\id REV REVELATION, Hiri Motu Bible, PNG, 3/93 
\h APOKALUPO 
\toc1 APOKALUPO KERISO ESE IOANE DEKENAI IA HEDINARAIA SIVARAINA 
\toc2 APOKALUPO 
\mt1 APOKALUPO  
\mt2 KERISO ESE IOANE DEKENAI IA HEDINARAIA SIVARAINA  
\c 1  
\p
\v 1 Inai buka ena hereva be Iesu Keriso ese ia hedinaraia gauna. Dirava ese Iesu dekenai ia hedinaraia, badina ia ura Iesu ese kahirakahira do idia vara gaudia be iena hesiai taudia dekenai do ia hedinaraia. Vadaeni Keriso ese iena aneru iena hesiai tauna Ioane dekenai ia siaia, inai gaudia do ia hamaoroa totona.  
\v 2 Lau inai Ioane ese lau itaia gaudia ibounai lau gwauraia hedinarai inai. Lau gwau Dirava ena hereva, bona inai Iesu Keriso ena hereva, be idia momokani vadaeni.   
\p
\v 3 Inai buka ia duahia tauna be do ia moale. Ma danu, inai buka ena peroveta hereva idia kamonai henia, bona iena hadibaia hereva idia badinaia taudia be do idia moale. Badina inai gaudia ibounai do idia vara ena nega be ia kahirakahira vadaeni.   
\s1 Ekalesia orea 7 Asia kahana dekenai  
\p
\v 4 Lau Ioane ese, umui ekalesia orea 7 Asia dekenai inai hereva lau torea noho inai. Dirava be harihari ia noho, gunaguna ia noho, bona gabeai danu do ia mai. Ia dekena amo hariharibada bona maino do umui abia. Dirava ena helai gabuna badana ena vairanai idia noho laumadia 7 dekena amo danu, hariharibada bona maino do umui abia,  
\v 5 bona Iesu Keriso dekena amo danu. Ia be Dirava ena hereva ia gwauraia maoromaoro tauna namona. Ia be mase dekena amo ia toreisi lou vara guna tauna. Ia be tanobada ena king ibounai edia biaguna.  
\p Ia ese ita ia lalokau henia, bona iena rarana dekena amo iseda kara dika ia huria ore vadaeni.  
\v 6 Ia ese ita ia haboua, vadaeni ita be Basileia ta, bona Tamana Dirava ena hahelagaia taudia ia ese ita ia halaoa vadaeni. Iesu Keriso dekenai, be hairai bada bona siahu bada do idia noho ela bona hanaihanai. Amen.   
\p
\v 7 Umui itaia, ia be ori edia latanai ia mai noho. Taunimanima ibounai be momokani do idia itaia. Bona ia idia gwadaia taudia ese danu do idia itaia. Tanobada besedia ibounai be ia dainai do idia tai. Inai be momokani! Amen.   
\p
\v 8 Lohiabada Dirava, harihari ia noho, gunaguna ia noho, bona gabeai do ia mai tauna, Siahu Ibounai Diravana, ia gwau, “Lau be Alepa bona Omega, Matamana bona Dokona.”   
\s1 Ioane ese Keriso ia itaia  
\p
\v 9 Lau be umui emui kakana Ioane. Iesu ena murinai lau raka noho dainai, lau be umui danu ita hisihisi noho mai haheauka danu. Badina be iena Basileia taudia ibounai ese hisihisi idia abia noho. Lau ese Dirava ena hereva, bona egu abidadama Iesu dekenai lau gwauraia hedinarai noho. Unai dainai, lau idia dogoatao, bona motumotu ta, ladana be Patamo, dekenai lau idia atoa, lau noho.  
\v 10 Vadaeni Lohiabada ena Dina dekenai Lauma Helaga ese lau ia abia. Unai neganai lauegu murina kahanai be gado badana ta, kibi ena regena bamona, lau kamonai.  
\v 11 Ia gwau, “Inai oi itaia gaudia buka dekenai do oi torea, bona ekalesia orea 7 dekenai inai buka do oi siaia lao. Ekalesia orea be inai: Efeso, Semurana, Peregamo, Tuatira, Sadi, Piladelepia, Laodikea.”   
\p
\v 12 Vadaeni lauegu vairana lau giroa, lau ia hereva henia tauna lau itaia totona. Bona golo lamepa ibounai 7 lau itaia.  
\v 13 Lamepa edia huanai tau ta ia gini, iena toana be Taunimanima ena Natuna bamona. Iena dabua be lata, ela bona iena aena dekenai, bona iena kemena be golo beleta ese ia hagegea.  
\v 14 Iena huina be kurokuro momokani, mamoe huina bamona, o ori kurokuro bamona. Iena matana be lahi ena hururuhururu bamona.  
\v 15 Iena aena be kapa ia diaridiari bamona, lahi dekenai idia gabua neganai. Iena gadona ena regena be bada herea, sinavai momo edia regena bamona.  
\v 16 Iena imana idibana dekenai be hisiu 7 ia dogoatao. Tuari kaia ta mai matana, isena rua gauna, be iena uduna dekena amo ia duduia maoromaoro. Iena vairana be dina tubua neganai, dina ena diaridiari bamona.   
\p
\v 17 Lau itaia neganai, iena aena badinai lau moru diho, lau be mase tauna bamona. To ia ese iena imana idibana lau dekenai ia atoa, ia gwau, “Oi gari lasi. Lau be ginigunana momokani, bona dokona momokani.  
\v 18 Lau be lau mauri noho. Guna be lau mase vadaeni, to harihari lau mauri noho, ma do lau noho ela bona hanaihanai. Mase ena ki, bona mase taudia edia gabu ena ki, be lauegu imana dekenai ia noho.  
\v 19 Unai dainai, oi itaia gaudia do oi torea, hari idia noho gaudia, bona vaira neganai do idia vara gaudia danu.  
\v 20 Hisiu 7 lauegu imana idibana dekenai oi itaia, bona golo lamepa 7 edia anina be inai: Hisiu 7 be ekalesia oreadia 7 edia aneru, bona golo lamepa 7 be ekalesia oreadia 7.”   
\c 2  
\s1 Hadibaia hereva: Efeso ekalesia oreana dekenai  
\p
\v 1 “Efeso ekalesia oreana ena aneru dekenai inai hereva do oi torea:  
\p “Hisiu 7 iena imana idibana dekenai ia dogoatao noho, bona golo lamepa 7 edia huanai ia raka noho tauna ese hadibaia hereva ia gwauraia inai:   
\p
\v 2 “Oiemu kara lau diba. Oiemu gaukara mai hekwarahi bada, bona oiemu haheauka lau diba vadaeni. Lau diba oi ese kara dika taudia oi negea, bona sibodia idia gwauraia aposetolo taudia oi ese oi tohoa vadaeni. Oi davaria vadaeni idia be koikoi taudia.  
\v 3 Lau diba oi haheauka noho, bona lauegu ladana dainai hisihisi oi davaria vadaeni. Bona lau diba oi hesiku lasi.  
\v 4 To inai gau tamona dekenai oi be kerere: Guna be lau oi lalokau henia bada, to hari be lasi.  
\v 5 Guna be kara namodia oi karaia, to inai kara oi rakatania, bona oi moru vadaeni. Unai dainai unai kara namodia dalana do oi laloa lou, bona oiemu lalona do oi giroa, ma oiemu kara gunadia do oi karaia lou. Bema oiemu lalona oi giroa lasi neganai, lau be do lau mai, oiemu lamepa be iena gabu dekena amo do lau kokia.  
\v 6 To oiemu namo sisina be inai: Nikolaita taudia edia kara oi badu henia noho, lau ese lau badu henia hegeregerena.   
\p
\v 7 “Mai ena taiana tauna, namona be Lauma Helaga ena hereva ekalesia oreadia dekenai do ia kamonai!  
\p “Kwalimu taudia dekenai lau ese gwaumaoro do lau henia, mauri auna ena huahua do idia ania. Inai mauri auna be Dirava ena uma gabu dekenai ia gini noho.”   
\s1 Hadibaia hereva: Semurana ekalesia oreana dekenai  
\p
\v 8 “Semurana ekalesia oreana ena aneru dekenai inai hereva do oi torea:  
\p “Ginigunana momokani bona dokona momokani, ia mase ma ia mauri lou, tauna ena hadibaia hereva be inai:   
\p
\v 9 “Oiemu hisihisi bona metau lau diba. Lau diba oi be ogogami, to momokani oi be kohu momo tauna. Lau diba sibodia idia gwauraia Iuda taudia ese oi idia hereva dika henia. Idia be Iuda taudia momokani lasi. Idia be Satani ena orea taudia.  
\v 10 Hisihisi do oi abia, to do oi gari henia lasi. Kamonai! Satani ese umui haida dibura ruma dekenai do ia koua, umui do ia dibaginia, bona dina 10 lalonai do umui hisihisi. Do umui gini goada noho, bona lau do umui badinaia noho ela bona mase, vadaeni lau ese umui emui kwalimu ahuna, mauri, umui dekenai do lau henia.   
\p
\v 11 “Mai ena taiana tauna, namona be Lauma Helaga ena hereva ekalesia oreadia dekenai do ia kamonai!  
\p “Kwalimu taudia be mase iharuana ese idia do ia hadikaia lasi.”   
\s1 Hadibaia hereva: Peregamo ekalesia oreana dekenai  
\p
\v 12 “Peregamo ekalesia oreana ena aneru dekenai inai hereva do oi torea:  
\p “Tuari kaia mai matana, isena rua gauna ia abia tauna ena hadibaia hereva be inai:  
\v 13 Oiemu noho gabuna lau diba, Satani be king unai gabu dekenai. To lau oi badinaia momokani noho, bona oiemu abidadama lau dekenai oi dogoatao noho. Oibe, unai Satani ia noho gabuna dekenai lau ia gwauraia hedinarai momokani tauna, Anetipa idia alaia mase neganai, oiemu abidadama lau dekenai oi rakatania lasi.   
\p
\v 14 “To inai gau haida dekenai oi be kerere. Umui emui huanai taunimanima haida ese Balama ena hadibaia hereva idia badinaia noho. Balama ena hadibaia hereva dainai, Balaki ese Israela taudia ia hakaudia kerere, vadaeni idia kara dika. Unai murinai Israela taudia ese kaivakuku dekenai idia henia vamuna idia ania, bona matabodaga karadia idia karaia.  
\v 15 Inai bamona danu, umui emui huanai, haida ese Nikolaita taudia edia hadibaia hereva idia badinaia noho.  
\v 16 Emui lalona do umui giroa. Bema lasi, umui dekenai do lau mai haraga, egu uduna dekenai tuari kaia dekena amo unai dika taudia do lau tuari henidia.   
\p
\v 17 “Mai ena taiana tauna, namona be Lauma Helaga ena hereva ekalesia oreadia dekenai do ia kamonai!  
\p “Kwalimu taudia dekenai mana haida, guba dekena amo ia mai aniani, hunia gauna do lau henia. Bona nadi kurokurona ta idia ta ta dekenai do lau henia. Unai nadi dekenai be ladana matamata ta ia torea, tau ta ia diba lasi gauna. Abia tauna sibona do ia diba.”   
\s1 Hadibaia hereva: Tuatira ekalesia oreana dekenai  
\p
\v 18 “Tuatira ekalesia oreana ena aneru dekenai inai hereva do oi torea:  
\p “Dirava ena Natuna, iena matana be lahi ena hururuhururu bamona, iena aena be kapa idia hagoevaia, vadaeni ia diaridiari bada bamona, iena hadibaia hereva be inai:   
\p
\v 19 “Oiemu kara, oiemu lalokau, oiemu abidadama, oiemu hesiai gaukara, bona oiemu haheauka, ibounai lau diba. Lau diba danu oiemu kara be namo, guna bamona lasi.  
\v 20 To inai gauna ta dekenai oi be oi kerere: Oi ese unai hahine, ladana Iesebele, ena kara dika oi koua lasi. Ia ese sibona ia gwauraia peroveta hahine. Lauegu hesiai taudia dekenai ia ese ia hadibaia kerere, bona ia hakaudia kerere, vadaeni matabodaga kara idia karaia, bona kaivakuku dekenai henia vamuna idia ania.  
\v 21 Lau ese nega lau henia vadaeni iena lalona do ia giroa totona, to iena lebulebu karadia ia ura lasi rakatania.  
\v 22 Vadaeni, kamonai! Lau ese gorere bada mai hisihisi bada danu unai hahine do lau henia, iena heudahanai geda dekenai. Bona unai taudia, unai hahine danu idia heudahanai vadaeni, bema edia lalona idia giroa lasi, idia danu do lau hisihisi henia bada herea, unai geda dekenai.  
\v 23 Unai hahine ena murinai idia raka taudia danu do lau alaia mase. Vadaeni ekalesia orea taudia ibounai do idia diba, lau be taunimanima ibounai edia laloa bona edia ura lau diba. Bona umui danu ta ta emui davana do lau henia, emui kara, emui kara hegeregerena.   
\p
\v 24 “To umui Tuatira taudia momo ese unai hadibaia hereva umui badinaia lasi, bona Satani ena hunia momokani gaudia umui diba lasi. Umui dekenai lau hereva inai: Metau ma ta umui emui latanai do lau atoa lasi.  
\v 25 To Dirava ese umui dekenai ia henia vadaeni gauna do umui dogoatao noho, ela bona umui dekenai lau mai.  
\v 26 Kwalimu taudia, egu ura idia karaia noho ela bona dokona taudia, dekenai be siahu, egu Tamana ese lau dekenai ia henia siahu hegeregerena, do lau henidia. Idia ese tanobada besedia do idia gunalaia.  
\v 27 Auri itotohi dekena amo tanobada besedia do idia biagudia. Uro idia makohia kahana maragimaragi bamona, unai tanobada besedia do idia hamakohia maragimaragi.  
\v 28 Bona daba ena hisiu bada danu, be idia dekenai do lau henia.   
\p
\v 29 “Mai ena taiana tauna, namona be Lauma Helaga ena hereva ekalesia oreadia dekenai do ia kamonai!”   
\c 3  
\s1 Hadibaia hereva: Sadi ekalesia oreana dekenai  
\p
\v 1 “Sadi ekalesia oreana ena aneru dekenai inai hereva do oi torea:  
\p “Dirava ena lauma 7 bona hisiu 7 ia abia tauna ena hadibaia hereva be inai:  
\p “Oiemu kara lau diba. Umui idia herevalaia, idia gwau, ‘Inai ekalesia orea ia mauri noho.’ To lasi, lau diba oi mase vadaeni.  
\v 2 Unai dainai, mahuta dekena amo do oi noga! Oiemu kara, do ia mase ore lasi gauna, do oi hagoadaia, do ia mase momokani garina. Oiemu kara ibounai lau itaia vadaeni, to oiemu kara maoromaoro ta lau davaria lasi, egu Dirava ena vairana dekenai.  
\v 3 Guna oi ese Sivarai Namona oi abia dae namo herea. Unai hadibaia hereva ma do oi kamonai henia lou, bona oiemu kara dika dekena amo oiemu lalona do oi giroa lou. Bema oiemu mahuta dekena amo oi noga lasi, lau be henaoa tauna bamona oi dekenai do lau mai. Lauegu hedinarai negana be do oi diba lasi.  
