\id GAL - Holiya
\ide UTF-8
\h गलातिगोळ
\toc3 गलातिगोळ
\toc2 गलातिगोळ
\toc1 गलातिगोळ हेसुर पौलुस प्रेरित उन चिट्ठी
\mt2 गलातियों के नाम पौलुस प्रेरित की पत्री
\mt1 गलातिगोळ हेसुर पौलुस प्रेरित उन चिट्ठी
\imt परिचय
\ip गलातिया अन्द ईद चिट्ठी प्रेरित पौलुस लिख्सदुन \xt १:१\xt* ईद अद चिट्ठी हुन जो पौलुस गलातिया अन्द मंडली इक मसीह अन जनम इन बाद्दा ४८-५७ साल इन बीच दा लिख्सदुन, गलातिया आ लॉकुर उर जो गलातिया हेसुर इन रोमी प्रांत दा ईरतोगोर. ग्यानी लॉकुरी ईद चिट्ठी सही रूप देल मालूम हैलेच, याग आव ईद चिट्ठी लिख्सदुन आग आव यल ईरोन. मान्सकु आगतद कि आव इफिसिगोळ कुरिन्थि नगर दा ईतकु ईद किताब लिख्सीदान.
\ip आ यहूदी अदिक गैरयहूदी मसीह लॉकुर्द हेसुर जो गलातिया दाकळोर मंडली इन सभासद ईरोर आंदुर हेसुर देल ईद चिट्ठी लिख्सदुन. मसीहगोळी यहूदी नियमगोळ्द विशेष रूप देल खतना अन पालन माळ पायजे ईद अनावाळेर ख्वाटा शिक्षकगोळ्द सामना माळोर साटी पौलुस विशेष रूप देल ईद चिट्ठी लिख्सदुन. ईद मसीहगोळ दा हिंग समुह ईरोद यदरी जूळाइज़र अंदकु आगोद इंदुर मान्सतोगोर कि गैरयहूदी मसीहगोळ्द खतना माळोद जरूरी आद, आंदुर पौलुस उन प्रेरितपन इन अधिकार मा प्रश्न चिन्ह हाकदुर. पौलुस आंदुर्द थ्वाळासा जीवन कात्‍ता अन थ्वाळासा भाग हेळकु तान प्रेरितपन इन पुष्टी माळदुन. \xt १:११–२:१४\xt* ईद स्पष्ट माळतेला कि मुक्ति सिर्फ यीशु मसीह मा विश्वास माळदुर देल अच सिकतद, आव खुशखबरी इन पुष्टी माळदुन. \xt २:१६\xt* मुक्ति परमेश्वर उन प्यार इन फल हुन अद लॉकुर्द कर्मकांड इन फल आल्लच.
\iot रूप-रेखा
\io1 १. गलातिया अन मंडली इक नमस्कार अंदकु पौलुस ईद चिट्ठी इन सुरूवात माळतान. \ior १:१-५\ior*
\io1 २. तान शिक्षा कोळोद अधिकार इन पुष्टी माळोर साटी पौलुस तान जीवन इन थ्वाळासा पार्श्वभुमी स्पष्ट माळतान आव ईद हेळोर साटी कि आव नियम शास्त्र अन अनुसार ईरोद ईद जीवन इन कोशिश माळदुन, लेकीन आव येनु सफलता हासिल माळीदिल. \ior १:६–२:२१\ior*
\io1 ३. इदुर बाद्दा नियम अदिक कृपा नामी मुक्ति कोळोर साटी येन भुमिका निभुसताव ईद आव स्पष्ट माळतान. \ior ३–४\ior*
\io1 ४. वळ्लीद मसीह जीवन इन साटी आव थ्वाळासा साधारण सुचना कोळतान. \ior ५:१–६:१०\ior*
\io1 ५. पौलुस आखरी दा आखरी विनती माळतान कि परमेश्वर उन द्वारा व्हाशोद मंळसा बनसोद ईद खतना घाई व्हार्यागोळ्द रीति देल हापाळ महत्वपुर्ण आद इदरी याद ईटी अदिक नमस्कार माळकु आव ई चिट्ठी इक खतम माळतान. \ior ६:११-१८\ior*
\c 1
\p
\v 1 पौलुस उन दी टु यारी प्रेरित निवळुस्कु आत जो ना मंळसागोळ दी टु अदिक ना मंळसा अन द्वारा, उलटा यीशु मसीह अदिक परमेश्वर आप्प उन द्वारा, याव आऊक सोत्‍तुर दा टु जित्‍ता माळदुन, प्रेरित हुन 
\v 2 अदिक सप्पा विश्वासी वार्टुर दी टु जो नान सांगुळ आर, गलातिया अन मंडलीगोळी शुभकामनागोळ कळदुर दा शामिल आर:
\p
\v 3 नाम परमेश्वर आप्प अदिक प्रभु यीशु मसीह अन दी टु नीमी अनुग्रह अदिक शांती कोळतेला ईरूल. 
\v 4 प्रभु यीशु मसीह तान तान इक नाम पापगोळ साटी कोट बुट्टुन, ताकी नाम परमेश्वर अदिक आप्प उन इच्छा अन अनुसार नामी ई वर्तमान बुरा युग देल बिळसुसुल. 
