\id 1TI - Holiya
\ide UTF-8
\h १ तीमुथियुस
\toc3 १ तीमुथियुस
\toc2 १ तीमुथियुस
\toc1 तीमुथियुस उन हेसुर पौलुस प्रेरित उन पयला चिट्ठी
\mt2 तीमुथियुस के नाम पौलुस प्रेरित की पहली पत्री
\mt1 तीमुथियुस उन हेसुर पौलुस प्रेरित उन पयला चिट्ठी
\imt परिचय
\ip पयला तीमुथियुस उन किताब प्रेरित पौलुस तान चेला तीमुथियुस उक लिख्सद ऊंद चिट्ठी हुन. तीमुथियुस उन किताब शायद मसीह अन जनम इन बाद्दा ६२ से ६४ साल इन बाद्दा लिख्सकु आगीत. ईद पौलुस उन जीवन इन अन्त इन हात्‍ती आत. पौलुस उन तीमुथियुस उन सांगुळ ऊंद करीबी रिश्ता ईरोद अदिक आव आऊक हापाळ घन पार उन रूप दा संदर्भित माळदुन \xt फिलिप्पिगोळ २:२२\xt* \xt १ तीमुथियुस १:२; १:१८\xt*
\ip ईद पौलुस उन नाक चिट्ठी गोळ दा टु ऊंद चिट्ठी हुन यदरी मंडली इन बजाय यातारा मंळसा अक संबोधित माळकु आगतद. दुसरा मुर चिट्ठी दुसरा तीमुथियुस, तीतुस, अदिक फिलिप्पी. पयला तीमुथियुस दा मंडली इन आराधना \xt २:१-१५\xt* मंडली नोर अधिकारीगोळ साटी लायकत \xt ३:१-१३\xt* अदिक ख्वाटा गुरुगोळ खिलाप चेतावनीगोळ \xt १:३-११; ४:१-५; ६:२-५\xt* ईद तोर्सतद कि पौलुस तीमुथियुस उक मंडली इन न्याड्या उपदेशक बनसोद प्रशिक्षण कोळोन. पयला तीमुथियुस दा हापाळ सिद्धांतगोळ आव जो नाम मंडली इन मंत्रालय इन प्रबंधन माळोर दा सहायता माळ सकतेव.
\iot रूप-रेखा
\io1 १. पौलुस तीमुथियुस उन अभिवादन से सुरूवात माळतान. \ior १:१-२\ior*
\io1 २. आग आव तीमुथियुस उक ख्वाटा गुरुगोळ खिलाप चेतावनी कोळतान. \ior १:३-११\ior*
\io1 ३. पौलुस यीशु मसीह अन साटी याट आभारी आन, ईद हेळतान. \ior १:१२-१९\ior*
\io1 ४. ईदुर बाद्दा आव तीमुथियुस उक आराधना अदिक मंडली इन अगुवा अन बारा दा निर्देश कोळतान. \ior २–३\ior*
\io1 ५. पौलुस तीमुथियुस उक थ्वाळासा आखरी निर्देश कोटकु तान चिट्ठी पुरा माळतान. \ior ४–६\ior*
\c 1
\p
\v 1 नामव उद्धारकर्ता परमेश्वर अदिक नाम्द आशा अन आधार मसीह यीशु उन आग्या देल मसीह यीशु उन प्रेरित पौलुस उन दी टु,
\p
\v 2 \x + \xo १:२ \xo*\xt प्रेरितगोळ १६:१\xt*\x*तीमुथियुस उन हेसुर जो विश्वास दा नानव खरा पार आन.
\p आप्प परमेश्वर, अदिक नामव प्रभु यीशु मसीह अन दी टु नीनी अनुग्रह, अदिक दया अदिक शांती सिकतेला ईरूल.
\s ख्वाटा गुरुगोळ विरूद्ध चेतावनी
\p
\v 3 ह्यांग ना मकिदुनिया अक होगतेला नीनी समझुसीदीन, कि इफिसुस दा ईतकु थ्वाळासा लॉकुरी आग्या कोळुल कि ख्वाटा सिद्धांतगोळ शिक्षा कोळबाळुल, 
\v 4 आंदरी अन पुरातन काल्पनिक कात्‍तागोळ अदिक अनन्त वंशावलीगोळ मा मन हचबाळी, यदुर देल विवाद आगताव, इव परमेश्वर उन कार्य ईला, जो विश्वास इन द्वारा आव आन. 
