\id PHP - Huitoto Mɨnɨca NT -Colombia 2011 (DBL 2013) 
\h FILIPENSES 
\toc1 Filipo Comɨ́nɨmo San Pablo Orécabe 
\toc2 Filipenses 
\toc3 Fil 
\mt2 FILIPO COMƗ́NƗMO SAN PABLO ORÉCABE 
\mt2 La Carta del Apóstol San Pablo a los Filipenses 
\c 1  
\s1 Filípomo ite Jesumo ɨ́ɨnotɨnomo Pablo llavéracomona cuete 
\p  
\v 1 Cue Páblodɨcue. Cue nabai Timoteo dɨga bibe ómoɨmo cuetɨ́coco. Jesucristo táɨjɨtagamɨedɨcoco. Nana Filipo jófuemo ite Juzíñamuimo jaɨnaide ámatɨaɨmo cuetɨ́coco. Daa bibedo omoɨ cɨ́gɨri ite ocuídɨllaɨnɨmo, naa eneno mameca canódɨnomo, cuetɨ́coco. Cristo Jesumo nana dáaziena jaɨnáidɨomoɨ.  
\v 2 Caɨ Moo Juzíñamui ñue ézɨcɨgafuemo omoɨ iri, naa comecɨ caɨmare uái illafue dɨga. Daje izói caɨ Ocuíraɨma Jesucristo ézɨcɨgafue dɨbénemo omoɨ iri, omoɨ ie lloga comecɨ caɨmare uái illafue dɨga. 
\s1 Pablo Jesumo ɨ́ɨnotɨnori Juzíñamuimo comécɨdo úrite 
\p  
\v 3 Naga ómoɨmo cue úibicaifɨrenaruido, caɨ Moo Juzíñamuina: “Ɨere fɨgora” daɨífɨredɨcue.  
\v 4 Juzíñamuimo comécɨdo cue úriadɨ, jaca nana ómoɨri caɨmare jɨcáfɨredɨcue.  
\v 5 Mei fueñe taɨnéinaruimona ua biruimo Juzíñamui ñúefuedo dáafuemo naa ómoɨri táɨjɨfɨredɨcaɨza. Afena fɨgora daɨífɨredɨcue.  
\v 6 Juzíñamui naui omoɨ comécɨmo ñúefuena déitate. Afe ñúefuena déitallɨfue taɨnédɨmɨe ua Jesucristo billɨ́ruimo fáɨcanocaiñeno déitaoicaite. Afefue taɨno daɨínideza onódɨcue.  
\v 7 Mei ómoɨna ɨere izíruillano nana ómoɨri daɨí comecɨ cue fácafue ɨere jaɨ́cɨna jóide. Afe izói daje cuemo iga ézɨcɨgafue, jeire otɨ́omoɨ. Llavécamɨedɨcue íadɨ, omoɨ cúeoɨri jeire oga ézɨcɨgafue, ñúefue cue lluájillena canode. Iemona caɨ jílloillɨfuena comɨ́nɨmo uáfuena ñue fɨdɨ́tatɨcue. Daje izói bífuena ɨere nahífueza daɨítatɨcue. Afe izói bie ñúefuena uáitaacadɨno uiécomo daa bífuedo caɨ jílloillɨfuedo jaɨ́cɨna ñue úritɨcue.  
\v 8 Jesucristo ómoɨmo dúecaillano izíruilla izói, omoɨ cɨ́gɨri ɨere cue íacanana Juzíñamui ñue onode.  
\v 9 Juzíñamuimo comécɨdo cue úrillado ómoɨena jɨcádɨcue. Danɨ conímana aillo jamánomo izíruillana jɨcádɨcue. Daje izói nana ñue fɨbíllafue abɨna omoɨ onóillɨfue dɨga, jɨcáfɨredɨcue. Ua daɨí ómoɨena jɨcádɨcue, ñúefuiaɨ omoɨ nɨ́ziana omoɨ fɨbíllena.  
\v 10 Afe bifue jeire omoɨ óiadɨ, omoɨ comecɨ ifue ɨ́aɨnite. Daje izói Cristo billɨ́ruimo nɨ́fuenidɨnona íitɨomoɨ.  
\v 11 Daɨí Jesucristo omoɨ illáfuena mámeite. Ua ria llɨzilla jofo úaɨna izói, ómoɨna mámeite. Ua aillo ñue fɨnócafuiaɨ omoɨ illáfuemo Jesucristo mámeite. Afedo Juzíñamuimo ñúefue ebíredɨfue dɨga nítaitɨomoɨ. 
\s1 Cristo jítainafue cue fɨ́nuamona cue comecɨ ifue ráifide 
\p  
\v 12 Amatɨaɨ, omoɨ cácarei, cuemo zúidɨfuiaɨna omoɨ fɨdɨ́taitɨcue. Aféfuiaɨ Juzíñamui caɨ jíllotallɨuai jino llúana nahí uáfuena canode.  
