\id EPH - Huli Bible [hui] -Papua New Guinea 2011 (web version -2013 bd) 
\h EBESA 
\toc1 Polohanda Keriso hameigini Ebesani hearuhondo beba ogo gilibu wia hene 
\toc2 Ebesa 
\toc3 Eb 
\mt1 Ebesa  
\mt2 Polohanda Keriso hameigini Ebesani hearuhondo beba ogo gilibu wia hene  
\imt1 Mbuga ogoha gilibu ngagonaga nemandi ogo  
\ip Polohanda Keriso hameigini Ebesani hearuhondo beba gilibu wia henegonaga irane ogo. Ngode Datagaliwabehanda manda bu winigo ogo. Ibugua hariha karubi ngarubi dindini karubi ngarubi bibahende wabinigo Keriso ibu haguane howa mo mbiraore halu mandagi helo manda bu henego ka, lalu lo nga. Be 1.10  
\ip Ogoni manda manda bu wini ngadagua tí Ngode Datagaliwabenaga wali agali kamirume mo mbiraore howa Keriso haguane helowa halimu, lalu bi hongo howa gilibu wia hene.  
\ip Pigane tenialu Ngode Datagaliwabehanda ibunaga wali agali dabowa tinaga ko domo wahene. Ani bialu ibunaga wali agaliruhondo ngulebero lo winigo heneneore ngulebero lalu manane ibu Dinini nginigo ogoninaga lo nga. Ani lowa ina Ngode Datagaliwabeha mbiraore kamago ogoni bime dege ndo horo bibahendeni kamagoria howa mbiraore hami̱ya lalu lo nga.  
\ip Ani manda buwa Ngode Datagaliwabenaga wali agalime Kerisoha ho gimbu bu holenego bi yobage lowa ogodagua lo nga.  
\io1 Mbira  
\io1 Keriso hameigini kamaru ina tingini ale lowa Keriso ibu inanaga haguane ale ka.  
\io1 Mende  
\io1 Keriso hameigini kamaru ina anda ale kama lowa Keriso ibu anda gene dunini ale ka.  
\io1 Tebone  
\io1 Keriso hameigini kamaru ina onene ale bedama lowa Keriso ibu agalini ale ka lalu lo nga.  
\ip Ina biamogo bia holene nawiore howa Ngode Datagaliwabehanda biamogo timbuni bia henego lalu lo nga. Kerisonaga gubalini holene ina walia henegobi ibuni inanaga koyane homo aribia henegobi inanaga ko bibahende birimago domo wahenegobi ina biamogo bulene nawi howa biamogo binigobi uruninaga lalu lo wigi bida.  
\iot Bu̱lu̱ baga buwa kuni gilibu ngago  
\io1 \ior 1.1-2\ior*  
\io1 Polohanda bi ala lenego \ior 1.3–3.21\ior*  
\io1 Kerisobi Keriso hameiginirubi \ior 4.1–6.20\ior*  
\io1 Kerisoha howa holene gahenge ngago \ior 6.21-24\ior*  
\io1 Lamaro bialu lenego  
\c 1  
\p
\v 1 I̱ Polo. Ngode Datagaliwabe ibuni hame leagome Keriso Yasunaga \w abosolo\w* kogoni. Ngode Datagaliwabenaga wali agali Keriso Yasuha ho gimbu bu haabo hene Ebesani kamiru tíhondo laro.\x + \xo 1.1 \xt Ab 18.19-21, 19.1, Lm 1.1, 1.7, 1 Ko 1.1, Kl 1.1\x*   
\p
\v 2 Ina Aba Ngode Datagaliwabebi Anduane Homogo Yasu Kerisobi libugua biamogo bia holenebi mo palia holenebi tíhondo ngilo hamelo ko.\x + \xo 1.2 \xt 2 Ko 1.2, Ga 1.3, Kl 1.2, Ta 1.4\x*   
\s1 Ngode Datagaliwabehanda Kerisoha howa dinininaga mo bayale holene ngaru nginigo ogo  
\p
\v 3 Ina Anduane Homogo Yasu Kerisonaga Aba Ngode Datagaliwabehanda Kerisoha howa ina mo turu halu dinininaga mo bayale holene bibahende dahuliya andaga tawe ngago nginigonaga iname ibuhondo ka̱i̱ lami̱ya.\x + \xo 1.3 \xt Eb 2.6\x*  
\v 4 Ibugua dindi haribi mbirale bibahende uruniha karubi ngarubi wa nabi howa ina Kerisoha ho gimbu bu howa ibunaga holoma̱yabi ko mbira para nahe bayaleore ibu deni holoma̱yabi ibugua ina dabene. Bambaore Ngode Datagaliwabenaga gubalini holeneme\x + \xo 1.4 \xt Yo 15.16, 17.24, Lm 8.28, Eb 5.27, Kl 1.22, 2 Te 2.13, 2 Ti 1.9, Ya 2.5, 1 Pi 2.20\x*  
\v 5 ina Yasu Kerisoni howa mo ibu waneigini hole manda bu hene. Ibuninaga hame leagome anidagua bini.\x + \xo 1.5 \xt Yo 1.12, Lm 8.29-30, 2 Ko 6.18, Ga 4.5\x*  
\v 6 Ngode Datagaliwabehanda ibunaga biamogo bia holene baya taraore ngago ibu Iginioreha howa inahondo turu halu bame nginigo mitangi bialu iname ibu mini yaraga hami̱ya.\x + \xo 1.6 \xt Md 3.17, Yo 3.35, Lm 3.24, 5.15, Kl 1.13\x*  
\v 7 Keriso homayagome ina golope halu iname ko birimago domo wahai hene kama. Ngode Datagaliwabenaga biamogo bia holene timbuniore nga ndobe.\x + \xo 1.7 \xt Ab 20.28, Eb 2.7, Kl 1.14, 1.20, Hi 9.12, 1 Pi 1.18-19\x*  
\v 8 Biamogo bia holene ogoni ibugua mbuni nabi howa timbuniore inahondo ngini.  
\p Ibu mini gigabiwi mani holene manda biahe howa  
\v 9 Ngode Datagaliwabehanda manda manda bu winidagua mana ala pani nahe ngelenego Kerisoni howa bia maro bulene manda bu winigo inahondo mo pani haya.\x + \xo 1.9 \xt Lm 16.25, Eb 3.4, 3.9-11, Kl 1.26, 2 Ti 1.9\x*  
\v 10 Ngode Datagaliwabehanda manda bu winigo ogo. Ibugua hariha karubi ngarubi dindini karubi ngarubi bibahende wabinigo Keriso ibu haguane howa mo mbiraore halu mandagi helo manda bu wini. Ogonidagua manda bu winigo bia maro bulene horo ibugua ala pongo bo winigo lola harangi bia maro bulebira.\x + \xo 1.10 \xt 1 Ko 3.22-23, Ga 4.4, Pb 2.9-10, Kl 1.16, 1.20, Hi 1.2, 1 Pi 1.20\x*   
\p
\v 11 Ngode Datagaliwabehanda bulebero lo wuwa bulene manda bu winidagua biai hene. Ibugua ina Kerisoha ho gimbu bu howa ibunaga wali agali holoma̱ya ina dabene. Ibugua ina dabenego irane ogo. Ibugua piganengi manda bu winigo mo tene howa bulebero lo winidagua bini.\x + \xo 1.11 \xt Lm 8.17, 8.28-29, Kl 1.12, Ta 3.7, Ya 2.5, 1 Pi 1.4\x*  
\v 12 Anigo Kerisohondo pigane mini dunu bia ho hene kamaru iname ibunaga mini daliga taraore ngago yaraga halu hami̱ya.   