\v 5 आग्या अन उद्देश ईद आद कि शुद्ध मन अदिक वळ्लीद विवेक, प्यार अदिक कपट रहित विश्वास इन द्वारा बरतद. 
\v 6 इवरी बिटकु थ्वाळासा लॉकुर बेकार मातगोळ दी भटकुसेग्यार. 
\v 7 अदिक आंदुर व्यवस्था अन गुरु रा आगोद चाहसतार, लेकीन जो मातगोळ अनतार अदिक यवरी मजबूती देल माताळतार, आंदरी सम्सालेव भी.
\p
\v 8 लेकीन नाव जान्सतेव कि अगर यावारा व्यवस्था अक उचित रीति देल क्याल्सा दा तंदान रा अद भला आद. 
\v 9 नाव ईद भी जान्सतेव कि व्यवस्था लॉकुर साटी ईला लेकीन व्यवस्था अक ईला मान्सावाळेर, विद्रोह, परमेश्वर उन अनादर माळावाळेर, पापीगोळ, अपवित्र अदिक न्यायी मंळसागोळ, मोय आप्प उन घात माळावाळेर, हत्या माळावाळेर, 
\v 10 व्यभिचारीगोळ, गंळ्स गामिगोळ, गुलाम उक मारावाळेर, ख्वाटा माताळावाळेर, अदिक ख्वाटा गवाही तीनावाळेर, अदिक इंदुर्द अतिरिक्त खरा सिद्धांतगोळ शिक्षा अन विरोधीगोळ साटी ठहरूसकु आग्याद. 
\v 11 ईद खुशखबरी महिमामय परमेश्वर यार हात्‍ती सप्पा आशीषगोळ आव अदिक आऊन द्वारा नानी सौप्सकु आग्याद.
\s पौलुस मा प्रभु उन अनुग्रह
\p
\v 12 ना तान प्रभु यीशु मसीह अन्द याव नानी सामर्थ्य कोटान, धन्यवाद माळतीन कि आव नानी विश्वासलायक सम्सकु तान स्यावा अन्द साटी ठहरूसदुन. 
\v 13 \x + \xo १:१३ \xo*\xt प्रेरितगोळ ८:३; ९:४,५\xt*\x*ना रा पयले अपमान माळावाळा, अदिक सतुसावाळा, अदिक हिंसा माळावाळा ईरीन; तरी भी नान मा दया आत, यतिकी ना अविश्वास इन दशा दा बिना सोच समझुस्कु ई क्याल्सागोळ माळीदीन. 
\v 14 अदिक नाम प्रभु उन अनुग्रह आ विश्वास अदिक प्यार इन सांगुळ जो मसीह यीशु दा आद, हापाळ इदुर देल आत. 
\v 15 ईद मात खरा अदिक हर प्रकार देल मानसोद लायक आद कि मसीह यीशु पापीगोळ उद्धार माळोर साटी दुनिया दा बंदुन, यारदा सब से बेकार पापी ना आईन. 
\v 16 लेकीन नान मा इदुरसाटी दया आत कि ना सब से बेकार पापी नान दा यीशु मसीह तान पुरा सहनशीलता तोरसुल, कि जो लॉकुर आऊन मा अनन्त जीवन साटी विश्वास माळ्यार आंदुर साटी ना ऊंद आदर्श बनसाईन. 
\v 17 ईग अनन्त राजा मतलब अविनाशी, अदृश्य, ऊंद मात्र परमेश्वर उन आदर अदिक महिमा हमेशा हमेशा आगतेला ईरूल. आमीन.
\p
\v 18 हे नान पारा तीमुथियुस, आ भविष्यवाणीगोळ अनुसार जो पयले नीन बारा दा माळकु आगीदव, ना ईद आग्या कोळतीन कि नी अऊर्द अनुसार वळ्लीद लळाई माळतेला ईर, 
\v 19 अदिक विश्वास अदिक आ वळ्लीद विवेक इक हुडुकु ईट, यदुर्द इनकार माळदुर कारण यास मुंदुर्द विश्वास रूपी जहाज मुळकेत. 
