\id 2TI - Huitoto Mɨnɨca NT -Colombia 2011 (DBL 2013) 
\h 2 TIMOTEO 
\toc1 Méifodo San Pablo Timotéomo Orécabe 
\toc2 2 Timoteo 
\toc3 2 Ti 
\mt2 MÉIFODO SAN PABLO TIMOTÉOMO ORÉCABE 
\mt2 Segunda Carta del Apóstol San Pablo a Timoteo 
\c 1  
\s1 Pablo Timotéomo cuete 
\p  
\v 1 Cue Páblodɨcue. Jesucristo ñúefue lluájillena orécamɨedɨcue. Juzíñamui comecɨ jítaina izói orécamɨedɨcue. Daje izói uícodo lloga zíiñona caɨ cáaillɨfue lluájitagacue. Cristo Jesumo dájena caɨ jaɨnáinamona afe cáaillɨfuena óitɨcaɨ.  
\v 2 Cue izíruiga jitó Timotéomo bibe cuetɨ́cueza, ona Juzíñamui ñue ézɨcɨiteza, daɨíacadɨcue. Daje izói: Juzíñamui omo dúecaiteza daɨdɨcue. Iemo: Caɨ Moo Juzíñamuimona oga comecɨ ñue uái illáfuemo íitɨoza, daɨdɨcue. Nana bie ñúefuiaɨ caɨ Ocuíraɨma Jesucrístodo óredɨo. 
\s1 Pablo Crístomo uai nabáiacade 
\p  
\v 3 Juzíñamuimo nágarui comécɨdo úrifɨredɨcue. Mona naɨo dɨga Juzíñamuimo cue úrilla llezica omo comecɨ uibífɨredɨcue. Omo cue úibicaillano Juzíñamuina: Ɨere fɨgora, daɨdɨcue. Cue uzútɨaɨ Juzíñamui ióbitallena ie ocuífɨregana ñue ɨ́ɨnua izói, afe izói ɨáɨnide comecɨ úrillafuedo ie ocuífɨregana ñue ɨ́ɨnofɨredɨcue.  
\v 4 O comecɨ zúucaifɨrenamo uibíoidɨcue; íemona ona ɨere jaca cɨ́oiacadɨcue, áfemona caɨmare cue íllena.  
\v 5 Taɨno lloñeno ñue Juzíñamuimo o ɨ́ɨnuafuemo uibíoidɨcue. Afe birui Juzíñamuimo o ɨ́ɨnogafue nano fueñe o uzungo Loida ɨ́ɨnoga. Daje izói o ei Eunice ɨ́ɨnoga. Iemo bífuena o jaca ñue ɨ́ɨnofɨredɨoza, ñue onódɨcue. 
\p  
\v 6 Ie jira bie izóidena o ócuitɨcue. Naui omo onoɨ cue bɨ́tajamona Juzíñamui omo lloga llófuelle rɨ́ino féitañeno o iri. Nɨné ona féiza afefue nágarui meine rɨire o uibíoicairi. Irai dúizaide meine boota izói o uibíoicairi. Afemona jamánomo o llófuelleza.  
\v 7 Mei Juzíñamui comecɨ jacɨ́ruillafuena caɨmo fecáñede. Mei jɨáɨfodo comecɨ meáiruiñenafue Juzíñamui caɨmo fecade; íemo jɨáɨmana caɨ izíruillafue, íemo abɨna ñue caɨ onónafue dɨga, caɨmo fecade. 
\p  
\v 8 Ie jira caɨ Ocuíraɨma, Crístomo uai nabáillana meáiruiñeno o iri. Daje izói ie uai ɨ́coɨnia llavécacueza, cuena meáiruiñeno o iri. Mei jɨáɨfodo ñuera jíllona uai ɨ́coɨnia comuide duere zefuíllafuena ruifíruiñeno o iri. Omo cómuite duere zefuíllɨfuena rairuíñeno o llɨ́ɨnori. Mei Juzíñamuimo ite rɨ́inodo caɨ comécɨna caɨmare fɨ́raiteza.  
