\id 2CO - होलिया
\ide UTF-8
\h २ कुरिन्थि
\toc3 २ कुरिन्थि
\toc2 २ कुरिन्थि
\toc1 कुरिन्थिगोळ्द हेसुर पौलुस प्रेरित उन दुसरा चिट्ठी
\mt2 कुरिन्थियों के नाम पौलुस प्रेरित की दूसरी पत्री
\mt1 कुरिन्थिगोळ्द हेसुर पौलुस प्रेरित उन दुसरा चिट्ठी
\imt परिचय
\ip दुसरा कुरिन्थि ईद चिट्ठी प्रेरित पौलुस यीशु मसीह अन्द जनम इन ५५-५६ साल इन बाद्दा लिख्सदुन \xt १:१\xt* ईद आ येढ्ढ चिट्ठी गोळ दा टु दुसरा चिट्ठी हुन जो पौलुस कुरिन्थिवासीगोळ साटी लिख्सदुन. हापाळ पंडीत विधवान हिंग सम्सतार कि ई चिट्ठी इन पयले कुरिन्थिगोळी ऊंद धोळ्द कळक चिट्ठी लिखसीदुन इदुर बारा दा आव \xt २:३-४\xt* ई वचन दा उल्लेख माळतान लेकीन ई चिट्ठी इन प्रतिक नाम हात्‍ती हैलेच. ईद दुसरा कुरिन्थि इन चिट्ठी पौलुस संभव अच मकिदुनिया नगर दा टु लिख्सीदान. \xt २:१३\xt*
\ip दुसरा कुरिन्थि ई चिट्ठी इन विशेषता ईद आद कि चिट्ठी दा वैक्तिक अदिक भावनात्मक मातगोळ्द चर्चा माळकु आग्याद ई चिट्ठी दा पौलुस जो वळ्लीद अहवाल आव कुरिन्थिगोळ बारा दा तीतुस से हासिल माळदुन अदुर बारा दा खुशी जाहीर माळतान. ई चिट्ठी दा विस्तार देल शिक्षा कोळोद बारा दा व्हाशोद नियम इन दृष्टीकोन देल कांळ्सतद. ईद शिक्षा ई विभाग दा सिकतद याता विभाग दा पौलुस आ चंदा अन्द बारा दा मात हेळतान जो चंदा यरूशलेम इन विश्वासीगोळ्द सहायता साटी ताकोमकु आगीत \xt ८–९\xt* मंडली दा थ्वाळासा लॉकुर पौलुस उन खिलाप ईरोर लेकीन थ्वाळासा मुंदुर अल बरावाळेर ख्वाटा प्रेरित ई विरोध इन फायदा नेगुकु पौलुस उक वोतकु खुद उन्नती माळोद चाहासोर. आंदुर पौलुस उन अधिकार माळदुर मा प्रश्न निर्माण माळदुर इदुरसाटी ई चिट्ठी इन आखरी भाग दा यीशु मसीह अन्द प्रेरित आगदुर नाता देल जो अधिकार आऊक सिक्याद आ अधिकार मा पौलुस जोर कोळतान.
\iot रूप-रेखा:
\io1 १. पौलुस उन मंडलीगोळी नमस्कार \ior १:१-७\ior*
\io1 २. पौलुस उन तान यात्रा अन्द बारा दा बदलाव अदिक जो अहवाल कुरिन्थिगोळ बारा दा हासिल आगीत अदुर बारा दा चर्चा अदिक हिंदळा कळक चिट्ठी यदुर बारा दा आंदुर प्रश्न निर्माण माळीदुर अऊर बारा दा हेळोद \ior १:८–७:१६\ior*
\io1 ३. यरूशलेम दा ईरावाळेर विश्वासीगोळ साटी चंदा माळदुर बारा दा सुचना \ior ८:१–९:१५\ior*
\io1 ४. आखरी दा पौलुस उन तान प्रेरितपन इन बचाव माळोद अदिक तान बरावाळा मुलाकात इन बारा दा चेतावनी कोळोद \ior १०:१–१३:१०\ior*
\c 1
\p
\v 1 \x + \xo १:१ \xo*\xt प्रेरितगोळ १८:१\xt*\x*पौलुस उन दी टु जो परमेश्वर उन इच्छा देल मसीह यीशु उन प्रेरित हुन, अदिक वार्ट तीमुथियुस उन दी टु परमेश्वर उन आ मंडली इन हेसुर,
\p जो कुरिन्थुस दा आद, अदिक सप्पा अखाया नगर इन सप्पा पवित्र लॉकुर हेसुर:
\p
\v 2 नाम आप्प परमेश्वर अदिक प्रभु यीशु मसीह अन्द दी टु नीमी अनुग्रह अदिक शांती सिकतेला ईरूल.
\s परमेश्वर उन धन्यवाद माळोद
\p
\v 3 नामव प्रभु यीशु मसीह अन्द परमेश्वर अदिक आप्प उन धन्यवाद आगुल, जो दया अन्द आप्प अदिक सप्पा प्रकार इन शांती इन परमेश्वर हुन 
\v 4 आव नामव सप्पा क्लेशगोळ दा दिलासा कोळतान; ताकी नाव आ दिलासा अन्द कारण जो परमेश्वर नामी कोळतान, आंदरी भी दिलासा कोळ सकुल जो यातारा प्रकार इन क्लेश दा इतीदार. 
\v 5 यतिकी ह्यांग मसीह अन्द दुखगोळ दा नाव यक्कुल सहभागी आगतेव, हांग अच नाव शांती दा भी मसीह अन्द द्वारा यक्कुल सहभागी आगतेव. 
\v 6 अगर नामी क्लेश सिकतद, रा ईद नीम्द शांती अदिक उद्धार इन साटी हुन; अदिक अगर शांती सिकतद, रा ईद नीम्द शांती इन साटी हुन; यदुर प्रभाव देल नीव धीरज इन सांगुळ आ क्लेशगोळ इक सहन माळ कोमतीर, यवरी नाव भी सहन माळतेव. 
\v 7 नाम्द आशा नीम्द बारा दा मजबूत आद; यतिकी नाव अरूतेव कि नीव ह्यांग नाम दुखगोळ दा, हांग अच शांती दा भी सहभागी आईर.
\p
\v 8 \x + \xo १:८ \xo*\xt १ कुरिन्थि १५:३२\xt*\x*हे वार्टुरा अदिक आकतींगेरा, नाव चाहसालेव कि नीव नाम आ क्लेश देल अनजान ईरी जो आसिया प्रदेश दा नाम मा बित्‍त; नाव ईत्‍ता भारी बोझ देल वत्‍तेगीदेव, जो नाम सामर्थ्य अन व्हार्या ईरोद, ईल ताका कि नाव जीवन देल भी कय तोळकु कुर्तीदेव. 
\v 9 अदिक नाव तान मन दा समसेगीदेव कि नाम मा मृत्यु उन आग्या आगेग्याद. ताकी नाव तान भरोसा ईटतीदिल बल्‍की आ परमेश्वर उन जो सोत्‍तुर इक जित्‍ता माळतान. 
\v 10 आवा नामी मृत्यु उन हिंग धोळ्द संकट देल ऊळ्सदुन, अदिक ऊळस्यान; अदिक आऊन मा नामी ईद आशा आद कि आव मुंद भी ऊळ्सतेला ईत्‍तान. 
\v 11 नीव भी ऊंद आगकु प्रार्थना अन्द द्वारा नाम सहायता माळीर कि जो वरदान नामी हापाळ मुंदुर द्वारा सिक्त, अदुर कारण हापाळ लॉकुर नाम दी टु धन्यवाद माळुल.
\s पौलुस उन यात्रा-योजना दा परिवर्तन
\p
\v 12 यतिकी नाव तान अंतर मन इन ई गवाही मा घमण्ड माळतेव, कि दुनिया दा अदिक विशेष माळकु नीम न्याड्या, नाम चरित्र परमेश्वर उन योग्य हिंग पवित्रता अदिक सच्चाई सहित ईरोद, जो शारीरिक ग्यान देल ईला लेकीन परमेश्वर उन अनुग्रह अन्द सांगुळ ईरोद. 
\v 13 नाव अदा लिख्सतेव जो नीव वाचुस या सम्स सकतीर. लेकीन बाक भी नीव नामी थ्वाळासा सम्सतीर. 
\v 14 अदिक नानी आशा आद कि या दिन प्रभु यीशु मसीह नीम हात्‍ती बंदान आ दिन नीव घमण्ड इन दिनगोळ दा अदिक अन्त ताका भी मान्सतेला ईत्‍तीर.
\p
\v 15 ईदा भरोसा देल ना चाहासीन कि पयले नीम हात्‍ती बराईन कि नीमी दुगना खुशी सिकुल; 
\v 16 \x + \xo १:१६ \xo*\xt प्रेरितगोळ १९:२१\xt*\x*ना सोचदिन कि नीम हात्‍ती टु आगकु मकिदुनिया नगर इक होगतेला, नीम से सीकाईन, अदिक बाक मकिदुनिया नगर टु नीम हात्‍ती बराहोती; मात्‍त सीकाईन; अदिक नीव नानी यहूदीगोळ दी थ्वाळासा दुर ताका सार माळी. 
\v 17 इदुरसाटी ना जो ईद इच्छा माळीदिन रा येन ना अनुचित ईरीन? या जो माळोद चाहासतीन येन मय इन अनुसार माळोद चाहासतीन कि ना मात दा “हव, हव” भी माळाईन अदिक थ्वाळासा समय दा “ईला ईला” भी माळाईन? 
