\id HEB - Huitoto Mɨnɨca NT -Colombia 2011 (DBL 2013) 
\h HEBREOS 
\toc1 Hebreo Imácɨmo Cuegabe 
\toc2 Hebreos 
\toc3 He 
\mt2 HEBREO IMÁCƗMO CUEGABE 
\c 1  
\s1 (Daa bimacɨ jɨáɨfodo mameina Judíuaɨ) 
\s1 La Carta a los Hebreos 
\s1 Juzíñamui ie Jitodo ja comɨ́nɨmo úrite 
\p  
\v 1 Jaiai nɨnomo caɨ judíuaɨ jaiáidɨgɨmamo Juzíñamui úrite. Ua, ie uai llóraɨnɨdo dɨga icaiño, dɨga jɨáɨfodo jóoide uáillaɨdo úrite.  
\v 2 Mei íadɨ ja birui íiraɨruillaɨdo Juzíñamui ie Jitodo caɨmo úrite. Bie Jitó uaido Juzíñamui jaiai bie énɨena naa úcuaɨri fɨnode. Iemo naga raa íeɨena náamatallena Juzíñamui íena mamede.  
\v 3 Afe Jitó ie Moomo ite ebíredena jino cɨ́otatɨmɨe. Daje llezica afémɨe jino náɨraɨmo cɨ́otaga; ua daje Juzíñamui izóidɨmɨe. Nana fɨnoca ráanɨaɨna afémɨe dájena jaɨnáitano ie ñue rɨírede uáillaɨdo nágarui ñue jaɨ́cɨna fɨnócana uite. Bímɨe, cruzmo dama ie dɨe tótajado caɨ fɨénidɨfuiaɨ ñue múiñua mei, caifo monamo ite Juzíñamui nabezi dɨbénemo ráɨnazaide, dɨnómona nahí illáɨmaillena. 
\s1 Juzíñamui Jitó Juzíñamui abɨ imácɨaɨ baɨmo fɨ́gomɨe 
\p  
\v 4 Afémɨe afe jamánomo rɨ́iredɨnomo jáillamona, nana Juzíñamui abɨ imácɨaɨ baɨmo fɨ́gomɨena jaide.  
\v 5 Juzíñamui ie abɨ imácɨmona dáamɨe jaca “Cue jitódɨo” daɨíñede. Ua, “Cue Jitódɨo, ja birui illáɨmana o jóoneitɨcue” jaca daje izói íaɨoɨna daɨíñede. Mei íadɨ ie Jitó Jesucrístona daɨí daɨde. Daje izói ie abɨ imácɨmona dáamɨena “O moona íitɨcue” daɨíñede. Dáanomo “Cue jitóitɨo” daɨíñede. Mei íadɨ Jesuna daɨí daɨde.  
\v 6 Ua Juzíñamui ie izoide daade Jitona bie énɨemo comuítajano daɨde: 
\q1 Mai, nana Juzíñamui abɨ imacɨ, bie cue jitona jacɨ́ruioicana ñue omoɨ ióbitari. 
\m  
\v 7 Mei íadɨ abɨ imácɨna Juzíñamui daɨde: 
\q1 Bimacɨ cue abɨ canóraɨnɨna íllamona, íaɨoɨna ocuífɨredɨcue. Iemona jairifo raɨre náidacailla izói, bimacɨ cue ocuícana raɨre jetáfɨrediaɨoɨ. 
\q1 Afe izói nana cue canófɨrede cue abɨ imacɨ jacɨ́rede boode iraicɨ izói, íaɨoɨna ocuífɨredɨcue, —daɨde. 
\m  
\v 8 Mei jɨáɨfodo ie Jitona daɨde: 
\q1 Juzíñamui o íllamona, o illáɨmana illɨrui jaca nɨnomo zíiñona íite. 
\q1 Ñue comécɨna jaɨ́cɨnainafuedo jaca illáɨmaifɨreitɨo. 
\q1  
\v 9 Ua, comécɨna jaɨ́cɨnainafuena izíruitɨo, mei íadɨ fɨénidɨfuiaɨmo éoicana eróidɨo. 
\q1 Iemona Juzíñamui, ua o Juzíñamui, jae ona ióbitade. 
\q1 Nana Juzíñamui uaina jiéruite o nabáiñɨaɨ cáɨmadua baɨmo, cáɨmatagao, —daɨde. 
\m  
\v 10 Jɨáɨnomo ie Jitona Juzíñamui daɨde: 
\q1 O Ocuíraɨmadɨo. 
\q1 Naga ráanɨaɨ o táɨnia mei, bie énɨe fɨnódɨo. 
\q1 Nana monamo ite naga úcuaɨ o ónoɨdo fɨnócano. 
\q1  
\v 11 Afe énɨe naa úcuaɨri nɨné táɨnocaitiaɨoɨ, mei íadɨ o jaca zíiñona íitɨo. 
\q1 Afénɨaɨ jácara ɨníroillaɨ zabilla izói zábitiaɨoɨ. 
\q1  
\v 12 Iemo ɨnícuiro dócoɨano oni jóonia izói, oni eneno íaɨoɨna jóoneitɨo. 
\q1 Iemona ɨniroi jɨáɨroina abɨmo jɨta izói, bínɨe naa ucúduaɨri méidoficaitiaɨoɨ. 
\q1 Mei íadɨ o jaca méidoñellɨoza, dɨnó nɨ́ɨmɨeitɨo. 
\q1 Omo itɨfue jaca zíiñona íite. 
\m  
\v 13 ¿Nɨɨe mei ie abɨ ímɨemo Juzíñamui llogámɨe: 
\q1 O faɨríconɨ o anamo cue anáfenotalle llezica mai benó cue nabézimo illaɨma nabai izói ráɨnazaɨbi? 
\m Daɨí daɨnámɨena iñede. Dama ie Jitó Jesuna daɨí daɨde.  
\v 14 Nana afe Juzíñamui abɨ imacɨ Juzíñamui ocuica canófɨrede jóriaɨaɨ. Ua Juzíñamui orécaiaɨoɨ, afémɨedo jílloitɨno ñue rairuíllena. 
\c 2  
\s1 Cristo caɨmo lluáɨbiga jíllona uaimo ñue úiñoredɨcaɨ 
\p  
\v 1 Ie jira Juzíñamui Jitó, Jesucristo daɨí naga illaɨma baɨmo jáidɨmɨena íllamona, nana Juzíñamuimona caɨ cacana uaillaɨ jeire caɨ olle ɨere jitáirede; omoɨ jefónɨaɨ ñue jɨnéoiri. Aféuaimo ñue omoɨ cacáreiri, oni nɨbéfodo fɨénidɨfuemo caɨ báɨiñeillena. 
\p  
\v 2 Mei Juzíñamui jaiai ie abɨ imácɨdo llogáuai jaca oni caitánide. Naga aféuaina jeire oñédɨno naa cacáfɨnidɨnori raɨre ɨere duere fɨnócaiaɨoɨ. Mei afe fɨénidɨfue fɨ́nuamona Juzíñamui íaɨoɨmo jaɨ́cɨna ɨbana ote.  
\v 3 Mei íadɨ birui aféuai baɨmo jamánomo ñue rɨírede uaina cacádɨnodɨcaɨ. Ie jira bie Crístomona caɨ cacana uáillaɨna jeire caɨ óñenia, ¿nɨ́ɨfuedo jaɨ́cɨna ɨba uáfuemona jílloitɨcaɨ? ¡Jíllonidɨcaɨ! Afe baɨmo ñue rɨírede uai nano fueñe Ocuíraɨma Jesucristo caɨmo llogáuai. Ie mei ie dáɨnana cacádɨnodo aféuai jae caɨ uafue daɨíllena llotátaga.  
\v 4 Afe íaɨoɨ daɨna uaimo onótate raado Juzíñamui ñue uai nabáitate. Iemo jɨáɨ jacɨ́rede raado, aillo cɨóraɨnina raa dɨga afémɨe ñue uai nabáitate, íaɨoɨ daɨnáuaimo ñue caɨ ɨ́ɨnollena. Afe llezica Juzíñamui ie jitáinafue izói, ie Ñuera Joreño ñúefuiaɨ fɨnolle rɨ́ino, illa dɨ́gamɨerie íaɨoɨmo fecade, daje izói caɨmo. 
\s1 Jesucristo Juzíñamui Jitó íadɨ afémɨe caɨ illa izói, fia cómena íficaide 
\p  
\v 5 Caɨ úrifɨrena ñuera uíreitɨruillaɨdo nɨ́ɨmɨe illáɨmaillena, Juzíñamui ie abɨ imácɨna: “Illáɨnɨna jáitɨomoɨ” daɨíñede.  
\v 6 Mei jɨáɨfodo comɨ́nɨna illáɨmaitaacade. Jaiai Juzíñamui Cuegáuaimo David Juzíñamuina daɨde: 
\q1 ¡Nɨɨ naga come Juzíñamui dɨbénedo jamáimɨiaɨna! 
\q1 ¿Nɨbái mei íaɨoɨmo comécɨidɨo? 
\q1 ¿Nɨbái mei íaɨoɨ jitótɨaɨmo járitaitɨo? 
\q1  
\v 7 Mei uáfuena due jiza o abɨ imacɨ jofófenemo comɨ́nɨna comuítatɨo. 
\q1 Illaɨma ebírenano naa ñúefue dɨga íaɨoɨmo nitádɨo. 
\q1  
\v 8 Naga raa íaɨoɨ anamo o itátatɨo. 
\m Daɨí naga raa ɨima anamo itábicaillamona, jae mɨnɨca ie anamo itábicaiñedena iñede. Mei íadɨ ja birui ɨima dɨbénedo naga raana náamatañega. Afe izóiñedeza; afémɨe nahí náamañede.  
\v 9 Mei íadɨ jɨáɨfodo birui Jesuna caɨ onónamona íemo comécɨidɨcaɨ. Afémɨe nana íanori due jiza Juzíñamui abɨ imacɨ jofófemo jóonegamɨe. Aféruido afe Jesús nano caɨ jɨáɨnona, tɨilla onóillena facade; mei afe llezica nana comɨnɨ fɨénidɨfue ɨ́coɨnia Juzíñamui zóofegamɨeza. Ie mei tɨide meine abɨdo cáanamona jamánomoidɨmɨena jaide. Afe mei afémɨe, illaɨma izói, ñúefuena nitácamɨe, jae ebire fɨnócamɨe, mei naui ie tɨ́illaruimo ɨere duere ie zefuíllamona. Juzíñamui caɨri dúecaillano, nana comɨnɨ nɨné táɨnocaitañellena caɨ ɨ́coɨnia Jesuna daɨí zefuítate. 
\p  
\v 10 Juzíñamui daɨí ie Jitó duere fɨnoille caɨmare íemo jóbide. Ie jira Juzíñamui íaɨoɨna jíllotaite ɨfódɨmɨe duere zefuíllafuedo nana caɨ jíllonafuena ñue fuitade. Mei jɨɨ, naga raa Juzíñamui íeɨena ie ɨ́ɨnuamona ja birui itíaɨoɨ. Afémɨe nana comɨ́nɨmona aillo jitótɨaɨ jílloacade ie caɨmare ebírenanomo dáanomo íaɨoɨ dúcɨzaillena.  
\v 11 Mei Juzíñamui dɨbénemo oni jóonetɨmɨe Jesús, nana Juzíñamui dɨbénemo oni jóonegamacɨ dɨga daje Juzíñamuina móorediaɨoɨ. Iemona, caɨ baɨmo jamánomoidɨmɨe íadɨ, Jesús “Cue ámatɨaɨdɨomoɨ” daɨí dáɨnana meáiruiñede.  
\v 12 Afémɨe Juzíñamuina daɨde: 
\q1 O mámecɨ cue ámatɨaɨmo jino llóitɨcue. 
\q1 Nana omo gaɨrídɨno cɨ́gɨri rocana ñúefue omo nítaitɨcue. 
\m  
\v 13 Jɨáɨnomo Cuegáuaimo daɨde: 
\q1 Cue Juzíñamuidɨo. Omo ɨ́ɨnoitɨcue. 
\m Ie mei jɨáɨnomo daɨde: 
\q1 Be, benó itɨcue, Juzíñamui cuemo iga naa úruiaɨri. 
\p  
\v 14 Onódɨomoɨza, nana caɨ jae cómena comuítagacaɨ. Daɨí caɨ íllamona, daje izói Jesús dama cómena comuíbicaide. (Ua, fia come izói jéicɨga.) Afe mei come abɨ íemo íllamona, ie tɨ́illado caɨ tɨ́taite Taɨfena rɨ́initade.  
\v 15 Jaiáimona nana tɨille jágɨedo Taɨfemo rairuícamacɨdɨcaɨ. Mei íadɨ Jesús jae caɨ jacɨ́ruiñeillena nane ñue caɨ fɨnode. Ja ráiruiñeganona afémɨe daɨí caɨ ñue orede, nana naui caɨ caana llezica tɨíllena jacɨ́ruitɨcaɨ íadɨ.  
\v 16 Mei uáfodo onóigaza: Jesús ie bíllado Juzíñamui abɨ imácɨna cánuaɨbiñedeza, mei íadɨ cómena íficaillano nana Abrahámona comuídɨgɨmana cánuaɨbite naa jɨáɨe Juzíñamuimo ɨ́ɨnotɨnori.  
\v 17 Afémɨe caɨ cánuaɨbillemona ie ámatɨaɨ nana íaɨoɨ illa izói afémɨe íficaillana ɨere jitáiredeza, mei dúecaifɨrede nahí comɨ́nɨmona Juzíñamuimo comɨ́nɨdo úritɨllaɨmana jáideza. Ua ɨ́ɨnofɨrega Juzíñamuimo úriraɨmana jáiacade, afe daɨí ie tɨ́illado comɨ́nɨmo ite fɨénidɨfuiaɨ oni muiñóllena.  
\v 18 Mei Jesucristo ɨ́aɨfue fɨeni facátafuiaɨmona duere zefuide, aféfuemo baɨíñede íadɨ; íemona ja birui fɨeni Taɨfe facátagamacɨna cánua rɨ́ino Crístomo íteza, ja caɨna ñue canórede. 
\c 3  
\s1 Jesús Moisés baɨmo jamánomoidɨmɨe 
\p  
\v 1 Ie jira, cue ñue ámatɨaɨ, Juzíñamui uáidogamacɨ dɨbénemo jaɨnáidɨomoɨza, Jesumo izire comecɨ omoɨ facari; ua caɨ jeire oga ñúefue lluáɨbitagamɨemo ñue comecɨ omoɨ facari. Iemo nane Juzíñamui dɨbénemo caɨdo ñue úritɨmɨemo, mai íemo comecɨ omoɨ facari.  
\v 2 Bie Jesús íena daɨí mamédɨmɨe ocuica uaina jaca nágaruillaɨ ɨ́ɨnofɨrede; ua, jaiáidɨmɨe Moisés nana íemo llogáuaina jeire ófɨrena izói, afe izói bímɨe nana íemo ocuica uaina jeire ófɨrede.  
\v 3-4 Jae onódɨomoɨza naga jofo come niga; dama abɨna niñédeza. Mei íadɨ naga ráanɨaɨ fɨnódɨmɨe Juzíñamui. Iemo daje izói ja onódɨomoɨza, naga jofo niraɨma afe nigaco baɨmo ñúemɨeza. Afémɨemo jamánomo ñúefue jóonerede. Ie izói afe bie Jesús Moisés baɨmo ñúefuena nitáregamɨe, mei naga raa afémɨe comuítagaza; íemo jɨáɨ daje izói Juzíñamuimo caɨ jaɨnáinana Jesús comuítateza.  
\v 5 Ua, afe Moisés nana Juzíñamui íemo llogáuai, Juzíñamui dɨbénemo táɨjɨacadɨmɨe izói, aféuaina ñue jaɨ́cɨna Juzíñamui eneno nɨzeca Israel náɨraɨmo llotátate. Afe daɨí afémɨe ie méifodo bite llófuellɨfuemo uai nabáitate.  
\v 6 Mei íadɨ Cristo, jofona náamataga Jitó izói, nana ie anamo itɨ́nona ñue jaɨ́cɨna ocuíoide. (Afe daɨí Cristo Moisés báɨfene ímɨenaza onódɨcaɨ, mei naga jitó, jofo ero táɨjɨraɨma baɨmo itɨ́mɨenaza.) Iemona Cristo dáɨnana, caɨ ɨ́ɨnuafue ñue rɨire itɨ́fuedo are illa ɨ́coɨmo jeire caɨ oíadɨ, Juzíñamui comɨ́nɨdɨcaɨ. Afe llezica afémɨemo caɨmare caɨ úiñuana jitáirede. 
\s1 Juzíñamui comɨnɨ comecɨ caɨmare uái illafue 
\p  
\v 7 Ie jira Juzíñamui Ñuera Joreño jaiai Cuegáuaido daɨde: 
\q1 Birui Juzíñamui daɨnáuai omoɨ cacana llezica omoɨ comécɨaɨ rɨ́iretañeno iri. 
\q1  
\v 8 Jaiai énɨe zaféredɨnodo Israel comɨnɨ facátaruimo afémacɨ íaɨoɨ comecɨ rɨire fɨ́nuano Juzíñamuina uáitatiaɨoɨ. 
\q1 Jɨɨ, afe izói omoɨ iñeno iri, daɨde. 
\m  
\v 9 Iemo nane Juzíñamui daɨde: 
\q1 Aféruillaɨdo jaiai omoɨ uzútɨaɨ Judíuaɨ cuemo ɨ́ɨnoñeno fɨeni facátafuedo cuena facátatiaɨoɨ. 
\q1 Cuarenta dɨga fɨmónado nana íaɨoɨmo cue fɨnócafuiaɨna cɨódiaɨoɨ íadɨ, cuemo fɨeni comécɨidiaɨoɨ. 
\q1  
\v 10 Ie jira afe bigɨma cuena rɨ́icaitade. 
\q1 Afémacɨdo daɨdɨcue: “Iaɨoɨ comecɨ cuemo fɨgo jaɨnáiñenamona, cue lloga io onóñeno oni nɨbéfodo jáidɨnona itíaɨoɨ.” 
\q1  
\v 11 Iemona áferi icɨ́rillano rɨírede uaido daɨdɨcue: “Jaca cue lloga caɨmare comécɨna uái ocózinaillana óñeitiaɨoɨ,” daɨdɨcue. 
