\id TIT - Huitoto Mɨnɨca NT -Colombia 2011 (DBL 2013) 
\h TITO 
\toc1 San Pablo Títomo Orécabe 
\toc2 Tito 
\toc3 Tit 
\mt1 SAN PABLO TÍTOMO ORÉCABE 
\mt2 La Carta del Apóstol San Pablo a Tito 
\c 1  
\s1 Pablo Títomo cuete 
\p  
\v 1 Páblodɨcue. Juzíñamui táɨjɨtagamɨedɨcue. Jesucristo orécamɨedɨcue. Juzíñamui nɨzécanomo ɨ́ɨnotalle uai cue lluájillena ie orécamɨedɨcue. Daje izói caɨ ɨ́ɨnoga ua uai, íaɨoɨ onóillena orécacue.  
\v 2 Afe bie caɨ ɨ́ɨnoga ua uai, jaca nɨnomo ñue caɨ illɨ́nomo caɨ ocuírinanomo móirede. Naɨ énɨe cómuiñenia uícodo, Juzíñamui afe zíiñona caɨ cáaillɨnona llote. Juzíñamui jaca táɨnona llófɨnide.  
\v 3 Ja birui ie llóiacaga uaina, ie mamécaruimo cuemo jóonega llófuecaillado caɨna onótate. Uafue, caɨ Jíllotaraɨma Juzíñamui afe daje uai cue llófuecaillena cue ocuide.  
\v 4 Tito, daje izói Juzíñamuimo ɨ́ɨnotɨcoco, íemona nahí cue jitó izóidɨo. Jira bibe omo cuetɨcue. Afe llezica, caɨ Moo Juzíñamui caɨ Ocuífɨrede caɨ Jíllotaraɨma Jesucristo dɨga o ñue ézɨcɨllena jitáidɨcue. Daje izói omo dúecaillena jitáidɨcue. Afe dáaruido caɨmare uái ñue o íllena jɨcádɨcue. 
\s1 Tito Crétamo llófuete 
\p  
\v 5 Monáillai cɨgɨ idu Crétamo o cue fɨénocaillaruido, naɨ fɨgo fɨnóbiñede raa ñue daje dɨne jaɨ́cɨna o fɨnózɨllena ona fɨédɨcue. Aféruido naga dɨga jofue illánuiaɨmo ite Juzíñamuimo jaɨnaide gaɨrídɨnomo íaɨoɨ ócuitɨmɨena o jóoneri daɨdɨcue. Ñue ócuite eicomɨ́nɨna jenoda o jóonetadɨcue. Afe izói naui uícodo omo llonódacaidɨcue.  
\v 6 Naga ñue ocuide éicome nɨ́fuenino írede. Daje izói afémɨe daa rɨngo otɨ́mɨe írena. Daje izói ie úruiaɨ Juzíñamuimo ñue ɨ́ɨnorediaɨoɨ. Afe úruiaɨ fɨénidɨfuena jóoneñegazana írediaɨoɨ. Ocuilla uaina náfueñedɨno izói ínidiaɨoɨ.  
\v 7 Iemo naga ócuitɨllaɨma Juzíñamui dɨbénemo ocuícaiaɨoɨ. Ie jira afémɨe nɨ́fuenino jaɨ́cɨna ñue írede. Daje izói afémɨe “Cue bie ɨere rɨ́imɨedɨcue” daɨínide. Daje izói afémɨe comécɨna éoicainide. Daje izói afémɨe jɨ́faifɨnide. Daje izói afémɨe illáɨredɨmɨena ínide. Daje izói afémɨe fia Juzíñamuimo táɨjɨnado úcube otɨ́mɨena ínide.  
