\id 1TH - Huli Bible [hui] -Papua New Guinea 2011 (web version -2013 bd) 
\h 1 TESALONAIGA 
\toc1 Polohanda Keriso hameigini Tesalonaigani hearuhondo beba mbira ogo gilibu wia hene 
\toc2 1 Tesalonaiga 
\toc3 1 Te 
\mt1 1 Tesalonaiga  
\mt2 Polohanda Keriso hameigini Tesalonaigani hearuhondo beba mbira ogo gilibu wia hene  
\imt1 Mbuga ogoha gilibu ngarunaga nemandi ogo  
\ip Polohanda Keriso hameigini Tesalonaigani hearuhondo beba mbira gilibu wia henego irane ti mo hongo helobi ti mini dungulo helobi gili bini. Ti Ngode Datagaliwabehondo mini mbiraore wu haabo kagobi gubalini ho haabo kagobi Timodihanda layagola Polohanda hale howa Ngode Datagaliwabehondo ka̱i̱ lene.  
\ip Ani lowa Polo ibuni ala ti heba mandagi hayangi ibu ogobi harugoni lalubi bi mbira Yasu dai bulenenaga ti hale hayagobi Polohanda ti mo mitangi bia hene. Ani mo mitangi bia halu lalu, Anduane Homogo dai birangi wali agali Kerisohondo mini mbiraore wu howa homayaru ti ala heyulebira. Ina nahome dindini kamaru ti heba mandagi hariha Anduane Homogo lola hole poleberama, lalu Polohanda gilibu wia hene.  
\ip Ani lowa bi mende hale hayagonaga Polohanda bi ogodagua ladai bialu lalu, Keriso ibu dai bilo tambu tígua tíni miniha mo hongo hagahaga bialubi biamogo bigibigi bialubi áyu bialu kamigonidagua biaabo halu halimu, lalu gilibu wia henego nga.  
\iot Bu̱lu̱ baga buwa kuni gilibu ngago  
\io1 \ior 1.1\ior*  
\io1 Polohanda bi ala lenego \ior 1.2–3.13\ior*  
\io1 Ngode Datagaliwabehondo ka̱i̱ lalu henego \ior 4.1-12\ior*  
\io1 Keriso hameiginime bayale bialu holenenaga ngago \ior 4.13–5.11\ior*  
\io1 Keriso ibu dai bulenenaga bi lenego \ior 5.12-22\ior*  
\io1 Ogodagua bulene nga lalu lenego \ior 5.23-28\ior*  
\io1 Lamaro bialu lenego  
\c 1  
\p
\v 1 Polo Sailasa Timodi iname Keriso hameigini Tesalonaigani kamiru tíhondo beba ogo gilibu wia harama. Tí ina Aba Ngode Datagaliwabenagabi Anduane Homogo Yasu Kerisonagabi kamigoni.\x + \xo 1.1 \xt Ab 17.1-13, 2 Te 1.1\x*  
\p Biamogo bia holenebi mo palia holenebi tíha wilo hamelo kama. \fig Tesalonaiga tano ogoni.|src="HK 25D.tif" size="2" ref="1 Tesalonaiga 1.1" \fig*   
\s1 Keriso hameigini Tesalonaigani hearunaga holenebi mini mbiraore wulenebi winigo ogo  
\p
\v 2 Horo bibahendengi iname tí bibahende mitangi bialu Ngode Datagaliwabehondo bi lalu howa ka̱i̱ lalu tínaga minibi laabo haramali.\x + \xo 1.2 \xt Eb 1.16, Pb 1.3-4, Kl 1.3, 2 Te 1.11\x*  
\v 3 Ani lalu howa iname ina Aba Ngode Datagaliwabe naga deni howa tígua mini mbiraore wu howa biabe birimigobi gubalini howa biabe erekuibi birimigobi inanaga Anduane Homogo Yasu Kerisoha mini dunu bia howa mini bilinahe kamigobi mitangi bialu bi lameremali.\x + \xo 1.3 \xt 1 Ko 13.13, Ga 5.6, Kl 1.4-6, Hi 6.10\x*  