\p  
\v 12 Amatɨaɨ, daje izói fɨgóñede, ñúefuena ɨáɨruiga ɨ́ɨnoñede comécɨmona mai abɨ́ omoɨ rairuiri, afe izói omoɨ íñeillena. Mei afe izóidɨmɨe caɨ caade Juzíñamuimona oni eneno jɨca íteza.  
\v 13 Mei íadɨ nágaruillaɨdo, Juzíñamui ómoɨna naɨ uáidua llezica, Juzíñamui dɨbénemo ñue rɨire jaɨnairi. Iemo danɨ ómoɨmona ñue lletari. Daɨí ñue omoɨ llóiri, fɨénidɨfue ie abɨ jɨ́fuiafuedo buna ómoɨmona dáamɨe comécɨna rɨíreiñellena.  
\v 14 Mei nanóidemona caɨmo ite izire ɨ́ɨnogafue, rɨire fáɨcanocaiñeno uáfuena caɨ onóiadɨ, jae Cristo dɨbénemo jaɨnáidɨnodɨcaɨ. Aféfuemo rairuíñeno ñue omoɨ jiéruiri. 
\m  
\v 15 Juzíñamui Cuegáuai daɨí daɨde: 
\q1 Birui Juzíñamui daɨnáuaina omoɨ cacana llezica, jaiai Israel Juzíñamuina uáitajaruimo comecɨ rɨírena izói, omoɨ comecɨ rɨíretaneño iri. 
\m  
\v 16 ¿Bu mei afe Juzíñamui uai cacádɨno íadɨ, nane dáanomo íena uáitate? Mei nana Egíptomona Moisés baɨrócamacɨ Juzíñamuina uáitate.  
\v 17 ¿Mei nɨ́ɨmacɨ cuarenta dɨga fɨmona Juzíñamuina icɨ́ritate? Mei nana afe Juzíñamui uai ɨ́ɨnoñeno fɨeni fɨnódɨno; nɨɨ afémacɨ ícuruaɨ énɨe zaféredɨnomo fɨénocaiga.  
\v 18 ¿Nɨɨ náɨraɨna rɨírede uaido Juzíñamui daɨde: “Jaca cue lloga caɨmare comécɨna uái ocózinaillɨnomo dúcɨñeitɨomoɨ?” Mei nana afe ie uaina cacádɨnona íadɨ aféuaina jeire oñédɨnona daɨí daɨde.  
\v 19 Daɨí íaɨoɨna dáɨnana íaɨoɨ ɨ́ɨnoñenado jofo cáɨmanomo dúcɨnidiaɨoɨ. Ua daɨí ñúenomo íaɨoɨ dúcɨñenana onódɨcaɨ. 
\c 4  
\p  
\v 1 Ja birui Juzíñamui uafue caɨmo lloga caɨmare comécɨna uái ocózinaillana caɨ olle uai caɨmo ite. Aféuai naɨ caɨmo illa llezica mai ómoɨmona dáamɨe aféuai comécɨmo óñeillena daɨítadɨfuemona mai abɨ́ omoɨ rairuiri.  
\v 2 Mei uafue caɨ bie ñúefuena llogámacɨdɨcaɨ. Ua afe jaiai Egíptomona baɨrócano ñúefuena llóina izói ñúefuena llogámacɨdɨcaɨ. Mei íadɨ íaɨoɨ cacana uai fɨgo íaɨoɨna canóñede; mei ɨ́ɨnoñediaɨoɨza fia táɨnona cacádiaɨoɨza.  
\v 3-4 Mei íadɨ Juzíñamui lloga caɨmare comécɨna uái ocózinaillɨnomo nahí jofo jáidɨnodɨcaɨ, mei ie uaina ñue caɨ ɨ́ɨnofɨrenado. Birui Jesumo caɨ ɨ́ɨnuamona, caɨmare comecɨ jacɨ́ruiñenafue dɨbénemo jóonegacaɨ. Jira ocózinairanomo táɨjɨñeno caɨ illa izói, jae caɨmare uái itɨcaɨ. Ie mei uire Juzíñamui illánomo ñue afémɨe dɨga caɨmare uái íitɨcaɨ. Jaiai ɨ́ɨnoñedɨnona Juzíñamui daɨde: 
\q1 Iaɨoɨmo cue rɨ́icaillano ñue rɨírede uaido daɨdɨcue, “Afe cue lloga caɨmare comécɨna uái ocózinaillɨnomo jaca dúcɨñeitiaɨoɨ,” daɨdɨcue. 
\m Daɨí Juzíñamui íaɨoɨna daɨde. Mei íadɨ ua íaɨoɨ caɨmare illɨfue Juzíñamui are uícomo mamécaza; mei jae are énɨe ie comuítajaruimona, nana Juzíñamui ie fɨnócafuiaɨ, naa caɨmare caɨ illɨ́fuiaɨri, jae fuitádeza. Mei Juzíñamui jɨáɨnomo ie Cuegáuaimo afe ie ocózinaillaruido úrite; daɨde: 
\q1 Juzíñamui seis dɨ́garui táɨjɨde; ie táɨjɨna mei siete iruimo nana ie fɨnócafuiaɨmona caɨmare uái ocózinaide. 
\m  
\v 5 Afe mei jɨáɨruido ie Cuegáuaimo Juzíñamui daɨde: 
\q1 Cue lloga caɨmare comécɨna uái ocózinaillɨnomo dúcɨñeitiaɨoɨ. 
\m  
\v 6 Iemo ñúefuena nanoide cacádɨno ɨ́ɨnoñenamona afénomo jofo íaɨoɨ jáinina méifomo, áfeo naɨ jɨáɨmacɨ jáillena túide.  
\v 7 Ie jira Juzíñamui dɨga fɨmona jailla mei, David roránicuaɨdo comɨnɨ uáiduano meine jɨáɨe billɨrui íaɨoɨmo llote. Afécuaɨmo, due jiza íllamona cue lloga izói, Juzíñamui daɨde: 
\q1 Birui Juzíñamui daɨnáuaina cacádɨomoɨza omoɨ comécɨna rɨíretañeno iri, daɨde. 
\m  
\v 8 Mei íadɨ Josué afe jaiáidɨnona nahí caɨmare come comecɨ jacɨ́ruiñenanomo uiñede. Ie jira dɨga fɨmona illa mei Juzíñamui meine abɨdo comɨnɨ caɨmare illɨ́ruina úrite.  
\v 9 Iemona afe nahí caɨmare come comécɨna uái ocózinaillafue naɨ ite, Juzíñamuimo jaɨnáidɨmacɨna danɨ íaɨoɨena maiñóllena. Afe ñue caɨmare caɨ illɨfue ocózinaillaruimo caɨ ocózinailla izoide.  
\v 10 Mei naga afe Juzíñamuimona oga caɨmare illɨ́fuena maiñódɨmɨe, dama ie jílloille naa ie nɨ́cɨdogano fáɨcanocaillano, caɨmare uái ite. Ua Juzíñamui naga ráanɨaɨ ie fɨ́nua fuilla mei, ocózinaillano caɨmare uái ite. Afémɨe uái illa izói caɨmare uái itɨcaɨ.  
\v 11 Ie jira afe caɨmare caɨ illɨ́fuena mai ñue omoɨ maiñori. Mai benómona daɨí omoɨ ífɨreiri, ómoɨmona buna jáiairagɨma bífuena íaɨoɨ ɨ́ɨnoñenado ɨ́aɨfuemo baɨílla izói omoɨ báɨiñeillena. 
\p  
\v 12 Nana Juzíñamui lloga uai, jaca íocɨre cáadɨmɨe izoide. Afe uai jaca nɨnomo rɨíredeza, buna oni caitánide uai. Aféuai comɨnɨ ɨfócɨaɨmo déifɨrede; ua íaɨoɨ comécɨna zuitáfɨrede. Mei jɨɨ, jaíre jicaɨca lloéfaido abɨ ñeta ɨere jofo ícurumo raɨre dúcɨzailla izói, afe izói Juzíñamui uai nana caɨ comecɨ ífuiaɨ onótate. Uáfuena caɨ comecɨ facáduana naa caɨ comecɨ jítaillafuiaɨri fɨ́dɨano ñue uáfodo jaɨ́cɨna jino caɨmo onótate.  
\v 13 Nana Juzíñamui fɨnócafuiaɨ íemona oni retáidonide. Ua, daa Juzíñamui cɨóñenamɨena iñede. Nana caɨ comécɨillafuiaɨ caɨ fɨnócafuiaɨ dɨga, uáfori caɨ nahí Jɨcánoraɨma ui anamo ite. 
\s1 Jesús Juzíñamui dɨbénemo caɨdo ñue úrifɨredɨllaɨma 
\p  
\v 14 Jae Juzíñamui Jitó, Jesús, mona úillɨe illano ɨere caifófenemo jaillano, Juzíñamui illánomo dúcɨde. Dúcɨillano Juzíñamuimo dɨbénemo caɨdo ñue raɨre úriraɨmana jaide; ua afémɨe caɨdo úrifɨredɨllaɨmana jóonega. Afe bie úriraɨma caɨmo íllaza, mai nana afémɨemo caɨ comécɨillɨ; afémɨedo caɨ ɨ́ɨnogafuiaɨ fáɨcanocaiñeno jaɨ́cɨna rɨire ñue íemo caɨ ɨ́ɨnoillɨ.  
\v 15 Afe caɨdo Juzíñamuimo úrifɨredɨllaɨma nana caɨ abɨ rɨ́idolle rɨ́ino iñénana onode. Ua afe caɨ rɨ́ino iñénamona caɨ féiraifɨrenana afémɨe onode. Ie onónamona caɨmo dúecaifɨrede; mei afémɨe caɨ izoide cómena íficaillamona, nana fɨeni facátafuiaɨna caɨ cacana izói cacade íadɨ afe fɨénidɨfuiaɨmo baɨíñede. Iemona Juzíñamui dɨnena jáiredɨcaɨ.  
\v 16 Ie jira Juzíñamui illáɨmana illánomo caɨ úrizaillɨ; mai omoɨ jacɨ́ruiñeno afe caɨdo úrifɨredɨllaɨmado Juzíñamuimo raɨre úrifɨreiri. Daɨí íemo úriredɨcaɨ caɨna ie dúecaillano caɨ fɨeni fɨnócafuiaɨ ɨba caɨmo óñeillena; daje izói afémɨe caɨ jitáillɨruido caɨ canóllena, afémɨemo úriredɨcaɨ. 
\c 5  
\p  
\v 1 Naga come dɨbéfodo Juzíñamuimo úritɨllaɨma comɨ́nɨmona nɨzeda oga. Uano Juzíñamuimo comɨ́nɨdo úrillena mamécamɨe. Daje izói afémɨe comɨnɨ dɨbéfodo Juzíñamui ióbitalle ráfuiaɨ fɨnófɨreillena mamécamɨe. Iaɨoɨ Juzíñamuimo fia iga ráanɨaɨ afémɨe izájite. Daje izói íaɨoɨ fɨénidɨfue ɨba otátañelle fia fállena fecaca tóɨca rɨ́llenɨaɨ afémɨe Juzíñamuimo izájite.  
\v 2 Afémɨe rɨ́inide cómena íllamona, íaɨoɨ illa izói abɨna onóñedɨmacɨna fɨ́aicana comecɨ járitañenado caɨmare fɨ́raizitaite. Daje izói oni nɨbéfomo baɨídɨnona comecɨ járitañeno llétaite.  
\v 3 Mei afe nɨzécamɨe caɨ izói rɨ́inidɨmɨe. Iemona dama ie ɨ́aɨfuiaɨ muiñolle tóɨca rɨlle jɨáɨmacɨ fécajilla izói, afémɨe jɨáɨ fécajirede. Ua nana comɨnɨ dɨbéfodo izáɨbilla izói, dama íeɨena afémɨe izáɨbirede. 
\p  
\v 4 Afe ɨere ñuera Juzíñamuimo úriraɨmana íllena, buna dama ie comecɨ jitaina izói ínide; dama Juzíñamui jóonegamɨe daɨí írena. Afémɨe caɨmare jacɨ́ruigamɨe. Jaiáidɨruimo daɨí Juzíñamui Aarona uáidote. Uáiduano, Juzíñamui íena nɨzeda úritɨllaɨmana jóonete.  
\v 5 Afe izói Jesucristo Juzíñamuimo comɨ́nɨdo úriraɨmana íllena raɨre dama uícoficaiñede. Mei íadɨ Juzíñamui daɨí úritɨllaɨmana ie jóoniacana llezica íena daɨde: 
\q1 Cue jitódɨo; ja birui illáɨmana o jóoneitɨcue, daɨde. 
\m  
\v 6 Ie mei daɨí daɨnámɨena Juzíñamui jɨáɨnomo nane daɨde: 
\q1 Jaca nɨnomo Juzíñamuimo comɨnɨ dɨbéfodo úriraɨmadɨo. Ua jaiai nɨnomo Juzíñamuimo úriraɨma Melquisedec izói jaca nɨnomo Juzíñamuimo comɨnɨ dɨbéfodo zíiñona úriraɨmana íitɨo. 
\m Aquíe izói Juzíñamui ie Jitó Jesuna daɨde.  
\v 7 Cristo caɨ come izói bie énɨedo jáicaillaruillaɨdo, izire éecana Juzíñamuimo comecɨ facade. Iemo dáaruido Juzíñamuimo izire jɨcade. Afémɨe daɨí íena jíllotaredɨmɨemo comécɨdo úrite; daɨde: “Bie cue tɨ́iacanafuemona mai cue jíllota” daɨde. Iemo Moo Juzíñamui anamo afémɨe ñue itábicaillamona comécɨdo Juzíñamuimo ie jɨ́cajana Juzíñamui cacade.  
\v 8 Daɨí Jesucristo Juzíñamui Jitó íadɨ, ie duere zefuíllafuiaɨdo ocuilla uai anamo itábicaillana fɨbide.  
\v 9 Afemona afémɨe daɨí nana caɨ jílloillɨfue ñue fuitállena jamánomo jaɨ́cɨna fɨbítagamɨena jaide. Ie jira nana íemo ɨ́ɨnotɨmacɨ dɨbénemo Jesús zíiñona Jíllotaraɨmana jaide. Ua zíiñona jíllonafue taɨnédɨmɨena jaide.  
\v 10 Mei jira Melquisedec izóidɨmɨe Juzíñamuimo comɨnɨ dɨbéfodo ziiño úrifɨreitɨmɨena, Jesús jae Juzíñamui mamécamɨe. 
\s1 Caɨ ɨ́ɨnogafue meine abɨdo caɨ jáanolle ɨere jacɨ́rede 
\p  
\v 11 Bífuiaɨdo aillo úriacadɨcue, mei íadɨ ɨere cacáacañedɨomoɨ. Iemona naɨ fɨgo baitáñedɨno izói itɨ́omoɨ. Daɨí omoɨ íllamona, bífuiaɨ ómoɨmo jino cue llolle ɨere féirede.  
\v 12 Naui nano Crístomo omoɨ ɨ́ɨnuaruimona jae dɨga fɨmona jaide. Iemona jae oni jɨáɨmacɨmo omoɨ llófuerizaille ɨere jitáirede. Mei jɨáɨfodo ja birui meine abɨdo Juzíñamui llogáuai taɨnéinafuiaɨna ómoɨmo jɨáɨma llófuelle jitáirede. Naɨ monoɨ jirode úrue izói meine abɨdo úruetaidɨomoɨ; naɨ fɨgo baitáñedɨno izói itɨ́omoɨ. Ua llɨ́cɨaɨna naɨ rɨ́nide izóidɨnona abɨdo jáidɨomoɨ.  
\v 13 Mei jɨɨ, naga monoɨ jirófɨredɨno, móonaiñena llezica naɨ dúetiru. Daje izói naga Juzíñamui anamo ñue jaɨ́cɨna caɨna móonaitade llófueinafue dɨbénemo baitáñedɨmɨe naɨ úrue izoide. Mei afémacɨ naɨ móonaiñeno úruiaɨ izói baitáñediaɨoɨza.  
\v 14 Mei jɨáɨfodo dama móonaite éicomɨnɨ llɨ́cɨaɨna rɨ́rena. Afe izói juárede llófueinafue ñue onona dama comécɨna ñue jéedɨmacɨmo dúide; mei afémacɨ aillo facáfɨrenamona ñúefue fɨénidɨfue baɨmo ñue onónana fɨbídiaɨoɨza. 
\c 6  
\p  
\v 1 Ie jira afe nánoide Cristo dɨbéfodo llogáfuiaɨ ómoɨmo llúana ja mozíñocaidɨcue, jɨáɨe cómofue ómoɨmo jino cue llóllena. Omoɨmo cue llolle bie cómofue, Juzíñamui llogáuaillaɨdo ómoɨna ñue jaɨ́cɨna móonaitaite. Aféfuiaɨ mai jeire caɨ ollɨ. Nano uícodo lloga ñúefue jillácɨna meine abɨdo dɨga icaiño ómoɨna llófueñeitɨcue. Afe nanóidɨfuiaɨ bie izói daɨde: “Omoɨna jíllotañeite omoɨ nɨ́cɨdogafuiaɨ fáɨcanocaillano ñúefuena méidori. Méiduano, mai Juzíñamuimo omoɨ ɨ́ɨnori,” daɨde.  
\v 2 Iemo afe nanóidɨfuiaɨ báutizaafuedo úrite. Iemo dáanomo onoɨ cómemo bɨ́tafuedo úrite. Daje izói come tɨ́ille mei, afe tɨ́idɨnomona meine abɨdo cáaillɨfue llote. Afe emódomo, íiraɨruimo Juzíñamui nana comɨ́nɨmo jɨcánolle mei zíiñona duere fɨnótallɨfuedo úrite.  
\v 3 Nana bie nanoide llogáfuiaɨna meine abɨdo llófueñeitɨcue. Mei íadɨ, Juzíñamui comecɨ jitaina izói, afémɨe cue canólledo, ñue móonaitadɨfuiaɨna omoɨ llófueitɨcue. 
