\id MIC MICAH, Hiri Motu Bible, PNG, 1989, 5/93 \h MIKA \toc1 MIKA \toc2 MIKA \mt1 MIKA \c 1 \p \v 1 Iotama, Ahasa bona Hesekaia be Iuda ena king taudia neganai, Lohiabada ese inai hereva Mika dekenai ia henia. Mika ena hanua be Moresete. Lohiabada ese dahaka do idia vara Samaria bona Ierusalema dekenai be Mika dekenai ia hamaoroa. \s1 Dirava ese Samaria bona Ierusalema do ia hadikaia ena taitai ane \q1 \v 2 Bese ibounai taudia e, do umui kamonai. \q1 Tanobada dekenai umui noho taudia e, \q1 Dirava ena hereva do umui kamonai. \q1 Lohiabada Dirava ese umui do ia samania. \q1 Kamonai! Lohiabada be iena dubu helaga, \q1 guba dekena amo ia hereva noho. \q1 \v 3 Lohiabada be iena gabu helagana dekena amo do ia diho mai. \q1 Ia be ororo edia ataiai dekenai do ia raka. \q1 \v 4 Unai neganai ororo be Lohiabada ena henunai do idia veve, \q1 bona ranu bamona do idia lao, \q1 digara be lahi lalonai ia veve bamona. \q1 Inai ororo be koura dekenai do idia veve diho. \q1 Idia be ranu ese ataiai gabuna, \q1 dekena amo ia bubua diho lao bamona. \p \v 5 Inai bamona kara be do idia vara, badina be Israela taudia ese Dirava dekenai idia kara dika, bona idia dagedage henia vadaeni. Israela ena dagedage be daika ena kerere? Kerere be hanua badana, Samaria ena! \p Bona Iuda taudia ese dirava koikoidia dekenai idia tomadiho, be daika ena kerere? Kerere be hanua badana, Ierusalema ena! \p \v 6 Unai dainai Lohiabada ia gwau, “Lau ese Samaria do lau hadikaia bada, momoru idia haboua gabuna, bona vain do idia hadoa gabuna do lau halaoa. Lau ese iena ruma ibounai do lau hamakohia, vadaeni edia momoru nadi ibounai be do lau bubua diho koura dekenai. Ruma edia badina nadi sibona do idia hedinaraia. \v 7 Bona lau ese Samaria taudia edia dirava koikoidia do lau hamakohia maragimaragi, bona edia dubu lalonai sihari kava hahine edia davana gaudia be lahi dekenai do lau negea. Edia kaivakuku ibounai danu be momoru haboua gabuna do lau halaoa. Samaria taudia ese lau dekena amo idia raka siri, bona dirava koikoi dekenai idia tomadiho, hegeregere hahine ta ese iena tau ia rakatania, bona ia sihari kava bamona. Unai dainai idau bese taudia ese Samaria do idia halusia, bona Samaria ena kohu be tano ta dekenai do idia abia lao, bona unai tano taudia ese edia dirava koikoidia dekenai unai kohu do idia henia.” \p \v 8 Vadaeni Mika ia hereva, ia gwau, “Inai kara do idia vara dainai lau be do lau lalohisihisi bona do lau tai. Lauegu lalohisihisi do lau hedinaraia totona lau be tamaka lasi bona kopina kavakava do lau raka loaloa. Lau be uda sisia bamona do lau tai mai boiboi danu, kokokoko danu bamona do lau tai bada herea. \v 9 Badina be Samaria ena toto be do idia namo lou diba lasi. Bona Iuda danu be kahirakahira toto unai bamona do ia davaria. Oibe, Ierusalema, lauegu bese taudia edia gabu korikori dekenai danu, nega daudau lasi neganai, unai bamona dika do ia vara.” \s1 Tuari taudia be Ierusalema dekenai idia mai noho \p \v 10 Ita dekenai idia tuari henia taudia, Gata taudia do umui hadibaia lasi. Ita be tuari ita lusi neganai, emui taitai do umui hunia. Bete Leapara hanua taudia e, tano kahu dekenai do umui hekure, emui lalohisihisi hedinaraia totona. \v 11 Umui Sapiri taudia e, mai hemarai danu, kopina kavakava, idau tano dekenai do umui lao, mai guia danu hesiai gaukara karaia totona. Sanana taudia be idia gari bada dainai, edia hanua dekena amo