\v 13 Benomo cue llavéinamona, nana nahíllaɨma jofo abɨ úiñoraɨnɨ, ñúefuedo cue llavéinana onódiaɨoɨ; ua Cristo ñúefue jeire cue úamona ja llavécamɨedɨcueza, áfena nana onódiaɨoɨ.  
\v 14 Llavécacuena íaɨoɨ cɨónamona, ja nana ɨ́ɨnote ámatɨaɨmona nabémacɨ ɨere náɨcaidiaɨoɨ, Juzíñamui uai jino llóllena. Ua meáiruiñeno uáfori jino llotíaɨoɨ. Daje izói cue llavéinamona caɨ Ocuíraɨmamo jamánomo ɨ́ɨnotiaɨoɨ. 
\p  
\v 15 Uáfuena dámɨerie cuemo úradoillano Crístodo úritiaɨoɨ. Afémacɨ énenoruillano cue baɨmo jamánomoidɨmɨena íacadiaɨoɨ; mei íadɨ jɨáɨmɨiaƗ comecɨ ñúefuedo jino llotíaɨoɨ.  
\v 16 Dáarie danɨ íaɨoɨ comecɨ óiacanafuiaɨdo Crístona jɨáɨfo úritiaɨoɨ. Cue llavébillafue baɨmo jamánomo raamo cuena jíiritaiacadiaɨoɨ.  
\v 17 Mei jɨáɨmacɨ cuena izíruillano Juzíñamui ñúefue jino llotíaɨoɨ, mei naɨ benó llavéracomo cue íllana onódiaɨoɨ. Ua Juzíñamui jílloillɨuai cue uáitañena jira llavécacueza onódiaɨoɨza.  
\v 18 Mei íadɨ ¿cúemona nɨ́bai? Dáarie jaɨ́cɨna Crístodo úritiaɨoɨ; jɨáɨmacɨ Crístodo jɨzíreoicana úritiaɨoɨ. Mei daje ábɨedo Crístodo íaɨoɨ úriadɨ, cuena jaca ióbitade. 
\p Afe cue ióbilla baɨmo jamánomo naɨ ióbioicaitɨcue.  
\v 19 Mei nana bífuiaɨmona nɨ́fuenino záitɨcueza onódɨcue. Ua cueri Juzíñamuimo comécɨdo omoɨ úrillado ñue jílloitɨcue. Daje izói Jesucristo Joreño cue cánuado ñue jino jáitɨcue.  
\v 20 Jesucrístodo meáiruiñeno cue úrillena cue comecɨ jítaillafue. Afe daje bífuemo ɨere ocuíridɨcue. Birui cue illáfuedo jɨáɨmacɨ Crístomo aillo ñúefue nitádiaɨoɨ. Afe bie nita baɨmo, naɨ jamánomo íaɨoɨ nitállena jitáidɨcue. Nɨbaɨ cáaitɨcue, nɨbaɨ tɨ́itɨcue dama mei áfena lloñédɨcue. Dama Jesucrístomo ñúefuiaɨna nita daɨdɨcue.  
\v 21 Naɨ tɨ́iñeno cue jáicaiadɨ, Cristo comecɨ jítainafue cue fɨ́nuana jamánomo naga raa baɨmo gáɨdɨcue. Iemona naɨ cue cáanafue ñuera; íemo jɨáɨ cue tɨille jamánomo baɨmo ñuera.  
\v 22 Mei íadɨ bie cue abɨdo naɨ cue caana llezica, caɨ Ocuíraɨma comecɨ jítainafue bínɨemo jino denóllena táɨjɨfɨreitɨcue. Meita bie mena cuemo itɨ́fuemona nɨfue nɨzeda óitɨcueza onóñedɨcue.  
\v 23 Naɨ feire jánaɨdeza, bie ménafuedemona nɨfue óitɨcue. Aféfuena ñue cue onoille féirede. Mei jɨáɨfodo caifo Cristo dɨné cue jáillena tɨ́iacadɨcue; bie izóidɨfue cúemona jamánomo ñuera.  
\v 24 Mei íadɨ jɨáɨe izói omoɨ cɨ́gɨdo bie caana abɨdo cue jáicallena, ómoɨena ɨere jitáirede.  
\v 25 Mei daa bífuena jaɨ́cɨna onódɨcue; omoɨ dɨga naɨ cue ícaillena ñue onódɨcue. Omoɨ dɨga cue íllena jitáirede, omoɨ ñue ɨ́ɨnogafue nágarui jeire omoɨ cue otátallena. Ua ómoɨri cue illa jitáirede, jae jeire omoɨ ua izói afe baɨmo jeire omoɨ óllena. Daje izói omoɨ ñue ɨ́ɨnogafuedo omoɨ ióbioicaillena, omoɨ cɨ́gɨri cue ícaillena naɨ jitáirede.  