\v 4 Ina hamene mbaliniru-o Ngode Datagaliwabehanda tí gubalini howa ibunagaore halimulo tí dabene kamigo mandabu kama.\x + \xo 1.4 \xt Kl 3.12, 2 Te 2.13\x*  
\v 5 Irane iname Bi Mana Debene tí kamigoha bime dege ndo hongomebi Ngode Datagaliwabe Dinini ibu heba bi mana ogoni heneneore manda biai howa yalu ibirima. Ina tí heba mandagi howa bialu harimagoni agua birima tí manda bidamigoni. Ogoni tíore bayale halimulonaga bialu harimagoni.\x + \xo 1.5 \xt 1 Ko 2.4-5, 4.20, Kl 2.2, Hi 2.3\x*  
\v 6 Iname bialu harimagobi Anduane Homogo ibugua biyagobi tígua hondowa bialu harimi. Tígua tandaga timbuni halu harugo lowa Ngode Datagaliwabe Dinininaga turu holene ngiyagome bi mana hale halu yu tiga bialu harimi.\x + \xo 1.6 \xt Ab 17.1-9, 1 Ko 4.16, 11.1, Pb 3.17, 2 Te 3.9\x*  
\v 7 Ani bialu howa Masedonia dindinibi Agaia dindinibi Yasu mana yu tiga biaga bibahende hearuhondo mana bayale walia halu harimi.\x + \xo 1.7 \xt 1 Pi 5.3\x*  
\v 8 Masedonia dindihabi Agaia dindihabi Anduane Homogonaga bi mana tíha howa lo yalu piyago ogoni hangu ndo tígua Ngode Datagaliwabehondo mini mbiraore wirimigonaga heba dindi bibahendeni karume hale haame ho ka. Ani bidago iname nde bi mbira latago holene nawida.\x + \xo 1.8 \xt Lm 1.8\x*  
\v 9 Ina tí hemiria ibirimagola tígua inahondo turu halu nenege hinalu, Hama, larimigonaga wali agali dindi uruni bibahendeni karume te lalu ka. Tí ala mbirale gime wabiniruhondo bi pupu wiaga harimigo ai mini beregedalu Ngode Datagaliwabe ibu hangu henenebi holenehebi kagonaga biabe bule tígua ibuhondo mini mbiraore wirimigonaga te lalu ka.\x + \xo 1.9 \xt Ab 14.15, 1 Ko 12.2, Ga 4.8, 1 Te 2.1\x*  
\v 10 Ngode Datagaliwabe Igini dahuliya andaga howa dai bilo tí hondo kamigonaga te lalu ka. Ngode Datagaliwabe Igini Yasu ibu ala homowa Ngode Datagaliwabe handa ibu mo heya henego ogoni ibugua ina Ngode Datagaliwabe naga lembo holene wulebiragoha naholoma̱yanaga gini mialu ka.\x + \xo 1.10 \xt Ab 17.31, 1 Te 4.16, 5.9, Ta 2.13, 2 Pi 3.12\x*   
\c 2  
\s1 Tesalonaigani howa Polohanda biabe binigo ogo  
\p
\v 1 Hamene mbaliniru-o ina tí hemiria ibalu biabe bialu harimago bame bu wahole ndo birimayago tíni mandabu kamigoni.\x + \xo 2.1 \xt 1 Te 1.5, 1.9\x*  
\v 2 Ina tí Tesalonaiga hemiria naibi Pilibai hemaore tano ogoriani hearume ina mo tandaga halu inahondo mege bialu hayagoni tí manda bu kami. Ani biyaruni bilowabi tí hemigoria inahondo handabe manga hayaruni helowabi iname tíhondo Bi Mana Debene Ngode Datagaliwabeha howa íbu ngago languluma̱ya Ngode Datagaliwabehanda ina mo hongo hene.\x + \xo 2.2 \xt Ab 16.19-24, 17.1-9, Pb 1.30, Kl 2.1\x*  
\v 3 Ani binigo iname tíhondo bi laramago tene yolebi mini ko do howabi mbirali mo hondo holenagabi ndo laramagoni.  
