\id HEB - Holiya
\ide UTF-8
\h इब्रानिगोळ
\toc3 इब्रानिगोळ
\toc2 इब्रानिगोळ
\toc1 इब्रानिगोळ हेसुर चिट्ठी
\mt2 इब्रानियो के नाम पत्री
\mt1 इब्रानिगोळ हेसुर चिट्ठी
\imt परिचय
\ip यीशु हाळोद नियम इन हापाळ सा भविष्यवाणीगोळी पुरा ह्यांग माळतान ईदा तोरसावाळा “इब्रानियो अन्द चिट्ठी” ईद ऊंद धिरज कोळावाळा किताब हुन. ऊंद उपदेश देल इदुर रचना माळकु आग्याद. सप्पा भविष्यवाणी अदिक स्याणा याजकगोळ्द जिम्मेदारीगोळी यीशु ह्यांग पुरा माळदुन ईद सरलता देल तोरसावाळा ६० से यक्कुल हाळोद नियम इन संदर्भ ई किताब दा आव. ईदा कारण देल ई किताब इक यहूदी मसीह लॉकुर साटी दिलासा कोळावाळा मान्सकु आग्याद. इदुर मुंद याजकगोळी यग्य माळोद जरवत हैलेच ईद व्यवस्था यीशु ह्यांग पुरा माळदुन ईद ई किताब दा स्पष्ट माळकु आग्याद. सप्पा पापगोळ साटी ऊंदा घन अदिक हमेशा हमेशा अन्द यग्य हिंग यीशु आदुन. ई किताब देल नामी हिंग समझ दा बरतद कि, यीशु मसीह, नामी परमेश्वर मा विश्वास माळोर साटी तयार माळतान. \xt १२:२\xt* ईदा रीति देल ई युग इन नाव मसीह विश्वासीगोळ साटी ई किताब दा धोळ्द दिलासा आद. नामी अदुर मा निर्भर ईर पायजे.
\ip इब्रानियो अन्द चिट्ठी याव लिख्सदुन ईद नामी मालूम हैलेच तरी भी थ्वाळासा विधवान लॉकुर मान्ना आद कि, ईद प्रेरित पौलुस, लूका या बरनबास ई परमेश्वर उन सेवकगोळ लिखसीदार. हांगा ईद किताब याग लिख्सकु आग्याद ईद भी नामी मालूम हैलेच. तरी भी हापाळ सा विधवान लॉकुर हिंग मान्सतार कि, ईद मसीह अन्द जनम इन बाद्दा ७० वर्ष इन पयले लिख्सकु आगीदाद. इदुर कारण हिंग कि, याग यरूशलेम नगर ७० इन साल दा नाश माळकु आत तरी भी ई किताब दा यरूशलेम इन वर्णन ईत्‍ता प्रकार देल माळकु आग्याद, जसा कि अद नाश माळकु अच ईला आगीत. ईद किताब हापाळ सा मंडलीगोळ दा होगकु वाचुसकु आगीदाद. अद रोम नगर दा लिख्सकु आगीत. \xt १३:२४\xt*
\iot रूप रेखा
\io1 १. लिखसावाळा हिंग तोर्सतान कि, यीशु ईव परमेश्वर उन सप्पा भविष्यवक्ता अदिक स्वर्गदूत इंदुर से भी महान आन \ior १:१–४:१३\ior*
\io1 २. इदुर बाद्दा आव ईद तोर्सतान कि, जो याजकगोळ यरूशलेम इन मंदिर दा स्यावा माळतार आंदुर से भी यीशु महान आन \ior ४:१४–७:२८\ior*
\io1 ३. मूसा अक कोटकु आगीद आ आग्यागोळ द्वारा जो हाळोद व्यवस्था परमेश्वर तान लॉकुर से माळदुन अदुर से भी यीशु उन स्यावा महान आद \ior ८:१–१०:३१\ior*
\io1 ४. यीशु हर मात दा श्रेष्ट आन ईद स्पष्ट माळदुर बाद्दा लेखक हापाळ सा दिनचर्या अन्द व्यवहारगोळ बारा दा सुचना कोळतान \ior १०:३२–१३:१७\ior*
\io1 ५. आखरी दा थ्वाळासा बोध अदिक शुभेच्छा कोटकु लेखक ई चिट्ठी इक खतम माळतान \ior १३:१८-२५\ior*
\c 1
\s परमेश्वर उन वचन, पार उन द्वारा
\p
\v 1 पयला अन्द युग दा परमेश्वर आप्प दादागोळ से थ्वाळा-थ्वाळा माळकु अदिक अलग-अलग देल भविष्यवक्तागोळ द्वारा मातगोळ हेळदुन, 
\v 2 ई आखरी दिनगोळ दा आव नाम से पार उन द्वारा मातगोळी हेळदुन, यारी आव सप्पा वस्तुगोळ्द वारीस ठहरूसदुन अदिक आऊंदा द्वारा परमेश्वर सप्पा दुनिया अन्द रचना माळ्यान. 
\v 3 आव परमेश्वर उन महिमा अन्द ऊजुळ अदिक आऊन स्वरूप इन छाप हुन, अदिक सप्पा वस्तुगोळी तान सामर्थ्य अन्द वचन देल संभाळ्सतान. आव मंळसा जाती इन पापगोळी माफ माळकु स्वर्ग दा होगकु महामहिम परमेश्वर उन ऊमा कय दी होगकु कुरतुन;
\s परमेश्वर-पार उन महानता
\p
\v 4 ई प्रकार पार स्वर्गदूतगोळ से महान माळकु आदुन, अदा प्रकार ह्यांग परमेश्वर आऊक स्वर्गदूतगोळ से वळ्लीद हेसुर कोट्टुन. 
\v 5 यतिकी परमेश्वर यातोदु भी स्वर्गदूतगोळ से हिंग अंदिदील, “नी नान पार हुय, ईंद ना नीन आप्प बनसीन.” अदिक ना यातोदु स्वर्गदूत से परमेश्वर ईद अंदुन, “ना नीन आप्प बनसाईन, अदिक नी नान पार बनस्या.”
\p
\v 6 अदिक याग परमेश्वर तान पयला पैदा आग्द पार उक दुनिया दा कळुतान, रा आव अनतान, “परमेश्वर उन सप्पा स्वर्गदूत आऊंद उपासना माळुल.” 
\v 7 लेकीन स्वर्गदूतगोळ्द बारा दा परमेश्वर ईद अनतान, “आव तान दूतगोळी पवन, अदिक तान सेवकगोळी भळकुस्द बेक्‍की माळतान.” 
\v 8 लेकीन परमेश्वर पार उन बारा दा अनतान, “हे परमेश्वर, नीन सिंहासन हमेशा हमेशा ईत्‍तीत: अदिक नीन शासन नीन लॉकुर मा न्याय इन सांगुळ आगतद. 
\v 9 नी सच्चाई से प्यार अदिक अन्याय से दुश्मनी ईट्द; ईद कारण परमेश्वर, नीन परमेश्वर, आनन्द इन याण्णा देल अभिषेक माळदुर द्वारा नीन संगीगोळ से वाळुसकु निवळुसदुन.” 
\v 10 वचन ईद भी अनतद, “हे प्रभु, सुरूवात दा नी पृथ्वी इन पायवा हाक्द, अदिक स्वर्ग नीन कय इंद कारीगरी हुन. 
\v 11 अव रा नाश आगेदव, लेकीन नी हांगा ईत्या; अदिक अव सप्पा फळक्यागोळ घाई कंदुसेदाव, 
\v 12 अदिक नी अवरी चादर इन घाई गुंडस्या, अदिक अव फळक्यागोळ घाई बदलुसेदव: पर नी हांग अच बन्सकु ईत्या अदिक नीन जीवन इन अन्त आगतीदील.” 
\v 13 अदिक स्वर्गदूतगोळ दा टु परमेश्वर यार से याग अंदुन, “नी नान ऊम्मा कय दी कुर, यागासताका कि ना नीन दुश्मनगोळी नीन कालगोळ्द ल्यालमा अन्द पांळ्सी माळ कोमालीन?” 
\v 14 येन स्वर्गदूत अव आल्लच, जो आत्मागोळ परमेश्वर उन स्यावा अदिक आऊन द्वारा उद्धार ताकोमावाळेर इक मदत माळोर साटी कळुकु आग्याव.
\c 2
\s महान उद्धार
\p
\v 1 ई कारण पायजे कि जो सत्य मातगोळी नाव केळेव, अदिक यक्कुल अच सावधानी देल अऊर मा मन हची, हिंग आगबाळुल कि वाहुसकु अऊर से दुर होटोगुल. 
\v 2 यतिकी जो बातणी स्वर्गदूतगोळ द्वारा नाम पुर्वजगोळी कोटकु आत अद खरा ठहरूस्त, यार आंदुर्द उल्लंघन माळदुर आंदरी दण्ड प्राप्त आत यदुर आंदुर लायक ईरोर. 
\v 3 अगर नाव ईद महान उद्धार मा ध्यान कोटीदील रा नाव ह्यांग उळु सकतेव? यदुर चर्चा पयले पहल प्रभु उन द्वारा आत, अदिक यार केळदुर आंदुर नामी ईद साबित माळदुर कि अद उद्धार खरा आद. 
\v 4 अदिक सांगुळ अच परमेश्वर भी तान इच्छा अन्द अनुसार चमत्कारगोळ, अदिक अदभुत क्याल्सागोळ, अदिक अलग प्रकार इन सामर्थ्य इन क्याल्सागोळ, अदिक पवित्र आत्मा अन्द वरदानगोळी वाट्सदुर द्वारा इदुर्द गवाही कोळतेला ईत्‍तुन.
\s उद्धार इन मार्गदर्शन
\p
\v 5 परमेश्वर आ बरावाळा दुनिया अक यदुर चर्चा नाव माळतेव, स्वर्गदूतगोळ हात्‍ती माळीदिल. 
\v 6 \x + \xo २:६ \xo*\xt भजन संहिता ८:४-६\xt*\x*बल्‍की यावारा शास्त्र दा ईद गवाही कोटान,
\q2 “मंळसा येन हुन कि नी आऊक याद माळत्या?
\q2 या मंळसा येन हुन कि नी आऊंद चिंता माळत्या?
\q1
\v 7 नी आऊक स्वर्गदूतगोळ से थ्वाळासा अच गोर्त माळ्द;
\q2 नी आऊन मा महिमा अदिक आदर इन मुकुट ईट्द,
\q1
\v 8 अदिक आऊक तान कयगोळ्द क्याल्सागोळ मा अधिकार कोट्ट
\q2 नी सप्पा आऊन कालगोळ ल्यालमा माळ्द.”
\p इदुरसाटी याग आव सप्पा येनारा आऊन हात्‍ती माळ कोंडुन, रा आव येनु भी बिटीदिल जो आऊन हात्‍ती ईला ईरोद. लेकीन ईग नाव सप्पा येनारा वस्तु आऊन हात्‍ती नोळालेव. 
\v 9 लेकीन नाव यीशु उक जो स्वर्गदूतगोळ से थ्वाळासा कम माळकु आगीदुन, मृत्यु उन दुख नेगदुर कारण महिमा अदिक आदर इन मुकुट हाक्‍कु नोळतेव, ताकी परमेश्वर उन अनुग्रह देल आव हर ऊंद मंळसा अन्द साटी सायुल.
\p
\v 10 ईद परमेश्वर उन साटी वळ्लीद हत्‍त याव सप्पा मातगोळी माळदुन अदिक संभाळ्सकु ईटदुन, यीशु उक भी यातनागोळ द्वारा परिपुर्ण माळ पायजे ताकी हापाळ सा चिकोर आऊन महिमा दा भागी आगुल. यतिकी यीशु अच आव ऊंद हुन जो आंदरी उद्धार इन दी ओयतान. 
