\id REV - Huitoto Mɨnɨca NT -Colombia 2011 (DBL 2013) 
\h APOCALIPSIS 
\toc1 Iiraɨruillaɨdo Iitɨfuiaɨ Jino Cɨ́otaina 
\toc2 El Apocalipsis 
\toc3 Ap 
\mt1 IIRAƗRUILLAƗDO IITƗFUIAƗ JINO CƗOTAINA 
\mt2 Juzíñamui San Juaamo Jino Cɨ́otagafue 
\mt2 EL APOCALIPSIS 
\mt3 O Revelación a San Juan 
\c 1  
\s1 Jesucristo jino onóitagafue 
\p  
\v 1 Bifue uire íitɨfuiaɨ jino cɨ́otainafue. Juzíñamui bífuiaɨna Jesucrístomo cɨ́otate, afémɨe ie ocuífɨreganomo ácatallena. Daɨí Cristo uáfuena raɨre íficaitɨfuena jino íaɨoɨmo ácatate. Jesucristo ie ángel daɨna abɨ ímɨedo bie jino cɨ́otagana ie ocuífɨregamɨe Juaamo onótate.  
\v 2 Afe Juan nana ie cɨónana uáfuena jino llote. Daje izói afémɨe Juzíñamui lloga uaina nabáifɨrede. Afe Juzíñamui lloga uai Jesucrístodo ñue jaɨ́cɨna llócaiga.  
\v 3 Bie Juzíñamuimona oga uaina jɨáɨmacɨmo facáduana cacádɨno caɨmare itíaɨoɨ. Daje izói bie rabénicomo cuega uaina cacáillano ñue náfuetɨno caɨmare ióbitiaɨoɨ. Mei bie rabénicomo llogáfuiaɨ zúitɨrui ja áɨnozideza. 
\s1 Siete dɨ́gade iglésiaɨ daɨna Juzíñamuimo gáɨrifɨredɨnomo Juan cuete 
\p  
\v 4 Asia énɨemo ite siete dɨ́gade iglésiaɨ daɨna Juzíñamuimo gáɨrifɨredɨnomo cuetɨcue. Cue Juáadɨcue. Mai Juzíñamui ñúefuiaɨ dɨbénemo, naa ie caɨmare uái illafue dɨbénemo omoɨ iri. Mei afe Juzíñamui birui itɨ́mɨeza, íemo jaca nanómona jaiai itɨ́mɨeza, íemo uire jaca nɨnomo íitɨmɨeza. Daje izói ie ráɨirano uícomo siete dɨ́gade ñuera jóriaɨ ite. Afe jóriaɨ Juzíñamui Ñuera Joreño jana. Afémɨe ñúefue dɨbénemo omoɨ iri.  
\v 5 Iemo daje izói Jesucristo lloga ñúefuiaɨ jeire omoɨ oíri. Afémɨe jɨáɨfo méidofɨnide uai nabáiraɨma. Daje izói afémɨe nano tɨ́illanomona abɨdo meine tɨ́iñellena cáatagamɨe. Iemo jɨáɨ afémɨemo bínɨe illáɨcomɨnɨ ocuilla rɨ́ino ite. Afe Cristo caɨna izíruillano ie totaca dɨ́edo caɨ fɨénidɨfuiaɨna oni dote.  
\v 6 Iemo nane illáɨcomɨnɨna caɨna itátate ie Moo Juzíñamuimo caɨ jaɨnáillena. Daje izói comɨ́nɨdo Juzíñamuimo úrifɨredɨnona caɨna jóonete. Afe Juzíñamui íena jóonegacaɨ. Ie jira jaca nɨnomo áillue ébifue naa ocuilla rɨ́ino dɨga afémɨe íena íteza. Aquíe izóideza. 
\p  
\v 7 ¡Ero, Cristo mona uíllɨedo bite! Nana comɨnɨ íena cɨ́oitiaɨoɨ. Daje izói ie fatɨno íena cɨ́oitiaɨoɨ. Iemo nana bínɨe naɨraɨ afémɨe bíllana cɨ́oillano éenaitiaɨoɨ. Jɨɨ, uafue daɨítadeza. 
\p  
\v 8 Caɨ jamánomo rɨire Ocuídɨmɨe bie izói daɨde: “Nana ráfuiaɨ naɨ cómuiñenia uícodo itɨ́mɨedɨcue. Daje izói fuizájillanomo itɨ́mɨedɨcue. Abecedario A-do táɨnia izói nánoramɨedɨcue. Daje izói abecedario Z-mo fuizailla izói íiraɨmɨedɨcue,” daɨde. Afémɨe birui itɨ́mɨe, íemo jaca nanómona itɨ́mɨe, íemo uire jaca nɨnomo íitɨmɨeza. 
\s1 Ebírede Cristo nɨcáɨrilla izói cɨona 
\p  
\v 9 Omoɨ ama Juáadɨcue. Omoɨ duere zefuilla izói daane duere zefuídɨcue. Daa omoɨ izói Juzíñamui illáɨmana illánomo jaɨnáidɨcue. Iemo Jesucristo omoɨ úiñotaja izói daa omoɨ dɨga úiñotagacue. Jesucrístodo faɨríotaga Juzíñamui ñuera uai jino cue llócailla jira llavécacue. Pátmosmo mámecɨrede monaillai cɨgɨ ídumo llavécamɨedɨcue.  
\v 10 Iemo afénomo caɨ Ocuíraɨma caɨ ocózinaitaruimo Juzíñamui Ñuera Joreño náamatagacue. Afe llezica vudugoɨ fúunua izoide fɨcɨ́rede uaina cue méifomo cacádɨcue.  
\v 11 Afe uai cuena daɨde: 
\p —Naga ráfuiaɨ uícodo itɨ́mɨedɨcue. Daje izói fuizájillanomo itɨ́mɨedɨcue. Abecedario A-do taɨneca, íemo Z-mo fuilla izóidɨmɨedɨcue. Mai nana o cɨona dɨga daa rabénicomo cúeiri. Cuiano, Asia énɨemo ite siete dɨ́gade iglésiaɨ daɨna Juzíñamuimo gaɨrífɨredɨnomo o oreri. Afe jófuenɨaɨ mámecɨaɨ: Efeso, íemo Esmirna, íemo Pérgamo, íemo Tiatira, íemo Sardis, íemo Filadelfia, íemo Laodicea, —daɨde. 
\p  
\v 12 Bu cuemo úrilla daɨíllena abɨdo gɨ́recaidɨcue. Gɨ́recaillano, siete dɨ́gade oro fɨnoina mechérana cɨódɨcue.  
\v 13 Afe cɨ́gɨmo cómemona comuídɨmɨena eróidena cɨódɨcue. Afémɨe jɨtáoigaroi éɨba ɨ́coɨmo dúcɨde. Ie jogóbemo lláɨidɨfe oro fɨnoina.  
\v 14 Afémɨe ɨfótɨraɨ ɨere úzerede, jaɨllɨcɨ úzerena izói úzerede. Iemo jɨáɨ nieve izói úzerede. Ie ui irai bóua izói cɨ́oide.  
\v 15 Afémɨe éɨba ñue queníretaga bronce izói quenírede. Ua bronce iraimo ruílla llezica jamánomo quenírena izói, ie ɨdaɨ quenírede. Iemo aillo imánillaɨ nofɨco tua fɨcɨ́rena izói ie uai fɨcɨ́rede.  
\v 16 Afémɨe onoɨ nabézimo siete dɨga ucudu llɨ́ide. Ie fuémona ɨere jáirede llojéfai izoide raa jino billa; afefai nágafene jáirede. Ie uiéco jitoma ɨere rɨire egáiñua izói rɨire egáiñote. 
\p  
\v 17 Afémɨena cɨ́oillano, ie anamo tɨ́idɨmɨe izói baɨídɨcue. Mei íadɨ afémɨe ie nabezi cuemo bɨ́tano cuena daɨde: 
\p —Jacɨ́ruiñeno o iri. Cue bie nanóidɨmɨedɨcue; dáamɨedɨcue fuizájillanomo íitɨmɨedɨcue.  
\v 18 Birui cáadɨmɨedɨcue. Mei naui tɨ́idɨcue, mei íadɨ birui jaca nɨnomo cáaitɨcue. Tɨ́illa zuitara llave izoide raa cuemo ite; daje izói tɨ́idɨno illano llávenɨaɨ cuemo ite.  
\v 19 O cɨona dɨga mai cúeiri; birui itɨ́fuiaɨ cúeiri, íemo uire cómuitɨfuiaɨ cúeiri.  
\v 20 Cue nabézimo o cɨona siete dɨ́gade ucúduaɨ rafue naui báinino ite. Ja birui jino uáfodo llórede; daje izói siete dɨ́gade mechera rafue llórede. Afe siete dɨ́gade ucúduaɨ siete dɨ́gazie Juzíñamuimo gaɨrídɨno uai llócaitɨno jana. Iemo afe siete dɨ́gade mechera siete dɨ́gazie Juzíñamuimo gaɨrífɨredɨno jana, —daɨí afémɨe cuena daɨde. 
\c 2  
\s1 Siete dɨ́gade iglésiaɨ daɨna Juzíñamuimo gaɨrífɨredɨnomo llollɨ́uai: Efésomo ite ɨ́ɨnotɨnomo llogáuai 
\p  
\v 1 Cue cɨónamɨe dáanomo cuena daɨde: 
\p Efésomo ite Juzíñamuimo gaɨrídɨno úiñoraɨmamo bíuai cúeiri: “Afe nabézido siete dɨ́gade ucúduaɨ llɨ́idɨmɨe daje izói siete dɨ́gade oro fɨnoina mechera cɨ́gɨdo macáfɨrede. (Afémɨe mechera cɨ́gɨdo mácafɨrena izói, comɨnɨ ñue úiñolle jana.) Afémɨe afe úiñoraɨmana bie izói daɨde:  
\v 2 Nana o fɨnócafuiaɨna onódɨcue. O rɨíredemo táɨjɨdɨoza onódɨcue, naa o comecɨ járitaiñedeza. Daje izói fɨénidɨno fɨeni illáfuiaɨna ɨere izire o rairuíllana onódɨcue. Iemo jɨáɨ táɨnona “Jesucristo orécanodɨcaɨ” daɨdɨ́nona facátatɨoza onódɨcue. Afemona afémacɨ taɨno llúana baitɨ́oza.  
\v 3 Jaca o comecɨ járidoñedɨo, íemo ɨere cuedo o táɨjɨna llezica cue ɨ́coɨnia ɨere duere zefuídɨoza. Afe llezica zefuíruiñeno ñue táɨjɨdɨo.  
\v 4 Mei íadɨ daa fɨgóñedɨfuena omo ite. Nano fueñe cue o izíruilla izói birui cuena izíruiñedɨo.  
\v 5 Ie jira nɨnómona oni nɨbéfodo baɨídɨoza comecɨ uibi. Mai omo itɨfue méidori. Fueñe o illa izói o iri. Bífuena o méidoñenia omo raɨre bíitɨcue, omo ite egáiñote raa oni óllena.  
\v 6 Mei jɨáɨfodo, daa ñúefuena naɨ omo ite. Afe nicolaítas fɨeni fɨnócafuiaɨmo naa íaɨoɨ fɨeni jɨáɨfodo llógamo éoicana eróidɨo. Cue daje izói áfena éoidɨcue.  
\v 7 Ñuera Joreño Juzíñamuimo jaɨnáidɨnona dáɨnamo cacáacadɨmɨe áfemo cacai. Afe Ñuera Joreño bie izói daɨíacade: “Fɨénidena anáfenodɨnona jáidɨmacɨna Juzíñamui nɨ́fueninanomo ite cáatate amena llɨzíllana güitátaitɨcue,” daɨde. 
\s1 Esmírnamo ite ɨ́ɨnotɨnomo llogáuai 
\p  
\v 8 Daje izói Esmírnamo ite Juzíñamuimo gaɨrídɨno úiñoraɨmamo bíuai cúeiri: “Nanóidɨmɨe dáamɨe íiraɨmɨena ómoɨmo úrite. Naui bínɨemo tɨ́idɨmɨe, íemo meine abɨdo nane cáadɨmɨena jaide. Afémɨe ona daɨde:  
\v 9 Nana o fɨnócana onódɨcue. Daje izói o duere zefuíllana onódɨcue, naa o ráanina dɨga. Mei íadɨ uáfueza Cristo dɨbénedo ɨere ráaredɨo. Jɨáɨmacɨ fɨeni omo úrillana onódɨcue. Afémacɨ, “Juzíñamui nɨzeca Judíodɨcaɨ” daɨdíaɨoɨ, mei íadɨ íeñediaɨoɨ. Afémacɨ danɨ Taɨfe dɨbénemo jaɨnáidɨno.  
\v 10 Duere o zefuíllemo jacɨ́naiñeno o iri. Mei ómoɨmona dámɨerie Taɨfe llavéracomo llavétaiteza, nana omoɨ facátallena. Daɨí omoɨ comecɨ ifue onóillena facátallɨomoɨza. Diez dɨ́garui duere zefuíredɨomoɨ. Mei íadɨ o tɨ́illɨnomo zóofeñeno ɨ́ɨnofɨreiri. Daɨí o íadɨ zíiñona cáallena o jɨrídotaitɨcue.  
\v 11 Ñuera Joreño Juzíñamuimo jaɨnáidɨnona dáɨnamo cacáacadɨmɨe mai áfemo cacai. Afe Ñuera Joreño bie izói daɨíacade: “Fɨénidena anáfenodɨnona jáidɨmacɨ nane méifodo tɨ́illamo raamo jíriñeitiaɨoɨ,” daɨde. 
\s1 Pérgamomo ite ɨ́ɨnotɨnomo llogáuai 
\p  
\v 12 Daje izói Pérgamomo ite Juzíñamuimo jaɨnáidɨno úiñoraɨmamo bíuai cúeiri: “Afe nágafene jáirede lloefai llɨ́idɨmɨe bie izói ona daɨde:  
\v 13 Nana o fɨnócana onódɨcue. Afe izói Taɨfe ocuícano cɨ́gɨmo itɨ́oza onódɨcue. Afénomo itɨo íadɨ zóofeñeno cuemo ñue o ɨ́ɨnuana onódɨcue. Daje izói cuemo o ɨ́ɨnuana fáɨcanocaiñedɨo. Afe izói Antipas mámecɨredɨmɨe cue ñue jaɨ́cɨna cue uai nabáifɨredɨmɨe. Afémɨe omoɨ cɨ́gɨri fatíaɨoɨ. Ie fáinaruido, cuemo omoɨ ɨ́ɨnuana zóofeñedɨomoɨ, Taɨfe illánomo itɨ́omoɨ íadɨ.  
\v 14 Mei íadɨ cue lletárafuiaɨna ómoɨmo ite. Omoɨmona dáarie jadɨ́ Pérgamomo Balaam llófuiana fáɨcanocaiacañediaɨoɨ. Afe Balaam jaiai Balacna llófuete Israel comɨnɨ fɨeni fɨ́nuaillena. Afe Balac Balaam llófuiamona Israel comɨ́nɨna jánaraɨmo fecaca rɨ́llenɨaɨna rɨtátate. Afe dáaruido afémacɨna ɨere jɨruíretade.  
\v 15 Nane jɨáɨe cue lletárafuena ómoɨmo ite. Omoɨ cɨ́gɨmo dáarie afe nicolaítas lloga uaina féitaiacañedɨno ite. Afémacɨna éoidɨcue.  
\v 16 Ie jira mai omoɨ comecɨ ifue méidori; mei íadɨ omoɨ méidoñenia, raɨre omoɨ dɨga fuirízaɨbitɨcue. Uáfueza cue fuémona bite jáirede lloéfaido omoɨ fɨeni fɨnódɨnona fázɨaɨbitɨcue.  
\v 17 Ñuera Joreño Juzíñamuimo jaɨnáidɨnona dáɨnamo cacáacadɨmɨe, áfemo cacai. Afe Ñuera Joreño bie izói daɨíacade, “Fɨénidena anáfenodɨmɨena jáitɨmɨe afe báinino ite maná daɨna monámona cocɨde güíllena güitátaitɨcue. (Bie maná Juzíñamui íaɨoɨ comécɨna náɨretaillena jana.) Iemo afémɨemo úzerede nofɨ́tofena fécaitɨcue. Afe nofɨ́tofemo buna ónoñega comue mámecɨ cuelle. Dama afe nofɨ́tofe llɨ́ɨnoitɨmɨe áfena onoille.” Aquíe izói daɨde. 
\s1 Tiatíramo ite ɨ́ɨnotɨnomo llogáuai 
\p  
\v 18 Daje izói Tiatíramo ite Juzíñamuimo jaɨnáidɨno úiñoraɨmamo bíuai cúeiri. “Juzíñamui Jitó ómoɨmo úrite. Afémɨe ui irai bóua izoide, íemo ie éɨba ñue queníretaga bronce izói quenírede. Afémɨe bie izói ómoɨna daɨde.  
\v 19 Nana omoɨ fɨnócana onódɨcue. Cuena omoɨ izíruillana onódɨcue, naa cuemo omoɨ ɨ́ɨnua dɨga. Daje izói cue dɨbénedo ñue omoɨ táɨjɨcaillana onódɨcue, naa omoɨ comecɨ járitaiñena dɨga. Fueñe omoɨ táɨnia baɨmo birui jamánomo fɨnóicaidɨomoɨ.  
\v 20 Mei íadɨ ómoɨmo daa cue lletárafuena naɨ ite. Afe Jezabel mámecɨredɨngo llógana rairuíñedɨomoɨ. Afengo, “Juzíñamui dɨbénedo úritɨcue,” daɨífɨrede, mei íadɨ fɨeni ie llócaigafuedo cue ocuífɨreganona jɨ́fuete. Afe jɨ́fuia uaido íaɨoɨna ɨere jɨruíretade. Daje izói jánaraɨmo fecaca rɨ́llenɨaɨna íaɨoɨna rɨtátate áfemo caɨmátaillena.  
\v 21 Aféngomo are úiñoidɨcue afengo comecɨ ifue méidollena. Mei íadɨ afengo áfena méidoacañede. Afengo ie jɨruífuena fáɨcanocaiacañede.  
\v 22 Mei jira birui afémacɨ afengo fɨnócafuena fáɨcanocaiñenia, aféngona ɨere izire ɨráretaitɨcue. Daje llezica nana afengo dɨga jɨruíredɨnona duere zefuítaitɨcue.  
\v 23 Afengo úruiaɨna tɨ́taitɨcue. (Afe úruiaɨ daɨna afengo llógamo jiéruitɨno.) Afemona naga come ɨfocɨ úrillana, ie comecɨ ifue dɨga ñue ɨ́coɨmo cue onónana, nana Juzíñamuimo gaɨrídɨno fɨ́dɨitiaɨoɨ. Iemo ómoɨmona illa dɨ́gamɨe fɨeni omoɨ fɨ́nuaze ómoɨna duere fɨ́noitɨcue.  
\v 24 Mei íadɨ ómoɨmona Tiatíramo ite jɨáɨmacɨ afe Jezabel omoɨ llófuia fɨénide uaina náfueñedɨomoɨ. Afe Jezabélmo jaɨnáidɨno íaɨoɨ llófueinana daɨdíaɨoɨ, “Caɨ llófueina uai Taɨfe ie, ɨere báinide naɨ uáfodo ónonidɨfuiaɨ,” daɨdíaɨoɨ. Afe llófueinana onótañegaomoɨ. Iemo ómoɨmo ite naui cue lloga baɨmo jɨáɨena ómoɨna ócuiñeitɨcue.  
\v 25 Daa bie llóitɨcue: Omoɨmo ite ñúefuiaɨ ñue rairuiri, naɨ cue bíñeille dɨno.  
\v 26 Fɨénidena anáfenodɨnona jáitɨnona náɨraɨaɨ ócuitɨmacɨna jóoneitɨcue. Afémacɨ cue jítainana ñue ɨ́coɨmo fuitádɨno. Ocuille rɨ́ino íaɨoɨmo jóoneitɨcue,  
\v 27 mei daɨí cue Moo cue ocuille rɨ́inona cuemo jóoneteza. Iemona náɨraɨaɨna rɨírede lloébɨcɨ izóidedo rɨire ócuitiaɨoɨ. Iaɨoɨmo cacáreacañedɨnona ɨcɨ́ruaɨ lláia jéenino llairúngotailla izói, afe izói íaɨoɨna duere fɨ́noitiaɨoɨ.  
\v 28 Daje izói monáiracudu ɨere ebire egáiñua izói, afémacɨna ebire fɨ́noitɨcue.  
\v 29 Ñuera Joreño Juzíñamuimo jaɨnáidɨnona dáɨnamo cacáacadɨmɨe mai áfemo cacai.” Aquíe izói daɨde. 
\c 3  
\s1 Sárdismo ite ɨ́ɨnotɨnomo llogáuai 
\p  
\v 1 Daje izói Sárdismo ite Juzíñamuimo jaɨnáidɨno úiñoraɨmamo bíuai cúeiri: “Afe siete dɨ́gade Juzíñamui jóriaɨredɨmɨe, nɨɨ afe Juzíñamui Ñuera Joréñoredɨmɨe Cristo, íemo afe siete dɨ́gade ucúduaɨ llɨ́idɨmɨe dáamɨe. Afémɨe bie izói ona daɨde: Nana o fɨnócana onódɨcue. Crístomo o jaɨnaina izóinado jɨca jalleide, íadɨ onódɨcueza tɨ́idɨmɨe izói itɨo.  
\v 2 Come cazilla izói mai abɨna onoiri. Naɨ omo due jiza fɨébide ɨ́ɨnogafuiaɨna meine rɨire fɨnori, mei aféfuiaɨ jae táɨnocaiacadeza. Eróidɨcuemo o fɨnócafuiaɨ cue Juzíñamui eróicana ñue jaɨ́cɨna jóiñedeza.  
