\id AMO - Huli Bible [hui] -Papua New Guinea 2011 (web version -2013 bd) 
\h AMOSO 
\toc1 Amoso 
\toc2 Amoso 
\toc3 Amo 
\mt1 Amoso  
\imt1 Mbuga ogoha gilibu ngarunaga nemandi ogo  
\ip Ngode Datagaliwabenaga bi mana \w latagi\w* haga agali marunaga bi Anduane Homogonaga mbugaha gilibu wini ngaru ti maha Amoso ibunaga ala pigane gilibu wini. Amoso ibu Yuda dindiha tano emene mbira wiagoha howa pigane ibu nogo sibi hinalu haga hene. Ani hearia Ngode Datagaliwabehanda ibunaga bi mana Isaraele dindiha wali agali hearuhondo latagi hama pelo olene. Odagoningi Isaraele tiha genda anda ibulene mbira nawi bayale dege hene.  
\ip Isaraele wali agali ti bayale dege kamabe toba howa hearia Amosohanda lalu, Ngode Datagaliwabenaga deni tí bayale ndo kamigoni. Tígua wali agali yagibano tí heba kamiru bababi wali agali tí damene kamiru bababi mana ko dege bialu kamigoni, lene. Amosohanda ibunaga damene hearuhondo lalu, Tígua ko bialu kamiruni wahadaba, lalu bi hongo howa lamigi bini. Ani lalu howa, Wali agalirume mini beregeda nabirimiyagua Ngode Datagaliwabehanda tí pani ngulebira, lalu lamini. Isaraele wali agalirunaga agali haguane hearume bi ogoni layago hale howa ibuni dalu Yuda dindihayagi bo talia dai bini. Ani bialu hemiria Amosohanda lalu, Ngode Datagaliwabehanda mana ogo ale biyada lalu manda nabiaga kagome biagadagua áyu tígua birimiyagua nde tí Ngode Datagaliwabe kago manda nabiore kamagoni lalu walia kami. Ai tígua Anduane Homogo ibu timbuniore howa ibugua mbirale bibahende biai habehe kago tí pani ngialu mo ko holene ngago manda bulene nga, lalu lamigi biniru gilibu wigi bida.  
\iot Bu̱lu̱ baga buwa kuni gilibu ngago ogo (1.1–2.5)  
\io1 Anduane Homogohanda wali agali tara tara manani dabenego \ior 2.6–6.14\ior*  
\io1 Anduane Homogohanda Isaraele wali agali manani dabenego \ior 7.1–9.15\ior*  
\io1 Amosohanda de gandeba dau halu hendenego  
\c 1  
\s1 Anduane Homogohanda Amosohondo bi laminigo ogo  
\p
\v 1 I̱ Tegoa tanoali nogo sibiru hinalu haga Amoso kogoni. Ani hewagola Anduane Homogohanda de gandeba mbira i̱hondo mo walia haya. Odagoningi Usia ibu Yuda dindiha kini heagola Yoasa igini Yaroboama ibu nde Isaraele wali agalinaga kini heangi bi ogo langiya. De gandeba ogoni hondowa mali kira hewagola dindi dumbirumbi timbuni biya.\x + \xo 1.1 \xt 2 Kin 14.23-29, 15.1-7, 2 Bit 26.1-23\x*   
\s1 Anduane Homogo ibugua wali agali mo ko holene hongo timbuni yu kago ogo  
\r (Amoso 5.8-9, 9.5-6)  
\p
\v 2 Amosohanda ogodagua lene.\x + \xo 1.2 \xt Yol 3.16\x*  
\q1 Anduane Homogo ibuni Hari Saionoha howabi  
\q1 Yarusaleme tano wiagoria howabi  
\q1 bi hongoheore hari kilikulu laradagua biayua.  
\q1 Ani biyagome datani Hari Kameloha hearu bibahende gau lai halu kabu gimbu biya.   
\s1 Anduane Homogohanda Siria wali agali hearu manani dabenego ogo  
\p
\v 3 Anduane Homogohanda lalu, Damasagasa wali agali tigua mana koore dewa biaabo harimi laya. Ani biaabo halu howa Gileada wali agali hearu mo ko halu harimigonaga henemaneore i̱na ti pani ngulebero.\x + \xo 1.3 \xt Ais 17.1-3, Yar 49.23-27, Seg 9.1\x*  
\v 4 Kini Hasaelenaga anda kagoria ira hedo bape harogola Kini Benehadadanaga andarubi dalu wai pabe hongohe bidarubi bibahende dai helolebero.  
\v 5 Damasagasa tano timbuni ngagonaga wai pabe panga hongohe bidaru bo gialo wahai holebero. Ani buwa Abene dindi ulini ngagoha wali agali karu bo purogo lalu Bededene dindinaga kini bedagobi bo batagi holebero. Ani bialu Siria wali agaliru Kie dindi ni tagira ibiragohayagi garabayabu yalu pelolebero, lene.\f + \fr 1.5 \ft Dindi ulini Abenebi Bededene dindi ledagobi ogoni labonaga irane ogo. Dindi kira ogonilabo Damasagasa dindiha dege wini. Anigo Hiburu bi lalu Abene dindi uli ogoni irane mana konaga dindi uli manda bialu manane lalu Bededene ogoni irane turuho dege haga dindi laga. Dindi kira ogonilabonaga mini ogoni gilibu winidagoni irane Ngode Datagaliwabehanda dindi ogoni mo ko hole nga lalu gilibu wini.\f*   
\s1 Anduane Homogohanda Pilidia wali agaliru manani dabenego ogo  
\p
\v 6 Anduane Homogohanda lalu, Wali agali Gasa tanoha kamirume mana ko dewaore bialu harimigoni. Emene ha̱lo hole ndo bibahendengi Gasa wali agali tígua wali agali maru Idomo dindiha garabaya biabe ale bialu helo minu yalu pirimigoni.\x + \xo 1.6 \xt Ais 14.29-31, Yar 47.1-7, Ese 25.15-17, Yol 3.4-8, Seb 2.4-7, Seg 9.5-7\x*  
\v 7 Tígua ani bialu harimigonaga heneneore i̱na Gasa wali agali pani mulebero. Tínaga tano ngagoha ira hedo bape harogola irame tano ogoniha anda hongohe karuni do baeala hole bilolebero.  
\v 8 Ani buwa wali agali Asadodo tanoha karu bo batagi halu Asagelono dindiha kini kagobi bo batagi holebero. Ogonidagua bialu ai Egerono tano ngago bo gialo wahalu Pilidia wali agali yu wahene maru hayadaru bo wahai holebero, lene.   
\s1 Anduane Homogohanda Taia wali agali manani dabenego ogo  
\p
\v 9 Anduane Homogohanda lalu, Taia wali agali tigua horo bibahendengi ko nabi nahe biaabo halu hayagonaga wali agali maru Idomo dindiha garabayabu yalu pelayagoni. Bambaore howa ti ko mbira nabi baya hanguore hami̱ya lalu bi hongo howa lo winigo ogoni habo lalu biyagonaga i̱na Taia wali agaliruore pani emene ndo mulebero.\x + \xo 1.9 \xt Ais 23.1-18, Ese 26.1–28.19, Yol 3.4-8, Seg 9.1-4, Md 11.21-22, Lg 10.13-14\x*  
\v 10 Taia tano ngagoria ira hedo ibira helarogola tanonaga anda hongohe karuni do gindulo ba a̱i̱ holebira, lene.   