\v 11 यतिकी लॉकुरी आंदुर पापगोळ से पवित्र माळतान अदिक आंदुर येढ्ढु पवित्र माळकु आग्यार, सप्पा मुंदुरव आप्प ऊंद अच आन, इदुरसाटी यीशु आंदरी तान वार्टुर अनोर से नाचालुन. 
\v 12 \x + \xo २:१२ \xo*\xt भजन संहिता २२:२२\xt*\x*आव परमेश्वर से अनतान, “ना तान वार्टुर अदिक आकतींगेर न्याड्या दा नींद हेसुर इन प्रचार माळाईन; सभा अन्द न्याड्या दा ना नींद प्रशंसा माळाईन.” 
\v 13 अदिक आव ईद भी अनतान, “ना तान भरोसा परमेश्वर मा ईटाईन. अदिक अनतान, ना ईल परमेश्वर उन कोळ्द चिकोर सांगुळ आईन,”
\p
\v 14 इदुरसाटी याग कि पारगोळ मास अदिक रक्ता अन्द भागी आर, रा यीशु खुद भी आंदुर घाई आंदुर सहभागी आगेदुन, ताकी मृत्यु उन द्वारा शैतान उक नाश माळ सकुल मतलब यार हाती मृत्यु उन शक्ति आद; 
\v 15 ईदा रीति देल आ मंळसागोळी मुक्त माळकोमी यार्द जीवन मृत्यु उन अंज्क इन मारा गुलामी या दासत्व दा ईरोर. 
\v 16 यतिकी ईद स्पष्ट आद कि आव रा स्वर्गदूतगोळ इक ईला बल्‍की अब्राहम उन वंश इन सहायता माळतान. 
\v 17 ई कारण आऊक चाहसोद ईरोद, कि सप्पा मातगोळ दा तान वार्टुरगोळ घाई बनसुल; यदुर देल आव आ मातगोळ दा जो परमेश्वर देल संबंध ईटतद, ऊंद दयालु अदिक विश्वासलायक महायाजक बनसुल ताकी लॉकुर्द पापगोळ साटी प्रायश्चित माळुल. 
\v 18 यतिकी याग आव परीक्षा अन्द दशा दा दुख नेगदुन, रा आव आंदुर्द भी मदत माळ सकतान यार्द परीक्षा आगतद.
\c 3
\s यीशु मूसा से महान आन
\p
\v 1 इदुरसाटी हे मसीह वार्टुरा अदिक आकतींगेरा, नीव जो परमेश्वर उन द्वारा कारूकु आगिर नीव तान ध्यान यीशु मा हचकु ईटी यारी परमेश्वर प्रमुख याजक माळोर साटी कळुकु आगीदुन, आ अदुर मा नाव तान कबुली कोळतेव. 
\v 2 आव याव आऊक निवळुस्यान आ परमेश्वर उन प्रती विश्वासलायक ईरोन, ठीक हांगा ह्यांग मूसा तान क्याल्सा अन प्रती परमेश्वर उन घराना दा विश्वासलायक ईरोन. 
\v 3 ह्यांग भवन इन निर्माण माळावाळा अक खुद भवन से यक्कुल आदर सिकतद, हांग अच यीशु मूसा से यक्कुल आदर इन पात्र मान्सकु आदुन. 
\v 4 यतिकी हर ऊंद मान्ना अन्द यावारा ना यावारा माळावाळा ईरतान, लेकीन परमेश्वर रा सप्पा वस्तु उन माळावाळा हुन. 
\v 5 मूसा रा परमेश्वर उन मान्या सेवक घाई विश्वासलायक ईरोन, अदिक आव अव मातगोळी अंदुन जो भविष्य दा परमेश्वर उन द्वारा अंदकु आगोव ईरव. 
\v 6 लेकीन मसीह पार आगा नाता देल परमेश्वर उन मान्या विश्वासलायक आन. अदिक आऊन मान्ना नाव हुयेव, अगर नाव नाम साहस अदिक यदुर मा नाव घमण्ड माळतेव आ आशा मा मजबूती देल स्थिर ईरूल.
\s परमेश्वर उन लॉकुरी आराम
\p
\v 7 इदुरसाटी ह्यांग पवित्र आत्मा अनतद,
\q2 “अगर ईंद परमेश्वर उन आवाज केळी,
\q1
\v 8 रा तान मन इक कठोर माळबाळेतीर,
\q2 ह्यांग कि निमोर पुर्वजगोळ याग आंदुर्द मरूस्थल दा परीक्षा आगोद
\q2 परमेश्वर उन खिलाप बगावत माळीदुर.
\q1
\v 9 परमेश्वर अनतान कि अल आंदुर नांद परीक्षा माळदुर अदिक परखुसदुर,
\q2 अदिक नान क्याल्सागोळी नोळदुर
\q2 यवरी ना चालीस साल टु माळतेला बरेतीन.”
\q1
\v 10 ईद कारण ना आ समय इन लॉकुर से सिट्ट दा ईत्‍तीन,
\q2 अदिक अंदीन, “इंदुर मन हमेशा टु अच अप्रामाणिक आव
\q2 अदिक नान आग्या अक ठुकरूसतार.”
\q1
\v 11 \x + \xo ३:११ \xo*\xt भजन संहिता ९५:७-११\xt*\x*इदुरसाटी ना सिट्ट दा बंदकु किर्‍या तिंदीन,
\q2 “इदुरसाटी येल ना आंदरी आराम कोळाईन
\q2 आ जागा दा आंदुर यागलु होग सकतीदिल.”
\p
\v 12 हे वार्टुरा अदिक आकतींगेरा, सावधान ईरी कि नीम दा ईत्‍ता बेकार अदिक अविश्वासी मन आगबाळुल, जो नीमी जित्‍ता परमेश्वर से दुर ओयुल. 
\v 13 लेकीन ईदुर बदला यागासताका ईद “ईंद इन दिन” अनकु आगतद, नीव हर दिशी आबुर दाबुर इक धीरज कोळतेला ईरी, ताकी नीम दा टु यावारा भी पाप दा भरमुसकु ईला आगुल, अदिक ना कठोर आगेगुल. 
\v 14 अगर नाव आखरी ताका मजबूती इन सांगुळ तान सुरूवात इन आत्मविश्वास इक हुडुकु ईरतेव रा नाव मसीह अन भागीदार बनसेगतेव. 
\v 15 \x + \xo ३:१५ \xo*\xt भजन संहिता ९५:७-८\xt*\x*ह्यांग शास्त्र अनतद, “अगर ईंद नीव परमेश्वर उन आवाज केळीर, रा तान मन इक कठोर माळबाळेतीर, ह्यांग कि बगावत इन दिनगोळ दा नीम पुर्वजगोळ माळीदुर.”
\p
\v 16 भला आंदुर या लॉकुर ईरोर यार परमेश्वर उन आवाज केळदुर अदिक आऊन खिलाप बगावत माळदुर? येन आंदुर आ लॉकुर ईला ईरोर, यारी मूसा मिस्त्र दा टु उळ्सकु तेगदीदुन? 
\v 17 अदिक परमेश्वर चालीस वर्ष ताका याता लॉकुर से सिट्ट दा ईत्‍तुन? येन आंदुर से अच ईला यार पाप माळदुर, अदिक आंदुर लाश मरूस्थल दा बिदकु ईत्‍तव? 
\v 18 अदिक परमेश्वर याता लॉकुर साटी किर्‍या तिंदुन कि नीव नान आराम इन जागा दा प्रवेश माळ सकतीदिल? येन आंदुर ई लॉकुर आल्लच यार आऊन आग्या मान्सीदील? 
\v 19 इदुरसाटी नाव नोळतेव कि आंदुर अविश्वास इन कारण अच आ जागा दा प्रवेश माळ सकिदील.
\c 4
\p
\v 1 इदुरसाटी याग कि परमेश्वर उन आराम इन जागा दा प्रवेश माळोद प्रतिग्या ईगासताका ताका आद, रा नामी ध्यान ईट पायजे हिंग आगबाळुल कि नीम दा टु यावारा जन आऊन से वंचित ईतोगुल. 
\v 2 यतिकी नाव खुशखबरी केळदेव ह्यांग आंदुर केळीदुर, लेकीन जो बातणी आंदुर केळीदुर आंदुर साटी येनु किमत ईला ईरोद, यतिकी याग आंदुर अदरी केळदुर रा ईदरी विश्वास इन सांगुळ स्वीकार माळीदिल. 
\v 3 नाव जो विश्वासी आयेव, आ आराम इक यदुर्द परमेश्वर प्रतिग्या माळीदुन अदरी नाव प्राप्त माळतेव. ह्यांग कि परमेश्वर अंदान, “ना सिट्ट दा ईदुर मा किर्‍या तिनकु अंदिदीन आंदुर यागलु नान आराम इन जागा दा शामिल आग सकतीदिल.” आव ईद अंदिदुन, याग कि दुनिया अन्द रचना माळदुर बाद्दा आऊन क्याल्सा पुरा आगेगीत. 
\v 4 यतिकी सातवा दिन इन बारा दा येल्यारा तरी शास्त्र दा आद, “अदिक बाक सातवा दिशी तान सप्पा क्याल्सागोळ माळकु परमेश्वर आराम माळदुन.” 
\v 5 अदिक ई संदर्भ दा आव मात्‍त अनतान, “आंदुर नान आराम इन जागा दा यागलु प्रवेश माळ सकतीदिल.” 
\v 6 यार पयले खुशखबरी केळदुर आंदुर आ आराम इक प्राप्त माळ सकिदील यतिकी आंदुर विश्वास ईला माळीदुर. लेकीन दुसरा अन साटी आराम इन दरवाजा ईगलु तेरकु आव. 
\v 7 \f + \fr ४:७ \fr*\ft भजन संहिता ९५:७-८ \ft*\f*इदुरसाटी परमेश्वर बाक ऊंद विशेष दिन निश्चित माळदुन अदिक अदरी अनकु आत “ईंद इन दिन.” थ्वाळासा साल इन बाद्दा दाऊद उन द्वारा परमेश्वर आ दिन इन बारा दा शास्त्रगोळ दा हेळीदुन यदुर्द उल्लेख शास्त्र पयले टु अच माळतद, “अगर ईंद नीव परमेश्वर उन आवाज केळीर, ह्यांग पयले अंदकु आग्याद, रा तान मन इक कठोर माळबाळी.”
\p
\v 8 अगर यहोशू आंदरी आ आराम इन जागा दा ओयायदुन यदुर्द परमेश्वर प्रतिग्या माळीदुन, रा परमेश्वर बाद्दा यातोदु दुसरा दिन इन बारा दा ईला अनायदुन. 
\v 9 रा जो भी आगुल, ह्यांग परमेश्वर सातवा दिन दा आराम माळतान हांग अच परमेश्वर उन लॉकुर साटी अल ऊंद आराम मिक्‍कु आद. 
\v 10 यतिकी जो यावारा भी परमेश्वर उन प्रतिग्या माळ्द आराम दा प्रवेश माळतार, आंदरी तान कर्म इन अनुसार अदुर दा आराम सिक्‍कीत हांग अच ह्यांग परमेश्वर उक तान क्याल्सागोळ से आराम सिक्याद. 
\v 11 इदुरसाटी बरी ईग नाव भी आ आराम इक हासिल माळोर साटी पुरा रीति देल कोशिश माळाता, ताकी हिंग आगबाळुल कि नाम न्याड्या दा टु यावारा भी अदरी हासिल माळदुर दा असफल आगबाळुल ह्यांग आंदुर तान विश्वास इन कमी इन द्वारा आगीदुर.
\p
\v 12 यतिकी परमेश्वर उन वचन जित्‍ता, क्रियाशील, अदिक हर ऊंद दोधारी तलवार से भी हापाळ तेज आद; अदिक हर जीव आत्मा अक, अदिक जोळ-जोळ इक ब्यार्र माळकु आर-पार गड्डा माळतद अदिक मन इन इच्छागोळ अदिक विचारगोळ्द न्याय माळतद. 