\v 8 Mei jɨáɨfodo, afémɨe ie jofomo mácaɨbitɨnona jɨáɨfodo comécɨñeno caɨmare llɨ́ɨnofɨredɨmɨena írede. Afémɨe ñue caɨmare fɨnófɨredɨmɨena írena. Afe izói dama ie abɨna ñue ocuídɨmɨena írena. Afe izói afémɨe comécɨna jaɨ́cɨna itɨ́mɨena írena. Afe izói afémɨe Juzíñamuimo ñue jaɨnáidɨmɨena írena. Afe izói afémɨe dama ie abɨna lletádɨmɨena írena.  
\v 9 Afémɨe ñue ɨ́ɨnofɨrega íemo lloga uaimo ɨere comécɨirede, jɨáɨmacɨ comécɨna náɨcaitallena. Iemo jɨáɨ afémɨe daɨí írede, nana uáitatɨnona uafue daɨítallena. 
\p  
\v 10 Mei uafue, aillo ocuícana náfueñedɨno ite. Judíuaɨmo ite nabene. Afémacɨ táɨnodo úritiaɨoɨ. Afe llezica comɨ́nɨna jɨ́fuetiaɨoɨ.  
\v 11 Afémacɨ úrilla llɨ́ɨcaitarede, mei dáarie afézie nana íaɨoɨ ñue ɨ́ɨnogafue dobáiñotadiaɨoɨza. Afe llezica llófueraɨnɨna uaido llófuefɨrediaɨoɨ, meáirede fɨ́nuado úcube óllena. 
\p  
\v 12 Afe Creta énɨe imácɨmona daade uai jino lloraɨma, ie nabáitɨaɨdo úrite. Daɨde: “Creta imacɨ táɨnofuerediaɨoɨ, íemo jazicɨ ie rɨ́llenɨaɨ izóidiaɨoɨ, íemo ɨere güillárediaɨoɨ, íemo jaca ɨere ráiraɨediaɨoɨ,” daɨde.  
\v 13 Afémɨe uafue daɨde. Ie jira rɨire íaɨoɨna lletari, Juzíñamuimo íaɨoɨ ɨ́ɨnogafuena féitañeno ñue jeire íaɨoɨ óllena.  
\v 14 Iemo daje izói ñue íaɨoɨna lletari, judíuaɨ danɨ uibica uáillaɨmo íaɨoɨ náfueñeillena. Iemo jɨáɨ, ua uáimona oni jɨ́icaidɨno comuítaga ocuilla uaimo íaɨoɨ cácareiñeillena. 
\p  
\v 15 Nana comécɨna ɨ́aɨfuenidɨmɨemo naga raa ɨ́aɨfuenide. Mei jɨáɨfodo íadɨ nana Juzíñamuimo ɨ́ɨnoñedɨno ɨ́aɨfuiaɨredɨnomo naga raa ɨ́aɨfuiaɨrede. Daje izói íaɨoɨ ɨfocɨ uibíllafue ɨáɨrede, nana íaɨoɨ comecɨ úrilla uai dɨga.  
\v 16 Afémacɨ “Juzíñamuina onódɨcaɨ” daɨdíaɨoɨ, mei íadɨ íaɨoɨ fɨnócado Juzíñamuina jáanotiaɨoɨ. Mei afémacɨ ɨáɨruigamacɨna jáidiaɨoɨza. Iemo náfueñedɨno izói itíaɨoɨ; íemo due jiza ñuera raana fɨnónidiaɨoɨ. 
\c 2  
\s1 Ñuera uafue llófueina uai 
\p  
\v 1 Tito, o daɨille uaillaɨ ñue uafue llófueina izói jaca jaɨ́cɨna jóirede.  
\v 2 Nana éicomɨnɨ jaca jɨfáifɨnidɨnona írede. Daje izói ñúefuiaɨdo jacɨ́ruiregaiaɨoɨ. Iemo, abɨna ñue onódɨmɨiaɨna írediaɨoɨ. Daje izói Juzíñamuimo íaɨoɨ ɨ́ɨnogafuemo ɨránifɨnidɨmɨe izói írediaɨoɨ. Daje izói nágaruillaɨdo ñue izíruicana ífɨrediaɨoɨ, íemo jɨáɨ jaca comécɨna járitaifɨnidiaɨoɨ.  