\p
\v 13 Henene lolene Bi Mana Debene ngagome tí pele mulene mo yu halimulonaga langinigo hale howa tí Kerisohondo mini mbiraore wirimigoni. Ani wirimigola Ngode Datagaliwabehanda ibu Dinini ngulebero lo winidagua tíhondo ngiyagome tí ibuninaga kami lalu walia hene.\x + \xo 1.13 \xt 2 Ko 1.22, 6.7, Eb 4.30, Kl 1.4-6\x*  
\v 14 Ngode Datagaliwabehanda ibunaga wali agali karuhondo ngulebero lowinigo heneneore mo yuleberami lalu manane ibunaga Dinini ngini. Ngode Datagaliwabehanda ina ibunaga kamaru golope hai holebira lalu Dinini ngiyago ibugua ina langiaga. Anigo Ngode Datagaliwabenaga mini daliga taraore ngago yaraga halu hami̱ya.\x + \xo 1.14 \xt Lg 21.28, Lm 8.23, 2 Ko 1.22, 1 Pi 2.9\x*   
\s1 Polohanda Ngode Datagaliwabehondo bi lenego ogo  
\p
\v 15 Irane ogonigo tígua Anduane Homogo Yasuhondo mini mbiraore wu kamigobi Ngode Datagaliwabenaga wali agali bibahende karuhondo gubalini ho kamigobi hale harungi\x + \xo 1.15 \xt Kl 1.4\x*  
\v 16 i̱na Ngode Datagaliwabehondo tínaga ka̱i̱ laabo halu ko. I̱na ibuhondo bi lalu howa tí mitangi bialu tínaga la halu\x + \xo 1.16 \xt Pb 1.3-4, Kl 1.3, 1 Te 1.2\x*  
\v 17 ina Anduane Homogo Yasu Keriso ibunaga Ngode Datagaliwabe wá taraore holene Aba kago ibugua tíhondo ibu Dinini ngilo i̱na mibe lalu la haruli. Dinini ogoni ibugua tí mini mo gigabi halu Ngode Datagaliwabe manda bilimulo walia holebira.\x + \xo 1.17 \xt Kl 1.9\x*  
\v 18 I̱na tínaga bi la halu kogo ogo. Tí mini duguahe howa ibunaga manda bulene ngago manda bilimulobi Ngode Datagaliwabehanda tí mini dunu bia ho halimulo olenegonaga irane manda bilimulobi la halu ko. Ibugua ibunaga wali agalihondo turu holene bayaleru ngulebero lowini uruni baya burugule ngago manda bilimulobi la halu ko.\x + \xo 1.18 \xt Ab 26.18, Eb 2.12, 4.4, Kl 1.12\x*  
\v 19-20 Ibuhondo mini mbiraorewi kamaru inaha ibugua hongo tara howa biabe birago hongo ogoni manda bilimulobi la halu ko. Ibugua hongo timbunime Keriso homayago mo heya howa dahuliya andagaha ibunaga gi tigahayagi berelenego hongo ogoni dege inaha ka.\x + \xo 1.19-20 \xt Eb 3.7, Kl 1.11, 1.29, 2.12\x*\x + \xo 1.19-20 \xt Iba 110.1, 2 Ko 13.4, Kl 1.16, 2.10-12, 3.1, Hi 1.3\x*  
\v 21 Keriso ibu dahuliya andaga kagoria howa hari daligaha haru haga karubi hondo haga karubi hongo holene yu karubi homogo karubi ti bibahende bolangua hai halu Keriso ibu daligaore howa ibugua ti haru ka. Hongo tara taranaga mini dindini áyu ngarubi awe wulebirarubi bibahende bolangua hai halu ibu mini daligaore ka.\x + \xo 1.21 \xt Lm 8.38, Pb 2.9-10, Kl 2.10, 2.15, Hi 1.4\x*  
\v 22 Ngode Datagaliwabehanda bibahende karubi ngarubi Kerisonaga geha mo wuwa Keriso hameigini karunaga Haguaneore daliga helo Keriso helene.\x + \xo 1.22 \xt Iba 8.6, Md 28.18, Kl 1.18, Hi 2.7\x*\x + \xo 1.22 \xt Kl 1.18\x*  
\v 23 Keriso hameigini karu ti Kerisonaga tingini howa ibu heba homane mbiraore helo helaga ka. Homane mbiraore howa tinaga tene Keriso ibu howa mbirale bibahende ibuha hangu maro bida.\x + \xo 1.23 \xt Lm 12.5, Eb 4.10, 4.15, Kl 2.9, 3.11\x*   
\c 2  
\s1 Ina homene ale hemaria Ngode Datagaliwabehanda mo hela dai bia henego ogo  
\p
\v 1 Ala tígua Ngode Datagaliwabehondo manga harimigonagabi ko birimigonagabi tí dinini homene ale harimigoni.\x + \xo 2.1 \xt Eb 4.18, Kl 1.21\x*\x + \xo 2.1 \xt Kl 2.13\x*  
\v 2 Ani bialu harimingi dindini mana ko wiaru hamelo harimigoni. Hari daligaha damanaga hongo holene haru haga kagome bia layadagua tígua bialu harimigoni. Haru haga ogonime áyu wali agali Ngode Datagaliwabe mana wahaga karu ti haru haga ka.\x + \xo 2.2 \xt Yo 12.31, Eb 5.6, 6.12, Kl 1.21, 3.6-7, Ta 3.3\x*  
\v 3 Ina bibahende kamarumebi tigua bialu henedagua dege harimagoni. Iname inanaga mini kome dimagoli holene wiadagua dimagoli halu inanaga tinginimebi minimebi hame layadagua bialu harimagoni. Wali agali bibahende hearubi dege hemaria Ngode Datagaliwabenaga lembo holene tibi inabi nolene wini.\x + \xo 2.3 \xt Lm 5.12, Ga 5.16, Kl 3.6, Ta 3.3, 1 Pi 4.3\x*   
\p
\v 4 Ani winigoyu Ngode Datagaliwabehanda inahondo gubalini timbuniore howa ibunaga dara halu biamogo bulene daliga gibiore nga.\x + \xo 2.4 \xt Lg 15.24, 15.32, Ab 15.11, Lm 5.6-10, 6.4-5, 6.13, 10.12, Eb 1.7, 2.1, 2.7, Kl 2.12-13\x*  
\v 5 Ani ngago iname Ngode Datagaliwabehondo manga ho howa dinini homene ale hemaria ibugua ina Keriso heba holoma̱ya hela dai bia hene. Ani biyago Ngode Datagaliwabenaga biamogo bia holeneme tí pele mulene yu kamigoni.  
