\id 1PE - Caribbean Hindustani NT -Suriname 2010 (DBL -2013) 
\h 1 Petras 
\toc1 Petras ke pahiela tjietthie 
\toc2 1 Petras 
\toc3 1 P 
\mt1 Petras ke pahiela tjietthie 
\imt1 Pahiela baat 
\ip Djab Petras ie doei tjietthie liekhies, tab iesaai logan hardam auro sataawal gail. Oe maangat raha oesabke tieha dewe aur jaad karwaawe kie sab iesaai logan ke doekh oethaawe ke pare hai. Kriest Jiesoe to bhie bahoet doekh oethaais hai. Oe hardam aapan bieswaasie log ke sanghe hai. Doekh khaalie thora dien khaatien hai, bakie poera soekh Parmeswar ke lage sada ke lieje rahiega. 
\ip Petras aapan doesara tjietthie me liekhies hai kie koetjh manai log Parmeswar ke baat doesar rakam siekhaawe hai aur bieswaasie logan ke bharmaawe hai. Ohie se iesaai logan ke tjaahie batjaaike rahe ke, ek safa djiewan bietaawe ke, khaalie Parmeswar ke oeppar bharosa kare ke aur Prabhoe Jiesoe ke agore ke djab talak oe lautke na aaiga. 
\c 1  
\s1 Tjietthie ke soeroe 
\p  
\v 1 Ham Petras baatie aur ie tjietthie liekhiela. Ham Jiesoe Kriest ke ekgo pathaawal waala baatie. 
\p Ie tjietthie oe iesaai log khaatien hai djaun pardesie ghat hia hoewa Pontas, Gaalaatsia, Kapaadosia, Aasia aur Bietienia diehaat me rahe hai.  
\v 2 Pieta Parmeswar agahie se djaanat raha kie oe toelogke tjoeniega. Aur okar Pawietr Aatma toelogke alag karies hai djeme toelog Parmeswar ke baat soeniehe aur toelogke diel Jiesoe Kriest ke khoen dwaara safa karal djaai. 
\p Parmeswar toelogke hardam auro djaada bhalaai kare aur sjaantie dewe. 
\s1 Parmeswar kaise iesaai logan ke bieswaas poera kariega 
\p  
\v 3 Aaw, hamlog aapan Prabhoe Jiesoe Kriest ke Pieta Parmeswar ke aadar karie dja. Oe oke maut me se djie oethaais hai. Aur aise karke oe hamlogke aapan barka daaja me ek naawa djiewan deis hai.  
\v 4 Ie naawa djiewan se hamlog ab sab biesaal tjiedj ke agor sakiela djaun oe hamlogke deiga. Ie sab tjiedj hamlog khaatien swarag me rakhal hai djaaha oesab kabhie na sariega, koi na naksaan kar sakiega aur bhie na poeraan hoiga.  
\v 5 Toelogke bieswaas dwaara Parmeswar aapan maahaan saktie se toelogke batjaawe hai djab lek ie djoeg ke ant me oe aapan biesaal soekh na dekhaaiga. 
\p  
\v 6 Ie sab baat ke biese me khoesie rahiehe, tjaahe ab toelog koetjh dien khaatien bharmaawal dja hai aur ohie se toelogke har ek rakam ke doekh oethaawe ke pare hai.  
\v 7 Ie moesiebat ke dwaara dekhaaiga kie toelog sattje ke Jiesoe Kriest ke oeppar bharosa kare hai kie na. Djaise barte aagie me ek toekkara sona djaraawe se dekha hai kie oe sona hai kie na, aisahie moesiebat me dekha hai kie iesaai log ke bieswaas satj hai kie na. Aur djab satj hai, tab toelogke bieswaas sona se auro biesaal hai. Sona poeraan hoi djaaiga, bakie sattja bieswaas sada rahiega. Aur djab toelogke bieswaas satj hai tab Parmeswar toelogke sab koi ke aage barka kariega aur biesaal banaaiga aur bhie okar raadj me ekgo oetja dardja par baithaaiga oe dien par djab Jiesoe Kriest lautke aaiga.  
\v 8 Toelog oke biena dekhe tjaahe hai. Aur tjaahe toelog oke aadj tak na dekhle hai, tabbo okare oeppar bharosa kare hai. Aur toelog etana khoesie baate kie dher baat na bol paawe hai. Toelog etana khoesiaalie se bharal baate kie djaise swarag me pahoetj gaile.  
