\id EPH EPHESIANS, Hiri Motu Bible, 1993 
\h EFESO 
\toc1 PAULO ENA REVAREVA EFESO TAUDIA DEKENAI 
\toc2 EFESO 
\mt2 PAULO ENA REVAREVA  
\mt1 EFESO  
\mt2 TAUDIA DEKENAI  
\c 1  
\p
\v 1 Lau inai Paulo, lau be Keriso Iesu ena aposetolo tauna, Dirava ena ura dainai. Lau ese inai revareva lau torea umui Dirava ena taudia Efeso dekenai, Keriso Iesu umui abidadama henia taudia.   
\p
\v 2 Lau ura be Dirava iseda Tamana bona Lohiabada Iesu Keriso ese hariharibada bona maino umui dekenai do idia henia.   
\s1 Keriso dainai Dirava ese iseda lauma ia hanamoa  
\p
\v 3 Dirava ita tanikiu henia be namo, ia be iseda Lohiabada Iesu Keriso ena Tamana. Bona Keriso danu ita hakapua dainai Dirava ese guba ena hanamoa gaudia ibounai ita dekenai ia henia, iseda lauma durua totona.  
\v 4 Tanobada ia do karaia lasi neganai, Dirava ese ita ia abia hidi, ita be iena taudia, Keriso lalonai ita noho dainai. Unai dekena amo, Dirava ena vairanai ita be helaga bona mai kerere ta lasi.  
\p Iena lalokau dainai,  
\v 5 Dirava ese gunaguna ita ia makaia vadaeni iena. Iena ura be Iesu Keriso dekena amo, ia ese iena natuna ita do ia halaoa. Inai be sibona ena palani, bona sibona ena ura.  
\v 6 Namona be Dirava ita hanamoa, iena hariharibada namo herea momokani dainai! Inai hariharibada ita dekenai ia henia davana lasi, iena Natuna lalokau dekena amo!   
\p
\v 7 Badina be Keriso ese iena mase dekena amo ita ia hoia lou vadaeni, iena rarana dainai. Iseda dika danu ia ese ia gwauatao vadaeni. Dirava ena hariharibada be bada herea momokani, ani?  
\v 8 Inai hariharibada ita dekenai ia henia badabada. Bona iena aonega bona diba bada hegeregerena,  
\v 9 Dirava ese sibona ena ura gauna, iena palani, gunaguna ia laloa, hunia gauna, ita dekenai ia hadibaia. Inai palani be Keriso dekena amo Dirava ese do ia karaia haorea.  
\v 10 Inai palani do ia haorea nega korikori ia ginidae neganai, Dirava ese do ia karaia haorea. Inai palani ena anina be, Dirava ia karaia gaudia ibounai, guba dekenai bona tanobada dekenai, be Keriso ese do ia biagua.   
\p
\v 11 Gau ibounai be Dirava ese ia karaia, iena palani hegeregerena. Bona ia ese ai Iuda taudia ia abia hidi, iena bese korikori do ai lao, bona Keriso danu do ai hakapua. Inai be Dirava ena palani, tanobada ia karaia hamatamaia neganai ia laloa gauna.  
\v 12 Ai Iuda taudia be Keriso ai laloa bona abidadama henia taudia ginigunadia. Unai dainai Dirava ese ai ia makaia, iena hairai diarina do ai hanamoa bada, nega ibounai.   
\p
\v 13 Umui danu, Sivarai Namona, hamauria umui dekenai ia henia hereva momokani umui kamonai henia neganai, Dirava ese iena bese taudia umui ia halaoa. Keriso umui abidadama henia dainai, Dirava ese iena gwauhamata toana, Lauma Helaga umui dekenai ia henia. Inai toana ese umui ia makaia, umui be Dirava ena bese taudia momokani.  
\v 14 Ita ese Lauma Helaga ita abia vadaeni, unai dainai ita diba momokani, Dirava ese ia gwauhamata iena taudia do ia henidia gaudia be dohore ita abia. Dirava ese ita ia hoia lou, bona Lauma Helaga dekena amo ita ia makaia, vadaeni ita diba momokani ita be ia dekenai dohore ita noho. Namona be iena hairai diarina ita hanamoa bada!   
\s1 Paulo ia noinoi Dirava ese Efeso taudia dekenai aonega do ia henia  
\p
\v 15 Umui emui sivarai lau kamonai vadaeni, umui ese Lohiabada Iesu umui abidadama henia, bona Dirava ena taudia umui lalokau henia.  
\v 16 Unai dainai umui totona Dirava lau tanikiu henia nega ibounai, doko lasi. Bona umui dainai lau guriguri noho.  