\v 3 Daje izói eirɨngótɨaɨ úrioinide; íemo ñúefuedo jacɨ́ruiregaiaɨoɨ. Afe izói táɨnona llófɨnidiaɨoɨ. Iemo jɨáɨ jaca jɨfáirado jɨ́faifɨnidiaɨoɨ.  
\v 4 Daɨí ñue íaɨoɨ íllana ácatarediaɨoɨ, jɨáɨe rɨngónɨaɨ jitáɨnguaɨ afe izói íllena. Afedo íaɨoɨ ɨnítɨaɨna izíruillena llollíaɨoɨ. Daje izói jitaɨngo íaɨoɨ úruiaɨ gáɨllena llófueregaiaɨoɨ.  
\v 5 Afe izói íaɨoɨ abɨna ñue onóillena llófueregaiaɨoɨ. Daje izói ɨ́aɨfuiaɨnidɨnona íaɨoɨ íllena llófueregaiaɨoɨ. Afe izói jofo ero fɨnoca raa ñue úiñollena llófueregaiaɨoɨ. Daje izói illáɨnidɨngo izói íaɨoɨ íllena llófueregaiaɨoɨ. Afe izói íaɨoɨ ɨni ocuícana jiéruifɨreillena llófueregaiaɨoɨ. Be daɨí írediaɨoɨ, buna Juzíñamui lloga fɨeni úridoɨñeillena. 
\p  
\v 6 Daje izói jitócomɨnɨ ñue íaɨoɨ íocɨretari, abɨna ñue íaɨoɨ onóillena.  
\v 7 Iemo jɨáɨ, naga o jetáacaga dɨbénedo o ñue illa izói íaɨoɨ íllena ácatari. Iaɨoɨna o llófuelle llezica, taɨno jɨ́fueñeno llófuefɨreiri. Daje izói jɨfánodoɨñeno lloiri.  
\v 8 Daje llezica táɨnodo úrinidɨo, buna o jánari úriñeillena. Afe daɨí o uáitaacadɨno meáiruitiaɨoɨ, mei ja odo fɨeni úrinideza. 
\p  
\v 9 Iemo jɨáɨ, nana ocuícano íaɨoɨ ocuídɨno anamo ñue íllena o llófuefɨreiri. Daje izói cáɨmamacɨna íaɨoɨ íllena lloíri. Iemo uai ófɨreiñedɨnona írediaɨoɨ.  
\v 10 Afe izói íaɨoɨ táɨjɨna llezica íaɨoɨ ocuídɨno ráaɨe merɨ́ñedɨnona írediaɨoɨ; mei jɨáɨfodo naga táɨjɨnana jetátagamɨe ñue ɨ́ɨnofɨregamɨena írede. Afe izói írediaɨoɨ, caɨ Jíllotaraɨma Juzíñamui lloga uai ɨere ebíredeza, danɨ afémacɨ abɨdo onótallena. 
\p  
\v 11 Mei jɨɨ, Juzíñamui caɨmo ie dúecaillana caɨmo cɨ́otate. Afe caɨmo ie dúecaillado nana énɨemo itɨno jíllorediaɨoɨ. Afe jíllorenafue Juzíñamui jae caɨna onótate.  
\v 12 Afe caɨmo ie dúecaillamo caɨ comécɨiadɨ fɨeni illafue caɨ fáɨcanocaillena caɨna onótate. Afe izói bie énɨe imacɨ óiacaga caɨ fáɨcanocaillena onótagacaɨ. Iemo jɨáɨfodo biruíllaɨdo caɨ illafue ñue úillena caɨmo llote. Jaca abɨ́ ñue caɨ ocuífɨrena caɨmo llote, íemo caɨ illafue ñue jaɨ́cɨna caɨ jóoneillena caɨ llote. Afe izói Juzíñamuimo dúide uaina caɨmare fɨnóredɨcaɨ.  