\v 5 परमेश्वर उन स्तुति अदिक महिमा हमेशा आगतेला ईरूल. आमीन.
\s यातोदु दुसरा खुशखबरी हैलेच
\p
\v 6 नानी आश्चर्य आगतद कि याव नीमी मसीह अन अनुग्रह देल कार्सदुन आऊन से नीव ईट जल्दी तिर्गकु दुसरा अच प्रकार इन खुशखबरी इन दी झुक्सली हतदीर. 
\v 7 लेकीन अद दुसरा खुशखबरी इच हैलेच: लेकीन मात ईद आद कि यास हिंग आर जो नीमी उलझन दा हाक्‍क बुळतार, अदिक मसीह अन खुशखबरी इक बिगळुसोद चाहासतार. 
\v 8 लेकीन अगर नाव, या स्वर्ग टु यावारा स्वर्गदूत भी खुशखबरी इक बिटकु जो नाव नीमी प्रचार माळकु केळसेव, यावारा अलग खुशखबरी नीमी प्रचार माळकु केळसुल, जो आ खुशखबरी टु अलग आद, रा आंदुर शापित आदार. 
\v 9 ह्यांग नाव पयले अंद कोंडेव, हांग अच ना ईग मात्‍त अनतीन कि आ खुशखबरी इक बिटकु यदरी नीव ग्रहण माळीर, अगर यावारा मात्‍त खुशखबरी केळ्सतान, रा शापित आगुल.
\p
\v 10 ईग ना येन मंळसागोळी मान्सतीन या परमेश्वर उक? येन ना मंळसागोळी समझुसोद चाहासतीन? अगर ना ईगासताका मंळसागोळी इच समझुसतेला ईरायदीन रा मसीह अन दास ईला आगायदीन.
\s पौलुस ह्यांग प्रेरित बन्सदुन
\p
\v 11 हे वार्टुरा अदिक आकतींगेरा, ना नीमी हेळ बुळतीन कि जो खुशखबरी ना केळ्सदीन, अद मंळसागोळ्द आल्लच. 
\v 12 यतिकी अद नानी मंळसा अन दी टु पोहचुसीदील, अदिक ना नानी केळ्सकु आत, लेकीन यीशु मसीह अन प्रकाशन देल सिक्त. 
\v 13 \x + \xo १:१३ \xo*\xt प्रेरितगोळ ८:३; २२:४,५; २६:९-११\xt*\x*यहूदी मत दा जो पयले नांद चाल चलन ईरोद अदुर्द बारा दा नीव केळ कोंडीर कि ना परमेश्वर उन मंडली इक हापाळ अच सतुसीन अदिक नाश माळ तोगीन. 
\v 14 \x + \xo १:१४ \xo*\xt प्रेरितगोळ २२:३\xt*\x*तान हापाळ सा जातीवाळेर से जो नान अवस्था अन ईरोर, यहूदी मत दा यक्कुल वाळुसतेला होगतोगोद अदिक तान आप्प दादागोळ परंपरागोळ साटी हापाळ अच उत्साही ईरीन. 
\v 15 \x + \xo १:१५ \xo*\xt प्रेरितगोळ ९:३-६; २२:६-१०; २६:१३-१८\xt*\x*लेकीन परमेश्वर उन, याव नान मोय इन गर्भ टु अच नानी ठहरूसदुन अदिक तान अनुग्रह देल कार्स बुट्टुन, 
\v 16 याग इच्छा आत कि नान दा तान पार उक प्रगट माळुल कि ना गैरयहूदीगोळ दा आऊन खुशखबरी केळसाईन, रा ना मास अदिक रक्ता देल सलाह ताकोंडीन, 
\v 17 अदिक ना यरूशलेम इक आंदुर हाती होदीन जो नान से पयले प्रेरित ईरोर, लेकीन अरब इक ओळेदीन अदिक बाक अल टु दमिश्क इक वापस बंदीन.
\p
\v 18 \x + \xo १:१८ \xo*\xt प्रेरितगोळ ९:२६-३०\xt*\x*बाक मुर वर्ष इन बाद्दा ना कैफा टु मुलाकात माळोर साटी यरूशलेम होदीन, अदिक आऊन हाती पंदरा दिन ताका ईत्‍तीन. 
\v 19 लेकीन प्रभु उन वार्ट याकूब उक बिटकु अदिक प्रेरितगोळ दा टु यारूकु नोळीदील. 
\v 20 जो मातगोळ ना नीमी लिख्सतीन, नोळी, परमेश्वर उक उपस्थित जान्सकु अनतीन कि अव ख्वाटा हैलेच. 
\v 21 इदुर बाद्दा ना सीरिया अदिक किलिकिया अन ऊरगोळ दा बंदीन. 
\v 22 लेकीन यहूदिया अन मंडलीगोळ जो मसीह दा ईरोर, नान बाय यागलु ईला नोळीदुर; 
\v 23 लेकीन ईदा केळतोगोर कि जो नामी पयले सतुस तोगोन, आव ईग अदा विश्वास इन खुशखबरी केळ्सतान यारी पयले नाश माळतोगोन. 
\v 24 अदिक आंदुर नान बारा दा परमेश्वर उन महिमा माळतोगोर.