\v 4 To Sadi dekenai oi be mai oiemu taudia haida, idia edia dabua idia hamiroa lasi. Idia ese dabua kurokuro idia do karaia noho. Idia be lau danu do ai raka hebou, badina edia kara be hegeregere vadaeni.  
\v 5 Kwalimu taudia ese dabua kurokuro unai bamona do idia karaia, bona edia ladana danu be mauri buka dekena amo do lau kokia lasi. To egu Tamana ena vairanai, bona iena aneru edia vairanai, edia ladana be do lau gwauraia.   
\p
\v 6 “Mai ena taiana tauna, namona be Lauma Helaga ena hereva ekalesia oreadia dekenai do ia kamonai!”   
\s1 Hadibaia hereva: Piladelepia ekalesia oreana dekenai  
\p
\v 7 “Piladelepia ekalesia oreana ena aneru dekenai inai hereva do oi torea:  
\p “Helaga bona hereva momokani tauna, ia ese Davida ena ki ia abia. Ia kehoa gauna, be ta ese do ia koua diba lasi, ma ia koua gauna, be ta ese do ia kehoa diba lasi. Inai tau ena hadibaia hereva be inai:   
\p
\v 8 “Oiemu kara lau diba vadaeni. Lau diba oiemu siahu be bada lasi, to egu hadibaia hereva be oi badinaia vadaeni, bona egu ladana be oi hunia lasi. Iduara ta oiemu vairanai lau kehoa vadaeni, tau ta ese do ia koua diba lasi.  
\v 9 Oi kamonai! Haida be idia sibodia idia gwauraia Iuda taudia, to idia be Iuda taudia momokani lasi. Idia be Satani ena orea taudia. Lau ese idia do lau guia, idia do lau hakaua, vadaeni oiemu aena badinai do idia tui diho. Vadaeni, do idia diba lau ese oi lau lalokau henia.  
\v 10 Guna lau ese oi lau oda henia do oi haheauka, bona inai oda be oi badinaia vadaeni. Unai dainai, tanobada do lau tohoa, bona tanobada taudia ibounai hisihisi dekena amo do lau tohoa neganai, oi do lau hamauria.  
\v 11 Nega daudau lasi lalonai, oi dekenai do lau mai. Vadaeni oi dekenai ia noho gauna do oi dogoatao namonamo noho, tau ta ese mauri, oiemu kwalimu ahuna, do ia dadia garina.  
\v 12 Kwalimu tauna be lauegu Dirava ena dubu ena du ta do lau halaoa, bona unai gabu do ia rakatania lasi. Lauegu Dirava ena ladana be unai kwalimu tauna ena latanai do lau torea, egu Dirava ena hanua ladana danu ia dekenai do lau torea, Ierusalema matamatana. Unai hanua be guba dekena amo do ia diho, lauegu Dirava dekena amo. Unai tau ena latanai danu, egu ladana matamatana do lau torea.   
\p
\v 13 “Mai ena taiana tauna, namona be Lauma Helaga ena hereva ekalesia oreadia dekenai do ia kamonai!”   
\s1 Hadibaia hereva: Laodikea ekalesia oreana dekenai  
\p
\v 14 “Laodikea ekalesia oreana ena aneru dekenai inai hereva do oi torea:  
\p “Hereva momokani tauna, bona Dirava ena hereva ia gwauraia maoromaoro tauna, ia be Dirava ia karaia gaudia ena badina momokani. Inai tau ena hadibaia hereva be inai:   
\p
\v 15 “Lau be oiemu kara lau diba. Lau diba oi be keru lasi, bona siahu lasi. Lau ura oi be keru momokani, o siahu momokani!  
\v 16 To lasi, oi be siahu sisina sibona, siahu lasi, keru lasi. Unai dainai lauegu uduna dekena amo oi do lau kanudia.  
\v 17 Oi be inai bamona oi hereva, oi gwau, ‘Lau be mai egu moni, bona gau ibounai lau dekenai be hegeregere vadaeni.’ To lasi. Oi diba lasi, to oi be namo lasi momokani, oi be bogahisihisi gauna, oi be ogogami, matakepulu, bona kopina kavakava.  
\v 18 Vadaeni, oi lau sisiba henia inai, lau dekena amo golo do oi hoia, lahi ese ia hagoevaia vadaeni gauna, kohu momo do oi davaria totona. Bona dabua kurokurona danu do oi hoia, do oi karaia, vadaeni dabua lasi totona do oi hemarai lasi. Matana muramura danu do oi hoia, unai muramura dekenai oiemu matana do oi dahua, vadaeni gau do oi itaia diba.  
\v 19 Lau ura henia taudia ibounai, be lau ese lau sisiba henia noho, bona lau matakani henia noho. Unai dainai, oiemu kara do oi laloa namonamo, kara namo do oi karaia mai goada danu, bona oiemu lalona do oi giroa.  
\v 20 Kamonai! Lau be iduara dekenai lau gini noho, lau pidipidi noho. Lauegu gadona do ia kamonai henia, bona iduara do ia kehoa tauna, be ia dekenai do lau vareai, ia danu do ai aniani hebou.  
\v 21 Kwalimu taudia dekenai be lau ese gwaumaoro do lau henia, vadaeni idia ese lau danu egu helai gabuna badana latanai do ai helai hebou. Unai bamona danu, guna lau be lau kwalimu, bona harihari egu Tamana danu, iena helai gabuna badana latanai ai helai hebou noho.   
\p
\v 22 “Mai ena taiana tauna, namona be Lauma Helaga ena hereva ekalesia oreadia dekenai do ia kamonai!”   
\c 4  
\s1 Tomadiho karadia guba dekenai  
\p
\v 1 Inai murinai, lauegu matana lau negea lao, vadaeni guba dekenai iduara ta ia kehoa noho, be lau itaia. Vadaeni gado ta, kibi ena regena bamona, guna lau kamonai gauna, ese lau dekenai ia hereva henia, ia gwau, “Oi daekau mai iniseni, vadaeni gabeai do idia vara momokani gaudia oi dekenai do lau hedinaraia.”  
\v 2 Nega tamona Lauma Helaga ese lau ia abia, vadaeni guba dekenai helai gabuna badana ta lau itaia, bona ia latanai tau ta ia helai.  
\v 3 Helai gabuna badana latanai ia helai tauna ena toana be iasipa bona sadio nadi edia diaridiari toana bamona. Bona kevau ese helai gabuna badana ia hagegea, lau itaia iena toana be samaragi nadi bamona.  
\v 4 Helai gabudia ibounai 24 ese unai helai gabuna badana idia hagegea, bona badana taudia 24 be unai helai gabudia latanai idia helai. Dabua kurokuro idia karaia, bona edia kwaradia latanai be edia dagi toana, golo kwara gaudia, idia noho.  
\v 5 Helai gabuna badana dekena amo, kevaru bona gado edia regena, bona guba ena boiboi ia mai. Helai gabuna badana ena vairanai, lamepa 7 idia araia noho, mai diaridiari bada, Dirava ena lauma 7 be inai.  
\v 6 Unai helai gabuna badana ena vairanai danu be davara ta ia noho, galasi gauna. Unai davara ena toana be hevarivari bamona.  
\p Mauri gaudia 4 mai edia matana momo, edia vairana kahanai bona edia murina kahanai danu, be helai gabuna badana idia hagegea noho.  
\v 7 Mauri gauna ginigunana ena toana be laiona bamona, iharuana be boromakau tau bamona, ihatoina ena vairana be taunimanima ta ena vairana bamona, bona mauri gauna namba 4 ena toana be ugava manu ia roho noho bamona.  
\v 8 Inai mauri gaudia 4 ta ta edia hanina be 6, bona inai hanina be mai edia matana momo, lalonai bona murimurinai. Idia be dina bona hanuaboi idia laga-ani lasi, idia hereva noho, idia gwau,  
\q1 “Helaga, Helaga, Helaga.  
\q1 Lohiabada Dirava be mai Siahu Ibounai.  
\q1 Gunaguna ia noho, harihari ia noho,  
\q1 bona gabeai danu do ia mai.”   
\p
\v 9 Inai mauri gaudia 4 ese ane idia abia noho. Mauri Hanaihanai Diravana be iena helai gabuna badana latanai ia helai noho, bona unai mauri gaudia ese ane dekena amo Dirava dekenai idia hanamoa bada, idia tanikiu henia, bona hairai idia henia. Inai bamona idia karaia neganai,  
\v 10 inai badana taudia 24 ese helai gabuna badana latanai ia helai Diravana ena vairanai idia tui diho, idia tomadiho henia noho. Oibe, Mauri Hanaihanai Diravana ena vairanai idia tomadiho henia, bona edia kwara gaudia be helai gabuna badana ena vairanai idia negea diho, idia gwau,   
\q1
\v 11 “Aiemai Lohiabada, aiemai Dirava e,  
\q1 oi be hegeregere momokani vadaeni,  
\q1 taunimanima ibounai ese hairai bona mataurai,  
\q1 be oi dekenai do idia henia,  
\q1 bona oiemu siahu henunai do idia noho.  
\q1 Badina gau ibounai be oi ese oi havaraia.  
\q1 Oiemu ura dainai oi karadia,  
\q1 bona oiemu ura dainai idia noho.”   
\c 5  
\s1 Ia koua momokani bukana, be Ioane ese ia itaia  
\p
\v 1 Buka ta lau itaia. Ia be helai gabuna badana latanai ia helai Diravana ena imana idibana ese ia dogoatao noho. Inai buka be mai toretore lalona kahanai, bona murimuri kahanai, bona ia be koua momokani, koua toana ibounai be 7.  
\v 2 Vadaeni, aneru goadana ta lau itaia, ia hereva badabada, ia gwau, “Daika be hegeregere inai buka do ia kehoa, bona inai koua toana 7 do ia makohia?”  
\v 3 To guba dekenai, bona tanobada dekenai, bona tanobada henunai, be ta ia goada lasi unai buka do ia kehoa. Unai dainai ta lasi inai buka ena lalona do ia itaia diba.  
\v 4 Lau be lau tai dikadika, badina be ta ena goada be hegeregere lasi buka do ia kehoa, bona buka ena lalona be ta ese ia itaia diba lasi.  
\v 5 Vadaeni, badana tauna ta ese lau dekenai ia hereva henia, ia gwau, “Oi tai lasi. Oi itaia! Iuda iduhuna ena Laiona, Davida ena natuna badana, ese kwalimu ia abia vadaeni. Ia ese unai koua toana 7 ia makohia diba, bona buka ia kehoa diba.”   
\s1 Mamoe ena Natuna, be Ioane ese ia itaia  
\p
\v 6 Vadaeni, Mamoe ena Natuna ta lau itaia, ia gini noho, to iena toana be, haida ese idia alaia mase bamona. Ia be helai gabuna badana ena huanai momokani ia gini, mauri gaudia 4, bona badana taudia ese ia idia hagegea. Bona Mamoe ena Natuna be mai ena doana 7 bona iena matana 7. Unai matana 7 be Dirava ena lauma 7, tanobada ena kahana ibounai dekenai ia siaia gaudia be unai.  
\v 7 Mamoe ena Natuna ia lao, helai gabuna badana dekenai ia helai Diravana ena imana idibana dekena amo, buka ia abia.  
\v 8 Buka ia abia neganai, mauri gaudia 4 bona badana taudia 24 be Mamoe ena Natuna ena vairanai idia tui diho. Idia ta ta be mai edia gita, bona mai edia golo urodia. Unai uro ta ta be mai edia bonana namo muramura, kwalahu gauna. Unai muramura ena bonana namona be Dirava ena taudia edia guriguri ena toana.  
\v 9 Vadaeni mauri gaudia 4, bona badana taudia 24 ese ane matamata idia abia, inai bamona:  
\q1 “Oi be hegeregere momokani buka do oi abia,  
\q1 bona koua toana do oi hamakohia.  
\q1 Badina be oi idia alaia mase,  
\q1 bona oiemu rarana dekena amo taunimanima oi hoidia,  
\q1 Dirava ena taudia do idia lao totona.  
\q1 Bese ibounai, gado ibounai, hanua ibounai,  
\q1 bona kopina idauidau taudia ibounai oi ese oi hoidia.   
\q1
\v 10 Oi ese idia oi haboua, vadaeni idia be Basileia ta.  
\q1 Bona Dirava ena hahelagaia taudia,  
\q1 be oi ese idia oi halaoa vadaeni,  
\q1 bona idia ese tanobada do idia gunalaia.”   
\s1 Ibounai ese Mamoe ena Natuna idia hanamoa bada  
\p
\v 11 Vadaeni, egu matana lau negea, bona aneru momo herea edia gadona lau kamonai. Idia ese helai gabuna badana, mauri gaudia, bona badana taudia idia gini hagegea. Edia momo be duahia diba lasi, milioni bona milioni.  
\v 12 Idia boiboi goada, idia gwau,  
\q1 “Inai Mamoe ena Natuna, guna idia alaia mase,  
\q1 ia be hegeregere momokani siahu bona kohu momo do ia abia.  
\q1 Ia be hegeregere momokani aonega bada, bona goada bada,  
\q1 mataurai, hairai bona hanamoa bada do ia abia!”   
\m
\v 13 Bona Dirava ese ia karaia gaudia ibounai, guba dekenai, tanobada dekenai, bona tanobada henunai, bona davara dekenai, inai gabudia lalonai gau ibounai edia boiboi lau kamonai, idia gwau,  
\q1 “Helai gabuna badana dekenai ia helai Diravana,  
\q1 bona Mamoe ena Natuna be,  
\q1 hanamoa, bona hairai, bona mataurai, bona siahu do idia abia,  
\q1 ela bona hanaihanai.”   
\m
\v 14 Vadaeni unai mauri gaudia 4 idia gwau, “Amen.” Bona badana taudia idia tui diho, idia tomadiho henia.   
\c 6  
\s1 Mamoe ena Natuna ese buka ena koua toadia 7 ia makohia  
\p
\v 1 Vadaeni Mamoe ena Natuna lau itaia, ia ese buka ena koua toana ginigunana ia makohia, ia kehoa. Bona mauri gaudia 4 edia huanai, idia ta, iena gadona be guba ia boiboi bamona, ia gwau, “Oi mai.”  
\v 2 Vadaeni hosi kurokurona ta lau itaia. Hosi dekenai ia guia tauna be mai ena peva. Unai tau dekenai kwara gauna namona idia henia, vadaeni mai goada danu ia lao, do ia kwalimu totona.   
\p
\v 3 Unai neganai Mamoe ena Natuna ese koua toana iharuana ia makohia. Ma mauri gauna iharuana lau kamonai, ia gwau, “Oi mai.”  
\v 4 Vadaeni hosi kakakakana ta ia mai. Ia dekenai ia guia tauna be siahu idia henia, ia ese tanobada dekena amo maino do ia kokia, taunimanima sibodia ta ta do idia alaia mase totona. Unai tau dekenai tuari kaia badana ta idia henia.   
\p
\v 5 Mamoe ena Natuna ese koua toana ihatoina ia makohia. Ma mauri gauna ihatoina lau kamonai, ia gwau, “Oi mai.” Vadaeni lau itaia, hosi koremana ta ia hedinarai. Ia dekenai ia guia tauna ese metau hahetohoa gauna, sikele ta, iena imana dekenai ia dogoatao.  