\v 9 Juzíñamuimo caɨ jaɨnáillena afémɨe ñue caɨna jíllotate, daje izói caɨna uáidote, ie ɨ́aɨfuenide comɨ́nɨna caɨ íllena. Danɨ ñue caɨ illáfuedo Juzíñamui íena ínidɨcaɨ. Mei jɨáɨfodo dama Juzíñamui jaiai uícodo mamérillado íeɨena itɨcaɨ. Daje izói Jesucrístomo caɨ jaɨnáillado Juzíñamui caɨna izíruite. Daɨí caɨna ie izíruillado íeɨena itɨcaɨ. Mei jaiai nɨnomo naɨ énɨe comuíñena llezica, Juzíñamui caɨna izíruite.  
\v 10 Mei bie caɨna ie izíruillafue, caɨ Jíllotaraɨma Jesucristo ana bínɨemo bíllado, afefue caɨmo jino onótate. Afe Cristo caɨ tɨ́illafuena ja jacɨ́nitade. Daje izói jíllona uai llúado, zíiñona caɨ illafue jino uáfomo cɨ́otate. Ua, íemo ɨ́ɨnotɨno zíiñona itátallena afe Juzíñamui uáfodo caɨmo onótate. Afe bie zíiñona caɨ illafue buna jaca nɨné táɨnocaitainide. 
\p  
\v 11 Bie ñuera uai lluájillena Juzíñamui jóonegamɨedɨcue. Judíoñedɨno llófuellena, Juzíñamui orécamɨedɨcue.  
\v 12 Iemo afe bíedo nana bífuiaɨ duere zefuídɨcue. Mei íadɨ áfena meáiruiñedɨcue. Cue ɨ́ɨnoga Juzíñamui comecɨ ífuena ñue cue onónamona, jacɨ́ruiñedɨcue. Mei afémɨe cuemo jóonenocaigafue jaca féiñeiteza. Afe bifue Juzíñamui dama Cristo billɨ́ruimo ñue úiñoite, mei afémɨe ɨere rɨ́inoredeza. Afena onódɨcue. 
\p  
\v 13 Naui jaɨ́cɨna joide llófueinafue o cue llófuia izói, áfena o llófuefɨreiri. Juzíñamuimo caɨ ɨ́ɨnogafuena jeire o oíri. Daje izói Jesucrístomo dájena caɨ jaɨnáinamona caɨna ie izíruillafuemo o iri.  
\v 14 Caɨ dɨga ite Ñuera Joreño canócaza Juzíñamui omo lloga ñuera rafue féitañeno o iri. 
\p  
\v 15 Ja onódɨoza: Nana Asia énɨe comɨnɨ ja cuena zóofetiaɨoɨ. Afémacɨmona bie mena ɨima íaillɨnoɨ: Figelo, íemo Hermógenes.  
\v 16 Mei íadɨ bie afe jɨáɨmɨe Onesíforo dɨbénedo nana ie comɨnɨ dɨga, mei caɨ Ocuíraɨma afémacɨmo caɨmare dúecaiteza. Mei afémɨe dɨga ícaiño cue jitaica raana atɨ́fɨrede. Llavécacue íadɨ jaca meáiruiñeno cuemo atɨ́fɨrede. Iemona Juzíñamui afémɨe comécɨna náɨcaitaiteza.  
\v 17 Uafue, Rómamo afémɨe illa llezica cuena are jénua ɨ́coɨnia baite.  
\v 18 Caɨ Ocuíraɨma caɨ comecɨ ifue rɨire jɨcánollɨruimo afe Onesíforomo dúecairi, Juzíñamuina daɨdɨcue. Ja ñue onódɨoza, Efésomo caɨ illa llezica, afe Onesíforo dɨga ícaiño caɨna canode. 
\c 2  
\s1 Jesucristo dɨbénemo itɨ́mɨe ñue fuirídɨmɨe izoide 
\p  
\v 1 Cue jitó Timoteo, Jesucrístomo dájena caɨ jaɨnáinamona Juzíñamuimo ite ñúefuiaɨmo itɨcaɨ. Afedo ñue o náɨreiri.  
\v 2 Cúemona o cacánafuemo cue uai nabáidɨnona aillo íteza. Iemona afefue mai oni jɨáɨe ñue ɨ́ɨnofɨredɨmɨiaɨmo o jóoneri. Afémacɨ daje izói oni jɨáɨmacɨmo llófuiailleza. 
\p  
\v 3 Duere zefuíllafue omo comuíadɨ, Jesucristo dɨbénemo ñuera fuiríraɨma izói abɨ́ rɨire o mameri.  