\v 18 परमेश्वर खरा गवाह आन कि नाम आ बातणी दा जो नीम से अंदुन “हव” अदिक “ईला” येढ्ढु शब्द सिकालव. 
\v 19 \x + \xo १:१९ \xo*\xt प्रेरितगोळ १८:५\xt*\x*यतिकी परमेश्वर उन पार यीशु मसीह यार्द नाम द्वारा मतलब नान अदिक सिलवानुस अदिक तीमुथियुस उन द्वारा नीम न्याड्या दा प्रचार आत, अदुर दा “हव” अदिक “ईला” येढ्ढु ईला ईरव, इदुरसाटी परमेश्वर नामव हव हुन. 
\v 20 यतिकी परमेश्वर उन यास भी वादा आव, अव सप्पा अदुर दा “हव” इन सांगुळ आव. इदुरसाटी आऊन द्वारा “आमीन” भी आत कि नाम द्वारा परमेश्वर उन महिमा आगुल. 
\v 21 अदिक जो नामी नीम सांगुळ मसीह दा ऊंद माळकु मजबूत माळतान, अदिक याव नामी अभिषेक माळ्यान आवा परमेश्वर हुन, 
\v 22 नाव आऊन नव हुयेव याव नाम मा आऊन आगोद छाप हच्यान अदिक बयाना दा आत्मा अक नाम मनगोळ दा कोटान. जो भविष्य दा सिकोद आद.
\p
\v 23 ना परमेश्वर उक गवाह माळकु अनतीन कि ना ईगासताका कुरिन्थुस दा इदुरसाटी बंदिदील, कि ना ईला चाहासीन कि नीमी बोयाईन. 
\v 24 ईद ईला कि नाव विश्वास इन बारा दा नीम मा प्रभुता जतुसोद चाहासतेव; लेकीन नीम खुशी दा सहायक आयेव यतिकी नीव विश्वास देल अच संची ईरतीर.
\c 2
\p
\v 1 ना तान मन दा ईदा ठान्स कोंडीदिन कि बाक मात्‍त नीम हात्‍ती नीमी उदास माळली बरतीदील. 
\v 2 यतिकी ना अगर नीमी उदास माळाईन, रा नानी खुशी कोळावाळा याव ईत्‍तान, सिर्फ आवा यारी ना उदास माळदीन? 
\v 3 अदिक ना ईदा मात नीमी इदुरसाटी लिख्सदीन कि यागल्यारा हिंग आगबाळुल कि नान बंदुर मा, यार देल नानी खुशी सीक पायजे नानी आंदुर से उदासी सिकुल; यतिकी नानी नीम सप्पा मुंदुर मा ई मात इन भरोसा आद कि जो नान खुशी आद, अदा खुशी नीम सप्पा मुंदुर्द भी आद. 
\v 4 धोळ क्लेश अदिक मन इन दुख देल ना हापाळ सा नीर कण्णगोळ दा टु वाहुसकु नीमी लिख्सीदीन, अद इदुरसाटी ईला कि नीव उदास आगी लेकीन इदुरसाटी कि नीव नान आ धोळ प्यार इक अर्त कोमी, जो नानी नीम से आद.
\s गलती माळावाळेर इक माफ
\p
\v 5 अगर यावारा नीमी दुख कोटान, रा नानी का ईला बल्‍की ना आऊन सांगुळ यक्कुल दुख इन व्यवहार माळालीन थ्वाळा-थ्वाळा नीम सप्पा मुंदरी भी उदास माळ्यान. 
\v 6 ईत्‍ता मंळसा अन्द साटी ईद दण्ड जो वार्टुर दा टु हापाळ मुंदुर कोटार, हापाळ आद. 
\v 7 इदुरसाटी ईदुर से वळ्लीद ईद आद कि आऊन अपराध माफ माळी अदिक आऊक दिलासा कोळी, ईदारा हिंग आगबाळुल आ मंळसा हापाळ उदासी दा मुळकेगुल. 
\v 8 ई कारण ना नीम से विनती माळतीन कि आऊक तान प्यार इन एहसास तोरसी. 
\v 9 यतिकी ना इदुरसाटी भी लिख्सीदीन कि नीमी वळ्लीद देल परकुस कोमाईन कि नीव नान सप्पा मातगोळ मानसोर साटी तयार आईर का ईला. 
\v 10 अगर नीव यारीकारा माफ माळतीर रा आऊक ना भी माफ माळतीन, यतिकी ना भी जो येनारा माफ माळीन, अगर हिंग माळीन, रा नीम कारण मसीह अन्द जागा दा ईतकु माफ माळीन 
\v 11 कि नाम मा शैतान उन दावपेच नळु बाळुल, यतिकी नाव आऊन युक्तिगोळ देल अनजान हैलेच.
\s त्रोआस दा पौलुस उन व्याकुलता
\p
\v 12 \x + \xo २:१२ \xo*\xt प्रेरितगोळ २०:१\xt*\x*याग ना मसीह अन्द खुशखबरी केळ्सली त्रोआस नगर दा बंदीन, अदिक प्रभु नान क्याल्सा अक पुरा माळोर साटी ऊंद दरवाजा तेर्द बुट्टुन, 
\v 13 रा नान मन इक चैन सक्कीदील, यतिकी ना तान वार्ट तीतुस उक अल नोळीदील; इदुरसाटी आंदुर से विदा ताकोमकु ना मकिदुनिया नगर इक होटोदिन.
\s मसीह दा विजय-हाब्ब
\p
\v 14 लेकीन परमेश्वर उन धन्यवाद आगुल जो मसीह दा हमेशा नामी जय इन हाब्ब दा हुळकु वयाळतान, अदिक मसीह अन्द ग्यान इन वास नाम द्वारा सप्पा जागा दा फैलुसतान. 
\v 15 यतिकी नाव परमेश्वर उन हात्‍ती उद्धार ताकोमावाळेर अदिक नाश आगावाळेर येढ्ढु मुंदुर साटी मसीह अन्द वास हुयेव. 
\v 16 थ्वाळासा लॉकुर साटी रा सोत्‍तुर घाई मृत्यु उन वास, अदिक हापाळ सा लॉकुर साटी जीवन इन घाई जीवन इन वास. ई मातगोळ्द लायक याव आन? 
\v 17 यतिकी नाव आ हापाळ मुंदुर घाई हैलेच जो तान फायदा साटी परमेश्वर उन वचन इस्तेमाल माळतार; परमेश्वर नामी कळ्यान. मन इन सच्चाई देल अदिक परमेश्वर उन सेवक आगोद नाता देल नाव परमेश्वर उक उपस्थित जान्सकु मसीह दा माताळतेव.
\c 3
\s व्हाशोद वाचा अन्द सेवक
\p
\v 1 येन नाव मात्‍त तान बळाई माळली हत्‍तेव? या मात्‍त नामी दुसरा लॉकुर घाई सिफारीश इन चिट्ठी गोळ नीम हात्‍ती तरोद या नीम से ताकोमोद आद? 
\v 2 नाम चिट्ठी नीवा हुईर, जो नाम दिलगोळ मा लिख्सकु आद अदिक अदरी सप्पा मंळसा अरूतार अदिक वाचुसतार. 
\v 3 ईद प्रगट आद कि नाम नीम न्याड्या दा सेवकाई इन कारण देल नीव मसीह अन्द चिट्ठी हुईर. अदिक जो स्याही देल ईला लेकीन जित्‍ता परमेश्वर उन आत्मा देल, कल्ल इन पाटीगोळ मा ईला, लेकीन दिल इन मास रूपी पाटीगोळ मा जो मसीह लिखस्यान.
\p
\v 4 नामी मसीह अन्द द्वारा परमेश्वर मा भरोसा आद अदा कारण नाव हिंग अनतेव. 
\v 5 नाव ई लायक हैलेच कि तान दी टु यातारा क्याल्सा माळ सक्केव, लेकीन नाम लायकीयत परमेश्वर उन दी टु आद, 
\v 6 परमेश्वर नामी व्हाशोद वाचा अन्द सेवक आगोद लायक भी माळदुन, जो लिख्सद व्यवस्था अन्द नियम देल ईला पर आत्मा अन्द नियम देल आद; यतिकी नियम कोंतद, लेकीन आत्मा जित्‍ता माळतद.
\p
\v 7 मूसा अन्द व्यवस्था यऊर अक्षर कल्लगोळ मा अगुळकु आगीदव, ईल ताका चमकदार आदव कि मूसा अन्द मार्रा मा ऊजुळ इन कारण जो गोर्त भी आगतोगोद, इस्त्राएली लॉकुर आऊन मार्रा मा दृष्टी माळ ईला सकोर. 
\v 8 ईद गौरव मुरजुसेत रा पवित्र आत्मा अन्द स्यावा अदिक यक्कुल चमकदार येती आगतीदील? 
\v 9 याग मृत्यु दण्ड कोळोद क्याल्सा चमकदार आद, रा उद्धार कोळोद क्याल्सा याट चमकदार ईत्‍तीत? 
\v 10 अदिक जो चमकदार ईरोद, अद भी आ तेज इन कारण जो अदुर से यक्कुल चमकदार ईरोद, हाळोद तेज पचेत्याद अदिक व्हाशोद तेज यक्कुल चमकदार आगेत्याद. 
\v 11 यतिकी याग जो गोर्त आग्त होगोद अद चमकदार ईरोद, रा अद जो संची ईत्‍तीत मात्‍त यक्कुल चमकदार येती ईरतीदील?