\v 6 Gado ta, mauri gaudia 4 edia huanai dekena amo lau kamonai, ia gwau, “Uiti kilogaram ta sibona be dina ta ena gaukara davana, bona bali kilogaram toi sibona be dina ta ena gaukara davana. To olive dehoro bona uaina be do umui hadikaia lasi.”   
\p
\v 7 Ma Mamoe ena Natuna ese koua toana namba 4 ia makohia. Bona mauri gauna namba 4 lau kamonai, ia gwau, “Oi mai.”  
\v 8 Vadaeni hosi ta lau itaia, ena kala be labora bamona. Ia dekenai ia guia tauna ena ladana be Mase, bona Mase Gabuna, Hel, be ia murinai ia lao. Idia ruaosi ese siahu idia abia, vadaeni tanobada ena taunimanima ibounai idia haria kahana 4. Vadaeni kahana ta be idia ese idia biagua. Unai kahana ena taunimanima idia alaia mase, tuari dekena amo, hitolo dekena amo, gorere dekena amo, bona dagedage gaudia dekena amo.   
\p
\v 9 Vadaeni Mamoe ena Natuna ese koua toana namba 5 ia makohia. Pata helagana henunai be mase taudia haida edia lauma idia noho. Inai taudia be guna Dirava ena hereva idia harorolaia, bona mai edia lalona ibounai, inai hereva idia gwauraia hedinarai momokani. Unai dainai haida ese idia dagedage henidia, idia alaia, idia mase.  
\v 10 Inai lauma idia boiboi goadagoada, idia gwau, “Siahu Ibounai Lohiabadana, helaga bona momokani, edena negai tanobada taudia do oi kota henia, edia davana do oi henia, aiemai rarana dainai?”  
\v 11 Vadaeni idia ta ta dekenai dabua kurokuro idia henia. Ma gado ta ese idia ia hamaoroa, ia gwau, “Do umui laga-ani noho nega sisina, ela bona emui bamona haida bona emui tadikakadia haida do idia alaia mase, umui mase hegeregerena. Bona unai bamona idia mase taudia edia momo be hegeregere neganai, Dirava ese emui rarana ena davana do ia henia.”   
\p
\v 12 Mamoe ena Natuna lau itaia, ia ese koua toana namba 6 ia makohia. Vadaeni tano mareremarere bada ia vara, dina danu ia dibura, dabua koremakorema bamona, bona hua be kakakaka, rara bamona.  
\v 13 Hisiu danu be guba dekena amo tanobada dekenai idia moru, fig huahua, mage lasi gaudia, lai bada ia toa neganai, fig auna dekena amo idia moru bamona.  
\v 14 Guba danu ia lao ore, hegeregere geda idia lokua noho bamona. Ororo bona motumotu ibounai danu edia gabu edia gabu dekena amo idia kokia.  
\v 15 Vadaeni tanobada ena king taudia bona lohia taudia, bona tuari biagudia, bona kohu momo taudia, bona goada taudia, bona hesiai mai guia danu taudia, bona ura kwalimu taudia, ibounai be nadi ena kohua dekenai, bona nadi badadia henunai idia hunia, ororo dekenai.  
\v 16 Idia ese ororo bona nadi badadia dekenai idia boiboi, idia gwau, “Umui ese aiemai latanai do umui moru diho, ai do umui hunia, helai gabuna badana dekenai ia helai Diravana ena vairana do ai itaia garina. Ai do umui hunia, Mamoe ena Natuna ena badu ese ai do ia abia garina!  
\v 17 Badina be idia ruaosi edia badu dinana badana ia ginidae vadaeni, bona daika do ia mauri noho diba?”   
\c 7  
\s1 Israela taudia 144,000 ese Dirava ena maka idia abia  
\p
\v 1 Vadaeni aneru 4 lau itaia, tanobada ena kona 4 dekenai idia gini. Idia ese lai 4 edia toa dalana idia koua. Vadaeni lai ta be tanobada dekenai, o davara dekenai ia toa lasi, o au ta ena rauna ia hamarerea lasi.  
\v 2 Ma aneru ta lau itaia, dina ia daekau kahana dekena amo ia daekau mai, ia ese Mauri Diravana ena koua toana badana ia dogoatao noho. Ia ese unai aneru 4 ia boiboi henidia badabada. Unai aneru 4 be Dirava ese siahu ia henidia vadaeni, tanobada bona davara do idia hadikaia totona.  
\v 3 Unai aneru ia gwau, “Tanobada bona davara bona au do umui hadikaia lasi, ela bona iseda Dirava ena hesiai taudia edia baguna dekenai Dirava ena maka do ita atoa.”  
\v 4 Vadaeni lau kamonai, Dirava ena maka idia abia taudia edia momo be 144,000. Idia be Israela bese taudia, edia iduhu 12 dekena amo, inai bamona:   
\q1
\v 5 Iuda ena iduhu dekena amo be 12,000,  
\q1 Rubena ena iduhu dekena amo be 12,000,  
\q1 Gado ena iduhu dekena amo, be 12,000,   
\q1
\v 6 Asere ena iduhu dekena amo be 12,000,  
\q1 Napatali ena iduhu dekena amo be 12,000,  
\q1 Manase ena iduhu dekena amo be 12,000,   
\q1
\v 7 Simeona ena iduhu dekena amo be 12,000,  
\q1 Levi ena iduhu dekena amo be 12,000,  
\q1 Isakara ena iduhu dekena amo be 12,000,   
\q1
\v 8 Sebuluno ena iduhu dekena amo be 12,000,  
\q1 Iosepa ena iduhu dekena amo be 12,000,  
\q1 Beniamina ena iduhu dekena amo be 12,000.   
\s1 Taunimanima momo herea  
\p
\v 9 Inai murinai egu matana lau negea, taunimanima momo herea lau itaia, duahia diba lasi. Idia be bese idauidau, iduhu idauidau, kopina idauidau, bona gado idauidau. Idia ibounai be helai gabuna badana ena vairanai bona Mamoe ena Natuna ena vairanai idia gini. Edia dabua be kurokuro, bona edia imana dekenai pama au rauraudia idia dogoatao.  
\v 10 Idia boiboi badabada, idia gwau, “Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu.”   
\p
\v 11 Vadaeni, helai gabuna badana, bona badana taudia, bona mauri gaudia 4 idia hagegea aneru ibounai ese helai gabuna badana ena vairanai idia tui diho, Dirava dekenai idia tomadiho henia.  
\v 12 Idia gwau, “Momokani! Iseda Dirava ita hanamoa bada, bona iena hairaina ita gwauraia hedinarai badabada be namo! Iena aonega bona iena laloa ibounai be namo herea dainai ita tanikiu henia, bona iena ladana ita hanamoa bada! Iena siahu bona goada be bada herea! Oibe, siahu ibounai be ia sibona ena, ela bona hanaihanai! Amen.”   
\s1 Inai taunimanima momo edia hisihisi ia ore vadaeni  
\p
\v 13 Badana tauna ta ese lau ia nanadaia, ia gwau, “Inai dabua kurokuro idia karaia taudia be daika? Bona edeseni dekena amo idia mai?”   
\p
\v 14 Vadaeni lau haere, lau gwau, “Tau badana e, oi diba, to lau diba lasi.”  
\p Ma ia ese lau ia hamaoroa, ia gwau, “Inai taudia be dagedage taudia ese idia hisihisi henia bada herea. To unai dagedage idia hanaia vadaeni, mai mauri danu. Bona idia ese edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro bona goeva momokani.  
\v 15 Unai dainai idia be Dirava ena helai gabuna badana ena vairanai idia gini noho. Dina bona hanuaboi idia ese Dirava ena hesiai gaukara idia karaia noho, iena dubu helaga lalonai. Helai gabuna badana dekenai ia helai Diravana be idia dekenai ia noho, bona ia ese idia ia naria noho.  
\v 16 Idia be do idia hitolo lou lasi, do idia ranu mase lou lasi, dina, o siahu gauna ta ese idia do ia araia lasi.  
\v 17 Badina be Mamoe ena Natuna, helai gabuna badana ena huanai ia noho, ese idia do ia naria. Ia ese mauri ranuna, ia lohilohi gauna, dekenai do ia hakaudia lao. Bona Dirava ese edia taitai ena ranu ibounai edia matana dekena amo do ia dahua ore.”   
\c 8  
\s1 Buka koua toana namba 7 ia makohia  
\p
\v 1 Mamoe ena Natuna ese koua toana namba 7 ia makohia, vadaeni guba dekenai be regerege ta lasi, hora ena kahana ta bamona.  
\v 2 Vadaeni Dirava ena vairanai idia gini aneru 7 lau itaia, idia dekenai kibi 7 idia henia.   
\p
\v 3 Ma aneru ta ia mai, pata helagana badibadinai ia gini. Iena imana dekenai be golo uro ta. Unai uro be, ia lalonai muramura mai bonana namo, idia gabua gauna. Vadaeni idia ese muramura mai bonana namona momo unai aneru dekenai idia henia. Unai aneru ese unai muramura bona Dirava ena taudia edia guriguri be ia haboua tamona. Vadaeni inai boubou gauna tamona be Dirava dekenai ia henia. Henia gabuna be golo pata helagana latanai, Dirava ena helai gabuna badana ena vairanai.  
\v 4 Vadaeni muramura mai bonana ena kwalahu, Dirava ena taudia edia guriguri danu, be aneru ena imana dekena amo ia daekau, Dirava ena vairanai.  
\v 5 Vadaeni aneru ese golo uro ia abia, pata helagana ena lahi dekena amo ia hahonua, bona tanobada dekenai ia negea diho. Vadaeni guba ia boiboi ena regena, gado edia regena, kevaru, bona tano mareremarere bada idia vara.   
\s1 Aneru 4 ese kibi idia hiriria  
\p
\v 6 Vadaeni aneru 7 idia gini hegaegae, edia kibi do idia hiriria totona.   
\p
\v 7 Aneru ginigunana ese iena kibi ia hiriria, vadaeni medu, aisi nadi bamona, bona lahi, rara danu idia mikisi, be tanobada dekenai idia diho. Unai neganai tanobada ena tano kahana toi dekena amo kahana ta ia araia ore, bona au ibounai edia orea toi dekena amo orea ta idia araia ore, bona tanobada ena rei kasiri ibounai ia araia ore.   
\p
\v 8 Aneru iharuana ese iena kibi ia hiriria. Vadaeni gau ta, iena toana be ororo bada herea mai lahi danu bamona be davara dekenai idia negea diho. Davara ena kahana toi dekena amo kahana ta be rara dekenai ia halaoa.  
\v 9 Davara ena gwarume orea toi dekena amo orea ta idia mase vadaeni. Bona sisima orea toi dekena amo orea ta idia mutu vadaeni.   
\p
\v 10 Aneru ihatoina ese iena kibi ia hiriria. Hisiu bada herea ta guba dekena amo ia moru diho, ia hururuhururu, kede badana bamona. Sinavai ibounai edia orea toi dekena amo sinavai orea ta edia latanai unai hisiu ia moru, bona lohilohi ranudia ibounai edia orea toi dekena amo orea ta edia latanai danu ia moru.  
\v 11 Unai hisiu ena ladana be “Mamina Dika.” Unai ranu ibounai ena kahana toi dekena amo ranu ena kahana ta be unai mamina dika ese ia abia. Bona unai ranu idia inua dainai, taunimanima momo herea idia mase, badina iena mamina be ia dika.   
\p
\v 12 Aneru namba 4 ese iena kibi ia hiriria, vadaeni dina bona hua bona hisiu ibounai idia haria kahana toi. Vadaeni idia ese dina ena kahana ta, hua ena kahana ta, bona hisiu edia kahana ta idia hadikaia. Vadaeni diari ena nega idia haria kahana toi. Bona diari ena kahana ta ia dibura. Unai dainai dina ena kahana ta be ia diari lasi, bona hanuaboi danu ena kahana ta be unai bamona ma ia dibura lao.   
\p
\v 13 Vadaeni ugava manu ta lau itaia, ataiai momokani ia roho noho. Bona iena gadona lau kamonai. Ia boiboi badabada, ia gwau, “Tanobada taudia ibounai madi o, madi o, madi o! Badina be aneru toi, edia kibi idia do noho. Vadaeni edia kibi ena regena idia hiriria neganai, hisihisi bada tanobada taudia ese ma do idia abia.”   
\c 9  
\s1 Aneru namba 5 ese kibi ia hiriria  
\p
\v 1 Aneru namba 5 ese iena kibi ia hiriria. Vadaeni hisiu ta lau itaia, guba dekena amo ia moru diho tanobada dekenai. Inai hisiu dekenai ki idia henia. Ki be dobu masemase gurina kehoa gauna.  
\v 2 Hisiu ese dobu masemase gurina ia kehoa. Vadaeni kwalahu be guri dekena amo ia daekau, amu badana ena kwalahu bamona. Inai guri dekena amo ia daekau kwalahuna ese dina bona guba padana idia koua, vadaeni idia dibura.  
\v 3 Vadaeni kwalahu dekena amo kwadi idia diho mai tanobada dekenai. Bona idia ese tanobada doadoa edia siahu hegeregerena idia abia.  
\v 4 Oda hereva inai bamona idia abia, “Umui ese rei do umui hadikaia lasi, tano dekenai idia tubu avadia bona au danu do umui hadikaia lasi. To umui ese Dirava ena maka edia baguna dekenai idia abia lasi taudia sibona do umui hadikaia.  
\v 5 Umui ese inai taudia do umui hisihisi henia ia lao bona hua 5, to umui ese idia do umui alaia lasi.” Vadaeni inai kwadi ese taunimanima idia hisihisi henia dikadika. Unai hisihisi be tanobada doadoa edia koria hisihisi bamona.  
\v 6 Unai hua 5 lalonai, taunimanima ese mase do idia tahua, to do idia davaria lasi. Idia be mase do idia ura dikadika, to mase ese idia dekena amo do ia heau siri bamona.   
\p
\v 7 Inai kwadi edia toana be tuari hosi bamona. Edia kwarana latanai be golo kwara gaudia bamona. Edia vairana be taunimanima edia vairana bamona.  
\v 8 Edia huina be hahine edia huina bamona. Edia isena be laiona edia isena bamona.  
\v 9 Edia kemena dekenai be palaka gaudia, auri bamona, idia noho. Edia hanina edia regena be kariota edia regena bamona, hosi momo ese idia veria gaudia, tuari dekenai idia heau vareai neganai.  
\v 10 Edia iuna be doadoa edia iuna bamona, mai ena koria gauna, doadoa bamona. Edia siahu, taunimanima do idia hisihisi henia hua 5, be edia iuna dekenai ia noho.  
\v 11 Idia be mai edia king. Ia be guri dobu masemase ena aneru. Iena ladana Heberu gado dekenai be Abadoni, to Helene gado dekenai iena ladana be Apoliona, ena anina be “Hadikaia Tauna.”   
\p
\v 12 Dika ta ia ore vadaeni. Rua be idia do noho.   
\s1 Aneru namba 6 ese kibi ia hiriria  
\p
\v 13 Aneru namba 6 ese iena kibi ia hiriria. Vadaeni gado ta lau kamonai, golo pata helagana ena kona 4 dekena amo. Inai pata helagana be Dirava ena vairanai ia noho.  
\v 14 Unai gado ese aneru namba 6 ia hamaoroa, ia gwau, “Aneru 4, Euperate Sinavai badana ena isena dekenai idia guia noho, be do oi ruhaia.”  