\v 4 Naga jɨáɨmɨena anáfenoacade fuiríraɨma fuiríllena mamérioide. Iemona uícodo nana jetáacaigafue fáɨcanocaite; afémɨe jae náamatagaza. Fáɨcanocaillano daa ie ocuídɨllaɨma anamo itábicaite, afe ie jɨ́ɨritɨllaɨma ióbitallena.  
\v 5 Daje izói naga jɨfánora raamo jɨfánotɨmɨe ñue jaɨ́cɨna jɨfánorede. Jɨfánua ocuide uai daɨna izói jɨfánorede. Afémɨe fɨeni jɨfánoia, mɨnɨ́cana jɨ́ridoñeite. Táɨnomo jɨfánoteza.  
\v 6 Jacafaɨ ríllamo izire táɨjɨdɨmɨe afe ie riga llɨzilla jeia llezica, afe ritɨ́mɨe fueñe ótena fɨgora. Dama íeɨena fueñe jofo óite.  
\v 7 Omo cue llógamo ñue comecɨ o facari, íemona caɨ Ocuíraɨma ona nana ñue fɨbítaiteza. 
\p  
\v 8 Mai tɨ́illanomona meine abɨdo caade Jesucrístomo o úibicairi. Daje izói afe Cristo caɨ jaiai illaɨma David úicoidɨgɨmamona comuídɨmɨe. Afémɨemo ñue o comécɨiri. Cue lloga ñue jíllona uai acɨ bie izói joide.  
\v 9 Bie ñúefue ɨ́coɨnia duere zefuítagacue. Jɨɨ, fɨénidɨfue fɨnódɨno izói maɨáno duere fɨnócacue. Mei íadɨ Juzíñamui lloga ñuera uai jaca buna llavénide.  
\v 10 Ie jira Juzíñamui nɨzécamacɨ cue cánua ɨ́coɨnia duere zefuídɨcue, mei íadɨ áferi zúucaiñeno jaca caɨmare itɨcue. Afémacɨ ñue jíllobicaillena duere fɨnócacue. Afe Jesucrístomo dájena caɨ jaɨnáinamona comuide jíllonafue ɨere ebírede. Iemo jaca zíiñona fúiñeite. 
\p  
\v 11 Bifue táɨnoñedeza, ɨere uafue: 
\q1 Afe Cristo tɨ́illa izói caɨ tɨ́iadɨ, afémɨe meine abɨdo cáadɨmɨena jailla izói, afe izói danɨ caɨ meine cáaillano afémɨeoɨri íitɨcaɨ. 
\q1  
\v 12 Afémɨe ɨ́coɨnia duere caɨ zefuíadɨ ie illáɨmana illánomo jáɨnaitɨcaɨ. 
\q1 Afémɨena caɨ jáanoiadɨ, afémɨe jɨáɨ caɨna jáanoite. 
\q1  
\v 13 Afémɨemo caɨ ɨ́ɨnoñeniadɨ, afémɨe jaca ie daɨna izói naɨ fɨnófɨrede; 
\q1 Mei Juzíñamui dama ie abɨna jáanonideza. 
\s1 Ñuera daɨíllena facaca táɨjɨraɨma 
\p  
\v 14 Bífuiaɨmo jɨáɨmacɨna ñue o comécɨitari. Daje izói bífuiaɨ caɨ Ocuíraɨma eróicana íaɨoɨmo jóoneri. Iaɨoɨ ráifiñede júfidofɨrega uáillaɨmo mai afémacɨna júfidotañeno o iri. Afe bie izoide júfidofɨrenafue ráifiñedeza, buna canóñede. Afemo cacáreidɨnona jɨáɨfodo oni comécɨna jóitate. Daje izói íaɨoɨ ɨ́ɨnoga ua uaina nɨné féitateza.  
\v 15 Juzíñamui uícomo fɨgora daɨíllena facaca táɨjɨraɨma izói o iri. Iemo afe llezica jɨáɨfodo lloñeno daje izói o illáfuena ñue jaɨ́cɨna o jóonefɨreiri. Daɨí ñue facácamɨe ie meáicaillafue iñede. Daɨítade come Juzíñamui ua ráfuena jaɨ́cɨna comɨ́nɨmo llófuete.  