\p  
\v 4-6 Daɨí birui ómoɨmo llófueacadɨcueza, mei nanóidɨfuiaɨna uáitajano oni jɨáɨfodo féiraitɨmɨiaɨ íaɨoɨ illafue nano ñue ɨ́ɨnogafuena jaca méidonide; mei afe ñúefuena naɨ náfueñediaɨoɨza. ¡Mai, abɨ omoɨ rairuiri! Afe daɨítadɨmacɨ naui dáaruina Juzíñamui llófuegamacɨ izóidiaɨoɨ; ua Juzíñamui dɨbénedo ɨfócɨna déitaganona itíaɨoɨ. Daje izói, monamo ite Juzíñamui daɨna caɨmátallɨfuena facádiaɨoɨ. Iemo daje izói afémacɨ Juzíñamui Ñuera Joreño úicaillana jae facádiaɨoɨ. Afe llezica Juzíñamui ebírede daɨnáuai cómena ñúetatɨfuena afe íaɨoɨ fácamona, ñúerana onódiaɨoɨ. Afe emódomo, Juzíñamui Jitó uire illáɨmana illɨrui llezica, íemo ite comɨnɨ cáɨmadolle rɨ́inodo jae bimacɨ canócaiaɨoɨ. Jae nana bie núefuiaɨna fɨbídiaɨoɨ. Mei íadɨ afe mei Juzíñamui ífuiaɨna móonaitaoiñeno, aféfuiaɨana íaɨoɨ uáitaiadɨ ñúefuena méidofɨnidɨnona jáidiaɨoɨ; mei daɨí afémacɨ íllamona Juzíñamui Jitona cruzmo fatátatɨmacɨ illa izói afémacɨ danɨ itíaɨoɨza. Ua naɨraɨ uiécori íena jɨfánodoɨa izói íena meáidaitadiaɨoɨ.  
\v 7 Bie izoide comɨnɨ comue jacafaɨ aiñena izoide. Juzíñamui bɨ́itaga nocɨ naga énɨemo dɨga ícaiño bɨide. Iemona afe énɨemona ñue ria aite, afe énɨemo táɨjɨdɨno güíllena. Afénɨena Juzíñamui ézɨcɨte.  
\v 8 Iadɨ jɨáɨnomo nocɨ bɨilla mei, daa fɨgóñede éegɨaɨ ailla, naa zaɨe dɨga. Afe izóidɨnɨe ráifiñedeza; nɨbaɨ íanori íllamona Juzíñamui fáidoite. Iiraɨnomo afénɨe jobáillamo dúide, naa afénomo zɨcódɨnuaɨri mei fɨgóñedeza. 
\s1 Caɨ úiñoigafue caɨna rɨire nabaide caɨ ɨ́ɨnogafue féiñellena 
\p  
\v 9 Mei íadɨ cue izíruiga ámatɨaɨdɨomoɨ. Jae cue lloga faidórafue baɨmo jamánomo ñúefuiaɨ dɨbénemo jaɨnáidɨomoɨ. Ua omoɨ jíllonafuemona comuide cáɨmaduafuiaɨ maiñófɨredɨomoɨza. Aféfuena ñue onódɨcue.  
\v 10 Juzíñamui comécɨna jaɨ́cɨna jóidɨmɨe. Iemona nana íena omoɨ izíruillamona omoɨ fɨnoca Juzíñamui comɨnɨ cánua ráanɨaɨna, afémɨe féitañede. Daje izói aféfuiaɨmo naɨ birui jiéruitɨomoɨ. Ua Juzíñamui jaɨnáidɨnona izíruillano, ñue afémacɨna rɨire canófɨredɨomoɨ.  
\v 11 Ie mei birui afe izire omoɨ nɨ́cɨdua izói, daje izói ómoɨmona illa dɨ́gamɨeriena Juzíñamuimo ocuíriri daɨdɨcue. Iemona omoɨ ɨ́ɨnogafuiaɨ jeire ómoɨna otátaacadɨcue, omoɨ úiñoigafue táɨnomo fáɨfiñeillena, mei jɨáɨfodo ñue jaɨ́cɨna omoɨ fuitállena. Afemo ómoɨna nágarui izire comécɨiri daɨdɨcue.  
\v 12 Daɨí izire omoɨ comécɨioillamona ráiraɨedɨno illa izói íñeitɨomoɨza. Mei omoɨ ñue comécɨillamona, jɨáɨfodo daade Juzíñamui lloga ua caɨmare illafue dɨbénemo itɨno illa izói íitɨomoɨza. Afémacɨ íaɨoɨ ɨ́ɨnogafuedo íaɨoɨ abɨna ñue fɨnóinafuena Juzíñamuimona otíaɨoɨ. Ua comecɨ járitaiñeno are illa ɨ́coɨmo Juzíñamui uícodo íaɨoɨmo lloga ñúefuena maiñórioidiaɨoɨ. Iaɨoɨ illáfuemo ñue omoɨ comécɨiri, íaɨoɨ illa izói omoɨ íllena. 
\p  
\v 13 Mei jɨɨ, Juzíñamui ɨere ɨ́ɨnofɨregamɨe. Jaiai Abraham illáruimo Juzíñamui uafue uai Abrahamo llote. “Aillo comɨnɨ jebuítaitɨo” jaiai uícodo íemo llote. Llua llezica uafue daɨíllena Juzíñamui dama ie mámecɨna llɨ́ɨnote, aféfuena Abraham ñue ɨ́ɨnollena. Ua Juzíñamui dama ie mámecɨna llɨ́ɨnote, mei jɨáɨe baɨmo jamánomoidɨmɨena iñédeza.  
\v 14 Daɨí Juzíñamui Abrahana daɨde: “Uafue ɨere ona ñue caɨmátaitaitɨcue. Jae cue o jitóretallemona, o erófene igɨ́mana jamánomo ɨere jebuítaitɨcue,” daɨde.  
\v 15 Iemona Abraham comecɨ raɨre járitaiñeno, dɨga fɨmona áfemo úiñooide. Daɨí ie ocuírina mei, afe Juzíñamui lloga caɨmare ie naɨraɨ jebuíllɨfuena Abraham ñue maiñódeza.  
\v 16 Bínɨe comɨnɨ cɨ́gɨmona dáamɨe uáfuena daɨíacana llezica, afémɨe baɨmo rɨíredɨmɨe mámecɨdo uafue daɨítate. Daɨí lloga uaina buna oni caitáiñede. Nana danɨ íaɨoɨ júfidogana záitate.  
\v 17 Daje izói Juzíñamui ie lloga fɨnóllɨfue, jɨáɨe ñue rɨírede uaido, aféfuena ɨere uafue daɨde. Afémɨe daɨí dáɨdeza, mei ie uícodo lloga ñúefuena máiñoitɨnomo, afefue ua jɨáɨfodo méidonidena jino íaɨoɨmo uáfodo llóiacadeza.  
\v 18 Daɨí Juzíñamui mena caitánide uáillaɨdo íaɨoɨmo llote. Afe ménacaiño ie daɨna dɨbénemo Juzíñamui táɨnona llónide. Afémɨe daɨí daɨde, áfemona caɨ comécɨna ñue íocɨretallena. Iemona caɨmo ie lloga ñue caɨ jíllonafuemo fáɨcanocaiñeno ɨ́ɨnofɨredɨcaɨ. Mei jɨɨ, caɨ Jíllotaraɨma Jesucrístomo jarire jaillano caɨna ie úiñotaga comecɨ ɨ́aɨfue dóllena raɨre íemo jɨcádɨcaɨ, caɨmo ite fɨénidɨfue ɨba óñeillena.  
\v 19 Afémɨe caɨ jíllotallena caɨmare úiñoidɨcaɨ. Iemona afémɨe caɨna daɨnáuai caɨ comecɨ nɨ́fuenina ñue mozíoitade. Ua caɨ úiñoigafue caɨna rɨire nabaide caɨ ɨ́ɨnogafuiaɨ féiñellena. Daɨí comecɨ docáiñeno ñue rɨire nabáitaga jacɨ́ruiñedɨnodɨcaɨ. Mei caɨ jíllotaite caɨ úiñogamɨe Jesús, caifo monamo Juzíñamui nahí ie iránomo íteza.  
\v 20 Afe Jesús, caɨ jáillɨo ɨfódɨmɨena afénomo jae jaide. Daɨí íllamona afémɨe jae comɨ́nɨdo Juzíñamuimo zíiñona úritɨllaɨmana jaide. Ua, jaiai Juzíñamuimo úriraɨma Melquisedec izóinado, Jesús jaca nɨnomo caɨdo úrite. 
\c 7  
\s1 Jesús, jaiai Melquisedec illa izói comɨ́nɨdo Juzíñamuimo úriraɨma 
\p  
\v 1 Afe Melquisedec Salem jofue illaɨma. Afe llezica afémɨe comɨnɨ dɨbéfodo jamánomoide daade Juzíñamuimo úrifɨredɨmɨe. Jaiai illáruimo Abraham jɨáɨe afénɨemo ite illáɨnɨna anáfenuaide. Iaɨoɨna anáfenuano Abraham meine bítemo, afe Melquisedec io anamo Abrahamo dúcɨzaide. Dúcɨillano Melquisedec, Abraham abɨ ñue fɨnóllena Juzíñamuimo jɨcade.  
\v 2 Afe llezica Abraham nana ie baɨroca ñuera ráanɨaɨmona, Juzíñamui íena eneno mameca ráanɨaɨna, Melquisedécɨmo raiñóñeno fia fecade. Melquisedec nanoide daɨna mámecɨ “Comécɨna jaɨ́cɨnaidɨllaɨma” fueñe daɨíacade. Ie mei afémɨe nane jɨáɨcɨ ote: “Salem Illaɨma.” Afecɨ “Comɨnɨ comécɨna caɨmare uái itátatɨllaɨma,” daɨíacade.  
\v 3 Afe Melquisedec moo mámecɨ jaca onónide, naa ie ei mámecɨ dɨga. Daje izói ie emódoidɨgɨma jɨáɨ ónoñega. Daje izói afémɨe jocóinarui ónoñega, ie tɨ́illarui dɨga. Iemona afémɨena comɨnɨ “Zíiñona itɨ́mɨe” daɨde. Afe Melquisedec comɨnɨ cɨ́gɨri illáfuedo Juzíñamui Jitó zíiñona caɨ dɨbéfodo úriraɨmana illáfuena caɨna fɨdɨ́tate. 
\p  
\v 4-5 Mai bífuemo ñue omoɨ comécɨri, Melquisedécɨmo ite jamánomoidɨfuena omoɨ onóillena. Ua Melquisedec, caɨ nanoide jáiairagɨma Abraham baɨmo jamánomoidɨmɨe. Mei Abraham ie baɨroca ráamona Melquisedécɨmo fecádeza. 
\p Abraham enaize Jacob doce dɨ́gade jitórede. Iemo afe jitónɨaɨ cɨ́gɨmona Leví comuídeza. Afémɨe comɨnɨ dɨbéfodo Juzíñamuimo úrillena Juzíñamui nɨzeda ogámɨe. Ie jira nana judíuaɨ Juzíñamuimo úriraɨnɨ Leví úicoidɨgɨmamona comuítagaiaɨoɨ. Afe Juzíñamui nɨzeca Leví náɨraɨna, Juzíñamui Moisés ocuica uaido daɨde: “Nana jɨáɨe judíuaɨ naɨraɨ imácɨmona Juzíñamuimo dúide ráanɨaɨna óredɨomoɨ,” daɨde. Ua Leví náɨraɨmo ɨbárede, nana jɨáɨe Israel naɨraɨ daa Abrahámona comuídɨno íadɨ. Ie jira Leví comɨnɨ nana afe Juzíñamuimo dúide ráanɨaɨna llɨ́ɨnofɨrediaɨoɨ.  
\v 6 Mei íadɨ afe Melquisedec, Leví naɨraɨ izíe íeñede. Mei íadɨ afémɨe áfena llɨ́ɨnoñeniadɨ afe Melquisedec, Leví emódoidɨgɨma Abrahámona Juzíñamuimo dúide ráanɨaɨna uáfuena llɨ́ɨnote. Iemona Melquisedec Leví baɨmo jamánomoidɨmɨeza onódɨcaɨ. 
\p Afe ráanɨaɨ ie llɨ́ɨnua llezica, Melquisedec Abrahamo úrite. Abraham Juzíñamui íemo ñue fɨnóllɨfue, uiécodo fɨdɨ́tagamɨe. Iemo ja birui Melquisedec afémɨe ñue ézɨcɨano daɨde: “Juzíñamui ona ñue cánoiteza,” daɨde.  
\v 7 ¿Nɨbémɨe mei jamánomoidɨmɨena? ¿Ezɨcɨtɨmɨe mei nɨbaɨ ézɨcɨgamɨe? Ua, ézɨcɨtɨmɨe baɨmo jamánomoina. Afefue buna jáanoñega.  
\v 8 Nane jɨáɨfue llóitɨcue. Caɨ cɨ́gɨmona eneno nɨzeca Leví comɨnɨ, Juzíñamui íena nano mameca ráanɨaɨna llɨ́ɨnofɨredɨno. Mei íadɨ afémacɨ fia comɨ́nɨza tɨífɨrediaɨoɨ. Mei jɨáɨfodo afe jɨáɨe llɨ́ɨnotɨmɨe Melquisedécɨna mámecɨredɨmɨe Juzíñamui Cuegáuai daɨna izói, tɨ́iñeno caade izóidɨmɨe. Ie jira Melquisedec jamánomo báɨmoidɨmɨe. Leví imacɨ naɨ Melquisedec jofófeneidɨno.  
\v 9 Iemo jɨáɨfue Levido daɨírede. Leví Abraham erófene igɨma. Mei íadɨ afe Juzíñamui íena eneno mameca raana llɨ́ɨnofɨredɨmɨe jaiai uícodo Melquisedécɨmo ie uzuma Abrahamdo Juzíñamuimo dúide raana ɨbade. Daɨí Leví comɨnɨ, jaiai uiécodo Juzíñamuimo dúide raana Melquisedécɨmo ɨbádiaɨoɨ.  
\v 10 Mei Leví naɨ jocóñena llezica ie comuíllɨno naɨ Abrahamo íteza. Ua Melquisedec ja Abrahamo dúcɨnaruimo, Leví jocóillɨno naɨ jaca ie nanoide uzúmamo ite.  
\v 11 Israel náɨraɨmona eneno nɨzécazie Leví comɨnɨ. Aféziemona nɨzeca nanoide Juzíñamuimo úriraɨma Aarón. Afémɨe naa ie erófene igɨ́maɨri comɨ́nɨdo Juzíñamuimo úriraɨnɨ. Ie jira afe úriraɨnɨdo Israel naɨraɨ Juzíñamui ocuilla uáillaɨna llogáiaɨoɨ. Mei íadɨ nana afe Juzíñamuimo úriraɨnɨ fɨnócafuiaɨ comɨnɨ ua zíiñona jílloillena fɨgo jínoiñede. Comɨnɨ comécɨna Juzíñamui jítaina izói nahí jaɨ́cɨna jóoitañede. Aarón naa ie erófene igɨ́maɨri fɨnócafuiaɨ fɨgo jínoñena jira, jɨáɨe afémɨe izóiñede baɨmo jamánomoidɨmɨena jitáidɨcaɨ, afémacɨ méifomo jóonellena. Ua Melquisedec zíiñona illa izóidɨmɨena jítaidɨcaɨ. (Ie jira afe Aarón comɨnɨ meifo méidoitɨmɨena Juzíñamui jae jino náɨraɨmo cɨ́otate. Afémɨe mámecɨ Jesucristo. Ua Aarón comɨnɨ méifomo jóonegamɨe Melquisedec izóidɨmɨe Jesús; afémɨe Aarón dɨbéfomo jaɨnáiñede.)  
\v 12 Jae afe jaiai uícomo ite Juzíñamuimo úriraɨnɨ nana dáanomo jɨáɨena íaɨoɨ méidua llezica, afe Moisés íaɨoɨmo ocuica uaillaɨ daje izói jɨáɨfodo méidorede.  
\v 13 Juzíñamui Cuegáuai daɨí daɨnámɨe caɨ Ocuíraɨma Jesucristo. Afe como jóonega Juzíñamuimo caɨdo úriraɨma Jesús, Leví naɨraɨ ímɨeñede. Jɨáɨziemona comuídɨmɨe. Ie naɨraɨ ímɨiaɨna jaca nɨzéñega, Juzíñamuimo comɨ́nɨdo úrillena. Ua comɨnɨ fia fecaca tóɨca rɨ́llenɨaɨ naa ráanɨaɨ dɨga Juzíñamuimo izájillena, nɨ́zeñegaiaɨoɨ.  
\v 14 Ñue onóigaza caɨ Ocuíraɨma Jesús Judá náɨraɨmona comuídɨmɨe. Moisés afe náɨraɨmo Juzíñamuimo úriraɨnɨna íllena, jaca lloñede. 
\p  
\v 15 Afe jɨáɨe como jóonega comɨ́nɨdo Juzíñamuimo úriraɨma Jesús, jino cɨóillamona, bífuiaɨna jino uáfodo baɨmo onódɨcaɨ; mei dama afémɨe Melquisedec izóinaza.  
\v 16 Bímɨe dama ie ñue zíiñona ífɨrenamona comɨ́nɨdo Juzíñamuimo úriraɨmana jaide. Mei jɨáɨfodo Leví náɨraɨmona jaiai nɨzeca Juzíñamuimo úriraɨnɨ ocuica uai dáɨnado úriraɨnɨna jáidiaɨoɨ. Afe uai nɨɨe náɨraɨmona nɨzéllena llote.  
\v 17 Mei íadɨ como jóonegamɨe Jesuna Juzíñamui ñue rɨírede nabáitaja uaido daɨde: 
\q1 “Melquisedec izói jaca nɨnomo Juzíñamuimo comɨ́nɨdo zíiñona úriraɨmana ja birui itɨ́oza,” daɨde. 
\m  
\v 18 Iemona afe uícodo ite ocuica uai jae oni caitaca, mei afe uai rɨínideza. Iemo jɨáɨ, aféuai comɨnɨ comecɨ nahí duáfuena fɨgo jínotanideza.  
\v 19 Afe Moisés ocuica uai buna comécɨna nahí jaɨ́cɨna fɨnóñede. Mei jɨáɨfodo jɨáɨe aféuai baɨmo, ñuera caɨ jíllotaite úiñoigamɨe Jesucristo jae caɨmo cɨ́otaga. Afémɨedo Juzíñamuimo áɨnozifɨredɨcaɨ, uáfodo Juzíñamuimo caɨ úrillena. 