\v 13 अदिक दुनिया अन्द यातोदारा भी वस्तु परमेश्वर उन नजर देल होचकोमकु हैलेच, आऊन कण्णगोळ मुंद यारी नामी लेखा जोखा कोळोद आद हर वस्तु बीना यातोदु आवरण इन तेरकु आद अदिक येनु अच ओझल हैलेच.
\s यीशु महान महायाजक
\p
\v 14 इदुरसाटी याग नामव ईत्‍ता धोड्डेव महायाजक आन, जो स्वर्ग दा टु आगकु होग्यान, मतलब परमेश्वर उन पार यीशु, रा बरी, तान विश्वास इक जो नाव प्राप्त माळेव मजबूती देल हुडुकु ईत्‍तेव. 
\v 15 यतिकी नामव जो महायाजक आन आव हिंग हैलेच कि जो नाम कमजोरीगोळ सांगुळ सहानुभुती ईट सक्यान, आऊक हर प्रकार देल हांगा परखुसकु आत ह्यांग नामी लेकीन आव हमेशा पाप रहित ईत्‍तुन. 
\v 16 रा बाक बरी, नाव आत्मविश्वास इन सांगुळ अनुग्रह ताकोमोर साटी परमेश्वर उन सिंहासन दी वाळुसेव ताकी जरवत बीळदुर मा नाम सहायता अन साटी नाव दया अदिक अनुग्रह अक हासिल माळ सक्केव.
\c 5
\p
\v 1 हर ऊंद महायाजक मंळसागोळ दा टु अच निवळुस्कु आगतान, अदिक लॉकुर्द प्रतिनिधीत्व माळोर साटी परमेश्वर इन स्यावा साटी नियुक्ती माळकु आगतद ताकी आव पापगोळ साटी भेंट अदिक बलिदान येर्सुल. 
\v 2 यतिकी खुद भी हापाळ रीति देल कमजोरी इन हात्‍ती आन इदुरसाटी आव अग्यानीगोळ अदिक भुला भटका लॉकुर सांगुळ कोमलता देल व्यवहार माळ सकतान. 
\v 3 इदुरसाटी आऊक पायजे कि ह्यांग लॉकुर साटी हांग अच तान साटी भी पाप-बली येरसुल. 
\v 4 ईद मुख्य याजक आदर इन पद याऊ तान तान इक निवळुस्कु ताकोमालुन, याग कि हारून उन घाई परमेश्वर उन दी टु ठहरूसकु आगालुन.
\p
\v 5 हांग अच मसीह भी महायाजक आगोद आदर तांदुर देल ग्रहण माळीदील, बल्‍की परमेश्वर आऊन से अंदुन “नी नान पार हुय, अदिक ईंद ना नीन आप्प बनसीन.” 
\v 6 ईदा प्रकार आव दुसरा जागा दा भी अनतान, “नी मलिकिसिदक इन रीति मा हमेशा साटी याजक आय.” \fig महायाजक याजक उन पयनावा अदिक धुपदानी इन सांगुळ|alt="High priest with his priestly clothes and censer" src="hk00267c.tif" size="col" copy="Horace Knowles ©" ref="५:५"\fig*
\p
\v 7 \x + \xo ५:७ \xo*\xt मत्ती २६:३६-४६; मरकुस १४:३२-४२; लूका २२:३९-४६\xt*\x*यीशु तान शरीर दा ईरोद दिनगोळ दा धोळ्द शब्द दा वर्ल-वर्लकु अदिक कण्ण इन नीर वाहुसकु आऊन से जो आऊक मृत्यु देल ऊळ्स सकोन, प्रार्थना अदिक विनती माळदुन, भक्ति अदिक नम्रता अन कारण परमेश्वर आऊन केळदुन. 
\v 8 लेकीन अगर आव परमेश्वर उन ईरोन तरी भी दुखगोळ झेल्सतेला आव आग्या अन पालन माळोद कलतुन. 
\v 9 अदिक सिद्ध बन्सदुर मा, तान सप्पा आग्या मानसावाळेर साटी अनन्त काल इन उद्धार इन स्त्रोत बन्सेदुन, 
\v 10 अदिक आ परमेश्वर उन दी टु मलिकिसिदक इन रीति मा महायाजक बनस्कु आदुन.
\s विश्वास देल भटकुसकु होगोद विरोध दा चेतावनी
\p
\v 11 इदुर बारा दा नामी हापाळ सा मातगोळ माताळोव आव, लेकीन यऊर्द वर्णन माळोद कठिन आद, यतिकी नीव सम्सदुर दा हापाळ धीरा आईर. 
\v 12 \x + \xo ५:१२ \xo*\xt १ कुरिन्थि ३:२\xt*\x*वास्तव दा ई समय ताका रा नीमी शिक्षक आगेगोद हुन, तरी भी ईद जरूरी आगेग्याद कि यावारा नीमी परमेश्वर उन वचनगोळ्द शिक्षा सुरूवात टु मात्‍त कलसुल. नीव रा हिंग आगेदीर कि नीमी ठोस भोजन इन बदला ईग भी हाल अच पायजे. 
\v 13 यतिकी जो हाल कुडुतान आव चिग्द अच आन अदिक आऊक सही गलत इन येनु अनुभव ईराल. 
\v 14 लेकीन ठोस भोजन स्याणागोळ साटी आद, आव याव तान अनुभव देल वळ्लीद अदिक बुरा अन्द ग्यान माळोद कलतोग्यान.
\c 6
\p
\v 1 इदुरसाटी बरी मसीह अन सुरूवात इन स्तर शिक्षा अक सुरूवात इन मातगोळी बिटकु नाव सिद्धता दी मुंद वाळुस्तेला होगाता, मृत्यु उन अगुवाई माळोर द्वारा प्रायश्चित इन पायवा मात हाकबाळुल, अदिक परमेश्वर मा विश्वास माळोद, 
\v 2 बपतिस्मा अन्द शिक्षा अदिक म्याकुच कयगोळी ईटोद, अदिक सोत्‍तुर दा टु जित्‍ता आगोद, अदिक अनन्त न्याय ताका. 
\v 3 अगर परमेश्वर चाहास्यान रा नाव ईदा माळेव.
\p
\v 4 जो लॉकुर तान विश्वास इक त्याग्स बुळतार आंदरी मात पश्चाताप माळोर साटी ह्यांग तनकु आग सकतद, आंदुर ऊंद घन परमेश्वर उन प्रकाश दा ईरोर, आंदुर स्वर्ग इन उपहार नेकदुर अदिक पवित्र आत्मा अन्द तान हिस्सा हासिल माळदुर, 
\v 5 अदिक परमेश्वर उन वळ्लीद वचन इन अदिक बरावाळा दुनिया अन सामर्थ्य अन अदिक आंदुर परमेश्वर उन वचन याट वळ्लीद आद ईदुर्द अनुभव माळ्यार. 
\v 6 अगर आंदुर आंदुर्द विश्वास देल भटकुसेदार रा आंदरी मन तिर्गुसोर साटी मात्‍त वापस तरोद असंभव आद; यतिकी आंदुर परमेश्वर उन पार उक मात्‍त क्रूस मा येर्सतार, तथा आऊक सार्वजनिक रूप देल अपमान इन विषय बन्सतार.
\p
\v 7 आ धरती जो हमेशा बिळावाळा बरसात इन नीर इक सोक्स बुळतद, जो जोतसावाळेर अदिक बोऊसावाळेर साटी उपयोगी फसल प्रदान माळतद, अद मुण्ण परमेश्वर से आशीष ताकोमतद. 
\v 8 लेकीन आ धरती मुळ्ल अदिक घासपुस पैदा माळतद, रा अद बेकार इन आद अदिक अद परमेश्वर उन दी टु श्रापित आगदुर मा आद अदिक अदुर्द अन्त होताक्‍कु आगोद हुन.
\p
\v 9 हे प्रिय संगीगोळा, नाव भला ईत्‍ता प्रकार इन मातगोळ चाहसतेव लेकीन नीम बारा दा नामी ईदुर से भी वळ्लीद मातगोळ्द आत्मविश्वास आद अव मातगोळ जो नीम विश्वास से जुळ्सकु आव. 
\v 10 नीव परमेश्वर उन लॉकुर्द लगातार मदत माळतेला जो प्यार तोर्सीर, अदरी अदिक नीम दुसरा क्याल्सागोळी परमेश्वर यागलु मारूतीदिल, आव अन्यायी हैलेच. 
\v 11 नाव चाहसतेव की नीम दा टु हर ऊंद आखरी ताका हिंग अच मेहनत माळतेला ईरूल, ताकी नीव निश्चय अदरी हासिल माळ सकीर यदुर्द नीव आशा माळतेला ईतीर. 
\v 12 नाव चाहसालेव कि नीव आलसी आगेगी, बल्‍की आंदुर्द अनुकरण माळी जो विश्वास अदिक धीरज इन सांगुळ आ वस्तुगोळी हासिल माळेत्यार यऊर्द परमेश्वर प्रतिग्या माळ्यान.
\s परमेश्वर उन अटल प्रतिग्या
\p
\v 13 परमेश्वर अब्राहम से प्रतिग्या हाळाहोती याग किर्‍या तीनोर साटी यारीकु तान से धोड्डेव नोळीदील, रा तांद अच किर्‍या तिंदुन, 
\v 14 अदिक अंदुन “ना सही दा नीनी हापाळ आशीष कोळाईन, अदिक नीनी अनेक वंशज कोळाईन.” 
\v 15 अदिक ईत्‍ता रीति देल अब्राहम धीरज हुडुकु परमेश्वर उन माळ्द प्रतिग्यागोळी हासिल माळदुन. 
\v 16 मंळसा रा तान से यातारा धोड्डेव मंळसा अन किर्‍या तीनतार, अदिक अद किर्‍या सप्पा तर्क विर्तकगोळ्द अन्त माळकु जो येनारा अंदकु आगतद, अदरी पक्‍का माळ बुळतद. 
\v 17 परमेश्वर उन माळ्द प्रतिग्या अक हासिल माळावाळेर इक परमेश्वर स्पष्ट माळकोमोद चाहासतान कि आव तान उद्देश इक यागलु बदलुसालुन इदुरसाटी आव तान प्रतिग्या अन सांगुळ तान किर्‍या अक जोळ्स बुट्टुन. 
\v 18 ईल येढ्ढ मातगोळ आव आऊन प्रतिग्या अदिक आऊन किर्‍या जो यागलु बदलुस सकालव, अदिक यऊर बारा दा परमेश्वर यागलु ख्वाटा माताळ सकालुन. इदुरसाटी नाव जो परमेश्वर उन हात्‍ती सुरक्षा ताकोमोर साटी बंदेव, अदिक जो आशा आव नामी कोटान अदरी हुडुकु हापाळ उत्साहीत आयेव. 
\v 19 अद आशा नाम जीव इन साटी ईत्‍ता लंगर आद जो स्थिर अदिक मजबूत आद, अदिक परदा अन बुळ्क इन पवित्र जागा ताका पहुचुसतद, 
\v 20 यल यीशु नाम दी टु नाम से पयले प्रवेश माळदुन, अदिक मलिकिसिदक इन परंपरा दा हमेशा हमेशा साटी प्रमुख याजक बनसेदुन.
\c 7
\s मलिकिसिदक याजक
\p
\v 1 ईव मलिकिसिदक शालेम इन राजा ईरोन, अदिक परमप्रधान परमेश्वर उन याजक ईरोन. याग अब्राहम नाक राजागोळी युद्ध दा पराजीत माळकु वापस आगोन आग मलिकिसिदक अब्राहम उक सिकदुन अदिक आऊक आशीष कोट्टुन. 
\v 2 अदिक अब्राहम आ सप्पा दा टु जो आव युद्ध दा जीकसीदुन अदुर्द दसवा हिस्सा कोट्टुन. मलिकिसिदक उन हेसुर इन पयला मतलब आद न्यायीपन इन राजा, अदिक अदुर्द ईद भी मतलब आद, “शालेम उन राजा” मतलब “शांती इन राजा.” 
