda marubi gibugibu hama pea.   
\s1 Anda mende Anduane Homogonaga anda ni paliragohayagi hearia hendenego ogo  
\p
\v 12 Anda timbuni mbira ni paliragohayagi heago hane orayagi Anduane Homogonaga anda hane hama wu mabu biagoha handa daibu hea. Anda ogoni luninaga magi mida pira mariani duria (45) halu arane magi mida pira tebirani duria (35) hea. Anda hái timbuni tohe heagonaga mida kirani bolanguahe hea.   
\s1 Anduane Homogonaga anda mida magi manda biai henego ogo  
\p
\v 13 Agali ogoni ibugua Anduane Homogo anda heagonaga luni magi manda bialu hearia mida pira duria (50) hea. Ani bialu dindi hama biagobi anda ni paliragohayagi heagobi magi manda biya. Ibugua Anduane Homogonaga anda mandahayagi howa magi manda bialu anda mende biago mandahayagi magi manda biya. Ani manda bu handalu hearia hama ogoninaga magi mida pira duria (50) dege haya.  
\v 14 Ani bialu Anduane Homogonaga anda haneni dindi henge wiago magi mida pira duria (50) dege wia.  
\v 15-16 Ani buwa anda timbuni abene ni paliragohayagi heago lunaga mida magi manda bialu anda tamu hobane luni kira heagobi mida magi manda bialu hearia bibahende mbiraore ogobi dege dege pira duria (50) hea.  
\s1 Anduane Homogonaga andaha yári tara tara wiaria hendenego ogo  
\p Anduane Homogonaga anda heagonaga panga harabanibi Hobane Loma Bia Hene heagonaga panga harabanibi Hobane Loma Bia Heneore heagonaga panga harabanibi uruninaga anda hái ira pelo mbaraleme para halu windo emene emene bu heagoha hái para halu bibahendeni irame para hai hea. Ira degeme anda hái para hama irigi halu windo heagoria paraho iri hea. Ani bialu windo bu hearu para hodambi holenebi ira maru wia dege bia.  
\v 17 Hobane Loma Bia Hene heagonaga anda háinibi Hobane Loma Bia Heneore heagonaga hái heagoriabi bigiya tara tara wabu helea. Ani bialu anda tamu hobane kira ogoni labonaga panga daligahabi bigiya tara tara wabu hela dege bia.  
\v 18 Bigiya uruni ayage ale yunihe mbira mbira heago dombeneha dahuliyali babaganeheru wabu helaga bia. Dahuliyali mbira mbiranaga dengui kira dege degehe hea.  
\v 19 Dahuliyalirunaga dengui mbirago agalinaga dengui handalehe ayage ale wabu heleagoha gi lehayagi handa edeho helea. Mendego laiononaga dengui handalehe ayage ale mende wabu heleagoha gi tigahayagi handa ede ho helea. Bigiya ogoni ale anda hái bibahendeha  
\v 20 dindi wali agali haga wiagoria howa wabu helaga bima irigi halu panga hairi heagoria wiari hea.  
\v 21 Panganaga anda gene timbuni heago abene bibahendeha ogobi dege dege hea.  
\s1 Lomabu delaga dabu irame wabini handalehe wiaria hendenego ogo  
\p Hobane Loma Bia Heneore heagonaga haraba kawareni mbirale mbira  
\v 22 lomabu delaga dabu irame wabini handalehe wia. Dabu ogoni daliganaga magi mida mbirani bolanguahe howa arane timbuninaga magi mida mbirani emene bolanguahe wia. Dabu ogoninaga dindihayagibi lene lenebi bibahende ira peleneme dege wabiniya. Ani handalu hewaria agali biagome i̱hondo langialu lalu, Dabu irame wabini ogoni Anduane Homogonaga deni wiaga ngagoni, laya lene.   
\s1 Anduane Homogonaga anda pangaru hendenego ogo  
\p
\v 23-24 Anduane Homogonaga andaha \w Hobane\w* Loma Bia Hene heagoha anda polene panga kira dugua ainai biaga wia. Ani bialu Hobane Loma Bia Heneore heagonaga panga harababi nde ogonibi dege wia.  
\v 25 Hobane Loma Bia Hene ogoninaga pangani ayage alenaga bigiyabi dahuliyalinaga bigiyabi anda háini wabu helayagobi dege wabu helaga biaria handaru. Ani bialu Anduane Homogonaga anda tamuha anda polene haraba wiagoria anda emene mbira ira peleneme dangilene hea.  
\v 26 Ani bialu anda ogoninaga manda mende mendehabi windo dugu wiago kaware anda háini ayage alenaga bigiyabi wabu helaga biaria handaru.   
\c 42  
\s1 \w Loma binigo\w* mo miaga agalirunaga anda hearia hendenego ogo  
\p
\v 1 Uruni handalu agali biagome i̱ haru halu Anduane Homogonaga anda heago abene uyurahayagi wali agali ngoai haga hama timbuni mbira wiagoria puwa handalu hewaria anda mbira ogonihayagi hea. Anda odagoni Anduane Homogo anda biagonaga erembirahayagi anda mende ni paliragohayagi hayago kaware dege hea.  
\v 2 Anda ogoninaga panga dindi abene uyurahayagi dugu uyu heagonaga luni magi mida pira duria (50) wialu yangalenaga magi mida pira kirani duria (25) hea.   
\p
\v 3 Anda ogoninaga tibi Anduane Homogonaga anda heago leneha hage helowa hanehayagi wali agali ngoaiho hagane hama timbuni wiagoria hapanaho howa hariga puíbu biaga wiagoria handa tagi hea. Anda ogoni halu tebo daliga bu gimbu bima irigi heneya. Tigua anda ogoninaga daligahayagi bu gimbu bini mende heago mo emene howa bini halu tebone daligaore bu gimbu bini heago mo emeneore howa biniya. Anidagua bini heago anda ogoni ge halu irigi hagane egageria handaleheya.\x + \xo 42.3 \xt Ese 40.17, 41.10\x*  
\v 4 Anda ogoninaga be tebone dindiha pigane hayadagonaga erembirahayagi dindi hanguni wali agali puíbu bulene hama luniore wia. Hama ogoni wali agali puíbu bulene arane yangalenaga magi mida duria wia. Hama ogoninaga luni magi mida pira duria (50) wia. Ani bialu hama ogonibi dege abene uyurahayagi panga dugua uyu heagoria tagira pea.  
\v 5 Anda be tebone daligaore bu gimbu bini biagonaga tamu hobane anda beki biagolabonaga timbuni heagobi ndo emene doroge hea.  
\v 6 Anda be tebo bima irigi hene biaru anda maru wali agali ngoai haga hama wiagoria bu hearu gene daligani dagia buwa bini headagua ndo hobane uruni binidago dindi hombene daligani buwa bame dindini bupe heneya. Anidagua binigome anda bu gimbubu migi bima irigi hene kiragolabo mo emene howa biniya.  
\v 7-8 Anda pigane be mbira kagonaga tamu hobaneha luninaga magi mida pira kirani duria (25) hea. Anigo anda marunaga tamuha luninaga magi mida pira duria (50) hea. Anda hobane mbiragonaga haneni ege pabe mbira bia. Pabe ogoni luni magi anda ogoni ale dege mida pira kirani duria (25) hea.  
\v 9-10 Ege pabe ogonila anda hayadagola hengeneha wali agali puíbu bulene hama wia. Mbirali ibu anda ogoniha anda polenaga hariga ni tagira ibiragohayagi howa anda mandaha hariga ngadagua ibalu anda ogoniha anda piagaya. Ani bialu Anduane Homogonaga anda heago abene ni tagira ibiragohayagi anda mbira ogonibi dege hea. Ani bialu anda ogoni Anduane Homogonaga anda heago erembirahayagi anda timbuni heagobi dege hearia handaru.  
\v 11 Anda abene unurahayaginaga haneni wali agali puíbu bulene hama wiago anda timbuni uyurahayagi heago haneni wiagobi dege wia. Anda ogoni kirabali ogobi labolabo howa yáribi mbirale maru marubi ogobi labolabo hea. Panga haraba wiarubi mbiraore ogobi dege dege hea.  
\v 12 Mbirali ibu anda unurahayagi hayadagoha anda pole hariga ni tagira ibiragohayagi howa anda puwa manda manda ibalu anda piaga wia. Anda mende uyurahayagi heagoha anda pole pialu howa piagadagua piagaya.   
\p
\v 13 Agali biago ibugua i̱hondo langialu, Anda kira ogonilabo Anduane Homogo ibuninagaore loma biahene ka. \w Loma\w* binigo mo miaga karu ti anda kira ogoniha anda puwa Anduane Homogo kagoha kaware piagaru tigua nogo egaru wali agalime Anduane Homogonaga loma biniru yalu ibiragoni ti nagaya. Anda ogoni labonaga tamu hobaneru Anduane Homogo ibuninagaore kago loma binigo mo miaga karume loma bayale duniniore yalu ibugu biraru hobane uruniha mo wigi biagaya. Loma uruni widi lomabu delaga lomabi wali agalime ko biyaru domo wahelonaga lomabi mana ko bero mitangi nabi howa biyarunaga mo tiga bulenaga lomabi uruni anda ogoniha yu piaga wia.  
\v 14 Loma binigo mo miaga Anduane Homogonaga andaha biabe bialu heneru ti tagira polenaga tigua biabe bialu howa aga karulagane anda ogoninaga tamu hobaneha golo iriari biaga. Loma binigo mo miaga hearunaga aga urunibi nde Anduane Homogonaga biabe bulenaga wiabagi hene dege wini. Ani bialu tigua aga golo iriari bialu aga tara ngaru mo karulalu wali agali ngoaiho haga hama timbuni ngagoria tagira piaga, laya, lene.   