\p
\v 12 इदुरसाटी हिंग आशा ईटकु नाव हिम्मत इन सांगुळ माताळतेव, 
\v 13 अदिक मूसा अन्द घाई ईला, याव तान बाय मा पळदा माळ बुटीदुन ताकी इस्त्राएली लॉकुर आ गोर्त आगावाळा तेज इन अन्त इक नोळ सकबाळुल. 
\v 14 लेकीन आंदुर मतिमन्द आगेदुर, यतिकी ईगासताका हाळोद नियम वाचुसाहोती आंदुर दिलगोळ मा अदा पळदा बिदकु ईरतोगोद, याग यावारा मंळसा मसीह दा होट बरतान आग अद पळदा येदोगतद. 
\v 15 ईगासताका यागल्यारा भी मूसा अन्द किताब वाचुसकु आगतद, रा आंदुर्द दिलगोळ मा पळदा बिदकु ईरतद. 
\v 16 लेकीन याग भी आंदुर्द दिल प्रभु उन दी तिर्गित, आग अद पळदा येदोदीत. 
\v 17 प्रभु रा आत्मा हुन: अदिक येल्यारा भी प्रभु उन आत्मा आद अल आजादी आद. 
\v 18 लेकीन याग नाव सप्पा मुंदुर्द खुला चेहरा देल प्रभु उन तेज इत्‍ता प्रकार प्रगट आगतद, ह्यांग आरसा दा, रा प्रभु उन द्वारा जो आत्मा आद, नाव अदा तेजस्वी रूप दा अंश अंश माळकु बदलुस्त होगतेव.
\c 4
\s मुण्ण इन गळग्यागोळ दा धन
\p
\v 1 इदुरसाटी याग नाम मा हिंग दया आत कि नामी ईद स्यावा सिक्त, रा नाव हिम्मत बिळालेव. 
\v 2 लेकीन नाव शरम इन होचकु क्याल्सागोळ्द त्याग माळ बुटेव, अदिक ना चतुराई देल नळुतेव, अदिक ना परमेश्वर उन वचन दा मिलावट माळतेव; लेकीन सच्चाई इक प्रगट माळकु, परमेश्वर उन मुंद हर ऊंद मंळसा अन्द अंतर मन दा तान भलाई कुर्सतेव. 
\v 3 लेकीन ईद खुशखबरी जो नाव केळ्सतेव इदुर मा पळदा बिदकु आद, रा ईद नाश आगावाळेर दा साटी बिदकु आद. 
\v 4 अदिक आ अविश्वासीगोळ्द साटी, यार्द बुद्धी ई दुनिया अन मय कुढ्ढ माळ बुटान, ताकी मसीह जो परमेश्वर उन प्रतिरूप हुन, आऊन चमकदार खुशखबरी इन उजुळ आंदुर नोळ सकबाळुल. 
\v 5 यतिकी नाव तान तान इक ईला, लेकीन मसीह यीशु उक प्रचार माळतेव कि आव प्रभु हुन; अदिक तान बारा दा ईद अनतेव कि नाव खुद यीशु मसीह नव सेवक हुयेव. 
\v 6 इदुरसाटी कि परमेश्वर अच हुन, याव अंदुन, “अंधार दा टु ज्योति चमकुसुल,” अदिक अदा नाम दिलगोळ दा चमकुस्त कि परमेश्वर उन महिमा अन्द पयचान इन ज्योति यीशु मसीह अन्द मार्रा मा टु प्रकाशमान आगुल.
\p
\v 7 लेकीन नाव जो मुण्ण इन गळग्यागोळ घाई आयेव यदुर दा अद आत्मिक धन ईटकु आद कि ईद तोरसोर साटी कि ईद असीम सामर्थ्य नाम दी टु ईला, बल्‍की परमेश्वर उन दी टु अच हुन. 
\v 8 नाव नाकु दी टु क्लेश रा भोग्सतेव, लेकीन मुसीबत दा बिळालेव; नीर उपाय रा आयेव, पर निराश आगालेव; 
\v 9 सतुस्कु रा आगतेव, पर त्यागस्कु आगालेव; केडुकु रा आगतेव; लेकीन नाश आगालेव. 
\v 10 नाव यीशु उन मृत्यु उक तान मय मा हर समय हुडुकु वयाळतेव कि यीशु उन जीवन भी नाम मय दा प्रगट आगुल. 
\v 11 यतिकी नाव जित्‍ता जी हमेशा यीशु उन कारण मृत्यु उन कय दा सोपस्कु आगतेव कि यीशु उन जीवन भी नाम मरनहार मय दा प्रगट आगुल. 
\v 12 ई प्रकार सायोद कार्य नाम मा प्रभाव हाकतद अदिक जीवन नीम मा.
\p
\v 13 इदुरसाटी कि नाम दा अदा विश्वास इन आत्मा आद, यदुर बारा दा शास्त्र दा लिख्सकु आद, “ना विश्वास माळदीन, इदुरसाटी ना माताळदिन.” इदुरसाटी नाव भी विश्वास माळतेव, इदुरसाटी माताळतेव. 
\v 14 यतिकी नाव जान्सतेव कि याव प्रभु यीशु मसीह अक जित्‍ता माळदुन, आवा नामी भी मसीह दा भागी जान्सकु जित्‍ता माळ्यान, अदिक नीमी तान मुंद उपस्थित माळ्यान. 
\v 15 यतिकी सप्पा वस्तुगोळ नीम साटी हुव, ताकी अनुग्रह हापाळ मुंदुर द्वारा यक्कुल आगकु परमेश्वर उन महिमा साटी धन्यवाद कोळोद यक्कुल वाळुसित.
\s विश्वास देल जिन्दगी माळोद
\p
\v 16 इदुरसाटी नाव हिम्मत बिळालेव; यतिकी नाम मय इन नाश आग्त ईरतद, तरी भी नाम बुळ्क इन मंळसातत्व दिन रोज व्हाशोद आग्त होगतद. 
\v 17 यतिकी नाम घळी तिमुर्द स्यांळ्दतुसा क्लेश नाम साटी हापाळ महत्वपुर्ण अदिक अनन्त महिमा उत्पन्न माळ्त होगतद; 
\v 18 अदिक नाव रा नोळ्द वस्तुगोळी ईला लेकीन अनदेखा वस्तुगोळी नोळ्त ईरतेव; यतिकी नोळ्द वस्तुगोळ थ्वाळासा अच दिन साटी आव, लेकीन अनदेखा वस्तुगोळ अनन्त काल ताका बन्सकु ईरताव.
\c 5
\p
\v 1 यतिकी नाव जान्सतेव कि याग नाम पृथ्वी माकळोद ड्यारा घाई मान्ना केडुकु आदीत, रा नामी परमेश्वर उन दी टु स्वर्ग मा ऊंद हिंग भवन सिक्‍कीत जो मान्ना कय देल माळकु ईरतीदील, लेकीन अनन्तकालीन आद. 
\v 2 ईदुर दा रा नाव यक्कुल श्वास ताकोमकु माताळतेव अदिक हापाळ लालसा ईटतेव कि तान स्वर्गीय मान्ना अक हाक्‍क कोंडेव 
\v 3 कि ईदुर हाकदुर देल नाव दंगदंगा सीक बाळुल. 
\v 4 अदिक नाव ई ड्यारा दा ईरतेला बोझ देल वोतकु श्वास ताकोमतेला माताळ्त ईरतेव, यतिकी नाव ईळसोद ईला बल्‍की हाक्कोद चाहासतेव, ताकी अद जो मरनहार आद जीवन दा मुळकेगुल. 
\v 5 याव नामी ईदा मात इन साटी तयार माळ्यान आव परमेश्वर हुन, याव नामी बयाना दा आत्मा भी कोटान.
\p
\v 6 इदुरसाटी नाव हमेशा हिम्मत कटकु ईरतेव अदिक ईद जान्सतेव कि यागासताका नाव मय दा ईरतेव, आगासताका प्रभु से ब्यार्र आयेव. 
\v 7 यतिकी नाव रूप इक नोळकु ईला, लेकीन विश्वास देल नळुतेव. 
\v 8 इदुरसाटी नाव हिम्मत कटकु ईरतेव, अदिक मय टु ब्यार्र आगकु प्रभु उन सांगुळ ईरोद मात्‍त यक्कुल वळ्लीद सम्सतेव. 
\v 9 ईदुर कारण नाम मन इन उमंग ईद आद कि चाहे सांगुळ ईत्‍तेव चाहे ब्यार्र ईत्‍तेव, लेकीन नाव आऊक भाऊस्त ईत्‍तेव. 
\v 10 \x + \xo ५:१० \xo*\xt रोमियों १४:१०\xt*\x*यतिकी जरूरी आद कि नाव सप्पा मुंदुर्द हाल मसीह अन्द न्याय आसन इन मुंद तेर्दोगुल, कि हर ऊंद मंळसा तान तान वळ्लीद बुरा क्याल्सागोळ्द बदला जो आव मय इन द्वारा माळ्यान सिकुल.
\s परमेश्वर से मेल-मिलाप
\p
\v 11 इदुरसाटी प्रभु उन अंज्क मान्सकु नाव लॉकुरी समझुसतेव; लेकीन परमेश्वर मा नाम हाल प्रगट आद, अदिक नान आशा ईद आद कि नीम विवेक मा भी प्रगट आगीदाद. 
\v 12 नाव तरी भी तान बळाई नीम मुंद माळालेव, बल्‍की नाव तान बारा दा नीमी घमण्ड माळोद मवका कोळतेव कि नीव आंदरी उत्‍तर कोळ सकी, जो मन मा ईला बल्‍की दिखावटी मातगोळ मा घमण्ड माळतार. 