\v 9 Ek dien Parmeswar toelogke bieswaas Jiesoe Kriest me poera kariega, tab toelog okar soekh me pahoetj djaihe. 
\p  
\v 10 Pahiele ke sanesian agahie se bataais raha kie Parmeswar aapan bhalaai se toelogke batjaaiga aur toelogke bieswaas poera kariega. Bakie oesab na samadjh paawat raha kie oe kaise kariega.  
\v 11 Tab oesab auro aage khodj karat raha kie kab aur kaun tem par ie sab kaam hoiga. Kriest ke Aatma oelogke diel me rahat raha aur oesabke agahie se djanaawat raha kie Kriest bahoet doekh oethaaiga aur ekare baad aapan maahaanta dekhaaiga.  
\v 12 Pawietr Aatma oelogke bhie djanaais kie ie sanesa oesab khaatien na hai, bakie toelog khaatien. Aur oe swarag me se pathaawal gail hai ab ke tem ke sanesian ke djanaai dewe khaatien kaun baat bataawe ke tjaahie. Aisahie oesabhan toelogse Kriest ke biese me khoes khabar bataais. Ie khoes khabar etana biesaal hai kie swarag ke parie logan auro maange hai djaane. 
\s1 Iesaai logan ke naawa aur safa djiewan 
\p  
\v 13 Ie sab baat jaad karke aapan sotj-bietjaar ekattha kar, aapan djiewan ekdam se samhaar, aur aapan diel bhar se bharosa karke agor djab talak Parmeswar aapan sab bhalaai toelogke na deiga oe dien par djab Jiesoe Kriest lautke aaiga.  
\v 14 Toelog Parmeswar ke larkan baate, ohie se okar baat soen. Aur na phien aapan kharaab laalietj poera kar djaise toelog pahiele karat rahiele djab toelog Jiesoe Kriest ke na djaanat rahiele.  
\v 15 Parmeswar pawietr hai aur oe toelogke aapan khaatien bolaais hai. Oe maange hai kie tohoelog aapan djiewan ekdam safa se bietaaw.  
\v 16 Parmeswar to apane biese me liekhwaais hai kie: 
\q1 „Djaise ham pawietr baatie, oisane toelog bhie pawietr ban.” 
\p  
\v 17 Toelog Parmeswar ke aapan Baap bolaawe hai. Bakie jaad kar kie oe bhie djadj hai aur djab oe faisala kare hai tab oe koi ke moeh na taake hai. Oe har ek iensaan ke rahan-tjalan dekhe hai. Ohie se toelog doenia par pardesie ghat aapan djiewan Parmeswar ke aage batjaaike bietaihe.  
\v 18 Toelog djaane hai kie Parmeswar toelogke oe be-kaamiel djiewan me se kienies hai djaun toelog aapan baap-daada se apanaile hai. Aur oe toelogke tjaanie aur sona se na kienies hai. Ie sab poeraan hoi djaaiga.  
\v 19 Bakie oe toelogke Kriest ke mahanga khoen se kienies hai. Ohie apane ke baliedaan karies hai djaise ekdam poera bhera ke battja begar bemaarie ke. 
\p  
\v 20 Parmeswar doenia banaawe se pahiele sallaah karies raha kie Kriest apane ke baliedaan karwaaiga hamlogke paap hataawe khaatien. Aur ab ie djoeg ke ant me oe toelogke dekhaawe hai kie Kriest Ke hai.  
\v 21 Tab okar kaam dekhke toelog ab Parmeswar me bieswaas kare hai. Ohie Kriest ke phien se maut me se djie oethaais hai aur oke maahaanta deis hai. Ohie khaatien ab toelog Parmeswar ke oeppar bharosa kare hai aur khoesiaalie se agore hai kie oe aapan sab kaam poera kariega. 
\p  
\v 22 Toelog Parmeswar ke sattja baat Kriest ke biese me bieswaas karle hai. Tab toelog aapan diel safa karwaile hai aur ab ek safa diel se aapan bhaai-bahien ke pjaar kar sake hai. Ohie se rodj ek doesare ke diel bhar se pjaar kar.  
