\id JAS JAMES, Hiri Motu Bible, PNG, 1993 
\h IAMESI 
\toc1 IAMESI ENA REVAREVA 
\toc2 IAMESI 
\mt1 IAMESI ENA REVAREVA  
\c 1  
\p
\v 1 Lau Iamesi inai. Lau be Dirava bona Lohiabada Iesu Keriso edia hesiai tauna.  
\p Lau ese inai revareva Iuda Keristani taudia ibounai tanobada gabu ibounai dekenai lau torea inai. Umui ese emui gabu korikori umui rakatania, tanobada idauidau dekenai umui noho. Umui lau hanamoa henia inai.   
\s1 Dibagani bona hisihisi ese umui ia hagoadaia diba  
\p
\v 2 Lauegu varavara taudia e, bema dibagani idauidau ese umui dekenai ia ginidae neganai, inai bamona do umui laloa be namo: Inai be moale gauna sibona.  
\v 3 Badina be umui diba, dibagani o hisihisi ese emui abidadama idia tohoa neganai, goada bona haheauka idia havaraia noho.  
\v 4 Vadaeni nega ibounai metau bona hisihisi lalonai do umui haheauka noho, ela bona inai haheauka emui lalona dekenai ia goada momokani. Unai neganai emui kara be namo, bona Dirava ena dala hegeregerena do umui raka, kerere ta lasi.   
\s1 Tau ta ia aonega lasi neganai do ia guriguri be namo  
\p
\v 5 Bema umui ta be aonega lasi, namona be Dirava do ia noia, vadaeni Dirava ese aonega ia dekenai do ia henia. Badina be Dirava ese taunimanima ibounai dekenai gau namodia ia henia noho. Bona tau ta bema ia be gau ta lasi, vadaeni Dirava do ia noia neganai, Dirava ese do ia badu henia lasi.  
\v 6 To unai tau ia noinoi neganai, namona be ia abidadama sibona, bona daradara lasi. Badina be daradara tauna be davara ena hurehure bamona. Lai ese ia doria lao, doria mai, ia be gini gabuna lasi.  
\v 7 Bema daradara tauna ia laloa, gau ta Lohiabada dekena amo do ia abia diba, iena laloa be anina lasi.  
\v 8 Badina be laloa rua tauna be iena kara ibounai lalonai, ia ese dala tamona sibona ia badinaia diba lasi.   
\s1 Ogogami bona kohu momo  
\p
\v 9 Keristani tauna ogogamina, bema Dirava ese ia abia isi neganai, do ia moale be namo.  
\v 10 To kohu momo tauna, bema Dirava ese ogogami tauna ia halaoa neganai, ia danu do ia moale be namo. Badina be kohu momo tauna do ia mase, be rei ena huahua ia mase noho bamona.  
\v 11 Umui diba, dina ia daekau neganai, iena siahu ese ava ia hakaukaua, vadaeni iena huahua ia moru diho, iena hairai be ia ore. Inai bamona danu, kohu momo tauna ese iena gaukara ia karaia noho neganai, do ia mase.   
\s1 Dika ese tau do ia tohoa, bona do ia dibagania  
\p
\v 12 Hisihisi bona dibagani ia abia neganai ia gini noho, mai haheauka danu tauna be namo. Badina be unai dika dekena amo ia kwalimu neganai, ia ese Dirava ia gwauhamata gauna, mauri hanaihanai, iena kwalimu ahuna, do ia davaria. Dirava ia hereva vadaeni, ia idia lalokau henia taudia ibounai ese unai mauri hanaihanai do idia davaria.  
\v 13 Bema tau ta ese dibagani ia davaria, o dika ta ese ia veria noho neganai, inai bamona do ia hereva lasi, “Dirava ese lau ia dibagania noho.” Badina be kara dika ese Dirava ia dibagania diba lasi momokani. Bona Dirava ese tau ta do ia dibagania lasi.  
\v 14 To dibagani ena badina korikori be, tau ta sibona ena ura dainai, kara dika ta ese ia veria noho, bona ia koia noho.  
\v 15 Vadaeni iena ura dikadia be idia rogorogo bamona, unai murinai kara dika ia havaraia. Bona kara dika ia tubu bona ia bada neganai, mase ia havaraia.   
