\id EZK EZEKIEL, Hiri Motu Bible, PNG, 7/88, 5/93 
\h ESEKIELA 
\toc1 ESEKIELA 
\toc2 ESEKIELA 
\mt1 ESEKIELA  
\c 1  
\s1 ESEKIELA ESE MATA HANAI DEKENAI DIRAVA IA ITAIA  
\s1 Dirava ena helai gabuna  
\p
\v 1 Lagani namba 30 lalonai, hua namba 4, bona dina namba 5 dekenai lau Esekiela be Iuda hesiai mai guia danu taudia edia huanai lau noho, sinavai ena ladana Kebara ena badinai. Unai neganai guba be sibona ia kehoa, bona mata hanai dekena amo Dirava lau itaia.   
\p
\v 2 Unai negana be king Iehoiakini idia guia, bona Babulonia dekenai ia noho, ena lagani namba 5 lalonai.  
\v 3 Unuseni, Babulonia dekenai, Kebara Sinavai ena badinai, lau Esekiela, hahelagaia tauna, Busi ena natuna, ese Lohiabada ena hereva lau kamonai. Bona Lohiabada ena siahu danu be egu latanai ia mai, unai gabu dekenai.   
\p
\v 4 Lauegu matana lau negea, bona lau itaia, lai ena guba ta be mirigini kahana dekena amo ia mai. Kevaru danu lau itaia, ori badana momokani dekena amo ia diaridiari noho. Diari badana, lahi bamona, ese unai ori ia hagegea noho. Kevaru ia diaridiari noho gabuna dekenai, gau ta, iena toana be auri laboralabora bamona ia noho.   
\p
\v 5 Bona unai lai guba ena huanai lau ese mauri gaudia 4 lau itaia, edia toana be taunimanima bamona.  
\v 6 To idia ibounai ta ta be mai edia vairana 4, bona mai edia hanina 4 danu.  
\v 7 Edia aena be maoromaoro, bona edia aena palapala be boromakau edia aena palapala bamona, bona idia diaridiari, auri laboralabora bamona.  
\v 8 Edia hanina 4 henunai be imana 4 idia noho, taunimanima edia imana hegeregerena. Inai mauri gaudia 4 be mai edia vairana 4, bona hanina 4 danu.  
\v 9 Bona idia ibounai ta ta edia hanina ruaosi idia kehoa, vadaeni idia ta ta edia hanina ruaosi dokodia be idia ta ta edia hanina dokodia idia kamokau. Bona idia haboua ena toana be maua ta mai ena kahana 4 bamona. Bona idia 4 be vaira dekenai sibona idia raka, edia tauanina idia giroa lasi.   
\p
\v 10 Inai mauri gaudia edia vairadia edia toana be idauidau, vaira kahanai edia vairana be taunimanima edia vairana bamona, idiba kahana dekenai edia vairana be laiona ena vairana bamona, lauri kahanai edia vairana be boromakau tau ena vairana, bona edia murina kahana edia vairana be ugava manu ena vairana ena toana bamona. Mauri gaudia edia vairana 4 be unai bamona.  
\v 11 Inai mauri gaudia edia ataiai hanina ruaosi idia kehoa, idia duduia isi, vadaeni edia dokona ese mauri gauna ta ena hanina dokona ia kamokau. Bona edia henuna hanina ruaosi ese edia tauanina idia koua.  
\v 12 Idia ta ta ibounai edia vairana be ibounai 4, bona idia edia matana be kahana 4 dekenai idia itaia diba. Unai dainai bema kahana ta idia lao noho neganai, idia edia vairadia idia giroa lasi, to idia lao sibona.   
\p
\v 13 Inai mauri gaudia edia huanai be gau ta, iena toana be lahi ena gida bamona, o kede bamona. Inai lahi bamona gauna be mauri gaudia edia huanai ia marere lao. Inai lahi be ia hururuhururu, bona iena lalona dekena amo kevaru be ia kevarua lao.  
\v 14 Bona mauri gaudia danu be karaharaga idia marere lao bona marere mai, kevaru bamona.   
\p
\v 15 Unai mauri gaudia lau itaia noho, vadaeni uili 4 lau itaia, idia ta ta be mauri gaudia ta ta badibadinai idia noho.  
\v 16 Unai uili ibounai edia toana be hegeregere, idia diaridiari, davana bada nadi bamona, bona uili ta ta be mai ena uili ta danu ia lalonai.  
\v 17 Unai dainai uili idia heau lao, heau mai diba, kahana 4 ibounai dekenai.   
\p
\v 18 Lau ese inai uili lau itaia be bada herea dainai lau gari. Bona uili edia isedia auridia kuborodia be mai edia matana momo, idia hagegea noho.  
\v 19 Vadaeni mauri gaudia idia marere lao neganai, uili be idia danu idia marere lao. Bona bema mauri gaudia ese tano idia rakatania, idia roho ataiai, vadaeni uili danu be idia roho ataiai.   
\p
\v 20 Mauri gaudia ese idia ura lao gabudia dekenai idia lao, bona uili danu be idia danu idia lao, badina be mauri gaudia edia lauma ese uili idia biagua bona hakaua noho.  
\v 21 Mauri gaudia idia lao neganai, uili danu idia lao. Mauri gaudia idia gini neganai, uili danu idia gini. Bona mauri gaudia ese tano dekena amo idia daekau neganai uili danu idia daekau, badina be mauri gaudia edia lauma be uili edia lalona dekenai idia noho.   
\p
\v 22 Mauri gaudia edia kwarana edia ataiai be gau ta, iena toana be uro badana ta bamona, to idia habubua, vadaeni iena kununa be ataiai. Bona inai uro bamona gauna be ia diaridiari momokani, galasi namona bamona, bona ia be unai mauri gaudia edia ataiai ia noho.   
\p
\v 23 Inai mauri gaudia be unai uro kuboruna ena henunai idia noho, bona idia ta ta ese edia ataiai hanina ruaosi idia kehoa. Bona idia ta ta edia hanina edia dokona ese ta ta edia hanina dokona dekenai idia kamokau. Ma edia hanina ruaosi, henunai gaudia ese ta ta edia tauanina idia koua.   
\p
\v 24 Idia roho lao neganai, lau ese edia hanina edia regena lau kamonai, sinavai momo edia regena bamona, o Siahu Ibounai Dirava ena gadona bamona, o tuari orea bada herea ena regena bamona. Idia gini noho neganai, edia hanina idia hakapua.  
\v 25 Vadaeni edia kwarana edia ataiai ia noho uro badana bamona gauna dekena amo gado ta ena regena ia mai.   
\p
\v 26 Unai edia kwarana edia ataiai habubua uro badana bamona gauna ena ataiai be gau ta, helai gauna ta bamona. Iena toana be nadi namo herea ena ladana sapairo bamona. Bona unai helai gauna latanai be gau ta lau itaia, iena toana be taunimanima ta, ia helai diho.  
\v 27 Unai Tau lau itaia, iena tauanina ena ataiai kahana be lahi ese ia hadiaria noho auri laboralabora bamona. Bona iena tauanina ena henunai kahana be hegeregere lahi ena diaridiari bamona. Bona lau itaia, diari badana ta ese ia hagegea noho.   
\p
\v 28 Inai diari badana be mai ena kala momo, guba ena kevau bamona. Inai diari lau itaia, ia be Lohiabada dekena amo ia mai diari badana, Dirava ena hairaina ia hedinaraia gauna.  
\p Vadaeni lau itaia neganai, lau moru diho, bona gado ta lau kamonai.   
\s1 Dirava ese Esekiela ia boiria, iena peroveta tauna dagi do ia abia totona  
\c 2  
\p
\v 1 Vadaeni Dirava ena gadona ese lau ia hamaoroa, ia gwau, “Tanobada tauna e, oi toreisi, lau ura oi dekenai do lau hereva.”   
\p
\v 2 Dirava ese lau dekenai ia hereva neganai, iena Lauma ese egu lalona dekenai ia vareai, bona ia ese lau ia abia isi, lau gini. Ma lau kamonai, Dirava ese lau ia hamaoroa, ia gwau,   
\p
\v 3 “Tanobada tauna e, Israela besena dekenai oi do lau siaia. Idia be dagedage besena, lau dekena amo idia raka siri vadaeni. Idia be do dagedage noho, edia sene taudia hegeregerena.  
\v 4 Idia ese lau idia matauraia lasi, bona edia lalona be auka noho. Unai dainai lau ese oi do lau siaia, oi ese lauegu hereva idia dekenai do oi hamaoroa. Lau be Lohiabada Dirava.  
\v 5 Sedira unai dagedage taudia ese oi dekenai do idia kamonai, o oi do idia kamonai lasi. To idia be do idia diba momokani, peroveta tauna ta be idia edia huanai ia mai vadaeni.   
\p
\v 6 “To oi, tanobada tauna e, idia dekenai do oi gari lasi, bona edia hereva dekenai do oi gari lasi. Idia ese oi do idia dagedage henia, bona oi do idia matauraia lasi. Oi be idia edia huanai do oi noho neganai idia edia kara oi dekenai be dika, doadoa edia kara bamona. To idia dekenai do oi gari lasi, bona edia hereva dekenai do oi gari lasi.  
\v 7 Sedira oi dekenai do idia kamonai henia lasi momokani, to do oi hesiku lasi, oi ese idia dekenai lauegu hereva do oi gwauraia noho. Do oi laloaboio lasi, idia be dagedage taudia.   
\p
\v 8 “Tanobada tauna e, egu hereva do oi kamonai. Do oi dagedage lasi, unai Israela taudia idia dagedage bamona. Oiemu uduna do oi kehoa, oi dekenai lau henia aniani gauna do oi ania.”   
\p
\v 9 Vadaeni imana ta lau itaia, ia ese buka ta, lokua gauna ia dogoatao, bona lau dekenai ia henia gwauraia.  
\v 10 Vadaeni lau itaia, imana ese buka ia kehoa, bona pepa ena kahana kahana dekenai toretore ia noho. Unai kahana ruaosi dekenai be lalohisihisi ena boiboi bona mase ena taitai sivarai idia torea.   
\c 3  
\p
\v 1 Vadaeni Dirava ese lau ia hamaoroa, ia gwau, “Tanobada tauna e, inai buka do oi ania. Unai murinai oi lao, Israela taudia dekenai do oi hereva.”   
\p
\v 2 Vadaeni egu uduna lau kehoa, bona buka lau dekenai ia henia, lau ania totona.  
\v 3 Dirava ia gwau, “Tanobada tauna e, inai oi lau henia buka oi ania, oiemu bogana ia dekena amo do oi hahonua.” Vadaeni buka lau ania, bona iena mamina be namo herea, hani bamona.   
\p
\v 4 Dirava ma ia gwau, “Tanobada tauna e, Israela taudia dekenai do oi lao, bona oi dekenai lau hamaoroa hereva, be idia dekenai do oi gwauraia.  
\v 5 Badina be idau taudia, bona idau gado taudia dekenai oi lau siaia lasi, to Israela taudia sibona dekenai.  
\v 6 Bema lau ese tanobada badadia dekenai oi lau siaia, gado idauidau momo, oi diba lasi gaudia idia hereva gabudia dekenai, unai taudia ese oiemu hereva do idia kamonai.   
\p
\v 7 “To Israela bese taudia ese oi do idia kamonai henia lasi. Idia ese lau dekenai idia kamonai henia lasi, badina idia ibounai be dagedage, bona edia lalona be auka momokani.   
\p
\v 8 “To hari lau ese oiemu lalona do lau ha-aukaia, idia edia lalona auka hegeregerena. Idia edia goada ese oiemu goada do ia hereaia lasi.  
\v 9 Oiemu goada be do lau habadaia, oi be do nadi auka herea bamona, daiamono bamona. Unai dainai unai dagedage taudia dainai do oi gari lasi.”   
\p
\v 10 Ma Dirava ia hereva, ia gwau, “Tanobada tauna e, lauegu hereva ibounai dekenai do oi kamonai namonamo, bona laloaboio lasi.  
\v 11 Bona oi lao, oiemu bese taudia, tuari taudia ese Babulonia dekenai idia abia lao vadaeni taudia be do oi hamaoroa, oi gwau, ‘Kamonai, Lohiabada Dirava ese inai bamona umui ia hereva henia noho.’ Oibe, bema idia kamonai, o bema idia kamonai lasi neganai, lauegu hereva do oi hadibaia idia dekenai.”   
\p
\v 12 Unai neganai Dirava ena Lauma ese lau ia abia isi, bona lauegu murina dekenai gado badana momokani lau kamonai, ia gwau, “Lohiabada ena hairaina be bada herea guba dekenai. Iena ladana do oi hanamoa bada!”  
\v 13 Unai mauri gaudia edia hanina idia hamarerea noho, bona uili ese regena idia karaia, tano mareremarere badana ena regena bamona.   
\p
\v 14 Lohiabada ena siahu ese lauegu latanai ia mai, mai goada bada danu, bona Dirava ena Lauma ese lau ia abia isi, bona lau ia abia lao. To egu lalona be ia dika bona mai badu danu.   
\p
\v 15 Vadaeni Dirava ena Lauma ese lau ia abia lao, bona Israela taudia, Babulonia dekenai noho taudia, dekenai lau ginidae. Unai gabu be Telabibi dekenai, Kebara Sinavai ena ranu isena kahirakahira ia noho. Dina 7 lalonai unai Israela taudia danu lau noho, bona edia sivarai lau dekenai ese egu lalona ia hisihisi henia bada, ela bona egu goada ia ore.   
\s1 Lohiabada ese Esekiela ia oda henia, Israela ena naria tauna ena dagi do ia abia  
\p
\v 16 Unai dina 7 idia ore neganai, Lohiabada ese lau Esekiela dekenai ia hereva, ia gwau,  
\v 17 “Tanobada tauna e, lau ese Israela bese ena naria tauna be oi do lau halaoa. Oi dekenai lau henia sisiba be idia dekenai do oi hamaoroa.  
\v 18 Bema lau gwau dika tauna ta be do ia mase, vadaeni oi ese ia do oi sisiba henia. Do oi hamaoroa iena kara dika do ia rakatania, vadaeni do ia mase lasi. Bema oi ese ia dekenai oi sisiba henia lasi, unai tau be iena kara dika dainai do ia mase. Bona lau be do lau gwau unai tau ena mase be oiemu kerere dainai.   
\p
\v 19 “To bema dika tauna be oi ese oi sisiba henia, bona iena dika ia rakatania lasi, vadaeni unai tau be iena kara dika dainai do ia mase. To oi be mai emu kerere lasi dainai, oi be do oi mase lasi.   
\p
\v 20 “Bona bema kara maoromaoro tauna ta ese iena kara maoromaoro ia rakatania, kara dika ia karaia, bona ia hamorua dalana lau karaia neganai, oi ese unai tau do oi sisiba henia, iena dika do ia rakatania. Bema oi sisiba henia lasi, ia be iena kara dika dainai do ia mase. Lau ese iena kara maoromaoro gunana be do lau laloa lasi. Lasi, bona lau be do lau gwau unai tau ena mase be oiemu kerere dainai.   
\p
\v 21 “To bema kara maoromaoro tauna oi sisiba henia do ia kara dika lasi, bona oiemu hereva ia kamonai henia dainai ia kara dika lasi, unai tau do ia mase lasi. Bona oiemu mauri danu be do ia noho, do lau utua lasi.”   
\s1 Dirava ese Esekiela ena hereva dalana ia koua  
\p
\v 22 Lau Esekiela be unai gabu dekenai lau do noho, vadaeni mamina lau abia, Lohiabada ena siahu bada be egu latanai ia mai. Bona Lohiabada ese lau ia hereva henia, ia gwau, “Oi toreisi, koura dekenai do oi lao. Unuseni oi ginidae neganai lau ese oi do lau hereva henia.”   
\p
\v 23 Unai dainai koura dekenai lau lao, bona unuseni Lohiabada ena hairaina lau itaia, Kebara Sinavai dekenai iena hairaina lau itaia bamona. Tano dekenai lau tui diho, egu vairana be tano dekenai lau atoa.   
\p
\v 24 To Dirava ena Lauma be lau dekenai ia vareai, bona ia ese lau ia abia isi, vadaeni lau gini. Lohiabada ese lau ia hamaoroa, ia gwau, “Tanobada tauna e, oiemu ruma dekenai do oi lao, oi raka vareai, bona iduara do oi koua.  
\v 25 Vadaeni gabeai tau haida ese varo do idia abia, oi do idia guia. Bona oi be emu ruma do oi rakatania diba lasi, taunimanima edia huanai do oi raka diba lasi.   
\p
\v 26 “Bona lau ese oiemu malana do lau hamasea, vadaeni do oi hereva diba lasi. Unai dainai oi ese inai dagedage taudia do oi sisiba henidia diba lasi.   
\p
\v 27 “To nega ta ta lau ese oi dekenai egu hereva do lau henia, bona do lau ura oi ese inai hereva taunimanima dekenai do oi gwauraia. Unai negadia dekenai, lau ese oiemu uduna do lau kehoa, vadaeni oi be taunimanima dekenai do oi gwau: ‘Lohiabada Dirava ese inai bamona ia hereva.’ Idia haida ese do idia kamonai henia, to haida be do idia kamonai henia lasi momokani, badina idia be dagedage besena.”   
\c 4  
\s1 Dirava ese Ierusalema do idia koua hagegea dalana Esekiela dekenai ia hedinaraia  
\p
\v 1 Dirava ia gwau, “Tanobada tauna e, biriki ta do oi abia, oiemu vairana dekenai do oi atoa, bona iena latanai Ierusalema hanua ena toana do oi torea, piksa bamona.  
\v 2 Vadaeni, inai biriki kahirakahira, taunimanima ese idia koua hagegea, bona do idia tuari henia bamona, dadaira, tuari gaudia, kamepa, bona idia haboua tano do oi atoa, piksa bamona.  
\v 3 Unai neganai, auri palaka ta do oi abia, ia be auri maguna bamona do ia lao, oi bona hanua emui huana dekenai do ia gini. Vadaeni hanua dekenai oiemu vairana do oi henia, bona oi ese koua hagegea totona do oi gini, tuari taudia ese bema idia karaia bamona. Inai be toa ta, Israela ena besena dekenai, badina oi karaia gauna idia itaia neganai, do idia diba tuari taudia do idia mai, Ierusalema hadikaia totona.   
\p
\v 4 “Unai neganai oiemu ohena laurina dekenai do oi hekure, bona lau ese Israela besena ena dika davana be oiemu latanai do lau atoa. Dina 390 lalonai oi be unai bamona do oi hekure, mai hisihisi danu, Israela taudia edia kerere dainai.  
\v 5 Unai dina 390 do oi hisihisi, badina be lagani 390 lalonai lau ese Israela edia kerere davana do lau henidia.   
\p
\v 6 “Unai oi karaia haorea neganai, oiemu ohena idibana dekenai do oi hekure, bona dina 40 lalonai Iuda edia dika davana totona do oi hisihisi. Badina be lagani 40 lalonai lau ese Iuda edia kerere davana do lau henidia.   
\p
\v 7 “Oi be oi hekure noho neganai, oi ese unai biriki, ma gau haida ena piksa, tuari taudia ese Ierusalema do idia abia toana gauna, be do oi itaia goada noho. Bona unai neganai danu oi be tuari totona do oi karaia hegaegae bamona, bona do oi gwau, ‘Inai hanua ese dika do ia davaria.’  
\v 8 Lau ese varo dekenai oi do lau guia, vadaeni oi be oiemu hekure dekenai do oi giroa diba lasi, ela bona oi ese inai piksa gaukara oi haorea neganai, lau makaia negana unai.   
\p
\v 9 “Inai danu, oi ese uiti, bali, bini, bona raisi bamona aniani do oi mikisi, bona beredi do oi gabua. Bona unai dina 390 lalonai, oiemu ohena laurina dekenai oi hekure neganai, inai beredi do oi ania.  
\v 10 Oi ese dina ta ta dekenai beredi ena metau 230 garam sibona do oi ania, dina ta lalonai nega tamona do oi ania.  
\v 11 Ranu danu do oi inua, dina ta lalonai kapusi rua sibona.  
\v 12 Lahi be taunimanima edia kukuri kaukaudia dekena amo do oi gabua, bona inai lahi dekenai emu beredi do oi gabua. Taunimanima ese oi idia itaia diba gabuna dekenai do oi ania.”  
\v 13 Lohiabada ma ia gwau, “Israela taudia ese aniani mirodia unai bamona do idia ania, lau ese idia lau luludia lao besedia edia huanai idia noho neganai.”   
\p
\v 14 To lau Esekiela be lau gwau, “Lohiabada Dirava e, mani oi kamonai. Lau ese egu tauanina be nega ta lau hamiroa lasi, egu mero negana dekena amo ia mai bona hari lau ese mase kava gauna ta o uda boromadia idia darea gauna ta lau ania lasi, bona vamu bodagana sisina be nega ta lau ania lasi momokani.”   
\p
\v 15 Vadaeni Lohiabada ese lau ia hamaoroa, ia gwau, “Namo, oiemu hereva dainai, gwaumaoro lau henia inai, oiemu beredi oi gabua neganai, boromakau kukuri kaukaudia dekena amo lahi do oi gabua, taunimanima edia kukuri lasi.”   
\p
\v 16 Ma lau ia hamaoroa, ia gwau, “Tanobada tauna e, lau ese Ierusalema ena beredi abia dalana do lau utua. Ierusalema taudia ese aniani ena metau, be sikele dekenai do idia tohoa guna, vadaeni mai gari danu do idia ania. Bona ranu danu ena metau do idia tohoa guna, vadaeni mai hoa dika danu do idia inua.  
\v 17 Badina aniani bona ranu be do idia maragi lao noho, bona taunimanima ese idia ta ta dekenai do idia itaia, mai hoa bona mai gari danu. Badina be edia kara dikadia dainai, edia tauanidia do idia maragi lao momokani.”   
\c 5  
\s1 Esekiela ese iena huina ia utua bona ia kakasia ore  
\p
\v 1 Lohiabada ia gwau, “Tanobada tauna e, tuari kaia ta do oi abia, bona ia dekena amo oiemu auki huina bona oiemu kwarana huina ibounai do oi kakasia ore. Unai huina ibounai ena metau do oi tohoa, bona huina do oi karoa, karoa toi.  
\v 2 Vadaeni lau ese lau makaia do oi hekure dinadia oi haorea neganai, do oi toreisi. Inai kara ese taunimanima dekenai do ia hedinaraia, tuari taudia ese Ierusalema idia abia vadaeni. Oi toreisi murinai, oiemu huina karoa toi ena karoa ta be unai biriki, Ierusalema ena toana, ena latanai do oi atoa, bona unuseni lahi dekenai unai huina do oi gabua. Ma huina ena karoa iharuana do oi abia, tuari kaia dekena amo do oi utua maragimaragi oiemu biriki, hanua ena toana, ena kahana kahana dekenai. Ma huina karoa ihatoina be lai dekenai do oi negea lao, bona lau ese egu tuari kaia dekena amo idia do lau lulua lao.  
\v 3 Unai huina dekena amo haida sibona do oi abia, bona oiemu dabua ena isena dekenai do oi kwatua kau.  
\v 4 Ma unai huina haida do oi abia, bona lahi dekenai do oi negea lao, do oi gabudia, bona unai gabua huina dekena amo lahi ta do ia vara Israela bese taudia ibounai edia latanai.”   
\p
\v 5 Lohiabada Dirava ese inai bamona ia hereva, ia gwau: “Inai hanua badana Ierusalema be bese idauidau edia huanai momokani lau atoa vadaeni. Basileia idauidau ese Ierusalema idia hagegea noho.  
\v 6 To Ierusalema ese egu taravatu bona egu oda ia utua bona negea momokani, bona inai kara dika dekena amo ia ese tano idauidau edia kara dika ia hanaia. Badina Ierusalema taudia ese egu taravatu bona oda idia negea bona utua momokani vadaeni.   
\p
\v 7 “Unai dainai lau, Lohiabada Dirava, ese inai bamona lau hereva noho: Ierusalema taudia e, umui ese egu taravatu bona oda umui kamonai henia lasi dainai, umui emui dika ese bese idauidau edia dika ia hanaia. Bona umui ese idau bese taudia edia oda bona taravatu umui badinaia vadaeni.   
\p
\v 8 “Unai dainai lau, Lohiabada Dirava ese umui lau hereva henia inai, lau ese umui Ierusalema taudia do lau tuari henia. Bona lau ese emui kerere davana do lau henia, bese idauidau edia vairana dekenai.  
\v 9 Emui kara dikadia be dika rohoroho momokani dainai, lau ese Ierusalema dekenai nega gunana ta dekenai lau karaia lasi matakani, bona gabeai negana ta do lau karaia lou lasi matakani do lau henia.  
\v 10 Unai matakani dainai, Ierusalema taudia edia huanai, tamana taudia ese edia natudia do idia ania, bona memero ese edia tamadia do idia ania. Bona umui do mauri taudia be lau ese emui dika davana do lau henia inai: Lai ia toa ena kahana ibounai dekenai umui do lau lulua lao.”   
\p
\v 11 Mauri ena Dirava, Lohiabada, ma ia gwau, “Egu ladana dekenai lau gwauhamata inai: Umui ese, egu Dubu Helaga be emui kaivakuku dika herea bona emui kara dika rohoroho dekena amo umui hamiroa vadaeni dainai, lau ese umui do lau negea momokani. Lau ese umui do lau itaia lasi, bona umui do lau bogahisihisi henia lasi.  
\v 12 Emui orea dekena amo kahana ta be hanaia gorere dikana dekena amo o hitolo dekena amo do idia mase. Ma kahana iharuana be tuari dekena amo do idia mase emui orea dekena amo. Ma kahana ihatoina be lau ese lai ia toa ena kahana ibounai dekenai do lau negea, bona lulua lao. Bona inai lai dekenai lau negea taudia be tuari kaia dekena amo do lau luludia lao.   
\p
\v 13 “Unai karadia be egu badu siahuna dekena amo do lau karaia, ia lao bona egu lalona do ia keru, vadaeni egu badu do ia ore. Unai neganai do umui diba, lau Lohiabada ese egu laloa maoromaoro bona egu laloa siahu dekenai umui lau hereva henia vadaeni.   
\p
\v 14 “Emui tano be anina lasi dika gabuna do lau halaoa, bona umui idia hagegea besedia dekena amo umui idia raka hanaia taudia ese umui do idia hereva dika henia momokani.   
\p
\v 15 “Io, lau ese umui emui dika davana do lau henia mai egu badu siahuna danu neganai, umui idia hagegea besedia be do idia gari bada. Idia ese umui do idia badu henia, bona umui do idia hereva dika henia. Lau inai Lohiabada, lau hereva vadaeni.   
\p
\v 16 “Lau ese emui aniani abia dalana do lau koua, do umui hitolo, bona do umui mase. Umui ese hitolo ena hisihisi do umui abia, peva taudia edia diba ese umui idia gwadaia ena hisihisi bamona.   
\p
\v 17 “Lau ese hitolo, bona uda boromadia dikadia do lau siaia, emui natudia do idia alaia mase totona. Bona gorere, heatu bona tuari, be umui alaia totona do lau siaia. Lau inai Lohiabada, lau hereva vadaeni.”   
\c 6  
\s1 Lohiabada ese dirava koikoidia tomadiho henia kara ia gwau henia  
\p
\v 1 Lohiabada ese lau Esekiela dekenai ia hereva, ia gwau,  
\v 2 “Tanobada tauna e, Israela ena ororodia dekenai oiemu vairana do oi henia, bona egu peroveta hereva idia dekenai do oi gwauraia,  
\v 3 do oi gwau, ‘Israela ena ororodia e, Lohiabada Dirava ena hereva do umui kamonai, ia gwau: Lau Lohiabada Dirava ese ororo badadia bona maragidia, koura dobudia bona koura maragidia inai bamona lau sisiba henidia noho: Lau ese tuari kaia ta do lau siaia diho, ia ese emui ataiai idia noho tomadiho gabudia, dirava koikoi tomadiho gabudia do ia hadikaia ore.  
\v 4 Emui boubou patadia, bona emui muramura gabua patadia do lau hamakohia. Unuseni idia tomadiho noho taudia ibounai be do lau alaia mase, edia kaivakuku edia vairana dekenai.  
\v 5 Israela taudia edia mase tauanidia bona edia turiadia be unai boubou patadia edia vairanai bona unai gabu ena kahana ibounai dekenai do idia hekure kava, hekure kava.  
\v 6 Israela ena hanua ibounai be do lau hadikaia ore. Vadaeni edia boubou patadia bona edia kaivakuku ibounai be do lau hamakohia ore, bona edia bonana namo muramura gabua patadia be do lau hamakohia maragimaragi. Idia ese edia imadia dekenai idia karaia gaudia ibounai be do idia boio ore momokani.  
\v 7 Gabu ibounai dekenai taunimanima do idia alaia mase, bona unai neganai do umui diba lau be Lohiabada.   
\p
\v 8 “ ‘To umui haida do lau alaia lasi, vadaeni do idia mauri noho. Inai do mauri taudia be lau ese bese idauidau edia huanai do lau luludia lao.  
\v 9 Unai gabudia dekenai mai guia danu idia noho neganai idia ese lau Lohiabada do idia laloatao. Unai neganai do idia diba lau ese idia lau matakani henia, bona idia lau hahemaraia, badina edia kara koikoi dekena amo idia ese lau idia rakatania, bona dirava koikoidia idia tahua. Edia kara dika, dika rohoroho gaudia dainai do idia hemarai bada, mai lalohisihisi momokani danu.  
\v 10 Do idia diba momokani lau be Lohiabada, bona do idia diba danu egu sisiba herevadia be hereva kava lasi.’ ”   
\p
\v 11 Lohiabada Dirava ia gwau, “Israela taudia e, emui imadia do umui abia isi, emui aedia dekenai tano do umui moia tao auka. Mai lalohisihisi danu do umui taitai, Israela taudia edia kara dika, bona dika rohoroho idia karaia dainai. Idia be tuari, o hitolo, o hanaia gorere dekena amo do idia mase.  
\v 12 Gabu daudau idia noho taudia be hanaia gorere dainai do idia mase, bona kahirakahira idia noho taudia be tuari dainai do idia mase, bona do mauri taudia be hitolo dekena amo do idia mase. Idia ese egu badu ena mamina do idia abia momokani.  
\v 13 Israela taudia edia mase tauanidia be edia kaivakuku edia huanai bona edia boubou patadia edia vairanai do idia hekure kava, hekure kava noho. Ororo ibounai edia ataiai, au mauridia bona ouki audia ibounai edia henunai unai mase tauanidia do idia noho, edia kaivakuku dekenai bonana namo muramura idia gabua vadaeni gabudia ibounai dekenai. Unai neganai, taunimanima ibounai do idia diba lau be Lohiabada.  
\v 14 Io, egu imana do lau abia isi, bona edia tano do lau hadikaia ore. Edia noho gabudia ibounai be anina lasi tano do lau halaoa, diho kahana ena tano kaukau dekena amo ia lao bona Ribila dekenai. Unai neganai do idia diba lau be Lohiabada.”   
\c 7  
\s1 Israela ena dokona be kahirakahira  
\p
\v 1 Lohiabada be lau dekenai ia hereva, ia gwau,  
\v 2 “Tanobada tauna e, lau Lohiabada Dirava ese Israela taudia edia tano totona lau hereva henidia inai: Dokona be inai, emui tano ena kahana ibounai dekenai dokona ia ginidae vadaeni.   
\p
\v 3 “Israela e, oiemu dokona ia ginidae inai. Oi ese egu badu ena mamina do oi abia, badina oiemu kara dikadia edia davana do lau henia. Oiemu kara dika rohoroho ibounai edia davana oi dekenai do lau henia.  
\v 4 Lau ese oi do lau itaia lasi, bona oi do lau bogahisihisi henia lasi, to oiemu kara dika rohoroho ena davana do lau henia momokani. Unai dekena amo do umui diba lau be Lohiabada.”   
\p
\v 5 Lohiabada Dirava ese inai bamona ma ia hereva noho, ia gwau: “Nega dika bada ena murinai be nega dika bada ma ta, be umui dekenai do ia vara noho. Do umui itaia, dika ia mai noho!  
\v 6 Dokona ia ginidae vadaeni, dokona momokani ia ginidae vadaeni. Do umui itaia, umui dekenai ia mai noho inai!   
\p
\v 7 “Israela dekenai noho taudia e, umui dekenai dika ia ginidae vadaeni. Nega ia kahirakahira vadaeni, umui dekenai gari bada be ororo edia tomadiho gabudia dekenai do ia vara, moale do umui davaria lasi.  
\v 8 Nega daudau lasi lalonai lau ese egu badu mai siahu bada umui emui latanai do lau bubua momokani. Emui kara dainai, umui lau kota henia noho, bona emui kara dika rohoroho ibounai ena davana umui dekenai do lau henia.  
\v 9 Lau ese umui do lau bogahisihisi henia lasi, bona umui do lau laloa lasi. Lau ese emui kara dika rohoroho ena davana do lau henia momokani. Unai dekena amo do umui diba lau be Lohiabada, bona lau ese emui dika davana lau henia noho.”   
\p
\v 10 Israela ena dika bada dinana be kahirakahira! Dagedage karadia momo idia vara noho. Hekokoroku kara danu be ia bada daekau noho.  
\v 11 Dagedage ia tubu noho dainai, kara dika ma haida danu idia tubu noho. Inai kohu momo, bona hekokoroku Israela taudia ta, be do ia mauri lasi. Edia kohu ibounai, bona edia hairai be do ia boio ore.   
\p
\v 12 Io, nega ia mai vadaeni, dina ia kahirakahira vadaeni. Kohu ia hoia mai tauna ese unai kohu do ia moalelaia lasi be namo, bona ia hoia lao tauna ese do ia lalohisihisi lasi danu be namo, badina be Dirava ena badu be taunimanima ibounai edia latanai do ia atoa kau.  
\v 13 Iena tano namona ia hoia lao tauna ese unai tano do ia abia lou lasi neganai, ia be do ia mase. Badina be Dirava ena badu be taunimanima ibounai edia latanai do ia diho. Idia ibounai be edia kara dika dainai do idia mase.  
\v 14 Tuari ena kibi be Israela taudia ese do idia hiriria, bona tuari totona gau ibounai do idia abia hegaegae. To gari bada dainai tau ta ese tuari totona do ia toreisi lasi, badina be Dirava ena badu be taunimanima ibounai edia latanai do ia diho.   
\s1 Israela taudia edia kara dika dainai davana idia abia  
\p
\v 15 Hanua ena ariara dekenai tuari ia vara noho, bona ruma edia lalonai taunimanima idia gorere bona idia hitolo noho. Hanua ena murimurina dekenai idia noho taudia be tuari dekena amo do idia mase, bona hanua lalonai noho taudia be gorere bona hitolo dekenai do idia mase.  
\v 16 Taunimanima haida be ororo dekenai do idia heau mauri. Idia be ororo dekenai do idia noho, koura dekena amo idia roho mai pune manu bamona. Inai taudia ta ta ibounai ese edia kara dikadia dainai do idia taitai.  
\v 17 Idia ibounai edia imadia be do idia manoka lao, bona edia tuidia be do idia huedehuede.  
\v 18 Idia ese puse dabua do idia karaia, bona mai gari bada danu do idia heudeheude. Idia ese edia kwaradia huina do idia kakasia ore, bona idia ibounai edia vairadia do idia atoa diho, hemarai bada dainai.  
\v 19 Idia ese edia siliva be ariara dekenai do idia negea, edia golo danu, gau mirona bamona, do idia negea lao. Badina be Lohiabada ena badu mai siahu danu dinana dekenai, edia siliva bona golo ese idia do ia hamauria diba lasi. Siliva bona golo ese edia hitolo ia haorea diba lasi, bona edia bogadia ia hakunua diba lasi. Guna unai siliva bona golo idia ura dikadika, bona unai kara ese ia veridia kara dikadia dekenai.   
\p
\v 20 Unai taudia be edia herahera nadi namodia dainai idia hekokoroku, bona edia kaivakuku dika rohorohodia bona edia gau dika hereadia be unai herahera dekena amo idia karaia. Unai dainai, unai herahera gaudia be unai taudia dekenai gau mirona ta, Lohiabada ese do ia halaoa.   
\p
\v 21 Lohiabada ese ia gwau, “Lau ese idau bese taudia do lau mailaia, idia bona tau dikadia ese Israela taudia edia kohu ibounai do idia henaoa, bona egu Dubu do idia hamiroa.  
\v 22 Inai idau bese taudia ese egu Dubu Helaga do idia hamiroa neganai lau ese do lau koudia lasi. Henaoa taudia ese egu Dubu Helaga lalonai do idia raka vareai, bona do idia hamiroa.   
\p
\v 23 “Auri seini do umui abia hegaegae, Israela taudia do umui guia totona, badina tano be rara habubua kara dikadia dekenai ia honu noho, bona hanua edia lalonai alaia mase karadia momo idia vara noho.  
\v 24 Lau Lohiabada ese bese dika hereadia do lau mailaia, bona idia ese Israela taudia edia ruma do idia abia. Israela ena goada taudia edia hekokoroku do lau haorea, bona edia gabu helagadia be unai bese taudia ese do idia hamiroa.  
\v 25 Lalohisihisi bona gari do idia ginidae neganai idia ese maino do idia tahua, to do idia davaria lasi.  
\v 26 Nega dika bada ena murinai be nega dika bada ma ta do ia vara, bona sivarai dikadia edia murinai be sivarai dikadia ma haida do idia kamonai. Israela taudia ese peroveta taudia do idia noia, dahaka do ia vara do idia hedinaraia. Ma hahelagaia taudia dekena amo hadibaia hereva namona do idia tahua, to namo ta do idia davaria lasi. Tau badadia ese danu sisiba ta do idia henidia diba lasi.  
\v 27 King ese do ia taitai, bona king ena natuna do ia hoa bada mai daradara bada danu, bona Israela taudia edia imadia do idia heudeheude momo, gari bada dainai. Idia edia kara hegeregerena lau ese edia davana do lau henia, bona idia ese haida idia kota henidia hegeregerena, be lau ese do lau kota henidia. Unai neganai idia be do idia diba lau be Lohiabada.”   
\c 8  
\s1 ESEKIELA ESE NEGA IHARUANA, MATA HANAI DEKENAI DIRAVA IA ITAIA  
\s1 Ierusalema dekenai kaivakuku idia tomadiho henia  
\p
\v 1 Babulonia dekenai mai guia danu ai noho negana ena lagani namba 6, hua namba 6, bona dina namba 5 dekenai, Iuda tau badadia be egu ruma lalonai idia helai noho lau danu. Vadaeni nega tamona, Lohiabada Dirava ena siahu egu latanai ia diho mai.  
\v 2 Egu matana lau abia isi, bona gau ta lau itaia, iena toana be taunimanima bamona. Iena gabana gauna ena henunai be lahi bamona, bona iena gabana ena ataiai be ia diaridiari, auri laboralabora ena hururuhururu bamona.  
\v 3 Ia ese imana bamona gauna ia atoa maoromaoro, bona egu kwarana huina ia dogoatao. Vadaeni inai mata hanai lalonai Dirava ena Lauma ese lau ia abia isi, ataiai momokani lau lao, tanobada bona guba edia huanai, bona ia ese Ierusalema dekenai lau ia abia lao. Lauma ese lau ia hakaua lao, bona Dubu Helaga ena mirigini kahana iduara, lalonai gauna, ena raka vareai gabuna dekenai lau ia atoa. Unai gabu dekenai kaivakuku dika herea, Dirava ena badu mai siahuna ia havaraia gauna, ia gini.   
\p
\v 4 Lau itaia danu, Israela ena Dirava ena hairaina be unuseni, Kebara Sinavai isena dekenai mata hanai lalonai lau itaia hegeregerena.  
\v 5 Dirava ese lau ia hamaoroa, ia gwau, “Tanobada tauna e, mirigini kahana do oi itaia.” Vadaeni egu matana lau negea, bona unuseni, iduara ena raka vareai gabunai, boubou patana kahirakahira, be Dirava ese ia badu henia kaivakuku dikana lau itaia.   
\p
\v 6 Dirava ese lau ia hamaoroa, ia gwau, “Tanobada tauna e, Israela taudia idia karaia noho kara dika rohoroho oi itaia noho, a? Idia ese inai karadia dekena amo egu gabu helagana dekena amo lau idia lulua lao noho. To kara dika rohoroho bada herea haida, inai kara idia hanaia gaudia, be do oi itaia.”   
\p
\v 7 Vadaeni ia ese ma lau ia hakaua, magu ena iduara ta ena badibadinai, bona magu lalonai ia noho matuna lau dekenai ia hedinaraia.  
\v 8 Ia gwau, “Tanobada tauna e, magu do oi geia iniseni.” Lau geia, matu lau karaia, bona iduara ta lau davaria.  
\v 9 Ia gwau, “Iduara do oi raka vareai, kara dika rohoroho bada herea gaudia unuseni idia karaia, be do oi itaia.”   
\p
\v 10 Vadaeni lau raka vareai bona lau itaia. Bona unuseni be idia rau gaudia idauidau bona boroma dika rohorohodia, bona Israela taudia edia kaivakuku ibounai edia laulaudia be haba dekenai idia torea vadaeni.  
\v 11 Unai laulau edia vairana dekenai Israela tau badadia ibounai 70 idia gini noho, bona Iasanaia Sapana be idia edia huanai ia gini. Idia ta ta be mai edia gida huaia auri kapusi, edia imadia dekenai, bona mai bonana muramura ena kwalahu be kapusi dekena amo idia daekau lao noho.   
\p
\v 12 Lohiabada ese lau ia nanadaia, ia gwau, “Tanobada tauna e, oi itaia, a? Israela tau badadia ese hunia dekenai idia karaia noho gauna oi itaia, a? Idia ese dirava koikoi edia laulaudia momo idia noho daiutu lalonai idia tomadiho noho. Idia gwau, ‘Lohiabada ese ai do ia itaia lasi, ia ese Israela ia rakatania vadaeni.’ ”   
\p
\v 13 Lohiabada ese lau ma ia hamaoroa, ia gwau, “Kara dika rohorohodia haida, inai kara idia hanaia gaudia, idia ese idia karaia noho, be do oi itaia.”   
\p
\v 14 Vadaeni ia ese Dubu Helaga ena mirigini kahana iduara ena raka vareai gabuna dekenai lau ia hakaua lao. Unuseni hahine haida lau itaia, idia helai diho, Tamusu dirava ia mase dainai idia taitai noho.   
\p
\v 15 Lohiabada ese lau ia hamaoroa, ia gwau, “Tanobada tauna e, inai be oi itaia vadaeni, a? To kara dika rohoroho haida, inai kara idia hanaia gaudia, be do oi itaia.”   
\p
\v 16 Vadaeni ia ese Dubu Helaga ena lalona dekenai ia noho maguna ena lalonai lau ia hakaua lao. Unuseni, Lohiabada ena Dubu Helaga ena vairanai, dehe bona boubou patana edia huanai, tau ibounai 25 bamona idia gini. Edia dorudia be Dubu Helaga idia henia, bona edia vairadia be dina ia daekau kahana dekenai idia henia. Idia ese dina idia tomadiho henia, dina ia daekau lao neganai.   
\p
\v 17 Lohiabada ese lau ia hamaoroa, ia gwau, “Tanobada tauna e, inai kara oi itaia vadaeni, a? Iuda besena taudia ese unai kara dika rohorohodia iniseni idia karaia noho be gau maragina sibona, a? Unai dainai idia ese tano be dagedage dekenai idia hahonua noho, bona idia ese lau idia habadua momokani noho? Ma hari oi itaia, idia ese lau idia matauraia lasi momokani, idia ese lau idia negea momokani karana idia karaia noho.  
\v 18 Unai dainai lau ese badu mai siahu bada karadia do lau karaia. Lau ese edia hisihisi do lau laloa lasi, bona idia do lau bogahisihisi henia lasi. Idia ese lau dekenai do idia guriguri mai boiboi bada danu, to lau ese idia do lau kamonai henia lasi.”   
\c 9  
\s1 Dirava idia gari henia taudia dekenai maka idia atoa  
\p
\v 1 Unai neganai lau ese Dirava ena gadona lau kamonai, ia gwau, “Ierusalema ena dika davana do umui henia taudia e, umui mai iniseni. Emui tuari gaudia do umui mailaia.”  
\v 2 Vadaeni lau itaia, tau ibounai 6 be Dubu Helaga ena magu iduara, mirigini kahana gauna, ena kahana dekena amo idia mai, ta ta be mai edia tuari kaia imadia dekenai. Ma tau ta danu idia danu ia mai, ia be dabua aukana ia karaia, bona mai ena torea peni bona pepa danu. Vadaeni idia be boubou patana, auri laboralabora gauna, ena badibadinai idia gini.   
\p
\v 3 Unai neganai Israela ena Dirava ena hairaina be ena noho gabuna kerubi edia ataiai, dekena amo ia daekau, bona Dubu Helaga ena raka vareai gabuna dekenai ia lao. Vadaeni Lohiabada ese unai dabua aukana ia karaia bona torea gaudia ia abia tauna ia boiboi henia.  
\v 4 Lohiabada ese ia hamaoroa, ia gwau, “Ierusalema hanua do oi raka hanaia, bona kara dika rohoroho ibounai, hanua lalonai idia karaia noho, dainai idia taitai noho, bona idia lalohisihisi noho taudia edia bagudia dekenai maka do oi atoa.”   
