\id EST ESTHER, Hiri Motu BIBLE, PNG, [1986] (5/90) rl 5/92 5/93 
\h ESETA 
\toc1 ESETA 
\toc2 ESETA 
\mt1 ESETA  
\c 1  
\s1 King Ahasueruo ese aria badana ia karaia  
\p
\v 1 Parasa ena king, Ahasuero ena king neganai, ia ese basileia ibounai 127 ia biagua, India ela bona Etiopia.  
\v 2 Unai neganai king Ahasuero be hanua badana ladana Susa dekenai iena terona dekenai ia helai.   
\p
\v 3 Iena lohia lagani ihatoina lalonai Ahasuero ese aria ta ia karaia, iena lohia taudia, bona iena hesiai taudia ibounai, bona Parasa bona Media tuari lohia taudia, bona basileia ena lohia taudia bona gavana taudia be aria lalonai idia vareai.  
\v 4 Unai aria be hua 6 lalonai, Ahasuero ese iena basileia namo herea, iena kohu momo, bona iena king siahuna bona iena hairaina danu ia hedinaraia.   
\p
\v 5 Unai aria murinai, king Ahasuero ese aria ta ma ia karaia, hanua badana Susa ena lalonai idia noho taudia, kohu momo bona ogogami taudia danu ibounai do idia vareai diba. Inai aria be king ena ruma ena uma maguna lalonai idia karaia hegaegae, bona do idia aniani mai moale danu ela bona dina 7 idia ore.   
\p
\v 6 Aria gabuna ena koua dabua be kurokuro bona bulu. Idia be varo namodia, edia kala kakakaka sisina dekena amo idia taua dae, ma unai varo be hururuhururu nadi namona dudia dekenai idia kwatua, siliva rini dekena amo. Aria gabuna ena helai gaudia be golo bona siliva dekenai idia karaia, bona edia foloa be hururuhururu nadi edia kala kakakaka bona kurokuro, bona mairi bona davana bada herahera nadi dekenai idia karaia.   
\p
\v 7 Uaina idia inua kapusi be golo gaudia. Unai kapusi be idauidau, bona uaina be momo, king ena hariharibada ena bada hegeregerena.  
\v 8 King ese iena hesiai taudia ia oda henia, aria dekenai vareai taudia ta ta ibounai ese uaina idia inua diba edia ura hegeregerena, idia inua maragi diba, bona idia inua bada diba.   
\p
\v 9 Kwini Vasati ese danu aria ta ia karaia, king Ahasuero ena ruma dekenai idia gaukara hahine taudia totona.   
\s1 Kwini Vasati ese king ia kamonai henia lasi  
\p
\v 10 Dina namba 7 dekenai king ena lalona ia moale, uaina ia inua dainai, bona ia ese eunuko taudia Mehumana, Bisita, Harabona, Bigita, Abagata, Setara bona Karakasa, king Ahasuero ena ruma naria taudia 7 ia oda henia.  
\v 11 Ia oda idia ese kwini Vasati be king ena vairanai do idia hakaua vareai, mai ena kwini toana kwara gauna danu. King ia ura hanua taudia bona hanua idauidau lohia taudia ese iena kwini ena hairaina do idia itaia noho, badina kwini Vasati be hahine namona, mai ena hairaina.  
\v 12 To kwini Vasati ese king ia kamonai henia lasi, king ena ruma naria taudia ese king ena oda idia hamaoroa neganai kwini Vasati ia ura lasi, bona ia lao lasi. Unai dainai king ena lalona ia siahu, ia badu maragi lasi.   
\p
\v 13 Unai neganai king ese iena aonega taudia, taunimanima edia kara, bona taravatu gaudia idia diba momo taudia ia boiria mai, do ia nanadaidia totona, badina inai be king ena kara.  
\v 14 King dekenai idia sisiba henia taudia be Karasena, Setara, Adamata, Tarasisi, Merese, Marasena, Memukana, Parasa, bona Media lohia taudia 7, idia be nega ibounai king ena vairanai idia gini, basileia ena gunalaia taudia badadia be unai.   
\p
\v 15 King ese unai taudia ia nanadaia, ia gwau, “Taravatu be edena bamona ia torea, kwini Vasati dekenai be edena bamona do ita karaia? Badina be kwini Vasati ese lau king, Ahasuero egu oda, egu ruma naria taudia lau siaia, bona idia hamaoroa gauna, be ia kamonai henia lasi.”   
\p
\v 16 Vadaeni Memukana be king bona hanua ta ta edia lohia taudia ia hamaoroa, ia gwau, “Kwini Vasati ia kerere vadaeni, king sibona dekenai lasi, to lohia taudia ibounai bona taunimanima ibounai dekenai, king Ahasuero ena basileia ibounai edia lalonai.  
\v 17 Badina be inai king ena adavana ena kara be hahine ibounai ese inai sivarai do idia kamonai, bona idia ese edia adavadia do idia matauraia lasi. Inai bamona do idia gwau, ‘King Ahasuero ese ia oda, kwini Vasati be iena vairana dekenai do idia hakaua mai, to ia mai lasi.’   
\p
\v 18 “Hari inai dina dekenai, king ena adavana ena kara ena sivarai idia kamonai vadaeni dainai, Parasa bona Media lohia taudia edia adavadia, ese king ena lohia ibounai dekenai do idia herevalaia. Vadaeni gabu ibounai dekenai hahine ese edia tau do idia matauraia lasi, bona tau ese edia hahine do idia badu henidia.   
\p
\v 19 “King e, bema oi ura neganai, oda ta do oi torea, bona inai oda be Parasa bona Media taudia edia taravatu lalonai do ia torea, vadaeni tau ta ese do ia haidaua diba lasi, oda be inai: Vasati be king Ahasuero ena vairanai ma do ia raka vareai lou lasi, to king ese Vasati ena dagi be hahine ta, Vasati ia hereaia hahine dekenai do ia henia.  
\v 20 Bema inai oda be oiemu basileia badana ena kahana ibounai dekenai oi siaia neganai, hahine ibounai ese edia tau do idia matauraia, kohu momo tauna, o ogogami tauna.”   
\p
\v 21 King Ahasuero bona iena lohia taudia ese inai hereva idia ura henia. Vadaeni king ese Memukana ena laloa gauna ia karaia.  
\v 22 King ese oda hereva revareva ia torea, bona ia siaia lao, ia ese ia biagua basileia ibounai dekenai. Unai oda be basileia ta ta edia revareva daladia dekenai, bona bese ta ta edia gado dekenai. Unai oda ia gwau, tau ta ta ibounai ese edia ruma edia ruma do idia biagua, bona edia bese ta ta ibounai lalonai edia hereva be mai siahu momokani danu.   