\v 3 यार आप्प, मोय, अदिक पुर्वजगोळ्द यातोदु इतिहास सिकाल, आऊन जनम या मृत्यु उन भी यातोदु उल्लेख हैलेच; लेकीन परमेश्वर उन पार उन घाई इच हमेशा अन साटी याजक बन्सकु ईरतान.
\p
\v 4 थ्वाळासा विचार माळी कि आव याट महान ईरोन यारी कुलपती अब्राहम युद्ध दा हासिल माळ्द माल इन दसवा हिस्सा कोट्टुन. 
\v 5 अदिक लेवी इन वंशज दा टु जो याजक इन पद हासिल माळतार, आंदरी व्यवस्था अन अनुसार आग्या सिक्याद कि इस्राएल इन लॉकुर से मतलब तान खुद इन लॉकुर से, दसवा हिस्सा ताकोम बाक आंदुर अब्राहम उन वंशजगोळ्द भी वंशज येती आगबाळुल. 
\v 6 लेकीन मलिकिसिदक, जो लेवी वंशज दाकळव भी ईला ईरोन, अब्राहम से दसवा हिस्सा ताकोंडुन, अदिक आ अब्राहम उक आशीषगोळ कोट्टुन यार हात्‍ती परमेश्वर उन प्रतिग्यागोळ ईरव. 
\v 7 इदुर्दा येनु शक हैलेच कि जो आशिर्वाद कोळतान आव आर्शिवाद ताकोमावाळा से धोड्डेव ईरायदुन. 
\v 8 यल ताका लेवीगोळ सवाल आद आंदुर दा दसवा हिस्सा आ मंळसागोळ द्वारा संघरूसकु आगतद जो मंळसागोळ सायतार लेकीन मलिकिसिदक उन यल ताका सवाल आद दसवा हिस्सा आऊन द्वारा संघरूसकु आगाईत जो शास्त्र अन अनुसार ईग भी जित्‍ता आन. 
\v 9 रा नाव ईद भी अन सकतेव कि लेवी भी, जो दसवा हिस्सा ताकोमतान, अब्राहम उन द्वारा दसवा हिस्सा कोट्टुन. 
\v 10 यतिकी याता समय मलिकिसिदक अब्राहम से भेंट माळीदुन, आग रा लेवी इन जनम भी ईला आगित आव रा तान पुर्वजगोळ्द शरीर दा ईरोन.
\p
\v 11 अगर लेवी याजकता अन परंपरा अन द्वारा संपुर्णता हासिल माळकु आग सकोद रा यावारा दुसरा याजक उन बरोद अच येन जरवत ईरोद? यतिकी ईदुर दा आधार मा लॉकुरी व्यवस्था भी कोटकु आगित, ऊंद हिंग याजक उन येन जरवत ईरोद जो मलिकिसिदक उन परंपरा नव ईरूल ना कि हारून उन परंपरा नव. 
\v 12 यतिकी याग याजक उन पद बदलुसेगतद, रा व्यवस्था अन भी बदलुसोद जरूरी आद. 
\v 13 यतिकी नाम प्रभु उन बारा दा ईव मातगोळ अनकु आगताव कि आव दुसरा गोत्र इनव हुन, यार गोत्र दा टु याऊ याजक उन रूप दा वेदी इन स्यावा माळीदिल, 
\v 14 रा प्रगट आद कि नाम प्रभु यहूदा अन गोत्र दा टु पैदा आग्यान, अदिक ई गोत्र अन बारा दा मूसा याजक पद इन येनु चर्चा माळीदिल.
\s मलिकिसिदक उन घाई दुसरा याजक
\p
\v 15 नाम दावा मात्‍त स्पष्टता देल प्रगट आगेगतद, याग मलिकिसिदक उन घाई दुसरा याजक पैदा आगतान, 
\v 16 जो शारीरिक आग्यागोळ अन नियमगोळ अनुसार ईला, लेकीन अविनाशी जीवन इन सामर्थ्य अन अनुसार याजक बनस्यान. 
\v 17 यतिकी शास्त्र अनतद, “नी मलिकिसिदक उन रीति मा युगानुयुग याजक आय.” 
\v 18 पयला नियम इदुरसाटी रद्द माळकु आत, यतिकी अद कमजोर अदिक व्यर्थ ईरोद. 
\v 19 इदुरसाटी कि मूसा अन्द व्यवस्था यारीकु पुरा सिद्ध माळ सकिदील. अदिक ईग आऊन जागा मा ऊंद हिंग वळ्लीद आशा ईटकु आग्याद यदुर द्वारा नाव परमेश्वर उन हात्‍ती होग सकतेव.
\p
\v 20 मसीह अन नियुक्ती परमेश्वर उन किर्‍या अन्द द्वारा आत लेकीन दुसरा अक बिना किर्‍या अन्द अच याजक माळकु आगीत.
\p
\v 21 \f + \fr ७:२१ \fr*\ft भजन संहिता ११०:४ \ft*\f*लेकीन यीशु आग ऊंद किर्‍या देल याजक बन्सीदुन, याग परमेश्वर आऊन से अंदिदुन, “प्रभु किर्‍या तिंदान अदिक आव तान मन यागलु बदलुसतिदील, ‘नी हमेशा साटी याजक बन्सकु ईत्या.’”
\p
\v 22 ई किर्‍या अन कारण यीशु मात्‍त ऊंद वळ्लीद वाचा अन्द हमी बनसेदुन.
\p
\v 23 ईग नोळी, हिंग हापाळ सा याजक ईरतोगोर लेकीन आंदरी मृत्यु आंदुर पदगोळ मा कायम ईर गोटीदील, 
\v 24 लेकीन यीशु अमर आन, अदिक आऊन याजक इन क्याल्सा हमेशा हमेशा साटी बन्सकु ईरोदाद. 
\v 25 इदुरसाटी जो आऊन द्वारा परमेश्वर उन हात्‍ती बरतार, आव आंदुर पुरा रीति देल उद्धार माळदुर दा समर्थ आन यतिकी आव परमेश्वर से आंदुर साटी विनती माळली हमेशा जित्‍ता आन.
\p
\v 26 हिंगा महायाजक नाम जरवतगोळी पुरा माळ सकतान. आव पवित्र आन, आव निर्दोष आन अदिक आऊन दा यातोदु पाप हैलेच, आव पापीगोळ से भी ब्यार्र माळकु आग्यान, अदिक स्वर्ग से भी आऊक म्याकुच नेगुकु आग्याद. 
\v 27 आ दुसरा महायाजकगोळ घाई आऊक जरूरी हैलेच कि हर रोज पयले तान पापगोळी अदिक बाक लॉकुर पापगोळ साटी बलिदान येर्सुल; यतिकी आव तान तान इक बलिदान येर्सकु अदरी ऊंद अच घन दा पुरा माळ कोंडुन. 
\v 28 मूसा अन्द व्यवस्था मंळसागोळी जो पुरा हैलेच आंदरी महायाजक नियुक्त माळतद, लेकीन परमेश्वर उन प्रतिग्या आऊन किर्‍या अन सांगुळ बन्सकु आग्याद ईद प्रतिग्या व्यवस्था अन्द बाद्दा बंदाद अदिक ई प्रतिग्या प्रमुख याजक उन रूप दा पार उक नियुक्त माळ्याद जो हमेशा हमेशा साटी आद अदिक परिपुर्ण बन्सकु ईरतद.
\c 8
\s यीशु नाम महायाजक
\p
\v 1 ईग जो मातगोळ नाव अनतेव आंदुर दा टु अदुर्दा सब से धोळ्द मात ईद आद कि नाम ईत्‍ता महायाजक आन, जो स्वर्ग मा महा महिमा अन्द सिंहासन इन ऊमा कय दी होगकु कुरतान, 
\v 2 अदिक पवित्र जागा दा मतलब खरा तम्बू दा यदरी परमेश्वर स्थापित माळ्यान ना कि मंळसा, आ जागा दा आव महायाजक क्याल्सा माळतान. 
\v 3 यतिकी हर ऊंद महायाजक भेंट अदिक बलिदान येरसोर साटी ठहरूस्कु आगतान, ईद कारण जरूरी आद कि ई याजक उन हात्‍ती भी येनारा येर्सली ईरूल. 
\v 4 अगर आव पृथ्वी मा ईरायदुन रा यागलु याजक ईला आगायदुन, यतिकी अल पयले टु अच हिंग याजक आर जो यहूदी व्यवस्था अन्द अनुसार भेंट येर्सतार. 
\v 5 जो याजकपन इन क्याल्सा आंदुर माळतार, अद स्वर्ग दा जो आद अदुर्द ऊंद सावली अदिक प्रतीकृती आद. ईद हांगा प्रकार आद याग मूसा पवित्र तम्बू उन निर्माण माळावाळा अच ईरोन आग परमेश्वर आऊन से अंदिदुन, “ध्यान दा ईरूल कि नी हर चीज बराबर अदा प्रतिरूप इन अनुसार माळ जो नीनी पहाळी मा तोर्सकु आगीत.” 
\v 6 लेकीन आ याजकगोळ से वाळुसकु स्यावा यीशु उक सिक्त यतिकी आव मात्त वळ्लीद-वळ्लीद वाचा अन मध्यस्थ ठहरूसदुन, जो मात्त वळ्लीद प्रतिग्यागोळ आसरा देल कटकु आग्याद.
\p
\v 7 यतिकी अगर अद पयला वाचा निर्दोष ईराईत, रा दुसरा वाचा साटी येनु जरवत ईला ईराईत. 
\v 8 लेकीन परमेश्वर उक आ लॉकुर दा दोष सिक्त अदिक आव अनतान, “प्रभु अनतान, नोळी, अव दिन बरताव कि ना इस्त्राएल इन लॉकुर सांगुळ, अदिक यहूदा अन्द लॉकुर सांगुळ व्हाशोद वाचा कटाईन. 
\v 9 ईद आ वाचा अन घाई ईरतीदील, जो ना आंदुर आप्प-दादागोळ सांगुळ आ समय कटकु आगीत, याग ना आंदुर्द कय हुळकु आंदरी मिस्त्र द्याश टु तेगुकु तंदीन; यतिकी आंदुर नान वाचा मा विश्वासयोग्य ईतीदील यदरी ना आंदुर सांगुळ कटीदिन, अदिक इदुरसाटी ना आंदुर मा ध्यान हचीदिल. 
\v 10 बाक प्रभु अनतान, कि जो वाचा ना आ दिनगोळ बाद्दा इस्त्राएल इन घराना अन सांगुळ कटाईन, अद ईद हुन कि ना तान व्यवस्था अक आंदुर मनगोळ दा हाकाईन, अदिक अदरी आंदुर दिलगोळ मा लिख्साईन, अदिक ना आंदुरव परमेश्वर ठहरूसाईन अदिक आंदुर नान लॉकुर ठहरूस्यार. 
\v 11 अदिक यावारा भी तान संगीगोळी अदिक मान्ना हात्‍तीवाळेर वार्टुर इक ईद शिक्षा कोळतीदील, कि नी प्रभु उक अरू, यतिकी स्याण हाती टु धोड्डेर ताका सप्पा नानी अर्त कोंडार. 
\v 12 ना आंदुर पापगोळी माफ माळाईन अदिक यागलु आंदुर पाप याद ईटतिदिल.” 
\v 13 ई वाचा अक व्हाशोद अंदकु आव पयला वाचा अक हाळोद माळ बुट्टुन अदिक जो हाळोद अदिक जीर्ण आगेगतद अद रा बाक राटनेरी गायब आगेदीत.
\c 9
\s पृथ्वी अदिक स्वर्ग इन आराधना
\p
\v 1 ईग नोळी आ पयला वाचा दा भी उपासना माळोद नियम ईरव, अदिक ऊंद उपासना अन्द जागा ईरोद जो मंळसा अन द्वारा माळकु आगीत. 