\p
\v 5 Bona lau kamonai, Dirava ese unai tau haida danu ia hamaoroa, ia gwau, “Unai maka ia atoa noho tauna ena murinai, hanua do umui raka hanaia, bona taunimanima do umui alaia mase. Ta do umui bogahisihisi henia lasi, bona ta do umui hamauria lasi,  
\v 6 tau burukadia, uhau, kekeni badadia, memero, kekeni, bona hahine danu. To iena baguna dekenai maka idia abia taudia do umui alaia lasi. Egu Dubu Helaga dekena amo inai kara do umui karaia hamatamaia.” Unai dainai idia ese unai tau badadia, Dubu Helaga ena vairanai idia gini noho taudia dekenai inai alaia kara idia hamatamaia.   
\p
\v 7 Ma Dirava ese idia ia hamaoroa, ia gwau, “Dubu Helaga do umui hamiroa. Dubu ena ariara mai edia magudia ibounai, be umui alaia mase taudia edia tauanidia dekena amo do umui hahonua. Umui lao!” Vadaeni idia be hanua ena ariara dekenai idia raka lao, bona idia ese hanua taudia idia alaia hamatamaia.   
\p
\v 8 Idia aladia noho neganai, lau Esekiela be sibona lau noho, vadaeni tano dekenai egu vairana lau atoa, bona lau boiboi, lau gwau, “Lohiabada Dirava e, oiemu badu mai siahu danu Ierusalema ena latanai oi bubua neganai, Israela do mauri noho taudia ibounai do oi alaia ore, a?”   
\p
\v 9 Vadaeni Dirava ese lau ia hamaoroa, ia gwau, “Israela bona Iuda taudia edia kerere be bada herea, bona idia alaia mase taudia edia rara dekenai Israela tano be ia honu noho. Ierusalema hanua be kota maoromaoro lasi ena kara dekena amo ia honu noho. Badina be idia gwau, ‘Lohiabada ese iseda tano ia rakatania vadaeni. Unai dainai ia ese iseda kara dika ia itaia lasi.’  
\v 10 To lau Lohiabada ese idia do lau bogahisihisi henia lasi, bona idia ese taunimanima momo dekenai idia karaia hegeregerena, be lau ese idia dekenai do lau karaia.”   
\p
\v 11 Unai neganai dabua aukana ia karaia, bona torea gaudia ia abia tauna ese ia giroa mai, bona Lohiabada dekenai ia hereva, ia gwau, “Lohiabada e, oiemu oda hegeregerena lau karaia vadaeni.”   
\c 10  
\s1 Lohiabada ena hairaina be Dubu Helaga ia rakatania  
\p
\v 1 Vadaeni egu matana lau negea, bona lau itaia, kerubi edia ataiai be gau ta ia hedinaraia, sapairo nadi bamona, iena toana be terona ta bamona.  
\v 2 Dirava ese dabua aukana ia karaia tauna ia hamaoroa, ia gwau, “Kerubi edia henunai idia noho uili edia huanai do oi lao, bona oiemu imana ruaosi be gida hururuhururu dekena amo do oi hahonua, kerubi edia huanai, bona unai gida be hanua ena latanai do oi negea lao gabu idauidau dekenai.” Vadaeni lau ese unai tau lau itaia, idia dekenai ia raka lao.   
\p
\v 3 Kerubi be Dubu Helaga ena diho kahana dekenai idia gini, bona unai tau be edia gabu dekenai ia raka vareai neganai ori ta ese lalona dekenai ia noho ariara mai maguna ia hahonua.  
\v 4 Unai neganai Lohiabada ena hairaina be kerubi edia ataiai dekena amo ia daekau lao, bona Dubu ena raka vareai gabuna dekenai ia lao. Ori ta ese Dubu ia hahonua, bona Lohiabada ena hairaina ena diaridiari ese Dubu ena lalona ariara ibounai ia hahonua.  
\v 5 Kerubi edia hanidia edia regena be murimurina dekenai ia noho ariara mai edia maguna lalonai idia noho taunimanima idia kamonai diba. Una regena be Siahu Ibounai Dirava ena gadona, ia hereva neganai, ena regena bamona.   
\p
\v 6 Lohiabada ese unai dabua aukana ia karaia tauna ia oda henia, lahi be kerubi edia henunai uili edia huanai do ia abia neganai, unai tau be ia lao, uili ta ena badibadinai ia gini.  
\v 7 Vadaeni kerubi ta ese iena imana ia abia isi, kerubi edia huanai ia gabua noho lahi dekena amo gida haida ia abia, bona unai dabua aukana ia karaia tauna ena imana lalonai ia atoa. Unai tau ese ia abia, bona ia raka lao.  
\v 8 Unai kerubi ta ta edia hanidia edia henunai be gau ta ia noho, iena toana be taunimanima ta ena imana bamona.   
\p
\v 9 Lau itaia danu, uili be ibounai 4, bona idia be kerubi edia badibadinai, uili ta ta be kerubi ta ta edia badibadinai. Inai uili edia toadia be krusolito nadidia edia diaridiari bamona.  
\v 10 Idia 4 edia toadia danu be hegeregere, toadia be tamona, bona uili ta ta be mai ena uili ta danu ia lalonai.  
\v 11 Unai dainai uili idia heau lao, heau mai diba, kahana 4 dekenai, kerubi idia ura idia lao hegeregerena. Kahana ta idia ura lao noho neganai, kerubi ese edia vairadia idia giroa lasi.   
\p
\v 12 Kerubi edia tauanidia ibounai, edia dorudia, edia imadia, bona edia hanidia, bona edia uili danu, be mai edia matadia momo, matadia dekenai idia honu.  
\v 13 Lau kamonai, unai uili be idia gwauraidia, “Idia giroagiroa noho uili.”  
\v 14 Kerubi ta ta edia vairadia be 4, vaira ginigunana be kerubi ena vairana, vaira iharuana be tau ena vairana, vaira ihatoina be laiona ena vairana, bona vaira namba 4 be ugava manu ena vairana.   
\p
\v 15 Unai neganai kerubi be ataiai dekenai idia daekau, idia be unai mauri gaudia, Kebara Sinavai ena isena dekenai lau itaia guna gaudia.  
\v 16 Bona unai kerubi idia marere neganai, edia badibadinai idia noho uili danu idia marere noho. Vadaeni kerubi ese edia hanidia idia atoa maoromaoro, idia daekau ataiai neganai, uili danu be idia badibadinai idia daekau lao noho.  
\v 17 Kerubi be idia gini noho neganai, uili danu idia gini noho, bona kerubi be idia daekau lao neganai, uili danu idia daekau lao, badina be unai mauri gaudia edia laumadia ese uili idia biagua noho.   
\p
\v 18 Vadaeni Lohiabada ena hairaina be Dubu Helaga ena raka vareai gabuna ia rakatania, bona kerubi edia ataiai gabuna dekenai ia lao, ia noho.  
\v 19 Unai neganai kerubi ese edia hanidia idia atoa maoromaoro, bona lau itadia neganai, tanobada dekena amo idia roho daekau lao, bona uili be idia danu idia lao. Vadaeni idia be Lohiabada ena Dubu ena dina daekau kahana iduara dekenai idia lao, unuseni idia naria nega sisina, bona Israela ena Dirava ena hairaina be idia edia ataiai ia noho.   
\p
\v 20 Unai mauri gaudia, Israela ena Dirava ena henunai lau itaia guna gaudia, Kebara Sinavai ena isena dekenai, be lau diba idia be kerubi.  
\v 21 Idia ta ta edia vairadia be toadia 4, 4 dekena amo, bona edia hanidia danu be 4, 4 dekena amo, bona edia hanidia edia henunai be gau haida, edia toadia be taunimanima edia imadia bamona.  
\v 22 Edia vairadia edia toana be Kebara Sinavai ena isena dekenai lau itaia guna gaudia edia vairadia toana hegeregerena. Idia ta ta idia marere neganai idia be vaira kahana dekenai sibona idia lao.   
\c 11  
\s1 Dirava ese Israela ena lohia taudia ia gwau henia  
\p
\v 1 Vadaeni Dirava ena Lauma ese lau ia abia isi, Lohiabada ena Dubu ena dina ia daekau kahana iduara dekenai lau ia abia lao. Unuseni, iduara kahirakahira lau ese tau ibounai 25 lau itaia, bona idia edia huanai be Iasanaia Asuru bona Pelataia Benaia, bese lohia taudia lau itaia.   
\p
\v 2 Dirava ese lau ia hamaoroa, ia gwau, “Tanobada tauna e, inai taudia ese palani dikadia idia karaia noho, bona sisiba dikana danu inai hanua lalonai idia henia noho,  
\v 3 idia gwau, ‘Ita ese nega sisina lalonai ruma be do ita haginidia lou iniseni. Inai hanua be vamu nadua uro bamona, bona ita be vamu bamona.’  
\v 4 Unai dainai, tanobada tauna e, idia do oi gwau henia, bona peroveta hereva do oi gwauraia idia dekenai.”   
\p
\v 5 Vadaeni Lohiabada ena Lauma ese lau ia abia, bona ia ese lau ia hamaoroa, ia gwau, “Taunimanima be inai bamona do oi hamaorodia, do oi gwau, Lohiabada ese ia gwau: Israela taudia e, emui hereva bona umui laloa gaudia be lau diba noho.  
\v 6 Umui ese taunimanima momo herea inai hanua lalonai umui alaia mase vadaeni, bona hanua ariara gabudia be mase edia tauanidia dekenai idia honu vadaeni.   
\p
\v 7 “Unai dainai, lau Lohiabada Dirava ese umui dekenai lau hereva henia inai: Ierusalema hanua be momokani ia be vamu nadua urona, to vamu be dahaka? Vamu be umui ese umui alaia mase vadaeni taudia edia tauanidia. To umui be iniseni do umui noho lasi. Lau ese hanua ena murimurina dekenai umui do lau negea lao.”   
\p
\v 8 Ma Lohiabada Dirava ia gwau, “Umui be tuari kaia dekenai umui gari noho, a? Lau ese tuari taudia umui dekenai do lau mailaia, idia ese umui do idia tuari henia.  
\v 9 Hanua ena huanai dekena amo umui do lau hakaua lao, bona idau taudia edia siahu henunai umui do lau atoa. Lau ese umui do lau kota henia momokani.  
\v 10 Umui be emui tano Israela dekenai tuari dekenai do umui mase. Unai neganai do umui diba lau be Lohiabada.  
\v 11 Inai hanua ese umui do ia gimaia lasi, uro ese ia lalonai ia noho vamu ia gimaia bamona. Lasi momokani, badina lau ese emui dika davana umui dekenai do lau henia Israela tano lalonai.  
\v 12 Umui be do umui diba lau be Lohiabada, bona do umui diba umui ese idau bese taudia edia taravatu umui naria noho neganai umui ese egu taravatu umui makohia, bona egu oda umui kamonai henia lasi.”   
\p
\v 13 Vadaeni lau Esekiela ese inai peroveta hereva lau gwauraia noho neganai, Pelataia Benaia ia moru, ia mase momokani. Unai neganai tano dekenai lau moru, egu vairana be tano dekenai lau atoa, bona lau boiboi, lau gwau, “Lohiabada Dirava e, Israela do mauri noho taudia ibounai be do oi alaia mase ore, a?”   
\s1 Babulonia dekenai noho Israela taudia dekenai Dirava ia gwauhamata henidia  
\p
\v 14 Lohiabada ese lau dekenai ia hereva, ia gwau,  
\v 15 “Tanobada tauna e, Ierusalema dekenai noho taudia ese oi bona oiemu varavara Israela taudia, gabu daudau dekenai umui noho taudia idia herevalaia noho. Idia gwau, ‘Iseda varavara, Babulonia dekenai idia noho taudia be daudau idia noho dainai idia ese Lohiabada idia tomadiho henia lasi. Unai dainai Lohiabada ese Israela tano be ita dekenai ia henia vadaeni, iseda tano.’   
\p
\v 16 “Esekiela e, oiemu varavara Israela taudia, hesiai mai guia danu henunai idia noho taudia do oi hamaorodia lau Lohiabada ese idau bese taudia edia tano idauidau dekenai lau siaidia vadaeni, bona bese idauidau edia huanai lau luludia lao. To inai nega sisina unuseni idia noho neganai, lau be idia danu do lau noho, bona unai gabudia dekenai, lau dekenai idia guriguri diba.   
\p
\v 17 “Unai dainai idia do oi hamaoroa, lau Lohiabada Dirava ese inai bamona lau hereva noho, lau gwau: Bese idauidau edia huanai dekena amo do lau haboudia lou, bona lau ese Israela tano be idia dekenai do lau henia lou.   
\p
\v 18 “To Israela dekenai do idia giroa lou neganai, idia ese Israela ena kaivakuku gaudia, gau dika herea ibounai, bona ena kara dika rohorohodia ibounai be do idia abia siri ore momokani.  
\v 19 Bona idia ese edia lalodia do idia hatamonaia, bona unai neganai lauma matamata be idia edia lalodia dekenai do lau atoa. Vadaeni edia laloa auka be edia lalodia dekena amo do lau kokia, bona laloa manada idia dekenai do lau henia.  
\v 20 Vadaeni egu taravatu bona egu oda ibounai do idia kamonai henia. Bona idia ese egu bese taudia do idia lao, bona lau ese edia Dirava do lau lao.  
\v 21 To kaivakuku tomadiho kara bona kara dika rohorohodia karadia idia ura henia taudia be lau ese edia dika davana do lau henia. Lau Lohiabada Dirava inai, lau hereva vadaeni.”   
\s1 Dirava ena hairaina be Ierusalema ia rakatania  
\p
\v 22 Vadaeni kerubi ese edia hanidia idia abia isi, idia atoa maoromaoro, bona idia roho daekau lao. Edia uili danu be idia danu idia daekau lao, bona Israela ena Dirava ena hairaina be idia edia ataiai ia noho.  
\v 23 Unai neganai Lohiabada ena hairaina be hanua ena huanai dekena amo ia daekau lao, hanua ena dina daekau kahana dekenai ia noho ororo dekenai ia roho lao.   
\p
\v 24 Vadaeni egu mata hanai lalonai, Dirava ena Lauma ese lau ia abia isi, bona Babulonia dekenai lau ia abia mai lou, vadaeni egu varavara Israela taudia, mai guia danu taudia dekenai lau noho lou. Unai neganai egu mata hanai, nihi bamona gauna, ese lau ia rakatania.  
\v 25 Vadaeni unai neganai, Lohiabada ese lau dekenai ia hedinaraia gaudia ibounai, be lau ese unuseni idia noho guia taudia lau hamaoroa.   
\c 12  
\s1 Esekiela ese heau mauri tauna bamona ia lao  
\p
\v 1 Lohiabada ese lau dekenai ia hereva, ia gwau,  
\v 2 “Tanobada tauna e, oi ese kamonai lasi bona dagedage taudia edia huanai oi noho. Idia be mai edia matadia, to idia itaia lasi, bona mai edia taiadia, to idia kamonai lasi, badina idia be dagedage besena.   
\p
\v 3 “Unai dainai, tanobada tauna e, oiemu kohu bona gau, be daudau do oi lao ena laolao totona do oi abia hegaegae. Bona dina lalonai, gabu daudau dekenai do oi lao noho tauna hegeregerena, oiemu varavara Israela taudia edia vairana dekenai do oi raka lao, ia lao bona ma gabu ta dekenai. Unai dagedage besena taudia, be sedira oiemu kara do idia itaia neganai, edia lalodia do idia kehoa idia be kamonai lasi taudia.  
\v 4 Dina lalonai, oiemu laolao kohu be edia vairana dekenai do oi abia hegaegae, bona adorahi neganai, idia edia vairana dekenai do oi raka lao, daudau gabuna do oi noho totona tauna ena kara bamona.   
\p
\v 5 “Idia ese oi idia itaia noho neganai, oiemu ruma ena habana dekenai matu ta do oi geia, bona mai emu laolao kohu danu matu dekena amo haba do oi rau hanaia.  
\v 6 Bona unai taudia edia vairana dekenai, emu laolao kohu be emu pagana dekenai do oi abia isi, bona hanuaboi ena dibura neganai do oi huaia lao. Oiemu vairana be muko dekenai do oi koua, tano dekenai oi raka gabuna do oi itaia diba lasi totona. Inai bamona do oi karaia be toa ta do ia lao Israela taudia dekenai, inai kara ese idia do ia sisiba henia.”   
\p
\v 7 Vadaeni Lohiabada ese lau ia oda henia hegeregerena lau karaia. Unai dina dekenai lau ese egu laolao kohuna lau kumia hegaegae, bona adorahi neganai egu imana dekenai ruma ena habana dekenai matu lau karaia, bona dibura neganai unai matu dekenai lau rau hanaia lao murimurina dekenai. Vadaeni egu laolao kohuna be egu pagana dekenai lau huaia lao, Israela taudia edia vairana dekenai.   
\p
\v 8 Daba neganai Lohiabada ese lau ia hereva henia, ia gwau,  
\v 9 “Tanobada tauna e, unai Israela taudia, dagedage taudia, ese oi do idia nanadaia, oi karaia noho kara ena anina be dahaka.  
\v 10 Vadaeni idia do oi hamoaoroa, lau Lohiabada Dirava ese inai bamona lau hereva noho: ‘Inai hereva metauna be Ierusalema dekenai ia noho bese king tauna, bona unuseni idia noho Israela taudia ibounai totona.’  
\v 11 Idia do oi hamaoroa, oi ese oi karaia vadaeni gauna be toa ta idia dekenai, bona oi ese laolao totona oi karaia hegaegae, be idia danu ese laolao do idia lao, mai guia danu.   
\p
\v 12 “Idia edia king tauna ese hanuaboi ena dibura lalonai ena laolao kohuna be iena pagana dekenai do ia abia isi, bona do ia huaia lao. Iena taudia ese ruma ena habana dekenai matu do idia karaia, edia lohia do idia abia murimurina dekenai totona. Bona edia king idia naria taudia ese king ena matana do idia koua, vadaeni iena lao dalana bona tano do ia itaia lasi.   
\p
\v 13 “Lau ese egu reke be tarapu bamona king ena vairana dekenai do lau atoa, bona do lau abia. Unai neganai Babulonia hanua dekenai ia do lau abia lao. Unuseni do ia mase, to ia ese unai hanua do ia itaia lasi.  
\v 14 King ena hesiai taudia, iena durua taudia, bona iena tuari taudia ibounai, be lau ese do lau luludia lao gabu idauidau dekenai. Taunimanima ese idia alaia mase totona ibounai do idia tahua noho.   
\p
\v 15 “Vadaeni bese idauidau edia huanai do lau luludia lao, bona tano idauidau edia lalonai do lau atodia neganai, idia be do idia diba lau be Lohiabada.  
\v 16 Tuari bona hitolo bona gorere dekena amo idia haida do lau naria, vadaeni do idia mase lasi. Bona unuseni, bese idauidau edia huana dekenai, do idia diba edia kara be dika rohoroho. Vadaeni edia dika do idia gwauraia hedinarai, bona do idia diba lau be Lohiabada.”   
\s1 Peroveta tauna be mai gari dainai do ia heudeheude: Lohiabada ena toa ta  
\p
\v 17 Lohiabada ese lau dekenai ia hereva,  
\v 18 ia gwau, “Tanobada tauna e, oi aniani neganai do oi heudeheude, bona ranu oi inua neganai mai gari bada danu do oi inua.  
\v 19 Bona Israela taudia ibounai do oi hamaoroa, do oi gwau, ‘Lohiabada Dirava ese Ierusalema dekenai noho taudia, Israela tano lalonai do noho taudia inai bamona ia herevalaia, ia gwau: Idia ese aniani do idia ania, mai gari danu, bona ranu do idia inua mai heudeheude danu, badina be edia tano ena anina ibounai be bese ta ese do idia kokia ore momokani, Israela taudia edia kara dika bada dainai.  
\v 20 Hanua momo be harihari mai edia taunimanima momo, to unai hanua be bese ta taudia ese do idia hadikaia ore, bona tano ena kahana ibounai be anina lasi gabuna do idia halaoa. Unai neganai do idia diba lau be Lohiabada.’ ”   
\s1 Edia laloa kerere be Lohiabada ese do ia hamaoromaoroa  
\p
\v 21 Lohiabada ese lau dekenai ia hereva, ia gwau,  
\v 22 “Tanobada tauna e, Israela taudia be badina dahaka inai hereva idia gwauraia lou, gwauraia lou noho, idia gwau, ‘Nega daudau be ia lao vadaeni, to peroveta tauna ena hereva anina idia vara lasi?’  
\v 23 Esekiela e, unai taudia do oi hamaoroa, lau, Lohiabada Dirava ese unai bamona hereva do lau hadokoa. Israela dekenai do idia gwauraia lou lasi. To inai bamona idia do oi hamaoroa, do oi gwau: Nega be kahirakahira, peroveta hereva ibounai hamomokania negana be kahirakahira vadaeni.   
\p
\v 24 “Badina be mata hanai koikoidia bona peroveta koikoidia be Israela besena lalonai do idia doko.  
\v 25 Lau Lohiabada Dirava ese peroveta taudia dekenai do lau hereva henia, bona lau gwauraia gauna be do lau karaia momokani. Do lau karaia haraga, do lau naria kava lasi. Umui dagedage bese taudia e, emui nega lalonai lau ese lau sisiba henia do lau karaia gaudia be do lau karaia. Lau inai Lohiabada lau hereva vadaeni.”   
\p
\v 26 Lohiabada ese ma lau ia hereva henia, ia gwau,  
\v 27 “Tanobada tauna e, Israela taudia idia laloa oiemu mata hanai bona oiemu peroveta hereva be nega daudau gabeai do idia vara gaudia.  
\v 28 Unai dainai idia do oi hamaoroa, lau Lohiabada Dirava be inai bamona lau hereva noho: ‘Do lau naria nega daudau lasi, to lau gwauraia vadaeni hereva ena anina do lau havaraia momokani. Lau Lohiabada Dirava lau hereva vadaeni.’ ”   
\c 13  
\s1 Peroveta taudia koikoidia edia dika davana  
\p
\v 1 Lohiabada ese lau ia hereva henia, ia gwau,  
\v 2 “Tanobada tauna e, Israela ena peroveta koikoi taudia, idia sibona edia laloa idia peroveta taudia do oi gwau henia, do oi gwau, ‘Umui dika taudia e, Lohiabada ena hereva do umui kamonai.’ ”   
\p
\v 3 Lohiabada Dirava be inai bamona ia hereva noho, ia gwau: “Peroveta taudia kavakavadia, idia sibona edia laloa gaudia idia gwauraia noho, to gau ta idia itaia lasi taudia be do idia dika momokani!  
\v 4 Israela taudia e, inai emui peroveta taudia be uda sisiadia bamona, ruma dikadia edia huanai idia noho.  
\v 5 Magu idia makohia gabudia idia gimaia lasi, bona magu ia moru gabudia idia haginia lou lasi. Unai dainai Lohiabada ena dina ia ginidae, bona unai dina ena tuari ia vara neganai, Israela be do ia gini auka lasi.   
\p
\v 6 “Emui peroveta taudia edia mata hanai be momokani lasi, bona edia peroveta hereva be koikoi sibona. Idia gwau, ‘Lohiabada be inai bamona ia hereva,’ to lau ese idia lau siaia lasi. Ma idia laloa edia hereva gaudia be momokani do idia vara!  
\v 7 To lau Lohiabada ese idia lau hamaoroa inai: Umui itaia noho mata hanai be momokani lasi, bona emui peroveta hereva be koikoi. Umui gwau, ‘Lohiabada be inai bamona ia hereva,’ to lau ese umui dekenai lau hereva lasi.”   
\p
\v 8 Unai dainai Lohiabada Dirava be inai bamona peroveta taudia dekenai ia hereva noho: “Emui hereva be momokani lasi, bona emui mata hanai be koikoi dainai, lau ese umui do lau dagedage henia.  
\v 9 Lau Lohiabada Dirava ese umui peroveta taudia emui dika davana do lau henia, badina umui mata hanai koikoi, bona peroveta hereva momokani lasi umui gwauraia noho. Umui be egu bese taudia edia hebou badadia lalonai do umui vareai lasi, bona emui ladadia be Israela taudia korikori edia ladadia danu do idia torea lasi, bona umui ese emui tano Israela dekenai do umui giroa lou lasi. Unai neganai do umui diba lau be Lohiabada Dirava.   
\p
\v 10 “Badina umui peroveta koikoi taudia ese egu bese taudia umui hakaua kerere noho, umui gwau, ‘Maino ia noho,’ to maino be ia noho lasi. Bona badina be taunimanima ese magu goada lasi idia haginia neganai, umui peroveta kava taudia ese unai magu be peni kurokuro sibona dekenai umui dahua noho.  
\v 11 Lau Lohiabada ese umui peroveta kava taudia lau hamaoroa inai, taunimanima edia magu be do ia moru diho. Lau ese medu bada do lau siaia, bona aisi nadidia bamona medu danu do lau siaia diho, lai bada danu.  
\v 12 Vadaeni unai magu do ia moru, bona taunimanima do idia henanadai, do idia gwau, ‘Badina dahaka peni sibona dekenai umui dahua, pilasta goadana dekena amo bema umui karaia be namo.’ ”   
\p
\v 13 Vadaeni Lohiabada Dirava be inai bamona ia hereva noho: “Egu badu ena siahu bada dainai, lau ese lai guba goadana bona medu bada, bona aisi nadidia bamona medu danu do lau siaia, unai magu do lau hadikaia ore totona.  
\v 14 Umui ese peni kurokuro dekena amo umui penia maguna do lau hamakohia. Ia be do ia dika, bona iena badina nadi do idia hedinarai. Vadaeni magu be umui dekenai do ia moru, bona umui do ia alaia mase. Unai neganai do umui diba lau be Lohiabada.   
\p
\v 15 “Magu, bona ena manoka gabuna be peni kurokuro dekenai idia dahua taudia ese egu badu mai siahu bada ena mamina do idia abia momokani. Vadaeni umui dekenai do lau gwau, ‘Magu bona magu idia penia kava taudia be idia ore vadaeni.  
\v 16 Israela ena peroveta koikoi taudia be unai peni kava taudia hegeregerena, idia ese Ierusalema taudia idia hamaoroa maino do idia abia, to idia abia diba lasi momokani. Lau inai Lohiabada Dirava lau hereva vadaeni.’ ”   
\s1 Peroveta hahine koikoidia edia dika davana  
\p
\v 17 Lohiabada ia gwau, “Tanobada tauna e, oiemu bese taudia edia huanai idia noho hahine taudia, idia ese sibodia edia laloa dekenai peroveta hereva idia gwauraia, be do oi gwau henia.  
\v 18 Do oi gwau, ‘Lohiabada Dirava be inai bamona ia hereva, ia gwau:  
\p “ ‘ “Umui hahine taudia be dika momokani do umui davaria! Umui ese meamea totona imana ganadia umui turia, emui bese taudia edia. Bona kwarana kumia mukodia, meamea gaudia, danu umui turia noho, taunimanima ese edia kwaradia dekenai do idia atoa. Vadaeni umui gwau inai meamea gaudia edia siahu dekena amo, idia ese taunimanima haida edia noho mauri idia biagua diba. Umui ura egu bese taudia edia lauma hamauria, bona hamasea siahuna do umui abia. Bona inai siahu dekena amo, umui sibona emui namo do umui habadaia gwauraia.  
\v 19 Egu bese taudia edia vairana dekenai egu ladana umui hamiroa vadaeni, bali aniani sisina o beredi maragina sibona do umui abia totona. Umui ese kerere lasi dainai lau ura idia mauri taudia umui alaia mase noho, bona kerere dainai lau ura idia mase taudia umui hamauria noho. Inai bamona umui karaia, badina egu bese taudia, hereva koikoi dekenai idia kamonai taudia, be umui ese umui koidia.” ’ ”   
\p
\v 20 Unai dainai Lohiabada Dirava ese inai bamona ia hereva noho: “Kamonai, emui meamea ganadia, idia ese taunimanima edia mauri o edia mase idia havaraia gwauraia gaudia be lau badu henidia noho momokani. Emui imadia dekena amo do lau darea oho, bona egu bese taudia be emui siahu dekena amo do lau ruhaia bona hamauria.  
\v 21 Emui kwarana kumia mukodia be do lau veridia oho, bona emui siahu dekena amo egu bese taudia do idia heau mauri momokani. Unai neganai do umui diba lau be Lohiabada.   
\p
\v 22 “Umui emui hereva koikoi dekena amo, kara namo idia karaia noho taudia edia laloa umui hamanokaia noho. Lau ura lasi unai bamona taudia do umui hadikaia. Umui ese kara dika taudia edia lalodia umui hagoadaia noho, vadaeni edia kara dika do idia rakatania lasi. Bona unai dainai unai dika taudia ese mauri do idia davaria lasi.   
\p
\v 23 “Unai dainai, hari ia lao, do umui mata hanai koikoi lou lasi, bona peroveta hereva koikoi do umui gwauraia lou lasi. Lau ese emui siahu dekena amo egu bese taudia do lau hamauridia momokani. Vadaeni do umui diba lau be Lohiabada.”   
\c 14  
\s1 Dirava ese kaivakuku tomadiho henia kara ia gwau henia  
\p
\v 1 Israela ena lohia taudia haida be lau dekenai idia mai, Lohiabada ena ura do idia diba totona.  
\v 2 Vadaeni Lohiabada be lau dekenai ia hereva, ia gwau,  
\v 3 “Tanobada tauna e, inai taudia ese kaivakuku idia tomadiho henia, mai edia kudoudia ibounai danu, bona inai kaivakuku badinaia kara ese kara dika dekenai idia hakaudia noho. Oi laloa lau ese idia dekenai do lau haere, a?   
\p
\v 4 “To oi ese idia do oi hamaoroa, lau, Lohiabada Dirava ese inai bamona idia dekenai lau gwau: Bema Israela tauna ta ese kaivakuku be iena kudouna lalonai ia tomadiho henia noho, bona inai hekwakwanai kara ese kara dika dekenai ia hakaua, bona inai murinai ia ese peroveta tauna dekenai ia mai, lau sibona ese unai tauna do lau haere henia. Lau ese ia dekenai do lau karaia, iena kaivakuku edia momo hegeregerena.  
\v 5 Inai kaivakuku ese Israela taudia lau dekena amo idia veria vadaeni. To sedira inai egu haere dekena amo, lau ese idia do lau veria mai lou, vadaeni idia ese lau do idia badinaia lou.   
\p
\v 6 “Unai dainai, Esekiela e, Israela taudia dekenai egu hereva do oi hamaoroa, lau gwau, ‘Emui lalodia do umui giroa, emui kaivakuku do umui rakatania, bona emui kara dika rohoroho dekena amo do umui siri momokani!’   
\p
\v 7 “Bema Israela tauna ta, o idau tauna, Israela taudia edia huanai noho tauna ese lau ia rakatania, bona kaivakuku ia tomadiho henidia, bona mai inai iena mauri hekwakwanai gauna danu unai tauna be peroveta tauna dekenai do ia lao, egu ura do ia diba totona, lau Lohiabada, lau sibona do lau haere henia.  
\v 8 Lau ese egu vairana do lau ha-aukaia unai tau dekenai. Taunimanima edia vairana dekenai unai tau be toa ta do lau halaoa, iena ladana be hemarai gauna do lau halaoa, bona egu bese dekena amo ia do lau negea momokani. Unai neganai do umui diba lau be Lohiabada.   
\p
\v 9 “Bona bema koikoi ia kamonai dainai, peroveta tauna ta ese peroveta hereva ia gwauraia, unai anina be lau Lohiabada ese lau koia vadaeni. Vadaeni lau ese egu imana do lau abia isi, ia do lau hadikaia totona, bona egu bese Israela dekena amo unai tau do lau kokia ore.  
\v 10 Unai tau ruaosi ese dika davana do idia abia. Peroveta tauna bona peroveta tauna ia nanadaia tauna ruaosi edia davana be hegeregere.  
\v 11 Unai neganai Israela taudia be lau dekena amo do idia raka siri lou lasi, bona edia kara dika ibounai dekena amo idia sibona do idia hamiroa lou lasi. To idia be egu bese taudia do idia lao, bona lau be edia Dirava do lau lao. Lau inai Lohiabada Dirava be lau hereva vadaeni.”   
\s1 Noa, Daniela bona Iobu  
\p
\v 12 Lohiabada ese lau dekenai ma ia hereva, ia gwau,  
\v 13 “Tanobada tauna e, bema tano ta ese lau dekenai idia karaia gwauhamata idia badinaia lasi kara dekena amo lau dekenai idia kara dika neganai, lau ese egu imana do lau abia isi, bona unai tano ena aniani abia dalana do lau koua. Lau ese hitolo do lau havaraia, vadaeni unai tano ena taudia bona mauri gaudia do lau alaia mase.  
\v 14 Bona sedira bema inai tau toiosi, Noa, Daniela, bona Iobu be unai tano dekenai idia noho, to idia ese edia kara maoromaoro dainai haida do idia hamauria diba lasi. Idia sibona be do lau hamauria. Lau inai Lohiabada Dirava lau hereva vadaeni.   
\p
\v 15 “O uda dagedage gaudia be unai tano dekenai do lau siaia, taunimanima do idia alaia ore totona. Unai dainai unai tano dekenai taunimanima bona ubua gaudia do idia noho lasi, bona dagedage gaudia dainai tau ta ese unai tano do ia raka hanaia diba lasi.  
\v 16 Bona bema unai tau toiosi be unuseni idia noho, lau Dirava, Lohiabada, mauri ena Dirava, egu ladana dekenai lau gwauhamata, idia ese edia natudia danu do idia hamauria diba lasi, to idia sibona mo be do idia mauri diba, bona unai tano be anina lasi gabuna do ia lao.   
\p
\v 17 “O sedira lau ese unai tano dekenai tuari do lau mailaia, bona tuari gaudia ese taunimanima bona ubua gaudia danu do idia alaia ore.  
\v 18 Bona bema unai tau toiosi be unuseni idia noho, lau Dirava, Lohiabada, mauri ena Dirava, egu ladana dekenai lau gwauhamata, idia ese edia natudia danu do idia hamauria diba lasi, to idia sibona mo be idia mauri diba.   
\p
\v 19 “O bema hanaia gorere dikana be unai tano dekenai lau siaia, bona taunimanima momo, bona ubua gaudia momo do idia mase,  
\v 20 to bema Noa, Daniela bona Iobu be unuseni idia noho, lau Dirava, Lohiabada, mauri ena Dirava, egu ladana dekenai lau gwauhamata, idia ese edia natudia danu do idia hamauria diba lasi. To idia sibona mo be do idia mauri, edia kara maoromaoro dainai.”   
\p
\v 21 Lohiabada Dirava ese inai bamona ia hereva noho, ia gwau: “Lau ese matakani aukadia ibounai 4 Ierusalema ena latanai do lau atoa, tuari, hitolo, uda dagedage gaudia, bona hanaia gorere dikana, taunimanima bona ubua gaudia do lau alaia mase totona.  
\v 22 To Esekiela e, Ierusalema dekena amo haida be do idia mauri noho, bona idia ese edia natudia be oi dekenai Babulonia lalonai do idia mailaia neganai do oi itadia namonamo. Do oi itaia edia kara be dika momokani. Vadaeni do oi diba Ierusalema dekenai lau atoa matakani be maoro momokani.  
\v 23 Unai neganai do oi diba danu, Ierusalema dekenai lau karaia karadia ibounai be mai edia badina momokani.” Lohiabada Dirava ese ia hereva vadaeni.   
\c 15  
\s1 Ierusalema be vain auna dikana bamona  
\p
\v 1 Lohiabada ese lau dekenai ia hereva, ia gwau,  
\v 2 “Tanobada tauna e, vain auna ena namo ese au haida edia namo ia hereaia, a? Vain rigina ena namo ese uda auna ena rigina ena namo ia hereaia, a?  
\v 3 Gau namona ta be vain rigina dekena amo oi karaia diba, a? Vain rigina dekena amo ikoko idia karaia noho, bona unai ikoko dekenai gau ta idia taua dae diba, a? Lasi, ani?  
\v 4 Vain rigidia dekena amo lahi idia karaia. Ena rigi ena duduna duduna be lahi ese ia gabua ore, to iena huana be gida sibona dekenai ia lao murinai ia be mai ena gaukara, a?  
\v 5 Lasi momokani, ia do gabua lasi neganai ia be mai ena gaukara lasi, bona lahi ese ia gabua vadaeni, bona gida sibona ia lao neganai ia be anina lasi gauna, ani?”   
\p
\v 6 Unai dainai, Lohiabada Dirava ese inai bamona ia hereva, ia gwau: “Uda audia edia huanai dekena amo vain auna idia abia, bona lahi dekenai idia gabua hegeregerena, lau ese unai bamona danu Ierusalema taudia dekenai do lau karaia.  
\v 7 Lau ese idia edia dika davana do lau henia. Idia be lahi ta dekena amo idia heau mauri vadaeni, to lahi ma ta ese do ia gabudia ore. Idia edia dika davana do lau henia neganai, do umui diba lau be Lohiabada.  
\v 8 Idia ese lau dekenai kara momokani idia karaia lasi, unai dainai edia tano be anina lasi gabuna do lau halaoa.” Lohiabada Dirava ese ia hereva vadaeni.   
\c 16  
\s1 Ierusalema ese kara momokani ia karaia lasi  
\p
\v 1 Lohiabada ese lau dekenai ia hereva lou, ia gwau,  
\v 2 “Tanobada tauna e, Ierusalema hanua do oi gwau henia, iena kara dika rohoroho dainai.  
\v 3 Do oi gwau: Lohiabada Dirava ese Ierusalema dekenai inai bamona ia hereva, ia gwau: Oiemu hamatamaia bona oiemu vara be Kanana taudia edia tano dekenai. Oiemu tamana be Amoro tauna, bona oiemu sinana be Hiti hahine.  
\v 4 Oiemu vara be inai bamona: Oiemu vara dinana dekenai oiemu hudona, bogana varona be idia utua lasi, bona ranu dekenai oi idia huria lasi. Do oi goeva totona damena dekenai oiemu kopina idia dahua lasi. Bona dabua dekenai oi idia kumia lasi.  
\v 5 Lasi, tau ta ese oi ia bogahisihisi henia lasi, bona ta ese oi ia lalokau henia lasi. To oiemu vara dina dekenai uma tano ena latanai oi idia negea kava.   
\p
\v 6 “Unai neganai lau be unai gabu lau raka hanaia, bona oi lau itaia, oiemu rara lalonai oi hekure noho. Rara ese oi ia koua, to lau ese oi lau hamaoroa, lau gwau, ‘Do oi mauri.’  
\v 7 Lau ese oi lau naria namonamo, bona oi tubu daekau, tano ena ava goadana ta bamona. Oi tubu goada bona lata danu, bona kekeni badana oi lao. Oiemu rata edia toana be namo, bona oiemu huina be ia lata, to oi be kopina kavakava, dabua lasi.   
\p
\v 8 “Oiemu gabu lau raka hanaia lou neganai, lau ese oi lau itaia, oi be kekeni badana bona oi be sihari totona oi hegaegae vadaeni. Unai neganai oiemu kopina kavakava be egu dabua badana dekena amo lau koua, bona egu gwauhamata momokani oi dekenai lau henia. Io, lau ese headava ena gwauhamata taravatuna oi danu lau karaia, bona oi be egu adavana oi lao.” Lohiabada Dirava be ia hereva noho inai.   
\p
\v 9 “Vadaeni ranu lau abia, bona rara be oi dekena amo lau huria ore, bona olive dehoro be oiemu kopina dekenai lau dahua.  
\v 10 Dabua mai edia turia herahera namodia oi dekenai lau henia, boromakau kopina tamaka be oiemu aena dekenai lau atoa. Oiemu kwarana be dabua aukana dekenai lau kumia, bona davana bada kouti, dabua manokamanoka gauna be oi dekenai danu lau atoa.  
\v 11 Lau ese herahera nadi namodia oi dekenai lau atoa, imana gana gaudia bona ageva danu.   
\p
\v 12 “Rini namona ta be oiemu udubaubauna dekenai lau atoa, bona haida danu oiemu taiana dekenai. Korona ta mai ena hairaina danu be oiemu kwarana dekenai lau atoa.  
\v 13 Oi be mai oiemu golo bona siliva herahera gaudia, bona oiemu dabua be dabua aukadia namodia momokani, bona dabua manokamanokadia mai edia turia heraheradia. Oiemu aniani be paraoa namo herea, bona hani bona olive ena dehoro. Oiemu hairaina be ia bada lao noho, bona oi be kwini dagi oi abia.  
\v 14 Oiemu sivarai be bese idauidau edia huanai idia gwauraia loaloa, oiemu hairaina ia bada herea dainai, badina be lau ese inai hairai oi dekenai lau henia.” Lohiabada Dirava be ia hereva noho inai.   
\p
\v 15 “To oi ese oiemu hairaina dekenai oi abidadama henia, bona oiemu sivarai be bada dainai oi ese ariara hahine ena kara oi karaia. Oi be raka hanaia taudia danu oi mahuta hebou.   
\p
\v 16 “Oiemu dabua haida oi abia, bona ataiai tomadiho gabudia edia boubou patadia edia latanai oi atodia, bona unai dabua edia latanai sihari kava karadia oi karaia. Unai bamona kara be dika momokani, nega gunadia dekenai idia vara lasi, bona gabeai danu do idia vara lou lasi.  
\v 17 Oiemu herahera gaudia danu, oi dekenai lau henia golo bona siliva gaudia oi abia, bona idia dekena amo tau edia laulaudia oi karaia, bona idia danu lebulebu karadia oi karaia.  
\v 18 Oiemu dabua mai heraheradia oi abia, unai laulau edia latanai oi atodia, bona oi dekenai lau henia dehoro bona muramura mai bonana namo be unai laulau edia vairanai oi atodia.  
\v 19 Lau ese aniani namona, paraoa namo herea, olive ena dehoro, bona hani oi dekenai lau henia, to oi ese unai dirava laulaudia dekenai boubou gaudia totona oi henidia.” Lohiabada Dirava ia hereva noho inai.   
\p
\v 20 “Unai neganai oi ese lau dekena amo oi havaraia natuna taudia bona hahinedia oi abia, bona boubou gaudia totona oiemu dirava dekenai oi henidia. Oiemu ariara karadia edia dika be hegeregere lasi, a?  
\v 21 Unai dainai oi ese ma inai dika danu oi karaia - oi ese egu natuna taudia oi alaia mase, bona gabua bouboudia oi halaodia, dirava koikoidia totona.  
\v 22 Oiemu kara dika rohorohodia bona oiemu ariara karadia ibounai oi karaia neganai, oi be oiemu maragi negana oi laloa lasi. Oi be dabua lasi neganai, bona oiemu rarana lalonai oi hekure negana, be nega ta oi laloa lasi.”   
\s1 Ierusalema be ariara hahine bamona  
\p
\v 23 Lohiabada Dirava ia gwau, “Ierusalema e, oi ese dika do oi davaria momokani! Oi ese unai kara dika ibounai oi karaia.  
\v 24 Bona unai murinai oiemu palai ruma, ariara ena kara dika karaia totona gauna, bona dirava koikoi tomadiho henia gabuna, be taunimanima haboua gabudia ibounai dekenai oi haginidia.  
\v 25 Hanua ena ariara ibounai edia dokona gabudia ibounai dekenai dirava koikoi tomadiho henia gabuna ena pata helagana oi haginia, bona unuseni oiemu hairaina oi hamiroa momokani lebulebu karadia dekenai. Raka hanaia taudia ibounai dekenai oiemu tauanina oi hoia lao, bona oiemu ariara ena kara dikadia be oi habadaia lao.  
\v 26 Oiemu badibadinai noho besena, Aigupito taudia, matabodaga taudia danu, lebulebu karadia oi karaia, bona oiemu ariara ena kara dika oi habadaia, lau do oi habadua totona.   
\p
\v 27 “Unai dainai lau ese egu imana lau abia isi, oi do lau hadikaia totona. Lau ese oiemu tano lau hamaragia, bona Pilistia taudia edia siahu henunai oi lau atoa. Idia ese oiemu lebulebu karadia dekenai idia hoa bada, mai badu danu.   
\p
\v 28 “Unai tau momo danu oi karaia lebulebu karadia ena mamina be hegeregere lasi oi dekenai dainai, oi ese Asuria taudia oi tahua, bona idia danu ariara ena kara dika umui karaia. To idia danu be hegeregere lasi oi dekenai, badina oiemu matabodaga be bada herea.  
\v 29 Vadaeni oiemu lebulebu karadia oi habadaia, bona Babulonia taudia danu sihari kava karadia oi karaia, unai hoihoi momo karaia gabuna dekenai, to idia danu be hegeregere lasi oi dekenai.”   
\p
\v 30 Lohiabada Dirava ia hereva noho inai: “Oiemu matabodaga be bada herea dainai inai karadia oi karaia, ariara hahine ena hemarai lasi karadia.  
\v 31 Hanua ena ariara ibounai edia dokona gabudia dekenai emu palai ruma oi haginidia, bona taunimanima haboua gabudia ibounai dekenai emu tomadiho gabudia oi karaia. To oi be ariara hahine korikori hegeregerena lasi, badina oi ese inai kara be moni abia totona oi karaia lasi.   
\p
\v 32 “Oi be heudahanai hahine! Badina oi be idau taudia danu oi sihari noho, to oiemu adavana oi sihari henia lasi.  
\v 33 Ariara hahine idia sihari henia taudia ese unai hahine ena davana, harihari gauna idia henia, to oi ese oi ura henia taudia ibounai dekenai harihari gaudia oi henia, inai dekena amo edia lalodia oi veria, kahana idauidau ibounai dekena amo do idia mai, oi danu do idia mahuta hebou totona.  