\s1 Anduane Homogohanda Idomo wali agali manani dabenego ogo  
\p
\v 11 Anduane Homogohanda lalu, Idomo wali agalime horo bibahendengi ko wiaru biaabo halu howa tinaga damene Isaraele wali agali hearu dara naheore howa ayu tibume dibalu homelaga bialu harimigoni. Tigua hendore ndo keba timbuniore howa ani bialu harimigoni. Tinaga keba ogoni ereba nahe wiaabo kagonaga Idomo wali agali uruni tibi pani emene ndo mulebero.\x + \xo 1.11 \xt Ais 34.5-17, 63.1-6, Yar 49.7-22, Ese 25.12-14, 35.1-15, Oba 1-14, Mal 1.2-5\x*  
\v 12 I̱na tinaga tano Temanabi Bosara tano ngagobi kirabaliha ira hedo bape harogola tano ogoni laboha anda hongohe karu dai holebira, lene.   
\s1 Anduane Homogohanda Amono wali agali manani dabenego ogo  
\p
\v 13 Anduane Homogohanda lalu, Amono wali agalime mana ko biaabo hayagonaga i̱na ti mana lalu genda mo mulebero. Tigua ani bialu howa dindi dewa mule hame lalu Gileada dindiha wali gali tombeha bere berearu bibahende bo togodo bagabu wahaya. Ani biyagonaga i̱na Amono wali agali karu pani emene ndoore mule ngogoni.\x + \xo 1.13 \xt Yar 49.1-6, Ese 21.28-32, 25.1-7, Seb 2.8-11\x*  
\v 14 Tinaga Laba tano ngagoria pabe hongohe bu kagoria ira hedo bape harogola tinaga anda hongohe bu karuni dai helolebero. Ami agali bu karume wai bule howa wai-o hongo howa lalu wai biagadagua bialu horo kongi puyabu hongoheore ibiradagua bulebira.  
\v 15 Ani biragola Amono dindinaga kinibi agali haguane karubi bibahende dindi mendeha garabayabu yalu polebira, lene.   
\c 2  
\s1 Anduane Homogohanda Moaba wali agali manani dabenego ogo  
\p
\v 1 Anduane Homogohanda lalu, Moaba wali agalime mana ko hangu biaabo halu kagonaga i̱na ti pani timbuniore mulebero. Tigua Idomo wali agalinaga kini bo wahalu ibunaga kunibi irani do abalu helayagonaga i̱na Moaba wali agaliruore pani timbuni mulebero.\x + \xo 2.1 \xt Ais 15.1–16.14, 25.10-12, Yar 48.1-47, Ese 25.8-11, Seb 2.8-11\x*  
\v 2 Moaba wali agalirunaga tano timbuni Keriodo ngagoria ira hedo bape howa tano ogoniha anda hongohe bu karuni bibahende dai helolebero. Ami agalirume wai bialu howa mbelo biguli hongo howa pu lalu wai huaro hongo howa lalu holebira. Horo ogoningi Moaba wali agali homai holebira.  
\v 3 I̱na Moaba wali agalinaga kini kagobi agali haguane bu karubi bibahende bo wahai holebero, lalu Anduane Homogohanda lene.   
\s1 Anduane Homogohanda Yuda wali agali manani dabenego ogo  
\p
\v 4 Anduane Homogohanda lalu, Yuda wali agali tigua mana ko hangu biaabo halu kagonaga i̱na ti pani timbuniore mulebero. Tigua i̱naga bi mo wahalu mana ngago talialu bia nabi kagoni. Tini mo koore halu i̱naga mana mo wahai haya. Tinaga mamalirume binidagua dege gime wabini wiaru hangu talima piya. Ani biyagonaga i̱na heneneore Yuda wali agali ti pani emene ndoore mulebero.  
\v 5 I̱na tinaga tano Yarusaleme ngagoria ira hedo bape harogola tano ogoniha anda hongohe bu karuni dai holebira, lalu Anduane Homogohanda ogonidagua lene.   
\s1 Anduane Homogohanda Isaraele wali agali manani dabenego ogo  
\p
\v 6 Anduane Homogohanda lalu, Isaraele wali agali tigua mana ko hangu biaabo halu kagonaga i̱na ti pani timbuni mulebero. Irane Isaraele wali agali tini damene karu baba dano howa yadai nabiragola uruni ti minalu agali mendenaga garabaya biabe ale bia haga helo muni ngi laga ka. Muni miragome tinaga dano hayago mo aribia haga ka. Wali agali darabi uruni tigua nde muni dano timbuni ndo emene ko ge su hangu yolo mulene karulapego nde muni anduanerume tinaga damene uruni dara nahaga ka.  
\v 7 Tigua wali agali yagibano burupale uruni dara nahe howa hengedape halu waratagi haga ka. Agali ko uruni tinibi tinaga iginirubi bibahendeme garabaya biabe ale bia haga wandari mbiraore bedago dege kayu yu iri ari biaga kagome i̱ni mini lene kogo mo yo handaga ka.  
\v 8 Wali agali yagibano burupale dano hene biarunaga aga ti mo yalu puwa lotu anda karuha ti aga ogoni yu paliaga ka. Tigua ti damene urunime tinaga dano hayadago yadai bulenaga ani biagago nde yagibano urunime dano biago yadai bibe naheore kagola nde tinaga labolabo yadai bulene ngago yadai nabiaga. Ani bialu godi yolo bibe nahe kagola yagibano uruninaga \w waini\w* iba hambu ngaru godi yolo ale lowa ti Ngode Datagaliwabenaga anda kagoha mo yalu puwa nalu haga biaga kagoni.\f + \fr 2.8 \ft Mana ogoni Haru Tagira Penego 22.26-27 howa ledago handabe.\f*   
\p
\v 9 Ai i̱naga wali agaliru-o i̱na tí mitangi buwa biamogo bialu i̱na Amoroali ti luore ira tamia ale howa hongoheore ira bai ale hearuni handape howa bo hilo wahai harugoni.\x + \xo 2.9 \xt Man 3.8-11\x*  
\v 10 I̱na tí Iyibi dindiha howa haru tagira ibirungi dindi ko wali agali nahaga wiagoha i̱nime haru bamba halu mali pira mariani (40) haru howa Amoro hameigini palearunaga dindi tí karu lalimulo mo ngirugoni.  
\v 11-12 Tí igini hearume i̱ninaga bi mana \w latagi\w* haga helo dabalu helarugola tígua nahole lalu larimigoni. Igiri daliahe maru \w Nasa \w*aria helo dabo helaruru hongo howa waini iba nelo mo nahalu birimigoni. I̱na manda bialu koria bi ogoni heneneore. I̱ Anduane Homogo i̱na bi o ledogoniore, lene.   
\p
\v 13 Anigo i̱na tí dindiha hengedopeore holebero. Ani berogola agalime mbirale gendabi mbira yaraga halu karia darama tungulowa e̱ lalu homaraligobi hondoleberemi.  
\v 14 Agali gerai hongo howa laga karu ti yo pobe nahe holebira. Agali hongo tarahe karu hongo habe nahe holebira. Ami agali karume tini pele mibe nahe holebira.  
\v 15 Agali wai biaga karume hongo howa wai bibe nahe halu agali gerai hongo howa laga karu ti gerai lalu yo pobe nahe halu agali nogo hosini biruwa wai biaga karu ibida pobe nahe holebira. Ti bibahende yo pialu napolebiraore. Ti waitigime bo hilo wahaiore holebira.  
