\id TIT TITUS, Hiri Motu Bible, PNG, 1993 
\h TITO 
\toc1 PAULO ENA REVAREVA TITO DEKENAI 
\toc2 TITO 
\mt1 PAULO ENA  
\mt2 REVAREVA  
\mt1 TITO DEKENAI  
\c 1  
\p
\v 1 Lau Paulo, lau be Dirava ena hesiai tauna, bona Iesu Keriso ena aposetolo tauna.  
\p Dirava ese lau ia abia hidi bona lau ia siaia, Dirava ese ia abia hidi taudia edia abidadama do lau hagoadaia totona. Oibe, lau ia siaia, hereva momokani idia dekenai do lau hadibaia, Dirava do idia badinaia momokani totona.  
\v 2 Edia abidadama lau durua, badina inai abidadama ese mauri hanaihanai ia havaraia noho. Inai mauri hanaihanai be tanobada ia do karaia lasi neganai, Dirava ese ia gwauhamatalaia, bona Dirava be koikoi diba lasi.  
\v 3 Bona harihari, iena nega korikori dekenai, Dirava ese iena gwauhamata ena anina ia hedinaraia vadaeni. Inai gwauhamata gauna be iena Sivarai Namona, bona lau ese lau harorolaia, Dirava, iseda Hamauria Tauna ena oda dainai.   
\p
\v 4 Tito e, lauegu natuna korikori, inai revareva oi dekenai lau torea, iseda abidadama be tamona dainai.  
\p Lau ura be Tamana Dirava, bona Keriso Iesu, iseda Hamauria Tauna ese hariharibada bona maino oi dekenai do idia henia.   
\s1 Tito ena gaukara Kerete motumotu dekenai  
\p
\v 5 Kerete dekenai oi lau rakatania badina be, unai gabu dekenai idia do maoro lasi gaudia do oi hamaoromaoroa totona. Bona lau ura danu hanua ta ta ibounai lalonai ekalesia gunalaia taudia do oi abia hidi. Lauegu hadibaia hereva oi laloaboio lasi, ani?  
\v 6 Ekalesia gunalaia tauna be kerere ta lasi tauna, bona ia be adavana tamona tauna. Iena natuna be Iesu do idia abidadama henia, idia be lebulebu lasi, bona edia tamana bona sinana do idia kamonai henia.  
\v 7 Badina be ekalesia orea gunalaia tauna ese Dirava ena gaukara ia naria dainai, ia be kerere ta lasi tauna. Ia be hekokoroku lasi, ia be badu haraga lasi, kekero lasi, bona moni do ia mataganigani henia lasi.  
\v 8 Ia ese idau taudia iena ruma dekenai do ia abia dae. Ia ese kara namodia do ia ura henia. Ia be aonega tauna, kara maoromaoro tauna, helaga tauna, bona ia sibona ena tauanina do ia naria bona biagua diba tauna.  
\v 9 Hereva momokani, ita abidadama henia bona ita hadibaia gauna, do ia badinaia momokani. Unai karadia dekena amo ia be hegeregere, haida do ia hagoadaia, hadibaia hereva namodia dekena amo. Danu do ia hegeregere, hereva momokani idia negea taudia do ia hamaoromaoroa.   
\s1 Kerete motumotu dekenai be hadibaia koikoi taudia momo  
\p
\v 10 Badina be tau momo ese hereva momokani idia kamonai henia lasi, bona hereva kavakava dekena amo haida idia hakaua kerere. Iuda taudia momo ese inai bamona idia karaia noho.  
\v 11 Idia edia hadibaia hereva be iseda hereva bamona lasi, bona idia ese taunimanima haida, bona edia famili taudia ibounai dekenai, daradara idia havaraia vadaeni. Inai hadibaia koikoi idia karaia noho, moni do idia abia totona. Idia edia kara bona edia hereva do oi hadokoa.  
\v 12 Kerete taudia edia peroveta tauna ta ese inai bamona Kerete taudia ia herevalaia, ia gwau, “Kerete taudia be nega ibounai idia koikoi noho, idia be uda boroma dikadia bamona, lahedo dikadika, bona aniani sibona idia laloa taudia.”  
\v 13 Inai hereva be momokani. Unai dainai idia do oi gwau henia goadagoada, Sivarai Namona do idia abidadama henia maoromaoro totona.  
\v 14 Vadaeni, unai neganai Iuda taudia edia gori, bona hereva momokani idia negea taudia, be do idia kamonai henia lou lasi.   