\v 4 Ani ndo Ngode Datagaliwabehanda ina karulape hemane hondowa inahondo Bi Mana Debene lamulene biabe ngiyagola iname nde ibugua hame ledadagua laramali. Iname wali agali mo turu hole manda bialu ndo Ngode Datagaliwabehanda ina ogobiore howa bialu kagoda lalu miniha manda bu kago iname ibu mo turu holenaga manda bialu laramali.\x + \xo 2.4 \xt Yar 11.20, Ga 1.10, 1 Ti 1.11\x*  
\v 5 Iname tí hemiria ibalu tí mo guya howa bi lalubi inanaga miniha dimagoli holene ngago yi howa bi lalubi ndo larimago manda bidamigoni. Ngode Datagaliwabe ibu ina de hondo kagoni.\x + \xo 2.5 \xt Ab 20.33, Lm 1.9, 1 Te 2.10, 2 Pi 2.3\x*  
\v 6 Tí kamirumebi wali agali maru karumebi inanaga mini yaraga helo hame lowa ndo biabe birimagoni.\x + \xo 2.6 \xt Yo 5.41, 5.44, 1 Ko 9.1-6, 2 Ko 11.9, 2 Te 3.8-9\x*  
\v 7 Ina Kerisonaga \w abosolo\w* agali harimagoni howa tíhondo ina biamogo bulene ngago bidaba labehe howa nale harima. Ani nale howa waneigini ai̱yame ibu waneigini mitangi bialu bayuwa hondo hagadagua iname tí heba howa tíhondo ani bialu harima.\x + \xo 2.7 \xt 1 Ko 2.3, 2 Ko 13.4, 2 Ti 2.24\x*  
\v 8 Iname tí gubalini timbuniore ho howa tíhondo Bi Mana Debene Ngode Datagaliwabeha howa íbu ngago hangu langule ndo tí inanaga gubaliniore harimigo iname inaneore tíhondo ngulenego karulape manda bu harima.  
\v 9 Hamene mbaliniru-o iname gime biabe erekuibi biaabo halu harimago tí mitangi nabi kamibe. Iname Bi Mana Debene Ngode Datagaliwabeha howa íbu ngago tí langialu harima. Langialu howa tí mo genda ya halu tígua mbira ngule manda nabilimulonaga ina horombe mbiragabi inane nalu holenenaga biabe erekuibi biaabo halu harima.\x + \xo 2.9 \xt Ab 20.34, 1 Ko 4.12, 2 Ko 11.9, 12.15\x*   
\p
\v 10 Iname bialu harimago Ngode Datagaliwabehanda handaya tíguabi de handarimigoni. Yasu mana yu tiga bu kamiru tíhondo iname mana bayalebi tigabibi hangu bialu kagua nabi harimagoni.  
\v 11 Waneigini abame ibu waneigini mitangi bialu tíhondo biagadagua iname tí hangu hanguhondo bialu harimago manda bidami.\x + \xo 2.11 \xt Ab 20.31\x*  
\v 12 Ani bialu howa iname tí mo hongo halubi mo turu halubi Ngode Datagaliwabe turu helo bialu holene ngadagua bialu halimu laabo halubi harimagoni. Ngode Datagaliwabe ibugua Handame Ho Kagoria tí anda puwa ibunaga bayale taraore holene yu halimulo ibugua tí olenego kami.\x + \xo 2.12 \xt Pb 1.27, Kl 1.10, 2 Ti 1.9, 1 Pi 5.10\x*   
\p
\v 13 Iname Ngode Datagaliwabehondo ka̱i̱ laabo haramaligo irane mende ogo. Iname Ngode Datagaliwabe bi mana tí hemiria yalu ibalu langirimagola tígua hale howa agalinaga bi mana ndo Ngode Datagaliwabenaga bi manaoreda lalu hale halu yu tiga birimigoni áyubi wiaabo kagoni. Bi mana ogoni yu tiga bu kamiru tíha Ngode Datagaliwabe ibugua biabe bialu ka.\x + \xo 2.13 \xt Ga 1.11-12, 4.14, 1 Te 1.2-3, 2 Te 2.13, 2 Pi 3.2\x*  
\v 14 Hamene mbaliniru-o Yudia dindiha Yu agalirume Ngode Datagaliwabenaga wali agali Keriso hameigini hearu ti mo tandaga hayadagua tí damenerume tí mo tandaga halu hayada.\x + \xo 2.14 \xt Ab 17.5, Hi 10.33-34\x*  
\v 15 Yu agali urunime Anduane Homogo Yasubi Ngode Datagaliwabe mana \w latagi\w* haga agali hearubi bo wahenego tigua inabi nde mo tandaga henego kama. Ani bialu hagarume Ngode Datagaliwabe mo turu nahagabi wali agali bibahende baba waitigi halu hagabi ka.\x + \xo 2.15 \xt Ab 2.23, 3.15, 7.52, 9.23, 9.29, 13.45, 13.50, 14.2, 14.5, 14.19, 17.5, 17.13, 18.12\x*  
\v 16 Ogoni hangu ndo tigua Yu wali agali ndo tara tara karume pele mulene yu helonaga bi mana iname lamuligo lowa hangai haabo holene manda bu hene. Tigua ko bibahende biaabo halu hayadagua bia tago halu bima iraga henego ogoni. Ani binigo Ngode Datagaliwabenaga lembo holene tini ibiraho ngeleda.\x + \xo 2.16 \xt Md 23.32-33, 24.6, Lg 11.52, Ab 13.50\x*   
\s1 Polohanda lone nenege polene hame lenego ogo  
\p
\v 17 Hamene mbaliniru-o iname nde tí helalu emene pu bagi harimagola de nahende howa minime dege mitangi bu wuwa tí hameore lalu de hondoa halu lone denguiore hondolego lowa hariga tai bialu harima.\x + \xo 2.17 \xt 1 Te 3.10\x*  
\v 18 Iname tí hemiria dai bua timbuni ho harima. Polo i̱na halu mbira hangu ndo halu mendebi dai bulebiruria dama Heyolabeme inanaga hariga mo hangai haya.  