murimuri dekenai idia lao lasi. Bona Betesele taudia edia taitai umui kamonai neganai, do umui diba hunia gabuna ta ia noho lasi unuseni. \v 12 Maroto taudia ese mai gari danu durua totona idia naria noho, badina be Lohiabada ese kahirakahira Ierusalema do ia hadikaia. \p \v 13 Lakisi dekenai umui noho taudia e, emui hosi be kariota dekenai do umui kwatua. Umui ese Israela ena kara dika umui itaia, bona umui danu umui karaia, vadaeni umui ese Ierusalema umui hakaua kerere, bona ena kara dika umui havaraia. \v 14 Umui Iuda taudia e, Moresete Gata hanua dekenai emui bamahuta hereva do umui gwauraia. Bese ta ese do ia abia, bona umui dekena amo do ia boio, badina Akesipi taudia ese umui idia koia vadaeni, bona idia ese umui do idia durua lasi. \p \v 15 Maresa taudia e, Lohiabada ese idau bese tuari taudia edia siahu henunai umui do ia atoa, bona idia ese emui hanua do idia abia. Bona Israela ena gunalaia taudia, hairai taudia idia gwau, be Adulama ena nadi ena matuna lalonai do idia hunia. \v 16 Iuda taudia e, unai idau bese tuari taudia ese umui lalokau henidia natudia do idia guia, do idia abia lao. Unai dainai mai lalohisihisi bada emui natudia dainai do umui taitai, bona emui kwarana huina do umui utua ore, kebere taudia do umui lao. \c 2 \s1 Ogogami taudia idia hisihisi henia taudia be Dirava ese do ia hadikaia \p \v 1 Palani dikadia umui laloa noho taudia e, dika bada herea momokani do umui davaria! Umui be hanuaboi neganai umui mahuta lasi, to umui ese kara dikadia do umui karaia dalana umui laloa noho. Bona dabai umui toreisi, unai kara be umui karaia momokani, badina dala umui davaria vadaeni. \v 2 Bema tau ta ena uma umui ura henia, umui dogoatao sibona! Bona bema tau ta ena ruma umui ura henia, inai danu umui dogoatao sibona. Umui ese koikoi dekena amo taunimanima edia ruma, bona edia bese ena kohu umui henaoa noho. \p \v 3 Unai dainai Lohiabada ia gwau, “Kamonai! Lau ese umui do lau hadikaia dalana lau laloa noho, bona umui be do umui heau mauri diba lasi. Nega dika bada do umui davaria, bona umui be mai hekokoroku do umui raka loaloa lou lasi. \v 4 Unai nega dikana ia vara neganai, taunimanima ese emui sivarai do idia gwauraia loaloa mai kirikiri danu. Taitai ane do idia abia koikoi, inai bamona: \q1 ‘Ai be ai dika momokani vadaeni! \q1 Lohiabada ese aiemai tano ia abia vadaeni. \q1 Bona idau bese taudia, \q1 idia ese ai idia guia taudia, \q1 dekenai aiemai tano ia henia.’ ” \p \v 5 Unai dainai inai tano be Lohiabada ena bese taudia dekenai do idia henia lou neganai, umui ta ese kahana ta do umui abia lasi. \p \v 6 Taunimanima ese lau idia gwau henia, idia gwau, “Unai bamona gaudia ai dekenai do oi haroro lasi. Unai bamona gaudia do oi herevalaia lasi. Dirava ese unai bamona hemarai ai dekenai do ia henia lasi. \v 7 Dirava ese Israela taudia do ia hadikaia lasi. Lohiabada be ai dekenai ia badu lasi. Ai dekenai dika ta do ia karaia diba, a? Lohiabada ese kara maoromaoro taudia dekenai ia hereva namo henia, ia ese ai do ia hadikaia diba lasi.” \p \v 8 Lohiabada ese ia haere henia, ia gwau, “Kamonai! Umui be umui toreisi, lauegu bese taudia umui dagedage henia noho. Lauegu taudia be tuari dekena amo idia giroa mai, idia laloa edia hanua dekenai maino do idia davaria. To umui ese idia totona umui naria noho, bona umui ese edia dabua umui henaoa noho. \p \v 9 “Umui ese egu bese ena hahine taudia edia ruma