\v 13 अगर नाव बेसुध आयेव रा परमेश्वर उन साटी, अदिक अगर चैतन्य आयेव रा नीम साटी आयेव. 
\v 14 यतिकी मसीह अन प्यार नामी मजबुर माळ बुळतद; इदुरसाटी कि नाव ईद सम्सतेव कि याग ऊंद सप्पा मुंदुर साटी सोत्‍तुन रा सप्पा सोत्‍तुर. 
\v 15 अदिक आव ई निमित्त सप्पा मुंदुर साटी सोत्‍तुन कि जो जित्‍ता आर, आंदुर मुंद इक तान साटी जित्‍ता ईरबाळुल लेकीन आऊन साटी जो आंदुर साटी सोत्‍तुन अदिक बाक जित्‍ता आदुन.
\p
\v 16 इदुरसाटी ईग टु नाव यारीकु मय इन अनुसार सम्सतीदील. यतिकी नाव मसीह अक भी मय इन अनुसार जान्सीदेव, तरी भी ईग टु आऊक हिंग जान्सतीदील. 
\v 17 इदुरसाटी अगर यावारा मसीह दा आन रा आव व्हाशोद दुनिया आन: हाळोद मातगोळ बितसेग्याव; नोळी, सप्पा मातगोळ व्हाशेव आगेग्याव. 
\v 18 ईव सप्पा मातगोळ परमेश्वर उन दी टु आव, याव मसीह अन द्वारा तान सांगुळ नाम मेल-मिलाप माळ कोंडुन, अदिक मेल-मिलाप इन स्यावा नामी सौप्सदुन. 
\v 19 मतलब परमेश्वर मसीह अन द्वारा तान सांगुळ दुनिया अन मेल-मिलाप माळ कोंडुन, अदिक आंदुर्द अपराधगोळ्द दोष आंदुर मा हचीदिल, अदिक आव मेल-मिलाप इन वचन नामी सौप्सदुन.
\p
\v 20 इदुरसाटी, नाव मसीह अन राजस्वर्गदूत हुयेव; मान्सी परमेश्वर नाम द्वारा विनती माळेत्यान. नाव मसीह अन दी टु निवेदन माळतेव कि परमेश्वर उन सांगुळ मेल-मिलाप माळकोमी. 
\v 21 जो पाप देल अग्यात ईरोन, आऊक अच आव नाम साटी पाप ठहरूसदुन कि नाव आऊन दा आगकु परमेश्वर उन मुंद नेक मंळसा बनसेगुल.
\c 6
\p
\v 1 नाव जो परमेश्वर उन सहकर्मी आयेव ईद भी हेळतेव कि आऊन अनुग्रह जो नीम मा आत, अदरी वाया होगगोळबाळी. 
\v 2 यतिकी आव रा अनतान,
\q1 “तान खुश आगोद समय दा ना नीन केळ कोंडीन,
\q2 अदिक उद्धार इन दिन ना नीन सहायता माळदीन.”
\q1 नोळी, ईग अद खुश
\q2 इन समय आद;
\m नोळी, ईग अद उद्धार इन दिन आद.
\p
\v 3 नाव यातोदु मात दा ठोकर तिनोद यातोद भी मवका कोळालेव ताकी नाम स्यावा मा यातोद भी दोष बरबाळुल. 
\v 4 लेकीन हर मात देल परमेश्वर उन सेवकगोळ्द घाई तान लायकत इक प्रगट माळतेव, बळा धीरज देल, क्लेशगोळ देल, दरिद्रगोळ देल, संकटगोळ देल, 
\v 5 \x + \xo ६:५ \xo*\xt प्रेरितगोळ १६:२३\xt*\x*क्वाळा तिनोद देल, कैद आगदुर देल, दंगा देल, मयनत देल, च्याता ईरोद देल, उपास माळदुर देल, 
\v 6 पवित्रता देल, आ ग्यान देल, धीरज देल, परमेश्वर उन प्यार अदिक कृपा देल, पवित्र आत्मा देल, 
\v 7 सही प्यार देल, सच्चाई इन वचन देल, परमेश्वर उन सामर्थ्य देल, न्यायीपन इन हथियारगोळ देल जो उजवा डाक्या कयगोळ दा आव, 
\v 8 आदर अदिक निरादर देल, बेकार कीर्ति अदिक वळ्लीद कीर्ति देल. अगर भरमुसावाळेर घाई मालूम आगतेव तरी भी सही आयेव; 
\v 9 अनजानगोळ्द घाई आयेव, तरी भी प्रसिद्ध आयेव; सोत्‍तुर घाई आयेव अदिक नोळी जित्‍ता आयेव; बळ्सकोमावाळेर्द घाई आयेव पर जीव देल कोनसुस्कु आगालेव; 
\v 10 शोक माळावाळेर्द घाई आयेव, पर हमेशा खुश ईरतेव; कंगालगोळ्द घाई आयेव, पर हापाळ मुंदुर इक धनवान माळ बुळतेव; हिंग आयेव जसा नाम हात्‍ती येनु हैलेच तरी भी सब येनारा ईटतेव.
\p
\v 11 हे कुरिन्थिगोळा, नाव तान मन तेरूकु नीम से मातगोळ हेळेव, नाम मन नीम दी तेरूकु आव 
\v 12 नीम साटी नाम मन दा यातोदु संकोच हैलेच, लेकीन नीम्द अच मनगोळ दा संकोच आद. 
\v 13 लेकीन तान चिकोर जान्सकु नीम से अनतीन कि नीव भी अदुर बदला दा तान मन तेर्द बुळी.
\s देवभक्ति ईला ईटावाळेर से सावधान
\p
\v 14 अविश्वासीगोळ्द सांगुळ संबंध माळकु जुआळी दा जुत्सबाळी, यतिकी न्यायीपन अदिक अन्याय इन येन मेल-जोल आद? या उजुळ अदिक अंधार इन येन संगती? 
\v 15 अदिक मसीह अन्द शैतान उन सांगुळ येन लगाव? या विश्वासी इन सांगुळ अविश्वासी इन येन नाता? 
\v 16 \x + \xo ६:१६ \xo*\xt १ कुरिन्थि ३:१६; ६:१९\xt*\x*अदिक मूर्तीगोळ्द सांगुळ परमेश्वर उन मंदिर इन येन संबंध? यतिकी नाव रा जित्‍ता परमेश्वर उन मंदिर हुयेव; ह्यांग परमेश्वर अंदान,
\q1 “ना आंदुर दा ईराइन
\q2 अदिक आंदुर दा नळुतोगाईन;
\q1 अदिक ना आंदुर परमेश्वर आगाईन,
\q2 अदिक आंदुर नान लॉकुर आदार.”
\m
\v 17 इदुरसाटी प्रभु अनतान,
\q1 “आंदुर न्याड्या दा टु होळी
\q2 अदिक ब्यार्र ईरी;
\q1 अदिक अशुध्द वस्तु उक मुट बाळी,
\q2 रा ना नीमी ग्रहण माळाईन;
\q1
\v 18 अदिक ना नीम आप्प आगाईन,
\q2 अदिक नीव नान पार अदिक पोर आदीर.
\q2 ईद सर्वशक्तिमान प्रभु परमेश्वर उन वचन हुन.”
\c 7
\p
\v 1 इदुरसाटी हे प्रियगोळा, याग कि ई वादागोळ नामी सिक्याव, रा बरी, नाव तान तान इक मय अदिक आत्मा अन्द सप्पा मलिनता देल शुद्ध माळेव, अदिक परमेश्वर उन अंज्क ईटतेला पवित्रता अक सिद्ध माळेव.
\s पौलुस उन खुशी
\p
\v 2 नामी तान दिल दा जागा कोळी. नाव ना रा यारदु सांगुळ अन्याय माळेव, ना यारीकारा बिगळुसेव अदिक ना यारीकारा ठगुसेव. 
\v 3 ना नीनी दोषी ठहरूसोर साटी ईद अनालीन. यतिकी ना पयले अच अन बुटीन कि नी नाम दिल दा हिंग कुर्तोग्या कि नाव नीन सांगुळ सायोर अदिक ऊळोर साटी तयार आयेव. 
\v 4 ना नीम से हापाळ हिम्मत इन सांगुळ माताळेतिन, नानी नीम मा बळा घमण्ड आद; ना शांती देल तुम्मेगीन. तान सप्पा क्लेश दा ना खुशी देल हापाळ तुमकु ईरतीन.
\p
\v 5 \x + \xo ७:५ \xo*\xt २ कुरिन्थि २:१३\xt*\x*यतिकी याग नाव मकिदुनिया नगर दा बंदेव, आग भी नाम मय इक चैन सिकीदील, लेकीन नामी नाकु दी टु क्लेश सिकतोगोद; व्हार्या लळाईगोळ ईरव, बुळ्क भयंकर मातगोळ ईरव. 
\v 6 फिर भी दिन गरीब मंळसागोळी शांती कोळावाळा परमेश्वर तीतुस उन बंदुर देल नामी शांती कोट्टुन; 
\v 7 अदिक ना सिर्फ आऊन बंदुर देल लेकीन आऊन आ शांती देल भी, जो आऊक नीम दी टु सिकीत. आव नीम लालसा, नीम दुख अदिक नान साटी नीम धुन इन बातणी नामी केळ्सदुन, यदुर देल नानी मात्‍त खुशी आत.
\p
\v 8 यतिकी कदाचित ना तान चिट्ठी देल नीनी दुखी माळदीन, लेकीन अदुर देल पछतासालिन ह्यांग कि पयले पछतासिन, यतिकी ना नोळतीन कि आ चिट्ठी देल नीनी दुख रा आत लेकीन अद घळी तिमुर्द साटी ईरोद. 