\v 16 Horo ogoningi ami agali gi nahaga pari wayali heneru bibahende danda timu wahalu ibida piai holebira, lalu Anduane Homogo i̱nime aniore ledogoni, lene.   
\c 3  
\p
\v 1 Isaraele wali agaliru-o tí Anduane Homogohanda Iyibi dindi howa haru tagira ibalu ogoha ibini kamigo ai ibugua tíhondo bi olarago hale hadaba.  
\v 2 Ibugua lalu, Wali agali dewaore dindi bibahende ngaruha bu hearu helowa ai tí hangu i̱naga wali agaliore halimulonaga i̱na tí dabo helarugoni. Ani birugo ai tígua mana ko dewa i̱ hondo hewagola birimigome ko dewaore tíha to̱ layadagonaga i̱na tí mana lalu pani timbuni ngulebero, lene.   
\s1 Anduane Homogohanda bi larago agali ibunaga bi latagi haga kagome lamulene ngago ogo  
\p
\v 3 Agali kiralime ogoha mbaliya ala nalowi howa hariga mandagi piagabe.  
\v 4 Budi gabua ale laionome tomo naga ale irabuha taya pialu bo ya nabi biruwa ngororo lagabe. Laiono iginime ibuni paliaga ege kabaha paluwa tomo nolene mina nabi howa ngororo lagabe.   
\p
\v 5 Ega gonoha delo ndole bialu ibilonaga ibunaga tomo nagane ale mbira nawiyagua agua bialu gonoha dolobadabe. Ega timbuni ge gono wialu pedaria ega nade howa bame pini hangume do wiagabe.   
\p
\v 6 Mbiralime wai ibira lalu tanoha howa mbelo biguli hongo howa pu layagua nde wali agali tanoha karume gi nahe holebirabe. Anidagua dege tano mbirago mo ko hayagua genda ogoni Anduane Homogohanda ibileneda naloleberemibe.   
\p
\v 7 Anduane Homogo Bibahende Haru Haame Ho Haga kagome mbirale bule mandabu ngaru ibunaga bi \w latagi\w* haga agali karuha howa ala latagi howa mani ibugua bule lalu lo wiyago heneneore biaga ka.   
\p
\v 8 Agalime budi gabua ale timbuni laionome ngororo laruago hale howa ti gi nahagabe. Ai Anduane Homogo Bibahende Haru Haame Ho Haga kagome agali mbiragohondo bi layagua nde agali ogoni ibugua bi layago latagi habe nahe kabe be ibugua latagi holebirabe.   
\s1 Samaria tano mo ko holebira, lalu Amosohanda latagi halu mbiwia henego ogo  
\p
\v 9 Amosohanda lalu, Tígua wali agali Asadodo tanoha karu olalu Iyibi dindiha karubi olowa ogodagua lalimu. Samaria dindi hari hombeneni mo ngoai howa wali agali bibahende tano ogoniha karu luluyu howa mana ko ngaru bialu kago handadaba, lalimu.  
\v 10 Anduane Homogohanda ogodagua leda, Samaria wali agali urunime mendeali mo hondo howa gungu bialu mini ngaru mo yuwabi mendealinaga mbirale ngaru mo page bini ngarume ti andagaha wu to̱lo tagi kago handadaba. Tigua mana tigabi bulene ngaru manda nabiagaore ka.  
\v 11 Ani bialu kagonaga waitigime tano ogoniha anda ibuwa anda timbuni hongohe karu bo gialo wahalu mbirale bayale anda tamuha ngaruni mo yu piai holebira, lene.   
\p
\v 12 Anduane Homogohanda laabo halu ogodagua leda. Budi gabua ale laionome nogo sibi mbira bo yalu puwa nalu heagua nogo sibi anduaneme gingila mule haruru pialu karia ge kuni kira hangu ibira halu hale yuni mbirago dege ibira karia handaga. Manane ogonidagua dege Ngode Datagaliwabehanda Isaraele wali agalinaga dindiha tano timbuni Samaria wiyagoni ogonidagua bulebira. Wali agali tano ogoniha turuho haga biaru mo ko halu homolebira. Wali agali emene yu wahene dege bayale holebira. Manane anda bibahende gialo yu piai henenaga dagia gene dege ibira haradagua bulebira, lene.   
\p
\v 13 Anduane Homogo Hongo Haiheore howa Bibahende Haru Haame Ho Haga kago ibugua lalu, Tígua bi larago baya hangu hale halu bi ogoni Yagabanaga aguanene bu karuhondo lamilimu.  
\v 14 Isaraele wali agalirume mana ko bialu hayagonaga pani merongi howa tinaga tano Bedeleha bo lomabu miaga dabu bu heledaru bo gialo wahai helolebero. Ani bialu dabu ogoninaga gibuni mariani nogo bulumaga ne gayane kaligobi wabu heledaru bibahende bo gingirulo paya bialu dindini ibira hai helolebero.\f + \fr 3.14 \ft Isaraelealime tinaga lomabu miaga dabu helenegoria nogo bulumaganaga ne gayane ale wabuwa gibuni maria winigoria helaga hene. Haru Tagira Penego 27.2 handabe.\f*\x + \xo 3.14 \xt 2 Kin 23.15\x*  
\v 15 Tinaga anda bayale dagare birangi paliaga poboyogobi bu heledarubi poboyogo birangi birulene nemanda bu heledarubi bibahende bo gialo wahai holebero. Anda bayaleore tara nogo elebananaga ne gayanerume yári bia howa bu heledarubi bibahende bo gialabagabu wahalu anda timbuni bu karu bibahende bo gialobaga biai holebero, lalu Anduane Homogohanda lene.   
\c 4  
\p
\v 1 Samaria wali bedemiru-o bi ogo hale hadaba. Tí nogo bulumagarume tani dewa nowa habatigihe hagagobi tí bame biruwa tígua wali agali yagibano karubi burupale karubi dara halu biamogo nabi howa ti genda yu helonaga mo ya haga bedemigoni. Tígua tí agalinihondo lulu iba dewa noliya ngi lalu haya haabo hagaore bedemigoni.  
\v 2 Anduane Homogo Bibahende Haru Haame Ho Haga kago ibugua mana tigabiore biagago bi hongo howaore lo wialu lalu, Heneneore horo mbira tagira ibulebira. Horo ogoni ibirangi tí wena hugume bibahende bolo magamaga buwa pume hende howa gililo yalu polebira. Wena hugume bo ledagola agalime gililo yamiagadagua tí gililo yalu polebira.  
\v 3 Pabe gialo wini wiagoria minu yalu puwa Hamono dindihayagi batagi holebira.   
\s1 Anduane Homogohanda Isaraele wali agaliru pani minigo milowa tinaga embone giambe henego ogo  
\p
\v 4 Anduane Homogo Bibahende Haru Haame Ho Haga kago ibugua ogodagua leda, Ai Isaraele wali agaliru-o tí áyu ogoni pudaba. Amu Bedele dindiha i̱ mitangi bialu lotu laga biagoha mana koru bima pudaba. Giligala tanohabi lotu laga biagoria mana ko ngaru biato hama pudaba. Egerebagi bibahendengi nogoru i̱nihondo lomabu ngule yalu ibalimu. Ani bialu horo tebone bibahendengi mbirale ngamiru \w pi\w* halu tale bialu pinigo i̱nihondo loma ngule yalu ibalimu.  