\v 3 O fueñe ɨ́ɨnoga íaɨoɨ llófuiamo uibíoicairi. Afena jeire o oíri. Afe llezica o comécɨmo itɨfue ñúefuena méidori. O abɨna ñue onóñenia, merɨ́rifɨredɨmɨe ónonino billa izói, duere omo fɨ́nuaɨbiitɨcueza. Cue billɨ́ruina ónoñeitɨo.  
\v 4 Mei íadɨ ómoɨmona jadɨ́ Sárdismo dáarie comécɨna ñúemacɨna ite. Afémacɨ ɨníroina ɨáɨñedɨno izoide. Afémacɨ úzecuiruaɨ jɨtada cue dɨga jáitiaɨoɨ, mei afe daɨí íaɨoɨmo dúideza.  
\v 5 Fɨénidena anáfenodɨnona jáidɨno úzecuirona jɨ́taitiaɨoɨ. Iemo zíiñona cáaitɨno mámecɨ cuiánicomona íaɨoɨ mámecɨaɨna dóñeitɨcue. Iemo daje izói cue Moo Juzíñamui uícomo “Bie cúemacɨ” dáɨitɨcue; daje izói ie abɨ imacɨ ángeles daɨnámacɨ uícomo “Bie cúemacɨ” dáɨitɨcue.  
\v 6 Ñuera Joreño Juzíñamuimo jaɨnáidɨnona dáɨnamo cacáacadɨmɨe mai áfemo cacai.” Aquíe izói daɨde. 
\s1 Filadélfiamo ite ɨ́ɨnotɨnomo llogáuai 
\p  
\v 7 Daje izói Filadélfiamo ite Juzíñamuimo jaɨnáidɨno úiñoraɨmamo bíuai cúeiri: “Afe nɨ́ɨfuenidɨmɨe omo úrite. Afémɨe uáfuena úrifɨredɨmɨe. Afémɨemo jaiai illaɨma David naze tuiñora llave ite. Afémɨe Juzíñamui illáɨmana illano tuiñóadɨ buna ɨbáinide. Daje izói afémɨe ɨbáia, buna zuitánide.  
\v 8 Bímɨe bie izói ona daɨde: Nana o fɨnócana onódɨcue. Buna ɨbáinide túide naze o uiécori jóonetɨcue. Mei fɨgo maɨríñedɨo, íadɨ cue uaina náfuetɨo; cuena jaca jáanofɨnidɨo.  
\v 9 Iemona Taɨfemo jaɨnáidɨnona o anamo caiñɨ́cɨdo ana íaɨoɨ dújutano óreitɨcue. Afémacɨ táɨnona úrillano bie izói daɨífɨrediaɨoɨ: “Caɨ bie Juzíñamui nɨzeca judíuaɨdɨcaɨ” daɨdíaɨoɨ, mei íadɨ íeñediaɨoɨ. Nana baimacɨ o anamo dújutaitɨcue, íemona ona cue izíruillana fɨ́dɨitiaɨoɨ.  
\v 10 Cue ocuica uai jeire o úamona aféuai daɨna izói comécɨna járidoñedɨo. Ie jira nana bínɨemo bite facátallɨruimona ona ñue ráiruitɨcue. Aféruido nana bínɨemo ite comɨnɨ facátalliaɨoɨ.  
\v 11 Raɨre bitɨcue. Omo ite ñúefuiaɨ ñue rairuiri, o jɨrídolle raa bu báɨroñeilleza.  
\v 12 Fɨénidena anáfenodɨnona jáitɨnona cúeɨena máiñoitɨcue. Máiñuano cue Juzíñamui gaɨríracomo ite maɨride jíaɨlliraɨ izói íaɨoɨna óreitɨcue. Iemona Juzíñamui illánomona jaca jino jáiñeitiaɨoɨ. Iaɨoɨmo cue Juzíñamui mámecɨ cúeitɨcue. Daje izói cue Juzíñamui jofue mámecɨ íaɨoɨmo cúeitɨcue. Afe jofue mámecɨ “Comue Jerusalén.” Afe jofue cue Juzíñamuimona caifo monámona ana bite. Daje izói afe fɨénidena anáfenodɨnomo cue comue mámecɨ cúeitɨcue.  
\v 13 Ñuera Joreño Juzíñamuimo jaɨnáidɨnona dáɨnamo cacáacadɨmɨe mai áfemo cacai.” Aquíe izói daɨde. 
\s1 Laodicéamo ite ɨ́ɨnotɨnomo llogáuai 
\p  
\v 14 Daje izói Laodicéamo ite Juzíñamuimo jaɨnáidɨno úiñoraɨmamo bíuai cúeiri: “Uáfuena llotɨ́mɨe omo úrite. Afémɨe jaɨ́cɨna uai nabáifɨredɨmɨe; daje izói jaca méidoñeno uáfuena úrifɨredɨmɨe. Afémɨe nana Juzíñamui fɨnócana taɨnéraɨma.  
\v 15 Afémɨe bie izói ona daɨde: Nana o fɨnócafuiaɨna onódɨcue. Ráairuillano fɨgo o ɨ́ɨnoñenana onódɨcue. O ɨ́ɨnoga ñue uzíredɨji izóiñede. Daje izói o ɨ́ɨnoga caɨmare mánaɨdɨji izóiñede. Ñue o uzírenana jitáidɨcue, nɨbaɨ jɨáɨfodo o mánaɨnana jitáidɨcue.  
\v 16 Mei íadɨ jabo uzíredɨji izóidɨo. Iemona jabo uzíredɨji jino tua izói ona jino dótaitɨcue.  
\v 17 Bie izói daɨífɨredɨo: “Ráaredɨmɨedɨcue,” daɨdɨo. Iemo “Nana cue illafue ñue jóide. Cue jitaica raana iñede,” daɨífɨredɨo. Mei íadɨ jɨáɨfodo o íllana onóñedɨo. Juzíñamui eróicana bu cáɨmadoñegamɨedɨo. Iemo daje izói ɨere duere zefuítagao, íemo ɨere dúeredɨmɨedɨo, íemo uina cɨ́oiñedɨmɨe izóidɨo. Iemo jɨáɨ ɨnícuironino emuíromade izóidɨo. Afe bie izói o íllana jaca onóñedɨo.  
\v 18 Mei jira omo llóitɨcue, “Iraimo ñue fɨnoca órona cúemona ɨba, uáfuena ráaredɨmɨena o jáillena. Daje izói cúemona úzerede ɨnícuirona ɨba, o meáire emuíromana ɨbáillena. Daje izói ui manórajina cúemona ɨba, o uimo jóoniamona ñue o cɨ́oillena.  
\v 19 Nana cue izíruiganona lletádɨcue; daje izói íaɨoɨna duere fɨnódɨcue ñue íaɨoɨ íllena. Mei íemona Jesucrístomo izire o jaɨnáicaillano, ɨere o ɨ́ɨnofɨreiri. O comecɨ ífuiaɨ méidori, ona duere cue fɨ́noiza.  
\v 20 Ero cacai, come comecɨ naze ízoinamo itɨcue. Dɨnómona jɨ́ɨritɨcue. Cue uaimo cacáreitɨmɨe ie naze tuiñóadɨ cue llɨ́ɨnollena, afémɨe illánomo jofo jáitɨcue. Jaillano dájena afémɨe dɨga nabáiritɨcue. Daje izói conima dɨga caɨmare úritɨcoco.  
\v 21 Fɨénidena anáfenodɨnona jáitɨnona, illáɨmana cue ráɨiranomo afémɨena cue dɨga ráɨitaitɨcue. Mei daɨí fɨénidena cue anáfenuamona cue Moo illáɨmana ráɨiranomo ráɨnazaidɨcueza.  
\v 22 Ñuera Joreño Juzíñamuimo jaɨnáidɨnona dáɨnamo cacáacadɨmɨe, mai áfemo cacai.” Aquíe izói daɨde. 
\c 4  
\s1 Monamo Crístomo lloga cáɨmafuiaɨ 
\p  
\v 1 Bie méifomo éroidɨcuemo, monamo ite naze túinana cɨódɨcue. Fueñe cue cacana uaina meine nane cacádɨcue. Afe uai vudugoɨ fɨcɨ́rena izói cacaide. Afe uai cuena daɨde: 
\p —Caifo benomo bi. Bífuiaɨ méifomo raɨre cómuitɨfuiaɨna omo ácataitɨcue, —daɨde. 
\p  
\v 2 Afe llezica Ñuera Joreño anamo itábicaidɨcue. Iemona monamo ite illaɨma ráɨiranona cɨódɨcue. Afénomo dáamɨe ráɨinana cɨódɨcue.  
\v 3 Afémɨe ɨere quérede ‘jaspe’ daɨna ráifide nofɨjɨ izói éroide. Aféjɨna jɨáɨfo daɨna ‘cornalina.’ Afe ráɨirano abɨdo rózigüeo nágafene ífoɨna ite. Afe rózigüeo ‘esmeralda’ daɨna ráifide nofɨjɨ quenírena izói quenírede.  
\v 4 Iemo afe ráɨirano abɨdo veinticuatro dɨga jɨáɨe illaɨma ráɨiranuaɨna nágafene ífoɨna íllana cɨódɨcue. Afénuaɨmo veinticuatro dɨga mona ero ocuide éicomɨnɨ ráɨidiaɨoɨ. Afémacɨ úzerede ɨníroillaɨ jɨtádiaɨoɨ. Iaɨoɨ ɨfomo oro fɨnoina illaɨma jɨtáfɨregacuifoɨ jɨ́iena.  
\v 5 Afe áillue ráɨiranomona aillo boride. Afe llezica afénomona ɨere fɨcɨre mona gɨ́rɨa cácacaide. Iemo afe ráɨirano uícomo siete dɨ́gade áillue bobáienɨaɨ bóoide. Afe siete dɨga bóoide bobáienɨaɨ Juzíñamui Ñuera Joreño jana.  
\v 6 Dáanomo afe ráɨirano uícomo, daa monáillaina eroide illa. Afe monáillai anáfenemo ñue cɨ́oide vidrio izoide. 
\p Afe ráɨirano abɨdo cuatro dɨga cáadɨmɨiaɨ ífoɨna itíaɨoɨ. Afémacɨ erófene dɨbénemo aillo uíjɨaɨ ite. Daje izói emodo dɨbénemo ite.  
\v 7 Bimácɨmona daa jánallarina eroide. Iemo jɨáɨe juráreto ɨítona eroide. Iemo jɨáɨe uiéco, come uiécona eroide. Iemo jɨáɨe feede máajaiñona eroide.  
\v 8 Afe cuatro dɨga cáadɨmɨiaɨmo illa dɨ́gamɨemo seis dɨga iáicuaɨ ite. Afe iáicuaɨ erófenemo uíjɨaɨna oruide; daje izói emódo dɨbénemo ite. Afémacɨ mona naɨo dɨga llɨ́ɨcaiñeno úritiaɨoɨ; Juzíñamuina daɨíoidiaɨoɨ: 
\q1 ¡Ɨere ɨ́aɨfuenidɨo! ¡Ɨere ɨ́aɨfuenidɨo! ¡Ɨere ɨ́aɨfuenidɨo! 
\q1 Ɨere ñuera caɨ Ocuíraɨmadɨo. 
\q1 Jamánomo rɨ́inorede Juzíñamuidɨo. 
\q1 Jaca nanómona itɨ́mɨedɨo, 
\q1 Iemo naɨ birui itɨ́mɨedɨoza, 
\q1 Iemo uire jaca nɨnomo zíiñona íitɨmɨedɨoza, —daɨí daɨíoifɨrediaɨoɨ. 
\p  
\v 9 Illa dɨ́gacaiño afe cáadɨmacɨ, ráɨiranomo ráɨide Moo Juzíñamuimo ebíredɨfue nitáadɨ, íemo ñúefue jóoneadɨ, íemo jɨáɨ fɨgora íena dáɨiadɨ,  
\v 10 afe llezica afe veinticuatro dɨga ocuide éicomɨnɨ áillue ráɨiranomo ite Juzíñamui anamo dújufɨrediaɨoɨ. Iemo afe jaca nɨnomo zíiñona itɨ́mɨena caɨmátaidiaɨoɨ. Afe llezica íaɨoɨ oro fɨnoina illaɨma ɨfo icuífuaɨ ráɨirano uícomo jóonefɨrediaɨoɨ. Jóoneta daɨífɨrediaɨoɨ: 
\q1  
\v 11 Caɨ Ocuíraɨma Juzíñamui, 
\q1 Ɨere ebíredɨfue omo nitáregaza, 
\q1 Daje izói ñúefuiaɨ omo jóonefɨregaza. 
\q1 O jamánomo rɨ́inorenana omo nitáregaza. 
\q1 Nana aféfuiaɨ ona náamaredeza. 
\q1 Mei naga ráanɨaɨ o comuítaga. 
\q1 Iemo o comecɨ jítaina izói itíaɨoɨza. 
\q1 Daje izói o comecɨ óiacanamona fɨnócaiaɨoɨ. 
\m Aquíe izói daɨífɨrediaɨoɨ. 
\c 5  
\s1 Ráɨidɨmɨe llɨ́iga rabénicona cɨódɨcue naa Cordero daɨnámɨe Cristo dɨga 
\p  
\v 1 Afe méifomo illaɨma ráɨiranomo ráɨidɨmɨe nabézimo ite rabénicona cɨódɨcue. Afénico ferɨ́noga rabe. Erófenemo cuega, daje izói jinófenemo jɨáɨ cuega. Afénico siete dɨga sello daɨna ñue ɨbaira raado ɨbaica.  
\v 2 Iemo rɨírede ángel daɨna Juzíñamui abɨ ímɨena cɨódɨcue. Afémɨe fɨcɨ́rede uaido jɨcánofɨrede; daɨde: 
\p —¿Bie sello mei cuatállena bu ñuena? ¿Bumo ñue dúide binico tuiñóllena? —daɨde. 
\p  
\v 3 Mei íadɨ afénico tuíñoitɨmɨena iñede. Caifo monamo iñede. Bínɨemo iñede, íemo bínɨe anamo tɨ́idɨno illánomo jɨáɨ daje izói iñede. Daje izói afénicomo buna eróinide afe facádollena.  
\v 4 Afénico tuíñoite comécɨna ñúemɨena baiñénamona ɨere éedɨcue. Daje izói afénico facádoitɨmɨe iñénamona, íemo jɨáɨ afénicomo eróillano ónoitɨmɨe iñénamona, ɨere éedɨcue.  
\v 5 Iemona veinticuatro dɨga eicomɨ́nɨmona dámɨe cuena daɨde: 
\p —Mai benómona éeñeno o iri, mei Judá naɨraɨ illaɨma Jánallarina mamécamɨe, fɨénidena jae ñue anáfenotateza. Afémɨe jaiai illaɨma David erófene igɨ́mamona comuídɨmɨe. Afe ie anáfenuamona afémɨe binico tuiñolle rɨ́ino ote. Daje izói afe siete dɨ́gade sello cuatalle rɨ́ino íemo ite, —daɨde. 
\p  
\v 6 Iemona afe ráɨirano cɨ́gɨmo, íemo afe cuatro dɨga cáadɨmɨiaɨ cɨ́gɨri, íemo afe veinticuatro dɨga éicomɨnɨ cɨ́gɨmo, Cordérona mameca Crístona cɨódɨcue. Afémɨe táɨide, mei íadɨ Juzíñamuimo fia fecállena ie íaɨoɨ fáina meifo cɨ́oide. Afe Cordero siete dɨga zícaɨrede, íemo ie ui siete dɨ́gade. Afe siete dɨ́gade uíjɨaɨ naga énɨiaɨmo oreca Juzíñamui Ñuera Joreño jana.  
\v 7 Afe Cordero illaɨma ráɨiranomo ráɨidɨmɨe nabézimo ite rabénicona llɨ́ɨnuaide.  
\v 8 Afémɨe afénico llɨ́ɨnua llezica afe cuatro dɨ́gade cáadɨmɨiaɨ, íemo afe veinticuatro dɨ́gade ocuide éicomɨnɨ afe Cordero anamo dújudiaɨoɨ. Afe eicomɨ́nɨmona illa dɨ́gamɨe ‘arpa’ daɨna rua roia taiga raa llɨ́iediaɨoɨ. Daje llezica afémacɨ oro fɨnoina ugúcɨaɨna oruide ichecoɨ llɨ́idiaɨoɨ. Afenɨaɨ Juzíñamuimo jaɨnáidɨno afémɨemo jɨcara uaillaɨ jana.  
\v 9 Afe éicomɨnɨ bie comue rua rotíaɨoɨ: 
\q1 O ɨere comécɨna ñúemɨenamona bie rabénico llɨ́ɨnota tuiñolle omo dúide. 
\q1 Mei naui Juzíñamuimo fatá fecácamɨedɨoza. 
\q1 Caɨna o dɨe tóillado Juzíñamui íena ɨbádɨoza. 
\q1 Uáfuena nágaziemona, 
\q1 Iemo nana jɨáɨfo úritɨnomona, 
\q1 Iemo naga comɨnɨ jófuiaɨmona, 
\q1 Iemo nana náɨraɨaɨmona Juzíñamui íena caɨna ɨbádɨoza. 
\q1  
\v 10 Caɨ Juzíñamui ie illáɨnɨna caɨna jáitatɨo; 
\q1 Daje izói comɨ́nɨdo Juzíñamuimo úrifɨreitɨnona caɨna jóonetɨo; 
\q1 Iemona énɨe náɨraɨaɨna ócuitɨcaɨ. 
\m Aquíe izói rotíaɨoɨ. 
\p  
\v 11 Afe mei eróidɨcue. Iemo aillo afe illaɨma ráɨiranomo ífoɨna ite ángeles daɨna Juzíñamui abɨ imacɨ úrilla uaina cacádɨcue. Daje llezica afe cuatro dɨga cáadɨmɨiaɨ uaina cacádɨcue. Iemo dáaruido éicomɨnɨ uaina cacádɨcue. Afe Juzíñamui abɨ imacɨ ɨere jamánomo aillo itíaɨoɨ. Ua millones y millones dáɨnaze itíaɨoɨ.  
\v 12 Afémacɨ fɨ́cɨrerie úritiaɨoɨ; daɨdíaɨoɨ: 
\q1 Fatá Juzíñamuimo fecaca Cordero comécɨna ɨere ñúenamona ñuera rɨ́ino maiñolle afémɨemo dúide. 
\q1 Daje izói aillo ráifide ráanɨaɨ dáamɨemo dúide. 
\q1 Iemo ɨfocɨ déillafuiaɨ dáamɨemo dúide. 
\q1 Iemo nana ñuera máɨrie dáamɨemo dúide. 
\q1 Iemo nitárega ñúefue dáamɨemo dúide. 
\q1 Iemo ñuera ébifue dáamɨemo dúide. 
\q1 Iemo aillo afémɨemo caɨmátaille uai afe Cordéromo dúide. 
\p  
\v 13 Afe llezica nana Juzíñamui comuítaganuiaɨ úrilla uaina cacádɨcue: nana monamo itɨ́nuiaɨ, daje izói énɨemo itɨ́nuiaɨ, daje izói énɨe anamo itɨ́nuiaɨ, daje izói monáillaimo itɨ́nuiaɨ, naa afénuiaɨmo itɨ́nuiaɨ úrilla uaina cacádɨcue. Daɨdíaɨoɨ: 
\q1 Nana caɨmátaille uaillaɨ illaɨma ráɨiranomo ráɨide Moo Juzíñamuimo íredeza, 
\q1 Daje izói jɨáɨ Cordéromo íredeza. 
\q1 Afe izói ñúefue afe íaillɨnoɨmo nitáredeza, naa ñuera ébifue dɨga, 
\q1 Iemo ñuera rɨ́ino íaillɨnoɨmo íredeza. 
\q1 Nana aféfuiaɨ íaillɨnoɨmo nana fɨmónaɨaɨdo, jaca nɨnomo zíiñona daɨí daɨírenaza. 
\p  
\v 14 Iemo afe cuatro dɨga cáadɨmɨiaɨ aiáɨrilla izói daɨdíaɨoɨ: 
\p —¡Daɨítadeza! —daɨíoifɨrediaɨoɨ. 
\p Iemo afe veinticuatro dɨ́gade éicomɨnɨ ana dújuillano, jaca nɨnomo zíiñona cáadɨmɨemo caɨmátaioifɨrediaɨoɨ. 
\c 6  
\s1 Siete dɨ́gade sello daɨna rabénico ɨbaira rafue 
\p  
\v 1 Cordero afe siete dɨ́gade séllomona nánora tuíñuana cɨódɨcue. Daje llezica cuatro dɨ́gade cáadɨmɨiaɨmona dáamɨe dáɨnana cacádɨcue. Ie úrilla uai, mona gɨ́rɨa fɨcɨ́rena izói fɨcɨ́rede. Daɨde: 
\p —Mai eróizaɨbi, —daɨde. 
\p  
\v 2 Cue eroilla llezica úzerede cabállona cɨódɨcue. Afe emódomo ráɨicaidɨmɨe zɨcuira llɨ́icaide. Iemo illaɨma ɨfo icuífoɨna ie jɨtádiaɨoɨ. Jɨta mei afémɨe naga náɨraɨna anáfenocana jaide. Ie mei nágaruillaɨdo afémɨe íaɨoɨna anáfenofɨrede. 
\p  
\v 3 Méifoide séllona Cordero cuata llezica, tórona éroide cáadɨmɨe úrillana cacádɨcue. Afémɨe: 
\p —Mai eróizaɨbi, —daɨde. 
