\id 2TI - Huli Bible [hui] -Papua New Guinea 2011 (web version -2013 bd) 
\h 2 TIMODI 
\toc1 Polohanda Timodihondo beba mende ogo gilibu wia hene 
\toc2 2 Timodi 
\toc3 2 Ti 
\mt1 2 Timodi  
\mt2 Polohanda Timodihondo beba mende ogo gilibu wia hene  
\imt1 Mbuga ogoha gilibu ngarunaga nemandi ogo  
\ip Polohanda Timodihondo beba mende ogo gilibu wia henedagoni Timodi ibu igiri daliahe howa bayale bialu holene mana manda bilo gilibu wia hene.  
\ip Bi haguane duniniore lenego, Ema nabi howa hibu lalu bialu holene nga, lalu lamini. Polohanda Timodihondo lalu, Tandaga nolene wiragolabi marume í̠hondo handabe manga haragolabi ogonidagua biragola Yasu Kerisohondo mini mbiraore wu harigoni hongo ho howa Yasu Kerisonaga Bi Mana Debene ngagobi Ngode Datagaliwabenaga Habo Nalolene Bi Bamba lowini ngagobi uruni yu dunu bia ho howa loyogo lama ibaga bialu haabo habe, lalu lamini.  
\ip Polohanda Timodihondo lalu, Wali agalime mini nawi lulu ale howa lai lalu karuni hale howa minime mo pe hararu koorene ko haga ngago ti kagoria nahe í̠ habagi howa haluni habe, lalu bi hongo howa lawia hene.  
\ip Polohanda lamaro bialu lalu, I̱na mana lawai haruligobi biabe bialu haruligobi haabo holene mo tene haruligobi mini mbiraore wu kogobi ema nabi haabo haruligobi maruhondo gubalini haruligobi ko ngagola hibu lalu haruligobi marume i̱hondo ko biragola tandaga naruligobi uruni bibahende í̠ manda biai kegoni, lalu Timodi mo mitangi bia halu howa, Í̠na ogonidagua bialu holene nga, lalu lamini.  
\iot Bu̱lu̱ baga buwa kuni gilibu ngago  
\io1 \ior 1.1-2\ior*  
\io1 Polohanda bi ala lenego \ior 1.3–2.13\ior*  
\io1 Ka̱i̱ lenegobi ogodagua bialu habe lenegobi \ior 2.14–4.5\ior*  
\io1 Mana ko bayalela dabolenebi mamage ho holenebi \ior 4.6-18\ior*  
\io1 Polo ibu biabe bialu henegoha ibuhondo binigo \ior 4.19-22\ior*  
\io1 Lamaro bialu lenego  
\c 1  
\p
\v 1 I̱ Polo Ngode Datagaliwabe ibuninaga hame leagome Keriso Yasunaga \w abosolo\w* kogoni. Iname Keriso Yasuha howa holene gahenge yu holoma̱ya Ngode Datagaliwabehanda ala ngulebero lowinigo holene ogoni ibugua, Í̠na lamule pu, laya.\x + \xo 1.1 \xt Eb 1.1\x*   
\p
\v 2 Timodi i̱ iginiore-o beba ogo í̠hondo gilibu wia haro. Aba Ngode Datagaliwabebi inanaga Anduane Homogo Keriso Yasubi libugua biamogo bia holenebi dara holenebi mo palia holenebi í̠hondo ngilo hamelo ko.\x + \xo 1.2 \xt Ab 16.1, 1 Ti 1.2\x*   
\s1 Bi Mana Debene mitangi bialu taga holene nawigo ogo  
\p
\v 3 I̱na Ngode Datagaliwabehondo ka̱i̱ laro. I̱naga mamalime miniha ko do nahe howa Ngode Datagaliwabenaga biabe bialu henedagua i̱nabi ani bialu ko. Horombe mbiragabi ta nabi Ngode Datagaliwabehondo bi lalu howa í̠ mitangi biaabo halu ibuhondo ka̱i̱ laruli.\x + \xo 1.3 \xt Ab 22.3, 23.1, Lm 1.8-9, Pb 3.5, 1 Te 1.2, 3.10\x*   
\p
\v 4 Í̠naga de iba ibiyago mitangi bialu turu holene i̱ha to̱lai helo í̠ lone de hondoa ho ko.   