\v 26 Mei daɨí nana omoɨ cɨ́gɨri íitɨcue. Afe uire cue bílledo Jesucrístona jamánomo aillo ióbitaitɨomoɨ. 
\p  
\v 27 Cristo ñúefuiaɨ úibicaillano, afe izói nágarui omoɨ illafue ñue jaɨ́cɨna jóoneri. Nɨbaɨ omoɨ cue éroizaiadɨ bifue jeire omoɨ úamona, omoɨ illa ñúefuena fɨdɨ́acadɨcue. Daje izói ómoɨmona jɨca itɨcue íadɨ, daje omoɨ illa ñúefuena onóiacadɨcue. Afe bie izoide ñúefuena fɨdɨ́acadɨcue: dáaziena caɨmare omoɨ jaɨnáillana onóiacadɨcue. Daje izói jílloillɨuaimona lloga ɨ́ɨnogauaimo izire omoɨ nɨ́cɨduana fɨdɨ́acadɨcue.  
\v 28 Daje izói omoɨ bacáuai ímɨiaɨna due omoɨ jácɨcaiñenana cuemo omoɨ lloiri, daɨdɨcue. Afe omoɨ jácɨcaiñenafue, nɨné íaɨoɨ táɨnocaillɨfuena uáfodo jino llotátate. Mei íadɨ daje llezica omoɨ jílloillɨfuena uáfodo jino llote. Bie omoɨ onóitainafue Juzíñamui dɨbénemona bite.  
\v 29 Mena rafue Juzíñamui ómoɨmo mamede. Nánorafue daɨde: 
\q1 Cristo uaina ɨere jeire óredɨomoɨza. 
\m Nane jɨáɨfue daɨde: 
\q1 Cristo ñúefue jeire omoɨ ua méifomo, afémɨe ɨ́coɨri duere zefuífɨredɨomoɨ. 
\m  
\v 30 Cue naa ómoɨri daje fuirilla izóidɨfuemo itɨcaɨ. Naui cue fuirídɨmɨe izói íllana cɨódɨomoɨ. Ja birui fuirídɨmɨe izói, naɨ cue jáicana ráfuena onódɨomoɨza. 
\c 2  
\s1 Cristo jamánomo uáitagamɨena jaide ie méifomo Juzíñamui jamánomo ñue ébifue íemo nitade 
\p  
\v 1 Ja birui Cristo ómoɨna náɨcaitarede. Afémɨe ómoɨna izíruillano, comecɨ zúurenamona omoɨ comécɨna cáɨmacaitarede. Ie Ñuera Joreño omoɨ dɨga ite. Conímana izíruillafue dúecaillafue dɨga afe dɨbénemo itɨ́omoɨ. Nana bífuiaɨna omoɨ onónamona, mai cue omoɨ ióbitari.  
\v 2 Ua caɨmare ñue omoɨ illɨ́fuedo cuena ióbitari. Afe izói daje izíruillafuemo omoɨ jaɨnáinamona cuena ióbitari. Afe mei dájemo comecɨ jitáinafue jeire omoɨ úado cuena omoɨ ióbitari. Afe emódomo dáafuemo omoɨ comécɨinado cuena omoɨ cáɨmacaitari.  
\v 3 Danɨ omoɨ comecɨ jitailla izói mamériñeno iri. Fia abɨ ɨ́ɨnuafuedo nɨ́fuena lloñeno iri. Mei íadɨ comecɨ mánaɨnafuedo omoɨ mamériri. Omoɨmona illa dɨ́gamɨerie omoɨ aɨno cómena o baɨmo comécɨna ñuera, omoɨ daɨífɨreiri.  
\v 4 Danɨ omoɨ ñue illáfuena jenóñeno iri. Mei íadɨ nana jɨáɨmacɨ ñue illáfuena omoɨ jenori. 
\p  
\v 5 Cristo Jesús comecɨ mámia izói, dájemo comecɨ omoɨ mameri.  
\v 6 Nano fueñe ie illa llezica afémɨe daa Juzíñamui izoide. Juzíñamui izói ie illa rɨ́ino afémɨemo ite. Mei íadɨ ie fɨénocaiga rɨ́inona “Raɨre meine cue ollɨ” daɨíñede.  
\v 7 Mei íadɨ afémɨe Juzíñamui izoina llezica afe íemo ite rɨ́inona oni eneno fɨénocaide. Fɨénocaillanona jɨba ɨima jéicɨa izói Cristo jéicɨga. Daɨí ie jéicɨinamona fia jamai táɨjɨtagamɨe bie énɨedo jáicana izói jáicade.  