\v 23 Parmeswar aapan baat dwaara toelogke naawa djiewan deis hai. Oe baat kabhie na miet djaaiga, bakie sada khaatien satj rahiega. Djab toelog soeroe karle ie sab baat me bieswaas kare ke, tab toelog djaise phien se paida bhaile rahiele. Toelogke dehie na phien se paida bhail, oe to mar djaaiga. Bakie Parmeswar ke baat toelogke aatma me ek naawa djiewan oegaais hai djaun sada khaatien rahiega.  
\v 24 Okar poestak me liekhal hai kie: 
\q1 „Djaise ghaas aur phoel djhar dja hai, oisahie iensaan logan ek tjhota tem khaatien djieje hai, tab mar dja hai. 
\q1 Aur oesabke soendarta haldie se biet dja hai. 
\q1  
\v 25 Bakie Parmeswar ke baat sada khaatien rahiega.” 
\m Aur ehie khoes khabar hai djaun toelogke khaatien soenaawal gail hai. 
\c 2  
\p  
\v 1 Ohie se sab kharaabie aur dhokhaabaadj aapan diel me se hataai de aur doei moeh se baat na kar. Doesare ke djaran na kar, aur bhie koi ke niendara na kar.  
\v 2-3 Toelog iesaai ke bieswaas me djaise ek rodj ke larka baate. Aur djaise oesabhan khaalie barhia doedh khodje hai, oisahie toelogke tjaahie Parmeswar ke barhia baat khodj-khodjke apana lewe ke. Aur djab toelog samadjh djaihe kie Parmeswar ketana daaja karies hai, tab toelogke bieswaas okare me barhiega. 
\s1 Djienda ieta aur pawietr djaatie 
\p  
\v 4 Khaalie Kriest ke oeppar aapan dhiaan lagaaw. Oe hardam khaatien djiega. Manai logan oke na maangies hai, bakie Parmeswar oke tjoenies hai sab se barhia aur djienda ieta ghat aapan mahal, jaane samaadj banaawe khaatien.  
\v 5 Apane ke Parmeswar ke dei deihe djeme oe toelogke bhie djaise ieta kaam me lei sakie aapan mahal khaatien. Toelog djaise pawietr agwa oke aapan pjaar, praatna, aadar aur dhanbaad daan dewe ke pare hai. Toelog Jiesoe Kriest dwaara ie sab kaam kar sake hai, ohie se toelogke daan Parmeswar ke bahoet barhia lage hai.  
\v 6 Okar poestak me liekhal hai kie oe bolies hai: 
\q1 „Dekh, ham ek kaamiel aur barhia ieta tjoenlie hai aur oke Sion\f + \fr 2:6 \ft Sion Jeroesaalem sahar ke ek doesar naam hai.\f* sahar me sab se barka waala ghat rakhlie hai. Dje aapan bieswaas okare oeppar dharle rahie, oke pastaaike na pariega.” 
\p  
\v 7 Toelog okare me bieswaas kare hai, ohie se oe toelogke khaatien sab se pjaara Waala hai. Bakie be-bieswaasie logan ke biese me ie baat satj hai kie: 
\q1 „Oe ieta djaun ghar banaawe waalan be-kaamiel maanies hai, ohie sab se kaamiel waala hoi gail hai.” 
\p Be-bieswaasie logan okare me dhakka maare hai, aur okare oeppar bahoet goessa hai.  
\v 8 Djaun manai logan ie baat na bieswaas kare hai aur na soene hai, oesabhan aapan djiewan ke rasta par gier djaai. Aisane oesab aapan karnie ke phal paaiga. 
\p  
\v 9 Bakie toelogan doesar rakam baate. Parmeswar toelogke tjoenies hai okar raadj me agwa ke kaam kare khaatien. Toelog okar djaatie baate aur oe toelogke doesar manai me se bolaaike apane khaatien alag karies hai okar biesaal kaam ke biese me partjaar kare ke. Toelog be-bieswaas ke andhiaar me se niekaaral gaile hai okar biesaal djotie me aapan djiewan bietaawe khaatien.  
\v 10 Pahiele toelog Parmeswar se doer rahiele, bakie ab toelog okar djaatie hoi gaile hai. Toelog bhie okar daaja ke biese me koetjh na djaanat rahiele, bakie ab oe toelogke daaja karies hai. 