\p
\v 5 Í̠na Ngode Datagaliwabehondo mini mbiraore wirigoni heneneore wu haabo kego i̱na manda bu kogoni. Í̠ aguane Loisi í̠ ai̱ya Yunisila libugua Ngode Datagaliwabehondo mini mbiraore winidagua í̠nabi ani dege wu ke manda bu ko.\x + \xo 1.5 \xt Ab 16.1, 1 Ti 1.5, 4.6\x*  
\v 6 Irane ogonigo i̱naga gi í̠naga haguaneni wirugola Ngode Datagaliwabehanda mugube ngiyago anda helo ira hungu biagadagua mo hungu biahole mitangi bialu habe.\x + \xo 1.6 \xt 1 Te 5.19, 1 Ti 4.14\x*  
\v 7 Ngode Datagaliwabehanda inahondo ibu Dinini ngiyago ibugua ina yurigihe holoma̱ya helaga ndo ka. Ibu Dinini ogoni ibugua hongo holenebi gubalini holenebi mini haru holenebi inaha to̱lai helo ngiaga ka.\x + \xo 1.7 \xt Lg 24.49, Ab 1.8, Lm 8.15\x*   
\p
\v 8 Ogonigo inanaga Anduane Homogonaga mana walia hole í̠na taga nahe habe. I̱ Anduane Homogonaga garabaya agali kogo mitangi bialu í̠ taga nahe habe. Taga nahe howa Ngode Datagaliwabehanda hongo holene ngiradagua Bi Mana Debene lamulenenaga tandaga nolene ngagobi nalu habe.\x + \xo 1.8 \xt Lm 1.16, Pb 1.7, Kl 1.24, 1 Ti 2.6\x*  
\v 9 Ngode Datagaliwabehanda ina pele ngialu ibunaga wali agali holoma̱ya ibugua ina olene. Ani binigo irane iname bayale birimagonaga ndo Ngode Datagaliwabe ibuninaga hame lolenemebi biamogo bia holenemebi ani bini. Bamba Ngode Datagaliwabehanda dindi wa nabi howa Keriso Yasuha howa ibunaga biamogo bia holene ogoni ngule lowini.\x + \xo 1.9 \xt Lm 8.28, Eb 1.4, 2.8-9, 1 Te 4.7, Ta 3.5, Hi 3.1, 1 Pi 1.20\x*  
\v 10 Mani inanaga Pele Ngiaga Keriso Yasu ibuni hapani hayangi howa ibugua biamogo bia holene ogoni inahondo walia hene. Keriso ibugua homolenenaga hongo tongolo wahowa bi mana debeneha howa haabobo holene walia hene.\x + \xo 1.10 \xt 1 Ko 15.54-57, Kl 1.26, Hi 2.14, 1 Pi 1.20\x*   
\p
\v 11 I̱ Bi Mana Debene lamulene \w abosolobi\w* lawai hagabi holiya Ngode Datagaliwabehanda dabo helene kogoni.\x + \xo 1.11 \xt 1 Ti 2.7\x*  
\v 12 Anigo i̱ tandaga nalu kogo irane ogoninaga nalu ko. Ani bidogo taga nahe mini bilinahe howa i̱na ibuhondo mini mbiraore wirugo wu howa Ngode Datagaliwabehanda Horo Mbira pongo bo wini ngago lola helo ibugua mbirale i̱ha wia do hayago bayale wiaabo helo hondo holebirago yu tiga bidogoni.\x + \xo 1.12 \xt Eb 3.1-2, 1 Ti 6.20, 2 Ti 4.8, 1 Pi 4.19\x*  
\v 13 I̱na í̠hondo bi mana tigatiga lawai harudagua biaabo hole hongo howa yu habe. Ani yu howa Keriso Yasuha ho gimbu bu howa mini mbiraore wulenebi gubalini holenebi inanaga ngago ogoniha howa haabo habe.\x + \xo 1.13 \xt 1 Ti 1.10, 4.6, 6.3, 2 Ti 2.2, 3.14, Ta 1.9, 2.1, Hi 10.23\x*  
\v 14 Ngode Datagaliwabe Dinini inaha kago ibunaga hongome í̠hondo mbirale bayale ngiyaru yu habe.\x + \xo 1.14 \xt Lm 8.11, 1 Ti 6.20\x*   
\p
\v 15 Pigelasa Hemoyanesila Esiali howa libu heba wali agali ogoniha hearu bibahendeme i̱ wahalu piai hayago í̠ manda bu kegoni.  