namodia, idia ura henia rumadia, dekena amo umui luludia lao. Bona edia natudia dekenai lau henia hanamoa bada be umui ese umui kokia lao, ma do idia abia lou lasi, ela bona hanaihanai. \p \v 10 “Do umui toreisi, do umui lao! Badina iniseni maino do ia noho lasi. Umui emui kara dika dainai, inai gabu do lau hadikaia ore momokani. \p \v 11 “Bema peroveta tauna ta ese koikoi bona kerere hereva ia gwauraia, bema ia gwau, ‘Lau peroveta inai, umui ese uaina bona inua kekero momo do umui davaria,’ inai taunimanima ese unai bamona peroveta hereva do idia abia dae!” \s1 Dirava ese iena bese do ia haginia lou \p \v 12 Lohiabada ese ma ia hereva, ia gwau, “To umui Israela taudia, do mauri noho taudia be do lau haboua. Lau ese umui do lau haboua, mamoe naria tauna ese iena mamoe edia magu lalonai ia haboudia lou bamona. Bona Israela ena tano be taunimanima dekenai do ia honu lou, tano ta mai ena mamoe momo bamona.” \p \v 13 Dirava ese iena bese taudia edia dala do ia kehoa, vadaeni edia guia dekena amo do ia hakaudia mai. Unai tano idauna ena hanua magu iduara do idia hamakohia, murimuri dekenai do idia lao. Edia king, Lohiabada be unai, ese idia do ia gunalaia. \c 3 \s1 Mika ese Israela lohia taudia ia gwau henia \p \v 1 Umui Israela umui gunalaia noho taudia e, umui kamonai! Umui ese kara maoromaoro do umui ura henia, bona havaraia, be emui gaukara bona dagi korikori. \v 2 To umui ese kara dika umui ura henia, bona kara maoromaoro umui ura henia lasi. Umui ese egu bese edia kopina umui kokia noho, bona edia turiana ena varovaro umui utua maragimaragi noho. \v 3 Umui ese egu bese umui ania noho. Umui ese edia kopina umui darea oho, edia turiana umui makohia, bona edia hidiona umui utua maragimaragi, hegeregere vamu umui utua, uro dekenai umui udaia totona. \v 4 To nega be ia mai noho, umui ese Lohiabada dekenai do umui boiboi, to ia ese umui do ia haere henia lasi. Emui guriguri dekenai do ia kamonai lasi, badina umui ese kara dika umui karaia vadaeni. \p \v 5 Egu bese edia peroveta taudia haida ese idia koidia noho. Bema moni idia henia neganai, idia peroveta maino be ia mai noho. To bema moni idia henia lasi neganai, tuari idia peroveta noho. \p Unai bamona peroveta taudia dekenai Lohiabada ia hereva, ia gwau, \v 6 “Peroveta taudia e, emui dina be kahirakahira ia ore. Hegeregere dina be ia diho lao, bona dibura be umui emui latanai ia diho noho bamona. Badina be, umui ese egu bese taudia umui hakaua kerere dainai, mata hanai do umui itaia lou lasi, bona peroveta hereva do umui gwauraia lou diba lasi.” \p \v 7 Bona inai peroveta taudia be vaira neganai do idia vara gaudia totona do idia peroveta, to anina do idia vara lasi dainai do idia hemarai, bona edia lalona ena mamina be dika. Badina Dirava ese edia guriguri do ia kamonai lasi, bona idia peroveta do ia vara gauna, be Dirava ese do ia koua. \p \v 8 To lau be, Lohiabada ese iena Lauma, mai ena siahu bona goada lau dekenai ia henia noho. Unai dainai mai egu laloa maoromaoro, bona laloa goada danu, lau ese Israela taudia dekenai edia kara dika lau hamaorodia diba. \p \v 9 Umui Israela gunalaia taudia e, kamonai! Umui ese kota maoromaoro umui ura henia lasi, bona umui ese kara maoromaoro be kara kerere dekenai umui halaoa noho. \v 10 Umui ese taunimanima alaia kara, bona kota maoromaoro lasi umui karaia noho. Bona inai bamona kara dekena amo umui laloa Ierusalema, Dirava