\s1 Ek safa djiewan bietaaw 
\p  
\v 11 Pjaara bhaai-bahien logan, toelog doenia par djaise gair djaatie aur pardesie rahe hai. Ohie khaatien ham toelogse bientie kariela iensaan ke kharaab laalietj me na bhieral rahe ke. Aisan tjiedj toelogke man biegaar dewe hai.  
\v 12 Toelogke tjaahie be-bieswaasie logan ke bietj me ek safa djiewan bietaawe ke. Aur tjaahe oesabhan ab toelogke kharaab manai bolaawe hai, tabbo djab oesab dekhiega kie toelog kaisan safa djiewan bietaawe hai, tab faisala ke dien par oesabke Parmeswar ke aage bole ke parie kie toelog bhala kaam karle rahiele. Tab oesabke okar aadar kare ke parie. 
\p  
\v 13 Des ke barkwan ke aage apane ke nietje kar Parmeswar ke parsand kare khaatien. Maahaaraadja ke baat soen. Oe to sab se maahaan raadj tjalaawe waala hai.  
\v 14 Oe laat logan ke dardja deis hai kaam kare ke. Ohie se oelogke baat maan le. Oesabke kaam hai kharaab manai logan ke sadja dewe khaatien aur barhia waalan ke ienaam dewe ke.  
\v 15 Parmeswar maange hai kie toelog aapan barhia tjaal-tjalan se bhoettjar logan ke moeh band kar de djaun Parmeswar ke baat na maange hai soene aur djaane.  
\v 16 Toelog paap me se tjhoetkaara paai gaile. Ab aapan djiewan ek tjhoetkaara waala ghat bietaaw. Bakie na boliehe kie: „Ab ham batj gailie, ohie se ham kharaabie bhie kar sakiela.” Na, toelog tjhoetkaara paile hai Parmeswar ke goelaam ghat aapan djiewan bietaawe ke.  
\v 17 Sab manai logan ke ieddjat kar. Sab iesaai bhaai-bahien ke pjaar kar, Parmeswar ke barka maan, aur maahaaraadja ke baat soen. 
\s1 Kriest ke ner rahoe 
\p  
\v 18 Dje toelog me se koi ke goelaam hai, oke tjaahie aapan barkwa ke baat soene ke aur bhie oke barka maane ke. Aur tjaahe oe ek barhia sardaar rahie kie na, tabbo oke barka maan.  
\v 19 Kabhie kabhie aise hai kie koi ekko kharaab kaam na karle rahie, tabbo okar barkwa oke sadja dewe hai. Djab toe Parmeswar ke baat jaad karke biena goessa se oe moesiebat sahie leihe, tab ie Parmeswar ke bahoet barhia lagiega.  
\v 20 Djab koi kharaabie karie aur maar khaai, aur oe aapan doekh dhieradj se sahie lei, tab oe koetjh na hai. Bakie djab koi biena kasoer kare sadja paai aur tabbo aapan doekh biena goessa se sahiega, tab Parmeswar ose bahoet khoesie rahiega. 
\p  
\v 21 Aur djab Parmeswar toelogke aapan larkan banaais, tab oe djaanat raha kie toelog moesiebat me rahiete, aur oe maangat raha kie toelog biena goessa se sahiete. Kriest toelog khaatien bahoet doekh oethaais hai aur toelogke dekhaais hai kaise doekh sahe ke. Toelog okare ner rahoe.  
\v 22 Oe kabhie paap na karies hai aur kabhie na djhoeth bolies hai.  
\v 23 Djab koi oke gariaawat raha tab oe oke phien se na gariaais. Aur manai logan djab oke moesiebat dewat raha, tab oe kabhie na bolies kie: „Toelogke sadja mielie.” Oe oesabke khaalie Parmeswar ke haath me saup dewat raha. Aur Parmeswar sattjaai se faisala kare hai.  
\v 24 Oe hamlogke paap apane oeppar leike aapan dehie ke kroes par baliedaan karies hai djeme hamlog djaise maral manai paap ke saktie me se batj djaai aur Parmeswar ke aage aapan djiewan be-kasoerie ghat bietaai sakie. Jiesoe ke dehie me maar ke tjienha se hamlog attjha hoi gailie.  