\v 6 Ina Keriso Yasu heba ho gimbu bu howa dahuliya tawenaga iname Keriso heba haru holoma̱ya Ngode Datagaliwabehanda ina Keriso heba mo heyamaga ho helene.\x + \xo 2.6 \xt Eb 1.20, Kl 2.12\x*  
\v 7 Ibugua ani binigo irane ogo. Ibugua ina Keriso Yasuha howa inahondo gubalini holene walia hayagome ibunaga biamogo bia holene daliga gibiore ngago walia ho wiaabo helo ani bini.\x + \xo 2.7 \xt Eb 1.7\x*  
\v 8 Ngode Datagaliwabehanda biamogo bia henegome tí ibuhondo mini mbiraore wuwa pele mulene yu kami. Tíni bayale birimigome ndo Ngode Datagaliwabehanda turu halu bame ngini.\x + \xo 2.8 \xt Yo 4.10, Lm 4.16, 10.14-17, Pb 1.29, 2 Ti 1.9, Hi 6.4\x*  
\v 9 Tíni biabe birimigonaga yolo ndogo tí mine holene henge nawi.\x + \xo 2.9 \xt Lm 3.20, 3.27, 4.2, 1 Ko 1.29-31, 2 Ti 1.9\x*  
\v 10 Ngode Datagaliwabehanda ina áyu kamagobi holoma̱ya wabini. Ina Keriso Yasu heba ho gimbu bu howa iname biabe bayale ibugua manda manda bu winigo ngaru bialu holoma̱ya Ngode Datagaliwabehanda ina wabini.\x + \xo 2.10 \xt 1 Ko 3.9, 2 Ko 5.5, 5.17, Eb 4.24, Ta 2.14\x*   
\s1 Ina Kerisoha ho mbiraore kamago ogo  
\p
\v 11 Yu wali agali ndo tara tara kamiru tí hondowa Yu wali agalime, Tí \w dongone\w* podo mabu biagane mana nabiaga kamigo ina biaga kama, laga kago agalime tinaga dongoneni biaganaga larago. Tí kamiruhondo larogo tí ala howa bialu harimigo mitangi bu dai bilimu.\x + \xo 2.11 \xt Lm 2.28-29, 1 Ko 12.2, Eb 5.8, Kl 1.21\x*  
\v 12 O biagoningi tí Kerisola mbiraore ndo dala hangu ho harimigoni. Ngode Datagaliwabenaga wali agali ibugua dabeneru aria ndo tí tara harimigoni. Ngode Datagaliwabehanda ibunaga wali agalihondo, Ngulebero, lalubi, Bulebero, lalubi lowinigo mo tene howa habo nalolene bi lowiniru tíhondo ndo lowini. Tí dindi ogoria howa Ngode Datagaliwabe kagobi pele mulene yulenaga bi manabi manda nabi howa mini dunu bia ho holene irane nawi howa tíni hanguore harimigoni.\x + \xo 2.12 \xt Lm 9.4, 9.8, Ga 4.8, Eb 4.18, Kl 1.21, 1 Te 4.5, 4.13\x*  
\v 13 Tí ala kaundiaha harimigoyu Yasunaga darama pelayagome áyu tí Keriso ibu heba ho gimbu bu howa tí kaware mo helenego kamigoni.\x + \xo 2.13 \xt Ga 3.28, Eb 2.17, Kl 1.20\x*  
\v 14 Keriso ibunime Yu wali agalibi wali agali tara tarabi mo mbiraore hayagome mo palia holene ina nginigo nga. Tí ala hangu hangu howa waitigi ho harimigome tu winigo ibugua tinginime gialo wahene.\x + \xo 2.14 \xt Ais 9.6, Mai 5.5, Yo 16.33, Ab 10.36, 1 Ko 12.13, Kl 1.20, 2.14\x*  
\v 15 Yu wali agalibi Yu wali agali ndo tara tarabi howa wali agali mbiraore ibu heba ho gimbu bu helo tiga bialu mo mbiraore hole ibugua Yu wali agalinaga \w Mana\w* lowinigome bia laradagua bulenebi mana mbira mbira bulenebi nabulenebi mo wahene. Ani bialu ibugua mo palia hene.\x + \xo 2.15 \xt 2 Ko 5.17, Ga 6.15, Eb 4.24, Kl 1.20-22, 2.14, 2.20\x*  
\v 16 Keriso ibu ira bangani homayagome wali agalinaga handabe manga holenebi keba holenebi bibahende winiru mo wahai hene. Ibugua ani biyagome Yu wali agalibi wali agali tara tara bibahenderubi hameigini mo mbiraore howa Ngode Datagaliwabe karia haru dai bini.\x + \xo 2.16 \xt Seg 9.10, Lm 6.6, 8.3, Kl 1.20, 2.14\x*  
\v 17 Ani haru dai buwa Keriso ibugua tí wali agali ala Ngode Datagaliwabe kagoria kaundia hene kamiruhondobi wali agali Ngode Datagaliwabe kagoria kaware heneruhondobi mo palia holenenaga Bi Mana Debene langule ibini.  
\v 18 Kerisoni howa ina Yu wali agalibi wali agali tara tarabi bibahende kamaru Ngode Datagaliwabe Dinini mbiraore ibuha howa ina Aba karia ibabehe kama.\x + \xo 2.18 \xt Ais 57.19, Seg 9.10, Ab 2.39, Lm 5.1\x*\x + \xo 2.18 \xt Lm 5.2, 1 Ko 12.13, Eb 3.12, Hi 4.16, 1 Pi 3.18\x*   
\p
\v 19 Anigo Yu wali agali ndo tara tara kamiru tí hameigini tarabi dindi taralibi ala harimigobi ndo kami. Áyu tí Ngode Datagaliwabenaga wali agali heba ho mbiraore howa ibunaga waneiginiore kamigoni.\x + \xo 2.19 \xt Ga 6.10, Eb 3.6, Pb 3.20, Hi 12.22-23\x*  
\v 20 \w Abosolobi\w* Ngode Datagaliwabe mana \w latagi\w* haga henerubi tigua anda gumuni mo winigoria anda genedane Keriso Yasu ibuni howa tíbi anda bu gimbu bini kami.\x + \xo 2.20 \xt Md 16.18, 1 Ko 3.9-11, Ga 2.9, Mo 21.14\x*  
\v 21 Anda ogoni Keriso ibugua yani ho howa anda Anduane Homogohondo loma bia ho helo mo anda halu ka.\x + \xo 2.21 \xt 1 Ko 3.16-17, 2 Ko 6.16, Eb 4.15-16, Kl 2.19\x*  
\v 22 Ibu heba ho gimbu bu howa tíbi wali agali marubi anda mbiraore ale bu gimbu bima iraga halu biala kami. Ngode Datagaliwabe ibunaga Dinini anda ogoniha ho kagoni.\x + \xo 2.22 \xt 1 Pi 2.5\x*   
\c 3  
\s1 Polohanda wali agali tara taranaga biabe bia henego ogo  
\p
\v 1 Irane ogoninaga i̱ Polo tí Yu wali agali ndo tara tara kamirunaga koyane Keriso Yasunaga garabaya agali kogoni howa i̱na Ngode Datagaliwabehondo tínaga bi la haruli.\x + \xo 3.1 \xt Eb 4.1, Pb 1.7, 1.13, Pm 1, 9\x*  
\v 2 Tí bayale halimulonaga Ngode Datagaliwabehanda ibunaga biamogo bia holene nginigome biabe ogoni i̱na berogo bia holiya nginigo tí hale harimigoni.\x + \xo 3.2 \xt Kl 1.25\x*  
\v 3 Ngode Datagaliwabehanda manda manda bu winidagua mana ala pani nahe ngelenego i̱hondo mo pani haya. Ogoninaga tene nemandi tongolo baga buwa abale gili birugoni.\x + \xo 3.3 \xt Eb 1.9-10, Kl 1.26\x*  
\v 4 Tígua ogoni daga larimiyagua mana ala pani nahe Kerisoha do henego i̱ manda bu kodagua tí manda buleberami.\x + \xo 3.4 \xt Kl 1.26-27\x*  
\v 5 Ngode Datagaliwabehanda mana ala pani nahe ngelenego ogoni wali agali ala heneru ti nalamini. Áyu ibugua ibu Dininime ibunaga \w abosolo\w* loma bia hene karubi Ngode Datagaliwabe mana \w latagi\w* haga karubi tihondo mo pani ho nga.  