\v 13 Iemo daje izói Juzíñamui uícodo lloga uai, caɨmare zuíllemo ocuírioiredɨcaɨ. Mei aferui ɨere rɨ́inoredɨmɨe Juzíñamui, caɨ Jíllotaraɨma Jesucristo caɨmare billɨ́ruiza.  
\v 14 Afémɨe caɨ ɨ́coɨnia tɨ́illɨnomo uigámɨe, nana fɨénidɨfuiaɨmona caɨ jílloillena. Daje izói nana caɨ ɨ́aɨfuiaɨ muiñóllena uigámɨe. Afedo afémɨe íena caɨna mamede, ñúefue ɨere íocɨre caɨ fɨnóllena. 
\p  
\v 15 Be nɨe o llófuerena uai. Nana náɨnide comɨnɨ comécɨna náɨcaitari, íemo lletáredɨno omo ite ocuille rɨ́ino dɨeze íaɨoɨna lletáfɨreiri. Buna ona jámairuitañeno iri. 
\c 3  
\s1 Juzíñamuimo ɨ́ɨnotɨno bie izói írediaɨoɨ 
\p  
\v 1 Jesucrístomo ɨ́ɨnotɨno énɨe illaɨma anamo íaɨoɨ írena uibíñotari, naa ocuídɨnuiaɨri. Daje izói aféllaɨmaɨ ocuica uai íaɨoɨ jiéruillena uibíñotari. Afe llezica ebena ñúefuiaɨ fɨ́nuamo ɨere jíecairediaɨoɨ.  
\v 2 Daje izói jɨáɨma jánana fɨeni úrinide. Afe izói afémacɨ comécɨna caɨmare uái itɨ́nona írediaɨoɨ, íemo illáɨnidɨnona írediaɨoɨ. Iemo daje izói nana comɨ́nɨna omoɨ uáidua llezica, comécɨna mánaɨdɨmɨena o illa jino íaɨoɨmo onótari. 
\p  
\v 3 Mánaɨdɨmɨena íredɨcaɨ. Mei naui uícodo daje izói caɨ bie jaca abɨna onóñedɨnodɨcaɨza. Juzíñamui lloga uaimo cacáreiñedɨcaɨ. Aféruimo nɨné féiraitɨno izói ífɨredɨcaɨ. Daje izói nana caɨ comecɨ fɨeni gáɨnafuiaɨmo rɨire ocuícanodɨcaɨ; íemo jɨáɨ caɨ ióbitade raamo rɨire llavécanodɨcaɨ; jaca nágarui fɨeni ífɨredɨcaɨ, íemo jɨáɨmamo úradoifɨredɨcaɨ. Iemo comécɨna éoidɨcaɨ, daje izói conímana éoicaifɨredɨcaɨ.  
\v 4 Mei íadɨ caɨ Jíllotaraɨma Juzíñamui íemo ite cáɨmafue jino caɨmo cɨ́otate, íemo nana náɨraɨaɨna ie izíruifɨrena dɨga.  
\v 5 Afémɨe caɨna jíllotaacade, mei íadɨ jaca nanómona caɨ daɨna ñúefuena caɨ fɨ́nuamona Juzíñamui caɨna jíllotañede. Mei jɨáɨfodo dama afémɨe caɨmo dúecaillado caɨna jíllotate. Caɨmo ite ɨ́aɨfuiaɨ dama ie múiñuado caɨna jíllotate. Afe llezica Juzíñamui Ñuera Joreño afe múiñuado, meine como jéicɨganona caɨna fɨnode. Iemona daje izói afe Ñuera Joreño como comuítaga ñúefuedo caɨna úicaite.  
\v 6 Caɨ Jíllotaraɨma Jesucrístodo, Juzíñamui ie Ñuera Joreño jeruíñeno caɨmo fecade.  