\s1 Anduane Homogonaga anda ege pabe bu mabu biago mida magi manda binigo ogo  
\p
\v 15 Agali biago ibugua Anduane Homogonaga anda heago tamuha wiaru bibahende mida magi mandabu handai haya. Mandabu handai halu ibugua i̱ haru halu ni tagira ibiragohayaginaga ege pabe haraba heagoria tagira piriba. Puwa ibugua ege pabe tagirahayagi ogoriani hayadagonaga mida magi manda bialu handaya.  
\v 16 Ibugua magi manda bu handagane yiniyagome ege pabe ni tagira ibiragohayagi heagonaga mida magi manda bu handaya. Ani manda bu handalu hearia mida handari kirani pira duria (250) yiaria handaya.  
\v 17-19 Ani bialu ibugua ege pabe abene uyurahayagi heagobi unurahayagi heagobi ni paliragohayagi heagobi bibahende magi mandabu handai hayagola mida magi mbiraore ogobi dege dege mida handari kirani pira duria (250) haya.  
\v 20 Ege pabe timbuni Anduane Homogonaga anda bu mabu binidagoni bu mabu bini ndo tiga tiga tungulo pugu bialu uyurahayagi bu banga bialu unurahayagi daliape halu amurayagi pu amu halu unurayagi pu uyu halu tigatiga tungu laga bini maria hea. Ani heagonaga magi mbiraore ogobi dege howa bibahendenaga mida handari kirani pira duria (250) dege dege hea. Ege pabe timbuni ogonime mbirale Anduane Homogonaga loma biahene ngarula wali agali tagirahayagi tanabi bu karunaga ngarula tubari hea.   
\c 43  
\s1 Anduane Homogo ibuni andagaha daibu henego ogo  
\p
\v 1 I̱na de gandeba handalu hewaria agali handalehe ogoni ibugua wai pabe timbuni heagonaga panga ni tagira ibiragohayagi dugua amu heagohayagi i̱ haru puwa helaya.  
\v 2 Ani howa handalu hewaria Isaraele wali agalinaga Ngode Datagaliwabe kagonaga wá taraore hongoheore ni tagira ibiragohayagi howa wá hadali hayane handaru. Ani hondo hewagola wá taraore ogoni wá heaore dege Ngode Datagaliwabenaga bi timbuni kilikulu lalu iba solowara tanguia amu nana biradagua bialu layuane hale haru. Ani layuagola wá taraore biagome dindi bibahendeha wá hongoheore haame hayane handaru.\x + \xo 43.2 \xt Ese 10.3-4, 10.18-19, 11.22-23, Mo 1.15\x*  
\v 3 I̱na de gandeba o handarudagoni ala Yarusaleme mo ko halu bo gialobagabu wahole ibiyaria hendenegobi dege handalu iba Keba peagoria hewaria hendenegobi dege lone handalu biru. Wá taraore ogoni ibiyago hondowa i̱na ma podalu dindiha dengui ela helo ge duli hanga howa bulu paliru.  
\v 4 Ani biwagola Anduane Homogonaga wá hongohe taraore ogoni ibalu tanonaga pabe panga haraba amu ni tagira ibiragohayagi howa tanoha anda pialu Anduane Homogonaga anda biagoha wá haanda hayane handaru.   
\p
\v 5 Ani hondo hewagola Anduane Homogonaga Dinini ibugua i̱ haru pialu Anduane Homogo anda haneni wali agali ngoaiho haga wiagoria helaya. Ani helayagola Anduane Homogo anda biagoha handa anda halu hewaria wá taraoreme anda tamu biagoha wá ho to̱latagi hearia handaru.  
\v 6 Agali handalehe biago ibu i̱ hewagoria kaware helowa Anduane Homogo ibugua anda tamu biagoha howa bi mbira layuane hale haru.  
\v 7-8 Bi ogoni Anduane Homogonaga bi leneyago ibugua i̱hondo langialu lalu, Dindiali-o i̱naga dagia kini biragane anda ogoha ngago ai wali agalime anda ogoha ibalu i̱nihondo mitangi bialu lotu lole ibulebira. I̱ni Isaraele wali agali baba anda ogoha ibalu mandagi haabo kogola mani Isaraele wali agalibi tinaga kinirubi tigua i̱naga mini timbuni mini lene kogo mo dindiha naholebiraore. Tigua mbirale dama mitangi bialu gime wabiniruhondo lone bi pupu wialubi naholebira. Kini ti andabi i̱ anda kogoria bia para naholebira. Ala kini ti anda i̱ andala kawareore pabe mbira hangume ho tu wuwa hayagoni. Ani heagola tigua kini maru homayarunaga tinginiru tini anda ogoniha hora haga biyagome i̱ anda i̱ninaga deni mo ko halu mo dodo helaga biya. Ani bialu tigua anda ogoniha howa mana ko ngu pi̱a̱o̱le wiaru bialu heagola ogonime i̱naga mini timbuni mini lene hewago mo dindiha helaga biya. Anidagua biyagonaga i̱na tihondo tandaga timbuni halu ti bo wahai harugoni.  
\v 9 Ani birugo Isaraele wali agali tigua mbirale dama mitangi bialu gime wabini ngaruhondo bi pupu nawi wahalu tinaga kini homenerunaga tingini kaware hora haga biagago waholene nga. Tigua i̱na bi larogo hale howa talialu biyagua nde i̱ ti baba mandagi haabo holebero, laya, lene.   
\p
\v 10 Anduane Homogohanda i̱hondo laabo halu lalu, Dindiali-o Isaraele wali agaliruhondo i̱ andaga biago ogobiore hea lalu lamibe. Ani lameregola tigua uruni manda bialu tinime mana ko bialu hayaru mitangi bu dai bialu taga helo ani lamibe.  
\v 11 Tigua taga ho kagola i̱ andagaha bibahendeore ogobi nga lalu ti hale helo lamiai habe. Ani bialu anda ogoninaga magi tara tara ogobiore ngelo lalu lamibe. Anda panga helolenebi anda ogobiore helo lalu bulenegobi lamiai habe. Anda ogoni ibu bialu howa manani talialu bulenego manabi bebani gilibu mibe. Ani bidegola tigua mana ogoni bibahende bebani gilibu ngago hondowa talialu i̱naga anda ogoni bayuwa bialu anda ogoninaga mana ngagobi bibahende taluwa bialu helo ani bibe.  
\v 12 I̱naga anda ogoninaga mana ogodagua. Anda ogoni ibu abale ibuni haga hari nene biagoriaore bialu anda kagoria dindi kaware ngaru i̱ninagaore ngelo loma biaho ngelalu bilimu. Ai i̱ andanaga mana uruni, lalu Anduane Homogohanda laya, lene.\x + \xo 43.12 \xt Ese 40.2\x*   
\s1 Lomabu delaga dabu mida magi mandabu hendenego ogo  
\p
\v 13 Anduane Homogonaga anda mida magi manda biyadagua lomabu delaga dabu heago ogonibi magi manda biya. Lomabu delaga dabu heago gene dindiha ganarua bu mabu bia. Ganarua ogoni dindiha wape heagonaga magi sendimida pira duria (50) wialu arane sendimida pira duria (50) dege wiagoni. Ganarua biago neneni hagira ale emene bu mabu biago ogoninaga daliga magi sendimida pira kirani duriaya (25).\x + \xo 43.13 \xt Har 27.1-2, 2 Bit 4.1\x*  
\v 14-15 Dabu ogoni halu tebo heago hobane mbiragonaga magi mida mbira hangu hea. Ani bialu mende dombeni heagonaga magi mida kira halu tebone daligani heago lomabu delaga howa ogoninaga magi mida kira dege heagoni. Dabu dindiha heagonaga nguni tagirapu heago arane magi sendimida pira duriaya. (50) Ani bialu hobane dombeni ogoni nguni tagirapu heagonaga arane magibi hobane tebone daliga heagonagabi magi sendimida pira duria (50) dege degeya. Ani heago lomabu delaga dabu ogoninaga daligani gimbuni mariani nogo bulumaga ne gayane ale maria hea.  
\v 16 Dabu ogoni daligani luninaga magibi arane yangalelanaga magibi mbiraore ogobi dege mida waragaria hea.  
\v 17 Dabu nira obeneni heagonaga lu magi arane yangalela mbiraore ogobi dege mida karia hea. Dabu neneni hagira emene bu mabu bupehe heagoni. Hagira emene neneni bu mabu binidago daliganaga magi sendimida pira kirani duriaya (25). Hagira emene biadaga henedagoni lomabu delaga daligadagonaga ganarua biradagua bia. Lomabu delaga dabu daligani ganarua ale wiago arane magi sendimida pira duriaya (50). Lomabu delaga dabu ogoriani irigi holenenaga egageria mbira dabu ogoni abene ni tagira ibiragohayagi howa wiadaga heagoni.   