\c 2  
\s1 King Ahasuero ese Eseta ia adavaia  
\p
\v 1 Unai murinai, King Ahasuero ena badu dekena amo ia keru neganai, ia ese Vasati ena kara, bona unai oda hereva Vasati totona, king ese ia siaia gauna ia laloa lou.  
\v 2 Unai dainai king ena hesiai taudia idia gwau, “King e, namona be oiemu basileia lalonai do idia headava lasi kekeni namodia mai hairaidia danu do idia tahua, oiemu vairanai do idia hakaua mai.  
\v 3 Namona be oi ese opesa taudia oiemu basileia ta ta ibounai dekenai do oi abia hidi, idia ese do idia headava lasi kekeni mai hairaidia danu be do idia haboua, Susa dekenai do idia siaidia mai, bona oiemu eunuko tauna Hegai, king ena adavana edia ruma naria tauna, ese unai ruma dekenai unai kekeni do ia naridia, bona dahua muramura namodia idia dekenai do ia henia.  
\v 4 Vadaeni oi ese oi ura henia bada kekeni do oi abia, bona Vasati ena gabu dekenai oiemu kwini do oi halaoa.”  
\p King ese inai hereva dekenai ia moale, vadaeni unai bamona idia karaia.   
\p
\v 5 Unai hanua badana Susa dekenai be Iuda tauna ta ia noho, ena ladana be Morodekai Iairi, Simei Kisa ena tubuna, Beniamina tauna.  
\v 6 Morodekai be abia mauri taudia danu Ierusalema dekena amo idia abia lao, Nebukanesa, Babulonia ena king ese Iekonia, Iuda ena king, be idia abia mauri bona idia abia lao neganai.   
\p
\v 7 Inai Morodekai ena tamana maragi ena natuna kekeni Hadasa, iena ladana ta be Eseta, be Morodekai ese ia ubua, badina be Eseta ena tamana bona sinana idia mase. Eseta be mai hairaina momokani, bona iena tamana bona sinana idia mase dainai, Morodekai ese sibona ena natuna kekeni hegeregerena Eseta ia halaoa.   
\p
\v 8 Unai dainai, king ena oda hereva ia siaia lao neganai, kekeni namodia momo be hanua badana Susa dekenai idia haboua, bona Hegai ese ia naridia neganai, Eseta danu ia abia, king ena ruma lalonai ia atoa, bona Hegai, hahine naria tauna, ese ia naria.  
\v 9 Inai Eseta ese Hegai ena lalona ia hamoalea, vadaeni Hegai ese Eseta do ia durua totona dahua muramura ia henia haraga. Aniani namona momokani danu Eseta dekenai ia henia, bona hesiai kekeni ibounai 7, king ena ruma kekeni edia huana dekena amo ia abia hidi, bona Eseta dekenai ia henia. Vadaeni Eseta bona iena hesiai kekeni be gabu namo herea Hegai ese ia henidia, hahine edia ruma lalonai.   
\p
\v 10 Eseta ese iena bese bona iena sene taudia ia hedinaraia lasi, badina be Morodekai ese unai bamona ia sisiba henia vadaeni.  
\v 11 To dina ibounai Morodekai ese hahine ena ruma ena maguna ena vairanai ia raka noho, do ia diba Eseta ena noho be edena bamona totona.   
\p
\v 12 Inai kekeni namodia be hahine edia taravatu edia henunai idia noho ela bona hua 12 idia ore. Inai be edia hairai do idia hanamoa negana: Hua 6 lalonai muro ena dehoro dekena amo, bona hua ma 6 be muramura mai edia bonana namo, bona hahine edia dehoro haida dekena amo idia dahua. Unai murinai kekeni ta ta, edia nega, edia nega dekenai king Ahasuero dekenai do idia hakaua lao.  
\v 13 Kekeni ta be hahine edia ruma dekena amo king dekenai ia raka vareai neganai, ia ese sibona ena ura dabua bona herahera ia atoa diba.  
\v 14 Kekeni be adorahi neganai king dekenai ia lao, bona dabai be ma do ia lou mai, hahine ena ruma iharuana dekenai. Unuseni Sasagasa, eunuko tauna ta, king ena adavana haida ia naridia tauna, ese ia naria. Ia be king dekenai do ia raka vareai lou lasi. To bema king ese ia ura henia, ia ese iena ladana do ia gwauraia, bona do ia boiria, ia mai lou.   
\p
\v 15 Eseta, Morodekai ena tamana maragi Abihaili ena natuna, Morodekai ese ia ubua kekeni, ena nega ia ginidae, king dekenai do ia raka vareai. Vadaeni Eseta ese iena dabua ia abia hidi lasi, to king ena hesiai tauna Hegai, hahine ia naria tauna, ese ia abia hidi dabua sibona. Eseta idia itaia taudia ibounai ese ia dekenai idia laloa namo.   
\p
\v 16 King Ahasuero ena lohia lagani namba 7, hua namba 10, hua ladana Tebete lalonai, Eseta be king Ahasuero dekenai idia hakaua vareai, king ena ruma lalonai.   
\p
\v 17 Vadaeni king ese Eseta ia ura henia bada, hahine oredia ibounai ia ura henia maragi, bona kekeni ibounai edia huana dekena amo Eseta sibona be king ese ia laloa namo henia, bona iena hanamoa ia henia bada herea. Unai dainai king ese kwini ena toana, kwara gauna, be Eseta ena kwarana dekenai ia atoa, bona kwini ia halaoa, Vasati ena gabu dekenai.   
\p
\v 18 Unai neganai king ese aria badana ia karaia, iena lohia bona iena hesiai taudia ibounai totona, unai be, Eseta ena aria. Bona king ese iena basileia taudia ibounai dekenai laga-ani dina ta ia henidia, bona taunimanima dekenai harihari gaudia ia henia, king ena hariharibada ena bada hegeregerena.   
\s1 Morodekai ese king ia hamauria  
\p
\v 19 Kekeni taudia be hahine edia ruma iharuana dekenai idia haboua neganai, Morodekai ese king ena gaukara ia karaia king ena ruma dekenai.  
\v 20 Eseta ese iena bese bona iena sene taudia ia do gwauraia hedinarai lasi, Morodekai ena sisiba hegeregerena. Badina be Eseta ese Morodekai ia kamonai henia noho, gunaguna ia dekenai ia noho neganai ia kamonai henia hegeregerena.   
\p
\v 21 Morodekai be king ena rumai ia gaukara neganai, Bigitana bona Terese, eunuko taudia ruaosi, king ena daiutu iduaradia idia gimaia taudia, ese king dekenai idia badu, bona king alaia dalana idia tahua.  