\v 15 Vadaeni unai aneru 4 be ia ese ia ruhaia. Unai aneru 4 be idia abia hegaegae, unai hora, unai dina, unai hua, unai lagani, gaukara ta do idia karaia totona. Edia gaukara be inai: Tanobada ena taunimanima orea toi dekena amo orea ta be do idia alaia mase.  
\v 16 Idia edia tuari taudia, hosi dekenai idia guia taudia, be ibounai 200 milioni. Edia momo be gado ta ese lau ia hamaoroa.   
\p
\v 17 Vadaeni, egu mata hanai lalonai unai hosi, mai edia guia taudia lau itaia. Unai taudia ese kemena auri edia kemena dekenai idia atoa. Unai auri edia kala be kakakaka, lahi bamona, bona bulu bona labora, salipa nadi bamona. Hosi edia kwarana be laiona edia kwarana bamona, bona edia uduna dekena amo, lahi bona kwalahu bona salipa idia negea murimuri kahana dekenai.  
\v 18 Inai dika badadia toi dainai, tanobada taudia ibounai kahana toi dekena amo, kahana ta idia mase. Inai lahi bona kwalahu, bona salipa, unai hosi ese edia uduna dekena amo idia negea gaudia, ese unai taudia idia alaia mase.  
\v 19 Hosi edia siahu be edia uduna bona edia iuna dekenai. Edia iuna be gaigai bamona, mai edia kwarana, bona unai kwarana dekena amo taunimanima idia hisihisi henia.   
\p
\v 20 Tanobada taudia oredia, inai hisihisi ese ia hamasea lasi taudia, be edia lalona idia giroa lasi, bona edia imana idia karaia gaudia dekena amo idia raka siri lasi. Idia ese lauma dikadia tomadiho henia karana idia rakatania lasi. Golo bona siliva bona kapa bona nadi bona au dekena amo idia karaia kaivakuku tomadiho henia kara idia hadokoa lasi. Inai kaivakuku gaudia ese gau idia itaia diba lasi, idia kamonai diba lasi, bona idia be raka diba lasi gaudia.  
\v 21 Oibe, unai dika taudia ese edia ala-ala, bona edia babalau, bona edia heudahanai, bona edia henaoa karadia danu dekena amo edia lalona idia giroa lasi.   
\c 10  
\s1 Aneru ese Ioane dekenai buka ia henia, vadaeni ia ania  
\p
\v 1 Vadaeni aneru goadana ma ta lau itaia, guba dekena amo ia diho. Ori ta ese ia kumia, dabua bamona, bona kevau ese iena kwarana ia hagegea. Iena vairana be dina bamona, bona iena aena edia toana be du, lahi ese idia ia araia noho, mai hururuhururu bada danu.  
\v 2 Aneru ena imana dekenai be buka maragina ta ia noho, ia kehoa noho. Vadaeni aneru ese iena aena idibana be davara dekenai ia atoa, bona iena aena laurina be tanobada dekenai ia atoa.  
\v 3 Ia boiboi bada herea, iena gadona be laiona edia boiboi bamona. Ia boiboi murinai, guba ena boiboi ibounai 7, mai regena bada be aneru dekenai idia haere henia.  
\v 4 Inai guba boiboi idia hereva neganai, lau ese edia hereva lau torea gwauraia. To gado ta guba dekena amo lau kamonai, ia gwau, “Inai guba boiboi ena hereva do oi torea lasi. Do oi hunia noho.”   
\p
\v 5 Vadaeni davara bona tanobada dekenai ia gini aneruna ese iena imana idibana ia duduia guba dekenai.  
\v 6 Ia ese ia mauri noho hanaihanai Diravana ena ladana dekenai gwauhamata metauna ia gwauraia. Inai Dirava ese guba bona iena lalonai gaudia ibounai, bona tanobada bona iena lalonai gaudia ibounai, bona davara bona iena lalonai gaudia ibounai ia karaia. Aneru ia gwau, “Nega ena dokona be ia kahirakahira momokani. Dirava ese ma nega sisina do ia naria lasi.  
\v 7 Aneru namba 7 ese iena kibi do ia hiriria gwauraia neganai, Dirava ese iena palani, hunia gauna, do ia karaia haorea. Dirava ese inai palani ena anina, be guna iena hesiai taudia peroveta taudia dekenai ia hamaoroa.”   
\p
\v 8 Vadaeni unai gado, guna guba dekena amo lau kamonai gauna, ese lau dekenai ia hereva henia lou, ia gwau, “Oi lao, davara bona tanobada dekenai ia gini aneru ena imana dekenai ia noho buka maragina, kehoa gauna, do oi abia.”   
\p
\v 9 Unai aneru dekenai lau lao, lau gwau, “Buka maragina lau dekenai oi henia.” Vadaeni ia gwau, “Oi abia, oi ania ore, oiemu bogana dekenai iena mamina do ia dika, to oiemu uduna dekenai iena mamina be do ia namo, hani bamona.”   
\p
\v 10 Vadaeni buka maragina aneru ena imana dekena amo lau abia, lau ania ore. Lauegu uduna dekenai ia be namo, hani bamona, to lau ania ore murinai, egu bogana ena mamina lau abia be ia dika.   
\p
\v 11 Vadaeni ia ese lau ia hamaoroa, ia gwau, “Taunimanima idauidau, bese idauidau, gado idauidau bona king idauidau danu, inai taudia ibounai dekenai do idia vara gaudia do oi gwauraia hedinarai lou.”   
\c 11  
\s1 Uitnesi taudia rua  
\p
\v 1 Vadaeni itotohi ta, iena toana be hahetoho auna, lau dekenai idia henia, idia gwau, “Oi lao, Dirava ena dubu helaga bona pata helagana edia bada do oi hahetoho karaia. Bona dubu helaga lalonai idia tomadiho noho taudia do oi duahia.  
\v 2 Dubu helaga ena ariara, murimuri magu ese ia hagegea gauna, be do oi hahetoho karaia lasi. Badina unai gabu be Dirava diba lasi taudia edia. Idia ese hanua helagana dekenai do idia mai, edia aena dekena amo do idia moia, hua 42 lalonai.  
\v 3 Lau ese egu uitnesi taudia rua dekenai siahu do lau henia. Vadaeni idia ese puse dabua do idia karaia, bona dina 1260 lalonai Dirava ena peroveta hereva do idia gwauraia hedinarai.”   
\p
\v 4 Inai uitnesi taudia rua be olive audia rua bona lamepa rua, tanobada ena Lohiabada ena vairanai idia gini noho.  
\v 5 Tau ta bema ia ura unai uitnesi ruaosi do ia hadikaia neganai, idia ese edia uduna dekena amo lahi do idia negea, unai tau do idia araia ore. Vadaeni, bema tau ta ese unai uitnesi taudia ia alaia toho neganai, ia be do ia mase momokani.  
\v 6 Unai uitnesi ruaosi be mai edia siahu guba do idia koua, vadaeni edia haroro dinadia lalonai medu do ia diho lasi. Idia be mai siahu danu tanobada ena ranu be rara dekenai do idia halaoa. Mai edia siahu danu, hisihisi idauidau dekena amo tanobada taudia do idia hisihisi henia. Inai bamona idia karaia diba nega momo, edia ura hegeregerena.   
\p
\v 7 Edia peroveta hereva gwauraia hedinarai gaukara ia ore neganai, unai dagedage gauna dikana, be guri dobu masemase dekena amo do ia daekau mai. Vadaeni ia ese idia ruaosi do ia tuari henia. Unai dagedage gauna be do ia kwalimu, ia ese unai uitnesi taudia ruaosi do ia aladia mase.  
\v 8 Vadaeni ruaosi edia tauanidia be hanua badana ena ariara dekenai do idia hekure noho. Unai gabu be edia Lohia idia hasatauroa gabuna. Unai hanua badana ena ladana, parabole dekenai, be Sodoma, o Aigupito.  
\v 9 Vadaeni dina toi mai dina kahana lalonai, taunimanima idauidau momo, bese idauidau, gado idauidau, kopina idauidau taudia ese unai uitnesi ruaosi edia tauanina do idia itaia noho. Bona unai taunimanima ese haida edia dala do idia koua, vadaeni ruaosi edia tauanina idia guria diba lasi.  
\v 10 Bona tanobada taudia be idia ruaosi edia mase dainai do idia moale bada. Edia turana ta ta dekenai harihari gaudia do idia henia, edia moale hedinaraia ena toana. Badina korikori be unai peroveta taudia ruaosi ese tanobada taudia idia hisihisi henia bada herea dainai.   
\p
\v 11 To dina toi mai dina kahana ta ia ore, Dirava ese mauri ena laga idia ruaosi dekenai ia siaia lao, idia lalonai inai laga ia vareai. Vadaeni ruaosi idia toreisi, idia gini. Unai kara idia itaia taudia idia gari bada herea.  
\v 12 Unai neganai unai peroveta taudia ruaosi ese gado ta guba dekena amo idia kamonai, ia hereva badabada, idia ia boiboi henia. Ia gwau, “Umui daekau mai iniseni.” Vadaeni idia ruaosi ori ta lalonai guba dekenai idia daekau. Idia badu henidia taudia ese ruaosi idia itaia, idia daekau lao noho.  
\v 13 Vadaeni, unai nega korikori, nega tamona, tano mareremarere badana ta ia vara. Unai hanua kahana 10 dekena amo, kahana ta ia hadikaia ore. Bona tano mareremarere dainai, taunimanima 7000 idia mase momokani. Taunimanima oredia, idia mauri noho taudia ese idia gari dikadika, bona guba ena Dirava ena siahu idia hanamoa bada.   
\p
\v 14 Dika iharuana be ia ore vadaeni. Ihatoina be kahirakahira do ia mai.   
\s1 Kibi namba 7  
\p
\v 15 Aneru namba 7 ese iena kibi ia hiriria. Vadaeni gado badadia guba dekenai idia hereva, idia gwau, “Tanobada biagua siahuna be iseda Lohiabada bona iena Keriso idia abia vadaeni. Bona Lohiabada ese tanobada do ia biagua momokani, ela bona hanaihanai.”  
\v 16 Vadaeni badana taudia 24, Dirava ena vairanai edia helai gabudia dekenai idia helai taudia, ese idia tui diho, Dirava idia tomadiho henia, idia gwau,   
\q1
\v 17 “Lohiabada e, Siahu Ibounai Diravana,  
\q1 harihari oi noho, gunaguna oi noho.  
\q1 Ai ese oi ai tanikiu henia.  
\q1 Oi ese oiemu siahu bada oi gaukaralaia vadaeni,  
\q1 bona oiemu Basileia oi biagua hamatamaia vadaeni.   
\q1
\v 18 Dirava diba lasi taudia idia badu dikadika,  
\q1 badina be oiemu badu ena nega ia ginidae vadaeni.  
\q1 Mase taudia edia kota henia nega danu ia ginidae vadaeni.  
\q1 Oiemu hesiai taudia, peroveta taudia,  
\q1 be harihari edia davana namona do oi henia.  
\q1 Oi dekenai idia gari henia taudia ibounai, badadia bona maragidia,  
\q1 edia davana namona do oi henia ena nega danu,  
\q1 be ia ginidae vadaeni.  
\q1 Harihari be tanobada idia hadikaia vadaeni taudia do oi alaia ore.”   
\p
\v 19 Vadaeni Dirava ena dubu helaga guba dekenai be ia kehoa, bona Dirava ena Taravatu Maua be dubu helaga lalonai ia hedinarai. Unai neganai kevaru, bona guba ena boiboi, bona tano mareremarere badana, bona medu, aisi nadi bamona, idia vara.   
\c 12  
\s1 Hahine bona huala badana  
\p
\v 1 Vadaeni hoa kara badana ta guba dekenai ia hedinarai. Hahine ta, iena dabua be dina, bona hua be iena aena henunai ia noho, bona hisiu 12 ese iena kwarana idia hagegea.  
\v 2 Ia be rogorogo, bona iena mara be kahirakahira, vadaeni hisihisi dainai ia tai mai boiboi bada danu.   
\p
\v 3 Ma hoa kara badana ta guba dekenai ia hedinarai. Huala badana ta, kakakaka gauna, iena kwarana be 7, bona iena doana be 10. Iena kwara gaudia be 7, iena kwarana ta ta edia latanai.  
\v 4 Huala ese iena iuna dekena amo guba ena hisiu momo ia daroa, vadaeni tanobada dekenai idia moru. Hisiu ibounai orea toi dekena amo hisiu orea ta ia botaia, idia moru diho. Unai huala ese, unai do ia mara hahine ena vairanai ia gini hegaegae noho. Ia naria noho, ela bona unai hahine ese mero do ia havaraia, ia ese mero do ia ania totona.  
\v 5 Vadaeni hahine ia mara, mero ta ia abia. Unai mero ese vaira neganai auri itotohi dekena amo bese ibounai do ia gunalaia. To hahine ia mara, be nega tamona iena mero idia abia daekau Dirava dekenai, bona Dirava ena helai gabuna badana dekenai.  
\v 6 Unai neganai unai hahine be taunimanima idia noho lasi gabuna dekenai ia heau lao, Dirava ese ia karaia hegaegae gabuna dekenai ia noho. Unuseni be dina 1260 lalonai unai hahine do idia ubua bona naria.   
\s1 Guba dekenai tuari ia vara  
\p
\v 7 Vadaeni guba dekenai tuari ia vara. Mikaela mai ena aneru momo danu ese huala idia tuari henia. Huala mai ena aneru momo danu ese Mikaela idia tuari henia.  
\v 8 To huala ena goada hegeregere lasi dainai ia kwalimu lasi. Unai dainai huala mai ena aneru be dala lasi guba dekenai do idia noho.  
\v 9 Vadaeni unai huala badana, be Dirava ena aneru ese idia negea diho. Ia be unai idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho gauna. Oibe, ia, mai ena aneru ibounai danu, be idia ese tanobada dekenai idia negea diho.   
\p
\v 10 Unai neganai lau kamonai, gado badana guba dekenai ia boiboi, ia gwau, “Harihari iseda Dirava ena hamauria ia ginidae vadaeni. Harihari iena Keriso ese iena siahu ia hedinaraia vadaeni. Badina be unai samania tauna ese Dirava ena vairanai, dina bona hanuaboi, guna ia gini, iseda varavara ia samania, be hari aneru ese idia negea vadaeni. Guba dekena amo ia idia negea diho vadaeni.  
\v 11 Iseda varavara ese Mamoe ena Natuna ena rarana dainai, bona iena hereva idia gwauraia dainai, Satani dekena amo idia kwalimu. Bona edia tanobada mauri idia laloa momo lasi, to Keriso dainai edia mauri idia atoa diho.  
\v 12 Guba e, bona guba lalonai noho taudia e! Unai kara dainai do umui moale bada! To tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.”   
\s1 Huala ese tanobada ia tuari henia  
\p
\v 13 Huala ia diba, tanobada dekenai ia idia negea diho neganai, ia ese unai mero ia havaraia hahine ia lulua hamatamaia.  
\v 14 To ugava manu ese iena hanina rua unai hahine dekenai idia henia, vadaeni ia ese unai huala dekena amo ia roho lao taunimanima noho lasi gabuna dekenai, iena gabu korikori dekenai. Unuseni lagani toi mai kahana ta do idia ubua bona naria, bona huala ese unuseni do ia hadikaia diba lasi.  