\v 6 Ibugua mana ala pani nahe ngelenego ogo. Bi mana debene ngagome wali agali tara tarabi Yu wali agali heba Ngode Datagaliwabenaga turu holene ngaru tihondobi miaga ka. Tibi inabi homane mbiraore kamago Ngode Datagaliwabehanda Keriso Yasuha howa, Ngulebero, lalu lowinigo tibi mo yu ka.\x + \xo 3.6 \xt Ga 3.14, 3.28-29, Eb 2.13-19\x*   
\p
\v 7 Ngode Datagaliwabehanda i̱hondo biamogo bia holene turu halu bame ngialu i̱ bi mana debenenaga biabe biaga holiya mo helene. I̱na ibunaga biabe bia holiya ibunaga hongome i̱ mo hongo haya.\x + \xo 3.7 \xt Kl 1.23-25\x*  
\v 8 Ngode Datagaliwabenaga wali agali maru karubi ndo i̱ dindihaore kogoni. I̱ ogonibi kogoni howa Kerisonaga baya burugule wiaabo hagane ngarunaga Bi Mana Debene wali agali tara tara karu hale helo i̱na lamule poliyanaga Ngode Datagaliwabehanda ngiya.\x + \xo 3.8 \xt 1 Ko 15.9-10, Ga 1.16, Eb 1.7, Kl 1.27, 1 Ti 1.13-15\x*  
\v 9 Ngode Datagaliwabehanda manda manda bu winidagua wali agali bibahende karume ibunaga mana ala pani nahe ngelenego galone hendelo i̱na latagi holiyabi ibugua biabe ogoni i̱hondo ngiya. Ngode Datagaliwabe ibu bibahendeore wabiaga howa ibugua galone ogoni bambaore howa pani nahe ngelaabo henego irane ogo.\x + \xo 3.9 \xt Lm 16.25, 1 Ko 2.7, Eb 1.9, Kl 1.16, 1.20, Hi 1.2\x*  
\v 10 Áyu o kamangi Keriso hameigini kamarume hariha haru haga karubi hongo tara tara karubi Ngode Datagaliwabehanda ibu mini gigabinaga manda bulene tara tara ngaru manda bilo ibugua ibunaga mana ala pani nahe ngelaabo hene.\x + \xo 3.10 \xt Lm 8.38, 11.33, Eb 1.21, 1 Pi 1.12\x*  
\v 11 Ngode Datagaliwabehanda manda manda bu wiaabo henedagua ogoni binigo ina Anduane Homogo Keriso Yasu ibuha howa bumaro bini.  
\v 12 Ina Keriso heba ho gimbu bu howa ibuhondo mini mbiraore wirimarume ina Ngode Datagaliwabe deni gi nahe hada payabu howa pu holene henge nga.\x + \xo 3.12 \xt Yo 14.6, Lm 5.2, Eb 2.18, Hi 4.16\x*  
\v 13 I̱na tínaga tandaga na harogo mitangi bialu tí genda nahalimulo hame ledogo ogoni. Tandaga ogoni narogo tí bayale halimulonaga nalu ko.\x + \xo 3.13 \xt Kl 1.24\x*   
\s1 Kerisonaga gubalini holene ogo  
\p
\v 14 Ai bi ala lala harugo aria laro. Irane ogoninaga Aba deni i̱na ge duli hangu ho biruwa ibuhondo bi lalu ko.  
\v 15 Wali agali hameigini tara tara dahuliya andagani karubi dindini karubi bibahendenaga Aba ibu howa tinaga mini henene mo yu ka.\x + \xo 3.15 \xt Eb 1.10, Pb 2.9-11\x*  
\v 16 Ngode Datagaliwabenaga hongo taraore holene timbuniore ngago tíninaga bu habaneha hongo halimulo hongo ogoni ibu Dininime ngilonaga i̱na ibuhondo mia lalu bi la halu kogoni.\x + \xo 3.16 \xt Lm 9.23, 2 Ko 4.16, Pb 4.19, Kl 1.11, 1.27\x*  
\v 17 Tígua ibuhondo mini mbiraore wu kamigome Keriso ibugua tínaga bu habaneha íbu helobi tínaga pinibi tenebi gubalini holeneha wiaabo helonaga bi la halu kogoni.\x + \xo 3.17 \xt Yo 14.23, Eb 2.22, Kl 1.23, 2.7\x*  
\v 18 Tíbi Ngode Datagaliwabenaga wali agali bibahende karubi tígua Kerisonaga gubalini holene magi lirahayagibi nirahayagibi lunagabi aranenagabi nguini maro nabi ngago tí manda bilimulonaga hongo ngilo i̱na Ngode Datagaliwabehondo mia lalu bi la halu kogoni.\x + \xo 3.18 \xt Yo 1.16, Lm 10.3, 10.11-12, Eb 1.18, 1.23, Kl 2.2, 2.9-10\x*  
\v 19 Kerisonaga gubalini holene ogoni tígua manda biai nahabeheorego lowa ibunaga gubalini holene manda bu halimulo hame ledo. Ani manda beramigola Ngode Datagaliwabenaga mbirale baya burugule tara tara ibuniha ngaru tíha wu to̱lai holebira.   
