\id 1JN - Huitoto Mɨnɨca NT -Colombia 2011 (DBL 2013) 
\h 1 JUAN 
\toc1 Nanoide San Juan Cuegabe 
\toc2 1 Juan 
\toc3 1 jn 
\mt1 NANOIDE SAN JUAN CUEGABE 
\mt2 Primera Carta del Apóstol 
\mt2 San Juan 
\c 1  
\s1 Cáatate úrilla uai 
\p  
\v 1 Nana raa nano taɨneina llezica itɨ́mɨedo ómoɨmo cuetɨcaɨ. Afémɨe Jesucristo. Afémɨemona caɨ cacánana llotɨcaɨ. Danɨ caɨ uído caɨ cɨónana llotɨcaɨ. Afémɨemo eróidɨcaɨ. Afémɨena danɨ caɨ ónoɨdo jetádɨcaɨ. Afémɨe Juzíñamuimona uaillaɨ lluáɨbitɨmɨe. Afémɨe uai caɨna cáatate.  
\v 2 Afe cáatatena itɨ́mɨe caɨ onóillena caɨmo cɨ́ocaide. Afémɨena cɨ́oillanona íemo uai faɨtɨcaɨ. Afémɨe fecalle zíiñona cáananona ómoɨmo jino llotɨcaɨ. Nanómona afémɨe Moo Juzíñamui dɨga ite, ie mei caɨmo cɨ́ocaide.  
\v 3 Jira caɨ cacánafue caɨ cɨónafue dɨga uáfuena jino llotɨcaɨ, daaco comɨ́nɨna omoɨ caɨ dɨga íllena. Ua afe izói uáfuena Moo Juzíñamuimo dájena jaɨnáidɨcaɨ. Daje izói ie Jitó Jesucrístomo jaɨnáidɨcaɨ.  
\v 4 Jira aféfuiaɨna ómoɨmo cuetɨcaɨ aféuaido jamánomo caɨmare ñue omoɨ íllena. 
\s1 Juzíñamui naɨraɨ comecɨ egáioidɨmɨe 
\p  
\v 5 Bie úrillauai Jesucristo caɨmo llogáuai. Afena jino ómoɨmo llotɨcaɨ: Juzíñamui comécɨna egáioidɨmɨe. Afémɨemo jaca jítɨnona iñede.  
\v 6 Dájena afémɨemo jaɨnáidɨcaɨ caɨ daɨíadɨ, íadɨ afe llezica jítɨfodo caɨ macáadɨ, taɨno llotɨcaɨ. Daje izói táɨnona fɨnódɨcaɨ.  
\v 7 Mei íadɨ Juzíñamui úzefomo illa izói, daje izói úzefomo caɨ macáadɨ, ua dájena conímamo jaɨnáidɨcaɨ. Iemo ie Jitó Jesucristo ie cruzmo tɨ́illamona, ie dɨe tótajamona nana caɨ fɨénidɨfuiaɨ dote. 
\p  
\v 8 Caɨ fɨénidɨfue iñede caɨ dáɨiadɨ, caɨ abɨ jɨ́fuetɨcaɨ. Táɨnofuefɨredɨmacɨdɨcaɨ.  
\v 9 Mei íadɨ Juzíñamui ñue jaɨ́cɨna fɨnóllɨfuemo áfemo ɨ́ɨnoredɨcaɨ caɨ fɨénidɨfuiaɨ jino caɨ llóiadɨ, uáfuena afe fɨénidɨfuiaɨna afémɨe dóite. Nana íemo fɨeni caɨ fɨnócafue ɨbana caɨmo óñeite.  
\v 10 Caɨ fɨénidɨfuiaɨ fɨnóñedɨcaɨ caɨ daɨíadɨ, Juzíñamui táɨnofueredena cɨ́otataitɨcaɨ. Ie úrilla uaina uáfuena jeire oñédɨcaɨ. 