\v 16 Onesiborasa ibugua i̱ mo turu haabo hayago ibubi ibu damenerubi ti Anduane Homogohanda dara howa biamogo bilo hamelo ko. I̱ garabaya hewaria ibugua taga nahe howa\x + \xo 1.16 \xt 2 Ti 4.16, 4.19\x*  
\v 17 Lomo tanoni anda ibalu ibugua i̱ handa walia hole lowa hai biaabo haya.  
\v 18 Horo Mbira pongo bo wini ngago lola harangi Anduane Homogohanda ibuhondo dara howa biamogo bulene milo hamelo ko. Ebesa tanoni hewaria ibugua i̱ biamogo biaabo hayago í̠ manda bu kegoni.\x + \xo 1.18 \xt Yu 21\x*   
\c 2  
\s1 Keriso Yasunaga ami agali mini bilinahe habe lenego ogo  
\p
\v 1 I̱ igini-o biamogo bia holene ina Keriso Yasuha ho gimbu bu howa kamarunaga ngago í̠ nde ogoniha hongo ho habe.  
\v 2 Wali agali dewa hale ho helowa i̱na bi lawai haga biruruni í̠ hale harigonigo í̠na bi o larugoniore agali mini bilinahe lawai haga mugube yu karuhondo lamigi bialu habe. Mani nde tigua maruhondo lamilo manda buwa lamibe.   
\p
\v 3 Anigo erekuibi mangabiru ngangi wahalu pu nabi howa hibu lalu Keriso Yasunaga ami agali mini bilinahe howa biabe bialu habe.\x + \xo 2.3 \xt 1 Ti 1.18, 2 Ti 1.8, 4.5\x*  
\v 4 Ani howa ami agalime biabe bialu howa tinaga haru haga kago mo turu hole hame lowa tigua biabe tara mende nabiaga.\x + \xo 2.4 \xt 1 Ko 9.25\x*  
\v 5 Mbiralime gerai lagago gerai langane mana lo ngadagua biai nahayagua ibu bolangua halu yolo miaganedagua namulebira.\x + \xo 2.5 \xt 1 Ko 9.25-26, 2 Ti 4.8\x*  
\v 6 Mbiralime tomo hangagago erekui biabe biragome tomo hini ngago ibuninaga wiagane.\x + \xo 2.6 \xt 1 Ko 9.7, 9.10\x*  
\v 7 I̱na bi o laroru mitangi bibe. Ani mitangi bialu kegola Anduane Homogo ibugua í̠hondo mo manda bia holebira.   
\p
\v 8 Yasu Keriso homalu lone heyu hayagobi ibu Debidi aguanene hayagobi Bi Mana Debene ogoninaga lawai haruligoni mitangi bialu habe.\x + \xo 2.8 \xt Lm 1.3, 2.16, 1 Ko 15.1, 15.4, 15.20\x*  
\v 9 I̱na Bi Mana Debene ogoni lamialu haruligonaga agali marume i̱ mo tandaga halu ka. Agali ko biaga karu garabaya dariba hagadagua tigua i̱ dariba ho ka. Anigo Ngode Datagaliwabenaga bi mana dege dariba nahene.\x + \xo 2.9 \xt Ab 9.16, 28.31, Eb 3.1, 3.13, Pb 1.7, 1.12-14, Kl 4.3, 4.18\x*  
\v 10 Irane ogonigo wali agali Ngode Datagaliwabehanda dabayaru mitangi bialu pele ngulenebi bayale taraore haabo holenebi Keriso Yasuha ngago tigua yu helo i̱na hibu lalu ema nabi howa tandaga na halu ko.\x + \xo 2.10 \xt 2 Ko 1.6, Eb 3.13, Kl 1.24\x*  
\v 11 Bi heneneore lagane ngago ogo\x + \xo 2.11 \xt Lm 6.5, 6.8, 2 Ko 4.10-11, 1 Ti 1.15\x*  
\q1 Ina ibu heba homarimayagua nde  
\q1 inabi ibu heba dege haabo holeberama.   