\v 15 Vadaeni huala ese hahine ia lulua, bona iena uduna dekena amo ranu ia negea, sinavai ia abata bamona, unai abata ese hahine do ia abia, do ia haboioa ore totona.  
\v 16 To tanobada ese hahine ia durua. Tanobada ese iena uduna ia kehoa bamona, unai huala ia negea ranuna, be tanobada ese ia hadonoa ore.  
\v 17 Vadaeni huala ese unai hahine ia badu henia dainai, ia lao, hahine ena natuna oredia, idia do noho taudia, ia tuari henia. Unai taudia be inai: Idia ese Dirava ena taravatu idia badinaia momokani. Bona Iesu ena hereva momokani idia gwauraia hedinarai, ma idia badinaia danu.  
\v 18 Vadaeni huala ese davara ena kone dekenai ia gini.   
\c 13  
\s1 Dagedage gauna davara dekena amo ia daekau mai  
\p
\v 1 Dagedage gauna ta lau itaia, davara dekena amo ia daekau, iena doana be 10, bona iena kwarana be 7. Iena doana edia duduna dekenai be kwara gaudia, dagi toana, idia noho, ibounai 10. Bona iena kwarana ta ta dekenai ladana idia torea, inai ladana ibounai edia anina be Dirava hadikaia hereva gaudia.  
\v 2 Inai dagedage gauna lau itaia, iena toana be lepadi bamona, to iena aena be bea ena aena bamona. Iena uduna be laiona ena uduna bamona. Huala ese sibona ena siahu inai dagedage gauna dekenai ia henia. Ma sibona ena helai gabuna badana, bona ena goada bada herea danu ia henia.  
\v 3 Iena kwarana ta lau itaia, iena toana be idia haberoa dikadika, mase berona bamona, to unai bero be ma ia namo lou vadaeni. Tanobada taudia ibounai ese inai dagedage gauna dekenai idia hoa bada, bona iena murinai idia raka.  
\v 4 Bona tanobada taudia ibounai ese huala idia tomadiho henia, badina be ia ese unai dagedage gauna dekenai iena siahu ia henia dainai. Dagedage gauna danu idia tomadiho henia, idia gwau, “Daika be inai dagedage gauna hegeregerena? Daika ese ia tuari henia diba?”   
\p
\v 5 Dirava ese ia koua lasi dainai, unai dagedage gauna ese iena uduna dekenai Dirava hadikaia hereva momo herea ia gwauraia. Unai bamona siahu ia abia dainai, unai dagedage gauna ese tanobada ia gunalaia hua 42 lalonai. tanobada ia gunalaia hua 42 lalonai.  
\v 6 Unai dagedage gauna ese iena uduna ia kehoa, Dirava ia hereva dika henia. Dirava ena ladana, bona Dirava ena noho gabuna, bona guba dekenai idia noho taudia ibounai be dagedage gauna ese ia hadikaia dikadika.  
\v 7 Dirava ese ia koua lasi dainai dagedage gauna ese Dirava ena taudia ia tuari henia, bona idia dekena amo ia kwalimu. Siahu danu ia abia, iduhu ibounai, bese ibounai, gado ibounai, bona kopina ibounai taudia, ia ese idia ia gunalaia.  
\v 8 Tanobada noho taudia ibounai, edia ladana be mauri buka dekenai idia torea lasi taudia ese, unai dagedage gauna do idia tomadiho henia. Inai mauri buka be Mamoe ena Natuna ena. Tanobada ia do karaia lasi neganai, Dirava ia diba unai Mamoe ena Natuna be do idia alaia mase.   
\p
\v 9 Mai ena taiana tauna, be mani do ia kamonai!  
\v 10 Bema Dirava ena ura be tau ta dibura ruma dekenai do idia atoa, ia be idia ese dibura ruma dekenai do idia atoa. Bona bema Dirava ena ura be tau ta tuari kaia dekena amo do idia alaia mase, ia be tuari kaia dekena amo do idia alaia mase. To hisihisi inai bamona ia vara neganai, Dirava ena bese taudia ese edia haheauka bona edia abidadama do idia dogoatao auka noho be namo.   
\s1 Dagedage gauna ma ta tano lalona dekena amo ia daekau mai  
\p
\v 11 Vadaeni dagedage gauna ma ta lau itaia, tano ena lalona dekena amo ia daekau mai. Iena doana be rua, mamoe ena natuna ena doana toana bamona. To iena gadona be huala badana ena gadona bamona.  
\v 12 Inai dagedage gauna iharuana ese dagedage gauna ginigunana ena siahu ibounai ia gaukaralaia, ia vairanai. Ia ese danu tanobada, bona tanobada noho taudia ibounai ia oda henidia, unai dagedage gauna ginigunana do idia tomadiho henia. Unai dagedage gauna ginigunana, be unai iena mase berona ia namo lou gauna.  
\v 13 Dagedage gauna iharuana ese hoa kara badadia ia karaia. Ia ese lahi, be guba dekena amo ia hadihoa taunimanima ibounai edia vairanai.  
\v 14 Unai ia abia siahuna dekena amo, ia ese hoa karadia dagedage gauna ginigunana ena vairanai ia karaia. Bona unai hoa karadia dainai, ia ese tanobada taudia ibounai ia koia momokani. Ia ese tanobada taudia ia hamaoroa, unai dagedage gauna, mai ena mase berona, to ia mauri noho gauna, iena laulau do idia karaia, iena ladana hanamoa totona.  
\v 15 Bona siahu ia abia, vadaeni dagedage gauna iharuana ese unai dagedage gauna ena laulauna dekenai, mauri ena lagana ia henia, vadaeni ia hamauria, bona ia hereva diba. Siahu danu unai laulau dekenai ia henia, vadaeni laulau do idia tomadiho henia lasi taudia ibounai, be ia ese do ia aladia mase.   
\p
\v 16 Vadaeni dagedage gauna iharuana ese, taunimanima ibounai, maragidia bona badadia, kohu momo taudia bona ogogami taudia, hesiai mai guia taudia, bona ura kwalimu taudia, maka ta idia dekenai ia atoa. Ia oda henidia, inai maka be edia imana idiba kahana dekenai, o edia baguna dekenai, do idia atoa.  
\v 17 Vadaeni bema tau ta ese inai dagedage gauna ena maka, iena ladana, o iena namba, ia abia lasi neganai, unai tau be gau ta ia hoia mai o hoia lao diba lasi.   
\p
\v 18 Umui ese inai hereva do umui laloa namonamo. Mai ena aonega tauna ese inai dagedage gauna ena namba do ia duahia namonamo, badina inai namba be tau ta ena ladana. Iena namba be inai: 666.   
\c 14  
\s1 Mamoe ena Natuna, mai ena bese taudia  
\p
\v 1 Ma lau itaia, Mamoe ena Natuna be Siona Ororo dekenai ia gini. Ia danu be taunimanima 144,000 idia gini, iena ladana, bona iena Tamana ena ladana be edia baguna dekenai Dirava ese ia torea.  
\v 2 Vadaeni guba dekena amo gado ta lau kamonai. Inai gado be sinavai momo edia ranu idia heau haraga ena regena bamona, bona guba ena boiboi bada bamona. Unai gado danu be gita taudia momo edia gita idia gadara nega tamona bamona.  
\v 3 Inai taunimanima 144,000 ese ane matamata idia abia, Dirava ena helai gabuna badana vairanai, bona mauri gaudia 4, bona badana taudia edia vairanai. Unai ane be tau ta ia davaria diba lasi, unai taunimanima 144,000 sibona. Dirava ese unai taudia tanobada dekena amo ia hamauria.  
\v 4 Inai taudia be hahine danu idia sihari lasi momokani. Idia be helaga bona goevagoeva. Idia ese Mamoe ena Natuna murinai idia raka, iena loaloa gabudia ibounai. Taunimanima ibounai edia huanai dekena amo Dirava ese idia ia hoia vadaeni. Bona idia be taunimanima ginigunadia Dirava bona Mamoe ena Natuna ese idia abia, edia.  
\v 5 Koikoi hereva nega ta idia gwauraia lasi, idia be kerere lasi momokani.   
\s1 Aneru toi ese hereva idia gwauraia  
\p
\v 6 Vadaeni aneru ma ta lau itaia, guba ena ataiai ia roho lao. Iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia.  
\v 7 Ia boiboi goadagoada, ia gwau, “Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni. Guba bona tanobada, bona davara, bona ranu guridia ibounai ia karaia Diravana do umui tomadiho henia.”   
\p
\v 8 Vadaeni aneru ma ta, iharuana, be unai aneru ginigunana ena murinai ia roho mai, ia gwau, “Babulonia badana be ia moru vadaeni! Oibe, unai hanua badana ia dika vadaeni. Oibe, Babulonia ese bese ibounai dekenai iena uaina aukana ia henidia, ia hakaudia kerere, vadaeni iena heudahanai karadia idia karaia. To harihari Babulonia ia moru vadaeni, ia moru momokani!”   
\p
\v 9 Ma aneru ta, ihatoina, unai aneru ruaosi edia murinai ia roho mai, ia boiboi bada, ia gwau, “Tau ta ese, bema dagedage gauna mai ena laulauna danu ia tomadiho henia, bona unai gauna ena maka be iena baguna dekenai, o iena imana dekenai do ia abia,  
\v 10 unai tau ese uaina auka herea do ia inua. Inai uaina be Dirava ena badu, bona Dirava ese ranu dekena amo iena uaina ia hamanokaia lasi. Lasi momokani. Dirava ese iena badu be kapusi dekenai ia bubua, vadaeni unai tau ese do ia inua. Oibe, unai bamona idia karaia taudia be lahi bona salipa nadina ese edia siahu dekena amo do idia hisihisi henidia bada, aneru helagadia bona Mamoe ena Natuna edia vairana dekenai.  
\v 11 Idia do ia hisihisi henia lahi ena kwalahu, be ia daekau lao noho hanaihanai. Unai dagedage gauna mai ena laulauna idia tomadiho henia, bona iena maka idia abia taudia be laga-ani do idia abia lasi. Dina bona hanuaboi do idia hisihisi, doko lasi.”   
\p
\v 12 To inai bamona ia vara neganai, Dirava ena bese taudia do idia gini goada be namo. Dirava ena bese taudia be inai: Dirava ena taravatu idia badinaia, bona Iesu idia abidadama henia mai momokani danu.   
\s1 Abidadama lalonai idia mase taudia be do idia moale  
\p
\v 13 Vadaeni gado ta, guba dekena amo lau kamonai, ia gwau, “Inai hereva do oi torea: Harihari ia lao, Lohiabada idia abidadama henia noho neganai idia mase taudia be do idia moale.”  
\p Ma Lauma Helaga danu ia hereva, ia gwau, “Oibe, idia ese edia gaukara mai hekwarahi dekena amo do idia laga-ani, bona idia be do idia laga-ani kava lasi. Badina be edia kara namodia ena sivarai, be idia danu nega tamona do ia lao noho.”   
\s1 Tanobada ena anina utua negana ia ginidae vadaeni  
\p
\v 14 Lauegu matana lau negea lou, ori kurokurona ta lau itaia, bona ta, iena toana be Taunimanima ena Natuna bamona, be ori latanai ia helai. Iena kwarana dekenai be golo kwara gauna ia noho, bona iena imana dekenai be kaia badana ta mai matana ia dogoatao.  
\v 15 Vadaeni aneru ma ta dubu helaga dekena amo ia raka mai, ori latanai ia helai tauna dekenai ia boiboi badabada, ia gwau, “Oiemu kaia badana harihari do oi gaukaralaia, badina be anina utua negana be ia ginidae vadaeni, tanobada ena anina ia mage vadaeni.”  
\v 16 Unai neganai ori latanai ia helai tauna ese iena kaia badana ia gaukaralaia, tanobada ena anina ia utua haorea.   
\p
\v 17 Vadaeni aneru ma ta guba ena dubu helaga dekena amo ia raka mai. Ia danu iena imana dekenai kaia badana mai matana ia dogoatao.   
\p
\v 18 Ma aneru ta be pata helagana dekena amo ia raka mai. Unai aneru be mai ena siahu lahi do ia gaukaralaia. Ia ese unai kaia badana mai matana ia dogoatao aneruna ia boiboi henia badabada, ia gwau, “Oiemu kaia badana harihari do oi gaukaralaia, tanobada ena vain huahua do oi utua vain dekena amo, badina idia mage vadaeni.”  
\v 19 Vadaeni aneru ese iena kaia badana ia gaukaralaia tanobada dekenai. Tanobada ena vain huahua ia utua oho, bona uaina moia gabuna badana, semensi tanika bamona gauna lalonai ia negea vareai. Inai moia gabuna be Dirava ena badu, siahu dikadika.  
\v 20 Unai vain huahua be moia gabuna dekenai idia moia haorea. Unai moia gabuna be hanua ena murimurinai. Vadaeni unai moia gabuna dekena amo rara ia heau lao, ela bona kilomita 300, rara ena dobu danu be mita rua hegeregerena.   
\c 15  
\s1 Aneru 7 ese hisihisi 7 do idia atoa tanobada dekenai  
\p
\v 1 Unai murinai toa gauna badana ma ta guba dekenai lau itaia, bona lau hoa bada. Aneru 7 ese hisihisi havaraia gaudia ibounai 7 idia dogoatao. Idia be hisihisi dokona gaudia. Inai idia ore neganai, hisihisi haida ma do idia vara lasi. Inai hisihisi 7 ese Dirava ena badu do idia haorea momokani.   
\p
\v 2 Bona davara ta lau itaia, hevarivari bamona, to mai ena lahi toana danu. Bona inai danu lau itaia, taunimanima orea ta unuseni idia gini. Unai davara hevarivari bamona ena badinai idia gini. Unai taudia be dagedage gauna mai ena laulauna dekena amo idia kwalimu vadaeni. Oibe, idia ese unai dagedage gauna mai ena ladana, unai namba gauna, idia halusia vadaeni. Bona Dirava ese gita idia ta ta dekenai ia henia, edia imana dekenai idia dogoatao.  
\v 3 Idia ese Dirava ena hesiai tauna Mose ena ane idia abia, bona Mamoe ena Natuna ena ane danu. Inai ane be inai bamona ia gwau,  
\q1 “Lohiabada Dirava e,  
\q1 Siahu Ibounai Dirava e,  
\q1 oiemu gaukara be bada herea momokani.  
\q1 Oiemu hoa karadia be idau momokani.  
\q1 Oi be bese ibounai edia King!  
\q1 Oiemu kara ibounai be maoromaoro bona momokani.   
\q1
\v 4 Lohiabada e, daika ese oi dekenai do ia gari henia lasi?  
\q1 Daika ese oiemu ladana do ia hanamoa lasi?  
\q1 Badina be oi sibona be helaga.  
\q1 Bese ibounai oi dekenai do idia mai,  
\q1 oi dekenai do idia tomadiho henia,  
\q1 badina be oiemu kara maoromaoro be ibounai idia itaia vadaeni.”   
\p
\v 5 Unai murinai lau itaia, guba ena dubu helaga ia kehoa. Ia lalonai ia noho palai dubu, Dirava ena Hereva Momokani gwauraia hedinarai gabuna danu ia kehoa.  