\v 19 Anduane Homogo Yasu dai birangi ibu deni howa ina wayali harimagonaga mini yaraga holene irane wilobi inanaga mini dunu bia holenebi mo turu holenebi tí ndo holeberamiyagua nde ai holebirabe.\x + \xo 2.19 \xt Pb 2.15-16, 4.1, 2 Te 1.4\x*  
\v 20 Iname tínaga mini mo yaraga holenebi ina mo turu holenebi irane tíore kamigoni.\x + \xo 2.20 \xt 2 Ko 1.14, 1 Te 3.13, Mo 1.7\x*   
\c 3  
\p
\v 1 Iname tí de nahende howa ogoria ha ho wiaabo habe naheyagola iya hangu Adene dindini hondo holene nga manda birima.\x + \xo 3.1 \xt Ab 17.15\x*  
\v 2 Ani bialu howa iyame ina hamene Timodi tí hemiria ibilo pu lariba. Timodi ibu ina heba howa iname Kerisonaga Bi Mana Debene lamialu Ngode Datagaliwabenaga biabe mandagi bialu haramali. Ibugua tí mo hongo helobi mini mbiraore wirimigo biamogo bilobi tí hemiria ibilaribagoni.\x + \xo 3.2 \xt Ab 16.1-3\x*  
\v 3 Irane tí tandaga dewa nalu kamigo howa mini mbiraore wu harimigo yu wahalu napilimulonaga ibilaribagoni. Tandaga urunibi Ngode Datagaliwabehanda ina mo bayale holenaga ibilalu kago tíni manda bidami.\x + \xo 3.3 \xt Eb 3.13, 2 Ti 3.12\x*  
\v 4 Anigo ina tí heba mandagi harimangi iname maha tandaga noleberama lalu tí abale langirimagoni. Ani bulebira langirimadagua birago bayuwa manda bidami.\x + \xo 3.4 \xt Ab 14.22, 20.24\x*  
\v 5 Irane ogoninaga i̱na Timodi tí kamiria ibilarugoni. Tígua mini mbiraore wiaabo halu kamibe be agua birimibe toba hayagola hondo pu laru. I̱na mitangi birugola dama Heyolabeme tí ko mo bia halu iname biabe birimago mo ko halu ibira holigo ani mitangi biru.\x + \xo 3.5 \xt Pb 2.16\x*   
\p
\v 6 Ai Timodi ibu tí kamigoria howa ina kamaria lone daibu ka. Dai buwa ibugua tí mini mbiraore wu haabo kami lalubi tí gubalini hagahaga bu kami lalubi bi turubiore ogoni inahondo langiya. Ani langialu ibugua tí ina mitangi biaabo halu iname tí de hondoa ho kamadagua tíguabi ina de hondoa ho kama larimiyago hale harima.\x + \xo 3.6 \xt Ab 18.5\x*  
\v 7 Hamene mbaliniru-o ibugua ani bidami lalu langiyagome ina genda holenebi tandaga nolenebi ngagoha howa tígua mini mbiraore wu haabo kami layago hale harimagome inanaga mini mo hongo haragola kama.\x + \xo 3.7 \xt 2 Te 1.4\x*  
\v 8 Anigo tígua Anduane Homogoha ho gimbu buwa mini bilina ho haabo kamiyagua nde ina turu howaore kamagoni.\x + \xo 3.8 \xt Pb 4.1\x*  
\v 9 Áyu iname tí mitangi bialu inanaga Ngode Datagaliwabehondo ka̱i̱ore labehe kama. Ina tí kamigo hondowa inanaga Ngode Datagaliwabe deni howa turu ho kamago ibuhondo ka̱i̱ larama.  