\q1
\v 12 Ina hibu lalu ema nabi haabo harimayagua\x + \xo 2.12 \xt Md 10.33, Lg 12.9, Lm 8.17, 1 Pi 4.13\x*  
\q1 inabi haru haga howa ibu heba haru holeberama.  
\q1 Iname ibu erembira mialu ina ibu aria ndo kama larimayagua  
\q1 ibugua nde ina erembira ngialu, Tí i̱naga ndo kami, lolebira.   
\q1
\v 13 Iname mini bilinaho naharimayagua  
\q1 ibu mini bilinahe dege haabo kagome  
\q1 ibuni mo hondo habe nahe ka.  
\m lagane ngago gilibu nga.\x + \xo 2.13 \xt Dag 23.19, Lm 3.3-4, Ta 1.2\x*   
\s1 Biabe biaga henene Ngode Datagaliwabehanda manda bu kago ogo  
\p
\v 14 Í̠na bi ogo wali agali mo mitangi bia haabo halu tigua bi tara tara nahabane ngarunaga bi mo anda howa gungu buligo í̠na Ngode Datagaliwabe deni howa tihondo, De hondo halimu, lalu lamibe. Bi ogoni aleme wali agali hale hararu mo bayale nahaga mo ko hagane nga.\x + \xo 2.14 \xt 1 Ti 1.4, 5.21, 6.4, Ta 3.9\x*  
\v 15 Í̠na Ngode Datagaliwabenaga bi mana henene ngadagua tigatigaore lawai hole ibunaga deni howa taga nahe habe. Ngode Datagaliwabehanda í̠hondo turu howa, Bayuwaore bialu hari, lelo ani bialu habe.\x + \xo 2.15 \xt 1 Ti 4.6, Ta 2.7-8\x*  
\v 16 Ani howa bi nagalone lalu kagoria í̠ nahe wandialu habagi habe. Bi urunibi laragome wali agalime Ngode Datagaliwabe erembira mialu pelonaga mo manga haga.\x + \xo 2.16 \xt 1 Ti 4.7, 6.20, Ta 1.14\x*  
\v 17 Mana ogoni aleme dere bidadagua bialu mo timbu howa wali agali mo ko hagane. Agali kira Haimeneasa Piledasa lalibugua mana ogonibi lawai haga ka.\x + \xo 2.17 \xt 1 Ti 1.20\x*  
\v 18 Libu hariga tigabi ngago wahalu ina homalu heyu holeberamagonaga libugua lalu, Ina abale heyu harimagoni, laga ka. Ani larago hale howa wali agali marume mini mbiraore ala wiyago wahowa mini tara mende wiaribia halu ka.  
\v 19 Anigo ina mini mbiraore wulene tene Ngode Datagaliwabehanda anda gene ale helenego ema nabibehe haabo kagoni. Ogoriani bi kira gilibu wini ngago mbira ogo, Anduane Homogohanda wali agali ibuninaga karu manda biai ho ka. Bi mendegome lalu, Mbiralime i̱ Anduane Homogonaga ko, layagua ogoni ibu ko ngaruhondo erembira mialu wahalu polene nga, lalu gilibu nga.\x + \xo 2.19 \xt Dag 16.5, 16.26, Ais 52.11, Nah 1.7, Yo 10.14, 10.27, Lm 8.35, 1 Ko 8.3, 1 Yo 2.19\x*   
\p
\v 20 Anda timbuniha ndisi tara tara dewa wiaganego maru ngolo silibamebi wabini wiaga. Maru nde irame wabini wialu maru nde dindi dongomame wabini wialu biaga. Ndisi maru biabe tara bulenaga dabo bagi ho ngelaga maru horo bibahendengi bulenaga wiaga.\x + \xo 2.20 \xt Lm 9.21, 1 Ko 3.12, 1 Ti 3.15\x* \fig Anda timbuniha ndisi tara tara dewa wiaganego maru ngolo silibamebi wabini wiaga. Maru nde irame wabini wialu maru nde dindi dongomame wabini wialu biaga.|src="HK 34B.tif" size="2" ref="(2.20)" \fig*  
\v 21 Mbiralime mana ko bibahende ngaru uruni wahai hayagua ibu ndisi bayale dabo bagi ho wiaganedagua ibu Ngode Datagaliwabehondo loma bia ho holebira. Ibugua ibunaga Anduane biamogo bia halu biabe bayale bibahende bule holebira.\x + \xo 2.21 \xt 2 Ti 3.17, Ta 3.1\x*  