\v 2 ऊंद तम्बू माळकु ईरोद, यदुर्द पयला कमरा दा दिंग्या ईटोद जागा, अदिक मेज अदिक परमेश्वर उक भेंट माळव रोट्टीगोळ ईरव; अदिक आ जागा अक पवित्र जागा अंदकु आगतोगोद. 
\v 3 दुसरा परदा अन हिंद मात्‍त ऊंद कमरा ईरोद, यदरी परम पवित्र जागा अंदकु आगतोगोद. 
\v 4 ईऊर दा सुगन्धित धूपदानी इन साटी व्हान्ना अन वेदी, अदिक व्हान्ना देल मळुस्द वाचा अन्द संदुक ईरोद ई संदुक दा व्हान्ना अन्द माळ्द मन्ना अन्द ऊंद जार इरोद, अदिक हारून उन आ छळी ईरोद यदुर मा अंकुर बेळ्दीदव अदिक येढ्ढ कल्ल यदुर मा आग्यागोळ लिख्सकु ईरव. 
\v 5 संदुक इन म्याकुच परमेश्वर उन उपस्थिती इन प्रतिक मतलब करूब बन्सकु ईरव जो तान पिक्‍कागोळी फैलुसकु माफ अन जागा मा सावली माळतोगव. लेकीन ई समय नाव ईव मातगोळ्द विस्तार देल चर्चा माळ सकालेव. \fig सभागृह अन तम्बू उन बुळ्क इन भाग|alt="Interior of tabernacle" src="bk00278c.tif" size="span" copy="Horace Knowles ©" ref="९:२"\fig*
\p
\v 6 सप्पा येनारा संची आगदुर बाद्दा याजक पयला कमरा दा हर रोज प्रवेश माळकु तान स्यावा अन्द कार्य पुरा माळोर साटी होगतोगोर. 
\v 7 लेकीन परदा अन बुळ्क इन दुसरा कमरा दा सिर्फ प्रधान याजक अच साल दा ऊंद अनली प्रवेश माळतोगोन, आव बिना आ रक्ता अन यागलु प्रवेश ईला माळतोगोन यदरी आव तान द्वारा अदिक तान लॉकुर द्वारा अनजाना दा माळ्द पापगोळ साटी परमेश्वर उक भेंट येर्सतोगोन. 
\v 8 ईदुर द्वारा पवित्र आत्मा स्पष्ट रीति देल ईद कल्सतद कि यागासताका ताका पयला तम्बू निदुरकु आद आगासताका ताका परम पवित्र जागा अन्द हादी ईगासताका तेरकु ईला ईरोद. 
\v 9 ईद ऊंद तम्बू हुन जो वर्तमान समय इन साटी ऊंद उदाहरण आद; मतलब यदुर्दा उन ईत्‍ता भेंट अदिक बलिदान येर्सदुर बाद्दा भी आराधना माळावाळेर मन सिद्ध आग सकालव. 
\v 10 ईद रा सिर्फ तिनोद कुडोद अदिक अलग-अलग प्रकार इन सुद्धिकरणगोळ्द विधीगोळ हुव. अद तम्बु यदुर दा आव स्यावा माळतान अद यक्कुल वळ्लीद परिपुर्ण तम्बु हुन अद मंळसागोळ्द कय इन माळ्द तम्बु आल्लच अदिक अद ई संसार इन निर्मिती इन भाग आल्लच.
\p
\v 11 लेकीन जो मातगोळ पयले टु अच ईल आव हिंग वळ्लीद वस्तुगोळ्द याग मसीह पयले टु प्रधान याजक बन्सकु बंदान. रा आव मात्‍त यक्कुल धोळ्द अदिक सिद्ध तम्बू टु आगकु, जो मंळसा अन कय इंद बन्सकु ईला मतलब ई सृष्टी इन ईला, 
\v 12 अदिक व्हातगोळ अदिक वस्तागोळ रक्ता अन द्वारा ईला लेकीन तांद अच रक्ता अन द्वारा, मसीह ऊंद अच घन तम्बु दा टु आगतेला महापवित्र जागा दा प्रवेश माळदुन अदिक नाम साटी पापगोळ देल अनन्त छुटकारा प्राप्त माळदुन. 
\v 13 यतिकी याग व्हातगोळ अदिक वस्तागोळ्द रक्ता अदिक होद्द पाड्डगोळ्द राकळ इक विधी इन अनुसार अशुध्द लॉकुर मा छिळकुसदुर देल आंदुर शुद्ध आगेगतार अदिक विधी इन अनुसार आंदुर अशुध्दता व्हार्यागोळ्द रीति देल होटोगतद. 
\v 14 याग ईद सही आद रा मसीह अन रक्ता याट प्रभावशाली ईतीदाद, आव अनन्त आत्मा अन द्वारा तान तान इक ऊंद संपुर्ण बली इन रूप दा परमेश्वर उक समर्पित माळ बुट्टुन. रा आऊन रक्ता नाम चेतना अक आ कर्मगोळ देल कोळसुसित जो मृत्यु दी ओयतार कि नाव जित्‍ता परमेश्वर उन स्यावा माळ सक्‍केव.
\p
\v 15 ईदा कारण मसीह ऊंद व्हाशोद वाचा अन्द मध्यस्थ आदुन, ताकी यारी परमेश्वर उन द्वारा कारूकु आग्याद आंदुर परमेश्वर उन प्रतिग्या माळ्द अनन्त आशिषगोळ्द वारीस आग सकुल. ईग नोळी पयला वाचा अन हात्‍ती ता दा माळ्द पापगोळ से मुक्त माळोर साटी फिरोती इन रूप दा आव तान जीव कोट बुटान. 
\v 16 यल ताका वसीयत नामा अन सवाल आद रा अदुर साटी याव आऊक माळ्यान आऊन मृत्यु उक प्रमाणित माळोद जरूरी आद. 
\v 17 यतिकी यातोदारा भी वसीयत नामा सिर्फ आगा प्रभावित आगतद याग अदुर्द लिखसावाळा अन मृत्यु आगेगतद, यागासताका अदुर्द लिखसावाळा जित्‍ता ईरतान रा अदुर्द यागलु प्रभावित बिळाल. 
\v 18 इदुरसाटी पयला वाचा भी रक्ता अन्द इस्तेमाल द्वारा प्रभावित आत. 
\v 19 पयले मूसा याग व्यवस्था अन विधान इन सप्पा आदेशगोळी सप्पा लॉकुरी घोषणा माळ कोंडान रा आव नीर इन सांगुळ व्हातगोळ अदिक पाड्डगोळ्द रक्ता अक क्याचांद इन अदिक हिस्सप इन डगालगोळ देल व्यवस्था अन किताब अदिक सप्पा लॉकुर मा छिळकुस बुटीदुन. 
\v 20 अदिक आव अंदिदुन, “ईद आ वाचा अन रक्ता हुन, यदरी पालसोद आग्या परमेश्वर नीमी कोटान.” 
\v 21 अदिक ईदा रीति देल आव तम्बू अदिक उपासना माळोद सप्पा वस्तुगोळ मा रक्ता छिळकुसदुन. 
\v 22 वास्तव दा व्यवस्था अन अनुसार लगभग रक्ता द्वारा अच सप्पा वस्तुगोळ शुद्ध आगताव, अदिक बिना रक्ता वाहुस्द पापगोळी माफ हैलेच.
\s मसीह अन बलिदान द्वारा पाप-माफ
\p
\v 23 रा बाक ईद जरूरी आद कि अव वस्तुगोळ जो स्वर्ग इन प्रतिकृती आव अवरी जनावरगोळ्द बलिदानगोळ से शुद्ध माळकु आगुल लेकीन स्वर्ग टु वस्तुगोळ रा ईऊर से भी वळ्लीद बलिदानगोळ देल शुद्ध माळकु आगोद अपेक्षा माळतद. 
\v 24 यतिकी मसीह मंळसागोळ्द कय इन माळ्द पवित्र जागा दा, जो खरा पवित्र जागा अन नमुना आद, प्रवेश माळीदिल लेकीन स्वर्ग दा अच प्रवेश माळदुन, ताकी नाम दी टु परमेश्वर उन मुंद प्रगट आगुल. 
\v 25 ईद ईला कि आव तान तान इक घळी-घळी बली येर्सुल, ह्यांग कि महायाजक हर साल पशुगोळ रक्ता हुडुकु पवित्र जागा दा प्रवेश माळतान, 
\v 26 ईलारा दुनिया अन उत्पत्ति टु हुडुकु मसीह अक घळी-घळी दुख नेगोद बिळाईत; लेकीन ईग युग इन अन्त दा आव ऊंद अच घन सप्पा मुंदुर साटी प्रगट आग्यान, ताकी तांद अच बलिदान इन द्वारा पाप इक दुर माळ बुळुल. 
\v 27 अदिक ह्यांग मंळसागोळ साटी ऊंद घन सायोद अदिक अदुर बाद्दा परमेश्वर उन द्वारा न्याय इन आगोद तय आद, 
\v 28 हांग अच मसीह भी हापाळ मंळसागोळ्द पापगोळी नेगोर साटी ऊंद घन बलिदान आदुन; अदिक जो लॉकुर आऊन हादी कायतार आंदुर उद्धार इन साटी ईग आव दुसरा घन प्रगट आदान रा पापगोळी दुर माळोर साटी ईला बल्‍की जो आऊन हादी कायेतार आंदरी उद्धार कोळोर साटी.
\c 10
\p
\v 1 व्यवस्था रा बरावाळा वळ्लीद मातगोळ्द सिर्फ सावली हुन, लेकीन अद आ वास्तविक मातगोळ्द सप्पा अदिक वास्तविक मातगोळ्द दाखला ईला. इदुरसाटी अवा बलिगोळ द्वारा यवरी लगातार हर साल अनन्त रूप देल येर्सकु आगतद, आराधना अन साटी हात्‍ती बरावाळेर इक हमेशा साटी सम्पुर्ण सिद्ध माळकु आगसकाल. 
\v 2 अगर हिंग आग सकाईत रा येन अऊर्द येर्सकु आगोद बंद ईला आगेगाईत? यतिकी बाक रा उपासना माळावाळेर ऊंदा घन दा हमेशा साटी पवित्र आगेगायदुर अदिक तान पापगोळ साटी बाक यागलु तान इक दोषी ईला समसायदुर. 
\v 3 लेकीन हर साल येर्सद बलिगोळ मंळसागोळी आंदुर पाप याद तोर्सतद. 
\v 4 यतिकी वस्तागोळ अदिक व्हातगोळ्द रक्ता पापगोळी दुर माळुल, ईद संभव हैलेच.
\p
\v 5 इदुरसाटी याग मसीह दुनिया दा बंदीदुन रा आव अंदिदुन, “नीनी याऊ बलिदान अदिक भेंट चाहासीदिल, लेकीन नी नान साटी ऊंद शरीर तयार माळ्द.”
\p
\v 6 अग्नि-बलिगोळ्द अदिक पाप-बलिगोळ देल नी खुश आगीदील.
\p
\v 7 आग बाक ना अंदिदीन, अदिक ह्यांग व्यवस्था अन किताब दा भी लिख्सकु आद, “ना ईल आईन, हे परमेश्वर, नीन इच्छा पुरा माळोर साटी बंदीन.”
\p
\v 8 आव पयले अंदिदुन, “बलिगोळ अदिक भेंट, अग्नि-बलिगोळ्द अदिक पापबलीगोळ नी चाहसाल अदिक ना रा नी अऊर से खुश आगीद.” तरी भी व्यवस्था ईद चाहासतद कि अव येर्सकु आगुल. 
\v 9 बाक आव अंदिदुन, ना ईल आईन, नान नीन इच्छा पुरा माळोर साटी बंदीन, रा आव दुसरा व्यवस्था अक स्थापित माळोर साटी पयला रद्द माळ बुळतान. 