\v 10 Iname horombe mbiragabi tí hameore lowa Ngode Datagaliwabehondo bi lalu ina tínaga dengui hondoa kamago lalubi tígua mini mbiraore wu kamigo mo hongo ha tago holoma̱ya lalubi lamiaabo halu haramali.\x + \xo 3.10 \xt Ab 26.7, Lm 1.10, Kl 4.12, 2 Ti 1.3\x*   
\p
\v 11 Inanaga Aba Ngode Datagaliwabe ibunibi inanaga Anduane Homogo Yasu ibuguabi ina tí kamiria ibuluma̱ya haru ibilo hame ledama.\x + \xo 3.11 \xt 2 Te 2.16\x*  
\v 12 Anduane Homogo ibugua tíni gubalini hagahaga beramiligobi wali agali bibahende karuhondo gubalini haramiligobi mo anda haaboore helo larama. Tínaga gubalini holene ogoni iname tíhondo gubalini timbuni ho kamadaguaore halimulo hamelo kama.\x + \xo 3.12 \xt 1 Te 4.9-10, 5.15, 2 Pi 1.7\x*  
\v 13 Ogonidagua birimiyagua ibugua tínaga bu mini mo hongo holebira. Mo hongo haragola inanaga Anduane Homogo Yasu ibunaga wali agali heba bibahende dai biragola ina Aba Ngode Datagaliwabe deni howa tí ibunaga loma bia henebi tigabiore ko mbira para nahebi holeberami.\x + \xo 3.13 \xt Seg 14.5, 1 Ko 1.8, Pb 1.10, 2 Te 1.7, 1.10\x*   
\c 4  
\s1 Iname Ngode Datagaliwabe turu helonaga bialu holene ogobi nga  
\p
\v 1 Ina hamene mbaliniru-o lamaro bialu bi mbira langeramago ogo. Tígua Ngode Datagaliwabe turu helonaga agua bialu holene nga lalu abale langirimago mandabu kami. Ogoni manda buwaore bialu harimigoni. Áyu iname Anduane Homogo Yasunaga minini howa tíhondo hongo howa lalu tígua bialu harimidagua dege bia tagoore halu bialu halimu larama.\x + \xo 4.1 \xt Pb 1.27, Kl 1.10, 2.6, 1 Te 2.12, 2 Te 3.6\x*  
\v 2 Anigo irane Anduane Homogo Yasunaga hongoni howa iname tíhondo agua bialu holene nga lalu langirimago mandabu kamigoni.  
\v 3 Ani manda bialu Ngode Datagaliwabehanda tí mitangi bialu ibunaga loma bia hene howa wali agali kayu bulene tíha para nahe halimulo hame ledago ogoni.\x + \xo 4.3 \xt 1 Ko 6.15, 6.18, Eb 5.3, 5.17, 5.27, Kl 3.5, 1 Te 5.23, Hi 10.10, 1 Pi 1.16\x*  
\v 4-5 Agali tí hangu hangu howa tínaga one bedagohondo tigabi dege bialu wali agali Ngode Datagaliwabe manda nabi karume dimagoli halu biagadagua ndo tigabi bulene ngadagua hangu bialu haru halimu.\x + \xo 4.4-5 \xt Lm 6.19, 1 Ko 6.13-15, 6.18\x*\x + \xo 4.4-5 \xt Iba 79.6, Ga 4.8, Eb 2.12, 4.17-18, 2 Te 1.8\x*  
\v 6 Anigo mana ogoni mitangi bialu pugua nabi Keriso hameigini maruhondo mo hondo halu ko nabi halimu. Bi ogoni iname ala hongoore howa tí langialu harimagoni irane mana ko urunibi bialu karuhondo Anduane Homogohanda pani mulebira.\x + \xo 4.6 \xt LBM 19.11-13, Iba 94.1, 1 Ko 6.8, 2 Te 1.8\x*  
\v 7 Iname wali agali kayu bigibigi bialu holoma̱ya ndo Ngode Datagaliwabehanda ibunaga loma bia hene howa bayale bialu holoma̱ya ina olo helenego kama.\x + \xo 4.7 \xt 1 Ko 1.2, 2 Te 2.13-14, Hi 12.14, 1 Pi 1.14-16\x*  