ena hanua ena taudia be bese goadana do idia lao. \p \v 11 Hanua taudia ese lohia taudia dekenai moni idia henia, bona edia lalona idia ania, kerere do idia karaia totona, bona hahelagaia taudia ese moni do idia abia totona, Taravatu ena anina idia gwauraia. Peroveta taudia danu ese do idia vara gaudia, moni totona idia gwauraia noho. Bona idia ibounai idia hereva, idia gwau, “Lohiabada be ita dekenai ia noho. Unai dainai dika ta ita dekenai do ia vara lasi.” \p \v 12 Unai dainai umui lohia taudia, bona hahelagaia taudia, bona peroveta taudia, umui emui kerere dainai, Dirava ese Ierusalema do ia hadikaia ore. Ierusalema ena ruma bona kohu be momoru haboua gabuna do idia lao. Bona Siona be idia geia tano kavakava bamona do ia lao. Unai ororo, Dubu Helaga ia noho gabuna, be uda ese do ia koua ore. \c 4 \s1 Lohiabada ese taunimanima ibounai edia king do ia lao \q1 \v 1 Nega gabeai dinadia neganai, \q1 Dubu Helaga ia gini ena ororo, \q1 be ataiai herea do ia lao. \q1 Ororo ibounai edia lata be ia ese do ia hanaia. \q1 Bese idauidau taudia momo, \q1 be inai ororo dekenai do idia mai. \q1 \v 2 Bona idia ese do idia gwau, \q1 “Lohiabada ena ororo dekenai do ita lao, \q1 Israela taudia edia Dirava ena Dubu Helaga be unuseni. \q1 Badina ia ura ita karaia gaudia, \q1 be ia ese ita do ia hadibaia. \q1 Ita ese Dirava ena ura dalana dekenai do ita raka, \q1 badina be Lohiabada ena hadibaia hereva, \q1 be Ierusalema dekena amo ia mai noho. \q1 Siona dekena amo Lohiabada ese, \q1 iena bese taudia ia hereva henidia noho. \q1 \v 3 Ia ese bese idauidau edia huanai, \q1 edia heai do ia hamaoromaoroa. \q1 Bese badadia, kahirakahira, bona daudau idia noho, \q1 edia hepapahuahu ia ese do ia haorea. \q1 Idia ese edia tuari kaia, \q1 be hama dekenai do idia botaia, \q1 bona tano geia auridia do idia halaoa. \q1 Bona edia io danu be hama dekena amo, \q1 au rigidia utua kaia do idia halaoa. \q1 Bese idauidau ese tuari do idia karaia lou lasi, \q1 ma idia ese tuari ena dala do idia tahua lou lasi. \q1 \v 4 Taunimanima ta ta ibounai, \q1 be maino dekenai do idia noho. \q1 Ta ta ese sibona edia vain uma bona fig audia, \q1 be do idia naria noho, \q1 bona tau ta ese idia do ia hagaria lasi. \q1 Siahu Ibounai Lohiabada ese inai bamona ia gwauhamata vadaeni.” \p \v 5 Bese ta ta ibounai ese sibodia edia dirava, edia dirava idia tomadiho henia bona kamonai henia. To ita ese Lohiabada, iseda Dirava do ita tomadiho henia, bona kamonai henia, ela bona hanaihanai. \s1 Israela taudia be idau tano taudia edia guia dekena amo do idia giroa mai \p \v 6 Lohiabada ia gwau, “Nega be ia mai noho, lau ese idia lau panisia, bona mai guia danu idau tano dekenai idia noho taudia, be do lau haboua lou. \v 7 Inai bese be mai edia manoka, bona edia tano dekena amo daudau idia noho. To idia do mauri noho taudia dekena amo, bese badana ta do lau hamatamaia lou, bona bese badana ta idia do lau halaoa. Lau ese Siona Ororo dekenai idia do lau gunalaia, unai neganai ela bona hanaihanai.” \p \v 8 Bona oi, Ierusalema hanua e, Dirava be oi dekenai ia noho, bona oiemu taunimanima be ia ese ia naria, mamoe naria tauna ese iena mamoe ia naridia bamona. Oi be oiemu tano ena hanua badana dekenai ma do lau halaoa lou. \v 9 Ierusalema e, badina dahaka oi tai bada herea? Badina dahaka oi hisihisi noho, hahine ese natuna ta kahirakahira ia havaraia neganai bamona? Oi be mai oiemu king