\v 34 Unai dainai, oiemu ariara karadia dekenai oi be idau, ariara hahine haida bamona lasi. Tau ta ese oi ia noia lasi ia danu do oi mahuta hebou, to ia do oi abia totona davana oi henia. To ia ese davana oi dekenai ia henia lasi. Unai dainai oi be idau momokani.”   
\s1 Dirava ese Ierusalema ena dika davana do ia henia  
\p
\v 35 “Unai dainai, ariara hahine e, Lohiabada ena hereva do oi kamonai!  
\v 36 Lau Dirava, Lohiabada, be inai bamona lau hereva, lau gwau: Oi ese oiemu dabua oi kokia, oiemu kopina kavakava oi hedinaraia, bona ariara hahine hegeregerena, oi ura henia taudia danu oi sihari, oiemu kaivakuku danu oi tomadiho henidia, bona oiemu natuna be boubou totona oi aladia mase dainai, davana oi dekenai do lau henia.  
\v 37 Lau ese oi idia ura henia taudia ibounai, idia danu lebulebu karadia oi karaia guna taudia, oi ura henia taudia bona oi badu henia taudia ibounai be do lau haboua mai. Idia ese oi do idia gini hagegea, vadaeni idia edia vairana dekenai oiemu dabua do lau kokia, vadaeni oiemu kopina kavakava do idia itaia.  
\v 38 Unai neganai lau ese oi dekenai egu kota hereva do lau gwauraia. Oi ese heudahanai bona alaia kara oi karaia dainai, oiemu davana mase do lau gwauraia. Rara oi habubua dainai, lau ese oiemu rarana danu do lau habubua, egu badu mai siahuna bona mai mama danu dainai.   
\p
\v 39 “Oi idia ura henia guna taudia edia siahu henunai oi do lau atoa. Idia ese oiemu palai rumadia do idia veria diho, bona oiemu tomadiho gabudia do idia hamakohia. Idia ese oiemu dabua do idia kokia, oiemu herahera nadidia namodia do idia abia, bona kopina kavakava oi do idia rakatania.  
\v 40 Unai neganai tuari orea ta do idia mailaia, oi do idia hadikaia totona. Idia ese nadi dekenai oi do idia hodoa, bona edia tuari kaia dekena amo oi do idia utua maragimaragi.  
\v 41 Oiemu ruma do idia gabudia ore, bona oiemu dika ena davana oi dekenai do idia henia, hahine momo edia vairana dekenai. Oiemu ariara karadia do lau hadokoa, bona oi ura henia taudia dekenai harihari gaudia oi henia kara danu be do lau hadokoa momokani.  
\v 42 Unai neganai egu badu mai siahu bada do ia keru, bona egu mama oi dekenai do lau rakatania. Do lau badu lou lasi.   
\p
\v 43 “To guna, lau ese emu dika davana do lau henia. Oi ese oiemu eregabe neganai oi lau durua karadia oi laloatao lasi, bona oiemu kara dika dekena amo lau oi habadua dainai, lau ese davana oi dekenai do lau henia.  
\p “To, oiemu kara dika rohoroho ibounai edia latanai, badina dahaka matabodaga karadia ma oi atoa kau? Lau, Lohiabada Dirava be lau hereva noho.”   
\s1 Sinana ena kara be natuna kekeni ese danu ia karaia  
\p
\v 44 Lohiabada ia gwau, “Ierusalema e, taunimanima ese oi do idia herevalaia, do idia gwau, ‘Sinana ena kara be natuna kekeni ese danu ia karaia.’  
\v 45 Badina be oiemu sinana ese iena adavana bona iena natuna ia ura henia lasi momokani, bona oi danu be inai bamona. Bona oi be oiemu tadikakana bamona danu, badina idia danu ese edia adavadia bona natudia idia ura henidia lasi. Oiemu sinana be Hiti hahine, bona oiemu tamana be Amoro tauna.   
\p
\v 46 “Oiemu kakana be Samaria, mai ena natuna hahine danu, oiemu mirigini kahana dekenai idia noho. Bona oiemu tadina be Sodoma, ia be iena natuna hahine danu idia noho, oiemu diho kahana dekenai.  
\v 47 Oi ese edia dala dekenai oi raka, bona edia kara dika rohorohodia oi karaia. To oi dekenai inai kara dika be hegeregere, a? Lasi momokani, nega daudau lasi lalonai, oiemu kara mirodia ese edia kara mirodia idia hanaia, oiemu dala ibounai lalonai.”   
\p
\v 48 Lohiabada Dirava ia gwau, “Lau, mauri ena Dirava lau hereva momokani inai: Oiemu tadina Sodoma bona iena natuna hahine edia kara be dika, to oiemu kara be dika herea momokani.  
\v 49 Oiemu tadina Sodoma ena kerere be inai: Ia bona iena natuna danu idia hekokoroku, idia aniani bada, idia boga kunu, bona idia noho namonamo mai edia kohu momo. To idia ese ogogami taudia bona gau lasi taudia idia durua lasi.  
\v 50 Idia be idia hekokoroku, kara dika rohorohodia be egu vairana dekenai idia karaia. Unai dainai lau ese idia lau hadikaia ore, inai be oi diba vadaeni.   
\p
\v 51 “Samaria ena kara dika be sisina ia bada, to Ierusalema e, oiemu kara dika be ia bada herea. Oiemu kara dika rohorohodia ese Samaria ena kara dika rohorohodia idia hanaia vadaeni. Inai oiemu kara dika rohorohodia ibounai dainai oiemu tadikakana edia toana be kara maoromaoro hahine edia toana bamona. Unai dainai oiemu hemarai do oi huaia.  
\v 52 Oi laloa oiemu tadikakana ese hemarai bada do idia davaria be namo. To oiemu dika ese idia edia dika ia hanaia momokani dainai, oi ese oiemu hemarai bada do oi huaia auka momokani. Badina be oiemu dika bada herea dainai, oiemu tadikakana edia toana be kara maoromaoro hahine edia toana bamona.”   
\s1 Sodoma bona Samaria be Dirava ese do ia hanamoa lou  
\p
\v 53 Lohiabada ese Ierusalema ia hamaoroa, ia gwau, “Lau ese Sodoma mai ena natuna hahinedia danu edia noho namo do lau henia lou. Bona Samaria mai ena natuna hahinedia danu edia noho namo danu do lau henia lou. Bona unai dina dekenai oi Ierusalema oiemu noho namo danu do lau henia lou, Sodoma bona Samaria edia huanai.  
\v 54 Unai neganai oi ese oiemu hemarai, do oi huaia noho, bona emu kara ibounai dainai do oi hemarai bona unai dekena amo oiemu tadikakana edia lalodia do oi hagoadaia, oiemu hisihisi ese edia hisihisi ia hanaia dainai.   
\p
\v 55 “To oiemu tadina Sodoma bona ena natuna hahinedia danu ese edia noho namo gunana dekenai do idia giroa lou, bona oiemu kakana Samaria bona iena natuna hahinedia ese edia noho namo gunana dekenai do idia giroa lou. Bona oi Ierusalema mai oiemu natuna hahinedia danu ese emui noho namo gunana dekenai do umui giroa lou.  
\v 56 Oiemu hekokoroku dinadia neganai oi ese Sodoma totona oi hevaseha momo, ani?  
\v 57 Unai be oiemu dika idia hedinaraia lasi neganai, ani? To harihari oi be Sodoma hegeregerena, bona Edoma taudia ese oi dekenai idia hevaseha noho. Pilistia taudia bona oi kahirakahira idia noho idau bese taudia, oi idia badu henia taudia ese oi idia kirikirilaia noho.  
\v 58 To oiemu lebulebu bona oiemu kara dika rohorohodia edia davana metauna do oi huaia noho.” Lohiabada ese ia hereva vadaeni.   
\s1 Gwauhamata taravatuna, noho hanaihanai gauna  
\p
\v 59 Lohiabada Dirava ia gwau, “Ierusalema e, oiemu kara hegeregerena be lau ese oi dekenai davana do lau henia. Badina be oi ese hereva helagana oi negea vadaeni, bona gwauhamata taravatuna oi makohia vadaeni.  
\v 60 To egu gwauhamata taravatuna, oiemu eregabe neganai oi danu ita karaia gauna, be do lau laloatao, bona oi danu be noho hanaihanai gwauhamata taravatuna do ita karaia, do ita haginia goada.  
\v 61 Unai neganai oiemu kara dika do oi laloatao, bona oiemu tadina bona kakana be oi dekenai do lau henia, oiemu natuna do lau halaodia neganai, oi be do oi hemarai, badina idia lau henia karana be iseda gwauhamata taravatuna sibona lasi gauna, to ma gau haida danu.   
\p
\v 62 “Iseda gwauhamata taravatuna do lau haginia goada, bona do oi diba lau be Lohiabada.  
\v 63 Lau ese oiemu kara dika ibounai do lau gwauatao, to oi ese unai dika do oi laloatao, bona oi be do oi hemarai bada dainai, oiemu uduna do oi kehoa lou lasi.” Lohiabada Dirava ia hereva vadaeni.   
\c 17  
\s1 Parabole: Ugava manu rua bona vain auna ta  
\p
\v 1 Lohiabada be lau dekenai ia hereva, ia gwau,  
\v 2 “Tanobada tauna e, Israela taudia dekenai parabole ta do oi gwauraia,  
\v 3 do oi gwau: Lohiabada Dirava be inai bamona ia hereva noho: Ugava manu ta mai ena hanina badadia, apena latadia, bona huina edia kala idauidau, be Lebanona dekenai ia mai.  
\v 4 Ia ese sida auna ta ena ataiai momokani rigina ia hamakohia, ia abia lao, hoihoi ena basileia ta dekenai ia huaia lao, bona hoihoi taudia edia hanua dekenai ia hadoa.   
\p
\v 5 “Vadaeni unai ugava manu ese Israela tano ena uhena ta ia abia, tano namona lalonai ia hadoa, ranu momo gabuna dekenai.  
\v 6 Vadaeni uhena ia tubu, vain auna ia lao, mai ena rigi bona raurau namodia. Iena rigi be ataiai idia tubu lao lasi, to idia be henunai, tano kahirakahira idia vara lata lao. Vain ena rigi be ugava manu ia noho kahana dekenai idia tubu lao, bona iena ramuna be ugava manu ena gabu henunai idia vara lao.   
\p
\v 7 “To ugava manu ma ta ia mai, iena hanina be bada herea, bona iena huina be momo. Vadaeni unai vain namona ese iena ramuna bona iena rigina be unai ugava iharuana ia noho kahana dekenai ia hatubua lao, ugava iharuana ese ranu do ia henia totona.  
\v 8 To unai vain be ugava ginigunana ese tano namona lalonai ia hadoa vadaeni guna, ranu momo gabuna dekenai, vain namo herea momokani, mai ena raurau namodia bona huahua namodia do ia lao totona.   
\p
\v 9 “Vadaeni, lau Lohiabada Dirava ese lau henanadai, lau gwau, ‘Inai vain be do ia mauri noho, bona do ia tubu noho, a? Lasi, badina ugava ginigunana be do ia badu, ani? Vadaeni ia ese unai vain be tano dekena amo do ia veria daekau momokani, ani? Ia ese vain ena huahua do ia kokia, bona iena rigina do ia hamakohia, ani? Vadaeni vain ena raurau do idia kaukau, ani? Unai vain tano dekena amo kokia karana be auka lasi, taunimanima momo lasi idia karaia diba, unai dainai unai ugava badana ese ia karaia haraga.  
\v 10 To bema idia hadoa hanai neganai, do ia tubu namonamo, a? Laurabada be ia dekenai do ia toa neganai, vain be do ia kaukau lasi, a? Ia tubu noho gabuna dekenai do ia mase lasi, a?’ ”   
\s1 Parabole ena anina be Lohiabada ese ia gwauraia  
\p
\v 11 Lohiabada ese lau dekenai ia hereva, ia gwau,  
\v 12 “Harihari unai dagedage besena taudia do oi hamaoroa, do oi gwau, ‘Inai parabole ena anina be umui diba lasi, a?’  
\p “Vadaeni inai bamona idia do oi hamaoroa: Kamonai, Babulonia ena king be Ierusalema dekenai ia mai, ia ese Iuda ena king bona iena lohia taudia ia abidia lao Babulonia dekenai.  
\v 13 Babulonia ena king ese Iuda ena king ena varavara tauna ta ia abia, Iuda ena king dagi ia henia, bona ia danu gwauhamata taravatuna ia karaia. Bona Babulonia ena king ese unai king matamata ia taravatua, gwauhamata helagana do ia gwauraia, unai gwauhamata taravatuna do ia makohia lasi.  
\v 14 Babulonia ena king ese Iuda lohia taudia danu ia abia lao, Iuda basileia be do ia manau, do ia hekokoroku lasi, bona Babulonia danu idia karaia gwauhamata taravatuna be Iuda taudia ese do idia badinaia totona.  
\v 15 To Iuda ena king ese ia dagedage henia, bona hesiai taudia Aigupito dekenai ia siaidia lao, idia ese hosi momo bona tuari taudia momo do idia henia totona. To Iuda ena king do ia kwalimu diba, a? Unai bamona ia karaia noho tauna be iena dika dekena amo ia heau mauri diba, a? Gwauhamata taravatuna do ia hamakohia, bona do ia heau mauri diba, a?   
\p
\v 16 “Lau, mauri ena Dirava, egu ladana dekenai lau gwauhamata inai, unai Iuda ena king be Babulonia dekenai do ia mase. Inai iena mase ena badina be, Babulonia ena king ese king dagi ia henia, to iena gwauhamata helagana, bona Babulonia ena king danu ia karaia gwauhamata taravatuna ia hamakohia dainai.  
\v 17 Farao, Aigupito ena king, ena tuari orea mai ena goada danu, bona iena durua orea ibounai ese Iuda do idia durua diba lasi, badina Babulonia taudia ese tano do ia haboua bada herea, bona Ierusalema do idia koua hagegea momokani, taunimanima momo do idia alaia mase totona.   
\p
\v 18 “Io, Iuda ena king ese iena gwauhamata helagana ia utua, bona gwauhamata taravatuna danu ia hamakohia. Inai kara ibounai ia karaia dainai ia be do ia heau mauri lasi momokani.”   
\p
\v 19 Lohiabada Dirava ia gwau, “Lau, mauri ena Dirava, egu ladana dekenai lau gwauhamata inai, egu gwauhamata helagana, ia negea gauna, bona egu gwauhamata taravatuna, ia utua gauna, ena davana be Iuda ena king dekenai do lau henia.  
\v 20 Lau ese egu reke be iena latanai do lau negea lao, bona reke ena varodia ese ia do idia dogoatao. Vadaeni lau ese Babulonia dekenai ia do lau abia lao. Unuseni lau dekenai ia karaia koikoi karana dainai do lau kota henia momokani.  
\v 21 Iena tuari taudia goadadia ibounai be tuari lalonai do idia mase, bona heau mauri taudia be lai ena kahana ibounai dekenai do idia luludia lao. Unai neganai do umui diba lau inai Lohiabada lau hereva vadaeni.”   
\s1 Parabole: Sida auna  
\p
\v 22 Lohiabada Dirava ese inai bamona ia hereva: “Lau sibona ese sida auna ena ataiai dekena amo rigi matamata ta do lau abia, vadaeni do lau hadoa. Unai rigi ena ataiai dekena amo rigi maragina bona manokamanokana ta do lau abia, bona lau sibona be ororo bada herea bona lata herea ena ataiai do lau hadoa.  
\v 23 Israela ena ororo ena ataiai do lau hadoa, iena rigina do idia tubu bona iena huahuana be do ia atoa, bona sida auna namo herea do lau halaoa. Vadaeni iena henunai be mauri gaudia idauidau do idia noho. Bona iena ikerukeru lalonai ataiai manu idauidau ese edia ruma do idia karaia.  
\v 24 Vadaeni hanua ena murimurinai idia noho audia ibounai be do idia diba lau Lohiabada ese au latana be lau hakwadogia noho, au namona be lau hakaukaua noho, bona au masena be lau ese lau hamauria noho. Lau Lohiabada lau hereva vadaeni, bona unai karana do lau karaia.”   
\c 18  
\s1 Dirava ese taunimanima ibounai ta ta edia kara ia itaia noho  
\p
\v 1 Lohiabada ese lau dekenai ia hereva,  
\v 2 ia gwau, “Inai hereva gunana ta Israela tano dekenai idia gwauraia lou, gwauraia lou, be dahaka? Idia gwau,  
\q1 ‘Tamana taudia ese vain huahua,  
\q1 kasiri gaudia idia ania vadaeni,  
\q1 bona edia natudia ese unai huahua edia mamina dikana idia abia.’ ”   
\p
\v 3 Lohiabada Dirava ia gwau, “Lau be lau mauri noho Diravana, bona lau hereva momokani umui dekenai, inai hereva gunana do umui gwauraia lou lasi Israela dekenai.  
\v 4 Kamonai! Taunimanima ibounai ta ta be lauegu, tamana taudia ibounai edia mauri, natuna ibounai edia mauri danu be lauegu sibona. Unai dainai bema tau ta ia kara dika neganai, unai tau sibona be do ia mase.   
\p
\v 5 “Sedira tau namona ta, iena kara be maoromaoro momokani ia noho.  
\v 6 Inai tau ese Israela taudia edia dirava koikoidia ia tomadiho henidia lasi. Ia ese kaivakuku dekenai idia henia boubou totona aniani ia ania lasi. Ia ese ia badibadinai ia noho tauna ena adavana ia sihari henia lasi, bona ia ese mai ena hua gorere hahine ta ia sihari henia lasi.  
\v 7 Ia ese tau ta ia koia lasi, bona tau ta ena kohu ia henaoa lasi. Bema tau ta ese ia dekena amo ia abiatorehai neganai, ia ese unai abiatorehai ena toana gauna ia henia lou. Ia ese hitolo taudia dekenai aniani ia henia, bona dabua lasi taudia dekenai dabua ia henia.  
\v 8 Bema tau ta ese ia dekena amo ia abiatorehai bona ia henia lou, vadaeni inai tau namona ese atoa kau moni ia abia lasi. Bema ia ese kota ia naria neganai, iena kota be mai maoromaoro bona momokani danu. Ia ese kara dika dekena amo ia raka siri noho.  
\v 9 Inai tau namona ese lauegu taravatu ia badinaia noho, bona lauegu oda ia kamonai henia noho. Oibe, ia be maoromaoro momokani dainai mauri do ia davaria. Lau, Lohiabada Dirava, lau hereva inai.   
\p
\v 10 “Vadaeni, sedira unai tau namona be mai ena natuna mero, bona ia bada neganai taunimanima edia kohu ia henaoa, bona taunimanima ia alaia, ma kara dikadia,  
\v 11 iena tamana ese ia karaia lasi gaudia ia karaia. Momokani inai mero be do ia mase. Ia ese dirava koikoi dekenai idia henia aniani gaudia ia ania, bona tau haida edia adavana ia sihari henidia noho.  
\v 12 Ia ese ogogami taudia ia hisihisi henia, bona kohu ia henaoa noho. Bona bema tau ta ese ia dekena amo ia abiatorehai neganai ia ese abiatorehai ena toana ia henia lou lasi. Ma inai tau namona ena natuna ese dirava koikoi ia tomadiho henidia noho, bona edia dubu dekenai kara dikadia badadia ia karaia.  
\v 13 Bona bema ia dekena amo ia abiatorehai tauna ese iena abiatorehai ia henia lou neganai, unai tau namona ena natuna dikana ese atoa kau moni danu ia abia.  
\p “Inai bamona ia karaia noho tauna be do ia mauri, a? Lasi momokani. Ia ese unai kara dikadia ibounai ia karaia vadaeni, unai dainai ia be do ia mase. Bona iena mase be sibona ena kerere dainai.   
\p
\v 14 “To sedira inai tau iharuana be mai ena natuna mero, bona ia bada neganai, ia ese iena tamana ena kara dika ia itaia. Ia itaia, to ia ese iena tamana ena kara bamona ia karaia lasi. Ia be do ia mase lasi.  
\v 15 Badina inai tau ese dirava koikoi, Israela taudia edia, ia tomadiho henidia lasi. Boubou gaudia, dirava koikoi dekenai idia henia aniani gaudia, be ia ese ia ania lasi. Ia ese tau ta ena adavana ia sihari henia lasi.  
\v 16 Ia ese tau ta dekenai ia dagedage lasi, bona tau ta dekena amo ia henaoa lasi. Bema tau ta ese abiatorehai toana gauna ia henia neganai, ia ese ia henia lou. Ia ese hitolo taudia dekenai aniani ia henia, bona dabua lasi taudia dekenai dabua ia henia.  
\v 17 Ia ese kara dika dekena amo ia raka siri momokani, bona atoa kau moni ia abia lasi, abiatorehai dekena amo. Ia ese lauegu taravatu ia badinaia noho, bona lauegu oda ia kamonai henia noho.  
\p “Ia be iena tamana ena kara dika dainai do ia mase, a? Lasi momokani. Ia be do ia mauri.   
\p
\v 18 “To momokani, iena tamana ese ia koikoi, ia henaoa, bona nega ibounai taunimanima ibounai dekenai ia kara dika. Unai dainai ia mase, bona iena mase be sibona ia karaia kara dikadia dainai.   
\p
\v 19 “To sedira umui henanadai, umui gwau, ‘Badina dahaka do ia hisihisi lasi iena tamana ena kara dika dainai?’ Vadaeni umui emui henanadai lau haere henia inai: Bema unai natuna ese kara maoromaoro ia karaia neganai, bona lauegu taravatu ibounai ia badinaia neganai, ia be do ia mauri momokani.   
\p
\v 20 “Kara dika ia karaia tauna, ia sibona be do ia mase. Natuna be do ia hisihisi lasi iena tamana ena kara dika dainai. Bona tamana be do ia hisihisi lasi iena natuna ena kara dika dainai. Kara maoromaoro tauna ese iena kara maoromaoro dainai davana namona do ia abia. Bona kara dika tauna ese iena kara dika dainai davana dikana do ia davaria.   
\p
\v 21 “To bema tau dikana ese iena kara dika do ia rakatania, bona lauegu taravatu ibounai ia badinaia, bona kara maoromaoro sibona do ia karaia, unai tau be do ia mase lasi. Ia be do ia mauri momokani.  
\v 22 Iena kara dika ibounai be do lau gwauatao, bona do ia mauri, badina be kara maoromaoro ia karaia.  
\v 23 Lau Lohiabada Dirava, lau ura umui lau nanadaia, umui laloa lau be lau moale bema tau dikana ta ia mase, a? Lasi momokani. To lau be do lau moale, bema tau ta ese iena kara dika do ia rakatania, bona mauri ia davaria.   
\p
\v 24 “To bema kara maoromaoro tauna ta ese iena kara maoromaoro ia rakatania, bona kara dikadia momokani idauidau, tau dikadia idia karaia noho gaudia, ia karaia neganai, ia be do ia mauri noho, a? Lasi. Iena kara namodia ibounai be Kota Badana lalonai do idia laloaboio momokani, bona iena koikoi kara bona iena kara dika dainai ia be do ia mase.   
\p
\v 25 “To sedira, do umui gwau, ‘Lohiabada ese ia karaia gauna be maoro lasi.’ Vadaeni umui Israela taudia e, lauegu hereva do umui kamonai: Umui laloa lauegu kara be maoro lasi, a? Umui lau hamaoroa inai: Umui emui kara ena dala be maoro lasi.   
\p
\v 26 “Bema kara maoromaoro tauna ta ese iena kara maoromaoro ia rakatania, bona kara dika ia karaia neganai, ia be do ia mase. Kara dika ia karaia dainai ia be do ia mase.   
\p
\v 27 “To bema kara dika tauna ese iena kara dika ia rakatania, vadaeni kara maoromaoro bona kara namodia ia karaia neganai, ia be do ia mauri.  
\v 28 Ia ese iena kara dikadia ibounai do ia laloa, bona idia dekena amo do ia raka siri. Unai dainai ia be do ia mase lasi, to do ia mauri momokani.  
\v 29 To umui Israela taudia ese inai bamona umui hereva noho, umui gwau, ‘Lohiabada ese ia karaia noho gauna be maoro lasi.’ Umui laloa lauegu dala be maoro lasi, a? Umui lau hamaoroa inai: Umui emui dala be maoro lasi.   
\p
\v 30 “Bona hari lau Lohiabada Dirava ese umui Israela taudia lau hamaoroa inai: Lau ese umui ta ta ibounai do lau kota henia. Umui emui kara dika do umui rakatania, emui kara dika ese umui do idia hadikaia ore garina.   
\p
\v 31 “Emui kara dika do umui hadokoa momokani, vadaeni laloa matamata, bona lauma matamata do umui abia. Umui mase ena anina be dahaka? Israela besena e, egu hereva do umui kamonai.   
\p
\v 32 “Badina be lau ese tau ta ena mase lau moalelaia lasi. Unai dainai umui emui lalona do umui giroa, vadaeni do umui mauri. Lau, Lohiabada Dirava lau hereva inai.”   
\c 19  
\s1 Lalohisihisi ane ta Israela ena king natuna totona  
\p
\v 1 Dirava ese lau ia hamaoroa inai lalohisihisi ane be Israela ena king natuna taudia rua totona do lau abia,  
\v 2 do lau gwau:  
\q1 Oiemu sinana be laiona hahine goadana bamona.  
\q1 Ia ese laiona dagedagedia edia huanai,  
\q1 iena natuna ia ubudia namonamo.   
\q1
\v 3 Iena natuna ta ia naria namonamo,  
\q1 bona ia bada neganai,  
\q1 ia be laiona goadana momokani.  
\q1 Boroma idauidau alaia dalana ia diba vadaeni,  
\q1 bona taunimanima danu ia ese ia anidia.   
\q1
\v 4 Bese idauidau ese inai laiona ena sivarai idia kamonai,  
\q1 bona edia guri tarapu lalonai inai laiona idia abia.  
\q1 Kimai momo dekena amo,  
\q1 idia ese inai laiona idia veria lao,  
\q1 bona Aigupito tano dekenai idia hakaua vareai.   
\b  
\q1
\v 5 Laiona hahine ese ia itaia,  
\q1 iena natuna be ia boio ore,  
\q1 vadaeni ia ese iena natuna ta ma ia abia.  
\q1 Ia naria namonamo,  
\q1 bona iena natuna ia tubu bada lao.   
\q1
\v 6 Laiona edia huanai ia loaloa noho,  
\q1 badina boroma idauidau alaia dalana be ia diba vadaeni,  
\q1 bona taunimanima be ia ese ia anidia.   
\q1
\v 7 Ia ese taunimanima edia gabu aukadia ia hadikaia ore,  
\q1 bona edia hanua be ia ese anina lasi gabudia ia halaoa.  
\q1 Unai tano taudia ibounai ese,  
\q1 unai laiona ena boiboi idia kamonai neganai,  
\q1 idia gari maragi lasi.   
\q1
\v 8 Vadaeni bese idauidau ese,  
\q1 unai laiona abia totona idia haboua.  
\q1 Gabu ibounai dekena amo idia mai.  
\q1 Idia ese edia labana reke gaudia idia atoa hegaegae,  
\q1 bona edia tarapu lalonai unai laiona idia abia.   
\q1
\v 9 Kimai momo dekena amo maua lalonai idia udaia,  
\q1 bona Babulonia ena king dekenai idia abia lao.  
\q1 Dibura ruma lalonai idia koua,  
\q1 vadaeni iena boiboi be,  
\q1 Israela ena ororo dekenai idia kamonai lou lasi.   
\s1 Vain auna  
\q1
\v 10 Emui sinana be vain auna bamona,  
\q1 sinavai ena badibadinai idia hadoa gauna.  
\q1 Iena huahua momo ia atoa,  
\q1 iena rigina danu be momo,  
\q1 badina ranu be momo unuseni dainai.   
\q1
\v 11 Inai vain ena rigina be goada bona auka,  
\q1 bona idia be king edia dagi audia idia lao.  
\q1 Vain be ia tubu daekau lata herea,  
\q1 bona ori dekenai ia daekau lao.  
\q1 Taunimanima ibounai ese vain ena ataiai idia itaia,  
\q1 mai ena rigi bona raurau momo danu.   
\q1
\v 12 To unai vain be,  
\q1 mai badu danu orea ta taudia ese idia veria daekau,  
\q1 bona tano dekenai idia negea kava.  
\q1 Vadaeni dina daekau kahana dekena amo lai ia toa,  
\q1 vain ia hakaukaua,  
\q1 bona iena huahua be idia moru diho.  
\q1 Vain ena rigi goadadia idia kaukau vadaeni,  
\q1 bona lahi ese ia gabudia ore.   
\q1
\v 13 Harihari inai vain be,  
\q1 anina lasi tano dekenai idia hadoa hanaia vadaeni,  
\q1 tano kaukau dekenai,  
\q1 ranu lasi gabuna.   
\q1
\v 14 Lahi be vain ena rigi badadia dekena amo ia toreisi,  
\q1 bona edia huahua ia gabua ore.  
\q1 Vain ena rigina be do idia goada lou lasi.  
\q1 Idia be king edia dagi audia,  
\q1 taunimanima ese do idia halaoa lou lasi.  
\m Inai be lalohisihisi ane ta, bona lalohisihisi neganai do umui abia.   
\c 20  
\s1 Dirava ena ura, be taunimanima ese idia ura henia lasi  
\p
\v 1 Aiemai hesiai mai guia danu negana, ena lagani namba 7, hua namba 5, bona dina namba 10 dekenai, Israela ena tau badadia haida lau dekenai idia mai, Lohiabada ena ura, be idia totona Lohiabada do lau nanadaia totona. Idia be egu vairana dekenai idia helai diho.   
\p
\v 2 Vadaeni Lohiabada be lau dekenai ia hereva, ia gwau,  
\v 3 “Tanobada tauna e, oi ese inai Israela lohia taudia do oi hamaoroa, lau Lohiabada Dirava ese inai bamona idia dekenai lau gwau: ‘Umui be egu ura do umui diba totona umui mai, a? To lau be mauri ena Dirava dainai, lau ese emui henanadai do lau koua, do lau haere lasi. Lau Lohiabada Dirava lau hereva inai.’   
\p
\v 4 “Tanobada tauna e, oi ese do oi kota henidia totona oi noho hegaegae, a? Vadaeni do oi kota henidia. Edia sene taudia edia kara dika rohorohodia ena sivarai idia dekenai do oi hadibaia.  
\v 5 Do oi gwau: Lohiabada Dirava be inai bamona ia gwau: Israela lau abia hidi dinana dekenai, lau ese Israela taudia dekenai gwauhamata lau henia. Idia be Aigupito tano dekenai idia noho neganai, lau sibona idia dekenai lau hedinaraia, bona lau hamaorodia, lau gwau: ‘Lau be Lohiabada, emui Dirava.’  
\v 6 Unai neganai danu idia dekenai lau gwauhamata, Aigupito dekena amo idia do lau hakaua lao, bona idia totona lau abia hidi tano, rata bona hani dekenai ia honu tano dekenai idia do lau hakaua vareai. Inai tano be namo herea momokani, tano ibounai ia hereaia tanona.   
\p
\v 7 “Idia lau hamaoroa, lau gwau, ‘Umui ibounai e, gau dika rohorohodia, emui matadia ese idia ura henia gaudia, be do umui negea ore, bona Aigupito taudia edia kaivakuku dekena amo umui sibona do umui hamiroa lasi. Lau be Lohiabada, emui Dirava.’  
\v 8 To idia ese lau dekenai idia dagedage, lau idia kamonai henia lasi. Idia edia gau dika rohorohodia, edia matadia idia moalelaia gaudia be idia ese idia negea ore lasi, bona Aigupito ena kaivakuku idia rakatania lasi.  
\p “Vadaeni lau laloa, egu badu mai siahu danu be edia latanai do lau bubua diho, bona do lau hadikadia ore, Aigupito ena tano dekenai.  
\v 9 To unai bamona lau karaia lasi, badina be inai: Unai kara ese egu ladana do ia hamiroa garina. Badina edia huanai idia noho taudia edia vairana dekenai, hereva ta lau hedinaraia guna vadaeni, gauna inai: Lau ese Israela taudia lau hamaoroa Aigupito dekena amo do lau hakaudia mai.   
\p
\v 10 “Vadaeni lau ese Aigupito dekena amo idia lau hakaua, tano kaukau dekenai idia raka vareai.  
\v 11 Egu taravatu idia dekenai lau henia, bona egu oda idia dekenai lau hadibaia, badina unai oda ia kamonai henia tauna be do ia mauri.  
\v 12 Inai danu, egu Sabati Dina idia dekenai lau henia, toa ta do ia lao, lau bona idia, aiemai huana dekenai. Sabati Dina dekena amo do idia diba lau Lohiabada ese idia lau hahelagaia noho.  
\v 13 To Israela bese taudia ese tano kaukau dekenai lau idia dagedage henia. Idia ese egu taravatu idia utua, bona egu oda, idia kamonai henidia taudia ese mauri idia davaria gaudia, be idia negea. Egu Sabati Dina be idia ese idia hamiroa momokani.  
\p “Vadaeni lau laloa, egu badu mai siahu danu be edia latanai do lau bubua diho, bona do lau hadikadia ore, tano kaukau dekenai.  
\v 14 To unai bamona lau karaia lasi, unai kara ese egu ladana do ia hamiroa garina. Badina be bese idauidau momo ese egu kara idia itaia, Israela taudia Aigupito dekena amo lau hakaudia neganai.  
\v 15 To tano kaukau dekenai lau ese idia lau gwauhamata henia, idia do lau henia gwauraia tano, rata bona hani dekenai ia honu tano, tano namo herea momokani, tano ibounai ia hereaia gauna, ena lalonai do lau hakaudia vareai lasi.  
\v 16 Badina be egu oda hereva idia negea, bona egu taravatu idia utua, bona egu Sabati Dinana idia hamiroa. Ma badina ta be, idia edia kudoudia ese edia kaivakuku idia laloa noho.   
\p
\v 17 “To ma lau ese idia lau itaia, bona idia dekenai lau bogahisihisi henia. Vadaeni idia lau hadikaia ore lasi, tano kaukau dekenai.  
\v 18 To tano kaukau dekenai lau ese edia natudia lau hamaoroa, lau gwau, ‘Emui tamadia idia karaia taravatu do umui badinaia lasi, edia oda hereva gaudia do umui kamonai lasi, edia kaivakuku danu do umui tomadiho henia lasi, do umui miro garina.  
\v 19 Lau be Lohiabada, emui Dirava, lauegu taravatu edia lalonai do umui raka, bona egu oda hereva do umui badinaia namonamo.  
\v 20 Bona egu Sabati Dinadia do umui matauraia, vadaeni Sabati be toa ta do ia lao, lau bona umui, iseda huana dekenai, vadaeni do umui diba lau be Lohiabada, emui Dirava.’   
\p
\v 21 “To unai edia natudia ese lau idia dagedage henia, egu taravatu lalonai idia raka lasi, bona egu oda hereva, idia kamonai henidia taudia ese mauri idia davaria gaudia, be idia utua. Idia ese Sabati Dina danu idia hamiroa.  
\p “Vadaeni lau laloa, egu badu mai siahu danu be edia latanai do lau bubua diho, bona do lau hadikadia ore, tano kaukau dekenai.  
\v 22 To unai bamona lau karaia lasi, unai kara ese egu ladana do ia hamiroa garina. Badina be bese idauidau momo ese egu kara idia itaia, Israela taudia Aigupito dekena amo lau hakaudia neganai.  
\v 23 Unai dainai tano kaukau dekenai gwauhamata ta ma idia dekenai lau gwauraia, lau gwau, bese idauidau edia huanai lau ese do lau luludia lao, bona tanobada gado idauidau taudia edia huanai idia do lau atodia, unai gabudia dekenai do idia noho.  
\v 24 Badina be idia ese egu oda hereva idia badinaia lasi, bona egu taravatu idia negea, bona egu Sabati Dina idia hamiroa, bona edia tamadia edia kaivakuku dekenai idia laloa momo noho.   
\p
\v 25 “Inai danu, taravatu dikadia, bona oda hereva haida, kamonai henidia taudia ese mauri idia davaria diba lasi gaudia, be lau henidia.  
\v 26 Bona idia ese harihari gaudia, boubou gaudia, be kaivakuku dekenai idia henia neganai, unai kara lau koua lasi, idia ese sibodia do idia hamiroa totona. Vadaeni idia ese edia vara guna natudia tau be gabua ore bouboudia totona idia henidia. Unai dekena amo lau hagaridia bada, idia be do idia diba lau be Lohiabada totona.   
\p
\v 27 “Unai dainai, tanobada tauna e, Israela taudia do oi hamaorodia, do oi gwau, ‘Lohiabada Dirava be inai bamona ia hereva, ia gwau: Inai kara dekena amo danu emui sene taudia ese lau idia hadikaia, bona idia be momokani lasi lau dekenai, gauna inai:  
\v 28 Lau gwauhamata do lau henidia tano lalonai lau hakaudia vareai neganai, idia ese ororo latana ta o au namona ta idia itaia neganai idia ese boubou gaudia unai ororo o au ibounai dekenai idia henia. Bona inai bamona bouboudia idia gabua, bona uaina bouboudia idia bubua dekena amo idia ese lau idia habadua.’  
\v 29 Lau ese idia lau nanadaia, lau gwau, ‘Inai ataiai gabudia, umui lao gabudia be dahaka?’ Bona unai neganai ia mai bona hari, unai tomadiho gabudia, edia ladadia be, ‘ataiai gabudia.’   
\s1 Dirava ese dika davana ia henia noho, bona dika ia gwauatao noho danu  
\p
\v 30 “Unai dainai Esekiela e, Israela taudia do oi hamaoroa, do oi gwau: Lohiabada Dirava be inai bamona ia hereva noho, ia gwau: Emui sene taudia edia kara dika hegeregerena badina dahaka umui karaia noho, bona edia kaivakuku badina dahaka edia murinai umui raka siri noho?  
\v 31 Hari dina danu umui ese kaivakuku dekenai harihari gaudia umui henia noho, bona kaivakuku dekena amo umui sibona umui hamiroa noho, badina umui ese emui natudia tau be gabua ore bouboudia umui halaoa noho. Bona harihari lauegu ura do umui diba totona umui henanadaia noho. Lau, mauri ena Dirava egu ladana dekenai lau gwauhamata inai: Lau ese emui henanadai do lau koua, umui dekenai do lau haere lasi.   
\p
\v 32 “Umui emui ura be bese idauidau, tano idauidau besedia edia kara hegeregerena do umui karaia, au bona nadi do umui tomadiho henia. To inai ura be nega ta do ia vara lasi.”   
\p
\v 33 Lohiabada Dirava ia gwau: “Lau, mauri ena Dirava, egu ladana dekenai lau hereva goada noho inai, momokani mai egu imana goadana, bona mai egu siahu ibounai, bona mai egu badu danu, umui do lau biagua.  
\v 34 Bese idauidau edia huanai dekena amo umui do lau hakaua, bona tano idauidau dekenai umui noho gabudia ibounai dekena amo umui lau haboua neganai, egu siahu bona egu badu do lau hedinaraia momokani.  
\v 35 Vadaeni ‘Bese Idauidau Edia Tano Kaukau’ dekenai umui do lau hakaua vareai. Unuseni umui do lau gwau henia, bona umui do lau kota henia.  
\v 36 Io, umui do lau kota henia, emui sene taudia Aigupito ena tano kaukau dekenai lau kota henidia hegeregerena. Lau, Lohiabada Dirava lau hereva noho inai.   
\p
\v 37 “Lau ese umui do lau biagua mai goada danu, bona umui do lau taravatua auka dainai, egu gwauhamata taravatuna be do umui utua lasi momokani.  
\v 38 Dagedage taudia bona egu taravatu idia utua noho taudia be umui emui huanai dekena amo do lau negea. Idia noho tano dekena amo do lau hakaudia mai, to Israela tano dekenai do idia raka vareai lasi. Unai negana do umui diba lau be Lohiabada.”   
\p
\v 39 Lohiabada Dirava ia gwau, “Vadaeni umui Israela besena taudia e, bema lau dekenai do umui kamonai lasi neganai do umui lao, ta ta ena kaivakuku ena kaivakuku ena hesiai gaukara do umui karaia. To umui lau sisiba henia inai: Gabeai umui ese lau do umui kamonai henia momokani, bona kaivakuku dekenai harihari gaudia henia kara dekena amo egu ladana helagana do umui hamiroa lou lasi.”   
\p
\v 40 Lohiabada Dirava ma ia gwau, “Badina be egu tano, egu ororo helagana ena latanai, Israela ena ororo badana Siona dekenai, Israela besena taudia ibounai ese lau dekenai do idia tomadiho, bona lau ese mai laloa namo danu idia do lau abia dae. Unai gabu dekenai umui ese boubou gaudia, emui tano anina vara guna gaudia, bona emui harihari gaudia helagadia be lau dekenai do umui henia.  
\v 41 Io, bese idauidau edia huanai dekena amo umui do lau hakaua, bona idia lalonai gabu idauidau umui noho tanodia dekena amo umui lau haboua neganai, lau ese umui do lau abia dae, bonana namo boubou gauna do lau abia dae bamona. Bona umui emui huanai lau ese egu helaga do lau hedinaraia, vadaeni bese idauidau taudia do idia diba lau be helaga.  
\v 42 Bona Israela tano, emui sene taudia dekenai lau gwauhamata do lau henidia tano, ena lalonai umui do lau hakaua vareai neganai do umui diba lau be Lohiabada.  
\v 43 Unai neganai emui dala dikadia bona emui kara dikadia, idia dekena amo umui sibona umui hamiroa karadia do umui laloa lou. Unai neganai umui sibona do umui negea bamona, bona do umui hemarai bada momokani, emui kara dika ibounai dainai.  
\v 44 Bona do umui diba lau be Lohiabada, badina umui dekenai lau karaia karadia be emui kara dika bona emui kara bodaga edia davana korikori hegeregerena lasi. To umui dekenai lau karaia karadia be egu ladana ese mataurai do ia abia totona.” Israela besena e, Lohiabada Dirava ia hereva noho inai.   
\s1 Peroveta hereva diho kahana totona  
\p
\v 45 Lohiabada ese lau dekenai ia hereva, ia gwau,  
\v 46 “Tanobada tauna e, diho kahana do oi itaia. Diho kahana ena latanai do oi haroro, bona diho kahana ena uda gabuna totona do oi peroveta.  
\v 47 Diho kahana ena uda dekenai do oi hamaoroa, do oi gwau, ‘Lohiabada ena hereva do oi kamonai. Lohiabada Dirava be inai bamona ia hereva, ia gwau: Kamonai, oiemu lalonai lahi ta do lau gabua, bona inai lahi ese mauri audia bona mase audia ibounai do ia gabua ore. Tau ta ese unai lahi do ia habodoa diba lasi, bona taunimanima ibounai, diho kahana dekena amo ela bona mirigini kahana dekenai, ese lahi ena siahu ena mamina do idia abia.  
\v 48 Idia ibounai do idia diba lau Lohiabada ese lahi lau gabua noho, bona tau ta ese do ia habodoa diba lasi.’ ”   
\p
\v 49 Vadaeni lau Esekiela lau gwau, “Lohiabada Dirava e, inai hereva gwauraia totona lau do oi hagoadaia lasi, badina idia ese lau dekenai idia hereva badubadu noho, idia gwau, lau be nega ibounai parabole sibona lau gwauraia noho.”   
\c 21  
\s1 Lohiabada ena tuari kaia  
\p
\v 1 Lohiabada ese lau dekenai ia hereva, ia gwau,  
\v 2 “Tanobada tauna e, Ierusalema taudia do oi gwau henia. Taunimanima ese dirava koikoi dekenai idia tomadiho gabudia danu do oi gwau henia. Israela tano taudia do oi sisiba henia,  
\v 3 badina lau Lohiabada lau hereva noho, lau gwau: Lau ese umui lau dagedage henia noho. Lau ese egu tuari kaia dekena amo umui ibounai do lau alaia mase, taunimanima namodia bona taunimanima dikadia danu.  
\v 4 Israela e, oiemu kara maoromaoro bona oiemu kara dika taudia do lau aladia ore dainai, lau ese emu taunimanima ibounai, diho kahana dekena amo, ela bona mirigini kahana dekenai, egu tuari kaia dekena amo do lau aladia.  
\v 5 Taunimanima ibounai be do idia diba, egu tuari kaia be ena udaia gabuna dekena amo lau veria vadaeni, bona ena udaia gabuna dekenai do lau atoa lou lasi.   
\p
\v 6 “Unai dainai, tanobada tauna e, do oi tai, oiemu kudouna ia makohia noho bamona do oi tai. Taunimanima ese oi idia itaia noho gabuna dekenai, mai lalohisihisi bada danu do oi tai.  
\v 7 Vadaeni idia ese oi do idia nanadaia, do idia gwau, ‘Badina dahaka oi tai noho?’ Unai neganai do oi gwau: ‘Sivarai metauna lau kamonai, vaira neganai kara badadia do idia vara, gari bada gaudia. Inai kara idia ginidae neganai, kudouna ibounai do idia veve, bona imana ibounai do idia manoka, lauma ibounai do idia mase bamona, bona tui ibounai be do idia heudeheude. Unai kara be ia mai noho, do ia vara momokani. Lohiabada Dirava ese inai hereva ia gwauraia vadaeni.’ ”   
\p
\v 8 Lohiabada ese lau dekenai ma ia hereva, ia gwau,  
\v 9 “Tanobada tauna e, peroveta hereva do oi gwauraia. Taunimanima do oi hamaoroa, lau Lohiabada be inai bamona lau hereva noho, lau gwau:  
\q1 Tuari kaia ta,  
\q1 tuari kaia ta be idia segea vadaeni,  
\q1 bona ia diaridiari noho danu.   