\p  
\v 4 Afe llezica jíaɨrede caballo jino bíllana cɨódɨcue. Afe emódomo ráɨicaidɨmɨemo féitalle rɨ́ino afémɨemo iga. Afémɨe nana naɨraɨ caɨmare uái illa féitaite, comɨnɨ conímana fazɨ́tallena. Afe llezica áillue lloébɨcɨna afémɨemo iga. 
\p  
\v 5 Iemo Cordero nane jɨáɨe tercer daɨna sello cuata llezica, jɨáɨe cáadɨmɨe úrillana cacádɨcue. Afémɨe: 
\p —Mai eróizaɨbi, —daɨde. 
\p Jira eróidɨcue. Eróidɨcuemo daa jítɨrede cabállona cɨódɨcue. Afe emódomo ráɨicaidɨmɨe mérenana onóillena facara raa llɨ́icaide.  
\v 6 Iemo cáadɨmɨiaɨ cɨ́gɨmona dáamɨe úrilla uai cacádɨcue. Aféuai daɨde: 
\p —Daa kilo trigo daa mona táɨjɨna fɨdɨ. Iemo daámani kilo cebada daa mona táɨjɨna fɨdɨ. Iemo aceite vino dɨga jaca jeruíredeza, mei afe ɨballe úcube iñédeza, —daɨde. 
\p  
\v 7 Afe mei Cordero jɨáɨe ‘cuarto’ daɨna sello cuata llezica, cáadɨmɨiaɨmona íiraɨmɨe úrillana cacádɨcue. Afémɨe: 
\p —Mai, eróizaɨbi, —daɨde. 
\p  
\v 8 Eróidɨcuemo borárede cabállona cɨódɨcue. Afe emódomo ráɨicaidɨmɨe tɨtáfɨredɨmɨe daɨnámɨe. Afémɨe óodana tɨ́idɨno illano jana maméidɨmɨe bite. Enɨe cuatro dɨga fecácamona dáanɨe íemo iga, afénomo rɨire ocuíllena. Afénomo comɨ́nɨna fuiríllado íaɨoɨna tɨ́coɨzitaite. Iemo daje izói júbiedo íaɨoɨna tɨ́coɨzitaite. Iemo dúicuaɨdo íaɨoɨna tɨ́coɨzitaite. Iemo énɨemo ite illáɨrede rɨ́llenɨaɨ íaɨoɨna tɨ́coɨzitaite. 
\p  
\v 9 Afe mei Cordero jɨáɨe ‘quinto’ daɨna sello cuata llezica, ‘altar’ daɨna Juzíñamui caɨmátaitarano anamo ite, tɨtaca comɨnɨ comécɨaɨna cɨódɨcue. Afémacɨ Juzíñamui uai llócailla ɨ́coɨnia tɨtácaiaɨoɨ.  
\v 10 Afe bimacɨ fɨcɨre úritiaɨoɨ; daɨdíaɨoɨ: 
\p —Ɨaɨfuenide caɨ Ocuídɨmɨe, uícodo o llógana méidoñeno ñue fuitáfɨredɨo. Enɨemo ite caɨ tɨtádɨno ɨere jɨcánota duere o fɨnóllena, ¿nɨé dɨnó naɨ mozíñoitɨo? Caɨ fatɨno ɨba o ollɨrui, ¿nɨ́garui naɨ baɨ dúiñoitɨo? —daɨdíaɨoɨ. 
\p  
\v 11 Mei jira afe altar anamo itɨ́macɨ úzecuiruaɨna igáiaɨoɨ. Afe llezica naɨ nano íanori ocózinaitagaiaɨoɨ. Mei nana íaɨoɨ tɨ́illa izói uire tɨtállɨno, Juzíñamui mámianomo naɨ dúcɨñede. Afe tɨtállɨno, naui íaɨoɨ tɨtaca ámatɨaɨ izói, Cristo uaimo táɨjɨfɨrediaɨoɨ. 
\p  
\v 12 Cordero nane jɨáɨe ‘sexto’ daɨna sello cuata llezica, eróidɨcuemo, énɨe ɨere jacɨre docaide. Iemo jitoma zúunaillana, jɨtaca jítɨroi izói éroide. Afe llezica fɨui náauina jíaɨrede dɨe izói méidoficaide.  
\v 13 Afe dáaruido mona ero ucúduaɨ cocɨ́diaɨoɨ. Ua, higuera daɨna amena llɨzilla, jairifo rɨire begüíñuamona cócɨa izói, afe izói ucúduaɨ ana bíñɨemo cocɨ́diaɨoɨ.  
\v 14 Afe llezica, rabe jofo ferɨ́rioicailla izói, mona ferɨ́rioicaide. Iemona cɨóbicaiñena. Iemo dáaruido nana caifóneduaɨ naa monáillai cɨgɨ íduaɨ íaɨoɨ illánomona oni jɨ́recaide.  
\v 15 Iemona naɨraɨ illaɨnɨ caifóneduaɨ anamo ite ífuaɨmo, naa jéerie nofɨ́cɨaɨ cɨ́gɨedo retáiritiaɨoɨ. Afénomo jamánomoidɨno daje izói retáiritiaɨoɨ. Iemo aillo ráanaitɨno, íemo fuiríraɨnɨ illáɨcomɨnɨ, íemo ɨere rɨíredɨnuiaɨ, íemo nana jacɨre rairuícano, daje izói buna ráiruiñegano, nana afénomo retáiritiaɨoɨ.  
\v 16 Afémacɨ caifóneduaɨna jéerie nofɨ́cɨaɨna daɨífɨrediaɨoɨ: 
\p —¡Mai caɨmo baɨi! Mai caɨna jiita, baie illaɨma ráɨiranomo ráɨide Juzíñamuimona caɨna rétaido. Cordero fɨnolle jacɨre caɨ duere fɨnóllɨfuemona caɨna rétaido, —daɨífɨrediaɨoɨ.  
\v 17 Mei jɨɨ, ɨere jacɨre comɨnɨ duere fɨnóllɨrui jae dúcɨdeza. ¿Bu mei áfena mozíñorena? 
\c 7  
\s1 Israel náɨraɨmona náamana onóillena cuegámacɨaɨ 
\p  
\v 1 Bie méifomo bínɨe fuédaɨaɨmo cuatro dɨ́gade ángeles daɨna Juzíñamui abɨ ímɨiaɨ, naidáienana cɨódɨcue. Afémacɨ nágafeniaɨmona jairifo jáiñuana mozíñotiaɨoɨ. Afe énɨemo jairífona jaiñótañediaɨoɨ, daje izói monáillaimo jaiñótañediaɨoɨ, íemo jɨáɨ aménaɨaɨmo jaiñótañediaɨoɨ.  
\v 2 Iemo jɨáɨe Juzíñamui abɨ ímɨena mona móimona bíllana cɨódɨcue. Afémɨe caade Juzíñamui íeɨe daɨíllena sello daɨna jóonelle raa llɨ́icabite. Afémɨe fɨcɨre úrite. Enɨe fuédaɨaɨmo cuatro dɨga naidáidɨmɨiaɨmo úrite. Afémacɨ bínɨe fɨeni íaɨoɨ fɨnolle, naa monáillai dɨga rɨ́inona igámacɨ. Afémacɨna bímɨe daɨde: 
\p  
\v 3 —Caɨ Juzíñamui ocuífɨreganomo, íaɨoɨ ozócɨmo náamana onóillena mámecɨ naɨ jóoneñena llezica, naɨ bínɨena duere fɨnóñeno iri. Daje izói monáillai naa aménaɨaɨ raɨre duere fɨnóñeno iri. 
\p  
\v 4 Jóonia mei, nɨ́gamacɨ náamana onóillena mámecɨna jóonegano íaɨoɨ númerona cacádɨcue. Nana Israel náɨraɨmo itɨ́ziaɨmona afe cuegano ciento cuarenta y cuatro mil dɨ́gade. 
\q1  
\v 5 Judá izíemona doce mil dɨga cúefide. 
\q1 Iemo Rubén izíemona doce mil dɨga cúefide. 
\q1 Iemo Gad izíemona doce mil dɨga cúefide. 
\q1  
\v 6 Iemo Aser izíemona doce mil dɨga cúefide. 
\q1 Iemo Neftalí izíemona doce mil dɨga cúefide. 
\q1 Iemo Manasés izíemona doce mil dɨga cúefide. 
\q1  
\v 7 Iemo Simeón izíemona doce mil dɨga cúefide. 
\q1 Iemo Leví izíemona doce mil dɨga cúefide. 
\q1 Iemo Isacar izíemona doce mil dɨga cúefide. 
\q1  
\v 8 Iemo Zabulón izíemona doce mil dɨga cúefide. 
\q1 Iemo José izíemona doce mil dɨga cúefide. 
\q1 Iemo Benjamín izíemona doce mil dɨga cúefide. 
\s1 Aillo dáanomo úzecuiruaɨ jɨtada gaɨrídɨno 
\p  
\v 9 Afe méifomo eróillano jamánomo aillo comɨ́nɨna cɨódɨcue. Nana náɨraɨaɨmona dáanomo bitíaɨoɨ. Daje izói nágaziemona bitíaɨoɨ. Iemo daje izói jɨáɨfo úritɨnuiaɨmona bitíaɨoɨ. Iemo daje izói naga jófuiaɨmona bitíaɨoɨ. Nana bimacɨ illaɨma ráɨirano uícomo naidáidiaɨoɨ. Daje izói Cordero uícomo naidáidiaɨoɨ. Afénomo aillo itíaɨoɨza buna facádonide. Nana afémacɨ úzecuiruaɨ jɨtáoidiaɨoɨ. Daje llezica afémacɨ rafóruaɨ llɨ́iediaɨoɨ.  
\v 10 Nana fɨ́cɨrerie daɨdíaɨoɨ: 
\q1 Caɨ jíllonano, illaɨma ráɨiranomo ráɨide caɨ Juzíñamuimona comuide. 
\q1 Daje izói caɨ jíllonano Cordéromona comuide, daɨdíaɨoɨ. 
\m  
\v 11 Afe llezica nana Juzíñamui abɨ imácɨaɨ, illaɨma ráɨirano onido ífoɨna naidáiediaɨoɨ. Daje izói veinticuatro dɨ́gade éicomɨnɨ onido ífoɨna naidáiediaɨoɨ. Iemo jɨáɨ cuatro dɨga cáadɨmɨiaɨ onido ífoɨna naidáidiaɨoɨ. Afémacɨ afe ráɨiranomo ráɨidɨmɨe anamo énɨemo fueco dɨné bɨ́jɨcaidiaɨoɨ. Bɨ́jɨcaillano Juzíñamuimo caɨmátaidiaɨoɨ.  
\v 12 Daɨdíaɨoɨ: 
\q1 ¡Bie izóideza! Ñúefuiaɨ nitalle caɨ Juzíñamuimo dúide, ñue ebíredɨfuiaɨ dɨga. 
\q1 Daje izói nana ñue onóigafue íemo dúide, naa fɨgora daɨífɨrena dɨga. 
\q1 Daje izói afémɨemo nitárede ñúefue dáamɨemo dúide, naa áillue máɨrie dɨga. 
\q1 Nana bífuiaɨ caɨ Juzíñamuina jaca nɨnomo zíiñona daɨí daɨírenaza. 
\q1 Aquíe izóideza, —daɨdíaɨoɨ. 
\p  
\v 13 Afe mei afe eicomɨ́nɨmona dáamɨe cuemo jɨcánote: 
\p —¿Baie buoɨ úzecuiruaɨ jɨtáoina? ¿Afémacɨ mei nɨnena bitíaɨoɨ? —daɨde. 
\p  
\v 14 Jira íena daɨdɨcue: 
\p —Afena onóñedɨcue. O ñue onódɨo, —daɨdɨcue. 
\p Iemo afémɨe cuena daɨde: 
\p —Bimacɨ aillo duere zefuilla ɨ́coɨmo jino bitɨno. Afémacɨ comécɨna ɨere ɨ́aɨfuenino íaɨoɨ íllena ja Cordero dɨ́edo muiñócaza. Afémacɨ ɨere úzecuiro ɨnícuiro illa izói itíaɨoɨ.  
\v 15 Ie jira Juzíñamui ráɨirano uícomo itíaɨoɨ. Afe llezica nágaruillaɨ, mona naɨo dɨga, Juzíñamui gaɨríraco ero ie ocuíllana fɨnófɨrediaɨoɨ. Iemo afe ráɨiranomo ráɨide Moo Juzíñamui, íaɨoɨ dɨga íllado jácɨfuemona íaɨoɨna ráiruite.  
\v 16 Afémacɨ jaca júbiemona duere fɨnóbiñeitiaɨoɨ. Daje izói jiróacanari duere zéfuiñeitiaɨoɨ. Iemo jitoma íaɨoɨna jɨáɨ úzitañeite. Daje izói uzíredɨruimo mona uzírena íaɨoɨmo uzire cácañeite.  
\v 17 Mei illaɨma ráɨirano abɨmo ite Cordero, ovejaɨ uíñua izói íaɨoɨna uíñoiteza. Afe llezica ñuera jaɨnoi jino toránuaɨdo íaɨoɨna ɨfóicaite. Afe jaɨnoi zíiñona cáatatɨji. Iemo afémacɨ éeadɨ Juzíñamui íaɨoɨ ui jeme nana oni dóite. 
\c 8  
\s1 Iiraɨe sello cúatajana cɨoide, oro fɨnoina ugucɨ uillɨ́tara dɨga 
\p  
\v 1 Iemo Cordero llɨ́iga rabénicomo ite íiraɨe sello daɨna ɨbáioide raa cuata llezica, daa hora átuedo mona tɨɨ daɨíñocaide.  
\v 2 Afe mei siete dɨ́gade Juzíñamui abɨ imacɨ Juzíñamui uícomo naidáienana cɨódɨcue. Afémacɨ siete dɨga vudugoɨ izoide raana igáiaɨoɨ.  
\v 3 Afe mei jɨáɨe ángel daɨnámɨe Juzíñamui abɨ ímɨe oro fɨnoina ugucɨ uillɨ́tara llɨ́icabillana cɨódɨcue. Afémɨe altar daɨna Juzíñamui caɨmátairano uícomo naidaide. Iemo aillo ugúcɨaɨ afémɨemo fecácaza, áfena Juzíñamuimo uillɨ́tallena. Mei nana Juzíñamuimo jaɨnáidɨno afémɨemo íaɨoɨ jɨcáfɨrena uaillaɨ llua llezica, bímɨe dáanomo afe ugúcɨaɨ Juzíñamuimo uillɨ́taiteza. 
\p Afe Juzíñamui ráɨirano uícomo ite oro fɨnoina ie caɨmátairanomo, bímɨe afe ugúcɨaɨ jutade; íemo afe llezica afe Juzíñamuimo jaɨnáidɨno jɨcáfɨrena uaillaɨ llócaigaza.  
\v 4 Afe ugucɨ uíllɨe, Juzíñamui abɨ ímɨe áfena altarmo juta mei, Juzíñamui uiécomo caifo uillɨ́oicaide, nana Juzíñamuimo jaɨnáidɨno jɨcáfɨrena uaillaɨ dɨga.  
\v 5 Afe mei Juzíñamui abɨ ímɨe ugucɨ uillɨ́tara raa llɨ́ɨnote. Llɨ́ɨnuano altármona oga caade iráicɨaɨna áfena oruítate. Daɨí fɨ́nuano ana énɨemo dotade. Afe dota llezica mona jacɨre gɨrɨde naa fɨcɨ́riede raari. Iemo aillo améuaɨ llairide. Iemo énɨe jacɨre docaide. 
\s1 Siete dɨ́gade vudúgoɨna eroide raa 
\p  
\v 6 Iemo afe siete dɨ́gade vudúgoɨna eroide llɨ́ide Juzíñamui abɨ imácɨaɨ afe vudugoɨ fúunollena maméritiaɨoɨ. 
\p  
\v 7 Nanóidɨmɨe fúunua llezica, jéerie nocɨ́jɨaɨ énɨemo cocɨ́tate. Afe dáaruido réɨcɨ dɨga dɨe taméricaide énɨemo cocɨ́tate. Afe cócɨamona énɨemona jarɨ́fenɨe boode. Daje izói nana aménaɨaɨmona jarɨ́fenaɨaɨ boode. Daje izói nana caade ráitɨaɨmona jarɨ́fene boode. 
\p  
\v 8 Afe meifo Juzíñamui abɨ ímɨe ie vudugoɨ fúunua llezica, boode áillue íduna éroide raa monáillajimo dotaina. Iemona monáillajimona jarɨ́feido dɨ́ena jaide.  
\v 9 Afemona nana afénomo ite caade chámunɨaɨmona jarɨ́fenɨaɨ aillo tɨ́coɨzitiaɨoɨ. Daje izói afénomo ite jéerie bárconɨaɨmona jarɨ́fenedo aillo nɨné táɨnocaidiaɨoɨ. 
\p  
\v 10 Iemo jɨáɨe Juzíñamui abɨ ímɨe ie vudugoɨ fúunua llezica, áillue ucudu monámona énɨemo baɨíde. Afe ucudu bobaie izói boode. Afe bóodɨcudu nana imánillaɨmona jarɨ́femanimo baɨíde. Daje izói énɨemona jaɨnoi jino toránuiaɨmo baɨílla.  
\v 11 Afe ucudu mámecɨ Erɨ́redɨcudu. Iemona nana imánillaɨmona jarɨ́femanillaɨ erɨ́riede. Iemona afe jaɨnoi erɨre jáillamona aillo comɨnɨ tɨ́idiaɨoɨ. 
\p  
\v 12 Ie mei nane jɨáɨe Juzíñamui abɨ ímɨe ie vudugoɨ fúunua llezica, jitómamona jarɨ́fetomado jítɨrecaide. Daje izói fɨuímona jarɨ́feuido jítɨrecaide. Iemo jɨáɨ ucúduaɨmona jarɨ́fecududo daje izói jítɨrecaide. Ie jira nana afémacɨmona jarɨ́fenedo jítɨrecaide. Naga mona naɨo dɨga jarɨ́femonana egáiñoñediaɨoɨ. 
\p  
\v 13 Afe méifomo caifo monamo éroidɨcue. Afe mona erodo feede Juzíñamui abɨ ímɨena cacádɨcue. Afémɨe fɨcɨre úrioicaide. Daɨde: 
\p —Aɨɨ. Enɨemo ite comɨnɨ nɨɨ dúerena; mei Juzíñamui abɨ imácɨmona daámani naɨ fɨébide vudugoɨ fúunollena. Afémacɨ fúunua llezica énɨe imacɨ, ¡Nɨɨ duere zéfuitiaɨoɨ! —daɨde. 
\c 9  
\p  
\v 1 Iemo nane jɨáɨe Juzíñamui abɨ ímɨe ie vudugoɨ fúunua llezica, daa ucudu monámona énɨemo baiɨllana cɨódɨcue. Iemo fɨénide jóriaɨ ɨbáirafo zuitara llave afe ucúdumo iga.  
\v 2 Afemona afécudu aféfona tuiñode. Tuíñuamona aféfomona jacafaɨ bóua uíllɨa izói caifo uillɨde. Aféfomona caifo uillɨde uíllɨe jitómana dúitate. Afe llezica mona erona jítɨre fɨnode.  
\v 3 Afe uíllɨemona bínɨedo feede fíuaɨ comuide. Afémacɨ, énɨemo ite acáiduaɨ izói molléroɨrediaɨoɨ.  
\v 4 Afémacɨ ráitɨe güíllena rairuícaiaɨoɨ. Daje izói nana amena rábiaɨna guitátañegaiaɨoɨ, naa jɨáɨe mócore zɨcode ráanɨaɨ dɨga. Daa comɨnɨ duere fɨnóllena orécaiaɨoɨ. Mei íadɨ danɨ Juzíñamui ie daɨítate mámecɨ ozócɨmo cúeñeganona, afe fíuaɨ duere fɨ́noitiaɨoɨ.  
\v 5 Mei íadɨ afe fíuaɨ comɨ́nɨna tɨ́tatañegaiaɨoɨ. Mei jɨáɨfodo afémacɨ cinco dɨga fɨui comɨ́nɨna izi cácataitiaɨoɨ. Afe fíuaɨ mailla, acaido come mailla izói izíreite.  
\v 6 Iemona aféruillaɨdo comɨnɨ, “Raɨre cue tɨ́illɨ” dáɨitiaɨoɨ, mei íadɨ tɨ́iñeitiaɨoɨ. Ɨere tɨ́iacaitiaɨoɨ íadɨ, tɨtáfɨrede raa afémacɨmona oni jɨca jáite. 
\p  
\v 7 Afe fíuaɨ jóbairizaillena mamérilla cabállona eróidiaɨoɨ. Iaɨoɨ ɨfócɨmo oro fɨnoina illaɨma ɨfo icuífoɨna éroide jɨ́ina. Iemo íaɨoɨ uiéco come uiécona éroide.  
\v 8 Iaɨoɨ ɨfótɨi rɨngo ɨfótɨina éroide. Iaɨoɨ ízie ‘león’ daɨna jánallari íziena éroide.  
\v 9 Iemo llojécuiroi izoide abɨ rɨ́idote icogɨ íaɨoɨ jogóbemo jɨ́ide. Iaɨoɨ féeoina jamánomo fɨcɨ́rede. Uafue, jóbairizailla caballo zonóicaiga ‘cárronɨaɨ’ fɨcɨ́rena izói fɨcɨ́rede.  
\v 10 Iemo afémacɨmo ite ooda acaido ooda izói molléroɨrede. Afe óodamo cinco dɨga fɨui comɨnɨ duere fɨnolle rɨ́ino ite.  
\v 11 Afe fíuaɨ illaɨma ite. Afémɨe fɨénide jóriaɨ ɨbáirafo úiñotɨmɨe. Afémɨe mámecɨ hebreo uaido Abadón; íemo griego uaido Apolión. Afecɨ daɨíacade “Nɨné táɨnocaitaitɨmɨe.” 