\v 9 ईग ना खुश आईन पर इदुरसाटी ईला कि नीनी दुख पोहचुस्त, उलटा इदुरसाटी कि नी आ दुख इन कारण मन तिर्गुस्द, यतिकी नीन दुख परमेश्वर उन इच्छा अन्द अनुसार ईरोद कि नाम दी टु नीनी यातोदु मात दा हानि पोहचुस बाळुल. 
\v 10 यतिकी परमेश्वर-भक्ति इन दुख हिंग पश्चाताप पैदा माळतान यदुर्द परिणाम उद्धार आद अदिक बाक अदुर देल पछतासोद बिळाल. लेकीन दुनिया अक दुख मृत्यु पैदा माळतद. 
\v 11 इदुरसाटी नोळी ईदा मात देल कि नीमी परमेश्वर उन दी टु बरोद दुख आत नीम दा याट उत्साह अदिक खुद इक उळसोद इच्छा अदिक हतास, अदिक अंज्क, अदिक लालसा, अदिक आस्था अदिक न्याय कोळोद विचार पैदा आत? नीव हर प्रकार देल ईद सिद्ध माळकु तोर्सदीर कि नीव ई मात दा निर्दोष आईर.
\p
\v 12 बाक ना जो नीम हात्‍ती लिखसीदिन, अद ना रा आऊन कारण लिख्सदीन याव अन्याय माळदुन अदिक ना आऊन कारण यार मा अन्याय माळकु आत, लेकीन इदुरसाटी कि नीम उत्साह जो नाम साटी आद, अद परमेश्वर उन मुंद नीम मा प्रगट आगेगुल. 
\v 13 इदुरसाटी नामी दिलासा सिक्त. नाम ई दिलासा अन्द सांगुळ तीतुस उन खुशी इन कारण मात्‍त यक्कुल खुशी आत यतिकी आऊन जीव नीम सप्पा मुंदुर कारण खुश आगेत. 
\v 14 यतिकी अगर ना आऊन मुंद नीम बारा दा येनारा घमण्ड तोर्सदीन, रा लज्जित आगीदील, लेकीन ह्यांग नाव नीम से सप्पा मातगोळ सही-सही अन बुटिदेव, हांग अच नाम घमण्ड तोरसोद तीतुस उन मुंद भी सही होळ्त. 
\v 15 याग आऊक नीम सप्पा मुंदुर्द आग्याकारी आगोद याद आगतद कि ह्यांग नीव अंज्क अदिक नळ्गतेला आऊन से मुलाकात माळदीर; रा आऊन प्यार नीम दी मात्‍त यक्कुल वाळुसेगतद. 
\v 16 ना खुश आईन यतिकी ना हर मात दा नीम मा पुरा भरोसा माळ सकतीन.
\c 8
\s उदारता पुर्वक दान कोळोद
\p
\v 1 \x + \xo ८:१ \xo*\xt रोमियों १५:२६\xt*\x*ईग हे वार्टुरा अदिक आकतींगेरा, नाव नीमी परमेश्वर उन अनुग्रह जो मकिदुनिया नगर इन मंडलीगोळ मा आत नाव चाहासतेव कि नीमी मालूम नळुल. 
\v 2 कि क्लेश इन धोळ्द परीक्षा दा आंदुर्द धोळ्द खुशी अदिक भारी कंगालपन दा आंदुर उदारता हापाळ वाळुसेत. 
\v 3 आंदुर बारा दा नान ईद गवाही आद कि आंदुर तान सामर्थ्य तुमकु उलटा सामर्थ्य से भी व्हार्या, मन देल कोटार. 
\v 4 अदिक ई दान दा अदिक यहूदीगोळ्द परमेश्वर उन पवित्र लॉकुर्द स्यावा दा सहभागी आगोद अनुग्रह अन्द बारा दा, नाम से घळी-घळी हापाळ विनती माळदुर, 
\v 5 अदिक ह्यांग नाव आशा माळीदेव, हांग अच ईला उलटा आंदुर प्रभु उक बाक परमेश्वर उन इच्छा देल नामी भी तान तान इक कोट बुट्टुर. 
\v 6 इदुरसाटी नाव तीतुस से विनती माळीदेव कि ह्यांग आव पयले सुरूवात माळीदुन, हांग अच नीम न्याड्या दा ई दान कोळोद कृपा अन्द क्याल्सा अक लगातार पुरा माळुल. 
\v 7 इदुरसाटी ह्यांग नीव सप्पा मात दा मतलब विश्वास, वचन, ग्यान अदिक सप्पा प्रकार इन कोशिश दा, अदिक आ प्यार दा जो नाम से ईटतीर, वाळुस्त होगतीर, हांग अच ई दान इन कृपा अन्द क्याल्सा दा भी वाळुस्त होगी.
\p
\v 8 ना आग्या अन्द रीति मा रा ईला, लेकीन दुसरा लॉकुर्द तोर्सद उत्साह देल नीम प्यार इन सच्चाई इक परखुसोर साटी अनतीन. 
\v 9 नीव नाम प्रभु यीशु मसीह अन अनुग्रह अरूतीर कि आव धनी ईतकु भी नीम साटी कंगाल आगेदुन, ताकी आऊन कंगाल आगदुर देल नीव धनी आगेगी.
\p
\v 10 ई मात दा नान सला ईदा आद: ईद नीम साटी वळ्लीद आद, जो ऊंद साल टु ना रा सिर्फ क्याल्सा अक माळदुर दा अच, लेकीन ई मात इन चाहासदुर दा भी पयला आगिदुर, 
\v 11 इदुरसाटी ईग ईद क्याल्सा पुरा माळी कि ह्यांग इच्छा माळदुर दा नीव तयार ईरीर, हांग अच तान तान पूंजी इन अनुसार पुरा भी माळी. 
\v 12 यतिकी अगर मन देल कोळोद तयारी आद रा अदुर अनुसार परमेश्वर आ दान इक ग्रहण भी माळ्यान जो आऊन हात्‍ती आद, ना कि आऊन अनुसार जो आऊन हात्‍ती हैलेच.
\p
\v 13 हिंग ईला कि दुसरा अक चैन अदिक नीमी क्लेश सिकुल, 
\v 14 लेकीन बराबरी इन विचार देल ई समय नीम बळती आंदुर घटी दा क्याल्सा बरूल, ताकी आंदुर बळती भी नीम घटी दा क्याल्सा बरूल कि बराबरी आगेगुल. 
\v 15 ह्यांग शास्त्र दा लिख्सकु आद, “याव हापाळ जेळदुन आऊन ज्यादा होटीदिल, अदिक याव थ्वाळासा जेळदुन आऊन गोर्त भी होटीदिल.”
\s तीतुस अदिक आऊन सहकर्मी
\p
\v 16 परमेश्वर उन धन्यवाद आगुल, याव नीम साटी अदा उत्साह तीतुस उन दिल दा हाक्‍क बुटान! 
\v 17 कि आव नाम समजुसोद मान्स कोंडुन उलटा हापाळ उत्साही आगकु आव तान इच्छा देल नीम हात्‍ती होग्याद. 
\v 18 नाव आऊन सांगुळ आ वार्ट उक भी कळेव यार्द हेसुर खुशखबरी इन बारा दा सप्पा मंडली दा फैलुसकु आद; 
\v 19 अदिक ईट अच ईला, लेकीन आव मंडली द्वारा नियुक्त भी आदुन कि ई दान इन क्याल्सा अन्द साटी नाम सांगुळ होगुल. नाव ईद स्यावा इदुरसाटी माळतेव कि प्रभु उन महिमा अदिक नाम मन इन तयारी प्रगट आगेगुल.
\p
\v 20 नाव ई मात दा सावधान ईरतेव कि ई उदारता अन्द क्याल्सा अन्द बारा दा यार स्यावा नाव माळतेव, यावारा नाम मा दोष हच सकबाळुल. 
\v 21 यतिकी जो मातगोळ सिर्फ प्रभु उन हात्‍ती इच ईला, लेकीन मंळसागोळ्द हात्‍ती भी भला आव नाव अऊर्द चिन्ता माळतेव.
\p
\v 22 नाव आऊन सांगुळ तान वार्ट उक भी कळेव, यारी नाव घळी-घळी परखुस्कु हापाळ सा मातगोळ दा उत्साही आगतेला नोळेव; लेकीन ईग नीम मा आऊक हापाळ भरोसा आद, ई कारण आव मात्‍त यक्कुल उत्साही आन. 
\v 23 अगर यावारा तीतुस उन बारा दा केळुल, रा आव नान संगी अदिक नीम साटी नान सहकर्मी हुन; अदिक अगर नाम वार्टुर्द बारा दा केळुल, रा आंदुर मंडलीगोळ्द कळुकु अदिक मसीह अन्द महिमा उर. 
\v 24 इदुरसाटी तान प्यार अदिक नाम अद घमण्ड जो नीम बारा दा आद मंडलीगोळ्द मुंद सिद्ध माळकु आंदरी तोरसी.
\c 9
\s संगी-मसीहगोळ्द साटी सहायता
\p
\v 1 ईग आ स्यावा अन्द बारा दा जो पवित्र लॉकुर्द साटी माळकु आगतद, नानी नीमी लिखसोद जरूरी हैलेच. 