\v 8 Ani bulene ngago mbiralime mana áyu lawai halu kamagoni puguayagua ogoni ibu agalinaga bi ndo pugualu ka. Ngode Datagaliwabe ibu Dinini tíhondo ngiaga kago ogoni ibunaga bi pugualu kagoni.\x + \xo 4.8 \xt Ese 36.27, 37.14, Lg 10.16, 1 Ko 2.10, 2 Ko 1.22, 1 Yo 3.24\x*   
\p
\v 9 Keriso hameigini kamiru tíni gubalini hagahaga bulene ngago agua halimu lalu gilibu wia holene nawi. Irane tíni agua bialu gubalini hagahaga bialu holene nga lalu Ngode Datagaliwabehanda tínihondo lawai hayago manda bidamigoni.\x + \xo 4.9 \xt Yo 13.34, 15.12, Hi 8.11, 1 Yo 2.20, 2.27, 3.11-13\x*  
\v 10 Gubalini holene ogoni yuwa Keriso hamewaneigini Masedonia dindini hearu bibahendehondo biamogo bialu harimi. Hamene mbaliniru-o ani bialu harimigodagua hangu ndo bia tagoore halu haabo halimu.\x + \xo 4.10 \xt 2 Te 3.4\x*  
\v 11 Ani bialu howa iname tíhondo ala langirimadagua miniha hogorale bu halu marunaga biabe birago hondowa hangu ndo tíninaga biabe beremigo mitangi bialu tínaga gime tomo nalu holenego biabe bialu hole harudalo manda buwaore halimu.\x + \xo 4.11 \xt Eb 4.28, 2 Te 3.8, 3.12, 1 Pi 4.15\x*  
\v 12 Ani bialu harimiyagua wali agali Yasu mana yu tiga nabi tagira karume tí hondowa bayaleore bialu kami lelobi tíni mbirale buru pale kamigo wali agalime ngilo mini mo hana holene hangu nawilobi halimu.\x + \xo 4.12 \xt Lm 13.13, 2 Ko 8.21, Kl 4.5\x*   
\s1 Anduane Homogo dai bulebirago ogo  
\p
\v 13 Ina hamene mbaliniru-o wali agali Yasuhondo mini mbiraore nawi howa mini dunu bia holene nayi karume mbirali homaragola ti yi lalu dara timbuniore hagadagua tí nahalimulo iname wali agali homeneru biagane mana henene manda bilimulo hame ledama.\x + \xo 4.13 \xt Eb 2.12\x*  
\v 14 Ani manda bidamagome Yasu ibu homowa lone heyu hayago yu tiga bidamagodagua Ngode Datagaliwabe ibugua wali agali Yasuhondo mini mbiraore wu howa homayaru ti Yasu heba haru dai bulebiragonaga yu tiga bu kamagoni.\x + \xo 4.14 \xt Lm 14.9, 1 Ko 15.3-4, 15.12-13, 15.18, 15.23\x*   
\p
\v 15 Mana ogo Anduane Homogo ibugua lawai hayago langerama. Anduane Homogo dai birangi ina nahome dindini kamarume wali agali ala homayaru helalu ina abale napoleberama.\x + \xo 4.15 \xt 1 Ko 15.51-52\x*  
\v 16 Horo ogoningi haragola Ngode Datagaliwabehanda bi dalimu lolebiragobi dahuliyali haguane mbira kagome bi lolebiragobi Ngode Datagaliwabenaga mbelo biguli lolebiragobi uruni ledagola Anduane Homogo ibuni dahuliya andaga howa dalipe holebira. Ani biragola wali agali Kerisohondo mini mbiraore wu howa homayaru ti ala heyulebira.\x + \xo 4.16 \xt Md 24.30-31, Ab 1.11, 1 Ko 15.23, 15.52, 1 Te 1.10, 2 Te 1.7\x*   
\p
\v 17 Ani bidagola ogoningi ina nahome dindini kamaru ibugua mo ngoai halu ti ala homene heyiyaru heba mandagi hari beralibaha Anduane Homogo lola hole poleberama. Ani bialu ina Anduane Homogo heba mandagi haabo holeberama.\x + \xo 4.17 \xt Yo 12.26, Ab 1.9, Mo 11.12\x*  
\v 18 Ani holeberamago bi ogoni lalu tíni miniha mo hongo hagahaga bialu halimu.   