\v 6 Unai aneru 7, hisihisi havaraia gaudia 7 idia dogoatao anerudia be dubu helaga dekena amo idia raka mai. Idia ese davana bada dabua goevagoevadia, bona kurokuro momokani idia karaia. Golo beleta be edia kemena dekenai idia kwatua.  
\v 7 Unai neganai mauri gaudia 4 edia huanai dekena amo, idia ta ese aneru 7 dekenai golo disi 7 ia henia. Inai disi be Noho Hanaihanai Diravana ena badu dekenai idia honu momokani.  
\v 8 Vadaeni Dirava ena hairaina bona iena siahu edia kwalahu ese unai dubu helaga ia hahonua. Bona tau ta be unai dubu helaga do ia raka vareai diba lasi. Lasi momokani. Do idia naria ela bona unai hisihisi 7, aneru 7 ese do idia havaraia gaudia, be do idia karaia haorea.   
\c 16  
\s1 Disi 7, Dirava ena badu toana  
\p
\v 1 Vadaeni, gado badana ta lau kamonai guba ena dubu helaga dekena amo, unai aneru 7 dekenai ia hereva henia, ia gwau, “Umui lao, unai disi 7, Dirava ena badu toana, do umui bubua diho tanobada dekenai.”   
\p
\v 2 Aneru ginigunana ese ia lao, iena disi tanobada dekenai ia bubua. Dagedage gauna ena maka idia abia taudia, bona dagedage gauna ena laulauna idia tomadiho henia taudia ibounai ese toto dikadia mai hisihisi danu idia abia.   
\p
\v 3 Aneru iharuana ese iena disi davara dekenai ia bubua. Vadaeni davara ena ranu be mase tauna ena rarana hegeregere ia lao. Bona davara lalonai idia noho gaudia ibounai idia mase vadaeni.   
\p
\v 4 Aneru ihatoina ese iena disi sinavai bona ranu guri dekenai ia bubua. Vadaeni idia be rara dekenai idia lao.  
\v 5 Vadaeni ranu ia biagua noho aneru ena gadona lau kamonai, ia gwau,  
\q1 “Helaga Diravana e, gunaguna oi noho, harihari oi noho.  
\q1 Oiemu kota henia karadia be maoromaoro momokani.   
\q1
\v 6 Badina be taunimanima ese Dirava ena helaga taudia,  
\q1 bona peroveta taudia edia rarana idia habubua.  
\q1 Unai dainai unai taunimanima dikadia dekenai rara oi henia, idia inua totona.  
\q1 Edia kara hegeregerena, mamina idia abia inai!”   
\m
\v 7 Unai neganai gado ma ta pata helagana dekena amo lau kamonai, ia gwau,  
\q1 “Lohiabada Dirava e, Siahu Ibounai Diravana e, momokani,  
\q1 oiemu kota henia kara be momokani bona maoromaoro.”   
\p
\v 8 Vadaeni aneru namba 4 ese iena disi be dina ena latanai ia bubua. Bona Dirava ese ia koua lasi dainai, dina ese taunimanima ia araia, lahi bamona.  
\v 9 Siahu bada herea ese taunimanima ia araia dikadika. Vadaeni idia ese Dirava ena ladana idia hadikaia dikadika, badina be ia be mai ena siahu unai hisihisi do ia havaraia, o do ia koua. To unai taunimanima ese edia dika dekena amo edia lalona idia giroa lasi. Bona idia ese Dirava ena ladana idia hanamoa lasi.   
\p
\v 10 Vadaeni aneru namba 5 ese dagedage gauna ena helai gabuna badana latanai iena disi ia bubua. Dibura ese unai dagedage gauna ena basileia ia koua. Bona iena taudia ese hisihisi dainai edia malana idia koria.  
\v 11 Bona guba ena Dirava idia hereva dika henia, edia hisihisi bona edia toto dainai. To edia kara dikadia dekena amo edia lalona idia giroa lasi.   
\p
\v 12 Unai neganai aneru namba 6 ese iena disi be sinavai badana, ladana be Euperate, lalonai ia bubua. Vadaeni ranu ia ore, sinavai ia kaukau. Bona dina daekau kahana dekena amo king do idia mai dalana ia kehoa vadaeni.  
\v 13 Vadaeni lauma dikadia toi lau itaia, edia toana be paroparo bamona. Idia ese huala badana ena uduna dekena amo, bona dagedage gauna ena uduna dekena amo, bona peroveta koikoi tauna ena uduna dekena amo idia mai noho.  
\v 14 Idia be lauma dikadia momokani, mai edia siahu hoa kara do idia karaia. Idia be tanobada edia king ibounai dekenai idia lao. Vadaeni unai king ibounai be do idia haboua, Siahu Ibounai Diravana ena Dina Badana neganai, be do idia tuari hebou totona.   
\p
\v 15 “Kamonai! Lau be henaoa tauna bamona umui dekenai do lau mai. Ia noga noho, bona iena dabua ia atoa hegaegae noho tauna be namo. Ia namo lasi, mai kopina kavakava do ia loaloa, badina be unai bamona iena hemarai do ia hedinaraia garina.”   
\p
\v 16 Unai lauma dikadia ese king ibounai idia haboua gabu ta dekenai. Inai gabu ena ladana Heberu gado dekenai be Aramagedono.   
\p
\v 17 Vadaeni aneru namba 7 ese iena disi be ataiai, guba ena hodahoda dekenai ia bubua. Unai neganai guba ena dubu helaga ena helai gabuna badana dekena amo gado badana ta ia hereva badabada, ia gwau, “Ia ore vadaeni.”  
\v 18 Vadaeni kevaru, bona guba boiboi ena regena bada, bona tano mareremarere bada herea momokani idia vara. Unai tano mareremarere be idau momokani, tanobada ia karaia negana ia mai bona hari, be ta unai bamona ia vara lasi. Ia sibona be dika herea.  
\v 19 Unai hanua badana, be ia parara, kahana toi, bona bese ibounai edia hanua badadia be idia makohia ore. Ma Dirava ese unai Babulonia badana ia laloa, bona iena badu toana kapusi Babulonia dekenai ia henia. Vadaeni Dirava ena badu siahu herea uaina be unai hanua dikana ese ia inua ore.  
\v 20 Motumotu ibounai idia mutu ore, bona ororo ibounai danu be idia ore vadaeni.  
\v 21 Bona medu, aisi nadi badadia bamona idia diho. Inai aisi nadi ta ta edia metau be 50 kilogaram bamona, guba dekena amo idia moru diho, taunimanima edia latanai. Vadaeni taunimanima ese Dirava idia hereva dika henia, unai medu, aisi nadi bamona dainai. Badina unai be hisihisi dika herea momokani dainai.   
\c 17  
\s1 Ariara hahine badana  
\p
\v 1 Unai disi 7 idia bubua aneruna ta be lau dekenai ia mai, ia gwau, “Oi mai, ariara hahine badana do idia panisia dalana oi dekenai do lau hedinaraia. Ia be unai hanua badana, sinavai momo edia badinai idia haginia hanuana.  
\v 2 Tanobada ena king ese ia danu matabodaga karadia idia karaia. Bona tanobada noho taudia ese iena matabodaga uaina idia inua, vadaeni idia kekero.”   
\p
\v 3 Unai neganai Lauma Helaga ese lau ia abia, bona unai aneru ese taunimanima noho lasi tano dekenai lau ia abia lao. Unuseni hahine ta, dagedage gauna kakakakana ta ena latanai ia helai, be lau itaia. Unai dagedage gauna ena kwarana be 7, bona iena doana be 10. Ia latanai be Dirava hadikaia ladana momo herea idia torea.  
\v 4 Unai hahine ena dabua kala be kakakaka, bona ma sisina kakakaka. Iena herahera gaudia be golo, davana bada nadidia, bona davana bada kavabukavabu. Iena imana dekenai golo kapusi ia dogoatao. Kapusi be iena matabodaga gau dika rohorohodia bona gau mirodia dekenai ia honu.  
\v 5 Hahine ena baguna dekenai be ladana ta ia torea. Inai ladana ena anina be hunia gauna: “Babulonia badana, ariara hahine ibounai bona tanobada ena kara mirodia ibounai edia sinana.”  
\v 6 Bona lau itaia, unai hahine be ia kekero vadaeni. Momokani, ia ese Dirava ena taudia edia rarana, bona Iesu idia badinaia dainai idia alaia mase taudia edia rarana ia inua dainai, unai hahine ia kekero.  
\p Lau itaia neganai lau hoa dikadika.  
\v 7 Aneru ese lau ia nanadaia, ia gwau, “Badina dahaka oi hoa noho? Inai hahine ena sivarai, hunia gauna, bona ia latanai hahine ia helai dagedage gauna, mai ena kwarana 7 bona doana 10, inai sivarai oi dekenai do lau hamaoroa.  
\v 8 Inai dagedage gauna oi itaia, be gunaguna ia noho, to harihari ia noho lasi. To nega daudau lasi, ia be guri dobu masemase gabuna dekena amo do ia daekau, vadaeni mase hanaihanai gabuna dekenai do ia lao. Tanobada dekenai noho taunimanima, idia momo be Dirava ese edia ladana mauri buka lalonai ia torea lasi, tanobada ia karaia neganai ia mai bona hari. Inai bamona taudia ese unai dagedage gauna do idia itaia, bona do idia hoa bada. Badina be inai: Guna be ia noho, hari be ia mauri noho lasi, to gabeai ma do ia hedinarai mai.   
\p
\v 9 “Aonega tauna be inai gauna ena anina do ia diba: Inai kwara 7 be ororo 7, hahine be idia latanai ia helai.  
\v 10 Bona unai kwara 7 danu be king 7. Idia 5 be idia moru vadaeni. Idia ta be harihari king dagi ia dogoatao noho. To ta be king dagi ia do abia lasi. Do ia hedinarai neganai, do ia king nega sisina sibona.  
\v 11 Bona inai dagedage gauna, guna be ia noho, to hari be ia noho lasi, ia be king namba 8. To ia be idia edia orea tauna ta, bona ia be mase hanaihanai gabuna dekenai do ia lao.   
\p
\v 12 “Iena doana 10, oi itaia gaudia, be king 10, to edia basileia idia do abia lasi. Idia ese unai dagedage gauna danu king siahuna do idia abia, hora tamona sibona.  
\v 13 Inai king 10 ibounai edia lalona be tamona, vadaeni edia siahu bona dagi be unai dagedage gauna dekenai do idia henia.  
\v 14 Idia ese Mamoe ena Natuna do idia tuari henia, to Mamoe ena Natuna be do ia kwalimu. Badina be inai: Ia be lohia ibounai edia Lohia, bona king ibounai edia King. Iena kwalimu, be Mamoe ena Natuna idia badinaia taudia, bona ia idia abidadama henia taudia ese danu do idia abia nega tamona, idia be ia ese ia abia hidi vadaeni taudia.”   
\p
\v 15 Bona aneru ese lau ia hamaoroa, ia gwau, “Oi itaia ranu momo gabudia, hahine be idia dekenai ia helai gabudia. Idia be tano idauidau taudia, bese idauidau taudia, kopina idauidau taudia, bona gado idauidau taudia.  
\v 16 Bona dagedage gauna mai ena doana 10, oi itaia vadaeni gaudia, ese ariara hahine do idia badu henia. Do idia hadikaia momokani, iena dabua do idia kokia, kopina kavakava do idia rakatania. Vadaeni iena tauanina do idia ania, bona lahi dekenai do idia gabua.  
\v 17 Oibe, Dirava ese iena palani be unai king 10 edia lalona dekenai do ia atoa. Vadaeni mai edia laloa tamona idia ese edia dagi siahuna be dagedage gauna dekenai do idia henia. Unai bamona do idia karaia, ela bona Dirava ese iena hereva ibounai do ia hamomokania vadaeni.   
\p
\v 18 “Bona hari oi itaia hahine be unai hanua badana, tanobada ena king ibounai ia ese ia biagua hanuana.”   
\c 18  
\s1 Babulonia do ia moru momokani  
\p
\v 1 Inai murinai, aneru ma ta lau itaia, guba dekena amo ia diho mai. Ia be mai ena siahu bada herea, bona iena hairai ese tanobada ibounai ia hadiaria.  
\v 2 Ia boiboi badabada, ia gwau,  
\q1 “Babulonia badana be ia moru vadaeni.  
\q1 Io, unai hanua badana be ia dika vadaeni.  
\q1 Lauma dikadia edia noho gabuna dekenai ia halaoa vadaeni.  
\q1 Satani ena lauma dikadia be ia lalonai idia noho.  
\q1 Manu dikadia bona manu dagedagedia,  
\q1 be iena ruma lalonai idia noho.   
\q1
\v 3 Badina be bese ibounai ese iena uaina idia inua vadaeni.  
\q1 Unai uaina be iena matabodaga karadia.  
\q1 Tanobada ena king ese,  
\q1 mai matabodaga danu ia idia sihari henia vadaeni,  
\q1 bona tanobada ena hoihoi taudia ese,  
\q1 Babulonia ena lebulebu karadia dekena amo kohu momo idia davaria.”   
\p
\v 4 Vadaeni gado ta guba dekena amo lau kamonai, ia gwau,  
\q1 “Lauegu orea taudia e,  
\q1 ia dekena amo do umui raka siri,  
\q1 ia danu do umui kara dika hebou garina,  
\q1 bona ia danu panisi do umui abia hebou garina!   
\q1
\v 5 Badina Babulonia ena kara dikadia be momo herea momokani,  
\q1 ororo bamona idia daekau lao, ela bona guba dekenai.  
\q1 Bona Dirava ese,  
\q1 Babulonia ena kara dikadia do ia laloaboio lasi.   
\q1
\v 6 Umui ese unai hahine dikana ena kara dika do umui laloa,  
\q1 bona iena kara hegeregerena, davana do umui henia.  
\q1 Iena kara dika ena davana do umui henia nega rua.  
\q1 Ia ese uaina auka momokani haida dekenai ia henia.  
\q1 Vadaeni umui ese unai uaina do umui ha-aukaia nega rua,  
\q1 bona ia dekenai do umui henia, do ia inua.   
\q1
\v 7 Ia ese sibona ia habadaia,  
\q1 bona lebulebu idauidau ia karaia momo.  
\q1 Vadaeni umui ese hisihisi bona tai do umui henia momo,  
\q1 iena lebulebu ia karaia momo hegeregerena.  
\q1 Badina be sibona dekenai ia hereva, ia gwau,  
\q1 ‘Lau be kwini,  
\q1 bona lauegu helai gabuna badana dekenai lau helai.  
\q1 Lau be vabu lasi.  
\q1 Lau dekenai be metau ta do ia mai lasi dainai,  
\q1 lau be do lau tai lasi.’   
\q1
\v 8 Unai bamona ia laloa dainai,  
\q1 dina tamona lalonai,  
\q1 hisihisi idauidau ia dekenai do idia ginidae,  
\q1 gorere, lalohisihisi, bona hitolo bada.  
\q1 Lahi ese do ia araia ore,  
\q1 badina be Lohiabada Dirava,  
\q1 unai lebulebu hahine ia kota henia Diravana,  
\q1 be mai ena siahu bada.”   
\p
\v 9 Tanobada ena king taudia be Babulonia danu matabodaga bona lebulebu idia karaia hebou. Vadaeni Babulonia hanua be Dirava ese ia araia, bona unai lahi ena kwalahu idia itaia neganai, unai king taudia be do idia taitai bada.  