\v 22 Inai sivarai be Morodekai ia kamonai, bona ia ese kwini Eseta ia hamaoroa, vadaeni Eseta ese king ia hadibaia, Morodekai ena ladana dekenai.   
\p
\v 23 Unai hereva idia tahua, bona idia davaria ia be momokani. Vadaeni unai tau ruaosi be au dekenai idia taua dae, idia mase. Inai kara be king ena sivarai buka ena lalonai idia torea, king ena vairana dekenai.   
\c 3  
\s1 Hamana ese dala ia tahua Iuda taudia do ia hadikaia ore  
\p
\v 1 Inai kara murinai, king Ahasuero ese Hamana Hamedata, Agaga tauna ia hanamoa, bona dagi badana ia henia. Iena dagi ese king ena lohia taudia ibounai edia dagi ia hanaia.  
\v 2 King ese iena hesiai taudia ibounai ia oda henia Hamana do idia matauraia, bona iena vairanai do idia tui diho. Idia ibounai ese unai bamona idia karaia, to Morodekai sibona ese Hamana dekenai ia tui diho lasi.   
\p
\v 3 Vadaeni king ena hesiai taudia oredia ese Morodekai idia nanadaia, idia gwau, “Badina dahaka king ena oda oi kamonai henia lasi?”  
\v 4 Dina momo idia ese unai bamona idia hereva henia, to Morodekai ia kamonai henidia lasi, ia gwau, “Lau be Iuda tauna, bona Hamana ena vairana dekenai lau tui diho diba lasi.”  
\p Vadaeni idia ese unai kara Hamana dekenai idia hamaoroa, do idia itaia, Morodekai ena hereva do ia kwalimu o lasi. Badina be ia gwau ia be Iuda tauna.   
\p
\v 5 Hamana ese ia itaia, Morodekai ese ia tui diho lasi, bona iena kwarana ia atoa diho lasi iena vairanai, vadaeni ia badu momokani.  
\v 6 To ia laloa Morodekai sibona do ia alaia lasi, badina ia kamonai Morodekai be Iuda tauna neganai, ia ese dala ia tahua Ahasuero ena basileia ibounai dekenai idia noho Iuda bese taudia ibounai be do ia alaia mase momokani.   
\p
\v 7 King Ahasuero ena lohia lagani namba 12, hua ginigunana, hua ladana be Nisana, lalonai, Hamana ia oda henia, vadaeni iena vairana dekenai laki gadara ta, ladana Puru idia karaia. Inai bamona idia karaia, Hamana ese Iuda taudia do ia alaia mase ena dina namona bona hua namona, be do ia diba totona. Vadaeni unai laki dekena amo idia davaria dina namona be hua namba 12, ena ladana be Adara, ena dina namba 13.   
\p
\v 8 Vadaeni Hamana ese king Ahasuero ia hereva henia, ia gwau, “Bese ta be oiemu basileia kahana ibounai dekenai idia noho. Edia noho be idau, bona iseda noho be idau. Edia taravatu be idau, bese oredia edia taravatu bamona lasi, bona idia ese king ena taravatu idia kamonai henia lasi. Unai dainai oi ese idia do oi alaia mase be namo.  
\v 9 King e, bema oi ura neganai, oda ta do oi torea hedinarai, inai bese taudia do idia alaia ore totona. Bema oda inai bamona oi gwauraia neganai, lau ese lau gwauhamata inai, siliva ena metau 340,000 kilogaram be king ena kohu haboua rumadia lalonai do lau atoa, inai bese do idia haorea taudia edia gaukara davana.”   
\p
\v 10 Inai hereva ia kamonai neganai king ese iena imana kwakikwakina rini ia kokia, Hamana Hamedata, Agaga tauna, Iuda taudia ia ura hadikaia tauna dekenai ia henia. Inai rini be king ena dagi toana gauna momokani, bona inai rini ia dogoatao noho tauna ese oda bona taravatu ibounai karaia siahuna ia abia momokani.  
\v 11 Bona king ese Hamana ia hamaoroa, ia gwau, “Unai bese taudia bona edia moni be oiemu, oiemu ura hegeregerena idia dekenai do oi karaia.”   
\p
\v 12 Vadaeni hua ginigunana ena dina namba 13 dekenai Hamana ese king ena toretore taudia ia boiria hebou, bona oda hereva ena pepa ta, Hamana ese ia gwauraia oda ibounai hegeregerena, idia torea. Inai pepa be gado idauidau dekenai, bona basileia ibounai edia toretore daladia idauidau dekenai idia torea, bona lohia taudia, gavana taudia bona king ena hesiai taudia ibounai dekenai idia siaia lao. King Ahasuero ena ladana idia torea, bona king ena rini dekena amo king ena toana be pepa dekenai idia karaia.  
\v 13 Inai revareva ena pepa be heau loaloa taudia edia imadia dekena amo idia siaidia lao. Inai revareva pepa ibounai edia torea gauna be inai: “Dina tamona dekenai, hua namba 12, hua ladana Adara, ena dina namba 13, Iuda taudia ibounai, buruka bona buruka lasi, tau bona hahine, mai edia natudia ibounai danu be do idia alaia mase, ta do idia bogahisihisi henia lasi. Iuda bese taudia do idia haorea momokani, bona edia kohu bona moni do idia abia.  
\v 14 Inai revareva ena anina be lohia taudia ibounai ese edia taunimanima dekenai do idia duahia hedinarai, taunimanima bese ibounai do idia diba, bona unai dina totona do idia noho hegaegae totona.”   
\p
\v 15 Hereva gwauraia taudia be idia heau lao, king ena oda hegeregerena, bona iena oda be hanua badana Susa dekenai danu idia gwauraia hedinarai.  
\p King bona Hamana ese idia helai diho, uaina idia inua, to Susa hanua taudia be idia daradara mai gari danu.   
\c 4  
\s1 Eseta ia gwauhamata, iena bese taudia do ia durua  
\p
\v 1 Unai kara ibounai be Morodekai ia diba neganai, ia ese mai lalohisihisi danu iena dabua ia darea, puse dabua ia karaia, bona lahi ena kahu be iena kwarana dekenai ia atoa. Vadaeni hanua ena huanai ia raka lao, bona mai boiboi danu ia tai bada.  
\v 2 To ia ese king ena ruma magu iduara ia raka vareai lasi, badina puse dabua idia karaia taudia ese unai iduara idia vareai diba lasi, taravatu dainai.  
\v 3 Bona king ena basileia gabudia ibounai dekenai, king ena oda hereva idia gwauraia hedinarai gabudia ibounai edia lalonai, Iuda taudia be idia tai noho, tai noho, idia aniani lasi, bona mai boiboi danu idia tai. Bona idia momo herea be puse dabua idia karaia, bona lahi ena kahu ena latanai idia hekure diho noho.   