ta lasi, a? Oiemu aonega taudia idia mase vadaeni, a? \p \v 10 Umui Ierusalema taudia e, do umui boiboi bona tai, emui tauanina do umui giroagiroa, hahine ta, natuna ia havaraia noho bamona. Badina hari umui ese hanua do umui rakatania, bona rei kavakava tano dekenai do umui noho. Bona idia ese umui do idia abia lao Babulonia dekenai. To unai gabu dekenai Lohiabada ese umui idia tuari henia taudia edia siahu dekena amo umui do ia hamauria. \v 11 Bese momo edia tuari taudia ese idia haboua vadaeni, umui do idia tuari henia gwauraia. Idia gwau, “Ierusalema hanua do ita hadikaia ore! Ita ese inai hanua ena dika do ita itaia!” \p \v 12 To unai bese idauidau taudia ese Lohiabada ena laloa idia diba lasi. Idia diba lasi ia ese idia do ia haboua, do ia panisidia, taunimanima ese uiti idia botaia bamona, uiti ena momoru idia kokia neganai. \p \v 13 Lohiabada ia gwau, “Umui Ierusalema taudia e, do umui toreisi, umui idia tuari henia taudia do umui panisidia! Lau ese umui do lau hagoadaia, emui goada be boromakau mai ena auri doana bona auri labora aena bamona. Umui ese bese momo do umui halusia. Bona unai bese ese tuari dekena amo idia abia kohu momo, be umui ese lau dekenai do umui henia. Lau be Lohiabada, tanobada ibounai ena Lohiabada.” \c 5 \p \v 1 Ierusalema taudia e, umui toreisi, emui tuari taudia do umui haboua! Idau bese tuari taudia ese umui idia hagegea noho, Israela ena gunalaia tauna idia tuari henia gwauraia! \s1 Dirava ia gwauhamata, Hamauria Tauna ta Betelehema dekenai do ia vara \p \v 2 Lohiabada ia gwau, “Betelehema Eparata, Iuda ena hanua ibounai edia huanai oi be maragi momokani. To oi dekena amo Lohia Badana ta do ia vara, bona ia ese Israela do ia biagua, egu ladana dekenai. Iena tubuna bona iena iduhu be gunaguna idia noho, ia mai bona hari danu.” \p \v 3 Dirava ese idau bese taudia edia siahu henunai iena bese Israela do ia rakatania, ela bona negana ia ginidae, hahine ta, Dirava ese ia abia hidi hahine ese iena natuna mero ta do ia havaraia. Unai murinai, inai mero ena varavara taudia be tano idauidau momo dekena amo do idia giroa mai, bona edia bese danu do idia haboua lou, edia tano dekenai. \p \v 4 Inai Lohia ia ginidae neganai, ia ese iena bese taudia do ia gunalaia, mai goada bona mai King ena siahu danu. Inai goada be Lohiabada dekena amo ia mai goadana, bona inai King ena siahu be Dirava, Lohiabada sibona ena. Iena bese taudia edia noho mauri be do ia namo, mai edia gari lasi, badina be bese idauidau taudia ibounai ese inai Lohia ena siahu do idia diba. \v 5 Inai Lohia ese maino do ia havaraia. \s1 Dirava ese iena bese do ia hamauria, bona idau bese taudia do ia hadikaia \p Asuria tuari taudia ese iseda tano do idia vareai kava, bona iseda hanua edia magu idia makohia neganai, ita ese mamoe naria taudia 7 do ita haginia, bona taunimanima gunalaia taudia 8. \v 6 Bona idia ese tuari ena goada dekena amo Asuria do idia halusia, oibe, Nimiroda ena tano do idia biagua. Idia ese Asuria taudia dekena amo ita do idia hamauria, iseda tano idia vareai kava neganai. \p \v 7 Israela taudia, idia do mauri noho taudia be bese idauidau edia huanai do idia noho, Lohiabada ese ia siaia hanuaboi ena paripari namona bamona. Israela taudia ese tanobada taudia do idia hanamoa, medu ese rei ia hanamoa bamona. Bona inai Israela taudia ese Dirava dekena amo durua do idia abia, taunimanima dekena amo lasi. \p \v 