\v 20 आंदुर दा टु उच हुमिनयुस अदिक सिकन्दर हुन, यारी ना शैतान उक कोट्ट बुटीन कि आंदुर परमेश्वर उन अपमान माळोद कलु बाळुल.
\c 2
\s आराधना अन निर्देश
\p
\v 1 ईग ना सब से पयले ईद आग्रह माळतीन कि विनती, प्रार्थना, निवेदन, अदिक धन्यवाद सप्पा मंळसागोळ साटी माळकु आगुल. 
\v 2 राजागोळ अदिक सप्पा धोळ अधिकारीगोळ्द निमित्त इदुरसाटी कि नाव शांती अदिक चैन इन सांगुळ परमेश्वर उक आदर कोळतेला अदिक पवित्रता देल जीवन बीतुसेव 
\v 3 ईद नाम उद्धारकर्ता परमेश्वर उक वळ्लीसा हततद अदिक प्रसन्न भी माळतद, 
\v 4 जो ईद चाहासतान कि सप्पा मंळसागोळ ऊळ्सकु आगुल, अदिक आंदुर सच्चाई इन ग्यान इक जान्स कोमुल. 
\v 5 यतिकी परमेश्वर ऊंद अच आन, अदिक परमेश्वर अदिक मंळसागोळ न्याड्या दा भी ऊंद अच मध्यस्थ भी आन, मतलब मसीह यीशु जो मंळसा हुन. 
\v 6 यीशु नाम सप्पा मुंदरी छुटकारा कोळोर साटी तान बलिदान कोटकु आजादी कोंडुन, अदिक आऊन गवाही सही समय मा कोटकु आत. 
\v 7 \x + \xo २:७ \xo*\xt २ तीमुथियुस १:११\xt*\x*ना सही अनतीन, ख्वाटा माताळालीन, कि ना ईदा उद्देश देल प्रचारक अदिक प्रेरित अदिक गैरयहूदीगोळ साटी खरा विश्वास इन उपदेशक ठहरूस्कु आदीन.
\p
\v 8 इदुरसाटी मंडली दा आराधना हाळाहोती ना चाहसतीन कि हर जागा मंळसा, बिना सिट्ट अदिक विवाद इन पवित्र कयगोळी नेगुकु प्रार्थना माळतोगुल. 
\v 9 \x + \xo २:९ \xo*\xt १ पतरस ३:३\xt*\x*हांग अच आर्तेर भी नम्रता अदिक खुद: नियंत्रण इन सांगुळ साधासुधा कपळागोळ देल तान तान इक सवारसुल; ना कि चुट्टी सवारसकु अदिक ना व्हान्ना अदिक मोती अदिक किमती कपळा देल, 
\v 10 लेकीन भला क्याल्सा देल, यतिकी परमेश्वर उन भक्ति माळावळतेर आर्तेरी भी ईदा वळ्लीद आद. 
\v 11 आर्त इक शांतता देल अदिक पुरा हात्‍ती ता देल कलु पायजे. 
\v 12 ना आर्तेरी ईजाजत कोळालीन कि आर्त ना शिक्षा कोळुल अदिक ना मंळसा मा अधिकार जतुसुल, लेकीन सुंगा मुंगा ईरूल. 
\v 13 यतिकी आदम पयले, आऊन बाद्दा हवा माळकु आदुर; 
\v 14 अदिक आदम ईला जो बहकुसकु आगीदुन, लेकीन आ आर्त हुळ जो बहकुसकु आगिदुर अदिक पापी ठहरूसदुर. 
\v 15 \f + \fr २:१५ \fr*\ft चिकोरी पैदा माळकु उद्धार ताकोंडार: या चिकोरी हाळाहोती सुरक्षित ईटकु आदार. \ft*\f* तरी भी आर्त इक चिकोर पैदा माळोर द्वारा उद्धार सिक्‍कीत, अगर आक संयम सांगुळ विश्वास, प्यार, अदिक पवित्रता दा संची ईरूल.
\c 3
\s मंडली नोर अध्यक्ष
\p
\v 1 ईद मात सही आद अगर यावारा तान मन दा सोचतान कि स्याण्णा आगोद चाहासतान, आव भला क्याल्सा अन इच्छा माळतान. 