\p
\v 4 Eseta ena hesiai kekeni bona iena hesiai taudia be Eseta dekenai idia mai, Morodekai ena kara idia hamaoroa, vadaeni kwini ena lalona ia hisihisi bada. Ia ese dabua haida ia siaia, Morodekai ese puse dabua do ia kokia, bona unai dabua namodia do ia karaia totona, to ia ese ia abidia lasi.  
\v 5 Vadaeni Eseta ese Hataka ia boiria, ia mai. Hataka be king ena ruma ena eunuko tauna ta, king ese ia abia hidi vadaeni, ia be Eseta ena hesiai tauna. Vadaeni Eseta ese Hataka be Morodekai dekenai, ia siaia, do ia diba dahaka kara ia vara, bona ena anina be dahaka.   
\p
\v 6 Hataka be ia raka lao, Morodekai dekenai ia lao, hanua ena ariara dekenai, king ena magu iduara ena vairanai.  
\v 7 Morodekai ese ia dekenai idia vara gaudia ibounai Hataka dekenai ia hamaoroa, bona ia hamaoroa danu moni hida Hamana ese ia gwauhamata vadaeni, king ena kohu haboua ruma dekenai do ia atoa, Iuda taudia hadikaia ore ena davana.  
\v 8 Morodekai ese danu Iuda taudia hadikaia ore oda pepa, Susa dekenai ia torea gaudia ta Hataka dekenai ia henia, Eseta dekenai do ia hedinaraia totona. Morodekai ese danu Hataka ia hamaoroa, Eseta dekenai inai oda ena anina do ia hadibaia, bona do ia noia, ia be king dekenai do ia raka vareai, do ia noinoi, iena bese do ia bogahisihisi henia totona.   
\p
\v 9 Unai neganai Hataka ia lao, Morodekai ena hereva be Eseta dekenai ia hamaoroa.  
\v 10 Vadaeni Eseta ese Hataka ia hereva henia, ia gwau,  
\v 11 “Lau be hegeregere lasi king dekenai do lau raka vareai. Bema king ese tau ta ia boiria mai, unai tau be king ena daiutu lalonai do ia vareai. Bema lasi neganai, bona tau ta ia vareai kava, unai tau be do idia alaia mase. King ena hesiai taudia bona iena basileia taudia ibounai inai taravatu idia diba. To inai taravatu koua totona dala be tamona sibona. Bema king ese iena dagi auna, golo gauna, be tau ta dekenai ia duduia neganai, unai tau be do ia mauri. To dina 30 idia lao vadaeni, bona idia ese lau idia boiria lasi, king dekenai do lau raka vareai totona.”  
\v 12 Vadaeni Hataka ese Eseta ena hereva be Morodekai dekenai ia hamaoroa.   
\p
\v 13 Morodekai ese idia ia hamaoroa, ia gwau, “Inai hereva Eseta dekenai do umui hamaoroa: ‘Momokani oi be king ena rumai oi noho, to do oi laloa lasi oi be do oi mauri noho. Idia ese oi danu do idia alaia mase, badina oi danu be Iuda besena.  
\v 14 Bema hereva ta king dekenai oi gwauraia lasi neganai, guba dekena amo durua be Iuda taudia totona do ia diho mai, to oi bona oiemu tamana ena iduhu taudia be do umui mase. To daika ia diba, sedira oi ese kwini dagi oi abia vadaeni ena badina korikori be iseda bese durua totona, ani?’ ”   
\p
\v 15 Vadaeni Eseta ese inai bamona Morodekai dekenai ia haere henia, ia gwau:  
\v 16 “Morodekai e, oi lao, Iuda taudia ibounai Susa dekenai do oi davaria, bona do oi haboua, bona lau dainai aniani ania lasi taravatu do umui karaia. Dina toi bona hanuaboi toi aniani do umui ania lasi, bona ranu do umui inua lasi. Lau bona egu hesiai kekeni danu do ai aniani lasi, umui hegeregerena. Unai murinai lau be king dekenai do lau raka vareai, iena taravatu do lau utua. Bema unai dainai lau mase, vadaeni lau mase.”   
\p
\v 17 Inai hereva ia kamonai neganai Morodekai ese king ena magu iduara ia rakatania, bona Eseta ena oda hereva gauna hegeregerena ia karaia.   
\c 5  
\s1 Eseta ese king bona Hamana be aria dekenai ia boiridia mai  
\p
\v 1 Eseta ese dina toi ia aniani lasi. Dina ihatoina dekenai ia ese kwini ena dabua ia karaia, vadaeni ia lao, king ena ruma ena magu lalonai ia gini, king ena daiutu ena vairanai. King be iena ruma ena lalonai bona terona dekenai ia helai noho, iena ruma iduara be iena vairana dekenai.  
\v 2 King ese kwini Eseta ia itaia, magu ena lalonai ia gini, vadaeni ia ese Eseta dekenai ia laloa namo. Unai neganai king ese iena dagi auna, golo gauna, be ia abia isi, Eseta dekenai ia duduia. Vadaeni Eseta be ia raka kahirakahira, iena imana be dagi auna dekenai ia atoa.   
\p
\v 3 King ese ia nanadaia, ia gwau, “Kwini Eseta, oi ura dahaka? Bema oi ura egu basileia kahana, lau ese oi dekenai do lau henia.”  
\v 4 Vadaeni Eseta ia haere, ia gwau, “King e, bema oi ura neganai, oi bona Hamana ruaosi be hari dina dekenai, lau ese lau karaia aria dekenai do umui mai.”   
\p
\v 5 King ese oda ia karaia, Hamana do idia abia mai haraga, idia ruaosi be Eseta ena aria dekenai do idia lao totona. Vadaeni idia ruaosi be Eseta ena aria dekenai idia lao.  
\v 6 Uaina idia inua noho neganai, king ese Eseta ma ia nanadaia, ia gwau, “Oiemu noinoi gauna be dahaka? Lau ese oi dekenai do lau henia. Oiemu ura be dahaka? Sedira egu basileia kahana do oi noia, to lau ese oi dekenai do lau henia.”   
\p
\v 7 Eseta ia gwau, “Egu noinoi bona egu ura be inai:  
\v 8 Egu king e, bema oi ese lau dekenai oi laloa namo, bona oi ura egu noinoi gauna do oi henia, bona egu ura do oi karaia momokani, mani emu kara oi bona Hamana ruaosi kerukeru ma do umui mai, lau karaia hegaegae aniani ma do umui ania, vadaeni unai neganai egu ura gauna oi dekenai do lau hamaoroa.”   