\v 10 परमेश्वर उन इच्छा देल नाव यीशु मसीह अन शरीर इन पयला अच घन बलिदान येर्सकु आगदुर द्वारा पवित्र माळकु आदेव. \fig वेदी मा बलिदान|alt="Burnt offering on an altar" src="hk00256c.tif" size="col" copy="Horace Knowles ©" ref="१०:१०"\fig*
\p
\v 11 हर ऊंद याजक हर रोज नीदुरकु तान न्याय इन कर्तव्यगोळी पुरा माळतान, अदिक ऊंद अच प्रकार इन बलिदान इक जो पापगोळी यागलु दुर माळ सकालव घळी-घळी येर्सतान. 
\v 12 लेकीन मसीह रा याजक उन रूप दा पापगोळ साटी, हमेशा साटी ऊंदा बलिदान येर्सकु परमेश्वर उन ऊम्मा कय दी होगकु कुरतुन, 
\v 13 अदिक अदा समय टु तान विरोधीगोळी परमेश्वर उन द्वारा कालगोळ्द पांळसी माळकु आगोद हादी कायेत्यान. 
\v 14 यतिकी आव ऊंद अच चढ़ावा अन द्वारा आंदरी जो पवित्र माळकु आगतार, हमेशा साटी पुरा सिद्ध माळ कोंडान.
\p
\v 15 अदिक पवित्र आत्मा भी नामी ईदा गवाही कोळतद; यतिकी अद पयले अनतद.
\p
\v 16 “प्रभु अनतान कि जो वाचा ना आ दिनगोळ बाद्दा आंदुर से कटाईन अद ईद हुन कि ना तान नियमगोळी आंदुर दिलगोळ मा मंळसाईन अदिक ना आंदुर मनगोळ मा लिख्साईन.”
\p
\v 17 बाक आव ईद अनतान, “ना आंदुर पापगोळी अदिक आंदुर अन्याय इन क्याल्सागोळी बाक यागलु याद माळतीदील.” 
\v 18 अगर ईंदुर्द पापगोळ्द माफ आगेग्याद, रा यातोदु बली इन येनु जरवत अच हैलेच.
\s बरी नाव परमेश्वर उन हात्‍ती होगाता
\p
\v 19 इदुरसाटी हे वार्टुरा अदिक आकतींगेरा, यतिकी यीशु उन रक्ता अन द्वारा आ परम पवित्र जागा दा प्रवेश माळोद निडर आत्मविश्वास आद, 
\v 20 यारी आव परदा अन द्वारा, मतलब आऊन खुद इन शरीर इन द्वारा ऊंद व्हाशोद अदिक जित्‍ता हादी इन माध्यम नाम साटी तेर्द बुटान. 
\v 21 अदिक नाम हात्‍ती हिंग महान याजक आन, जो परमेश्वर उन मान्ना अन अधिकारी आन, 
\v 22 रा बरी, नाव खरा मन अदिक पुरा विश्वास इन सांगुळ, अदिक नामी मन इन दोष इन भावनागोळी शुद्ध माळोर साटी अदिक दिल मा रक्ता छिळकुसकु, अदिक शरीर इक शुद्ध नीर देल तोळकु परमेश्वर उन हात्‍ती होदेव. 
\v 23 बरी नाव तान आशा अन अंगीकार इक मजबूती देल हुडुकु ईत्‍तेव, यतिकी याव प्रतिग्या माळ्यान, आव विश्वासयोग्य आन; 
\v 24 अदिक बरी नाव ध्यान ईटाता कि नाव प्यार अदिक वळ्लीद क्याल्सागोळ्द प्रती आबुर दाबुर इक ह्यांग मदत माळ सकतेव, 
\v 25 अदिक ऊंद सांगुळ सभागोळ दा बरोद तान ई आदतगोळी बिळबाळी, ह्यांग कि थ्वाळासा लॉकुरी अल ईला बरोद आदत बिदोग्याद, लेकीन आबुर दाबुरी मात्‍त यक्कुल प्रोत्साहित माळतेला ईरी; ह्यांग कि नीव नोळेतीर प्रभु उन दिन हात्‍ती बरेत्याद.
\p
\v 26 यतिकी सत्य अन पयचान हासिल माळदुर बाद्दा अगर नाव जान बुझुस्कु पाप माळतेला ईत्‍तेव, रा पापगोळ साटी बाक यातोदु दुसरा बलिदान मिक्‍कु हैलेच. 
\v 27 उलटा बाक रा बरावाळा न्याय अदिक भीषण बेक्‍की इन अंज्क इन सांगुळ हादी कायोद अच सिर्फ मिक्‍कु ईरतद जो परमेश्वर उन विरोधीगोळी भसम माळ कोंडीत. 
\v 28 जो यावारा मूसा अन व्यवस्था अन पालन माळालुन, आऊन मा बिना दया माळ्द येढ्ढ या मुर मुंदुर गवाहगोळ्द गवाही मान्सकु कोंदकु आगतद, 
\v 29 रा विचार माळकोमी कि आव याट मात्त भारी दण्ड इन लायक ठहरूस्यान, याव परमेश्वर उन पार उक काल देल मेटदुन अदिक वाचा अन रक्ता अक, यदुर द्वारा आव पवित्र ठहरूस्कु आगीदुन, अपवित्र जान्सदुन, अदिक अनुग्रह अन आत्मा अन अपमान माळदुन. 
\v 30 यतिकी नाव आऊक अरूतेव, याव अंदिदुन, “बदला ताकोमोद नान क्याल्सा आद, ना अच बदला ताकोमाईन.” अदिक बाक आव ईद भी अनतान, कि “प्रभु तान लॉकुर्द न्याय माळ्यान.” 
\v 31 जित्‍ता परमेश्वर उन कय दा बिळोद भयानक मात आद.
\p
\v 32 लेकीन आ हिंदळोव दिनगोळी याद माळी, यदुर दा नीव परमेश्वर उन ऊजुळ हासिल माळकु, अदिक अदुर बाद्दा याग नीव मयनतगोळ्द सामना माळतेला कठोर संघर्ष दा मजबूती इन सांगुळ बन्सकु ईत्‍तीर. 
\v 33 आग यागल्यारा रा सप्पा लॉकुर मुंद नीमी अपमानीत अदिक सतुसकु आत अदिक यागल्यारा यार सांगुळ हिंग बर्ताव माळकु आगतोगोद, नीव आंदुर साथ कोट्टीर. 
\v 34 यतिकी नीव कैदीगोळ दुख दा भी सहभागी आदीर, अदिक तान संपत्‍ती भी खुशी देल लुटुस गोट्टीर; ईद जान्सकु कि नीम हात्‍ती ऊंद मात्‍त वळ्लीद अदिक हमेशा ठहरूसावाळा संपत्‍ती आद. जो हमेशा साटी बन्सकु ईरतद. 
\v 35 इदुरसाटी तान निडर आत्मविश्वास बिळबाळी यतिकी अदुर्द प्रतिफल धोळ्द आद. 
\v 36 यतिकी नीमी धीरज ताकोमोद जरूरी आद, ताकी परमेश्वर उन इच्छा अक पुरा माळ सकीर अदिक जो प्रतिग्या माळकु आग्याद अदरी हासिल माळीर. 
\v 37 “यतिकी ह्यांग शास्त्र अनतद, हापाळ जल्दी जो बरावाळा आन आव बंदान आव बिलकुल समय हचतिदील. 
\v 38 नान सच्चाई देल नळावाळेर लॉकुर विश्वास देल जित्‍ता ईत्‍तार; अदिक अगर आंदुर दा टु यावारा हिंद हटस्यान रा ना आऊन से खुश ईरतीदील.”
\p
\v 39 लेकीन नाव आंदुर दा टु हैलेच जो हिंद हट्सतार अदिक नाश आगेगतार उलटा आंदुर दा टु आयेव जो विश्वास माळतार अदिक ऊळ्सकु आगतार.
\c 11
\s विश्वास
\p
\v 1 विश्वास इन मतलब आद यार्द आशा हचकु ईटतेव आऊन साटी निश्चित आगोद, अदिक यातोदारा वस्तु उक नाव चाहे नोळालेव अदुर अस्तित्व अन बारा दा निश्चित आगोद अच विश्वास हुन. 
\v 2 ईदा कारण स्याणा लॉकुर काल इन लॉकुरी आंदुर विश्वास इन द्वारा परमेश्वर उन सहमती हासिल आगित.
\p
\v 3 \x + \xo ११:३ \xo*\xt यूहन्ना १:३\xt*\x*विश्वास देल अच नाव जान्स कोमतेव कि पुरा दुनिया अन्द रचना परमेश्वर उन शब्द अन द्वारा आग्याद. इदुरसाटी जो माळ्द मातगोळ दृश्य आव, अव दृश्य देल अच बनसीदील.
\p
\v 4 विश्वास इन द्वारा अच हाबील परमेश्वर उक कैन से वळ्लीद बलिदान येर्सीदुन, अदिक आऊन विश्वास इन द्वारा अच सच्चाई देल नळावाळा मंळसा आगोद सहमती परमेश्वर से हासिल माळदुन; यतिकी परमेश्वर खुद अच आऊन दानगोळी सहमती कोट्टुन. ईदुर मतलब हाबिल विश्वास इन कारण अच ईंद भी माताळतान, याग कि आव सोतोग्यान.
\p
\v 5 विश्वास देल अच हनोक नेगुकु आदुन कि मृत्यु उक नोळबाळुल, अदिक आऊक याऊ ढुंढ्स सकिदील यतिकी परमेश्वर आऊक म्याकुच नेगु कोंडीदुन, शास्त्र अनतद कि हनोक उन म्याकुच नेगा से पयले आव परमेश्वर उक प्रसन्न माळीदुन. 
\v 6 अदिक विश्वास बिना परमेश्वर उक खुश माळोद असंभव आद; यतिकी जो परमेश्वर उन हात्‍ती बरतान आऊक विश्वास माळ पाहीजे यतिकी परमेश्वर उन अस्तित्व आद अदिक आंदरी प्रतिफल कोळतान जो आऊक ढुंढ्सतार.
\p
\v 7 विश्वास इन कारण देल अच नूह अक याग परमेश्वर उन द्वारा अव भविष्य अन मातगोळ्द बारा दा चेतावनी कोटकु आगित जो आव नोळीदुन भी ईला, रा आव पवित्र अंज्क पुर्वक तान परिवार इक ऊळसोर साटी ऊंद ड्वांगा अन निर्माण माळीदुन. परिणाम स्वरूप आऊन विश्वास इन द्वारा अच आव दुनिया अक दोषी ठहरूसदुन; अदिक विश्वास इन द्वारा परमेश्वर से बरावाळा न्यायीपन इक हासिल माळदुन.
\p
\v 8 विश्वास देल अच अब्राहम उक याग परमेश्वर कारदुन रा आग्या मान्सकु ईत्‍ता जागा दा होटोदुन यदुर्द परमेश्वर प्रतिग्या माळीदुन; अदिक आव ईला जानसोन कि आव यल होगेत्यान, तरी भी तान द्याश बिट बुट्टुन. 
\v 9 विश्वास इन कारण अच प्रतिग्या माळ्द धरती मा आव ऊंद अनजाना परदेशी घाई तान मान्ना माळकु निवास माळदुन. आव तम्बूगोळ दा हांगा ईत्‍तुन ह्यांग इसहाक अदिक याकूब ईतिदुर जो आऊन सांगुळ परमेश्वर उन अदा प्रतिग्या अन उत्‍तराधिकारी ईरोर. 
\v 10 अब्राहम आ नगर इन हादी कायोन, यदरी परमेश्वर आकार कोटकु माळदुन अदिक हमेशा मजबूत ईरावाळा पायवा हाकदुन.
\p
\v 11 विश्वास इन कारण अच अब्राहम जो हापाळ बाट्ट आगेगिदुन अदिक सारा जो खुद वांझला ईरोर, लेकीन आक परमेश्वर मा विश्वास माळदुर कि आव आकिन प्रतिग्या पुरा माळतान अदिक अब्राहम आप्प बन्सेदुन. 
\v 12 ईद कारण अब्राहम देल अच, जो सोत्‍तुर घाई ईरोन, आकाश ईनव तारागोळ अदिक समुद्र अन धुळा घाई अनगिनत वंशज पैदा आदुर.