\c 5  
\s1 Anduane Homogo dai bilonaga manda manda bu holene ngago ogo  
\p
\v 1 Hamene mbaliniru-o ani bulebira lalu bi ogoni langirimago horo ogoangi ibulebira lalubi mbirale mbira ogo ale bialu kamaria ibulebira lalubi iname tíhondo lone langulene nawi.\x + \xo 5.1 \xt Md 24.36\x*  
\v 2 Irane ina mitangi nabi kamaria pageali mbiraga ibagadagua Anduane Homogonaga Horo ogonibi ibulebirago manda buwaore kamigoni.\x + \xo 5.2 \xt Md 24.42-44, Lg 12.39, 2 Pi 3.10, Mo 3.3\x*  
\v 3 Wali agalime lalu, Ina bayale wai nabi karulape hangu kama, lalu kaore mo ko holene abaleore ibira holebira. Waneigini ai̱ya gali taba honolene tu kaware haragola tandaga abale hagadagua ogonibi ibulebira. Ani biragola wali agalime yo polene henge nawulebira.\x + \xo 5.3 \xt Ese 13.10, Hos 13.13, Md 24.39, Lg 21.34-35, Yo 16.21-22\x*  
\v 4 Hamene mbaliniru-o tí arumaha ndo kamigo pageali ibiragola mogo laramilidagua Horo ogoni ibiragola tí mogo lolene nawulebira.\x + \xo 5.4 \xt Lm 13.12-13, 1 Yo 2.8\x*  
\v 5 Tí bibahende kamiru wá holenenaga kamigo tí horombenaga kami. Ina mbiraganagabi arumanagabi ndo kamagoni.\x + \xo 5.5 \xt Lm 13.12, Eb 5.8-9\x*  
\v 6 Anigo wali agali maru ti palia hondo kadagua nahe ina dengala howabi mini haru howabi holene nga.\x + \xo 5.6 \xt Md 24.42, 25.5, 25.13, 1 Pi 5.8\x*  
\v 7 Mbiraga haragola wali agalime palia hondo hagabi lulu iba nalu lulu yu hagabi ka.\x + \xo 5.7 \xt Lg 21.34-36, Lm 13.13, Eb 5.14\x*  
\v 8 Ani biagadagua ndo ina horombenaga kamagome ina mini haru howa holene nga. Ani bialu wai biagame mbirale \w galuhombeneni\w* karulagadagua iname mini mbiraore wulenebi gubalini holenebi karulo holene nga. Ani karulalu wai biaga manda karulagadagua ina pele mulene ngiragonaga mini dunu bia holene karulo holene nga.\x + \xo 5.8 \xt Ais 59.17, Eb 6.13-17\x*  
\v 9 Ngode Datagaliwabehanda ibunaga lembo holene ngagonaga tandaga iname noloma̱ya ina dabo helene ndo. Anduane Homogo Yasu Kerisoha howa pele mulene yu holoma̱ya ibugua ina dabo helene kama.\x + \xo 5.9 \xt Lm 9.22, 1 Te 1.10, 2 Te 2.13-14, 1 Pi 2.8\x*  
\v 10 Anduane Homogo Yasu Keriso ibu dai birangi ina dindini haabo kamaria ibiyaguabi homedamagola ibiyaguabi ta nabi ibu heba mandagi haabo holoma̱ya ibugua inanaga homa hene.\x + \xo 5.10 \xt Lm 14.8-9, 2 Ko 5.15, 1 Te 4.14\x*  
\v 11 Ani bidago tígua tíni miniha mo hongo hagahaga bialubi biamogo bigibigi bialubi áyu bialu kamigonidagua biaabo halu halimu.\x + \xo 5.11 \xt Yu 20\x*   
\s1 Bulene ngago lalubi tí mitangibu ko lalubi Polohanda bi lamaro binigo ogo  
\p
\v 12 Ina hamene mbaliniru-o tí heba biabe mandagi bialu karu tigua tí Kerisoha kamiru haru howa hariga walia halubi lawai halubi kago manda bialu tihondo bayale hangu bialu halimulo hame ledama.\x + \xo 5.12 \xt 1 Ko 16.18, Pb 2.29, 1 Ti 5.17, Hi 13.7, 13.17\x*  
\v 13 Tigua biabe bialu kago galoneore mitangi bialu tihondo gubalini howa bayaleore bialu tíni mo palia hagahaga bialu halimu.   