\s1 Hamana ese Morodekai alaia dalana ia laloa karaia  
\p
\v 9 Unai dina dekenai, Hamana be aria ia rakatania neganai ia be mai moale bada danu. To Hamana ese Morodekai ia itaia, king ena ruma raka vareai gabunai ia helai, bona Morodekai ese ia toreisi lasi, bona Hamana ena vairana dekenai ia gari lasi neganai, Hamana be ia badu mai siahu danu Morodekai dekenai.  
\v 10 Momokani Hamana be ia badu herea, to ia ese iena badu ia koua, bona kara ta ia karaia lasi. Ia be iena ruma dekenai ia lao, iena turana haida ia boiridia mai, iena adavana Serese danu.  
\v 11 Vadaeni Hamana ese mai hekokoroku danu idia dekenai ia hereva. Iena kohu momo, bona iena natuna tau be momo, bona king ese dagi badana momokani ia henia, bona ia ese king ena lohia ibounai ia hereaia dainai ia hekokoroku.   
\p
\v 12 Ma Hamana ia gwau, “Kwini Eseta ese aria ta ia karaia, bona king danu do ia helai tauna ta ia boiria lasi, to lau sibona. Bona kwini Eseta ese lau bona king ma ia boiria lou, kerukeru danu aria ma ta do ai ania hebou.  
\v 13 To inai gau namodia ibounai ese lau idia hamoalea lasi, unai Iuda tauna, Morodekai, be king ena ruma ena raka vareai iduara dekenai ia helai, lau itaia noho dainai.”   
\p
\v 14 Vadaeni Hamana ena adavana Serese bona edia turadia ibounai ese Hamana idia hamaoroa, idia gwau, “Taunimanima taua dae auna ta, ena lata be 22 mita do oi haginia. Bona kerukeru dabai king do oi noia, vadaeni ia ese gwaumaoro do ia henia, unai gau dekenai Morodekai do idia taua dae, ia mase. Unai neganai king danu aniani ania gabuna dekenai do umui lao, mai moale danu.”  
\p Hamana ese unai hereva ia ura henia, vadaeni ia oda henia, taunimanima taua dae mase auna do idia karaia.   
\c 6  
\s1 King ese Morodekai ia hanamoa  
\p
\v 1 Unai hanuaboi neganai king be ia mahuta diba lasi, vadaeni ia boiboi, king ena sivarai buka do idia mailaia. Vadaeni king ia oda henia, iena lohia neganai idia vara gaudia be iena vairanai do idia duahia hedinarai.  
\v 2 Buka lalonai ia torea sivaraina ta be Morodekai ese Bigitana bona Terese ia samanidia ena sivarai. Idia be king ena hesiai taudia, iena iduara raka vareai gabuna idia gimaia taudia, bona idia ese king Ahasuero alaia mase dalana idia tahua.  
\v 3 Vadaeni king ese idia ia nanadaia, ia gwau, “Inai Morodekai dekenai dahaka hanamoa o edena dagi badana ita henia, inai kara namona dainai?” King ena hesiai taudia, iena vairanai idia gini taudia, be idia gwau, “Gau ta ita henia lasi.”   
\p
\v 4 King ia gwau, “Daika be egu magu lalonai idia noho?” Unai neganai Hamana be king ena ruma ena magu lalonai ia raka vareai vadaeni, ia ura ia karaia hegaegae taua dae auna dekenai Morodekai do ia taua dae mase dalana king dekenai do ia herevalaia.   
\p
\v 5 Vadaeni king ena hesiai taudia ese king idia hamaoroa, idia gwau, “Hamana be unuseni, magu ena lalonai ia gini noho.” King ia gwau, “Do ia raka vareai.”   
\p
\v 6 Hamana ia raka vareai neganai, king ese ia nanadaia, ia gwau, “Tau ta be lau ura bada do lau hanamoa. Unai tau totona dahaka do lau karaia?”  
\p Vadaeni Hamana be ia sibona ia laloa, inai bamona: “King ese daika ia ura bada do ia hanamoa? Tau idauna ta lasi, to lau sibona.”   
\p
\v 7 Unai dainai Hamana ese king dekenai ia haere, ia gwau, “King e, oi ese oi ura bada do oi hanamoa tauna totona, inai bamona do oi karaia:  
\v 8 King ena dabua do oi mailaia, oi ese oi karaia vadaeni gaudia, bona hosi ta, iena latanai oi guia vadaeni, bona inai hosi ena kwarana dekenai be king ena toana herahera namodia.  
\v 9 Unai neganai oiemu lohia tauna badana ta ese unai oi moalelaia tauna dekenai inai king ena dabua do ia atoa. Bona unai tau ese oiemu hosi ena latanai do ia helai, bona lohia tauna badana ese hosi be hanua ena ariara badana do ia hakaua hanaia. Bona lohia tauna badana ese unai tau ena vairanai do ia raka, do ia boiboi, do ia gwau, ‘King ese ia moalelaia tauna, be inai bamona ia hanamoa noho!”   
\p
\v 10 Vadaeni king ese Hamana ia hamaoroa, ia gwau, “Do oi karaharaga, dabua bona hosi do oi abia, oiemu hereva hegeregerena, bona Morodekai, Iuda tauna dekenai unai hanamoa karadia ibounai do oi karaia. Morodekai be king ena ruma ena raka vareai iduara dekenai do oi davaria.”   
\p
\v 11 Unai dainai Hamana ese king ena dabua bona hosi ia abia, Morodekai ena latanai dabua ia atoa, bona hosi ena latanai Morodekai ia helai. Unai neganai Hamana ese hanua ena ariara badana dekenai Morodekai ia hakaua hanaia, bona Hamana ia boiboi, ia gwau, “King ese ia moalelaia tauna, be inai bamona ia hanamoa noho.”   
\p
\v 12 Vadaeni Morodekai be king ena ruma raka vareai iduara dekenai ma ia giroa lou. To Hamana be iena ruma dekenai ia lao haraga, bona mai lalohisihisi danu iena vairana ia koua momokani.  
\v 13 Hamana ese iena adavana Serese bona iena turana ibounai be ia dekenai idia vara gaudia ia hamaoroa.  
\p Vadaeni iena aonega taudia bona iena adavana Serese ese Hamana idia hamaoroa, idia gwau, “Inai Morodekai, oiemu siahu ia ese ia hamaragia noho tauna, bema ia be Iuda tauna, ia ese oi do ia halusia momokani. Oi ese oi koua diba lasi.”   
\p
\v 14 Idia ese ia dekenai idia hereva noho neganai, king ena ruma ena eunuko taudia idia ginidae, bona karaharaga Hamana idia hakaua lao, Eseta ese ia karaia hegaegae aria do ia ania totona.   