\p  
\v 12 Nanoide jacɨre izi cacánafue jae záaide. Mei íadɨ naɨ mena fɨébide. 
\p  
\v 13 Iemo nane jɨáɨe Juzíñamui abɨ ímɨe ie vudugoɨ fúunua llezica, Juzíñamui uícomo ite oro fɨnoina altar daɨna afémɨemo caɨmátairanomona úrilla uaina cacádɨcue. Afe uai afe caɨmátairanomo ite cuatro dɨ́gade caifo fáɨide zicaɨ cɨ́gɨmona cácacaide.  
\v 14 Afe uai jae vudugoɨ fúunote Juzíñamui abɨ ímɨena daɨde: 
\p —Afe cuatro dɨ́gade Eufrates imani abɨmo cuinaca ángeles izóidɨno mai zuitari, —daɨde. 
\p  
\v 15 Jira zuitácaiaɨoɨ, nana comɨnɨ jarɨ́fenaɨraɨdo tɨtállena. Mei aféruimo dúcɨnamona baɨ óllena eneno mamécaiaɨoɨ. Daje izói biruimo dúcɨnamona mamécaiaɨoɨ. Daje izói bie fɨui íena mamécaiaɨoɨ. Iemo daje izói bie fɨmona íena mamécaiaɨoɨ.  
\v 16 Afe cuatro dɨga ángeles ocuíllɨno aillo ite. Nana afémacɨ cabállonɨaɨ emódomo ráɨiediaɨoɨ. Iemo afémacɨ dɨ́gadiaɨoɨ dáɨnana cacádɨcue. Afémacɨ doscientos millones dɨ́gadiaɨoɨ. 
\p  
\v 17 Bie izói éroide cabálluaɨ nɨcaɨdo cɨona izói cɨódɨcue. Afe cabálluaɨ emódomo ráɨidɨno jogóbiaɨmo llojeco jɨtáoidiaɨoɨ. Afe llojécuiromo jíaɨre, mócore, borare cuega. Iaɨoɨ cabálluaɨ ɨfo ‘leon’ daɨna jánallari ɨfona éroide. Afémacɨ fuémona irai izói jino bite, íemo uíllɨe bite, íemo daje fuémona naɨraɨ ɨere uzire cóonaitalle raa jino bite.  
\v 18 Afe cabálluaɨ fuémona bite daámani jacɨre táɨnocaitate ráamona aillo naɨraɨ fuite. Uafue, nana comɨ́nɨmona jarɨ́fenaɨraɨ tɨ́idiaɨoɨ.  
\v 19 Daje izói afe cabálluaɨ óodamo jacɨre tɨ́taite rɨ́ino ite, mei afe ooda jaiona eróideza; ɨfóredeza. Afedo comɨ́nɨna aɨnízɨcana uite. 
\p  
\v 20 Mei íadɨ tɨ́idɨnomona fɨébidɨno, baie daámani jacɨ́redemona tɨ́iñedɨno, íaɨoɨ fɨnófɨreiga fɨénidɨfuiaɨ féitaacañediaɨoɨ. Daje izói fɨénide jóriaɨmo caɨmátaitajana fáɨcanocaiñediaɨoɨ, naa jɨáɨforie fɨnoca jánaraɨaɨna. Dáarie afe jánaraɨaɨ oro fɨnoina, jɨáɨe plata fɨnoina, jɨáɨe bronce fɨnoina; íemo jɨáɨe nofɨcɨ fɨnoina, íemo jɨáɨe amena fɨnoina. Nana bie jánaraɨaɨ jaca cɨóñede; daje izói mɨnɨ́cana cacáñede, íemo daje izói macáñede.  
\v 21 Afe fɨébidɨno jɨáɨmacɨ méiniana fáɨcanocaiñediaɨoɨ. Daje izói jɨáɨma fue gáɨana fáɨcanocaiñediaɨoɨ. Daje izói íaɨoɨ jɨruírenana féitañediaɨoɨ. Daje izói íaɨoɨ merɨ́rifɨrenana féitañediaɨoɨ. 
\c 10  
\s1 Daa ángel daɨnámɨe Juzíñamui abɨ ímɨe duera rabénico llɨ́ide 
\p  
\v 1 Afe méifodo rɨírede Juzíñamui abɨ ímɨe monámona ana bíllana cɨódɨcue. Afémɨe uíllɨe cɨ́gɨdo bite; íemo afémɨe ɨfomo rózigüeo izoide jɨ́ina. Ie uiéco jitoma egáiñua izói quenírede. Iemo ie ɨdaɨ boode jíaɨlliraɨ izói éroide.  
\v 2 Afémɨe daa duera rabénico tuiñoda llɨ́ide. Ie ɨdaɨ nabezi monáillaimo bɨtade, íemo ie jarɨ́fezi énɨemo bɨtade.  
\v 3 Iemo jánallari fɨcɨre ɨrilla izói fɨcɨre úrite. Afémɨe úrilla mei, mona siete dɨ́gacaiño gɨrɨde; ie gɨ́rɨa come úrilla izói cácacaide.  
\v 4 Afe siete dɨ́gacaiño mona gɨ́rɨa llɨ́ɨcailla mei, íaɨoɨ daɨna uaillaɨ cúeiacadɨcue. Mei íadɨ cúeiacadɨcuemo monámona daa uai cuemo úrillana cacádɨcue; daɨde: 
\p —Afe siete dɨ́gacaiño mona gɨ́rɨa uaillaɨ rabemo cueñeno iri; báinino comécɨmo o jóoneri, —daɨde. 
\p  
\v 5 Afe mei afe monáillaimo naidaide, énɨemo naidaide Juzíñamui abɨ ímɨe, ie onoɨ nabezi monamo zɨtáoide.  
\v 6 Afe llezica zíiñona ite Juzíñamui mámecɨ llɨ́ɨnuano rɨire úrite. Afe dáaruido énɨe comuítatɨmɨe mámecɨ, daje izói monáillai comuítatɨmɨe mámecɨ, íemo nana afénomo ite cáadɨnuiaɨ comuítatɨmɨe mámecɨ llɨ́ɨnota rɨire daɨde: 
\p —Benómona jaca ja móziñoñelleza.  
\v 7 Jabe siete dɨ́gademona íiraɨmɨe Juzíñamui abɨ ímɨe ie vudugoɨ fúunollɨruimo dúcɨlle llezica, Juzíñamui jɨca ia comécɨdo báinino mamécafue, ñue ɨ́coɨmo zaite. Daɨí Juzíñamui ie uai jino llóraɨnɨmo jaiai uícodo llote. Afémacɨ danɨ ie ocuífɨregano, —aquíe izói daɨde. 
\p  
\v 8 Naui monámona cue cacana uai nane meine cuemo úrite. Cuena daɨde: 
\p —Afe énɨemo monáillaimo naidáidɨmɨe ónoɨmo ite túide duera rabénico mai llɨ́ɨnuai, —daɨde. 
\p  
\v 9 Jira afe Juzíñamui abɨ ímɨemo afe duera rabénico jɨ́cajidɨcue. Jɨcádɨcuemo afémɨe cuena daɨde: 
\p —Llɨ́ɨnota mai güi. Afe duera rabénico o fuemo cɨ́iji naɨmérena izói cácaite, mei íadɨ o jébemo erɨre cácaite, —daɨde. 
\p  
\v 10 Mei jira Juzíñamui abɨ ímɨe ónoɨmona afe duera rabénico llɨ́ɨnota güitɨcue. Güitɨ́cuemo cue fuemo cɨ́iji izói naɨmere cácaide. Mei íadɨ afe ja cue güilla méifodo cue jébemo erɨre cácaide.  
\v 11 Afe mei cuena daɨdíaɨoɨ: 
\p —Juzíñamui daɨna aillo comɨnɨ jófuiaɨmo cómuitɨfuiaɨ, meine dáanomo llóredɨoza. Daje izói aillo náɨraɨaɨna Juzíñamui dáɨnana llóredɨoza. Iemo daje izói jɨáɨforie úritɨnona Juzíñamui dáɨnana llóredɨoza. Iemo jɨáɨ aillo illáɨnɨna Juzíñamui dáɨnana llóredɨoza, —aquíe izói daɨdíaɨoɨ. 
\c 11  
\s1 Uai nabáifɨrede íaillɨnoɨ 
\p  
\v 1 Afe mei árera rázɨna cuemo itíaɨoɨ. Afezɨ jofo facáradozina eroide. Afezɨ cuemo fécano cuena daɨdíaɨoɨ: 
\p —Mai náidacaillano dama Juzíñamui gaɨríraco nɨe dɨnóride fácaji. Daje izói Juzíñamuimo caɨmátairano o fácaji nɨe dɨnóride. Afe llezica afénomo nɨeze afémɨemo caɨmátaidɨmacɨna ite mai fácado.  
\v 2 Mei íadɨ afeco jinófebɨrɨ facáñeno o iri; mei afeno jɨcánemacɨmo dúideza. Afémacɨ Jerusalén daɨna ɨ́aɨfuenide jófuena cuarenta y dos dɨga fɨuido fɨeni anáfenoitiaɨoɨ.  
\v 3 Iemo cue dɨbénedo úrillena uai nabáifɨrede íaillɨnoɨna óreitɨcue; come zuure ia jɨtaca jítɨcuiro, jɨ́taitiaillɨnoɨ. Afe íaillɨnoɨ mil doscientos sesenta dɨ́garuillaɨ cuedo úritiaillɨnoɨ. (Afe mil doscientos sesenta dɨ́garui, cuarenta y dos dɨga fɨui.) 
\p  
\v 4 Bie cue uai nabáifɨrede íaillɨnoɨ ménade olivo amena izóidiaillɨnoɨ. Daje izói afe íaillɨnoɨ bínɨe comuítate Juzíñamui uícomo jóonega mena boode áillue lámpara izóidiaillɨnoɨ.  
\v 5 Dáamɨe íaillɨnoɨna fɨeni fɨnóacaniadɨ, afe íaillɨnoɨ fuémona irai orédiaillɨnoɨ, afe íaillɨnoɨ fáiacadɨnona náamɨena cuarítallena. Nana íaillɨnoɨna fɨeni fɨnóacadɨnona daɨí tɨ́taiteza.  
\v 6 Bie cue uai nabáifɨrede íaillɨnoɨmo monámona nocɨ bɨítañede rɨ́ino ite. Afe íaillɨnoɨ Juzíñamui dɨbénedo úricaille dɨnó, nocɨna bɨ́itañeitiaillɨnoɨ. Daje izói jaɨnoi dɨ́ena ória rɨ́ino íaillɨnoɨmo ite. Iemo jɨáɨ comɨnɨ duere fɨ́noite nana jacɨ́rede duico comuítaja rɨ́ino afe íaillɨnoɨmo ite. Afe íaillɨnoɨ comecɨ óiacana dɨnori comɨ́nɨna duere fɨnórediaillɨnoɨ.  
\v 7 Mei íadɨ afe íaillɨnoɨ táɨjɨna fuilla mei, ɨere jacɨre éroide caade rɨlle afe fɨénide jóriaɨ ɨbáirafomona jino bite. Jino billano afe íaillɨnoɨ dɨga fúirite. Fuiríllano íaillɨnoɨna anáfenoite. Anáfenua mei íaillɨnoɨna tɨ́taite.  
\v 8 Iaillɨnoɨ tɨ́ille mei, caɨ Ocuíraɨma coráɨnanomo, nɨɨ afe Jerusalemo, afe áillue jofue cɨgɨ iomo, íaillɨnoɨ tɨ́ide abɨ fɨénocaigaiaillɨnoɨ. Afe jofue mámecɨ, fɨeni íllana onótate uaido Sodoma daɨna. Daje izói jɨáɨ Egípto daɨna.  
\v 9 Iemo daruiámani átuedo dɨga jófuiaɨ naɨraɨ afe íaillɨnoɨ abɨ tɨ́illamo acáritiaɨoɨ. Iemo íaillɨnoɨ abɨna raɨtátañeitiaɨoɨ. Daje izói dɨ́gazie íaillɨnoɨ abɨ bɨ́inamo acáritiaɨoɨ, naa jɨáɨfodo úritɨnuiaɨri.  
\v 10 Bínɨemo ite comɨnɨ afe íaillɨnoɨ tɨ́illari ɨere ióbidiaɨoɨ. Daje izói caɨmare íitiaɨoɨ. Afe caɨmare íaɨoɨ íllamona conímamo ráanɨaɨna raiñóñeno fécaitiaɨoɨ. Mei afe íaillɨnoɨ Juzíñamui dɨbénedo úricailla llezica, bimácɨna ɨere duere zefuítatiaillɨnoɨza.  
\v 11 Mei íadɨ daruiámani átuedo jailla méifomo Juzíñamui afe íaillɨnoɨna meine abɨdo cáatate. Iemo meine abɨdo íaillɨnoɨna macátate. Iemona íaillɨnoɨmo acáritɨno jamánomo jacɨ́naitiaɨoɨ.  
\v 12 Afe mei afe uai nabáifɨrede íaillɨnoɨ monámona fɨcɨ́rede uaina cacade. Aféuai íaillɨnoɨna daɨde: 
\p —Caifo bené bi, —daɨde. 
\p Jira íaillɨnoɨna éoidɨno éroidemo, caifo mona uíllɨedo monamo jáidiaillɨnoɨ.  
\v 13 Afe íaillɨnoɨ jailla llezica énɨe ɨere rɨire docaide. Afe rɨire docáillamona afe áillue jofue diez dɨ́ganodemona dáagobe nana jáɨcoɨzite. Afemona siete mil comɨnɨ tɨ́coɨzitiaɨoɨ. Afemona fɨébidɨno ɨere jacɨ́naitiaɨoɨ. Jacɨ́naillano monamo ite Juzíñamuina caɨmátaidiaɨoɨ. 
\p  
\v 14 Méifoide ɨere jácɨfue ja záide, mei íadɨ íiraɨe bille ja raɨrede. 
\s1 Siete dɨ́gade vudugoɨ fúunotɨnomona ja íiraɨmɨe fúunote 
\p  
\v 15 Siete dɨ́gade ángeles daɨnámacɨ Juzíñamui abɨ ímɨiaɨmona íiraɨmɨe ie vudugoɨ fúunote. Fúunua llezica, monámona dɨga fɨcɨre úrilla uaillaɨ cácacailla; daɨdíaɨoɨ: 
\q1 —Nana bínɨe illaɨnɨ illáɨmaillano naa íaɨoɨ ocuícanuiaɨri ja dájena caɨ Juzíñamuimo, íemo ie Crístomo jaɨnáitaga. 
\q1 Iemo afe Cristo jaca nɨnomo zíiñona ócuifɨreite, —daɨdíaɨoɨ. 
\m  
\v 16 Iemona Juzíñamui uícomo ráɨide veinticuatro dɨ́gade éicomɨnɨ íaɨoɨ illaɨma ráɨiranomona ana bɨ́jɨcaidiaɨoɨ. Uáfueza, afe úrilla llezica énɨemo fueco dɨné bɨ́jɨcaillano, Juzíñamuina caɨmátaitadiaɨoɨ.  
\v 17 Iena daɨdíaɨoɨ: 
\q1 Ona fɨgora daɨdɨcaɨ. 
\q1 Jamánomo ocuide Juzíñamuidɨoza. 
\q1 Birui itɨ́mɨedɨoza, íemo jaiai nanómona itɨ́mɨedɨoza, íemo jɨáɨ jaca nɨnomo zíiñona íitɨmɨedɨoza. 
\q1 Fɨgora ona daɨdɨcaɨ, mei o áillue rɨ́ino maiñódɨoza. 
\q1 Máiñuano ja nane como ocuízaidɨoza. 
\q1  
\v 18 Náɨraɨaɨ icɨ́rinaizɨtiaɨoɨ, mei íadɨ íaɨoɨ duere o fɨnóllɨruimo ja dúcɨzaide. 
\q1 Daje izói tɨ́idɨno ɨere rɨire o jɨcánollɨruimo ja dúcɨzaide. 
\q1 O dɨbénedo úrite o ocuífɨreganomo íaɨoɨena o mameca ñúefuiaɨna íaɨoɨmo fécaitɨo. 
\q1 Daje izói o uaina ñue ɨ́ɨnofɨrede ñue fɨnócanomo íaɨoɨmo dúide ñúefuiaɨna fécaitɨo; 
\q1 íemo daje izói o mámecɨna jɨfánodoɨñeno ñue llɨ́ɨnotɨnomo íitɨo. 
\q1 Uáfueza, jamánomoidɨmɨemo, 
\q1 daje izói jamáimɨemo íaɨoɨmo dúide raana íaɨoɨmo ífɨredɨo. 
\q1 Daje izói bínɨe ñúemacɨna fɨéniruitadɨno o táɨnocaitallɨruimo ja dúcɨzaide. 
\m Aquíe izói afe éicomɨnɨ daɨdíaɨoɨ. 
\p  
\v 19 Iemona monamo ite Juzíñamui gaɨríraco túijicaide. Afénomo Juzíñamui comɨnɨ dɨga caɨmare úrira raa uáfori cɨ́ocaide. Afe úrira raa emodo órona ɨbaica caja. Afe eromo Juzíñamui lloga uaillaɨ éenotiaɨoɨ. Afe gaɨríraco túijicailla llezica améuaɨ rɨire llairide, íemo fɨcɨ́riede ráanɨaɨ cacaide; íemo mona fɨcɨre gɨrɨde; íemo énɨe ɨere rɨire docaide; íemo ɨere maɨride nocɨ́jɨaɨ cocɨde. 
\c 12  
\s1 Rɨngo íemo jacɨ́rede zɨcɨ́naɨmana eróidɨmɨe dɨga monamo cɨ́ocaide 
\p  
\v 1 Afe mei monámona jacɨ́rede onótate raa cɨ́oicaide. Afénomo ɨníroido ferɨ́nua izói, jitómado ferɨ́noga rɨngo cɨ́oina. Afengo ɨdaɨ anamo fɨui cɨ́oina, íemo afengo ɨfomo doce dɨ́gade ucudu illácuifoɨ, illaɨma jɨtáfɨregacuifoɨ izoide jɨtáoide.  
\v 2 Afe rɨngo úrue jocóacade izínailla. Afe ɨere izírenari caillɨ́cade; mei afengo úrue jéicɨacana llezica ɨere duere zefuídeza.  
\v 3 Afe méifodo jɨáɨe jacɨ́rede onótate raa monamo cɨ́ocaide. Afénomo áillue jíaɨrede jacɨ́rede zɨcɨ́naɨmana eróidɨmɨe cɨ́ocailla. Afémɨe siete dɨga ɨfórede. Iemo afémɨe diez dɨga zícaɨrede. Afe ɨfócɨaɨmo illa dɨ́gacɨmo illaɨma jɨtáracuifoɨ jɨ́ina. Daa ie mámecɨ Taɨfe.  
\v 4 Ie óodado monamo ite úcuaɨmona jarɨ́fecuduna aillo dánomo jaɨnánote. Jaɨnánuano afécuduaɨna ana énɨemo dotade. Afe ‘dragón’ daɨna zɨcɨ́naɨmana éroidɨmɨe, afe úrue jocóacade rɨngo uiécomo jóoneoide, afe ie jocóacaga úrue jócua llezica raɨre rɨ́llena.  
\v 5 Iemo afe rɨngo ɨíza jocode. Afémɨe uire móonaia nana náɨraɨaɨna llojébɨcɨ izóidedo rɨire ócuifɨreite. Afe úrue jócua méifodo Juzíñamui baɨroca. Baɨroda ie illáɨmana ráɨiranomo uiga.  
\v 6 Afe llezica afe rɨngo táɨzicɨmo botade. Afe dɨnomo afengo retáirillɨno uícodo Juzíñamui fɨnoca. Afénomo mil doscientos sesenta dɨga mona afengo ecáecaille. 
\p  
\v 7 Afe méifodo áillue fuiríacana caifo mona eromo comuide. Afénomo Juzíñamui abɨ imacɨ illaɨma Miguel naa jɨáɨe Juzíñamui abɨ imácɨaɨri afe dragón dɨga fuirídiaɨoɨ. Daje izói afe dragón naa ie abɨ imácɨaɨri fuirídiaɨoɨ,  
\v 8 mei íadɨ afémacɨ Miguel náɨraɨna anáfenonidiaɨoɨ. Iemona dragón imacɨ illɨno monamo iñede.  
\v 9 Afe ie illɨno iñena jira afe rɨírede dragón monámona ja jino dotaca. Afe jaiai nɨnomo ite jaio daɨnámɨe jɨáɨfodo mameina Taɨfe, íemo Satanás, íemo dáamɨe nana náɨraɨna jɨ́fuefɨredɨmɨe. Afémɨe naa ie abɨ imácɨri ana énɨemo dotácaiaɨoɨ. 
\p  
\v 10 Afe méifomo monámona fɨcɨ́rede uaina cacádɨcue. Afe uai daɨde: 
\p —Caɨ Juzíñamui bínɨe comɨnɨ jílloillena mámiaruimo ja dúcɨde. Daje izói íemo ite rɨ́ino facállɨruimo ja dúcɨde. Iemo daje izói illáɨmana ie illɨ́ruimo ja dúcɨde. Daje izói ie jitó Cristo rɨire ocuíllɨruimo ja dúcɨde. Mei caɨ ámatɨaɨmo fɨénidɨfue nitáfɨredɨmɨe ja jino dotácaza. Afémɨe nágaruillaɨ, mona naɨo dɨga caɨ Juzíñamui uiécori afémacɨmo fɨénidɨfue nitáfɨrede.  