\s1 Anduane Homogonaga lomabu delaga dabu loma bia henego ogo  
\p
\v 18 Anduane Homogo Bibahende Haru Haame Ho Haga kagome i̱hondo langialu lalu, Dindiali-o i̱naga bi larogo baya hangu hale ha. Tígua lomabu delaga dabu ogonibi bu helowa dabu ogoriani mbirale bo lomabu delowa nogo baragonaga darama dabuni odo tandala paya bialu howa mana ogore bilimu.\x + \xo 43.18 \xt Har 29.35-37\x*  
\v 19 Nogo bulumaga wangabe mbira haru puwa \w loma\w* binigo mo ngiaga agali Sadogo aria karuhondo meregola tigua ko biyago i̱na domo waholiyanaga nogo ogoni loma bialu i̱hondo bo ngilo mibe. I̱ Anduane Homogo Bibahende Haru Haame Ho haga kogo i̱na ogo bibe larogoni. Libai hameigini Sadogonaga aguanene ti hangume loma binigo mo ngiaga howa i̱ni kogoha kaware ibalu i̱naga biabe biahaga habehe kagoni.  
\v 20 Ani bialu howa nogo ogoninaga darama ngago hambu yuwa dabu kagonaga gimbuni mariani bulumaga ne gayane ale kago darama ha̱i̱ halu dabu obeneni kagonaga gimbuni maria ngagoha odo ha̱i̱ halu dabu dombeni ogoni neneni hagira emene bidagobi ha̱i̱ halimu. Tígua ogonidagua beremigola dabu ogoriani dodo para kago domo wahalu i̱naga deni dabu ogoni i̱naga loma biahene bayale wulebira.  
\v 21 Ani bialu ko biyago i̱na domo waholiyanaga nogo bulumaga ogoni yalu puwa nogo bo delaga dindi henge mbira i̱ anda kago tagirayagi ngagoria delalimu.  
\v 22 Ani bialu horo mendengi nogo meme dere durubi mbira nabiore wangabe kago haru ibuwa ko biyago domo waholenenaga loma bialu bo ngilimu. Ani bialu meme ogoninaga daramame lomabu delaga dabu kago dodo nahe helonaga abale bulumaga daramame birimidagua dege bilimu.  
\v 23 Ogonidagua biai halu nogo sibi wangabebi bulumaga wangabebi dere durubi mbira nabi habetigiore kago i̱ni koria haru ibalimu.  
\v 24 Ani haru eberemigola loma binigo mo ngiaga agali karu tigua nogo ogonilabo balu ibi howa irani dai helo i̱naga loma ogoni delolene nga.  
\v 25 Anidagua biai howa horo karu nogo memebi bulumagabi sibibi wangabe mbira dege dege ko biyago domo waholenenaga loma bialu bo delole haru ibalu irani dai helo delalimu. Nogo uruni lomabu yalu eberemigo dere durubi mbira nabiore bayale kago hondowa haru ibalimu.  
\v 26 Horo karu loma binigo mo ngiaga agali karu tigua lomabu delaga dabu kago dodo nahe i̱nagaore bayale helonaga loma uruni bo delolene nga. Tigua ogonidagua biragome lomabu delaga dabu i̱ninaga loma bia heneore holebira.  
\v 27 Sarere mbira ogoni piai halu horo halini laragola \w loma\w* binigo mo ngiaga agali karu tigua Isaraele wali agalinaga loma yu poramigo mo loma bia halu holene horo wulebira. Irani dai helonaga lomabu delolenebi \w Anduane\w* Homogoi̱nila ho gimbu bulenaga lomabi delaga bialu holebira. Tigua ogonidagua bialu kangi tí baba i̱naga miniha dungulo holebero. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lalu Esegielehanda lene.   
\c 44  
\s1 Panga haraba ni tagira ibiragohayagi wiago payaho wiaabo holebira lenego ogo  
\p
\v 1 Agali biago ibugua i̱ haru halu panga timbuni ni tagira ibiragohayagi wiagoria piyagola handalu hewaria panga timbuni wiago paya ho wia.  
\v 2 Ani paya ho wiagola Anduane Homogohanda i̱hondo langialu, Panga ogo ibu payaho wiaabo hene ngagola mbiralime dugua nabulebira. Irane i̱ Anduane Homogo tí Isaraele wali agalinaga Ngode Datagaliwabe kogo hariga ogoniha anda ibinigome panga ogoni ibu payaho wiaabobo bu wulebira.  
\v 3 Kini ibugua hangu panga haraba ogoniha anda ibalu i̱naga wanakuini tomo nalu birulebira. Ani biruwa anda hobane timbuni kagoha ibu panga haraba maru ngaruha ubaanda tagi bulene karulape, laya, lene.   
\s1 Anduane Homogonaga wali agali karu ti dege ibu andaga anda polene nga lenego ogo  
\p
\v 4 Ani bialu agali biago ibugua tanoha anda polene panga haraba abene uyurahayagi wiagoha i̱ haru anda puwa ibu Anduane Homogonaga wanakuihayagi pu haya. Ani pu heagola Anduane Homogonaga wá taraore holeneme anda biagoha wá hagimbu biya. Anidagua biyagola i̱ ge duli hangaho biruwa ma podalu dengui dindini elaho biraru.\x + \xo 44.4 \xt Ais 6.4, Ese 1.28, 3.23, 43.5\x*  
\v 5 Ani berewagola Anduane Homogohanda i̱hondo langialu lalu, Dindiali-o i̱na í̠hondo mbirale mbira mo walia harogo damene handai halu bi languleberogo bayuwa hale hai habe. I̱naga anda o kagonaga mana ngagobi mbirale bulene ngagobi bibahendeore langiai holebero. I̱ anda ogoniha ogo ibu anda polene karulape ogo ibu anda polene nakarulape lalu langulebero. Ani loleberogo bi ogo bayuwa hale habe.   
\p
\v 6 Isaraele wali agalime i̱naga bi wahalu doga ho karunihondo ogodagua lamibe. I̱ Anduane Homogo Bibahende Haru Haame Ho Haga kogo i̱na tíhondo bi ogodagua laro. Tíore mana ko ngubi ngaruore bialu haga ngamigo wahai halimu.  
\v 7 Tígua nogo habane daramaru i̱naga lomabu delalu howa agali dindi tarali hearu i̱naga andaha anda íbu helarimi. Agali i̱ manda nabiaga uruni tinaga \w dongone\w* podo mabu biagane mana nabi howa tigua i̱hondo mini mbiraore nawi haya. Tigua i̱naga anda hewagoha anda ibiyagome i̱naga deni i̱ anda mo mebia haya. Tígua mana ko ngubi urunibi bialu kamigome i̱naga habo nalolene bi lo wirugo mo habo lalu kami.  
\v 8 Tínime i̱naga anda ogoniha biabe bulene ngago bialu haga ndo kami. Tígua agali i̱hondo mini mbiraore nawi bu karume tínaga biabe ogoni bia aribia helo mo biahaga kamigoni ndobe.   
\p
\v 9 I̱ Anduane Homogo Bibahende Haru Haame Ho Haga kogo i̱na ogodagua laro. Agali dindi tarali tinaga dongone podo mabu biagane mana nabi howabi i̱nihondo mini mbiraore nawiagabi bu karu tigua i̱naga anda kagoha anda polene nawi. Ti Isaraele wali agali baba mandagi ibagabu ha hagayaguabi i̱naga andaha anda polene nawiore, laya lene.   
\s1 \w Libai\w* hameiginime \w loma\w* binigo mo miaga agalinaga biabe biaga winigo bulene nawi lenego ogo  
\p
\v 10 Anduane Homogohanda i̱hondo langialu lalu, Isaraele wali agalime i̱ erembira ngialu piyangi \w Libai\w* hameigini hearu tiguabi nde i̱hondo erembira ngialu puwa dama mitangi bialu mbirale gime wabini wiaruhondo bi pupu wialu haya.  
\v 11-14 Libai hameigini tigua wali agali bu hearume mbirale gime wabini wiaruhondo bi pupu wialu helo biawai hene. Ani biyagome wali agali tigua mana ko bilonaga tinaga bu mini mo heya hayagola tigua ko biya. Anidagua biyagonaga i̱ Anduane Homogo Bibahende Haru Haame Ho Haga kogo i̱na heneneore laro. I̱na Libai hameigini uruni pani nelo miaore bulebero. I̱na Libai hameigini karu tigua \w loma\w* binigo mo ngiaga agali howa biabe nabilolebero. Tigua i̱naga \w Hobane\w* Loma Bia Heneore kaware ibulene nawi. Ani bialu mbirale i̱naga wiabagi hene ngagoriabi ti kaware ibulene nawi. Tigua mana ko ngubiore wiaru bialu hayagonaga taga timbuni ho holebira. Anigo i̱naga ege pabe kagoha mamage howa handayaho helobi biabe maru ege pabe andaneha bulene ngaru tigua bialu helobi helolebero. Tigua nogo bo loma bialu irani dai helolenaga loma ngaru mo manda manda bulene handayaho halu wali agalime loma maru yu ibiraru yamigi bulebira. Ani bialu i̱ mitangi bialu lotu lolene horongi tigua wali agali lotu lelo biamogo bulebira.   
\s1 Loma binigo mo miaga agali hearu tinaga biabe ogodagua bulene nga lenego ogo  
\p
\v 15 I̱ Anduane Homogo Bibahende Haru Haame Ho Haga kogo i̱na ogodagua laro. Libai hameigini Sadogo aria karu ti dege loma binigo mo ngiaga agali howa biabe bialu holebira. Isaraele wali agali tigua i̱ erembira ngialu piyangi hameigini mbiraore Sadogo aria hangume i̱naga biabe bialu i̱ andaga haabo hene. Anidagua binigo ai hameigini Sadogo aria ti hangu i̱ kogoria kaware ibalu i̱naga biabe bialu howa nogo habane daramaru yalu ibalu i̱nihondo lomabu ngulebira.  
\v 16 Sadogo hameigini karume i̱naga andaha anda pialu i̱naga dabu kagoria kaware puwa biabe bialu mbirale ngaru handayaho holebira.  