\p
\v 20 Iname ngi laramadaguabi mitangi bidamadaguabi ndo ibugua ibunaga hongo inaha biabe bialu kagome ngia tago ha bia tago ha bigi bialu kago\x + \xo 3.20 \xt Lm 16.25, 1 Ko 2.9, Kl 1.29\x*  
\v 21 Keriso hameigini karuha howabi Keriso Yasuha howabi Ngode Datagaliwabenaga mini mo yaraga haabobo bilo lalu aniore bilo hamelo ko.\x + \xo 3.21 \xt Lm 11.36, 16.27, Hi 13.21\x*   
\c 4  
\s1 Keriso hameigini kamaru ina Kerisonaga tingini homane mbiraore kamago ogo  
\p
\v 1 I̱ Anduane Homogonaga biabe biaga kogonaga garabaya agali kogo i̱na tíhondo hongo howa laro. Ngode Datagaliwabehanda tí olayangi howa tíhondo agua bialu holene nga layadaguaore bialu halimu.\x + \xo 4.1 \xt Eb 3.1, Pb 1.27, Kl 1.10, 1 Te 2.12, Pm 1, 9\x*  
\v 2 Tíni mo dindi ho ha hogorale bu ha ema nabi howa hibu la bigi bialu halimu. Tínaga gubalini holene walia halu tíni biamogo bigi bigi bialu halimu.\x + \xo 4.2 \xt Ab 20.19, Ga 5.22-23, Kl 3.12-13\x*  
\v 3 Mo palia holeneme tí mo bimaga ho helaga ngagoni. Mo palia holene ogonime mini mbiraore holene Ngode Datagaliwabe Dinini ibugua ngiaganego bayuwa yania ho halimu.\x + \xo 4.3 \xt Kl 3.14-15\x*  
\v 4 Mini dunu bia ho holene tínaga wilo Ngode Datagaliwabehanda tí olenego ogoni mbiraore ngadagua tingini homane mbiraorebi ibu Dininibi mbiraore ka.\x + \xo 4.4 \xt Lm 12.5, 1 Ko 12.4, 12.11-12, Eb 1.18, 2.16-18\x*  
\v 5 Anduane Homogobi mbiraore ka. Mini mbiraore wulenebi mbiraore nga baboraya bulenebi mbiraore nga.\x + \xo 4.5 \xt Yo 10.16, 1 Ko 1.13, 2 Ko 11.4, Ga 3.27-28, Hi 6.6\x*  
\v 6 Ngode Datagaliwabe mbiraore kago ibu wali agali bibahendenaga Aba howa ibu bibahendenaga Anduane Homogo ka. Ibugua ina bibahendeha howa biabe biaga ka.\x + \xo 4.6 \xt Lm 11.36, 1 Ko 12.6\x*   
\p
\v 7 Keriso ibugua ibunaga biamogo bia holene ngadagua ina bibahende hangu hanguhondo biamogo bulene muguberu ta halu ngini.\x + \xo 4.7 \xt Lm 12.3, 12.6, 1 Ko 12.11\x*  
\v 8 Anduane Homogonaga \w mbugani\w* lo ngadagua ogo,\x + \xo 4.8 \xt Iba 68.18, Kl 2.15\x*  
\q1 Ibu hari daligahaore iraga halu pialu howa  
\q1 ibugua garabayaru dewa haru pene.  
\q1 Ibugua wali agalihondo biamogo bulene muguberu ta halu mini,  
\m lalu gilibu nga.  
\v 9 Anigo, Ibu hari daligahaore iraga halu pialu, ledagoni irane agibe. Bi ogoninaga irane ogo. Ala ibu dindihaore dalini.\x + \xo 4.9 \xt Yo 3.13\x*  
\v 10 Dindihaore dalinigo ogoni ibu dege hari daligahaore dahabaneha iraga halu penego mbiraore ibu ka. Ibugua daligahabi dindihabi bibahendeoreha ibuni haame holenaga ani bini.\x + \xo 4.10 \xt Hi 4.14, 9.24\x*  
\v 11 Ibunioreme wali agalihondo biamogo bulene muguberu ta halu mini. Mugube uru ale mini. Maru ti \w abosolo\w* helo mialu maru ti Ngode Datagaliwabe mana \w latagi\w* haga helo mialu maru ti Bi Mana Debene lamima piaga helo mialu maru ti wali agali haru haga helobi lawai haga helobi mialu bini.\x + \xo 4.11 \xt Lm 12.7, 1 Ko 12.28, 2 Ti 4.5\x*  
\v 12 Keriso ibugua ani binigo irane ogo. Ngode Datagaliwabenaga wali agali bibahendeme ibunaga biabe bia helo mo manda manda bia howa Kerisonaga tingini mo anda halu hongo helonaga ibugua ani bini.\x + \xo 4.12 \xt 1 Ko 12.7, Eb 1.23, 2 Ti 3.17\x*  
\v 13 Ani biyagome ina bibahende mandagi howa ina mini mbiraore wulenebi Ngode Datagaliwabenaga Igini manda bulenebi mbiraore holeberama. Ina wali agali mini bogabi howa Keriso ibu daliga timbuniore kadagua inabi anda ho daga howa holeberama.\x + \xo 4.13 \xt 1 Ko 14.20, Kl 1.28, 2.2\x*  
\v 14 Ani howa waneiginime mini dewa nawi hagadaguabi puyabume iba mo yaribu bia haragola mbirale ibani ngago pulo yu puibu daibu biagadagua bialubi agali mo hondo hagane bu karume wali agali ko ngagoha pelonaga mo guya halu mana tinime wabu wini ngaru hangu lawai haga bu karubi ndo holeberema.\x + \xo 4.14 \xt Ais 28.9, 1 Ko 14.20, 2 Ko 2.17, Hi 13.9\x*  
\v 15 Ani ndo ina bibahendeme mana beramaligo bialu howa gubalini holenebi henene hangu lolenebi mo tene halu inanaga haguane Keriso ibuha anda ho daga holene nga.\x + \xo 4.15 \xt Eb 1.22, 4.25, Kl 1.18, 1 Yo 3.18\x*  
\v 16 Ibugua ina haru haragola tinginini hene dege bibahende tigatiga gimbu buwa gimbu biaga kuni kagome tingini mo mbiraore haga ka. Tinginini hene degeru hangu hangu howa tini biabe bulene ngadagua bialu kagola gubalini holeneme tingini ibuni bibahende mo anda halu hongo halu haga.\x + \xo 4.16 \xt Kl 2.19\x*   
\s1 Kerisoha holene gahenge ngago ogo  
\p
\v 17 Anigo i̱na Anduane Homogonaga minini howa bi mbira buleneore ngago manda bialu larogo ogo, Wali agali Ngode Datagaliwabe manda nabi karume hagadagua nahalimu. Tigua galone ndo mitangi biagabi\x + \xo 4.17 \xt Lm 1.21, 1 Pi 1.14\x*  
\v 18 tinaga mini arumahebi ka. Tinaga miniha manda nawibi mangahebi kago holene gahenge Ngode Datagaliwabehanda ngiaganego tihondo namini ka.\x + \xo 4.18 \xt Ab 26.18, Ga 4.8, Eb 2.12, 1 Te 4.5\x*  
\v 19 Ti taga holene embedahe howa tini mana ko bulene ngagohondo mialu mana ko tara tara nabuleneore ngaru biaabo halu haga ka.\x + \xo 4.19 \xt Kl 3.5\x*   
\p
\v 20 Kerisonaga mana lo manda birimigo ogonibi ndo.  
\v 21 Ibunaga mana tí hale harimigoni. Tí ibunaga talima piaga howa Yasuha henene lolene ngago tigua tí lawai hayagoni.  