\p
\v 16 Lauegu varavara e, lauegu lalokau, do umui laloa kerere lasi.  
\v 17 Gau namodia ibounai, bona harihari gaudia namodia momokani ibounai, be Dirava dekena amo idia diho mai. Dirava ese diari ibounai ia karaia, bona nega haida idia ese edia toana idia senisia, nega haida mai edia dibura nega. To Dirava ese iena kara ia senisia lasi, ia diari hanaihanai, bona ia be mai ena dibura sisina lasi.  
\v 18 Ia sibona ena ura dainai, Dirava ese iena hereva momokani dekena amo, ita dekenai mauri matamata ia henia, vadaeni iena vara guna natuna taudia ita lao. Momokani, Dirava ia karaia taudia ibounai edia huanai, ita be iena vara guna natuna taudia.   
\s1 Dirava ena hereva do umui badinaia, kamonai sibona lasi  
\p
\v 19 Lauegu varavara e, egu lalokau, inai sisiba umui laloaboio lasi. Umui ta ta ibounai ese hereva dekenai do umui kamonai haraga, to hereva do umui gwauraia haraga lasi. Bona do umui badu haraga lasi.  
\v 20 Badina be taunimanima edia badu ese Dirava ena kara maoromaoro ia havaraia diba lasi.  
\v 21 Unai dainai miro karadia ibounai, laloa dikadia, bona kara dikadia ibounai do umui rakatania. Dirava henunai do umui noho, bona iena hereva, emui lalona dekenai ia hadoa gauna, do umui abia dae, mai emui manau danu. Inai hereva ese umui ia hamauria diba.   
\p
\v 22 To Dirava ena hereva do umui kamonai kava lasi, to umui badinaia danu. Bema umui kamonai kava, umui sibona umui koia noho.  
\v 23 Bema tau ta be hereva ia kamonai sibona, to ia badinaia lasi, ia be sibona ena vairana ena toana hevarivari lalonai ia itaia bamona.  
\v 24 Iena vairana ena toana korikori ia itaia, vadaeni ia raka siri, bona maoromaoro iena vairana ena toana ia laloaboio momokani.  
\v 25 To taravatu namona bona goevagoeva momokani ia noho, ia ese kara dika ena siahu dekena amo ita ia ruhaia vadaeni. Tau ta bema inai taravatu ia itaia namonamo noho, bona ia badinaia noho, bona ia kamonai kava lasi, to ia karaia momokani neganai, unai tau be namo. Dirava ese unai tau, iena kara ibounai lalonai, do ia hanamoa.   
\p
\v 26 Tau ta bema ia laloa ia be Keristani tauna namona, to iena malana ia naria diba lasi neganai, ia ese sibona ena lalona ia koia noho. Unai tau ena Keristani kara be anina lasi.  
\v 27 To Keristani tauna ena kara goevagoeva bona momokani, Tamana Dirava ena vairanai be inai: Bema tamana bona sinana lasi maragidia bona vabu be mai edia hisihisi, ia ese do ia naridia. Bona tanobada ena kara mirodia dekena amo do ia raka siri.   
\c 2  
\s1 Taunimanima ibounai do umui lalokau henidia, maka tamona dekenai  
\p
\v 1 Lauegu varavara taudia e, ita be Lohiabada Iesu Keriso ita abidadama henia noho. Ia be guba ena hairai diarina ena Lohiabada momokani. Unai dainai namo lasi umui ese toana namo o dagi bada taudia do umui laloa bada, to ogogami bona dagi lasi taudia do umui laloa maragi. Unai be maoro lasi.  
\v 2 Sedira kohu momo tauna ta, mai ena imana kwakikwakina rini, golo gauna, bona mai ena dabua namodia danu emui dubu lalonai ia raka vareai. Ma ogogami tauna ta, mai ena dabua dikana, be emui dubu do ia raka vareai danu.  
\v 3 Sedira dabua namona tauna do umui hereva henia, do umui gwau, “Mani emu kara, inai helai gauna namona dekenai do oi helai.” To ogogami tauna dekenai do umui hereva henia, do umui gwau, “Unuseni do oi gini noho, o foloa dekenai do oi helai, lauegu aena badinai.”  