\v 2 \x + \xo ३:२ \xo*\xt तीतुस १:६-९\xt*\x*\f + \fr ३:२ \fr*\ft सिर्फ ऊंदा हिंग्स ईरूल; या ऊंदा घन मदा आगुल.\ft*\f* ईद जरूरी आद कि स्याण्णा निर्दोष, अदिक ऊंदा हिंग्स उन गंळ्स, शालीन, आत्मसंयमी, आदरणीय, अतिथी-सत्कार माळावाळा, अदिक कलसोर दा निपुण ईरूल. 
\v 3 कुडावाळा या बडाबडी माळावाळा ईला ईरूल; बल्‍की मुलायम ईरूल, अदिक ना झगळेलु, अदिक ना धन इन लालची ईरूल. 
\v 4 तान मान्ना अन वळ्लीद व्यवस्था माळुल, अदिक तान चिकोर चिंळ्गेर अनुशासन दा ईटकु आंदुर से आदर ताकोमावाळा ईरूल. 
\v 5 अगर यावारा तान मान्ना अन्द अच व्यवस्था माळोद ईला जान्सतीदान, रा परमेश्वर उन मंडली इन रखवाली ह्यांग माळ्यान? 
\v 6 बाक ईद कि आव विश्वास दा परीपक्व ईरूल, ईदारा हिंग आगबाळुल कि अभिमान माळकु शैतान उन घाई दण्ड पाऊसुल. 
\v 7 अदिक मंडली इन व्हार्या दा भी आऊन हेसुर आगुल, हिंग आगबाळुल कि अपमानीत आगकु शैतान उन फासा दा फसुसेगुल.
\s मंडली नोर सेवक
\p
\v 8 हांग अच मंडली अन्द सेवकगोळी भी गंभीर आग पायजे, येढ्ढ रंगवाळेर, कुडावाळेर अदिक नीच कमाई इन लोभ माळावाळेर ईला ईरूल; 
\v 9 लेकीन विश्वास इन भेद इन शुद्ध विवेक इक गहराई देल हुडुकु ईटुल. 
\v 10 अदिक आंदुर पयले परख आगुल, आग अगर निर्दोष होट्टुर रा बाक मंडली इन सेवक उन क्याल्सा माळुल. 
\v 11 ईदा प्रकार देल आंदुर हिंग्सुर भी आदर ताकोमा लायक आर्तेर ईरूल; अदिक अपमान इन मातगोळी माळावळतेर ईला ईरूल, लेकीन शालीन अदिक सप्पा मातगोळ दा विश्वास इन लायक ईरूल. 
\v 12 मंडली इन सेवक ऊंदा हिंग्स उन गंळ्स ईरूल अदिक चिकोर चिण्ग अदिक तान मान्ना अन्द वळ्लीद व्यवस्था माळोद जानसुल. 
\v 13 यतिकी जो मंडली इन सेवक वळ्लीद क्याल्सा माळतार, आंदुर तान साटी वळ्लीद पद अदिक मसीह यीशु दा जो आंदुर्द विश्वास आद, अदुर्दा महान साहस हासिल माळतार.
\s महान राज
\p
\v 14 ना नीन हात्‍ती राटनेरी बरोद आशा ईटदुर मा भी ई चिट्ठी नीनी इदुरसाटी लिख्सतीन, 
\v 15 कि अगर नान बंदुर दा समय आगुल, रा नी जान्स कोम कि परमेश्वर उन घराना दा जो जित्‍ता परमेश्वर उन मंडली आद अदिक जो सच्चाई इन खंबा अदिक पायवा आद, लॉकुर आपस दा ह्यांग बर्ताव माळ पायजे. 
\v 16 ईदुर दा संदेह हैलेच कि भक्ति इन भेद गंभीर आद, मतलब
\q1 अद जो मय दा प्रगट आत,
\q2 आत्मा दा न्यायी ठहरूस्त,
\q1 स्वर्गदूतगोळ इक कांळ्सदुन,
\q2 गैरयहूदीगोळ दा आऊन प्रचार आत,
\q1 दुनिया दा आऊन मा विश्वास माळकु आत,
\q2 अदिक महिमा दा म्याकुच नेगुकु आदुन.
\c 4
\s तीमुथियुस उक निर्देश
\p
\v 1 पवित्र आत्मा स्पष्टता देल अनतद कि बरावाळा समयगोळ दा हापाळ सप्पा लॉकुर तान विश्वास इक त्याग्स बुट्टार अदिक भटकुसावाळा आत्मागोळ अदिक शैतान उन द्वारा कल्सद मातगोळ हींद आगेदार. 