\c 2  
\s1 Cristo cáɨconi ñue úriraɨma 
\p  
\v 1 Cue jitótɨaɨ, bífuiaɨ ómoɨmo cuetɨcue, ɨáɨredɨfuiaɨmo omoɨ báɨiñellena. Mei íadɨ dámɨe ɨáɨredɨfuiaɨ fɨnóadɨ, Moo uiécomo cáɨconi ñue úritɨmɨe ite. Afémɨe Jesucristo. Ñue jaɨ́cɨna itɨ́mɨe.  
\v 2 Jesucristo caɨ fɨénidɨfuiaɨ ɨ́coɨnia fagámɨe. Dama caɨ ɨ́coɨniañedeza, mei íadɨ nana énɨe comɨnɨ fɨénidɨfuiaɨ ɨ́coɨnia. 
\p  
\v 3 Juzíñamui ocuícafuiaɨ ɨere caɨ cacáreadɨ íena onódɨcaɨza fɨ́dɨitɨcaɨ.  
\v 4 Mei íadɨ dámɨe “Iena onódɨcue” daɨíadɨ ie ocuícafuiaɨ ɨere cácareñeniadɨ, afémɨe taɨno lloraɨma, ua táɨnofuefɨredɨmɨe.  
\v 5 Mei ie ɨbana Juzíñamui ocuícafuena fɨnódɨmɨe, jae Juzíñamuina nabéfuena izíruite. Daɨí áfedo íemo caɨ jaɨnáinana fɨdɨ́dɨcaɨ.  
\v 6 “Juzíñamuimo jaɨnáidɨcue” dámɨe daɨíadɨ Cristo maca izói ie macállɨno jitáirede. 
\s1 Comue ocuícafue 
\p  
\v 7 Cue izíruigamacɨ, comue ocuícafue ómoɨmo cueñédɨcue. Afefue nanómona ómoɨmo itɨfue. Afe jaiai rafue daje omoɨ cacana úrillafue.  
\v 8 Mei íadɨ ómoɨmo cue cuegafue comue ocuícafue izói ómoɨmo íficaizaɨbite. Bie ocuícafue Crístomo nahí ua ráfuena ite. Afe izói bie ocuícafue ómoɨmo nahí ua ráfuena íite. Afefue ua nahifue, jítɨno oni jáioicaideza. Jae ua comécɨna egáiñollena ñue egáioinaza. 
\p  
\v 9 Dámɨe “úzefomo itɨcue” daɨíadɨ, íadɨ jɨáɨmana naɨ éoia, afemɨe naɨ jítɨfomo ite.  
\v 10 Ie ámana izíruitɨmɨe úzefomo ite. Afémɨemo mɨnɨ́cana fɨénidɨfuiaɨmo baɨítaitena iñede.  
\v 11 Mei íadɨ ie ámana éoicaidɨmɨe naɨ jítɨfomo ite; ua jítɨfodo macade. Nɨné jáideza onóñede, jítɨno uina cɨ́oitañena jira. 
\p  
\v 12 Jitótɨaɨ, ¡omoɨ cacai! Juzíñamui Jesucristo tɨtáinanomo omoɨ fɨénidɨfuiaɨ ɨbana ote. Ie jira bifue ómoɨmo cuetɨcue.  
\v 13 Móotɨaɨ, ómoɨmo cuetɨcue, nano taɨnéinanomo itɨ́mɨena jae omoɨ onona jira. Jitócomɨnɨ, ómoɨmo cuetɨcue, Taɨfena omoɨ anáfenua jira. 
\p Jitótɨaɨ, ómoɨmo cuetɨcue, ja Moona omoɨ onóicailla jira.  
\v 14 Móotɨaɨ, ómoɨmo cuetɨcue, nano taɨnéinanomo itɨ́mɨe omoɨ onóicailla jira. Jitócomɨnɨ, daje izói ómoɨmo cuetɨcue omoɨ rɨíredɨmacɨna jira; omoɨ comécɨmo Juzíñamui úrilla uai jeire omoɨ ua jira; Taɨfena omoɨ anáfenua jira. 
\p  
\v 15 Bínɨemo ite Juzíñamuina bacáuairedɨno fɨnócafuiaɨna izíruiñeno omoɨ iri. Daje izói íaɨoɨmo itɨ́fuiaɨna cacáreiñeno omoɨ iri. Dámɨe afémacɨ fɨnócafuiaɨna izíruiadɨ, afe llezica Moo Juzíñamuina íziruiñeite.  