\v 25 Toelog bhera ghat barhia rasta par se bhatkat gaile. Bakie ab toelog lautke aile hai bhera tjaraawe Waala Jiesoe lage, aur oe toelogke sewa aur rakhwaala kare hai. 
\c 3  
\s1 Biehautie biehauta 
\p  
\v 1-2 Biehautie logan, toelogke tjaahie aapan aadmie ke nietje rahe ke. Toelog me se koi koi ke aadmie na maange hai Parmeswar ke baat soene. Bakie djab toelog Parmeswar ke rasta par tjaliehe, aur toelogke aadmie dekhiega kie toelog kaisan safa djiewan bietaawe hai aur Parmeswar ke ketana barka maane hai, tab saait oesab dekhke okare me bhie bieswaas kare lagiega.  
\v 3 Toelogke na tjaahie khaalie aapan baar saukh-sienghaar se sadjaawe ke, soendar gahana aur barhia kapra pahiene ke. Ie to dekhaawe ke hai.  
\v 4 Bakie bestar hai kie toelog aapan dhiaan lagaihe oe tjiedj par djaun ke dwaara toelogke diel barhia hoi djaaiga. Ie sada khaatien rahiega. Djab toelog doesare ke pjaar kariehe aur sadhaaran se rahiehe, tab ie Parmeswar ke auro attjha lagiega.  
\v 5 Pahiele djabaana ke bieswaasie aurat logan bhie ie rakam se barhia hoi gail raha. Oesab Parmeswar ke baat maanke agorat raha kie oe aapan waada poera kariega. Aur oesab aapan aadmie ke nietje rahat raha.  
\v 6 Saara Aabraaham ke aapan maaliek maanat raha. Djab toelog aapan djiewan barhia se bietaihe aur koetjh ke na deraihe, tab toelog okar bietian ghat rahiehe. 
\p  
\v 7 Aisane dje biehauta hai, toelogke tjaahie akkiel se aapan aurat se rahe ke. Djab koi ke kaatj ke bartan hai, tab oe batjaaike kaam me laawe hai. Aisane toelogke tjaahie aapan aapan aurat se sotj-bietjaar karke rahe ke aur okar ieddjat kare ke. Parmeswar ohoelogke bhalaai karke hakdaar banaais hai okar sanghe naawa djiewan paawe khaatien. Djab toelog ie baat jaad karke aapan aurat se rahiehe, tab Parmeswar toelogke praatna soeniega. 
\s1 Prem karte rahiehe 
\p  
\v 8 Ie hamaar antiem baat hai iesaai log ke djiewan ke biese me. Miel-djoelke rahoe, apane log me mar-mietiehe, aur ekwan iesaai bhaai-bahien ke pjaar kar. Doesare ke daaja kar, aur apane ke tjhota maan.  
\v 9 Djab koi tor bedjatie kie to koetjh kharaabie kariega, tab toe oelte oe kaam na kariehe, bakie praatna kar kie Parmeswar okar bhalaai kare. Tab toelogke aasies mieliega. Oe toelogke bolaais hai aasies dewe ke.  
\v 10 Prabhoe ke poestak me liekhal hai kie: 
\q1 „Dje maange hai soekh se rahe aur sab barhia tjiedj se aapan hiettjha poera kare, oke tjaahie aapan moeh samhaare ke aur na djhoeth bole ke. 
\q1  
\v 11 Oke tjaahie sab kharaabie se doer rahe ke aur barhia rasta par tjale ke aur kausies kare ke sab ke sanghe miel-djoelke aapan djiewan bietaawe ke. 
\q1  
\v 12 Parmeswar dekhe hai ke okar baat maane hai aur oe aisan manai ke praatna soene hai. 
\q1 Bakie dje kharaabie kare hai, oe Parmeswar ke tanko na attjha lage hai.” 
\s1 Biena goessa se doekh sahiehe 
\p  
\v 13 Djab toe kausies kariehe aapan djiewan attjha se bietaawe ke, tab koi na tor sanghe kharaabie kariega.  
\v 14 Bakie hoi sake hai kie toke Parmeswar ke baat soene ke dwaara doekh oethaawe ke parie. Djab aisahie hoiga, tabbo toe soekhie rahiehe. Aur djab manai logan toelogke sataaiga, tab oesab tjaahe djaun baat se toelogke derwaaiga, tabbo oesabke na daraihe.  