\v 17 Iseda Lohiabada Iesu Keriso ena Dirava, ia be Tamana mai hairaina bada herea lau noia noho. Lauegu noinoi be inai: Ia ese Lauma Helaga umui dekenai do ia henia. Lauma Helaga ese aonega umui dekenai do ia henia, bona ia ese Dirava umui dekenai do ia hedinaraia. Vadaeni Dirava dekenai do umui manada.  
\v 18 Ma Dirava lau noia, ia ese emui lalona do ia hadiaria, vadaeni umui ia boiboi totona ahuna ena namo do umui diba momokani, bona unai ahuna do umui naria noho. Lau ura danu Dirava ese iena taudia dekenai dohore ia henia davana bada hanamoa gaudia do umui diba momokani.  
\v 19 Dirava lau noia danu iena siahu badana, ita lalonai ia gaukara noho gauna, ena bada herea do umui diba momokani. Inai siahu ita abia, iseda abidadama dainai.  
\v 20 Bona inai siahu be Dirava ese ia gaukaralaia, Keriso mase dekena amo ia hatorea isi neganai. Ia gaukaralaia danu, guba dekenai Keriso ia atoa neganai, ia be Dirava ena idiba kahana dekenai ia helai.  
\v 21 Keriso ese guba ena lohia taudia ibounai, gunalaia taudia ibounai, gavana taudia ibounai, bona siahu taudia ibounai ia ese idia ia hereaia. Iena ladana ese danu, ladana ibounai inai tanobada mauri lalonai bona gabeai maurina lalonai danu ia hereaia momokani.  
\v 22 Dirava ese gau ibounai Keriso ena aena henunai ia atoa, bona ia ese ekalesia ena kwarana momokani Keriso ia halaoa.  
\v 23 Ekalesia be Keriso ena tauanina. Keriso ese gau namodia ibounai dekena amo ia honu, ese gau ibounai ia hahonua noho, badina be Dirava ese gau namodia ibounai ia honu, ese Keriso ia hahonua vadaeni.   
\c 2  
\s1 Ita mase taudia Dirava ese ia hamauria Keriso dainai  
\p
\v 1 Guna umui be emui kara dika bona kerere dainai umui mase.  
\v 2 Unai neganai inai tanobada ena kara dika dalana umui raka. Umui ese lauma dikadia edia biaguna umui kamonai henia. Inai lauma dika ese Dirava idia kamonai henia lasi taudia edia lalona dekenai harihari ia gaukara noho.  
\v 3 Guna ita ibounai be idia bamona ita karaia. Iseda tauanina edia ura dikadia, bona iseda lalona edia ura kava sibona ita karaia. Vadaeni unai bamona ita noho dainai, iseda dika davana korikori be Dirava ena badu, taunimanima oredia ibounai hegeregerena.   
\p
\v 4-5 Momokani, iseda kara dika ese ita idia alaia, ita mase momokani. To Dirava ena bogahisihisi bona iena lalokau ita dekenai be bada herea momokani. Unai dainai ita mase taudia be Dirava ese ia hamauria momokani, Keriso danu. Badina be Dirava ena bogahisihisi sibona ese umui ia hamauria.  
\v 6 Keriso Iesu danu ita hakapua dainai, Dirava ese Keriso danu ita ia hatorea isi, vadaeni guba dekenai lohia dagi do ita abia, Keriso danu.  
\v 7 Inai bamona ia karaia, iena hariharibada bona lalokau bada herea, be hari bona vaira neganai taunimanima ibounai do idia diba totona. Keriso Iesu dekena amo inai hariharibada bona lalokau ita dekenai ia hedinaraia vadaeni.  
\v 8 Badina be Dirava ena hariharibada ese umui ia hamauria vadaeni abidadama dainai, umui sibona ese lasi, to Dirava ena hariharibada, davana lasi ese.  
\v 9 Bona inai hamauria be emui gaukara dekena amo lasi, tau ta do ia hekokoroku garina.  
\v 10 Dirava ese ita ia karaia. Bona ia ese Keriso Iesu ena siahu dekena amo tau matamatadia ita ia halaoa, kara namodia do ita karaia totona. Dirava ese gunaguna inai bamona dala ia palani hegaegae ita totona.   
\s1 Keriso ese bese rua ia hatamonaia  
\p
\v 11 Umui laloa, gunaguna umui be idau bese taudia, bona Iuda taudia ese umui idia herevalaia neganai idia gwau, “Kopina idia utua lasi taudia.”  
\v 12 Unai neganai umui be Keriso umui diba lasi, bona Israela taudia edia vairanai umui be idau taudia momokani. Dirava ena gwauhamata danu umui be gabu lasi, bona tanobada taudia bamona umui noho dainai, umui be Dirava lasi taudia, bona gabeai mauri hanaihanai ena naria laloa namona umui diba lasi.  