\v 16 Nana íaɨoɨmona lloga ráfuiaɨ mɨnɨ́cana Juzíñamuimona biñede. Fia danɨ íaɨoɨ cɨ́gɨmona comuide. Comécɨna ɨáɨredemona fɨeni óiacanafue bite. Caɨ ui ióbicailla jítaillamona jɨáɨe fɨeni óiacanafue bite. Caɨmo ite ráanɨaɨmona fɨeni abɨ ɨ́ɨnuafue bite. Nana afe billáfuiaɨ bínɨemo ite Juzíñamuina bacáuairedɨno llóolloga.  
\v 17 Afena bacáuairedɨno fúioicaide, naa íaɨoɨmo ite fɨeni óiacanafuiaɨ dɨga. Mei íadɨ Juzíñamui jitáinafue fɨnódɨmɨe jaca nɨnomo zíiñona ite. 
\s1 Uafue táɨnofue dɨga dájemo jaɨnáiñede 
\p  
\v 18 Jitótɨaɨ, jae íiraɨruimo dúcɨdeza. Cristo uáitaoidɨmɨe bíllana cacádɨomoɨ. Ja birui aillo Cristo uáitaoidɨno cɨ́ocaide. Ie jira birui íiraɨruina onódɨcaɨ.  
\v 19 Afémacɨ cáɨmona jino jáidiaɨoɨ. Mei íadɨ uáfuena cáɨeñediaɨoɨ. Uáfuena cáɨena íaɨoɨ íadɨ, caɨri fɨébite. Ua afémacɨ cáɨmona jino jáidiaɨoɨ nana cáɨeñeitiaɨoɨza uáfodo daɨí áfedo onóillena. 
\p  
\v 20 Mei íadɨ Cristo Ñuera Joréñona igáomoɨ; íemona afémɨedo onótagaomoɨ.  
\v 21 Omoɨmo cuetɨcue mei, uáfuena omoɨ onona jira. Uáfuena omoɨ onóñenamona cueñédɨcue. Uáfuemona jɨáɨe daa táɨnofuena comuínide. Jae onódɨomoɨza. 
\p  
\v 22 ¿Bu táɨnofueredɨmɨe? Jesuna Crístoñede daɨdɨ́mɨe, afémɨe dama táɨnofueredɨmɨena. Nɨ́ɨmɨe Crístona uáitaoidɨmɨe. Afémɨe Moo Juzíñamuina jáanote. Afe izói ie Jitona jáanote.  
\v 23 Jitona jáanotɨmɨe afémɨemo daje izói Moona iñede. Mei íadɨ Crístona jiéruitɨmɨe daje izói Moona onode. 
\p  
\v 24 Ie jira, nanómona omoɨ cacana úrillafue omoɨ comécɨmo ñue omoɨ jóoneoiri. Jira nanómona omoɨ cacánafue ñue omoɨ comécɨia Juzíñamui Jitomo dájena íitɨomoɨ. Afe llezica caɨ Moori dájena íitɨomoɨ.  
\v 25 Jesús uáfuena uícodo llote, zíiñona cáananona caɨmo fecállena. 
\p  
\v 26 Omoɨ jɨ́fueiacadɨnodo bifue ómoɨmo cuetɨcue.  
\v 27 Mei íadɨ Jesucristo ómoɨmo fecaca Ñuera Joreño ómoɨmo ite. Ie jira daɨí buna ómoɨmo llófuenidiaɨoɨ. 
\p Daje Ñuera Joreño nana ráfuiaɨna ómoɨna llófullofuede. Afémɨe llogafue uafue; táɨnofueñede. Jira daɨí Crístomo dájena omoɨ iri, Ñuera Joreño ómoɨmo llua izói. 
\p  
\v 28 Jitótɨaɨ, mai birui Crístomo dájena jaɨnáicairi, afémɨe cɨ́ocaillɨruimo ie dáɨnana ñue caɨ ɨ́ɨnollena. Daɨí ie bíllemo ie uiécona méairuiñeitɨcaɨ.  