\v 2 ईद आ ख्वाटा पाखंडी मंळसागोळ्द कारण आदीन, यार्द विवेक मान्सी होततेला लोवा देल दाग्सकु आग्याद, 
\v 3 जो मदा माळोर से रोकस्यार, अदिक ऊमोद येनारा वस्तुगोळ देल अलग ईरोद आग्या कोट्टार, यवरी परमेश्वर इदुरसाटी घळुस्यान कि विश्वासी अदिक सच्चाई इक अरावाळेर अवरी धन्यवाद इन सांगुळ तिनुल. 
\v 4 यतिकी परमेश्वर उन माळ्द हर ऊंद वस्तु वळ्लीद आद, अदिक यातोदु वस्तु अस्वीकार माळोद लायक हैलेच; लेकीन ईद कि धन्यवाद इन सांगुळ तिनकु आगुल, 
\v 5 यतिकी परमेश्वर उन वचन अदिक प्रार्थना अन द्वारा शुद्ध आगेगतद.
\s यीशु मसीह ऊंद वळ्लेव सेवक
\p
\v 6 अगर नी वार्टुर इक ई मातगोळ्द याद कोळतेला ईत्या, अदिक विश्वास इन सच्चाई अदिक आ वळ्लीद शिक्षा अन मातगोळ से, जो नी मान्सतेला बंद्या; रा मसीह यीशु उन वळ्लेव सेवक ठहरूस्या. 
\v 7 परमेश्वर रहित कात्‍ता-कात्‍तागोळ देल जो सिर्फ हाळामुंडगोळ द्वारा केळ्सकु अशुध्द कात्‍तागोळ आव येनु संबंध ईटबाळ, लेकीन भक्ति इन साधना माळ. 
\v 8 यतिकी मय इन साधना देल फायदा गोर्त आगतद, लेकीन भक्ति सप्पा मातगोळ साटी लाभदायक आद, यतिकी ई समय इन जीवन अदिक बरावाळा जीवन इन भी वादा इदुर्दा साटी आद. 
\v 9 हिंग ऊंद विश्वास ईटा लायक कहावत आद, जो पुरा रीति देल स्वीकार माळा लायक आद. 
\v 10 यतिकी नाव मयनत अदिक कोशिश इदुरसाटी माळतेव कि नाम आशा आ जित्‍ता परमेश्वर मा आद, जो सप्पा मंळसागोळ्द अदिक खास माळकु विश्वासीगोळव उद्धारकर्ता आन.
\p
\v 11 इव मातगोळ्द आग्या कोळ अदिक कल्सतेला ईर. 
\v 12 याऊ नीन जवानी इक तुच्छ सम्सबाळुल; लेकीन वचन, माताळदुर दा, चाल-चलन, अदिक प्यार, अदिक विश्वास, अदिक पवित्रता दा विश्वासीगोळ साटी आदर्श बनसेग. 
\v 13 यागासताका ना बरालीन, आगासताका लॉकुर न्याड्या प्रभु उन वचन वाचुसदुर दा अदिक उपदेश कोळदुर दा अदिक कल्सदुर दा तान इक मग्न ईट. 
\v 14 आ वरदान इन प्रती जो नीन दा आद, अदिक भविष्यवाणी इन द्वारा स्याणागोळ्द कय दा ईटा होती नीनी सीकीत, अदरी अनदेखा माळबाळ. 
\v 15 ई मातगोळ्द विचार माळ्त ईर अदिक ईऊर दा तान ध्यान हचकु ईट, ताकी नीन उन्नती सप्पा मुंदुर मा प्रगट आगुल. 
\v 16 तान जीवन इन दी अदिक तान शिक्षागोळ सावधानी ईट. ई मातगोळ मा संची ईर, यतिकी अगर हिंग माळतेला ईत्या रा नी तान अदिक तान केळावाळेर साटी भी उद्धार इन कारण आद्या.