\v 16 Bínɨemo ite táɨnona úrioinafuemona oni o iri. Daɨí táɨnona úrifɨredɨno jamánomo fɨénidɨfuiaɨmo baɨídiaɨoɨza. Anábaitagano izói íficaidiaɨoɨ.  
\v 17 Fɨeni íaɨoɨ llófueina uai raɨre jɨca jalleide. Come abɨmo comuide fɨénide ñozagɨ jarire oni móonaioicailla izói, bimacɨ llófuega uai oni jalléicaide. Afe bie izói ja Jimeneo Fileto dɨga, bimacɨ izói, fɨeni llófuetɨnona jáidiaillɨnoɨ.  
\v 18 Afe íaillɨnoɨ Juzíñamui ua uáimona oni nɨbéfodo jáidiaillɨnoɨ. Juzíñamui tɨ́idɨno meine abɨdo cáaillɨfue dɨbénedo llotíaillɨnoɨ: Ja záide, daɨdíaillɨnoɨ. Daɨí jɨáɨe comɨnɨ Juzíñamuimo ɨ́ɨnogafuena uáitacana jáidiaillɨnoɨ.  
\v 19 Mei íadɨ caɨ ɨ́ɨnoga uai oni cáitañeillena, Juzíñamui áfemo jɨáɨe rɨírede uaina nabaide. Iemona féitañeno afe Juzíñamuimo ɨ́ɨnoicaidɨcaɨ. Afemona caɨ bie rɨire mozíoiga jíaɨlliraɨ izóidɨcaɨ. Juzíñamui nabaica uai Juzíñamui dama íeɨena caɨna mameide. Afe uai bie izói jóoide: Caɨ Ocuíraɨma nana dama ie nahí comɨ́nɨna ñue onode. Iemo afe Juzíñamui nabaica uai jɨáɨfodo bie izói daɨde: Nana “Crístomo jaɨnáidɨcue,” daɨdɨno fɨénidɨfuena féitano, aféfuemona ja oni írediaɨoɨ. (Bie ie nabaica uaido, Juzíñamuimo caɨ ɨ́ɨnogafuena afémɨe rɨire fɨnode.) 
\p  
\v 20 Aillue jofo eromo dɨga raa ite. Ráifide oro ie fɨnoina raa ite. Daje izói ráifide plata ie fɨnoina raa ite. Iemo jɨba ráifiñede amena fɨnoina raa ite, naa nogóramona fɨnoca raa dɨga. Dáarie bie ñuera rairuica jiróracuaɨdo jɨcana bitɨ́nona jirótafɨredɨcaɨ. Jɨáɨe fɨgo jínoñede jiróracuaɨdo jalleide illáɨmana ecáñedɨcaɨ.  
\v 21 Afe izói naga jɨáɨmacɨ canóllena Juzíñamui nɨzécamɨe, jaca comécɨna ɨ́aɨfuenino írede. Afémɨe jaca ɨ́aɨfuemona oni írede. Iemona afe cómena Juzíñamui íeɨena ñue fɨnóbitade. Ebena ñuera táɨjɨnanomo Juzíñamui raɨre íena óreite. Mei afémɨe ɨáɨnide ráifide oro fɨnoina jiróraco izóidɨmɨeza. 
\p  
\v 22 Jitócomena llezica comecɨ fɨeni óiacanafuiaɨmona oni o iri. Mei jɨáɨfodo come ñue jaɨ́cɨna illáfuedo o jairi. Daje izói Juzíñamuimo o ɨ́ɨnofɨreiri, íemo jɨáɨmana o izíruifɨreiri, íemo comecɨ mánaɨnafuedo naga cómena o uáidofɨreiri. Iemo, nana comecɨ ɨ́aɨfuenino Juzíñamuimo úrifɨredɨno dɨga o nabáiriri.  
\v 23 Daje izói táɨnomo comécɨilla uáillaɨna náfueñeno o iri. Mei ja onódɨoza, bie izoide úrillafuiaɨ fúirienaillafue comuítate.  
\v 24 Juzíñamui ocuífɨregamɨe jaca jɨáɨma dɨga icɨ́rinide, íemo jɨáɨ fuirínide. Mei jɨáɨfodo afémɨe nana comɨnɨ dɨga caɨmare írede. Daje izói jɨáɨmacɨna caɨmare llófuerede. Iemo afémɨe jɨáɨmamo jarire úriñeno, fɨ́aicana úrirede.  