\v 5 Ani bialu mberedi loma buwa i̱hondo ka̱i̱ lalu ngia naberemi. Tígua mbirale pi halu tale buwa pinigo i̱hondo ngia naberemi. Ani buwa tíninaga mini yaraga halimu. Mana ogonidagua bule tí hamelo hagayagonaga laro, lene.   
\p
\v 6 Anduane Homogohanda ogodagua lara, I̱nime tínaga tano bibahendeha hina gari timbuniore ibilarugola tomo naneore harimigoni. I̱nime binidalo manda bialu mini beregeda nabiore kamigoni.  
\v 7 Ai tomo anda helonaga dalu ibaga wiyagoni naibilo payarugoni. Tano maruha dalu ibilalu maruha naibile waharu. Mabu maruha gomba helonaga iba dalu ibilarugo maruha naibilarugola dindi lebola daga hayagoni.  
\v 8 Wali agali tano mbirahayagi hagaru ti tano mendeha iba taya bima piyago nabereyane handarimigoni. I̱na urunidagua birugola tígua i̱ni kogoha mini beregedalu dai nabi kamigoni, lene.   
\p
\v 9 Anduane Homogohanda ogodagua lara, I̱na puyabu poboyogobiore ibilarugola tínaga mabuha tomo hengemiruha mo ko holene tagira ibiyagoni. Pagaya aleme tínaga mabuha tomo hengemirubi \w gerebi\w* lini dagane mabu hengemirubi tínaga poge irane hearubi olibe irane hearubi bibahende naiore hayagoni. Ani biyago hondowa tíni mini beregedabehego naberegedeore kamigoni, lene.   
\p
\v 10 Anduane Homogohanda laabo halu lalu, Warago koorene ko mbirame abale Iyibi wali agali bo waharudagua tíbi ani bulebero. Ani bialu wai birimingi howa waitigi agalime tínaga igiri daliahe hearu bo wahai halu tínaga nogo hosi hemiruni waitigi agali hearume haru halu piai helarugoni. Ani buwa wai bialu agali bo payapaya bini tí hemigoria wiarume ngu timbuni bialu wiyaru manda bibehego tí namandabi dege howa mini beregeda nabiore kamigoni, lene.   
\p
\v 11-12 Ani lowa Anduane Homogohanda lalu, Abale Sodomo Gomorala mo ko howa bo waharudagua tí maru mo ko halu bo waharugoni. Ani birugo ai wali agali maru áyu kamiruni tí ira timbuni dene daba tebo dugu wini ngaligobi kamigoni. Tí anidagua bini harimadalo manda bibehe kamigo howa mini beregeda nabiore kamigonida. Ani bidamigonidago nde i̱na Isaraele wali agali tí mo ko howa boliyago ani bialu hadaba. Ai bi ogoni Anduane Homogo i̱nime heneneore tagira pelogoria lo werogo tí bibahende manani howa tale buliya íbu hai hole kamigoni, lene.\x + \xo 4.11-12 \xt Pig 19.24\x*   
\s1 Anduane Homogo ibu mbirale bibahendenaga hongo haiheore kago ogo  
\r (Amoso 5.8-9, 9.5-6)  
\q1
\v 13 Hari timbuni karu wabialu puyabu poraru pelaga Ngode Datagaliwabe ibuore kagoni.  
\q1 Ibugua ibuninaga bu miniha mitangi bu karu wali agalihondo lapani haga ka.  
\q1 Horombenaga wá holene ngago mo arumaho helaga kagoni.  
\q1 Ibu dindi hari ngaruha ibagabu haga kagoni.  
\q1 Ibunaga mini ogo,  
\q1 Anduane Homogo Ngode Datagaliwabe Hongo Haiheore kagoni,  
\m lalu lolene nga.   
\c 5  
\s1 Anduane Homogonaga bi mana \w latagi\w* hagame dara halu dugu bia henego ogo  
\p
\v 1 Isaraele wali agaliru-o mbirali homaragola dara howa dugu biagadagua tínagaore dugu bia harogo hale hadaba.   
\q1
\v 2 Wandari mabuage ale Isaraele pilayago ai nde ibu lone heyabe naheore.  
\q1 Ibu dindini pilo ibiraho nga.  
\q1 Mbiralime lone mo heya habe nahe ngagoni,  
\m lalu larogoni.   
\p
\v 3 Anigo Anduane Homogo Bibahende Haru Haame Ho Haga kago ibugua lalu, Isaraele dindi tano mbiraha howa ami agali daosini mbira (1,000) wai bule tagira piyaru ai handari mbira (100) hangu dai biya. Tano mendeha howa agali handari mbira (100) wai bule tagira piyaru ai pirali hangu dai biya, lene.   
\s1 Isaraele wali agalime Anduane Homogo kagoha dai biyagua ti holene bayale mulebira, lenego ogo  
\p
\v 4 Anduane Homogohanda Isaraele wali agaliruhondo lalu, I̱ni kogoha holene bayale mule dai bidaba.  
\v 5 Tí Beaseba tanoha lotu lole napilimu. Tígua i̱ Bedele tanoha kabe toba howa tai nabilimu. Tano ogoni mo ko halu bo gialo hole bu waholebira. Giligala dindihabi lotu lole napilimu. Dindi ogoniha wali agali karu dindi mendeha garabayabu yalu polebirago tí Giligala dindi napilimu, lene.   
\p
\v 6 Tí Anduane Homogo ibuni karia dai bialu holene bayale ibuha howa mo yule dai bidaba. Ai tígua ibu karia dai nabirimiyagua ibunime hariha howa ira hedo ibira haradagua bialu tí Isaraele aria karuni dai holebirago. Ira ogonime Bedele dindibi da dege bulebira. Ani dalu kagola agali mbirame ira ogoni ba hundia habe nahe holebira.   
\s1 Wali agali mana ko biaga karu mo ko holene wulebira, lenego ogo  
\p
\v 7 Agali manani howa tigabi dabolene ngadagua ndo ke̱ howa mo hondo haga kamiru tíha pani nolene emene ndoore timbuni wulebira.   
\q1
\v 8-9 Anduane Homogohanda yakundirubi wá haga ale marubi harini wabu heleda.\x + \xo 5.8-9 \xt Yob 9.9, 38.31\x*  
\q1 Ibugua wá kagoha mo aruma halu aruma haga ngago mo wá haga ka.  
\q1 Ibugua iba solowara timbuni bedaru íbu lalu dindini haealame ha layagua ani biaga ka.  
\q1 Ibugua agali hongo gibihe karu mo ko howa pani mialu tinaga anda hongohe bu heledaru bo gialo wahalu biaga kagoni.  
\q1 Nahendene ale tara uruni biaga kago ibuninaga mini Anduane Homogoore kagoni,  
\m lalu iba gana lene.   
\s1 Amoso ibugua Isaraele wali agalime mana ko biyagonaga bi laminigo ogo  
\p
\v 10 Agali tigabi mbirame manani dabalu howa tigabi ngadagua dabalu ko biaga kago taliragola tígua agali ogonibiru handabe manga haga kamigoni.  