\p
\v 15 Laloa bona kudouna goevagoeva taudia dekenai, gau ibounai be goevagoeva. To laloa miro taudia dekenai, bona Dirava idia abidadama henia lasi taudia dekenai, gau ta be ia goevagoeva lasi. Badina be unai miro ese edia laloa bona edia kudouna ia hadikaia dainai.  
\v 16 Idia gwau Dirava idia diba, to edia kara dekena amo idia ese Dirava idia negea. Idia be dika bada, Dirava idia kamonai henia lasi, bona kara namona ta idia karaia diba lasi.   
\c 2  
\s1 Tito ese tau bona hahine badadia dekenai do ia hadibaia hereva  
\p
\v 1 To oi ese hadibaia hereva maoromaorona do oi gwauraia.  
\v 2 Tatau badadia do oi hadibaia, do idia kekero lasi, do idia laloa maoromaoro, bona mai edia bogahisihisi karadia do idia noho. Ma abidadama dekena amo, lalokau dekena amo, bona haheauka dekena amo do idia gini goada.   
\p
\v 3 Inai bamona danu hahine badadia do oi hadibaia, do idia noho namonamo, hahine helagadia bamona. Idia ese haida edia ladana do idia hadikaia lasi, bona inuinu kekero ese idia do ia biagua lasi. Idia ese kara namo do idia hadibaia.  
\v 4 Vadaeni edia hadibaia hereva ese hahine matamatadia do ia durua, edia adavana bona natuna do idia lalokau henia.  
\v 5 Bona do idia laloa maoromaoro, do idia noho namonamo, mai laloa goevagoeva danu, bona edia ruma lalonai do idia gaukara. Bogahisihisi karadia do idia karaia, bona edia adavana edia hereva do idia kamonai henia. Unai dekena amo, tau ta ese Dirava ena Sivarai Namona do ia hadikaia diba lasi.   
\s1 Tito ese eregabe taudia dekenai do ia hadibaia hereva  
\p
\v 6 Inai bamona danu, eregabe taudia do oi hadibaia goada, do idia laloa maoromaoro, bona edia tauanina do idia biagua namonamo.  
\v 7 Bona oi sibona danu kara namodia do oi hedinaraia, unai eregabe taudia ese oiemu kara bamona do idia karaia totona. Mai oiemu momokani bona laloa maoromaoro danu, hereva momokani idia dekenai do oi hadibaia.  
\v 8 Vadaeni oiemu hereva be maoromaoro dainai, tau ta ese oi do ia gwauraia kerere diba lasi. Bona oi idia ura henia lasi taudia be do idia hemarai, badina be iseda dika ta do idia herevalaia diba lasi.   
\s1 Tito ese hesiai mai guia danu taudia dekenai do ia hadibaia hereva  
\p
\v 9 Hesiai mai guia danu taudia dekenai inai bamona do oi hadibaia: Edia biagudia do idia kamonai henia. Gaukara namona do idia karaia nega ibounai, edia biagudia ese idia do idia ura henia totona. Edia biagudia edia hereva dekenai do idia hereva lou lasi.  
\v 10 Edia biagudia edia gau do idia henaoa lasi. To biagudia edia hereva do idia badinaia momokani, vadaeni edia biagudia ese edia hesiai taudia do idia abidadama henia. Vadaeni hesiai taudia edia kara namodia ese hairai bona mataurai be Sivarai Namona dekenai do idia havaraia. Inai ita hadibaia Sivarai Namona be iseda Hamauria Tauna Dirava ena.   
\s1 Ita noho namonamo, Keriso ena Dina do ita naria  
\p
\v 11 Ita diba, Dirava ese iena hariharibada ia hedinaraia vadaeni, taunimanima ibounai do ia hamauria totona.  
\v 12 Bona inai hariharibada ese ita ia hadibaia noho, Dirava negea kara bona lebulebu kara do ita rakatania. Ita ia hadibaia danu, do ita noho namonamo, do ita kara maoromaoro, bona Dirava do ita matauraia.  
\v 13 Bona inai hariharibada ese danu ita ia hadibaia vadaeni, Keriso do ita abidadama henia, bona iena gwauhamata ena anina do ita naria, mai moale bada danu. Oibe, ita ese Dirava badana bona iseda Hamauria Tauna Iesu Keriso edia hairai do ia hedinarai Dinana do ita naria noho.  