\c 7  
\s1 Hamana idia taua dae, ia mase  
\p
\v 1 Unai dainai, king Ahasuero bona Hamana be idia raka vareai, kwini Eseta danu do idia aniani hebou totona.  
\v 2 Dina iharuana dekenai, idia be uaina idia inua neganai, king ese Eseta ma ia nanadaia lou, ia gwau, “Kwini Eseta e, oiemu noinoi be dahaka? Lau ese oi dekenai do lau henia. Oiemu ura gauna be dahaka? Bema oi ura egu basileia kahana, lau ese oi dekenai do lau henia.”   
\p
\v 3 Vadaeni kwini Eseta ia haere, ia gwau, “King badana e, bema lau dekenai oi laloa namo, bona bema oi ura neganai, egu noinoi be egu mauri lau dekenai do oi henia, bona egu noinoi danu be egu bese do oi hamauria.  
\v 4 Badina be tau ta ese gwauhamata hereva ia ha-aukaia momokani, lau bona egu bese taudia do ia alaia ore momokani. Bema iena hereva ese hesiai gaukara mai guia danu dekenai ai do ia atoa, be hereva ta oi dekenai do lau gwauraia lasi, badina lau ura lasi metau oi dekenai do lau henia. To idia ura ai do idia hadikaia ore momokani, unai dainai oi dekenai lau noinoi inai.”   
\p
\v 5 King Ahasuero ese Eseta ia nanadaia, ia gwau, “Unai bamona ia karaia gwauraia tauna be daika? Ia be edeseni ia noho?”   
\p
\v 6 Eseta ia haere, ia gwau, “Ai ia dagedage henia, bona ai ia hadikaia ore gwauraia tau dikana be Hamana!”  
\p Unai neganai Hamana be ia gari bada herea, king bona kwini edia vairana dekenai.  
\v 7 Vadaeni king ese aniani gabuna dekena amo ia toreisi mai badu momokani danu, iena ruma ena uma maragina dekenai ia raka lao. To Hamana be ia diba, iena kara dainai king ese do ia hadikaia gwauraia. Unai dainai Hamana be ruma dekenai ia noho, ia ese kwini Eseta do ia noia do ia bogahisihisi henia, king ese do ia alaia garina.   
\p
\v 8 Vadaeni king ese uma ia rakatania, uaina inua gabuna ma ia helai lou totona. Daiutu dekenai ia raka vareai neganai king ese Hamana ia itaia, ia be Eseta ena hekure patana ena latanai ia moru diho noho. King ese inai kara ia itaia neganai, ia boiboi bada, ia gwau, “Inai tau ese egu adavana be egu ruma lalonai do ia sihari henia, a?”  
\p King ese unai hereva ia gwauraia, vadaeni nega tamona hesiai taudia ese dabua dekenai Hamana ena vairana idia koua.  
\v 9 Unai neganai Harabona, king ena eunuko hesiai tauna ta ia gwau, “Inai danu, Hamana ese taunimanima taua dae auna, ena lata be 22 mita, be iena ruma kahirakahira ia haginia, Morodekai do ia taua dae mase totona. To king e, inai Morodekai ese guna oi ia durua, vadaeni oi idia hadikaia gwauraia taudia ese oi idia alaia lasi!”  
\p Vadaeni king ia oda henia, ia gwau, “Unai taua dae auna dekenai Hamana do umui taua dae ia mase!”   
\p
\v 10 Hamana ese unai taua dae auna be Morodekai totona ia haginia. To idia ese unai auna dekenai Hamana sibona idia taua dae, ia mase. Unai neganai king ena badu be ia keru vadaeni.   
\c 8  
\s1 King Ahasuero ese Iuda taudia dekenai gwaumaoro ia henia  
\p
\v 1 Unai dina dekenai King Ahasuero ese Hamana, Iuda taudia ia hadikaia dalana ia tahua tauna, ena ruma bona tano be kwini Eseta dekenai ia henia. Bona Eseta ese king ia hamaoroa, Morodekai be iena varavara tauna, unai dainai unai dina ia lao, Morodekai be king ena vairanai ia gini.  
\v 2 Vadaeni king ese iena imana kwakikwakina rini, iena toa karaia gauna, Hamana dekena amo ia abia vadaeni gauna, be ia kokia, Morodekai dekenai ia henia. Unai neganai Eseta ese Morodekai be Hamana ena ruma ena biaguna ia halaoa.   
\p
\v 3 To Eseta ese king dekenai ma ia noinoi lou. Ia be king ena aena badinai ia tui diho, bona mai tai danu ia hereva henia. Ia ese king ia noia, Hamana, Agaga tauna, ena oda hereva dikana, Iuda taudia hadikaia ore totona gauna, be king ese do ia koua.  
\v 4 Vadaeni king ese iena dagi auna, golo gauna, be Eseta dekenai ia duduia. Unai dainai Eseta ia toreisi, king ena vairanai ia gini.   
\p
\v 5 Eseta ia gwau, “King e, bema oi ura neganai, bona bema lau dekenai oi laloa namo, bona bema oi laloa ia be kara maorona, oiemu oda hereva mani do oi torea, do oi siaia lao, Hamana Hamedata, Agaga tauna, ena revareva, king ena basileia ibounai lalonai idia noho Iuda taudia do idia hadikaia ore totona ia torea gaudia do oi hadokoa momokani.  
\v 6 Badina inai dika bada egu bese taudia dekenai lau ura lasi momokani. Bema egu varavara taudia idia alaia mase neganai edena bamona do lau noho namo diba?”   
\p
\v 7 Vadaeni king Ahasuero ese kwini Eseta bona Morodekai, Iuda tauna, ia hamaoroa, ia gwau, “Kamonai, Hamana be lau taua dae, ia mase, badina ia ese Iuda taudia ia hadikaia gwauraia, bona lau ese Hamana ena tano bona ena ruma be Eseta dekenai lau henia vadaeni.  
\v 8 To oda hereva pepana, king ena ladana dekenai ia torea, bona iena imana kwakikwakina rini dekena amo toana ia karaia gauna, be ta ese ia koua o hadokoa diba lasi. To umui emui ura hegeregerena Iuda taudia dekenai revareva do umui torea. Lauegu ladana dekenai do umui torea, bona egu imana kwakikwakina rini dekena amo pepa dekenai egu toa do umui karaia.”   