\v 11 Tígua agali yagibano karunaga dabudabu emene yu karu gingila mialu tomo mbirale ngaru mo page biaga kamigoni. Ani buwa ai tí anda hongohe ege to̱le̱ anda buwa kamigonigo tíni anda ogoniha napalueberemi. Tínaga mabu ngamiruha \w gerebi\w* lini hengedamirunaga ibaneme waini iba hambialu nanoleberemi.\x + \xo 5.11 \xt Man 28.30, 28.38-40, Mai 6.15, Seb 1.13\x*  
\v 12 Tígua bia ko hene dewaore ngamigome tíha ko bini dewaore ngagoni manda bido. Tígua agali mana tigabi ngaru biaga karu mo ko haramili. Agali ko biaga karume tinaga bi lahabe lalu muni ngirago mo yuwa yagibano karunaga bi henene larago yula dambi halu muni ngiyagonaga ke̱ howa lahaga kamigoni.  
\v 13 Wali agalime mana tiga nabi ogonidagua mbira biyagua agali mana mandabi kamiru tígua bi mbira nale ne hambu ndibu lowa ema nabi holene karulape nga.   
\s1 Mana tigabi ngaru bialu kamigola Ngode Datagaliwabehanda ibuni tí heba haabo holebirago ogo  
\p
\v 14 Tígua mana ko ngaru wahai howa mana bayale ngaru hangu bialu halimu. Ani beramigola tíni bayale holeberami. Tígua Anduane Homogo Ngode Datagaliwabe Hongo Haiheore kago ibuni tí heba haga ka laramiligo ai tígua mana bayale ngaru bialu harimiyagua nde heneneore ibuni tí heba mandagi haabo holebira.  
\v 15 Mana ko ngaru yu wahalu mana tigabi ngaru hangu bialu howa godi laramiru lalu manani tigabi dabolene ngadagua dabalu halimu. Tígua anidagua bialu harimiyagua Anduane Homogo ibugua wali agali emene yu wahene kamiruni baya hangu handayaho holebira.\x + \xo 5.15 \xt Iba 97.10, Yol 2.14, Mai 5.3, 5.7-8\x*   
\s1 Isaraele wali agalirume yilalu dugu bulebira lenego ogo  
\p
\v 16-17 Anigo tígua mana ko urunibi beremiligonaga Anduane Homogo Hongo Haiheore howa Bibahende Haru Haame Ho Haga kago ibugua lalu, I̱na tí pani nguleore ngogoni. Ani berogola tígua tanonaga hariga pugupugu bidarunaga yilalu dugu bigibigi bialu holeberemi. Ogonidagua bialu howa mbirali homaragola yilalu dugu biaga karubi agali nogo sibi haru haga tano tagirahayagi karubi olowa yilalu dugu biamogo bule ibidaba lalu ololeberemi. Ani berogola agali maru waini iba wabiaga gerebi mabuha karume yilalu dugu tara bima bima ibalu holebira, lene. Anduane Homogohanda i̱na bi o ledogoniore.   
\s1 Anduane Homogonaga Horo ibirangi bulebira lenego ogo  
\p
\v 18 Tí bibahendeme Anduane Homogonaga Horo abale ibilo hamelo kamigoni. Anigo tí darabioreda. Horo ogoni tagira ibiragola tígua mbirale mbira bayale agile mo yu holeberemibe. Horo ogoningi wá holene nawi tíha aruma holene wulebira.  
\v 19 Horo ogoningi ogodagua bulebira. Agali mbira ibu laionome bo nolebiragola ibida pialu karia habolo puwa ibu balu nolene dege mende biango ale gabua timbuni bea ngola holebira. Agali mbira ibu tagira howa andaga dai bialu anda pole pialu karia puya anda haiha wuwa hayaradagua bulebira.  
\v 20 Anigo Anduane Homogonaga Horo ogoningi aruma hai howa wá holene emeneorebi nawulebira. Turu holene mbira nawi mo ko holene dege wulebira.   
\p
\v 21 Anduane Homogohanda lalu, Tínaga horo timbuni mo ngoai howa lotu laga ngamiruni i̱ turu nahe howa hame naleore kogoni.\x + \xo 5.21 \xt Ais 1.11-14\x*  
\v 22 Tígua mbirale bo lomabu delarimiyaguabi balawa wabiaga widi lini lomabu ngirimiyaguabi i̱na yamia nabulebero. Nogo bulumaga hinidemiru tomo baya hangu nelo muwa habatigiore kagola i̱hondo ka̱i̱ lalu lomabu ngule haru ibirimiyaguabi i̱na nayamulebero.  
\v 23 Tígua ngida ale balu iba gana laramiligo i̱ore hale naholego nalalimu.  
\v 24 Anigo tígua bilimulo hame ledogo mbira ogo. Tígua mana bayalebi tigabi bulene ngarubi bialu halimu. Tígua ogonidagua bialu kamigome iba timbuni hundia nabiaga poraligobi wulebira.   
\p
\v 25 Ai Isaraele wali agaliru-o. Mali pira mariani (40) i̱ni tí heba mandagi wali agali napale dindi ko wiagoha ibagabu harimago howa i̱na tíhondo loma mbira bo ngidaba nale haruligoni.\x + \xo 5.25 \xt Ab 7.42-43\x*  
\v 26-27 Anigo ai áyu howa tígua i̱ yu wahalu puwa mbirale ko tínaga kini lalu gime wabinigo mini Sagudu wirimigobi mende yakundinaga lalu mini Kaiwana wabu wirimigobi ogoni labohondo bi pupu wialu kamigoni. Ani birimigome i̱na dindi mbira Damasagasa tano ngagohayagi garabayabu yalu pelarogola pialu howa tínaga gime wabini ogonilabo mo yalu poleberemi, lalu Anduane Homogo ibu mini Ngode Datagaliwabe Hongo Haiheore kago ibugua bi ogoni lene.   
\c 6  
\s1 Isaraele wali agalime tini biamogo bulene nakarulape henego ogo  
\p
\v 1 Wali agali Yarusaleme tanoha kamirubi Samaria tanoha kamirubi tí bibahende awadaga bayale kamagodago lowa tíha mbira agi bulubadabe lowa hadapeho kamiruni dara ho kogoni. Isaraele dindinaga agali haguane tí kamiria wali agali tígua ti biamogo bilimulo ibaga wiyago ai dara ho kogoni. Tí bibahende mo ko holene wulebiragonaga dara ho kogoni.  
\v 2 Tígua Kalene tano ngago hondo pudaba. Ani bialu tano timbuni Hamadabi hondo pialu Pilidia dindiha tano Gede ngagobi hondo puabo halimu. Isaraele dindi Yuda dindila bayale ndo lowa dindi hondo pirimiruni bayaleyabe. Ani bialu dindi uruni timbuni tínaga dindi timbuni ngamigobi dege wiabe.  
\v 3 Tígua manda bialu kamiria tíha mo ko holene mbira naibulubadabe. Ai tíni ko ngaru bialu kamigome mo ko holene yu anda eberemigonaga dara ho kogoni.  
\v 4 Wali agali homogo kamiru tí nogo bulumaga sibirunaga mbirini bayale ngaru nowa dagia bayale ngarunaga paliaga kamiru tíha mo ko holeneme ngola holigo de hondo holene nga.  
\v 5 Kini Debidihanda iba gana lo winidagua tígua iba gana gahenge dewa lo wule manda buwa ngida ale tara tara balu iba gana laga kamiruni.  