\c 2
\s अन्य प्रेरितगोळ द्वारा पौलुस उक मान्यता
\p
\v 1 \x + \xo २:१ \xo*\xt प्रेरितगोळ ११:३०; १५:२\xt*\x*चौदा वर्ष इन बाद्दा ना बरनबास उन सांगुळ मात्‍त यरूशलेम इक होदीन, अदिक तीतुस उक भी सांगुळ ओतीन. 
\v 2 नान होगोद ईश्वरीय प्रकाशन इन अनुसार आत; अदिक जो खुशखबरी ना गैरयहूदीगोळ दा प्रचार माळतीन, अदरी ना आंदरी हेळ बुटीन, लेकीन आबना दा आंदरी जो धोड्डेर सम्सकु आगोर, ताकी हिंग आगबाळुल कि नान ई समय इन या पिछला दवळ धूप बेकार ठहरूसुल. 
\v 3 लेकीन तीतुस उक भी जो नान सांगुळ ईरोन अदिक गैरयहूदी आन, खतना माळसुसोर साटी मजबुर माळकु आगीदील. 
\v 4 ईद आ ख्वाटा वार्टुर कारण आत जो चोरी देल बंदीदुर, कि आ स्वतंत्रता अन जो मसीह यीशु दा नामी सिक्याद, भेद ताकोमकु नाम मा नियंत्रण हासिल माळुल. 
\v 5 ऊंद घळीतीम आंदुर्द हात्‍ती आगोद नाव मान्सीदील, इदुरसाटी कि खुशखबरी इन उपज नीम दा बन्सकु ईरूल. 
\v 6 बाक जो लॉकुर येनारा सम्सकु आगोर आंदुर चाहे ह्यांग भी ईतीदार नानी इदुर से येनु लेना-देना हैलेच; परमेश्वर यारदु पक्षपात माळालुन आंदुर से जो येनारा सम्सकु आगोर, नानी येनु भी प्राप्त आगीदील. 
\v 7 लेकीन इदुर विपरीत याग आंदुर विश्वास इक नोळदुर कि ह्यांग यहूदी लॉकुर साटी खुशखबरी इन क्याल्सा पतरस उक कोटकु आत, हांग अच गैरयहूदीगोळ साटी नानी खुशखबरी केळसोद कोटकु आत. 
\v 8 यतिकी याव पतरस से खतना माळ्द लॉकुर दा प्रेरिताई इन क्याल्सा बळा प्रभाव सहित माळसुसदुन, आवा नान से भी गैरयहूदीगोळ दा प्रभावशाली क्याल्सा माळसुसदुन, 
\v 9 अदिक याग आंदुर आ अनुग्रह अक जो नानी सिक्‍कीत जान्स कोंडुर, रा याकूब, अदिक कैफा, अदिक यूहन्ना जो मंडली इन खंबा सम्सकु आगोर, नानी अदिक बरनबास उक संगती इन ऊमा कय कोट्टुर कि नाव गैरयहूदीगोळ हात्‍ती होदेव अदिक आंदुर खतना माळ्द लॉकुर हात्‍ती; 
\v 10 सिर्फ ईद अंदुर कि नाव कंगालगोळ्द सुधी ताकोंडेव, अदिक ईदा क्याल्सा अक माळोद ना खुद भी कोशिश माळीन.
\s पौलुस द्वारा पतरस उन विरोध
\p
\v 11 लेकीन याग कैफा अन्ताकिया दा बंदुन, रा ना आऊन बाय मा आऊन सामना माळदीन, यतिकी आव दोषी ठहरूसीदुन. 
\v 12 इदुरसाटी कि याकूब उन दी टु येनारा लॉकुर बरोर से पयले आव गैरयहूदीगोळ सांगुळ तिनतोगोन, लेकीन याग आंदुर बंदुर रा खतना माळ्द लॉकुर अंज्क इन कारण आव हिंद सरकुसेदुन अदिक किनारा माळली कुरतुन. 
\v 13 आऊन सांगुळ जमा यहूदीगोळ भी कपट माळदुर, ईल ताका कि बरनबास भी आंदुर कपट दा बिदोदुन. 
\v 14 लेकीन याग ना नोळदीन कि आंदुर खुशखबरी इन सच्चाई मा सीधा चाल नळालुर, रा ना सप्पा मुंदुर मुंद कैफा से अंदीन, “याग नी यहूदी आगकु गैरयहूदीगोळ घाई नळुत्या अदिक यहूदीगोळ घाई ईलारा नी गैरयहूदीगोळी यहूदीगोळ घाई नळुली येती अनत्या?”
\s विश्वास द्वारा न्यायी ठहरूसोद
\p
\v 15 नाव रा जनम टु यहूदी हुयेव, अदिक पापी गैरयहूदीगोळ दा टु हैलेच. 
\v 16 \x + \xo २:१६ \xo*\xt रोमियों ३:२०; \xt*\xt रोमियों ३:२२\xt*\x*तरी ईद जान्सकु कि मंळसा व्यवस्था अन क्याल्सागोळ देल ईला, लेकीन सिर्फ यीशु मसीह मा विश्वास माळोद द्वारा न्यायी ठहरूसतान, नाव खुद भी मसीह यीशु मा विश्वास माळदेव कि नाव व्यवस्था अन क्याल्सागोळ देल ईला, लेकीन मसीह मा विश्वास माळदुर देल न्यायी ठहरूसदेव; इदुरसाटी कि व्यवस्था अन क्याल्सागोळ देल यातोदु प्राणी न्यायी ठहरूसतीदील. 
