\id 2PE - Huitoto Mɨnɨca NT -Colombia 2011 (DBL 2013) 
\h 2 PEDRO 
\toc1 San Pedro Méofodo Cuegabe 
\toc2 2 Pedro 
\toc3 2 Pe 
\mt1 SAN PEDRO MÉIFODO CUEGABE 
\mt2 Segunda Carta del Apóstol San Pedro 
\c 1  
\s1 Jesumo ɨ́ɨnotɨnomo Pedro cuete 
\p  
\v 1 Cue Simón Pédrodɨcue. Jesucristo ocuífɨregamɨedɨcue. Daje izói ie oréfɨregamɨedɨcue. Ɨere ráifide ɨ́ɨnuafue jeire otɨ́nomo bibe cuetɨcue. Omoɨ ɨ́ɨnogafue daa caɨ ɨ́ɨnogafue izói ráifide. Aféfuena ja faɨríotɨomoɨ, mei caɨ Jíllotatɨmɨe Jesucristo Juzíñamui dɨga comécɨna ñue jaɨ́cɨna jóidɨmɨeza.  
\v 2 Caɨ Ocuíraɨma Jesús, Juzíñamui dɨga, omoɨ onónamona dɨga ézɨcɨafuiaɨ, daje izói comecɨ caɨmare uái illáfuiaɨ dɨbénomo omoɨ iri. 
\s1 Crístomo jaɨnáidɨnomo ite nɨe izóidɨfuiaɨ 
\p  
\v 3 Nana caɨ comecɨ jitaica raa, Juzíñamui iodo caɨmare caɨ jáillena Juzíñamuimo ite rɨ́inodo caɨmo fecaca. Afémɨe caɨ ie fɨdɨ́tamona bífuiaɨna caɨmo ite. Ua dama íemo ite ñúefuiaɨdo afémɨe caɨna íemo ɨ́ɨnotade. Daje izói ie fáɨgacailla ebire fɨnócafuiaɨdo íemo caɨna ɨ́ɨnotade.  
\v 4 Iemona ie jɨ́fueñeno fecalle uai caɨmo llote. Bie caɨmo llogáuai ɨere aillo ráifide uai. Afe uáillaɨdo Juzíñamui illa izói íitɨomoɨza. Nana comɨnɨ ɨ́aɨfue dɨbénemo fɨeni comecɨ jítainafuiaɨdo uigámacɨ; mei íadɨ Juzíñamui ómoɨmo llogáuaido afe ɨ́aɨfuemona jae jíllodɨomoɨ. Iemona Juzíñamui ñue illafue dɨbénemo íitɨomoɨ.  
\v 5 Mei ie jira omoɨ ɨ́ɨnogafuemo, nágarui Cristo ñue illáfuedo omoɨ íocɨre jáillafuena aillo nabáicana uiri; afe omoɨ ñue jáillafuemo caɨmare fɨbíllafue daje izói nabáicana omoɨ uiri;  
\v 6 afe caɨmare fɨbíllafuemo, dama abɨna rairuíllɨfue omoɨ nabáicana uiri; afe dama abɨna rairuíllafuemo comecɨ járidoñenafue omoɨ nabáicana uiri; afe comecɨ járidoñenafuemo Juzíñamuimo caɨmare comécɨillɨfue dájemo nabáicana uiri;  
\v 7 afe Juzíñamuimo caɨmare comécɨillafuemo ámatɨaɨna duéruillafue dájemo nabáicana uiri; afe ámatɨaɨna duéruillafuemo nahí izíruillafue mai izire dájemo nabáicana uiri. 
\p  
\v 8 Nana bie izói daɨnáfuiaɨ jeire omoɨ óiadɨ, afe llezica aféfuiaɨ ñue omoɨ móonaitaiadɨ, omoɨ illafue táɨnomo báɨiñeite. Daje izói caɨ Ocuíraɨma Jesucrístona omoɨ onónafue táɨnoñeite.  
\v 9 Mei íadɨ bífuiaɨna jeire oñédɨno uínidɨmɨe illa izói ite; jɨca cɨóñeno áɨnori cɨódɨmɨe izói ite. Jaiai ie fɨnoca fɨénidɨfuiaɨ dóinamo ja comécɨñede.  
\v 10 Mei jira, ámatɨaɨ, Juzíñamui uáidota eneno nɨzécamacɨdɨomoɨza onódɨomoɨza. Iemona jiéredɨmacɨ izói omoɨ iri, aféfuiaɨ omoɨ comécɨmo rɨire amena jáinao izói íllena. Afe izói omoɨ íadɨ, jaca Cristo iómona oni nɨbéfodo jáiñeitɨomoɨ.  