\v 6 Tígua emene ha̱lo ha nabi howa gabo beha \w waini\w* iba dewaore hambialu naho wiaga kamigoni. Tínaga tinginini welibi nga biaga tara mini sandabi ha̱i̱ haga kamigoni. Anigo Isaraele dindini mo ko holene tagira ibiragola tígua dara nahagane kamigoni.  
\v 7 Ani bialu kamigome dindi mendeha garabaya bamba holene tíore holeberemi. Ani beremigola tomo dewa dawa nagimbu bialu tínaga turu ho holene henge nawiore holebira.   
\p
\v 8 Anduane Homogo Hongo Haiheore howa Bibahende Haru Haame Ho Haga kagome buleore lalu bi hongohe mbira ogodagua lo ngeleda. Isaraele wali agalirume mine halu kago i̱na turu naheore kogoni. Tínaga anda timbuni karuha yári bayale ngamirubi hame naleore kogoni. Ani bidogo ai uruni bibahendeore tí waitigi dindi taraha karu giha mo ya holebero, lene.   
\p
\v 9 Ani lowa lalu, Ai agali pirali hangu anda be mbiraha yu wahene heagua uruni bibahende homai holebira.  
\v 10 Mbiraligo homedagola ibuni damene mbirame ibunaga tingini mo ibulebira. Ani buwa ibugua anda ogoniha mbira yu wahene bira do kagohondo lalu, Mendeali bedabe naberebe, lolebira. Ani laragola agali bira do hene biago ibugua ladai bialu lalu, Nabereore, lolebira. Ani laragola agali homenenaga tingini mo ibini biagome lalu, Bi nalabe. Anduane Homogonaga mini nalami̱ya, lolebira, lene.   
\p
\v 11 Amoso ibugua lalu, Anduane Homogohanda ogodagua lara, Anda bu karuni emene timbunibi bibahende bo gialabaga bialu gingirulo payabu wahadaba, laragola gingirulo bagabu waholebira.  
\v 12 Tígua manda beremigola nogo hosime ege to̱le̱ timbuni ngaruni gerai polebirabe be agalime e hongole lowa ege to̱le̱ ngagoria nogo bulumagame dindi tombelo haru gililama polebirabe. Ani nabiagago manda buwa tígua mana ogonibi bialu kamigoni. Tígua mana tigabi ngago agali homelo tomia bialu mana bayale ngago tígua degeme mo beregedalu mo ko haga kamigoni.   
\p
\v 13 Tígua wai bialu Lodeba tano bo poda hana halu tíni karularima lowa mine halu kamigoni. Ani bialu howa lalu, Inane hongome Karinaimi dindibi bo poda hana halu karularima, lalu kami.  
\v 14 Anigo Anduane Homogo Ngode Datagaliwabe Hongo Haiheore kago ibugua ogodagua lara, I̱na agali dindi tara howa tí baba wai bilimulo ibilolebero. Uruni tigua tí mo ko howa bo podama pialu uyurahayagi Hamada tanoha bama puabo halu unurahayagi dindi ulini Araba ngagoria bo poda hana holebira, lene.   
\c 7  
\s1 Amoso ibugua de gandeba handalu hearia pagaya ale mbira hendenego ogo  
\p
\v 1 Anduane Homogo Bibahende Haru Haame Ho Haga kagome i̱hondo de gandeba mbira mo walia haya. I̱na handalu hewaria pagaya ale wabuni timbuni mbira ibilaya. Agali biabe biahaga hearume datani hearu gandulo yu pialu kininaga nogo bulumaga hearu nelo minigo ai mani teneha howa pudu lalu andaho aribia halu heaore dege pagaya ale uruni tibi nde tagira ibiya.  
\v 2 Ani handalu hewaria pagaya ale uruni tigua datani dindi bibahendeha hearu nai hayane handaru. Ani biyago hondowa i̱na lalu, Anduane Homogo Bibahende Haru Haame Ho Haga-o í̠naga Isaraele wali agali karuninaga ko ngaru domo wahai ha. Ti dewali ndo emene ko hangu howa hongo naheore karunidago í̠na ti mana lalu pani miriyagua nde ti mani agua bialu bayale holobadabe, laru.  
\v 3 Ani larugola Anduane Homogo ibugua mini wiadai bialu lalu, Ai áyu de handariruni tagira naibulebira laya, lene.   
\s1 Amoso ibugua de gandeba handalu hearia ira dayaria hendenego ogo  
\p
\v 4 Anduane Homogo Bibahende Haru Haame Ho Haga kagome de gandeba mende ogobi walia haya. Anduane Homogohanda ibunaga wali agali pani mule lowa ira timbuni delo manda manda biago handaru. Ira ogonime iba kuyuma timbuniore dindiha bereago dalu do hundi lowa ai dindini dama irigi hayane handaru.  
\v 5 Ani biyago hondowa i̱na lalu, Aiore Anduane Homogo Bibahende Haru Haame Ho Haga-o anidagua nabuleore. Í̠naga wali agali ti dewa ndo emene ko hongo nahe karunidago í̠na ti mana lalu pani miriyagua nde mani ti agua bialu bayale holobadabe, laru.  
\v 6 Ani larugola nde Anduane Homogo ibugua mini wiadai bialu lalu, Áyu handarigoni tagira naibulebira laya, lene.   
\s1 Amosohanda de gandeba handalu anda biaganaga pu tiga handaga mbira de hendenego ogo  
\p
\v 7 Anduane Homogohanda de gandeba tebone walia hayagola handalu hewaria Anduane Homogo ibuni anda hái mbirani hapara ho hearia handaru. Agalime anda bialu howa pu tiga handaga emene mbiraha aeane emene dege mbira pu ngunini pongo biaho helowa anda háidago tigabi kabe hako hayadabe hondole tiga handaga pu heleneyago Anduane Homogohanda yaniaho hearia handaru. \fig anda háidago tigabi kabe hako hayadabe hondole tiga handaga pu heleneyago Anduane Homogohanda yaniaho hearia handaru.|src="HK 34f.tif" size="1" ref="(7.7)" \fig*  
\v 8 Ani yaniaho howa ibugua i̱hondo lalu, Amoso-o o hendedegoni agiledabe, laya. Ani layagola i̱na ibuhondo ladai bialu lalu, Pu mbira ngunini aeane pongo biahedago hendedo, laru. Ani larugola ibugua i̱hondo ogodagua laya. Pu ogonime i̱naga wali agaliru ti tigabi henedabe be yole henedabe hondolenaga yarugo. Ai anda hái hako hene ula amuhe kaligobi henedane hendedogoni. I̱na mini wiadai bialu dara nahe howa ti pani nelo mulebero.  
\v 9 Isaraele wali agali Aisaganaga aguanene karu tinaga lotu lo ngoai haga dindi wiyadaruni bibahendeore bo gialobagabu wahai holebero. Kini Yaroboamanaga damene karu mbiraore hangubi yu wanahe bo wahaiore holebero laya, lene.   
\s1 Amosohanda loma binigo mo miaga Amasaia mo keba henego ogo  
\p
\v 10 Bedele tanoha agali mbira mini Amasaia henego ibu \w loma\w* binigo mo miaga howa ibugua Isaraele wali agalinaga Kini Yaroboamahondo bi ogodagua lo pelene. Ibugua lalu, Kini-o Amosohanda í̠naga bi hale nahe wahalu í̠la waitigi helo lowa Isaraele wali agaliha ndelope hama ibaga bialu ka. Í̠na ibu ani lalu helo wahariyagua nde ibunaga bi ogonime inanaga dindi ogo mo ko timbuniore holebira.  