\v 8 Jamai cómena ie illa llezica jamánomo comécɨna mánaɨdɨmɨena abɨ́ mamede. Daɨí mámiano ie Moo Juzíñamui daɨnáuai jeire uano dama tɨ́izaide. Ua aillo meáire cruzmo tɨ́izaide.  
\v 9 Ie jira Juzíñamui jamánomo aillo ñúefue íemo nitade. Ua áfemona nana jɨáɨe mámecɨaɨ baɨmo jalléidɨcɨna Juzíñamui íemo jɨtade.  
\v 10 Daɨí bie mámecɨna Juzíñamui íemo jɨtade, nana comɨnɨ ie anamo dújuillena. Ua afe Jesús daɨnácɨna íaɨoɨ cacánamona nana monamo itɨ́nuiaɨ, bie énɨemo itɨ́nuiaɨ, daje izói énɨe anamo itɨ́nuiaɨ cañɨ́cɨdo ie anamo dújuitiaɨoɨ.  
\v 11 Daɨɨ́ dújuillano nana comɨnɨ comécɨdo íena ónuano, Jesucrístona nahí Ocuíraɨmana dáɨitiaɨoɨ. Daɨí dáɨnado Moo Juzíñamuimo ñúefue nítaitiaɨoɨ. 
\s1 Crístomo jaɨnáidɨno bínɨe egáiñotɨno izóidiaɨoɨ 
\p  
\v 12 Mei jira, cue izíruiga ámatɨaɨ, naui omoɨ cɨ́gɨri cue illa llezica jaca ómoɨmo cue llogáuaina jeire otɨ́omoɨ. Ja birui ómoɨmona jɨca itɨ́cuemo, naui omoɨ úana izói, afe baɨmo aillo jeire omoɨ oíri. Danɨ omoɨ jíllonafuemo comécɨna mánaɨdɨmɨe izói jacɨ́ruioicana áfemo omoɨ comécɨoiri. Aféfuena nana comɨ́nɨmo ñue jino omoɨ denóoicairi.  
\v 13 Mei Juzíñamui afe ñuera comecɨ óiacanafuiaɨ ómoɨmo fecádɨmɨe. Afémɨe dama ie comecɨ ñue jítainafuedo ómoɨna canófɨrede, omoɨ comecɨ ñue óiacanafuiaɨ jino denóllena. 
\p  
\v 14 Bífuiaɨ jino omoɨ denolle llezica nana omoɨ jetácafuiaɨ fɨeni úriñeno omoɨ fɨnori. Daje izói áfena júfidoñeno omoɨ fɨnori.  
\v 15 Iemona bie izói omoɨ iri nɨnena jɨáɨmacɨ ómoɨmo ɨ́aɨfue jóoneñeillena. Daɨí nɨ́fuenino omoɨ iri, áfemona ɨ́aɨfuenidɨnona omoɨ ílleza. Mei daɨí omoɨ íllamona, comécɨna ɨ́aɨfuemo féitate fɨgóñede comɨnɨ cɨ́gɨri, Juzíñamui úruiaɨna maméllɨomoɨza. Iaɨoɨ cɨ́gɨri, ucudu caifona bie jítɨrede énɨe egáiñua izói, ie izói comɨnɨ comecɨ jítɨrenana egáiñoitɨomoɨ.  
\v 16 Afe egáiñuado zíiñona cáataite uai íaɨoɨmo jino llóitɨomoɨ. Daɨí Cristo billɨ́ruimo ómoɨri meáIdaiñeno caɨmare abɨ́ ɨ́ɨnoitɨcue. Daje izói omoɨ ñue illáfuedo naui ómoɨri ɨere cue táɨjɨnafue táɨnomo jɨfánofiñenana onódɨcue.  
\v 17 Naui ñúefuena omoɨ ɨ́ɨnuaruimo danɨ omoɨ illáfuena Juzíñamuimo llotɨ́omoɨ. Birui naɨ omoɨ ɨ́ɨnogafue ñue jaɨ́cɨna cue jóoniamona, nɨbaɨ benó cue tɨ́iadɨ, áferi cáɨmacaitɨcue. Afe llezica omoɨ cánuaɨbiga ióbillafueri ióbidɨcue.  
\v 18 Daje izói caɨmare omoɨ iri; cue cáɨmacailla dɨbéfuemo jeire omoɨ oíri. 
\s1 Timoteo Epafrodito dɨga Filipos comɨ́nɨmo oréillɨfue 
\p  
\v 19 Caɨ Ocuíraɨma Jesús comecɨ óiacania, Timotéona omoɨ eróizaitaitɨcue. Omoɨ illafue afémɨe abɨdo cuemo lluáɨbiadɨ, ɨere áferi cáɨmacaitɨcue.  
\v 20 Cue comecɨ faca izói, comecɨ facade jɨáɨe cómena iñede. Dama Timoteo cue izói comecɨ úrilla. Dama afémɨe omoɨ ñue illɨ́fuemo uáfuena comecɨ facáoifɨrede.  