\v 11 Bifue daɨna izói omoɨ íadɨ, caɨ ocuide Jíllotaraɨma Jesucristo zíiñona illáɨmana illánomo, rairuíñeno caɨmare jofo uáidollɨomoɨ. 
\p  
\v 12 Mei íemona bífuiaɨmo omoɨ comécɨioitaitɨcue; aféfuiaɨ onódɨomoɨ íadɨ. Daje izói afe ómoɨmo birui ite ua uai jeire otɨ́omoɨ íadɨ, naɨ jaca jaɨ́cɨna comécɨioitaitɨcue.  
\v 13 Bie ñue llóinafue uáfodo ómoɨmo cue lletalle naɨ cue jáicana llezica, cúemona ñue jaɨ́cɨna cɨ́oide.  
\v 14 Mei jɨɨ, naui caɨ Ocuíraɨma Jesucristo benó illa llezica, raɨre cue tɨíllano bie énɨemo cue íñeillena cuena daɨde. Afémɨe cuemo llua izói ja raɨre íficaite.  
\v 15 Ie jira birui nana cue rɨ́inodo llófueritɨcue, cue tɨilla méifomo bífuiaɨmo jaca ñue omoɨ comécɨillena. 
\s1 Pedro Cristo jamánomo ñuera ébifuena cɨónana jino llote 
\p  
\v 16 Naui cue nabáiñɨaɨ cue dɨga caɨ Ocuíraɨma Jesucrístomo ite ñuera rɨ́ino ífuena omoɨ llófuetɨcaɨ, ie meine abɨdo billɨfue dɨga. Nana afe llófueinafuiaɨ danɨ caɨ comécɨmo comuídɨfueñede. Táɨnofuena lloñédɨcaɨ, mei íadɨ danɨ caɨ uído ie jamánomo ñuera ébifuena cɨódɨnodɨcaɨ. Iemona uafue llotɨcaɨ.  
\v 17 Ie Moo Juzíñamui íemo ñúefue nítana, jɨáɨe ebíredɨfue íemo fécana danɨ caɨ uído cɨódɨcaɨ. Juzíñamui ebire ie uaido daɨde: “Bie cue izíruiga jitó. Afémɨeri ɨere ióbioidɨcue,” daɨde.  
\v 18 Aquíe izói monámona Moo dáɨnana danɨ caɨ jefodo cacádɨcaɨ; mei afe ñue eneno nɨzeca ídumo afe caɨ Ocuíraɨmaɨoɨri jáidɨcaɨza. 
\p  
\v 19 Bie como caɨ llogafue baɨmo, jɨáɨe nahí ua llogafue ite. Bie nahí uafue jaiai uícodo uai jino llóraɨnɨ lloga cuegáuai. Afe cuegáuai caɨ llogáuaina nabaide. Bínɨe naɨ jítɨfomo illa llezica bíuaina ráiruiñeno ɨere jeire óredɨomoɨ. Aféuai mechera naɨo bóua jítɨfo egáiñua izoide. Ua aféuai naɨ mona mónaiñenia, jítɨfo egáiñua izói omoɨ comécɨna egáiñote. Afe mona monailla llezica monáiracudu izóidɨmɨe billano, omoɨ comécɨna ñue jaɨ́cɨna déitaite.  
\v 20 Mei fueñe bífuemo omoɨ comécɨiri: Cuegáuaillaɨmo ite uícodo jino lloga daɨnáfuiaɨ dama afe uai lloráɨmamona llóñega.  
\v 21 Mei onódɨcaɨza, uai llóraɨnɨ jaca danɨ íaɨoɨ comecɨ jítainafuiaɨdo úriñediaɨoɨ. Mei jɨáɨfodo afe Juzíñamui íeɨena maiñócamacɨ afémɨe dɨbéfodo úritiaɨoɨ; mei Ñuera Joreño ɨfócaiaɨoɨza. 