\v 11 Amoso ibugua bi ogodagua laga bialu ka. Kini Yaroboama wai bialu karia agali waime bo wahalu Isaraele wali agali bibahende dindi mendeha garabayabu yalu polebira, lalu kagoni, lene.   
\p
\v 12 Ani lowa Amasaiahanda Amoso hearia puwa ibuhondo lalu, Ngode Datagaliwabenaga bi \w latagi\w* haga-o í̠ Bedele dindi ogoria nahe áyu ogoniore pialu Yuda dindiha hama dai bibe. Ngode Datagaliwabenaga bi Yuda dindiha howa latagi hama poregola Yuda wali agalime í̠ yolo bilo ani bule pu.  
\v 13 Bedele dindi ogoria howa í̠na bi labelo ina turu nahe kamagoni. Irane dindi ogohayagi kini ibuni lotu haru haga kagoni. Ani bialu Ngode Datagaliwabenaga anda kago Isaraele wali agali bibahendenaga kagoni, lene.   
\p
\v 14 Ani layagola Amosohanda ladai bialu lalu, I̱ Ngode Datagaliwabenaga bi mana latagi haga howa maru yolo mialu karuni ale ndo kogoni. I̱ nogo sibi haru hagabi poge irane karu handayaho hagabi kogoni.  
\v 15 Ai i̱ninaga biabe uruni bialu hewaria Anduane Homogohanda i̱ dabo helalu bi ogodagua langiya. Í̠ pialu i̱naga Isaraele wali agali karuhondo bi ogodagua lamule pu laya handala ibinigo kogoni.  
\v 16 Ani birugo ai i̱na Anduane Homogohanda bi langiyago larogo hale habe. Ibunaga bi Isaraele wali agaliru lamulene yidogo lamuliya nale wahalu pu larigoni.  
\v 17 Amasaia-o í̠na ani larigonaga Anduane Homogohanda ibunaga bi podene í̠ha ngeleda. Ani bidagome í̠ one ibu tano ogoha agali page yama ibaga biaga birulebira. Ani bialu bedagola waitigirume ibalu í̠ waneigini bu karuni bibahende bo wahai holebira. Waitigime í̠naga dindi ngeruni karulai howa ti tuwa ta holebira. Tigua í̠ dindi tara Ngode Datagaliwabe manda nabiaga karunaga dindiha garabayabu yalu poragola dindi ogoniha í̠ homolebere. Waitigi uruni tigua Isaraele wali agalirubi dindi taraha garabayabu yalu polebira laya, lalu Amosohanda lene.   
\c 8  
\s1 Amosohanda de gandeba handalu hearia mbasigedi nuha tomo tara tara henearia hendenego ogo  
\p
\v 1 Anduane Homogo Bibahende Haru Haame Ho Haga kago ibugua de gandeba walia hayago handalu hewaria tomo bayale tara tara dewa mbasigedi nuha hono to̱lo wiaria handaru.  
\v 2 Ani hondo hewagola Anduane Homogohanda i̱hondo lalu, Amoso-o agi dege hendedebe, laya. I̱na lalu, Mbasigedi nuha tomo bayale tara tara hono to̱lo ngago hendedogoni, laru. Anduane Homogo ibugua lone lalu, Ai agalime tomo bogabi bayaleru buyu ngoai howa nagadagua i̱ninaga Isaraele wali agaliru pani mialu bo waholene kaware ibiyada. Áyu i̱na mini wiadai nabi ti pani timbuniore mule ngo.  
\v 3 Ani berogola horo ogoningi wali agali kini andagaha iba gana lalu hagarume lone nale tigua dugu daraore bia aribia holebira. Wali agali homenerunaga tingini wu paya paya bu wima polebira. Ani bidagola tigua dugu dege bialu holebira. Homenerunaga tinginiru mo batagi haga biragola wali agali bi mbira naleore ona hama polebira, lene.   
\s1 Isaraele dindiha mo ko holebira lenego ogo  
\p
\v 4 Isaraeleali tígua wali agali mbirale nawi yagibano karu handape howa tí mo ko hole hame laga kamiruni tíore hale hadaba.  
\v 5 Tígua tíni dege dege laedene bigi bialu lalu, Lotu laga horo uruni abale piai helo. Ani biragola inanaga tomoru wali agalime yolo bilo magedi hamaha abale yalu poloma̱ya. Ai inanaga tomo magedi yalu poloma̱ya \w Sabada\w* horo piai hayabe be wene dege ngabe. Inanaga tomo ngamaru ke̱ howa yolo diba daga halu genda magi handagane ngaru ke̱ howa mo hondo holoma̱ya.  
\v 6 Balawa wabiaga widi lini ko hene ngamaru muni daliga muluma̱ya. Ani bialu agali yagibano muni nawi mbira kagohondo dano harimago ti muni emeneorebi ge su hangu mulenebi nawiore dano harimago yadai bibe nahe karu minalu agali mendenaga garabaya biabe ale biahaga hole pelo muni mimi̱ya. Agali ogoni ibugua muni yolo ngiragome inanaga dano harimagonaga pani ngilo ani bimi̱ya, lalu kamigoni.   
\p
\v 7 Anduane Homogo Isaraele wali agalinaga Ngode Datagaliwabehanda bi hongohe mbira lo wialu lalu, Isaraele wali agali tínaga mana ko bialu kamigoniore i̱na embeda naholeore bero.  
\v 8 I̱na dindi ogo mo ema bia halu dumbirumbi bilarogola wali agalime gi taraore howa dugu bialu holeberemi. Isaraele dindi ogo bibahendeha dumbirumbi timbuniore bulebira. Dindi ogo irigi halu ibira howa pandu laragola iba Naili tulala daga howa ibira haradagua bulebira.  
\v 9 Horo ogoningi dege horombe hanuni ni anda pelarogola abale mbi lolebira. Anduane Homogo Bibahende Haru Haame Ho Haga kogo i̱nime bi o ledogoniore.  
\v 10 Horo timbuni uruni tagira ibirangi lotu lalu kamiria turu howa iba gana laga ngamiru mo beregedalu genda yu howa homa duguanda haradagua dugu bialu holeberemi. Tígua bu miniha gendaore howa aba ai̱yame libunaga igini mbiraore hangu henego homaragola dugu biagadagua bialu holeberemi. Aiore daraho bedago walia halu aga mbege nu ale biaga ngago bu howa mandari podo mbolo lowa halu bulebira. Tígua ogonidagua biai halimulo mo bia holebero. Horo ko ogoningi genda tandagabi luore wiaabo helolebero, lene.   
\p
\v 11 Anduane Homogo Bibahende Haru Haabo Ho Haga kagome laabo halu lalu, Mani howa tí dalu ogoha hina gari timbuni pelolebero. Tígua gari timbuni lalu holebirago hinanaga ndo hége lebolaho holebirago iba noa howa ndobi bulebira. Gari timbuni ogoni iba hina henene ndo i̱naga bi manaore hale hoa howa garibi timbuni lo holebira. I̱ Anduane Homogo Bibahende Haru Haame Ho Haga kogo i̱nime bi o ledogoniore.  
\v 12 Wali agali tigua i̱naga bi mana hale hole lowa Homene Iba bedagoha howa Medidereniana iba bedagoria dindi bibahende dombeni ngaruha taya bialu ha holebirago howa ti hale naholebira.  