\p  
\v 20 Afe Jesucristo Juzíñamui rɨire nabáirede uaido jóonega.  
\v 21 Ie uícodo Juzíñamuimo úriraɨnɨna jáidɨno, rɨírede uaido jóoneñegaiaɨoɨ. Mei íadɨ Jesús comɨ́nɨdo Juzíñamuimo úriraɨmana jáillaruimo, Juzíñamui rɨire nabaica uaido ja daɨí mameca. Mei Juzíñamui ie Cuegáuaimo Jesudo úrite, daɨde: 
\q1 “Cue Juzíñamuidɨcue. Bifue rɨire cue nabaica uaido daɨdɨcue. Cue comecɨ faca uai jaca jɨáɨuaina méidoñeitɨcue. 
\q1 O zíiñona comɨ́nɨdo Juzíñamuimo úriraɨmana itɨo; 
\q1 Ua Melquisedec izóidɨmɨedɨo,” daɨde. 
\m  
\v 22 Ie jira Jesucristo, Juzíñamui jamánomo ñuera caɨmo comue fɨnóllɨfue caɨna ñue onótate. Ua Jesucristo aféfuemo ɨere uafue daɨde. Afe fɨnóllɨfue Moisés lloga nanoide fɨnóllɨfue baɨmo ñuera.  
\v 23 Jesucristo uícoidɨruillaɨmo ite Leví náɨraɨmona nɨzeca Juzíñamuimo úriraɨnɨ ua aillo ite; mei íaɨoɨ tɨ́coɨzifɨrenamona jaca jɨáɨmɨena méidofɨregaiaɨoɨ.  
\v 24 Mei íadɨ Jesús caɨ dɨbéfodo Juzíñamuimo úrillana, jaca jɨáɨmɨena méidonide; mei afémɨe jaca nɨnomo zíiñona itɨ́mɨeza.  
\v 25 Iemona Jesús nana íedo Juzíñamuimo úrizaɨbitɨnona, jaca nɨnomo jaɨ́cɨna ñue jíllotarede, mei afe Jesús, íaɨoɨri Juzíñamuimo zíiñona úriraɨmana íllaza. 
\p  
\v 26 Ua, afémɨe izoide Juzíñamuimo comɨ́nɨdo úritɨllaɨmana jaiai nɨnómona jitáidɨcaɨ. Ñue caɨ jílloillɨfue afémɨe caɨmo ñue zúitaitɨmɨe, mei afémɨe nahí ñuera nɨ́fuenidɨmɨeza. Afe llezica afémɨe nana fɨénidɨmacɨ ɨ́aɨfuemona oni eneno rairuícamɨe. Ie mei afémɨe mona ero úcuaɨ illa caifomo, Juzíñamui nahí illánomo uigámɨe.  
\v 27 Jaiai uícomo ite Juzíñamuimo úritɨllaɨnɨ nágaruillaɨdo tóɨca rɨ́llenɨaɨna fatá Juzíñamuimo izájifɨrediaɨoɨ. Nano fueñe danɨ íaɨoɨmo ite ɨ́aɨfue ɨ́coɨnia áfenɨaɨna izájidiaɨoɨ. Afe mei comɨ́nɨmo ite ɨ́aɨfue ɨ́coɨnia áfenɨaɨna izájifɨrediaɨoɨ. Mei íadɨ Jesús afe izói fɨ́nuana jitáiñede. Afémɨe dácaiño nana comɨnɨ ɨ́aɨfue ɨ́coɨnia dama ie abɨ Juzíñamuimo fecade. Ua cruzmo ie duere zefuida tɨ́illado abɨ fecade.  
\v 28 Afe Cristo uiécodo lloga ocuíllafuedo llotɨno, jɨáɨe jamai fɨgo nahí jaɨ́cɨna fɨnótañede comɨ́nɨmona Juzíñamuimo úritɨllaɨnɨna mamédiaɨoɨ. Mei jɨáɨfodo, afémacɨ méifomo jóonega úritɨllaɨma Jesucristo, Juzíñamui ñue rɨire nabaica uaido jóonega. Afémɨe jaca nɨnomo nahí jaɨ́cɨnaitaga Juzíñamui Jitó. 
\c 8  
\s1 Juzíñamui caɨmo cómuena fɨnóllɨfue, Jesús caɨmo jino denódɨmɨe 
\p  
\v 1 Nana caɨ daɨnáfuiaɨmona llógana bie ñue nahífuena ómoɨmo llóitɨcue: Como lloga caɨmo ñue jóobide caɨdo Juzíñamuimo úriraɨma birui ja caɨmo ite. Afémɨe caifo monamo ite Juzíñamui nabézimo ráɨnazaide.  
\v 2 Dɨnomo Juzíñamui nahí illánomo Jesús íllamona, jamánomo ñuera Juzíñamui uiécomo Jesús caɨdo úricabite, caɨ jílloillɨfue ñue caɨmo zúillena. Afe Juzíñamuimo caɨ nahí áɨnozirano comɨnɨ fɨ́noñega. Jaiai bínɨemo ite Juzíñamuimo áɨnoziraco comɨnɨ niga.  
\v 3 Naga Juzíñamuimo úritɨllaɨma, fia iga ráanɨaɨ, tóɨca rɨ́llenɨaɨ dɨga Juzíñamuimo fecáfɨreitɨmɨena mameca. Ie jira caɨ dɨbéfodo Juzíñamuimo úriraɨma Jesús, daje izói dama ie fécajille raa jitáirede.  
\v 4 Bínɨemo afémɨe nɨbaɨ abɨdo ie bia, afémɨe caɨdo Juzíñamuimo due jiza úriraɨmañeite, mei Moisés ocuícauai daɨna izói Juzíñamuimo caɨdo úriraɨnɨ bínɨemo naɨ íteza. Daje izói bimacɨ naɨ benó Juzíñamuimo fia fecaca raana íemo izájifɨrediaɨoɨza. (Ie jira caɨdo ziiño úriraɨma Jesús, caifo monamo Juzíñamuimo caɨ ie canólledo úricabite.)  
\v 5 Bínɨemo ite Juzíñamuimo úriraɨnɨ aillo ráfuiaɨdo nɨ́cɨdotiaɨoɨ. Nana íaɨoɨ nɨ́cɨdogafuiaɨ jánana mameide. Iaɨoɨ fɨnócafuiaɨ caifo monamo ite Juzíñamui nahífuiaɨna caɨna fɨdɨ́tate. Daje izói bínɨemo ite jaiai Juzíñamuimo áɨnoziraco, Juzíñamui nahífuena caɨ fɨdɨ́taraco. Afena onódɨcaɨza, mei Moisés afeco nitátaacanaruimo, Juzíñamui íena daɨde: 
\q1 “Caifónedumo o illa llezica omo cue ácataga afécona o cɨona izói, afe izói jaɨ́cɨna mai o niiri,” daɨde. 
\m  
\v 6 Mei íadɨ bínɨemo ite Juzíñamuimo úriraɨnɨ nɨ́cɨdogafue ɨere afe baɨmo, caɨ caifo monamo ite úritɨllaɨma Jesús caɨdo jamánomo ñúefuena nɨ́cɨdote. Mei jɨɨ, afe Jesucristo caɨmo zuitaca Juzíñamui ñuera caɨri comue fɨnóllɨfue, jaiai Moisés lloga fɨnóllɨfue baɨmo ñuera. Mei Moisés ocuica uai baɨmo, Juzíñamui uícodo lloga cómofue jamánomo ñuera uáimona comuídeza.  
\v 7 Afe Moisés lloga nanoide fɨnóllɨfue, comɨnɨ jílloillena ñue jínoiadɨ, jɨáɨe uire iite ñue fɨnolle uai jítaiñeitiaɨoɨ. Mei íadɨ afe naonide uai íaɨoɨ jílloillena fɨgo jínoñede.  
\v 8 Afe nano ocuica uai jeire otɨno nahí jaɨ́cɨnaidɨfuemo fɨgo dúcɨñediaɨoɨ. Dúcɨñediaɨoɨmona, Juzíñamui ie Cuegáuaimo íaɨoɨna daɨde: 
\q1 “Uire jɨáɨruido nana Israel náɨraɨmo comue ñue cue fɨnóllɨfue ócuitɨcue, naa Judá náɨraɨri. 
\q1  
\v 9 Jaiai íaɨoɨ uzútɨaɨmo cue daɨna ocuica uai izói, ócuiñeitɨcue. 
\q1 Jaiai aféruillaɨdo Egipto énɨemona afémacɨ billa llezica íaɨoɨna ɨfódɨcue: 
\q1 Ua afémacɨna izire úicaidɨcue. 
\q1 Mei íadɨ cue lloga ocuica uaina nano íanori fáɨcanocaillano, áfena fɨgo náfueñediaɨoɨ. 
\q1 Afe jira íaɨoɨna zóofetɨcue,” Juzíñamui daɨde. 
\m  
\v 10 Naɨ nane íaɨoɨna lluano Juzíñamui daɨde: 
\q1 “Uíreitɨruillaɨdo Israel imácɨmo bie izói cue ñue comue fɨnóllɨfue ócuitɨcue. 
\q1 Aféruillaɨdo cue ocuica uáillaɨna íaɨoɨ ɨfócɨmo jaɨ́cɨna déitaitɨcue. 
\q1 Ua aféuaina íaɨoɨ comécɨdo jeire íaɨoɨna otátaitɨcue. 
\q1 Iemona afémacɨna dama cúeɨena nane meine abɨdo máiñoitɨcue. 
\q1 Afe llezica íaɨoɨ nahí Juzíñamuina íitɨcue. 
\q1 Iemo cue náɨraɨna íitiaɨoɨ. 
\q1  
\v 11 Aféruillaɨdo nana afémacɨ uáfodo ñue cuena ónodiaɨoɨza, cuena íaɨoɨ onóillena abɨ dɨné jɨáɨma llónide. 
\q1 Iemona ie abɨ ímɨiaɨmo buna Juzíñamuina onótanide. Daje izói dámɨe ie ámamo Juzíñamuina onóillena llóñeite; mei nana cuena ónodiaɨoɨza. 
\q1 Naga jamáimɨe, íemo jɨáɨ naga jamánomoide rɨíredɨllaɨma, nana daje izói cuena ónoitiaɨoɨ. 
\q1  
\v 12 Nana íaɨoɨmo cue dúecaillamona íaɨoɨ fɨeni fɨnócafuiaɨ ɨbana óñeitɨcue. 
\q1 Nana íaɨoɨ comecɨ ɨ́aɨfuiaɨna jaca nɨnomo féitaitɨcue. 
\q1 Aféfuiaɨna úibiñoñeitɨcue,” dɨnó Juzíñamui daɨde. 
\m  
\v 13 Bie méifodo lloga Juzíñamui fɨnóllɨfue, cómofuena méiduamona, afe uícodo Moisés lloga fɨnóllɨfue jae jaiáiza feide. Afena Juzíñamui daɨí uáfodo llote. Iemo naga jaiai raa zabízaillamona raɨre oni dotánocaiga; oni dotánocailleza cɨ́oñelle. 
\c 9  
\s1 Bínɨemo ite Juzíñamuimo áɨnozirano, jana izói jɨáɨe monamo ite Juzíñamuimo áɨnozirano caɨ fɨdɨ́tate 
\p  
\v 1 Afe naui nano lloga fɨnóllɨfue llua llezica, Juzíñamui íemo áɨnoziraco nitátate. Afe nitátaja dáaruido, comɨnɨ Juzíñamuina ióbitalle uaillaɨ afémacɨmo daje izói lloga.  
\v 2 Afe lloga Juzíñamuimo áɨnoziraco Moisés nitátaga. Afeco ere niñeno jédacɨede ɨníroina ɨbáicaco. Afe áreco ero ménaco tɨtaca. Jinóidɨco Juzíñamui Ñúeco daɨna. Afeco eromo áillue mechera izoide egáñora ite. Siete dɨga dájemona boode raa ite. Dáanomo Juzíñamui dɨbénemo oni enénorie rairuica pan jóonerabani ite, naa afe páanɨaɨri.  
\v 3 Afe áɨnoziraco jofóidɨco Jamánomo Ñuera Rairuícaco daɨna. Afe jofóidɨco daje izói jédacɨede ɨníroina ruica dɨné eróicana nacona ɨbaica. Jédacɨede jɨ́garoi izóidena fetaca.  
\v 4 Afe fetaca jédacɨroi abɨmo ugucɨ jobáirabani ite. Bibani llɨ́aɨde órona jinófene aɨfítaga. Bie jofóidɨco eromo daa áillue ráanɨaɨ éenora ite. Cajona eroide. Afe éenoraco nana jinófene órona aɨfítaga. Afe éenoraco eromo Juzíñamui nofɨcɨ ibɨ́cɨmo cuega ocuica uaillaɨ ite. Ie jira afeco nofɨ́bɨcɨmo cuega Juzíñamui caɨ ocuilla éenuacona mameina. Iemo afénomo daa oro fɨnoina nogo ite. Afégomo ite Juzíñamui monámona cocɨ́taga güille. Afe güille mámecɨ maná. Daa afe éenoracomo Aarón jɨgüida izoide radozi ite. Afe idozi jamai jazicɨ radozi óinaza dúidɨdozi. (Zɨ́corede juzítofe izóiñede.) Mei íadɨ Juzíñamui afe idózina énɨemo riñeno, fia táɨnomona zɨcótano raɨre ñue llɨzítate.  
\v 5 Afe éenoraco ɨbáirabɨcɨ emódomo mena oro fɨnoina Juzíñamui abɨ imácɨna eroide jana naidáide. Mei íadɨ afe íaillɨnoɨ iáicorede. (Afe íaillɨnoɨ mámecɨ rɨ́aɨmona “Querubines.”) Afe íaillɨnoɨ conima uiécomo eróidiaillɨnoɨ. Iaillɨnoɨ naidaina cɨ́gɨmo Juzíñamui cɨ́ocaifɨrede. Afe Juzíñamuina cɨóñenaza; dama ie abɨ egáñuana cɨófɨrena. Afénomo faga tóɨnɨaɨ dɨ́ena recuífɨrediaɨoɨ. Daɨí recuífɨrediaɨoɨ, Juzíñamui meine abɨdo comɨ́nɨmo dúecaillano, íaɨoɨmo ite fɨénidɨfue ɨba íaɨoɨmo óñeillena, ua afe ɨ́coɨnia íaɨoɨna duere fɨ́noñeillena. Nana afe dɨbénemo ite duera nɨ́cɨdogafuiaɨna ja birui benomo llónide. 
\p  
\v 6 Afe ocuica áɨnoziraco nilla mei, íemo naa ie jofo ero ráanɨaɨri fɨ́nua mei, comɨ́nɨdo Juzíñamuimo úriraɨnɨ jinóidɨcomo jáifɨrediaɨoɨ. Afénomo íaɨoɨmo ocuica comɨ́nɨdo Juzíñamui ióbitalle ráanɨaɨ fɨnófɨrediaɨoɨ.  
\v 7 Mei íadɨ afe jofóidɨcomo, dama Juzíñamuimo úritɨllaɨma jáifɨrena. Aféllaɨma naga fɨmónaɨaɨdo dácaiño afeco jofo eromo jáirede. Faga tóɨnɨaɨ dɨ́ena jaca jofo úifɨrede. Dama íemo ite onóñeno fɨnoca fɨénidɨfue ɨ́coɨnia daɨí dɨ́ena Juzíñamuimo izájide. Ie mei nane nana comɨnɨ ɨ́aɨfue ɨ́coɨnia jɨáɨe dɨ́ena Juzíñamuimo izájide.  
\v 8 Bífuiaɨdo Juzíñamui Ñuera Joreño daa jɨáɨfuena caɨ fɨdɨ́taiacade. Afefue daɨde: “Baie jinóidɨco naɨ illa llezica, jofóidɨcomo jɨba comɨnɨ jaille naɨ rairuírede. Ua aféruillaɨdo jofo dama Juzíñamui illánomo jáinidiaɨoɨ.  
\v 9 Nana bie Moisés illágɨmado nɨ́cɨdogafuiaɨ birui caɨ onóillena canode. Ua comɨ́nɨmo ácatafɨrega raa izoide, aféruido Juzíñamuimo áɨnozillena nigaco, naa afe eromo íaɨoɨ nɨ́cɨdogafuiaɨri, ñue jaɨ́cɨna caɨna onótate. Biruíllaɨdo judíuaɨ aillo faga tóɨnɨaɨ jɨáɨe fia fecaca raa dɨga, Juzíñamuimo naɨ izájifɨrediaɨoɨ. Mei íadɨ afe bíedo íaɨoɨ comecɨ Juzíñamuimo ñue jaɨ́cɨna jóitanide, mei íaɨoɨ comécɨmo ite fɨénidɨfuiaɨ naɨ féitañegaza, fia ɨbaica izói íteza.  
\v 10 Nana afe íaɨoɨ nɨ́cɨdogafuiaɨ fia jinófene ífuiaɨ. Nɨɨe izói íitiaɨoɨ daɨde. Dárie íaɨoɨ güille, jirolle dɨga fɨ́mairillafuedo úrite. Afe izói fia emódoide múiñuafuedo úrite. Nana bífuiaɨ fia nano nɨé dɨno comɨ́nɨmo ocuica, mei Juzíñamui jɨáɨfuena méidollɨruimo naɨ dúcɨñedeza. Ie jira aféfuiaɨ daa aféruillaɨ íena ráifide. 
\p  
\v 11 Mei íadɨ caɨdo Juzíñamuimo úrifɨreitɨllaɨmo Jesucristo, jae caɨmo dúcɨde. Afémɨedo ñuera cáɨmafuiaɨ caɨmo zúide, mei ua nahí Juzíñamuimo áɨnoziracomo afémɨe jaɨnáideza. Afe jaiai bínɨemo ite comɨnɨ niga Juzíñamuimo áɨnoziraco jaboide. Afécomona caɨ ióbillafue baɨmo, Jesucristo jamánomo ñuera jíllonafue, caifo monámona ana caɨmo zúitaɨbite. Afémɨe afe nahí Juzíñamuimo áɨnoziracomo dúide; afeco bínɨe comɨnɨ níñega. Dama ie nahico monamo ite.  