\v 11 Caɨ ámatɨaɨ Cordero dɨ́edo fɨénidɨfuena anáfenodiaɨoɨ. Daje izói íaɨoɨ jino meáiruiñeno lloga Juzíñamui uáillaɨdo caifófeficaidiaɨoɨ, mei jaca tɨ́illana jacɨ́ruiñediaɨoɨza; mei jɨáɨfodo jaca tɨ́illemo ñue fɨnóbidiaɨoɨza.  
\v 12 Iemona, mona naa afénomo ite cáadɨnuiaɨri mai omoɨ ióbiri. Mei íadɨ énɨemo itɨno nɨɨ dúerena, naa monáillaimo itɨ́nuiaɨri, mei Taɨfe ómoɨmo ana ɨere icɨ́rillano jáideza. Afémɨe nano íanori ie íllena onódeza. 
\p  
\v 13 Afe dragón ana énɨemo ie dótajana onóillano, naui ɨíza jocódɨngo racade.  
\v 14 Mei íadɨ afe rɨngo mena áillue máajaiño iáicona iga, áfedo afe jaio daɨnámɨe dragómona jɨca táɨzicɨmo afengo féellena. Afénomo daámani fɨmona átuedo afengo ecáecaiga.  
\v 15 Iemo jaio daɨnámɨe áillue jaɨnoi ie fuémona orede, imánina comuíllena, mei afe imánido afe rɨngo coróbaitallena.  
\v 16 Mei íadɨ énɨe rɨngona rɨ́idote, mei afe dáaruido énɨe bócocaillano, afe dragón fuémona oreca imánina naítateza.  
\v 17-18 Afe bíemona afe dragón rɨngomo ɨere rɨ́icaide. Rɨ́icaillano aféngomona fɨébide ie erófene igɨ́maɨaɨ dɨga fuirízaide. Afémacɨ Juzíñamui ocuica uaillaɨ jeire otíaɨoɨ. Daje izói afémacɨ Jesucristo lloga ua ráfuena fáɨcanocaiñeno nágarui jeire ófɨrediaɨoɨ. 
\c 13  
\s1 Mena áillue jacɨre eroide rɨlle cɨ́ocaide 
\p  
\v 1 Monáillai fuédamo cue naidáillano monáillaimona ɨere jacɨre eroide rɨlle caifo bíllana cɨódɨcue. Afémɨe ɨfo siete dɨ́gade, daje izói afémɨe diez dɨga zícaɨrede. Afe illa dɨga zícaɨmo illaɨma jɨtáracuifoɨ jɨ́ina. Afémɨe ɨfócɨaɨmo Juzíñamuina fɨeni daɨna mámecɨ cúeina.  
\v 2 Afe cue cɨona jacɨ́rede rɨlle jánallarina eroide. Ie ɨ́daɨaɨ oso ɨ́daɨna eroina, íemo ie fue león fuena eroide. Bímɨemo dragón íemo ite rɨ́ino naa ie illáɨmaillano dɨga afémɨemo fecade. Afe llezica rɨire ocuífɨrenafue afémɨemo lloga.  
\v 3 Afe jacɨ́rede rɨlle ɨfócɨaɨmona daacɨ tɨtade áillue boáfena eroide illa. Mei íadɨ afe tɨtáacade áillue boafe raɨre jacaide. Iemona nana énɨe náɨraɨaɨ áferi ɨere jacɨ́naitiaɨoɨ. Jacɨ́naillano afémɨemo ɨ́ɨnotiaɨoɨ.  
\v 4 Afémacɨ dragón uícomo énɨemo fueco dɨné bɨ́jɨcaillano íemo caɨmátaidiaɨoɨ, mei dragón rɨire ocuille rɨ́ino afe jacɨ́rede rɨ́llemo ígaza. Iemo daje llezica jacɨ́rede rɨ́llemo caɨmátaidiaɨoɨ. Caɨmátaillano daɨdíaɨoɨ: 
\p —¿Bu mei bie jacɨ́rede rɨlle izoina? ¿Bu mei afémɨe dɨga fuirírena? ¡Afémɨe anáfenonide! —daɨdíaɨoɨ. 
\p  
\v 5 Afe llezica afe jacɨ́rede rɨlle afémɨe úrilla bu llétañega. Iemona Juzíñamuina ɨáɨre daɨna uaina llote, naa fɨeni abɨ ɨ́ɨnuafuiaɨri. Afe izói cuarenta y dos dɨga fɨui, daɨí ie ocuilla buna ráiruiñega.  
\v 6 Iemona afémɨe bie izói fɨnode; Juzíñamuina uáitano, ie mámecɨna ɨáɨre daɨíoide. Daje izói Juzíñamuimo úriranona ɨaɨre daɨíoide. Iemo monamo itɨ́nuiaɨna daje izói ɨáɨre daɨíoide.  
\v 7 Iemo jɨáɨ daje izói Juzíñamuimo jaɨnáidɨno dɨga ie fuirilla buna ráiruiñega. Daje izói afémacɨ ie anáfenolle buna ráiruiñega. Iemo nágazie ocuille rɨ́ino afémɨemo fecaca. Daje izói nana comɨnɨ jófuiaɨ ócuifɨreite, íemo daje izói nana jɨáɨfodo úritɨnuiaɨ ócuifɨreite, íemo daje izói nana náɨraɨaɨna ócuite.  
\v 8 Nana bínɨemo itɨno afe jacɨ́rede rɨ́llemo caɨmátaidiaɨoɨ. Afémacɨ mámecɨaɨ zíiñona íitɨno rabénicomo cúeñega. Ua énɨe taɨneina llezica baimacɨ mámecɨaɨ afénicomo cúeñega, mei afémacɨ ɨ́ɨnoñena jira. Afénico naui tɨtaca Cordero ie. 
\p  
\v 9 Bífuemo cacáacadɨmɨe mai bíemo cácarei.  
\v 10 Jɨáɨmacɨna maɨtá uitɨno méifodo nane maɨtá uille. Iemo jɨáɨ lloéfaido jɨáɨmacɨna tɨtádɨno méifodo afémɨe daje izói lloéfaido tɨtalle. Mei jira Juzíñamuimo jaɨnáidɨno comécɨna járidonidiaɨoɨ; daje izói jɨáɨ ñue ɨ́ɨnorediaɨoɨ. 
\p  
\v 11 Afe méifodo jɨáɨe jacɨre eroide rɨlle énɨemona caifo bíllana cɨódɨcue. Afémɨemo mena zicaɨ ite; cordero zícaɨna eroide. Mei íadɨ afémɨe dragón úrilla izói úrite.  
\v 12 Naui monáillaimona bite nanoide jacɨre éroide rɨ́llemo ite rɨire ocuille rɨ́ino, daje izói bie méifoidɨmɨemo ite. Iemo nanoide jacɨ́rede rɨlle uícori, bímɨe íemo ite rɨ́ino ácatate. Ie rɨ́ino ácata llezica afémɨe nana énɨemo itɨ́nuiaɨ, nanoide jacɨ́rede rɨ́llemo caɨmátaillena ocuide. Afe nanóidɨmɨe ɨfomo ite áillue boafe raɨre jacáidɨmɨe.  
\v 13 Iemo afe méifoidɨmɨe daje izói ɨere jácɨmɨe daɨítate raana cɨ́otate. Mei uafue, afémɨe nana comɨnɨ eróicana monámona iraicɨ ana énɨemo cocɨ́tate.  
\v 14 Iemo afe nanoide jacɨ́rede rɨlle uícomo buna ráiruiñega ie fɨnócaigado nana bínɨemo itɨ́nuiaɨna jɨ́fuete. Afémacɨna jɨ́fuiano afe aillo bofédaite jacɨ́rede rɨ́llena eroide jánaraɨna afémacɨna fɨnótate. Afe bofédaite jacɨ́rede rɨlle lloéfaido aillo bofeca, mei íadɨ naɨ caade.  
\v 15 Iemo afe méifoide jacɨ́rede rɨ́llemo, afe jánaraɨ cáatalle rɨ́ino íemo iga. Iemona afe jánaraɨna cáatano, afémɨe afe jánaraɨna úritade. Daje izói nana afe jánaraɨmo camátaiñedɨnona afe jacɨ́rede rɨlle jánaraɨ íaɨoɨna fatátate.  
\v 16 Nana afe baɨmo, nana náɨraɨaɨna bie izói itátate; nana jabóidɨmacɨ naa jamánomoidɨmɨiaɨ dɨga, nana ráaredɨno naa dúeredɨno dɨga, nana ráiruiñegano naa rairuícano dɨga, íaɨoɨ onoɨ nabézimo daa onótate número jóonetade. Afe onótate número nabézimo jóoneñenia íaɨoɨ ozócɨmo jóonerede.  
\v 17 Naga afe onótate númerona cúeñegamɨe jaca ɨbárinide, daje izói raana fecánide. Afe número nanoide jacɨ́rede rɨlle ie. Afe número afémɨemo dúide mámecɨ daɨíacade.  
\v 18 Bifue onóillena ɨere báitajamo dúide. Afena onódɨmɨe, mai afe jacɨre eroide rɨlle número faca. Afémɨe número ɨima ie. Afe número seiscientos sesenta y seis. 
\c 14  
\s1 144,000 dɨ́gadɨno roga rua 
\p  
\v 1 Afe méifomo Cordero Sión mameina idu emódomo naidáinana cɨódɨcue. Afénomo afémɨe dɨga ciento cuarenta y cuatro mil comɨnɨ naidáiede. Afémacɨ ozócɨmo Cordero mámecɨ naa ie Moo mámecɨ dɨga cúeina.  
\v 2 Iemo monámona fɨcɨ́rede raana cacádɨcue. Afe fɨcɨ́rena aillo imánillaɨ nofɨco tua fɨcɨ́rena izoide. Jɨáɨ rɨire mona gɨ́rɨa fɨcɨ́rena izoide. Iemo jɨáɨ aillo arpa daɨna, rua roia taiga ráanɨaɨ fɨcɨ́rena izoide.  
\v 3 Afe llezica illaɨma ráɨirano uícomo afémacɨ comue rua rotíaɨoɨ. Daje izói cuatro dɨga cáadɨmɨiaɨ, íemo éicomɨnɨ uícomo rotíaɨoɨ. Afe rúana jaca buna ónide. Danɨ afe ciento cuarenta y cuatro mil dɨga énɨemona jíllode comɨnɨ afe rúana onona.  
\v 4 Afe bimacɨ rɨngomo jíriñedɨno, mei afémacɨ jaca ɨ́aɨfuenidɨno; danɨ íaɨoɨ abɨ rairuídiaɨoɨ. Daje izói afémacɨ Cordéromo jaɨnáitagamacɨ. Afémacɨ comɨ́nɨmona jíllotagamacɨ, Juzíñamuimo nanóidɨno ie dúidɨmacɨna íaɨoɨ íllena. Daje izói Cordéromo nanoide dúidɨno itíaɨoɨ.  
\v 5 Afémacɨ jaca táɨnona úriñediaɨoɨ, mei afémacɨ Juzíñamui illáɨmana ráɨirano uícori ɨ́aɨfuenino itɨ́noza. 
\s1 Daámani ángeles daɨnámacɨ Juzíñamui abɨ ímɨiaɨ llócaiga uai 
\p  
\v 6 Afe mei jɨáɨe Juzíñamui abɨ ímɨe mona dáafenedo féiana cɨódɨcue. Afémɨemo zíiñona jíllollɨuai illa, bínɨemo itɨ́nomo llóllena. Nana énɨe náɨraɨaɨmo llórede, íemo nana jɨáɨziemo. Daje izói nana jɨáɨfodo úritɨnomo llórede, íemo daje izói nana comɨnɨ jófuiaɨdo.  
\v 7 Afémɨe fɨcɨ́rede uaido daɨde: 
\p —Juzíñamuina ñue omoɨ jacɨ́ruiri; ñúefuiaɨna afémɨemo omoɨ nitari, mei afémɨe ɨere rɨire jɨcánollɨruimo ja dúcɨdeza. Mai mona fɨnódɨmɨe, daje izói énɨe fɨnódɨmɨe, íemo monáillai fɨnódɨmɨe, íemo énɨemona jaɨnoi jino torano fɨnódɨmɨe; afémɨemo omoɨ caɨmátaifɨreiri, —daɨde. 
\p  
\v 8 Iemo nane jɨáɨe Juzíñamui abɨ ímɨe méifodo cɨ́ocaide; afémɨe daɨde: 
\p —Ja jáɨcoɨzite, ja jáɨcoɨzite. Afe áillue Babilonia jofue jáɨcoɨzite. Mei aillo fɨénide jɨruífuiaɨ izoide ɨ́aɨfuiaɨ omoɨ fɨ́nofɨrenado, nana naɨraɨ jɨfáidɨno izói itátatɨomoɨza, —daɨde. 
\p  
\v 9 Afe méifodo íiraɨe Juzíñamui abɨ ímɨe fɨcɨre daɨíoicaide: 
\p —Dáamɨe jacɨ́rede rɨ́llemo caɨmátaiadɨ, íemo jɨáɨ afe jánaraɨmo caɨmátaiadɨ, íemo daje izói afe rɨlle mámecɨ ozócɨmo nɨnena ónoɨmo cuetátaiadɨ,  
\v 10 afe izóidɨno Juzíñamui lloga jamánomo duere fɨnóllɨnomo orélliaɨoɨ. Mei afe izóidɨnomo afémɨe ɨere rɨ́icaide; rɨ́icaillano afémɨe duere íaɨoɨ fɨnolle, féiñellena rɨire íaɨoɨmo mamécaza. Iemo Juzíñamui abɨ imacɨ uícomo, daje izói Cordero uícomo, iraido íaɨoɨna ɨere izi cácatalliaɨoɨ. Iemo daje izói naɨraɨ ɨere uzire cóonaitalle raado afe izóidɨnona ɨere izi cácatalliaɨoɨ.  
\v 11 Duere íaɨoɨ zefuítate irai uíllɨe jaca nɨnomo llɨ́ɨcaiñeno caifo uillɨ́oide. Afe jacɨ́rede rɨ́llemo caɨmátaitɨno mona naɨo dɨga afe duere fɨnóinamona jaca ócozinaiñeitiaɨoɨ. Afémacɨ naa afe rɨ́llena eroide jánaraɨmo caɨmátaidɨnori, íemo jɨáɨ ie mámecɨna onótate número otɨno dɨga nana jaca ócozinaiñeitiaɨoɨ.  
\v 12 Mei jira Juzíñamuimo jaɨnaide ie ocuica uaimo jiéruitɨno, naa Jesudo fáɨcanocaiñede jáidɨno dɨga, comécɨna járidonidiaɨoɨ. 
\p  
\v 13 Nane afe méifomo monámona daa uai cuemo úrillana cacádɨcue; daɨde: 
\p —Bie cúeiri: “Benómona caɨ Ocuíraɨmamo ɨ́ɨnote tɨ́itɨno caɨmare íitiaɨoɨ.” Afena Juzíñamui Ñuera Joreño “Jii” dáɨdeza, mei afémacɨ íaɨoɨ táɨjɨnamona ocózinaitiaɨoɨza. Daje izói íaɨoɨ fɨnócano, jɨáɨma dɨga nabáirilla izói féitañegaza, —daɨí daɨde. 
\s1 Ria llɨzilla óina izói, énɨe comɨnɨ jofo ollɨ́ruimo dúcɨde, Juzíñamui duere íaɨoɨ fɨnóllena 
\p  
\v 14 Afe mei eróillano úzerede mona ero uíllɨena cɨódɨcue. Afe uíllɨe emódomo Nanoide Ɨima Jitona Jesuna éroidɨmɨe ráɨina. Ie ɨfomo oro fɨnoina illaɨma jɨtáracuifoɨ jɨ́ina. Daje izói hozna mámecɨrede arroz izoide llɨ́zie ñetara llɨ́ide. (Afe raa jofo icuífoɨna néfide jáirede lloefai izoide.)  
\v 15 Iemo nane jɨáɨe Juzíñamui abɨ ímɨe ie gaɨríracomona jino billa. Afémɨe fɨcɨ́rede uaido uíllɨe emódomo ráɨidɨmɨena daɨde: 
\p —O llɨ́iga llɨ́zie ñetara raado táɨjɨiri. Ja jeede dɨga mai jofo ono. Ja jofo ollɨ́ruimo dúcɨdeza. Enɨe comɨnɨ fɨnócafuiaɨ ja jeede ríanɨaɨ izói fɨénidɨfuena ɨere oruídeza, —daɨde. 
\p  
\v 16 Afe mei uíllɨe emódomo ráɨidɨmɨe ie llɨ́iga llɨ́zie ñetara raado énɨe comɨ́nɨmo táɨjɨzaide. Afedo fɨénidɨfuena oruídɨno jofo ote. 
\p  
\v 17 Afe mei jɨáɨe Juzíñamui abɨ ímɨe monamo ite Juzíñamui gaɨríracomona jino bite. Daje izói afémɨe jáirede llɨ́zie ñetara raa llɨ́icabite.  
\v 18 Afe llezica jɨáɨe Juzíñamui abɨ ímɨe Juzíñamuimo caɨmátairanomona jino bite. Afémɨemo jobáitalle rɨ́inona ite. Iemo afémɨe, jáirede ñetara raa llɨ́idɨmɨena fɨcɨre jɨ́ɨrillano daɨde: 
\p —Mai omo ite jáirede ñetara raado táɨjɨiri; énɨemo ite jɨ́rɨcoillaɨ ollɨ́ruimo ja dúcɨdeza. (Afe jɨ́rɨcoillaɨ fɨénide comɨnɨ jana.) Mai jofo ono, mei afe jɨ́rɨcoillaɨ ja ɨere jiduídeza, —daɨde. 
\p  
\v 19 Iemo afe jɨáɨe Juzíñamui abɨ ímɨe, ie jáirede ñetara raado énɨe comɨ́nɨmo táɨjɨzaide. Afedo énɨemo ite jeede jɨ́rɨcoillaɨ izoide fɨénidɨno jofo ote. Uano áillue ɨduíriraco izóidɨnomo jofo dɨte, afénomo rɨire ɨduíllena. Bie ɨduilla Juzíñamui bie izói duere afémacɨna fɨnolle jana.  
\v 20 Afe jɨ́rɨcoillaɨ izoide fɨénidɨno áillue comɨnɨ jofue jinomo ɨduica. Afe ɨduíracomona aillo dɨ́ena tote. Afórede imani izoide; áfeji caballo táɨia ie fue illa dɨnori afórede. Daje izói áfeji trescientos kilómetros dɨnó tote. 
\c 15  
\s1 Iiraɨe siete dɨ́gade jacɨ́rede duere fɨnóllɨfuiaɨ Juzíñamui abɨ imacɨ mameca 
\p  
\v 1 Iemo monámona jɨáɨe jacɨ́naitade áillue raa jánana cɨódɨcue. Siete dɨ́gade Juzíñamui abɨ imacɨ íiraɨe siete dɨ́gade jacɨ́rede duere fɨnóllɨfuiaɨ lluáɨbitiaɨoɨ. Afedo Juzíñamui rɨ́icaillana záaite. 
\p  
\v 2 Daje izói, vídriona fɨnóinana eroide monáillajina cɨódɨcue. Afeji réɨcɨ dɨga taméricaide; daɨí eroide. Jacɨ́rede rɨ́llena anáfenodɨno afe fuédamo naidáiediaɨoɨ; daje izói ie jánaraɨna anáfenodɨno; íemo jɨáɨ afe ie número mámecɨna ozócɨmo cúeñegano dɨga. Nana dáanomo afe vídriona eroide monáillai fuédamo naidáiediaɨoɨ. Nana bimacɨ Juzíñamui íaɨoɨmo fecaca ‘arpa’ daɨna rua roia taiga raa llɨ́iediaɨoɨ.  
\v 3 Afémacɨ Juzíñamui jaiai ocuífɨregamɨe Moisés rua rotíaɨoɨ. Daje izói jɨáɨ Cordero rua rotíaɨoɨ. Aférua bie izói daɨde: 
\q1 Ocuíraɨma, nana o fɨnócanuiaɨ ɨere ebíriede. 
\q1 Jamánomo rɨ́inorede Juzíñamuidɨo. 
\q1 Náɨraɨaɨ Illaɨma, nana o jáifɨrena io uáfuena jaɨ́cɨna jóide. 
\q1  
\v 4 Ocuíraɨma, ona ñue jácɨruiñeitɨmɨena iñede. 
\q1 Daje izói omo ñúefuena jóoneñeitɨmɨena iñede. 
\q1 Mei dama o ɨ́aɨfuenidɨmɨenaza. 
\q1 Naga náɨraɨaɨ omo caɨmátaizaɨbitiaɨoɨ, mei o jaɨ́cɨna fɨnófɨregafuiaɨna cɨódiaɨoɨza. 
\m Aquíe izói rotíaɨoɨ. 
\p  
\v 5 Bie méifodo, monamo ite Juzíñamui gaɨríraco túijicaillana cɨódɨcue. Afeco nofɨ́bɨcɨmo cuega Juzíñamui ocuica uaillaɨ éenorano.  
\v 6 Afécomona Juzíñamui siete dɨ́gade abɨ imacɨ jino bite. Afémacɨ siete dɨ́gade jacɨ́rede duere fɨnóllɨfuiaɨ uite. Afémacɨ ráifide ɨáɨnide queníredɨcuiruaɨ jɨtáoidiaɨoɨ. Iaɨoɨ llaɨtáoiga oro fɨnoina cɨraigɨ ife jogóbemo dúcɨde.  
\v 7 Ie mei cuatro dɨ́gade cáadɨmɨiaɨmona dáamɨe afe siete dɨ́gade Juzíñamui abɨ imácɨmona illa dɨ́gamɨemo oro fɨnoina ichecoɨ fecade. Aféchecoɨ jaca nɨnomo zíiñona ite Juzíñamui ocuica duere fɨnóllɨfuena oruide.  