\v 17 नाव जो मसीह दा न्यायी ठहरूसोद चाहासतेव, अगर खुद अच पापी होट्टेव रा येन मसीह पाप इन सेवक आन? यागलु ईला! 
\v 18 यतिकी जो येनारा ना केळ्द बुटीन अगर अदरी मात्‍त माळतीन, रा तान तान इक अपराधी ठहरूसतीन. 
\v 19 ना रा व्यवस्था अन द्वारा व्यवस्था अन साटी सोतोदीन कि परमेश्वर मसीह अन्द साटी जित्‍ता ईराइन. 
\v 20 ना मसीह अन सांगुळ क्रूस मा येर्सकु आगीन, ईग ना जित्‍ता ईतीदील, लेकीन मसीह नान दा जित्‍ता आन; अदिक ना मय दा ईग जो जित्‍ता आईन रा सिर्फ आ विश्वास देल जित्‍ता आईन जो परमेश्वर उन पार उन मा आद, याव नान से प्यार माळदुन अदिक नान साटी तान तान इक कोट बुट्टुन. 
\v 21 ना परमेश्वर उन अनुग्रह अक बेकार ठहरूसालीन; यतिकी अगर व्यवस्था अन द्वारा न्यायीपन आगाईत, रा मसीह अन सायोद बेकार आगाईत.
\c 3
\s व्यवस्था या विश्वास
\p
\v 1 हे निर्बुद्धी गलातिगोळा, याव नीमी मोहीत माळ कोंडान? नीम रा मान्सी कण्णगोळ मुंद यीशु मसीह क्रूस मा येर्सकु आदुन! 
\v 2 ना नीम से सिर्फ ईद जानसोद चाहासतीन कि नीमी आत्मा, येन व्यवस्था अन क्याल्सागोळ देल या विश्वास इन समाचार देल सिक्त? 
\v 3 येन नीव हिंग निर्बुद्धी आईर कि आत्मा अन रीति मा सुरूवात माळकु ईग मय इन रीति मा अन्त माळीर? 
\v 4 येन नीव ईट दुख बेकार अच नेगदीर? लेकीन यागलु बेकार हैलेच. 
\v 5 जो नीमी आत्मा दान माळतान अदिक नीम दा सामर्थ्य नव क्याल्सा माळतान, आव येन व्यवस्था अन क्याल्सागोळ देल या खुशखबरी मा विश्वास देल हिंग माळतान?
\p
\v 6 \x + \xo ३:६ \xo*\xt रोमियों ४:३\xt*\x*“अब्राहम रा परमेश्वर मा विश्वास माळदुन अदिक ईद आऊन साटी न्यायीपन आळुकु आत.” 
\v 7 \x + \xo ३:७ \xo*\xt रोमियों ४:१६\xt*\x*इदुरसाटी ईद जान्स कोमी कि जो विश्वास माळावाळेर आर, आंदुर अच अब्राहम उन औलाद उर. 
\v 8 अदिक पवित्रशास्त्र पयले टु अच ईद जान्सकु कि परमेश्वर गैरयहूदीगोळी विश्वास देल न्यायी ठहरूस्यान, पयले टु अच अब्राहम उक ईद खुशखबरी केळ्स बुट्टुन कि “नीन दा सप्पा जातीगोळी आशीष सिक्‍कीत.” 
\v 9 इदुरसाटी जो विश्वास माळावाळेर आर, आंदरी अब्राहम उन सांगुळ आशीष सिक्‍कीत.
\p
\v 10 इदुरसाटी यास लॉकुर व्यवस्था अन क्याल्सागोळ मा भरोसा ईटतार, आंदुर सप्पा श्राप इन हात्‍ती आर, यतिकी शास्त्र दा लिख्सकु आद, “जो यावारा व्यवस्था अन किताब दा लिख्सकु सप्पा मातगोळ माळदुर दा स्थिर ईरालुन, आव श्रापित आन.” 
\v 11 लेकीन ईद मात प्रगट आद कि व्यवस्था अन द्वारा परमेश्वर उन ईल याऊ न्यायी ठहरूसालुन, यतिकी न्यायी जन विश्वास देल जित्‍ता ईत्‍तान. 
\v 12 लेकीन व्यवस्था अन विश्वास देल येनु संबंध हैलेच; यतिकी “जो अवरी मानस्यान, आव अऊर कारण जित्‍ता ईत्‍तान.” 
\v 13 मसीह जो नाम साटी श्रापित बन्सदुन, नामी कोंडकु व्यवस्था अन श्राप देल बिळ्सुसदुन, यतिकी शास्त्र दा लिख्सकु आद, “जो यावारा क्रूस मा लटकुसकु आगतान आव श्रापित आन.” 
\v 14 ईद इदुरसाटी आत कि अब्राहम उन आशीष मसीह यीशु दा गैरयहूदीगोळ ताका पोहचुसुल, अदिक नाव विश्वास इन द्वारा आ आत्मा अक प्राप्त माळेव यदुर्द वादा आग्याद.