\q1
\v 10 Idia segea vadaeni,  
\q1 alaia kara totona.  
\q1 Idia dahua vadaeni,  
\q1 do ia diaridiari kevaru bamona totona,  
\q1 bona kevaru bamona do ia marere haraga.  
\p “Hari inai negana be moale negana lasi, badina be egu bese taudia ese egu sisiba bona egu matakani ibounai idia abia dae lasi.  
\v 11 Unai dainai, tuari kaia be idia dahua noho, do ia diaridiari, do ia hegaegae taunimanima alaia totona. Idia segea bona idia hadiaria vadaeni, ala-ala tauna ena imana dekenai do idia atoa totona.  
\v 12 Tanobada tauna e, do oi tai, do oi tai mai boiboi danu. Badina inai tuari kaia be egu bese taudia bona edia lohia taudia hadikaia totona gauna. Lohia taudia bona edia taunimanima be tuari kaia dekena amo do idia mase hebou. Unai dainai Israela e, mai lalohisihisi danu, oiemu kemena do oi botaia.  
\v 13 Lau ese egu bese taudia lau tohoa noho, bona bema edia lalodia idia giroa lasi neganai, inai kara ibounai be idia dekenai do idia vara. Lau Lohiabada Dirava, lau hereva noho.   
\p
\v 14 “Unai dainai, tanobada tauna e, peroveta karana do oi karaia inai bamona: Oiemu imana do oi patapataia, vadaeni tuari kaia be do oi davea nega rua, ma do oi davea nega toi, taunimanima ese do idia itaia, bona do idia diba ala-ala badana momokani be idia dekenai do ia mai noho.  
\v 15 Unai neganai edia kudoudia be gari bada dainai do idia veve, badina be edia iduara ibounai dekenai tuari kaia ia diaridiari noho, kevaru bamona ia diaridiari noho. Bona ena isena be mai matana, ala-ala totona.  
\v 16 Tuari kaia e, idiba kahana do oi utua, bona lauri kahana do oi utua, oiemu ura gabuna ibounai dekenai do oi utua.  
\v 17 Lau danu be egu imana do lau patapataia, vadaeni egu badu be do ia keru. Lau Lohiabada ese lau hereva vadaeni.”   
\s1 Babulonia ena king ena tuari kaia  
\p
\v 18 Lohiabada ese lau dekenai ma ia hereva, ia gwau,  
\v 19 “Tanobada tauna e, Babulonia ena king be mai ena tuari kaia do ia mai, vadaeni iena dala rua edia toadia ena mapu do oi karaia. Inai dala ruaosi be tano tamona dekena amo. Babulonia dekena amo ia mai dala badana dekenai gabu ta ia noho, unai gabu dekenai dala rua ma idia matamaia.  
\v 20 Dala ta be Raba hanua, Amono tano dekenai ia lao noho, ma dala ta be Ierusalema hanua mai ena magu dekenai ia lao noho. Unai gabu, unai dala ruaosi idia hakapua gabuna dekenai toa auna do oi atoa, oiemu mapu dekenai.  
\v 21 Badina be Babulonia ena king be unai gabu dekenai do ia gini, dala ruaosi do ia itaia noho. Edena dala dekenai do ia lao do ia diba totona, ia ese peva ena diba haida iena imana dekenai do ia abia, tano dekenai do ia negedia, iena kaivakuku danu do ia nanadaia, bona boromakau ena asena danu ena toana do ia tahua.  
\v 22 Iena imana idibana ese diba ta tano dekena amo do ia abia, unai diba ena ladana be Ierusalema. Vadaeni Babulonia ena king ese Ierusalema abia totona inai bamona do ia oda: ‘Magu iduara hamakohia au latadia do umui abia hegaegae, hanua taudia do umui alaia mase, tuari totona do umui boiboi bada, tano be hanua magu ena badibadina do umui haboua bada, bona hanua koua hagegea kohoro aukadia do umui haginia.’  
\v 23 Esekiela e, inai sisiba hereva Ierusalema taudia dekenai do oi gwauraia, to idia ese do idia hamomokania lasi, badina idia ese tuari lasi ena gwauhamata helagadia Babulonia danu idia karaia vadaeni guna. To Babulonia ena king ese edia kerere momo do ia laloatao, bona do ia tuari henidia, do ia abidia, do ia guidia.   
\p
\v 24 “Lau Lohiabada Dirava ese inai bamona lau hereva noho, lau gwau: Ierusalema taudia e, emui kara dika be idia hedinarai momokani lau dekenai, bona emui kerere be taunimanima ibounai idia diba. Emui kara ibounai lalonai emui dika idia hedinarai dainai, lau ese emui dika davana lau gwauraia inai, umui idia hadikaia gwauraia taudia edia siahu henunai umui do lau atoa.   
\p
\v 25 “Oi danu, Israela ena king, tau dikana, helaga diba lasi tauna, oiemu dina ia ginidae vadaeni. Oiemu davana do oi abia momokani negana ia ginidae vadaeni.  
\v 26 Lau, Lohiabada Dirava lau hereva noho inai, lau gwau, ‘Oiemu kwarana kumia dabua do oi ruhaia, bona oiemu korona do oi kokia. Oiemu dagi toana gaudia do oi karaia lou lasi. Henunai idia noho taudia be do idia abia isi ataiai, bona ataiai idia noho taudia be henunai do idia atoa.  
\v 27 Hadikaia, hadikaia! Io, hanua badana do lau hadikaia ore momokani. Bona do idia hanamoa lou lasi, ela bona iena Biaguna korikori be do ia mai, unai neganai ia dekenai do lau henia.’   
\s1 Peroveta hereva Amono taudia edia latanai  
\p
\v 28 “Tanobada tauna e, peroveta hereva do oi gwauraia. Do oi gwau, lau Lohiabada Dirava ese Amono taudia, Israela idia hereva dika henia noho taudia, be inai bamona lau herevalaia noho, lau gwau:  
\q1 “Tuari kaia ta, tuari kaia ta,  
\q1 be idia veria vadaeni,  
\q1 taunimanima do ia aladia mase totona.  
\q1 Ia be idia ese idia dahua vadaeni,  
\q1 bona ia diaridiari noho.  
\q1 Ia be do ia marere haraga,  
\q1 kevaru bamona,  
\q1 mai ena diaridiari danu.   
\m
\v 29 “Umui ese umui itaia noho mata hanai be koikoi sibona, bona emui peroveta herevadia be anina lasi. Umui be helaga lasi bona kara dika taudia, bona emui dina ia mai noho, emui dika davana abia dinana. Tuari kaia be emui aiodia dekenai do ia moru.   
\p
\v 30 “Tuari kaia be iena udaia gabuna dekenai do lau udaia lou, a? Lasi, lau ese umui vara tano korikori dekenai umui do lau kota henia.  
\v 31 Lau ese egu badu mai siahu danu emui latanai do lau bubua diho. Umui ese unai badu ena mamina do umui abia, lahi mai hururuhururu danu ena siahu bamona. Bona dagedage taudia, taunimanima alaia dekenai idia manada taudia edia siahu henunai umui do lau atoa.  
\v 32 Umui be lahi dekena amo do umui mase ore. Emui rarana be emui tano korikori dekenai do ia bubua. Bona tau ta ese umui do ia laloa lou lasi. Lau Lohiabada lau hereva vadaeni.”   
\c 22  
\s1 Ierusalema ena kara dika  
\p
\v 1 Lohiabada ese lau dekenai ia hereva, ia gwau,  
\v 2 “Tanobada tauna e, oi ese oi kota henia diba, a? Inai hanua be mai ena ala-ala taudia momo. Unai dainai hanua taudia edia kara dika rohorohodia ibounai do oi gwauraia hedinarai.  
\v 3 Do oi gwau, lau Lohiabada Dirava be inai bamona lau hereva noho, lau gwau: Umui ese emui bese tamona taudia momo umui alaia mase, bona kaivakuku umui tomadiho henidia dainai umui sibona umui hamiroa, bona emui nega be kahirakahira ia ginidae inai.  
\v 4 Umui be umui kerere vadaeni, emui alaia kara dainai, bona umui be miro vadaeni, kaivakuku umui karaia dainai. Unai dainai emui mauri nega umui hakwadogia vadaeni, emui dokona dinana ia ginidae vadaeni. Unai dainai bese idauidau taudia ese umui idia hereva dika henia, umui dekenai idia kirikiri bona idia hevaseha noho, bona lau ese lau koudia lasi.  
\v 5 Mai dagedage danu umui ese taravatu umui kamonai henia lasi dainai, umui kahirakahira noho taudia bona daudau idia noho taudia danu ese umui idia hevaseha henia noho.   
\p
\v 6 “Israela ena lohia taudia ibounai ese sibodia edia goada idia abidadama henia, bona taunimanima alaia karadia idia karaia noho.  
\v 7 Ierusalema hanua lalonai tau ta ese iena tamana bona sinana ia matauraia lasi. Umui ese emui huanai idia noho idau bese taudia umui koidia noho. Ma danu tamana bona sinana lasi maragidia bona vabu taudia dekenai kara dika umui karaia noho.  
\v 8 Egu helaga gabudia umui negea vadaeni, bona egu Sabati Dinadia umui hadikaia vadaeni.  
\v 9 Emui tau haida ese taunimanima idia samania koikoi noho, unai taunimanima do idia hamasea totona. Bona Ierusalema taudia haida be ororo dekenai idia noho kaivakuku tomadiho gabudia dekenai idia aniani, bona lebulebu karadia idia karaia noho.  
\v 10 Tau haida ese edia tamadia edia adavadia idia sihari henia noho.  
\v 11 Haida ese heudahanai idia karaia, bona haida be edia ravana hahine danu idia mahuta hebou, ma haida be edia taihuna korikori idia sihari henia.  
\v 12 Ierusalema taudia haida ese moni davana idia abia noho, taunimanima do idia alaia mase totona. Bona haida ese edia varavara Israela taudia dekenai idia heniatorehai neganai atoa kau moni danu idia abia, bona edia kohu be dagedage karadia dekena amo idia abia noho. Momokani umui Ierusalema taudia ese lau umui laloaboio vadaeni. Lau, Lohiabada Dirava lau hereva noho.   
\p
\v 13 “Egu imana do lau lokua, bona emui henaoa kara bona ala-ala kara do lau botaia.  
\v 14 Emui dika davana do lau henia dinana dekenai, umui be mai emui goada, o emui imadia do umui abia isi diba, a? Lau inai Lohiabada lau hereva vadaeni, bona egu hereva ena kara do lau karaia.  
\v 15 Lau ese emui bese taudia do lau lulua gabu idauidau dekenai, tano bona basileia ibounai dekenai, bona emui kara dika mai miro danu do lau hadokoa momokani.  
\v 16 Bona unai bese idauidau taudia ese umui do idia matauraia lasi neganai, umui be do umui diba lau be Lohiabada.”   
\s1 Dirava ena lahi, taunimanima hagoevaia lahina  
\p
\v 17 Lohiabada ese lau dekenai ia hereva, ia gwau,  
\v 18 “Tanobada tauna e, Israela taudia be momoru bamona egu vairana dekenai idia lao vadaeni. Idia ibounai be auri laboralabora, bona tini, bona auri, bona auri metauna, lahi lalonai do noho momoru gaudia bamona, idia dekena amo siliva idia havevea oho neganai.  
\v 19 Bona lau Lohiabada Dirava ese idia lau hamaoroa noho, lau gwau: Umui be momoru sibona dainai, lau ese umui ibounai be Ierusalema dekenai do lau haboua.  
\v 20 Taunimanima ese siliva bona auri, bona auri metauna bona tini be lahi lalonai idia atoa, vadaeni lahi idia hasiahua bada, siliva do idia havevea totona, unai bamona danu lau ese egu badu mai ena siahu bada dekena amo umui do lau haboua, lahi lalonai umui do lau atoa vareai, umui do lau havevea.  
\v 21 Io, lau ese Ierusalema dekenai umui do lau haboua, bona egu badu ena siahu bada dekena amo umui do lau havevea.  
\v 22 Ierusalema lalonai umui do lau havevea, siliva be lahi lalonai idia havevea oho bamona, bona unai neganai, do umui diba lau Lohiabada ese egu badu be emui latanai lau bubua diho vadaeni.”   
\s1 Israela lohia taudia edia kara dika  
\p
\v 23 Lohiabada ese ma lau dekenai ia hereva, ia gwau,  
\v 24 “Tanobada tauna e, Israela taudia do oi hamaoroa edia tano be kara dika dainai ia miro, bona unai dainai lau Dirava ese mai badu danu tano dekenai medu do lau siaia lasi.  
\v 25 Ierusalema ena lohia taudia be idia boiboi noho laiona bamona, boroma ta idia alaia neganai. Inai lohia taudia ese taunimanima idia alaia noho, edia kohu bona tano do idia abia totona, bona inai ala-ala kara dainai vabu momo idia noho.   
\p
\v 26 “Hahelagaia taudia ese egu taravatu idia utua noho, bona egu gau helagadia idia matauraia lasi. Idia ese gau helagadia bona gau helagadia lasi edia idau idia gwauraia lasi, bona taunimanima idia hadibaia lasi miro gaudia bona miro lasi gaudia edia idau be dahaka. Egu Sabati Dinadia danu idia badinaia lasi. Unai karadia dekena amo egu ladana be Israela taudia ese idia matauraia lasi.  
\v 27 Ierusalema ena gavamani opesa taudia be uda sisiadia bamona, idia alaia vadaeni mauri gaudia idia darea noho. Inai opesa taudia ese taunimanima idia alaia noho, kohu momo do idia abia totona.   
\p
\v 28 “Ierusalema ena peroveta taudia ese pilasta idia iusilaia lasi, to peni kurokuro sibona. Idia ese idia mata hanai koikoi, bona peroveta hereva koikoi idia gwauraia noho, idia gwau, ‘Lohiabada Dirava be inai bamona ia hereva noho,’ to Lohiabada ese hereva ta ia henidia lasi.  
\v 29 Ierusalema ena dagi lasi taudia danu ese mai dagedage danu ogogami taudia bona gau lasi taudia idia koia, bona idia dekena amo idia henaoa noho. Idau bese taudia edia kohu danu idia abia kava, bona unai kohu abia lou dalana ta be lasi.   
\p
\v 30 “Vadaeni Ierusalema lalonai tau ta lau tahua, kara maoromaoro tauna, ia ese, Israela taudia lau dekenai do ia hakaudia lou totona. Ia be tau ta bamona, magu do ia haginia, bona egu vairanai, magu ia makohia gabuna dekenai do ia gini, tano do ia gimaia totona, lau ese do lau hadikaia ore garina. To inai bamona tau ta lau davaria lasi.  
\v 31 Unai dainai egu badu be idia edia latanai do lau bubua diho. Egu badu mai siahu bada ena lahi dekena amo do lau gabudia ore. Edia kara dika dainai, idia do lau hadikaia ore. Lau Dirava, Lohiabada, ese lau hereva vadaeni.”   
\c 23  
\s1 Parabole: Tadikaka rua  
\p
\v 1 Lohiabada ese lau dekenai ia hereva, ia gwau,  
\v 2 “Tanobada tauna e, hahine rua idia noho, idia be hahine tamona ena natuna.  
\v 3 Idia be kekeni bona rami hebou neganai, tau haida ese kemedia idia rosia, bona edia ratadia idia gigia. Vadaeni idia ese ariara karadia idia karaia Aigupito dekenai.  
\v 4 Hahine vara guna ena ladana be Ohola, bona iena tadina ena ladana be Oholiba. Lau ese idia lau adavaia, vadaeni idia ese natudia tau bona hahine idia havaraia. Edia ladadia edia anina be inai: Ohola be Samaria, bona Oholiba be Ierusalema.   
\p
\v 5 “Ohola be egu adavana neganai, ia ese ariara karadia ia karaia. Ia ese ia ura henia taudia, Asuria taudia, be ia ese ia ura dikadika do ia sihari henidia.  
\v 6 Idia be tuari taudia, dabua kakakaka idia karaia, lohia taudia bona tuari biagudia, idia ibounai be eregabe taudia namo herea, hosi dekenai idia guia taudia.  
\v 7 Vadaeni Ohola ese idia danu lebulebu karadia ia karaia, idia ibounai be Asuria ena tau namodia momokani. Bona Ohola ese ia ura henia dikadika taudia ibounai edia kaivakuku dekenai ia sibona ia hamiroa.   
\p
\v 8 “Iena ariara karadia, Aigupito dekenai ia noho dinadia lalonai ia karaia karadia be Ohola ese ia hadokoa lasi, badina be iena kekeni bona rami hebou dinadia lalonai tau haida be ia danu idia mahuta hebou, iena rata idia gigia, bona ia danu lebulebu karadia idia karaia.  
\v 9 Unai dainai, ia ura henia taudia, inai Asuria taudia, ia ese ia matabodaga henidia taudia, edia imadia dekenai Ohola lau atoa.  
\v 10 Idia ese Ohola ena dabua ibounai idia kokia, iena natuna tau bona hahine idia dogoatao, bona unai murinai idia ese tuari kaia dekenai Ohola idia alaia mase. Hahine taudia ese ia idia kikilaia neganai idia gwau Oholo ia abia davana be maoro.   
\p
\v 11 “Ohola ena tadina Oholiba ese inai kara ia itaia, to iena dika ese iena kakana ena dika ia hanaia. Iena matabodaga bona iena ariara karadia be bada. Unai kara dekenai iena kakana be dika, to ia be dika herea.  
\v 12 Vadaeni Oholiba danu ese Asuria taudia ia matabodaga henia, lohia taudia, bona tuari biagudia, mai edia tuari dabua namo herea, hosi dekenai idia guia taudia, ibounai be eregabe taudia namo herea.  
\v 13 Vadaeni lau itaia, inai hahine Oholiba be ia miro danu, ia ese iena kakana Ohola ena kara hegeregerena ia karaia, idia ruaosi dala tamona idia raka vadaeni.   
\p
\v 14 “To Oholiba ese iena ariara karadia ma ia habadaia, ia ese tau edia laulau haba ta dekenai ia itaia, Babulonia taudia edia laulaudia, peni kakakaka dekena amo idia torea vadaeni gaudia,  
\v 15 mai edia gaba gaudia edia koekoedia dekenai bona kwara kumia dabuadia edia kwaradia dekenai, ibounai edia toana be lohia taudia, Babulonia dekenai idia noho taudia edia laulaudia.  
\v 16 Ia ese idia ia itaia neganai, Ohilaba ese idia ia ura henia dikadika, bona hereva gwauraia taudia idia dekenai ia siaidia lao, Babulonia dekenai.  
\v 17 Vadaeni Babulonia taudia be ia dekenai idia mai, ia idia sihari henia, ia lao bona edia lebulebu karadia dekena amo ia idia hamiroa. Idia hamiroa murinai, Oholiba ese idia ia negea, mai badu danu.   
\p
\v 18 “To ia ese iena ariara karadia be ia hunia lasi, bona iena kopina kavakava be mai hekokoroku danu taunimanima edia vairanai ia hedinaraia neganai, lau ese ia lau negea mai egu badu danu, iena kakana lau negea hegeregerena.  
\v 19 To ia ese iena ariara karadia ma ia habadaia, badina iena kekeni badana ena dinadia ia laloa lou, unai neganai ia ese ariara karadia ia karaia Aigupito tano dekenai.  
\v 20 Unuseni ia ura henia taudia, edia usidia be doniki edia usidia bamona, bona edia vesi be hosi edia vesi bamona taudia, be ia ese ia matabodaga henidia.  
\v 21 Oholiba e, oiemu kekeni dinadia neganai oiemu lebulebu karadia oi ura dikadika do oi karaia lou. Badina unai neganai Aigupito taudia ese oiemu kemena idia rosia, bona oiemu rata idia gigia, bona umui siharisihari noho.   
\s1 Dirava ese Oholiba ena dika davana ia henia  
\p
\v 22 “Unai dainai Oholiba e, lau Dirava, Lohiabada ese oi lau hereva henia noho inai: Oi idia ura henia taudia, mai badu danu oi negedia taudia, be do lau hatoreisidia, bona kahana ibounai dekena amo idia do lau haboua, oi do idia hadikaia totona.  
\v 23 Babulonia taudia, bona Kaledea taudia ibounai, Pekodo bona Soa bona Koa taudia, bona Asuria taudia ibounai idia danu, ibounai be eregabe taudia namo herea bona lohia taudia bona tuari biagudia, tuari opesa badadia, ibounai be hosi idia guia taudia.  
\v 24 Idia be oi hadikaia totona mirigini kahana dekena amo do idia mai, mai edia kariota, bona treila, bona edia tuari orea taudia momo herea danu. Idia ese oi do idia koua hagegea, mai edia keme auridia, bona edia kesi, bona edia auri kwara gaudia, bona edia siahu henunai oi do lau atoa. Vadaeni idia ese sibodia edia taravatu dekena amo oi do idia kota henia.  
\v 25 Oi dekenai lau badu dainai, lau ese edia badu do lau koua lasi, vadaeni idia ese oiemu udubaubauna bona oiemu taiana do idia utua oho, bona emu heau mauri gwauraia taudia be tuari kaia dekena amo do idia mase. Emu natuna tau bona hahine be unai taudia ese do idia guia, bona do idia abidia lao, bona emu do mauri noho taudia be lahi ese do ia gabudia ore.  
\v 26 Idia ese danu oiemu dabua do idia kokia, bona oiemu herahera nadidia namo herea do idia abia lao.  
\v 27 Unai dekena amo lau ese oiemu lebulebu bona oiemu ariara karadia, Aigupito dekena amo oi mailaia, be do lau hadokoa. Unai dainai Aigupito taudia be do oi ura henia dikadika lou lasi, bona idia do oi laloa lou lasi.”   
\p
\v 28 Badina be Lohiabada Dirava ese inai bamona ia hereva noho, ia gwau: “Kamonai, lau ese oi idia badu henia noho taudia, oi negedia bona oi rakatanidia taudia, edia siahu henunai oi do lau atoa.  
\v 29 Vadaeni idia ese mai dagedage danu oiemu hekwarahi ena anina ibounai do idia abia lao, bona kopina kavakava oi do idia rakatania. Unai neganai oiemu ariara karadia edia hemarai do idia hedinaraia. Oiemu lebulebu bona oiemu ariara karadia ese  
\v 30 inai hemarai be oiemu latanai ia havaraia, badina be bese idauidau danu ariara karadia oi karaia, bona edia kaivakuku dekena amo oi miro.  
\v 31 Oiemu kakana ena dala oi raka vadaeni, unai dainai iena kapusi be oiemu imana dekenai do lau atoa.”  
\v 32 Lohiabada Dirava be inai bamona ia hereva, ia gwau,  
\q1 “Oiemu kakana ena kapusi dekena amo do oi inua,  
\q1 kapusi be bada bona dobu.  
\q1 Idia ese oi do idia kirikirilaia,  
\q1 bona oi dekenai do idia hevaseha,  
\q1 badina unai kapusi ena anina be bada.   
\q1
\v 33 Oi be do oi kekero,  
\q1 bona mai emu lalohisihisi danu,  
\q1 badina unai kapusi ena muramura be momo herea.  
\q1 Inai oiemu kakana Samaria ena kapusi,  
\q1 be gari bada bona hadikaia kara ena kapusi.   
\q1
\v 34 Do oi inua,  
\q1 ena muramura do oi inua haorea.  
\q1 Vadaeni kapusi do oi hamakohia maragimaragi,  
\q1 bona ena makohia gauna ta dekena amo,  
\q1 emu ratana do oi darea.  
\q1 Lau Dirava, Lohiabada ese lau hereva vadaeni.”   
\p
\v 35 Unai dainai Lohiabada Dirava be inai bamona ia hereva, ia gwau, “Oi ese lau oi laloaboio bona oiemu murinai lau oi negea vadaeni. Unai dainai oiemu lebulebu bona oiemu ariara karadia edia davana do oi abia.”   
\s1 Dirava ese Ohola bona Oholiba edia dika davana ia henia  
\p
\v 36 Lohiabada ese lau dekenai ia hereva, ia gwau, “Tanobada tauna e, Ohola bona Oholiba do oi kota henia totona oi noho hegaegae, a? Vadaeni edia kara dika rohorohodia do oi gwauraia idia dekenai.  
\v 37 Badina idia be idia heudahanai, bona edia natudia tau, lau dekena amo idia havaraia memero, be gabua boubou totona kaivakuku ena lahi ena lalonai idia gabudia ore.  
\v 38 Bona unai sibona lasi, to unai dina tamona lalonai egu Dubu Helaga bona egu Sabati Dina idia hamiroa.  
\v 39 Badina be edia natudia idia alaia mase bona edia kaivakuku ena boubou gaudia idia halaoa ena dina lalonai, idia ese egu Dubu Helaga lalonai idia raka vareai, bona idia hamiroa. Unai bamona kara be egu Ruma dekenai idia karaia.   
\p
\v 40 “Idia ese danu hereva gwauraia taudia idia siaia lao, daudau dekena amo tau haida do idia mai totona, vadaeni idia mai. Idia dainai unai tadikaka ruaosi ese idia digu, edia matadia idia penia, bona edia tauanidia dekenai herahera nadidia idia atoa.  
\v 41 Hekure patana namo herea ena latanai idia helai, bona edia vairana dekenai danu pata ta idia atoa, iena latanai bonana namo muramura bona dehoro, idia dekenai lau henia gaudia be unai pata ena latanai idia atoa vadaeni.   
\p
\v 42 “Unai neganai moale karaia orea taudia edia boiboi be hanua taudia idia kamonai. Inai orea be tatau, lebulebu taudia, bona tano kaukau dekena amo idia hakaua mai kekero taudia. Vadaeni idia ese unai tadikaka hahine ruaosi edia imadia dekenai rini idia atoa, bona korona namodia momokani edia kwaradia dekenai idia atoa.   
\p
\v 43 “Vadaeni lau sibona lau laloa, unai hahine ta be ia heudahanai momo dainai ia buruka haraga vadaeni. Vadaeni lau gwau, ‘Idia ese hahine buruka danu heudahanai do idia karaia, a?’  
\v 44 Unai tatau ese unai lebulebu hahine ruaosi Ohola bona Oholiba do idia sihari henia, ariara hahine do idia sihari henia hegeregerena.  
\v 45 To kara maoromaoro taudia ese unai hahine do idia gwauraia kerere, vadaeni heudahanai hahine bona taunimanima alaia hahine edia davana do idia henidia, badina idia be heudahanai hahine, bona rara be edia imadia dekenai.”   
\p
\v 46 Badina be Dirava, Lohiabada ese inai bamona ia hereva, ia gwau, “Tuari orea ta do umui hakaua mai, unai hahine ruaosi do idia hagaria, bona idia dekena amo do idia henaoa.  
\v 47 Bona unai tuari orea taudia ese nadi dekena amo unai hahine ruaosi do idia hodoa, bona edia tuari kaia dekena amo do idia aladia mase, edia natudia tau bona hahine danu do idia aladia mase, bona edia ruma do idia gabudia ore.   
\p
\v 48 “Unai dekena amo lebulebu karadia be inai tano dekenai do lau hadokoa. Bona hahine ibounai ese do idia naria namonamo, idia ese unai lebulebu hahine ruaosi hegeregerena do idia karaia lasi momokani.  
\v 49 Umui tadikaka hahine ruaosi e, emui lebulebu, bona emui kara dika, kaivakuku umui tomadiho henia karadia dainai davana do umui abia. Unai neganai do umui diba lau be Dirava, Lohiabada.”   
\c 24  
\s1 Parabole: Nadua urona  
\p
\v 1 Aiemai hesiai mai guia danu negana, ena lagani namba 9, hua namba 10, bona dina namba 10 dekenai, Lohiabada ese lau dekenai ia hereva, ia gwau,  
\v 2 “Tanobada tauna e, inai dina, hari inai dina, ena ladana do oi torea. Badina be hari dina dekenai, Babulonia ena king ese Ierusalema ia koua hagegea hamatamaia inai.  
\v 3 Parabole ta be egu dagedage besena taudia dekenai do oi gwauraia, do oi gwau, ‘Lohiabada Dirava be inai bamona ia hereva:  
\q1 “ ‘Uro ta be lahi ena latanai do umui atoa,  
\q1 ranu be uro lalonai do umui bubua danu.   
\q1
\v 4 Vamu namona do umui udaia,  
\q1 aena, bona pagana.  
\q1 Turia namodia danu dekena amo uro do umui hahonua.   
\q1
\v 5 Unai vamu be mamoe namona momokani.  
\q1 Iena henunai lahi do umui habadaia.  
\q1 Ranu do umui boilia,  
\q1 turia bona vamu do umui nadua.’ ”   
\p
\v 6 Vadaeni Lohiabada Dirava ese inai bamona ia hereva noho, ia gwau: “Inai hanua, ala-ala taudia momo idia noho hanua, be dika do ia davaria momokani! Ia be uro dikana, mai ena raraka, nega ta idia hagoevaia lasi urona bamona. Vamu ibounai ta ta be uro dekena amo kokia haraga! Namodia do umui tahua gwauraia lasi, do umui kokia kava, badina unai vamu ibounai idia dika vadaeni.  
\v 7 Hanua dekenai ala-ala idia karaia, to rarana be tano dekenai idia bubua lasi, tano ena kahu do ia hunia garina. Lasi, to rarana be nadi ena latanai idia bubua.  
\v 8 Bona lau ese unai rara be unai nadi dekenai lau rakatania, ia hunia diba lasi gabuna. Unuseni ia hedinarai noho, be unai rara ese davana henia totona ia boiboi noho.”   
\p
\v 9 Lohiabada Dirava ma ia hereva inai: “Inai hanua, ala-ala taudia momo idia noho hanua be dika do ia davaria momokani! Lau ese danu au rakuraku do lau haboua, bona do lau habadaia.  
\v 10 Lahi audia momo do umui haboua mai! Lahi do umui habadaia, bona vamu do umui nadua namonamo, vasiahu do umui bubua lao, bona turia do umui gabua ore.  
\v 11 Vadaeni unai uro, auri laboralabora gauna, mai ena anina lasi danu, be gida siahudia ena latanai do umui atoa, vadaeni siahu bada dainai uro ena auri be do ia diaridiari, bona ena miro, bona ena raraka dikana do idia veve lao ore.  
\v 12 To umui hekwarahi kava vadaeni, badina uro ena raraka bona ena miro be lahi ese ia kokia lasi.   
\p
\v 13 “Unai uro ena raraka be Ierusalema ena lebulebu miro herea. Badina be lau ese Ierusalema lau hagoevaia toho, to iena miro badana dekena amo ia goeva lasi. Bona ia be do ia goeva lou diba lasi ia lao bona egu badu mai siahu danu ese Ierusalema dekenai iena dika davana ia henia haorea vadaeni.  
\v 14 Lau, Lohiabada Dirava ese lau hereva vadaeni. Inai kara be do ia vara, bona lau ese do lau karaia. Lau ese do lau laloa lou lasi, do lau bogahisihisi henia lasi, bona egu lalona do lau giroa lasi. Ierusalema ena dala bona ena kara hegeregerena do lau kota henia. Lau Dirava, Lohiabada ese lau hereva noho.”   
\s1 Esekiela ena adavana ia mase  
\p
\v 15 Lohiabada ese lau dekenai ia hereva, ia gwau,  
\v 16 “Tanobada tauna e, gorere haragana dekena amo oiemu adavana, oiemu matana ia ura henia bada noho hahine do lau abia lao. To oiemu lalohisihisi ena toana do oi hedinaraia lasi, do oi tai lasi, bona oiemu matana ena ranu do ia diho lasi.  
\v 17 Do oi hahodi, to lalohisihisi ena regena do oi karaia lasi, bona mase dainai do oi taitai lasi. Dabua dekena amo oiemu kwarana do oi kumia, bona emu aena dekenai tamaka do oi karaia. Oiemu uduna dabua dekenai do oi koua lasi, bona mase totona idia taitai taudia edia aniani do oi ania lasi.”   
\p
\v 18 Vadaeni, daba neganai lau ese taunimanima lau hereva henidia, bona adorahi neganai egu adavana ia mase. Daba rere neganai lau be Lohiabada ese lau ia hamaoroa hegeregerena lau karaia.   
\p
\v 19 Unai neganai taunimanima ese lau idia nanadaia, idia gwau, “Badina dahaka inai bamona oi karaia noho, bona oiemu kara ena anina be dahaka ai dekenai?”   
\p
\v 20 Idia dekenai lau haere, lau gwau, “Lohiabada ese lau dekenai ia hereva, ia gwau,  
\v 21 ‘Israela taudia do oi hamaoroa, do oi gwau: Lohiabada Dirava be inai bamona ia hereva: Kamonai, umui be egu Dubu Helaga ena goada dekenai umui hekokoroku noho. Ia be emui matadia idia moalelaia noho gauna, bona emui laumadia ese idia ura henia noho gauna. To lau Lohiabada ese unai Dubu Helaga do lau hadikaia, bona emui natudia tau bona hahine, Ierusalema lalonai umui rakatania, be tuari kaia dekena amo do idia mase.  
\v 22 Unai neganai umui ese lau Esekiela egu kara hegeregerena do umui karaia, muko dekenai emui uduna do umui koua lasi, bona mase totona idia taitai taudia edia aniani do umui ania lasi.  
\v 23 Emui kwarana kumia dabua be emui kwarana dekenai do idia noho, bona emui tamaka be emui aedia dekenai do idia noho. Emui lalodia do idia hisihisi lasi, bona do umui taitai lasi. To emui kara dikadia dainai emui tauanidia be do idia maragi lao, bona umui ta ta dekenai lalohisihisi ena regena sisina sibona do umui karaia.  
\v 24 Unai neganai lau Esekiela be toa ta umui dekenai, bona lau ese lau karaia karadia be umui ese do umui karaia. Lohiabada ia gwau inai bamona ia vara neganai, umui be do umui diba ia be Dirava, Lohiabada.’ ”   
\p
\v 25 Bona Lohiabada ma ia gwau, “Tanobada tauna e, Dubu Helaga, edia gabu aukana, edia moale bona edia hairai, edia matadia ese idia moalelaia noho, edia lalodia ese idia ura henia noho gauna do lau abia lao. Edia natudia tau bona hahine danu do lau abia lao.  
\v 26 Unai bamona lau karaia dinana dekenai heau mauri tauna ta be oi dekenai do ia mai, Ierusalema idia hadikaia sivarai oi dekenai do ia hamaoroa.  
\v 27 Unai dina dekenai, oiemu uduna do lau kehoa, bona unai tau dekenai do oi hereva, bona oiemu hereva dalana be do lau koua lou lasi. Unai bamona dekenai oi be toa ta do oi lao Israela taudia dekenai, bona do idia diba lau be Lohiabada.”   
\c 25  
\s1 Peroveta hereva Amono taudia edia latanai  
\p
\v 1 Lohiabada ese lau dekenai ia hereva, ia gwau,  
\v 2 “Tanobada tauna e, Amono tano dekenai oiemu matana do oi negea, bona Amono taudia edia latanai do oi peroveta.  
\v 3 Amono taudia do oi hamaoroa, do oi gwau, ‘Lohiabada Dirava ena hereva do umui kamonai. Lohiabada Dirava ese inai bamona ia hereva, ia gwau: Amono taudia e, egu Dubu Helaga idia hamiroa, bona Israela tano idia hadikaia neganai, umui be moale bada. Iuda taudia danu be mai guia danu gabu daudau dekenai idia abia lao neganai umui moalelaia bada herea.  
\v 4 Unai karadia dekenai umui moale dainai, lau ese dina daekau kahana bese taudia edia siahu henunai umui do lau atoa. Idia ese umui do idia halusia. Idia ese emui tano dekenai bona emui taudia edia huanai edia kamepa bona edia ruma do idia haginia. Emui au huahua do idia ania, bona emui rata do idia inua.  
\v 5 Emui hanua badana, Raba, be kamelo edia rei gabuna do lau halaoa, bona Amono taudia edia hanua be mamoe orea edia magu do lau halaodia. Unai neganai do umui diba lau be Lohiabada.’ ”   
\p
\v 6 Badina be Lohiabada Dirava ese inai bamona ia hereva, ia gwau, “Amono taudia e, egu bese Israela edia hisihisi dekenai emui imadia umui patapata bona mai moale bada danu umui roho daekau, roho daekau. Umui ese Israela taudia umui laloa dika henidia.  
\v 7 Unai bamona umui karaia dainai, lau ese idau bese taudia edia siahu henunai umui do lau atoa. Idia ese umui dekena amo do idia henaoa momo. Lau ese umui do lau hadikaia momokani, bona bese idauidau dekena amo umui do lau utua oho, vadaeni umui be bese ta do idia gwauraia lou lasi. Unai neganai do umui diba lau be Lohiabada.”   
\s1 Peroveta hereva Moaba taudia edia latanai  
\p
\v 8 Lohiabada Dirava ese inai bamona ia hereva, ia gwau, “Moaba taudia idia hereva, idia gwau, ‘Iuda besena be bese idauidau ibounai hegeregerena.’  
\v 9 Unai dainai lau ese Moaba ena tano hetoana idia noho hanua namodia momokani do lau durua lasi, vadaeni tuari oreadia ese do idia tuari henidia. Hanua be inai: Bete Iesimoto, Bala Meono, bona Kiriataimi.  
\v 10 Lau ese dina daekau kahana bese taudia, tano kaukau taudia, do lau durua, vadaeni idia ese Moaba tano, bona Amono tano danu do idia halusia. Unai murinai Moaba be bese ta do idia gwauraia lou lasi.  
\v 11 Lau ese Moaba ena dika davana do lau henia. Vadaeni do idia diba lau be Lohiabada.”   
\s1 Peroveta hereva Edoma taudia edia latanai  
\p
\v 12 Lohiabada Dirava be inai bamona ia hereva, ia gwau: “Edoma taudia ese Iuda bese taudia edia dagedage totona davana idia henia, bona idia be kerere momokani unai davana idia henia dainai.”  
\v 13 Unai dainai Lohiabada Dirava be inai bamona ia hereva, ia gwau, “Lau ese egu imana do lau abia isi, Edoma do lau hadikaia totona. Lau ese Edoma ena taunimanima bona ubua gaudia ibounai do lau alaia mase. Edoma do lau hadikaia ore, bona Temana hanua ela bona Dedana hanua dekenai, Edoma taudia be tuari kaia dekena amo do idia mase.  
\v 14 Edoma taudia edia dika davana do lau henia, egu bese Israela taudia edia goada dekena amo. Unai dekena amo Edoma taudia ese egu badu mai siahuna ena mamina do idia abia, vadaeni egu davana henia kara ena anina do idia diba. Lau Dirava, Lohiabada ese lau hereva vadaeni inai.”   
\s1 Peroveta hereva Pilistia taudia edia latanai  
\p
\v 15 Lohiabada Dirava ia hereva, ia gwau, “Nega daudau Pilistia taudia bona Iuda taudia ese idia ta ta dekenai idia tuari henia. Bona Pilistia taudia ese mai dagedage bona badu danu davana henidia totona Iuda taudia idia tuari henia, bona idia hadikadia momokani.  
\v 16 Unai dainai lau Dirava, Lohiabada lau gwauraia inai, lau ese Pilistia taudia do lau tuari henia, bona do lau hadikadia ore. Lau ese Kerete taudia ibounai bona Pilistia ena tano palaka dekenai do mauri noho taudia ibounai do lau alaia mase.  
\v 17 Lau ese Pilistia taudia do lau matakani henia, bona edia dika davana do lau henia momokani. Idia ese egu badu ena mamina do idia abia momokani. Unai neganai do idia diba lau be Lohiabada.”   
\c 26  
\s1 Peroveta hereva Turo taudia edia latanai  
\p
\v 1 Aiemai hesiai mai guia danu negana, ena lagani namba 11, hua ginigunana, ena dina ginigunana dekenai, Lohiabada ese lau dekenai ia hereva, ia gwau,  
\v 2 “Tanobada tauna e, Turo hanua badana ena taudia ese Ierusalema idia herevalaia mai moale danu, idia gwau, ‘Namo bada, Ierusalema ia dika vadaeni, iena magu iduaradia idia makohia vadaeni, to iseda magu iduaradia idia kehoa noho inai. Ierusalema ena hoihoi gaukara be hari ia dika dainai, Turo ena hoihoi gaukara be do idia namo bada lou. Namo bada herea!’ ”   
\p
\v 3 Unai dainai Lohiabada Dirava be inai bamona ia hereva noho, ia gwau: “Turo e, kamonai, lau ese oi lau dagedage henia noho. Lau ese bese momo do lau mailaia, oi do idia hadikaia totona, davara ese hurehure ia mailaia bamona.  
\v 4 Idia ese Turo ena magu do idia hadikaia ore, bona oiemu kohoro do idia veria diho, vadaeni lau ese Turo ena kahu bona momoru do lau daroa, bona nadi kavakava gabuna do lau halaoa.  
\v 5 Turo be davara ena motumotu maragina do ia lao, haoda taudia ese edia reke do idia hakaukaua gabuna sibona. Lau, Lohiabada Dirava lau hereva vadaeni. Bona bese idauidau taudia ese Turo dekena amo ena kohu do idia henaoa.  
\v 6 Idia ese edia tuari kaia dekena amo Turo ena taunimanima, tano badana ena hanua ibounai lalonai idia noho, do idia alaia ore. Unai neganai Turo taudia be do idia diba lau be Lohiabada.”   
\p
\v 7 Lohiabada Dirava be inai bamona ia hereva, ia gwau: “Kamonai! Lau ese tanobada ena king badana, king ibounai ia hereaia tauna, Babulonia ena king Nebukanesa, do lau mailaia, Turo do ia tuari henia totona. Ia ese mirigini kahana dekena amo do ia mai, mai ena tuari taudia momo herea, mai hosi bona kariota, bona hosi guia taudia momo herea danu.  
\v 8 Ia ese Turo ena tano badana ena hanua ibounai lalonai idia noho taudia be tuari kaia dekena amo do ia alaia mase. Ia ese magu ta dekena amo Turo do ia hagegea, bona tano momo do ia haboua, bona kesi momo do ia abia isi, magu bamona, Turo do ia hadikaia totona.  
\v 9 Nebukanesa danu ese au badadia bona latadia dekena amo Turo ena magu do ia botaia auka ela bona ia hamakohia momokani. Bona iena tuari taudia ese Turo ena kohoro be auri iradia dekena amo do idia hamorua diho.  
\v 10 Nebukanesa ena hosi be momo herea dainai, edia aedia edia kahu ese Turo hanua do ia koua. Iena tuari taudia ese Turo ena magu iduara dekena amo do idia raka vareai, orea ta ese maguna ia hamakohia hanua bema idia raka vareai hegeregerena. Unai neganai hosi guia taudia bona treila bona kariota edia regena ese Turo ena magu do ia hamarerea, do idia heudeheude.   
\p
\v 11 “Nebukanesa ena hosi edia aedia ese Turo ena ariara ibounai do idia moia, bona edia guia tuari taudia ese Turo taudia ibounai do idia alaia mase. Turo ena du badadia bona aukadia momokani be tano dekenai do idia moru.  
\v 12 Nebukanesa ena tuari taudia ese Turo ena kohu do idia henaoa ore, bona iena hoihoi noho kohu do idia abia kava. Hanua ena magu do idia hamakohia ore momokani, bona hanua ena ruma namo herea ibounai do idia hadikaia ore. Turo ena nadi, bona au bona momoru ibounai be davara lalonai do idia negea diho.  
\v 13 Turo ena ane edia regena do lau hadokoa, iena gita edia regena be do idia kamonai lou lasi.  
\v 14 Turo be nadi kavakava gabuna do lau halaoa, gwarume abia reke ena hakaukaua gabuna sibona. Nega ta dekenai Turo do idia haginia lou lasi, badina lau Dirava, Lohiabada lau hereva vadaeni.”   
\p
\v 15 Lohiabada Dirava ese Turo hanua ia hereva henia inai bamona, ia gwau, “Do oi moru neganai, oiemu lalonai idia bero taudia be do idia tai, mai boiboi danu, bona ala-ala be do ia bada oiemu taunimanima edia huanai. Unai neganai Turo kahirakahira idia noho kone taudia be do idia heudeheude bada, ani?  
\v 16 Unai neganai danu davara kone ena king taudia ibounai be edia terona dekena amo do idia diho, edia dabua badadia do idia atoa siri, bona edia dabua mai edia herahera danu do idia kokia. Mai heudeheude bona mai gari danu edia dabua do idia kokia, bona tano dekenai do idia helai. Turo ena dika dainai, do idia hoa bada mai gari danu.  
\v 17 Bona Turo ena latanai inai lalohisihisi ane do idia abia, do idia gwau:  
\q1 “Mai ena sivarai bada hanua,  
\q1 be idia hadikaia vadaeni!  
\q1 Iena lagatoi be davara lalonai idia boio vadaeni.  
\q1 Guna Turo be davara ena gabu aukana.  
\q1 Turo mai ena noho taudia danu ese,  
\q1 guna idia be davara ibounai idia biagua,  
\q1 bona Turo taudia ese,  
\q1 kone dekenai noho taudia idia hagaria bada herea.   
\q1
\v 18 To harihari,  
\q1 Turo ia moru dinana dekenai,  
\q1 motumotu be idia heudeheude noho.  
\q1 Io, davara ena motumotu taudia idia gari noho, mai hoa danu,  
\q1 Turo ia moru vadaeni dainai.”   
\p
\v 19 Badina be Lohiabada Dirava be inai bamona ia hereva noho, ia gwau, “Turo e, lau ese anina lasi hanua oi do lau halaoa, taunimanima idia noho diba lasi hanuadia hegeregerena. Lau ese davara ena ranu dekena amo oi do lau koua, do oi diho momokani.  