\v 21 Nana jɨáɨmacɨ danɨ íaɨoɨ comecɨ jítainafue jenódiaɨoɨ. Cristo Jesús dɨbéfuena lloñédiaɨoɨ.  
\v 22 Afémɨe cuemo ráifinafuena náganuiaɨmo jino cɨótagaza onódɨomoɨ. Ñúefue jino cue llócaillado afémɨe cue dɨga, jitó izói jáicaide. Ua moo ie jitó dɨga táɨjɨcana izói cue dɨga táɨjɨcaide.  
\v 23 Cuemo ite itɨ́fuiaɨ jino déillana ñue cue onóadɨ, bie Timotéona omoɨ méiñOtaacadɨcue.  
\v 24 Caɨ Ocuíraɨma ñue ɨ́ɨnotɨcue. Iemona nɨbaɨ ómoɨna raɨre dama eróizaɨbitɨcue. 
\p  
\v 25 Daje izói cúemona uáfodo jóideza, cue ama Epafrodito omoɨ cɨ́gɨmo jáirena. Afémɨe cue táɨjɨnana nabáifɨredɨmɨe. Daje izói fuirilla izói cue llócaigafue nabáifɨredɨmɨe. Mei íadɨ naui cue jitaica raamo táɨjɨllena omoɨ cuemo orécamɨe, abɨdo ómoɨmo orédɨcue.  
\v 26 Mei afémɨe nana ómoɨna izire cɨóacade. Ie ɨrárenana omoɨ fɨdɨ́namona afémɨe comecɨ ɨere járitaide.  
\v 27 Uáfuena ɨere ɨrárede; tɨ́illanomo fɨgo dúcɨde. Mei íadɨ Juzíñamui íemo dúecaillano íena jíllotate. Dama afémɨemo dúecaiñedeza; mei jɨáɨ daje izói cuemo dúecaide. Ua Juzíñamui cuemo dúecaide, cuemo ite zúufuiaɨ baɨmo jɨáɨe aillo comecɨ zúufuiaɨ cuemo bíñeillena.  
\v 28 Iemona íena ɨere oréacadɨcue, raɨre afémɨemo omoɨ érocaillano ɨere omoɨ ióbicaillena, cue zúucaillafue raɨre nɨné féilleza.  
\v 29 Bie Epafrodítona mai jamánomo caɨmare omoɨ uáidori, Juzíñamuimo izire jaɨnaide ámaza. Nana ie illa izóidɨmɨiaɨ caɨmare jacɨ́ruioicana íaɨoɨmo mai omoɨ cacáreiri.  
\v 30 Ua afémɨe Crístomo táɨjɨnafuedo tɨ́illanomo fɨgo dúcɨde. Dama ie cáanafue jacɨ́redɨfuemo afémɨe jóonete cuena canóllena. Ua omoɨ bíninamona afémɨe cue cánuaɨbillena ɨere jamánomo nɨ́cɨdote. 
\c 3  
\s1 Uáfuena Juzíñamui ióbilla caɨ ñue jaɨ́cɨna illafue 
\p  
\v 1 Cue ámatɨaɨ, mai caɨ Ocuíraɨma omoɨ ióbioicairi. Cue cuegafue meine ómoɨmo cue llolle cuena áɨfedua izói íñeite, mei íadɨ ómoɨna ɨere ñue canode.  
\v 2 Ɨáɨruiga jɨba jɨco izói fɨénidɨfuemo itɨ́macɨmona abɨ́ omoɨ rairuiri. Omoɨ bacano ɨcoɨ quetátafɨrediaɨoɨ.  
\v 3 Caɨ bie ua quetácamacɨnaza. Caɨ bie caɨ joréñodo Juzíñamui ióbillamacɨdɨcaɨ. Fia jínofenemo cɨoide raana ɨ́ɨnoñedɨcaɨ. Cristo Jesús íeɨena caɨ íllari caɨmátaidɨnodɨcaɨ.  
\v 4 Bífuiaɨmo aillo cue ɨ́ɨnoregafuiaɨ ite íadɨ, áfena lloñédɨcue. Cue baɨmo buna aféfuiaɨmo ɨ́ɨnonide.  
\v 5 Cue jocóinamona ocho dɨ́garui íllamona cue bacano ɨcoɨ quetádiaɨoɨ, mei nahí israelita naɨraɨ ímɨedɨcueza. Cue bie Benjamín izíemo jaɨnáidɨmɨedɨcue. Cue jocóinanomona hebreo ímɨedɨcue. Ua hebreo ímɨe jitódɨcue. Judíuaɨ ocuícafue jino cue dobáiñuamona cue bie fariséodɨcue.  