\p
\v 13 विश्वास इक तान मन दा हुडुकु ई सप्पा लॉकुर सोतोदुर; याता वस्तुगोळ्द परमेश्वर प्रतिग्या माळीदुन आंदुर ई वस्तुगोळ हासिल माळीदिल, आंदुर बस अवरी दुर टु ना नोळदुर अदिक अऊर्द स्वागत माळदुर अदिक आंदुर ईद खुला हिसाब देल मान्स कोंडुर कि आंदुर ई धरती मा परदेशी अदिक अनजाना आर. 
\v 14 आ लॉकुर जो ईत्‍ता मातगोळ अनतार, आंदुर ईद तोर्सतार कि आंदुर ऊंद ईत्‍ता द्याश इन खोज दा आर जो आंदुर्द खुद इन आद. 
\v 15 जो द्याश आंदुर बिटार अदुर बारा दा आ लॉकुर विचार माळतेला ईरालुर, अगर विचार माळतेला ईरायदुर रा आंदरी मात्‍त वापस बरोद मौका ईराइत. 
\v 16 लेकीन आंदुर ऊंद वळ्लीद मतलब स्वर्गीय द्याश इन अभिलाषी आर; इदुरसाटी परमेश्वर आंदुर परमेश्वर कहलुसली सरमुसालुन, यतिकी आव आंदुर साटी ऊंद नगर तयार माळ्यान.
\p
\v 17 विश्वास इन कारण अच अब्राहम, याग परमेश्वर आऊन परीक्षा ताकोमोन, तान पार इसहाक उक बलिदान इन रूप दा भेंट कोट्टुन; अब्राहम आव ईरोन यार से परमेश्वर प्रतिग्या माळीदुन तरी भी आव तान ऊंद ठैसा पार उक बली येरसोर साटी तयार ईरोन. 
\v 18 रा इदुरसाटी परमेश्वर आऊन से अंदिदुन, “इसहाक उन द्वारा अच नीन वंश वाळुसित.” 
\v 19 अब्राहम विचार माळीदुन परमेश्वर इसहाक उक सोत्‍तुर दा टु भी जित्‍ता माळ सकतान, अदिक हांग नोळकु आगुल रा ऊंद प्रकार देल अब्राहम इसहाक उक मृत्यु दा टु मात्‍त वापस नोळदुन.
\p
\v 20 विश्वास देल अच इसहाक याकूब अदिक एसाव उक आंदुर भविष्य अन बारा दा आशीष कोट्टुन.
\p
\v 21 विश्वास देल अच याकूब साया होती यूसुफ उन येढ्ढु पारगोळ दा टु ऊंद ऊंद पार उक आशीष कोट्टुन, अदिक तान कोल इन सहारा ताकोमकु परमेश्वर उन आराधना माळदुन.
\p
\v 22 विश्वास देल अच यूसुफ, याग आव सायदुर मा ईरोन, रा इस्त्राएलगोळी मिस्त्र टु होटकु होगोद बारा दा माताळीदुन, अदिक तान अस्थीगोळ सांगुळ येन माळ पाहीजे अदुर निर्देश हेळीदुन.
\p
\v 23 विश्वास देल अच मूसा अन मोय आप्प आऊक पैदा आगदुर बाद्दा मुर तिंगुळ ताका होचकोमकु ईटदुर; यतिकी आंदुर नोळदुर, कि चिग्द सुंदर आद, अदिक आंदुर राजा अन्द आग्या मुरदुर देल अंजीदिल.
\p
\v 24 विश्वास देल अच मूसा धोड्डेव आगकु फिरौन उन पोर इन पार अंदकु आगली इनकार आदुन. 
\v 25 इदुरसाटी कि आऊक पाप दा थ्वाळासा दिन इन सुख भोगस्दुर देल परमेश्वर उन लॉकुर सांगुळ दुख भोगसोद यक्कुल वळ्लीद हत्‍त. 
\v 26 अदिक मसीह अन कारण निन्दीत आगली मिस्त्र अन भंडार देल धोळ्द धन सम्सदुन: यतिकी आऊन कण्ण भविष्य अन प्रतिफल हासिल माळदुर दी हतकु ईरव.
\p
\v 27 विश्वास देल अच राजा अन सिट्ट देल बिना अंजकु मूसा मिस्त्र अक बिट बुट्टुन, यतिकी मान्सी कि आऊक अदृश्य परमेश्वर कांळसोन. 
\v 28 विश्वास देल अच आव फसह अन हाब्बा अदिक कवाळ मा रक्ता छिळकुसोद पालन माळदुन, कि मृत्यु उन दूत इस्त्राएलीगोळ्द पैदा आग्द पयला औलादगोळी कोंद सकबाळुल.
\p
\v 29 विश्वास देल अच इस्त्राएली लॉकुर क्याचांद समुद्र अन आप्पाटी हिंग ईळदुर, ह्यांग कि वंळगींद जागा मा टु; अदिक याग मिस्त्रीगोळ हांग अच माळोद चाहासदुर, रा सप्पा नीर दा मुळकेदुर.
\p
\v 30 विश्वास देल अच यरीहो अन दिवार, याग येळ दिन ताका अदुर्द परिक्रमा इस्त्राएलीगोळ माळदुर रा अद बिदोत. 
\v 31 विश्वास देल अच राहाब वेश्या आग्या ईला मान्सावाळेर सांगुळ कोन्सुसकु आगीदील; यतिकी आक इस्त्राएली गुप्तचरगोळ संगीपना पुर्ण स्वागत माळीदुर.
\p
\v 32 ईग ना मात्‍त येन अनाईन? यतिकी समय ईतीदील, कि गिदोन, बाराक अदिक शिमशोन, यिफताह, दाऊद शमूएल अदिक भविष्यवक्तागोळ्द वर्णन माळाईन. 
\v 33 इंदुर विश्वास इन द्वारा अच राज्य जीक्स कोंडुर; जो सही अवा क्याल्सा माळदुर; अदिक परमेश्वर प्रतिग्यागोळ कोट्टुन अवरी हासिल माळदुर, आंदुर हुल्लीगोळव बाय बंद माळ बुट्टुर. 
\v 34 बेक्‍की इन लपटागोळी शांत माळदुर; तलवार इन धार देल उळ्दकु होट्टुर, निर्बलता दा ताकतवर आदुर; लळाई दा वीर होट्टुर; परदेशीगोळ फौजगोळ मा विजय हासिल माळदुर.
\p
\v 35 विश्वास इन द्वारा आर्तेर तान सोतकु रिश्तेदारगोळी मात्‍त जित्‍ता नोळदुर; यास रा सतुसतेला कोन्सुसकु आदुर; अदिक छुटकारा चाहासीदिल; इदुरसाटी आंदुर कि वळ्लीद जीवन इन पुनरूत्थान हासिल माळ सकुल. 
\v 36 हापाळ मुंदुर मज्याक हार्सकु आत; अदिक क्वाळागोळ्द सामना माळकु आत याग कि थ्वाळासा मुंदुरी संकलीगोळ देल कटकु बंदीगृह दा हाक्‍कु आत. 
\v 37 आंदुर मा पथराव माळकु आदव, आंदरी आरी देल सिळकु येढ्ढ भाग माळकु आदव, आंदरी तलवार देल मौत इन घाट ईळ्सकु आत. आंदुर गरीब ईरोर आंदरी यातनागोळ कोटकु आदव अदिक आंदुर सांगुळ बुरा व्यवहार माळकु आत. मर्री म्यांडागोळ तोगुल हाक्‍कु ईत्‍त आत्‍त भटकुसतेला ईत्‍तुर. 
\v 38 अदिक मरूस्थल, पहाळीगोळ, गुफागोळ दा अदिक धरती इन फुटगोळ दा वयाळदुर, ई दुनिया आंदुर लायक ईला ईरोद.
\p
\v 39 विश्वास देल अच आंदुर्द वळ्लीद लेखा जोखा ईटकु आत, तरी भी परमेश्वर उन प्रतिग्या माळ्द मातगोळ आंदरी सकिदील. 
\v 40 यतिकी परमेश्वर नाम साटी पयले टु ऊंद वळ्लीद योजना ठहरूसीदुन, आऊन उद्देश ईद ईरोद कि आंदरी भी नाम सांगुळ अच संपुर्ण सिद्ध माळकु आगुल.
\c 12
\s परमेश्वर नाम आप्प
\p
\v 1 यल ताका नाव गवाहगोळ्द हिंग धोळ्द बादल देल घेरस्कु आयेव, रा बाक बरी, हर ऊंद बादा हाकावाळा वस्तु उक अदिक आ पाप इक जो आसानी देल नामी ऊलझुस बुळतद अदरी भीट बुटेव, अदिक बरी, अद दवळ जो नामी ओळोद आद अदरी धिरज इन सांगुळ ओळेव, 
\v 2 अदिक नाम विश्वास इन कर्ता अदिक सिद्ध माळावाळा यीशु उन दी तान कण्णगोळी हचकु ईत्‍तेव. याव तान मुंद उपस्थित खुशी इन साटी क्रूस इन यातनागोळ झेल्सदुन, अदुर शरम इन येनु चिन्ता माळीदिल अदिक परमेश्वर उन सिंहासन इन ऊमा कय दी विराजमान आगेदुन.
\p
\v 3 इदुरसाटी आऊन मा ध्यान माळी, याव तान विरोध दा पापीगोळ्द ईट विरोध सहन माळदुन कि नीव निराश आगकु साहस बिट बुळतिदिल. 
\v 4 नीव लॉकुरी पाप इन विरोध दा संघर्ष माळतेला ईट सहन माळोद बिदिदील कि नीम रक्ता वाहुसिदाद; 
\v 5 येन नीव आ प्रोत्साहन इन शब्दगोळी, यारी परमेश्वर तान चिकोर सम्सकु नीम से अंदुन, येन नीव मारतोगीर? “हे नान पारा, याग परमेश्वर नीनी सुधरूस्यान आग ध्यान हच, अदिक याग आव नीन ताळना माळ्यान रा हताश आगबाळ. 
\v 6 यतिकी प्रभु यार से प्यार माळतान, आऊक सुधरूस्तान भी, अदिक यारी पार माळ कोमतान, आऊक दण्ड भी कोळतान.”
\p
\v 7 नीव दुख इक ताळना सम्सकु सहन माळकोमी; परमेश्वर नीमी पार जान्सकु नीम सांगुळ बर्ताव माळतान. हिंग याता पार हुन जो आप्प उन द्वारा सजा भोगसालुन? 
\v 8 अगर अद ताळना यदुर भागी सप्पा आगतार, नीम्द आगीदील रा नीव आऊन चिकोर आल्लच, लेकीन नीव घटिया मंळसा आईर. 
\v 9 बाक याग कि नाम शारीरिक आप्प भी नाम ताळना माळतोगोर अदिक नाव आंदुर्द आदर माळदेव, रा येन नाव आत्मिक आप्प उन यक्कुल हात्‍ती आगकु जीवन ईला बीतुसेव. 
\v 10 नाम शारीरिक आप्पगोळ थ्वाळासा समय इन साटी ह्यांग आंदुर वळ्लीद सम्सदुर नामी ताळना माळदुर, लेकीन परमेश्वर नाम भलाई इन साटी ताळना माळतान यदुर देल नाव आऊन पवित्रता अन सहभागी आग सक्केव. 
\v 11 वर्तमान दा हर ऊंद प्रकार इन ताळना आनन्द इन ईला, लेकीन अद दुखद हततद; तरी भी जो अदरी सहन माळ-माळकु पक्‍का आगेग्यार, बाद्दा आंदरी न्यायीपन इन जीवन अदिक शांती इन प्रतिफल हासिल आगतद.
\s उपदेश अदिक चेतावनी
\p
\v 12 इदुरसाटी थक्स कयगोळी नेगी अदिक निर्बल ट्वांगरागोळी मजबूत माळी, 
\v 13 अदिक तान कालगोळ साटी सीधा हादी माळी कि लंगळा भटकुस बाळुल लेकीन भला चंगा आगेगुल.