\v 29 Ja onódɨomoɨza Jesucristo ñue jaɨ́cɨna fɨnódɨmɨe. Afemona daje izói nana jaɨ́cɨna fɨnódɨno Juzíñamui jitótɨaɨza ónoitɨomoɨ. 
\c 3  
\s1 Juzíñamui jitótɨaɨ 
\p  
\v 1 Mai ¡comécɨmo faca! Nɨɨ jamánomo Juzíñamui caɨna izíruilla. Iemona ie jitótɨaɨna maméidɨcaɨ. Jae áfedɨcaɨ. Ie jira énɨemo ite Juzíñamuina éoidɨno caɨ izói comécɨñediaɨoɨ, mei Juzíñamuina íaɨoɨ onóñena jira.  
\v 2 Izíruiga ámatɨaɨ, jae Juzíñamui jitódɨcaɨ. Iiraɨruimo caɨ íficaillɨfuena naɨ caɨmo ácatañega. Mei íadɨ onódɨcaɨza, Jesucristo cɨ́ocaia afémɨe izói íitɨcaɨ, ie illa izói námɨena caɨ cɨona jira.  
\v 3 Nana afémɨemo daɨí comécɨidɨmacɨ danɨ dáamacɨ nana ɨ́aɨfuiaɨmona ñue dóficaitadiaɨoɨ, mei Jesucristo ɨáɨfuenidɨmɨe illa izói íitɨcaɨ. 
\p  
\v 4 Mei íadɨ nana fɨénidɨfue fɨnódɨmacɨ Juzíñamui ocuícafue uáitajano jámairuite. Mei jira fɨénidɨfue ocuina ráfuena uáitaoina.  
\v 5 Jae Jesucristo bie énɨemo caɨ fɨénidɨfue oni duáɨbillana onódɨomoɨ. Daje izói afémɨemo nɨfue iñénana onódɨomoɨ.  
\v 6 Mei jira nana afémɨemo dájena jaɨnáioicaidɨmacɨ fɨeni macánidiaɨoɨ; mei íadɨ nana fɨeni macáfɨredɨmacɨ afémɨena jaca cɨóñediaɨoɨ; íena onóñediaɨoɨ.  
\v 7 Cue jitótɨaɨ cacai. Buna ómoɨna jɨ́fueñellena nane dáɨitɨcue; ñúefue fɨnófɨredɨmɨe ñúemɨe, Jesucristo ñúemɨena illa izói.  
\v 8 Mei íadɨ fɨeni macáfɨredɨmɨe Taɨfemo jaɨnáidɨmɨe, mei nanómona Taɨfe fɨénidɨfuiaɨredɨmɨena ite. Uafue Juzíñamui Jitó Taɨfe fɨnócafuiaɨ táɨnocaitaɨbite. 
\p  
\v 9 Juzíñamui jitótɨaɨmona jaca buna fɨgóiñeno macáoicaiñede, Juzíñamui íemo iga cáanano íemo illa jira. Afémɨe fɨénidɨfuena fɨnófɨnide, Juzíñamui jitoza.  
\v 10 Afedo bu mei Juzíñamui úruiaɨnaza, bu mei Taɨfe úruiaɨnaza onódɨomoɨza. Uafue nɨ́ɨmɨerie ñúefuena fɨnóñenia, ie ama íziruiñenia, afémɨe Juzíñamui dɨbénemo itɨ́mɨeñede. 
\s1 Conímana caɨ izíruillafue jitáirede 
\p  
\v 11 Mei jɨɨ nanómona omoɨ cacana úrilla uai, be nɨe uai: conímana caɨ izíruillafue jitáirede.  
\v 12 Caín izói omoɨ iñeno iri. Afémɨe Taɨfe dɨbene ímɨe, íemona ie ama tɨtade. ¿Nɨbái mei íena tɨtade? Caín úradoillano ie ama tɨtade, Caín fɨnócafuiaɨ fɨgóñena jira; mei íadɨ ie ama fɨnócafuiaɨ ñuera. 