\v 22 Igiri daliahe karume tinaga bu miniha dimagoli hagadagua nahe í̠ habagi howa agali bu miniha gahengeme Anduane Homogohanda ti biamogo bilo olaga karu baba howa mana tigabibi mini mbiraore wulenebi gubalini holenebi mo palia holenebi tai bialu habe.\x + \xo 2.22 \xt Ab 9.14, 1 Ko 1.2, 1 Ti 1.5, 6.11\x*  
\v 23 Wali agali marume mini nawi howa irane nawini bi anda halu kagoria nape ti gungu bulebirago manda buwa ti heba nahe wandialu habe.\x + \xo 2.23 \xt 1 Ti 4.7, 2 Ti 2.16, Ta 3.9\x*  
\v 24 Ani howa Anduane Homogonaga biabe biaga karume gungu bulene nawiore. Tigua wali agali bibahende ta nabi karuhondo biamogo biagabi lawai haga mini bayalewibi kebabi nahe howa holene nga.\x + \xo 2.24 \xt 1 Ti 3.2-3, Ta 1.7-9, 3.2\x*  
\v 25 Tigua wali agali Ngode Datagaliwabenaga bi mana mo wahaga karu ti bayale helonaga hendore howa mo tiga bia holene nga. Ani biyagua mani tigua mana henene ngago manda bilobi mini beregedelobi Ngode Datagaliwabehanda henge mulebira.\x + \xo 2.25 \xt Ga 6.1, 1 Ti 2.4, 6.11, Ta 1.1, 1 Pi 3.15\x*  
\v 26 Tigua mini wia dai bialu ala dama Heyolabeme hame layadagua bilo gono wedagoha ti mininigo mani gono ogoniha howa do gundu lalu ibida polebira.   
\c 3  
\s1 Hamaro bulene horo kaware harangi ko holene timbuni wulebirago ogo  
\p
\v 1 Bi mbira ogo manda bibe. Hamaro bulene horo kaware harangi ko holene timbuni wulebira.\x + \xo 3.1 \xt 1 Ti 4.1, 2 Ti 4.3, 2 Pi 3.3, 1 Yo 2.18\x*   
\p
\v 2 Wali agalirume tini hangu mitangi bulenebi muni dimagoli holenebi mine holenebi mege bulenebi bi koorene ko nakarulapeore lolenebi aba ai̱yalanaga bi mo waholenebi ka̱i̱ nalolenebi tigua Ngode Datagaliwabe mitangi nabi holenebi wulebira.\x + \xo 3.2 \xt Lm 1.29-31, 1 Ti 1.20, 6.4, 2 Pi 2.3, 2.12\x*  
\v 3 Wali agalihondo gubalini naholenebi dara naholenebi gurulenebi bo waholenebi keba timbuni holenebi bayale bulenela waitigi ho halu ani bulene wulebira.\x + \xo 3.3 \xt Ta 2.3, 2 Pi 3.3\x*  
\v 4 Tigua tinaga damene waitigi karuhondo ndelo mulenebi mini nawi howa abale bulenebi, I̱ni mini timbuniorewi ko, lo mitangi bulenebi Ngode Datagaliwabe mo tene nahe tingininaga mana ngago dege mo tene holebira.\x + \xo 3.4 \xt Pb 3.19, 2 Pi 2.13, Yu 4, 19\x*  
\v 5 Tigua Ngode Datagaliwabe mana ngaru tingini degeme bialu ibunaga hongo holene henene ngago manda nabi holebira. Timodi-o wali agali urunibi karu heba mandagi nahabe.\x + \xo 3.5 \xt Md 7.15, 7.21, Lm 2.19-20, 2 Te 3.6, 1 Ti 5.8, 6.5, Ta 1.16\x*  
\v 6 Agali urunibi marume wali mini nawi ale bedaru andaga anda puwa wali uruninaga mini mo dariba haga. Wali urunime ko dewa ala biyagonaga genda howa lone dimagoli dege halu biraga.\x + \xo 3.6 \xt Md 23.14, Ta 1.11\x*  
\v 7 Tigua mana lo manda bua howa mana henene yu tiga nabibehe beda.  