\v 6 Jacɨre ocuíoidɨmɨe izói Crístomo jaɨnáidɨno fállena íaɨoɨna racádɨcue. Judíuaɨ ocuícafuemo lloga ñue jaɨ́cɨna illafue dɨbéfuemo, jaca nɨ́fuenidɨmɨedɨcue. Bu úaitañegamɨedɨcue.  
\v 7 Mei íadɨ nana bie naui cúemona aillo ráifidɨfuiaɨna, ja birui aféfuiaɨna Cristo ɨ́coɨnia náfueñedɨcue. Ua aféfuiaɨna jamai ráifiñedɨfuiaɨ izói áfemo comécɨidɨcue.  
\v 8 Afe baɨmo aillo jɨáɨfuemo comécɨidɨcue. Cue Ocuíraɨma Jesucrístona cue onóillɨfue, nana cuemo itɨ́fuiaɨ baɨmo aillo ráifide. Iemona cuemo itɨ́fuiaɨna féitatɨcue. Cristo ɨ́coɨnia naga cuemo itɨ́fuiaɨna cue féitaga. Ua aféfuiaɨna oni dotáacaiga raa izói comécɨidɨcue, afe ɨbana Cristo cue náamatallena.  
\v 9 Daje izói cue afémɨemo jaɨnáiacadɨcue. Ocuícafuena cue ɨ́ɨnuamona ñue illáfuena llɨ́ɨnotɨcue. Mei íadɨ afe ñue illáfuedo Crístomo jáɨnaiñeitɨcue. Jesumo ɨ́ɨnotɨnomo Juzíñamui iga nahí ñue illáfuedo Crístomo jáɨnaitɨcue.  
\v 10 Cue comecɨ jítainafue Cristo cue onóillena. Daje izói ie tɨ́illanomona meine abɨdo cáatate rɨ́inona, “Cuemo iri,” daɨdɨcue. Afémɨe duere zefuilla izói duere zefuíacadɨcue. Afe daɨí ie tɨ́illaruimo ie illa izói íitɨcue.  
\v 11 Afemona tɨ́idɨnuiaɨ meine cáallɨfuemo ocuíridɨcue. 
\s1 Cristo fueñe cue ocuilla izói cue jáillena, fuirilla izói izire nɨ́cɨdocana uitɨcue 
\p  
\v 12 Ja nana afe bie mamérillafue otɨcue daɨíñedɨcue. Daje izói comecɨ jaɨ́cɨna ñue jóidɨmɨedɨcue daɨíñedɨcue. Mei íadɨ Cristo fueñe cue ocuilla izói íacadɨcue. Ie jira nágarui aféuaimo nɨ́cɨdocana uitɨcue, afémɨe cuena daɨna izói cue jáillena.  
\v 13 Cue ámatɨaɨ, bífuiaɨmo ja dúcɨdɨcue dama daɨíñedɨcue. Mei cue nahí fɨnóacaigafue jɨáɨfodo jóide. Naui cue illáfuena féitatɨcue. Afe llezica nahí como cuemo déioicaitɨcuemo rɨire comécɨidɨcue.  
\v 14 Aizɨ́dɨno raɨre mózizailla izóidɨnomo dúcɨacadɨcue. Juzíñamuimona fia jɨrídolle raa izoide cue llɨ́ɨnuaɨbillena, Juzíñamui monámona cuena uáidote. Crístomo cue jaɨnáinamona afe jɨrídolle raana máiñoitɨcue. 
\p  
\v 15 Cáɨmona nana ɨ́ɨnogafuedo ñue móonaitɨno, mai bie izói caɨ comécɨoillɨ. Jɨáɨfodo omoɨ comécɨiadɨ, Juzíñamui áfena ómoɨna fɨdɨ́taite.  
\v 16 Mei íadɨ bifue mai caɨ náfuellɨ: caɨ onóigafue izói mai ñue caɨ illɨ. Daje izói ñue jaɨ́cɨna mai caɨ comécɨoillɨ. 
\p  
\v 17 Cue ámatɨaɨ, naui omoɨ cɨ́gɨri cue íllana cɨódɨomoɨza, afe izói omoɨ iri. Omoɨmo cue cɨ́otagafue jeire otɨ́nomo izire comecɨ omoɨ facáoiri.  
\v 18 Ja aillo Cristo tɨ́illafuena uáitatɨno íteza. Iemona dɨga icaiño afémacɨdo ómoɨmo llotɨcue. Nane zuure éebicaillano dáanomo ómoɨmo llóitɨcue. Afémacɨmona abɨ́ omoɨ rairuiri.  
\v 19 Bie izói itɨno íiraɨruimo nɨné táɨnocaitiaɨoɨ. Danɨ íaɨoɨ abɨ jitáinafuiaɨna daɨdíaɨoɨ: 
\p —Bie cue juzíñamui, —daɨdíaɨoɨ. Meáirede raana meáiruiñediaɨoɨ. Mei íadɨ áfedo abɨ́ ɨ́ɨnotiaɨoɨ. Fia bie énɨe ífuemo comécɨidiaɨoɨ.  