\v 13 Horo ogoningi wandari igiri baya hongohe daliahe karu iba noa howa de mborere bialu dindini odo paya paya bulebira.  
\v 14 Wali agalirume heneneore bi hongohe mbira lo wialu Samaria wali agalirume dama mitangi bialu mbirale bi pupu wulenaga gime wabini ngaru mini lalu ogodagua laga ka. Heneneore Dana tanonaga dama mbiranaga minini howabi Beaseba tanonaga dama mendenaga minini howabi henene laro laga kami. Anidagua lagaru bibahendeore homai halu lone heya nabulebiraore, lene.   
\c 9  
\s1 Anduane Homogohanda Isaraele wali agali manani helenego ogo  
\p
\v 1 Anduane Homogo ibu lomabu delaga dabu ibuni andagaha wiagoria hapara howa hearia i̱na handaru. Ibugua bi ogodagua laya. I̱ andagaha wali agali haga dagia ngaruni ema bialu birila gimbu bilo anda gene daliga bolangua kagoria nduli badali ha. Anda gene hongohe karuni bo podo paya bialu wali agali karuni bibahendenaga emboneni poda dambi halu bo homelai hela. Uruniha bo dambi nahe hayadaru waitigime ibalu wai buwa bai helolebero. Ani berogola mbiraore hangubi ibida pialu ha do naholebira.  
\v 2 Mbiralime i̱ni heneda handala dindiha gua bima pialu humbirini andaha tagira puwa ha do heaguabi ogoni ibu i̱nime haruru puwa handa walia halu minulebero. Mbirali ibu pialu dahuliya andagaha iragaho heaguabi ogoni ibu dindi ogoria minu gililope holebero.\x + \xo 9.2 \xt Iba 139.8, Yar 51.53, Oba 4\x*  
\v 3 Maru amu Hari Kamelo kagoha puwa ha do heaguabi i̱na handa walia halu minaore bulebero. Maru ti ibida puwa iba solowara timbuni bedagoha anda pialu unuraore bira do hayaguabi nde ibaha abagua timbuni bedagohondo, Haya, lolebero.\x + \xo 9.3 \xt Yob 34.22, Iba 139.9-12, Ais 27.1, Yar 16.16\x*  
\v 4 Waitigirume ibuwa garabayabu yalu piyaguabi nde tihondo homelo bo wahalimu lalu lamulebero. I̱na ti biamogo nabi homelo bo wahai holebero, lalu Anduane Homogohanda lene.   
\q1
\v 5 Anduane Homogo Bibahende Haru Haame Ho Haga howa Hongo Haiheore kago ibugua dindi ogo ela haragola  
\q1 dindi bibahende ema biai halu wali agali dindini karume mogo lowa dugu biaga ka.  
\q1 Iba Naili poragome tulala ladaga howa ibira hagadagua  
\q1 dindi bibahende ngaru porabu daga halu ibira haga nga.   
\q1
\v 6 Anduane Homogohanda dahuliya andagaha howa ibunaga anda bu helalu  
\q1 hari mindini karume dindi ogo dangila dambi halu anda mbira bia haradagua bida.  
\q1 Ibugua iba solowara bedaru ibidaba lowa  
\q1 dindi bibahendeni odo paya bia laragola ani biaga.  
\q1 Ogoni biaga kago ibuninaga mini Anduane Homogoore laga kagoni.   
\p
\v 7 Anduane Homogohanda lalu, Isaraele wali agaliru-o i̱na tí handaya ho haruligodagua dege Idiobia wali agalirubi nde ani dege handayaho haruli. I̱na Pilidia wali agali karubi nde Kiridi dindiha howa haru íbu helalu Siria wali agali bu karunibi Kia dindi howa haru ibirugoni. Abale Isaraeleali tí Iyibi dindiha howa haru tagira ibirudagua dege tibi haru ibinigo ka.  
\v 8 Anduane Homogo Bibahende Haru Haame Ho Haga kogo i̱na Isaraele wali agali tígua mana bialu kamiruni handalu koria mana ko dewaore tíha to̱ledane hendedo. Anidagua bidamigodago ai i̱na Isaraele wali agali tí bo hilo wahai helolebero. I̱na bo wahaiore nahe howa Yagabanaga aguaneneru maru nde yu waho helolebero.   
\p
\v 9 I̱na bi larogome ladi ale mini widi lini aeanela tale biagadagua Isaraele wali agali i̱nime dabaki holebero. Isaraele wali agali ko biaga karuni dindi mendeha widi aeaneru yalu pu wahagadagua bialu dindi tara ngaruha ho bilibolo lelolebero.  
\v 10 Marume lalu, Ngode Datagaliwabehanda inaha mo ko holene mbira naibilolebira, lalu haga karu bibahende waitigirume ti bo wahai helolebero, lalu Anduane Homogohanda lene.   
\s1 Isaraele dindi lone mo bayale holebira lenego ogo  
\p
\v 11 Anduane Homogohanda lalu, Horo mbira tagira ibulene ngago ogoni ibirangi i̱na Isaraele wali agalinaga kini mbira tínaga mamali Debidi henegobi helalu anda mbira podo ibira ho wiradagua bidaruni lone mo heyaho helolebero. Anda ibu abale bayale hongohe hayagobi helo hadai bilolebero.\x + \xo 9.11 \xt Ab 15.16-18\x*  
\v 12 Ani bidogola Isaraeleali ti hongohe howa Idomo agali karu baba wai bialu howa bo podalu dindi ti karulolebira. Dindi marubi i̱ninaga ala wini ngaru bibahende tigua karulai holebira, lene. Bi ogoni Anduane Homogo ibunime bule layago biaiore holebira.   
\q1
\v 13 Anduane Homogohanda lalu, Horo mbira ibulebirago  
\q1 ogoningi tomo bayale abale anda howa  
\q2 lini dewaore wali agali abale nai habe nahe dolebira.  
\q1 Pu mbira lini daga mini \w gerebi\w* karume lini dewaore abale daragola  
\q2 \w waini\w* iba wabiaga karume lini pingidalu waini iba wa biai habe nahe dolebira.  
\q1 Waini iba bayaleru dindi hari ngaruha howabi hari bare emene ngaruha howabi  
\q2 dugua tagi hene ale hambu paya biradagua bulebira.\x + \xo 9.13 \xt LBM 26.5, Yol 3.18\x*   
\q1
\v 14 I̱ninaga wali agaliru tini dindi wiyagoha haru dai bulebero.  
\q1 Tinaga anda paberu gialobaga bini wiyaru  
\q2 lone bu aribia halu hayagobi dege helolebira.  
\q1 Tinaga mabu hangaga wiyagoha gerebi irane hongowa  
\q2 gerebi lini dedagola dagadagua waini iba wabialu hambu nalu tomo marubi hangalu dewa nalu holebira.\x + \xo 9.14 \xt Ais 61.4, Yar 30.3, Ese 36.33\x*   
\q1
\v 15 I̱naga wali agali uruni ti tinaga dindi i̱nime mirugoha bayale kagola  
\q2 mbiralime ti lone bo batagi habe nahe holebira.  
\q1 Anduane Homogo tínaga Ngode Datagaliwabehanda bi ogonidagua laya,  
\m lalu Amosohanda lai hene.\x + \xo 9.15 \xt Ais 60.21, Yar 32.41, Ese 34.28, Yol 3.20\x*