\v 8 Bamba Yanese Yambereselame Mosesehondo handabe manga halu henedagua wali agali urunibime mana henene ngago manga howa wahaga ka. Tigua minime tigatiga mitangi nabiaga howa Ngode Datagaliwabe mana yu tiga nabibehe ka.\x + \xo 3.8 \xt Har 7.11, Lm 1.28, 2 Ko 13.5, 1 Ti 6.5, 2 Ti 2.25\x*  
\v 9 Urunime ani bima puabo naholebira. Bamba heneyarume Yanese Yamberesela libu lulu ale nakarulape heago handa walia henedagua wali agali áyu karume uruni ti ogonibi dege kane handa walia holebira.   
\s1 Ngode Datagaliwabe mana hongo howa yu holene ngago ogo  
\p
\v 10 Anigo í̠ ogonibi ndo harili. I̱na mana lawai haruligobi biabe bialu haruligobi holene mo tene haruligobi í̠na ogonidagua bialu i̱ talima ibalu kegoni. I̱na Ngode Datagaliwabehondo mini mbiraore wu kogobi ema nabi haabo haruligobi gubalini ho haruligobi hibu lalu haruligobi\x + \xo 3.10 \xt Pb 2.22, 1 Ti 4.6\x*  
\v 11 marume i̱hondo kagua biraligobi i̱ tandaga naruligobi í̠ manda bu ke. Andiogo tanobi Aigoniama tanobi Lisidara tanobi uruniha hewaria i̱hondo bibahende biyagonaga tandaga timbuni naabo halu harugo uruni bibahende í̠ manda biai kegoni. Anigo bibahende biyarunaga tandaga nalu hewago hondowa Anduane Homogohanda i̱ pele ngialu haru piya.\x + \xo 3.11 \xt Iba 34.19, Ab 13.14-52, 14.1-20, 2 Ko 1.10\x*  
\v 12 Wali agalime Keriso Yasuha ho gimbu bu howa Ngode Datagaliwabe mo tene holene nga manda biragola maru karume ti mo tandaga holebira.\x + \xo 3.12 \xt Md 16.24, Yo 15.20, 17.14, Ab 14.22, 1 Te 3.3\x*  
\v 13 Wali agali mana ko biagarubi bayaore tingi hagarubi ti ko howa hama pialu koorene ko holebira. Tigua wali agali mo hondo halu kagola dama Heyolabeme tinibi mo hondo halu holebira.\x + \xo 3.13 \xt 2 Te 2.11, 1 Ti 4.1, 2 Ti 2.16\x*  
\v 14 Í̠ nde mana henene lo manda bialu harigo yu tiga bu kegonigo hongo howa yu haabo habe. Í̠hondo mana lawai hayaru urumelo í̠ni manda bu kegoni.\x + \xo 3.14 \xt 1 Ti 1.13, 1 Ti 2.2\x*  
\v 15 Anduane Homogonaga \w mbugani\w* bi lo ngago í̠ igiri emeneni howa lo manda biaabo halu harigo kegoni. Anduane Homogonaga mbugani bi lo ngagome mini gigabi mo wia halu Keriso Yasuhondo mini mbiraore wuleneme Ngode Datagaliwabehanda pele ngiaganego í̠ni manda bu kegoni.\x + \xo 3.15 \xt Yo 5.39, 1 Pi 1.20-21\x*  
\v 16 Anduane Homogonaga mbugani bi bibahende lo ngaru agalime gili bilo Ngode Datagaliwabehanda ti mo manda bia hene. Ibunaga mbuga ogoni bi lo ngarume mana henene lawai holebi mana yole ngago mo tiga bulebi mana nakarulape ngago mo waholebi hariga tigabini holene mana lamulenebi ngagoni.\x + \xo 3.16 \xt Lm 15.4, 2 Ti 2.21, 2 Pi 1.20-21\x*  