\s व्यवस्था अदिक वाचा
\p
\v 15 हे वार्टुरा अदिक आकतींगेरा, ना मंळसा अन रीति मा अनतीन; मंळसा अन वाचा जो पक्‍का आगेगतद, रा ना यावारा अदरी टाल्सतान अदिक ना अदुर्दा येनारा वाळुस्तान. 
\v 16 इदुरसाटी वादागोळ अब्राहम उक अदिक आऊन वंश इक कोटकु आग्याव. आव ईद अनालुन, “वंशगोळी,” ह्यांग हापाळ मुंदुर बारा दा अंदुन; लेकीन ह्यांग ऊंद इन बारा दा कि “नीन वंश इक” अदिक आव मसीह हुन. 
\v 17 लेकीन ना ईद अनतीन: जो वाचा परमेश्वर पयले टु पक्‍का माळीदुन, अदरी व्यवस्था नाक सौ तीस वर्ष इन बाद्दा बंदकु टाल्स सकाल्द कि वादा बेकार ठहरूसुल. 
\v 18 \x + \xo ३:१८ \xo*\xt रोमियों ४:१४\xt*\x*यतिकी अगर मीरास व्यवस्था देल सिक्याद रा बाक वादा देल ईला, लेकीन परमेश्वर अब्राहम उक वादा अन द्वारा कोट बुटान.
\p
\v 19 आग बाक व्यवस्था येती कोटकु आत? अद रा अपराधगोळ कारण बाद्दा कोटकु आत कि आ वंश इन बरासताका ईरूल, यारी वादा कोटकु आगीत; अदिक आव स्वर्गदूतगोळ द्वारा ऊंद मध्यस्थ अन कय दा ठहरूसकु आत. 
\v 20 मध्यस्थ रा ऊंद इन आगाल्द, लेकीन परमेश्वर ऊंद अच आन.
\s व्यवस्था अन उद्देश
\p
\v 21 रा येन व्यवस्था परमेश्वर उन वादागोळ विरोध दा आद? यागलु ईला! यतिकी अगर हिंग व्यवस्था कोटकु आगाईत जो जीवन कोळ सकाईत, रा खराखुरा न्यायीपन व्यवस्था देल ईराईत. 
\v 22 लेकीन पवित्रशास्त्र सप्पा मुंदरी पाप इन हात्‍ती माळ बुळ्त, ताकी अद वादा यदुर्द आधार यीशु मसीह मा विश्वास माळोद आद, विश्वास माळावाळेर साटी पुरा आगेगुल.
\p
\v 23 लेकीन विश्वास इन बरोर से पयले व्यवस्था अन हात्‍ती ता दा नाम रखवाली आगतोगोद, अदिक आ विश्वास इन बरासताका जो प्रगट आगावाळा ईरोद, नाव अदुर्दा बंधन दा ईत्‍तेव. 
\v 24 इदुरसाटी व्यवस्था मसीह ताका पोहचुसोर साटी नाम गुरु आग्याद कि नाव विश्वास देल न्यायी ठहरुसेव. 
\v 25 लेकीन याग विश्वास होट्ट बत्‍त, रा ईग नाव गुरु उन हात्‍ती ईतीदील. 
\v 26 यतिकी नीव सप्पा आ विश्वास इन द्वारा जो मसीह यीशु मा आद, परमेश्वर उन औलाद हुईर. 
\v 27 अदिक नीम दा टु यास मुंदुर मसीह दा बपतिस्मा ताकोंडार आंदुर मसीह अक हाक्‍क कोंडार. 
\v 28 ईग ना यावारा यहूदी ईत्‍तुन अदिक ना यावारा गैरयहूदी, ना यावारा दास ना यावारा स्वतंत्र, ना यावारा नर ना नारी, यतिकी नीव सप्पा यीशु मसीह दा ऊंद आईर. 
\v 29 \x + \xo ३:२९ \xo*\xt रोमियों ४:१३\xt*\x*अदिक अगर नीव मसीह अन आईर रा अब्राहम उन वंश अदिक वादा अन अनुसार वारीस भी हुईर.
\c 4
\p
\v 1 ना ईद अनतीन कि वारीस यागासताका चिग्द आन, बल्‍की सप्पा वस्तुगोळ्द स्वामी आन, तरी आऊन दा अदिक दास दा यातोदु भेद हैलेच. 
\v 2 लेकीन आप्प उन ठहरूस्द समय ताका संरक्षकगोळ अदिक मुनीमगोळ वश दा ईरतान. 
\v 3 हांग अच नाव भी, याग चिकोर ईरव, रा दुनिया अन पयले टु शिक्षा अन वश दा आगकु दास बन्सकु ईरव. 
\v 4 लेकीन याग समय पुरा आत, रा परमेश्वर तान पार उक कळुदुन जो आर्त देल पैदा आदुन, अदिक व्यवस्था अन हात्‍ती पैदा आदुन, 
\v 5 \x + \xo ४:५ \xo*\xt रोमियों ८:१५-१७\xt*\x*ताकी व्यवस्था अन हात्‍ती गोळी कोंडकु बिळ्स कोमुल, अदिक नामी पार आगोद हक्क सिकुल. 