\v 22 Tíbi nde mini ala tawenaga biaga wiaru dege bialu harimigoni wahalimu. Mini ala tawe ogonime tíni mo hondo halu mo ko holenebi mana ko ngaru bulenaga tínaga bu miniha dimagoli holenebi ngaru wahai halimu.\x + \xo 4.22 \xt Lm 6.6, 8.13, Eb 2.2-3, 4.17, Kl 3.9, Hi 12.1, 1 Pi 4.3\x*  
\v 23 Tínaga gubalinibi minibi mo gahengeore holene nga.\x + \xo 4.23 \xt Lm 12.2, Kl 3.10\x*  
\v 24 Mini gahenge karulalimu. Ngode Datagaliwabehanda mini gahenge ibuni ale wabinigo ogonime holene heneneorebi mana tigabibi bayalebi walia haga.\x + \xo 4.24 \xt Pig 1.26, Lm 6.4, Eb 2.10, Kl 3.10\x*   
\p
\v 25 Anigo ina bibahende Kerisonaga tinginiha hene dege howa homane mbiraore kamagonaga tindule wahalu tí bibahendeme tíni Keriso hameiginiruhondo henene dege laga bialu halimu.\x + \xo 4.25 \xt Seg 8.16, Lm 12.5, Kl 3.8-9\x*  
\v 26 Tí keba harimiyagua nde keba ogonime tí ko maru bilimulo mo bia holigo de hondo halimu. Tígua keba ho haabo ho kamiore dege ni paluani hondo halimu.\x + \xo 4.26 \xt Iba 4.4, Ya 1.19-20\x*  
\v 27 Dama Heyolabe anda ibilo henge mbira namilimu.\x + \xo 4.27 \xt 2 Ko 2.10-11, Ya 4.7, 1 Pi 5.9\x*  
\v 28 Wali agali ala pagebibi heneru ti lone page nabi ti henemane holenagabi wali agali yagibano karu biamogo bulenagabi ti yolo biabe bulene nga.\x + \xo 4.28 \xt 1 Te 4.11, 2 Te 3.8, 3.11-12\x*  
\v 29 Bi lalu howa mo ko holene bi nalalimu. Bi bayale biamogo bulene bibi mo hongo holene bibi tíni buru padamiru ale mo yu anda ibulene bibi bi uruni ale lalimu. Tígua bi ani laramigome wali agali hale hararu ti mo bayale holebira.\x + \xo 4.29 \xt Eb 5.4, Kl 3.8, 3.16, 4.6, 1 Te 5.11\x*  
\v 30 Tígua Ngode Datagaliwabe Dinini mo tandaga nahalimu. Tí Ngode Datagaliwabenaga kami lalu walia holene ibunaga Dinini íbu ka. Hamaro bulene Horo ibirangi Ngode Datagaliwabehanda tí golope heneneore holebira lalu manane ibunaga Dinini íbu kagoni.\x + \xo 4.30 \xt Ais 63.10, Lm 8.23, Eb 1.13-14, 1 Te 5.19\x*  
\v 31 Handabe manga ho haabo holenebi gungu abale porabu para holenebi keba holenebi wahai halimu. Bi ko dalimu lolenebi mege bialu lolenebi nalalimu. Bu habaneha lembo holene ale mbira nawilo halimu.\x + \xo 4.31 \xt Kl 3.8, 3.18-19, Ta 3.2-3, 1 Pi 2.1\x*  
\v 32 Ani nabi turubini dege bigi bialu bu habane gedaore howa mbiralime emene liahe mbira birago la nabi wahaga haga bialu Ngode Datagaliwabehanda Kerisonaga minini howa tínaga ko birimigo domo wahayadagua tíguabi nde la nabi wahalimu.\x + \xo 4.32 \xt Md 6.14, 18.22-35, Mg 11.25, 2 Ko 2.10, Kl 3.13\x*   
\c 5  
\s1 Wá holene kagoria holene ngago ogo  
\p
\v 1 Tí Ngode Datagaliwabenaga waneigini ibugua gubalinihe kamiru tí ibu ale hole manda bu halimu.\x + \xo 5.1 \xt Md 5.48, Lg 6.36\x*  
\v 2 Mbirale bayale ngabi Ngode Datagaliwabehondo loma bia haganebi bo miaganebi miragola Ngode Datagaliwabe turu haganego ogonidagua Keriso ibugua ina gubalini howa ina holoma̱yanaga ibuninaga holene pela hene. Gubalini holene ogonibime tí haru helo holene nga.\x + \xo 5.2 \xt Har 29.18, LBM 1.9, Iba 40.6, Yo 13.34, Lm 14.15, 2 Ko 2.15, Ga 2.20, Hi 7.27, 10.10, 1 Yo 3.11, 3.23\x*   
\p
\v 3 Tí Ngode Datagaliwabenaga wali agali kamigo howa wali agali kayu bulenebi tinginime ko maru ale bulenebi dimagoli holenebi uruni alenaga lalu bame tebi heba lolene nawiore.\x + \xo 5.3 \xt Lm 6.13, 1 Ko 5.1, 2 Ko 12.21, Kl 3.5, 1 Te 4.3\x*  
\v 4 Tígua bi dodohebi bi ko tombe nahebi hegebi labe naheore kamigoni. Ani ndo tí Ngode Datagaliwabehondo turu halu ka̱i̱ lalu holene nga.\x + \xo 5.4 \xt Md 12.35, Lm 1.28, Eb 4.29\x*  
\v 5 Mbira heneneore larogo ogo. Wali agali kayu biagabi tinginime ko maru ale biagabi dimagoli hagabi dimagoli holene ogoni mbirale tarahondo bi pupu wiagane mana damenego mana uruni biagarume Ngode Datagaliwabebi Kerisobi libugua Handame Ho Kagoria ti holene henge nawulebira.\x + \xo 5.5 \xt 1 Ko 6.9-10, Ga 5.19-21, Kl 3.5\x*   
\p
\v 6 Uruni alenaga lalu mbiralime tíhondo bi ko tombe nahe laragome tí mo hondo holigo de hondo halimu. Uruni aleni wali agali Ngode Datagaliwabehanda bia laradagua nabi karu ibunaga lembo holene tiha wiaabo holebira.\x + \xo 5.6 \xt Lm 1.18, Kl 2.4, 2.8, 2 Te 2.3\x*  
\v 7 Anigo wali agali urunibi biaga karu heba mandagi nahalimu.  
\v 8 Ala tínibi arumaha harimigoni. Áyu tí Anduane Homogonaga wali agali kamigo tí wá holene kagoria ho kami. Ani kamigo tí wá holenenaga wali agali holene ngadagua halimu.\x + \xo 5.8 \xt Yo 12.36, Ab 26.18, Lm 1.21, 2 Ko 3.18, Eb 2.11-13, Kl 1.13, 1 Pi 2.9, 1 Yo 2.9\x*  
\v 9 Wá kagome bayale bulenebi mini tigabi holenebi henene lolenebi lini urunibi daabo haga ka.\x + \xo 5.9 \xt Ga 5.22\x*  
\v 10 Anduane Homogo turu helo bulene mana lo manda bialu halimu.\x + \xo 5.10 \xt Lm 12.2, Pb 1.10, 1 Te 5.21, 1 Ti 2.3\x*  
\v 11 Wali agali aruma holenenaga mana ko biaga karu heba mandagi nahalimu. Tígua mana ko biraru wá holeneni mo pani halimu.\x + \xo 5.11 \xt Lm 6.21, 1 Ko 5.9-11, Ga 6.8, 2 Te 3.6, 3.14, 2 Yo 10-11\x*  
\v 12 Anigo tigua ohowa mana ko bialu karunaga te lolene tagabidago nale waharo.  
\v 13 Mana bibahende biraru wá holene kagoria mo pani haragola mana ko uruninaga teneore handai holebira.\x + \xo 5.13 \xt Yo 3.20-21, Hi 4.13\x*  
\v 14 Mbirale mbira mo pani hayagua ogoni wá holene aria haga. Ogoninaga bi lo ngago ogo,\x + \xo 5.14 \xt Ais 26.19, 60.1, Lm 13.11\x*  
\q1 Padego í̠ de ngalalu homolene ngagoria howa heyabe.  