\v 12 Nana comɨnɨ íena, dácaiño afeco eromo ite jofóidɨcomo afémɨe jaide. Ie jailla llezica chivo dɨe, juráreto jiza dɨe dɨga uiñede; mei jɨáɨfodo dama ie dɨe uite. Mei jɨɨ, afémɨe ɨ́aɨfuenidɨmɨena íllamona, cruzmo caɨ ifomo tɨ́illano, ie dɨe tótado zíiñona caɨ jíllonafue ote.  
\v 13 Jaiai Moisés daɨna izói, ɨ́aɨcaillamɨe íemo ite ɨ́aɨfue bie izói muiñórede. Múiñoñegamɨe Juzíñamuimo dúide comɨnɨ cɨ́gɨdo macánide. Daje izói afémɨe Juzíñamuimo nabáirinide. Ie jira faga tóɨnɨaɨ dɨe atɨ́rede. Iemo jɨáɨe Juzíñamuimo mameca juráreto jiza jobailla afe jízechoma atɨ́rede. Ie mei afe ɨ́aɨcaillamɨemo aféchoma júdaɨrede. Iemona afémɨe ɨ́aɨcaiñegamɨena jaide. Mei jínofena muiñócaza. Ja Juzíñamui comɨ́nɨmo meine abɨdo caɨmare úrirede.  
\v 14 Mei jɨɨ, Juzíñamui dáɨnamona afe tóɨnɨaɨ dɨe rɨírede, come jinóidɨfuemo muiñóllena. Afefue daɨítania, ua onódɨcaɨza. Mei Jesucristo dɨe jamánomo rɨírede. Ua dama afémɨe ñue nɨ́fuenidɨmɨenado Juzíñamuimo ie abɨ dama izáɨbite. Afe ziiño Ñuera Joreño ie cánuado Jesucristo dama ie abɨ Juzíñamuimo izájide. Iemona ie dɨe tótamona nana caɨ comécɨmo ite ɨ́aɨfuiaɨna muiñótate. Ua nana caɨ jaiáimona nɨ́cɨdogafuiaɨ caɨna zíiñona cáatañede. Mei íadɨ Jesucristo dɨ́edo caɨ comecɨ múiñua mei, ua zíiñona cáatagacaɨ, afe jaca nahí caade Juzíñamui ocuícano ráiruiñeno caɨ jetállena. 
\p  
\v 15 Ie jira Jesucristo jae Juzíñamui comue fɨnóllɨfue caɨmo jino zúitaitɨmɨe. Afémɨedo nana Juzíñamui nɨzécano uafue uícomo lloga zíiñona cáɨmaduafuena maiñóritiaɨoɨ. Juzíñamui daɨí nana comɨnɨ jílloillɨfue uícodo mamede, mei dama Cristo tɨ́illado comɨnɨ fɨénidɨfuiaɨ Juzíñamui dote. Ua jaiai uícodo lloga nanoide fɨnóllɨfue illa llezica, nana aféruimo afémacɨ fɨeni fɨnócafuiaɨ ja birui Cristo tɨ́illa jírari, Juzíñamui dote; duano, nana íemo ɨ́ɨnotɨnona jíllotate. Daɨí Juzíñamuimo zíiñona caɨmare nabáirillafue maiñódiaɨoɨ.  
\v 16-17 Afe maiñórillafue, come tɨ́illa méifomo íitɨfue izoide. Dámɨe tɨ́iadɨ ie fɨébide fecɨ raa jɨáɨmɨe oni llɨ́ɨnoga. Afémɨe naɨ tɨ́iñenia, fecɨ raa oni llɨ́ɨnoitɨmɨe mɨnɨca raana naɨ llɨ́ɨnonide. Ie jira oni llɨ́ɨnoitɨmɨe íemo dúide raa maiñóllena, afe raa naama tɨ́illa jitáirede. Daje izói Juzíñamuimo caɨmare nabáirillafue caɨ maiñóllena, Cristo tɨ́illa jitáirede.  
\v 18 Afe jira jaiai uícodo lloga Juzíñamui ñue fɨnóllɨfue táɨniaruimo dɨ́íena recuíñorediaɨoɨ.  
\v 19 Moisés nana afe ocuica uaillaɨ nana comɨ́ínɨmo jino llua mei, afe uaillaɨ cuiábɨcɨmo faga tóɨnɨaɨ dɨ́ena cuirɨ́note. Daje izói afe mei nana comɨ́nɨmo cuirɨ́note. Ua llua mei, Moisés duera “hisopo” daɨna rarocɨ llɨ́ɨnote. Llɨ́ɨnuano, afécɨmo jíaɨrede oveja itɨ́raɨna maɨte. Iemo jáɨnoina jaɨcuica dɨ́edo afe rarócɨna rɨáitate. Rɨ́íaitano, ocuilla uai cuiábɨcɨ naa comɨ́nɨri dɨ́ena cuirɨ́note.  
\v 20 Cuirɨ́nua llezica Moisés daɨde: “Juzíñamui ómoɨena ocuica ie fɨnóllɨfue bie dɨe uafue daɨítate,” daɨde.  
\v 21 Daje izói aféruillaɨdo Moisés íaɨoɨ ɨniroi fɨnoina Juzíñamuimo áɨnoziracomo dɨ́ena cuirɨ́note. Daje izói nana afeco eromo ite Juzíñamui ióbifɨrena raamo dɨ́ena cuirɨ́note.  
\v 22 Ua, Moisés ocuica uai daɨna izói jamánomo dɨga raa, dɨ́edo Juzíñamui dɨbénemo dua izói ñue fɨnoca. Iemona dɨe tótañegana comɨnɨ comecɨ ɨ́aɨfuiaɨ ɨba jaca órede. 
\s1 Cristo dama ie abɨ Juzíñamuimo izájille comɨnɨ fɨénidɨfuiaɨna muiñode 
\p  
\v 23 Afe comɨnɨ niga Juzíñamuimo áɨnoziraco Juzíñamui ocuide, naa afeco eromo ite ráanɨaɨri. Iemona nana afeco eromo ite ráanɨaɨri Juzíñamui dɨbénemo ite nahífuiaɨna jánana caɨ cɨona izói caɨna onótate. Nana bínɨemo ite afeco ero ráanɨaɨ Juzíñamui illánomo nahí itɨ́fuiaɨ jana. Ie jira bínɨemo ite ráanɨaɨ dɨbénemo fɨgora Juzíñamui daɨíllena, bie dɨe recuille jitáirede. Mei íadɨ Juzíñamui nahí illánomo jáifɨreitɨno dɨbénemo, bie dɨe baɨmo ñuera Juzíñamuimo fia izájifɨreille raa jitáirede, afémacɨna Juzíñamui ɨere fɨgora daɨíllena. Ua tóɨnɨaɨ dɨe baɨmo Jesucristo jamánomo ñuera dɨe jitáirede.  
\v 24 Iemona Cristo tɨ́illa llezica, afe Cristo bínɨemo ite comɨnɨ niga Juzíñamuimo áɨnoziracomo eromo jofo jáiñede. Afe bico fia nahico jana. Mei jɨáɨfodo Cristo, Juzíñamui nahí illánomo caɨdo úrillena jae cɨ́íocaizaide.  
\v 25 Afénomo Cristo dama ie abɨna, dɨga icaiño meine nane izájiñede. Mei íadɨ bínɨemo ite Juzíñamuimo comɨ́nɨdo úritɨllaɨma, naga fɨmónado faga tóɨnɨaɨ dɨe uillano, afe Juzíñamuimo jáiraco jofoide ɨere ñuera rairuíredɨcomo jaide.  
\v 26 Afémacɨ jáifɨrena izói Cristo jáifɨredena fɨgóñede. Mei nɨbaɨ afémɨe daɨí dɨga icaiño jáiadɨ, íemo énɨe fɨ́nuaruimona afémɨe afe izói dɨga icaiño meine abɨdo tɨ́irede; mei íadɨ afe izóiñedeza. Afémɨe caɨ illáruillaɨdo jaiai lloga Juzíñamui fɨnóllɨfue fuilla llezica, dácaiño fia cómena íficaillano caɨmo cɨ́ocaizaɨbite. Ua afémɨe bínɨemo caɨ jɨáɨnona ie tɨ́izaɨbillado, nana caɨmo ite fɨénidɨfuiaɨ nɨné féillena oni dote.  
\v 27 Ja onóigaza, naga come bínɨemo dácaiño tɨ́ide. Tɨ́illa mei, íaɨoɨ illafue Juzíñamui jaɨ́cɨna jɨcánoite. Aféfuena daje izói ñue onódɨcaɨ.  
\v 28 Daje izói Jesucristo, comɨnɨ fɨénidɨfuiaɨ oni dóllena dácaiño tɨ́izaɨbite. Ie mei uire jɨáɨruido afémɨe fɨénidɨfuiaɨna duáɨbiñeite; mei jaiai ie dógaza. Mei íadɨ afémɨe uafue meine dáanomo cɨ́ocaizaɨbite, nana íena izire úiñoidɨnona jíllotano monamo ie illánomo úillena. 
\c 10  
\p  
\v 1 Mei jaiai Moisés ocuica uai naa ie lloga nɨ́cɨduaɨri, ɨco nɨrui bite caɨmare illɨ́fuiaɨ jana. Afe ie lloga jáiaifue nahífueñede. Moisés bie ɨco zúitɨfue caɨ onóillena jana uícodo llote. Iemona naga fɨmónaɨaɨdo faga tóɨnɨaɨna íaɨoɨ úifɨrena, íaɨoɨ comécɨna fɨgo jaɨ́cɨna jóitañede. Mei uáfuena, afe faga tóɨnɨaɨ íaɨoɨ úifɨrena Juzíñamuimo áɨnozidɨno nahí ɨ́aɨfuenidɨnona jáitañedeza.  
\v 2 Mei daɨí uafue ɨ́aɨfuenidɨnona íaɨoɨ jáiadɨ, nɨbaɨ afe tóɨnɨaɨna izájifɨrenana fáɨcanocaidiaɨoɨ; mei jɨáɨfodo fáɨcanocaiñediaɨoɨ, naɨ comécɨna jaɨ́cɨna jóoneñegaiaɨoɨza. Daje izói áfedo Juzíñamuimo áɨnozidɨno comécɨna ɨ́aɨfuena nahí nɨ́fuenidɨnona jáiadɨ, nɨbaɨ jae íaɨoɨ fɨénidɨfue izire íaɨoɨmo iñede. Mei íadɨ íaɨoɨ fɨénidɨfue jaca izire íaɨoɨmo ite. Iemona onódɨcaɨ, tóɨnɨaɨ fecáfɨrena ɨ́aɨfuena fɨgo doñede.  
\v 3 Mei íadɨ afe fatá Juzíñamuimo izájitaga tóɨnɨaɨna cɨónamona, comɨnɨ íaɨoɨ fɨénidɨfue naga fɨmónaɨaɨdo úibicaitagaiaɨoɨ.  
\v 4 Mei jɨɨ, juráretuaɨ, chívuaɨ dɨe dɨga, jaca come fɨénidɨfuiaɨ dónide. Mei áfemo ua dolle rɨ́ino iñédeza.  
\v 5 Ie jira Jesucristo bínɨemo bíacana llezica ie Moo Juzíñamuina daɨde: 
\q1 Omo fia fecaca faga tóɨnɨaɨna gáɨñedɨoza, comɨ́nɨna ɨere fɨgora o daɨíllena. 
\q1 Mei jɨáɨfodo énɨe cómena ja cuena jéicɨtaitɨo. 
\q1 Afemona cue tɨ́illedo íaɨoɨna óɨena nɨ́fuenidɨnona jáitaitɨcue. 
\q1  
\v 6 Ua comɨnɨ ɨ́aɨfue ɨ́coɨnia jobaica tóɨnɨaɨ ja birui ona ióbitañede. 
\q1  
\v 7 Ie jira cuegánico cuedo úrilla izói birui ona daɨdɨcue: 
\q1 “Moo Juzíñamui benó bínɨemo o comecɨ jitáillafue fɨ́nuaɨbitɨcue,” daɨde. 
\m  
\v 8 Nano fueñe afémɨe daɨde, nana afe Juzíñamuimo fia fecaca tóɨnɨaɨ, ɨ́aɨfue ɨ́coɨnia jobaica tóɨnɨaɨ dɨga Juzíñamui comécɨna zuitáñede. Ua íena ióbitañede, nana afe nɨ́cɨdogafue jaiai ocuilla uai daɨna íadɨ.  
\v 9 Afe emódomo Jesús daɨde: “Moo Juzíñamui, ja o comecɨ jitáillafue birui benomo fɨ́nuaɨbitɨcue.” Daɨí Juzíñamui nana afe jaiai ocuica nɨ́cɨdogafuiaɨna zóofete. Zóofiano, afe méifomo Cristo dama ie abɨ cruzmo izájillafue Juzíñamui jeire ote, ñue comɨ́nɨmo caɨmare érocaillena.  
\v 10 Daɨí Jesucristo, ie Moo Juzíñamui comecɨ jítainafue izói fɨnode. Daɨí ie fɨ́nuamona jae dama Juzíñamui nabaina ñue fɨnócamacɨna jáidɨcaɨ. Mei jɨɨ, Jesucristo dácaiño jaɨ́cɨna nana caɨ fɨénidɨfue oni eneno féitate. Mei nɨnomo féiñeitena cruzmo dama ie abɨ Juzíñamuimo izájideza. 
\p  
\v 11 Naga judío Juzíñamuimo comɨ́nɨdo úriraɨma nágaruillaɨdo naidáillano daje izói faga tóɨnɨaɨna Juzíñamuimo izájifɨrede; mei íadɨ afe rɨ́lledo comɨnɨ ɨ́aɨfuiaɨ dónide.  
\v 12 Mei jɨáɨfodo Jesuscristo dácaiño comɨnɨ fɨénidɨfue ɨ́coɨnia duere zefuida, tɨ́izaɨbite, afe izói dáanomo íñeillena. Ie tɨ́illa mei meine abɨdo cáaillano caifo monamo Juzíñamui nabézimo ráɨnazaide, nana comɨnɨ ɨ́aɨfue múiñuana fuilla jira.  
\v 13 Dɨnomo, nana ie faɨríconɨ ie anamo íaɨoɨ itábicaillena afémɨe úiñoide.  
\v 14 Mei jɨɨ, Jesucristo, dácaiño ie Moo Juzíñamuimo ie abɨna izájide. Afe izájillafuedo, nɨɨ cruzmo ie tɨ́illamona, nana caɨna ie nabaina ñue fɨnode. Jae nana caɨ comecɨ ɨ́aɨfuena ñue múiñuano jaca nɨnomo caɨmo caɨmare érocaide.  
\v 15 Aféfuemo Juzíñamui Ñuera Joreño uaina nabáide, ɨere uafue caɨ daɨíllena. Ñuera Joreño Cuegáuaimo daɨde: 
\q1  
\v 16 Juzíñamui daɨde: “Uire jɨáɨruillaɨdo cue comɨ́nɨmo bie izói jɨáɨe como cue fɨnóllɨfue llóitɨcue, naa jɨáɨe cuemo ɨ́ɨnotɨnori. 
\q1 Aféruillaɨdo cue ocuica uáillaɨna íaɨoɨ comécɨmo jaɨ́cɨna onótaitɨcue. 
\q1 Ua afe uaillaɨ íaɨoɨ ɨfócɨmo ñue jino denótaitɨcue,” daɨde. 
\m  
\v 17 Ie mei nane emódomo daɨde: 
\q1 “Nana íaɨoɨ fɨeni fɨnócafuiaɨ ɨbana otátañeitɨcue. 
\q1 Daɨí oñena llezica, íaɨoɨ comécɨmo ite ɨ́aɨfuiaɨna jaca nɨné féitaredɨcue.” 
\m Dɨnori Juzíñamui daɨde.  
\v 18 Nana comɨnɨ fɨénidɨfuiaɨ daɨí dua mei, jɨáɨ ɨ́aɨfue ɨ́coɨnia dóllena fatá fecaca tóɨnɨaɨ jae jítaiñega. 
\s1 Juzíñamuimo caɨ áɨnozillena jitáirede 
\p  
\v 19 Iemona, ámatɨaɨ, cácarei. Jae Juzíñamuimo caɨ jáillɨo uáfodo túide. Ua ie nahí illánamo, afe ɨere ñuera rairuícacomo caɨmare jacɨ́ruiñeno íemo úrizairedɨcaɨ; mei Jesús caɨri tɨ́izaɨbillano caɨna Juzíñamuina éoitadɨfue oni muiñócaza.  
\v 20 Afémɨe tuiñoca io ñuera rairuíredɨco jédacɨede ɨbáiraroido joide. Jira Juzíñamui illánomo cómena cáataite comue io Jesús tuíñuano, afe iodo afémɨe caɨna ɨfode. Afe io tuiñóllena dama ie abɨ izi cácatate, íemo cruzmo duere zefuírede.  
\v 21 Iemona Jesús nana Juzíñamuimo ɨ́ɨnotɨnodo Juzíñamuimo Uritɨllaɨmana jae jaide.  
\v 22 Afémɨe ja caɨri úrioinamona, mai Juzíñamuimo jacɨ́ruiñeno omoɨ áɨnoziri, mei íemo ñue caɨ ɨ́ɨnuamona jae meáiruiñedɨnona mamécacaɨza. Ie jira jɨ́fuenide comécɨdo, mai omoɨ áɨnoziri. Aɨnozillano, mai íemo caɨmare caɨ úrillɨ. Ua táɨnona lloñeno mai íemo comecɨ caɨ facallɨ. Mei nana caɨ ɨáɨrede comecɨ ɨ́coɨnia afémɨe jae jaɨ́cɨna oni féitagaza; ua come abɨ ñue jáɨnoido jocoina izói comécɨna muiñócacaɨ.  
\v 23 Afe uáfodo jino comɨ́nɨmo caɨ lloga Juzíñamuimo caɨmare caɨ úrillafuena, mai fáɨcanocaiñeno áfemo izire caɨ ɨ́ɨnofɨreillɨ, mei afefue caɨmo llotɨ́mɨe Jesús jaca ɨ́ɨnofɨregamɨeza.  