\p
\v 14 सप्पा मुंदुर सांगुळ शांती इन सांगुळ ईरली अदिक पवित्र जीवन जीऊसोर साटी हर प्रकार देल प्रयत्नशील ईरी, यतिकी इदुर बिना यावारा भी प्रभु उक नोळ सकतीदिल. 
\v 15 तान तान इन सावधानी माळी, ताकी यावारा परमेश्वर उन अनुग्रह देल हींद होगबाळुल. अदिक यावारा भी केय खांदी घाई वाळुस बाळुल, यतिकी आदुर जहर देल यातोदारा झगळा उत्पन्न आग ईला पाहीजे. 
\v 16 यावारा भी अनैतिक अदिक अन्यायी या एसाव उन घाई आगबाळुल याव ऊंद घन इन भोजन इन बदला तान धोळ पार आगोद अधिकार मार बुट्टुन. 
\v 17 अदुर बाद्दा नीव जान्सतीर कि याग आव तान आप्प उन से आशीष ताकोमोद चाहासदुन रा अयोग्य आळुकु आदुन, अदिक वर्ल-वर्लकु आव आशीष ताकोमोद कोशिश माळदुन तरी भी आऊक आऊन पाप इन मन तिर्गुसोद मौका सिकिदील.
\p
\v 18 नीव बेक्‍की देल होद्द आ सिनाय पहाळी इन हात्‍ती बंदीदिल, यदरी महसुस माळकु आग सकोद अदिक ना रा अंधार अदिक ना रा उदासीनता अदिक बवंडर इन हात्‍ती बंदीर ह्यांग इस्त्राएली लॉकुर बंदीदुर. 
\v 19 अदिक तुरही इन आवाज, अदिक माताळावाळेर्द ईत्‍ता शब्द अन हात्‍ती बंदीदिल, यार केळावाळेर विनती माळदुर कि ईग नाम से मात्‍त मातगोळ माळकु आगबाळुल. 
\v 20 यतिकी आंदुर आ आग्या अक सहन माळ सकिदील: “अगर यातोदारा प्राणी भी पहाळ इक मुट्टीत रा अदुर मा कल्लगोळ भिटकु आगुल.” 
\v 21 अदिक अद नजारा हिंग भयानक ईरोद कि मूसा अंदुन, “ना हापाळ अंजक्या देल अदिक नळ्गेतीन.”
\p
\v 22 लेकीन नीव सिय्योन इन पहाळी, जित्‍ता परमेश्वर उन नगर, अदिक स्वर्गीय यरूशलेम अदिक हजार स्वर्गदूतगोळ आनन्द पुर्ण सभा दा होट बंदीर. 
\v 23 नीव परमेश्वर से पयले पैदा आग्द यार हेसुर स्वर्ग दा लिख्सकु आव आंदुर सभा दा पोहचुसेगीर. नीव आ परमेश्वर उन हात्‍ती बंदीर जो सप्पा लॉकुर न्याय माळतान कि न्यायी लॉकुर्द आत्मागोळ सिद्ध आगुल. 
\v 24 अदिक ऊंद व्हाशोद वाचा अन मध्यस्थ यीशु अदिक छिळकाव इन आ रक्ता अन हात्‍ती होट बंदीर, जो हाबील उन रक्ता अन अपेक्षा वळ्लीद वस्तुगोळ्द प्रतिग्या माळतान.
\p
\v 25 सावधान ईरी, अदिक आ अनावाळा से बाय तिर्गुसबाळी, यतिकी आ लॉकुर याग पृथ्वी माकळव चेतावनी कोळावाळा से नकार माळकु ऊळु सकिदील, रा नाव स्वर्ग मा टु चेतावनी कोळावाळा से बाय वाकळा माळकु ह्यांग ऊळु सक्केव? 
\v 26 आ समय रा आऊन शब्द पृथ्वी इक आलगाळ्स कोम्त, लेकीन ईग आव ईद प्रतिग्या माळ्यान, “ऊंद घन बाक ना सिर्फ पृथ्वी इक बल्‍की आकाश इक भी आलगाळ्सकु ईट बुळाईन.” 
\v 27 ईव शब्द “ऊंद घन मात्‍त” आ हर वस्तु दी प्रगट माळतद कि जो मातगोळ निर्मित माळकु आग्याव अव आलगाळ्सकु आदव अदिक अस्थिर ईत्‍ताव कि जो मातगोळ आलगाळ्सकु आगालव अव स्थिर ईरूल.
\p
\v 28 इदुरसाटी बाक याग नामी हिंग राज्य सिकेत्याद यदरी आलगाळ्सकु आगाल रा बरी धन्यवादी बनसाती अदिक आदर मिलुस्कु अंज्क इन सांगुळ परमेश्वर उन उपासना माळेव कि परमेश्वर अदुर देल प्रसन्न आगुल; 
\v 29 यतिकी नाम परमेश्वर भसम माळावाळा बेक्‍की हुन.
\c 13
\s परमेश्वर उक ह्यांग प्रसन्न माळेव
\p
\v 1 आबुर दाबुर दा विश्वासी वार्टुर्द प्यार बन्सकु ईरूल. 
\v 2 अनजाना लॉकुर्द तान मान्या सत्कार माळोद मारूबाळी, यतिकी हिंग माळतेला अच थ्वाळासा लॉकुर अनजाना दा स्वर्गदूतगोळ्द स्वागत माळदुर. 
\v 3 कैदीगोळ्द इत्‍ता सुधी ताकोमी, कि मान्सी आंदुर सांगुळ नीव भी कैद आईर; अदिक यार सांगुळ बुरा बर्ताव माळकु आगतद, आंदुर्द ईत्‍ता प्रकार सुधी ताकोमी, मान्सी नीव भी पिळीत आगेतीर.
\p
\v 4 मदा सब दा आदर इन मात सम्सकु आगुल, अदिक गांड-हिंग्स आबुर दाबुर सांगुळ विश्वासयोग्य ईरूल, यतिकी परमेश्वर अनैतिक अदिक व्यभिचारीगोळ्द न्याय माळ्यान.
\p
\v 5 \f + \fr १३:५ \fr*\ft व्यवस्थाविवरण ३१:६ \ft*\f*नीम स्वभाव धन से प्यार माळोद ईरबाळुल, अदिक जो नीम हात्‍ती आद, अदुर दा संतुष्ट ईरी यतिकी परमेश्वर अंदान ना नीनी यागलु बिळतीदील, अदिक यागलु मारूतीदिल. 
\v 6 इदुरसाटी नाव बेधळक आगकु अनतेव, कि प्रभु, नान सहायक आन; ना अंजालीन; मंळसा नान येन माळ सकतान.
\p
\v 7 जो नीमोर अगुवागोळ ईरोर, अदिक यार नीमी परमेश्वर उन वचन केळस्यार, आंदरी याद ईटी; अदिक ध्यान देल आंदुर्द चाल चलन इन अन्त नोळकु आंदुर्द विश्वास इन अनुकरण माळी. 
\v 8 यीशु मसीह नीन अदिक ईंद अदिक युगानुयुग ऊंदा घाई आन. 
\v 9 हर प्रकार इन अपरिचित शिक्षागोळ देल भरमुसकु आगबाळी. नाम मन इन साटी ईद वळ्लीद आद कि आंदुर अनुग्रह अन द्वारा मजबूत बनसुल ना कि तिनोद कुडोद संबंध दा नियमगोळी मान्सदुर देल, यदुर देल आंदुर यागलु भला आगीदील यार अवरी मान्सदुर.
\p
\v 10 नाम्द ऊंद हिंग वेदी आद यदुर मा टु तिनोद अधिकार आ याजकगोळी हैलेच, जो तम्बू दा स्यावा माळतार. 
\v 11 यतिकी याता पशुगोळ रक्ता महायाजक पाप-बली इन साटी महापवित्र जागा दा ओयतान, अदिक आ जनावरगोळ शरीर आ तम्बूगोळ्द छावनी इन व्हार्या होताक्कु आगताव. 
\v 12 ईदा कारण, यीशु भी नगर इन व्हार्या सोत्‍तुन ताकी लॉकुर पापगोळ देल आऊन रक्ता अन द्वारा शुद्ध आग सकुल. 
\v 13 रा बाक बरी, आऊन हात्‍ती छावनी इन व्हार्या होगाता, अदिक आऊन अपमान दा सहभागी आगाता. 
\v 14 यतिकी ईल पृथ्वी मा नाम येनु स्थाई नगर हैलेच, बल्‍की नाव ऊंद बरावाळा नगर इन हादी कायेतेव. 
\v 15 नळी नाव यीशु उन द्वारा परमेश्वर उक स्तुतिरूपी बलिदान अर्पण माळाता जो आ टुटगोळ्द काय हुन यार आऊन हेसुर इक अरतार. 
\v 16 भलाई माळोद अदिक आबुर दाबुर सहायता माळोद मारूबाळी, यतिकी परमेश्वर हिंगा बलिदानगोळ देल खुश आगतान.
\p
\v 17 तान अगुवागोळ्द आग्या मान्सी अदिक आंदुर आदेशगोळ मा नळी. आंदुर नीम मा बिना आराम माळ्द हिंग सावधानी ईटतार ह्यांग मान्सी आंदरी तान क्याल्सागोळ्द लेखा जोखा परमेश्वर उक कोळोद आद; अगर नीव आंदुर आग्या मानसीर रा आनन्द इन सांगुळ तान क्याल्सा माळ्यार, अगर मान्सतीदील रा आंदुर दुख इन सांगुळ तान क्याल्सा माळ्यार अदिक अद नीम साटी मदतगार साबित आगतीदील.
\p
\v 18 नाम साटी प्रार्थना माळतेला ईरी, यतिकी नामी भरोसा आद कि नाम विवेक शुद्ध आद: अदिक नाव सप्पा मातगोळ दा वळ्लीद चाल नळोद चाहसतेव. 
\v 19 ना नीम से आग्रह माळतीन कि नीव प्रार्थना माळतोगी ताकी राटनेरी ना नीम हाती बर सकाईन.
\s आखरी प्रार्थना
\p
\v 20 याव म्यांडागोळ घाई आ महान चरवाहा नाम प्रभु यीशु उन रक्ता अन द्वारा आ सनातन वाचा मा मोहर हचकु सोत्‍तुर दा टु जित्‍ता माळदुन आव शांती इन दाता परमेश्वर, 
\v 21 नीमी सप्पा वळ्लीद साधनगोळ देल संपन्न माळुल, यदुर देल नीव आऊन इच्छा पुरा माळ सकीर, अदिक यीशु मसीह अन द्वारा आव नाम बुळ्क आ सप्पा मातगोळी सक्रिय माळुल जो आऊक वळ्लीद हततद. मसीह अन महिमा युगानुयुग आगतेला ईरूल. आमीन.
\s आखरी शब्द
\p
\v 22 हे वार्टुरा अदिक आकतींगेरा, ना नीम से आग्रह माळतीन कि ईद प्रोत्साहन इन संदेश इक धीरज इन सांगुळ केळी, यतिकी ई चिट्टी जो ना नीमी लिख्सीन यक्कुल धोळ्द हैलेच. 
\v 23 ना चाहासतीन कि नीमी ईद पता नळुल नाम वार्ट तीमुथियुस कैद दा टु बिटकु आग्यान. अदिक अगर आव राटनेरी बंदुन रा ना आऊन सांगुळ नीम से मुलाकात माळली बराईन.
\p
\v 24 तान सप्पा अगुवागोळी अदिक सप्पा परमेश्वर उन लॉकुरी नमस्कार अनेतीर. इटलीवाळेर विश्वासी लॉकुर नीमी नमस्कार अनतार.
\p
\v 25 नीम सप्पा मुंदुर मा परमेश्वर उन अनुग्रह आगतेला ईरूल. आमीन.