\v 4 Bema unai bamona umui karaia neganai, umui be mai emui kerere. Emui kerere be inai: Maka tamona dekenai taunimanima umui kara henidia lasi, to mai emui laloa maoromaoro lasi danu, taunimanima edia toana sibona umui itaia, bona idia edia kara umui laloa kerere, kota biaguna dikana ia karaia bamona.   
\p
\v 5 Lauegu varavara taudia e, lauegu lalokau, umui kamonai. Inai tanobada ena ogogami taudia be Dirava ese ia abia hidi vadaeni, iena Basileia do idia abia totona. Inai Basileia be Dirava ia gwauhamata vadaeni, ia idia lalokau henia taudia ese do idia abia. Oibe, ogogami taudia edia abidadama, be guba ena kohu momo bamona, badina be Dirava ena Basileia lalonai do idia vareai.  
\v 6 To umui ese ogogami taudia umui matauraia lasi. Daika ese umui idia dagedage henia, bona umui idia doria lao kota dekenai? Kohu momo taudia, ani?  
\v 7 Idia ese emui ladana namona, Dirava ese umui dekenai ia henia gauna, idia hadikaia noho, ani?   
\p
\v 8 Unai dainai, namona be Basileia ena Taravatu do umui badinaia. Inai Taravatu badana be Buka Helaga lalonai ia torea, ia gwau, “Oiemu badibadinai ia noho tauna do oi lalokau henia, oi sibona oi lalokau henia bamona.” Bema inai Taravatu umui badinaia neganai, kara namo herea umui karaia noho.  
\v 9 To bema taunimanima edia toana dekena amo umui kara henidia, kara dika umui karaia inai. Bona inai Taravatu ese umui ia gwauraia kerere.  
\v 10 Badina be bema tau ta ese Taravatu momo herea ia badinaia, to tamona sibona ia badinaia lasi, ia be mai ena kerere, Taravatu ibounai ia utua tauna hegeregerena.  
\v 11 Badina be Dirava ese inai Taravatu ia gwauraia, “Do umui heudahanai lasi,” bona inai Taravatu danu ia gwauraia, “Taunimanima do umui alaia lasi.” Vadaeni, bema oi heudahanai lasi, to tau ta oi alaia, oi be Taravatu oi utua vadaeni.  
\v 12 Umui ese inai bamona do umui laloa be namo: Vaira neganai Dirava ese umui do ia kota henia Taravatu dekena amo. Inai Taravatu ese kara dika ena siahu dekena amo ita ia ruhaia noho. Unai dainai do umui hereva namonamo, bona noho namonamo, unai Taravatu hegeregerena.  
\v 13 Badina be bogahisihisi ia henia lasi tauna ese Dirava dekena amo bogahisihisi do ia davaria lasi. To bogahisihisi ia henia tauna ese Kota Biaguna ena bogahisihisi do ia davaria.   
\s1 Abidadama mai ena kara lasi be anina lasi  
\p
\v 14 Lauegu varavara taudia e, tau ta bema ia gwau ia be abidadama tauna, to kara namona ta ia karaia lasi, iena namo be dahaka, a? Abidadama ese ia do ia hamauria diba, a?  
\v 15 Sedira Keristani tadikaka ta o taihuna ta be dabua lasi, bona ia be aniani lasi.  
\v 16 Vadaeni umui ta ese bema ia hamaoroa, ia gwau, “Dirava ese oi do ia hanamoa, oi ese oiemu kopina do oi hasiahua, bona do oi boga kunu.” Bema unai bamona umui hamaoroa, to dabua ta o aniani ta umui henia lasi neganai, emui hereva be anina lasi.  
\v 17 Abidadama danu be inai bamona. Bema abidadama sibona ia noho, to kara be lasi, unai abidadama be anina lasi.   
\p
\v 18 To tau ta sedira ia hereva, ia gwau, “Oi be mai oiemu abidadama, to lau be mai lauegu kara namodia.” Vadaeni, lauegu haere be inai bamona, “Tau ta mai ena abidadama, to mai ena kara lasi, unai bamona tauna ta ia noho, a? Lasi momokani. To lau ese egu abidadama do lau hamomokania egu kara namodia dekena amo.”  