\v 2 यतिकी ना नीम मन इन तयारी इक अरूतीन, यदुर कारण ना नीम बारा दा मकिदुनिया नगर इन ईरावाळेर्द मुंद घमण्ड तोर्सतिन कि अखाया नगर इन लॉकुर ऊंद साल टु तयार आग्यार, अदिक नीम उत्साह मात्‍त हापाळ मुंदुर इक भी तयार माळ्याद. 
\v 3 लेकीन ना वार्टुर इक इदुरसाटी कळीन कि नाव जो घमण्ड नीम बारा दा तोर्सदेव, अद ई मात दा व्यर्थ ईरबाळुल; लेकीन ह्यांग ना अंदीन हांग अच नीव तयार ईरी, 
\v 4 हिंग आगबाळुल कि अगर यावारा मकिदुनिया नोर ईरावाळेर नान सांगुळ बरूल अदिक नीमी तयार ईला नोळुल, रा आग सकतद कि ई भरोसा अन्द कारण नाव ईद अनालेव कि नीव लज्जित आदेव. 
\v 5 इदुरसाटी ना वार्टुर से ईद विनती माळोद जरूरी सम्सदीन कि आंदुर पयले टु नीम हात्‍ती होगुल, अदिक नीम उदारता अन्द काय यदुर बारा दा पयले टु वचन कोटकु आगीत, तयार माळकु ईटुल कि ई दबाव देल ईला लेकीन उदारता अन्द काय इन घाई तयार आगुल.
\p
\v 6 लेकीन मात ईद आद: जो थ्वाळासा बोऊसतान, आव थ्वाळा अच कळदान; अदिक जो हापाळ बोऊसतान, आव हापाळ कळदान. 
\v 7 हर ऊंद मंळसा ह्यांग मन दा ठानस्यान हांग अच दान माळुल; ना कुळकुळ्स तेला अदिक ना दबाव देल, यतिकी परमेश्वर खुशी देल जो कोळतान आऊन से अच प्यार ईटतान. 
\v 8 परमेश्वर सप्पा प्रकार इन अनुग्रह नीमी हापाळ तरीका देल कोळ सकतान यदुर देल हर मात दा अदिक हर समय, सप्पा येनारा, जो नीमी जरूरी आद, नीम हात्‍ती ईरूल; अदिक हर ऊंद वळ्लीद क्याल्सा अन्द साटी नीम हात्‍ती हापाळ येनारा ईरूल. 
\v 9 ह्यांग शास्त्र दा लिख्सकु आद,
\q1 “आव सळग्यान माळदुन, आव कंगालगोळी दान कोट्टुन,
\q2 आऊन न्याय हमेशा बन्सकु ईत्‍तीत.”
\m
\v 10 इदुरसाटी जो बोऊसावाळा अक बींजा अदिक ऊमोर साटी रोट्टी कोळतान, आव नीमी बींजा कोट्टान, अदिक आऊक फलवन्त माळ्यान; अदिक नीम न्याय इन कायगोळी वाळुस्यान. 
\v 11 नीव हर मात दा सप्पा प्रकार इन उदारता अन्द साटी जो नाम द्वारा परमेश्वर उन धन्यवाद माळसुसतद, धनवान माळकु आदीर. 
\v 12 यतिकी ई स्यावा अक पुरा माळदुर देल ना सिर्फ पवित्र लॉकुर्द जरवतगोळ पुरा आगताव, लेकीन लॉकुर दी टु परमेश्वर उन भी हापाळ धन्यवाद आगतद. 
\v 13 यतिकी ई स्यावा अक प्रमाण स्वीकार माळकु आंदुर परमेश्वर उन महिमा प्रगट माळतार कि नीव मसीह अन्द खुशखबरी इक मान्सकु आऊन हात्‍ती ईरतीर, अदिक आंदुर्द अदिक सप्पा मुंदुर्द सहायता माळदुर दा उदारता प्रगट माळतेला ईरतीर. 
\v 14 अदिक आंदुर नीम साटी प्रार्थना माळतार; अदिक इदुरसाटी कि नीम मा परमेश्वर उन हापाळ अच अनुग्रह आद, नीम लालसा माळतेला ईरतार. 
\v 15 परमेश्वर उन, आऊन आ दान इन साटी जो वर्णन टु व्हार्या आद, धन्यवाद आगुल.
\c 10
\s पौलुस उन अधिकार
\p
\v 1 ना आवा पौलुस हुईन जो नीम मुंद गरीब आईन लेकीन बेन हिंद नीम दी साहस माळतीन, नीमी मसीह अन्द नम्रता अदिक कोमलता अन्द कारण समझुसतीन. 
\v 2 ना ईद विनती माळतीन कि नीम मुंद नानी निर्भय आगकु साहस माळोद बिळबाळुल, ह्यांग ना थ्वाळासा लॉकुर मा जो नामी मय इन अनुसार नळावाळेर सम्सतार, आंदरी साहस तोरसोद विचार माळतीन. 
\v 3 यतिकी नाव मय इन अनुसार नळुतेव अदिक वयाळतेव, तरी भी नाव मय इन अनुसार लळाई माळालेव. 
\v 4 यतिकी नाम लळाई इन हथियार शारीरिक ईला, लेकीन किल्लागोळ्द नाश माळोर साटी परमेश्वर उन सामर्थ्य देल परिपुर्ण आद. 
\v 5 इदुरसाटी नाव कल्पनागोळ्द अदिक हर ऊंद धोळ्द मात इन, जो परमेश्वर उन पयचान इन विरोध दा येळतद, खंडन माळतेव; अदिक हर ऊंद भावना अक कैद माळकु मसीह अन्द आग्याकारी माळ बुळतेव, 
\v 6 अदिक तयार ईरतेव कि याग नीम आग्या पालन पुरा आगेगुल, रा हर ऊंद प्रकार इन आग्या अन्द उल्लंघन माळावाळेर इक दण्डित माळेव.
\p
\v 7 नीव अवा मातगोळी नोळी, जो कण्णगोळ्द मुंद आव. अगर यारीकारा तान मा ईद भरोसा आद कि ना मसीह नव हुईन, रा आव ईद भी जान्स कोमुल कि ह्यांग आव मसीह नव हुन हांग अच नाव भी हुयेव. 
\v 8 यतिकी अगर ना आ अधिकार इन बारा दा मात्‍त यक्कुल घमण्ड तोरसाईन, जो प्रभु नीम बीगळुसोर साटी ईला लेकीन सुधरूसोद साटी नामी कोटान, रा ना लज्जित ईला आगाईन. 
\v 9 ईद ना इदुरसाटी अनतीन कि चिट्ठी गोळ्द द्वारा नीमी अंजक्या तोरसावाळा ठहरूसतीदील. 
\v 10 यतिकी आंदुर अनतार, “आऊन चिट्ठी गोळ रा गंभीर अदिक प्रभावशाली आव; लेकीन याग आव मुंद इरतान, रा आव मय देल कमजोर अदिक माताळदुर दा हल्का अरूकु आगतान.” 
\v 11 जो हिंग अनतान, आव ईद ऊमसुल कि ह्यांग बेन हिंद चिट्ठी गोळ दा नामव वचन आव, हांग अच नीम मुंद नामव क्याल्सा भी ईत्‍ताव.
\p
\v 12 यतिकी नामी ईद साहस हैलेच कि नाव तान तान इक आंदुर दा टु येनारा सांगुळ आळुल या आंदुर से खुद इक मीलुसुल, जो तान प्रशंसा खुद माळतार, अदिक तान तान इक आपस दा आळ्‍दकु तौलुस्कु आबुर दाबुर से मिलान माळतार, आ लॉकुर खुद मूर्ख ठहरूस्तार. 
\v 13 नाव रा सीमा टु व्हार्या घमण्ड यागलु भी माळतीदील, लेकीन अदा सीमा ताका जो परमेश्वर नाम साटी ठहरूस्यान, अदिक अदुर्दा नीव भी होट बंदीर, अदिक आऊंदा अनुसार घमण्ड भी माळ्यार. 
\v 14 यतिकी नाव तान मर्यादा अन्द व्हार्या होगालेव, जसा कि नीम ताका पोहचुसोद दशा दा ईला ईराईत, उलटा मसीह अन्द खुशखबरी केळ्सतेला नीम ताका पोहचुसेग्याव. 
\v 15 नाव मर्यादा टु व्हार्या दुसरा अन मेहनत मा घमण्ड माळालेव; लेकीन नामी आशा आद कि याग-याग नीम विश्वास वाढुस्तेला होदीत आग-आग नाव तान मर्यादा अन्द अनुसार नीम कारण मात्‍त वाढ़ुस्त होदेव, 
\v 16 ताकी नाव नीम मर्यादा से मुंद वाढ़ुस्कु खुशखबरी केळसेव, अदिक ईद ईला कि नाव दुसरा अन मर्यादा अन्द बुळ्क माळदव क्याल्सा मा घमण्ड माळेव.
\p
\v 17 ह्यांग शास्त्र अनतद, घमण्ड माळोद आद, आव प्रभु मा घमण्ड माळुल. 
\v 18 यतिकी जो तान बळाई माळतान आव ईला, लेकीन यार्द बळाई प्रभु माळतान, आवा ग्रहण माळकु आगतान.
\c 11
\s पौलुस अदिक ख्वाटा प्रेरित
\p
\v 1 अगर नीव नान थ्वाळासा मूर्खता सहन माळ कोमायदीर रा येन ईद भला आगाईत; हव, नान सहन भी माळी. 
\v 2 ना नीम बारा दा ईर्ष्या ईटतीन ह्यांग परमेश्वर ईटतान, नीव ऊंद पवित्र कुवारा पोर इन घाई आईर, यारी ना सिर्फ ऊंद मंळसा अक, खुद मसीह अन्द सांगुळ मदा माळोद वादा माळीदिन. 