\v 6 अदिक नीव जो पार हुईर, इदुरसाटी परमेश्वर तान पार उन आत्मा अक, जो “हे अब्बा, हे आप्प” अनकु कारूतान, नाम दिलगोळ दा कळ्यान. 
\v 7 इदुरसाटी नी ईग दास हैलेच, लेकीन पार हुय; अदिक याग पार आद, रा परमेश्वर उन द्वारा वारीस भी आद.
\s गलतीगोळ बारा दा पौलुस उन चिन्ता
\p
\v 8 पयले रा नीव परमेश्वर उक ईला जान्सकु आंदुर दास ईरोर जो स्वभाव देल परमेश्वर हैलेच, 
\v 9 लेकीन ईग जो नीव परमेश्वर उक अर्त कोंडीर बल्‍की परमेश्वर नीमी अरतुन, रा आ निर्बल अदिक निकम्मा पयले टु शिक्षा अन मातगोळ दी येती तिर्गतीर, यार्द नीव दुबारा दास आगोद चाहासतीर? 
\v 10 नीव दिनगोळ अदिक तिंगुळगोळ अदिक नियत समयगोळ अदिक वर्षगोळी मान्सतीर. 
\v 11 ना नीम बारा दा अंजतीन, येल्यारा हिंग आगबाळुल कि जो मेहनत ना नीम साटी माळदीन अद बेकार ठहरूसुल.
\p
\v 12 हे वार्टुरा अदिक आकतींगेरा, ना नीम से विनती माळतीन, नीव नान घाई आगेगी; यतिकी ना भी नीम घाई आगेगीन; नीव नांद येनु बिगळुसीदील. 
\v 13 लेकीन नीव जान्सतीर कि पयले पयले ना मय इन निर्बलता अन कारण नीमी खुशखबरी केळ्सदीन. 
\v 14 अदिक नीव नान शारीरिक दशा अक जो नीम परीक्षा अन कारण ईरोद, तुच्छ जान्सीदील; ना अदुर देल घृणा माळदीन; अदिक परमेश्वर उन स्वर्गदूत बल्‍की खुद यीशु मसीह अन घाई नानी ग्रहण माळदुन. 
\v 15 रा अद नीम खुशी मानसोद येल होत? ना नीम गवाह हुईन कि अगर आग सकाईत रा नीव तान कण्णगोळी भी तेगुकु नानी कोट्ट बुळायदीर. 
\v 16 रा येन नीम से सही माताळोद कारण ना नीम दुश्मन बनसेगीन? 
\v 17 आंदुर नीमी संगी माळोद रा चाहासतार, लेकीन भला उद्देश देल ईला; बल्‍की नीमी ब्यार्र माळोद चाहासतार कि नीव आंदरी का संगी माळकोमी. 
\v 18 लेकीन ईद भी वळ्लीद आद कि भला मात दा हर समय संगी माळोद कोशिश माळकु आगुल, ना सिर्फ अदा समय याग ना नीम सांगुळ ईरतीन. 
\v 19 हे नान चिकोरा, यागासताका नीम दा मसीह अन रूप बनसेगाल्द, आगासताका ना नीम साटी बाक चिग्द हाळाहोती जो दुख आगतद अद दुख नेगुतीन. 
\v 20 इच्छा रा ईद आगतद कि ईग नीम हाती बंदकु दुसरा अच प्रकार देल माताळाईन, यतिकी नीम बारा दा ना उलझन दा आईन.
\s पुरा अदिक हाजिरा अन उदाहरण
\p
\v 21 नीव जो व्यवस्था अन हात्‍ती आगोद चाहासतीर, नानी हेळी, येन नीव व्यवस्था अन केळालीर? 
\v 22 शास्त्र दा ईद लिख्सकु आद कि अब्राहम उन येढ्ढ पारगोळ आदुर; ऊंद दासी देल अदिक ऊंद स्वतंत्र आर्त देल. 
\v 23 लेकीन जो दासी देल आदुन, आव शारीरिक रीति देल पैदा आदुन; अदिक जो स्वतंत्र आर्त देल आदुन, आव वादा अन अनुसार पैदा आदुन. 
\v 24 ई मातगोळ दा उदाहरण आद: ई आर्तेर मान्सी येढ्ढ वाचागोळ आर, ऊंद रा सीनै पहाळ इन यदुर देल दास अच पैदा आगतार; अदिक आक हाजिरा हुळ. 
\v 25 अदिक हाजिरा मान्सी अरब इन सीनै पहाळ हुळ, अदिक आधुनिक यरूशलेम आकिन बराबर आद, यतिकी आक तान चिकोर समेत दासत्व दा आर. 
\v 26 लेकीन म्याकुच इन यरूशलेम स्वतंत्र आद, अदिक अद नाम मोय हुन. 
\v 27 यतिकी शास्त्र दा लिख्सकु आद,
\q2 “हे वांझला, नी जो पैदा माळाल खुशी माळ;
\q1 नी यारी दुख नेगाल, कुतक्या खोल्सकु जय जयकार माळ;
\q2 यतिकी त्याग्सद मंळसा अन्द औलाद सुहागीन इन औलाद देल भी यक्कुल आद.”