\v 15 Bakie Kriest ke poera maan, oe hamlogke Prabhoe hai. Aur djab koi tose poetjhiega kie toe kaahe ke okare oeppar bharosa kare hai, tab hardam tajaar rahoe ie sab baat kaida, ieddjat, aur safa diel se samdjhaawe ke.  
\v 16 Tab dje koi Kriest ke rasta aur tor tjaal-tjalan ke biese me kharaab baat bole hai, oesabke saram lagiega. 
\p  
\v 17 Hardam barhia kaam kariehe. Djab Parmeswar maange hai kie toe moesiebat sahiehe, tab auro attjha hai bhala kaam karke doekh oethaawe ke aur na boeraai karke.  
\v 18 Aisahie Kriest bhie karies hai. Oe ek dafe hamlogke paap khaatien maral hai. Oe be-kasoerie raha aur tabbo kasoer waalan khaatien aapan djaan deis djeme oe toelogke Parmeswar se ek karwaai sake. Okar dehie maar dhaaral gail, bakie okar aatma aage djieje hai  
\v 19 aur gail djaaha maral logan ke aatma band karal hai aur hoewa oesabse partjaar karies.  
\v 20 Oe manai log pahiele djiejat raha djab Noah barka djahaadj banaawat raha. Parmeswar oesabke bahoet agories aur mauka deis aapan paap pastaai ke. Bakie oelog okar baat na maangat raha soene. Ohie khaatien djab Parmeswar djor se barkha barsaais, tab dher manai logan na batjal raha, khaalie aathgo. 
\p  
\v 21 Ie kaahaanie dekhaawe hai kie dopoe ke matlab ka hai. Hamlog dopoe na leila aapan dehie dhowaawe khaatien, bakie dekhaawe ke kie hamlog Parmeswar se praatna kar tjoekalie hai hamlogke diel safa kar dewe khaatien, aur oe hamlogke praatna soen leis. Oe Jiesoe Kriest ke maral manai me se djie oethaais hai, ohie se hamlog batj gailie hai.  
\v 22 Tab Jiesoe swarag me gail aur ab oe Pieta Parmeswar ke dahiena bagal baithal hai. Aur hoewa par oe sab parie logan se aur sab doesar saktie waalan aur raadj tjalaawe waalan se maahaan hai. 
\c 4  
\s1 Tajaar rahiehe doekh oethaawe khaatien 
\p  
\v 1 Kriest ke iensaan ghat doekh oethaawe ke paral, aur oe Parmeswar ke man waala maanke ie kaam karat raha. Ohie se tohoelogke tjaahie tajaar rahe ke doekh oethaawe khaat. Djab toelog bieswaasie ghat Kriest ke man waala maanke doekh oethaihe, tab toelog kharaab tjiedj na mangiehe kare. Ie baat jaad karke hiemmat pakarle rahiehe. 
\p  
\v 2 Djab lek toelog doenia par rahiehe toelog aapan djiewan na bietaihe djaise doesar manai logan. Iesab to khaalie aapan man waala kare hai. Bakie toelogke tjaahie rahe ke djaise Parmeswar ke barhia lage hai.  
\v 3 Toelog aapan man waala karke be-bieswaasie ghat dher dien bietaai tjoekale. Aur be-bieswaasie logan khaalie be-saram tjiedj kare hai, laalietj kare hai, hardam pieke haltjal matjaawe hai, aur be-sahoer ghat nauta kare hai naklie bhagwaan ke aadar kare khaatien.  
\v 4 Oelog na samdjhe hai kie toelog kaahe ke oelogke sanghe ab be-saram ke kaam na kare hai aur oesab toelogke biese me kharaab baat bole hai.  
\v 5 Bakie ek rodj oelogke Parmeswar ke aage kaboele ke parie kaahe ke oelog aise bolat raha. Parmeswar tajaar hai djienda aur maral logan ke oeppar faisala kare ke.  
\v 6 Ohie se khoes khabar Kriest ke biese me maral logan se bhie bataawal gail hai. Aur tjaahe sadja paaike oelogke dehie mar gail hai, tabbo oelogke aatma Parmeswar sanghe djie sake hai djaise oe maange hai. 