\v 25 Daje izói Juzíñamui ocuífɨregamɨe naga ie llófueinana náfueacañedɨnona comecɨ manaɨ fɨ́nuano, íaɨoɨna lletárede. Afémɨe daɨí íaɨoɨna lletárede, íaɨoɨ comecɨ ifue Juzíñamui méidotalleza. Iemona daje izói ua ráfuena Juzíñamui íaɨoɨna onótaiteza.  
\v 26 Bie izoide llógana jámairuitɨno Taɨfe írebaimo jiilla izói itíaɨoɨ. Iemo afe Taɨfe ie comecɨ óiacana izói afémacɨna ócuite. Mei íadɨ ua ráfuena íaɨoɨ onónamona jíllorediaɨoɨ. Afénomo jíizaidɨnona oni baɨrórede. Afémacɨ ɨnɨ́dɨmɨe como cazilla izói, abɨna onóitiaɨoɨ; íemona Taɨfe anámona jíllorediaɨoɨ. 
\c 3  
\s1 Comɨnɨ íiraɨruillaɨdo illɨfue 
\p  
\v 1 Ja bífuiaɨna o onótaitɨcueza. Iiraɨruillaɨdo jacɨ́redɨruina caɨmo mónaite.  
\v 2 Aféruimo comɨnɨ danɨ íaɨoɨ abɨna fɨeni izíruitiaɨoɨ, íemo úcubena ɨere duéruitiaɨoɨ, íemo ɨere fɨeni abɨ ɨ́ɨnoitiaɨoɨ. Daje izói “Jamánomoidɨmɨedɨcue” daɨnano, cómena canóñede táɨnofuiaɨmo comécɨitiaɨoɨ. Iemo Juzíñamuimo fɨeni úritiaɨoɨ, íemo íaɨoɨ móotɨaɨaɨ ocuilla uaina náfueñeitiaɨoɨ. Iemo jɨáɨmana “Ɨere fɨgora” daɨíñeitiaɨoɨ. Daje izói Juzíñamuimo ɨ́ɨnogafuena náfueñeitiaɨoɨ.  
\v 3 Afémacɨ jɨáɨmana íziruiñeitiaɨoɨ, daje izói féitañeno íaɨoɨmo duere fɨnódɨmɨemo dúecaiñeitiaɨoɨ, íemo jɨáɨmacɨmo fɨeni úritiaɨoɨ. Iemo íaɨoɨ comecɨ fɨeni óiacanafuena “Dama ite” dáɨiñeitiaɨoɨ. Iemo jɨáɨma íaɨoɨ icɨ́adɨ ñúefuedo fɨnóacañediaɨoɨ. Daje izói comɨ́nɨna ɨere izi cácataitiaɨoɨ. Nana ñúefuiaɨna bacáuai ífuena mámeitiaɨoɨ.  
\v 4 Afémacɨ danɨ́ íaɨoɨ nahí comɨ́nɨna jɨáɨe comɨ́nɨmo fállena fécajifɨrediaɨoɨ. Iemo “Dama cue íacana izói íredɨcue,” daɨífɨrediaɨoɨ; íemo táɨnomo comécɨillano “Ɨere jamánomoidɨmɨedɨcue,” dáɨitiaɨoɨ. Daje izói Juzíñamui jenóñeno danɨ íaɨoɨ comecɨ gáɨnafuiaɨna jénoitiaɨoɨ.  
\v 5 Dɨga jinófene íuaido “Cue bie ñuera Juzíñamui uaina ɨ́ɨnotɨmɨedɨcue,” dáɨitiaɨoɨ. Mei íadɨ jofona íaɨoɨ comecɨ ráatailla mei, afe ɨ́ɨnogafuemo ite méidolle rɨ́inona jáanotiaɨoɨ. 
\p Afe bie izoide comɨnɨ dɨga nabáiriñeno o iri.  
\v 6 Mei bimácɨmona dáarie, jɨáɨmacɨ jofomo jaillano comécɨna rɨínide rɨngónɨaɨ jɨ́fuefɨrediaɨoɨ. Afe rɨngónɨaɨ fɨénidɨfuiaɨna oruide. Afe rɨngónɨaɨ nana fɨeni óiacanafuiaɨna anáfenogaiaɨoɨ.  