\p
\v 28 हे वार्टुरा अदिक आकतींगेरा, नाव इसहाक इन घाई वादा अन औलाद हुयेव. 
\v 29 अदिक ह्यांग आ समय मय इन अनुसार पैदा आग्द आत्मा अन अनुसार पैदा आग्द उक सतुसोद, हांग अच ईग भी आगतद. 
\v 30 लेकीन पवित्रशास्त्र येन अनतद? “दासी अदिक आकिन पार उक तेगु बुळ, यतिकी दासी अन पार स्वतंत्र आर्त इन पार उन सांगुळ उत्‍तराधिकारी आगतीदील.” 
\v 31 इदुरसाटी हे वार्टुरा अदिक आकतींगेरा, नाव दासी नोर ईला लेकीन स्वतंत्र आर्त इनोर औलाद हुयेव.
\c 5
\s स्वतंत्रता अक सुरक्षित ईटी
\p
\v 1 मसीह स्वतंत्रता अन साटी नामी स्वतंत्र माळ्यान; इदुरसाटी इदुर्दा अच स्थिर ईरी, अदिक दासत्व अन जुआ दा मात्‍त बिळबाळी. 
\v 2 नोळी, ना पौलुस नीम से अनतीन कि अगर खतना माळसुसीर, रा मसीह देल नीमी येनु लाभ आगतीदील. 
\v 3 तरी भी ना हर ऊंद खतना माळसुसावाळा अक विनती माळतीन कि आऊक सप्पा व्यवस्था मानसोद बिद्दीत. 
\v 4 नीव जो व्यवस्था अन द्वारा न्यायी ठहरूसोद चाहासतीर, मसीह देल अलग अदिक अनुग्रह देल बिदोगीर. 
\v 5 यतिकी आत्मा अन कारण नाव विश्वास देल, आशा माळ्द न्यायीपन इन हादी कायतेव. 
\v 6 मसीह यीशु दा ना खतना अदिक ना खतनारहित येनारा क्याल्सा अन आद, लेकीन सिर्फ विश्वास, जो प्यार इन द्वारा प्रभाव हाकत्या. 
\v 7 नीव रा भला भाति हरीर. ईग याव नीमी रोक्स बुटुन कि सच्चाई इन भरोसा माळबाळी. 
\v 8 हिंग सीख नीम कारावाळा अन दी टु हैलेच. 
\v 9 \x + \xo ५:९ \xo*\xt १ कुरिन्थि ५:६\xt*\x*थ्वाळासा खमीर सप्पा काल्सद हीट इक खमीर माळ बुळतद. 
\v 10 ना प्रभु मा नीम बारा दा भरोसा ईटतीन कि नीम यातोदारा दुसरा विचार ईरतीदील; लेकीन जो नीमी घबरूस बुळतान, आव यावारा येती आगबाळुल फैसला आदीत. 
\v 11 लेकीन हे वार्टुरा अदिक आकतींगेरा, अगर ना ईगासताका खतना अन प्रचार माळतीन, रा येती ईगासताका सतुस्कु आगतीन? बाक रा क्रूस इन ठोकर होगतेला ईत्‍त. 
\v 12 भला आगाईत कि जो नीमी डावाडोल माळतार, आंदुर तान मय अच कोद बुळायदुर.
\p
\v 13 हे वार्टुरा अदिक आकतींगेरा, नीव स्वतंत्र आगोर साटी कार्सकु आगीर; लेकीन हिंग आगबाळुल कि ईद स्वतंत्रता शारीरिक क्याल्सागोळ साटी मवका बनसुल, बल्‍की प्यार देल आबुर दाबुर दास बन्सी. 
\v 14 यतिकी सप्पा व्यवस्था ई ऊंद अच मात दा पुरा आगेगतद, “नी तान हातळोर से तान घाई प्यार ईट.” 
\v 15 लेकीन अगर नीव आबुर दाबुर इक हल्ल देल कचतीर अदिक हरूकु तिनतीर, रा सावधान ईरी कि आबुर दाबुर सत्यानाश ना माळबुळी.
\s पवित्र आत्मा द्वारा संचालन
\p
\v 16 लेकीन ना अनतीन, आत्मा अन अनुसार नळदीर रा नीव मय इन लालसा यातोदारा रीति देल पुरा माळतीदील. 
\v 17 \x + \xo ५:१७ \xo*\xt रोमियों ७:१५-२३\xt*\x*यतिकी मय आत्मा अन विरोध दा अदिक आत्मा मय इन विरोध दा लालसा माळतद, अदिक ईव आबुर दाबुर विरोधी आव, इदुरसाटी कि जो नीव माळोद चाहासतीर अद माळ सकबाळी. 
\v 18 अदिक अगर नीव आत्मा अन नळ्सदुर देल नळुतीर रा व्यवस्था अन हात्‍ती ईतीदील. 
\v 19 मय इन क्याल्सा रा प्रगट आव, मतलब व्यभिचार, खराब क्याल्सा, लुचपन, 
\v 20 मूर्तिपूजा, जादु टोना, दुश्मनी, झगळा, जलन, सिट्ट, विरोध, फूट, स्वार्थीपन, 
\v 21 जलन, मतवालापन, अवैध संबंध, अदिक ईऊर घाई मात्‍त दुसरा क्याल्सा आव, ईऊर बारा दा ना नीम से पयले टु अच अंद बुळतीन ह्यांग पयले अंद भी कोंडीन, कि ईत्‍ता क्याल्सा माळावाळेर परमेश्वर उन राज्य अन वारीस आगतीदील. 