\c 5
\s विश्वासीगोळ प्रती जिम्मेदारीगोळ
\p
\v 1 यातारा बाट्ट उक कठोरता देल दनकुस बाळेत, लेकीन आऊक आप्प सम्सकु समझुसबुळ, अदिक हारोदोर मंळसागोळी वार्ट सम्सकु; 
\v 2 हाळामुंड आर्तेर इक मोय सम्सकु; अदिक हारोदोर आर्तेर इक आकतींग सम्सकु पुरा पवित्रता देल समझुसबुळ.
\p
\v 3 आ रांड्यागोळ्द ध्यान ईट, जो सही दा जरवतमंद आर. 
\v 4 अगर यातारा रांड्या अन चिकोर या नातु-नतरागोळ ईतीदार, रा आंदुर तान मोय-आप्प अदिक आजा-आजी इन पालन पोषण इन बदला चुकुसली अदिक तान परिवार इन चिन्ता माळोर द्वारा तान न्यायी मातगोळी जीवन कार्य दा तरोद पयले कलु पायजे, यतिकी ईद परमेश्वर उक पंसद आद. 
\v 5 जो रांड्या सही दा जरवतमंद आर, अदिक आकिन यारू हैलेच, अदिक आक तान पुरा आशा परमेश्वर मा ईट्यार, अदिक ईळ्लक हागुल विनती अदिक प्रार्थना माळतेला परमेश्वर से मदत बेळतार; 
\v 6 लेकीन जो रांड्या भोग विलास दा जीऊसतार, आक जित्‍ता हैलेच लेकीन जित्‍ता दा का सोतोग्यार. 
\v 7 इव मातगोळ्द भी लॉकुरी निर्देश कोळतोग ताकी आंदुर निर्दोष ईरूल. 
\v 8 लेकीन अगर यावारा तान रिश्तेदारगोळ दी, विशेष तान परिवार इन सदस्यगोळ्द मदत माळालुन, रा आव विश्वास देल तिरगेग्यान अदिक अविश्वासी देल भी हापाळ बुरा बनसेग्यान.
\p
\v 9 आ रांड्यागोळ्द विशेष सुची दा जो आर्थिक सहायता ताकोमेत्यार आका रांड्या अन हेसुर लिख्सकु आगुल जो साठ वर्ष से कमीनोर ईला ईतीदार, अदिक तान गंळ्स उन विश्वासलायक ईतीदार, 
\v 10 अदिक भला क्याल्सा दा सुनाम ईतीदार, याक चिकोर्द पालन-पोषण माळीदार; पाऊनागोळ्द स्यावा माळीदार, पवित्र लॉकुर्द काल तोळदिदार, दुखीगोळ्द सहायता माळीदार, अदिक हर ऊंद भला क्याल्सा दा मन हचीदार.
\p
\v 11 लेकीन हारोदोर रांड्यागितेर्द ईद सुची सम्मिलीत माळबाळी यतिकी मसीह अन प्रती आंदुर्द समरपन मा याग आंदुर्द बारा दा वासना पुरा इच्छागोळ हावी आगताव रा आंदुर मात मदा माळोद चाहसतार, 
\v 12 अदिक दोषी ठहरूस्तार, यतिकी आंदुर तान पयला वचन इक मुर्द बुट्टुर. 
\v 13 ईदुर अलावा आंदुर बेकार आगतार अदिक मानोन-मान्नी वयाळकु आलसी आगोद कलुतार, अदिक सिर्फ आलसी ईला लेकीन ईत्‍त आत्‍त माळतार अदिक बिना मतलब इन अनुचित मातगोळ माताळतार. 
\v 14 इदुरसाटी ना ईद चाहासतीन कि हारोदोर रांड्यागितेर मदा माळुल, अदिक चिकोर हाळुल अदिक मान्न मकान संभाळसुल, अदिक यातारा विरोध इक बदनाम माळोद मवका कोळबाळुल. 
\v 15 यतिकी हापाळ रा बयकुस्कु शैतान उन हिंद आगेग्यार. 
\v 16 अगर यातारा विश्वासीगीत इन मान्या रांड्यागोळ आर, रा आका आंदुर्द सहायता माळुल कि मंडली मा बोझ ईला आगुल, ताकी आंदुर आंदुर्द सहायता माळ सकुल जो रांड्यागोळ खराखुरा जरवतमंद आर.