8 Inai Israela taudia, bese idauidau edia huanai idia noho, be laiona, uda dekenai ia noho bamona, ia ese boroma bona mamoe ania totona ia labana noho. Ia be mamoe edia magu ia vareai, ia ese mamoe ia dogoatao, ia daredia dikadika, bona tau ta ese mamoe ia durudia diba lasi. \v 9 Inai bamona dala dekenai Israela ese, ia dekenai idia tuari henia taudia do ia halusia, bona do ia hadikadia ore momokani. \p \v 10 Lohiabada ese Israela taudia ma ia hamaoroa, ia gwau, “Unai dinadia lalonai lau ese emui tuari gaudia do lau hadikaia ore. Emui hosi do lau abia lao, bona emui kariota be do lau haorea momokani. \v 11 Bona emui hanua edia magu ibounai do lau kokia, emui kohoro, hunia gabudia, danu do lau kokia ore. \v 12 Lau ese emui meamea gaudia do lau hadikaia ore, emui meamea taudia edia kara danu do lau haorea. \p \v 13 “Lau ese emui dirava koikoi bona emui nadi du helagadia, umui tomadiho henidia gaudia do lau hadikaia ore. Bona umui sibona umui karaia gaudia dekenai do umui tomadiho henia lou lasi. \v 14 Lau ese unai hahine dirava Asera ena kaivakuku do lau veria diho, bona emui hanua do lau hadikaia. \v 15 Bona egu badu siahu bada momokani dekena amo, lau ese lau dekenai idia kamonai henia lasi besedia ibounai edia kerere davana do lau henia.” \c 6 \s1 Lohiabada ese Israela ia samania \p \v 1 Lohiabada ena kota hereva Israela dekenai do umui kamonai. Lohiabada e, do oi toreisi, oiemu samania hereva do oi gwauraia. Namona be ororo ese oiemu kota hereva do idia kamonai. \p \v 2 Ororo e, bona umui goada herea nadi badadia, nega hanaihanai tano henunai umui noho, tanobada hagoadaia totona! Lohiabada ena samania hereva do umui kamonai. Lohiabada be mai ena samania hereva iena bese taudia dekenai. Ia ese Israela do ia gwau henia. \p \v 3 Vadaeni Lohiabada ia hereva, ia gwau, “Lauegu bese taudia e, edena kerere umui dekenai lau karaia? Dahaka metau umui emui latanai lau atoa, a? Lau dekenai do umui haere. \v 4 Lau sibona ese Aigupito dekena amo umui lau hakaua mai. Lau ese emui guia dekena amo umui lau hamauria. Lau ese Mose, bona Arona, bona Miriama lau siaia, idia ese umui do idia gunalaia totona. \p \v 5 “Lauegu bese taudia e, Moaba ena king Balaki ia ura karaia umui dekenai kara, do umui laloa lou. Bona Balama Beoro ese Balaki ia haere henia hereva danu do umui laloa. Umui durua totona lau karaia gaudia danu do umui laloa, Sitima kamepa bona Gilegala dekenai umui raka lao neganai. Unai kara badadia be lau ese lau karaia umui do lau hamauria totona. Unai kara do umui laloa, vadaeni egu kara maoromaoro do umui diba.” \s1 Dahaka kara Lohiabada ia ura taunimanima do idia karaia? \p \v 6 Lau ese Lohiabada, guba ena Dirava lau tomadiho henia neganai, dahaka do lau mailaia? Sedira boromakau ena natudia namo herea momokani do lau mailaia, gabua bouboudia Lohiabada dekenai do lau henia, a? \v 7 Bema mamoe momo herea, duahia diba lasi, bona olive dehoro ena sinavai momo herea, danu lau mailaia neganai, do ia moale? Lauegu natuna vara guna Lohiabada dekenai do lau mailaia, egu kara dika davana karaia totona, a? \p \v 8 Lasi momokani! Lohiabada ese kara namo dalana ita ia hamaoroa vadaeni. Lohiabada ia ura ita karaia gauna be inai: Kara maoromaoro do ita karaia, taunimanima ibounai do ita lalokau henia nega ibounai, bona mai manau danu Dirava danu do ita raka hebou. \p \v 9 Bema ita be Lohiabada dekenai ita gari noho, inai be