\s1 Batjal waala tem khoeb thiek se kaam me laaw 
\p  
\v 7 Ab dher dien na rahie gail hai tab ie djoeg ke ant hoi djaaiga. Ohie se apane ke samhaar aur djaagal rahoe praatna kare khaatien.  
\v 8 Sab se barka tjiedj hai kie toelog doesar bieswaasie logan ke diel bhar se pjaar karte rahiehe. Djab hamlog doesare ke pjaar kariela, tab hamlog oesabke dher oelta kaam bhoelaai sakiela.  
\v 9 Iesaai bhaai-bahien logan ke na bhoen-bhoenaaike aapan ghar me leihe, bakie prem se.  
\v 10 Pawietr Aatma bhalaai karke toelogke sab koi ke koetjh kartab deis hai. Oe samadjh kaam me laaw samaadj waalan ke sahaaita kare khaatien. Aise toelog Parmeswar ke dher rakam ke bhalaai batiehe djaise oke attjha lage hai.  
\v 11 Djab toelog me se koi samadjh paais hai Parmeswar ke sanesa bataawe ke, tab oke tjaahie okar hoekoem se kare ke. Aur djab koi ke samadjh hai doesare ke sahaaita kare ke, tab oke tjaahie Parmeswar ke saktie dwaara kare ke. Ie rakam se Pieta Parmeswar ke aadar pahoetjiega Jiesoe Kriest dwaara, aur sab soekh aur hoekoem okar rahiega sada ke lieje! Ha, aisahie hai. 
\s1 Kriest ghat doekh oethaaw 
\p  
\v 12 Pjaara bhaai-bahien logan, koetjh dien baad toelogke bahoet doekh oethaawe ke parie. Tab na atjambho hoihe aur na boliehe kie: „Ie kaise hoi sake hai?” Ie howe ke tjaahie. Moesiebat ke tem par dekhaaiga kie toelog sattje ke Parmeswar par bharosa kare hai kie na.  
\v 13 Kriest bhie ie rakam se doekh oethaawat raha. Ohie se toelog djetane okare ghat doekh oethaihe, otane toelogke tjaahie khoesie rahe ke. Tab djab oe lautke aaiga aur Parmeswar dekhaaiga kie oe ketana maahaan hai, tab toelog bhie bahoet khoesie hoi djaihe.  
\v 14 Djab manai logan toelogke bedjatie karie kie toelog Kriest me bieswaas kare hai, tab toelog soekhie baate. Ie dekhaawe hai kie Parmeswar ke Pawietr Aatma toelogke saath hai. Oe toelogke diel soekh se aur khoesiaalie se bhar dewe hai. 
\p  
\v 15 Bakie batjaaike rahiehe kie toelogke kabhie na doekh oethaawe ke pare aapan kharaab tjalaawa dwaara. Djab toelog koi ke djaan mariehe, kie tjorie kariehe, kaanoen toeriehe, kie to koi ke bietj me boliehe, tab toelogke sadja mielke bhie doekh oethaawe ke parie. Ie rakam doekh ke biese me ham na liekhiela.  
\v 16 Bakie djab toelogke Kriest me bieswaas kare se doekh kaate ke parie, tab toelogke na sarmaai ke tjaahie. Khaalie Parmeswar ke aadar kar kie toelog Jiesoe Kriest ke naam se „‘iesaai”’\f + \fr 4:16 \ft ‘Iesaai’ ke matlab hai: Jiesoe ke bieswaasie.\f* bolaawal dja hai. 
\p  
\v 17 Ab to tem aai gail hai kie Parmeswar faisala kariega, aur oe iesaai logan ke lage soeroe kariega. Aur djab oe aapan ghar waalan ke lage soeroe karie, tab ketana auro ghabaraahat rahiega oelog khaatien djaun okar khoes khabar na maange hai bieswaas kare.  
\v 18 Djab be-kasoerie logan aisahie doekh oethaaike aur mehenat se paap ke saktie me se batj dja hai, tab oe manai logan djaun Parmeswar ke baat na soene hai aur khaalie paap me rahe hai, oesabse ka hoiga? 
\p  
\v 19 Ohie se dje Parmeswar ke djaane dwaara be-kasoerie ghat doekh oethaawe hai, oelogke tjaahie aapan djiewan safa se bietaite apane ke okar haath me saup dewe ke. Oelog to aapan banaawe Waala par hardam bharosa kar sake hai. 