\v 8 Iemo afe Juzíñamui gaɨríraco uíllɨena oruide. Afe uíllɨe Juzíñamui jamánomoidɨmɨena íllamona, daje izói ie ɨere rɨ́inorenamona comuide. Afe llezica afécomo buna jofo jáinide. Naɨ afe siete dɨ́gade Juzíñamui abɨ imacɨ siete dɨ́gade jacɨ́rede duere fɨnóllɨfuiaɨ záiñena llezica buna jofo afécomo jáinide. 
\c 16  
\s1 Juzíñamui duere fɨnóllɨfuena oruide ichécuaɨ 
\p  
\v 1 Afe mei Juzíñamui gaɨríracomona jino bite fɨcɨ́rede uaina cacádɨcue. Afe uai siete dɨ́gade Juzíñamui abɨ imácɨna daɨde: 
\p —Juzíñamuimona bite siete dɨ́gade duere fɨ́nuana oruídɨchecuaɨ ana énɨemo tótaji, —daɨde. 
\p  
\v 2 Nanoide Juzíñamui abɨ ímɨe jaillano, afémɨemo ite ichecoɨ ana énɨemo totade. Afemona nana jacɨ́rede rɨlle mámecɨna cuegánomo jacɨ́rede duico comuide. Afémacɨmo izírede jíllotañede ñozagɨ izoide duico comuide, daje izói afe rɨlle jánaraɨmo caɨmátaifɨredɨnomo. 
\p  
\v 3 Iemo méifoide Juzíñamui abɨ ímɨe afémɨemo itɨ́checoɨ monáillaimo totade. Tótamona afe monaillai jaɨnoi tɨ́idɨmɨe dɨe izói jaide. Iemona nana monáillaimo ite cáadɨnuiaɨ tɨ́coɨzite. 
\p  
\v 4 Iemo nane jɨáɨe Juzíñamui abɨ ímɨe afémɨemo itɨ́checoɨ imánillaɨmo, daje izói énɨemona jaɨnoi jino toránuaɨmo totade. Iemona afeno jáɨnoillaɨ dɨ́ena jaide.  
\v 5 Afe mei jaɨnoi fɨeni fɨnótate Juzíñamui abɨ ímɨe dáɨnana cacádɨcue; daɨde: 
\p —Ocuíraɨma, ɨ́aɨfuenide Juzíñamuidɨo. Bie izói comɨnɨ duere o fɨnóllena ɨere comécɨna jaɨ́cɨna jóidɨmɨedɨo.  
\v 6 Mei omo jaɨnáidɨnona tɨ́tano íaɨoɨ dɨ́ena naui totádiaɨoɨza. Daje izói o dɨbénedo úritɨno dɨ́ena totádiaɨoɨza. Iemo birui afe ɨbana o afémacɨna dɨ́ena jirótatɨo, mei daɨí afémacɨmo dúideza. 
\p  
\v 7 Afe mei nane Juzíñamuimo caɨmátairanomona dámɨe dáɨnana cacádɨcue; daɨde: 
\p —Jɨɨ, uáfueza, caɨ Ocuíraɨma, o jamánomo rɨírede Juzíñamuidɨo. Uáfuena ñue jaɨ́cɨna ɨere rɨire jɨcánotɨo, —daɨde. 
\p  
\v 8 Ie mei nane jɨáɨe Juzíñamui abɨ ímɨe afémɨemo itɨ́checoɨ jitómamo totade. Afemona afe jitoma comɨnɨ cóonaitalle rɨ́ino iga.  
\v 9 Iemona nana comɨnɨ jamánomo cóonaizɨtiaɨoɨ. Mei íadɨ íaɨoɨ comecɨ itɨ́fuiaɨna méidoñediaɨoɨ. Daje izói Juzíñamuimo caɨmátaiñediaɨoɨ. Mei jɨáɨfodo afe jacɨ́rede duere fɨnóllɨfuiaɨ ocuídɨmɨena faidófɨrediaɨoɨ. 
\p  
\v 10 Iemo nane jɨáɨe Juzíñamui abɨ ímɨe afémɨemo itɨ́checoɨ jacɨre eroide rɨlle illáɨmana ráɨiranomo totade. Afe llezica afémɨe náamataga illano jítɨrecaide. Iemona nana comɨnɨ afe uícodo íaɨoɨmo comuide duícuaɨ izírenari danɨ abɨ aɨnízɨtiaɨoɨ.  
\v 11 Mei daɨí itíaɨoɨ íadɨ, íaɨoɨ fɨnoca fɨénidɨfuiaɨ fáɨcanocaiñediaɨoɨ. Mei jɨáɨfodo, izi íaɨoɨ cácana ɨ́coɨnia, daje izói jacɨre íaɨoɨ ñozánaillamona, monamo ite Juzíñamuina ɨáɨre daɨdíaɨoɨ. 
\p  
\v 12 Iemo nane jɨáɨe Juzíñamui abɨ ímɨe afémɨemo itɨ́checoɨ áillue Eufrates mámecɨrede imánimo totade. Afemona afe imani zafénaite, áfedo illaɨnɨ raɨre ruica bille io tuiñóllena. Aféllaɨnɨ naa íaɨoɨ fuiríraɨnɨri jitoma caifo biránomona bitíaɨoɨ. 
\p  
\v 13 Afe mei dragón daɨnámɨe fuémona, daje izói jacɨre eroide rɨlle fuémona, daje izói taɨno uai jino llófɨredɨmɨe fuémona daámanide cúuraɨcɨna eroide fɨénide jóriaɨ jino bíllana cɨódɨcue.  
\v 14 Afe daámanidɨno Taɨfe jóriaɨ. Afémacɨ cɨóraɨnina raana cɨ́otafɨredɨno. Bie damɨeámanidɨno nana énɨe illaɨnɨ naa íaɨoɨ fuiríraɨnɨri dáanomo gaɨrítaite, jamánomo rɨ́inorede Juzíñamui dɨga fuiríllena. Aferui Juzíñamui aillo ɨba ollɨrui. 
\p  
\v 15 Aféruido monámona Cristo úrillana cacádɨcue; daɨde: 
\p —Ero, cacai. Merɨ́rizaɨbitɨmɨe billa izói, comɨnɨ naɨ cuemo comécɨñediaɨoɨmo déizaɨbitɨcue. Cue bille llezica ɨnɨ́ñeno cuemo comecɨ facáoidɨmɨe caɨmare íite. Daje izói emuíroma mácañeillena ɨníroina ñue úiñotɨmɨe izói, ɨ́aɨfuemona abɨna ráiruitɨmɨe méairuiñeite, —daɨde. 
\p  
\v 16 Iemo afe daámanide fɨénide jóriaɨ, nana illáɨnɨna dáanomo gaɨrítate. Afeno mámecɨ hebreo uaido daɨna Armagedón. 
\p  
\v 17 Iemo siete dɨ́gademona íiraɨe Juzíñamui abɨ ímɨe afémɨemo itɨ́checoɨ caifo táɨfomo totade. Tota llezica monamo ite gaɨríracomona fɨcɨ́rede uai cácacaide. Afe uai illaɨma ráɨiranomona jino bite; daɨde: 
\p —Ja fuite, —daɨde. 
\p  
\v 18 Afe méifodo, améuaɨ llairilla. Mona gɨ́rɨa naa fɨcɨ́riede ráanɨaɨ dɨga cácacaide. Afe llezica énɨe ɨere rɨire docaide. Nanómona bínɨemo comɨnɨ ia docáifɨrena baɨmo, jamánomo rɨire docaide.  
\v 19 Iemona afe áillue comɨnɨ jofue daámani dɨeze bójicaide. Jɨáɨe bínɨemo ite jofue jáɨcoɨzite. Afe llezica Juzíñamui áillue Babilonia jófuemo úibicaide, duere íaɨoɨna fɨnóllena. Afe duere fɨnóllɨfue comɨnɨ tɨ́taite rɨ́iji jírua izói íite. Afémɨe rɨ́icaillano daɨí íaɨoɨna fɨ́noite.  
\v 20 Afe dáaruido nana monáillaji cɨgɨ íduaɨ naa jɨáɨe caifóneduaɨri nɨné táɨnocaide.  
\v 21 Afe llezica aillo jéerie nocɨ́jɨaɨna monámona comɨ́nɨmo cocɨde. Aféjɨaɨmona dáarie cuarenta kilos méerede. Iemona afénomo ite comɨnɨ afe áillue nocɨ́jɨaɨ cócɨari Juzíñamuina ɨáɨre daɨdíaɨoɨ, mei afe bimacɨ duere fɨ́nua ɨere jamánomoideza. 
\c 17  
\s1 Jamánomo jɨruíredɨngo duere fɨnóinafue 
\p  
\v 1 Afe méifomo siete dɨ́gachecoɨ llɨ́ide Juzíñamui abɨ imácɨmona dáamɨe cuemo úrizaɨbite. Cuena daɨde: 
\p —Eróizaɨbi. Jamánomo jɨruírede izoide ɨ́aɨfueredɨngo duere fɨnóinana omo ácataitɨcue. Afengo monáillajillaɨmo ite. Afe bie izói daɨíacade aillo naɨraɨ afengo anamo itíaɨoɨ.  
\v 2 Bínɨe illaɨnɨ afengo dɨga aillo fɨénide ɨ́aɨfuiaɨ fɨnófɨrediaɨoɨ. Iemo bínɨe comɨnɨ afengo ɨ́aɨfuerenamona jɨfáifɨredɨno izói ɨáɨre jáidiaɨoɨ, —daɨde. 
\p  
\v 3 Afe mei Juzíñamui Ñuera Joreño nɨcáɨrilla izói cuemo ácataja llezica, daa Juzíñamui abɨ ímɨe táɨzicɨmo cue uite. Afénomo daa rɨngo jíaɨrede jacɨre eroide rɨlle emódomo ráɨinana cɨódɨcue. Afe rɨ́llemo dɨga Juzíñamui ɨáɨre daɨna uaillaɨ cúeina. Afe rɨlle siete dɨga ɨfócɨrede, daje izói afémɨe zicaɨ diez dɨ́gade.  
\v 4 Afe rɨngo jɨtáoigacuiro jíaɨrede, íemo morádona eroide. Afengo oro fɨnoina íena ebire fɨnóbide, íemo ráifide ñue fɨnoca nofɨ́cɨaɨna, íemo ‘perla’ daɨna zíriona fɨnóbide. Iemo afengo oro fɨnoina ichecoɨ llɨ́ide. Aféchecoɨ ɨáɨrede raana oruide, íemo jɨáɨ afengo jɨruírena llezica fɨnoca ɨ́aɨfuiaɨna oruide.  
\v 5 Afengo ozócɨmo cuetá jóonega ónonide mámecɨ illa. Afecɨ bie izói daɨde: “Aillue Babilonia jofue, nana fɨénidɨfuiaɨ jillacɨ, aféfuiaɨ ei daɨna izói mameide. Iemo nana bínɨemo ite éoigafuiaɨ ei daɨna izói mameide.”  
\v 6 Iemo dɨga Juzíñamuimo jaɨnáidɨno afe rɨngo ɨ́coɨnia fazɨ́caiaɨoɨ. Afémacɨ Jesús uai llócaina jira afengo tɨtácaiaɨoɨ. Iaɨoɨ fazɨ́canori afengo, come jɨfáifɨrena izói, ɨere ióbide. Afena cɨ́oillano ɨere jacɨre fáɨgacaidɨcue.  
\v 7 Ie jira Juzíñamui abɨ ímɨe cuena daɨde: 
\p —¿Mɨnɨ́cari jacɨ́naitɨo? Afe rɨngo ónonino daɨíacanafue jino omo onótaitɨcue. Daje izói afengo uífɨrede jacɨ́rede rɨlle maméinafuena omo onótaitɨcue. Afe rɨlle ɨfo siete dɨ́gade, íemo diez dɨga zícaɨrede.  
\v 8 Afe o cɨona jacɨ́rede rɨlle jaiai nɨno itɨ́mɨe, mei íadɨ ie tɨ́illa mei jae iñede. Mei íadɨ afémɨe íiraɨcaiño ie tɨ́ille uícodo meine abɨdo fɨénide jóriaɨ ɨbáirafomona caifo biite. Mei íadɨ billano zíiñona ie duere fɨnóllɨnomo orelle. Enɨemo ite comɨ́nɨmona zíiñona ille rabénicomo énɨe taɨneina llezica mámecɨna cúeñegano, afe rɨ́llena cɨ́oillano ɨere jacɨ́naificaitiaɨoɨ, mei afémɨe jaiai íteza, íemo birui jae iñédeza, íemo meine abɨdo uire bíiteza. 
\p  
\v 9 Birui caɨ uaina féiruiñedɨnomo naɨ benó jɨáɨe llollɨ́fuena ite: Cácarei. Afe siete dɨ́gade ɨfócɨaɨ baie rɨngo ráɨina siete dɨ́gade caifóneduaɨ jana.  
\v 10 Iemo afe llezica afe siete dɨ́gade ɨfocɨ daje izói siete dɨ́gade illaɨnɨ jana. Afe siete dɨ́gade illáɨnɨmona cinco dɨga ja dotácaiaɨoɨ. Afe mena fɨébidemona daa naɨ illáɨmana ite. Iemo jɨáɨmɨe naɨ illáɨmaizaɨbiñede. Afémacɨmona íiraɨllaɨma bíadɨ are iñeno táɨnocaite.  
\v 11 Naui caade íocɨrede rɨlle, tɨ́ide íadɨ, nane birui caade illaɨma. Afémɨe siete dɨ́gademona afémacɨ emódoidɨllaɨma. Mei íadɨ afémɨe siete dɨ́gademona dáamɨe. Afe mei afémɨe íiraɨcaiño ie tɨ́illɨnomo jáite. 
\p  
\v 12 Afe o cɨona diez dɨ́gade zicaɨ, diez dɨ́gade naɨ illáɨnɨna jáiñedɨno jana. Mei íadɨ jacɨ́rede rɨlle dɨga dáaruido afémacɨ nano íanori dɨeze illaɨnɨ ocuífɨrena rɨ́ino llɨ́ɨnoitiaɨoɨ.  
\v 13 Bie diez dɨ́gade illaɨnɨ conímamo daje izói comécɨidiaɨoɨ. Iemo íaɨoɨmo ite ocuille rɨ́ino jacɨ́rede rɨ́llemo fécaitiaɨoɨ.  
\v 14 Iemona Cordero daɨna Jesucristo dɨga fúiritiaɨoɨ; mei íadɨ Cordero íaɨoɨna anáfenoite. Mei afémɨe nana ocuídɨnomona Jamánomo Ocuídɨmɨeza. Daje izói afémɨe nana illáɨnɨmona Jamánomoidɨllaɨmaza. Afémɨe dɨga jáicadɨno Juzíñamui nɨzeda jɨ́ɨrigano. Daje izói afémacɨ fáɨcanocaiñeno Juzíñamuimo ñue ɨ́ɨnofɨredɨno, —daɨí afémɨe cuena daɨde. 
\p  
\v 15 Juzíñamui abɨ ímɨe nane dáanomo cuena daɨde: 
\p —O cɨona monáillajillaɨ, nɨɨ afe ɨ́aɨfueredɨngo illano, afe monáillajillaɨ aillo jófuenɨaɨ jana. Daje izói aillo comɨnɨ jana, íemo jɨáɨforie úritɨno jana, íemo aillo náɨraɨaɨ jana.  
\v 16 Jacɨre eroide rɨ́llemo o cɨona zícaɨnɨaɨ jɨáɨe illáɨmaɨaɨ jana. Afémacɨ bie jɨruíredɨngona éoitiaɨoɨ. Eoillano aféngona zóofeitiaɨoɨ, íemo jɨáɨ aféngona emuírogɨ óreitiaɨoɨ. Afe mei afengo ɨ́eizɨna rɨ́itiaɨoɨ. Iemo jɨáɨ aféngona iraimo cóonaitaitiaɨoɨ.  
\v 17 Juzíñamui comecɨ jítaina izói afe rɨngona duere íaɨoɨ fɨnóllena ónonino íaɨoɨ comécɨmo úrite. Ie jira dájena comécɨidiaɨoɨ íaɨoɨmo ite jacɨre ocuille rɨ́ino jacɨ́rede rɨ́llemo fecállena. Iemona afémɨe jamánomo rɨ́irede. Daɨí Juzíñamui daɨna uáillaɨna fuillɨ́ruimo dúcɨa llezica fɨnófɨrediaɨoɨ. Iemona afémɨe daɨna uaina ñue ɨ́coɨmo záitatiaɨoɨ.  
\v 18 Afe naui o cɨona jɨruíredɨngo, nana énɨe jamánomo ocuífɨredɨllaɨma illágobe jana, —aquíe izói daɨde. 
\c 18  
\s1 Babilonia jofue táɨnoicailla 
\p  
\v 1 Bie méifodo monámona jɨáɨe ángel daɨnámɨe, Juzíñamui abɨ ímɨe ana bíllana cɨódɨcue. Afémɨe aillo rɨ́ino dɨga bite. Afe llezica ie quenire bóodedo bínɨe egáiñote.  
\v 2 Afe llezica afémɨe fɨcɨre úrite; daɨde: 
\p —Aillue Babilonia jofue ja jáɨcoɨzite, ja táɨnocaide. Taɨfe ocuífɨregano illánona jaide. Daje izói nana jɨáɨforiede ɨáɨrede jóriaɨ uíñoracona jaide. Afe izói nana ɨáɨre féedɨno jɨlláɨllɨnona jaide, naa jɨáɨ caɨ éoiga féedɨnuiaɨri.  
\v 3 Mei aillo fɨénide ɨ́aɨfuiaɨ afengo fɨnófɨrenado, nana naɨraɨ jɨfáidɨno izói itíaɨoɨza. Iemo naga énɨe illaɨnɨ afengo dɨga aillo jɨruifue izoide ɨ́aɨfuiaɨna fɨnófɨrediaɨoɨ. Bínɨemo ráanɨaɨ fecáfɨredɨno ɨere úcuberedɨnona jáidiaɨoɨ. Mei uafue, afe áillue jofue comɨnɨ izire jɨcaca táɨnomo faɨtátate ráanɨaɨ íaɨoɨ jɨcáfɨrenamona bimacɨ aillo úcubenaidiaɨoɨ. 
\p  
\v 4 Afe mei monámona jɨáɨe uaina cacádɨcue; daɨde: 
\p —Omoɨ cúeɨedɨomoɨza bie jófuemona oni omoɨ jai; íaɨoɨ fɨnoca fɨénidɨfue afémacɨ fɨ́nua izói omoɨ fɨ́noñeilleza. Daje izói íaɨoɨmo zúite jacɨ́redɨfuiaɨ ómoɨmo jíiriñelleza.  
\v 5 Mei afémacɨmo ite fɨénidɨfuiaɨ ofilla ja monamo dúcɨdeza. Iaɨoɨ fɨnoca fɨénidɨfuiaɨmo Juzíñamui ja uíbicaideza.  
\v 6 Iemo Juzíñamuina daɨde: 
\p —Jɨáɨmacɨmo íaɨoɨ feca izói, afe izói íaɨoɨmo fecari. Iaɨoɨ fɨeni fɨ́nua izói, afe baɨmo ménacaiño afémacɨmo fɨnori. Afémacɨ ñúemacɨmo erɨ́redena jóoneta jirota izói duere íaɨoɨna fɨnódiaɨoɨ. Afe íaɨoɨ fɨ́nua izói, afe ɨbana ménacaiño afémacɨmo rɨire duere íaɨoɨna fɨnori.  
\v 7 Aillo táɨnodo abɨ íaɨoɨ ɨ́ɨnua dɨeze, íemo cómena canóñedemo fáɨfifɨrena dɨeze, áfeze afémacɨna duere fɨnori; afe izói íaɨoɨna duere zefuítari. Mei bie rɨngo izoide jofue comɨnɨ afengo ie comécɨdo daɨífɨredeza: “Benomo illáɨngona ráɨidɨcue. Jaca fécɨnaiñeitɨcue; jaca dúenitɨcue,” —afengo daɨde.  
\v 8 Ie jira bie izói úrillamona, dáaruido omo dúide jacɨ́redɨfuiaɨ cómuite: tɨ́illa íemo duere zefuilla, íemo júbie. Iemo iraimo cóonaitɨo. Mei o duere fɨnótate Juzíñamui jamánomo rɨ́inoredeza. Afémɨe jaca caɨ Ocuíraɨma. 
\p  
\v 9 Afengo dɨga jɨruírede bínɨe illáɨcomɨnɨ, daje izói afengo dɨga cómena canóñedemo fáɨfidɨno aféngori ɨere éenaitiaɨoɨ. Mei uafue, afengo cóonailla uíllɨena cɨóillamona aféngori cáillɨcaillɨ éeitiaɨoɨ.  
\v 10 Afengo ɨere duere fɨnóinari jacɨ́naillamona oni jɨca íitiaɨoɨ. Afemona dáɨitiaɨoɨ: 
\p —¡Aɨɨ, nɨɨ o dúerena! Jamánomo rɨ́irede Babilonia jófuedɨo, ¡nɨɨ duere o zefuilla! ¡Mei raɨre dáaruido o duere fɨnoina comuíbicaide! —dáɨitiaɨoɨ. 
\p  
\v 11 Bínɨe ráanɨaɨ fecáfɨredɨno aféngori cáillɨcaillɨ éenaitiaɨoɨ, mei ja íaɨoɨ atɨca ráaɨe ɨ́baitɨno iñede.  