aonega ena kara ita karaia noho. \p Lohiabada ese Ierusalema hanua badana dekenai ia boiboi noho, ia gwau, “Hanua badana taudia e, do umui kamonai! \v 10 Kara dika taudia edia ruma lalonai be gau namodia momo herea idia noho, idia ese koikoi dekena amo idia abia gaudia. Idia ese sikele koikoi idia gaukaralaia noho, bona inai kara lau ura lasi momokani. \v 11 Sikele koikoi idia gaukaralaia taudia be edena bamona edia dika do lau gwauatao diba? \p \v 12 “Hanua ena kohu momo taudia ese ogogami taudia edia gau idia abia kava, koikoi bona dagedage dekena amo. Bona umui ibounai be umui hereva koikoi noho. \v 13 Momokani, emui kara dika lau laloa noho dainai, lau ese umui do lau hadikaia kara lau hamatamaia noho inai. \p \v 14 “Umui be do umui aniani, to emui bogana do idia kunu lasi, umui be do hitolo noho. Umui ese emui ruma dekenai kohu umui haboua, to unai kohu be do idia boio. Badina be umui haboua namonamo gaudia be tuari dekenai do lau hadikaia ore! \p \v 15 “Umui ese koni umui hadoa, to ena anina do umui abia lasi. Umui ese olive huahua umui gigia, to olive dehoro dekena amo emui kopina do umui dahua lasi. Bona umui ese uaina umui karaia, to do umui inua diba lasi. \p \v 16 “Inai bamona kara be do idia vara, badina umui ese king Omeri bona iena natuna king Ahaba edia kara dikadia umui badinaia vadaeni. Idia edia kara ibounai be umui ese danu umui karaia noho. Unai dainai lau ese umui do lau hadikaia. Vadaeni idau bese taudia ese umui do idia kirikirilaia. Bona taunimanima ibounai, gabu ibounai noho taudia ese umui do idia ura henia lasi momokani.” \c 7 \s1 Israela ena kara dainai peroveta tauna ena lalona ia hisihisi \p \v 1 Madi, egu lalona ia hisihisi noho. Lau be hitolo tauna bamona, au dekenai au huahua lau tahua noho, to ta lau davaria diba lasi, bona vain dekenai ena huahua ta lau davaria lasi. Fig ena au huahua danu be ibounai idia kokia ore vadaeni. \v 2 Kara maoromaoro tauna ta be lasi egu tano dekenai, tau ta ese Dirava ia badinaia lasi. Lasi momokani. Tatau ibounai ese taunimanima alaia totona idia naria noho. Bona idia ta ta ibounai ese edia varavara taudia idia hadikaia gwauraia. \p \v 3 Dika idia karaia dalana be idia diba momo. Lohia taudia bona kota biaguna taudia ese taunimanima dekena amo moni idia noia noho, idia ese kota hereva do idia hagagevaia totona. Ladana bada taudia ese kota biaguna dekenai idia hereva henia, edia ura gaudia idia hamaoroa. Bona unai kota biaguna ese unai ura gaudia ia henidia noho. \v 4 Unai dainai idia edia kara namo be mogea vadaeni gauna, ava dikadia bamona. Bona edia kara maoromaoro be ia gageva, au ginigini ia gageva bamona. \p To dina be ia ginidae vadaeni, Dirava ese iena bese taudia edia kerere davana do ia henia, peroveta taudia dekena amo ia sisiba henidia do ia karaia bamona. Unai dainai taunimanima be harihari idia daradara noho. \p \v 5 Oiemu badibadinai ia noho tauna do oi abidadama henia lasi. Oiemu turana ena hereva do oi hamomokania lasi. Oiemu adavana dekenai oi hereva gauna danu be do oi naria namonamo. \v 6 Badina inai nega lalonai mero ese iena tamana ia hereva dika henia noho. Kekeni ese iena sinana ia heai henia, bona hahine eregabe ese iena ravana hahine ia dagedage henia noho. Tau ta ena famili taudia ese ia idia heai henia noho. \p \v 7 To lau ese Lohiabada do lau naria noho. Ia ese lauegu guriguri do ia kamonai, bona lau abidadama henia, ia ese