\v 20 Unai neganai oi do lau doria diho, hel ena guri dobuna, mase taudia idia noho gabuna dekenai do oi lao. Vadaeni sene taudia, idia mase vadaeni taudia danu do oi noho. Unuseni do oi noho, dika hanaihanai gabuna dekenai, mase taudia danu. Unai dainai tau ta ese oi dekenai do ia noho lasi, bona mauri taudia edia tano dekenai do oi noho lou lasi.  
\v 21 Dala dika rohorohona dekena amo oi do lau hadokoa, vadaeni do oi boio ore momokani. Taunimanima ese oi do idia tahua, to idia ese nega ta oi do idia davaria lou lasi. Lau, Lohiabada Dirava ese lau hereva vadaeni.”   
\c 27  
\s1 Lalohisihisi ane Turo hanua totona  
\p
\v 1 Lohiabada ese lau dekenai ia hereva, ia gwau,  
\v 2 “Tanobada tauna e, Turo ia mase vadaeni dainai, lalohisihisi ane do oi abia.  
\v 3 Turo, davara ena iduara dekenai ia noho hanua badana, bona kone tanodia momo taudia edia hoihoi gabuna, do oi hamaoroa, do oi gwau: Lau, Lohiabada Dirava be inai bamona lau hereva noho, lau gwau:  
\b  
\q1 “Turo e, guna oi hereva vadaeni, oi gwau,  
\q1 ‘Egu hairaina be bada herea.’   
\q1
\v 4 Oiemu noho gabuna be davara dekenai.  
\q1 Oi idia haginia taudia ese,  
\q1 sisima mai hairaina bamona oi idia karaia.   
\q1
\v 5 Oiemu audia ibounai be kasuarina audia,  
\q1 Heremona Ororo dekena amo,  
\q1 bona oiemu au tubua be sida auna ta,  
\q1 Lebanona Ororo dekena amo.   
\q1
\v 6 Oiemu bara be Basana ena ouki audia dekena amo idia karaia.  
\q1 Oiemu reirei be Kupro ena kasuarina audia dekena amo idia karaia,  
\q1 bona elefante doadia dekena amo idia hagoadaia.   
\q1
\v 7 Dabua aukana mai ena turia herahera danu,  
\q1 be Aigupito dekena amo oi abia.  
\q1 Unai dabua auka dekena amo oiemu palai oi karaia,  
\q1 bona oiemu pepe danu.  
\q1 Dabua namona, ena kala bulu bona kakakaka,  
\q1 be Elisa kone tano dekena amo oi abia.  
\q1 Unai be dina ena siahu koua dabua namona totona.   
\q1
\v 8 Oiemu bara taudia be Sidono bona Aravada idia mai taudia.  
\q1 Oiemu davara diba momo taudia, Turo taudia ese,  
\q1 oiemu lalona dekenai idia gaukara noho.  
\q1 Idia be oiemu taria taudia.   
\q1
\v 9 Gebala ena tau badadia,  
\q1 sisima kamuta gaukara diba momo taudia,  
\q1 ese oiemu reirei idia naria,  
\q1 bona reirei ena matu idia koua namonamo.  
\q1 Davara ena lagatoi bona kada ibounai,  
\q1 be oi dekenai idia kamokau,  
\q1 oiemu hoihoi kohu idia hoihoilaia.   
\b  
\p
\v 10 “Parasa bona Ludia bona Libia dekena amo taudia be oiemu tuari taudia, oiemu tuari orea lalonai. Idia ese edia kesi bona auri kwara gaudia be oiemu haba edia latanai idia taua dae. Idia dekena amo hairai oi abia.  
\v 11 Aravada bona Heleke taudia be oiemu magudia edia latanai idia gini, bona Gamada taudia be oiemu kohoro lalonai. Idia ese oiemu magudia ibounai edia latanai edia kesi idia taua dae. Bona unai dekena amo oiemu hairai be bada herea momokani.   
\p
\v 12 “Tarasisi taudia be oiemu taudia danu idia hoihoi karaia, oiemu kohu idauidau be momo herea dainai. Idia ese siliva, bona auri, bona auri haragana, bona auri metauna, oi dekenai idia henia, edia hoihoi gaudia edia davana.  
\v 13 Iavana bona Tubala bona Meseka taudia be umui Turo taudia danu idia hoihoi karaia, idia ese hesiai mai guia taudia, bona auri laboralabora gaudia umui dekenai idia henia, emui hoihoi gaudia edia davana.  
\v 14 Bete Togarama taudia ese hosi, bona tuari hosi, bona doniki umui dekenai idia henia, emui hoihoi gaudia edia davana.   
\p
\v 15 “Rodo taudia be umui danu idia hoihoi karaia. Kone tanodia momo lalonai, emui hoihoi gabudia idia noho, bona idia ese elefante doadia bona eboni audia idia mailaia, emui hoihoi gaudia edia davana.  
\v 16 Edoma taudia be umui danu idia hoihoi karaia, emui kohu be momo herea dainai. Idia ese samarago nadi namodia, bona dabua kakakaka, bona dabua mai ena turia herahera, bona dabua auka namo herea, bona davara nadi namodia, bona kavabukavabu danu umui dekenai idia henia, emui hoihoi gaudia edia davana.   
\p
\v 17 “Iuda bona Israela tano taudia be umui danu idia hoihoi karaia. Idia ese uiti, olive dehoro, fig huahuadia matamatadia, hani, bona bonana namo muramura umui dekenai idia henia, emui hoihoi gaudia edia davana.  
\v 18 Damaseko taudia be umui dekena amo idia hoihoi, emui kohu be momo herea dainai, bona idia ese Helebono ena uaina, bona Sahara ena mamoe huina kurokurona umui dekenai idia henia, emui hoihoi gaudia edia davana.   
\p
\v 19 “Usala dekenai idia noho Dano taudia bona Iavana taudia danu ese oiemu kohu idia hoia. Idia ese auri haragana, kasia aniani ena mamina hanamoa muramurana, bona tohu umui dekenai idia henia, emui kohu edia davana.  
\v 20 Dedana taudia ese umui dekenai hosi edia doruna dabuadia idia hoia lao, emui kohu do idia abia totona.  
\v 21 Arabia bona Kedara lohia taudia ese umui ura bada gaudia mamoe, mamoe ena natudia, bona nanigosi dekena amo emui kohu idia hoia.   
\p
\v 22 “Sieba bona Rama edia hoihoi taudia be umui emui kohu idia abia totona, idia ese aniani ena mamina hanamoa muramura namo herea idauidau, bona herahera nadidia idauidau ibounai, bona golo umui dekenai idia henia.  
\v 23 Harana bona Kane bona Eden bona Asuru bona Kilimada taudia danu be umui dekenai hoihoi idia karaia.  
\v 24 Idia ese dabua namo herea, bona dabua ena kala bulu, bona dabua mai ena turia herahera, bona geda ena dabua, kala idauidau momo, idia lokua namonamo bona varo dekenai idia kwatua gaudia be umui dekenai idia hoihoilaia.  
\v 25 Tarasisi lagatoi momo be umui ese umui hoia, emui hoihoi gaudia do idia abia lao totona.  
\b  
\q1 “Turo e, oi be sisima ta davara ena latanai bamona.  
\q1 Oiemu kohu momo be metau herea.   
\q1
\v 26 Oiemu bara taudia ese oi idia bara lao,  
\q1 davara dobu dekenai.  
\q1 To laurabada ia toa goada herea dainai oi bubua,  
\q1 oi diho davara lalonai.   
\q1
\v 27 Oiemu kohu momo, oiemu hoihoi gaudia,  
\q1 oiemu kuru taudia,  
\q1 bona oiemu taria taudia,  
\q1 oiemu sisima kamuta taudia,  
\q1 bona oiemu hoihoi taudia,  
\q1 oiemu tuari taudia ibounai,  
\q1 bona oiemu lalonai noho taudia ibounai,  
\q1 be davara lalonai idia diho,  
\q1 davara lalonai dika oi davaria dinana dekenai.   
\q1
\v 28 Oiemu kuru taudia edia tai idia kamonai neganai,  
\q1 kone dekenai noho taudia ibounai idia heudeheude.   
\b  
\q1
\v 29 “Sisima bona kada ibounai dekena amo,  
\q1 kuru taudia do idia diho kone dekenai.  
\q1 Bara taudia bona taria taudia ibounai be,  
\q1 kone dekenai do idia gini noho.   
\q1
\v 30 Idia ese oi Turo dainai do idia tai noho.  
\q1 Do idia tai dikadika,  
\q1 bona edia kwaradia dekenai kahu do idia negea,  
\q1 bona kahu ena latanai do idia hekure giroagiroa.   
\q1
\v 31 Turo e, oi dainai inai sisima bona kada kuru taudia ese,  
\q1 edia kwaradia huina do idia kakasia ore,  
\q1 bona puse dabua do idia karaia.  
\q1 Oi dainai do idia tai,  
\q1 mai edia lalohisihisi momokani.  
\q1 Edia laumadia danu do idia hisihisi.   
\q1
\v 32 Oi dainai idia taitai noho neganai,  
\q1 idia ese inai lalohisihisi ane do idia abia,  
\q1 do idia gwau,  
\q1 ‘Tanobada lalonai edena hanua be Turo hanua hegeregerena?  
\q1 Madi, ia be hari davara ena lalonai,  
\q1 mai regerege ta lasi ia noho.’   
\q1
\v 33 Guna, oiemu hoihoi kohudia,  
\q1 be davara kahadia idauidau dekena amo idia mai neganai,  
\q1 bese momo taudia edia lalodia oi hamoalea.  
\q1 Oiemu kohu momo bona emu hoihoi gaudia dekena amo,  
\q1 tanobada ena king taudia dekenai kohu momo oi henia.   
\q1
\v 34 To hari davara ese oi ia hadikaia vadaeni.  
\q1 Oi be davara ena lalonai oi diho dobu herea vadaeni.  
\q1 Oiemu hoihoi kohudia bona emu gaukara taudia ibounai,  
\q1 be oi danu idia diho vadaeni.   
\q1
\v 35 Kone tanodia taudia ibounai,  
\q1 be oi dainai idia hoa bada noho.  
\q1 Edia king taudia idia gari bada noho.  
\q1 Edia vairadia ese edia gari ena toana ia hedinaraia noho.   
\q1
\v 36 Bese idauidau edia hoihoi taudia ese oiemu sivarai,  
\q1 be mai laloa dika bona gari danu idia herevalaia noho.  
\q1 Oiemu dokona be mai gari danu,  
\q1 bona do oi boio momokani,  
\q1 ia lao bona hanaihanai.”   
\c 28  
\s1 Peroveta hereva Turo ena king ena latanai  
\p
\v 1 Lohiabada ese lau dekenai ia hereva, ia gwau,  
\v 2 “Tanobada tauna e, Turo ena king do oi hamaoroa, lau Dirava, Lohiabada ese ia dekenai lau hereva noho, lau gwau: Oi be hekokoroku dekena amo oi sibona oi abia isi, bona oi gwau oi be dirava ta. Oi gwau dirava ta ena kara bamona, oi be terona ta dekenai oi helai, bona davara ese oi ia hagegea noho. Io, oi gwau oiemu aonega be dirava ta ena aonega hegeregerena, to oi be taunimanima sibona, dirava lasi.  
\v 3 Oi laloa danu oiemu aonega ese Daniela ena aonega ia hereaia noho, bona oi laloa hunia gauna ta be oi dekena amo ia hunia diba lasi.   
\p
\v 4 “Momokani oiemu aonega bona oiemu diba dainai oi ese kohu momo oi davaria vadaeni, bona golo bona siliva momo emu haboua ruma lalonai oi haboua vadaeni.  
\v 5 Hoihoi karadia dekenai oiemu aonega be bada dainai, oi ese oiemu kohu oi habadaia. Bona inai emu kohu bada dainai oiemu hekokoroku be ia bada momokani!   
\p
\v 6 “Unai dainai lau, Lohiabada Dirava ese inai bamona lau hereva noho: Oi ese oi laloa oiemu aonega be dirava ta ena aonega hegeregerena dainai,  
\v 7 lau ese idau bese taudia, dagedage taudia momokani, do lau mailaia, idia ese oi do idia tuari henia. Idia ese oiemu aonega dekena amo oi abia hairai gaudia ibounai do idia hadikaia ore.  
\v 8 Idia ese oi do idia alaia mase, bona davara ena lalonai oi do idia doria, do oi diho ore momokani.  
\v 9 Oi alaia totona taudia oi dekenai idia mai neganai, oi be do oi gwau oi be dirava ta, a? Lasi, unai ala-ala taudia edia vairanai oi be taunimanima sibona, dirava ta lasi.  
\v 10 Oi be sisia sibona bamona do oi mase, idau bese taudia edia imadia dekena amo. Lau, Lohiabada Dirava, lau hereva vadaeni inai.”   
\s1 Lalohisihisi ane Turo ena king totona  
\p
\v 11 Lohiabada ese lau dekenai ma ia hereva, ia gwau,  
\v 12 “Tanobada tauna e, Turo ena king dainai lalohisihisi ane ta do oi abia, bona ia do oi hamaoroa, do oi gwau, ‘Lohiabada Dirava ese inai bamona ia hereva, ia gwau:  
\b  
\q1 “ ‘Turo ena king e,  
\q1 guna oi be namo herea bona goeva momokani,  
\q1 aonega dekenai oi honu,  
\q1 bona oiemu hairaina be ta ese ia hereaia lasi.   
\q1
\v 13 Oi be Eden dekenai oi noho,  
\q1 Dirava ena uma gabuna be unai.  
\q1 Herahera nadidia idauidau ibounai oiemu dabua dekenai oi atoa,  
\q1 sadio, topasio, iasipa,  
\q1 krusolito, berulio, onuku,  
\q1 sapairo, barekete, bona samarago.  
\q1 Oiemu herahera haida danu be golo dekena amo idia karaia,  
\q1 oiemu vara dinana dekenai inai gau namodia,  
\q1 be oi totona idia karaia hegaegae.   
\q1
\v 14 Kerubi aneru latana,  
\q1 gimaia aneru unai,  
\q1 be lau ese oi lau halaoa.  
\q1 Unai dagi totona oi lau abia hidi.  
\q1 Oi be Dirava ena ororo helagana dekenai oi noho,  
\q1 bona oi be herahera nadi edia diaridiari ena huanai oi raka.   
\q1
\v 15 Oiemu vara dinana dekena amo,  
\q1 oi be mai emu kerere lasi,  
\q1 oiemu dala ibounai lalonai,  
\q1 ia lao bona oiemu kara dika,  
\q1 be oiemu lalona dekenai ia vara hedinarai.   
\q1
\v 16 Oiemu hoihoi karadia momo herea dainai,  
\q1 oiemu lalona dekenai dagedage ia vara,  
\q1 bona oi kara dika.  
\q1 Unai dainai Dirava ena ororo helagana dekena amo,  
\q1 lau ese oi lau negea diho,  
\q1 mai emu hemarai bada danu.  
\q1 Gimaia aneruna e,  
\q1 nadi mai diaridiari edia huanai,  
\q1 dekena amo oi lau lulua lao.   
\q1
\v 17 Oiemu kudouna be ia hekokoroku lao,  
\q1 oiemu hairai bada dainai.  
\q1 Oi ese oiemu aonega oi hamiroa,  
\q1 oiemu hairaina dainai.  
\q1 Unai dainai lau ese tanobada dekenai oi lau negea diho.  
\q1 King taudia edia vairanai lau ese oi lau hahemaraia,  
\q1 idia ese oi do idia itaia noho,  
\q1 bona do idia gari totona.   
\q1
\v 18 Oiemu kara dika momo herea,  
\q1 bona oiemu hoihoi kara koikoidia dekena amo,  
\q1 oi ese oiemu gabu helagadia oi hamiroa vadaeni.  
\q1 Unai dainai oiemu hanua, Turo,  
\q1 dekenai lahi lau havaraia,  
\q1 bona ia ese Turo ia gabua ore.  
\q1 Oi idia itaia noho taudia ibounai edia vairana dekenai,  
\q1 lau ese kahu dekenai oi lau halaoa, tano ena latanai.   
\q1
\v 19 Bese idauidau edia huanai,  
\q1 oi idia diba taudia ibounai,  
\q1 be oi dainai idia gari mai hoa danu,  
\q1 unai kara be idia danu dekenai do ia vara garina.  
\q1 Mai gari bada danu oiemu dokona ia vara.  
\q1 Oi be oi boio vadaeni,  
\q1 ia lao bona hanaihanai.’ ”   
\s1 Peroveta hereva Sidono ena latanai  
\p
\v 20 Lohiabada ese lau dekenai ia hereva, ia gwau,  
\v 21 “Tanobada tauna e, Sidono hanua dekenai oiemu matana do oi negea, bona Sidono taudia edia latanai do oi peroveta.  
\v 22 Sidono taudia do oi hamaoroa, do oi gwau: Lohiabada Dirava ena hereva do umui kamonai, ia ese umui ia herevalaia noho inai bamona, ia gwau:  
\b  
\q1 “ ‘Sidono e, lau ese oi lau dagedage henia inai,  
\q1 bona oi dekenai do lau karaia karadia dainai,  
\q1 taunimanima ese egu ladana do idia hanamoa.  
\q1 Badina lau ese oiemu taudia edia dika davana,  
\q1 be do lau henia momokani,  
\q1 bona egu helaga do lau hedinaraia neganai,  
\q1 idia be do idia diba lau be Lohiabada.   
\q1
\v 23 Badina hanaia gorere dikana,  
\q1 be Sidono lalonai do lau siaia,  
\q1 bona rara danu oiemu hanua edia lalonai do lau bubua,  
\q1 tuari dainai.  
\q1 Kahana kahana ibounai dekena amo tuari taudia ese,  
\q1 Sidono do idia tuari henia,  
\q1 vadaeni Sidono taudia be tuari taudia ese do idia alaia mase.  
\q1 Unai neganai Sidono taudia do idia diba lau be Lohiabada.’ ”   
\s1 Dirava ese Israela do ia hanamoa  
\p
\v 24 Lohiabada ia gwau, “Israela tano idia hegegea noho bese taudia ese ava ginigini o au ginigini bamona Israela taudia do idia hisihisi henidia lou lasi, bona idia ese Israela taudia do idia hereva dika henia o negea lou lasi, guna idia karaia bamona. Unai neganai do idia diba lau be Lohiabada Dirava.”   
\p
\v 25 Lohiabada Dirava ese inai bamona ia hereva noho, ia gwau, “Israela besena taudia be edia huanai gabu idauidau dekenai idia noho besedia dekena amo do lau haboudia lou neganai, lau ese egu helaga be Israela taudia dekenai do lau hedinaraia, bese idauidau edia vairanai. Unai neganai Israela taudia be edia tano korikori dekenai do idia noho. Unai tano be egu hesiai tauna Iakobo dekenai lau henia.  
\v 26 Idia be unai tano dekenai do idia noho namonamo. Ruma do idia haginia, bona vain umadia do idia hadoa. Israela tano kahirakahira idia noho bese taudia, idia ese Israela taudia idia negea taudia, ibounai edia dika davana do lau henia murinai, Israela taudia be do idia noho namonamo. Unai neganai do idia diba lau be Lohiabada, edia Dirava.”   
\c 29  
\s1 Peroveta hereva Aigupito tano ena latanai  
\p
\v 1 Aiemai hesiai mai guia danu negana, ena lagani namba 10, hua namba 10, ena dina namba 12 dekenai Lohiabada ese lau dekenai ia hereva, ia gwau,  
\v 2 “Tanobada tauna e, Aigupito ena king Farao ia noho gabuna dekenai oiemu matana do oi negea, bona iena latanai do oi peroveta,  
\v 3 do oi gwau, lau Dirava, Lohiabada ese inai bamona lau hereva noho, lau gwau:  
\b  
\q1 “Farao, Aigupito ena king e,  
\q1 lau ese oi lau dagedage henia inai,  
\q1 oi be huala badana,  
\q1 oiemu sinavai edia lalonai oi hekure noho.  
\q1 Oi gwau, ‘Naila Sinavai be lauegu,  
\q1 lau ese lau karaia.’   
\q1
\v 4 To lau Lohiabada ese kimai dekena amo,  
\q1 oiemu aukina do lau dogoatao,  
\q1 bona oiemu sinavai edia gwarume,  
\q1 be oiemu kopina dekenai do lau atodia,  
\q1 oi dekenai do idia kamokau.  
\q1 Vadaeni oiemu sinavai edia huanai dekena amo oi do lau veria daekau,  
\q1 oiemu sinavai gwarume ibounai,  
\q1 oiemu kopina dekenai idia kamokau gaudia danu.   
\q1
\v 5 Unai neganai lau ese tano kaukau dekenai oi do lau negea lao,  
\q1 oi bona emu sinavai gwaurume ibounai.  
\q1 Oi be taunimanima idia noho lasi tanona dekenai do oi moru,  
\q1 bona tau ta ese umui do ia haboua lasi,  
\q1 ta ese umui do ia guria lasi.  
\q1 Tano ena boroma bona ataiai manudia dekenai umui do lau henia,  
\q1 idia ese umui do idia ania ore.   
\b  
\p
\v 6 “Unai neganai Aigupito dekenai noho taudia ibounai be do idia diba, lau be Lohiabada. Badina Israela taudia ese umui Aigupito taudia idia abidadama henia umui ese idia do umui durudia, to idia umui durua lasi, umui be siriho manokana bamona dainai.  
\v 7 Israela taudia ese edia imadia dekenai umui idia dogoatao neganai, siriho bamona umui makohia, bona edia pagadia umui gwadaia. Bona Israela taudia be umui dekenai idia tabekau neganai umui makohia, vadaeni edia dorudia idia dika.   
\p
\v 8 “Unai dainai lau, Lohiabada Dirava be inai bamona lau hereva noho, lau gwau: Aigupito e, oi kamonai, tuari kaia be oiemu latanai do lau mailaia, vadaeni oiemu taunimanima bona ubua gaudia do lau alaia mase.  
\v 9 Aigupito be tuari orea ta ese do idia hadikaia, bona anina lasi gabuna do idia halaoa. Unai neganai do umui diba lau be Lohiabada.  
\p “Aigupito e, oi ese hereva oi gwauraia, oi gwau, ‘Naila Sinavai be lauegu, lau ese lau karaia,’  
\v 10 unai dainai, oi kamonai, lau ese oi do lau dagedage henia, bona oiemu sinavai ibounai do lau dagedage henidia danu. Lau ese Aigupito tano be do lau hadikaia, bona anina lasi gabuna do lau halaoa, Migidola dekena amo ia lao bona Asiwana, ia lao bona Etiopia ena tano hetoana.  
\v 11 Unai tano dekenai, taunimanima ta o boroma ta ese do ia raka hanaia lasi. Lagani 40 lalonai taunimanima bona boroma be unuseni do idia noho lasi.  
\v 12 Lau ese Aigupito do lau hadikaia momokani, vadaeni ia be lagani 40 lalonai anina lasi do ia noho, bona iena hanua uma tano edia dika ese idau bese edia uma tano ena dika do ia hanaia. Ma lau ese danu Aigupito taudia be heau mauri taudia do lau halaodia. Idia be tano idauidau momo dekenai do idia heau lao, edia huana dekenai do idia noho.”   
\p
\v 13 Lohiabada Dirava ese ma ia gwau, “Lagani 40 do idia ore, vadaeni Aigupito taudia be edia huanai idia noho besedia dekena amo ma do lau haboua lou.  
\v 14 Vadaeni Aigupito ena noho namo do lau havaraia lou, bona Pataro tano, edia sene taudia edia tano, lalonai ma do lau hakaudia vareai lou. Unai gabu dekenai, Aigupito be basileia manokana ta do lau halaoa.  
\v 15 Basileia ibounai edia huanai ia be do ia maragi herea. Bona ia ese nega ta basileia idauidau do ia biagudia lou lasi.  
\v 16 Israela besena taudia ese Aigupito do idia abidadama henia lou lasi, bona durua totona Israela taudia ese Aigupito do idia noia lou lasi, badina hari Israela ia diba unai tano dekenai noinoi be kara kerere. Unai neganai Israela taudia be do idia diba lau be Lohiabada Dirava.”   
\s1 King Nebukanesa ese Aigupito do ia halusia  
\p
\v 17 Aiemai hesiai mai guia danu negana, ena lagani namba 27, hua ginigunana ena dina ginigunana dekenai, Lohiabada ese lau Esekiela dekenai ia hereva, ia gwau,  
\v 18 “Tanobada tauna e, Nebukanesa, Babulonia ena king ese iena tuari orea ia siaia, Turo hanua do idia tuari henia totona. King ese iena tuari taudia dekenai gaukara metau ia henidia dainai, tuari taudia edia kwaradia idia kebere lao, bona edia pagadia idia toto dikadika. To king bona iena tuari taudia ese gau ta Turo dekena amo idia abia lasi, edia tuari auka, bona edia gaukara bada ibounai be hekwarahi kava.  
\v 19 Unai dainai lau Lohiabada Dirava be inai bamona lau hereva noho, lau gwau: Kamonai, lau ese Aigupito tano be Nebukanesa, Babulonia ena king dekenai do lau henia. Ia ese Aigupito ena kohu namodia do ia abia lao, do ia henaoa ore momokani. Unai kohu dekena amo iena tuari taudia edia hekwarahi davana do ia henia.  
\v 20 Lau ese Aigupito tano Nebukanesa dekenai do lau henia, iena hekwarahi ena davana, badina be Babulonia tuari taudia be lau dekenai idia gaukara noho. Lau, Lohiabada Dirava ese lau hereva noho inai.   
\p
\v 21 “Unai bamona ia vara neganai, lau ese Israela taudia do lau hagoadaia, doa ta bamona. Bona lau ese oi Esekiela, oiemu dala do lau karaia, vadaeni oi ese hereva do oi gwauraia hedinarai mai goada danu, bona taunimanima ibounai ese oi dekenai do idia kamonai. Unai neganai do idia diba lau be Lohiabada.”   
\c 30  
\s1 Lohiabada ese Aigupito ena dika davana do ia henia  
\p
\v 1 Lohiabada ese lau dekenai ma ia hereva lou, ia gwau,  
\v 2 “Tanobada tauna e, do oi peroveta, bona do oi gwau, lau Dirava, Lohiabada egu hereva be inai! Inai egu hereva do oi boiboi:  
\b  
\q1 “Gari bada dinana ia mai noho!   
\q1
\v 3 Inai dina be ia kahirakahira vadaeni.  
\q1 Lohiabada ena dina ia kahirakahira vadaeni.  
\q1 Ia be ori momo dinana,  
\q1 bese idauidau do ia hadikadia dinana.   
\q1
\v 4 Aigupito dekenai tuari do ia vara,  
\q1 bona lalohisihisi bada,  
\q1 be Etiopia dekenai do ia vara.  
\q1 Aigupito lalonai taunimanima momo do idia alaia mase,  
\q1 bona Aigupito ena kohu,  
\q1 be bese ta ese do ia abia lao.  
\q1 Aigupito ena goada badina gabudia,  
\q1 be do idia makohia.   
\b  
\p
\v 5 “Etiopia bona Putu bona Ludia, Arabia bona Libia, Aigupito idia durua tano haida edia taudia danu, be Aigupito taudia danu tuari dekenai do idia mase.”   
\p
\v 6 Lohiabada Dirava ia hereva noho inai:  
\b  
\q1 “Aigupito idia durua noho taudia be do idia moru,  
\q1 bona Aigupito ena siahu,  
\q1 ia hekokorokulaia gauna be do ia manoka lao.  
\q1 Migidola dekena amo ia lao bona Asiwana dekenai,  
\q1 Aigupito ena durua taudia,  
\q1 be tuari dekenai do idia mase.  
\q1 Lau Lohiabada Dirava lau hereva noho inai.   
\q1
\v 7 Aigupito be anina lasi tano,  
\q1 be tuari taudia ese do idia halaoa.  
\q1 Aigupito idia hagegea besedia,  
\q1 Aigupito idia durua besedia,  
\q1 edia tano danu be anina lasi gabu do idia halaoa.  
\q1 Unai edia tano ena hanua ibounai danu,  
\q1 be idia hadikaia ore hanua edia huanai do idia noho.   
\q1
\v 8 Unai neganai lau ese Aigupito,  
\q1 be lahi dekenai do lau gabua,  
\q1 bona iena durua taudia ibounai be do idia mase.  
\q1 Unai neganai do idia diba lau be Lohiabada.   
\b  
\p
\v 9 “Unai dina dekenai lau ese hereva gwauraia taudia Etiopia dekenai do lau siaia haraga, idia do lau sisiba henidia, bona edia noho namo dekena amo do lau hagaridia totona. Aigupito ena sivarai idia kamonai neganai, Etiopia taudia edia lalodia do idia hisihisi bada herea. Badina unai dina be ia mai noho momokani!”   
\b  
\q1
\v 10 Lohiabada Dirava be inai bamona ia hereva noho:  
\q1 “Nebukanesa, Babulonia ena king ena siahu dekena amo,  
\q1 lau ese Aigupito ena kohu momo do lau haorea.   
\q1
\v 11 Nebukanesa, mai ena tuari orea,  
\q1 edia dagedage ese,  
\q1 bese idauidau ibounai edia dagedage ia hanaia noho.  
\q1 Inai Babulonia tuari orea,  
\q1 be Aigupito hadikaia ore totona do lau mailaia vareai.   
\q1
\v 12 Lau ese Naila ena sinavai ibounai do lau hakaukaua,  
\q1 bona Aigupito tano,  
\q1 be tau dikadia dekenai do lau hoia.  
\q1 Idau bese taudia edia imadia dekena amo,  
\q1 lau ese Aigupito tano,  
\q1 mai ena anina ibounai do lau hadikaia ore.  
\q1 Lau Lohiabada lau hereva vadaeni inai.”   
\b  
\q1
\v 13 Lohiabada Dirava be inai bamona ma ia hereva noho:  
\q1 “Kaivakuku bona dirava koikoidia,  
\q1 Memepisi idia noho gaudia,  
\q1 be do lau hadikaia ore momokani.  
\q1 Aigupito tano dekenai king ta do ia noho lou lasi.  
\q1 Unai dekena amo lau ese gari bada,  
\q1 be Aigupito ena tano dekenai do lau havaraia.   
\q1
\v 14 Pataro be anina lasi gabuna do lau halaoa,  
\q1 bona Soana be lahi dekena amo do lau gabua.  
\q1 Tebe hanua ena dika davana do lau henia.   
\q1
\v 15 Pelusio, Aigupito ena gabu aukana ena latanai,  
\q1 egu badu mai siahu bada danu do lau bubua diho,  
\q1 bona Tebe ena kohu momo do lau haorea.   
\q1
\v 16 Aigupito be lahi dekenai do lau gabua,  
\q1 bona Pelusio taudia ese,  
\q1 hisihisi bada herea do idia abia.  
\q1 Tebe ena magudia be do idia makohia parara,  
\q1 bona tuari orea do idia vareai.  
\q1 Memepisi be dina ibounai tuari ese do ia hagaria bada.   
\q1
\v 17 Heliopolisi bona Bubasitisi hanua edia eregabe taudia,  
\q1 be tuari kaia dekena amo do idia mase,  
\q1 bona unai hanua ruaosi,  
\q1 edia taunimanima be hesiai mai guia danu taudia do idia halaoa.   
\q1
\v 18 Tehapenehe dekenai dina be do ia dibura.  
\q1 Aigupito ena siahu do lau hamakohia dinana dekenai,  
\q1 iena siahu, ia heagilaia noho gauna, be do ia ore.  
\q1 Tehapenehe be ori ta ese do ia koua,  
\q1 bona iena hahine taudia,  
\q1 be hesiai mai guia danu totona do idia abidia lao.   
\q1
\v 19 Unai bamona kara dekenai,  
\q1 Aigupito ena dika davana do lau henia neganai,  
\q1 idia be do idia diba lau be Lohiabada.”   
\s1 Aigupito ena king ena siahu be Dirava ese ia hamakohia  
\p
\v 20 Aiemai hesiai mai guia danu negana, ena lagani namba 11, hua ginigunana, ena dina namba 7 dekenai, Lohiabada ese lau dekenai ia hereva, ia gwau:  
\v 21 “Tanobada tauna e, lau ese Aigupito ena king ena imana lau hamakohia vadaeni. Oi itaia, iena imana hanamoa totona dabua dekenai do idia kumia be namo, do ia auka lou, tuari kaia be ma do ia davea lou diba. To tau ta ese ia kumia lasi.   
\p
\v 22 “Unai dainai, lau Lohiabada Dirava ese inai bamona lau hereva, lau gwau: Lau ese Farao, Aigupito ena king do lau hadikaia gwauraia. Iena imana ruaosi do lau hamakohia, mai goadana gauna, bona ia makohia vadaeni gauna danu. Tuari kaia be iena imana dekena amo do ia moru.  
\v 23 Aigupito taudia be bese idauidau momo edia huana dekenai do lau luludia lao.  
\v 24 Lau ese Babulonia ena king ena imana do lau hagoadaia, bona egu tuari kaia be iena imana dekenai do lau atoa. To Aigupito ena king ena imana do lau hamakohia. Ia be do ia tai mai boiboi danu, bona do ia mase Babulonia ena king ena vairana dekenai.   
\p
\v 25 “Io, Babulonia ena king ena imana be do lau hagoadaia, to Aigupito ena king ena imana be do idia manoka lao. Momokani, lau ese egu tuari kaia be Babulonia ena king ena imana dekenai do lau atoa, bona Aigupito kahana dekenai tuari kaia ia duduia neganai, taunimanima be do idia diba lau be Lohiabada.  
\v 26 Lau ese Aigupito taudia do lau lulua lao, bese idauidau edia huanai do idia lao. Tano idauidau edia huana dekenai do lau siaidia lao, idau taudia bamona unuseni do idia noho. Unai neganai do idia diba lau be Lohiabada.”   
\c 31  
\s1 Parabole: Sida auna badana  
\p
\v 1 Aiemai hesiai mai guia danu negana, ena lagani namba 11, hua namba 3, ena dina ginigunana dekenai Lohiabada ese lau dekenai ia hereva, ia gwau,  
\v 2 “Tanobada tauna e, Farao, Aigupito ena king, mai ena taunimanima ibounai danu, do oi hamaoroa, do oi gwau,  
\b  
\q1 “ ‘Oiemu king siahuna badana dekenai,  
\q1 oi be daika danu oi hegeregere?   
\q1
\v 3 Oi be Asuria bamona,  
\q1 guna ia be Lebanona ena sida auna ta,  
\q1 mai ena rigi namodia momokani,  
\q1 bona mai ena ikerukeru danu.  
\q1 Inai sida be lata herea,  
\q1 iena ataiai be ori edia lalonai.   
\q1
\v 4 Ranu ese ia ubua,  
\q1 ranu dobudia ese sida idia halataia.  
\q1 Sida ia hadoa gabuna,  
\q1 be sinavai ese ia heau hagegea,  
\q1 bona unai sinavai ese,  
\q1 uda audia ibounai dekenai ranu ia siaia lao.   
\q1
\v 5 Unai sida be ia tubu daekau lata herea.  
\q1 Iena lata ese uda audia ibounai ia hanaia.  
\q1 Iena rigina danu idia tubu bada lao,  
\q1 bona idia tubu lata lao danu,  
\q1 ranu momo ese sida auna ia ubua dainai.   
\q1
\v 6 Ataiai manudia ibounai ese,  
\q1 edia ruma be sida ena rigina dekenai idia karaia.  
\q1 Iena rigina henunai danu,  
\q1 tano ena boroma idauidau ese edia natudia idia havaraia.  
\q1 Sida ena ikerukeru lalonai,  
\q1 tanobada ena bese badadia ibounai idia noho.   
\q1
\v 7 Ia be bada herea,  
\q1 bona iena rigina be lata dainai,  
\q1 iena hairaina be namo herea,  
\q1 badina be iena ramuna be idia diho idia lao,  
\q1 ranu momo gabudia dekenai.   
\q1
\v 8 Dirava ena uma gabuna dekenai ia vara sida auna ta ese,  
\q1 inai sida auna ia hereaia lasi,  
\q1 bona saipresi auna ta ena rigina,  
\q1 be inai sida ena rigi danu idia hegeregere lasi.  
\q1 Dirava ena uma lalonai auna ta be lasi,  
\q1 mai ena hairaina unai sida ena hairaina hegeregerena.   
\q1
\v 9 Lau Lohiabada ese iena rigina momo dekena amo,  
\q1 unai sida, Aigupito, dekenai hairai lau henia.  
\q1 Eden ena audia ibounai,  
\q1 Dirava ena uma lalonai idia vara gaudia ese,  
\q1 unai sida idia mama henia.’ ”   
\s1 Sida auna, Aigupito, ia moru  
\p
\v 10 “Unai dainai, lau Lohiabada Dirava ese umui lau hamaoroa inai: Unai au, ia tubu daekau, bona ori dekenai ia kamokau neganai, be ia hekokoroku noho danu.  
\v 11 Unai dainai lau ese unai au lau negea, bona lau ese bese idauidau edia siahu herea tauna dekenai unai au do lau henia. Ia ese unai au dekenai davana do ia henia, unai au ena kara dika hegeregerena.  
\v 12 Idau taudia, gari havaraia bese taudia ese unai au do idia utua diho, bona do idia rakatania. Iena rigina be ororo bona koura ibounai edia latanai do idia moru, bona tanobada besedia ibounai be unai au ena ikerukeru dekena amo do idia raka siri, do idia rakatania.  
\v 13 Au ia moru murinai, ataiai manudia ibounai be iena latanai do idia noho, bona tano ena boroma idauidau danu be iena rigina edia huanai do idia raka.  
\v 14 Unai dainai hari ia lao, sinavai edia isena dekenai noho auna ta be ataiai momokani do ia tubu daekau lou lasi, ori dekenai do ia kamokau lou lasi. Idia ibounai be do idia mase, taunimanima idia mase noho bamona. Mase taudia idia lao gabuna, dobu masemase gurina, be idia danu unuseni do idia diho lao.”   
\p
\v 15 Lohiabada Dirava be inai bamona ia hereva noho: “Unai au be mase gabuna do ia diho lao neganai, lau ese ranu dobudia do lau oda henia, idia ese unai au do idia koua, edia taitai toana. Bona sinavai edia heau dalana do lau koua, ranu momo danu do lau koua, do idia heau mai lasi. Bona au ia mase vadaeni dainai, lau ese Lebanona Ororo dekenai dibura do lau havaraia, bona uda ena au ibounai do idia manoka lao.  
\v 16 Unai au be mase gabuna dekenai idia diho vadaeni taudia danu, guri dobuna dekenai do lau negea diho neganai, iena moru ena regena dekenai bese idauidau mai gari danu do idia heudeheude. Eden ena au ibounai, bona Lebanona ena au namodia, ranu momo idia abia vadaeni, to hari be mase gabuna idia lao vadaeni audia, be unai sida auna ena moru dainai do idia moale.  
\v 17 Guna, unai au ena ikerukeru lalonai idia noho, iena durua taudia, bese idauidau edia huanai idia noho taudia, be ia danu mase gabuna dekenai idia diho vadaeni, bona tuari kaia dekenai idia mase vadaeni taudia danu.   
\p
\v 18 “Unai au be Aigupito ena king, bona Aigupito ena taudia ibounai. Momokani Eden ena au ibounai edia huanai ta ese unai au Aigupito ia hereaia diba lasi, lata dekenai, o hairai dekenai. To hari, Aigupito e, Eden ena audia dekenai ia vara bamona, be oi danu dekenai do ia vara. Oi be idia danu mase gabuna dekenai do oi diho lao. Unuseni oi ese Dirava diba lasi taudia bona tuari dekenai idia mase vadaeni taudia danu do oi noho. Lau Lohiabada Dirava ese lau hereva vadaeni inai.”   
\c 32  
\s1 Lalohisihisi ane Farao totona  
\p
\v 1 Aiemai hesiai mai guia danu negana, ena lagani namba 12, hua namba 12, ena dina ginigunana dekenai Lohiabada ese lau dekenai ia hereva, ia gwau,  
\v 2 “Tanobada tauna e, Farao, Aigupito ena king dainai lalohisihisi ane ta do oi abia, bona ia dekenai egu hereva do oi hamaoroa, do oi gwau,  
\b  
\q1 “ ‘Oi ese oi laloa oi be laiona ta,  
\q1 bese idauidau edia huanai,  
\q1 to oi be davara ena huala ta bamona.  
\q1 Oiemu sinavai edia lalonai,  
\q1 oiemu udubaubauna dekenai ranu oi doria noho,  
\q1 bona oiemu aena dekena amo,  
\q1 ranu oi hamarerea noho,  
\q1 vadaeni kopukopu ese ranu ia hamiroa noho.’ ”   
\b  
\q1
\v 3 Lohiabada Dirava ese inai bamona ia hereva noho, ia gwau:  
\q1 “Bese idauidau taudia momo idia haboua neganai,  
\q1 lau ese egu reke be oiemu latanai do lau negea,  
\q1 vadaeni unai besedia ese,  
\q1 reke lalonai oi do idia veria daekau mai.   
\q1
\v 4 Lau ese tano kavakava dekenai oi do lau negea lao,  
\q1 bona ataiai manudia bona tano dekenai boroma idauidau,  
\q1 idia ibounai oi dekenai do lau mailaia.  
\q1 Idia ese oiemu tauanina do idia ania.   
\q1
\v 5 Oiemu hidiona be ororo kahana ibounai dekenai do lau negea lao,  
\q1 bona oiemu tauanina dekena amo,  
\q1 koura do lau hahonua.   
\q1
\v 6 Oiemu rarana be do lau habubua lao,  
\q1 unai rara ese ororo do ia koua,  
\q1 bona sinavai ibounai do ia hahonua.   
\q1
\v 7 Lau ese oi do lau hadikaia ore neganai,  
\q1 guba be do lau koua,  
\q1 bona hisiu edia diari be do lau habodoa, do idia dibura.  
\q1 Dina be ori dekena amo do lau koua,  
\q1 bona hua be do ia diari lasi.   
\q1
\v 8 Guba ena diari ibounai do lau habodoa oiemu ataiai,  
\q1 bona oiemu tano be dibura momokani,  
\q1 dekena amo do lau koua.  
\q1 Lau Lohiabada Dirava ese lau hereva noho inai.   
\b  
\p
\v 9 “Aigupito taudia e, bese idauidau edia huanai, umui diba lasi tanodia lalonai, mai guia danu umui do lau siaia lao neganai, bese momo taudia do idia laloa hekwarahi.  
\v 10 Bese momo, be umui dekenai lau karaia gaudia dekenai do idia gari, mai hoa bada danu. Lau ese egu tuari kaia do lau davea neganai, king taudia be mai gari danu do idia heudeheude. Oiemu moru dinana dekenai, unai taudia ibounai do idia heudeheude, idia ta ta ese edia mauri do idia laloa momo, unai bamona karadia idia dekenai do idia vara garina.”   
\p
\v 11 Lohiabada Dirava ese Aigupito ena king dekenai ma ia hereva, ia gwau: “Babulonia ena king ena tuari kaia be oiemu latanai do ia ginidae.  
\v 12 Umui do lau durua lasi, vadaeni goada herea taudia ese umui do idia tuari henia. Inai taudia be bese idauidau ibounai edia huanai, dagedage besena taudia momokani. Idia ese Aigupito ena hekokoroku do idia hamakohia ore, bona Aigupito ena taudia ibounai do idia alaia mase. Emui taunimanima, bona umui hekokorokulaia gaudia ibounai, be unai bese ese do idia hadikaia ore.   
\b  
\q1
\v 13 “Lau ese Aigupito ena ubua gaudia ibounai,  
\q1 be do lau hadikaia ore,  
\q1 ranu gabudia ibounai edia badibadinai.  
\q1 Taunimanima edia aedia ese,  
\q1 unai ranu gabudia do idia moia lou lasi,  
\q1 bona ubua gaudia ese edia aedia dekena amo,  
\q1 ranu do idia hamiroa lou lasi.   
\q1
\v 14 Unai neganai ranu gabudia do lau hagoevaia,  
\q1 bona emui sinavai ranu be do idia heau namonamo,  
\q1 olive dehoro bamona.  
\q1 Lau Lohiabada Dirava lau hereva noho inai.   
\q1
\v 15 Aigupito be anina lasi tano do lau halaoa,  
\q1 bona iena tano ena anina ibounai do lau abia lao.  
\q1 Bona Aigupito dekenai noho taudia ibounai,  
\q1 be do lau alaia mase neganai,  
\q1 idia be do idia diba lau be Lohiabada.   
\b  
\p
\v 16 “Unai lalohisihisi ane do idia abia Aigupito totona. Bese idauidau edia hahine taudia ese Aigupito totona bona Aigupito taudia ibounai totona do idia taitai neganai, unai ane do idia abia. Lau inai, Lohiabada Dirava lau hereva vadaeni.”   
\s1 Mase taudia idia noho gabuna  
\p
\v 17 Aiemai hesiai mai guia danu negana, ena lagani namba 12, hua ginigunana ena dina namba 15 dekenai, Lohiabada ese lau dekenai ia hereva, ia gwau,  
\v 18 “Tanobada tauna e, Aigupito taudia ibounai, taunimanima momo herea totona do oi tai, bona idia do oi siaia diho, idia bona bese goadadia edia hahine taudia danu, mase gabuna dekenai do idia diho, guri dobuna dekenai idia diho vadaeni taudia danu do idia noho.  
\v 19 Idia dekenai do oi gwau:  
\q1 “ ‘Umui laloa emui hairai ese,  
\q1 haida edia hairai ia hereaia, a?  