\v 24 Daje llezica illa dɨ́gamɨerie, mai conímamo ñue caɨ comécɨillɨ, conímana caɨ izíruillɨno caɨ jenóllena. Daje izói jɨáɨmana ñúefuiaɨna rairuíñeno jiéruillɨnona jenóredɨcaɨ.  
\v 25 Daje izói omoɨ Juzíñamuimo gaɨrífɨrenafuena mai féitañeno iri. Dáarie aféfuena féitafɨrediaɨoɨ. Daɨí illa fɨénide. Mei jɨáɨfodo, Jesucristo meine billɨrui raɨre dúcɨacanana omoɨ onónamona, mai conímana ñue úrillauaido comécɨna caɨmare caɨ náɨreitallɨ, nana caɨ ɨ́ɨnogafue féiñellena. 
\p  
\v 26 Juzíñamui llogafue daɨde: Jaca dama Jesús tɨ́illamo caɨ ɨ́ɨnuamona jílloredɨcaɨ. Aféfuena caɨ ie onótaja mei, mei íadɨ afe uaina naɨ caɨ ruifíruioiadɨ jae abɨ dɨne jɨáɨe caɨ ɨ́aɨfue múiñoitena iñede.  
\v 27 Daɨí ruifíruioidɨmacɨmo jamánomo izire jácɨfue zúite, mei Juzíñamui duere íaɨoɨ fɨnóllɨfuemo jae áɨnozideza. Afémɨe ɨere íaɨoɨmo rɨ́icaillano ɨere boode jɨáɨfodo joide iraimo íaɨoɨna duere zefuítaite. Ua nana Juzíñamuina bacáuairedɨnona irai amena cuarita izóidemo, Juzíñamui íaɨoɨna dɨnomo zíiñona duere zefuítaite.  
\v 28 Moisés ocuica uaina ruifíruitɨmɨena raɨre tɨtádiaɨoɨ. Ua, mena nɨbaɨ daámani uai nabáiraɨnɨ daɨna uáimona, íemo dúecaiñeno íena tɨtádiaɨoɨ.  
\v 29 Mei Moisés ocuica uaina ruifíruitɨmɨena daɨí duere fɨnóbiteza, Juzíñamui Jitona ruifíruitɨmɨemo jamánomo izire duere fɨnóllɨfue, afémɨemo zúiteza. Afémɨe Jesús dɨ́ena jámairuitɨmɨe. Afe tɨ́illamo totaca dɨ́edo, afémɨe naui dácaiño Juzíñamuimo oni eneno nɨzécamɨena jaide. Mei íadɨ Jesuna ruifíruitɨmɨe caɨmo dúecaifɨrede Ñuera Joréñona ɨaɨre daɨífɨredɨmɨena jaide. Daɨí itɨ́mɨena ɨere Juzíñamui duere fɨnórede.  
\v 30 Ja birui daɨí itɨ́mɨe fɨénidɨfue ɨba ófɨredɨmɨena onódɨcaɨ, nɨ́ɨmɨe caɨ Moo Juzíñamuina. Afémɨe daɨde: “Afe ɨba ófɨredɨmɨedɨcue. Ua nana ɨ́aɨfuiaɨ ɨbana duere fɨnótafɨredɨmɨedɨcue,” dáɨdeza. Jɨáɨnomo Juzíñamui Cuegáuai daɨde: “Juzíñamui ie comɨnɨ comecɨ ífuena jaɨ́cɨna jɨcánoite. Jɨcánuano íaɨoɨmo dúide duere fɨnóllɨfue ócuite,” daɨde.  
\v 31 Daɨí ie úrillana caɨ onónamona, caade Juzíñamuimo duere fɨnóllena izájina jamánomo jacɨ́rede. 
\p  
\v 32 Mei íadɨ naui íanori omoɨ illáfuemo uibíoiri. Aféruimo ñúefuena omoɨ onona mei, aillo duere zefuídɨomoɨ, mei íadɨ aféruimo omoɨ ɨ́ɨnogafue fáɨcanocaiñeno ñue ocuídɨomoɨ.  
\v 33 Dáruillaɨdo uáfori comɨnɨ eróicana báiñuano duere fɨnócaomoɨ. Jɨáɨruillaɨdo daɨí fɨnócamacɨmo omoɨ nabáillamona duere zefuítagaomoɨ.  
\v 34 Afe llezica llaveca ámatɨaɨmo dúecaifɨredɨomoɨ. Afe baɨmo, ómoɨmo ite ráanɨaɨna jɨáɨmacɨ báɨruana caɨmare rairuíñedɨomoɨ, mei onódɨomoɨza, bínɨemo ite raa baɨmo, jamánomo ñuera jaca baɨrónide raa ómoɨena monamo íteza.  
\v 35 Ie jira naui izire omoɨ ɨ́ɨnoga uaina mai birui omoɨ féitañeno iri. Aféuaina ñue omoɨ ɨ́ɨnofɨreiri, mei ɨ́coɨmo ɨere ñuera jɨrídoga ízoide raa máiñoitɨomoɨza.  
\v 36 Juzíñamui jítainafuena omoɨ jiéruilla llezica raɨre comecɨ járidoñeno íredɨomoɨ. Ua, omoɨ ɨ́ɨnoga ñúefue, omoɨ are jaɨ́cɨna llocana uille mei, Juzíñamui uícodo lloga caɨmare jíllonafuena máiñoitɨomoɨza.  
\v 37 Mei jɨɨ Juzíñamui Cuegáuaimo daɨde: 
\q1 “Ja íanori íllamona, uícodo lloga bíitɨmɨe Jesucristo, jɨzíñeno raɨre dúcɨzaɨbite. 
\q1  
\v 38 Afémɨe naɨ biñena llezica, nɨ́ɨfuenidena cue mamécamɨe, cuemo ie ɨ́ɨnuado nágaruillaɨdo caɨmare ie illano, cuena ióbitaite. 
\q1 Mei íadɨ afémɨe afe ie ɨ́ɨnoga uaina meine abɨdo féitaiadɨ, afémɨeri íobiñeitɨcue,” dɨnó Juzíñamui daɨde. 
\m  
\v 39 Mei íadɨ meine abɨdo féitatɨno dɨbénemo jaɨnáiñedɨcaɨ. Afémacɨ daɨí íaɨoɨ ɨ́ɨnoñenamona jílloñeitiaɨoɨ. Mei jɨáɨfodo caɨ bie Jesucrístomo ɨ́ɨnotɨnodɨcaɨ, daɨí danɨ caɨ jíllotagacaɨ. 
\c 11  
\s1 Juzíñamuimo caɨ ɨ́ɨnuafue 
\p  
\v 1 Mei ¿mɨnɨca ɨ́ɨnuafuena? Ɨɨnuafue Juzíñamui daɨna uaina jeire caɨ uafue. Ɨɨnuamona caɨ úiñoga cáɨmafue jeire caɨ ollɨ́nona onódɨcaɨ. Daje izói Juzíñamuimo ɨ́ɨnuamona, ie lloga cáɨena mameca ñuera raa cɨóñena íadɨ, afefue ua íllana comécɨdo ua onódɨcaɨ.  
\v 2 Ua, ɨ́ɨnuafuedo judíuaɨ jaiáidɨgɨmamona Juzíñamuimo jaɨnáidɨmɨiaɨ, Juzíñamui comecɨ jítaillamacɨna jáidiaɨoɨ. 
\p  
\v 3 Juzíñamuimo caɨ ɨ́ɨnuamona, Juzíñamui ie úrilla uaido bínɨe fɨ́nuana onódɨcaɨ. Daɨí ie fɨ́nuado nana bie caɨ cɨona énɨe, táɨnomona Juzíñamui comuítate. Ua, mɨnɨ́cana iñédeza cɨóñena ráamona naga ráanɨaɨ comuíbicaide. 
\p  
\v 4 Juzíñamuimo ɨ́ɨnuano Abel, Caín fecaca baɨmo, ñuera Juzíñamui ióbitalle raa fécaɨbite. Iemona Abel Juzíñamui dɨbénemo jaɨ́cɨna itɨ́mɨena jaide. Juzíñamui jiéruigamɨena jaide. Mei Juzíñamui Abel fécaɨbiga raa llɨ́ɨnuamona, Juzíñamui comecɨ Abelna jítainana onódɨcaɨ. Daɨí Juzíñamui íena jiéruillafuedo Abel jaɨ́cɨnaidɨfuemo Juzíñamui uai nabaide. Afe Abel, jaiai uícodo Juzíñamuimo ie ɨ́ɨnuado ñue illáfuedo jaide. Aféfuena caɨ fɨ́dɨamona, afémɨe tɨtácamɨe íadɨ, ie ɨ́ɨnogafue, úrillauai izói caɨmo úrite. “Juzíñamuimo ñue caɨ ɨ́ɨnollɨ,” caɨna daɨde. 
\p  
\v 5 Iemo Enoc Juzíñamuimo ie ɨ́ɨnuado tɨ́iñeno caifo monamo uiga. Daɨí tɨ́illana ie ónoñeillena, cáanori monamo Juzíñamui uiga. Afe mei afémɨe bínɨemo cɨóñenamɨe, mei afémɨe Juzíñamui úigaza. Afémɨe naɨ úiñega Juzíñamui ióbitadɨmɨe daɨnámɨe.  
\v 6 Mei jɨɨ, Juzíñamuimo caɨ ɨ́ɨnoñenia jaca íena ióbitanidɨcaɨ. Dáamɨe Juzíñamuimo áɨnoziacania, Juzíñamui nahí illánona uícodo ie ɨ́ɨnolle jitáirede. Nane íemo nana izire íena onóiacadɨno, ñue ɨbana dama ie abɨ ífuena íaɨoɨna onótaite. Aféfuemo uícodo daje izói ɨ́ɨnorediaɨoɨ. 
\p  
\v 7 Daje izói Noé, Juzíñamui lloga raɨre biite naɨ cɨóñena duere fɨnóllɨfuena fɨ́dɨano Juzíñamuimo ñue ɨ́ɨnote. Ɨɨnuano áillue jofóredɨcae fɨnode, áfedo nana dama ie comɨnɨ daɨí jílloillena. Noé daɨí dama Juzíñamuimo ɨ́ɨnuado, nana jɨáɨe ɨ́ɨnoñede comɨ́nɨmo duere fɨnótatɨuai jino íaɨoɨmo llote. Afe izói Juzíñamuimo ɨ́ɨnuado Juzíñamui comecɨ jitaina nɨ́fuenidɨmɨena jaide. 
\p  
\v 8 Afe mei jaiáidɨruimo Juzíñamui Abrahana jɨ́ɨrite, jɨáɨe énɨemo jaiánɨllena, áfenɨena ɨco jɨáɨruido íeɨena maiñóllena. Abraham Juzíñamuimo ɨ́ɨnuamona afe jɨ́ɨrilla uaina cacáillano, raɨre ie illánɨemona oni jɨáɨnomo jáizaide, ie dúcɨillɨno naɨ ónoñega íadɨ.  
\v 9 Abraham naɨ Juzíñamuimo ɨ́ɨnuamona, Juzíñamui íemo fecáacaiga énɨemo fia jɨcánemɨena dɨga fɨmona fia ite. Ua, ɨniroi niina úicaifɨrega jofomo afénɨemo are íoide. Daje izói Abraham comuítaga jitó Isaac, dɨnómona Jacob dɨga afénomo daje izoide ɨniroi nillácuaɨmo are itíaillɨnoɨ naa ie comɨ́nɨri. Juzíñamui daje énɨena fecalle uaina Abrahamo llua izói, afe íaillɨnoɨmo uícodo llote.  
\v 10 Ua Abraham afe jamai illácuaɨmo dama íeɨeñede énɨemo caɨmare íoide. Afémɨe caɨmare ite, mei Juzíñamui dɨbénemo ite caɨmare táɨnocaitanide illɨ́nomo dúcɨillena afémɨe úiñoideza. Afe caɨmare illɨco Juzíñamui mamérillano dama ie uaido niga. 
\p  
\v 11 Daje izói Abraham aɨ, Sara, Juzíñamuimo ɨ́ɨnuamona, jamánomo jíonaite íadɨ, fueñe úruerena rɨ́ino ote. Iemona daa jitó jocode, mei Juzíñamui aféngona aféfuena uícodo daɨna uai, afengo ɨere ñue ɨ́ɨnoteza. Afengo bie izói daɨde: Bímɨe ie daɨna uaina jɨáɨfo méidofɨnidɨmɨe.  
\v 12 Iemona Abraham ɨere jíonaite íadɨ, ɨere aillo erófene igɨ́maɨaɨna jebuítate. Ua jamánomo dɨga naɨraɨ jebuide; nɨɨ ja lloga monamo ite facádonide úcuaɨ izói itíaɨoɨ. Nane monáillai fuédamo ite facádonide guamaɨ izói jebuídiaɨoɨ. 
\p  
\v 13 Nana caɨ lloga comɨnɨ Juzíñamuimo naɨ íaɨoɨ ɨ́ɨnoina llezica tɨídiaɨoɨ; nana Juzíñamui uícodo lloga ñúefuiaɨna naɨ llɨ́ɨnoñediaɨoɨ, tɨ́illa. Mei íadɨ afe lloga ñúefuiaɨ ɨco jɨáɨruimo zúillena jɨcana fɨdɨ́diaɨoɨ. Fɨ́dɨano caɨmare aféfuemo ɨ́ɨnuano comécɨidiaɨoɨ, mei bínɨemo ónoñega jɨcánemacɨna íaɨoɨ illa raɨre méaicaiñeno llotíaɨoɨza. Uáfuena bínɨedo jaiánɨcana jáidiaɨoɨ.  
\v 14 Nana daɨí llotɨno, danɨ íaɨoɨ nahí illɨ́nomo íaɨoɨ jáiacanana llotíaɨoɨ. Ua jɨáɨe énɨemo jáillana íaɨoɨ úiñoinana caɨna fɨdɨ́tate.  
\v 15 Daɨí íaɨoɨ dáɨnamona, mei nɨbaɨ jaiai íaɨoɨ illánɨemo comécɨidiaɨoɨ. Daɨí íaɨoɨ comécɨiadɨ dɨga icaiño meine abɨdo afénomo jáirediaɨoɨ. Mei íadɨ abɨdo afénomo jáiñediaɨoɨ.  
\v 16 Mei jɨáɨnomo comécɨidiaɨoɨ. Jɨáɨe jamánomo ñuera illánomo, monamo ite Juzíñamuimo nabáirizaillɨnomo izire úiñoidiaɨoɨ. Daɨí Juzíñamuimo íaɨoɨ ɨ́ɨnuamona, Juzíñamui ɨere ióbite. Bie jaiánɨcana jáidɨno Juzíñamuina dáɨiadɨ: “O cue Juzíñamuidɨo,” daɨí íaɨoɨ dáɨnari Juzíñamui méaicaiñede. Mei íaɨoɨ jofue izoide ñuera illɨno, dɨnomo Juzíñamui dɨga zíiñona nabáirizaillena, Juzíñamui jae fɨnócaza. 
\p  
\v 17-18 Naui Isaac jocoina llezica Juzíñamui Abrahana daɨde: 
\p “O úicoitɨgɨma bie jitó Isáacɨmona aillo jébuitiaɨoɨza,” daɨde. Dɨga iruillaɨ íllamona Juzíñamui dáaruimo Abrahana ɨ́ɨnuafue facátate. Iemo Juzíñamui ocuilla izói, Abraham naɨ Juzíñamuimo izire ɨ́ɨnuano, ie jitó oni uite, tɨtada Juzíñamuimo fecállena.  
\v 19 Mei Abraham Juzíñamuimo ñue ɨ́ɨnuano comecɨ facade: “Juzíñamui jamánomo ñue rɨ́inoredɨmɨe; tɨ́ide come meine cáataite rɨ́ino íemo ite. Cue jitó tɨ́idena Juzíñamui meine íena cáatarede,” daɨí Abraham comecɨ anado daɨde. Iemo, Abraham ie jitona fáiacana llezica Juzíñamui afémɨemo raɨre úrillano, ie daade jitona jíllotate. Abraham ie jitona fañede. Ie jira jɨáɨfodo daɨírede, tɨ́illanomona Abraham ie jitona meine abɨdo ote. 
\p  
\v 20 Daje izói Juzíñamuimo ɨ́ɨnuamona Isaac ie jitó íaillɨnoɨ Jacóbomo Esaú dɨga uire Juzíñamui orelle caɨmátaillɨfue ua llote. 
\p  
\v 21 Daje izói Juzíñamuimo ɨ́ɨnuamona Jacob, ie tɨ́izaillɨruimo José jitó íaillɨnoɨmo úrite. Urillano ie enaize íaillɨnoɨmo uire Juzíñamui orelle caɨmátaillɨfue jino llote. Afe llezica ie macara jɨgüida llɨ́ɨnota ie abɨ mozíñuano caɨmare Juzíñamuimo úrite, ie ióbitallena.  
\v 22 Daje izói Juzíñamuimo ɨ́ɨnuamona José ie tɨ́izaillɨrui áɨnozillano, Israel comɨnɨ Egipto énɨemona uire oni danɨ íaɨoɨ énɨemo jáillɨfue llote. Afe llezica ie ícuruaɨ afénɨemo fɨéñeno oni úillena, uícodo uai íaɨoɨmo jóonete. 
\p  
\v 23 Dɨga fɨmona jailla mei, Egipto rɨ́illaɨma nana Israel como jéicɨga jitótɨaɨna fazɨ́tate. Mei íadɨ Moisés jocoina mei, ie moo íaillɨnoɨ Juzíñamuimo ɨ́ɨnuamona, illáɨmana jacɨ́ruiñeno Moisena retáidotiaillɨnoɨ. Dauiámani íena retáidotiaillɨnoɨ, afeza ɨere ñúezana jira.  
\v 24 Aféllaɨma jiza Moisena náamataja mei, Moisés móonailla llezica Moisés aféngomo dúillana ruifíruite; mei afémɨe Juzíñamui dɨbénemo jaɨnáideza. Ie jira Juzíñamuimo ɨ́ɨnuamona Moisés afe mámecɨ oni faɨte.  
\v 25 Mei jɨáɨfodo Juzíñamuimo jaɨnáidɨno cɨ́gɨri íllana, afémɨe jamánomo gaɨde, nana duere zefuídiaɨoɨ íadɨ. Daje izói ie comɨ́nɨna fɨeni ie zóofiamona raɨre féite jabo ióbillafue dɨbénemo íllana afémɨe gáɨñede. Moisés Juzíñamuimo ɨ́ɨnuano ñue comécɨide. 