\c 5  
\s1 Barkwan aur tjhotkwan 
\p  
\v 1 Dje koi samaadj ke barkwa hai, ham oelogse maangiela ekahie dardja waala ghat bienaai karke koetjh poetjhe. Ham aapan aakhie se dekhlie hai kaise Kriest hamlog khaatien doekh oethaais hai. Aur djab oe lautke aaiga aur aapan maahaanta dekhaaiga, tab ham toelogke saath oman bhie bhaag lebe.  
\v 2 Ham toelogke bienaai kariela Parmeswar ke samaadj ke log ke barhia se sewa kare ke, djaise ekgo bhera tjaraawe waala aapan djhoend bhera ke dekh-bhaal kare hai. Ie kaam karaai se na kar, bakie khoesiaalie se. Aisane Parmeswar ke barhia lage hai. Bhie aapan kaam na kar koetjh ienaam paawe khaatien, bakie aapan diel se.  
\v 3 Aur ie kaam bhie na kariehe barkwa khele khaatien, bakie sadhaaran se samaadj logan ke dekhaihe kie oelogke aapan djiewan kaise bietaawe ke tjaahie.  
\v 4 Tab djab sab se maahaan dekh-bhaal kare Waala lautke aaiga, tab oe toelogke ieddjat kariega. Okar soekh toelog khaatien rahiega djaise ekgo maala djaun kabhie na djhoeraaiga. 
\p  
\v 5 Naudjawaan logan, ham toelogse bienaai kariela barkwan ke baat soene ke. Toelog sab koi ke tjaahie apane ke doesarkwan ke aage tjhota maane ke. Ghamandie logan Parmeswar ke doesman hai, bakie oe bhalaai kare hai dje apane ke tjhota maane hai.  
\v 6 Ohie khaatien apane ke Parmeswar ke aage nietja kar. Oe maahaan Waala hai. Tab oe aapan tem par toelogke oetja dardja deiga.  
\v 7 Aapan sab sotj-phiekier Parmeswar ke haath me saup de, oe toelogke sewa kare hai. 
\p  
\v 8 Aapan djiewan samhaar aur djagte rahoe. Djaise ekgo ser aapan bhoekh ke patwaawe khaatien goerdjke koetjh khaaik khodje hai, oisane saitaan khodjke maange hai tose paap karwaawe aur tor bieswaas naas kar dewe.  
\v 9 Okar djhoeth baat na soen aur aapan bieswaas pakarle rahoe. Jaad kar kie doenia bhar me ekwan iesaai bhaai logan ke bhie aisan doekh oethaawe ke pare hai. 
\p  
\v 10 Parmeswar toelogke sab rakam bhalaai kare hai. Oe toelogke tjoenies hai Kriest ke sanghe sada ke lieje biesaal soekh me rahe ke. Ek tjhota tem khaatien toelogke doekh oethaawe ke parie, tab oe toelogke poera kariega aur toelogke bieswaas barhaaiga, djeme toelog ekdam se okare par bharosa kariehe aur hardam okar baat soeniehe.  
\v 11 Oke sab saktie hai sada ke lieje! Aisahie to hai. 
\s1 Tjietthie ke ant 
\p  
\v 12 Ham djaaniela kie Selfaanas ekgo bharosaadaar iesaai bhaai hai toelog khaatien. Oe hamme sahaaita karies hai ie tjhota tjietthie liekhe ke. Ham maangiela toelogke diel me hiemmat pahoetjaawe aur toelogke jaad karwaawe kie Parmeswar hamlogke sattje ke sab rakam se bhalaai kare hai djaise ham ie tjietthie me liekhlie baatie. Oman pakarle rahiehe. 
\p  
\v 13 Hia Baabielon sahar ke iesaai bhaai-bahien logan toelogke jaad kare hai. Parmeswar toelogke saath ohoelogke aapan djaatie ghat tjoenies hai. Aur hamaar iesaai ke beta Markas toelogke bhie jaad kare hai. 
\p  
\v 14 Apane log me prem se tjoemma de. 
\p Parmeswar sab koi ke sjaantie dewe djaun Kriest me saamiel hai.