\p  
\v 13 Cue ámatɨaɨ, Juzíñamuina bacáuairedɨno ómoɨna éoinamona fáɨgacaiñeno iri.  
\v 14 Jae tɨ́izaille iómona zíiñona cáaillɨomo dóbaicaidɨcaɨ. Afena onódɨcaɨ, Jesuna ɨ́ɨnotɨnona caɨ izíruilla jira. Mei íadɨ izíruiñedɨmɨe tɨ́izaillɨodo jaide.  
\v 15 Nágamɨe ie abɨ cómena éoidɨmɨe cómena tɨtádɨmɨe izói ite. Iemo come tɨtádɨmɨe comécɨmo zíiñona cáanano iñénana onódɨomoɨ.  
\v 16 Jesucristo ie cáanano cáɨconi iga; áfedo nana izíruillafuiaɨna onódɨcaɨ. Afe izói caɨ cáananona lloñeno Jesuna ɨ́ɨnotɨnori daɨí abɨna zóoferedɨcaɨ.  
\v 17 Dámɨe ie illɨ́nomo jitáirede raa ítemo, ie aɨno come jitaica raa iñénana cɨóillano, mei íadɨ íemona jeruide, ¿nɨɨe izói Juzíñamuimo izíruillafue ie comécɨmo íteza? ¡Iñede!  
\v 18 Cue jitótɨaɨ, ¡fia fuena daɨna uaido mai caɨ izíruiñeno iri! ¡Mei íadɨ ñue fɨnóllɨfuiaɨdo uafue izíruillafuedo mai conímana caɨ izíruiri! 
\s1 Juzíñamui uiécomo ñue íena ɨ́ɨnofɨrenafue 
\p  
\v 19 Jira daɨí uáfuemo jaɨnáidɨmacɨdɨcaɨ onódɨcaɨza; nane aféfuemona Juzíñamui uiécomo ñue íena ɨ́ɨnofɨredɨnodɨcaɨ.  
\v 20 Caɨ comecɨ caɨ ɨ́coɨnia llóiadɨ, Juzíñamui caɨ comecɨ baɨmo aillo ñúemɨenaza onódɨcaɨ. Afémɨe nágafuiaɨ onode. Iemona afe ɨ́coɨnia caɨmo ɨbana óite.  
\v 21 Mei jira, izíruiga ámatɨaɨ, caɨ comecɨ caɨ ɨ́coɨnia lloñéniadɨ Juzíñamui uiécomo ñue íena ɨ́ɨnofɨredɨnodɨcaɨ.  
\v 22 Nana íemo caɨ jɨcaca raana fécaite, ie ocuícafuiaɨna jeire caɨ úamona; ua íena caɨ ióbitamona áfenɨaɨna caɨmo fécaite.  
\v 23 Afémɨe ocuícafue daɨde: “Ie Jitó Jesucrístomo caɨ ɨ́ɨnori. Afe emódomo caɨ conímana caɨ izíruiri afémɨe caɨ ocuilla izói,” daɨí daɨíñocaide.  
\v 24 Ie ocuícafuiaɨna ɨere cacáreidɨmacɨ afémɨeoɨri itíaɨoɨ. Daje izói afémɨe nágarui íaɨoɨri ite. Afémɨe jaca caɨmo íllana onódɨcaɨ. Ua áfena afémɨe caɨmo iga Ñuera Joréñodo onódɨcaɨ. 
\c 4  
\s1 Ñuera Joreño Crístona uáitafɨrede jóriaɨna anáfenoacade 
\p  
\v 1 Bie énɨe táɨnofuiaɨ llotɨ́nona oruízaideza. Afémacɨ “Juzíñamuido úritɨcaɨ,” daɨdíaɨoɨ. Izíruiga ámatɨaɨ, ¡omoɨ cácarei! Naga “Juzíñamui dɨbéfodo úritɨcaɨ” daɨdɨ́mɨena ɨ́ɨnoñeno iri. Mei íadɨ íaɨoɨna facátari, nɨɨe joreño íaɨoɨmo íllana onóillena, Juzíñamui ie, nɨbaɨ íeñede.  