\v 12 Iaɨoɨ atɨ́fɨrega ráanɨaɨ, be nɨɨe: Oro, plata, ráifide nofɨ́cɨaɨ, ‘perla’ daɨna ráifide zírio, ráifide úzecuiro, íemo jíaɨrede ‘sédacuiro,’ morádona eroide seda dɨga, íemo jɨáɨ dɨga jɨáɨfodo zióriede aménaɨaɨ, íemo ebírede ‘marfil’ daɨna elefante zicaɨ fɨnoina ráifide raana, íemo ráifide amena fɨnoina raa, íemo ‘bronce’ daɨna borárede lloébɨcɨ fɨnoina raa, íemo jamai lloébɨcɨ fɨnoina raa, íemo ‘marmol’ daɨna nofɨcɨ fɨnoina raa,  
\v 13 daje izói ‘canela’ daɨna güíllemo faɨga raa, íemo jɨáɨforie ráifide ziórede raa, íemo ziórede ugucɨ, íemo ‘mira’ daɨna ziórede raa, íemo come abɨ jɨlláiranɨaɨ, íemo ‘vino’ daɨna jiróraji, íemo cáɨredɨji, íemo ñuera pan fɨnófɨrena harina, íemo trigo, íemo daje izói abɨ́fɨrede cáadɨno, íemo ovéjaɨaɨ, íemo cabálluaɨ, íemo ‘carros’ daɨna arɨ́nellaɨaɨ, daje izói jacɨre rairuica comɨ́nɨna fecádiaɨoɨ. Bie izói daɨna cáadɨno ɨima rɨngo dɨga jɨáɨmacɨmo fecádiaɨoɨ rɨire íaɨoɨ ocuíllena.  
\v 14 Afe jofue comɨ́nɨna dáɨitiaɨoɨ: 
\p —¡Baie omoɨ gaɨga caɨmárede amena llɨzíllanɨaɨ izoide ráaɨe jae iñede. Nana omoɨ ofítaga ebíriede ráanɨaɨ ja táɨnocaide! —dáɨitiaɨoɨ. 
\p  
\v 15 Afe ráanɨaɨ fécajano ɨba úcube ófɨredɨno bie áillue jofue comɨ́nɨmona otíaɨoɨ. Uano aillo úcuberediaɨoɨ. Mei íadɨ aféruido afe jofue ɨere duere fɨnóinari jacɨ́naillamona oni jɨca íitiaɨoɨ. Afénomona aféngori cáillɨcaillɨ éeitiaɨoɨ.  
\v 16 Iemo dáɨitiaɨoɨ: 
\p —¡Aɨɨ. Aillue jófuedɨo nɨɨ dúerena! Naui ñuera ráifide úzecuiro jɨtádɨngo izóidɨo. Daje izói o comɨnɨ jíaɨrede ráifide ɨniroi, íemo morádona eroide ráifide ɨniroi jɨtáfɨrediaɨoɨ. Afe llezica oro íena fɨnóritiaɨoɨ; daje izói ráifide nofɨcɨ fɨnoina raana fɨnóritiaɨoɨ, íemo jɨáɨ ‘perla’ daɨna zíriona jɨtáfɨrediaɨoɨ.  
\v 17 Iemo dáaruido naado aillo ráanɨaɨ nɨné táɨnocaide. 
\p Daje izói nana ‘barco’ daɨna áillue nocáe ocuídɨllaɨnɨ, naa afécaedo jáidɨno dɨga, áfena jacɨ́ruillano oni jɨ́carie itíaɨoɨ; daje izói afécaedo táɨjɨdɨnori naa jɨáɨfodo monáillajimo táɨjɨde comɨ́nɨri oni jɨ́carie itíaɨoɨ.  
\v 18 Iemo afe jofue bóua úillɨana cɨóillano caillɨ́diaɨoɨ: 
\p —Bie izoide naui áillue jófuena, ¿Nɨnomo cɨ́oitɨcaɨ? Bie izoide jofue jaca íñeite, —daɨdíaɨoɨ. 
\p  
\v 19 Ɨere zúucaillano íaɨoɨ ɨfomo énɨe júdaɨdiaɨoɨ. Daɨí ñiano cáillɨcaillɨ éediaɨoɨ. Daɨdíaɨoɨ: 
\p —¡Aɨɨ! ¡Aillue jofue nɨɨ dúerena! Nana monáillajido ráanɨaɨ fecáfɨredɨno afe ráanɨaɨ o comɨnɨ úamona afémacɨ aillo úcuberediaɨoɨ. ¡Mei íadɨ dáaruido afe áillue comɨnɨ jofue ja nɨné táɨnocailla! —daɨdíaɨoɨ. 
\p  
\v 20 Afe mei áfena cɨódɨmɨe daɨde: 
\p —Monamo itɨ́nuiaɨ, mai afe áillue jofue táɨnocaillari omoɨ ióbiri. Uáfueza, Jesucristo orécano, naa Juzíñamui dɨbénedo úritɨnori mai ióbiri, naa Juzíñamuimo jaɨnáidɨno dɨga. Mei Juzíñamui afengo nɨné táɨnocaitajado, omoɨ duere zefuítaja ñue jaɨ́cɨna ɨba ote, —daɨde. 
\p  
\v 21 Afe mei rɨírede Juzíñamui abɨ ímɨe áillue nofɨcɨ caifo raiñode. Afecɨ áillue ‘molina’ daɨna trigo llaira mérede nofɨcɨ fɨnoina eroide. Caifo ráiñuano afécɨna monáillajimo dotade. Dótajano daɨde: 
\p —Afe bie izói áillue Babilonia jofue ana cáicoɨzite, íemona jaca nɨnomo meine cɨ́oñeille.  
\v 22 Benómona jaca o cɨ́gɨdo joide iomo ‘arpa’ daɨna rua roia taiga raa rúanɨaɨna meine cácaiñeille. Daje izói totíbacui uai naa bainada uai dɨga ja meine cácaiñeille. Afe izói nana jɨáɨforie táɨjɨana baitádɨnomona buna fɨébiñena. Iemo daje izói dobérilla fɨcɨ́rena izói ‘molina’ daɨna nofɨcɨ uaina cácaiñeille.  
\v 23 Afe daje llezica o jófuiaɨ eromo bóofɨrede mechera izói boode ráanɨaɨ abɨdo bóoñeite. Iemo aféruimo áɨrena llezica ɨráɨzie caɨmare fɨ́cɨrerie íaɨoɨ úrilla uáillaɨna meine jaca cácaiñeille. Mei naui omo ite ráanɨaɨ fecáfɨredɨno bínɨe comɨ́nɨmona jamánomoidiaɨoɨ íadɨ, ja birui afe caɨmárede uaillaɨ cácaiñeille. Naui aféruimo aima bífuefɨrena uai izóidedo náɨraɨaɨna jɨ́fuefɨredɨo; mei íadɨ afe jɨ́fuefɨrena ona nabáiñede. 
\p  
\v 24 Mei uafue, afe o jofue cɨ́gɨmo Juzíñamui dɨbénedo úrifɨredɨno dɨ́ena cɨona. Daje izói Juzíñamuimo jaɨnáidɨno naa jɨáɨe bínɨemo fagano dɨ́ena afénomo cɨona. Afe cɨona dɨe, afe jofue comɨnɨ jɨáɨmacɨ tɨ́taja ɨ́coɨnia daɨí illa jana, —daɨde. 
\c 19  
\p  
\v 1 Afe bie méifomo monamo ite aillo comɨnɨ fɨcɨ́rede uáillaɨna cacádɨcue. Daɨdíaɨoɨ: 
\q1 ¡Aleluya! Caɨ jíllonano caɨ Juzíñamuimo dúide. 
\q1 Daje izói ɨere ebíredɨfue afémɨemo mamérede, íemo naa ñuera rɨ́ino dɨga. 
\q1  
\v 2 Mei afémɨe ñue jaɨ́cɨna ua uaido ɨere rɨire jɨcánofɨredeza. 
\q1 Afe ɨere jɨruíredɨngona afémɨe rɨire duere fɨnótateza. 
\q1 Afengo ɨere ie jɨruírenado énɨe comɨ́nɨna ɨáɨre fɨnode. 
\q1 Juzíñamuimo táɨjɨtagano tɨilla ɨba aféngomo oga, daɨdíaɨoɨ. 
\p  
\v 3 Nane dáanomo daɨdíaɨoɨ: 
\p —¡Aleluya! mei afengo jobailla uíllɨe jaca nɨnomo llɨ́ɨcaiñeno uillɨ́oite, —daɨdíaɨoɨ. 
\p  
\v 4 Afe llezica veinticuatro dɨ́gade éicomɨnɨ, íemo jɨáɨ cuatro dɨga cáadɨmɨiaɨ dɨga, ana énɨemo bɨ́jɨcaillano, Juzíñamuimo caɨmátaidiaɨoɨ. Illaɨma ráɨiranomo ráɨide Juzíñamuimo caɨmátaillano daɨdíaɨoɨ: 
\p —¡Daɨítadeza! ¡Aleluya! —daɨdíaɨoɨ. 
\p  
\v 5 Nane afe mei illaɨma ráɨiranomona jɨáɨe uaina cacádɨcue; aféuai daɨde: 
\p —Caɨ Juzíñamuimo nana afémɨe ocuícano afémɨemo ñúefuiaɨ omoɨ mameri. Daje izói íena caɨmare jacɨ́ruitɨno, illáɨcomɨnɨ naa jɨba comɨ́nɨri, ñúefuiaɨ afémɨemo jóonefɨreiri. 
\s1 Cordero daɨna Cristo áɨrena rafue 
\p  
\v 6 Nane daje izói aillo comɨnɨ uaillaɨ izóidena cacádɨcue. Afe uaillaɨ aillo imánillaɨ fɨcɨ́rena izói fɨcɨ́rede, íemo jɨáɨ afe uaillaɨ fɨcɨre mona gɨ́rɨa fɨcɨ́rena izói fɨcɨ́rede. Afe uaillaɨ daɨde: 
\q1 ¡Aleluya! Jamánomo rɨírede caɨ ocuide Juzíñamui nane meine como ócuite. 
\q1  
\v 7 Mai caɨ ióbillɨ; daje izói ɨere caɨmare caɨ illɨ. 
\q1 Afémɨemo ebíredɨfue caɨ mamellɨ. 
\q1 Mei Cordero áɨrena izóidɨruimo ja dúcɨdeza. 
\q1 Afémɨe aɨ izóidɨnona jáitɨno ja ñue fɨnóbidiaɨoɨ. Afémacɨ Crístomo ua ɨ́ɨnotɨmacɨ. 
\q1  
\v 8 Ráifide úzecuirona jɨtárediaɨoɨ. 
\q1 Mei uafue, ɨáɨnino queníredɨroi Juzíñamui afémacɨna jɨtátaga. 
\m Mei afe ñuera ráifide úzecuiro Juzíñamuimo jaɨnáidɨno comécɨna jaɨ́cɨna jóoina jánaza. 
\p  
\v 9 Iemo Juzíñamui abɨ ímɨe cuena daɨde: 
\p —Mai cúeiri: Cordero áɨrena ráfuemo uáidogano ja caɨmare itíaɨoɨ, —daɨde. 
\p Nane cuena daɨde: 
\p —Bíuai Juzíñamui lloga ua uai, —daɨde. 
\p  
\v 10 Iemona afe Juzíñamui abɨ ímɨemo cue caɨmátaillena ie anamo dújudɨcue. Mei íadɨ afémɨe cuena daɨde: 
\p —Cuemo daɨí iñeno, mei o izói cue Juzíñamui ocuícamɨedɨcueza. Jɨɨ, Jesús llócaiga ua uaimo féitañeno ɨ́ɨnote o ámatɨaɨ izóidɨcue. ¡Cuemo caɨmátaiñeno; Juzíñamuimo cáɨmatai! —daɨde. 
\p Mei afe Jesús llócaiga ua uai, Juzíñamui dɨbénedo lloga uaillaɨ jino llotɨno comecɨ úritade. 
\s1 Uzerede cabállomo ráɨicaidɨmɨe 
\p  
\v 11 Nane afe méifomo mona tuíñuana cɨódɨcue. Afénomo úzerede caballo cɨ́ocaide. Afe emódomo ráɨicaidɨmɨe mámecɨ “Fiel” íemo jɨáɨ “Verdadero” daɨnámɨe. Mei afémɨe ñue jaɨ́cɨna illáfuedo ocuídeza; daje izói áfedo fɨénidɨno dɨga fuirítateza.  
\v 12 Ie ui irai bóua izói quere cɨ́oide. Ie ɨfócɨmo dɨga illaɨma jɨtáracuifoɨ jɨtáoide. Daje izói afénomo dama ie onoiga mámecɨ cúeina.  
\v 13 Afémɨe jɨtácacuiro dɨ́emo mutácaroi. Afémɨe mámecɨ Juzíñamui Uai.  
\v 14 Afe llezica nana monamo ite Juzíñamui ocuica fuirídɨno afémɨe óodana jáidiaɨoɨ. Afémacɨ ráifide úzecuiro jɨtáoidiaɨoɨ. Aferoi jaca ɨáɨnide. Baie nana afémɨedo jáidɨno úzerede cabállomo ráɨicaidiaɨoɨ. 
\p  
\v 15 Afémacɨ ɨfódɨmɨe fuémona jáirede lloefai jino bite, áfedo nana naɨraɨ boféllena. Afe llezica afémɨe lloébɨcɨ izóidedo náɨraɨaɨna ócuite. Vino fɨnóacanomo úvaɨaɨ ɨduíllena rɨire záizɨa izói, afe izói afémɨe afémacɨmo ɨere rɨire jɨcánoite. Iemo jamánomo rɨ́inorede Juzíñamui rɨ́icaillamona cómuite ɨere duere fɨnóillɨfue, vino jirótaja izói afémacɨna duere fɨnótaiteza.  
\v 16 Ie ɨnícuiro emódomo jɨtácacuiromo cuega mámecɨ illa. Daje izói ie rɨáɨzimo cuega. Afecɨ daɨde: “Nana illáɨnɨmona Jamánomoidɨllaɨma,” íemo jɨáɨ “Nana Ocuídɨnomona Jamánomo Ocuídɨmɨe.” Afémɨe nɨɨ caɨ Ocuíraɨma Cristo. 
\p  
\v 17 Afe mei Juzíñamui abɨ ímɨe jitoma rɨire egáiñuanomo naidáinana cɨódɨcue. Afémɨe nana mona erodo féedɨnuiaɨ fɨcɨre jɨ́ɨrite; daɨde: 
\p —Juzíñamui fɨnoca áillue güille nana dáanomo omoɨ rɨáɨbi,  
\v 18 mei benomo illaɨnɨ ɨ́eizɨ rɨ́itɨomoɨza, naa fuiríraɨnɨ illáɨcomɨnɨ ɨ́eizɨ dɨga. Dáanomo íocɨrede fuirífɨredɨno ɨ́eizɨ rɨ́itɨomoɨ, naa caballo ɨ́eizɨ dɨga. Daje izói afe emódodo ráɨicaidɨno ɨ́eizɨ rɨ́itɨomoɨ. Iemo nana fɨébidɨno ɨ́eizɨ rɨ́itɨomoɨ. Buna ráiruiñegano, daje izói jacɨre rairuícano, íemo jɨáɨ jamáimacɨ ɨ́eizɨ, naa jamánomoidɨmacɨ dɨga daje izói rɨ́itɨomoɨza, —daɨde. 
\p  
\v 19 Afe mei afe jacɨre eroide rɨ́llena cɨódɨcue naa bínɨe illáɨcomɨnɨ naa íaɨoɨ fuiríraɨnɨaɨ dɨga. Nana bimacɨ fuiríllena dáanomo ofídiaɨoɨ. Afémacɨ afe úzerede cabállomo ráɨicaidɨmɨe dɨga fuirízaɨbitiaɨoɨ. Afémɨe “Juzíñamui Uai” daɨnámɨe. Daje izói afémɨe canode fuiríraɨnɨ dɨga fuiríllena maméritiaɨoɨ.  
\v 20 Afe mei afe jacɨ́rede rɨlle, taɨno uai jino llócaidɨmɨe dɨga ja llaveca. Afe taɨno uai jino llotɨ́mɨe, jacɨ́rede rɨlle eróicana, jacɨ́naitade cɨóraɨnina raa cɨótate. Aféfuiaɨdo afe taɨno uai jino llotɨ́mɨe, nana afe jacɨ́rede rɨlle mámecɨna cuetátaganona jɨ́fuete. Daje izói afe jacɨ́rede rɨlle jánaraɨmo caɨmátaidɨnona afémɨe jɨ́fuete. Iemona ‘monstruo’ daɨna jacɨre eroide rɨlle, daje izói taɨno uai jino llotɨ́mɨe, cáanori dáanomo duere fɨnolle jorai izoide bóodɨimo dotácaiaillɨnoɨ. Afe jorai izoide duere fɨnóllɨno ɨere uzire boode.  
\v 21 Nana áfemona fɨébidɨno úzerede cabállomo ráɨicaidɨmɨe fuémona bite lloéfaido tɨtácaiaɨoɨ. Iemona nana féedɨnuiaɨ bie tɨtácano rɨáɨbillano íaɨoɨ ɨ́eizɨri jéɨrediaɨoɨ. 
\c 20  
\s1 Mil dɨga fɨmona dɨno comɨnɨ caɨmare íitiaɨoɨ 
\p  
\v 1 Bifue méifomo ángel daɨnámɨe Juzíñamui abɨ ímɨe monámona ana bíllana cɨódɨcue. Afémɨe afe fɨénide jóriaɨ ɨbáirafo zuitara llave naa áillue llójeo dɨga llɨ́icabite.  
\v 2 Afe bie Juzíñamui abɨ ímɨe ‘dragón’ daɨna jáiaira áillue jaio lláɨtano anáfenode. Afe jaio jɨáɨfodo mameina Taɨfe, dáamɨe Satanás. Anáfenuano afémɨena mil dɨga fɨmona llaveca.  
\v 3 Ana fɨénide jóriaɨ ɨbáirafomo óriano íena llavede. Lláviano afe nazemo ‘sello’ daɨna “buna zuitánide” daɨde raa jóonete. Daɨí fɨnoca náɨraɨaɨna mil dɨga fɨmona dɨnori jɨ́fueñeillena. Afe mil dɨga fɨmona jaille méifomo, afémɨe nano íanori zuitalle. 
\p  
\v 4 Afe mei illaɨnɨ ráɨiranuaɨna cɨódɨcue. Afénomo ráɨiedɨno ɨere rɨire jɨcánolle rɨ́inona igáiaɨoɨ. Afe dáaruido ɨfócɨaɨna jáicoɨcano comécɨaɨna cɨódɨcue. Afémacɨ Jesús jaɨ́cɨna lloga Juzíñamui uai íaɨoɨ llócailla ɨ́coɨnia ɨfócɨna jaitácaiaɨoɨ. Afémacɨ afe jacɨre eroide rɨ́llemo caɨmátaiñediaɨoɨ; daje izói afe jánaraɨmo caɨmátaiñediaɨoɨ. Daje izói afémacɨ ozócɨmo ie mámecɨ cuetátañediaɨoɨ, íemo daje izói íaɨoɨ ónoɨmo. Afémacɨ abɨ meine abɨdo cáaillano mil fɨmona dɨno Cristo dɨga illáɨmaitiaɨoɨ.  
\v 5 Afe bie meine abɨdo cáadɨno, nanóidɨno meine cáaillɨruimo abɨdo cáaitiaɨoɨ, jae caɨ daɨna Cristo dɨga illáɨmaillena. (Mei íadɨ jɨáɨe tɨ́idɨno mil dɨga fɨmona záiñena dɨno meine abɨdo cáaiñeitiaɨoɨ.)  
\v 6 Nana afe nanoide cáaillɨruimo meine abɨdo cáaitɨno caɨmare itíaɨoɨ. Daje izói afémacɨ Juzíñamui ñue fɨnócano. Afe meífoide tɨille afémacɨmo jaca jíriñeite. Mei íadɨ afémacɨ comɨ́nɨdo Juzíñamuimo úrifɨreitɨnona íitiaɨoɨ; daje izói Cristo íeɨena zíiñona íitiaɨoɨ. Iemona mil fɨmona dɨno afe Cristo dɨga illáɨmaitiaɨoɨ. 
\p  
\v 7 Afe mil dɨga fɨmona záilla méifomo, Taɨfe ie llavéinafomona zuitalle.  
\v 8 Jáillano nana énɨe náɨraɨaɨna jɨ́fueite. Aféruido “Gogna” mámecɨrede náɨraɨna jɨ́fuiaite, “Magog” daɨna náɨraɨna dɨga. Afe náɨraɨaɨ fúiritɨnuiaɨna Taɨfe dáanomo jofo óite, íiraɨcaiño fuiríllena. Afémacɨ monáillajimo ite guamaɨ dɨ́gadeza facádonidiaɨoɨ.  
\v 9 Afemona énɨe nánɨena afémacɨ ɨere oruíbicaite. Iemona Juzíñamuimo jaɨnáidɨno illánona nágafene fállena cɨrɨ́notiaɨoɨ. Afe illano Juzíñamui izíruiga Jerusalén daɨna jofue; áfena cɨrɨ́notiaɨoɨ. Mei íadɨ Juzíñamui monámona irai afémacɨmo orede. Afe iraido fɨébiñeno cóonaitiaɨoɨ.  
\v 10 Afe llezica afémacɨ jɨ́fueoicaide Taɨfe boode jóraimo dotaca. Afe jorai ɨere uzire boode. Afe dáanomo jacɨre eroide rɨlle, íemo jɨáɨ taɨno uai jino llócaidɨmɨe naui dotaca. Afénomo mona naɨo dɨga jaca nɨnomo zíiñona ɨere duere fɨnócaiaɨoɨ. 
\s1 Aillue úzerede ráɨirano illaɨma ie, íemo afe uícomo ɨere rɨire jɨcánollɨno cɨoina 
\p  
\v 11 Afe méifodo áillue úzerede ráɨirano illaɨma íena cɨódɨcue. Iemo afénomo ráɨidɨmɨena cɨódɨcue. Afémɨe uícomona nana énɨe mona dɨga nɨné cɨóbicaiñena. Afe mona énɨe dɨga illɨno jae iñede; jae nɨné táɨnocaidiaɨoɨ.  