\p  
\v 26 Bíedo afémɨe comécɨide: “Nana Egipto énɨe ebírede ráanɨaɨ baɨmo, Juzíñamui dɨbénemo ie dámɨe illa jamánomo ráifide, duere afémɨe zefuide íadɨ.” Afémɨe daɨí comecɨ facade. Ua Moisés, Cristo ɨ́coɨnia zefuíllano, féitañeno daɨí comécɨioifɨrede; mei Juzíñamuimo ɨ́ɨnuamona baɨmo ñuera féinide raa izóidɨfue afe ie jɨrídollena afémɨe onódeza.  
\v 27 Iemona Moisés Juzíñamuimo ɨ́ɨnuamona, afe Egipto illáɨmamo ite rɨ́inona jacɨ́ruiñeno Egíptomona botade. Ua jacɨ́ruiñeno afe Moisés oni jaide, mei buna cɨóñena Juzíñamuimo fáɨcanocaiñeno ñue nágarui comécɨifɨredeza. Daɨí ie comécɨinamona, uído cɨónamɨemo ɨ́ɨnua izói, Moisés Juzíñamuimo ɨere ɨ́ɨnote. 
\p  
\v 28 Daje izói Moisés Juzíñamuimo ɨ́ɨnuamona, Juzíñamui lloga pascua rafue como fueñe fɨnode. Ua Juzíñamui llua izói, Moisés íaɨoɨ jofónɨaɨ naze fuédamo oveja dɨ́ena jíritate. Daɨí fɨ́nuamona, Juzíñamui oreca tɨ́taite abɨ ímɨe nana Israel nano fueñe jococa jitótɨaɨaɨmona buna tɨtáñede, aillo Egipto imacɨ jitótɨaɨ tɨ́coɨzitiaɨoɨ íadɨ.  
\v 29 Daje izói Juzíñamuimo ɨ́ɨnuamona nana Israel aillo comɨnɨ “Jíaɨrede” daɨna monáillai ñue zaférede iodo ruícafenemo jaitádiaɨoɨ, mei afe monáillai jaɨnoi Juzíñamui oni gaɨtácaza, íaɨoɨ ruica jáillɨo tuiñóllena. Mei íadɨ Egíptomona racádɨno afémacɨ jailla izói jáidiaɨoɨmo, meine io jáɨnoina ɨbáibicaillari coróbaitiaɨoɨ. 
\p  
\v 30 Iemo Israel comɨnɨ Jericó jofue anáfenoacadiaɨoɨ. Afe jofue rɨire naidároga nofɨ́banina cɨrɨ́noga. Iemo Juzíñamuimo ɨ́ɨnuamona ie daɨna izói, siete dɨ́garui afe rɨire ɨbaica jofue jinófenedo ífoɨna macáoidɨaɨoɨ. Iemona ɨcoɨ iruimo afe caifo nitaca nofɨcɨ fɨnoina jofue jinófene cɨrɨ́nuabani, Juzíñamui ana énɨemo caitade.  
\v 31 Daje izói Juzíñamuimo ɨ́ɨnuamona naui uícodo fɨénidɨngo, Rahab fañega, nana jɨáɨe afe jófuemo ite ɨ́ɨnoñedɨno fazɨ́caicɨoɨ íadɨ; mei Juzíñamui comɨ́nɨmona oreca énɨena ñue onóillena méiñoitɨnona afengo caɨmare cánuano jofo uáidoteza. 
\p  
\v 32 Naɨ jino lloñega aillo ite jɨáɨe jaiai Juzíñamuimo ɨ́ɨnofɨredɨno. Bibedo íaɨoɨ illáfuiaɨna cue llóllena cue abɨ juánideza, nana llónidɨcue. Fia íaɨoɨ mámecɨaɨ jino llóitɨcue, íaɨoɨmo omoɨ ñue comécɨioillena. Afémacɨ Gedeón, Barac, Sansón, Jefté, David, Samuel; daje izói Juzíñamui uai jino llóraɨnɨ ite.  
\v 33 Bimácɨmona dámɨerie Juzíñamuimo ɨ́ɨnuamona jɨáɨe náɨraɨna anáfenodiaɨoɨ. Jɨáɨmacɨ Juzíñamuimo ɨ́ɨnuano Juzíñamui jaɨ́cɨna jóidɨfuena comɨ́nɨmo ocuide. Dáarie Juzíñamuimo ɨ́ɨnuamona ie uícodo llua izói, Juzíñamui canócaiaɨoɨ. Dáarie Juzíñamuimo ɨ́ɨnuamona rɨírede jánallarillaɨ fuena ɨbaica izói fɨnode, íena íaɨoɨ rɨ́ñeillena.  
\v 34 Jɨáɨmacɨ uzírede iraimo dotácaiaɨoɨ ia, naɨ Juzíñamuimo íaɨoɨ ɨ́ɨnuado afe iráimona uzíñeno jino bitíaɨoɨ. Dáarie Juzíñamuimo ɨ́ɨnuamona fuiríllafuiaɨmona otábiñeno jino ñue jíllodiaɨoɨ. Iemo jóbairo illa llezica Juzíñamuimo ɨ́ɨnuamona dáarie maɨríñedɨmɨiaɨ ñue máɨrimɨiaɨna jaide. Daɨí Juzíñamuimo ɨ́ɨnuamona onina bite fuiríraɨnɨna abɨdo raɨnódiaɨoɨ.  
\v 35 Daje izói Juzíñamuimo ɨ́ɨnuamona dáarie rɨngónɨaɨmona íaɨoɨ úruiaɨ tɨ́ide íadɨ, meine abɨdo íaɨoɨmo cáataga. 
\p Mei íadɨ jɨáɨmacɨ naɨ Juzíñamuimo ɨ́ɨnua llezica, ɨbátarede tɨ́ide jíllotafuena lloñédiaɨoɨ, mei aféfuedo Juzíñamuina jáanotaitɨcaɨ, daɨdíaɨoɨ, íadɨ Juzíñamuina jáanotanidiaɨoɨ. Ie jira ɨere duere zefuítano tɨtácaiaɨoɨ. Daɨítadena lloñédiaɨoɨ; mei afémacɨ meine abɨdo caana mei, jamánomo ñuera zíiñona illáfuena méaicaiñeno maiñóacadiaɨoɨza.  
\v 36 Naɨ jɨáɨmacɨ Juzíñamuimo ɨ́ɨnua llezica, fɨénide zánonafuiaɨmona duere fɨnóbidiaɨoɨ. Jɨáɨmacɨ rɨire zechénogaiaɨoɨ. Ua dáarie Juzíñamuimo íaɨoɨ ɨ́ɨnuamona cúinajano llavécaiaɨoɨ.  
\v 37 Daje izói jɨáɨe Juzíñamuimo ɨ́ɨnotɨno nofɨ́cɨaɨna níjɨcaiaɨoɨ; jɨáɨmacɨ dáafemɨiaɨdo amena dera izóidedo ñetácaiaɨoɨ; jɨáɨmacɨ caɨmare taɨno uáillaɨdo bífuegaiaɨoɨ, íaɨoɨ ɨ́ɨnuafue facátallena, íemo lloéfaido fagáiaɨoɨ. Jɨáɨe Juzíñamuimo ɨ́ɨnotɨno, íaɨoɨ ɨníroinina jira, tóɨca rɨlle igóraɨna jɨtáoidiaɨoɨ. Daɨí fia macáoidiaɨoɨ, mei jofónidiaɨoɨza. Ua ɨere ráanidiaɨoɨza. Ie emódomo duere zefuítano ɨere fɨeni fɨnócaiaɨoɨ.  
\v 38 Daɨí fɨnócaiaɨoɨ íadɨ, Juzíñamuimo íaɨoɨ ɨ́ɨnogafuena fáɨcanocaiñediaɨoɨ. Iemona bimacɨ Juzíñamui dɨbénemo ɨere izíruigano; mei íadɨ bínɨemo ite ɨ́ɨnoñedɨno afe Juzíñamui uaina jeire otɨ́nona jámairuitiaɨoɨ. Ie jira ɨ́ɨnotɨno afe ɨ́ɨoñedɨmacɨ cɨ́gɨri íllena, ɨ́ɨnoñedɨmacɨmo fɨgo dúiñede, mei ɨ́ɨnoñedɨmacɨ comecɨ ɨere ɨáɨredeza. Ɨɨnotɨnona jámairuillano, íaɨoɨna oni jiúfɨrediaɨoɨ. Iemona ɨ́ɨnotɨnomona dáamɨerie zaféredɨzicɨmo jáidiaɨoɨ. Jɨáɨmacɨ caifóneduaɨ illánomo botádiaɨoɨ. Iaɨoɨ jaillánomo ite ífuaɨmo ífɨrediaɨoɨ, naa íduaɨ ana ífuaɨri.  
\v 39 Nana bimacɨ Juzíñamuimo ɨ́ɨnuamona, ñue “fɨgora” daɨnámacɨna jáidiaɨoɨ. Mei íadɨ nana Juzíñamui uícodo lloga caɨmare ñue illɨ́fuiaɨna fɨgo maiñóñediaɨoɨ; jabo maiñódiaɨoɨ.  
\v 40 Mei Juzíñamui jae uícodo caɨ canolle jamánomo ñuera cáɨmaduafue mamédeza. Afe jamánomo ñuera cáɨmaduafue Jesucrístodo caɨ nahí caɨ jílloillɨfue. Daɨí jaiai ua Juzíñamuimo ɨ́ɨnotɨno naa caɨ dɨga, birui dáanomo jaiai Juzíñamui mameca nahí jílloillɨfuemo dúcɨitɨcaɨ. Ua afémacɨ naa caɨ dɨga, Juzíñamuimo caɨmare nabáirillafuena jeire óitɨcaɨ. 
\c 12  
\s1 Jesumo ñue jaɨ́cɨna omoɨ comécɨioiri 
\p  
\v 1 Ie jira, cue ámatɨaɨ, comécɨdo ñue omoɨ facari. Ua aillo jamánomo Juzíñamuimo izire ɨ́ɨnotɨno bínɨemo caɨ uícodo macáoidiaɨoɨ. Afémacɨ Juzíñamui caɨ ióbitallɨfuena caɨna ɨfode. Afémacɨ caɨ ɨ́ɨnogafuemo jaɨ́cɨna ɨ́foite uai nabáiraɨnɨ. Caɨ abɨdo ífoɨna itíaɨoɨ. Afémacɨmo caɨ comécɨillamona, nana caɨ jɨzítacana uite fɨénidɨfuiaɨ mai oni caɨ féitallɨ. Ua, caɨmo ite fɨénidɨfue, abɨ llótaidote ɨniroi izói caɨmo jɨ́ide. Jɨ́inamona jaca caɨna aruire itátate. Afena fáɨcanocaillano, Juzíñamui ióbitallɨfuemo zefuíruiñeno mai izire caɨ nɨ́cɨdollɨ.  
\v 2 Afe llezica duere caɨ zefuíllano féitano, mai Jesumo comecɨ caɨ facallɨ; mei afémɨe Juzíñamui ióbitallɨodo, ɨ́ɨnuafuedo caɨ jáillena caɨ ɨfódɨmɨeza. Mei afémɨe ie Moo Juzíñamuina féitañeno ie fáainaruimo naɨ íemo izire ɨ́ɨnoide. Daɨí ie ɨ́ɨnua, afémɨe izói jaɨ́cɨna caɨ ɨ́ɨnollena, afémɨe caɨ ɨfode. Iemona afémɨe caɨ ɨ́ɨnogafue ñue ɨ́coɨmo fuitádɨmɨe. Ua, Jesús duere zefuide, íadɨ afe duere zéfuilla méifomo íite cáɨmafuemo, afémɨe ñue comécɨide. Afemo comécɨioillano uái dáɨi cruzmo tɨ́izaide; mei áfedo nana íemo ɨ́ɨnotɨno caɨmare jíllobicaitiaɨoɨza, afémɨe onode. Iemo afe meáirede tɨ́illana náfueñeno, abɨdo meine cáadɨmɨena jaide. Afe daɨí jaillano caifo Juzíñamui nabézimo Jesús ráɨnazaide. 
\p  
\v 3 Ie jira, caɨ jɨáɨnona duere zefuítagamɨe Jesumo mai ñue omoɨ comécɨioiri, omoɨ duere fɨnóbicaillamona omoɨ zéfuiruiñeillena. Daje izói Jesumo ñue omoɨ uibíoiri omoɨ comecɨ ñue náɨreillena. Mei afémɨe fáɨcanocaiñeno Juzíñamuimo ɨ́ɨnoicaide, fɨénidɨno íena uáitajano duere ie fɨnódiaɨoɨ íadɨ. 
\p  
\v 4 Fɨénidɨfue omoɨ comécɨna jɨ́ɨrioide, íadɨ nágarui áfemona abɨ ráiruifɨredɨomoɨ. Afemona abɨ rairuíllano ɨere juárede. Iemona jabo duere fɨnócaomoɨ. Mei íadɨ fɨénidɨfuena omoɨ anáfenoacanamona naɨ tɨ́iñedɨomoɨ. Dama Jesús ɨ́coɨnia jabo duere zefuídɨomoɨ.  
\v 5 Afe llezica Juzíñamui caɨmare llogáuaina nɨbaɨ jae féitatɨomoɨ. Aféuaido Juzíñamui ie úruiaɨ izói, ómoɨna llófuete; ona rɨire daɨde: 
\q1 “Cue jitó, o Ocuíraɨma Juzíñamui omo oreca duere zefuítajafuena jámairuiñeno iri, mei áfedo afémɨe ñue ona rairuíllano lletádeza. 
\q1 Daje izói fɨeni o fɨ́nuamona afémɨe duere o fɨnóadɨ, comécɨna rɨ́inidɨmɨe izói iñeno iri. 
\q1 Mei jɨáɨfodo, abɨ mámiano, ie llétafuena ñue jeire oíri, ñúemɨena o jáilleza. 
\q1  
\v 6 Mei Ocuíraɨma Juzíñamui nana ie izíruiganona fɨ́aicana lletáfɨredeza, ɨ́aɨfuenidɨnona íaɨoɨ jáillena. 
\q1 Afe izói nana ie ua onoiga jitótɨaɨna llorebai mailla izói due ízitate, mei afémacɨ dama íeɨeza,” daɨde. 
\m  
\v 7 Omoɨna izíruillamona Juzíñamui afe daɨí ómoɨna duere zefuítate, ómoɨmo llófuellena, baɨmo ñuera ie jitótɨaɨna omoɨ jáillena. Ie jira duere zefuítagaomoɨ. Mei onódɨomoɨza, bínɨemo ite moo llétañega jitó ñue móonaiñeiteza. Iemona afe moo nana ie jitótɨaɨna llorebai mailla izói ízitate.  
\v 8 Ie jira Juzíñamui ízitañegamɨe nɨbaɨ ie nahí jitóñedeza, móonidɨza; mei nana nahí ie jitótɨaɨ izi cácatagaiaɨoɨza.  
\v 9-10 Afe emódomo caɨ bínɨemo ite móotɨaɨ naui ñue caɨ móonaillena, ñue comecɨ íaɨoɨ fácamona, izire caɨna lletádiaɨoɨ. Ua nano íanori illáruillaɨdo caɨna duere fɨ́nuafuedo lletádiaɨoɨ. Ua izi cácatagacaɨ. Afe llezica naɨ caɨ moona caɨmare jacɨ́ruitɨcaɨ; jacɨ́ruioillano ñue íaɨoɨ anamo itábicaidɨcaɨ. Daje izói caɨ monamo ite Moo anamo jamánomo caɨmare itábicairedɨcaɨ; mei afémɨemo caɨ ɨ́ɨnuano, nahí ie jitótɨaɨna comuítagacaɨza. Nana afémɨe duere caɨ fɨ́nuafue caɨ dɨbénemo aillo ráifide, afémɨe ebire ñuera illa izói, daje izói caɨ íllena.  
\v 11 Ua, ja onódɨomoɨza nana izi cácatafuemo illa llezica, áfena gáɨñedɨcaɨ. Mei íadɨ afe izi cácatafue záilla mei, áfedo lletácano, Juzíñamui anamo ñue jaɨ́cɨna íficaillano, comécɨna jacɨ́ruiñedɨnona caɨmare jáitɨcaɨ. 
\s1 Juzíñamui uaina ruifíruilla ɨere jacɨ́rede 
\p  
\v 12 Juzíñamui daɨí omoɨ llétajana omoɨ onónamona, mai abɨ́ omoɨ mame. Ja abɨna náɨnidɨno izói omoɨ iñeno iri. Omoɨ zúurede comecɨ náɨretari.  
\v 13 Afe llezica omoɨ duere zefuíllafuemo, mai bífuemo jaɨ́cɨna comecɨ facádori. Aféfuedo daɨíri “Juzíñamui ióbille jitótɨaɨna móonaitagacaɨ.” Daɨí o dáɨnamona, jɨáɨe ómoɨmona Jesumo ɨ́ɨnogana féitaacadɨno, comécɨna caɨmare náɨretaitɨo. Daɨí ie náɨreillamona afémɨe meine abɨdo Jesús uaina izire ɨ́ɨnocana jeire óite. 
\p  
\v 14 Afe emódomo nana comínɨ cɨ́gɨri, mai comecɨ rɨ́icaitañeno cáɨmafuemo omoɨ iri. Daje llezica, Juzíñamui ebire ñue illa izói, afe dɨbénemo mai omoɨ abɨ ífuiaɨ nágarui méidocana uiri. Bie izóidɨfuemo omoɨ naɨ iñéniadɨ jaca buna Juzíñamuina cɨ́oñeille. Mei íadɨ comecɨ ɨ́aɨninafuemo caɨ íadɨ, íena cɨ́oitɨcaɨ.  
\v 15 Juzíñamui caɨmo fecaca caɨ ie cánuafue aillo ite. Bifue nana jeire omoɨ ófɨreilleza izire omoɨ comécɨiri. Daɨí íllamona buna fɨénidɨfuemo oni nɨbéfodo báɨiñeiteza. Daa daɨí oni fɨénidɨfue dɨbénemo baɨídɨmɨe nana jɨáɨmacɨ comécɨna fɨeni fɨnode. Mei jɨɨ, duere zefuíllamona Cristo dɨbénemo fɨgo jaɨnáiacañedɨmɨe, jucúrede juia izoide. Mei afe juia illemo totáa, nana áfeji jucúredɨjina jaide. Daɨítade come nana ie aɨno comɨ́nɨna daje izói fɨgóruiñede. Afemona abɨ́ omoɨ rairuiri.  