\c 2  
\s1 Táɨnofuiaɨna llófuefɨredɨno 
\r (Jud 4-13) 
\p  
\v 1 Mei íadɨ afe dáaruillaɨdo Israel comɨnɨ cɨ́gɨri táɨnofuiaɨ jino llóraɨnɨ ite. Afe izói omoɨ cɨ́gɨri táɨnofuiaɨdo llófueritɨno íite. Afémacɨ danɨ fɨeni fɨnode ɨfocɨ úrillafuena báinino omoɨ llófueitiaɨoɨ, comɨnɨ Juzíñamuimo íaɨoɨ ɨ́ɨnogafue féitallena. Daɨí aféuaido íaɨoɨna jíllotaite Ocuíraɨmana jáanoitiaɨoɨ. Afemona íaɨoɨ nɨné raɨre táɨnocaillɨfue danɨ íaɨoɨmo zúite.  
\v 2 Iaɨoɨmo ite fɨénidɨfue dɨbénedo aillo comɨnɨ jáitiaɨoɨ. Danɨ afémacɨ ɨ́coɨnia caɨ ua ñue jaille iori fɨeni úritiaɨoɨ. Bie ñue ua caɨ jaille io Juzíñamui ñúefue.  
\v 3 Iaɨoɨ aillo úcube llɨ́ɨnoiacanamona, táɨnofuiaɨdo omoɨ íaɨoɨ jɨ́fuiado úcubena llɨ́ɨnoitiaɨoɨ. Mei íadɨ íaɨoɨ nɨné táɨnocaitaitɨmɨe, íaɨoɨ fɨnócafuiaɨna cɨ́oillano daɨí íaɨoɨ táɨnocaillɨfuena fáɨcanocaiñeno maméoide. Mei jaiai nɨnomo íaɨoɨ duere fɨnóllena mamécaiaɨoɨza. 
\p  
\v 4 Juzíñamui abɨ imácɨmona dáarie fɨénidɨfuemo baɨídiaɨoɨ. Afémacɨ ɨ́aɨfuena Juzíñamui doñede. Doñeno duere zefuille iraimo íaɨoɨna orede. Jítɨfomo íaɨoɨna fɨénocaide. Dɨnomo ɨco izire jɨcánollɨruimo baɨ óllena cuinácaiaɨoɨ. 
\p  
\v 5 Daje izói Noé illágɨma llezica fɨénide comɨnɨ ɨ́aɨfuena Juzíñamui doñede. Mei íadɨ jamánomo áillue jáɨnoido afe fɨénidɨnona Juzíñamui nana fɨéñeno fuitade. Afe fɨénide náɨraɨmona dama Noéna naa siete dɨga ie comɨ́nɨri Juzíñamui jíllotate. Afe Noé jaɨ́cɨna ñúefuedo íaɨoɨna lletade íadɨ jamáiena faɨtíaɨoɨ. 
\p  
\v 6 Bifue mei, daje izói Juzíñamui Sodoma jofue, Gomorra jofue imacɨ dɨga nɨné táɨnocaitate. Ua nana íaɨoɨ jofue bóua mei, daa ɨmuícɨaɨ fɨébilla. Ua daɨí izire nɨné táɨnocaitate, ie méifodo fɨeni íitɨno, bífuena cɨ́oillano, Juzíñamui fɨénidɨno izire duere fɨnófɨrede daɨíllena.  
\v 7 Afeno bóocuamona Lot daɨnámɨe comecɨ ñuénado íena jíllotade. Lot afe ɨáɨrede comɨnɨ fɨeni illáfuena ie cɨónamona ie comecɨ jamánomo zúucaide.  
\v 8 Bie comécɨna ñúemɨe Lot, nágarui fɨénide comɨnɨ cɨ́gɨri ie íllari, íaɨoɨ fɨeni fɨnócafuiaɨna cɨode; íaɨoɨ fɨeni úrillafuiaɨna cacade. Aféfuiaɨ ie ñuera comécɨna zuure fɨnode.  
\v 9 Daɨí caɨ Ocuíraɨma nana íena ñue jacɨ́ruitɨno íaɨoɨ comecɨ fɨeni facátafuiaɨmona íaɨoɨ jílloillena ñue onode. Daje izói afémɨe nana fɨénidɨno ɨco íiraɨcaiño ɨere jɨcánollɨruimo duere fɨnóllena oni eneno jóoniana ñue onode. 
\p  
\v 10 Nana ɨáɨre comecɨ jítainafue jeire óiacadɨnona Juzíñamui ɨere duere fɨ́noite. Caɨ Ocuíraɨma rɨ́inona jámairuitɨnona daje izói duere zéfuitaitiaɨoɨ. Afémacɨ llétana cacáacaiñedɨno. Illáɨmana jacɨ́ruiñedɨno. Daje izói monamo ite jóriaɨ izoide rɨ́inoredɨnona báiñuana jacɨ́ruiñediaɨoɨ.  