\p
\v 9 Vadaeni, maoromaoro king ena toretore taudia idia boiria mai, bona unai dina, hua ihatoina, ladana Sivana, ena dina namba 23 dekenai, revareva idia torea, Morodekai ena oda hegeregerena. Inai revareva ese Morodekai ena oda ibounai Iuda taudia dekenai idia gwauraia hedinarai, basileia 127 dekenai, bona basileia gunalaia taudia, bona gavana taudia, bona lohia taudia ibounai, India dekena amo ia lao bona Etiopia dekenai. Inai revareva be gado idauidau ibounai dekenai, bona revareva torea daladia ibounai dekenai idia torea, Iuda taudia dekenai danu, edia revareva dala dekenai, bona edia gado dekenai.   
\p
\v 10 Morodekai ese king Ahasuero ena ladana be unai revareva dekenai ia torea, bona idia dekenai be king ena imana kwakikwakina rini dekenai king ena toa ia karaia. Bona revareva be hosi guia taudia dekena amo ia siaidia lao haraga. Inai hosi be king ena hosi maguna lalonai idia vara gaudia.   
\p
\v 11 Unai revareva Morodekai ese ia karaia gauna lalonai inai hereva idia torea: “King ese gwaumaoro ia henia inai, Iuda taudia hanua ta ta ibounai lalonai idia noho ese idia haboua diba, bona do idia tuari henidia gwauraia taudia be ma do idia tuari henidia lou diba. Edena bese o edena basileia ese Iuda taudia idia hadikaia toho, to Iuda taudia ese do idia toreisi, bona idia tuari henidia diba. Iuda taudia ese idia ibounai idia alaia diba, edia hahine bona natudia danu, edia kohu danu idia abia diba.  
\v 12 Iuda taudia ese unai kara be dina tamona lalonai do idia karaia, king Ahasuero ena basileia ibounai edia lalonai. Unai dina be hua namba 12, hua ladana Adara, ena dina namba 13.”   
\p
\v 13 Inai revareva be, taravatu ta idia halaoa, bona ena pepa ta ta ibounai be basileia ta ta ibounai dekenai idia siaia lao, taunimanima ibounai edia vairanai idia duahia hedinarai, vadaeni Iuda taudia be do idia hegaegae, bona unai dina dekenai idia ese idia tuari henidia taudia edia davana do idia henia momokani.   
\p
\v 14 Unai dainai inai oda hereva pepadia abia lao taudia ese king ena hosi idia guia, bona idia heau haragaharaga, unai be king ena oda aukana dainai. Inai oda hereva be hanua badana Susa lalonai danu idia gwauraia hedinarai.   
\p
\v 15 Morodekai be king ena vairana dekena amo ia raka lao. Ia ese king ena dabua ia kwatua, edia kala be bulu bona kurokuro. Ena kwara gauna be korona, golo gauna badana, bona iena kouti be dabua aukana, namona momokani, ena kala be kakakaka. Susa taudia idia itaia, bona mai moale danu idia boiboi noho.  
\v 16 Iuda taudia idia noho namo, mai moale danu, bona taunimanima ese idia mataurai henidia.   
\p
\v 17 Hanua ibounai, bona basileia ibounai dekenai, king ena oda hereva idia kamonai Iuda taudia ibounai be idia moale noho, bona laga-ani dinana idia abia, aria idia karaia, bona idia noho namo.  
\p Bona unai tano idau bese taudia be Iuda taudia dekenai idia gari. Unai dainai idia momo be sibodia Iuda taudia idia halaoa, Iuda orea danu idia haboua.   
\c 9  
\s1 Iuda taudia idia kwalimu  
\p
\v 1 Hua namba 12, hua ladana Adara, ena dina namba 13 dekenai, king ena oda hereva ena kara do idia karaia. Unai dina dekenai Iuda taudia idia ura hadikaia taudia ese Iuda taudia do idia alaia ore gwauraia. To unai dina dekenai Iuda taudia ese idia toreisi, bona idia badu henia taudia dekena amo idia kwalimu.  
\v 2 Iuda taudia idia noho hanua ibounai, king Ahasuero ena basileia ibounai dekenai, Iuda taudia ese sibodia orea ta ta dekenai idia haboua, bona idia hadikaia gwauraia taudia tuari henidia totona idia noho hegaegae. To tau ta ese idia ia koua diba lasi, badina be taunimanima ibounai ese Iuda taudia dekenai idia gari henia noho.  
\v 3 Bona basileia edia lohia taudia bona gavana taudia, bona gunalaia taudia bona king ena hesiai taudia ibounai ese Iuda taudia idia durua, badina be Morodekai dekenai idia gari henia.  
\v 4 Badina Morodekai ena ladana be bada king ena ruma dekenai, bona basileia ibounai dekenai iena sivarai idia gwauraia loaloa. Iena siahu danu be ia bada lao noho.   
\p
\v 5 Unai dainai Iuda taudia ese edia mase dala idia tahua taudia ibounai be tuari kaia dekena amo idia aladia mase, idia hadikadia ore, bona edia ura hegeregerena idia ese idia badu henidia taudia idia halusia momokani.   
\p
\v 6 Hanua badana Susa dekenai Iuda taudia ese tau ibounai 500 idia alaia ore.  
\v 7 Idia alaia taudia haida edia ladadia be Parasanadata bona Dalapono bona Asipata,  
\v 8 bona Porata bona Adalia bona Aridata,  
\v 9 bona Paramasita, bona Arisai bona Aridai bona Vaisata.  
\v 10 Inai taudia be Hamana Hamedata ena natuna tau ibounai 10. Hamana be Iuda taudia ia dagedage henia tauna.  
\p To Iuda taudia ese idia alaia taudia edia kohu idia abia lasi.   
\p
\v 11 Unai dina dekenai, Iuda taudia ese taunimanima hida idia alaia Susa dekenai be tau haida ese king idia hamaoroa.  
\v 12 Vadaeni king ese kwini Eseta ia hamaoroa, ia gwau, “Hanua badana Susa lalonai Iuda taudia ese tau ibounai 500 idia alaia mase, bona Hamana ena natuna tau 10 danu. Lau laloa egu basileia oredia dekenai, Iuda taudia ese taunimanima ma momo herea idia alaia vadaeni. Harihari oiemu noinoi be dahaka? Dahaka ma oi ura noho? Lau ese oi dekenai do lau henia momokani, oiemu ura hegeregerena.”   
\p
\v 13 Eseta ia haere, ia gwau, “King e, bema oi ura neganai, gwaumaoro be Iuda taudia do oi henia, vadaeni hari dina Iuda taudia Susa dekenai idia karaia kara be kerukeru danu do idia karaia diba. Ma danu do oi oda henia, Hamana ena natuna tau 10 edia tauanidia be taua dae auna dekenai do idia taua dae.”   
\p
\v 14 Vadaeni king ese ia oda henia, unai bamona do idia karaia, oda hereva be Susa dekenai idia gwauraia hedinarai, bona Hamana ena natuna tau 10 be idia taua dae.  