\p
\v 14 Ina hamene mbaliniru-o tígua bulene ngago ogo. Biabe bibe manga haga karuhondo bi hongo howa lamilimu. Gi haga karu tinaga miniha hongo helo mo hongo halimu. Mini gedaorewi karu biamogo bilimu. Bibahendehondo abale keba nahe bi tendore lalu ema nabi hondo halimu.\x + \xo 5.14 \xt Ga 5.22, 6.1-2, Kl 3.12, 2 Te 3.6, 3.11, 3.15, Hi 12.12\x*  
\v 15 Ani buwa mbiralime ko biragola ko dege bia dai bulamini de hondo halu tíni degedege bayale bigibigi biaabo holebi wali agali bibahende karuhondo bayale dege biaabo holebi harimadalo manda buwaore halimu.\x + \xo 5.15 \xt Min 20.22, Md 5.39, Lm 12.17, 1 Ko 6.7, 1 Pi 3.9\x*   
\p
\v 16 Miniha turu haabo howa halimu.\x + \xo 5.16 \xt 2 Ko 6.10, Pb 4.4\x*  
\v 17 Bibahende ta nabi ngarunaga Ngode Datagaliwabehondo bi laabo halu halimu.\x + \xo 5.17 \xt Lg 18.1, Eb 6.18, Kl 4.2, 1 Pi 4.7\x* \fig Bibahende ta nabi ngarunaga Ngode Datagaliwabehondo bi laabo halu halimu.|src="HK 80A.tif" size="1" ref="(5.17)" \fig*  
\v 18 Tí kamigoha bayale holene íbu ngayaguabi ko holene íbu ngayaguabi ta nabi bibahendengi Ngode Datagaliwabehondo ka̱i̱ lalu halimu. Tí Keriso Yasuha ho gimbu bu howa ani lalu halimulo Ngode Datagaliwabehanda hamelo ka.\x + \xo 5.18 \xt Eb 5.20, Kl 3.17\x*   
\p
\v 19 Ngode Datagaliwabe Dinini ibugua tíha howa hungu bialu kago mo hundia nahalimu.\x + \xo 5.19 \xt Eb 4.30, 1 Ti 4.14, 2 Ti 1.6\x*  
\v 20 Mbiralime bi mana lamulene Ngode Datagaliwabehanda miyago langiragola hale habe manga nahalimu.\x + \xo 5.20 \xt 1 Ko 14.1, 14.39\x*  
\v 21 Bi larago bibahende tigatiga larabe yole larabe bayuwa dabalu bayalego dege mo yai halimu.\x + \xo 5.21 \xt 1 Ko 2.11, 2.15, Pb 4.8, 1 Yo 4.1\x*  
\v 22 Ko bulene tara tara bibahende ngaru tí kamigoha íbu ngagola tíni para holani hondowa halimu.\x + \xo 5.22 \xt Yob 1.1, 1.8, 2.3\x*   
\p
\v 23 Mo palia holene ngiaga Ngode Datagaliwabe ibugua tí ibunaga hai halimulo mo tiga bia helo laro. Ina Anduane Homogo Yasu Keriso dai bilonaga howa tínaga dininibi minibi tinginibi ko tara tara ngarume para nahe halimulo Ngode Datagaliwabe ibugua tí haru hai helo laro.\x + \xo 5.23 \xt Lm 15.33, 1 Ko 1.8, Pb 4.9, 1 Te 3.13, 2 Te 3.16\x*  
\v 24 Tí olo helayago ibu mini bilinahe kago ibunime ani bulebiraore.\x + \xo 5.24 \xt 1 Ko 1.9, 10.13, 2 Te 3.3\x*   
\p
\v 25 Hamene mbaliniru-o tígua Ngode Datagaliwabehondo bi lalu howa inanagabi la halimu.\x + \xo 5.25 \xt Kl 4.3, 2 Te 3.1\x*   
\p
\v 26 Keriso hameigini bibahende kamiru gi tigani bigibigi bilimu.\x + \xo 5.26 \xt Lm 16.16\x*   
\p
\v 27 Ina Anduane Homogonaga minini howa tíhondo bi hongo howa lalu beba ogoni Keriso hameigini bibahende karu hale hai helo daga lope halimu laro.   
\p
\v 28 Anduane Homogo Yasu Kerisonaga biamogo bia holene tíha wiaabo helo hamelo kogoni.