\v 17 Loma binigo mo ngiaga agali karu tigua i̱naga andaha anda polene ege pabe mendehayagi anda pole howa tinaga aga karulaganego pu bayaleme wabini wiaru mo karulolebira. Ani puwa tamuha howa ti aga nogo sibi irinime wabini ngago karulo holene nawiore.\x + \xo 44.17 \xt Har 28.39-43, LBM 16.4\x*  
\v 18 Tigua aga darasiru karulalu agame embone dambi holene labolabo bayaleme wabini ngagome dambiho holene nga. Anigo tinaga tingini poboyogo bulebiragonaga mandibu wulene nakarulape.  
\v 19 Ani bialu ti wali agali ngoaiho haga hama ngagoria tagira pole howa i̱naga biabe bulenaga karulagane aga biago golowa anda damini hobane kira kagoha ngelolene nga. Aga ogoni i̱ninaga wiabagi henego wali agali bu karume ela hayagua nde tibi i̱ninagaore habagi holebira. Ani buwa aga mende bame tanabi karulagane ngago karulo aribia halu tagira polene nga.\x + \xo 44.19 \xt LBM 16.23, Ese 42.13-14\x*   
\p
\v 20 Loma binigo mo ngiaga agali uruni tinaga mandari bibahendeore podo mbololo waholene nawi. Tinaga mandari luni helo waholenebi nakarulape dege. Tigua mandari podo emene tubagi holene nga.\x + \xo 44.20 \xt LBM 21.5\x*  
\v 21 Loma binigo mo ngiaga agali karume i̱ andaha anda polene ege pabe mende kagoha anda pole howa \w waini\w* iba nolene nawiore.\x + \xo 44.21 \xt LBM 10.9\x*  
\v 22 Tigua wali mbira ibu agalinime wahene bedago dabu bulene nawi. Loma binigo mo ngiaga agali karu ti Isaraele wandari agalila mandagi palia nabini bedagobi loma binigo mo ngiaga mbira homenegonaga one dalo bereaguabi nde ogoni dabu bulene karulape.\x + \xo 44.22 \xt LBM 21.7, 21.13-14\x*   
\p
\v 23 Loma binigo mo ngiaga agali karu tigua i̱naga wali agalihondo mbirale ogo i̱ninaga wiabagi hene nga mbirale ogo i̱ninaga wiabagi hene ndo nga lalu lawai holene nga. Ani lawai halu mbirale i̱naga deni dodo nahe ogo nga dodohe ogo nga lalu lawai holene nga.\x + \xo 44.23 \xt LBM 10.10\x*  
\v 24 Wali agalime keba howa lai lalu heagua nde \w loma\w* binigo mo ngiaga agali bu karu tigua manani howa wali agali biaru i̱naga bi mana lo ngadagua tigabi dabaki bulene nga. Loma binigo mo ngiaga karu tigua i̱naga horo timbuni i̱ mitangi bialu lotu lalu halimulo dabo wirugo tagira ibirangi bulene lo ngadagua bialu holene nga. \w Sabada\w* horo ibirangibi horo ogoni i̱ninagaore wiabagi hene nga lowa i̱ mitangi bialu holene nga.   
\p
\v 25 Loma binigo mo ngiaga agali karume mbirali homene tingini ngago ela holene nawiore. Tigua homene tingini ngago ela hayagua tini i̱naga deni dodohe holebira. Anigo ti dameneore aba ai̱yayaguabi tini waneiginiyaguabi hameneyaguabi mbalini dabu nabi bereneyaguabi nde tinaga homene tingini ngago ela holene karulape nga. Ani biragome tini i̱naga deni dodo nahe holebira.\x + \xo 44.25 \xt LBM 21.1-4\x*  
\v 26 Loma binigo mo ngiaga mbirame ibu i̱naga deni dodohe kayagua lone dodo nahelonaga mana ngadagua bulene nga. Ani bialu o biagome ibuha dodo nahe howa horo karia bame tagira hondo holene nga.  
\v 27 Ani bialu mani ibugua i̱naga andaha anda polene ege pabe mende hayagoha anda puwa ibunaga ko ngago domo wahelonaga loma ala bo delalu mani i̱naga biabe bulene ngago bule anda pobehe holebira. I̱ Anduane Homogo Bibahende Haru Haame Ho Haga kogo i̱na bi o ledogoniore.   
\p
\v 28 Isaraele wali agali hameigini maru karu ti Isaraele dindi podo ta haga biyagua loma binigo mo ngiaga karu ti dindi lenego mbira nawulebira. Tininaga mbirale bayale yu haabo holene i̱ni kogoni.\x + \xo 44.28 \xt Dag 18.20\x*  
\v 29 Loma binigo mo ngiaga karu tigua widi loma delolenebi ko biniru domo wahelonaga lomabu delolenebi mana ko bero mitangi nabi howa binirunaga lomabu delolenebi uruni wali agalime yalu ibiragola loma binigo mo ngiaga ti hangume nalu holebira. Isaraele wali agalime mbirale i̱nagaore lalu wiabagi ho ngarubi loma binigo mo ngiaga ti hangume mo yulebira.\x + \xo 44.29 \xt Dag 18.8-19\x*  
\v 30 Wali agalime mabuha tomo hengeneru \w pigane\w* boga birago loma binigo mo ngiaga agali karu tinaga bu yalu ibulebira. Ani bialu wali agali karume loma tara tara i̱naga yalu ibirarubi loma binigo mo ngiaga agali ti mo yaga bulene karulape. Ani bialu wali agalime mberedi pigane hirinigo i̱nihondo loma bialu loma binigo mo ngiaga karu ti nelo mulene nga. Wali agalime mana ogonibi biyagua i̱na wali agalibi waneiginirubi bibahende mo bayale hai holebero.  
\v 31 Nogo egabi minana homene mbira wiaguabi nogo gabuarume bo wahene wiaguabi urunidagua homene ngaru loma binigo mo ngiaga karume nolene nawiore laya, lalu Esegielehanda lene.\x + \xo 44.31 \xt LBM 22.8\x*   
\c 45  
\s1 Isaraele wali agalime dindi mbira Anduane Homogonaga tu wiabagi ho ngelenego ogo  
\p
\v 1 Anduane Homogohanda i̱hondo laabo halu lalu, Tígua Isaraele dindiha daibu howa dindi hameigini kamidagua tuwu ta haramingi dindi timbuni mbira i̱ni Anduane Homogo kogonaga tu wiabagiho ngelalimu. Dindi ogoni luninaga magi kilomida homberia (12) bolanguahe howa arane yangalenaga magi kilomida pira ngelalimu. Dindi ogoni bibahende i̱ninagaore wiabagi hene ngelo ngelalimu.  
\v 2 Anidagua buwa dindi ogoni hanuniore i̱ninaga anda bule tuwu ngelalimu. Dindi ogoninaga gibuni maria ngagoha ogobi dege dege magi manda bialu mida handari kirani pira duria (250) ngelo ngelalimu. Ani bialu dindi hobane ogoni waraanda ho mabu bialu ogoninaga magi manda bialu mida pira kirani duria (25) ngelo tu wiabagiho ngelalimu. Dindi hobane mende ogoni bame ngelalimu.  
\v 3-5 Ani bialu dindi i̱ninaga tu wiabagi howa ngelarimigo ogobi labolabo ngelo haluki tu wiabagi ho ngelalimu. Ani ngelowa tu hanuni podoki halu kirabalinaga magi manda bialu luninaga kilomida homberia (12) emene bolanguahe wialu arane yangalenaga magi kilomida duria hangu ngelalimu. Dindi podene mendego \w loma\w* binigo mo ngiaga agali i̱naga biabe bialu haga karu tinaga ngelo. Ani bialu dindi hobane mendego i̱naga anda bu holebira. Agali maru loma binigo mo ngiaga howa i̱naga wanakuini kaware ibuwa i̱naga anda kagoha biabe bialu haga karu tinaga anda dindi i̱na tu wu merogoha bu holebira. Dindi hobane i̱naga anda kagoha i̱ninaga wiabagi heneore wulebira. I̱naga dindi ogoniha halu mende tu wiabagi harogo \w Libai\w* hameigini bu karu tinaga ngelolebero. Libai hameigini uruni ti maru i̱naga andaha biabe bialu haga bu karu tigua tinaga tano dindi hobane ogoniha bu holebira.   
\p
\v 6 Ani bialu dindi tu tebone timbuni dege luninaga magi kilomida homberia (12) bolanguahe wialu arane yangalenaga magi kilomida kirani bolanguahe tu wiabagiho ngelolene nga. Ani ngeledemigoria Isaraele wali agali tinaga tano timbuni dunini ogoni ngelo ngelalimu, lene.   
\s1 Isaraeleali kininaga dindi podene kira ngelalimu lenego ogo  
\p
\v 7 Anduane Homogohanda i̱hondo laabo halu lalu, Tígua kininaga dindi podene kira ngelalimu. Dindi mbirago i̱naga anda kagobi tínaga tano dunini ngamigo tagiraha ni tagira ibiragohayagi milimu. Ibunaga dindi wuyu pialu hameigini tara padago baba tubari ngagoria tagira pelo tu wu milimu. Ani bialu kininaga dindi mendego abene ni paliragohayagi ngelo tu wu milimu. Ibunaga dindi wima pialu ni paliragohayagi dindi mende hameigini tara padaru baba tubari ngagoria tagira pelo milimu. Anidagua beremigola i̱naga dindi ngogomebi tínaga tano dunini ngamigomebi kininaga dindi ogoni bibahende dindi dombeni ngago ni tagira ibiragohayagi howa pialu ni paliragohayagi tagira poragola dindi ogoni tí hai holene wulebira. Ani beremigola dindi ogoni timbuni mbira Isaraele hameigini marunaga ngagobi dege wulebira.  