\v 19 Oi ese inai oi abidadama henia: “Dirava korikori be tamona,” a? Namo, to lauma dikadia danu unai bamona idia abidadama, bona mai gari danu idia heudeheude noho.  
\v 20 Oi kavakava tauna e, bema oi abidadama, to kara namodia oi karaia lasi, vadaeni oiemu abidadama be anina lasi. Inai anina oi diba lasi, a?   
\p
\v 21 Gunaguna iseda tamana Aberahamo ese iena natuna Isako be pata helagana ena latanai boubou totona ia atoa neganai, Dirava ese ia gwauraia maoromaoro. Oibe, Dirava ese Aberahamo ena kara namona ia itaia dainai, ia gwauraia maoromaoro.  
\v 22 Oi itaia, Aberahamo ena abidadama be iena kara namona danu nega tamona idia gaukara. Bona unai dainai iena kara namodia ese iena abidadama idia hamomokania vadaeni.  
\v 23 Buka Helaga ena hereva be momokani, ani? Ia gwau, “Aberahamo ese Dirava ia abidadama henia, bona iena abidadama dainai Dirava ia gwau ia be maoromaoro vadaeni.” Unai dainai idia gwau Aberahamo be Dirava ena turana.  
\v 24 Unai dainai umui itaia, kara namodia dainai, taunimanima be Dirava ena vairanai idia maoromaoro, abidadama sibona dainai lasi.   
\p
\v 25 Unai bamona danu, ariara hahine Rahaba be iena kara dainai Dirava ena vairanai ia maoromaoro. Badina be ia ese Israela ena hesiai taudia iena ruma dekenai ia abidia dae, bona dala idauna dekena amo ia siaidia lao, vadaeni idia heau mauri.   
\p
\v 26 Ita diba, tauanina bema mai ena lauma lasi, ia be mase gauna, ani? Vadaeni unai bamona danu, abidadama mai ena kara namodia lasi, be mase gauna.   
\c 3  
\s1 Iseda uduna ena hereva do ita naria  
\p
\v 1 Lauegu varavara taudia e, umui momo ese hadibaia gaukara umui abia be namo lasi. Badina be ai hadibaia taudia be Dirava ese do ia kota henia auka, haida bamona lasi.  
\v 2 Ita ibounai ese nega momo kerere ita karaia. To bema tau ta ese iena hereva dekena amo kerere ta ia karaia lasi, ia be goeva bona namo momokani. Ia ese iena tauanina ibounai ia biagua bona naria diba.  
\v 3 Hosi edia uduna dekenai auri ita atoa, vadaeni inai auri ita veria, be hosi ese iseda ura do idia karaia. Hosi ena tauanina ibounai ita giroa diba, iseda ura dalana dekenai.  
\v 4 Lagatoi danu umui laloa, ia be bada herea, bona lai badadia ese idia hodaia. To tari maragimaragina ese ia taria noho, bona lagatoi be tari tauna ena ura gabuna dekenai ia lao noho.  
\v 5 Unai bamona danu mala be gau maragina, to ia be hekokoroku momo.  
\p Lahi danu umui laloa. Lahi maragina ese uda bada herea ia araia ore diba.  
\v 6 Bona mala be lahi bamona. Ia be tauanina kahana ibounai edia kahana tamona, to kara dika idauidau ia havaraia diba. Ia ese iseda mauri ibounai, tauanina bona lauma ia hadikaia diba. Iseda noho dalana ibounai be mala ese ia hakererea momokani diba, badina be lahi bamona ita ia araia noho. Unai lahi be hel dekena amo ia mai.  
\v 7 Taunimanima ese mauri gaudia ibounai idia hamanadaia diba. Idia raka gaudia, idia roho gaudia, bona idia rau gaudia, bona davara lalonai noho gaudia danu be taunimanima ese idia hamanadaia diba.  
\v 8 To mala be tau ta ese ia hamanadaia diba lasi. Mai dika danu mala ese ia mareremarere noho, bona tau ta ese iena dika ia koua diba lasi. Mala be taunimanima alaia poisini dekenai ia honu masemase.  