\v 17 Anigo ina Ngode Datagaliwabenaga biabe biahaga kamaru bi mana ogonidagua lo ngagome mo karulapeore helaragola biabe bayale tara tara bulene mugube yu howa bayuwa bialu holeberama.\x + \xo 3.17 \xt 1 Ti 6.11, 2 Ti 2.21\x*   
\c 4  
\s1 Ngode Datagaliwabe mana henene lawai holene ngago ogo  
\p
\v 1 Keriso Yasu ibugua dabaga howa wali agali áyu karubi homenerubi heba godi lolebira. Ibugua dai bialu Handame Haga Kini howa wali agali bibahende haru holebirago mitangi bibe. Ngode Datagaliwabebi Keriso Yasubi libu deni howa i̱na í̠hondo bi ogoni hongo howa laro.\x + \xo 4.1 \xt Ab 10.42, Lm 14.9-10, 1 Ti 5.21, 6.13\x*  
\v 2 Mana ogoni lamialu howa horo bibahendengi lamiaabo habe. Wali agalime hale hoa hayaguabi nahayaguabi ta nabi harugo lowa ti hale hai helo lamiaabo habe. Í̠na ani lamialu howa mo tiga bialu talialubi mini elahe helo mo hongo halubi lolene ngadagua ema nabi howa hibu lalu lawai habe.\x + \xo 4.2 \xt Ab 20.20, 20.31, 1 Ti 4.13, 5.20, Ta 1.13, 2.15\x*  
\v 3 Awe wali agali marume bi mana henene hale habe manga howa tini hame ledadagua bulebira. Tigua bi mana tara nakarulape hale hoa howa bi mana ogoninaga lawai haga karu heba mandagi mo ngoai ho holebira.\x + \xo 4.3 \xt 1 Ti 1.10, 4.1, 2 Ti 1.13, 3.1, 3.6\x*  
\v 4 Ngode Datagaliwabenaga bi mana henene ngago hale habe manga howa erembira mialu mamalinaga bi te tara tara nagalone ngaru hale hoa holebira.\x + \xo 4.4 \xt 1 Ti 1.4, 4.7, Ta 1.14\x*  
\v 5 Anigo í̠na horo bibahendengi mini haru haabo halu tandaga nolene ngayagua hibu lalu nalu habe. Bi Mana Debene lamiaga kego Ngode Datagaliwabenaga biabe bia haga howa biabe bibahende bulene ngaru bayuwa bialu biai habe.\x + \xo 4.5 \xt Ab 21.8, Eb 4.11, 2 Ti 1.8, 2.3\x*   
\s1 Polonaga biabe bumaro bulene winigo ogo  
\p
\v 6 I̱ nde i̱ni Ngode Datagaliwabehondo loma bialu bo mulene pongo bo winigo áyu ngagoni. I̱ dindini holene hamaro bule ko.\x + \xo 4.6 \xt Pb 1.23, 2.17, 2 Pi 1.14\x*  
\v 7 I̱na hongo howa gerai lalu henego ai i̱ pole winigoria pu maro biru. Ngode Datagaliwabehondo mini mbiraore wulene wa nahe wiaabo kogoni.\x + \xo 4.7 \xt 1 Ko 9.24-25, Pb 3.14, 1 Ti 6.12, Hi 12.1\x*  
\v 8 Anduane Homogo ibu Dabaga tigabi kago ibugua Horo Mbira pongo bo winingi i̱na bolangua harugonaga yolo wu kago i̱hondo ngulebira. Yolo ogoni Ngode Datagaliwabehanda i̱hondo, Í̠ mini tigabiwi kego, lolene wulebira. I̱ hanguhondo ndo wali agali Anduane Homogo dai bilo hame lowa hondo karu tihondobi tinaga ngago mulebira.\x + \xo 4.8 \xt 1 Ko 9.24-25, 2 Ti 1.12, Ya 1.12, 1 Pi 5.4, Mo 2.10\x*   
\s1 Bi galone maru Timodihondo lamaro bialu lenego ogo  
\p
\v 9 I̱ kogoria abaleore ibule manda bibe.\x + \xo 4.9 \xt 2 Ti 1.4\x*  