\v 7 Dɨga ráfuiaɨ onóiacadiaɨoɨ mei íadɨ Juzíñamui ua ráfuena baitánidiaɨoɨ.  
\v 8 Jaiai Moisés illáruillaɨdo mena aima Janes, Jambres dɨga, Moisés daɨna uai uáitatiaillɨnoɨ. Afe íaillɨnoɨ uáitaja izói, bie comɨnɨ íiraɨruillaɨdo ua uaina uáitaitiaɨoɨ. Iaɨoɨ ɨfocɨ úrillafue oni nɨbéfodo jóoide. Juzíñamuimo ɨ́ɨnogafuena fáɨcanocaidiaɨoɨza; áfemo ínidiaɨoɨ, táɨnofue ɨ́ɨnotiaɨoɨ. 
\p  
\v 9 Mei íadɨ bimacɨ are jɨáɨmacɨna jɨ́fuecana úiñeitiaɨoɨ. Mei íanori íllamona nana comɨnɨ íaɨoɨ jɨ́fuefɨrenafuena fɨ́dɨitiaɨoɨ. Jaiai Moisés uáitate íaillɨnoɨ táɨnona úrilla uaina comɨnɨ fɨ́dɨa izói, nane afe izói bimacɨ táɨnona úrilla uaina nana comɨnɨ fɨ́dɨitiaɨoɨ. 
\s1 Iiraɨcaiño Pablo Timotéomo jóonenocaigafue 
\p  
\v 10 Mei íadɨ o cue llófuiana ñue jeire otɨo. Cue maca izói jaca ñue macádɨo. Iemo cue mamérilla izói ñue mamérifɨredɨo. Iemo Juzíñamuimo cue ɨ́ɨnua izói, afe izói ɨere ɨ́ɨnofɨredɨo. Cue comecɨ jarire úriñena izói, afe izói fɨ́aicana úritɨo. Jɨáɨmana cue duéruilla izói duéruitɨo. Dɨga juáredɨfuiaɨ cuemo comuide, íadɨ fáɨcanocaiñeno Juzíñamui ñúefue llócadɨcue. Afe cue ocuilla izói ñue ocuíoidɨo.  
\v 11 Comɨnɨ duere cue fɨnóllena cuena racádiaɨoɨ, mei íadɨ áferi jacɨ́naiñeno caɨmare itɨcue. Naui Antioquía jófuemo duere cue zefuíllana onódɨo; daje izói Iconio jofue, Lystra dɨga cuemo íaɨoɨ fɨnócafuena onódɨo. Nana racada duere cue íaɨoɨ fɨ́nuafuiaɨna onódɨoza. Mei íadɨ caɨ Ocuíraɨma nana aféfuiaɨmona ñue cuena jíllotate.  
\v 12 Uafue onóigaza, nana Jesucrístomo jaɨnáinamona ñue jaɨ́cɨna illáfuemo íacadɨno, naɨ ɨ́ɨnoñedɨmacɨdo duere zéfuitiaɨoɨ.  
\v 13 Iemo afe llezica fɨénide jɨáɨmana jɨ́fuefɨredɨno jamánomo fɨénidɨfuiaɨmo ana jáitiaɨoɨ. Jɨáɨmacɨna íaɨoɨ jɨ́fuia llezica, danɨ jɨáɨmacɨ íaɨoɨna jɨ́fueitiaɨoɨ. 
\p  
\v 14 Mei jɨáɨfodo omo llófuegafuiaɨmo rɨire o comécɨoicairi, mei aféfuiaɨmo ɨere ñue ɨ́ɨnotɨoza. Iemo afe bífuiaɨna o llófuetɨmɨena onódɨo.  
\v 15 Daje izói o dúemɨedɨomona Juzíñamui ñuera Cuegáuaina fueñe onóicaidɨo. Aféuaimona llófuegao, jíllonafue o maiñóllena. Afe jíllonafue Cristo Jesumo o ɨ́ɨnuado o oga.  