\v 8 Ani bidagola Isaraelealinaga kini ibugua ibuninaga dindiore wu howa kini ala i̱na tíhondo dabo ngirurume wali agali hengedape halu henedagua holene manda nabulebira. Ani bialu kini ibugua Isaraele wali agalinaga dindi ngaru karulolene manda nabiore holebira.   
\p
\v 9 I̱ Anduane Homogo Bibahende Haru Haame Ho Haga kogo i̱na ogodagua laro. Isaraeleali haru haga bu kamiru tígua mana ko bialu haabo harimigo ai wahai halimu. Tígua wali agali bu hearuhondo mana ko bialu ti bope halu harimigoni. Ai áyu tígua mana ko uruni alego wahai halu mana bayale tigabi ngago taluwa bialu halimu. Ani bialu i̱naga wali agali tininaga dindi ngagoria karu bo taliatagi ala haramilidagua nahalimu. I̱ Anduane Homogo Bibahende Haru Haame Ho Haga kogo i̱na bi o ledogoniore, laya, lene.   
\s1 Isaraele tigua mbirale ngaru tigatiga tale bulene nga lenego ogo  
\p
\v 10 Anduane Homogohanda laabo halu lalu, Isaraele wali agali tígua tínaga mbirale yolo mulenenaga genda handagane ngamiru lu magi handagane ngamirubi tigabi dege handalu manda bilimu.\x + \xo 45.10 \xt LBM 19.36\x*   
\p
\v 11 Mbirale yobi ngaru genda magi handagane mini eba nga. Mbirale iba ale ngaru magi handagane mini bada nga. Ai ebala badala ogobi labolabo wulene karulape. Anidagua bulene ngago eba pirame home mbira wialu bada pirame home mbirayaguabi koro mbirayaguabi mbira dege dege wulene nga.\f + \fr 45.11 \ft Genda magi handagane mini kira homela korola ngagonaga magi mbiraore lida magi handari mbirani pira kariani duria (175) nga. Ani bialu ebala badala magi mbiraore ale dege pira mbirani karia (17) ale nga.\f*   
\p
\v 12 Mbirale genda magi handaga ogobi nga. Genda magi mini gera ngago pira kirame (20) manda bialu genda magi mende mini segelenaga mbira hangu manda biaga nga. Genda magi segele ngago pira waragaria (60) manda bialu genda magi mini mina ngago mbira hangu manda biaga nga.\f + \fr 45.12 \ft Genda magi handalu howa genda magi mini segeledago hayagua nde garama bearia (11) karulape wiaga. Genda magi mini mina heagua nde genda magi daliga garama handari waragariani pira halirani maria (684) wiaga nga.\f*   
\p
\v 13 Tígua i̱naga loma tomo mbiraleru yalu ibalu howa mbirale uruninaga genda magini howa ogodagua mo tale bulene nga. Widibi balibi genda magi handalu pira waragaria (60) ngayagua nde ogoninaga homane mbira i̱hondo ngulene nga.  
\v 14 Tínaga ira olibe hengedemiru lini ibane handari mbiranaga (100) mbiraore hangu i̱ ngulene nga.  
\v 15 Ani bialu nogo sibi tí daluha datani nalu helo handari kira (200) hinu kamigo aria mbiraore hangu i̱hondo lomabu ngulene nga. Tígua mbirale uruni widi lomabu delolebi irani dai helo bo delolebi \w Anduane\w* Homogo i̱nila ho gimbu bulenenaga loma bo delolebi yalu ibalimu. I̱na tínaga ko bu kamiru domo wahai holiya urunidagua bilimu. I̱ Anduane Homogo Bibahende Haru Haame Ho Haga kogo i̱na bi o ledogoniore laya, lene.   
\p
\v 16 Wali agali bibahendeme loma uruni Isaraele wali agalinaga kini karia yalu ibulene nga.  
\v 17 Nogo sibi irani dai helonaga lomabi widi lomabu delolenebi waini iba odo lomabu delolenebi uruni bibahende ege pigane ngabulo kagola horo timbuni tagira ibirangibi \w Sabada\w* horo mbira mbirangibi horo timbuni tí Isaraele wali agalinaga wiabagiho ngelaga birugo tagira ibirangibi lomabu mulene uruni milimulo kini ibugua tí mo ngulene nga. Ani bialu Isaraele wali agalime ko biniru domo waholenaga lomarubi delolene nga. Loma uruni ko domo waholenaga lomabi widi lomabu delolenebi irani dai helo lomarubi Anduane Homogola ho gimbu bulenaga lomarubi kini ibugua tí mo ngigi bulebira.   
\s1 Anduane Homogo mitangi bialu lotu lolene horo timbuni winiru ogo  
\p
\v 18 Anduane Homogo Bibahende Haru Haame Ho Haga kagome bi ogodagua lalu, Ege piganenaga horo mbira laragola nogo bulumaga wangabe mbira dere durubi nabi kago hondowa loma bialu bo ngilimu. I̱naga anda kago dodo nahelonaga loma ogoni bo ngilimu.  
\v 19 Loma binigo mo ngiaga kago ibugua ko biniru domo waholenaga loma nogo bulumaga ogoninaga darama hambu yuwa i̱naga anda kago panga harabani gene karu odo ha̱i̱ halu lomabu delaga dabu kagonaga nguni maria ngagoriabi i̱naga anda haneni wali agali ngoai haga ngagonaga ege pabe harabani gene kagobi bibahende darama ogonime odo ha̱i̱ halimu.  
\v 20 Ani buwa ege ogoninaga horo kane laragolabi ani dege bilimu. Mbiralime ibu ko berogo mitangi nabi howa ko biyaguabi mana ko ngago manda nabi howa bu heaguabi ko ogoni biyagonaga loma binigo mo ngiaga kagome bulumaga ogoni loma biahalu bo ngiragome i̱naga anda kago dodo nahe bayale helolebira.   
\p
\v 21 Ege mbira ogoninaga dege horo dene (14) laragola tígua horo timbuni mbira mini \w Bolangua\w* Halu Penegonaga Horo ogoni mitangi bialu holene nga. Ani bialu ogoningi horo karu bibahendengi tí kamirume \w mberedi\w* yidi nahe hirinigo nolene nga.\x + \xo 45.21 \xt Har 12.1-20, Dag 28.16-25\x*  
\v 22 Horo timbuni ogoninaga tí pigane íbu ngoai haramingi kini kagome nogo bulumaga bayale mbira haru ibuwa ibuni ko binirubi ibunaga wali agalime ko biyarubi domo waholenaga bulumaga ogoni loma bialu loma binigo mo ngiaga kagome bo delelo mulene nga.  
\v 23 Mberedi yidi nahe hirinigo nolene horo tagira ibiragola horo karu bibahendeni kini ibugua nogo sibi wangabe kariabi nogo bulumaga wangabe kariabi Anduane Homogo i̱nihondo loma bialu irani dai helo bo delolene nga. Kini ibugua nogo meme mbira mbira horo karia bibahendengi wali agalirume ko biniru domo waholenaga loma bialu bo delolene nga. Ibugua nogo uruni dere durubi nabi bayaleore kago hondowa bolene nga.  
\v 24 Kini ibugua nogo sibi bulumagaru mbira mbira uruni heba balawa bayale genda magi manda nu kira ale kilogarama deria (14) lomabu mialu olibe lini ibanebi be timbuninaga magi lida tebira ale lomabu mulene nga. Ani miragola loma binigo mo ngiaga bu karu tigua nogo bulumaga sibi uruni loma bialu bo delalu howa balawa urunibi olibe ibane urunibi heba lomabu delolene nga.   
\p
\v 25 Horo timbuni dege mbira Anda \w Nemandaha\w* Palu Holene Horo tagira ibirangi ege kanegonaga horo nguini (15) laragola horo ogoningi kini ibugua ala horo karu nogo bulumagarubi sibirubi haru ibalu ko biniru domo waholenaga lomabi irani dai helonaga lomabi balawabi olibe lini ibanebi mo yalu ibuwa loma uruni ala miyagobi dege lomabu ngialu holene nga, lalu Anduane Homogohanda laya, lene.\x + \xo 45.25 \xt LBM 23.33-36, Dag 29.12-38\x*   
\c 46  
\s1 Anduane Homogohanda Kinime loma ogodagua bulene nga lenego ogo  
\p
\v 1 Anduane Homogo i̱na Bibahende Haru Haame Ho Haga kogo ogodagua laro. I̱naga anda haneni wali agali ngoai haga ngagoha polenaga panga haraba ni tagira ibiragohayagi kago horo waragaru biabe bialu hagane horongi panga ogoni payaho wiaabo holene nga. Anigo \w Sabada\w* horo harangibi Ege Mbira Ngabulo kagonaga horo pigane tagira ibirangibi panga ogoni duguaho ngelolene nga.  