\q1 Do umui diho lao,  
\q1 Dirava idia diba lasi taudia danu do umui hekure hebou.’   
\p
\v 20 “Aigupito taudia, be tuari dekenai idia mase vadaeni taudia danu do idia moru. Tuari kaia ia hegaegae noho, bona ia ese idia ibounai do ia alaia mase.  
\v 21 Tuari mai goadadia taudia, guna Aigupito idia durua taudia, ese mase gabuna, hel lalonai, Aigupito edia mase matamata taudia do idia abidia dae. Do idia gwau, ‘Inai Dirava diba lasi taudia, tuari dekenai idia mase, be inai mase gabuna dekenai idia mai vadaeni, bona iniseni do idia hekure noho!’   
\p
\v 22 “Asuria be unuseni, mai iena tuari orea ibounai danu. Iena tuari taudia edia guria gabudia ese Asuria ena hekure gabuna idia hagegea noho. Idia ibounai be tuari lalonai idia mase taudia.  
\v 23 Edia guria gabudia be guri dobu masemase dekenai idia noho, bona idia ese Asuria ena guria gabuna idia hagegea noho. Inai taudia ibounai, guna idia ese taunimanima ibounai idia hagaria bada, to idia be tuari kaia dekenai idia mase.   
\p
\v 24 “Elama danu be unuseni, bona iena orea badana taudia ibounai ese iena guria gabuna idia hagegea noho. Idia ibounai be tuari kaia dekenai idia mase, bona idia ese kopina utua kara ena taravatu idia abia lasi. Guna idia ese taunimanima ibounai idia hagaria bada, to harihari guri dekenai idia diho taudia danu idia hemarai hebou noho.  
\v 25 Elama totona hekure gabuna idia karaia, idia aladia mase taudia edia huanai. Elama ena tuari taudia edia guria gabudia ese Elama ena guria gabuna idia hagegea noho. Idia ibounai be kopina utua kara ena taravatu idia abia lasi, bona tuari lalonai idia mase taudia sibona. Idia be guna idia do mauri neganai, taunimanima edia huanai gari bada idia havaraia, to hari idia be mase taudia, mai edia hemarai bada, tuari dekenai idia mase taudia danu idia hekure hebou noho.   
\p
\v 26 “Meseka bona Tubala danu be unuseni. Edia guria gabudia be edia orea taudia ibounai edia guria gabudia ese idia hagegea noho. Unai taudia ibounai be kopina utua kara idia abia lasi taudia, bona tuari kaia dekena amo idia mase, badina idia ese tanobada idia noho neganai, taunimanima idia hagaria bada herea.  
\v 27 Idia ese edia sene taudia goadadia hegeregerena, mai mataurai bada danu guria gabunai idia diho, a? Lasi momokani. Badina unai sene taudia be mai edia tuari gaudia danu mase gabuna dekenai idia diho. Edia tuari kaia be edia kwaradia henunai idia atoa, bona edia kesi be edia turiadia edia latanai idia atoa. Gunaguna tanobada dekenai idia mauri noho neganai, idia ese gari bada taunimanima dekenai idia havaraia.   
\p
\v 28 “Farao, Aigupito ena king e, umui Aigupito taudia be kopina utua kara idia abia lasi taudia danu do umui hekure. Unai tuari dekenai idia mase taudia edia tauanidia ese umui emui tauanidia do idia koua momokani.   
\p
\v 29 “Edoma danu be unuseni, mai ena king bona ena lohia taudia ibounai. Guna idia be tuari taudia mai goadadia, to hari idia be mase gabuna, hel dekenai idia hekure noho. Kopina utua kara idia abia lasi, bona tuari dekenai mase taudia danu mase gabuna lalonai idia hekure noho.   
\p
\v 30 “Mirigini kahana lohia taudia ibounai danu be unuseni, bona Sidono taudia ibounai danu. Idia edia goada bona siahu ese guna tanobada taudia dekenai gari bada idia havaraia, to hari be mai hemarai danu guri lalonai idia diho, tuari dekenai idia mase taudia danu. Unuseni idia hekure noho, to kopina utua kara idia abia lasi. Guri dobu masemase dekenai idia diho taudia danu idia hemarai hebou noho.”   
\p
\v 31 Lohiabada Dirava ese inai bamona ia hereva noho, ia gwau: “Farao bona iena tuari taudia be unai guri dekenai idia vareai, bona idia ese unai tuari dekenai mase taudia idia itaia neganai, edia lalodia ese goada sisina do idia davaria.   
\p
\v 32 “Momokani Farao be tanobada dekenai ia noho neganai, ia dekena amo taunimanima momo lau hagaria bada, to ia bona iena tuari orea be do idia mase. Bona unai murinai tuari dekenai idia mase taudia danu guri lalonai do idia hekure hebou. Io, kopina utua kara idia abia lasi taudia danu do idia hekure hebou. Lau inai, Lohiabada Dirava lau hereva vadaeni.”   
\c 33  
\s1 Lohiabada ese Esekiela ia abia hidi, iena bese taudia edia naria tauna dagi do ia abia  
\p
\v 1 Lohiabada ena hereva be lau dekenai ia mai, ia gwau,  
\v 2 “Tanobada tauna e, oiemu bese taudia dekenai, naria tauna ena kara do oi hadibaia. Bema lau ese tuari taudia be tano ta dekenai do lau siaia neganai, unai tano ena taunimanima ese edia naria tauna ta do idia abia hidi.  
\v 3 Bona naria tauna ese ia itaia, tuari taudia idia mai noho neganai, ia ese iena kibi do ia hiriria, iena bese taudia do ia hadibaia totona.   
\p
\v 4 “Vadaeni bema tau ta ese kibi ena regena ia kamonai, to ia noho kava, ia hunia lasi, unai neganai unai tuari taudia ese ia do idia alaia, bona iena mase be sibona ena kerere dainai.  
\v 5 Iena mase be ia sibona ena kerere dainai, badina be unai sisiba ia kamonai lasi. Bema unai sisiba ia kamonai neganai, ia be do ia heau mauri.   
\p
\v 6 “To bema naria tauna ese ia itaia, tuari taudia be idia mai noho, bona kibi ia hiriria lasi, tuari taudia be do idia mai, unai kara dika taudia do idia alaia mase. To lau be do lau gwau edia mase be unai naria tauna ena kerere dainai. Bona ia ese iena kerere davana do ia abia.   
\p
\v 7 “Unai dainai, tanobada tauna e, lau ese Israela besena ena naria tauna oi lau halaoa inai. Oi ese lauegu sisiba hereva idia dekenai do oi hamaoroa.   
\p
\v 8 “Bema lau gwau kara dika tauna ta be do ia mase, vadaeni oi ese ia do oi hamaoroa iena kerere daladia do ia hadokoa. Bema oi sisiba henia lasi neganai, iena kara dika be do ia noho, bona ia be do ia mase. To lauegu vairana dekenai, unai tau ena mase be oi sibona oiemu kerere, bona oi ese oiemu kerere davana do oi abia.   
\p
\v 9 “Bema oi ese kara dika tauna ta oi sisiba henia momokani, bona iena kara dika ia hadokoa lasi, ia be do ia mase iena dika dainai. To oi be kerere lasi dainai oi be do oi mauri.”   
\s1 Dirava ese taunimanima ibounai ta ta edia kara ia itaia noho  
\p
\v 10 Lohiabada ese lau dekenai ia hereva, ia gwau, “Tanobada tauna e, oi ese Israela taudia do oi hamaoroa, oi gwau: Umui ese inai bamona umui hereva noho, umui gwau, ‘Ai ese kara dika momo ai karaia vadaeni, aiemai latanai idia metau herea, unai dainai aiemai tauanina idia maragi lao noho. Edena bamona do ai mauri noho diba?’ ”   
\p
\v 11 Lohiabada ese lau dekenai ma ia hamaoroa, ia gwau, “Israela taudia dekenai lauegu hereva do oi hamaoroa, lau gwau, ‘Lau Lohiabada, mauri Diravana ese kara dika tauna ena mase lau moalelaia lasi. To dika tauna bema iena dika ia rakatania, vadaeni mauri ia davaria, unai kara dekenai do lau moale momokani. Israela taudia e, umui emui kara dika umui hadokoa! Badina dahaka umui ese mase umui ura henia noho?’ ”   
\p
\v 12 Ma Lohiabada ese Esekiela ia hamaoroa, ia gwau, “Tanobada tauna e, Israela taudia do oi hamaoroa, bema tau namona ia kara dika neganai, iena kara namona, guna ia karaia gauna, ese do ia hamauria lasi. Bema tau dikana ese iena kara dika ia hadokoa, ia ese iena kerere davana do ia davaria lasi. To bema tau namona ese kara dika dalana ia hamatamaia, ia be do ia mauri diba lasi, badina iena kara namona gunana be do lau laloa lasi.   
\p
\v 13 “Momokani nega haida lau ese tau namona dekenai lau gwauhamata henia, ia be do ia mauri. To bema ia ese iena kara maoromaoro gunadia ia abidadama henia, bona ia ese kara dika ia hamatamaia, lau ese iena namo gunana do lau laloa lasi. Ia be iena kara dika dainai do ia mase.   
\p
\v 14 “Inai danu, sedira lau ese tau dikana do lau sisiba henia ia be do ia mase. To bema iena kara dika ia rakatania, bona kara maoromaoro ia karaia, ia be do ia mauri.  
\v 15 Bema ia ese abiatorehai ena toana ia henia lou, o ia ese ia henaoa gauna ia henia lou, bona bema kara dika ia hadokoa, bona mauri idia henia taravatudia ia badinaia neganai, ia be do ia mase lasi. Ia be do ia mauri.  
\v 16 Lau ese iena kara dika, guna ia karaia gaudia do lau gwauatao, bona ia be do ia mauri, badina ia ese kara maoromaoro bona kara namodia ia karaia dainai.   
\p
\v 17 “Bona oiemu bese taudia ese lauegu kara idia herevalaia noho, idia gwau lauegu kara be maoro lasi, a? Lasi momokani, to Israela taudia, idia edia kara be maoro lasi.   
\p
\v 18 “Bema kara maoromaoro tauna ese iena kara namona ia rakatania, bona kara dika ia hamatamaia, ia be unai kara dainai do ia mase.   
\p
\v 19 “To bema kara dika tauna ese iena kara dika ia rakatania, bona kara maoromaoro, bona kara namona ia karaia neganai, ia ese unai kara dainai do ia mauri.   
\p
\v 20 “To Israela besena e, umui gwau lauegu kara be maoro lasi. Lau ese umui ta ta do lau kota henia, emui kara ta ta ibounai hegeregerena.”   
\s1 Ierusalema ia moru ena sivarai  
\p
\v 21 Ai be hesiai mai guia danu Babulonia dekenai ai noho ena lagani namba 12, hua namba 10, bona dina namba 5 neganai, tau ta, Ierusalema dekena amo ia heau mauri tauna ta, be lau dekenai ia mai, ia gwau, “Hanua be ia moru vadaeni, idia halusia vadaeni.”   
\p
\v 22 Heau mauri tauna be do ia ginidae lasi neganai, unai adorahi dekenai Lohiabada ena siahu be egu latanai ia mai, bona unai siahu ena mamina lau abia. Kerukeru dabai, unai tau ia ginidae neganai, Lohiabada ese egu gadona ia hanamoa, bona hereva dalana ia henia lou lau dekenai.   
\s1 Israela dekenai do mauri noho taudia edia kara dika  
\p
\v 23 Lohiabada ese lau ia hamaoroa, ia gwau,  
\v 24 “Tanobada tauna e, Israela ena hanua, idia hadikaia ore hanua ibounai dekenai idia do noho taudia ese inai bamona idia hereva noho, idia gwau, ‘Aberahamo be tau tamona, to Dirava ese inai tano ibounai ia dekenai ia henia. To hari ita be taunimanima momo. Unai dainai, sedira ia momokani, Dirava ese inai tano ita dekenai ia henia vadaeni!’ ”   
\p
\v 25 Ma Lohiabada ia gwau, “Esekiela e, lauegu hereva idia dekenai do oi hamaoroa, lau gwau: Lau inai Lohiabada Dirava, umui ese kara dika momo umui karaia noho. Vamu umui alaia neganai, rara umui bubua ore lasi, to mai rara danu umui ania noho. Umui ese dirava koikoi dekenai umui tomadiho noho. Umui ese taunimanima umui alaia noho. Edena bamona umui laloa inai tano umui abia diba, a?   
\p
\v 26 “Umui emui tuari kaia umui abidadama henia noho. Emui kara be mai bodaga danu. Umui ibounai ese heudahanai umui karaia noho. Edena bamona umui laloa inai tano be umui emui? Umui be hegeregere lasi momokani!   
\p
\v 27 “Ma Esekiela e, idia do oi hamaoroa inai: Lau be mauri Diravana, bona lau hereva momokani inai, Israela ena hanua, idia hadikaia ore hanuadia idia noho taudia be tuari taudia ese do idia alaia ore. Bona hanua ena murimurinai idia noho taudia be uda boroma ese do idia anidia. Ma ororo bona nadi edia matuna dekenai idia hunia noho taudia be gorere dekena amo do idia mase.   
\p
\v 28 “Lau ese inai tano do lau hadikaia ore, vadaeni nadi kavakava gabuna do lau halaoa. Guna be Israela taudia ese edia goada dainai idia hekokoroku, to lau ese edia goada do lau haorea momokani. Israela ena ororo ibounai be uda dikana do lau halaoa, vadaeni tau ta ese idia do ia raka hanaia diba lasi.   
\p
\v 29 “Edia kara dikadia dainai lau panisidia, bona edia tano be nadi kavakava gabuna lau halaoa neganai, idia be do idia diba, lau be Lohiabada.”   
\s1 Taunimanima ese peroveta tauna Esekiela ena hereva idia badinaia lasi  
\p
\v 30 Lohiabada ia gwau, “Tanobada tauna e, oiemu bese taudia ese hanua ena magu badibadinai, bona ruma edia iduara dekenai oi idia herevalaia noho, idia gwau, ‘Namo ita lao, Lohiabada ena hereva, iena peroveta tauna dekenai ia henia gauna, do ita kamonai!’  
\v 31 Vadaeni egu bese taudia idia haboua noho, oiemu hereva do idia kamonai totona. To idia be idia kamonai kava sibona, inai hereva idia badinaia lasi. Idia ese kara namodia do idia karaia dalana idia herevalaia noho, to edia hereva be mai anina lasi. Badina be edia uduna dekena amo lalokau hereva momo idia gwauraia noho, to edia kudouna dekena amo edia kohu habadaia daladia idia laloa noho.   
\p
\v 32 “Idia dekenai oi be lalokau ane ia abia noho tauna sibona bamona, iena gadona be namo herea, bona gita be ia gadaralaia namonamo. Badina be oiemu hereva be idia kamonai, to kara ta do idia karaia lasi.   
\p
\v 33 “To gabeai, oiemu hereva ibounai edia anina do idia vara momokani neganai, idia be do idia diba, peroveta tauna ta be idia edia huanai ia noho vadaeni.”   
\c 34  
\s1 Israela idia gunalaia taudia be Dirava ese ia kota henidia  
\p
\v 1 Lohiabada ese lau dekenai ma ia hereva, ia gwau,  
\v 2 “Tanobada tauna e, Israela gunalaia taudia do oi gwau henia, bona lau, Lohiabada Dirava, egu hereva idia dekenai do oi hamaoroa, lau gwau: Umui ese dika momokani do umui davaria! Israela taudia be hegeregere mamoe orea bamona, bona umui be edia naria taudia. To umui ese umui sibona umui naria noho, emui mamoe umui naria lasi.   
\p
\v 3 “Umui ese mamoe dekena amo rata umui abia, umui inua. Bona umui ese mamoe ena huina umui abia, emui dabua do umui karaia totona. Bona mamoe namodia umui alaia, vadaeni edia vamu umui ania noho. To umui ese emui mamoe umui naria lasi momokani.   
\p
\v 4 “Umui ese mamoe manokadia umui durua lasi. Umui ese mai edia gorere bona mai edia bero mamoedia umui hanamodia lasi. Idia loaloa kava mamoedia umui hakaudia lou lasi, bona idia boio gaudia umui tahua lasi. Lasi momokani, to umui ese mamoe umui dagedage henidia.   
\p
\v 5 “Mamoe be mai edia naria tauna lasi dainai, idia be gabu idauidau momo dekenai idia loaloa kava, vadaeni uda sisia bona laiona ese idia aladia bona idia anidia.  
\v 6 Unai dainai lauegu mamoe be ororo badadia dekenai idia loaloa, tanobada kahana ibounai dekenai danu idia loaloa. Bona tau ta ese idia ia tahua lasi, lasi momokani.   
\p
\v 7 “Unai dainai, umui mamoe naria taudia e, lau Lohiabada ese umui lau hamaoroa noho hereva do umui kamonai:  
\v 8 Lau be Lohiabada, mauri Diravana, bona lau hereva momokani inai: Lauegu mamoe be uda sisia bona laiona edia aniani gauna idia lao vadaeni, edia naria tauna ta be lasi dainai. Bona lauegu mamoe naria taudia ese egu mamoe idia tahua lasi. Unai mamoe naria taudia ese idia sibona idia ubua bona naria. To idia ese lauegu mamoe idia naria lasi.  
\v 9 Unai dainai, mamoe naria taudia e, lau Lohiabada egu hereva do umui kamonai.  
\v 10 Lau Lohiabada Dirava be inai bamona lau hereva, lau gwau: Lau ese umui do lau dagedage henia. Lau ese egu mamoe be umui dekena amo do lau kokia, bona umui ese egu mamoe naria dagina, be do lau koua, bona do umui karaia lou lasi. Umui ese umui sibona umui naria noho karana be do lau koua. Lauegu mamoe be umui dekena amo do lau hamauria, umui ese idia do umui ania lou lasi.”   
\s1 Mamoe naria tauna namona  
\p
\v 11 “Badina be lau Lohiabada Dirava ese umui lau hamaoroa, lau sibona ese egu mamoe do lau tahua, bona idia do lau naria.  
\v 12 Iena mamoe idia loaloa kava bona gabu idauidau idia heau boio neganai, mamoe naria tauna ese idia do ia tahua, bona idia do ia haboua lou. Lau ese unai bamona lauegu mamoe do lau naria. Sedira idia be gabu dikadia dekenai, bona dibura gabudia dekenai danu, to lau ese idia do lau hamauria.  
\v 13 Bese idauidau edia huanai dekena amo idia do lau hakaua mai, bona edia tano korikori dekenai idia do lau haboua lou. Israela ena ororo bona sinavai namodia gabudia dekenai do lau hakaudia mai, bona tano namona gabudia dekenai idia do lau ubua.  
\v 14 Rei namona gabudia dekenai idia do lau ubua, Israela ena ororo dekenai rei namo herea do idia ania, mai edia gari ta lasi.   
\p
\v 15 “Lau sibona be mamoe naria tauna do lau lao, bona lau ese edia laga-ani gabuna ta do lau davaria. Lau, Lohiabada Dirava be lau hereva vadaeni.   
\p
\v 16 “Idia boio vadaeni mamoedia be do lau tahua, bona loaloa kava gaudia be do lau hakaua lou. Bero momoedia edia bero do lau kumia, bona mai edia gorere gaudia be do lau hanamoa. To mai edia digara, bona mai edia goada gaudia do lau hadikaia ore. Lau ese egu mamoe oreana do lau naria, mai maoromaoro danu.   
\p
\v 17 “Lauegu mamoe oreana e, lau, Lohiabada Dirava ese umui lau hamaoroa, lau ese umui ta ta do lau kota henia. Bona lau ese mamoe be kahana do lau atoa, bona nanigosi be kahana do lau atoa, namodia be kahana, bona dikadia be kahana.   
\p
\v 18 “Umui haida ese rei namo herea umui ania momo, bona emui bogana idia kunu dainai, umui ania lasi reina umui moia bona hadikaia. Bona ranu goevagoeva umui inua neganai, umui inua lasi gauna umui hamiroa!  
\v 19 Lauegu mamoe haida ese madi umui moia vadaeni rei idia ania noho, bona umui hamiroa vadaeni ranu idia inua noho.   
\p
\v 20 “Unai dainai lau Lohiabada Dirava ese umui lau hamaoroa inai: Lau ese umui mamoe goadadia bona mamoe manokadia emui huanai, kota do lau karaia.  
\v 21 Umui mamoe goadadia ese mamoe manokadia, gorere gaudia, umui doria siri, bona egu orea dekena amo umui luludia siri.   
\p
\v 22 “To lau ese egu mamoe do lau hamauria, bona idia dekenai dagedage karana be do lau koua. Lauegu mamoe ta ta ibounai do lau kota henia, bona namodia be kahana do lau atodia, dikadia be kahana do lau atodia.  
\v 23 Bona lau ese mamoe naria tauna tamona, egu hesiai tauna Davida bamona, idia dekenai do lau henia. Ia ese idia do ia naria.  
\v 24 Lau Lohiabada, be edia Dirava do lau lao, bona lauegu hesiai tauna Davida bamona, be edia King do ia lao. Lau inai Lohiabada, lau hereva vadaeni.   
\p
\v 25 “Lau ese idia danu gwauhamata taravatuna do lau karaia, bona uda boroma dikadia ibounai do lau lulua ore. Vadaeni idia be nadi kavakava gabudia, bona uda gabudia danu dekenai do idia mahuta diba, mai edia gari ta lasi.  
\v 26 Bona lau ese idia do lau hanamoa, bona egu ororo helagana dekenai idia do lau atoa, do idia noho. Unuseni medu namona do lau hadihoa, idia edia noho do lau hanamoa.   
\p
\v 27 “Huahua audia ese huahua do idia atoa, tano danu ese aniani gaudia do ia havaraia, bona taunimanina ta ta be sibona edia tano korikori dekenai do idia noho, mai maino danu. Bona lau ese egu bese taudia, idia guia noho taudia, be idia guia taudia dekena amo do lau ruhaia neganai, idia be do idia diba momokani, lau be Lohiabada.   
\p
\v 28 “Bona Dirava diba lasi bese idauidau taudia ese egu orea taudia edia kohu do idia henaoa lou lasi. Bona uda boroma idauidau ese idia do idia alaia lou lasi. Idia be do idia noho namonamo, bona tau ta ese idia do ia hagaria lasi.  
\v 29 Bona edia tano be lau ese do lau hanamoa, bona tano ese aniani momo do ia havaraia dainai idia be do idia hitolo lou lasi. Bese idauidau taudia ese egu orea taudia do idia hereva dika henia lou lasi.   
\p
\v 30 “Bona Israela taudia be do idia diba namonamo, lau Lohiabada, edia Dirava be idia danu lau noho, bona idia be lauegu orea taudia. Lau Lohiabada Dirava lau hereva vadaeni inai.   
\p
\v 31 “Umui be lauegu mamoe, bona umui be lauegu tano dekenai umui noho. Umui be lauegu bese, bona lau be umui emui Dirava. Lau Lohiabada Dirava lau hereva inai.”   
\c 35  
\s1 Dirava ese Edoma ena dika davana ia henia  
\p
\v 1 Lohiabada ese lau dekenai ia hereva, ia gwau:  
\v 2 “Tanobada tauna e, oiemu matana be Edoma tano dekenai do oi negea, bona iena latanai do oi peroveta.  
\v 3 Do oi gwau:  
\q1 “Lau, Lohiabada Dirava ese inai bamona Edoma lau hamaoroa,  
\q1 lau gwau:  
\q1 Edoma Ororodia e, lau ese umui do lau dagedage henia.  
\q1 Lau ese anina lasi tano umui do lau halaoa.   
\q1
\v 4 Emui hanua badadia do lau hadikaia ore,  
\q1 bona emui tano be anina lasi gabuna do lau halaoa.  
\q1 Unai neganai do umui diba lau be Lohiabada.   
\p
\v 5 “Badina umui Edoma taudia ese Israela dekenai umui dagedage henia idaunegai momokani ia mai bona hari, bona Israela taudia be mai edia durua taudia lasi neganai, umui ese idia umui alaia mase. Io, lau ese Israela taudia edia kara dika ena davana lau henidia haorea neganai, umui ese tuari kaia dekena amo umui hadikadia.  
\v 6 Unai dainai lau Lohiabada Dirava, mauri ena Dirava, egu ladana dekenai lau gwauhamata inai: Edoma taudia e, emui dika ena davana be mase, bona do umui heau mauri diba lasi. Emui kerere be ala- ala, unai dainai ala-ala ese umui do ia abia.  
\v 7 Lau ese Edoma ena ororo gabuna do lau hadikaia, vadaeni anina lasi tano do lau halaoa. Bona inai tano idia hanaia toho taudia ibounai do lau alaia mase.  
\v 8 Lau ese emui ororo ibounai be alaia mase vadaeni taudia dekena amo do lau koua, bona tuari dekenai mase vadaeni taudia edia tauanidia ese emui ororo maragidia bona koura ibounai do idia hahonua.  
\v 9 Emui tano do lau hadikaia momokani, vadaeni do ia dika noho ela bona hanaihanai. Emui hanua edia lalonai tau ta do ia noho lou lasi. Unai neganai do umui diba lau be Lohiabada.   
\p
\v 10 “Umui hereva vadaeni, umui gwau, Iuda bona Israela, mai edia tano ruaosi danu be umui emui, bona umui ese do umui abidia. Unai hereva dekena amo lau umui matauraia lasi, badina lau Lohiabada be Iuda bona Israela edia Dirava.  
\v 11 Unai dainai lau, Lohiabada Dirava, mauri ena Dirava, egu ladana dekenai lau gwauhamata inai, emui badu, bona emui mama, bona emui laloa dika egu bese taudia dekenai ena davana be umui dekenai do lau henia. Egu bese taudia be do idia diba, emui kara dika idia dekenai, ena davana be lau ese umui dekenai lau henia noho.  
\v 12 Unai neganai, Edoma taudia e, do umui diba, lau Lohiabada ese emui hereva, Israela ena ororodia dekenai, mai hekokoroku umui gwauraia hereva ibounai lau kamonai vadaeni, umui gwau, ‘Israela be idia hadikaia ore vadaeni, do ita abia, do ita haorea momokani.’  
\v 13 Umui sibona emui hekokoroku umui habadaia, bona lau do umui hadikaia hereva umui gwauraia badabada gaudia, be lau kamonai vadaeni.”   
\p
\v 14 Lohiabada Dirava ma ia hereva inai, ia gwau, “Edoma e, lau ese oi do lau hadikaia, vadaeni oi be anina lasi tano do oi lao dainai, tanobada taudia ibounai ese oi do idia kirikirilaia, mai moale bada danu.  
\v 15 Egu tano Israela idia hadikaia ore neganai, oi be oi moale bada hegeregerena, lau be do lau moale bada, idia ese oi do idia hadikaia neganai. Edoma Ororo, bona Edoma taudia ibounai e, umui be do idia hadikaia ore momokani. Unai neganai taunimanima ibounai do idia diba lau be Lohiabada.”   
\c 36  
\s1 Dirava ese Israela do ia hanamoa  
\p
\v 1 Lohiabada ia gwau, “Tanobada tauna e, Israela ena ororo dekenai do oi peroveta, do oi gwau: Israela ena ororodia e, Lohiabada ena hereva do umui kamonai.  
\v 2 Lohiabada Dirava be inai bamona ia hereva noho, ia gwau: Umui idia hadikaia gwauraia taudia ese mai moale danu umui idia herevalaia noho, idia gwau, ‘Israela ia moru be namo bada, hari unai Israela ena ororo gunadia be iseda tano!’   
\p
\v 3 “Unai dainai Esekiela e, do oi peroveta, oi ese lau, Lohiabada Dirava lau gwauraia noho hereva do oi gwauraia: Israela idia hagegea noho besedia ese Israela idia halusia, bona Israela ena kohu idia henaoa haorea neganai, idia ese Israela ena ladana idia hadikaia momokani.  
\v 4 Unai dainai, Israela ena ororodia e, lau, Lohiabada Dirava egu hereva do umui kamonai: Umui ororo badadia bona ororo maragidia, umui sinavai bona koura, umui tano anina lasi gabudia, umui taunimanima noho lasi hanuadia e! Umui dekena amo emui kohu idia abia lao, bona umui idia hagegea bese taudia ese umui idia hereva dika henia.   
\p
\v 5 “Lau, Lohiabada Dirava ese, egu badu mai siahu danu lalonai, Israela idia hagegea bese taudia lau gwau henidia vadaeni, bona Edoma lau gwau henia bada herea vadaeni. Mai moale bada bona mai mataurai lasi danu Edoma taudia ese egu tano idia abia, ena rei gabudia danu idia abia.   
\p
\v 6 “Unai dainai, Israela tano dekenai do oi peroveta. Ororo badadia bona ororo maragidia, sinavai bona koura ibounai do oi hamaoroa, do oi gwau, ‘Lohiabada Dirava ese inai bamona ia hereva noho, ia gwau: Bese idauidau taudia ese umui idia hereva dika henia dainai, lau ese mai badu danu lau hereva inai:  
\v 7 Lau Lohiabada Dirava ese lau gwauhamata inai, unai Israela idia hagegea noho bese ibounai ese hemarai bada do idia davaria.’   
\p
\v 8 “To umui, Israela ena ororodia e, emui au ena rigidia do idia tubu daekau lao, bona emui au huahuadia do idia mage, egu bese Israela taudia ese emui aniani do idia ania dainai. Badina be nega sisina ia ore neganai, edia gabu korikori, Israela, dekenai do idia giroa mai lou.  
\v 9 Badina lau be umui danu lau noho, bona lau ese umui do lau durua, emui tano do umui geia, bona uhe do umui hadoa.  
\v 10 Lau ese emui bese do lau habadaia, do umui momo herea. Umui ese emui hanua do umui haginia lou, guna idia hadikaia gabudia ibounai be do umui haginia lou, bona unuseni do umui noho.  
\v 11 Emui taunimanima bona boromakau danu, be do idia momo herea. Umui ese natudia momo do umui havaraia, bona bese be do ia bada herea, guna bamona lasi. Lau ese emui dala do lau kehoa, vadaeni Israela dekenai do umui noho, guna umui noho bamona. Noho namo umui dekenai do lau henia, bona inai noho ese emui noho namo gunana do ia hereaia. Unai neganai do umui diba lau be Lohiabada.  
\v 12 Umui Israela taudia, egu bese taudia, be inai tano dekenai do lau mailaia lou. Inai tano be emui tano korikori, bona inai tano dekenai emui natudia be hitolo dainai do idia mase lou lasi.   
\p
\v 13 “Lau, Lohiabada Dirava ese inai bamona lau gwau: Taunimanima idia gwau Israela tano ese iena taudia ia haorea noho, bona ia ese iena bese taudia edia natudia be mase dekenai ia abidia lao.  
\v 14 To lau gwau, hari ia lao, emui tano Israela ese iena taudia do ia haorea lou lasi, bona emui natudia be mase dekenai do ia abidia lao lou lasi. Lau, Lohiabada Dirava lau hereva vadaeni inai.  
\v 15 Lau ese bese idauidau edia hereva do lau hadokoa, idia ese umui do idia hereva dika henia lou lasi. Tano ese iena bese taudia edia natudia be mase dekenai do ia abidia lao lou lasi. Lau, Lohiabada Dirava, lau hereva vadaeni inai.”   
\s1 Israela ena mauri matamata  
\p
\v 16 Lohiabada ese lau dekenai ia hereva, ia gwau,  
\v 17 “Israela besena taudia be edia tano korikori dekenai idia noho neganai, idia ese edia mauri dala bona edia kara dekena amo tano idia hamiroa. Edia kara be egu vairana dekenai ia miro, hahine ta ena rara kara ena miro bamona.  
\v 18 Unai dainai egu badu be idia edia latanai lau bubua, idia ese ala-ala kara dekenai, bona kaivakuku tomadiho henia kara dekenai tano idia hamiroa ena davana.   
\p
\v 19 “Bese idauidau edia huanai dekenai lau luludia lao, bona tano idauidau lalonai idau taudia bamona idia noho. Edia kara hegeregerena, edia davana lau henidia.  
\v 20 Idia lao gabudia ibounai dekenai idia ese egu ladana helagana idia hamiroa, badina be taunimanima ese Israela taudia idia herevalaia, idia gwau, ‘Inai be Lohiabada ena orea taudia, to ia ese ia henidia tano dekena amo haida ese idia luludia lao.’  
\v 21 To egu ladana helagana, Israela taudia ese, edia huanai idia noho besedia, edia vairanai idia hamiroa ladana, be lau ese lau laloa bada.”   
\s1 Dirava ese mauri matamata Israela taudia dekenai do ia henia  
\p
\v 22 Lohiabada ia gwau, “Esekiela e, Israela taudia dekenai inai lauegu hereva do oi hamaoroa, oi gwau: Lohiabada Dirava be inai bamona ia hereva, ia gwau: Israela besena e, umui be bese idauidau edia huanai umui lao gabudia ibounai dekenai egu ladana helagana be umui ese umui hamiroa bona hadikaia vadaeni. Unai dainai inai kara haida do lau karaia, be umui do lau hanamoa totona lasi, to lauegu ladana helagana do lau hanamoa totona do lau karaia.   
\p
\v 23 “Lau ese bese idauidau dekenai egu ladana ena helaga do lau hedinaraia, do idia diba lauegu kara be maoromaoro momokani. Umui Israela taudia emui kerere dainai, unai idau bese taudia ese lau idia matauraia lasi. To lau ese mai goada danu, durua kara badadia umui totona do lau karaia, vadaeni umui dekena amo, idau bese taudia do idia diba, lauegu kara be maoromaoro, bona namo momokani. Ma do idia diba namonamo, lau sibona be Lohiabada. Lau, Lohiabada Dirava lau hereva vadaeni.   
\p
\v 24 “Badina be lau ese bese idauidau taudia dekena amo, umui do lau abia, bona emui tano korikori dekenai umui do lau hakaua mai lou.  
\v 25 Bona lau ese ranu goevagoeva do lau abia, umui dekenai do lau bubua, do umui goeva totona. Lau ese umui do lau hagoevaia emui dirava koikoi bona emui miro dekena amo.   
\p
\v 26 “Bona lau ese laloa matamata, bona lauma matamata umui dekenai do lau henia. Guna emui kudouna be auka, nadi bamona. To lau ese unai kudouna auka do lau kokia, kudouna manokana, kamonai henia diba gauna do lau henia.   
\p
\v 27 “Bona lau ese egu Lauma umui dekenai do lau henia, emui lalona dekenai do ia noho. Umui do lau hakaua, vadaeni egu taravatu bona egu oda ibounai do umui badinaia.  
\v 28 Unai neganai umui ese emui sene taudia dekenai lau henia tano dekenai do umui noho. Umui be lauegu bese do umui lao, bona lau be emui Dirava do lau lao.  
\v 29 Emui miro ibounai dekena amo umui do lau hagoevaia, bona emui uiti bona koni do lau oda henia, momo herea do ia vara. Unai dainai do umui hitolo lou lasi.  
\v 30 Au huahua bona uma aniani do lau habadaia, vadaeni hitolo dainai bese idauidau edia huanai do umui hemarai lou lasi.   
\p
\v 31 “Vadaeni umui emui dala dikadia bona emui kara dikadia do umui laloa lou. Unai neganai umui sibona do umui negea bamona, bona do umui hemarai bada momokani.  
\v 32 Israela taudia e, lau ura umui diba, umui lau hanamoa dainai inai kara lau karaia lasi. Lasi momokani! To lau ura emui kara dikadia dainai, hemarai bada ena mamina do umui abia. Lau, Lohiabada Dirava ese lau hereva vadaeni.”   
\p
\v 33 Lohiabada Dirava ma ia gwau, “Emui kara dika ibounai dekena amo umui do lau hagoevaia neganai, lau ese emui hanua korikori dekenai umui do lau atoa lou, unuseni do umui noho. Bona idia hadikaia ore gabudia ibounai be do umui haginia lou.  
\v 34 Emui tano, guna idia namo gaudia, be raka hanaia taudia idia herevalaia idia be ava ginigini dekena amo idia dika. To lau ese emui dala do lau kehoa, umui ese unai tano do umui birulaia lou.   
\p
\v 35 “Vadaeni taunimanima ibounai be do idia gwau, ‘Inai tano, guna ia be dika, to hari ia be Eden ena Uma Gabuna bamona. Bona inai hanua, guna be tuari ese ia hadikaia ore, bona ena kohu idia henaoa ore, be hari taunimanima idia noholaia. Ma inai hanua be mai edia magu danu.’  
\v 36 Unai neganai umui kahirakahira idia do mauri noho bese taudia do idia diba namonamo, lau Lohiabada ese, idia hadikaia vadaeni hanua ibounai be lau haginia lou. Bona do idia diba, lau ese tano dikadia lau hanamoa lou diba danu. Lau gwauhamata vadaeni unai bamona do lau karaia, bona lau Lohiabada ese do lau karaia momokani.”   
\p
\v 37 Lohiabada Dirava ma ia hereva, ia gwau, “Bema Israela bese taudia ese lau idia noia, edia bese do lau habadaia totona, lau ese edia noinoi do lau kamonai. Vadaeni idia be momo herea do idia lao, mamoe idia momo herea bamona.   
\p
\v 38 “Oibe, idia be do momo herea, hegeregere boubou totona Ierusalema dekenai idia mailaia mamoe idia momo herea bamona, aria helagana idia karaia neganai. Unai dainai unai idia hadikaia vadaeni hanua ibounai be taunimanima dekena amo do idia honu momokani. Vadaeni do idia diba lau sibona be Lohiabada.”   
\c 37  
\s1 Turia kaukaudia idia noho ena koura  
\p
\v 1 Lohiabada ena siahu badana ese lau dekenai ia kamokau, bona iena Lauma ese lau ia abia isi, lau ia abia lao, koura ta dekenai lau ia atoa. Unai koura ena tano palaka dekenai be turia kaukau momo herea idia noho.  
\v 2 Lohiabada ese lau ia hakaua lao, hakaua mai, bona koura ena kahana ibounai dekenai turia momo lau itaia. Turia be kaukau momokani.   
\p
\v 3 Lohiabada ese lau ia nanadaia, ia gwau, “Tanobada tauna e, inai turia be do idia mauri lou diba, a?”  
\p Lau haere lau gwau, “Lohiabada Dirava, oi tamona sibona oi diba, lau be lasi.”   
\p
\v 4 Vadaeni Lohiabada ma lau dekenai ia hereva, ia gwau, “Lau ura unai turia dekenai peroveta hereva do oi henia, do oi gwau, ‘Umui turia kaukaudia e, Lohiabada ena hereva do umui kamonai!’  
\v 5 Idia dekenai lau, Lohiabada Dirava egu hereva do oi gwauraia, lau gwau: Lau ese hahodi be umui lalona dekenai do lau atoa vareai, vadaeni umui be do umui mauri lou.  
\v 6 Lau ese umui dekenai varovaro bona hidio do lau atoa, bona kopina dekena amo umui do lau koua. Lau ese hahodi umui dekenai do lau henia, vadaeni do umui mauri lou momokani. Unai neganai umui be do umui diba lau be Lohiabada.”   
\p
\v 7 Vadaeni Lohiabada ese lau ia hamaoroa hegeregerena lau peroveta. Bona hereva lau gwauraia noho neganai, regena ta, turia idia haboua noho edia regena lau kamonai. Turia be idia haboua lou, turia ta ta ena gabu ena gabu dekenai idia kamokau.   
\p
\v 8 Bona lau itaia noho neganai, idia dekenai varovaro idia vara, hidio danu idia hedinarai. Kopina danu ese turia idia koua. To idia edia lalona dekenai be hahodi ia noho lasi.   
\p
\v 9 Dirava be lau dekenai ia hereva, ia gwau, “Tanobada tauna e, lai dekenai do oi peroveta, lai do oi hamaoroa, Lohiabada Dirava ese ia oda henia, kahana ibounai dekena amo do oi hodaia mai, inai mase turiadia dekenai do oi vareai, vadaeni mauri idia davaria.”   
\p
\v 10 Vadaeni Lohiabada ese lau ia hamaoroa hegeregerena lau peroveta. Unai turia lalonai hahodi idia vareai, vadaeni mauri idia davaria, bona idia gini. Idia be momo herea, tuari orea badana hegeregerena.   
\p
\v 11 Dirava ese lau ia hamaoroa, ia gwau, “Tanobada tauna e, Israela taudia be inai turia bamona. Idia gwau idia be kaukau vadaeni, idia gwau idia be dala lasi do idia namo lou, bona idia be dika vadaeni.  
\v 12 Unai dainai lauegu bese taudia Israela dekenai do oi peroveta, do oi gwau lau Lohiabada Dirava ese edia guria gabudia do lau kehoa. Emui mase gabudia dekena amo umui do lau abia isi, murimuri dekenai do umui mai, bona emui tano korikori Israela dekenai umui do lau atoa lou.   
\p
\v 13 “Edia guria gabudia lau kehoa, bona murimuri dekenai idia lau mailaia neganai, idia be do idia diba lau be Lohiabada.  
\v 14 Lauegu hahodi be idia edia lalona dekenai do lau atoa, idia dekenai mauri do lau henia lou, bona edia tano korikori dekenai do lau atodia, idia noho. Unai neganai do idia diba lau be Lohiabada. Lau gwauhamata vadaeni inai kara do lau karaia, bona do lau karaia momokani. Lau inai Lohiabada lau hereva vadaeni.”   
\s1 Iuda bona Israela be do idia haboua, basileia tamona do idia lao  
\p
\v 15 Lohiabada ese lau dekenai ia hereva lou,  
\v 16 ia gwau, “Tanobada tauna e, au ta do oi abia, bona ia latanai do oi torea inai bamona: ‘Iuda basileia ena au.’ Ma au ta do oi abia, bona ia latanai do oi torea inai bamona: ‘Israela basileia ena au.’   
\p
\v 17 “Unai neganai unai au ruaosi oiemu imana tamona dekenai do oi dogoatao, vadaeni edia toana be au tamona sibona bamona.  
\v 18 Vadaeni oiemu bese taudia ese inai kara ena anina oi dekenai do idia nanadaia neganai, oi ese do oi haere, oi gwau,  
\v 19 ‘Lohiabada Dirava ese inai bamona ia hereva, ia gwau: Lau ese Israela ena au do lau abia, bona Iuda ena au dekenai do lau atoa kau. Bona unai au ruaosi dekena amo au tamona do lau halaoa, lauegu imana dekenai do lau dogoatao.’ ”   
\p
\v 20 Lohiabada ese lau ia hereva henia, ia gwau, “Esekiela e, oiemu imana dekenai au ruaosi do oi dogoatao, taunimanima dekenai do oi hedinaraia.  
\v 21 Bona idia do oi hamaoroa, lau, Lohiabada Dirava ese egu bese be bese idauidau dekena amo do lau abia, tanobada kahana kahana ibounai dekena amo do lau abidia, bona do lau haboudia, edia tano korikori lalonai do lau hakaudia vareai.   
\p
\v 22 “Vadaeni bese tamona idia do lau halaoa unai tano lalonai, Israela ena ororo dekenai. Bona king tamona ese idia ibounai do ia gunalaia. Idia be bese rua do idia lao lou lasi, bona idia be basileia rua dekenai do idia parara lou lasi.   
\p
\v 23 “Idia ese idia sibona do idia hamiroa lou lasi kaivakuku bona dirava koikoi dekena amo, o sibona do idia hadikaia lasi kara dikadia dekena amo. Badina be lau ese idia do lau durua, bona edia kerere, bona lau dekena amo idia raka siri kara dekena amo idia do lau ruhaia. Lau ese idia do lau hagoevaia, bona idia be lauegu bese do idia lao, bona lau be edia Dirava do lau lao.   
\p
\v 24 “Bona lauegu hesiai tauna Davida bamona tauna be edia King do ia lao, bona ia tamona ese idia ibounai do ia naria, mamoe naria tauna bamona. Idia ese lauegu taravatu do idia badinaia, bona egu oda do idia kamonai henia namonamo.   
\p
\v 25 “Idia be egu hesiai tauna Iakobo dekenai lau henia tano dekenai do idia noho. Edia sene taudia idia noho tano be unai. Idia bona edia natudia bona tubudia be unai gabu dekenai do idia noho ela bona hanaihanai. Bona egu hesiai tauna Davida bamona tauna be edia King do ia lao ela bona hanaihanai.   
\p
\v 26 “Lau ese idia danu maino ena gwauhamata do lau karaia, bona inai gwauhamata be do ia noho hanaihanai. Lau ese idia do lau haginia goada, bona edia bese do lau habadaia, do idia be momo herea. Lau ese egu Dubu Helaga be edia tano dekenai do lau atoa, bona unuseni do ia noho ela bona hanaihanai.   
\p
\v 27 “Lau be unuseni idia danu do lau noho, lau be idia edia Dirava, bona idia be lauegu bese do idia lao.   
\p
\v 28 “Oibe, lauegu Dubu Helaga be Israela taudia edia gabu dekenai do lau atoa, idia edia huanai do ia noho ela bona hanaihanai. Unai dainai bese idauidau taudia be do idia diba, lau Lohiabada ese Israela taudia lau abia hidi vadaeni, lauegu bese korikori totona.”   
\c 38  
\s1 Peroveta hereva Goga ena latanai  
\p
\v 1 Lohiabada ese lau dekenai ia hereva, ia gwau,  
\v 2 “Tanobada tauna e, Goga, Magoga tano tauna, Meseka bona Tubala besedia edia king tauna badana dekenai oiemu matana do oi negea, bona iena latanai do oi peroveta,  
\v 3 do oi gwau, lau, Lohiabada Dirava ese inai bamona lau hereva noho, lau gwau: Goga e, Meseka bona Tubala edia king badana e, lau ese oi lau dagedage henia noho inai.  