\v 2 Juzíñamui Joréñona itɨ́mɨe omoɨ onóillɨfue llóitɨcue. Nágamɨe Jesucristo ua cómena bínɨemo bite jino onótatɨmɨe, afe cómemo Juzíñamui Joreño ite.  
\v 3 Mei íadɨ daɨí jino onótañedɨmɨe Juzíñamui Joréñoñedɨmɨe. Afémɨemo Crístona uáitafɨrede jóriaɨ ite. Afe izóidena fɨénide jóriaɨ bíllena ja cacádɨomoɨ. Mei afe jae bie énɨemo ite. 
\p  
\v 4 Jitótɨaɨ, omoɨ Juzíñamui iédɨomoɨ. Omoɨri itɨ́mɨe baɨmo rɨ́inorenamona, afe táɨnofɨredɨnona jae anáfenodɨomoɨ, mei íaɨoɨ daɨnáfuiaɨ omoɨ ɨ́ɨnoñena jira. Bínɨemo ite táɨnofɨredɨnori itɨ́mɨe jabóidɨmɨe.  
\v 5 Afémacɨ Juzíñamuina bacáuairedɨnomo jaɨnáidɨno, ie jira Juzíñamuina bacáuaido úritiaɨoɨ. Iemona bínɨemo ite Juzíñamuina ɨ́ɨnoñedɨno afémacɨmo cacáreidiaɨoɨ.  
\v 6 Mei íadɨ caɨ Juzíñamui iédɨcaɨ. Juzíñamuina onódɨmɨe caɨmo cacáreide. Mei íadɨ Juzíñamui íeñedɨmɨe caɨmo cacáreiñede. Afedo uafue uaina llófueinafuena onódɨcaɨ; daje izói jɨ́fuetena llófueinafuena onódɨcaɨ. 
\s1 Juzíñamui izíruitɨmɨe 
\p  
\v 7 Izíruiga ámatɨaɨ, conímana caɨ izíruilla jitáirede; izíruillafue Juzíñamuimona bíteza. Nana izíruillafuiaɨredɨno Juzíñamui jitótɨaɨ. Afe llezica Juzíñamuina onódiaɨoɨ. 
\p  
\v 8 Juzíñamui jamánomo izíruillafuiaɨna oruídɨmɨe, ie jira izíruillafuenidɨmɨe Juzíñamuina onóñede.  
\v 9 Juzíñamui daade ie Jitó ana énɨemo orede afémɨedo cáananona caɨmo íllena. Afedo ie caɨna izíruillafue caɨmo ácatate.  
\v 10 Afe óriado uáfuena izíruillafuena caɨ fɨdɨ́tate. Juzíñamuina caɨ duéruia nahí izíruillafueñede. Mei íadɨ afémɨe caɨna dúecaillano cáɨconi ie Jitó ória, afe nahí izíruillafue. Ua Juzíñamui caɨ fɨénidɨfuiaɨ ɨ́coɨnia caɨ jɨáɨnona duere fɨnóllɨmɨena ie Jitó orede. 
\p  
\v 11 Izíruiga ámatɨaɨ, Juzíñamui daɨí caɨna izíruillamona, afe izói conímana caɨ izíruillafue jitáirede.  
\v 12 Juzíñamuina jaca buna cɨóñena; mei íadɨ conímana caɨ izíruia Juzíñamui caɨ comécɨmo ite. Afe illa dáaruido Juzíñamui izíruillafue caɨmo ñue rɨire comuíoicaide.  
\v 13 Juzíñamui dɨbénemo caɨ íllana, caɨ comécɨmo Juzíñamui íllana ónorede. Afena ie Ñuera Joreño caɨmo fecáinado onódɨcaɨ.  
\v 14 Moo Juzíñamui ie Jitó orede afémɨedo comɨnɨ jílloillena. Iena danɨ cɨódɨcaɨ. Afena jino uáfodo llotɨcaɨ.  
\v 15 Nágamɨerie Jesús Juzíñamui Jitona onótatɨmɨe, jaca Juzíñamui dɨga ite. Daje izói Juzíñamui afémɨe comécɨmo ite. 