\v 11 Juzíñamui abɨ imacɨ afe fɨénidɨno baɨmo rɨ́inorediaɨoɨ. Daɨí íaɨoɨ illa íadɨ, afémacɨ afe jóriaɨ izoide rɨ́inoredɨnona fɨeni daɨíñediaɨoɨ. Ua caɨ Ocuíraɨma uiécori afémacɨna báiñuafuedo “Duere zéfuitɨomoɨ,” daɨíñediaɨoɨ. 
\p  
\v 12 Afe fɨénidɨno rɨ́llenɨaɨ izói abɨna onóñediaɨoɨ. Afe rɨ́llenɨaɨ da ebena illáfuemo itíaɨoɨ. Ñúefue dɨne comécɨiñediaɨoɨ. Fia llaɨtada fállena jocócaiaɨoɨ. Bie izói itɨ́mɨiaɨ ónoñegafuedo fɨeni úritiaɨoɨ. Mei íadɨ afémacɨ jɨba rɨlle izói tɨ́itiaɨoɨ.  
\v 13 Jɨáɨe comɨnɨ duere íaɨoɨ zefuítado duere fɨnóbitiaɨoɨ. Ianori caɨmátaillɨfuedo jɨáɨe ɨere ióbitadɨnodɨcaɨ, daɨífɨrediaɨoɨ. Afémacɨ meáidaitadɨmacɨ. Comecɨ fɨeni fɨnode raa izói omoɨ cɨ́gɨri itíaɨoɨ. Daje llezica omoɨ fɨnoca ráfuiaɨdo nabáiriacadiaɨoɨ ómoɨna ɨaɨre fɨnóllena. Táɨnona jɨ́fuete caɨmátailla raado jɨfánotiaɨoɨ. 
\p  
\v 14 Afémacɨ nana cɨona rɨngomo fia érocaiñeno llaɨtada jɨruifue fɨnóacadiaɨoɨ. Afémacɨ fɨénidɨfue fɨ́nuana ɨere gáɨdiaɨoɨ. Afena fáɨcanocaiacañediaɨoɨ. Comécɨna náɨnidɨnona bífueta ɨ́aɨfuemo uitíaɨoɨ. Naga raana izire máiñuana ɨere fɨbídiaɨoɨ. Afe izoide comɨnɨ ɨ́aɨre faidócano.  
\v 15 Afémacɨ Moo Juzíñamui ñuera iómona oni fɨénidɨodo jáidiaɨoɨ. Jaiai uai llóraɨma Balaam ífuedo jáidiaɨoɨ. Afe Balaam Beor jitó. Afe Balaam fɨénidɨfuiaɨ ie fɨ́nuado aillo úcubena llɨ́ɨnoiacade.  
\v 16 Mei jɨáɨfodo áfemona uáinide burra Balaam fɨénidɨfuiaɨ dɨné íena lletade. Afe burra come izói úrillano, Balaana uáɨritaidɨmɨe úrilla izói rairuíllano íena úritañede. 
\p  
\v 17 Nana bie táɨnofuena llófueridɨno jaɨnoi iñeno jaɨnoi orano zafénailla izóidiaɨoɨ. Jairífodo oni nɨné ñaɨtaca mona úillɨe izóidiaɨoɨ. Jamánomo jítɨrede jítɨnomo zíiñona íllena rɨire faidócaiaɨoɨ.  
\v 18 Mei aillo abɨ ɨ́ɨnua uáillaɨdo naa taɨno uaillaɨ dɨga, ñúemacɨna jɨ́fuecana uitíaɨoɨ. Iaɨoɨ ɨ́aɨfuiaɨdo, comɨnɨ abɨ jítainafuiaɨ dɨga jɨáɨmacɨna bífuetiaɨoɨ. Ua ɨ́aɨfue dɨbénemo itɨ́nomona uáfuena jíllodɨnona meine ɨ́aɨfuemo nane bífuiaidiaɨoɨ.  
\v 19 Uícodo raɨre llotíaɨoɨ: “Uafue ráiruiñega comɨnɨ izói íitɨomoɨ,” daɨífɨrediaɨoɨ. Mei íadɨ afe daɨna llezica, danɨ afémacɨ ɨ́aɨfue dɨbénemo izire jaɨnáitaganona itíaɨoɨ. Iemona afémacɨ fɨénidɨfue fɨ́nuana fáɨcanocainidiaɨoɨ. Illa dɨ́gamɨe íena anáfenode raa íena náamatade. Iemo áfemo izire jaɨnáitagamɨena jaide.  