\v 4 Lau ese oi do lau veria giroa, bona kimai be oiemu aukina dekenai do lau atoa, vadaeni oi do lau veria mai. Oiemu tuari orea danu do lau veria, hosi bona guia taudia, ibounai be mai edia tuari dabua, orea bada herea, ibounai mai edia keme auridia bona kesi, bona mai edia tuari kaia edia imadia dekenai.  
\v 5 Parasa bona Etiopia bona Libia taudia be idia danu, bona idia ibounai be mai edia kesi bona auri kwara gaudia.  
\v 6 Gomere bona Bete Togarama, mirigini kahana gabu daudau dekena amo, mai edia tuari taudia danu, bese momo taudia be oi Goga danu idia noho. Idia ibounai do lau veria mai.   
\p
\v 7 “Goga e, do oi noho hegaegae, oi bona oi dekenai idia haboua orea badadia danu. Oi ese idia ibounai do oi gunalaia, bona tuari totona do umui noho hegaegae.  
\v 8 Dina momo murinai lau ese umui do lau boiria hebou. Lagani momo murinai lau ese oi Goga do lau oda henia, tano ta do oi tuari henia. Inai tano be nega daudau mai anina lasi ia noho, to ena dika dekena amo idia hanamoa lou vadaeni. Inai tano noho taudia be guna bese idauidau momo edia huanai mai maino danu idia noho dainai tuari ena mamina idia diba lasi. Edia tano korikori Israela dekenai idia giroa lou vadaeni, bona hari idia be mai maino danu idia noho.  
\v 9 To oi, Goga e, mai oiemu tuari orea, bona oi danu idia mai bese momo taudia ese unai tano Israela do umui tuari henia haraga herea, lai guba bamona. Umui ese unai tano ori bamona do umui koua.”   
\p
\v 10 Lohiabada Dirava ese inai bamona Goga dekenai ma ia gwau, “Unai dina do ia ginidae neganai, laloa haida be oi dekenai do idia vara, vadaeni kara dika ta do oi palania,  
\v 11 do oi gwau, ‘Lau ese mai edia magu lasi hanuadia edia tano do lau tuari henia. Lau ese mai maino danu idia noho taudia, tuari idia laloa lasi taudia do lau tuari henia. Badina idia be mai hanua magudia lasi, mai edia magu iduaradia lasi, mai edia auri ba loka gaudia lasi.  
\v 12 Unai guna idia dika hanuadia lalonai idia noho taudia edia kohu do lau henaoa, bona edia gau do lau abia kava. Idia be bese idauidau edia huanai, gabu idauidau dekena amo idia haboua lou, bona hari, mai edia boromakau bona mamoe momo Israela tano ena huanai momokani idia noho.’ ”   
\p
\v 13 Ma Lohiabada ese Goga ia hamaoroa, ia gwau, “Sieba bona Dedana, bona Tarasisi ena hoihoi taudia bona edia hanua ibounai taudia ese oi do idia nanadaia, do idia gwau, ‘Oi ese kohu henaoa totona oi mai, a? Oi ese oiemu orea ibounai oi haboua vadaeni, kohu bona gau do umui dadia, bona siliva bona golo do umui huaia lao totona, a? Boromakau, mamoe bona kohu haida danu do umui dogoatao, bona do umui abia lao, a?’ ”   
\p
\v 14 Lohiabada ese lau dekenai ia hereva, ia gwau, “Tanobada tauna e, Goga do oi hamaoroa, lau, Lohiabada Dirava ese inai bamona hereva ia dekenai lau gwauraia inai: Egu bese Israela taudia be idia noho namonamo neganai, oi ese do oi toreisi.  
\v 15 Oiemu gabu mirigini kahana dekena amo do oi raka mai, mai oiemu orea badana danu, bese idauidau edia tuari taudia, idia ibounai ese hosi idia guia taudia.  
\v 16 Umui ese egu bese, Israela taudia, do umui tuari henia, bona Israela tano do umui koua, ori koremakorema ese tano ia koua bamona. Goga e, vaira neganai, lau ese oi do lau mailaia, egu tano do oi hadikaia, vadaeni bese idauidau ese lau do idia diba, bona idia dekenai egu helaga do lau hedinaraia, egu kara oi dekena amo do idia itaia neganai.  
\v 17 Nega gunadia lalonai egu hesiai taudia, Israela ena peroveta taudia edia ududia dekena amo lau herevalaia tauna be oi. Unai lagani gunadia lalonai, idia peroveta lau ese oi Goga do lau mailaia, Israela do oi tuari henia totona. Lau, Lohiabada Dirava lau hereva vadaeni inai.”   
\s1 Dirava ese Goga ena dika davana do ia henia  
\p
\v 18 Lohiabada Dirava ia gwau, “Unai dina dekenai, Goga ese Israela tano do ia tuari henia hamatamaia dinana dekenai, egu badu do ia toreisi.  
\v 19 Badina be egu badu ena siahu dainai, lau ese lau gwauraia inai: Unai dina dekenai, Israela tano be do ia mareremarere bada herea.  
\v 20 Davara ena gwarume, ataiai manudia, uda boromadia, tano dekenai idia rau noho gaudia ibounai, bona tanobada ena latanai idia noho taudia ibounai danu, be egu vairana dekenai do idia heudeheude. Ororo danu do idia bubua, bona edia nadi badadia do idia moru diho. Israela dekenai noho magu ibounai be tano dekenai do idia moru diho.  
\v 21 Lau, Lohiabada Dirava lau hereva inai: Lau ese gari karadia idauidau momo do lau havaraia, Goga do lau hadikaia totona, vadaeni iena tuari taudia ese idia ta ta dekenai do idia tuari henia, vadaeni tuari kaia dekena amo do idia mase.  
\v 22 Hanaia gorere dikadia bona tuari dekena amo Goga ena dika davana do lau henia. Medu bada herea bona aisi bamona medu, lahi bona salipa be Goga, bona iena orea taudia, bona ia idia durua besedia edia latanai do lau siaia diho.  
\v 23 Unai dekena amo egu ladana ena namo herea bona egu helaga do lau hedinaraia, bona bese momo edia vairana dekenai egu kara do lau hedinaraia. Unai neganai do idia diba lau be Lohiabada.”   
\c 39  
\s1 Dirava ese Goga do ia halusia  
\p
\v 1 Lohiabada Dirava ia gwau, “Tanobada tauna e, Goga ena latanai do oi peroveta, do oi gwau: Lohiabada Dirava ese oi totona inai hereva ia gwauraia: Goga e, Meseka bona Tubala edia king e, lau ese oi lau dagedage henia noho inai.  
\v 2 Lau ese oi do lau hagiroa, bona oi do lau veria lao. Mirigini kahana, gabu daudauna dekena amo oi do lau mailaia. Oi do lau hakaua, Israela ena ororo gabudia do oi tuari henia totona.  
\v 3 Unai neganai oiemu peva be emu imana laurina dekena amo do lau botaia ia moru, bona emu diba be emu imana idibana dekena amo do lau hamorudia.  
\v 4 Goga e, oi bona emu tuari orea taudia ibounai, bona oi idia durua noho bese idauidau taudia danu be do umui moru, do umui mase Israela ena ororodia dekenai. Bona lau ese ataiai manudia ibounai, bona boroma idauidau ibounai danu do lau mailaia, emui tauanidia do idia ania.  
\v 5 Umui be taunimanima noho lasi tano dekenai do umui mase. Lau, Lohiabada Dirava, lau hereva vadaeni inai.  
\v 6 Lau ese lahi do lau siaia diho, ia ese Magoga bona kone tanodia dekenai idia noho namonamo taudia do ia gabudia. Unai neganai do idia diba lau be Lohiabada.   
\p
\v 7 “Lau ese egu ladana helagana ena anina be Israela taudia dekenai do lau hadibaia. Bona idia do lau taravatua, egu ladana helagana do idia hamiroa lou lasi. Vadaeni bese idauidau do idia diba lau Lohiabada, be Israela ena Dirava Helagana.”   
\p
\v 8 Lohiabada Dirava ese ma ia hereva, ia gwau, “Kamonai! Lau ese lau herevalaia vadaeni dinana be do ia ginidae momokani.  
\v 9 Unai neganai Israela hanua edia lalonai idia noho taudia be do idia raka lao, tuari taudia ese idia rakatania vadaeni tuari gaudia be lahi totona do idia haboua, do idia gabudia ore. Kesi bona keme auridia, peva bona diba, heatu audia bona io. Israela taudia ese unai gaudia be lahi audia do idia halaoa, ela bona lagani 7 idia ore.  
\v 10 Unai dainai idia ese au be uma tanodia dekenai do idia abia lasi, o uda dekenai do idia utua lasi, badina be edia lahi be unai tuari gaudia dekena amo do idia karaia. Israela taudia ese idia dekena amo idia henaoa taudia edia kohu ma do idia henaoa, bona edia kohu idia abia lao taudia dekena amo kohu ma do idia abia lao. Lau, Lohiabada Dirava lau hereva noho inai.   
\s1 Goga do idia guria  
\p
\v 11 “Unai dina dekenai lau ese Goga dekenai guria gabuna do lau henia Israela dekenai: Koura ta, ladana be, ‘Laolao Taudia edia Koura,’ unai be Davara Mase ena dina daekau kahana dekenai. Inai guria gabuna ese laolao taudia edia dala be do ia koua, badina be unuseni Goga bona iena orea badana ibounai do idia guridia. Unai gabu ena ladana do idia atoa, ‘Goga ena Tuari Orea ena Koura.’   
\p
\v 12 “Hua ibounai 7 lalonai, Israela besena taudia ese unai Goga orea taudia do idia guridia, tano do idia hagoevaia totona.  
\v 13 Israela tano taudia ibounai ese do idia guridia, bona unai dina, egu hairai bona egu kwalimu do lau hedinaraia dinana dekenai, tanobada taudia ese Israela taudia do idia matauraia. Lau, Lohiabada Dirava ese lau hereva vadaeni inai.   
\p
\v 14 “Unai hua 7 idia ore neganai, tau haida ma do idia abia hidi, idia ese tano do idia raka hanaia lou, tano ena kopina dekenai do noho mase tauanidia do idia guria totona. Unai dekena amo idia ese tano ena kahana ibounai do idia hagoevaia momokani.  
\v 15 Tano idia raka hanaia neganai, bema idia ta ese tau ta ena turiana do ia davaria neganai, ia ese toa ta do ia haginia unai turia ena badibadinai, vadaeni mase guria taudia ese unai toa do idia itaia, bona idia ese Goga ena Tuari Orea Koura dekenai unai tauanidia do idia guria.  
\v 16 Hanua ta, ena ladana, Tuari Orea Badana, be unuseni do ia noho. Unai karadia dekena amo tano be do ia goeva momokani vadaeni.”   
\p
\v 17 Lohiabada Dirava ese lau dekenai ia hereva, ia gwau, “Tanobada tauna e, ataiai manudia idauidau bona uda boromadia ibounai dekenai do oi boiboi, do oi gwau, ‘Kahana ibounai dekena amo do umui haboua mai, boubou aria ta, lau Lohiabada ese do lau karaia hegaegae umui totona gauna do umui ania, boubou aria badana Israela ena ororodia dekenai. Vamu do umui ania, bona rara do umui inua.  
\v 18 Tuari taudia goadadia edia hidiona do umui ania, bona tanobada lohia taudia edia rarana do umui inua, idia be mamoe tau, bona mamoe natudia bona nanigosi bona boromakau tau bamona, ibounai be Basana ubua gaudia bamona gaudia, egu aria totona gaudia.  
\v 19 Unai taudia be boubou totona bamona lau aladia mase neganai, umui manu bona boroma ibounai ese digara do umui ania ia lao bona emui bogadia idia kunu momokani, bona rara do umui inua, ia lao bona umui kekero.  
\v 20 Egu aniani patana dekenai hosi bona hosi guia taudia, tuari goada herea taudia, bona tuari taudia idauidau do umui ania, bona emui bogadia do idia kunu momokani. Lau Dirava, Lohiabada lau hereva vadaeni inai.’ ”   
\s1 Dirava ese Israela do ia hanamoa lou  
\p
\v 21 Lohiabada ia gwau, “Lau ese egu hairai be bese idauidau dekenai do lau hedinaraia, vadaeni bese ibounai ese egu kota maoromaoro do idia itaia, bona dika ena davana lau henia ena siahu danu do idia itaia.  
\v 22 Unai dina dekena amo Israela taudia be do idia diba lau be Lohiabada, edia Dirava.  
\v 23 Bona bese idauidau be do idia diba, Israela besena be hesiai mai guia danu dekenai idia lao, edia karadika dainai. Badina be edia kara dekena amo, idia ese lau idia koia dika herea. Unai dainai egu vairana be idia dekena amo lau hunia, bona idia tuari henidia gwauraia taudia edia siahu henunai Israela taudia lau atodia, vadaeni Israela taudia be tuari dekenai idia mase.  
\v 24 Edia miro bona edia kerere hegeregerena, be idia dekenai lau karaia, bona egu vairana be idia dekena amo lau hunia.”   
\p
\v 25 Lohiabada Dirava ia gwau, “To harihari lau ese Iakobo ena tubuna taudia do lau bogahisihisi henia, Israela taudia edia noho namo gunana be ma do lau havaraia lou. Egu ladana helagana do lau naria namonamo.  
\v 26 Idia ese edia hemarai do idia laloaboio, edia kara koikoi lau dekenai danu do idia laloaboio. Badina idia be edia tano korikori dekenai do idia noho lou, bona mai maino danu do idia noho, haida ese do idia hagaridia lasi.  
\v 27 Badina be lau ese bese idauidau edia huanai dekena amo Israela taudia do lau abidia lou, bona idia badu henidia besedia dekena amo do lau haboudia lou neganai, lau ese idia dekena amo, egu helaga be bese idauidau dekenai do lau hedinaraia momokani.  
\v 28 Unai neganai Israela taudia do idia diba lau be Lohiabada, edia Dirava, badina be gabu daudau dekenai idia lau siaia, bese idauidau edia huanai, bona ma lau haboudia lou, edia tano korikori dekenai. Lau ese idia ta be bese idauidau edia huanai do lau rakatania lou lasi.  
\v 29 Bona egu vairana be idia dekena amo do lau hunia lou lasi, to egu Lauma be Israela besena dekenai do lau henia momokani. Lau, Lohiabada Dirava lau hereva vadaeni inai.”   
\c 40  
\s1 Esekiela ena mata hanai  
\p
\v 1 Aiemai hesiai mai guia danu negana, ena lagani namba 25, hua ginigunana ena dina namba 10 dekenai, unai be Ierusalema idia halusia murinai, lagani 14 idia lao vadaeni. Unai dina dekenai, Lohiabada ese iena imana egu latanai ia atoa.  
\v 2 Dirava ese mata hanai ta dekena amo Israela tano dekenai lau ia abia lao, ororo badana ta ena ataiai lau ia atoa diho, vadaeni egu vairana dekenai ruma haida lau itaia, hanua badana ta bamona.  
\v 3 Dirava ese unai hanua kahirakahira lau ia hakaua lao, bona tau ta lau itaia, iena toana be auri laboralabora bamona, mai ena lata tohoa varona, bona lata tohoa auna danu iena imana dekenai. Ia be hanua magu ena iduara ena badibadinai ia gini noho.   
\p
\v 4 Ia ese lau dekenai ia hereva, ia gwau, “Tanobada tauna e, lau ese oi dekenai lau hedinaraia gaudia ibounai be oiemu matana do idia itaia namonamo, bona oi kamonai gaudia do oi kamonai henidia bona lalodia namonamo, badina inai gau itaia totona Dirava ese oi ia mailaia vadaeni. Do oi itaia gaudia ibounai be Israela bese taudia do oi hamaoroa.”   
\s1 Magu ena iduara, dina ia daekau kahana gauna  
\p
\v 5 Vadaeni Dubu Helaga lau itaia, bona magu ta ese Dubu Helaga ena tano ia hagegea momokani. Unai lata tohoa auna, unai tau ena imana dekenai gauna, ena lata be 3 mita. Vadaeni unai tau ese unai au dekena amo magu ena bada ia abia. Magu ena ataiai be 3 mita bona ena udunana danu be 3 mita.   
\p
\v 6 Vadaeni tau be dina ia daekau kahana ia vaira henia iduara dekenai ia lao. Iduara ena vadavada dekenai ia daekau lao, bona iduara ena raka vareai aena atoa gabuna ena lababa ia abia, iduara ena lababana be 3 mita.  
\v 7 Dubu gimaia taudia edia daiutu be iduara ruma ena kahana kakana dekenai idia noho. Daiutu toi be kahana ta, daiutu toi be kahana ta. Inai daiutu ta ta edia bada be hegeregere, edia lata be 3 mita, bona edia lababa danu be 3 mita. Idia padadia dekenai idia noho habadia edia udunana be 2.5 mita. Unai daiutu 6 edia dokona dekenai raka vareai gabuna ta ma ia noho, ena lata be 3 mita, bona unai raka vareai gabuna ena murinai be dehe, o daiutu badana ta. Inai daiutu badana ese Dubu Helaga ia vaira henia.   
\p
\v 8 Unai tau ese unai dehe o daiutu badana ena lababa ia abia, ena lababa be 4 mita, bona ena dokona habana ena udunana be 1 mita.  
\v 9 Unai dokona habana lalonai be iduara ta, Dubu Helaga kahirakahira gauna.   
\p
\v 10 Unai gima taudia edia daiutu 6, toi kahana ta, ma toi kahana ta, edia bada be tamona, bona idia padadia dekenai idia noho habadia edia udunana be tamona.   
\p
\v 11 Vadaeni unai tau ese iduara ena raka vareai ena lata ia abia, 5 mita, bona iduara korikori ena lata ia abia, 6.5 mita.  
\v 12 Gima taudia edia daiutu ta ta edia vairanai be magu kwadogina ta, ena ataiai be 50 sentamita bona iena udunana danu 50 sentamita. Unai daiutu edia lababa be 3 mita, edia lata danu 3 mita.  
\v 13 Unai tau ese danu unai iduara ruma ena lababa ia abia, ena daiutu ta ena murimurina kahana haba dekena amo ia lao bona ia vaira henia daiutu ena murimurina kahana haba dekenai, vadaeni iduara ruma ena lababa be ibounai 12.5 mita.  
\v 14 Dehe, o daiutu badana danu ena lababa ia abia, 10 mita. Inai dehe ena iduara be Dubu ena magu ese ia hagegea ariara gabuna dekenai ia vareai lao.  
\v 15 Magu ena iduara ena raka vareai ruma ena vairana kahana ia lao bona iena dehe ena dokona momokani be 25 mita.  
\v 16 Daiutu ta ta edia murimurina habadia edia lalonai uindo maragidia idia noho, bona daiutu edia padadia lalonai danu uindo idia noho. Dehe danu be mai ena uindo haida iena haba toi edia latanai. Ruma ena lalona dekenai idia vaira henia haba edia latanai pama audia edia laulaudia idia koroa.   
\s1 Murimuri kahana maguna ese ia hagegea ariara gabuna  
\p
\v 17 Vadaeni unai tau ese murimuri kahana maguna ia hagegea ariara gabuna lalonai lau ia hakaua vareai. Unuseni daiutu momo bona nadi ariarana ta lau itaia, idia ese magu idia hagegea bamona. Lau itaia, daiutu ibounai 30 idia noho, bona idia ese unai nadi ariarana idia vaira henia.  
\v 18 Inai nadi ariarana be magu iduaradia dekenai ia kamokau lao, bona iena lababa be magu iduaradia edia lata hegeregerena. Unai nadi ariarana be henunai ariarana, to Dubu ena lalona ariara be ataiai sisina.   
\p
\v 19 Magu ena iduara ma ta ese Dubu Helaga ena lalona ariara ena maguna ena raka vareai gabuna ia karaia. Ia be ataiai sisina iduarana. Vadaeni unai tau ese unai magu iduara ruaosi, henunai gauna, bona ataiai sisina gauna edia padana ia abia, 50 mita.   
\s1 Mirigini kahana magu iduara  
\p
\v 20 Vadaeni unai tau ese mirigini kahana dekenai lau ia hakaua lao. Unuseni magu iduara ta ese mirigini kahana ariara ia vaira henia. Unai be murimuri kahana maguna ena iduara ta. Unai tau ese iduara ena ruma ena lata bona ena lababa ia abia.  
\v 21 Dubu ena gimaia taudia edia daiutu be iduara ruma ena kahana kahana dekenai idia noho, daiutu toi be kahana ta, bona daiutu toi be kahana ta, edia lata bona lababa, bona daiutu padadia idia noho habadia edia udunana, bona unai daiutu badana, o dehe ena lata bona lababa danu be dina ia daekau kahana magu iduara ruma ena bada ibounai hegeregerena. Unai mirigini kahana iduara ena ruma ena lata be 25 mita, bona iena lababa be 12.5 mita.  
\v 22 Daiutu badana o dehe, uindo ibounai, bona pama audia, idia koroa gaudia ibounai be unai dina daekau kahana magu iduara ena koroa gaudia hegeregerena. Vadavada ena aena moia audia be ibounai 7, bona dehe ena iduara be Dubu ena magu ese ia hagegea ariara gabuna dekenai ia vareai lao.  
\v 23 Inai mirigini kahana magu iduara ese lalona kahana dekenai ia noho magu iduara ma ta ia vaira henia, dina daekau kahana magu iduara ia karaia hegeregerena. Vadaeni unai tau ese unai magu iduara ruaosi edia padana ia abia, 50 mita.   
\s1 Diho kahana magu iduara  
\p
\v 24 Unai murinai unai tau ese diho kahana dekenai lau ia hakaua lao, vadaeni magu iduara ma ta ai itaia. Ia ese unai iduara ena ruma ena lata bona lababa ia abia, bona ia be unai iduara ruma haida edia bada ibounai hegeregerena.  
\v 25 Inai diho kahana magu iduara be mai ena uindo, unai magu iduara haida hegeregerena. Inai magu iduara ena lata be 25 mita, bona ena lababa be 12.5 mita, unai magu iduara haida hegeregerena.  
\v 26 Ena vadavada ena aena moia audia be ibounai 7, bona ena dehe ena iduara be Dubu ena magu ese ia hagegea ariara gabuna dekenai ia vareai lao. Ruma ena lalona dekenai idia vaira henia haba edia latanai pama audia edia laulaudia idia koroa.  
\v 27 Inai diho kahana magu iduara danu ese lalona kahana dekenai ia noho magu iduara ma ta ia vaira henia. Vadaeni unai tau ese unai magu iduara ruaosi edia padana ia abia, 50 mita.   
\s1 Lalona kahanai ia noho magu ia hagegea ariara gabuna: Diho kahana iduara  
\p
\v 28 Vadaeni unai tau ese lalona kahana magu ia hagegea ariara gabuna dekenai lau ia hakaua lao, diho kahana magu iduara ta dekena amo. Ia ese unai diho kahana magu iduara ruma, lalona gauna, ena lata bona lababa ia abia, iena bada be unai murimuri maguna ena iduara ruma ibounai edia bada bona toana hegeregerena.  
\v 29-30 Inai ruma ena gima taudia edia daiutu, iena dehe bona iena lalona kahana haba edia bada ibounai be unai magu iduara ruma haida edia bada bona toana hegeregerena. Inai magu iduara ruma lalonai danu be uindo idia noho. Ruma ena lata be 25 mita bona iena lababa be 12.5 mita.  
\v 31 Iena dehe ese murimuri kahana magu ia hagegea ariara gabuna ia vaira henia, bona ruma ena lalona haba edia latanai be pama audia edia laulaudia idia koroa. Inai magu iduara ena vadavada ena aena moia audia be ibounai 8.   
\s1 Lalona kahanai ia noho magu ia hagegea ariara gabuna: Dina daekau kahana iduara  
\p
\v 32 Vadaeni unai tau ese lalona kahana magu ia hagegea ariara gabuna dekenai lau ia hakaua lao, dina ia daekau kahana magu iduara ta dekena amo. Ia ese unai dina ia daekau kahana magu iduara ruma, lalona gauna, ena lata bona lababa ia abia, iena bada bona toana be unai magu iduara haida hegeregerena.  
\v 33 Inai ruma danu ena gima taudia edia daiutu ibounai, iena dehe, bona iena lalona kahana haba edia bada ibounai be unai magu iduara ruma haida edia bada bona toana hegeregerena. Uindo danu ese ruma idia hagegea, dehe dekenai danu uindo idia noho. Ruma ena lata be 25 mita, bona iena lababa be 12.5 mita.  
\v 34 Iena dehe ese murimuri kahana magu ia hagegea ariara gabuna ia vaira henia, bona ruma ena lalona haba edia latanai pama audia edia laulaudia idia koroa. Inai magu iduara ena vadavada ena aena moia audia be ibounai 8.   
\s1 Lalona kahanai ia noho magu ese ia hagegea ariara gabuna: Mirigini kahana iduara  
\p
\v 35 Vadaeni unai tau ese mirigini kahana magu iduara, lalona gauna, dekenai lau ia hakaua lao. Ia ese ruma ena lata bona lababa ia abia, bona ia be unai magu iduara ruma haida edia bada bona toana hegeregerena.  
\v 36 Ruma be mai ena gima taudia edia daiutudia 6 unai haida hegeregerena. Ruma ena lalona habadia be mai edia du, bona ia be mai ena daiutu badana o dehe, bona mai ena uindo, idia hagegea gaudia. Iena gau ibounai be unai magu iduara haida hegeregerena. Iena lata be 25 mita bona iena lababa be 12.5 mita.  
\v 37 Ena dehe ese murimuri kahana magu ia hagegea ariara gabuna ia vaira henia, bona ruma ena lalona haba edia latanai pama audia edia laulaudia idia koroa. Inai magu iduara ena vadavada ena aena moia audia be ibounai 8.   
\s1 Boubou gaudia do idia abia hegaegae daiutudia  
\p
\v 38 Unai murimuri kahanai ia noho magu ese ia hagegea ariara gabuna dekenai daiutu ta ia noho, mirigini kahana magu iduara, lalona gauna, ena badibadinai. Inai daiutu ena iduara be magu iduara ena dehe lalonai ia vareai, bona inai ruma lalonai boromakau, mamoe bona gabua ore totona boubou gaudia idia huria.  
\v 39 Dehe lalonai, pata 4 idia noho, rua haba ta, bona rua haba ta dekenai. Inai patadia latanai boubou totona gaudia idia alaia mase, gabua ore totona gaudia, o kara dika totona gaudia, o kerere totona gaudia.  
\v 40 Dehe ena murimurina kahana dekenai, mirigini kahana magu iduara raka vareai gabuna dekenai, be pata 4, rua be vadavada kahana ta, ma rua be vadavada kahana ta.  
\v 41 Vadaeni unai be pata ibounai 8, idia 4 be dehe lalonai, bona idia 4 be dehe ena murimurina kahanai. Inai pata ibounai edia latanai boubou totona gaudia idia alaia mase.  
\v 42 Ma nadi patadia, nadi dekena amo idia utua gaudia, ibounai 4 danu idia noho, gabua ore bouboudia utua bona abia hegaegae totona gaudia. Pata edia lata be 75 sentamita, edia lababa danu be 75 sentamita, bona edia ataiai be 50 sentamita. Boubou gaudia alaia mase totona gaudia, kaia, bona ira bamona gaudia be unai nadi patadia dekenai idia atoa.  
\v 43 Kimai, edia lata be tau ta ena imana ena lababa, be unai raka vareai ena haba ruaosi dekenai idia taua dae. Unai gabu ena pata edia latanai be boubou gaudia edia hidiona idia atoa.   
\p
\v 44 Vadaeni unai tau ese lalona kahanai ia noho magu ese ia hagegea ariara gabuna dekenai lau ia hakaua lao. Unuseni lau ese daiutu rua lau itaia, ta be mirigini kahana magu iduara badibadinai ia noho, ia ese diho kahana ia vaira henia. Ma ta be diho kahana magu iduara badibadinai ia noho, ia ese mirigini kahana ia vaira henia.  
\v 45 Unai tau ese lau ia hamaoroa, unai diho kahana ia vaira henia daiutu be hahelagaia taudia, Dubu Helaga idia biagua taudia, edia.  
\v 46 Bona mirigini kahana ia vaira henia daiutu be hahelagaia taudia, boubou patana idia biagua taudia, edia. Unai be Sadoka besena taudia. Levi ena bese taudia ibounai edia huanai dekena amo, Sadoka bese taudia sibona ese Lohiabada kahirakahira do idia raka, iena hesiai gaukara do idia karaia totona.   
\s1 Lalona kahana magu ese ia hagegea ariara gabuna, bona Dubu Helaga  
\p
\v 47 Unai tau ese lalona kahana magu ese ia hagegea ariara gabuna ena lata bona iena lababa ia abia, ena lata be 50 mita, iena lababa danu be 50 mita. Dubu Helaga be dina ia diho kahana dekenai ia noho, bona Dubu ena vairana dekenai boubou patana ia noho.   
\p
\v 48 Vadaeni unai tau ese lau ia hakaua lao, Dubu Helaga ena dehe dekenai ai lao. Ia ese dehe ena iduara ena bada ia abia, ena lababa be 7 mita bona ena ataiai be 2.5 mita. Iduara ena haba ruaosi edia udunana be 1.5 mita.  
\v 49 Dehe ena lata be 10 mita, bona ena lababa be 6 mita. Vadavada ta ia daekau lao dehe dekenai, bona iena aena moia audia be ibounai 10. Dehe ena du be rua, raka vareai gabuna ena kahana kahana dekenai idia noho.   
\c 41  
\s1 Helaga Herea Gabuna  
\p
\v 1 Vadaeni unai tau ese Dubu Helaga lalonai lau ia hakaua vareai, bona ia ese Helaga Gabuna ena vareai gabuna ena du edia lababa ia abia, 3 mita.  
\v 2 Raka vareai gabuna ena lababa be 5 mita, bona ena haba ruaosi edia udunana be 2.5 mita. Bona ia ese danu Helaga Gabuna ena bada ia abia, ena lata be 20 mita bona ena lababa be 10 mita.   
\p
\v 3 Unai neganai unai tau be lalona momokani daiutu dekenai ia raka vareai, ia ese unai daiutu ena raka vareai du ruaosi edia lababa ia abia, 1 mita. Ena raka vareai gabuna ena lababa be 3 mita, bona ena haba ruaosi edia udunana be 3.5 mita.  
\v 4 Ia ese unai lalona momokani daiutu ena bada ia abia, iena lata be 10 mita, bona iena lababa danu be 10 mita. Vadaeni ia ese lau ia hamaoroa, ia gwau, “Inai be Helaga Herea Gabuna.”   
\s1 Dubu Helaga ena haba edia badibadinai daiutu haida idia haginia  
\p
\v 5 Vadaeni unai tau ese Dubu Helaga ena habana ena udunana ia abia, 3 mita. Inai haba ena badibadinai be daiutu maragidia idia noho, edia lababa be 2 mita. Inai daiutu ese Dubu Helaga idia hagegea, ena haba ibounai edia badibadinai.  
\v 6 Inai daiutu be sitori toi dekenai, bona edia sitori ta ta dekenai be daiutu 30 idia noho. Dubu Helaga ena haba be henuna kahana dekenai iena udunana be bada, bona sitori ta ta dekenai ia daekau neganai iena udunana be ia maragi sisina lao. Unai dainai sitori ibounai dekenai daiutu be mai edia helai namonamo gabudia, haba ena latanai, bona bolta be haba dekenai idia gwadaia lasi.  
\v 7 Vadaeni inai haba ena badibadinai idia noho daiutu edia lababa be idia bada lao, henuna sitori dekena amo ia lao bona ataiai sitori dekenai, Dubu ena haba ena udunana ia maragi lao hegeregerena. Dubu ena haba dekenai vadavada ia daekau lao, unai dekena amo taunimanima be henuna sitori dekena amo idia daekau lao ela bona sitori namba 2, bona sitori namba 2 dekena amo idia daekau lao ela bona sitori namba 3.   
\p
\v 8-11 Lau itaia danu unai daiutu ibounai edia murimurina habana ena lababa be 2.5 mita. Dubu ena mirigini kahana ena daiutu ibounai be mai edia iduara ta, diho kahana daiutu ibounai danu be mai edia iduara ta. Lau itaia danu, patapata ta, ia dekenai taunimanima idia raka diba gauna ese Dubu Helaga ia hagegea. Inai patapata ena lababa be 2.5 mita, bona iena ataiai, tano dekena amo be 3 mita. Dubu ena haba badibadinai daiutu maragidia edia badina nadidia danu edia ataiai, tano dekena amo be 3 mita. Inai patapata, o raka gabuna, bona hahelagaia taudia edia daiutu edia huanai be ariara ta, ena lababa 10 mita. Inai ariara, bona inai hahelagaia taudia edia daiutu danu, be Dubu Helaga ena kahana kahana dekenai idia noho.   
\s1 Dina ia diho kahana dekenai ia noho ruma  
\p
\v 12 Dubu Helaga ena dina diho kahana dekenai ia noho ariara ena dokona dekenai be ruma ta, ena lata be 45 mita, bona ena lababa be 35 mita. Iena haba, idia hagegea gauna ena udunana be 2.5 mita.   
\s1 Dubu Helaga ena bada  
\p
\v 13 Unai tau ese Dubu Helaga ena lata ia abia, 50 mita. Bona Dubu Helaga ena murina kahana haba, ariara hanaia ela bona dina diho kahana ruma ena murina kahana haba danu be 50 mita.  
\v 14 Bona Dubu Helaga ena dina daekau kahana, mai ena kahana bona kahana, lalona ariara ena lababa unai, be 50 mita danu.  
\v 15 Unai tau ese Dubu Helaga ena dina diho kahana dekenai ia hahetoha, ena lata, mai ena haba ruaosi danu be 50 mita.  
\s1 Dubu Helaga lalonai daihutu bona herahera  
\p Dubu Helaga ena dehe, ena Helaga Gabuna, bona ena Helaga Herea Gabuna.  
\v 16 edia lalona habadia be au reirei namodia dekenai idia koua, edia foloa dekena amo ela bona edia uindo dekenai. Edia uindo danu be au dekenai idia koua diba.  
\v 17 Dubu Helaga ena lalona habadia ibounai edia latanai, ela bona iduara edia ataiai, be laulau namodia idia koroa.  
\v 18 Inai laulau be pama audia bona kerubi aneru. Kerubi bona pama audia idia koroa, ta ta edia gabu dekenai unai haba ibounai edia latanai. Kerubi ibounai be mai edia vairadia rua.  
\v 19 Edia vairana ta be taunimanima ena vairana bamona, inai vairana ese pama auna ta kahana ta dekenai ia itaia noho, bona edia vairana ta be laiona ena vairana bamona, ia ese pama auna kahana ma ta dekenai ia itaia noho. Inai bamona laulaudia ese Dubu Helaga ena lalonai kahana ibounai dekenai idia koroa,  
\v 20 Dubu ena foloa ela bona iduara edia ataiai.  
\v 21 Helaga Gabuna ena iduara idia dogoatao stadi ruaosi be sikoea, idia be kahana 4 audia.  
\s1 Pata helagana, au dekena amo karaia gauna  
\p Helaga Herea Gabuna ena iduara ena vairana dekenai,  
\v 22 be pata helagana ta, au gauna, ena ataiai be 1.5 mita bona iena lata bona lababa be 1 mita. Iena kona bona iena badina bona iena haba be au dekena amo idia karaia. Unai tau ese lau ia hamaoroa, ia gwau, “Inai pata be Lohiabada ena vairana dekenai ia noho gauna.”   
\s1 Dubu Helaga ena iduara ta ta  
\p
\v 23 Dubu Helaga ena Helaga Gabuna bona iena Helaga Herea Gabuna ruaosi edia iduara be kahana rua rua gaudia.  
\v 24 Iduara ta ta be mai edia kahana rua rua, bona kahana ruaosi be mai edia hinisi, bona iduara ena huana dekenai idia kehoa.  
\v 25 Helaga Gabuna ena iduara edia kopidia latanai be pama audia bona kerubi edia laulaudia idia koroa, haba dekenai idia koroa bamona. Bona dehe ena murimurina kahana be mai ena guhi, au reirei dekena amo idia karaia.  
\v 26 Dehe ena kahana kahana habadia dekenai be uindo latadia, to maragidia, bona uindo edia kahana kahana dekenai be pama audia laulaudia idia koroa.   
\c 42  
\s1 Dubu Helaga kahirakahira idia noho ruma rua  
\p
\v 1 Unai tau ese murimurinai ia noho ariara dekenai lau ia hakaua lao, Dubu Helaga ena mirigini kahana dekenai ia noho ruma ta dekenai. Inai ruma be Dubu ena dina diho kahana ruma kahirakahira ia noho.  
\v 2 Inai ruma ena lata be 50 mita, bona ena lababa be 25 mita.  
\v 3 Iena haba ta ese Dubu ena ariara, iena lababa be 10 mita ia vaira henia, ma iena haba ta ese murimurina ariara ena raka gabuna ia vaira henia. Inai ruma be sitori toi gauna, mai ena daihutu momo diho kahanai, bona daihutu momo lasi mirigini kahanai. Inai daihutu laini ruaosi edia huanai, dehe latana, o raka gabuna ia noho.  
\v 4 Inai ruma ena sitori namba 3 ena dehe, o raka gabuna, ena lababa be 5 mita, bona iena lata be 50 mita, bona inai dehe ese daihutu edia vairana dekenai ia lao. Daihutu edia iduara ibounai be mirigini kahana dekenai. Ma raka gabuna ta be ruma ena mirigini kahana dekenai, iduara be unai kahanai dainai. Inai raka gabuna ena lababa be 50 sentamita sibona.  
\v 5 Ataiai idia noho daihutu be sisina idia maragi, badina edia dehe edia lababa be sisina bada, to sitori namba 1 bona sitori namba 2 edia dehe edia lababa be sisina idia maragi.  
\v 6 Inai 3 sitori ruma be mai ena du lasi, ia be idau, ruma haida bamona lasi. Unai dainai sitori namba 1 ena daihutu be bada, to sitori namba 2 bona 3 edia daihutu be idia maragi sisina lao, edia dehe edia lababa idia bada sisina lao dainai.  
\v 7 Inai 3 sitori ruma ena mirigini kahana, murimurina ariarana kahana gauna, ena lata be 25 mita sibona. To magu ta, ena lata 25 mita, be inai kwadogi kahana dekena amo ia heau lao, unai ataiai dehe ena metau huaia totona.  
\v 8 Vadaeni murimurina ariarana kahana daihutu edia lata ibounai be 25 mita sibona. To Dubu Helaga idia vaira henia daihutu edia lata ibounai be 50 mita.  
\v 9 Inai daihutu be mai edia raka vareai gabuna ta, dina daekau kahana dekenai, murimuri kahana ariarana dekena amo, unai ariara ena mirigini kahana maguna ia hamatamaia gabuna dekenai.   
\p
\v 10 Dubu Helaga ena diho kahana dekenai ruma ta, iena bada bona iena toana be hari lau herevalaia vadaeni mirigini kahana gauna hegeregerena. Inai diho kahana gauna be Dubu ena dina diho kahana haba kahirakahira ia noho.  
\v 11 Inai ruma ena daihutu be mai edia raka gabuna, o dehe, unai mirigini kahana ruma ena hegeregerena. Inai ruma ena daihutu danu, edia lata bona lababa, edia raka vareai gabudia bona edia toana ibounai be mirigini kahana gaudia hegeregerena.  
\v 12 Inai ruma ena diho kahana daihutu be mai edia raka vareai gabuna ta, dina daekau kahana dekenai, diho kahana maguna ia hamatamaia gabuna dekenai, murimurina ariarana dekena amo.   
\p
\v 13 Unai tau ese lau ia hamaoroa, ia gwau, “Inai ruma ruaosi edia mirigini bona diho kahana daihutudia, Dubu Helaga idia vaira henia gaudia be idia helaga. Inai daihutu edia lalonai hahelagaia taudia, Lohiabada ena kahirakahira do idia raka taudia, ese helaga herea aniani, harihari gaudia, do idia ania. Unai daihutudia lalonai danu be aniani, harihari gaudia helaga herea, do idia atoa, paraoa boubouna, bona kara dika bona kerere abia lao totona boubou gaudia, badina unai gabudia be helaga.  
\v 14 Hahelagaia taudia be Helaga Gabuna do idia raka vareai neganai, idia be unai gabu do idia rakatania lasi murimuri ariarana dekenai, ela bona edia dabua helagana do idia kokia, bona do idia atodia namonamo guna, badina unai dabua be helaga. Idia ese dabua idaudia do idia atoa guna, unai murinai hanua taudia edia gabu do idia raka lao diba.”   
\s1 Dubu Helaga ia noho tano ena bada  
\p
\v 15 Unai tau ese Dubu Helaga ena lalona kahana magu ia hagegea gabuna ena ruma edia bada ia abia vadaeni murinai, ia ese dina ia daekau kahana magu iduara dekena amo lau ia hakaua lao, bona Dubu Helaga ena murimurina magu ia hagegea gabuna ena bada ia abia.  
\v 16 Iena lata tohoa auna dekena amo dina daekau kahana maguna ena lata ia abia, 250 mita.  
\v 17 Vadaeni mirigini kahana maguna ena lata ia abia, 250 mita, lata ia tohoa auna dekena amo.  
\v 18 Vadaeni diho kahana maguna ena lata ia abia, 250 mita.  
\v 19 Dina ia diho kahana maguna danu ena lata ia abia, 250 mita.  
\v 20 Vadaeni unai magu ese ia hagegea gabuna ena bada be inai: Iena lata be 250 mita, bona iena lababa danu be 250 mita. Bona inai magu ese tano helagana bona tano helagana lasi edia hetoa gabuna ia hedinaraia.   
\c 43  
\s1 Lohiabada ese iena Dubu Helaga dekenai ia giroa lou  
\p
\v 1 Unai tau ese Dubu Helaga ena dina ia daekau kahana magu iduara dekenai lau ia hakaua.  
\v 2 Unuseni Israela ena Dirava ena hairaina lau itaia, dina ia daekau kahana dekena amo ia mai. Dirava ena gadona ena regena be sinavai momo edia regena bamona, bona iena hairaina ese tano ia hadiaria bada.  
\v 3 Inai egu mata hanai, be Dirava ese Ierusalema hadikaia ore totona ia mai, lau itaia vadaeni mata hanai bamona, bona Kebara Sinavai ena badibadinai lau itaia gauna danu bamona. Vadaeni tano dekenai lau tui diho haraga, egu vairana be tano dekenai lau atoa.  
\v 4 Vadaeni Lohiabada ena hairaina, be dina ia daekau kahana magu iduara ia hanaia, bona Dubu Helaga lalonai ia vareai.   
\p
\v 5 Unai neganai Lohiabada ena Lauma ese lau ia abia isi, Dubu Helaga ena lalona ariarana dekenai lau ia hakaua lao. Unuseni lau itaia, Dubu Helaga be Lohiabada ena hairaina dekena amo ia honu.  
\v 6 Unai tau be egu badibadinai ia gini unuseni, bona lau kamonai, Lohiabada be lau dekenai ia hereva, Dubu Helaga ena lalona dekena amo, ia gwau:   
\p
\v 7 “Tanobada tauna e, egu terona be iniseni. Lau ese inai gabu dekenai egu aena palapala do lau atoa, bona egu bese Israela taudia edia huanai do lau noho ela bona hanaihanai. Israela taudia bona edia king taudia danu ese egu ladana helagana do idia hamiroa lou lasi. Idia ese dirava idaudia do idia tomadiho henia lou lasi, bona idia ese edia king taudia edia mase tauanidia do idia guria lou lasi inai gabu dekenai.  
\v 8 King taudia ese edia ruma edia raka vareai gabudia bona edia iduara kahana kahana audia be egu Dubu Helaga ena raka vareai gabudia bona ena iduara kahana kahana audia badibadinai idia haginia vadaeni. Unai dainai lau bona idia, aiemai padana be magu ta sibona. Edia kara dika rohorohodia dekena amo egu ladana helagana idia hamiroa, unai dainai egu badu mai siahu danu dekena amo lau ese idia lau hadikaia ore.  
\v 9 Harihari idia ese dirava idaudia tomadiho henia kara do idia hadokoa, bona edia king edia mase tauanidia be egu noho gabu dekena amo daudau do idia abia lao. Bema unai bamona idia karaia, lau ese idia edia huanai do lau noho ela bona hanaihanai.”   
\p
\v 10 Ma Lohiabada ese ia hereva, ia gwau, “Tanobada tauna e, Israela taudia dekenai inai Dubu Helaga ena toana do oi hamaoroa, vadaeni edia kara dika dainai do idia hemarai. Dubu Helaga ena palani be idia dekenai do oi hedinaraia, do idia laloa totona.  
\v 11 Bona bema edia kara ibounai dainai idia hemarai neganai, Dubu Helaga ena palani do oi hadibadia namonamo, iena toana, iena raka vareai gabudia, bona raka murimuri gabudia, Dubu ena gau ibounai, bona Dubu ena taravatu ibounai danu. Inai gaudia ibounai bona Dubu ena palani be edia vairanai do oi torea, vadaeni idia ese do idia itaia, bona Dubu ena gaukara dalana do idia diba, bona iena taravatu do idia badinaia diba.  
\v 12 Dubu Helaga ena taravatu be inai: Dubu Helaga ia hagegea tano ibounai, inai ororo ena ataiai gabuna dekenai, be helaga herea. Dubu Helaga ena taravatu be unai.”   