\v 20 Mei íadɨ caɨ nana caifo mona imácɨdɨcaɨ. Caɨ nana, caɨ jíllotade Ocuíraɨma Jesucristo monámona bíllemo úiñotɨcaɨ.  
\v 21 Caɨ zíiñoñede abɨna afémɨe méiduaɨbite, afémɨe ie abɨ ebire cɨoina izói caɨ íllena. Afémɨemo ite rɨ́inodo naga raana náamatade. Iemona afe daje íemo ite rɨ́inodo caɨ abɨ ífuena méidoite. 
\c 4  
\s1 Jaca caɨ Ocuíraɨmamo caɨmátaioicairi 
\p  
\v 1 Cue izíruiga ámatɨaɨ, mei ómoɨna ɨere cɨóiacadɨcue. Omoɨ cue ióbioinamacɨdɨomoɨ. Iemo cue jɨrídolle raa izóidɨomoɨ. Ua cue izíruigamacɨdɨomoɨza; mai caɨ Ocuíraɨmamo jaɨ́cɨna rɨire omoɨ comécɨoiri. 
\p  
\v 2 Evódiana mámecɨredɨngo íemo Síntique dɨga, izire jɨcádɨcue, dáafuemo ómɨngo comécɨiri. Mei caɨ Ocuíraɨmamo jaɨnáinamona ebúñona maméidɨomɨngoza.  
\v 3 Daje izói jɨáɨmɨemo úritɨcue. O, cue táɨjɨnado jaca ñue cuena nabáidɨo. Ua cue ɨ́ɨnoga nábaidɨo. Jira bie caɨ mirɨ́ngotɨaɨna o canótaitɨcue. Mei afe íaɨnguaɨ cúeoɨri afe jíllona uai cue llócainado nɨ́cɨdocaidiaɨnguaɨ. Bíaɨnguaɨ, Clemente dɨga naa jɨáɨmɨeoɨri cúeoɨri táɨjɨcadiaɨoɨ. Nana afémacɨ mámecɨ ja Juzíñamui zíiñona illɨno óitɨno mámecɨ cúeinanicomo cuega. 
\p  
\v 4 Nágaruillaɨdo caɨ Ocuíraɨmamo mai omoɨ caɨmátaioicairi. Nane dáanomo daɨdɨcue, mai caɨmátaioicairi.  
\v 5 Omoɨ comecɨ mánaɨna naga cómemo, mai cɨ́otaitɨomoɨza. Caɨ Ocuíraɨma billɨ́ruimo áɨnozideza. Caɨ áɨnori íteza. 
\p  
\v 6 Omoɨ comecɨ nɨ́fuemo járitaitañeno iri, mei jɨáɨfodo naga ómoɨmo comuídɨfuiaɨna Juzíñamuimo úrilla llezica, afémɨemo mai omoɨ lloiri. Daje izói omoɨ jitailla raana jɨcari. Afe llezica “Ɨere fɨgora” mai omoɨ daɨífɨreri.  
\v 7 Ie mei Juzíñamui comecɨ caɨmare uái illafue ómoɨmo íiteza. Bie comecɨ uái illafue comɨnɨ onoiga táɨnofue baɨmo ñuera. Afe caɨmare uái illafue omoɨ comécɨna ñue ráiruite. Daje izói omoɨ comecɨ jarire úrillafuena ñue manánaitaite. Mei Cristo Jesumo daane jáɨnaitɨomoɨza. 
\s1 Ñúefuiaɨmo comecɨ omoɨ facáoiri 
\p  
\v 8 Cue ámatɨaɨ, íiraɨcaiño omoɨ llóitɨcue. Nana nahí uáfuiaɨmo omoɨ comécɨiri. Daje izói nahí caɨmare jacɨ́ruioigafuiaɨmo omoɨ comécɨoiri. Daje izói nana jaɨ́cɨna illáfuiaɨmo omoɨ comécɨiri. Afe izói nana ɨ́aɨnidɨfuiaɨmo omoɨ comécɨiri. Daje izói nana ióbillafuiaɨmo omoɨ comécɨiri. Daje izói nana caɨmare jalléinafuemo omoɨ comecɨ uibíoiri. Nana bie ñúefuiaɨmo omoɨ comécɨoiri. Daje izói nana ñúefuena nitáfɨreganomo afémacɨmo omoɨ uibíoiri. 
\p  
\v 9 Omoɨ cue llófuia izói mai omoɨ iri; ómoɨmo cue lloga lletárafuiaɨmo mai omoɨ ɨ́ɨnori. Cue dáɨnana omoɨ cacana izói, cue fɨnócana omoɨ cɨona izói, afe izói mai omoɨ iri. Iemona comecɨ caɨmare uái illafue fecáfɨrede Juzíñamui omoɨ dɨga ífɨreite. 