\v 14 Keriso ese iena mauri ia henia ita dainai, kara dika ibounai dekena amo ita do ia hamauria totona. Badina be ia ura orea tamona ita do ia halaoa, ia sibona ena orea, do ita goevagoeva, bona iena kara namodia do ita karaia totona.   
\p
\v 15 Inai bamona hereva do oi hadibaia noho. Bona oiemu siahu ibounai do oi gaukaralaia, taunimanima do oi hagoadaia totona, bona taunimanima do oi sisiba henia totona. Tau ta ese bema oi ia negea gwauraia, oi ese ia do oi koua.   
\c 3  
\s1 Keristani kara namodia totona do ita gini goada  
\p
\v 1 Oiemu taudia do oi hadibaia lou, idia ese gavana bona gavamani ena siahu taudia do idia kamonai henia. Edia oda hereva do idia badinaia, bona do idia naria hegaegae kara namodia ibounai do idia karaia totona.  
\v 2 Idia ese tau ta do idia gwauraia dika lasi, bona do idia heai lasi, to do idia manau. Nega ibounai taunimanima ibounai dekenai manada kara do idia karaia.   
\p
\v 3 Badina be ita danu gunaguna ita be mai kavakava, mai kamonai lasi, bona mai kerere danu. Ura dikadia bona tauanina ena moale gaudia idauidau ese ita idia koia. Ita ese haida ita laloa dika henia, ma haida ita mama henia. Haida be ita ese ita badu henia, bona haida ese ita danu idia badu henia.   
\p
\v 4 To Dirava, iseda Hamauria Tauna ese iena bogahisihisi bona iena lalokau ia hedinaraia neganai,  
\v 5 ia ese ita ia hamauria. Iseda kara maoromaoro dainai ita ia hamauria lasi. Lasi, to iena bogahisihisi dainai ia ese ita ia hamauria, Lauma Helaga dekena amo. Ia ese vara lou ena mauri matamata ita dekenai ia henia, iseda dika ia huria ore dainai.  
\v 6 Iesu Keriso, iseda Hamauria Tauna ena gaukara dekena amo, Dirava ese Lauma Helaga ena siahu iseda latanai ia bubua bada herea.  
\v 7 Unai dainai Keriso ena hariharibada dekena amo, Dirava ena vairanai do ita maoromaoro diba. Bona Dirava ese, ita abidadama henia bona naria noho gauna, mauri hanaihanai ena gwauhamata, ita dekenai ia henia noho.   
\p
\v 8 Unai hereva be momokani vadaeni, bona lau ura unai hereva do oi gwauraia goadagoada. Vadaeni Dirava idia abidadama henia taudia ese edia kara do idia naria namonamo. Kara namodia sibona do idia karaia, bona inai kara be do mai anina, bona taunimanima durua karadia.   
\p
\v 9 To hepapahuahu kavakavadia, sene taudia edia ladana tahua, heai, bona Taravatu totona badu herevadia dekena amo do oi gini siri. Badina idia be anina lasi, bona tau ta idia durua lasi.   
\p
\v 10 Ekalesia idia hapararaia noho tauna be nega ginigunana bona nega iharuana do oi sisiba henia. Bema oiemu hereva ia kamonai lasi neganai, unai tau do oi negea.  
\v 11 Oi diba, unai bamona tauna be mai ena kerere, bona ia be dika momokani. Iena dika ese iena kerere idia hamomokania noho.   
\s1 Hadibaia hereva dokodia  
\p
\v 12 Aretema o Tukiko bema lau siaia oi dekenai neganai, mani emu kara lau dekenai do oi mai, Nikapoli dekenai. Badina be lau laloa, keru neganai Nikapoli dekenai do lau noho.  
\v 13 Sena, taravatu diba tauna, bona Apolo, edia laolao dalana mani do oi karaia hegaegae. Idia do oi durua namonamo, bona idia dekenai hegeregere lasi gaudia do oi henidia.   
\p
\v 14 Iseda Keristani taudia ibounai, namona be kara namodia dekenai do idia manada, bona gau lasi taudia do idia durua. Namo lasi idia noho kava, to durua karadia do idia karaia noho.   
\p
\v 15 Iniseni lau danu idia noho taudia ibounai ese edia hanamoa idia siaia inai. Iesu idia abidadama henia taudia, aiemai turadia lalokau, idia dekenai mani aiemai hanamoa do oi henia.  
\p Dirava ena hariharibada umui ibounai dekenai do ia noho.