\p  
\v 16 Daɨí Juzíñamui caɨna izíruillana fɨdɨ́tagacaɨ. Aféfuena ɨ́ɨnotɨcaɨ. Juzíñamui jamánomo izíruillafuiaɨna oruídɨmɨe. Izíruillafuemo itɨ́mɨe Juzíñamuimo ite. Afe izói Juzíñamui afémɨe comécɨmo ite.  
\v 17 Daɨí jamánomo ñuera izíruillafue caɨmo comuíoicaide. Iemona íiraɨruimo facátallɨruido ñue íena ɨ́ɨnofɨredɨnona íitɨcaɨ. Mei Jesucristo bie énɨemo ñue cáɨmamɨena illa izói afe izói itɨcaɨ.  
\v 18 Izíruinafuemo jacɨ́ruillafue iñede. Mei jira ñue jaɨ́cɨna izíruillafue jácɨfuena jino orede. Mei jácɨfuemo duere fɨnótajano ite. Ie jira jacɨ́naitɨmɨe ñue jaɨ́cɨna izíruioicaiñede. 
\p  
\v 19 Caɨ Juzíñamuina izíruitɨcaɨ, nano fueñe caɨna ie izíruilla jira.  
\v 20 Dámɨe daɨíadɨ “Juzíñamuina izíruitɨcue” mei íadɨ afe llezica ie daano cómena éoia, afémɨe táɨnofueredɨmɨe. Uafue dámɨe ie cɨona daano cómena izíruiñede, afe llezica cɨóñena Juzíñamuina izíruinide.  
\v 21 Juzíñamui caɨmo iga daa ocuícafue. Afe bie ocuícafue daɨde: “Juzíñamuina izíruitɨmɨe daje izói ie aɨno cómena izíruiri,” daɨde. 
\c 5  
\s1 Caɨ dɨnena bínɨemo ite fɨénidɨfuiaɨna anáfenoitɨcaɨ 
\p  
\v 1 Nágamɨe Jesús Crístona ɨ́ɨnotɨmɨe Juzíñamui jitó. Dámɨe come moona izíruitɨmɨe afe izói afe moo jitótɨaɨna izíruite.  
\v 2 Moo Juzíñamuina caɨ izíruia, afe llezica ie ocuícafuena caɨ fɨnóadɨ, Juzíñamui jitótɨaɨna caɨ izíruillana ja ónoitɨcaɨ.  
\v 3 ¿Mɨnɨca Juzíñamuina izíruillafuena? Mei ie ocuícafuiaɨna jeire caɨ ua. Ie ocuícafuiaɨ llégɨenide;  
\v 4 mei naga Juzíñamui jitó énɨemo ite fɨénidɨfuiaɨna anáfenorede. Ua caɨ ɨ́ɨnuafuedo énɨemo ite fɨénidɨfuiaɨna anáfenodɨcaɨ.  
\v 5 Dama Jesús Juzíñamui Jitona ɨ́ɨnotɨmɨe énɨemo ite fɨénidɨfuiaɨna anáfenorede. 
\s1 Juzíñamui Jitomo uai nabáillafue 
\p  
\v 6 Jesucristo jaɨnoi dɨe dɨga cɨócaizaɨbitɨmɨe. Ie báutizaillaruimo Juzíñamui Jitona comɨnɨ fɨdɨ́tagaiaɨoɨ. Afe izói ie tɨ́izaillaruimo, dama ie abɨ zóofiano, ie dɨe tóillamona áfedo comɨnɨ onótagaiaɨoɨ. Fia jáɨnoiñedeza, íadɨ jaɨnoi dɨe dɨga bite. Jesús Juzíñamui Jitónafuemo Ñuera Joreño uai nabáiraɨma. Ñuera Joreño llogafue uafue.  
\v 7 Afe Jesús Juzíñamui Jitónafuemo damɨeámani uai nabáiraɨma monamo ite: Moo Juzíñamui, Juzíñamuimona Uaillaɨ Lluáɨbitɨmɨe, Ñuera Joreño dɨga. Bie daámani come daɨnáuai dáamɨemo jaɨnaide.  