\v 16 Daje izói nana jɨruírenafuiaɨmona abɨ́ omoɨ rairuiri. Afe llezica ómoɨmona dámɨe Esaú illa izói iñeno iri, mei afe Esaú jaca Juzíñamui jítainafuemo fɨgo comécɨiñedeza. Aféfuena jámairuillano, afémɨe nánoramɨe íadɨ, íemo ite maiñórille rɨ́ino, fia due jiza güille ɨbana fecade.  
\v 17 Afe Esaú illáfuena ñue onódɨomoɨza; mai aféfuemo omoɨ comécɨioiri. Ɨco íiraɨruimo ie moo ézɨcɨrafuena Esaú maiñóacade, íadɨ ie moo ja íena ruifíruite. Afémɨe comecɨ ifue méiduano éecana ie moomo izire jɨcade; íadɨ “Jii” daɨíñede. Afe naui Esaú jámairuillafue jaca méidonide. 
\p  
\v 18 Ja birui Juzíñamuimo caɨmare nabáirillanomo dúcɨdɨomoɨ. Jaiai Juzíñamui comɨnɨ áillue caifónedumo áɨnozidiaɨoɨ, Juzíñamui daɨna uaina cacáillena. Afedu mámecɨ Sinaí. Afedu náaduna irai izói boode, aillo úillɨe dɨga. Afe llezica ɨere jacɨre naɨríbicaide. Naɨríbicaillano, jairifo rɨire jaiñode.  
\v 19 Aféruimo bainada izoide fɨcɨre cácacaide. Afe llezica áillue come úrilla uai íaɨoɨmo fɨcɨre cácacaide. Afe uai ɨere jacɨ́rede cacaide. Afemona, áfena cacádɨno jɨáɨe emódomo lletara uaina llóñellena izire jɨcádiaɨoɨ.  
\v 20 Afe íaɨoɨ cacana íaɨoɨmo lloga lletara uai jamánomo ɨere juáredeza. Aféuai daɨde: 
\q1 “Bie óode íduna omoɨ jetáiñeno iri. Nɨnena daa rɨlle bídumo bíadɨ, raɨre nofɨ́cɨaɨdo fáiri. Daje izói nɨnena bídumo bite come fáiri,” daɨde. 
\m  
\v 21 Uafue, afe cacánafue naa cɨ́ocaidɨfue dɨga ɨere jacɨ́renamona, dama Moisés uai ua: “Aferi ɨere jacɨ́naitɨcue. Jacɨ́ruillano cuidɨ́ritɨcue,” daɨde. 
\p  
\v 22 Mei íadɨ, jae jɨáɨfodo Jesucrístomo omoɨ ɨ́ɨnuamona, ja birui Juzíñamuimo ite jacɨ́nide caɨmare nabáirillafue dɨbénemo dúcɨdɨomoɨ. Ie mei ɨ́coɨmo monamo ite jaca caade Juzíñamui uícomo úrizaitɨomoɨ. Juzíñamui illa jofue, “mona ero ie Jerusalén” mámecɨrede. Iemo jɨáɨfodo “Sión Caifónedu” daɨna. Afémɨemo ja omoɨ caɨmare nabáirillamona dɨga íeza facádonide Juzíñamui abɨ imacɨ Juzíñamuina ióbioicana ɨráɨzitiaɨoɨ.  
\v 23 Ua, omoɨ ɨ́ɨnuamona Juzíñamui ómoɨna daɨde: “Ja cue daade Jitó Jesucristo izóidɨnodɨomoɨ. Cuemo ie dúina izói, afe izói ja cuemo jaɨnáidɨomoɨ,” daɨde. Afemona nana Juzíñamui íena comuítagamacɨmo jae jaɨnáidɨomoɨ. Nana afe íemo jaɨnáidɨno mámecɨaɨ jae monamo cuega. Ie jira nana Moo Juzíñamui ie comuítaganona, ñue jɨcánuana fɨbídɨmɨe izói, ñue íaɨoɨna rɨ́idoite, mei afémɨe nana naɨraɨ Mooza. Jaiai ie anamo ñue itɨno, jae tɨídiaɨoɨ, mei íadɨ íaɨoɨ ñuera joreño naɨ fɨgo caɨmare iñédiaɨoɨ. Ja biruíllaɨdo Cristo caɨri tɨ́illano caɨna jíllotate. Daɨí nana íemo ɨ́ɨnotɨnona jíllotano, afe tɨ́idɨno ñuera joréñuaɨ ñue jaɨ́cɨna caɨmare itátagaiaɨoɨ.  
\v 24 Uafue, Juzíñamui comue caɨmare caɨmo fecállɨfue caɨmo llóiacade. Afefue caɨmo lluáɨbitɨmɨe Jesús, mei ie cruzmo ie dɨe tótajado caɨmare ɨ́aɨfuenidɨnona fɨnócacaɨza. Ie jira ie dɨe, úrilla uai izói jamánomo ñúefue caɨ ɨfócɨmo denode. Mei jɨáɨfodo Abel dɨe tóilla afe izói caɨmare ñúefuiaɨ caɨmo lloñede. 
\p  
\v 25 Nana bie caɨmare Juzíñamui caɨmo llotátagafuiaɨna jae onódɨomoɨ. Afena omoɨ onónamona, afefue ómoɨmo llotɨ́mɨe mai omoɨ ruifíruiñeno iri. Afe íena ruifíruillamona abɨ́ omoɨ rairuiri. Mei jaiai bínɨemo Juzíñamui jóonega lletáraɨma dáɨnana ruifíruitɨno, duere íaɨoɨ fɨnóinamona jaca jílloñediaɨoɨ. Afe baɨmo birui monámona caɨmo llotɨ́mɨe dáɨnana caɨ ruífiruiadɨ, daje izói ua jílloñeitɨcaɨ.  
\v 26 Jaiai aféruimo ie úrilla uai énɨena dɨga icaiño rɨire docáitate. Mei íadɨ birui afémɨe uafue llote: “Nane afe emódomo dáacaiño énɨena rɨire docáitaitɨcue, naa caifo ite monánɨaɨri,” daɨde.  
\v 27 Afémɨe daɨna “Nane afe emódomo énɨena dáacaiño docáitaitɨcue” Juzíñamui íiraɨruillaɨdo fɨnóllɨfue caɨna daɨde. Aféruimo nana ie fɨnoca raa, ranítado izírilla izói níraɨdoite. Afe níraɨduado nana níraɨrede ráanɨaɨna, afémɨe oni nɨné táɨnocaitaite. Mei íadɨ níraɨnide ráanɨaɨ jaca méidonide; fɨébillano zíiñona íitiaɨoɨ.  
\v 28 Ja birui Juzíñamui méidonide illáɨmana illánomo jaɨnáitagacaɨ. Iemona íena “Ɨere fɨgora” caɨ daɨífɨreillɨ. Afe llezica caɨmare úrillafuedo mai íemo caɨ ióbillɨ. Ua, ñue jacɨ́ruioicana ie uáillaɨmo mai ñue caɨ cacáreillɨ.  
\v 29 Mei jɨɨ, caɨ Juzíñamui, irai amena cuarilla izói, nana ɨ́aɨfueredɨnona jaca zíiñona íaɨoɨna duere fɨ́noite. 
\c 13  
\s1 ¿Nɨe izói Juzíñamuina ióbitaredɨcaɨ? 
\p  
\v 1 Amatɨaɨ, mai conímana omoɨ izíruifɨreiri.  
\v 2 Daje izói onina bitɨ́nona mai dúecaillano ñue caɨmare uáidori, mei daɨí dárie jɨáɨmana íaɨoɨ caɨmare uáidofɨrenamona ónonino Juzíñamui abɨ ímɨiaɨna jofo llɨ́ɨnotiaɨoɨ. 
\p  
\v 3 Iemo Jesumo ɨ́ɨnuamona llavécamacɨmo ñue omoɨ úibicairi. Ua dájena llavécano izói, mai íaɨoɨmo comecɨ omoɨ facari, íaɨoɨna omoɨ canóllena. Daje izói duere fɨnoca Jesumo jaɨnáidɨmacɨmo, mai omoɨ ñue comécɨiri, mei danɨ omoɨ abɨna jɨáɨmacɨ duere zefuítarede; íemo bimacɨ dɨga daɨí zéfuitɨomoɨza. (Dáamacɨdɨomoɨza.) 
\p  
\v 4 Daa come daje rɨngona áɨreia ñuera. Afémɨe dama ie aɨ abɨna onona ñuera. Ɨima dama ie aɨ jeta ñuera. Mai bifue ɨáɨñeno ñue omoɨ fɨ́mairi. Mei Juzíñamui nana jɨruíredɨnona izire jɨcánuano íaɨoɨna duere fɨ́noiteza, naa dama áɨreiñeno rɨngo dɨga itɨ́nori. 
\p  
\v 5 Daje izói omoɨ comecɨ ífuena ñue onoiri. Ucubena aillo jitailla fɨénide. Afemona abɨ́ omoɨ rairuiri. Mei jɨáɨfodo ómoɨmo due jiza ite ráanɨaɨri júfidoñeno caɨmare uái iri, mei Juzíñamui uafue dáɨdeza: “Ona fáɨcanocaiñeitɨcue. Daje izói jaca ona zóofeñeitɨcue,” daɨde.  
\v 6 Iemona mɨnɨ́cana jɨzíreñeno daɨíredɨcaɨ: 
\q1 “Juzíñamui cuena canófɨredɨmɨe; íemona fɨeni cue fɨnóacadɨmɨena jácɨruiñeitɨcue.” 
\p  
\v 7 Iemo mai Juzíñamui uai ómoɨmo nano fueñe jino llófuetɨnomo ñue omoɨ uibíoiri, mei ñúeodo ómoɨna ɨfódiaɨoɨza. Iaɨoɨmona comuide ñúefuiaɨmo, féitañeno mai ñue omoɨ comécɨioiri. Afémacɨ Jesús ɨ́coɨnia tɨtácaiaɨoɨ, mei íadɨ afémacɨ fáɨcanocaiñeno Jesumo ɨ́ɨnua izói, afe izói féitañeno mai omoɨ ɨ́ɨnofɨreiri. 
\p  
\v 8 Mei jɨɨ, Jesucristo nanómona ie illa izói, ja birui jɨáɨfodo méidoñeno dáamɨeoicaide. Ua afémɨe jaca zíiñona dáamɨeite.  
\v 9 Ja birui dɨga jɨáɨfodo cacaide onina bite ónoñega fɨeni llófueinafuiaɨ ite. Aféfuiaɨ ñúeomona oni nɨbéfodo omoɨ baɨítaiacadeza; áfemona abɨ́ omoɨ rairuiri. Juzíñamui caɨri dúecaillano caɨ cánuano caɨ comecɨ náɨrecaitate. Afe ie caɨ comecɨ náɨretaja ñuera. Mei íadɨ afe jɨcana lluáɨbiga güille rairuínafuiaɨna jeire caɨ óiadɨ, caɨna ñue cánoñeite. Daje izói afe uai jeire otɨ́nona canóñede. 
\p  
\v 10 Jesucristo caɨ ifomo fécafue Juzíñamuimo caɨmare caɨ nabáirillena danɨ caɨmo dúide. Nana Judíuaɨdo Juzíñamuimo úriraɨnɨ, ie jaiai gaɨríracomo aillo Juzíñamuimo áɨnozille nɨ́cɨdogafuiaɨ fɨnódiaɨoɨ. Mei íadɨ afémacɨ Jesús dɨbénemo ite cáɨmafuiaɨna llɨ́ɨnonidiaɨoɨ. 
\p  
\v 11 Judíuaɨmona comɨ́nɨdo Juzíñamuimo úritɨllaɨma dáacaiño naga fɨmona afe faga rɨlle dɨe Juzíñamui icomo uite. Afe Juzíñamui icomo ite jofoide ñue rairuícacomo comɨnɨ ɨ́aɨfue ɨ́coɨnia dɨ́ena uite. Mei íadɨ afe faga rɨlle, comɨnɨ illácuaɨ jinomo jobáifɨrediaɨoɨ.  
\v 12 Afe izói Jesús Jerusalén jinomo duere zefuide, dama ie dɨe tóillado nana comɨnɨ fɨénidɨfue oni dóllena. Daɨí duano íaɨoɨna Juzíñamui íena mamede.  
\v 13 Ie jira nana Judíuaɨ Juzíñamuimo áɨnozille nɨ́cɨdogafuiaɨna féitajano, mai dama Jesumo jaca caɨ ɨ́ɨnollɨ. Ua, daɨí íemo caɨmare caɨ jaɨnáinamona jílloitɨcaɨ. Ie meáire duere zéfuilla izói, duere caɨ zefuíadɨ, áfena náfueñeno naɨ caɨmare íemo jáɨnaitɨcaɨ.  
\v 14 Ja bínɨemo ñuera méidoñega illano caɨmo iñede; mei íadɨ Juzíñamui fɨnoca monamo ite méidonide caɨ illɨ́nomo izire úiñoidɨcaɨ, caɨmare zíiñona ie dɨga caɨ nabáirizaillena.  
\v 15 Iemo, Jesús caɨdo Juzíñamuimo nahí úriraɨmana íllamona, mai Jesudo nágaruillaɨ Juzíñamuimo ñúefue caɨ nitallɨ. Ua, caɨ fuemo ite uaido Juzíñamuina caɨmátaitaredɨcaɨ. Caɨ Ocuíraɨma Jesús mámecɨdo caɨ úriadɨ, jaca Juzíñamuina ebire ióbitaredɨcaɨ.  
\v 16 Daje izói nágarui jɨáɨma canolle ñúefue jeire o úana, mai féitañeno iri. Aféruido jitáidɨnomo ómoɨmo ite raana jeruíñeno fecari; mei aféfuiaɨna Juzíñamui ɨere ióbideza. 
\p  
\v 17 Omoɨ illaɨnɨ llogáuaimo ñue omoɨ cacáreiri. Aféuai anamo ñue omoɨ itábicairi; mei omoɨ comecɨ ñue íllena aféllaɨnɨ nágarui ómoɨna rairuífɨrediaɨoɨza. Ua aféllaɨnɨ ómoɨna rairuilla nɨe izói íadɨ, afémacɨ Juzíñamuimo jino llórediaɨoɨ. Ie jira íaɨoɨ táɨjɨnana omoɨ daɨdóñeno iri; mei jɨáɨfodo ñue íaɨoɨ anamo omoɨ itábicairi. Afedo aféllaɨnɨ Juzíñamui ocuica táɨjɨnana caɨmare fɨ́noite. Mei íadɨ afémacɨ afe táɨjɨnana zúurecana fɨnóadɨ, fɨgo cánoñegaomoɨ. 
\p  
\v 18 Mai birui caɨdo Juzíñamuimo omoɨ úriri, afe Juzíñamui caɨ canólleza, mei caɨ comecɨ ifue ɨáɨnideza. Mei jɨɨ, nágaruillaɨ náganuiaɨmo illa dɨ́gamɨe íaɨoɨ eróicana ñue jaɨ́cɨna fɨ́gomɨena íacadɨcaɨ.  
\v 19 Ua, cuedo Juzíñamuimo comécɨdo omoɨ úrillena izire jɨcádɨcue, raɨre meine abɨdo omoɨ cɨ́gɨmo Juzíñamui cue orélleza. 
\s1 Iiraɨcaiño uáidota ñue ézɨcɨnocaillafue 
\p  
\v 20 Ja birui Juzíñamui ñue omoɨ ézɨcɨllena jɨcádɨcue; Moo Juzíñamui, comécɨna uái illafue comɨ́nɨmo fécaitɨmɨe. Iemona caɨ Ocuíraɨma Jesuna tɨ́illanomona Juzíñamui meine abɨdo cáatate, mei Jesús ie dɨe tóillado nana caɨmo ite fɨénidɨfuiaɨna muiñódeza. Múiñuano zíiñona Juzíñamuimo caɨ nabáirillafue cáɨena mamede. Ua, Jesús jamánomo ñuera ovejaɨ úiñoraɨma izoide. Afémɨe ovejaɨ rairuilla izói, caɨna úiñofɨrede, comécɨna uái caɨ íllena.  
\v 21 Afe bie Juzíñamuimo omoɨ comecɨ náɨreillena jɨcádɨcue. Ua nana ie ñuera rɨ́inodo omoɨ comécɨaɨna ñue jaɨ́cɨna caɨmare náɨreillena jɨcádɨcue. Afe bie cue jɨcácado ie jitáinafuena ñue comɨnɨ eróicana fɨ́noitɨomoɨ. Afe llezica Juzíñamui comecɨ óiacana izói danɨ caɨmo zúillena izire íemo jɨcádɨcue. Mei daɨí jamánomo ebírenafue Jesucrístomo, nɨnomo fúiñeitena nitáredɨcaɨza. Mai, daɨí íteza. 
\p  
\v 22 Amatɨaɨ, nana bie ómoɨmo cue cuega lletárafuiaɨmo járitañeno fɨa omoɨ comécɨiri. Afena izire ómoɨena jɨcádɨcue, mei bie ómoɨmo cue cuegáuai íanorideza.  
\v 23 Iemo jɨáɨfuena ómoɨmo fɨdɨ́taacadɨcue. Jae caɨ ama Timoteo llavéinanomona jae jino zuitaca. Omoɨ dɨne naɨ jáiñeitɨcuemo, afémɨe cue illánomo raɨre dúcɨadɨ, nɨbaɨ daane omoɨ éroizaɨbitɨcoco. 
\p  
\v 24 Nana omoɨ llófuete illáɨnɨna cuedo ñue uáidori, naa afénomo ite Jesumo ɨ́ɨnotɨnori. Itáliamona benomo caɨ bite ámatɨaɨ ómoɨmo uaillaɨ orédiaɨoɨ. 
\p  
\v 25 Juzíñamui nana ñue omoɨ íllena ñue ézɨcɨteza. Mai. 
\p Daɨítadeza. Jae nɨɨe.