\q1 Ani beregola Keriso ibugua í̠ni wá ha dali holebira,  
\m lalu gilibu nga.   
\p
\v 15 Anigo tíni bialu haramigo bayuwa manda bilimu. Tígua wali agali mini nawi karu hagadagua nahe mini gigabiwi karu hagadagua halimu.  
\v 16 Horo áyu kamaruni koangi kamago manda buwa bayale bulenenaga henge áyu ngagonigo bayale bilimu.\x + \xo 5.16 \xt Ga 6.10, Kl 4.5\x*  
\v 17 Tí mini nawi ale nahe howa Anduane Homogohanda tígua bilimulo hamelo kago agidabe manda bilimu.\x + \xo 5.17 \xt Lm 12.2, Kl 1.9, 1 Te 4.3, 5.18\x*   
\p
\v 18 Tígua lulu yule \w waini\w* iba nagimbu nabilimu. Ogonime tí mo ko haga nga. Ani nabi Ngode Datagaliwabe Dinini ibugua tíha tolai helo halimu.\x + \xo 5.18 \xt Min 20.1, Ais 5.11, 5.22, Lg 21.34\x*  
\v 19 Tígua Iba Gananaga bibi Ngode Datagaliwabenaga iba ganabi ibunaga Dinini ibugua iba gana tí lawai haragonagabi uruni alego lalu tínihondo lagalaga bialu halimu. Tínaga gubaliniha Ngode Datagaliwabe mini yaraga hoa howa Anduane Homogohondo Iba Gana bibi Ngode Datagaliwabenaga iba ganabi lalu halimu.\x + \xo 5.19 \xt Iba 33.2-3, Ab 16.25, 1 Ko 14.26\x*\x + \xo 5.19 \xt Kl 3.16-17\x*  
\v 20 Inanaga Anduane Homogo Yasu Keriso minini howa tígua Aba Ngode Datagaliwabehondo bibahende íbu ngarunaga ka̱i̱ laabo halu halimu.\x + \xo 5.20 \xt Iba 34.1, Ais 63.7, Hi 13.15, 1 Pi 2.5\x*   
\s1 Agalini onenela holene ngago ogo  
\p
\v 21 Tígua Keriso ibu teneore ka mitangi bu kamigo howa tíni mo dindihaore hagahaga bilimu.\x + \xo 5.21 \xt Pb 2.3, 1 Pi 5.5\x*   
\p
\v 22 Anduane Homogohanda bia larago beramilidagua onene bedamiru tígua tínaga agalinime bia laradagua bilimu.\x + \xo 5.22 \xt Pig 3.16, Eb 6.5, Kl 3.18, 1 Pi 3.1\x*  
\v 23 Keriso hameigini karunaga haguane Keriso ibu kadagua agalini ibu onenenaga haguane kagoni. Keriso hameigini bibahende karu ti ibunaga tingini howa Keriso ibu tinaga Pele Miaga ka.\x + \xo 5.23 \xt 1 Ko 11.3, Eb 1.22-23, Kl 1.18\x*  
\v 24 Keriso ibugua bia larago Keriso hameigini karu bibahendeme biagadagua oneneru tígua tí agalinime bia larago biaiore holene nga.   
\p
\v 25 Kerisohanda ibunaga wali agali gubalini howa ibuninaga holene pela hayagoni. Ani gubalini hayadagua agalini kamiru tí one gubalini holene nga.\x + \xo 5.25 \xt Ga 1.4, Kl 3.19, 1 Pi 3.7\x*  
\v 26 Keriso ibugua ani buwa Keriso hameigini karu bibahende ibame baboraya biyagomebi Ngode Datagaliwabenaga bi mana laminigomebi ti mo bayale howa ibugua ti Ngode Datagaliwabenaga helo ibuhondo loma bia ho mini.\x + \xo 5.26 \xt Yo 15.3, 17.17, Ta 3.5, Hi 10.10, 10.22, 1 Yo 5.6\x*  
\v 27 Ibugua ani binigo irane Keriso hameigini karu bibahende bayale helo ko mbira do nahebi ko mbira nawibi mana ko binigonaga motudu nawibi gahengebi baya buruguleorebi howa ti ibunaga helo ibugua ti ibunihondo mulenaga ani bini.\x + \xo 5.27 \xt 2 Ko 11.2, Eb 1.4, Kl 1.22\x*  
\v 28 Anigo ogonidagua agalinime ibuni tingini gubalini haralidagua ibu one gubalini holene nga. Ibu one gubalini hagagome ibuni gubalini haga ka.  
\v 29-30 Mbiralime ibuninaga tingini handabe manga nahaga. Keriso hameigini kamaru ina ibu tingini aria dege kamago Keriso ibugua bayuwa hondo hagadagua iname inanenaga tingini bayuwa hondo haramali.\x + \xo 5.29-30 \xt Lm 12.5, 1 Ko 6.15, 12.27, Eb 1.22-23\x*  
\v 31 Anduane Homogonaga \w mbugani\w* bi lo ngadagua ogo, Irane ogonigo agali mbirame ibu aba ai̱yala helalu ibu onela mandagi howa libu mbiraore holebira, lalu gilibu nga.\x + \xo 5.31 \xt Pig 2.24, Md 19.5, Mg 10.7-8, 1 Ko 6.16\x*  
\v 32 Bi ogoniha ala pani nahe ngelenego áyu pani ho ngago galone heneneore timbuni aube tobahe nga. Galone ogoni Kerisobi Keriso hameigini bibahenderubi mbiraore holenenaga ngaria hendedo.  
\v 33 Galone ogoni tínagabi ngago ogo. Agalini bibahende kamiru tígua tíni gubalini haramilidagua tínaga one gubalini halimu. Onene bibahende bedamiru tígua nde tí agalininaga bi hale halu bilimu.\x + \xo 5.33 \xt Kl 3.19, 1 Pi 3.6, Mo 19.7\x*   
\c 6  
\s1 Waneiginirubi aba ai̱yarubi tigua bulene ngago ogo  
\p
\v 1 Waneiginiru-o tí Anduane Homogonaga kamigo tí aba aíyalame bi laradagua hale halu bulene ogoni tigabigo ani bialu halimu.\x + \xo 6.1 \xt Min 23.22, Kl 3.20\x*  
\v 2-3 Bulene nabulenebi \w mana\w* lowini ngarunaga Ngode Datagaliwabehanda la tago halu, Bulebero, lalu lowinigo pigane ogo. Tí aba ai̱yala mo yo handa nabi laradagua hale halu bilimu. Ani bialu harimiyagua tí bayale halu dindi ogoriani lu holeberami, lalu gilibu nga.\x + \xo 6.2-3 \xt Md 15.4\x*\x + \xo 6.2-3 \xt Har 20.12, Man 5.16\x*   
\p
\v 4 Waneigini aba ai̱yaru-o tígua tínaga waneiginiru haru howa lawanana bialu mo keba nahalimu. Ani nabi howa Anduane Homogonaga mana lawai halubi mini wilo mana lolene ngadagua lalubi halimu.\x + \xo 6.4 \xt Man 4.9, 6.7, 6.20-25, Iba 78.4, Min 19.18, 22.6, Kl 3.21\x*   
\s1 Garabaya biabe ale bia hagamebi tinaga haru hagamebi bulene ngago ogo  
\p
\v 5 Garabaya biabe ale bia hagaru-o tígua tínaga haru haga dindini karu mitangi bialu tigua bia laradagua mogo lowa baya hangu bilimu. Bialu howa Kerisonaga biabe bia harolo mitangi bialu henene minime bilimu.\x + \xo 6.5 \xt 2 Ko 7.15, Pb 2.12, Ta 2.9-10, 1 Pi 2.18\x*  
\v 6 Tínaga haru hagame tí de hendedaore bayale berami lelonaga hangu ndo tí de nahendedahabi bayale bialu halimu. Tí Kerisonaga garabaya biabe ale bia haga howa Ngode Datagaliwabehanda hame ledago tígua gubalini howa biai halimu.  