\v 20 Mei caɨ jíllotate Ocuíraɨma Jesucrístona onódɨmacɨ, énɨemo ite ɨ́aɨfuiaɨmona oni jíllodiaɨoɨ. Bimácɨmona dáarie íaɨoɨ jíllua mei naui íaɨoɨ anáfenogafuemo abɨdo íaɨoɨ baɨíadɨ, nano íaɨoɨ illa baɨmo, jamánomo fɨ́goñeite.  
\v 21 Juzíñamui ñuera iona íaɨoɨ onóñenia afefue afémacɨmona fɨgóñede. Mei íadɨ ja Juzíñamui iona onona mei, íaɨoɨmo iga ñuera lletárafuiaɨna féitaadɨ, afefue jamánomo fɨénide.  
\v 22 Jaiai daɨna ua uai como afémacɨmo zúilla. Aféuai daɨde: “Jɨco ie cɨcúecana abɨdo güízajide. Daje izói mero abɨna ñue jococa nane dama ie ɨ́aɨbɨmo nane jabɨ́jabɨizaide,” daɨde. 
\c 3  
\s1 Caɨ Ocuíraɨma billɨfue 
\p  
\v 1 Cue izíruiga ámatɨaɨ, omoɨ cácarei. Bie méifoidɨbe ómoɨmo cuetɨcue. Ménacaiño ómoɨmo cue orécabedo ómoɨna abɨ jɨ́fueñeno bífuemo comécɨitaacadɨcue. Ñue llófueinafuedo ómoɨna comécɨitadɨcue.  
\v 2 Afe jira jaiai ñuera uai lloraɨnɨ caɨmo llogáfuemo omoɨ uibíoiri. Daje izói Cristo orécamacɨ ómoɨmo lloga jíllotate Ocuíraɨma lletara uaimo féitañeno áfemo omoɨ comécɨiri. 
\p  
\v 3 Nano fueñe bífuemo omoɨ uibíoiri: ɨco íiraɨruillaɨdo Juzíñamui lloga ñúefuiaɨna zanófɨredɨno bíitiaɨoɨza. Afémacɨ danɨ íaɨoɨ comecɨ fɨeni óiacanafuiaɨdo itíaɨoɨ.  
\v 4 Afémacɨ ómoɨmo zanoda jɨcánoitiaɨoɨ: “¿Nɨnomo ite ómoɨmo lloga meine bite Cristo? ¿Néemei afe? Caɨ jáiaigɨma tɨilla méifomo naga raa daje izói ite. Ua énɨe comuíllaruimona naga rafue daje izói jáioicaide.”  
\v 5 Daɨí llóitiaɨoɨ, mei jaiai nɨnomo monana Juzíñamui ie uaido fɨ́nuafuemo comécɨiacañediaɨoɨza. Afe izói Juzíñamui uaido ocuíllamona, zocade raa zocai ízoi, bínɨe jáɨnoimona comuide. Iemo jaɨnoi cɨ́gɨdo bínɨe Juzíñamui ie uaido rɨire itábicaitate. Aféfuena náfueñeno bie zanófɨredɨno onóacañediaɨoɨ.  
\v 6 Afe mei daje izói énɨe anábaitade áillue nocɨ aféruillaɨdo bie énɨemo ite cáadɨnuiaɨna nɨné táɨnocaitaɨbite.  
\v 7 Mei íadɨ birui ite mona énɨe dɨga daje Juzíñamui daɨna uaido táɨnocaitalle irai íena oni jóoneoiga. Afe irai fɨénidɨnuiaɨ nɨné táɨnocaillɨruimo ɨco íiraɨcaiño ɨere jɨcánollɨruimo afe bínɨena naa mona dɨga cuarítaite. 
\p  
\v 8 Izíruiga ámatɨaɨ, bie emódomo ífuena omoɨ féitañeno iri. Caɨ Ocuíraɨmamona daa mona mil fɨmona izóideza. Daje izói afémɨemona mil fɨmona daa mona izóideza.  
\v 9 Caɨ Ocuíraɨma ie daɨnáfuiaɨ fuitállɨruimo dúcɨa baɨ jɨáɨruimo dúiñoñeite. Dámɨerie afémɨena jɨáɨruimo dúiñoite daɨífɨrediaɨoɨ. Mei íadɨ afémɨe caɨri járitaiñede. Afémɨe buna oni fáɨiacañede, mei jɨáɨfodo caɨmo ite fɨénidɨfuiaɨ ñúefuena méidollena afémɨe ɨere jitaide. Afémɨe aféruina baɨ jɨáɨruimo dúiñoñeite. Féitañeno ie mamécaruimo zúite. 