\v 9 Mala dekena amo iseda Lohiabada bona Tamana ita hanamoa noho. Bona mala dekena amo danu taunimanima, Dirava ese iena toana bamona ia karaia taudia, ita hadikaia noho.  
\v 10 Uduna tamona ese hanamoa hereva bona hadikaia hereva ia gwauraia noho. Lauegu varavara taudia e, inai bamona kara ia vara be dika.  
\v 11 Guri tamona dekena amo, ranu ena mamina namo bona ranu ena mamina dika ia lohilohi daekau noho, a?  
\v 12 Lauegu varavara taudia e, fig auna ese olive huahua do ia atoa, a? O vain auna ese fig huahua do ia atoa, a? Davara ese danu ranu ena mamina namo ia havaraia lasi.   
\s1 Aonega korikori be Dirava dekena amo  
\p
\v 13 Sedira umui ta be mai ena aonega bona mai ena diba. Bema tau ta be inai bamona neganai, namona be iena aonega do ia hamomokania, iena mauri namona bona iena kara namodia dekena amo. Aonega tauna be do ia hekokoroku lasi, to iena diba namona ese iena aonega do ia hedinaraia.  
\v 14 To umui emui lalona dekenai, bema mama, bona umui sibona habadaia kara idia noho neganai, emui aonega be momokani lasi. Unai be aonega koikoi, bona do umui heagilaia lasi, Dirava ena hereva momokani do umui hadikaia garina.  
\v 15 Unai bamona aonega be Dirava dekena amo ia diho mai lasi. Ia be tanobada gauna sibona, tauanina sibona gauna, bona Satani dekena amo ia mai.  
\v 16 Mama bona sibona habadaia kara idia noho neganai maino be lasi, bona kara dikadia ibounai danu idia noho.  
\v 17 To Dirava dekena amo aonega ia abia tauna ena kara ginigunana be inai: Ia laloa goevagoeva. Ma iena kara haida be inai: Mai ena maino, laloa manada bona gado namo. Ia be mai ena bogahisihisi, bona kara namodia momo ia havaraia noho. Ia be maka tamona dekena amo taunimanima ibounai ia kara henidia, edia toana dekena amo lasi. Ma inai tau be Keristani koikoi tauna lasi.  
\v 18 Bema maino ita karaia noho neganai, inai be uhe ita hadoa bamona. Vadaeni inai maino dekena amo, kara maoromaoro do ia vara, uhe ena anina ia tubu hegeregerena.   
\c 4  
\s1 Bema tanobada ena kara ita ura henia, inai be Dirava ita ura henia lasi  
\p
\v 1 Heatu bona heai be edena bamona umui emui huanai idia vara noho? Edia badina korikori be inai: Emui ura dikadia, be emui lalona dekenai idia tuari noho, ani?  
\v 2 Gau idauidau umui ura dikadika, to umui abia diba lasi. Unai dainai taunimanima umui alaia gwauraia. Mai mama danu gau haida umui ura abia, to umui abia diba lasi. Unai dainai umui heatu bona heai noho. Emui ura gaudia umui abia lasi, badina be Dirava umui noia lasi dainai.  
\v 3 O bema Dirava umui noia neganai, emui ura gauna umui davaria lasi, badina be mai laloa kerere danu umui noia. Emui laloa be unai gauna do umui abia, bona do umui gaukaralaia emui tauanina edia ura dikadia totona.  
\v 4 Umui be headava kara ena taravatu umui makohia noho taudia bamona. Umui diba lasi, a, bema umui ura tanobada danu umui turana karaia neganai, inai be umui ese Dirava umui tuari henia noho?  
\v 5 Buka Helaga lalonai ia torea, ia gwau: “Inai lauma, Dirava ese iseda lalona dekenai ia atoa laumana, be Dirava ia ura dikadika ia sibona ese do ia abia, iena.” Inai Buka Helaga ena hereva be anina lasi, a?   
\p
\v 6 To Dirava ese iena hariharibada ia henia badabada noho. Unai dainai Buka Helaga ma ia hereva, ia gwau: “Dirava ese hekokoroku taudia edia dala ia koua, to manau taudia dekenai iena hariharibada ia henia.”   