\v 2 Horo uruni tagira ibirangi kini kago ibugua i̱naga andaha anda ibulenaga panga haraba ogoniha anda ibulene nga. Ani bialu kini ibu wali agali ngoaiho haga hama timbuni ngagoha ege pabe mende kagonaga haraba ni tagira ibiragohayagi howa anda polene wulebira. Anda puwa tamuha harabani howa lomabu delaga dabu ngagoha handa amu ho holene nga. Ani ngagola \w loma\w* binigo mo ngiaga karume mbirale kini ibugua lomabu yalu ibiyaru mo mulebira. Loma uruni irani dai helolene lomabi \w Anduane\w* Homogo i̱nila ho gimbu bulene lomabi bu delolebira. Ani bialu kini ibuni ge duli hangaho biruwa ma podalu i̱ mitangi bialu lotu lolebira. Ani bialu mani wali agali ngoaiho haga hama timbuni wiyagoha tagira polebira. Anigo loma binigo mo ngiaga karu tigua panga ogoni paya nabi alendo halu ne̱ lelo panga duguaho ngelolebira.  
\v 3 Sabada horongibi Ege Mbira Ngabulo kagonaga horo ibirangibi ege pabe mende kagonaga panga ni tagira ibiragohayagi dugua dai bidagonaga haneni wali agali bibahendeme ngoaiho haga hama timbuni ngagoriani ge duli hangaho biruwa i̱ mitangi bialu lotu ogonibi lalu holebira.   
\p
\v 4 Sabada horo harangi kini ibugua nogo sibi igini hongolo waragaria sibi wangabe mbira lowa irani dai helonaga loma bo delole haru ibulene nga. Nogo sibi uruni dere durubi nabi bayaleore kago hondowa haru ibulebira.  
\v 5 Nogo sibi wangabe bayale ogoni haru halu balawa widime wabini genda magi manda nu kira ale kilogarama deria (14) lowa yalu ibulene nga. Ani bialu nogo sibi igini waragaria biaru heba balawa ibunime hame ledadagua yalu ibulene nga. Ani bialu olibe lini ibane balawa yidagobi dege yulene nga. Ibugua yulubadagoni balawa genda magi manda nu kira ale kilogarama deria (14) hanalu ibiyagua nde olibe lini ibane be timbuninaga magi manda lida tebira ale heba hambu yalu ibulebira.   
\p
\v 6 Ege Mbira Ngabulo kagonaga horo harangi kini ibugua nogo bulumaga wangabe mbirabi sibi igini hongolo waragaria hebabi sibi wangabe timbuni mbira laga buwa lomabu yalu ibulene nga. Nogo uruni dere durubi nabi bayale kago hondowa haru ibulene nga.  
\v 7 Ani bialu ibugua nogo bulumaga wangabe biago heba balawa widime wabini ngago aria genda magi manda nu kira ale kilogarama deria (14) heba yu ibalu nogo sibi wangabe biago heba balawa ogonibi dege lomabu yalu ibulene nga. Ani bialu nogo sibi igini hongolo biaru heba balawa kini ibuni hame ledadagua yu ibulene nga. Ibugua balawa kilogarama deria (14) ale hanalu ibiyagua nde olibe lini ibane karulape timbuninaga magi manda lida tebira ale hambu yalu ibulene nga.  
\v 8 Ani bialu kini ibugua i̱ mitangi bialu lotu lole ibalu panga haraba ni tagira ibiragohayagi wali agali ngoai haga hama ngagoria howa haraba kagoha anda ibiyadagua ibu lotu lai halu hariga ogoniha dege dai bialu tagira polene nga.   
\p
\v 9 Wali agali karumebi nde horo timbuni uruningi Anduane Homogo i̱ mitangi bialu lotu lole ibuwa tigua ege pabe haraba abene uyurahayagi ngagonaga anda ibirarume ti lotu lai halu panga haraba abene unurahayagi ngagoha tagira polene nga. Ti marume i̱ mitangi bialu lotu lole panga haraba abene unurahayagi anda ibirarume nde ti lotu lai howa panga haraba abene uyurahayagi ngagoha tagira polene nga. Ti anda ibiragoha lone dai nabi ege pabe haraba mende ngagonaga harabaha dai bialu tagira polene nga.  
\v 10 Kini ibu wali agaliru ege pabe harabani anda ibirangi ibu ti heba anda ibulene nga. Ani bialu wali agali tagira porangi nde ibu ti heba dege tagira polene nga.  
\v 11 Horo timbuni uruni harangi wali agali tigua lomabu ngule nogo bulumaga wangabe mbira mbira haru ibalu balawa widime wabini genda magi manda nu kira ale kilogarama deria (14) hanalu ibuwa nogo sibi wangabe mbira mbira haru halu balawa genda magi kilogarama deria (14) ogonibi dege hanalu ibulene nga. Ani bialu sibi igini hongoloru haru halu balawa hanalu ibiragome genda magi tini hame ledadagua hanalu ibulene nga. Tigua balawa kilogarama deria (14) ale hanalu ibiyagua nde olibe lini ibane karulape timbuninaga magi manda lida tebira ale hambu yalu ibulene nga.   
\p
\v 12 Kinidagome Anduane Homogo i̱naga loma ibunime hame ledadagua irani dai helonaga lomabi i̱nila ho gimbu bulene lomabi haru halu ibiyagua nde loma binigo mo ngiaga bu karu tigua ege pabe mende kagonaga panga ni tagira ibiragohayagi ngagoha anda ibilo dugupe holene nga. Ani dugua haragola kini ibu anda ibalu loma haru ibiyago loma binigo mo ngiaga karume lomabu ngialu kagola kini ibuni Sabada horongi biagadagua bialu tamuha panga haraba kawareni hondo holebira. Ibugua i̱ mitangi bialu lotu lai halu tagira poragola loma binigo mo ngiaga bu karume panga lone payatagi holene nga, lalu Anduane Homogohanda laya, lene.   
\s1 Horo bibahendengi egerebagiore lomabu ngulene mbira nga lenego ogo  
\p
\v 13 Anduane Homogohanda laabo halu lalu, Horo bibahendengi egerebagi nogo sibi igini hungubalua mali mbira hangu pene dere durubi nabi bayaleore kago hondowa haru ibalu Anduane Homogo i̱nihondo loma irani dai helonaga bo delole haru ibalimu. Loma ogoni horo bibahendengi ogonidagua biaabo halimu.  
\v 14 Horo bibahendengi loma ogoni delolene heba balawa widime wabini ngaru lomabu dela dege bilimu. Balawa ogoni lomabu delole howa genda magi manda kilogarama kirabi olibe lini ibane lida mbira heba odo biamaga howa lomabu delalimu. Egerebagi loma delolene mana ogoni horo bibahendengi wiaabo helo ani bilimu.  
\v 15 Egerebagi bibahendengi irani dai helonaga lomabu delole nogo sibi igini haru ibalu balawabi olibe lini ibanebi yalu ibugu biaabo holene nga.   
\s1 Kininaga dindi lalu te lenego ogo  
\p
\v 16 I̱ Anduane Homogo Bibahende Haru Haame Ho Haga kogo i̱na bi ogo laro. Kini ibugua ibunaga dindi mbirahayagi ngago ibu igini kago tu wu miyagua nde dindi ogoni ibu igini biagonaga wiaabo halu ibu waneigini aguanene mani holobadarunagabi wia a̱i̱ hene wulebira.  
\v 17 Anigo kini ibugua dindi mbira agali ibunaga biabe biahaga karu mbirago tu wu miyagua nde mani mali pira duria (50) howa dano henego \w Yadai\w* Bulene Mali ogoningi dindi ogoni kini ibuni mo yu dai bulebira. Ani bialu dindi ogoni kini ibu halu ibu waneigini mani holobadarunaga wiaabo hene wulebira. Dindi ogoni kini ibu igini aguanerunaga dege wiaabo holebira.\x + \xo 46.17 \xt LBM 25.8-17\x*  
\v 18 Ani bialu kini ibugua wali agali maru karunaga dindi page karulolene nawi. Ibu igini karu dindi tu wu mulene manda biyagua nde ibuninaga dindi winigo dege tu wu mulene nga. I̱naga wali agali bu karu ti dindi karulape tininaga dindiore wiaabo helonaga anidagua bulene nga, lalu Anduane Homogohanda laya, lene.   
\s1 Esegiele ibu tomo loma biniru dawaga anda hearia hendenego ogo  
\p
\v 19 Agali biagome i̱ haru halu puwa loma binigo mo miaga hearunaga anda habagi hene heago haneni hariga piagane Anduane Homogonaga anda heago abene uyurahayagi wiagoria haru pu helaya. Ani helayagola i̱ ogoriani howa handalu hewaria hariga wali agali ibagabu haga hama ogoni pialu ni paliragohayagi pupe hea.  
\v 20 Agali ogoni ibugua i̱hondo langialu lalu, Dindi ogoria loma binigo mo miaga karu ti ibalu ko biniru domo wahelonaga lomarubi mana ko bero mitangi nabi howa bialu hayarunaga lomabi aria podo wini maru loma binigo mo miaga ti nole dawagane henge ngagoni. Ani bialu balawa lomabu mini biaru aria podo wini maru ti nole hirulebira. Loma binigo mo miaga karu tigua wali agali bu haga hama ngagoria mo yalu tagira polene nawi. Tigua yu tagira piyagua nde wali agali bu karubi i̱ninaga habagi hene karu ale dege holebira.   
\p
\v 21 Ani lowa agali ogoni ibugua i̱ haru halu hama timbuni wali agali ngoai ho haga wiagoria tagira puwa hama ogoninaga gibuni maria wiagoha haru piyagola dindi hobane mbira mbira wiaru handai haru.  
\v 22 Hama timbuni ogoninaga gibuni maria hama emene maria ogobi dege dege wia. Hama emene uruni luninaga mida pira kira (20) wialu yangalenaga mida nguira (15) wia.  
\v 23 Ani bialu hobane maria ogoniha ege pabe bu mabu bini wia. Ege pabe ogoni gibuniha ira delaga henge mbira wia.  