\v 12 Daje llezica Juzíñamui uícomo naui Juzíñamuimo ɨ́ɨnoñeno tɨ́idɨno naidáienana cɨódɨcue. Afeno jamánomoidɨnori naa jamáimacɨri dáanomo naidáiediaɨoɨ. Afe llezica comɨnɨ fɨnócafuiaɨ cuiánicuaɨ túide. Daje izói afénomo jɨáɨe zíiñona íitɨno mámecɨ cuiánico túide. Bie tɨ́idɨno íaɨoɨ fɨnócafuiaɨ íllaze rɨire jɨcánogaiaɨoɨ, mei afe íaɨoɨ fɨnócafuiaɨ cuiánicomo cúeina dɨeze rɨire jɨcánogaiaɨoɨ.  
\v 13 Afe llezica monáillajimo báɨide tɨ́idɨno meine abɨdo Juzíñamui uícomo caifo náidacaitagaiaɨoɨ. Daje izói nana jɨáɨforie tɨ́idɨnuiaɨ íaɨoɨ tɨ́illanomona meine abɨdo Juzíñamui uícomo caifo náidacaitagaiaɨoɨ. Afe nana náidacaitagano íaɨoɨ fɨnócafuiaɨ íllaze afémacɨmo rɨire jɨcánogaiaɨoɨ.  
\v 14 Afe mei ‘muerte’ daɨna comɨnɨ tɨíllafue boode jóraimo dotaca, ie mei nɨné táɨnocaide. Daje izói dáanomo naui tɨ́idɨno ɨbáinaco afénomo dotaca. Dotaca mei nɨné táɨnocaide. Afe bie boode jorai, íiraɨe tɨ́illana mameide.  
\v 15 Iemo afe zíiñona itɨno mámecɨ cuiánicomo mámecɨna cúeñegano afe boode jóraimo dotácaiaɨoɨ. 
\c 21  
\s1 Comue mona comue énɨe dɨga 
\p  
\v 1 Afe méifodo comue mona, comue énɨe dɨga cɨódɨcue. Mei nanoide mona nanoide énɨe dɨga ja nɨné cɨóbicaiñenaza. Daje llezica monaillai jae iñede.  
\v 2 Afe llezica comue Jerusalén daɨna ɨ́aɨfuenide jofue, Juzíñamui uícomona monámona ana bíllana cɨódɨcue. Afena cɨódɨmɨedɨcue, Júaadɨcue. Afe jofue, óllena jɨcánoga rɨngo ebire fɨnóbina izói ebire cɨ́oide.  
\v 3 Iemo monámona fɨcɨre dáɨnana cacádɨcue. Afe uai daɨde: 
\p —Ero, comɨnɨ cɨ́gɨri birui Juzíñamui illa. Afémacɨ dɨga ífɨreite, íemo afémacɨ afémɨe comɨ́nɨna íitiaɨoɨ. Ja birui dama afémɨe afémacɨ cɨ́gɨri íite, afémacɨ Juzíñamuina ie íllena.  
\v 4 Juzíñamui afémacɨ ui jémena zafénaitaite. Aféruimo tɨ́ille íñeite. Daje izói eia íñeite, íemo jɨáɨ duere zefuíllamona eia íñeite. Daje izói comɨnɨ abɨ izírena íñeite, mei jaiai itɨ́fuiaɨ jae záaideza. 
\p  
\v 5 Iemo illaɨma ráɨiranomo ráɨidɨmɨe cuena daɨde: 
\p —Ero. Nana cómuena méidotɨcue. 
\m Iemo nane daɨde: 
\p —Bie uai ɨere ua uaiza, mai cúeiri. Daje izói bie uai ɨere ɨ́ɨnofɨregaza, —daɨde. 
\p  
\v 6 Nane afe mei cuena daɨde: 
\p —Ja ñue ɨ́coɨmo fɨnócaza. Cue bie naga ráfuiaɨna naɨ cómuiñenia uícodo itɨ́mɨedɨcue. Daje izói dáamɨedɨcue fuillɨ́nomo itɨ́mɨedɨcue. Abecedario A-mona táɨnia izóidɨmɨedɨcue. Daje izói abecedario Z-mo fuizajilla izóidɨmɨedɨcue. Jáɨnoina jiróacadɨmɨe ñúejina jirótaja izói, afe izói ñúefuiaɨ dɨbénemo íacadɨmɨemo raiñóñeno afémɨemo zíiñona illáfuena ífɨreitɨcue.  
\v 7 Fɨénidena anáfenodɨmɨe nana bíena fecɨ raa fia máiñua izói, máiñoite. Afe llezica afémɨe Juzíñamuitɨcue, íemo daje llezica afémɨe cue jitóite. 
\p  
\v 8 Mei íadɨ nana ɨ́ɨnoñedɨno dɨbéfodo duere zefuille afémacɨmo dúide. Uáfueza, ñúefuena jacɨ́ruitɨno daje izói ɨ́ɨnoñedɨno, íemo jɨáɨmana éoidɨno, íemo jɨáɨmana tɨtádɨno, íemo jɨáɨ jɨruífuena fɨnófɨredɨno, íemo jɨáɨma fue gáɨana fɨbídɨno, íemo jɨáɨ jánaraɨmo caɨmátaidɨno, íemo nana táɨnona úritɨno; nana bie izóidɨno boode jóraimo dotárediaɨoɨ. Afe jorai ɨere uzire boode. Afe bie boode jorai íiraɨe tɨ́illana mameide, mei afénomo dotácano jaca nɨnomo Juzíñamuimona oni eneno duere fɨnócanona íitiaɨoɨza. 
\s1 Comue Jerusalén 
\p  
\v 9 Afe mei siete dɨ́gade ángeles daɨnámacɨ Juzíñamui abɨ imácɨmona daa cuemo úrizaɨbite. Afémɨe naui Juzíñamui ocuica siete dɨ́gade íiraɨe jacɨ́rede duere fɨ́nuana oruide ichecoɨ uitɨ́mɨe. Afémɨe cuena daɨde: 
\p —Ero, Cordero aɨ izóidena jáitɨnona o ácataitɨcue, —daɨde. 
\p  
\v 10 Iemo Juzíñamui Ñuera Joreño bie izóidena nɨcaɨ anado cuena cɨ́otate. Afe Juzíñamui abɨ ímɨe áillue caifónedumo cue uite. Afénomo monámona Juzíñamui uícomona ana bite jamánomo ñuera Jerusalén jofue cuemo ácatate.  
\v 11 Juzíñamui abɨ ebire quenírena izói afe jofue quenírie cɨ́oide. Daje izói ɨere ráifide nofɨcɨ quenírena izói queníriede. ‘Jaspe’ daɨna nofɨcɨ vidrio enéfecomo cɨ́oina izói cɨ́oide.  
\v 12 Afe jofue jinófenedo nágafene áillue cɨrɨ́nuabairo raa ite. Afe cɨrɨ́nogamo doce dɨ́gaze naze ite. Iemo illa dɨga nazemo Juzíñamui abɨ ímɨe naidaina. Iemo afe náziaɨmo doce dɨ́gade Israel naɨraɨ mámecɨaɨ cúeina.  
\v 13 Afe jofue náziaɨmona, fuirɨ́fenemo dazeámani ite. Iemo jɨáɨe dazeámani onífenemo ite; íemo jɨáɨe dazeámani féɨfenemo ite; íemo jɨáɨe dazeámani afáifenemo ite.  
\v 14 Afe jofue jinófene cɨrɨ́nua anamo nofɨcɨ fɨnoina mozíoidɨbani doce dɨ́gade. Illa dɨ́gabanimo Cordero nágagobiaɨmo orécano ‘apóstoles’ daɨnámacɨ mámecɨaɨ cúeina. 
\p  
\v 15 Afe cue dɨga úrite Juzíñamui abɨ ímɨe, oro fɨnoina facáradozi llɨ́ide, afe jofue facállena. Daje izói ie náziaɨ facállena, íemo jɨáɨ afe jinófene cɨrɨ́nua facállena.  
\v 16 Afe jofue fueda nagaámariede; nágafene daje dɨnóriede. Ie árera dɨbene daje dɨnóriede; íemo ie ruica dɨbene daje dɨnóriede. Afe Juzíñamui abɨ ímɨe ie llɨ́iga radózido jofue facade. Facádemo dos mil doscientos kilómetros árera. Daje izói ruica dɨné eróicana dos mil doscientos kilómetros. Iemo caifo dɨné eróicana jɨáɨ daje izói dos mil doscientos kilómetros. Nágafeniaɨ daje dɨnóriede.  
\v 17 Afe mei jinófene cɨrɨ́nuabani facade. Facádemo sesenta y cuatro metros caifo ite. Afena Juzíñamui abɨ ímɨe come facáfɨrena izói facade. 
\p  
\v 18 Afe jinófene cɨrɨ́nuabani ‘jaspe’ daɨna nofɨcɨ fɨnoina. Afe jofue ɨáɨnide oro niina. Ñue enéfecomo cɨ́oide vídriona eroide.  
\v 19 Jinófene cɨrɨ́nua anamo mozíoidɨbanillaɨ nana jɨáɨforiede ráifide nofɨ́cɨaɨdo ebire ñue fɨnoca. Nanóidɨbani ‘jaspe’ daɨna nofɨ́cɨdo ebire ñue fɨnoca, íemo jɨáɨbani ‘zafiro’ daɨna nofɨ́cɨdo ebire ñue fɨnoca, íemo jɨáɨbani ‘ágata’ daɨna nofɨ́cɨdo ebire ñue fɨnoca, íemo jɨáɨbani ‘esmeralda’ daɨna nofɨ́cɨdo ebire ñue fɨnoca,  
\v 20 íemo jɨáɨbani ‘ónice’ daɨna nofɨ́cɨdo ebire ñue fɨnoca, íemo jɨáɨbani ‘cornalina’ daɨna nofɨ́cɨdo ebire ñue fɨnoca, íemo jɨáɨbani ‘crisólito’ daɨna nofɨ́cɨdo ebire ñue fɨnoca, íemo jɨáɨbani ‘berilo’ daɨna nofɨ́cɨdo ebire ñue fɨnoca, íemo jɨáɨbani ‘topacio’ daɨna nofɨ́cɨdo ebire ñue fɨnoca, íemo jɨáɨbani ‘crisoprasa’ daɨna nofɨ́cɨdo ebire ñue fɨnoca, íemo jɨáɨbani ‘jacinto’ daɨna nofɨ́cɨdo ebire ñue fɨnoca, íemo jɨáɨbani ‘amatista’ daɨna nofɨ́cɨdo ebire ñue fɨnoca.  
\v 21 Afe doce dɨ́gade naze ɨbáirabɨcɨ áillue perla. Illa dɨ́gaze daa perla ie fɨnoina. Afe jofue cɨ́gɨdo joide áillue macárao ɨáɨnide oro fɨnoina. Afe macárao enéfeomo ñue cɨoide vídriona eroide. 
\p  
\v 22 Afe jofue eromo Juzíñamuimo gaɨríraco jaca nɨnó daa cɨ́oñedɨcue; mei jamánomo rɨ́inorede Juzíñamuimo ebena nágafeniaɨmo caɨmátaidiaɨoɨza. Afémɨena jɨáɨfodo daɨna caɨ Ocuíraɨma. (Afe jofue gaɨríraco Juzíñamui abɨza. Daje izói jɨáɨ Cordero abɨza.)  
\v 23 Afe jofue jitómado egáiñuamo dúiñede; daje izói fɨuido egáiñonide. Mei afe jofue Juzíñamui abɨmo ite ebírede quenírededo egáiñogaza. Daje izói jɨáɨ Juzíñamui Cordero afe jofue egáiñogaza.  
\v 24 Nana jíllotaga naɨraɨ afe jofue egáñuado mácaitiaɨoɨ. Bínɨe naɨraɨ illaɨnɨ afe jófuemo íaɨoɨmo ite aillo ebíriede illaɨma daɨíllena ráanɨaɨna átɨitiaɨoɨ. Atɨano Juzíñamuimo, íemo jɨáɨ Crístomo izájitiaɨoɨ. Daje llezica afe jofue ocuídɨmɨe íaillɨnoɨmo aillo ñúefuena mámeitiaɨoɨ.  
\v 25 Afe jofue naze jaca monari ɨ́baiñelle. Iemo afénomo jaca mona náuiñeite. Jira náziaɨ ɨbáillɨrui íñeite.  
\v 26 Enɨe náɨraɨaɨ íaɨoɨmo ite ebíriede ráanɨaɨna afénomo átɨitiaɨoɨ. Daje izói afénomo aillo ñúefuiaɨ mámeitiaɨoɨ.  
\v 27 Mei íadɨ comécɨna ɨáɨredɨno jaca afénomo jofo jáinide. Daje izói comécɨna éoidɨno dɨnomo jofo jáinide, naa taɨno llotɨ́nori. Dama zíiñona íitɨno mámecɨ cueránicomo mámecɨna cuegámacɨ danɨ afénomo jofo jaille. Afénico Cordero daɨna Jesucrístomo ite. 
\c 22  
\p  
\v 1 Afe mei Juzíñamui abɨ ímɨe ɨáɨnide imánina cue ácatate. Afémani jaɨnoi cómena zíiñona cáatate. Afeji vidrio enéfenemo uáfori cɨoina izói cɨ́oide. Afe imani Juzíñamui illáɨmana ráɨiranomona tote. Afe ráɨirano daje izói Cordero ie.  
\v 2 Afe jofue cɨ́gɨdo áillue macárao illa. Afe macárao dáafenedo comɨ́nɨna zíiñona cáatate aménaɨaɨ riina. Daje izói afénomo ite imani fuédado nágafene daje ie aménaɨaɨ riina. Afe aménaɨaɨ illa dɨga fɨui llɨzífɨrede. Iemo jɨáɨ afe aménaɨaɨ íbiaɨ naɨraɨ ñue manóllena ite.  
\v 3 Aféruillaɨdo afénomo faidórafuena jae íñeite. Juzíñamui illáɨmana ráɨirano afe jófuemo ite; daje izói Cordero ráɨirano afénomo ite. Ie ocuífɨregano daa afémɨemo caɨmátaitiaɨoɨ.  
\v 4 Afe llezica afémacɨ Juzíñamuimo, meáiruiñeno jofo conímamo éroitiaɨoɨ. Afémacɨ ozócɨmo afémɨe mámecɨ cúeina.  
\v 5 Afénomo mona jaca náuiñeite. Afénomo itɨno mechera izoide egáiñuana jítaiñeitiaɨoɨ. Daje izói jitoma egáiñuana jítaiñeitiaɨoɨ, mei caɨ Ocuide Juzíñamui íaɨoɨna egáioite. Iemo afémacɨ jaca nɨnomo zíiñona illáɨmaitiaɨoɨ. 
\s1 Jesucristo billɨrui ja áɨnozide 
\p  
\v 6 Afe méifomo Juzíñamui abɨ ímɨe nane cuena daɨde: 
\p —Bie uai ɨere ua uaiza. Daje izói bie uai ɨere ɨ́ɨnofɨregaza. Afe caɨ Ocuíraɨma naui Juzíñamui uai jino llóraɨnɨ comécɨmo úritɨmɨe. Afémɨe birui ie abɨ ímɨe orede, ie ocuícamacɨmo raɨre cómuitɨfuiaɨna onótallena, —daɨde. 
\p  
\v 7 Iemo Jesucristo daɨde: 
\p —¡Raɨre bitɨcue! Binícomo cuega Juzíñamui uáillaɨna jiéruitɨmɨe caɨmare ite, —daɨde. 
\p  
\v 8 Cue Juáadɨcue. Bífuiaɨna cacádɨcue, daje izói bífuiaɨna cɨódɨcue. Bífuiaɨna cacáillano, íemo daje izói cue cɨona méifomo, cuemo ácatate Juzíñamui abɨ ímɨe anamo dújudɨcue afémɨemo caɨmátaillena.  
\v 9 Mei íadɨ afémɨe cuena daɨde: 
\p —Jadíe izói cuemo iñeno. O izói Juzíñamui ocuícamɨedɨcue. Daje izói Juzíñamui dɨbénedo úrifɨrede o ámatɨaɨ izóidɨcue. Iemo jɨáɨ binícomo cuega uáillaɨna náfuetɨno izóidɨcue. Cuemo caɨmátaiñeno; dama Juzíñamuimo caɨmátaifɨreiri, —daɨde. 
\p  
\v 10 Nane dáanomo cuena daɨde: 
\p —Binícomo cuega Juzíñamui uaina báinino o comécɨmo jóoneñeno o iri. Mei bífuiaɨ ɨ́coɨmo ñue fuizájillɨrui ja áɨnozideza.  
\v 11 Naɨ bie fuiñena llezica, fɨénidɨmacɨ íaɨoɨ fɨnófɨrega fɨénidɨfuena dama íaɨoɨ fɨnócaza. Fia eroi, mei afe izói íaɨoɨ íllado jamánomo duere fɨnólliaɨoɨza. Daje izói comécɨna ɨáɨredɨno dama comécɨna ɨáɨreoicaideza. Fia eroi, mei áfedo duere fɨnólliaɨoɨza. Mei íadɨ ñue itɨno íaɨoɨ illa baɨmo ñue iri. Daje izói Juzíñamui íena ñue fɨnócamɨe fáɨcanocaiñeno afémɨe íena ífɨreiri, —daɨde. 
\p  
\v 12 Iemo Jesucristo daɨde: 
\p —Jɨɨ, raɨre bitɨcue. Illa dɨ́gamɨemo cue fecalle fia jɨrídoga izoide raa atɨ́dɨcue. Illa dɨ́gamɨemo afémɨe fɨnoca dɨeze fécaitɨcue.  
\v 13 Nanóidɨmɨedɨcue. Iemo jɨáɨ íiraɨmɨedɨcue. Daje izói naga ráfuiaɨ uícodo itɨ́mɨedɨcue. Daje izói fuizájillanomo itɨ́mɨedɨcue. Iemo jɨáɨ abecedario A-mona táɨnia izóidɨmɨedɨcue. Daje izói abecedario Z-mo fuizájilla izóidɨmɨedɨcue. 
\p  
\v 14 Iaɨoɨ ɨníroina jocófɨredɨno izói, comecɨ ifue ñuérana méidotɨno caɨmare itíaɨoɨ. Íemona cáatate amena llɨzíllana güírediaɨoɨ. Afe bie izói daɨíacade zíiñona íaɨoɨ íllena. Daje izói íaɨoɨ ɨniroi ñue jócuamona, afe jofue nazedo Juzíñamui illánomo jofo jáirediaɨoɨ.  
\v 15 Mei íadɨ comécɨna ɨáɨredɨno afénomo jofo jáinidiaɨoɨ. Iemo daje izói jɨáɨma fue gáɨana fɨbídɨno, íemo daje izói nana jɨáɨforiede jɨruifue fɨnódɨno, daje izói cómena méinetɨno, daje izói jánaraɨmo caɨmátaidɨno, daje izói jɨáɨe comɨ́nɨna ɨere jɨ́fuefɨredɨno, naa afe izoide fɨbídɨnori; nana bie izoide comɨnɨ afe jófuemo jofo jáinidiaɨoɨ; jáiñeno jino fɨébitiaɨoɨ. 
\p  
\v 16 Cue Jesúdɨcue. Juzíñamuimo ua jaɨnáidɨnomo nana bífuiaɨ jino llóllena cue abɨ ímɨe ja cue oreca. Jaiai illaɨma David comuilla moi ímɨedɨcue; daje izói afémɨemona jebuídɨno comuítagamɨedɨcue. Iemo ɨere egáiñote monáiracudu izóidɨmɨedɨcue, —daɨde. 
\p  
\v 17 Iemona Juzíñamui Ñuera Joreño daɨde: 
\p —Mai bi, —daɨde. 
\p Daje izói Cordero aɨ daɨna afémɨemo ua jaɨnáidɨno íena daɨde: 
\p —Mai bi, —daɨde. 
\p Daje izói bíuaillaɨna cacádɨno afémɨena: 
\p —Mai bi, —omoɨ daɨíri. 
\p Iemo Cristo daɨde: 
\p —Jiróacaitɨmɨe zíiñona cáataite jáɨnoina ɨbáñeno mai fia jíruaɨbiri. Afe bie izói daɨíacade zíiñona illáfuena óiacadɨmɨe mai cuemo bi; raiñóñeno omo fécaitɨcueza. 
\p  
\v 18 Nana binícomo cuega Juzíñamui uaimo cacáreidɨnona bie izói llétaitɨcueza, cacai: Dáamɨe bie ráfuena baɨmo zotáadɨ, Juzíñamui binícomo cuega jacɨ́rede duere fɨ́nuanɨaɨna afémɨemo jóoneite.  
\v 19 Daje izói binícomo cuega Juzíñamui uáimona dáamɨe daa uai oni óiadɨ, Juzíñamui afe zíiñona cáaitɨno mámecɨ cuiánicomo cuega afémɨe mámecɨna oni óite. Daje izói binícomo lloga nɨ́fuenide jófuemo Juzíñamui afémɨena jofo jáitañeite.  
\v 20 Bifue jino llotɨ́mɨe nane dáanomo llote: 
\p —Jɨɨ, raɨre bitɨcue, —daɨde. 
\p Afemona Juan daɨde: 
\p —Aquíe izóideza. ¡Caɨ Ocuíraɨma Jesús, mai bi! 
\p  
\v 21 Caɨ Ocuíraɨma Jesucristo nana ómoɨna ñue fɨ́noiteza. Daɨítadeza. Jae nɨɨe.