\p
\v 17 जो हाळाबाट्टुर मंडली इन वळ्लीद स्यावा माळतार, खास माळकु आंदुर जो वचन केळसोर अदिक कल्सदुर दा मयनत माळतार, आंदुर येढ्ढ गुणा आदर इन लायक सम्सकु आगुल. 
\v 18 \x + \xo ५:१८ \xo*\xt मत्ती १०:१०; लूका १०:७\xt*\x*यतिकी शास्त्र अनतद, “जो वस्ता दावन इन आद अदुर बाय कट बाळेतीर,” यतिकी “मजदूर तान मजदूरी इन हकदार आन.” 
\v 19 यातारा दोष यातारा मंडली इन हाळाबाट्टुर मा हचकु आगुल रा येढ्ढ या मुर गवाहगोळ्द बिना अदरी केळबाळ. 
\v 20 पाप माळावाळेर इक सप्पा मुंदुर मुंद दनकुस, ताकी दुसरा लॉकुर भी अंजुल.
\p
\v 21 परमेश्वर, अदिक मसीह यीशु अदिक निवळुस्द स्वर्गदूतगोळ इक उपस्थित जान्सकु ना नीनी चेतावनी कोळतीन कि ई निर्देशगोळी बिना मतभेद इन अदिक यावारा ऊंद इन पक्षपात ताकोमकु यातोदु क्याल्सा माळबाळ. 
\v 22 मंडली इन स्यावा अन्द नियुक्ती इन साटी बिना सोच सम्सकु यारदारा मा तान कय राटनेरी ईट बाळेत, अदिक दुसरा अन पापगोळ दा भागी आगबाळेत; तान-तान इक पवित्र माळकु ईटेत.
\p
\v 23 सिर्फ नीर इक अच कुडावाळा ईरबाळ, लेकीन तान व्हाट्टा अन्द घळी-घळी बिमार आगोद कारण थ्वाळा-थ्वाळा अंगुर इन रास्सा भी क्याल्सा दा तरतोग.
\p
\v 24 थ्वाळासा मंळसागोळव पाप स्पष्ट रूप देल प्रगट आगेगताव, अदिक न्याय इन साटी प्रस्तुत माळकु आगेगताव, लेकीन दुसरा मंळसागोळव पाप बाद्दा प्रगट आगताव. 
\v 25 ईदा प्रकार भला क्याल्सा भी स्पष्ट रूप देल प्रगट आगेगताव; लेकीन जो भला क्याल्सा प्रगट आगालव अव भी होचकु ईर सकालव.
\c 6
\p
\v 1 यास दासगोळ जुआळी इन ल्यालमा आर, आंदुर तान-तान स्वामी इक धोळ्द आदर इन लायक जानसुल, ताकी परमेश्वर उन हेसुर अदिक शिक्षा अन्द अपमान आगबाळुल.
\s ख्वाटा शिक्षा अदिक धन इन लोभ
\p
\v 2 यार स्वामी विश्वासी आर आंदरी आंदुर कम आदर कोळबाळुल यतिकी आंदुर वार्टुर उर, बल्‍की आंदुर्द मात्‍त यक्कुल स्यावा माळी, यतिकी यारी स्यावा अन लाभ सीकतद आंदुर विश्वासी अदिक आंदुर प्रिय आर. ई मातगोळ शिक्षा कोळी अदिक हांग अच माळोर साटी प्रोत्साहित माळतेला ईरी. 
\v 3 अगर यावारा दुसरा अच प्रकार इन शिक्षा कोळतान अदिक सही मातगोळी, मतलब नाम प्रभु यीशु मसीह अन्द निर्देशगोळ इक अदिक आ शिक्षा इक मान्सालुन, जो देवी शिक्षा अन अनुसार आद, 
\v 4 रा आव अभिमानी आगेदुन, अदिक येनु जान्सालुन; बल्‍की आऊक विवाद अदिक शब्दगोळ मा तर्क हचोद बिमारी आद, यदुर देल ह्यावा, अदिक झगळा, अदिक अपमान नव मातगोळ, अदिक बेकार-बेकार संक्या, 
\v 5 अदिक आ मंळसागोळ दा फालतु लळाई-झगळा पैदा आगताव यार्द दिमाक भ्रष्ट आगेग्याद, अदिक आंदुर सच्चाई इन हादी देल अलग आगेग्यार, जो सम्सतार कि भक्ति कमाई इंद जरया हुन.