\v 24 Ani wiago agali biago ibugua i̱hondo langialu lalu, Anduane Homogonaga andaha biabe bialu haga agali karume wali agalime nogo loma bule haru ibiniru barago aria podo wini maru ngaru mo yalu puwa ti nole dindi hobane ogoriani dawaga bulebira, laya, lene.   
\c 47  
\s1 Anduane Homogonaga andaha howa iba dugualu pialu hearia hendenego ogo  
\p
\v 1 I̱na de gandeba handalu hewaria agali handalehe biagome i̱ lone Anduane Homogo anda haraba biagoria haru dai biya. Ani haru dai biyagola handalu hewaria iba mbira anda biago harabaha howa dugualu ni tagira ibiragohayagi pupe halu pea. Iba o piyadagoni panga abene unurayaginaga loma biniru delaga dabu heagonaga andane dindiha ibalu piya.\x + \xo 47.1 \xt Seg 14.8, Yo 7.38, Mo 22.1\x*  
\v 2 Ani handalu hewaria dege agali handalehe biago ibugua i̱ haru halu Anduane Homogonaga anda pabe bu mabu bini heagonaga panga abene uyurayagi dugu wiagoha tagira pialu pabe headagua piriba. Puwa pabe headagua tagirahayagi pu mabu bialu panga haraba mende ni tagira ibiragohayagi puabo hariba. Ani pialu howa handalu hewaria iba peago abene unurayagi ege pabe heagonaga andane dindiha howa tagira pialu hearia handaru.  
\v 3 Ani peagola agali handalehe biagome mbirale mita magi manda biagane mbira yu howa iba peago lunaga mita magi handari duriani (500) manda biya. Manda buwa ibugua i̱hondo, Í̠ iba ogoni domaedeha, laya. Ani layagola domaede halu hewaria ibame i̱naga ge ayuende hangu namulaya.  
\v 4 Ani bialu emene iba tigida ubadaga halu lunaga mita magi handari duria (500) ale mende puwa ibugua i̱hondo iba lone domaedeha laya. Ani layagola domaede halu hewaria iba biagome i̱naga ge dulini namulaya. Ani biya handala lone unura mita magi handari duria (500) tebone lone puwa iba domaedeha layagola i̱ lone dege domaede halu hewaria i̱naga tombeni namu laya.  
\v 5 Ani bialu lone dege mita magi handari duria (500) ale puwa iba uli wiagoria i̱na domabe nahe iba do̱ lolene ale karulapeya.  
\v 6 Ani wiagola agali handalehe biago ibugua i̱hondo langialu lalu, Dindiali-o mbirale uruni bayuwaore de handai haribe, laya. Ani lalu iya haru iba angeha lone dai biriba.   
\p
\v 7 Ani dai buwa iba ange mende mendehabi i̱na ira dewa andaho hearia handaru.  
\v 8 Handalu hewaria agali handalehe biagome i̱hondo langialu lalu, Iba ogoni ni tagira ibiragohayagi howa pialu iba Yodana poragoha pupe halu iba kuyama mini Homene Iba bedagoha pupe haga. Iba kuyama Homene Iba ogoni ibu ibi dewawi berenego ai iba ogonime ibalu biramogo biragome iba bayale gagahe bira aribia haga.  
\v 9 Iba ogoni poragoha ema bialu piaga dewa karubi íbu ngoai halu wenabi iba ogoniha dewaore birulebira. Iba ogonime iba kuyama mini Homene Iba bedagoha puwa mo gagahe bayale berelolebira. Ani bialu dindi bibahende iba ogoni poragoha mbirale bibahendeore bayale holene yu hai holebira.  
\v 10 Iba ogoni poragoha ange angeha agalime wena minule wena nu yuwa Engedi dindi howa hama hama pialu Enegelaimi dindi ngagoria hairi holebira. Ani bialu howa tinaga wena nuru iba angeni nime yobilonaga mo yobia haga bulebira. Iba ogoniha wena bayale tara tara dewaore solowara timbuni Mediderenianaha bedarubi dege birulebira.\fig Iba ogoniha wena bayale tara tara dewaore ... dege birulebira.|src="HK 74b.tif" size="2" ref="(47.10)" \fig*  
\v 11 Anigo iba kaware maru puguaha berene bedaru bayale naholebira. Waru pugua uruniha iba berene bedaru ibi iba dege biraabo holebira.  
\v 12 Anduane Homogonaga andaha howa iba tagira piyagonaga ange mende mendehabi ira lini daga tara tararu anda haga bulebira. Ira uruni karunaga yuniru gau nale liniru ege bibahendengi daabo holebira. Wali agalime ira uruninaga liniru do nalu yunirume wali agaliha warago tara tara ngaru mo dabi haga bulebira laya, lalu agali handalehe biagome i̱ de gandeba handalu hewagoha i̱hondo lene.\x + \xo 47.12 \xt Mo 22.2\x*   
\s1 Isaraele hameigini tinaga dindi tubari winigo ogo  
\p
\v 13-14 Anduane Homogo Bibahende Haru Haame Ho Haga kago ibugua lalu, I̱na tínaga mamali Isaraelela bi hongohe mbira lo wialu Isaraele dindi ngagoni tínaga dindi ogoniore wiaabo helo ngulebero lo wirugoni. Ai dindi ogoni Isaraele wali agali hameigini homberia (12) kamidagua tu wu tahalimu. Tínaga hameigini kamidagua dindi hobane mbira mbira dege dege tahaga bilimu. Anigo Yosebe aguaneru ti dege dindi kira tu wu milimu. Dindi tubari ogodagua wulebira.  
\v 15-16 Dindi tubari uyurayaginaga iba solowara timbuni Medidereniana bedagoria howa pu banga bialu ni tagira ibiragohayagi pupe halu Hedelono tano tagira peda. Ogoriani howa pialu Hamada tano polene hariga ngagoria tagira pialu Sedada tano pialu Beroda tano puabo howa Sibiraimi tano anda peda. Sibiraimi tano ogoni ibu Damasagasa tanola Hamada tanola hengeneha nga. Ai tínaga dindi tubari Tigoni tano ngagoria pu bolangua ka. Tano ogoni ibu dindi hobane mbira mini Haurana ngagonaga tubari ngagoria peda.  
\v 17 Anidagua dege Isaraelenaga dindi tubari uyurayaginaga iba solowara timbuni mini Medidereniana bedagoria howa ni tagira ibiragohayagi pialu Enono tano ngagoria peda. Dindi abene unurayaginaga tubari ogoni ibu Damasagasa dindibi Hamada dindibi dombeneha bolangua halu peda.   
\p
\v 18 Ani bialu dindi tubari ni tagira ibiragohayaginaga Damasagasa Haurana dindila dombene ngagoria howa wu yu pialu Yodana iba tigida puabo halu unurayaginaga Isaraele baba Gileada dindinaga abene mbirahayagi tagira peda. Abene unurayaginaga tubari iba kuyama mini Homene Iba bedagoria tagira peda.   
\p
\v 19 Tubari unurayaginaga Tama tano ngagoria howa pialu ni paliragohayagi dindi mini Kadese Meriba wiagoria tagira peda. Ani bialu Iyibila tubariyagibi iba emene mbira pedago tigida iraga halu iba solowara Medidereniana bedagoria tagira peda.   
\p
\v 20 Ani bialu ni paliragohayaginaga tubari iba solowara Medidereniana bedagoria uyurayagi pu banga bialu amura Hamada tanoha tubari piyagoria gimbu bida.   
\p
\v 21 Ani ngago dindi ogoni tíni hameigini harimidagua baya hangu tu wu tahaga bilimu.  
\v 22 Hameigini mbira ibu dindi tu wu harago ibu aguanene holebiraru tigua ogoriani ha a̱i̱ holebira. Ani bialu dindi tu wu tahalu howa agali maru dindi tara howa ibuwa ti baba mandagi hene karu dindi tu mialu ti onerume tínaga dindi ogoriani howa waneigini taba hanarago helonagabi dindi tu wu mialu bilimu. Agali uruni tibi nde Isaraeleali dege ka lo manda bialu dindi tu wu tahalu howa tigatiga bilimu.  
\v 23 Isaraele hameigini mbira mbira tí kamidagua dindi tarali haru kamiru dindi tínime tu wu migi migi bilimu. Anduane Homogo Bibahende Haru Haame Ho Haga kogo i̱na bi lai harugoni laya, lene.   
\c 48  
\s1 Isaraele hameiginiru ti dindi podo ta henego ogo  
\p
\v 1 Anduane Homogohanda laabo halu lalu, Isaraelealinaga dindi tubari abene uyurahayaginaga amura iba solowara timbuni mini Medidereniana bedagoria howa pu banga bialu ni tagira ibiragohayagi polenaga tubari Hedelono tano ngagoria bolangua halu pialu Hamada tano polene hariga tagira piaga ngagoria bolangua halu pialu amura Enono tano timbuni ngagoria puabo halu pialu Damasagasala Hamadala hengene ngagoha bolangua halu pupe haga bida. Dana hameigini ti dindi ogonihayagi mulebira. Tinaga dindi gibuni ni tagira ibiragohayagi howa wima pialu ni paliragohayagi iba solowara timbuni Medidereniana bedagoria tagira polebira.  