\v 8 Enɨemo daje izói daámani uai nabáiraɨma ite: Ñuera Joreño, íemo Jesús báutizaja jaɨnoi, íemo ie tɨ́illaruimo totaca dɨe dɨga. Bie daámanide dane dáamɨede. 
\p  
\v 9 Comɨnɨ uai nabáillafue llɨ́ɨnofɨredɨcaɨ, mei íadɨ Juzíñamui uai nabáillafue jamánomoide, ie jira ie Jitori uai nabáillafuena caɨ ɨ́ɨnolle ɨere jitáirede.  
\v 10 Juzíñamui Jitona ɨ́ɨnotɨmɨe bie uai nabáillafue dama ie comécɨdo úicade. Juzíñamuimo ɨ́ɨnoñedɨmɨe Juzíñamui táɨnofueredena cɨ́otate, Juzíñamui ie Jitori uai nabáillafue dáɨnana ie ɨ́ɨnoñena jira.  
\v 11 Afe daɨnáfuedo Juzíñamui daɨde: zíiñona cáanano afémɨe caɨmo iga. Afe cáanano ie Jitodo bite.  
\v 12 Juzíñamui Jitona comécɨdo llɨ́ɨnotɨmɨemo afe zíiñona cáanano ite. Mei íadɨ Juzíñamui Jitó comécɨdo llɨ́ɨnoñedɨmɨemo afe cáanano iñede. 
\s1 Juan íiraɨcaiño lluáfuiaɨ fuizáillafue dɨga úrite 
\p  
\v 13 Ja Juzíñamui Jitona ɨ́ɨnotɨomoɨ. Jira bifue ómoɨmo cuetɨcue zíiñona cáanano ómoɨmo íllana omoɨ onóillena. 
\p  
\v 14 Juzíñamui uáfuena caɨmo cacáfɨrenana ɨ́ɨnofɨredɨcaɨ. Daa mɨnɨ́cana caɨ jɨcáadɨ ie comecɨ jítaina izói, afémɨe caɨ daɨna cacana onódɨcaɨ.  
\v 15 Mei jira afémɨemo caɨ úrillana Juzíñamui cacáfɨrenana onódɨcaɨ. Afena onónamona caɨ jɨcácana afémɨe caɨmo fécana daje izói onódɨcaɨ. 
\p  
\v 16 Cómena tɨ́tañeite fɨénidɨfue ite. Dámɨe ie aɨno come afe fɨénidɨfue fɨ́nuana cɨóadɨ, Juzíñamuimo afémɨeri jɨcari. Iemona Juzíñamui cáananona íemo fécaite. Tɨ́tade fɨénidɨfue ite. Afemo Juzíñamuimo omoɨ jɨcari daɨíñedɨcue.  
\v 17 Nana fɨénidɨfuiaɨ ɨ́aɨfue; come comécɨna tɨtade. Mei íadɨ jɨáɨe ɨ́aɨfue ite; afefue cómena tɨ́tañeite. 
\p  
\v 18 Juzíñamuina Móoredɨmɨe ɨ́aɨfuedo macáñedeza onódɨcaɨ; mei Juzíñamui Jitó íena úiñoteza. Ie jira Taɨfe íena ocuínide. 
\p  
\v 19 Juzíñamui íedɨcaɨza onódɨcaɨ. Afe izói nana bínɨe comɨnɨ Taɨfe ocuícafue anamo itíaɨoɨza onódɨcaɨ. 
\p  
\v 20 Juzíñamui Jitó jaiai bíllana onódɨcaɨ. Afémɨedo ua nahí Juzíñamuina onótagacaɨ. Afe Uámɨemo jaɨnáicana itɨcaɨ. Afefue daɨíacade Juzíñamui Jitó Jesucristo dɨbénemo itɨcaɨ. Afémɨe nahí Juzíñamui. Afémɨemo jaɨnáicana caɨ íadɨ zíiñona caɨna cáataite.  
\v 21 Jitótɨaɨ, mai jánaraɨmo caɨmátaiñeno omoɨ iri; daje izói nana jɨáɨe jɨ́fuete jóriaɨmona abɨ omoɨ rairuíri. Jae nɨɨe.