\v 16 Nana Juzíñamui Cuegáuai, Juzíñamui afe cueraɨnɨ comécɨmo úrilla izói ñue jaɨ́cɨna cuega. Bie uai ɨere ráifide comɨnɨ ɨfocɨ déillena. Aféuaido comɨnɨ llófuerega; íemo afe bíuaido táɨnomona lloga uaina uáitarede; íemo áfedo jɨáɨmacɨna lletárede; daje izói aféuaido jaɨ́cɨna comɨnɨ ñue illɨ́fuena íaɨoɨmo llórede.  
\v 17 Afe daɨí Juzíñamui Cuegáuaido Juzíñamui ocuícamɨe ñue baitádɨmɨena írede. Iemona afémɨe ñue fɨnóbide, nana ñúefuiaɨ ie fɨnóllena. 
\c 4  
\p  
\v 1 Juzíñamui eróicana, caɨ Ocuíraɨma Jesucristo dɨga, Juzíñamui uaillaɨ o llófɨreillena ɨere omo llonódacaidɨcue. Mei Jesucristo bínɨemo illáɨmana bille llezica, afémɨe nana caade comɨ́nɨna, naa tɨ́idɨno dɨga íaɨoɨmo itɨ́fuena rɨire jɨcánoiteza.  
\v 2 Afémɨe raɨre bíacana jira, rɨire ona dáɨitɨcue: Nágarui Juzíñamui uaillaɨ jino o llófɨreiri. Afemo rɨire o mamérioiri. Comɨnɨ aféfuena cacáacana llezica, daje izói aféfuena afémacɨ cacáacañena llezica, nana afémacɨna jaca daje izói Juzíñamui uai rɨire o llófɨreiri. Ñue rɨire llófɨreiri Juzíñamuimo naɨ ɨ́ɨnoñedɨno aféuaina íaɨoɨ jiéruillena. Daje izói afémacɨ illafue fɨgóñedeza, bíuaido íaɨoɨna lletari. Iemo ñúeodo íaɨoɨ jáillena, mai rɨire íaɨoɨmo lloiri. Nana bífuiaɨna, nana comecɨ járitañenafuedo fɨ́aicana o llófuefɨreiri.  
\v 3 Afe daɨí llófuefɨreiri, mei dɨga irui íllamona, comɨnɨ ua llófueinafuemo cácañeitiaɨoɨza. Mei jɨáɨfodo danɨ íaɨoɨ fɨeni gaɨna izói danɨ íaɨoɨ cacáacana izói, íaɨoɨ llófueitɨnona aillo jénoitiaɨoɨza.  
\v 4 Juzíñamui ua ráfuena fáɨcanocaillano, nana jagaɨ izoide táɨnomona llogáfuiaɨmo náfueitiaɨoɨ.  
\v 5 Mei jɨáɨfodo o iri. Cáadɨmɨe izói ñue abɨna o onoiri. Zúufue omo comuíadɨ, áferi jacɨ́naiñeno abɨ rɨire o mameri. Iemo jíllona uai o llóllemo mamérioiri. Juzíñamui omo jóonega táɨjɨna ñue ɨ́coɨmo o fuitari. 
\p  
\v 6 Ja íanori íllamona Juzíñamui ióbitallena fatá fecaca rɨlle izói, fécajigacue. Cue tɨtáillɨrui ja áɨnozide.  
\v 7 Ñuera fuiríraɨma izói, fɨénidɨfue anáfenua izói táɨjɨnana jae rɨire ñue ɨ́coɨmo fuitádɨcue. Iemo jɨfánotɨmacɨmona rɨire aizɨda goal orédɨmɨe izói, afe izói cue táɨjɨna fuillánomo dúcɨdɨcue. Iemo Juzíñamuimo caɨ ɨ́ɨnogafuena fáɨcanocaiñeno, ja ñue ɨ́coɨmo ɨ́ɨnotɨcue.  
\v 8 Iemona ja birui caɨ Ocuíraɨma cuemo fecalle fia jɨrídoga raa izóidɨfuemo ocuíridɨcue. Afe ie billɨ́ruimo, Juzíñamui anamo ñue nɨ́ɨfuenidɨmacɨmo dúide zíiñona illáfuena afémɨe cuemo fécaite; mei afémɨe comɨ́nɨmo itɨ́fuena ñue jaɨ́cɨna jɨcánoitɨmɨeza. Dama cuemo fécañeiteza, mei íadɨ daje izói nana ie billɨ́ruimo caɨmare ocuíridɨnomo jɨrídorede zíiñona illáfuena afémɨe fécaite. 