\v 3 लेकीन ना अंजतीन कि ह्यांग हाव तान चतुराई देल हवा अक बयकुस्त, हांग अच नीम सीधा साधा मन अदिक पवित्रता देल जो मसीह अन्द सांगुळ ईर पायजे, येल्यारा भ्रष्ट माळकु आगबाळुल. 
\v 4 अगर यावारा नीम हात्‍ती बंदकु यावारा दुसरा यीशु उन प्रचार माळुल, यार्द प्रचार नाव माळीदील; या यातारा दुसरा आत्मा नीमी सिकुल, जो पयले ईला सिकीदाद; या मात्‍त यावारा खुशखबरी केळसुल यदरी नीव पयले मान्सीदील, रा नीव अदरी स्वीकार माळ कोमतीर.
\p
\v 5 ना रा सम्सतीन कि ना यातारा मात दा धोळ से धोळ प्रेरितगोळ से गोर्त हैलेच. 
\v 6 अगर ना माताळदुर दा अनाळी आईन, तरी भी ग्यान दा गोर्त हैलेच. नाव इदरी हर मात दा सप्पा प्रकार देल नीम साटी प्रगट माळेव.
\p
\v 7 येन ईदुर दा ना येनारा पाप माळीन कि ना नीमी परमेश्वर उन खुशखबरी ह्यांगारा-मुंगारा केळ्सदीन; अदिक तान तान इक नम्र माळदीन कि नीव म्याकुच आगेगी? 
\v 8 ना दुसरा मंडलीगोळी लुट्सदिन, मतलब ना आंदुर से मजदूरी ताकोंडीन ताकी नीम स्यावा माळाईन. 
\v 9 \x + \xo ११:९ \xo*\xt फिलिप्पिगोळ ४:१५-१८\xt*\x*अदिक याग ना नीम सांगुळ ईरीन अदिक नानी गोर्त आत, रा ना यारदु मा बोझ हाक्‍कीदिल, यतिकी वार्टुर मकिदुनिया नगर टु बंदकु नान जो गोर्त ईरोद अदरी पुरा माळदुर; अदिक ना हर मात दा तान तान इक नीम मा बोझ आगदुर देल रोक्सदिन, अदिक रोक्सकु ईटाईन. 
\v 10 अगर मसीह अन्द सच्चाई नान दा आद रा अखाया द्याश दा याऊ नानी ई घमण्ड देल रोक्सतिदिल. 
\v 11 येती? येन इदुरसाटी कि ना नीम से प्यार ईटालीन? परमेश्वर ईद अरूतान कि ना प्यार ईटतीन.
\p
\v 12 लेकीन जो ना माळतीन, अदा माळ्त ईराइन कि जो धोळ प्रेरित मवका ढुंढ्सतार ना आ धोळ सीक गोळालीन, ताकी याता मात दा आंदुर घमण्ड माळतार, अदुर्दा आंदुर नाम्द अच घाई ठहरूसुल. 
\v 13 यतिकी ईत्‍ता लॉकुर ख्वाटा प्रेरित, अदिक छल कपट देल क्याल्सा माळावाळेर, अदिक मसीह अन्द प्रेरितगोळ्द रूप ताकोमावाळेर उर. 
\v 14 ईद येनु अचम्भा अन्द मात आल्लच यतिकी शैतान खुद भी ज्योतिर्मय स्वर्गदूत उन रूप धारण माळतान. 
\v 15 इदुरसाटी अगर आऊन सेवक भी न्याय इन सेवकगोळ्द घाई रूप ताकोमुल, रा येनु धोळ्द मात हैलेच, लेकीन आंदुर न्याय आंदुर कर्मगोळ्द अनुसार आदीत.
\s प्रेरित उन रूप दा पौलुस उन दुख भोगसोद
\p
\v 16 ना मात्‍त अनतीन, याऊ नानी मूर्ख सम्सबाळुल; ईलारा मूर्ख अच सम्सकु नान सहन माळी, ताकी थ्वाळासा ना भी घमण्ड माळ सकाईन. 
\v 17 ई आत्मविश्वास इन घमण्ड दा जो येनारा ना अनतीन, अद प्रभु उन आग्या अन्द अनुसार ईला पर मान्सी मूर्खता देल अच अनतीन. 
\v 18 याग कि हापाळ सा लॉकुर मय इन अनुसार घमण्ड माळतार, रा ना भी घमण्ड माळाईन. 
\v 19 नीव रा समझदार ईतकु खुशी देल मूर्ख लॉकुर्द सहन माळ कोमतीर. 
\v 20 यतिकी याग यावारा नीमी दास माळ कोमतान, या फायदा नेगुतान, या फसुस कोमतान, या तान तान इक धोड्डेव माळतान, या नीम बाय मा क्याबरा बडुतान, रा नीव सहन माळ कोमतीर. 
\v 21 नान अनोद अनादर इन अच बारा दा आद, मान्सी नाव इदुरसाटी निर्बल घाई ईरेव.
\p लेकीन याग यावारा यातोदारा मात दा हिम्मत माळतान-ना मूर्खता देल अनतीन-रा ना भी हिम्मत माळतीन. 
\v 22 येन आंदुर अच इब्रानी उर? ना भी हुईन. येन आंदुर अच इस्त्राएली उर? ना भी हुईन. येन आंदुर अच अब्राहम उन वंश उर? ना भी हुईन. 
\v 23 \x + \xo ११:२३ \xo*\xt प्रेरितगोळ १६:२३\xt*\x*येन आंदुर अच मसीह अन्द सेवक उर ना यर्र इन घाई अनतीन ना आंदुर से यक्कुल आईन. यक्कुल मयनत माळदुर दा; घळी घळी कैद आगदुर दा; क्वाळागोळ तिंदुर दा; घळी घळी मृत्यु उन जोखीमगोळ दा. 
\v 24 अईद घन ना यहूदीगोळ्द कय देल उंच्यालीस क्वाळागोळ तिनदिन. 
\v 25 \x + \xo ११:२५ \xo*\xt प्रेरितगोळ १६:२२; \xt*\xt प्रेरितगोळ १४:१९\xt*\x*मुर घन ना बळ्सकोंड्डीन; ऊंद घन नान मा कल्लगोळ देल पथराव माळकु आत; मुर घन जहाज, यऊर मा ना येरीदिन, मुरदोदव; ऊंद ईळ्लक ऊंद हागुल ना समुद्र दा कळदिन. 
\v 26 \x + \xo ११:२६ \xo*\xt प्रेरितगोळ ९:२३; \xt*\xt प्रेरितगोळ १४:५\xt*\x*ना घळी घळी यात्रागोळ दा; गांगागोळ जोखीमगोळ दा; डाकूगोळ जोखीमगोळ दा; तान जातीवाळेर देल जोखीमगोळ दा; गैरयहूदीगोळ देल जोखीमगोळ दा; नगरगोळ जोखीमगोळ दा; आळी इन जोखीमगोळ दा; समुद्र अन्द जोखीमगोळ दा; ख्वाटा वार्टुर्द न्याड्या जोखीमगोळ दा ईत्‍तीन. 
\v 27 मयनत अदिक कष्ट दा; घळी घळी च्याता ईरदुर दा; हसु-नीरअळ्क दा; घळी घळी उपास माळदुर दा; सोळ इन दिन दा; बिन फळक्या अन्द ईरदुर दा; 
\v 28 अदिक दुसरा मातगोळी बिटकु यऊर वर्णन ना माळालीन; सप्पा मंडलीगोळ्द चिन्ता हर दिन नानी वत्‍त बुळतद. 
\v 29 यार निर्बलता देल ना निर्बल आगालीन? यार्द ठोकर तिंदुर देल नान जीव नोयाल?
\p
\v 30 अगर घमण्ड माळोद जरूरी आद, रा ना तान निर्बलता अन्द मातगोळ मा घमण्ड माळाईन. 
\v 31 प्रभु यीशु उन परमेश्वर अदिक आप्प जो हमेशा धन्य आन, अरूतान कि ना ख्वाटा माताळालीन. 
\v 32 \x + \xo ११:३२ \xo*\xt प्रेरितगोळ ९:२३-२५\xt*\x*दमिश्क नगर दा अरितास राजा दी टु जो शासक ईरोन, आव नानी हुळसुसोर साटी दमिश्किगोळ्द नगर मा पयरा कुर्सकु ईटीदुन. 
\v 33 लेकीन नानी जाळी इन माळ्द फुट्टी दा कुर्सकु ऊंद दिवार इन खिळकी टु ईळ्सकु आत, ईत्‍ता प्रकार देल ना आऊन कय दा टु ऊळ्दकु होटोदिन. \fig शयर इन दरवाजा अदिक दिवार दी होगतेला|alt="Entrance to the city gate and wall" src="hk00238c.tif" size="col" copy="Horace Knowles ©" ref="११:३२"\fig*
\c 12
\s पौलुस उन दिव्य दर्शन
\p
\v 1 यतिकी घमण्ड माळोद नान साटी ठीक हैलेच तरी भी माळोद बिळतद; इदुरसाटी ना प्रभु उन कोळ्द दर्शनगोळ अदिक प्रकाशगोळ्द चर्चा माळाईन. 
\v 2 ना मसीह दा ऊंद मंळसा अक अरूतीन; जो चौदा वर्ष आग्याव कि मालूम ईला शरीर सहित, मालूम ईला शरीर रहित, परमेश्वर अरूतान; हिंग मंळसा तिसरा स्वर्ग ताका नेगुकु आदुन. 