\v 10 Iena hisihisi do idia abia garina, daudau dekena amo do idia gini. Do idia gwau,  
\q1 “Madi o, madi o, Babulonia e,  
\q1 hanua bada herea, goada hanuana,  
\q1 hora tamona lalonai, oiemu kerere davana oi abia vadaeni.”   
\p
\v 11 Tanobada ena hoihoi taudia danu be ia dainai do idia taitai, bona do idia lalohisihisi. Badina be edia kohu be tau ta ese do ia hoia lou lasi.  
\v 12 Inai kohu be golo bona siliva, nadi namo hereadia, kavabukavabu, davana bada dabua, bona dabua kakakaka idauidau, siliki dabuadia, au namodia idauidau, elefante doana dekena amo idia karaia herahera gaudia, bona au dekena amo idia karaia korokoro gaudia, bona kapa, auri bona nadi kurokurona dekena amo idia karaia herahera gaudia.  
\v 13 Ma kohu haida inai bamona: Muramura namodia idauidau, kinamono, aniani mamina hanamoa muramura, kwalahu mai bonana namona ia havaraia muramurana, muramura mai ena bonana namona, bona kopina dahua muramura namona, uaina bona olive dehoro, paraoa bona uiti, boromakau bona mamoe, hosi bona kariota, bona hesiai mai guia taudia, bona taunimanima edia lauma danu.   
\p
\v 14 Hoihoi taudia ese Babulonia idia hamaoroa, idia gwau,  
\q1 “Kohu namodia, guna oi ura henia dikadika gaudia,  
\q1 be idia ese oi idia rakatania.  
\q1 Oiemu moni, ma oiemu hairai ibounai idia ore vadaeni,  
\q1 bona idia do oi davaria lou lasi.”   
\m
\v 15 Unai hoihoi taudia, idia ese moni momo unai hanua lalonai idia davaria. Idia be daudau dekenai do idia gini, Babulonia ena hisihisi idia danu do idia abia garina. Do idia lalohisihisi bada, bona do idia tai.  
\v 16 Do idia gwau,  
\q1 “Madi o, madi o, hanua badana.  
\q1 Guna ia ese davana bada dabuadia,  
\q1 bona kakakaka kala rua dabuadia ia karaia,  
\q1 golo, bona nadi namo herea,  
\q1 bona kavabukavabu herahera gau namodia ia atoa.   
\q1
\v 17 To hora tamona lalonai, iena kohu ibounai idia ore vadaeni.”  
\p Bona bouti badadia edia kapena taudia, bona bouti badadia dekenai idia guia taudia, bona bouti badadia edia kuru taudia, bona edia moni be davara dekena amo idia davaria taudia, be daudau dekenai idia gini.  
\v 18 Lahi ese Babulonia ia araia noho idia itaia neganai, idia edia lalona idia hisihisi bona idia taitai, idia gwau,  
\q1 “Tanobada lalonai hanua ta ese unai hanua ia hereaia diba, a?”   
\m
\v 19 Vadaeni tano ena kahu be edia kwarana dekenai idia negea, idia tai, idia tai mai boiboi bada danu, idia gwau,  
\q1 “Hanua badana madi o, madi o!  
\q1 Iena kohu momo dekena amo,  
\q1 bouti badadia taudia ese edia moni bada idia davaria,  
\q1 to hora tamona lalonai,  
\q1 iena kohu ibounai idia boio vadaeni!   
\q1
\v 20 Guba lalonai noho taudia e,  
\q1 Babulonia ena moru do umui moalelaia,  
\q1 Dirava ena helaga taudia,  
\q1 bona aposetolo taudia bona peroveta taudia,  
\q1 do umui moale bada,  
\q1 badina be umui dekenai Babulonia ese ia karaia hegeregerena,  
\q1 Dirava ese Babulonia ena dika davana ia henia vadaeni.”   
\p
\v 21 Inai hereva ia ore murinai aneru goadana ta ese nadi badana ta, iena toana be uiti ia moia nadina bamona, ia abia. Inai nadi ia abia isi, davara dekenai ia negea diho. Vadaeni aneru ia gwau,  
\q1 “Babulonia hanua badana,  
\q1 unai bamona, mai dagedage danu, oi do idia negea diho,  
\q1 vadaeni taunimanima ese oi do idia itaia lou lasi.   
\q1
\v 22 Gita idia gadaralaia, bona ane idia abia taudia,  
\q1 ivilikou idia gadaralaia, bona kibi idia hiriria taudia,  
\q1 oiemu lalona dekenai edia regena do idia kamonai lou lasi.  
\q1 Gaukara idauidau idia diba taudia be,  
\q1 edia gaukara do idia karaia lou lasi oiemu lalona dekenai.  
\q1 Uiti moia nadi ena gaukara ena regena be,  
\q1 oiemu lalona dekenai do idia kamonai lou lasi.   
\q1
\v 23 Lamepa ena diari be,  
\q1 oiemu lalona dekenai do idia hedinarai lou lasi.  
\q1 Headava matamata tauna bona hahine,  
\q1 oiemu lalona dekenai edia gadona do idia kamonai lou lasi.  
\q1 Madi, oiemu hoihoi taudia,  
\q1 guna idia be tanobada ena tau badadia momokani.  
\q1 To oiemu meamea karadia ese bese ibounai idia koia.   
\q1
\v 24 Oibe, Babulonia be Dirava ese ia panisia,  
\q1 badina be ia ese peroveta taudia ia alaia mase.  
\q1 Ia ese Dirava ena helaga taudia edia rarana ia habubua,  
\q1 bona tanobada dekenai idia alaia mase taudia ibounai,  
\q1 edia rarana be,  
\q1 ia lalonai idia davaria vadaeni.”   
\c 19  
\s1 Kwalimu ane idia abia guba dekenai  
\p
\v 1 Inai murinai regena ta lau kamonai. Regena be taunimanima momo herea guba dekenai idia noho edia gadona. Idia boiboi, idia gwau,  
\q1 “Aleluia! Dirava ita hanamoa!  
\q1 Hamauria, bona hairai, bona siahu,  
\q1 be iseda Dirava dekenai idia noho.   
\q1
\v 2 Badina be iena kota henia kara be momokani bona maoromaoro.  
\q1 Ia ese ariara hahine badana ia kota henia vadaeni.  
\q1 Unai hahine ese,  
\q1 iena matabodaga kara dekena amo tanobada ia hadikaia.  
\q1 Dirava ese ia panisia,  
\q1 badina be unai hahine ese,  
\q1 Dirava ena hesiai taudia ia alaia mase dainai.”   
\m
\v 3 Idia boiboi lou, idia gwau,  
\q1 “Aleluia! Dirava ita hanamoa!  
\q1 Unai hanua badana ia araia lahi ena kwalahu,  
\q1 be ia daekau lao noho hanaihanai.”   
\m
\v 4 Bona badana taudia 24, bona mauri gaudia 4 ese helai gabuna badana dekenai ia helai Diravana ena vairanai idia tui diho, idia tomadiho henia. Idia gwau, “Amen. Dirava ita hanamoa!”   
\s1 Mamoe ena Natuna ena headava aria  
\p
\v 5 Vadaeni gado ta, helai gabuna badana dekena amo ia mai, ia gwau,  
\q1 “Dirava ena hesiai taudia ibounai e,  
\q1 bona ia dekenai idia gari henia taudia badadia bona maragidia ibounai danu,  
\q1 iseda Dirava do umui hanamoa.”   
\m
\v 6 Vadaeni regena ta lau kamonai, taunimanima momo herea edia gado regena bamona. Edia regena be sinavai momo edia ranu idia heau haraga ena regena bamona, bona guba ena boiboi bada bamona. Unai taudia idia gwau,  
\q1 “Aleluia! Dirava ita hanamoa!  
\q1 Lohiabada iseda Dirava,  
\q1 Siahu Ibounai Diravana, ia sibona be King.   
\q1
\v 7 Do ita moale, do ita moale bada!  
\q1 Ia sibona do ita hanamoa!  
\q1 Badina be Mamoe ena Natuna ena headava negana,  
\q1 be ia ginidae vadaeni,  
\q1 bona iena adavana be headava totona ia hegaegae vadaeni.   
\q1
\v 8 Davana bada dabua kurokuro,  
\q1 namo herea momokani ia karaia vadaeni,  
\q1 Dirava ese ia henia gauna.”  
\p Inai dabua be goevagoeva bona ia diaridiari. Unai be Dirava ena helaga taudia edia kara namodia ena toana.   
\p
\v 9 Vadaeni unai aneru ese lau ia hamaoroa, ia gwau, “Inai hereva do oi torea: Mamoe ena Natuna ena headava aria dekenai idia boiboi taudia be do idia moale bada.” Ma aneru ia gwau, “Inai be Dirava ena hereva momokani.”   
\p
\v 10 Lau be iena aena badinai lau tui diho, ia do lau tomadiho henia totona. To lau dekenai ia hereva henia, ia gwau, “Unai bamona oi karaia lasi, lau danu be hesiai tauna. Lau be oiemu gaukara hebou tauna, bona oiemu varavara. Lau be Iesu ena hereva idia gwauraia hedinarai bona badinaia taudia ibounai edia varavarana. Dirava sibona do oi tomadiho henia. Badina be hereva momokani, Iesu ia hedinaraia gauna, ese peroveta taudia ibounai edia lauma ia hasiahua noho.”   
\s1 Hosi kurokurona latanai ia guia tauna  
\p
\v 11 Vadaeni guba lau itaia ia kehoa, bona hosi kurokurona ta ia hedinarai. Hosi latanai ia guia tauna ena ladana be “Abidadama” bona “Momokani.” Ia ese taunimanima ia kota henidia, o bema tuari ia karaia neganai, ia be mai kara maoromaoro danu ia karaia noho.  
\v 12 Iena matana be lahi ena hururuhururu bamona. Iena kwarana latanai be kwara gaudia momo. Iena kopina latanai be ladana ta ia torea, to ia torea hereva be tau ta ia diba lasi, ia sibona ia diba.  
\v 13 Ia ese ia karaia dabua be rara lalonai idia atoa diho vadaeni gauna. Unai tau ena ladana be “Dirava ena Hereva.”  
\v 14 Guba ena tuari oreadia be ia murinai idia lao. Hosi kurokurodia latanai idia guia, bona davana bada dabuadia, goevagoeva bona kurokuro, idia karaia.  
\v 15 Edia gunalaia tauna ena uduna dekena amo be tuari kaia ta mai matana ia duduia maoromaoro. Inai tuari kaia dekena amo ia ese tanobada bese ibounai tuari dekenai do ia halusia. Ia ese idia do ia biagua auka herea, iena auri itotohi dekena amo. Ia ese tanika badana, vain huahua moia gabuna dekenai, uaina ena ranu do ia gigia murimuri dekenai. Inai moia gabuna be Siahu Ibounai Dirava ena badu, siahu dikadika.  
\v 16 Unai gunalaia tauna ena dabua bona iena mamuna dekenai be iena ladana ia torea. Inai ladana be inai bamona: “King ibounai edia King, bona lohia ibounai edia Lohia.”   
\p
\v 17 Inai murinai aneru ta lau itaia, dina ena latanai ia gini. Ia boiboi badabada, guba ena atai dekenai idia roho manudia dekenai ia boiboi, ia gwau, “Umui mai, Dirava ena aria badana dekenai do umui haboua mai.  
\v 18 King edia tauanina, bona tuari biagudia edia tauanina, bona tuari taudia edia tauanina, bona hosi edia tauanina, bona hosi dekenai idia guia taudia edia tauanina, bona taunimanima ibounai, ura kwalimu taudia, bona hesiai mai guia taudia, badadia bona maragidia, edia tauanina do umui ania.”   
\p
\v 19 Vadaeni dagedage gauna, bona tanobada ena king taudia mai edia tuari oreadia lau itaia. Idia haboua, unai hosi kurokuro latanai ia guia tauna mai ena tuari orea do idia tuari henia totona.  
\v 20 Unai neganai guba tuari oreadia ese unai dagedage gauna idia dogoatao, bona unai peroveta koikoi tauna danu idia dogoatao, idia ruaosi idia guia. Unai peroveta koikoi tauna ese guna, hoa kara momo unai dagedage gauna ena vairanai ia karaia. Unai hoa karadia dekena amo, ia ese dagedage gauna ena maka idia abia taudia ia koidia, bona dagedage gauna ena laulau dekenai idia tomadiho henia taudia danu ia koidia. Unai dagedage gauna bona peroveta koikoi tauna ruaosi be idia do mauri noho neganai, lahi gohuna dekenai idia negea diho. Unai be salipa ia araia noho gabuna, guri badana ta.  
\v 21 To hosi kurokurona dekenai ia guia tauna ese iena uduna dekenai tuari kaia dekena amo dagedage gauna ena tuari taudia ibounai ia alaia mase. Bona atai dekenai idia roho manudia ibounai ese unai mase taudia edia tauanina idia ania, idia boga kunu momokani.   
\c 20  
\s1 Aneru ese Satani ia guia lagani 1000  
\p
\v 1 Vadaeni aneru ta lau itaia, guba dekena amo ia diho. Iena imana dekenai guri dobu masemase ena ki ia dogoatao, bona auri seini badana ta danu.  
\v 2 Inai aneru ese unai huala, unai idaunegai gaigaina, ma iena ladana be “Diabolo” bona “Satani,” ia dogoatao, seini dekenai ia guia. Vadaeni do ia guia noho, ela bona lagani 1,000 idia ore.  
\v 3 Aneru ese unai huala be guri dobu masemase lalonai ia negea diho. Vadaeni unai guri ia lokaia, bona koua toana ia karaia. Satani be unai bamona ia koua, tanobada bese do ia koia diba lasi totona, lagani 1000 lalonai. Unai lagani 1000 idia ore neganai idia ese Satani ma do idia ruhaia lou nega sisina sibona.   
\s1 Keriso do ia lohia, lagani 1000  
\p
\v 4 Inai murinai helai gabudia haida lau itaia, bona idia latanai helai taudia danu lau itaia. Unai taudia dekenai Dirava ese kota biaguna ena siahu ia henia. Bona taunimanima momo edia laumadia lau itaia. Inai taudia be edia kwaradia idia utua oho, badina be Iesu ena hereva momokani, bona Dirava ena hereva idia gwauraia dainai. Idia ese dagedage gauna o iena laulauna idia tomadiho henia lasi. Bona dagedage gauna ena maka edia baguna dekenai o edia imana dekenai, idia abia lasi. Idia be mase dekena amo idia mauri lou, vadaeni Keriso danu lohia siahu idia abia, ela bona lagani 1000 idia ore.  
\v 5 To mase taudia oredia do idia mauri lou lasi ela bona lagani 1000 idia ore. Mase dekena amo toreisi lou ginigunana be inai.  
\v 6 Inai toreisi lou ginigunana dekenai idia toreisi taudia be moale bona helaga momokani. Idia be Dirava ena taudia korikori. Mase iharuana be mai ena siahu lasi unai taudia dekenai. Idia be Dirava bona Keriso edia hahelagaia taudia. Bona lagani 1000 lalonai Keriso danu do idia lohia.   