\v 7 Afe daɨí Juzíñamui caɨna dúecaillano, nɨ́fuenidɨnodɨcaɨ izói caɨmo caɨmare éroide. Afémɨe daɨí caɨna itátate, caɨ ocuírina zíiñona caɨ illɨno caɨ maiñóllena. 
\p  
\v 8 Bie uaillaɨ ɨere uáfueza. Daje izói nana bífuiaɨ jeire íaɨoɨ ólleza ona íaɨoɨna ɨere llotátaitɨcue. Daɨí ona llotátaitɨcue Juzíñamuimo ɨ́ɨnotɨno bie ñúefuiaɨmo nágarui íaɨoɨ jiéruillena. Comɨnɨ canóllena bífuiaɨ nana ñuera.  
\v 9 Mei íadɨ abɨna onóñedɨno júfidogafuemona oni o jɨ́icairi. Daje izói jaiáidɨgɨma dɨbénedo lloga íaɨoɨ comuilla táɨnofuiaɨmona oni o jɨ́icairi. Afe izói jɨáɨmana uáitafɨrenamona oni o jɨ́icairi. Iemo jɨáɨ, Moisés lloga uaimo ite féiredɨfuiaɨdo fuirídɨnomona oni jɨ́icairi. Nana bie izóidɨfuiaɨ cómena canóñede. Daje izói bífuiaɨ ɨfócɨna úriñedɨnomona comuide. 
\p  
\v 10 Juzíñamuimo dájena jaɨnáidɨno cɨ́gɨri dámɨe eneno bozíetaiacania, íena uáidota ménacaiño lletari. Daɨí lletaca cacáacañeniadɨ, omoɨ cɨ́gɨmona íena ruifíruiri.  
\v 11 Uáfuena íena ruifíruiri, mei ja áfemona afémɨe fɨénidɨmɨena onóredeza. Afémɨe ñúefuemona oni nɨbéfodo fɨénidɨfuemo baɨídɨmɨe. Iemo dama ie fɨnoca fɨénidɨfuedo duere fɨnóbide. 
\s1 Pablo naa ie nabáiñɨaɨri mamérilla uai 
\p  
\v 12 Artémana mámecɨredɨmɨe, nɨbaɨ Tíquicona mámecɨredɨmɨe omo cue óreiadɨ méifomo, Nicópolis jofue illánomo raɨre cue eróizaɨbiri. Afénomo o jáillena raɨre mamériri, dɨnomo dáanomo conímamo dúcɨitɨcocoza. Mei afénomo rozíredɨruillaɨ záitaiacadɨcueza.  
\v 13 Iemo nane jɨáɨfue, Zénana mámecɨredɨmɨe Apolos dɨga nana omo ite dɨeze íaillɨnoɨna canori. Afe Zena jɨáɨmado ñue úrifɨredɨmɨe. Iaillɨnoɨ jaille llezica jitaica raana íaillɨnoɨmo fecari, mɨnɨ́cana íaillɨnoɨ jítaiñellena.  
\v 14 Iemo daa caɨ Juzíñamuimo jaɨnáidɨno ñue lloíri, ñúefuiaɨmo íaɨoɨ táɨjɨfɨreilleza; daje izói jɨáɨe come jitáiadɨ, íaɨoɨ jitailla raana fecari. Iemona íaɨoɨ illafue ñue ráifiteza. 
\s1 Iiraɨcaiño uáiduano ñue íaɨoɨ íllena Pablo Juzíñamuimo jɨcade 
\p  
\v 15 Nana cue dɨga itɨno omo uai orédiaɨoɨ. Caɨ izíruiga nabáiñɨaɨ daje Juzíñamuimo ɨ́ɨnotɨno o uáidori. Mei Juzíñamui nana ómoɨna ñúefue dɨbénemo itátaiteza. Daɨítateza. Jae nɨɨe.