\v 3 ना हिंग मंळसा अक अरूतीन कि मालूम ईला शरीर सहित, या मालूम ईला शरीर रहित परमेश्वर अच अरूतान 
\v 4 कि स्वर्गलोक मा नेगुकु आदुन, अदिक हिंग मातगोळ केळदुन जो माताळकु आगालव; अदिक आ मातगोळी बाय मा तरोद बराबर हैलेच. 
\v 5 हिंग मंळसा मा रा ना घमण्ड माळाईन, लेकीन तान मा तान निर्बलतागोळी बिटकु, तान बारा दा घमण्ड माळतीदील. 
\v 6 यतिकी अगर ना घमण्ड माळोद चाहसाईन भी रा मूर्ख आगतीदील, यतिकी ना सही माताळाईन; तरी भी रूक्सेगतिन, हिंग आगबाळुल कि ह्यांग नानी यावारा नोळतान या नान से केळतान, नानी अदुर देल यक्कुल समसुल.
\p
\v 7 इदुरसाटी कि ना परमेश्वर उन प्रकाशन इन यक्‍कुलता अन कारण तुम्मेगाईन, नान मय दा ऊंद मुळ्ल नळ्सकु आत, मतलब शैतान उन ऊंद स्वर्गदूत नानी बुक्‍की बडुल अदिक घमण्ड माळदुर देल नानी रोक्सकु ईटुल. 
\v 8 ईदुर बारा दा ना प्रभु से मुर घन विनती माळीन कि ईद नान से दुर आगेगुल. 
\v 9 अदिक आव नान से अंदुन, “नान अनुग्रह नीन साटी हापाळ आद; यतिकी नान सामर्थ्य निर्बलता दा सिद्ध आगतद.” इदुरसाटी ना हापाळ खुशी देल तान निर्बलतागोळ मा घमण्ड माळाईन कि मसीह अन्द सामर्थ्य नान मा सावली माळतेला ईरूल. 
\v 10 ई कारण ना मसीह अन्द साटी निर्बलतागोळ दा, अपमान गोळ दा, अदिक गरीबी दा, अदिक उपद्रवगोळ दा, अदिक संकटगोळ दा खुश आईन; यतिकी याग ना निर्बल ईरतीन आग अच सामर्थी आगतीन.
\s कुरिन्थिगोळ्द साटी पौलुस उन चिन्ता
\p
\v 11 ना मूर्ख रा बन्सदीन, लेकीन नीव अच नानी ईद माळोर साटी मजबुर माळदीर. नीव रा नान प्रशंसा माळायदीर, यतिकी अगर ना येनु हैलेच, तरी भी आ धोड्डेर से धोड्डेर प्रेरितगोळ से यातोदारा मात दा गोर्त हैलेच. 
\v 12 सही प्रेरितगोळ्द लक्षण भी नीम न्याड्या सप्पा प्रकार इन धीरज सांगुळ चमत्कारगोळ, अदिक अदभुत क्याल्सागोळ, अदिक सामर्थ्य अन्द क्याल्सागोळ देल तोर्सकु आदव. 
\v 13 नीव याता मात दा दुसरा मंडलीगोळ देल गोर्त ईरीर, सिर्फ इदुर दा कि ना नीम मा तान भार हाक्‍कीदिल. नान ईद अन्याय माफ माळी.
\p
\v 14 ना तिसरा घन नीम हात्‍ती बरली तयार आईन, अदिक ना नीम मा यातोदारा भार हाकतिदिल, यतिकी ना नीम धन दौलत ईला उलटा नीमी का चाहासतीन. यतिकी चिकोरगोळी मोय-आप्प उन साटी धन दौलत जमा माळोद बिळाल, पर मोय-आप्प उक चिकोरगोळ साटी धन जमा माळोद बिळतद. 
\v 15 ना नीम आत्मागोळ साटी हापाळ खुशी देल खर्च माळाईन, उलटा खुद भी खर्च आगेगाईन. येन याट यक्कुल ना नीम से प्यार ईटतीन, आट अच गोर्त नीव नान से प्यार ईट्टीर?
\p
\v 16 हिंग आग सकतद कि ना नीम मा भार हाकीदिल, लेकीन चतुराई देल नीमी ध्वाका कोटकु फसुस कोंडीन! 
\v 17 भला, यारी ना नीम हात्‍ती कळुदीन, येन आंदुर दा टु यारदारा द्वारा ना छल कपट माळकु नीम से येनारा ताकोम कोंडीन? 
\v 18 ना तीतुस उक विनती माळदीन अदिक आऊन सांगुळ ऊंद वार्ट उक कळुदीन, रा तीतुस छल कपट माळकु नीम से येनारा ताकोंडुन का? नाव ऊंद अच आत्मा देल सारखा अच हादी देल नळदिदील का?
\p
\v 19 नीव ईगासताका सम्सतिदीर कि नाव नीम मुंद खुद इन बचाव माळेतेव. नाव रा परमेश्वर उक उपस्थित जान्सकु मसीह दा माताळतेव, अदिक हे प्रियगोळा, सप्पा मातगोळ नीम उन्नती साटी अच अनतेव. 
\v 20 नानी अंज्क आद, ईदारा हिंग आगबाळुल कि ना बंदकु ह्यांग चाहासतीन, हांंग नीमी नोळतीदिल; अदिक नानी भी ह्यांग नीव चाहसालीर हांग अच नोळीर; अदिक नीम दा झगळा, जलन, सिट्ट, विरोध, ईर्ष्या, चुगली, अभिमान अदिक चेंगळ आगुल; 
\v 21 अदिक ईलारा हिंग आगबाळुल कि नान परमेश्वर नान मात्‍त नीम मान्या बंदुर मा नान मा दबाव हाकुल अदिक नानी हापाळ मुंदुर साटी मात्‍त शोक माळोद बिळुल, यार पयले पाप माळीदुर अदिक खराब क्याल्सा अदिक व्यभिचार अदिक वासना देल, जो आंदुर माळदुर, मन तिर्गुसिदील.
\c 13
\s आखरी चेतावनी
\p
\v 1 ईग तिसरा बार ना नीम हात्‍ती बरतीन: हर ऊंद मुकदमा सिद्ध माळोर साटी येढ्ढ या मुर गवाहगोळ्द जरवत ईरतद. 
\v 2 ह्यांग ना दुसरा बार नीम सांगुळ ईरीन, हांगा ईग दुर ईरतेला आ लॉकुर से यार पयले पाप माळ्यार, अदिक अन्य सप्पा लॉकुर से ईग पयले से अन बुळतीन कि अगर ना मात बराईन रा बिळतीदील, 
\v 3 यतिकी नीव रा इदुर्द सबुत चाहासतीर कि मसीह नान दा माताळतान, जो नीम साटी कमजोर ईला लेकीन नीम दा सामर्थी आद. 
\v 4 आव कमजोर इन कारण क्रूस मा येर्सकु रा आदुन, तरी भी परमेश्वर उन सामर्थ्य देल जित्‍ता आन. नाव भी अदुर्दा कमजोर आयेव, लेकीन परमेश्वर देल जो नीम साटी आन, आऊन सांगुळ ऊळदेव.
\p
\v 5 तान तान इक जाच विश्वास दा आईर का ईला. तान तान इक जाच. येन नीव तान बारा दा ईद जान्सालीर कि यीशु मसीह नीम दा आन? ईलारा नीव जाच दा निकम्मा होटीर. 
\v 6 लेकीन नान आशा आद कि नीव जान्स कोंडीर कि नाव निकम्मा हैलेच. 
\v 7 नाव तान परमेश्वर से ईद प्रार्थना माळतेव कि नीव येनु बुराई माळबाळी, इदुरसाटी ईला कि नाव सही कांळ्सीगेव, लेकीन इदुरसाटी कि नीव भलाई माळी, बाक नाव निकम्मा अच ठहरूसेगुल. 
\v 8 यतिकी नाव सच्चाई इन विरोध दा येनु माळ सकालेव, लेकीन सच्चाई इन साटी इच माळ सकतेव. 
\v 9 याग नाव कमजोर आयेव अदिक नीव ताकतवर आईर, रा नाव खुश आगतेव, अदिक ईद प्रार्थना भी माळतेव कि नीव सिद्ध आगेगी. 
\v 10 ईदुर कारण ना नीम बेन हींद ई मातगोळी लिख्सतीन, कि उपस्थित आगकु नानी आ अधिकार इन अनुसार यदरी प्रभु बीगळुसोर साटी ईला लेकीन नीम भलाई इन साटी कोटान, कटनाई देल येनु माळोद बिळबाळुल.
\s आखरी अभिवादन
\p
\v 11 इदुरसाटी हे वार्टुरा अदिक आकतींगेरा, खुश ईरी; सिद्ध आगतेला होगी; हिम्मत ईटी; ऊंदा मन ईटी; मेल मिलाप देल ईरी. अदिक प्यार अदिक शांती इन दाता परमेश्वर नीम सांगुळ ईत्‍तान.
\p
\v 12 परमेश्वर उन शुद्ध प्यार दा आबुर दाबुरी पवित्र चुम्मा देल नमस्कार माळी.
\p
\v 13 सप्पा मसीह परमेश्वर उन लॉकुर नीमी प्यार अदिक नमस्कार अनतार.
\p
\v 14 प्रभु यीशु मसीह अन अनुग्रह अदिक परमेश्वर उन प्यार अदिक पवित्र आत्मा अन सहभागीता नीम सप्पा मुंदुर सांगुळ आगतेला ईरूल.