lau do ia hamauria. \s1 Lohiabada ese iena bese taudia do ia hamauria \p \v 8 Ita dekenai idia tuari henia taudia ese ita dekenai do idia hereva dika henia lasi. Momokani ita moru vadaeni, to ita be ma do ita gini lou. Ita be harihari dibura lalonai ita noho, to Lohiabada ese iena diari ita dekenai do ia henia. \v 9 Ita ese Lohiabada ena vairana dekenai ita kara dika dainai, iena badu ena mamina do ita abia nega sisina. To gabeai ia ese ita do ia durua, bona idau bese taudia ese ita dekenai idia karaia vadaeni dika edia davana, be Dirava ese do ia henia. Ia ese dibura dekena amo ita do ia mailaia, ma diari lalonai ita do ia atoa. Lohiabada ese ita dekenai kara maoromaoro momokani ia karaia, be do ita itaia namonamo. \p \v 10 Guna ita idia tuari henia taudia ese ita dekenai idia hereva dika, idia gwau, “Lohiabada, emui Dirava be edeseni ia noho?” To gabeai idia itaia Lohiabada ese ita ia hamauria neganai, do idia hemarai momokani. Bona unai neganai do ita itaia, Lohiabada ese ita dekenai idia tuari henia taudia do ia moia diho, taunimanima ese dala ena kopukopu idia moia diho bamona. \p \v 11 Ierusalema taudia e, emui hanua magudia do umui haginia lou negana be do ia ginidae. Bona unai neganai, emui tano hetoa maka do idia abia lao, bona emui tano do idia habadaia. \v 12 Bona unai neganai, taunimanima be umui dekenai do idia mai, gabu ibounai dekena amo, Asuria bona Aigupito ena hanua ta ta, bona Euperate Sinavai ena kahana ibounai. Ma gabu idauidau, daudau herea gabudia, davara hanaia gabudia, bona ororo hanaia gabudia dekena amo danu do idia mai umui dekenai. \p \v 13 To tanobada be tano kaukau, nadi kavakava gabuna do ia lao, badina be tanobada dekenai noho taudia ese kara dika momo idia karaia dainai. \s1 Lohiabada e, Israela dekenai do oi bogahisihisi henia \p \v 14 Lohiabada e, mani emu kara, oiemu bese, oi abia hidi vadaeni taudia do oi naria, mamoe naria tauna ese iena mamoe ia naria noho bamona. Idia be tano namo lasi ororo gabuna dekenai idia noho, to tano namona be idia ia hagegea noho. Edia dala do oi kehoa, vadaeni Basana bona Gileada rei namona gabudia dekenai aniani do idia ania, gunaguna idia karaia bamona. \p \v 15 Lohiabada e, lau ura oi ese hoa kara haida ai durua totona do oi karaia lou, guna Aigupito dekena amo ai oi hakaua mai neganai bamona. \v 16 Bese idauidau taudia ese inai hoa kara do idia itaia, vadaeni do idia hemarai bada. Momokani idia be mai edia goada, to mai gari danu edia uduna do idia koua, bona edia taiana danu do idia koua. \v 17 Idia be gaigai bamona, tano ena kahu dekenai do idia rau. Idia ese edia kohoro dekena amo do idia raka, mai gari bona mai edia heudeheude danu. Bona idia ese gari dainai oi Lohiabada, aiemai Dirava dekenai do idia mai. \p \v 18 Lohiabada e, Dirava ta oi hegeregerena be ia noho lasi. Oi ese oiemu bese taudia, idia do mauri noho taudia, edia kara dika oi gwauatao noho. Oiemu badu ia noho hanaihanai lasi, to oi ura bada oiemu noho hanaihanai lalokauna ai dekenai do oi henia. \p \v 19 Oi ese ai dekenai ma do oi bogahisihisi henia lou. Oi ese aiemai kara dika do oi moia diho ore, davara ena dobu herea gabuna dekenai do oi atodia siri. \v 20 Oi ese oiemu kara maoromaoro bona oiemu noho hanaihanai lalokauna oiemu bese taudia dekenai do oi hedinarai henia. Badina gunaguna unai bamona oi gwauhamata, oiemu bese edia sene taudia, Aberahamo bona Iakobo dekenai.