\p
\v 6 लेकीन सन्तोष इन सांगुळ भक्ति माळोद धोळ्द कमाई आद. 
\v 7 यतिकी नाव रा ना दुनिया दा येनारा हुडुकु बंदेव अदिक ना येनारा वय सकतेव. 
\v 8 अगर नाम हात्‍ती तिनली अदिक हाकली आद, रा ईऊर्दा का सन्तोष ईर पायजे. 
\v 9 लेकीन जो धनी आगोद चाहासतार, आंदुर ईत्‍ता परीक्षा अदिक फासा अदिक हापाळ सा मूर्खतापुर्ण अदिक हानिकारक लालसागोळ दा फसुसतार, जो मंळसागोळी बिगळुस बुळतद अदिक विनाश इन खाई दा ढकलुस बुळतद. 
\v 10 यतिकी पैस्या अन्द लोभ हर प्रकार इन बुराईगोळ्द जळ हुन, यदरी हासिल माळोद कोशिश माळतेला हापाळ मुंदुर विश्वास देल भटकुसकु तान-तान इक कई प्रकार इन दुखगोळ देल छल्ली माळ कोंडार.
\s तीमुथियुस उन व्यक्तिगत निर्देश
\p
\v 11 लेकीन हे परमेश्वर उन विश्वासी जन, नी ई मातगोळ हात्‍ती टु ओळ, अदिक न्याय, भक्ति, विश्वास, प्यार, धीरज अदिक नम्रता अन्द हिंद हत. 
\v 12 विश्वास इन वळ्लीद कुस्ती आळ; अदिक तान साटी आ अनन्त जीवन इक हासिल माळकोम, यदुर साटी नी कारूकु आग्या अदिक हापाळ सा गवाहगोळ मुंद वळ्लीद अंगीकार माळीद. 
\v 13 \x + \xo ६:१३ \xo*\xt यूहन्ना १८:३७\xt*\x*ना नीनी ईद आग्या परमेश्वर उन मुंद जो सप्पा मुंदुरी जीवन कोळतान, अदिक मसीह यीशु उक गवाह माळकु याव पुन्तियुस पिलातुस उन मुंद वळ्लीद गवाही कोट्टुन. कोळतीन, 
\v 14 कि नी नाम प्रभु यीशु मसीह अन्द प्रगट आगासताका ई आग्या अक निष्कलंक अदिक निर्दोष ईट, 
\v 15 परमेश्वर जो परमधन्य अदिक ऊंद मात्र शासक अदिक राजागोळ राजा अदिक प्रभुगोळ प्रभु हुन, आऊन द्वारा यारी आव ठीक समय मा प्रगट माळ्यान. 
\v 16 अदिक अमरता सिर्फ आऊंदा हुन, अदिक आव ज्योति दा ईरतान, येल ताका याऊ पोहचुस सकालुन, अदिक ना आऊक यावारा मंळसा नोळ्यान अदिक ना नोळ सकतान. आऊन प्रतिष्ठा अदिक सामर्थ्य हमेशा हमेशा ईत्‍तीत. आमीन.
\p
\v 17 ई दुनिया अन धनवानगोळी आग्या कोळ कि आंदुर अभिमानी आगबाळुल अदिक चंचल धन मा आशा ईट बाळुल, लेकीन परमेश्वर मा जो नाम सुख इन साटी सप्पा येनारा बहुतायत देल कोळतान. 
\v 18 आंदरी आग्या कोळ कि आंदुर भलाई माळुल, अदिक भला क्याल्सागोळ दा धनी आगुल. अदिक उदारता देल सहायता कोळदुर दा तयार ईरूल, 
\v 19 अदिक मुंदळोद साटी ऊंद वळ्लीद पायवा हाक्‍कु ईटुल कि खरा जीवन इक वश दा माळ कोमुल.
\p
\v 20 हे तीमुथियुस, ई धरोवर इन रखवाली माळ; अदिक यदरी येनारा लॉकुर गलती देल ग्यान अनतार, अदुर्द बेकार मातगोळ अदिक विरोध इन मातगोळ देल अलग ईर. 
\v 21 यास मुंदुर ई ग्यान इक मान्सकु विश्वास देल भटकुसेग्यार.
\p नीम मा अनुग्रह आग्त ईरूल.