\p
\v 7 Unai dainai Dirava ena ura do umui karaia. Satani do umui tuari henia, vadaeni umui dekena amo do ia heau boio.  
\v 8 Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai. Kara dika taudia e, emui imana do umui huria. Keristani koikoi taudia e, laloa rua dekena amo umui emui kudouna do umui hagoevaia.  
\v 9 Do umui lalohisihisi, bona umui taitai bada be namo. Emui kiri do umui hadokoa, do umui tai sibona. Emui moale do umui koua, do umui laloa metau sibona.  
\v 10 Lohiabada ena vairanai do umui manau, vadaeni ia ese umui do ia abia isi.   
\s1 Emui Keristani varavara tauna do umui gwauraia kerere lasi  
\p
\v 11 Lauegu varavara taudia e, umui ta ta do umui gwauraia kerere lasi. Tau ta ese bema iena Keristani varavara tauna ia gwauraia kerere, o ia gwauraia dika neganai, ia be maoro lasi. Badina unai kara dekena amo ia ese Taravatu ia gwauraia kerere, bona Taravatu ia gwauraia dika. Bema Taravatu oi gwauraia dika neganai, oi be Taravatu badinaia tauna lasi, to oi be Taravatu ena kota biaguna.  
\v 12 Taravatu atoa Tauna, bona kota biaguna be tamona sibona, Dirava be unai. Ia be mai ena siahu, taunimanima do ia hamauria, bona taunimanima do ia hamasea. Vadaeni, oi be daika, oi dekenai ia noho tauna do oi gwauraia kerere?   
\s1 Do ita hekokoroku lasi  
\p
\v 13 Umui haida inai bamona umui hereva, umui gwau, “Hari dina o kerukeru dina unai hanua badana do ita lao, unuseni lagani ta do ita noho, do ita hoihoi, moni momo do ita abia.”  
\v 14 Umui dekenai inai bamona lau hereva: Umui diba lasi kerukeru dina dahaka do ia vara. Badina be emui mauri be dahaka? Umui be kwalahu maragina bamona, nega sisina ia hedinarai, vadaeni ia boio momokani.  
\v 15 To namona be inai bamona do umui hereva: “Bema Dirava ia ura, ita be ita mauri noho, vadaeni unai kara o inai kara do ita karaia.”  
\v 16 To umui heagi noho bona umui hekokoroku noho, bona unai bamona hekokoroku ibounai be dika.   
\p
\v 17 Unai dainai, inai do umui laloa namonamo: Bema kara namona karaia ena dala oi diba, to oi karaia lasi, unai be oi kara dika.   
\c 5  
\s1 Sisiba kohu momo taudia dekenai  
\p
\v 1 Kohu momo taudia e, lauegu hereva do umui kamonai henia. Do umui taitai, mai boiboi danu do umui tai, metau bona hisihisi umui dekenai do idia ginidae dainai.  
\v 2 Emui kohu be dika bona bodaga vadaeni, bona emui dabua be pitopito ese idia ania ore.  
\v 3 Emui golo bona emui siliva idia raraka vadaeni, bona edia raraka ese emui dika do ia hedinaraia. Inai raraka ese danu emui tauanina do ia ania, lahi bamona. Unai kohu momo umui haboua vadaeni, inai dokona dinadia lalonai.  
\v 4 Umui kamonai, emui uma lalonai idia gaukara taudia edia davana umui henidia lasi. Unai dainai mai boiboi danu idia maumau noho. Emui uma ena anina idia utua taudia edia taitai be Dirava, Siahu Ibounai Lohiabada ia kamonai vadaeni.  
\v 5 Tanobada dekenai umui noho neganai, umui ura henia karadia bona gaudia umui moalelaia, mai lebulebu danu. Bona aniani bada umui ania dainai, emui tauanina idia bada herea, boroma idia ubua digara bamona, vadaeni umui noho hegaegae ala-ala dinana totona.  
\v 6 Umui ese kara maoromaoro taudia umui gwauraia kerere, bona umui aladia mase. Bona idia ese unai emui dika idia koua lasi.   