\v 2-7 Ase hameigini ti Dana hameigininaga dindi ngagonaga abene unurahayagi podo wulebira. Nabadali hameigini tinaga dindi Ase hameigini dindi ngagonaga abene nirayagi podo wulebira. Ani bialu daliape howa nira Manase hameigini ti podo wulebira. Ani bialu nira dege Manase hameigini erembirahayagi Eberaimi hameigini ti podo wulebira. Ani bialu nira dege Eberaimi hameigininaga erembirahayagi Lubene hameigini ti podo wulebira. Ani bialu Lubene hameigini dindi ngago abene nirayagi Yuda hameigini ti podo wulebira. Tinaga dindi tubari ni tagira ibiragohayagi howa pialu ni paliragohayagi iba solowara timbuni mini Medidereniana bedagoria pupe haga bida, lene.   
\s1 Dindi mbira hanuni winigonaga bi lenego ogo  
\p
\v 8 Anduane Homogohanda laabo halu lalu, Yuda hameigini dindiha abene unurahayagi ngago galone bulenaga wiabagi ho ngelolene nga. Dindi ogoni yangalenaga magi kilomida homberiani (12) bolanguahe nga. Dindi ogoninaga tubari ni tagira ibiragohayagi ngagoria howa pialu mendehayagi amu iba solowara Medidereniana bedagoria tagira peda. Dindi ogoni hameigini maru tinaga dindi lunaga magi ngagobi dege ngago Anduane Homogo i̱naga anda dindi ogoniha dombeniore bu holebira.   
\p
\v 9-10 Dindi ogoni dombeneha i̱ninaga dindiore ngelo tu wiabagiho ngelalimu. Dindi ogoninaga haguane uyurahayagi pu paga halu herene unurahayagi pupe haga bida. Ani bialu lunaga magi kilomida homberiani (12) emene bolangua hene labolabo ngelo tu wilimu. Ani bialu arane ogobi labolabo kilomida duria helo tu wilimu. Dindi ogoni \w loma\w* binigo mo ngiaga karu tinaga wulebira. Anduane Homogo i̱naga anda dindi ogoniha hanuniore bu holebira.  
\v 11 Dindi ogoni i̱naga wiabagi heneore wulebirago Sadogo hameigini bu karu tinagaore wulebira. Bamba Isaraele wali agali maru tigua i̱hondo erembira ngialu piyangi \w Libai\w* hameigini tiguabi i̱ erembira ngialu piai hayago pelowa Sadogo hameigini ti dege i̱ wahalu nape haabo haya. Loma binigo mo ngiaga uruni tigua i̱naga biabe biahalu mini bilinahe howa i̱ talima ibalu baya hangu bialu haya.  
\v 12 Ani bialu hayagonaga i̱na dindi bayaleore ogoni ti mo turu halu tihondo mulebero. Ani merogola dindi ogoni wiabagi heneore mbira wulebira.  
\v 13 Libai hameigini karu ti dindi loma binigo mo ngiaga biarunaga dindi ngagoria dege gibuniha wulebira. Tinaga dindi ogoni luninaga magi kilomida homberiani (12) bolanguahe wialu aranenaga magi kilomida duria wialu bida.  
\v 14 Tigua dindi Anduane Homogo i̱ninaga tu wiabagiho ngelaramigo dindi maru ngagobi ndo bayaleore wiabagi heneore wulebira. Anidagua wulebirago manda bialu Libai hameigini bu karu tiguabi loma binigo mo ngiaga karu tiguabi dindi i̱ninaga ogoni agali mendeali helo mulenebi yolo bulenebi nawiore laro, lene.   
\p
\v 15 Ani bialu loma binigo mo ngiaga karunaga dindi ngago mendehayagi henge ngago luninaga magi kilomida homberiani (12) bolanguahe wialu arane yangalenaga magi kilomida kirani bolanguahe ngelo tu wilimu. Dindi ogoni i̱ninaga wiabagi helo ndo wali agali tinaga wuwa dindi dombeni tano ogoriani wulene nga. Dindi ogoriani tinaga anda bialu dindi henge maru wulebira.  
\v 16 Tano ogoninaga lene lene maria ngagoha ege pabe bu mabu bidagola ege pabe ogoni bibahendeha luninaga mida magi daosini kira handari kirani pira duria (2,250) holebira.  
\v 17 Tano ogoni tagirani dindi henge bame wia mabu bidagoria hama ogoni aranenaga mida magi handari mbirani pira kirani duria (125) wulebira.  
\v 18-19 Ani bidagoria wali agali tinaga tano dombeni wiragola hama ogoni podaki halu hama timbuni mende ni tagira ibiragohayagi wialu mende ni paliragohayagi wulebira. Dindi bame ngagoriani wali agali tanoha bu karu ti eru hongolene wulebira. Dindi ogonilabo luninaga magi mbiraore ogobi labolabo kilomida duria wulebira. Isaraele hameigini dindi bibahendeha howa ibalu tano ogoniha biabe bialu e hongolene wulebira.   
\p
\v 20 Wali agalinaga dindibi i̱ninaga dindibi emene mbira yami yami buwa Libai hameigini ti haragobi dindi timbuni dege mbira wulebira. Dindi ogoni timbuni magi gibuni maria ngagoria howa manda bialu kilomida homberiani (12) bolanguahe dege dege wulebira, laya.   
\p
\v 21-22 Dindi ogoni ni tagira ibiragohayagibi ni paliragohayagibi ngagolabo kininaga wulebira. Kininaga dindi ogoni i̱naga dindi ngogoria kawareni howa wuyu pialu ni tagira ibiragohayagi hameigini tara baba tubari ngagoria tagira polebira. Kininaga dindi mende ni paliragohayagi ngago ogoni i̱naga dindi ngogoria kawareni howa wuyu pialu iba solowara timbuni mini Medidereniana bedagoria tagira polebira. Ani bidagola kininaga dindi lene labolabo ngelowa Isaraele wali agali tinaga dindi nirayagi Libai hameigini loma binigo mo ngiaga agaliru tinaga dindi lirayagi ngelowa i̱naga dindi dombeneha wulebira. Ani bialu wali agali tinaga dindiha nirayagi tano timbuni wulebira. Yuda hameigininaga dindi abene uyurahayagi ngagola Beniyamini hameigini tinaga dindi abene unurahayagi wulebira, Anduane Homogohanda laya, lene.   
\s1 Isaraele hameigini maru dindi tu wu ta henego ogo  
\p
\v 23-27 Anduane Homogohanda i̱hondo laabo halu lalu, Isaraele hameigini maru bu karu tinaga dindi Beniyamini hameigini tinaga dindi biabe tara bulene o ngagonaga kaware dege dindi unurahayagi mulebira. Ani miragola unurayagi Simiono hameigini ti holebira. Ani halu Isaga hameigini ti Simiono hameigininaga dindi ngago abene unurahayagi dege mulebira. Ani bialu Sebulunu hameigini ti Isaga hameigini dindi ngago unurahayagi ngago mulebira. Gada hameigini ti dindi Sebulunu hameigini dindi ngago abene unurahayagi mulebira. Anidagua bialu tinaga dindi tubari ni tagira ibiragohayagi dindi tara baba tubari ngagoria howa wuyu pialu ni paliragohayagi iba solowara timbuni Medidereniana bedagoria tagira pugu bulebira.   
\p
\v 28 Dindi abene unurahayagi howa hameigini tara baba tubaribi Gada hameigini baba tubaribi Tama tano ngagoria howa ni paliragohayagi pu dai bialu iba Kadese Meriba laga bedagoria tagira polebira. Ani bialu emene ubadaga howa iba biruyu pedadagua Iyibiali baba tubari piaho wialu iba solowara timbuni mini Medidereniana bedagoria tagira polebira.   
\p
\v 29 Anduane Homogo Bibahende Haru Haame Ho Haga kogome bi ogo larogoni. Isaraele hameigini tíni dege dege dindi ogoni tíninaga wilo anidagua tu wu ta halimu, lalu Anduane Homogohanda laya lene.   
\s1 Yarusalemenaga ege pabe panga homberia (12) wulebiragonaga bi lenego ogo  
\p
\v 30-34 Anduane Homogohanda laabo halu lalu, Tano anda polenaga ege pabe bu mabu bidagonaga haraba homberia (12) wulebira. Ege pabe ogoninaga lene uyuyagibi unuyagibi ni ibiragohayagibi ni paliragohayagibi haraba tebira dege dege wigi bulebira. Ege pabe ogoninaga haraba mbira mbirani Isaraele hameigini homberia (12) biarunaga mini mbira mbira gilibu wigi bulebira. Ege pabe abene uyurahayagi haraba tebira ngagoria hameigini Lubenebi Yudabi Libaibi tebirali uruni tinaga mini wulebira. Ani bialu Yosebebi Beniyaminibi Danabi tinaga mini haraba abene ni tagira ibiragohayagi gilibu wigi bulebira. Ani bialu Simionobi Isagabi Sebulunubi tinaga mini haraba abene unurahayagi gilibu wigi bulebira. Ani bialu Gadabi Aserabi Nabadalibi tinaga mini haraba ni paliragohayagi gilibu wigi bulebira. Ege pabe ogoni luninaga magi lene bibahendeha mbiraore ogobi dege dege mida magi daosini kira handari kirani pira duria bolanguahe (2,250) holebira.\x + \xo 48.30-34 \xt Mo 21.12-13\x*  
\v 35 Ege pabe tano bu yaanda kagonaga mida magi daosini dira (9,000) bibahende holebira. Mani howabi laabo halu tano ogoniha mini Anduane Homogo Ogoniha Ka lolebira, lalu Anduane Homogohanda ogodagua bigi bulebira lalu Esegielehondo de gandebaha howa uruni bibahende walia hai hene.\x + \xo 48.35 \xt Yar 3.17, 33.16, Yol 3.21, Seg 2.10, Mo 21.3, 22.3\x*