\v 7 Garabaya biabe ale bia haga howa biabe beramigo bame agalinaga bia harolo mitangi bialu ndo Anduane Homogonaga berolo mitangi bialu turu halu bilimu.  
\v 8 Garabaya biabe ale bia haga kamirubi nabini kamirubi ta nabi tígua biabe bayale beramigonaga yolo Anduane Homogo ibugua tí ngulebirago mitangi bialu halimu.\x + \xo 6.8 \xt 2 Ko 5.10, Ga 3.28, Kl 3.11\x*   
\p
\v 9 Garabaya biabe ale bia hagarunaga haru hagaru-o tígua tínaga garabaya biabe ale bia hagaruhondo ogonidagua dege bialu halimu. Ani bialu howa tihondo, Nabirimiyagua bolebero larogoni, bi ogonibi nalalimu. Tinagabi garabaya biabe ale bia haganagabi tí bibahendenaga Haru Haga mbiraore dahuliya andaga kago manda bilimu. Ibugua tí birimigonaga dabalu howa ta nabi mbiraore kami mitangi bialu dabaga ka.\x + \xo 6.9 \xt Man 10.17, Lm 2.11, Kl 3.25, 4.1\x*   
\s1 Ngode Datagaliwabenaga wai biagane aleru karulolene ogo  
\p
\v 10 Bi lamaro bialu larogo ogo. Anduane Homogoha ho gimbu bu howa ibunaga hongo holene timbuni ngagome tí mo hongo helowa halimu.\x + \xo 6.10 \xt 1 Ko 16.13, Eb 1.19, 3.16, Kl 1.11\x*  
\v 11 Dama Heyolabenaga ohowa mo hondo hagane mana ngagoria pi nale hongo howa bolangua hole tígua Ngode Datagaliwabenaga wai biagane ale ngiraru karulai halimu.\x + \xo 6.11 \xt Lm 13.12, 2 Ko 6.7, 10.4, Eb 4.14, 1 Te 5.8\x*\fig Tígua Ngode Datagaliwabenaga wai biagane ale ngiraru karulai halimu.|src="HK 75E.tif" size="1" ref="(6.11)" \fig*  
\v 12 Iname wali agali baba wai berama ndogo dama tara tara hari daligaha karu baba wai bialu kama. Haru hagarubi hondo hagarubi hongo tara tara arumaheha karubi ti baba iname wai bialu kama.  
\v 13 Anigo Ngode Datagaliwabenaga wai biagane aleru áyu ogoni karulalimu. Ko holene ngangi tígua waitigi baba hongo howa wai bu maro bialu hongohe dege haabo holeberami.\x + \xo 6.13 \xt Yo 12.31, 14.30, Lm 8.38, 1 Ko 15.50, Kl 2.15, 1 Pi 5.8-9\x*\x + \xo 6.13 \xt 2 Ko 10.4, Eb 5.16\x*   
\p
\v 14 Ani manda buwa wai bule nendebu halimu. Henene lolene tínaga mandibu ale ndibulo wuwa mini tigabi \w galuhombeneni\w* karulowa\x + \xo 6.14 \xt Ais 11.5, 59.17, 2 Ko 6.7, 1 Te 5.8\x*  
\v 15 mo palia holenenaga Bi Mana Debene lamima polene ge su ale karulo halimu.\x + \xo 6.15 \xt Ais 40.9, 52.7, Nah 1.15, Lm 10.15\x*  
\v 16 Ngode Datagaliwabehondo mini mbiraore wulene humbi ale yu haabo halimu. Ogonime dama Heyolabeme hungu biaga timume tí bole biragola mo hundia habehe holeberami.\x + \xo 6.16 \xt 1 Yo 5.4\x*  
\v 17 Pele mulene yu kamigo manda ale karulowa Ngode Datagaliwabe bi mana gilibu ngago ibunaga Dinini ibugua tíhondo ngiyago wai bulene ayu tibu ale mo yu halimu.\x + \xo 6.17 \xt Ais 49.2, 59.17, 1 Te 5.8, Hi 4.12, Mo 19.15\x*  
\v 18 Ani bialu howa tígua Ngode Datagaliwabehondo, Biamogo bia, lalu laabo halimu. Ngode Datagaliwabe Dinini ibugua la lalu langiradagua bibahendenaga Ngode Datagaliwabehondo bi la haabo halimu. Ani bulenaga mamage halu wahalu nape hibu lalu halimu. Ngode Datagaliwabenaga wali agali bibahende karunaga tígua ibuhondo bi la haabo halimu.\x + \xo 6.18 \xt Md 26.41, Lg 18.1, Lm 12.12, Kl 4.2, 1 Te 5.17, 1 Ti 2.1\x*  
\v 19 Ngode Datagaliwabehanda i̱na bi lolenego langilo i̱nagabi nde bi la halu halimu. Ani langiragola i̱na gi nahe elahe howa bi mana debenenaga galone ala pani nahe ngelenego bayuwa lawai holiyanagabi bi la halimu.  
\v 20 Áyu nde i̱ dariba kagola kogoni howa bi mana debene ogoni lamima piaga i̱ kogoni. Anigo i̱na bi mana debene ogoni lamulene ngadagua gi nahe elahe howa lamuliyanagabi tígua Ngode Datagaliwabehondo bi la halimu.\x + \xo 6.20 \xt Ab 4.29, 2 Ko 3.12, Kl 4.3-4, 2 Te 3.1\x*\x + \xo 6.20 \xt 2 Ko 5.20, Pb 1.20, Pm 9-10\x*   
\s1 Lamaro bialu lenego ogo  
\p
\v 21 Inanaga hameiginiore Tiyagasa ibu mini bilinahe howa Anduane Homogonaga biabe bia haga kago ibugua i̱ bayale kogobi i̱na bialu kogobi tí hale halimulo te ogoni tí langulebira.\x + \xo 6.21 \xt Ab 20.4, Kl 4.7-8, 2 Ti 4.12, Ta 3.12\x*  
\v 22 Ibugua ani langilo i̱na tí kamiria ibu pu laro. Ibugua ina kamarume bialu kamagonaga te tí langiragola tínaga mini mo hongo holebira.   
\p
\v 23 Aba Ngode Datagaliwabebi Anduane Homogo Yasu Kerisobi libugua Keriso hameigini bibahende tíhondo mo palia holenebi gubalini holenebi mini mbiraore wulene heba ngilo hamelo ko.  
\v 24 Inanaga Anduane Homogo Yasu Kerisohondo gubalini holene wa nahe yu haabo karu tí heba Ngode Datagaliwabenaga biamogo bia holene wiaabo helo hamelo ko.\x + \xo 6.24 \xt 1 Pi 1.8\x*