\s1 Boubou patana  
\p
\v 13 Boubou patana ena bada abia totona, Dubu ena bada ia tohoa dalana be ma ia karaia lou: Dadaira ta ese boubou patana ena badina, nadi gauna, ia hagegea. Inai dadaira ena dobu be 50 sentamita, bona iena lababa be 50 sentamita. Dadaira ena murimurina kahana dekenai be isena ta, iena ataiai be 25 sentamita.  
\v 14 Inai boubou patana ena badina nadi ena lata be 9 mita, ena lababa danu be 9 mita. Inai badina nadi ena latanai nadi patapata toi, badana ela bona maragina, idia ta ta edia lata bona lababa be hegeregere gaudia dekena amo boubou patana do idia karaia. Henuna patapata ena lata be 8 mita, iena lababa danu 8 mita, bona iena ataiai be 1 mita. Iena latanai ia noho patapata ena lata be 7 mita, iena lababa danu be 7 mita bona iena ataiai be 2 mita. Iena latanai ia noho patapata, ataiai gauna ena lata be 6 mita, iena lababa danu be 6 mita, bona iena ataiai be 2 mita. Inai patapata toiosi do idia haginia namonamo, vadaeni idia ta ta idia atoa neganai, iena henuna gauna be mai ena aena raka gabuna, bona unai raka gabuna ena lababa 50 sentamita ese henuna patapata ia hagegea noho. Inai raka gabudia ese patapata toiosi idia hagegea, bona edia lababa be 50 sentamita, sitori ibounai dekenai.  
\v 15 Inai ataiai patapata be lahi karaia gabuna, boubou gaudia gabua gabuna. Inai patapata ena kona 4 dekenai doa 4 do idia haginia, edia lata be 50 sentamita.  
\v 16 Inai boubou patana ena ataiai be sikoea, iena lata 6 mita, bona iena lababa danu 6 mita.  
\v 17 Huana dekenai ia noho patapata danu be sikoea, iena lata be 7 mita, iena lababa danu 7 mita, bona iena duduna dekenai isena ta ena ataiai be 25 sentamita ese do ia hagegea. Boubou patana ena badina ia hegegea dadaira ena lababa be 50 sentamita. Boubou patana ena vadavada be dina ia daekau kahanai do ia noho.   
\s1 Boubou patana idia hahelagaia dalana  
\p
\v 18 Lohiabada Dirava ese lau dekenai ia hereva, ia gwau, “Tanobada tauna e, egu hereva do oi kamonai. Boubou patana idia karaia haorea neganai, oi ese iena latanai boubou gaudia do oi gabua ore, bona oi alaia vadaeni boromakau edia rara be boubou patana ena latanai do oi negea. Unai dekena amo boubou patana be do oi hahelagaia.  
\v 19 Levi hahelagaia taudia, Sadoka ena iduhu taudia sibona ese egu vairana dekenai do idia mai, egu Dubu Helaga ena hesiai gaukara do idia karaia. Lau Lohiabada Dirava ese inai oda lau gwauraia vadaeni inai: Oi ese boromakau natuna tau ta idia dekenai do oi henia, kara dika totona boubou gauna idia ese do idia halaoa.  
\v 20 Unai boromakau ena rara haida be boubou patana ena ataiai idia noho doa edia latanai do oi atoa, bona huanai ia noho patapata ena kona dekenai bona iena isena, huanai ia noho patapata ia hagegea gauna ena kahana ibounai dekenai unai rara do oi atoa. Inai dala dekenai oi ese boubou patana do oi hagoevaia, bona hahelagaia danu.  
\v 21 Unai boromakau, kara dika totona boubou gauna, be do oi abia lao, Dubu Helaga ena murimurina kahanai idia abia hidi vadaeni gabuna dekenai do oi gabua ore. Unai gabu be Dubu ena tano, to helaga gabuna ena murimurinai.  
\v 22 Vadaeni dina iharuana dekenai, nanigosi tau, bero o toto lasi gauna do oi abia, bona kara dika abia lao totona boubouna do oi halaoa. Boubou patana be nanigosi ena rara dekena amo do oi hagoevaia, boromakau ena rara dekena amo oi hagoevaia hegeregerena.   
\p
\v 23 “Oi hagoevaia haorea neganai boromakau ta, dika lasi momokani gauna, bona mamoe orea dekena amo mamoe tau, dika lasi momokani gauna ta danu be boubou gaudia totona do oi henia.  
\v 24 Lau Lohiabada, egu vairana dekenai do oi mailaidia. Hahelagaia taudia ese boubou edia latanai damena do idia atoa, bona do idia gabudia ore, lau, Lohiabada, egu.   
\p
\v 25 “Dina 7 lalonai, dina ta ta dekenai nanigosi tau ta do oi henia, kara dika abia lao gauna do ia halaoa totona, bona boromakau tau ta, bona mamoe orea dekena amo, mamoe tau ta, mai edia dika lasi momokani gaudia, danu do oi henia.  
\v 26 Dina 7 lalonai hahelagaia taudia ese boubou karadia do idia karaia, boubou patana ena dika ibounai abia lao, bona hagoevaia totona. Unai dekena amo do idia hahelagaia.  
\v 27 Inai dina 7 idia ore neganai, dina namba 8 ia hamatamaia dekena amo, hahelagaia taudia ese emui gabua ore bouboudia bona emui maino bouboudia be unai boubou patana ena latanai do idia karaia. Unai neganai lau ese umui dekenai do lau laloa namo henia. Lau, Lohiabada Dirava, ese lau hereva vadaeni inai.”   
\c 44  
\s1 Dina daekau kahana magu iduara do idia raka vareai diba taudia  
\p
\v 1 Unai tau ese Dubu Helaga ena dina daekau kahana magu iduara, murimuri gauna, dekenai lau ia hakaua lao. Inai iduara be idia koua vadaeni.  
\v 2 Vadaeni Lohiabada ese lau dekenai ia hereva, ia gwau, “Inai magu iduara be do idia koua momokani, bona tau ta ese do ia kehoa lasi. Bona tau ta ese inai magu iduara dekena amo do ia raka vareai lasi, badina lau Lohiabada ese inai iduara dekena amo lau raka vareai vadaeni. Unai dainai do umui koua momokani, bona unai bamona do ia noho.  
\v 3 Emui king sibona be inai magu iduara rumana lalonai do ia helai diba, Lohiabada ena vairanai do ia aniani totona. To ia be iduara ruma ena dehe dekena amo do ia raka vareai, bona unai vareai gabu dekena amo danu ruma ma do ia rakatania.”   
\p
\v 4 Unai neganai unai tau ese mirigini kahana magu iduara dekena amo Dubu Helaga ena vairana kahana dekenai lau ia hakaua lao. Unuseni lau itaia, Lohiabada ena hairaina ese Dubu Helaga ia hahonua, vadaeni tano dekenai lau tui diho haraga, egu vairana be tano dekenai lau atoa.  
\v 5 Lohiabada ese lau dekenai ia hereva, ia gwau, “Tanobada tauna e, do oi laloa namonamo, oi dekenai do lau hamaoroa gaudia ibounai do oi itaia, bona idia totona egu hereva do oi kamonai. Badina inai gaudia be lau Lohiabada, egu Dubu ena taravatu, bona egu oda hereva ibounai danu. Do oi laloa namonamo danu, daika be Dubu Helaga lalonai do idia raka vareai diba, bona daika be Dubu Helaga lalonai do idia raka vareai diba lasi.   
\p
\v 6 “Bona unai dagedage besena, Israela bese taudia do oi hamaoroa, do oi gwau, Lohiabada Dirava ese inai bamona ia hereva, ia gwau: Israela besena e, emui kara dika rohorohodia ibounai do umui hadokoa.  
\v 7 Idau bese taudia, edia kudoudia bona edia tauanidia danu dekenai kopina utua kara idia abia lasi taudia, be egu Dubu Helaga lalonai umui hakaudia vareai, egu aniani, unai boubou gaudia, edia digara bona edia rara be lau dekenai idia henia noho neganai. Unai kara dekena amo egu Dubu Helaga umui hamiroa vadaeni. Unai dainai umui, egu bese taudia ese egu gwauhamata taravatuna umui hamakohia vadaeni, emui kara dika rohorohodia ibounai dekena amo.  
\v 8 Egu Dubu ena gau helagadia danu umui naridia namonamo lasi, to idau bese taudia umui abia hidi vadaeni, egu gau do idia naria, egu Dubu Helaga lalonai.   
\p
\v 9 “Lau, Lohiabada Dirava, ese inai bamona lau hereva noho: Idau bese tauna ta, iena kudouna dekenai lau ia abidadama henia lasi, bona iena tauanina dekenai danu kopina utua kara ia abia lasi neganai, ia ese egu Dubu Helaga lalonai do ia raka vareai lasi. Bona inai bamona idau bese taudia danu, Israela bese taudia edia huanai idia noho taudia, idia danu ese egu Dubu Helaga do idia raka vareai lasi.”   
\s1 Levi taudia ese hahelagaia taudia dagi idia abia diba lasi  
\p
\v 10 Lohiabada ese lau dekenai ia hereva, ia gwau, “Lau ese Levi taudia edia dika davana lau henidia noho inai, badina idia bona Israela taudia oredia danu ese lau idia rakatania, bona kaivakuku idia tomadiho henia.  
\v 11 Levi taudia ese egu Dubu Helaga lalonai hesiai gaukara haida do idia karaia diba, bona magu iduara do idia naria diba. Idia ese boubou gaudia totona taunimanima idia mailaia boromakau, nanigosi bona mamoe gaudia idia alaia diba, bona Dubu dekenai idia mai taunimanima edia hesiai gaukara do idia karaia diba.  
\v 12 To idia ese Israela taudia totona kaivakuku tomadiho henia kara idia karaia, bona idia ese taunimanima idia hakaua kerere, vadaeni idia kara dika. Levi taudia ese unai bamona idia karaia dainai lau, Lohiabada Dirava ese gwauhamata metauna lau gwauraia vadaeni, Levi taudia ese edia dika ena davana do idia huaia.  
\v 13 Idia ese lau noho gabuna kahirakahira do idia mai lasi, bona egu hahelagaia taudia edia dagi do idia abia lasi. Idia be egu Helaga Herea Gabuna dekenai do idia raka vareai lasi. Idia ese edia kara dika rohorohodia edia hemarai dainai hemarai do idia abia.  
\v 14 To lau ese idia do lau abia hidi, Dubu Helaga do idia naria, Dubu ena kohu, ena au, ena guhi, gau unai bamona hanamoa gaukara do idia karaia. Bona idia ese Dubu dekenai idia mai taunimanima durua gaukara do idia karaia.   
\p
\v 15 “To Levi taudia haida, Sadoka ena bese taudia, ese hahelagaia taudia ena dagi guna idia abia, bona Israela besena taudia ese lau idia rakatania neganai, idia ese egu Dubu Helaga lalonai egu gaukara ibounai idia naria namonamo noho, mai edia laloa maoromaoro bona momokani danu. Unai dainai hari idia ese egu hesiai gaukara do idia karaia, bona egu vairana dekenai do idia mai, digara bona rara, boubou gaudia, be lau dekenai do idia henia totona.  
\v 16 Inai Sadoka besena taudia sibona ese egu Dubu Helaga do idia raka vareai, egu boubou patana kahirakahira do idia raka mai, egu hesiai gaukara karaia, bona egu oda hereva do idia badinaia totona.   
\p
\v 17 “Idia be lalona ariara magu iduara idia raka vareai, bona Dubu Helaga ena lalona ariara dekenai do idia lao neganai, idia ese dabua aukadia do idia karaia. Mamoe huidia dabua do idia karaia lasi bema Dubu Helaga ena lalona ariara dekenai, o Dubu Helaga lalonai egu gaukara idia karaia noho neganai.  
\v 18 Idia edia kwarana kumia gaudia be dabua auka dekenai karaia gaudia, bona edia koekoedia dekenai dabua auka piripou do idia karaia. Gaba gauna do idia karaia lasi, bona kopina varahu ia havaraia gauna ta do idia karaia lasi.  
\v 19 To idia be murimuri maguna unai kahana dekenai taunimanima idia noho gabuna idia ura lao neganai, idia ese unai Dubu Helaga ena gaukara dekenai idia karaia dabua do idia kokia guna, bona daiutu helagadia lalonai inai dabua do idia rakatania. Idia ese dabua idaudia do idia karaia, edia dabua helagadia dekena amo unai taunimanima ese dika do idia davaria garina.   
\p
\v 20 “Hahelagaia taudia ese edia kwaradia edia huina do idia kakasia lasi, bona edia huina do idia halataia lasi. Edia kwaradia huina do idia utua kwadogi sibona.  
\v 21 Hahelagaia taudia ese Dubu Helaga ena lalona ariara do idia raka vareai neganai, idia ese uaina do idia inua lasi momokani.  
\v 22 Hahelagaia taudia ese vabu o tau ta ese ia negea hahine ta do idia adavaia lasi. Hahelagaia tauna ese rami hebou kekeni ta, Israela besena dekena amo, o hahelagaia tauna ta ena vabu sibona do ia adavaia.   
\p
\v 23 “Hahelagaia taudia ese egu bese taudia do idia hadibaia, gau helagadia bona gau helagadia lasi edia idau be dahaka, bona Dirava ena taravatu bona oda dekenai, dahaka be goeva, bona dahaka be goeva lasi.  
\v 24 Taunimanima edia huanai heai idia vara neganai, hahelagaia taudia ese unai hepapahuahu do idia hamaoromaoroa, egu taravatu ena dala dekenai. Idia ese danu lau gwauraia aria ibounai do idia badinaia, bona egu Sabati Dinadia do idia hahelagaia, egu taravatu bona egu oda hereva ibounai hegeregerena.   
\p
\v 25 “Hahelagaia tauna ese mase tauna dekenai do ia kamokau lasi, do ia goeva lasi garina. To bema iena tamana o sinana o iena natuna ta o iena tadikakana o iena taihuna kekeni idia mase neganai, idia dainai do ia miro diba.  
\v 26 Iena miro dekena amo idia hagoevaia murinai, ia be dina 7 do ia naria, vadaeni do ia goeva.  
\v 27 Unai dina 7 idia ore neganai, ia ese Dubu Helaga ena lalona ariara dekenai ma do ia raka vareai, bona do ia goeva momokani totona iena kara dika kokia boubou gauna do ia henia. Unai murinai ia ese Dubu Helaga lalonai iena gaukara helagadia ma do ia karaia lou diba. Lau, Lohiabada Dirava lau hereva vadaeni inai.   
\p
\v 28 “Hahelagaia taudia ese tano ta do idia biagua lasi Israela lalonai, edia ahuna be lau sibona. Kohu ta Israela dekenai do umui henidia lasi, badina be edia kohu be lau.  
\v 29 Paraoa boubouna bona kara dika bona kerere kokia boubou gaudia be do idia ania, bona Israela taudia ese idia atoa siri gau helagadia, lau Dirava dekenai idia henia gaudia ibounai be hahelagaia taudia do idia abia, edia.   
\p
\v 30 “Uma gaudia, idia vara guna gaudia idauidau ibounai bona emui harihari gaudia idauidau ibounai, be hahelagaia taudia do idia abia, edia. Bona umui ese beredi umui gabua neganai ibounai, umui ese emui beredi ginigunana danu be hahelagaia taudia dekenai do umui henia. Unai bamona umui karaia neganai, lau Dirava ese emui ruma ta ta do lau hanamoa.  
\v 31 Ia mase kava gauna ta o gau ta ese ia haberoa gauna ta, ataiai manu, o tano ena kopina dekenai ia hekure kava gauna, be hahelagaia taudia do idia ania lasi.”   
\c 45  
\s1 Tano haria neganai Lohiabada be mai ena kahana helagana  
\p
\v 1 Ma Lohiabada ese lau ia hamaoroa, ia gwau, “Israela tano do umui haria neganai, tano ena kahana ta be do umui abia hidi Lohiabada ena, kahana helagana do ia lao. Inai tano ena lata be 12.5 kilomita, bona ena lababa be 10 kilomita. Inai tano be do ia helaga, ia lao bona ena hetoana ibounai dekenai.  
\v 2 Inai tano ena lalonai Dubu Helaga ena tano do ia noho, iena lata be 250 mita bona iena lababa danu be 250 mita. Inai Dubu Helaga ena tano be tano haida ma ese do ia hagegea, ruma lasi tano, iena lababa be 25 mita.  
\v 3 Inai tano helagana lalonai, tano kahana ta do umui abia hidi, iena lata be 12.5 kilomita, bona iena lababa be 5 kilomita. Inai tano lalonai Dubu Helaga, helaga herea momokani gabuna do ia gini.  
\v 4 Unai tano be tano helagana do ia lao. Ia be hahelagaia taudia, Dubu Helaga lalonai kara helagadia idia karaia, bona Lohiabada ena vairanai iena hesiai gaukara idia karaia noho taudia edia gabu. Edia ruma be inai tano lalonai, bona Dubu Helaga ia noho tano helagana danu.  
\v 5 Ma unai tano kahana ta, ena lata be 12.5 kilomita, ena lababa be 5 kilomita be Levi taudia edia. Idia ese Dubu Helaga lalonai kara helagadia haida idia karaia noho. Inai tano lalonai Levi taudia edia hanua do idia noho.   
\p
\v 6 “Unai tano helagana ena badibadinai, be tano ma ta, iena lata be 12.5 kilomita, ena lababa be 2.5 kilomita. Unai tano dekenai be hanua badana ta do ia noho, bona Israela taudia be unuseni idia noho diba.   
\s1 King ena tano  
\p
\v 7 “Tano danu do umui atoa siri king ena. Iena tano kahana be rua. Tano helagana bona hanua badana ena dina diho kahana hetoa gabuna dekena amo dina diho kahana tano ibounai ia lao bona davara badana be king ena tano. Ma tano helagana bona hanua badana ena dina daekau kahana hetoana dekena amo dina daekau kahana tano ia lao bona Israela ena hetoa gabuna dekenai, inai tano ibounai danu be king ena tano. Iena tano ena lata be Israela ena iduhu ta ena lata hegeregerena, dina diho kahana hetoa ia lao bona dina daekau kahana hetoa dekenai.  
\v 8 Inai tano be king ena ahuna korikori Israela dekenai. Unai dainai lau ese king do lau halaodia taudia ese egu bese taudia do idia hisihisi henidia lou lasi, to king ese Israela tano orena be Israela iduhu ta ta edia naria kara henunai do ia rakatania.”   
\s1 King ese do idia naria taravatuna  
\p
\v 9 Lohiabada Dirava ia gwau, “Umui Israela ena king taudia e, egu bese taudia umui dagedage bona hisihisi henidia karadia do umui hadokoa. Kota maoromaoro, bona kara maoromaoro danu do umui karaia. Umui ese egu bese taudia edia tano dekena amo do umui luludia lou lasi. Lau, Lohiabada Dirava ese umui lau hamaoroa noho inai.   
\p
\v 10 “Gau edia metau\f a \fr 45.10  \ft Epa, sekele, homere, bata, koro, mina bona gera be Heberu taudia edia aniani ena metau tohoa gaudia haida.\f* tohoa sikele momokanidia sibona do umui gaukaralaia:   
\p
\v 11 “Epa bona bata edia anina be hegeregere. Bata ibounai 10 be homere ta hegeregerena, bona epa 10 danu be homere ta hegeregerena. Metau abia sikele ibounai edia badina be homere.  
\v 12 Sekele be gera ibounai 20 hegeregerena. Sekele 5 totona sekele edia anina korikori 5 do umui henia, bona sekele 10 totona sekele edia anina korikori 10 do umui henia. Emui mina totona sekele ibounai 60 do umui henia.   
\s1 Boubou bona aria  
\p
\v 13 “Boubou gaudia be inai bamona do umui henia:  
\p “Uiti: Umui haboua uiti do umui karoa, karoa 60 dekenai, vadaeni karoa ta do umui henia.  
\p “Bali: Umui haboua bali do umui karoa, karoa 60, vadaeni karoa ta do umui henia.   
\p
\v 14 “Olive Dehoro: Umui emui audia dekena amo umui abia olive dehoro do umui karoa, karoa 100. Vadaeni karoa ta do umui henia. Ena bada be bata dekenai do umui abia. Bata 10 be homere ta hegeregerena. Homere ta be koro ta hegeregerena.   
\p
\v 15 “Mamoe: Mamoe 200, 200 dekena amo, mamoe ta ta do umui henia. Umui Israela iduhu ibounai ese mamoe boubou gaudia inai bamona do umui henia. Paraoa bouboudia, gabua ore bouboudia, bona maino karaia bouboudia do umui henia, Israela taudia edia kara dika davana karaia totona. Lau Lohiabada Dirava inai oda hereva lau gwauraia noho inai.   
\p
\v 16 “Inai tano taudia ibounai ese inai boubou gaudia be Israela ena king dekenai do idia henia.  
\v 17 Vadaeni king ena gaukara korikori be gabua ore bouboudia bona paraoa bouboudia bona uaina bouboudia gaudia do ia henia, aria negadia, bona hua matamata negadia, bona Sabati Dinadia negadia, Israela besena ena aria korikoridia ibounai negadia lalonai. Ia ese kara dika bouboudia bona paraoa bouboudia bona gabua ore bouboudia bona maino karaia bouboudia do ia henia, Israela besena ena kara dika kokia totona gaudia.”   
\s1 Aria idauidau  
\p
\v 18 Lohiabada Dirava be inai bamona ia hereva noho, ia gwau, “Hua ginigunana ena dina ginigunana dekenai, boromakau ena natuna tau, dika lasi momokani gauna ta do umui abia, bona ia dekena amo Helaga Gabuna do umui hagoevaia.  
\v 19 Hahelagaia tauna ese kara dika kokia totona boubou gauna ena rarana haida do ia abia, Dubu Helaga ena iduara idia hagegea audia dekenai, bona boubou patana ena kona 4 dekenai, bona lalona ariara ena magu iduara ibounai edia audia dekenai unai rara do ia atoa.  
\v 20 Unai hua ena dina namba 7 dekenai danu unai bamona do umui karaia, ia diba lasi o ia laloa kerere dainai tau ta ese kara dika ta ia karaia kava vadaeni dainai. Unai dekena amo Dubu Helaga do umui hagoevaia.   
\p
\v 21 “Hua ginigunana ena dina namba 14 dekenai, Pasova Aria do umui karaia hamatamaia. Dina 7 lalonai idia hatubua lasi paraoa do umui ania.  
\v 22 Unai dina dekenai, king ese boromakau natuna tau ta do ia henia, kara dika kokia totona gauna, ia bona Israela taudia ibounai dainai.  
\v 23 Bona inai Pasova Aria ena dina 7 lalonai king ese boromakau natudia tau 7 bona mamoe tau, dika lasi momokani gaudia 7 do ia henia, Lohiabada ena, unai dina ta ta dekenai, gabua ore boubou gaudia, bona nanigosi tau ta, unai dina ta ta dekenai, kara dika kokia totona gaudia.  
\v 24 King ese danu paraoa boubouna do ia henia, paraoa ena bada 17.5 lita be boromakau tau ta ta dekenai, bona paraoa ena bada 17.5 lita be mamoe tau ta ta dekenai, bona olive dehoro 3 lita boromakau ta ta dekenai, bona mamoe ta ta dekenai danu.   
\p
\v 25 “Unai bouboudia ibounai hegeregerena danu, be king ese do ia henia Au Raurau Ruma Maragidia Aria dekenai. Inai aria be hua namba 7 ena dina namba 15 dekenai ia hamatamaia. Unai aria ena dina 7 lalonai king ese dina ta ta dekenai unai bouboudia ibounai do ia henia, kara dika kokia totona. Gabua ore bouboudia, paraoa bouboudia, bona olive dehoro danu, edia bada be Pasova Aria totona ia henia gaudia edia bada hegeregerena.”   
\c 46  
\p
\v 1 Lohiabada Dirava ia gwau, “Dina ia daekau kahana magu iduara, lalona ariara dekenai ia vareai gauna, be gaukara dinadia 6 lalonai do umui koua momokani, to Sabati Dinadia bona Hua Matamata Ena Aria dinadia neganai unai magu iduara do umui kehoa.  
\v 2 Emui king be murimuri kahana dekena amo do ia raka vareai, magu iduara ruma ena dehe dekenai, vadaeni iduara ena auna ena badibadinai do ia gini. Unai neganai hahelagaia taudia ese king ena gabua ore boubou bona iena maino karaia totona boubou gaudia be do idia gabua, bona Lohiabada dekenai do idia henia. Unuseni, dehe lalonai iduara ena badibadinai, king be do ia tomadiho. Unai murinai ia be murimurina kahana do ia lao lou. To unai magu iduara do umui koua lasi ia lao bona dina do ia diho.  
\v 3 Sabati Dinadia bona Hua Matamata Ena Aria dinadia lalonai Israela taudia ibounai ese Lohiabada do idia tomadiho henia, unai magu iduara ena raka vareai gabuna dekenai.   
\p
\v 4 “Sabati Dinadia dekenai king ese inai Dina ena boubou, gabua ore gauna, Lohiabada dekenai do ia mailaia: Mamoe natudia ibounai 6, mamoe tau ta, ibounai dika lasi momokani gaudia.  
\v 5 Inai mamoe tau danu be paraoa ena metau 17.5 lita do ia mailaia, bona mamoe natudia danu be king ena goada hegeregerena dekenai paraoa do ia henia. Paraoa ena metau 17.5 lita ta ta danu be olive dehoro 3 lita ta ta do ia mailaia danu.  
\v 6 Hua Matamata ena dina dekenai, king ese boromakau natuna tau ta, dika lasi momokani gauna, bona mamoe natudia 6, bona mamoe tau ta, dika lasi momokani gaudia, do ia henia.  
\v 7 Unai boromakau natuna tau danu be paraoa ena metau 17.5 lita do ia mailaia, bona unai mamoe tau danu be paraoa 17.5 lita ma do ia mailaia. Unai mamoe natudia danu be king ese iena goada hegeregerena dekenai paraoa do ia henia. Bona paraoa ena metau 17.5 lita ia henia negadia ta ta ibounai be olive dehoro 3 lita ta ta danu do ia henia.   
\p
\v 8 “King be lalona ariara iduara ruma do ia raka vareai neganai, ia be ruma ena iduara dekena amo do ia raka vareai, bona murimurina dekenai ia raka lao neganai, unai iduara dekena amo ma do ia raka lao.   
\p
\v 9 “To unai guriguri aria ta totona taunimanima ese Lohiabada tomadiho henia totona idia mai neganai, mirigini kahana magu iduara dekenai idia raka vareai taudia be diho kahana magu iduara dekenai do idia raka murimuri. Bona diho kahana magu iduara dekenai idia raka vareai taudia be mirigini kahana magu iduara dekenai do idia raka murimuri. Tau ta lasi ese ia raka vareai iduara dekena amo ma do ia raka murimuri, to ibounai be do idia raka vaira sibona, vadaeni do idia raka murimuri lao.  
\v 10 Taunimanima do idia raka vareai neganai, king danu be idia danu do ia raka vareai, bona do idia raka murimuri neganai king danu do ia raka murimuri lao.   
\p
\v 11 “Io, Au Raurau Ruma Maragidia Aria bona idia gwauraia vadaeni guriguri aria idauidau dekenai, paraoa boubouna boromakau natuna tau ta danu do idia henia gauna be 17.5 lita, bona mamoe tau ta danu paraoa be 17.5 lita, to mamoe natudia danu henia tauna ese iena goada hegeregerena dekenai paraoa do ia henia. Paraoa 17.5 lita ta ta danu olive dehoro 3 lita ta ta do ia henia.  
\v 12 Nega haida king ese iena laloa namo dainai ia ura boubou gauna ta Lohiabada dekenai do ia henia, gabua ore boubouna, o maino karaia boubouna. Unai neganai lalona ariara ena dina ia daekau kahana magu iduara be ia totona do umui kehoa. Ia ese iena gabua ore boubouna o iena maino karaia boubou gauna do ia henia, Sabati Dina neganai ia karaia hageregerena. Vadaeni king be do ia raka murimuri dekenai murinai, unai magu iduara do umui koua.”   
\s1 Dina ta ta ibounai bouboudia  
\p
\v 13 Lohiabada ia gwau, “Daba ta ta ibounai mamoe natuna ta, lagani tamona bona dika lasi momokani gauna, be Lohiabada dekenai do umui henia, gabua ore boubouna totona.  
\v 14 Daba ta ta ibounai danu, unai mamoe danu paraoa boubouna do umui henia, ena metau 2 kilogaram, bona olive dehoro ena metau lita ta, paraoa danu do idia mikisi totona. Inai paraoa boubouna, Lohiabada ena, daba ibounai gauna, be noho hanaihanai taravatuna.  
\v 15 Unai dainai mamoe natuna, bona paraoa boubouna bona olive dehoro, be daba daba ibounai do umui henia, gabua ore boubouna totona nega ibounai, doko lasi.”   
\s1 King ena tano  
\p
\v 16 Lohiabada Dirava be inai bamona ia hereva noho, ia gwau, “Bema king ese iena tano ena kahana ta be iena natuna tau ta dekenai ia henia, harihari gauna totona, unai tano be unai natuna tau ena bese ese do idia biagua.  
\v 17 To bema king ta ese iena tano kahana ta be iena hesiai tauna ta dekenai ia henia neganai, unai tau ese do ia abia, ia lao bona Henia Lou ena Lagani. Unai neganai unai tano be king ma do ia biagua lou. King ena natuna tau sibona ese king ia henidia tano idia dogoatao diba hanaihanai.  
\v 18 King ese iena taunimanima edia tano ta do ia abia diba lasi, edia ahuna dekena amo do ia luludia lasi. Bema king ese iena natuna dekenai tano do ia henia neganai, ia sibona ena tano do ia henia. Ia ese egu bese taudia ta do ia dagedage henia lasi, edia tano abia totona.”   
\s1 Dubu Helaga ena nadua gabudia  
\p
\v 19 Vadaeni unai tau ese magu iduara ena badibadinai ia noho iduara maragina ta dekena amo lau ia hakaua hanaia, ia lao bona hahelagaia taudia edia daiutu helagadia, mirigini kahana idia vaira henia gaudia. Unuseni, unai daiutu edia dina diho kahana dekenai gabu ta lau itaia.  
\v 20 Vadaeni unai tau ese lau ia hamaoroa, ia gwau, “Unai gabu dekenai hahelagaia taudia ese kerere bona kara dika kokia totona boubou gaudia be do idia nadua, bona paraoa bouboudia do idia gabua. Idia ese murimurina ariara dekenai unai gaudia do idia abidia lao lasi, unai boubou edia helaga ena siahu ese taunimanima do idia hadikaia garina.”   
\p
\v 21 Vadaeni unai tau ese lau ia hakaua lao, murimurina ariara dekenai ai lao, murimuri magu ena kona 4 dekenai ai lao, magu ena kona ta ta be mai edia magu hagegea gabudia ta ta, ibounai 4.  
\v 22 Edia lata be 20 mita bona edia lababa be 15 mita.  
\v 23 Inai kona ta ta dekenai idia noho gabudia idia hagegea magudia be nadi dekenai karaia gaudia. Inai gabu 4 be mai edia lahi karaia gabudia, amu gaudia, magu ta ta edia nadi badinai.  
\v 24 Vadaeni unai tau ese lau ia hamaoroa, ia gwau, “Inai be nadua gabudia, bona iniseni Dubu Helaga ena hesiai gaukara taudia ese taunimanima ese idia henia boubou gaudia do idia nadua.”   
\c 47  
\s1 Mauri ena sinavai  
\p
\v 1 Unai tau ese Dubu Helaga ena raka vareai gabuna dekenai lau ia hakaua lao. Ranu be Dubu ena raka vareai gabuna ena henuna dekena amo ia heau daekau mai, bona ia heau lao dina daekau kahana dekenai, badina Dubu Helaga be dina daekau kahana ia vaira henia. Inai ranu ia heau hamatamaia gabuna be Dubu Helaga ena diho kahana ena henunai, bona ia heau lao dalana be boubou patana ena diho kahana dekena amo ia lao dina daekau kahana dekenai.  
\v 2 Vadaeni unai tau ese lau ia hakaua lao, Dubu Helaga dekena amo ai raka murimuri dekenai mirigini kahana magu iduara dekena amo. Ma ia ese murimuri kahana dekenai lau ia hakaua, ela bona dina daekau kahana murimurina magu iduara dekenai. Unuseni lau itaia, ranu sisina be unai magu iduara ena diho kahana dekenai ia heau lao noho.   
\p
\v 3 Unai tau be dina daekau kahana ia raka, ranu ia lao dalana. Ia be mai ena lata tohoa varona iena imana dekenai, vadaeni ia ese unai ia heau noho ranu ena lata ia abia 500 mita, bona ia ese lau ia hamaoroa unai ranu lalonai do lau raka lao unuseni. Unai ranu ena dobu be egu aena garugaru dekenai sibona.  
\v 4 Vadaeni ia ese ma 500 mita edia lata ia abia, bona unai maka dekenai ranu ena dobu be egu tuina dekenai. Iena varo dekenai ma 500 mita ia abia, bona unuseni ranu ena dobu be egu gaba dekenai.  
\v 5 Ma 500 mita edia lata ia abia, vadaeni ranu be sinavai ta, lau raka hanaia diba lasi, badina ranu be ia dobu, egu hanaia dala tamona be, nahu dekenai sibona.  
\v 6 Unai tau ese lau ia nanadaia, ia gwau, “Tanobada tauna e, inai gauna oi itaia namonamo, a?”  
\p Vadaeni ia ese lau ia hakaua lao sinavai ena isena dekenai.  
\v 7 Unuseni lau ese au momo herea lau itaia, sinavai ena isena kahana kahana dekenai.  
\v 8 Vadaeni ia ese lau ia hamaoroa, ia gwau, “Inai ranu be dina daekau kahana dekenai ia heau lao noho, ia lao bona Ioridane Sinavai ena koura dekenai, bona unai dekena amo Davara Mase dekenai do ia heau vareai. Davara Mase dekenai inai sinavai ena ranu do ia vareai neganai, ia ese iena damena do ia kokia, bona davara ena ranu be damena lasi ranu do ia halaoa.   
\p
\v 9 “Unai sinavai ia heau lao gabudia ibounai dekenai mauri gaudia idauidau be do idia vara momo. Bona gwarume idauidau danu momo herea be ranu gabudia momo lalonai do idia noho, unai sinavai ena heau dainai. Unai sinavai ese Davara Mase ena ranu be damena lasi ranu do ia halaoa, bona ia heau lao gabudia ibounai dekenai mauri do ia havaraia.  
\v 10 Gwarume abia taudia be Davara Mase ena badinai do idia gini. Bona Ene Gedi dekena amo ela bona Enegalaimi dekenai edia reke do idia hakaukaua. Idia ese gwarume idauidau do idia abia, Davara Badana dekenai idia abia gwarume hegeregerena.   
\p
\v 11 “To Davara Mase kahirakahira idia noho gohu maragidia bona ranu gabudia haida edia ranu ena damena be do ia noho. Taunimanima ese unai ranu gabudia dekena amo damena do idia abia noho diba.  
\v 12 Unai sinavai isena ena kahana kahana dekenai huahua audia idauidau ibounai do idia vara. Edia rauraudia do idia kakoro lao lasi, bona edia huahua do idia moru kava lasi, to huahua momo do idia atoa nega ibounai, doko lasi. Hua ibounai lalonai, huahua do idia atoa, badina Dubu Helaga dekena amo ia heau mai sinavai ese ranu momo ia henidia noho dainai. Inai au edia huahua be aniani gaudia, bona edia rauraudia ese taunimanima edia gorere do idia hanamoa.”   
\s1 Tano ena hetoa gabudia  
\p
\v 13 Lohiabada Dirava ia gwau, “Israela ena iduhu 12 edia huanai tano do umui haria, to Iosepa ese tano kahana rua do ia abia.  
\v 14 Lau ese emui sene taudia dekenai gwauhamata metau lau henia, inai tano idia dekenai do lau henia. Unai dainai hari do umui haria, iduhu ibounai edia ahuna be hegeregere. Inai tano be emui ahuna korikori do ia lao.   
\p
\v 15 “Tano ena hetoana be inai: Mirigini kahana dekenai: Davara Badana dekena amo ia matamaia, ia lao, Hetelono dekena amo ia lao, ela bona Hamata ena raka vareai gabuna, ela bona Sedada.  
\v 16 Ma ia lao Berota bona Sibiraimi dekenai, inai hanua ruaosi be Damaseko bona Hamata edia hetoa gabuna dekenai idia noho, ma ia lao ela bona Hatikono, Haurana ena hetoana kahirakahira.  
\v 17 Unai dainai inai mirigini hetoana be Davara Badana dekena amo ia lao, ela bona Enono hanua dekenai, Damaseko bona Hamata edia hetoana gabuna dekenai.   
\p
\v 18 “Dina daekau kahana ena tano hetoana be Enono dekena amo do ia matamaia, Damaseko bona Haurana edia huanai dekenai do ia lao, bona Ioridane Sinavai dekena amo do ia lao, Gileada bona Israela tanodia edia huanai hetoana be unai, ela bona Davara Mase, ela bona Tamara. Dina daekau kahana hetoana be unai.   
\p
\v 19 “Diho kahana ena tano hetoana be Tamara dekena amo do ia matamaia, do ia lao ela bona Meribata Kadesi ranu gabudia, vadaeni Aigupito Dokana dekena amo do ia lao, ela bona Davara Badana. Diho kahana hetoana be unai.   
\p
\v 20 “Dina diho kahana ena tano hetoana be Davara Badana, ela bona gabu ta, Hamata raka vareai ena dina diho kahana dekenai. Dina diho kahana hetoana be unai.   
\p
\v 21 “Inai tano ibounai be emui iduhu edia huanai do umui haria.  
\v 22 Inai tano be emui ahuna korikori do ia lao, umui emui, bona idau taudia, emui huanai idia noho, bona edia natudia be emui huanai idia havaraia vadaeni taudia. Idia be Israela memero korikori hegeregerena do idia lao umui emui huana dekenai. Bona idia ese edia ahuna tano kahana do idia abia, Israela taudia edia huanai.  
\v 23 Edena iduhu lalonai idau tauna ta ia noho, unuseni iena tano ahuna do umui henia. Lau, Lohiabada Dirava ese lau hereva vadaeni inai.”   
\c 48  
\s1 Iduhu edia huanai tano idia haria  
\p
\v 1-7 Ma Lohiabada ia hereva, ia gwau, “Israela ena mirigini kahana tano hetoana be Davara Badana dekena amo ia matamaia, ia lao, Hetelono dekena amo ia lao, ela bona Hamata ena raka vareai gabuna, vadaeni Enono hanua dekenai ia lao, Damaseko bona Hamata edia huanai tano hetoana dekenai.  
\p “Israela ena iduhu ta ta ese tano ena kahana ta do idia abia, dina daekau kahana hetoana dekena amo, ela bona Davara Badana dekenai, mirigini kahana dekena amo ia lao bona diho kahana dekenai. Dano iduhu be mirigini kahana momokani dekenai, bona Iuda be diho kahana momokani dekenai. Iduhu ta ta ese edia tano do idia abia inai bamona, mirigini ela bona diho:  
\q1 Dano  
\q1 Asere  
\q1 Napatali  
\q1 Manase  
\q1 Eparaima  
\q1 Rubena  
\q1 Iuda   
\s1 Tano kahana ta be gaukara idauna totona idia abia hidi  
\p
\v 8 “Iuda ena diho kahana hetoana dekena amo, gaukara idauna totona tano kahana ta be do umui atoa siri Dubu Helaga totona. Inai tano ena lababa mirigini ela bona diho be 12.5 kilomita, bona iena lata be iduhu edia tano edia lata hegeregerena.   
\p
\v 9 “Inai tano ena huanai momokani ia noho tano be umui dekenai do ia idau momokani, iena lata be 12.5 kilomita, bona iena lababa be 10 kilomita, be do umui hahelagaia, Lohiabada ena.  
\v 10 Inai tano helagana ena kahana ta be hahelagaia taudia dekenai do umui henia. Inai tano ena lata be 12.5 kilomita mirigini kahana ela bona diho kahana dekenai, bona iena lababa be 5 kilomita dina daekau kahana ela bona dina diho kahanai. Inai tano ena huanai momokani dekenai Lohiabada ena Dubu Helaga do ia noho.  
\v 11 Inai tano helagana be Sadoka besena ena hahelagaia taudia edia. Idia ese mai edia laloa maoromaoro bona momokani danu egu hesiai gaukara do idia karaia, bona Israela taudia be kara dika karaia totona idia raka siri neganai, idia be idia raka siri lasi, Levi taudia idia raka siri bamona.  
\v 12 Unai dainai idia ese tano namona momokani, tano helaga herea, do idia abia, Levi taudia edia tano ena badibadinai.   
\p
\v 13 “Levi taudia edia tano be hahelagaia taudia edia tano ena diho kahanai. Levi taudia edia tano danu ena lata be 12.5 kilomita bona ena lababa be 5 kilomita.  
\v 14 Unai Lohiabada dekenai umui hahelagaia tano ibounai be Israela ena tano ena kahana namo herea momokani, bona umui ese unai tano ena kahana ta do umui hoia lasi, o ena kahana ta be haida dekenai do umui henia o hanaia lao lasi. Inai tano be ia helaga, Lohiabada ena.   
\p
\v 15 “Inai gaukara idauna totona umui atoa siri tano ena kahana ta be do noho, ena lata be 12.5 kilomita bona ena lababa be 2.5 kilomita. Ia be helaga lasi, ia be taunimanima ese idia gaukaralaia diba. Taunimanima be unuseni do idia noho diba, bona hanua badana be unai tano ena huanai momokani lalonai do ia noho.  
\v 16 Unai hanua badana ena lata be 2250 mita, iena lababa danu be 2250 mita.  
\v 17 Noho kava tano ese hanua badana do ia hagegea. Inai tano be boromakau bona mamoe gaudia edia rei ania gabuna, bona ena lababa be mirigini kahana, 125 mita, diho kahana, 125 mita, dina daekau kahana, 125 mita, bona dina diho kahana, 125 mita.  
\v 18 Hanua badana be tano helaga herea ena diho kahanai idia haginia murinai, hanua ena dina daekau kahana bona ena dina diho kahana dekenai be noho kava tano. Unai tano ena lata, dina daekau kahanai be 5 kilomita, bona dina diho kahanai danu ena lata be 5 kilomita. Inai tano ruaosi edia lababa be 2.5 kilomita, bona idia be biru gaukara totona. Hanua taudia ese unai tano do idia gaukaralaia diba edia aniani do idia havaraia totona.  
\v 19 Hanua lalonai idia noho taudia, iduhu idauidau taudia ibounai ese unai tano idia birulaia diba.   
\p
\v 20 “Vadaeni lau itaia, unai gaukara idauna totona idia atoa siri tano ena huanai momokani ia noho tano ena lata be 12.5 kilomita, ena lababa danu be 12.5 kilomita, bona iena lalonai be hanua badana mai ena tano ia noho.   
\p
\v 21 “Inai tano helagana, Dubu Helaga, bona hahelagaia taudia, bona Levi taudia edia tano, bona hanua badana ia noho tano, ena dina daekau kahana tano ibounai, ela bona Ioridane Sinavai bona ena dina diho kahana tano ibounai ela bona Davara Badana dekenai be king ese do ia biagua.  
\v 22 Unai dainai hahelagaia taudia bona Levi taudia edia tano, bona hanua badana ena tano be king ena tano ena huanai idia noho. King ena tano ena mirigini hetoana be Iuda ena tano, bona ena diho hetoana be Beniamina ena tano.   
\s1 Iduhu oredia edia tano  
\p
\v 23-27 “Unai tano helagana ena diho kahana dekenai Israela ena iduhu oredia ta ta ese tano ena kahana ta do idia abia dina daekau kahana hetoana dekena amo ela bona Davara Badana dekenai, mirigini kahana dekena amo ia lao bona diho kahana dekenai. Beniamina iduhu be mirigini dekenai ia noho, bona Gado be diho kahanai momokani ia noho. Iduhu ese tano do idia abia inai bamona, mirigini ela bona diho:  
\q1 Beniamina  
\q1 Simeona  
\q1 Isakara  
\q1 Sebuluno  
\q1 Gado   
\p
\v 28 “Gado iduhu ena diho kahana tano hetoana be Tamara hanua dekena amo ia lao, ela bona Meribata Kadesi ranu gabudia, bona unai neganai Aigupito ena tano hetoana dekena amo ia lao, ela bona Davara Badana dekenai.”   
\p
\v 29 Lohiabada Dirava ia gwau, “Unai dala dekenai Israela ena tano do umui haria lao, Israela ena iduhu ta ta ese edia ahuna do idia abia totona.”   
\s1 Ierusalema ena magu iduara  
\p
\v 30-34 Hanua badana ena lalonai do idia raka vareai gabudia be ibounai 12. Hanua ena magu 4 ta ta edia lata be 2250 mita. Bona inai magu ta ta be mai edia iduara toi toi. Inai iduara ta ta edia ladana be Israela iduhu ta ta edia ladana. Mirigini kahana magu ena iduara edia ladana be Rubena, Iuda bona Levi. Dina daekau kahana magu ena iduara edia ladana be Iosepa, Beniamina bona Dano. Diho kahana magu ena iduara edia ladana be Simeona, Isakara bona Sebuluno, bona dina diho kahana magu ena iduara edia ladana be Gado, Asere bona Napatali.   
\p
\v 35 Hanua badana ena magu ibounai idia raka hagegea, bona ena magu 4 edia lata ibounai idia tohoa. Edia lata ibounai be 9000 mita. Inai hanua badana ena ladana be do idia atoa, “Lohiabada Ia Noho Gabuna.”