\p  
\v 10 Caɨ Ocuíraɨma billɨrui merɨ́riraɨma naɨo billa izói, naɨ due ócuiriñeitiaɨoɨmo déizaɨbiteza. Afe billɨ́ruimo mona naa íemo ite ráanɨaɨri jacɨre nɨné táɨnoficaite; áfena ɨere fɨcɨre cácaite. Nana afe mona fɨ́nua ráanɨaɨ naa úcuaɨri iraimo nɨné táɨnocaite. Afe llezica bínɨe naa íemo ite itɨ́nuiaɨri cúarite. 
\p  
\v 11 Ja nana daɨí táɨnocaillɨfuena omoɨ fɨdɨ́namona, nana ɨ́aɨfuemona abɨ omoɨ rairuíllɨfue ɨere jitáirede; benómona afémɨena caɨmare ióbitaredɨcaɨ. Ua Juzíñamui íeɨena omoɨ illɨfue ɨere jitáirede.  
\v 12 Mai Juzíñamui ie nahí illáɨmana cɨ́ocaizaɨbillɨruimo omoɨ úiñori. Uiñua llezica, omoɨ onóigafuedo aféruina raɨre mai omoɨ járidori. Aféruillaɨdo mona ero iraido nɨné táɨnocaite. Nana énɨe fɨ́nua ráanɨaɨ iraimo nɨné íbɨna jáitiaɨoɨ.  
\v 13 Mei íadɨ Juzíñamui uícodo caɨmo lloga comue monamo comue énɨemo ocuíridɨcaɨ. Afe comue énɨemo mona dɨga, nana raa ñue jaɨ́cɨna jóite. Naga raa nɨ́ɨfuenite. 
\p  
\v 14 Izíruiga ámatɨaɨ, mei benómona naɨ bífuemo omoɨ úiñoina llezica, nana ómoɨmo ite rɨ́inodo omoɨ illafue jaɨ́cɨna jóoneri. Daɨí omoɨ comecɨ caɨmare uái illafue dɨbénemo íllamona Juzíñamui ómoɨmo eróicaizaɨbilleza. Afe izói omoɨ comecɨ ɨ́aɨcaiñeno nɨ́fuenino Juzíñamui ómoɨmo cɨ́oizaɨbilleza.  
\v 15 Nane jɨáɨfuemo omoɨ comécɨoiri. Afefue daɨde: Caɨ Ocuíraɨma comɨ́nɨmo járitaiñenafue, ua caɨ jílloillɨfue. Daa bíuai caɨ izíruiga ama Pablo ómoɨmo cuete. Juzíñamui íemo lloga comecɨ jaɨ́cɨna fɨbíllafuedo cúefɨrede.  
\v 16 Nana afémɨe orécabiaɨmo daa bífuiaɨ llote. Mei íadɨ dáarie ie uaillaɨ ñue onóillena ɨere féirede. Abɨna onóñedɨno afe féiredɨuaina jɨáɨfodo mamédiaɨoɨ. Afe izói jabo ɨ́ɨnotɨno aféuaina jɨáɨfodo dobáiñotiaɨoɨ. Daje izói jɨáɨe Juzíñamui Cuegáuai lloga uáillaɨna oni jɨáɨfodo áɨfedotiaɨoɨ. Afemona afémacɨ danɨ abɨ nɨné táɨnocaitaitiaɨoɨ. 
\p  
\v 17 Izíruiga ámatɨaɨ, nana bífuiaɨna ja uícodo onódɨomoɨza, mai fɨénidɨnomona abɨ́ omoɨ rairuiri, afémacɨ jɨ́fuerillafuedo meine abɨdo ɨ́aɨfuemo omoɨ báɨiza; omoɨ jeire oga ñúefuena nɨné féiza.  
\v 18 Mei jɨáɨfodo, caɨ jíllotate Ocuíraɨma Jesucrístona, mai jamánomo ñue abɨna omoɨ onoiri. Caɨna ie duéruillafuemo, omoɨ comecɨ ifue aillo oni móonaitaoicairi. Ɨere ebire ñúefue dama Jesucrístomo mai birui omoɨ nitari. Daje izói zíiñona ebíredɨfue afémɨemo mai omoɨ nitáfɨreiri. Mai. Jae nɨɨe.