\s1 Dama Páblomo dúidɨfuiaɨ Timotéomo llote 
\p  
\v 9 Timoteo, mai raɨre cue eróizaɨbiri; rɨire áfemo o mamériri.  
\v 10 Mei cue nabai Demas, bínɨe ráanɨaɨna jamánomo gáɨnamona jae cuena zóofeteza. Zóofiana jae Tesalónica jófuemo jaide. Iemo jɨáɨe cue nabai, Crescéntena mámecɨredɨmɨe, jae Galacia énɨemo jaide. Daje izói jɨáɨ Tito oni Dalmacia énɨemo jae jaide.  
\v 11 Dama Lucas cue dɨga fɨébilla. O billɨ́ruimo, mai Marcos jénuaillano cue dɨné ómɨcoɨ biri, mei afémɨe benó cue táɨjɨna cuena ɨere cánoiteza.  
\v 12 Cue nabai Tíquico, Efeso jófuemo jae cue oreca.  
\v 13 O billɨ́ruimo cue fɨeca emódomo jɨtáraroi o atɨri. Naui Troas jófuemo ite Carpona mámecɨredɨmɨe jofomo cue fɨeca. Daje izói cue rabénicuaɨ o atɨri. Iemo jɨáɨe cuega rábiaɨ féitañeno o atɨri, mei afébiaɨna ɨere jitáidɨcueza. 
\p  
\v 14 Naui Alejandro aillo fɨénidɨfuiaɨ cuemo nitade. (Afémɨe lloéfiaɨ fɨ́nuamo táɨjɨfɨredɨmɨe.) Nana fɨeni ie úrillafuiaɨ dɨeze caɨ Ocuíraɨma afémɨemo ɨba óite.  
\v 15 Afe Alejándromona abɨ́ o rairuíoicairi, mei afémɨe caɨ lloga uaina ɨere uáitaacadeza. 
\p  
\v 16 Nano fueñe cue abɨ rɨ́idollɨfue, rɨ́illaɨnɨ uícomo cue llua llezica, bu cuena nabáiñede. Nana cuena zóofetiaɨoɨ. Juzíñamui afefue ɨba íaɨoɨmo óñeillena afémɨemo jɨcádɨcue.  
\v 17 Mei íadɨ naui abɨ cue rɨ́iduaruimo caɨ Ocuíraɨma cuena canode. Afémɨe cuena ñue rɨire fɨnode, jíllona uai oni nana judíoñedɨnomo cue lluájillena. Afémɨe afe lluájillafue ñue ɨ́coɨmo cuena fuitátate. Afe daɨí caɨ Ocuíraɨma ɨere jacɨ́redɨfuemona ñue cuena jíllotate.  
\v 18 Daje izói nana jɨáɨe fɨénidɨfuiaɨmona, afémɨe cuena jíllotaite, íemo dama íeɨena cuena ráiruite, monamo ite ie illáɨmana illánomo cue dúcɨillena. Ñuera ebíredɨfue jaca nɨnomo íemo íteza. Daɨítadeza. 
\s1 Iiraɨcaiño uáiduafuiaɨ naa ézɨcɨgafuiaɨ dɨga 
\p  
\v 19 Mai, Prisca, Aquila dɨga caɨmare uáidori, naa Onesíforo comɨnɨ dɨga.  
\v 20 Erasto Corinto jófuemo fɨébide. Cue nabai Trófimo ie ɨrárenamona, Mileto jófuemo cue fɨeca.  
\v 21 Mai raɨre rozíredɨruillaɨ naɨ dúcɨñena llezica benó o biri. Benómona jɨáɨmacɨ omo uai orédiaɨoɨ, be nɨ́ɨmacɨ: Eubulo, íemo Pudente, íemo Lino, íemo Claudia. Daje izói nana Crístomo jaɨnaide ámatɨaɨ o uáidotiaɨoɨ. 
\p  
\v 22 Caɨ Ocuíraɨma Jesucristo nágarui ómoɨmo nabáirifɨreillena Juzíñamuimo jɨcádɨcue. Daje izói Juzíñamui nana omoɨ ézɨcɨllena jɨcádɨcue. Mai daɨítadeza; jae nɨɨe.