\v 10 Demasa ibugua dindini holene mbirale ngaru gubalini howa i̱ wahalu ibu Tesalonaiga piya. Keresenese ibu Galesia piya. Taidasa ibu Dalamesia piya.\x + \xo 4.10 \xt 2 Ko 8.23, Ga 2.3, Kl 4.14, Pm 24, Ta 1.4, 1 Yo 2.15\x*  
\v 11 Lugu dege iya kaba. Maga ibu biabe biamogo bibehe kago í̠na ibu damu pialu libu haru ibalibu.\x + \xo 4.11 \xt Ab 12.12, 12.25, 13.13, 15.37-39, Kl 4.10, 4.14, Pm 24\x*  
\v 12 I̱na Tiyigasa ibu Ebesa pelo ibuhondo pu laru.\x + \xo 4.12 \xt Ab 20.4, Eb 6.21-22, Kl 4.7-8\x*  
\v 13 I̱ ibalu howa i̱naga aga luni Toroasani howa Kabasanaga andagani ngelarugo mo yalu mbuga ngelarugobi yalu ibabe. Mbuga maru nogo dongoneme wabinigo ngaru galone timbuniorego embeda holeni mo yabe.\x + \xo 4.13 \xt Ab 20.6\x*   
\p
\v 14 Aleganda ibu ege to̱le̱ mini gabame mbirale tara tara wabiaga biago ibugua i̱hondo handabe manga timbuniore haya. Ani biyagonaga Anduane Homogohanda ibuhondo pani karulape mulebira.\x + \xo 4.14 \xt Iba 28.4, 62.12, Min 24.12, Ab 19.33, Lm 2.6, 1 Ti 1.20, Mo 18.6\x*  
\v 15 Iname Ngode Datagaliwabenaga bi mana lameramaligonaga ibugua keba timbuni howa ina bo wahole manda bu kago í̠ nde de hondowa habe.   
\p
\v 16 Godi halu mbira larimangi i̱na ladai birugola agali mbira i̱hayagi nahe bibahende wahalu piai haya. Tigua nakarulape ogoni biyago Ngode Datagaliwabehanda mitangi nabilo hame ledo.\x + \xo 4.16 \xt Ab 7.60, 2 Ti 1.15\x*  
\v 17 Anduane Homogo ibugua i̱ wahalu pu nabi i̱la haabo howa mo hongo hayagola Yu wali agali ndo tara tara hearu ti hale helo i̱na Ngode Datagaliwabe bi mana lamiai harugoni. Tigua i̱ bo homelole biyaria Anduane Homogohanda i̱ yamiya.\x + \xo 4.17 \xt Iba 22.21, Dan 6.22, Ab 23.11, 27.23, 2 Pi 2.9\x*  
\v 18 Anduane Homogohanda i̱ ko bibahende ngagoria kogola i̱ yamiaabo howa dahuliya andaga ibuni Handame Ho Kagoria i̱ haru polebira. Ibunaga mini mo yaraga holene wiaaboboore bilo hamelo ko. Aniore bilo laro.\x + \xo 4.18 \xt Iba 121.7, Lm 11.36, Ga 1.5, Hi 13.21\x*   
\p
\v 19 Pirisila Aguilabi Onesiborasa ibu damenerubi i̱na ti bibahende mitangi biaabo halu ko, layiya lalu lamibe.\x + \xo 4.19 \xt Ab 18.2, 2 Ti 1.16-17\x*  
\v 20 Erasadasa ibu Korindini hondo haya. Torobimasa ibu warago bayagola Miledasani ngelalu piru.\x + \xo 4.20 \xt Ab 19.22, 20.4, 21.29, Lm 16.23\x*  
\v 21 Ira yuni gilope howa dagare ibagane hororu naibidaore i̱ kogoria abale ibulene ngago ibabe. Yubulasabi Pudenesebi Lainasabi Kolodiabi Keriso hameigini bibahendemebi, Tí mitangi ho kama, layiya lalu lamibe.   
\p
\v 22 Anduane Homogo ibu í̠naga dinini heba halu Ngode Datagaliwabenaga biamogo bia holene tí bibahendeha wiaabo helo hamelo ko.