\v 15 Unai dainai Iuda taudia Susa dekenai be hua ladana Adara ena dina namba 14 dekenai ma idia haboua, Susa dekenai taunimanima ma 300 idia alaia mase. To Iuda taudia ese idia alaia taudia edia kohu idia abia lasi.   
\p
\v 16 Iuda taudia oredia, king ena basileia kahana ibounai lalonai idia noho danu idia haboua, edia mauri gimaia totona, bona idia ese idia hadikaia gwauraia taudia ibounai 75,000, idia badu henidia taudia, idia alaia mase. To Iuda taudia ese idia alaia taudia edia kohu idia abia lasi.  
\v 17 Unai kara be hua ladana Adara ena dina namba 13 dekenai idia karaia, bona dina namba 14 dekenai idia laga-ani, aria bona moale dinana dekenai idia halaoa.  
\v 18 To Susa dekenai idia noho Iuda taudia ese edia laga-ani be dina namba 15 dekenai idia abia, badina dina namba 13 bona dina namba 14 danu dekenai idia haboua vadaeni, taunimanima alaia totona.   
\p
\v 19 Unai dainai Iuda taudia, hanua maragidia, mai edia magu lasi hanuadia lalonai idia noho, ese lagani ta ta hua ladana Adara ena dina namba 14 be edia laga-ani bona moale dina badana idia halaoa. Inai dina dekenai aniani bada idia ania hebou, bona harihari gaudia be idia ta ta dekenai idia henia.   
\s1 Purimi ena Aria  
\p
\v 20 Unai neganai Morodekai ese inai dina edia kara ibounai edia sivarai ia torea, bona revareva ia torea, Iuda taudia ibounai dekenai ia siaidia, king Ahasuero ena basileia ibounai lalonai, gabu kahirakahira, bona gabu daudau danu.  
\v 21 Morodekai ese idia ia hamaoroa, hua ladana Adara ena dina namba 14 bona 15 be lagani ta ta ibounai edia laga-ani dinadia do idia badinaia.  
\v 22 Inai dinadia dekenai Iuda taudia ese idia ura hadikaia taudia dekena amo kwalimu idia abia. Bona unai hua lalonai edia lalohisihisi bona taitai be idia ore, bona edia gabu dekenai moale bona laga-ani idia davaria. Morodekai ese Iuda taudia ia hamaoroa, unai dina ruaosi lalonai aria bona moale do idia karaia, bona idia ta ta dekenai, bona ogogami taudia dekenai harihari gaudia do idia henia.   
\p
\v 23 Unai dainai Iuda taudia be idia gwauhamata, idia ese Morodekai ena revareva ena oda hereva be lagani ta ta ibounai dekenai do idia karaia.   
\p
\v 24 Badina be Hamana Hamedata, Agaga tauna, Iuda taudia ia badu henidia tauna, ese Iuda taudia hadikaia ore dalana ia laloa, bona laki gadara ta ladana Puru ia karaia, idia do ia halusia bona do ia hadikadia ore totona.  
\v 25 To Eseta be king ena vairanai ia gini neganai, king ese oda hereva ia torea, unai oda dekena amo Hamana ese iena laloa dikana Iuda taudia totona gauna be ia sibona dekenai ia havaraia. Bona ia, bona iena natuna tau danu, be taua dae auna dekenai idia taua dae, idia mase.   
\p
\v 26 Unai dainai, unai dina ena ladana be “Purimi” idia atoa, unai Parasa hereva “Puru” dainai.  
\p Vadaeni, Morodekai ena revareva ena oda hereva dainai, bona idia dekenai idia vara gaudia ibounai dainai,  
\v 27 Iuda taudia ese idia laloa tamona, inai Purimi kara be taravatu do idia halaoa, idia bona edia tubudia edia latanai, bona idau bese taudia, Iuda orea idia vareai vadaeni taudia danu edia latanai. Lagani ta ta ibounai, inai dina ruaosi be do idia laloa bona badinaia momokani, ena nega korikori dekenai, bona Morodekai ese ia torea oda hereva ibounai hegeregerena.   
\p
\v 28 Inai Purimi dina ruaosi be do idia laloatao, bona badinaia, uru ibounai lalonai, edia bese ta ta bona iduhu ta ta ibounai lalonai, bona basileia bona hanua ibounai lalonai danu. Inai Purimi dinadia badinaia kara be do ia doko lasi, bona Iuda taudia edia tubudia edia tubudia edia huana dekena amo inai kara be do ia boio lasi momokani.   
\p
\v 29 Vadaeni kwini Eseta, Abihaili ena natuna, bona Morodekai, Iuda tauna, ese revareva iharuana ma idia torea. Inai revareva ese danu Purimi ena dina ruaosi ia herevalaia, bona revareva lalonai kwini Eseta ese Morodekai ena Purimi oda hereva ia durua bona hamomokania, mai ena siahu danu.   
\p
\v 30 Revareva be Eseta bona Morodekai idia siaia, Iuda taudia ibounai dekenai idia lao. Revareva ta ta be Parasa ena basileia ibounai 127 dekenai idia lao. Revareva edia lalonai inai bamona idia torea, “Iuda taudia ibounai e, maino bona noho namo do umui abia.  
\v 31 Umui bona emui tubudia, gabeai idia vara taudia, ese inai Purimi dina ruaosi do umui badinaia namonamo, edia nega korikori dekenai, umui ese aniani lasi taravatu bona taitai negadia ena taravatu umui badinaia hegeregerena. Lau Morodekai bona kwini Eseta, ai ruaosi ese inai taravatu umui dekenai ai atoa.”   
\p
\v 32 Inai oda hereva, Eseta ese ia torea gauna, ese Purimi ena taravatu ia haginia, bona revareva idia torea danu, do idia hamomokania totona.   
\c 10  
\s1 King Ahasuero bona Morodekai be mai edia ladadia badadia  
\p
\v 1 King Ahasuero ese iena basileia kahana ibounai dekena amo takisi moni ia abia, kone gabudia dekena amo bona motumotu gabudia dekena amo danu.  
\v 2 King ena siahu bona iena goada karadia, bona Morodekai dekenai dagi badana king ese ia henia ena sivarai ibounai be Media bona Parasa king edia sivarai buka lalonai idia torea vadaeni.   
\p
\v 3 Badina be Morodekai, Iuda tauna, be king Ahasuero ena iharuana. King sibona ese Morodekai ia hanaia. Morodekai be Iuda taudia edia huanai ia bada herea, bona idia ese Morodekai idia ura henia bona ia dekenai idia moale bada. Badina be Morodekai ese iena bese taudia edia namo ia tahua, bona ia ese Iuda taudia edia maino bona noho namo totona ia gaukara.