\s1 Dirava ese Satani be hisihisi hanaihanai gabuna lalonai do ia negea  
\p
\v 7 Lagani 1000 idia ore neganai, Satani be unai guri dobu masemase dekena amo do idia ruhaia.  
\v 8 Vadaeni ia ese tanobada ena gabu ibounai idia noho taudia dekenai do ia lao, idia do ia koia. Inai taudia edia bese ladana be Goga bona Magoga. Satani ese unai taudia ibounai do ia haboua tuari totona. Edia momo be bada herea momokani, kone ena miri bamona.  
\v 9 Idia be tanobada kahana ibounai dekenai idia raka lao, bona idia ese Dirava ena helaga taudia edia kamepa, bona Dirava ese ia lalokau henia hanuana idia hagegea. To lahi be guba dekena amo ia diho, Satani ena tuari orea ia araia ore.  
\v 10 Unai neganai Satani, idia ia koia tauna, be lahi bona salipa gohuna lalonai Dirava ese ia negea diho. Unai gabuna lalonai be guna dagedage gauna bona peroveta koikoi tauna idia negea diho vadaeni. Unuseni hisihisi do idia abia dina bona hanuaboi, ela bona hanaihanai.   
\s1 Kota Badana Dinana  
\p
\v 11 Unai murinai helai gabuna badana kurokurona ta lau itaia, bona ia latanai ia helai Tauna danu. Vadaeni iena vairanai tanobada bona guba be idia heau boio, bona tau ta ese idia ia itaia lou lasi.  
\v 12 Bona mase taudia, ladana bada taudia bona ladana maragi taudia be lau itaia, helai gabuna badana ena vairanai idia gini. Vadaeni Dirava ese buka haida ia kehoa, bona buka ma ta ia kehoa, mauri bukana. Bona mase taudia be Dirava ese ia kota henia, edia kara buka lalonai ia torea hegeregerena.  
\v 13 Davara lalonai idia mase vadaeni taudia be davara ese idia ia henia daekau lou. Bona Mase, bona mase taudia edia gabu ese idia lalonai idia koua noho taudia idia henia daekau lou. Vadaeni idia danu be Kota Biaguna ese edia kara hegeregerena idia ia kota henia.  
\v 14 Ia ese Mase, bona mase taudia edia gabu, be lahi gohuna lalonai ia negea diho. Inai lahi gohuna be mase iharuana.  
\v 15 Bona bema tau ta ena ladana be mauri bukana lalonai ia torea lasi neganai, Kota Biaguna ese unai tau be lahi gohuna lalonai ia negea diho.   
\c 21  
\s1 Guba matamata bona tanobada matamata  
\p
\v 1 Vadaeni guba matamatana bona tanobada matamatana lau itaia. Badina be guba gunana bona tanobada gunana be idia lao ore vadaeni. Davara danu be ia ore vadaeni.  
\v 2 Bona Hanua Helagana, Ierusalema matamatana lau itaia, guba dekena amo ia diho mai noho, Dirava dekena amo. Inai Hanua Helagana be headava matamata kekeni bamona, ia herahera namo herea, dabua namona ia karaia, iena adavana totona ia hegaegae vadaeni.  
\v 3 Gado ta lau kamonai, helai gabuna badana dekena amo ia mai, ia hereva badabada, ia gwau, “Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao.  
\v 4 Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”   
\p
\v 5 Vadaeni helai gabuna badana latanai ia helai Diravana ia hereva, ia gwau, “Harihari be gau ibounai lau karaia matamata inai.” Ma lau dekenai ia hereva, ia gwau, “Harihari inai hereva do oi torea, badina ia be maoromaoro bona momokani vadaeni, bona inai hereva do umui abidadama henia diba.”  
\v 6 Ma ia gwau, “Ia ore vadaeni! Lau be Matamana bona Dokona, lau be gau ibounai edia badina, bona egu gaukara ibounai be do lau karaia haorea. Bema tau ta ia ranu mase, lau be ranu do lau henia, davana lasi. Inai ranu be lohilohi gabuna dekena amo ia daekau noho mauri ranuna.  
\v 7 Kwalimu tauna ena kwalimu ahuna be inai: Lau be iena Dirava do lau lao, bona ia be lauegu natuna.  
\v 8 To lau badinaia totona idia gari taudia, abidadama lasi taudia, kara bodaga taudia, taunimanima idia alaia taudia, lebulebu taudia, meamea taudia, kaivakuku dekenai idia tomadiho henia taudia, bona koikoi taudia ibounai, idia ibounai edia davana be dika. Idia be unai gohu, lahi bona salipa idia araia noho gabuna lalonai do idia lao. Inai be mase iharuana.”   
\s1 Ierusalema Matamatana  
\p
\v 9 Unai neganai aneru ta lau dekenai ia mai. Ia be unai aneru 7 oreana, edia aneru ta. Idia ese guna hisihisi idia havaraia disi idia dogoatao. Ia ese lau ia hamaoroa, ia gwau, “Oi mai, headava matamata hahinena, Mamoe ena Natuna ena adavana oi dekenai do lau hedinaraia.”  
\v 10 Vadaeni Lauma Helaga ese lau ia abia, bona aneru ese lau ia abia lao ororo badana ta ena atai dekenai. Ia ese Ierusalema Hanua Helagana lau dekenai ia hedinaraia, guba dekena amo ia diho mai noho, Dirava dekena amo.  
\v 11 Dirava ena hairaina ese unai hanua ia hadiaria, bona davana bada nadi bamona ia hururuhururu. Iena toana be iasipa nadina bamona, bona galasi bamona ia diaridiari.  
\v 12 Hanua be mai ena magu. Inai magu be bada bona iena ataiai be lata. Magu ena iduara ibounai be 12, bona aneru 12 be unai iduara badinai idia gini. Iduara edia latanai be Israela ena iduhu 12 edia ladana idia torea.  
\v 13 Magu ena iduara be inai bamona: Dina ia daekau kahanai iduara be toi, mirigini kahanai iduara be toi, diho kahanai iduara be toi, bona dina ia diho kahanai iduara danu be toi.  
\v 14 Bona magu ena badina nadidia be 12, bona idia latanai be Mamoe ena Natuna ena aposetolo taudia 12 edia ladana idia torea.   
\p
\v 15 Lau dekenai ia hereva henia aneruna ena imana dekenai be hahetoho auna ta, golo dekena amo ia karaia gauna. Ia dekena amo aneru ese hanua, bona iduara, bona magu edia bada ia hahetoho karaia.  
\v 16 Hanua ena kahana 4 edia bada be hegeregere. Iena lababa bona ena lata be hegeregere. Aneru ese iena hahetoho auna dekena amo hanua ena bada ia hahetoho karaia. Iena lata be 2400 kilomita, iena lababa be 2400 kilomita, bona iena ataiai ena lata danu be 2400 kilomita.  
\v 17 Magu danu ena bada ia hahetoho karaia, bona iena ataiai ena lata be 60 mita. Aneru ese taunimanima edia hahetoho dalana ia gaukaralaia.   
\p
\v 18 Hanua ena magu be iasipa nadina dekena amo idia karaia, bona hanua be golo goeva momokani dekena amo idia haginia, to ia diaridiari, galasi bamona.  
\v 19 Hanua ena magu ena badina nadidia ibounai be davana bada nadidia idauidau dekena amo idia heraheralaia. Davana bada nadi ginigunana be iasipa, iharuana be sapairo, ihatoina be kalakedo, namba 4 be samaragi,  
\v 20 namba 5 be sadonu, namba 6 be sadio, namba 7 be krusolito, namba 8 be berulo, namba 9 be topasio, namba 10 be krusoparaso, namba 11 be huakinto, namba 12 be ametuso.\f a \fr 21.20  \ft IASIPA, SAPAIRO, KALAKEDO, SAMARAGI, SADONU, SADIO, KRUSOLITO, BERULO, TOPASIO, KRUSOPARASO, HUAKINTO, AMETUSO: Inai be davana bada nadi haida, hairai bada gaudia. Hiri Motu gado dekenai mai edia ladana lasi dainai, Helene gado dekenai idia torea.\f*  
\v 21 Iduara 12 be kavabukavabu 12. Iduara ta ta be kavabukavabu tamona dekena amo idia karaia. Hanua ena ariara ibounai be golo goeva momokani, to ia be galasi bamona ia diaridiari.   
\s1 Diari bona mauri  
\p
\v 22 Hanua lalonai dubu helaga ta lau itaia lasi. Badina be Lohiabada, Siahu Ibounai Diravana, bona Mamoe ena Natuna, be unai hanua ena dubu helaga.  
\v 23 Dina bona hua edia diari danu unai hanua dekenai be lasi. Badina be Dirava ena hairaina ese unai hanua ia hadiaria noho. Bona Mamoe ena Natuna be unai hanua ena lamepa.  
\v 24 Tanobada ena bese idauidau ese unai hanua ena diari lalonai do idia raka. Bona tanobada ena king ese edia kohu ia dekenai do idia mailaia vareai.  
\v 25 Dina lalonai unai hanua ena iduara be do idia koua lasi. Oibe, iduara be nega ta do idia koua lasi, badina hanuaboi be lasi unuseni.  
\v 26 Tanobada ena bese idauidau ese unai hanua dekenai edia hairai gaudia bona edia kohu do idia abia mai vareai.  
\v 27 To dika gauna ta be unai hanua dekenai do ia vareai diba lasi. Lebulebu idia karaia taudia, o koikoi taudia be do idia vareai lasi. Lasi momokani. Mamoe ena Natuna ena mauri bukana lalonai edia ladana idia torea taudia sibona be unai hanua dekenai do idia vareai.   
\c 22  
\s1 Mauri ranuna, bona mauri auna  
\p
\v 1 Aneru ese mauri ranuna ena sinavai lau dekenai ia hedinaraia. Ia be galasi bamona ia diaridiari, bona iena ranu be Dirava bona Mamoe ena Natuna edia helai gabuna badana dekena amo ia heau lao.  
\v 2 Inai sinavai be hanua ena ariara badana ena huanai ia heau lao. Sinavai ena kahana kahana be mauri audia idia gini. Inai mauri auna ese lagani ta lalonai huahua ia atoa nega 12, hua ta ta ibounai lalonai huahua ia atoa. Inai au ena rauna ese bese idauidau idia hanamoa noho.  
\v 3 Unai hanua ena lalonai, Dirava ese ia gwauraia dika vadaeni gauna ta be do ia noho diba lasi.  
\p Dirava bona Mamoe ena Natuna edia helai gabuna badana be unai hanua lalonai do ia noho. Bona Dirava ena hesiai taudia ese ia do idia tomadiho henia.  
\v 4 Idia ese Dirava ena vairana do idia itaia, bona iena ladana be edia baguna dekenai ia ese do ia torea.  
\v 5 Unai hanua dekenai be hanuaboi lasi, bona unuseni idia noho taudia ese lamepa o dina ena diari do idia ura lasi. Badina be Lohiabada Dirava ese idia dekenai diari do ia henia. Bona idia ese king hegeregerena do idia lohia noho, ela bona hanaihanai.   
\s1 Iesu do ia giroa mai  
\p
\v 6 Aneru ese lau ia hamaoroa, ia gwau, “Inai hereva be maoromaoro bona momokani, bona inai hereva do oi abidadama henia diba. Lohiabada Dirava ese iena Lauma Helaga iena peroveta taudia dekenai ia henia noho. Ia ese iena aneru ia siaia vadaeni, kahirakahira do idia vara gaudia, iena hesiai taudia dekenai do ia hadibaia totona.”   
\p
\v 7 Iesu ia hereva, ia gwau, “Kamonai! Lau be do lau mai haraga! Inai buka ena peroveta herevadia idia kamonai henia taudia be do idia moale!”   
\p
\v 8 Lau Ioane ese inai hereva ibounai lau kamonai, bona inai kara ibounai lau itaia. Bona unai gaudia lau itaia bona kamonai haorea neganai, lau dekenai unai gaudia ia hedinaraia aneruna ena aena badinai lau tui diho, do lau tomadiho henia totona.  
\v 9 To lau dekenai ia hereva, ia gwau, “Unai bamona do oi karaia lasi. Lau be hesiai tauna, oi bamona, bona lau be oiemu varavara peroveta taudia edia gaukara hebou tauna danu. Bona lau be, inai buka ena hereva idia kamonai henia taudia ibounai edia gaukara hebou tauna danu. Dirava sibona do oi tomadiho henia.”   
\p
\v 10 Ma lau ia hamaoroa, ia gwau, “Inai buka ena peroveta hereva do oi hunia lasi, badina be Dirava ese inai kara do ia karaia ena nega be kahirakahira.  
\v 11 Vadaeni kara dika tauna, be kara dika do ia karaia noho. Lebulebu tauna, be lebulebu do ia karaia noho. Kara maoromaoro tauna, be kara maoromaoro do ia karaia noho. Bona helaga tauna, be helaga kara do ia karaia noho.”   
\p
\v 12 Iesu ia hereva, ia gwau, “Kamonai! Lau be karaharaga umui dekenai do lau mai! Taunimanima edia gaukara davana be lauegu imana dekenai idia noho. Taunimanima ibounai edia kara hegeregerena edia davana do lau henia.  
\v 13 Lau be Alepa bona Omega, ginigunana bona gini gabena, matamana bona dokona.”   
\p
\v 14 Edia dabua idia huria taudia be idia moale. Badina be inai: Idia be mai edia maoro, mauri auna ena huahua do idia ania. Bona mai edia maoro danu, hanua ena iduara do idia raka vareai.  
\v 15 To murimuri dekenai be kara bodaga taudia, bona dika bada idia karaia taudia, meamea taudia, matabodaga taudia, ala-ala taudia, kaivakuku idia tomadiho henia taudia, bona koikoi idia ura henia bona badinaia taudia idia noho.   
\p
\v 16 “Lau Iesu ese egu aneru umui dekenai lau siaia, inai hereva be ekalesia oreadia dekenai do ia gwauraia totona. Lau be Davida ena natuna ta, Davida ena bese tauna. Lau be unai hisiu bada, daba rere neganai ia diaridiari gauna.”   
\p
\v 17 Lauma Helaga bona Headava Matamata Hahine idia gwau, “Oi mai.” Bona inai hereva idia kamonai taudia danu, namona be idia gwau, “Oi mai.”  
\p Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.   
\s1 Sisiba hereva dokona  
\p
\v 18 Lau Ioane, ese inai buka ena peroveta hereva idia kamonai noho taudia lau sisiba henia inai: Tau ta ese bema inai hereva edia latanai hereva haida ma do ia atoa kau neganai, Dirava ese inai buka lalonai idia torea hisihisi, be unai tau ena latanai do ia atoa kau.  
\v 19 Bona bema tau ta ese hereva ta inai peroveta bukana dekena amo do ia kokia, Dirava ese unai tau ena davana namona do ia kokia. Oibe, ia ese mauri auna ena aniani do ia ania diba lasi. Bona ia be Hanua Helagana do ia vareai diba lasi. Inai davana namodia ruaosi be inai buka ese ia herevalaia vadaeni.   
\p
\v 20 Inai hereva ibounai ia gwauraia hedinarai Tauna ia gwau, “Oibe, momokani, lau be kahirakahira do lau mai.”  
\p Amen. Lohiabada Iesu e, oi mai.   
\p
\v 21 Lohiabada Iesu ena hariharibada umui ibounai dekenai do ia noho. Amen.