\v 22 लेकीन आत्मा अन काय, प्यार, खुशी, शांती, धीरज, कृपा, भलाई, विश्वास, 
\v 23 नम्रता, अदिक संयम आद; हिंग-हिंग क्याल्सागोळ विरोध दा यातोदारा भी व्यवस्था हैलेच. 
\v 24 अदिक जो मसीह यीशु नोर आर, आंदुर मय इक आऊन लालसागोळ अदिक अभिलाषागोळ समेत क्रूस मा येर्स बुटार.
\p
\v 25 अगर नाव आत्मा अन द्वारा जित्‍ता आयेव, रा आत्मा अन अनुसार नळदेव भी. 
\v 26 नाव घमण्डी आगकु ना आबुर दाबुर इक छेळसेव, अदिक ना आबुर दाबुर से जलनखोरी माळेव.
\c 6
\s आबुर दाबुर सहायता माळी
\p
\v 1 हे वार्टुरा अदिक आकतींगेरा, अगर यावारा मंळसा यातोदारा अपराध दा हुळकु भी आगतान रा नीव जो आत्मिक आईर, नम्रता अन सांगुळ ईत्‍ता मंळसा अक संभाळसी, अदिक तांद भी सावधानी ईटी कि नीव भी परीक्षा दा बिळबाळी. 
\v 2 नीव आबुर दाबुर बोझ नेगी, अदिक ईत्‍ता प्रकार मसीह अन व्यवस्था अक पुरा माळी. 
\v 3 यतिकी अगर यावारा येनु ईला ईत्‍तुर मा भी तान तान इक येनारा सम्सतान, रा तान तान इक ध्वाका कोळतान. 
\v 4 लेकीन हर ऊंद तांद अच क्याल्सा अक जाच कोमुल, अदिक आग दुसरा अन बारा दा ईला लेकीन तांद अच बारा दा आऊक घमण्ड माळोद मवका सिक्‍कीत. 
\v 5 यतिकी हर ऊंद मंळसा तांद अच बोझ नेगदान.
\p
\v 6 यारी वचन इन शिक्षा सिकतद, आव सप्पा वळ्लेव वस्तुगोळ दा कलसावाळा अक भागी माळुल.
\p
\v 7 ध्वाका तिनबाळी; परमेश्वर मज्याक दा हार्सकु आगालुन, यतिकी मंळसा जो फसल हच्यान आव अदा कळदान. 
\v 8 यतिकी जो तान मय इन साटी हचतान, आव मय इन द्वारा विनाश इन कटनी कळदान; अदिक जो आत्मा अन साटी हचतान, आव आत्मा अन द्वारा अनन्त जीवन इन कटनी कळदान. 
\v 9 नीव भला क्याल्सा माळदुर दा साहस बिळबाळी, यतिकी अगर नाव ढिला ईरतीदील रा ठीक समय मा कटनी कळदेव. 
\v 10 इदुरसाटी येल ताका समय सिक्‍कीत नाव सप्पा घराना अन सांगुळ वळ्लीद माळेव, विशेष माळकु विश्वासी वार्टुर सांगुळ.
\s आखरी चेतावनी अदिक अभिवादन
\p
\v 11 नोळी, ना ह्यांग धोळ धोळ अक्षरगोळ दा नीमी तान कय देल लिख्सीन. 
\v 12 जो लॉकुर शारीरिक दिखावा चाहासतार आंदुर अच नीम्द खतना माळसुसोर साटी दबाव हाकतार, सिर्फ इदुरसाटी कि आंदुर मसीह अन क्रूस इन कारण सतुस्कु आगबाळुल. 
\v 13 यतिकी खतना माळसुसावाळेर खुद रा व्यवस्था मा नळालुर, लेकीन नीम खतना इदुरसाटी माळसुसोद चाहासतार कि नीम शारीरिक दशा मा घमण्ड माळुल. 
\v 14 लेकीन हिंग आगबाळुल कि ना दुसरा यातोदारा मात मा घमण्ड माळाईन, सिर्फ नाम प्रभु यीशु मसीह अन क्रूस इन, यार्द द्वारा दुनिया नान नजर दा अदिक ना दुनिया अन नजर दा क्रूस मा येर्सकु आगीन. 
\v 15 यतिकी ना खतना अदिक ना खतनारहित येनारा आद, लेकीन व्हाशोद दुनिया. 
\v 16 यास ई नियम मा नळदार आंदुर मा, अदिक परमेश्वर उन इस्त्राएल मा शांती अदिक दया आगतेला ईरूल.
\p
\v 17 मुंद नानी याऊ दुख कोळबाळुल, यतिकी ना यीशु अन दागगोळी तान मय दा हुळकु टेटाळतीन. 
\v 18 हे वार्टुरा अदिक आकतींगेरा, नाम प्रभु यीशु मसीह अन अनुग्रह नीम आत्मा अन सांगुळ ईरूल. आमीन.