\s1 Filipo imacɨ fia fecaca raa Páblomo orédiaɨoɨ 
\p  
\v 10 Meine nane cuemo omoɨ comécɨillari caɨ Ocuíraɨmado ɨere ióbidɨcue. “¿Nɨbái mei cuena féitatɨomoɨ?” ómoɨna daɨíacañedɨcue. Cue omoɨ canóacana raa átɨitɨmɨe iñédeza, onódɨcue.  
\v 11 Cue ráaninari ómoɨna fɨeni úacaiñedɨcue; cuemo ite raari cue ióbillana ja fɨbídɨcue.  
\v 12 Duere cue íllana fɨbídɨcue. Daje izói aillo cue jitaica ráanɨaɨ íllana fɨbídɨcue. Nɨfue cuemo comuíadɨ, afe izóidɨfue cue ocuíllana ja fɨbídɨcue. Nɨbaɨ jeɨ́redɨcue, nɨbaɨ jufíruitɨcue; afe izói caɨmare cue íllana fɨbídɨcue. Güiga alla cuemo íadɨ, mei cuemo iñéniadɨ daje izói ñuera.  
\v 13 Naga cuemo eróicana comuide raana ocuíredɨcue; mei Cristo cuena rɨ́iduado ocuíredɨcue.  
\v 14 Mei íadɨ cue dúerena llezica cuemo omoɨ dúecaillamona, cue omoɨ cánua ñuera. Dɨga icaiño duere cue fɨnóinari omoɨ zúunailla cuena náɨcaitade. 
\p  
\v 15 Omoɨ Filipos imácɨdɨomoɨza, daje izói bífuena onódɨomoɨ. Nano fueñe jíllona uai cue llócaina llezica, daade cue canófɨredɨnodɨomoɨ. Ua Macedóniamona oni jɨáɨnomo cue jailla llezica daade cue canode Jesumo ɨ́ɨnotɨnodɨomoɨ. Fia fecaca ráanɨaɨ cuemo oréfɨredɨomoɨ. Afemona comɨ́nɨmo cue feca izói, íemo íaɨoɨmona cue llɨ́ɨnua izói, afe dájemo naa ómoɨri táɨjɨdɨnodɨcaɨ.  
\v 16 Naɨ Tesalónicomo cue illa llezica, omoɨ dɨga ícaiño, fia fecáfɨreiga ráanɨaɨna cue jítaicanɨaɨna cuemo orédɨomoɨ.  
\v 17 Fia ráanɨaɨna cue llɨ́ɨnoiacanamo comécɨiñedɨcue; mei íadɨ cue comecɨ jítaillafue, Juzíñamui uiécomo ómoɨmo aillo ii, daɨdɨcue. Iemona daɨí aillo omoɨ ofítaga raana uire maiñóritɨomoɨ. Afemo comécɨidɨcue.  
\v 18 Mei nana jae cue llɨ́ɨnoga. Afena cue jitaica ráanɨaɨ baɨmo ja llɨ́ɨnotɨcue. Epafrodítodo cuemo omoɨ oreca ráanɨaɨ fɨgo baite. Baɨmo cue jitáillena iñede; ja aillo íteza. Cuemo fia omoɨ oreca ráanɨaɨ ɨere Juzíñamuina ióbitade. Daɨí cuena omoɨ cánuado, Juzíñamui comecɨ jítaina fɨnódɨomoɨ. Aferi Juzíñamui ióbicaillano afémɨe áfena jeire ote.  
\v 19 Cue ɨ́ɨnoga Juzíñamui nana omoɨ jitaica raana ómoɨmo fécaite, mei nana Cristo Jesús ebire comuítaga ráanɨaɨ Juzíñamuimo dúideza. Ie jira íemo aillo ite ráanɨaɨ izói, afe izói ómoɨmo fécaite.  
\v 20 Mei ñuera ebíredɨfue caɨ Moo Juzíñamuimo jaca íoicaideza. Daɨítadeza. 
\s1 Iiraɨcaiño uáidonocaillafue 
\p  
\v 21 Cue dɨbénedo nana Juzíñamuimo jaɨnáidɨno Jesucristo mámecɨdo omoɨ uáidori. Cue dɨga ite caɨ ámatɨaɨ ómoɨmo uai orédiaɨoɨ.  
\v 22 Nana benomo ite Juzíñamuimo jaɨnáidɨno daje izói uai ómoɨmo orédiaɨoɨ. Romano nahíllaɨma jofomo itɨno ɨere ómoɨna izire uáidoiacadiaɨoɨ. 
\p  
\v 23 Caɨ Ocuíraɨma Jesucristo nana ómoɨna ñue ézɨcɨiteza. Mai daɨítadeza; jae nɨɨe.