\s1 Mai haheauka danu Lohiabada do umui naria noho  
\p
\v 7 Unai dainai, lauegu varavara taudia e, do umui haheauka noho ela bona Lohiabada do ia giroa mai. Umui laloa: Biru tauna ese iena uma anina ia naria, mai ena haheauka danu. Oibe, ia naria ela bona medu ginigunana bona medu dokona danu idia diho vadaeni.  
\v 8 Umui danu do umui haheauka. Bona mai abidadama ena laloa goada danu, Lohiabada do umui naria noho, badina iena mai be kahirakahira.   
\p
\v 9 Lauegu varavara e, umui ta ta dekenai do umui maumau lasi, Dirava ese umui do ia kota henia garina. Kota Biaguna ia gini hegaegae noho iduara dekenai, iena mai be kahirakahira.  
\v 10 Lauegu varavara taudia e, peroveta taudia do umui laloa. Lohiabada ena ladana dekenai idia hereva neganai, hisihisi lalonai idia haheauka bona idia goada. Edia kara bamona do umui karaia be namo.  
\v 11 Ita diba inai haheauka taudia ese moale idia davaria vadaeni, ani? Iobu ena haheauka sivaraina umui kamonai vadaeni, bona Lohiabada ese dokona neganai Iobu ia durua bada, ani? Badina be Lohiabada be mai ena bogahisihisi, bona iena hariharibada be bada herea.   
\s1 Do ita hereva metau lasi  
\p
\v 12 Lauegu varavara taudia e, gau bada herea be inai: Hereva metau o hereva helaga dekena amo do umui gwauhamata lasi. Guba, o tanobada, o idau gauna ta ena ladana dekenai do umui gwauhamata lasi. To bema “oibe” oi hereva gwauraia neganai, “oibe” sibona do oi gwau. Bona bema “lasi” oi hereva gwauraia neganai, “lasi” sibona do oi gwau. Hereva haida ma do umui gwauraia lasi, Dirava ena panisi do umui davaria garina.   
\s1 Kara maoromaoro tauna ena guriguri be mai ena siahu  
\p
\v 13 Umui emui huanai be tau ta ia hisihisi noho, a? Do ia guriguri be namo. Tau ta ia moale, a? Dirava hanamoa ane do ia abia be namo.  
\v 14 Umui ta ia gorere, a? Ia ese ekalesia gunalaia taudia do ia boiria be namo. Idia ese ia dainai do idia guriguri, bona ia dekenai dehoro do idia atoa, Lohiabada ena ladana dekenai.  
\v 15 Inai guriguri mai abidadama danu ese gorere tauna do ia hanamoa. Lohiabada ese iena mauri do ia hanamoa, bona iena kara dika do ia gwauatao.  
\v 16 Unai dainai umui ta ta dekenai emui kara dikadia do umui gwauraia hedinarai, bona umui ta ta totona do umui guriguri. Vadaeni unai neganai, Dirava ese emui mauri do ia hanamoa. Kara maoromaoro tauna ena guriguri be mai ena siahu. Inai bamona guriguri ese taunimanima ia durua diba.  
\v 17 Elia be taunimanima sibona, ita bamona. To ia ese Dirava dekenai ia guriguri goadagoada, medu do ia diho lasi. Vadaeni lagani toi bona hua 6 lalonai medu ia diho lasi.  
\v 18 Ma Elia ia guriguri lou, vadaeni medu be guba dekena amo ia diho, bona tano ese iena anina ia havaraia.   
\s1 Dala dekena amo tau ta ia raka siri neganai, do ita hakaua lou  
\p
\v 19 Lauegu varavara taudia e, bema umui ta be hereva momokani ena dala dekena amo ia raka siri, bona bema ta ese ia hakaua lou, inai be namo bada.  
\v 20 Inai do umui laloa namonamo: Bema tau ta ese kara dika tauna ia durua, vadaeni unai dika tauna ese iena dala dikana ia rakatania, unai durua tauna ese unai tau ena lauma be mase dekena amo do ia hamauria. Bona unai durua tauna ena kara dika momo danu, be Dirava ese do ia gwauatao.