\v 13 Oibe, gunaguna umui be murimuri taudia momokani, to hari, umui be Keriso Iesu lalonai dainai, Keriso ena rarana ese Dirava ena bese lalonai umui ia atoa vadaeni.  
\v 14 Badina be Keriso ese iseda maino ia karaia. Ia ese Iuda taudia bona Iuda lasi taudia edia dagedage ia haorea, bese tamona ia halaoa vadaeni. Oibe, Keriso ese, sibona ena tauanina dekena amo, unai bese ruaosi ia hapararaia maguna ia kokia ore momokani, bese ruaosi ia hatamonaia.  
\v 15 Keriso ese Iuda taudia edia Taravatu, mai ena oda bona torea hereva maragidia ibounai ia haorea. Inai bamona ia karaia, unai bese ruaosi dekena amo bese matamata tamona do ia havaraia totona. Oibe, inai bese ruaosi Keriso danu idia haboua tamona dainai, idia edia huanai be Keriso ese maino ia karaia vadaeni.  
\v 16 Iena mase satauro latanai dekena amo Keriso ese unai bese ruaosi ia hatamonaia, vadaeni tauanina tamona hegeregerena, Dirava dekenai maino do idia karaia. Bona Keriso ese, iena satauro dekena amo edia dagedage, bese ruaosi edia huanai gauna, ia haorea momokani.   
\p
\v 17 Momokani, Keriso ia mai, maino ena Sivarai Namona umui ibounai dekenai ia harorolaia. Umui Iuda lasi taudia, Dirava dekena amo umui noho daudau taudia dekenai ia harorolaia. Bona umui Iuda taudia, Dirava kahirakahira umui noho taudia dekenai danu ia harorolaia.  
\v 18 Keriso dainai ita ibounai, Iuda bona Iuda lasi taudia, be Tamana ena vairanai ita gini diba, Lauma tamona ita dekenai ia henia dainai.   
\s1 Ita Keristani taudia ibounai be Dirava ena ruma  
\p
\v 19 Unai dainai umui Iuda lasi taudia, harihari umui be idau bese taudia lasi. Umui be Dirava ena taudia, bona iena hanua tamona taudia. Umui be Dirava ena bese taudia korikori.  
\v 20 Umui be aposetolo taudia bona peroveta taudia idia haginia ruma, iena du latanai Dirava ese umui ia haginia noho. Inai ruma ena kona nadina be Keriso Iesu sibona.  
\v 21 Keriso ese inai ruma ena kahana ibounai ia hagoadaia noho, bona ia haboua tamona. Vadaeni ia ese ia haginia dainai, ruma be Lohiabada ena dubu helaga momokani do ia lao.  
\v 22 Umui be Keriso lalonai dainai, ia ese umui ia haginia noho, ekalesia orea haida danu. Umui ia haginia hebou, vadaeni Dirava ena noho rumana momokani umui lao noho, iena Lauma Helaga ia noholaia gabuna.   
\c 3  
\s1 Paulo ese Iuda lasi taudia totona ia gaukara  
\p
\v 1 Unai dainai lau Paulo, be Keriso Iesu ese ia guia, umui Iuda lasi taudia do lau durua totona. Vadaeni umui dainai Dirava lau guriguri henia noho.  
\v 2 Lau laloa umui kamonai vadaeni, Dirava ese iena hariharibada dekena amo, umui durua totona, inai gaukara badana lau dekenai ia henia vadaeni.  
\v 3 Dirava ese iena palani, hunia gauna, lau dekenai ia hedinaraia. Inai palani ena anina sisina umui dekenai lau torea vadaeni guna.  
\v 4 Bema inai lau torea gauna umui duahia neganai, do umui diba, lau be Keriso ena sivarai, ia hunia gauna, lau diba momokani vadaeni.  
\v 5 Nega gunadia lalonai Dirava ese taunimanima dekenai inai hunia hereva ia hadibaia lasi. To harihari Dirava ese iena Lauma Helaga dekena amo, iena aposetolo bona peroveta helaga taudia dekenai inai hunia hereva ia hedinaraia vadaeni.  
\v 6 Inai hunia hereva ena anina be inai: Sivarai Namona dekena amo, Iuda lasi taudia bona Iuda taudia ese Dirava ena hanamoa tamona do idia abia. Inai orea ruaosi edia tauanina be tamona, bona idia ruaosi Dirava ena gwauhamata, Keriso Iesu dekena amo ia gwauraia gauna do idia abia hebou.   
\p
\v 7 Dirava ese iena hesiai gaukara tauna lau ia halaoa, iena Sivarai Namona do lau harorolaia totona. Ia ese harihari gauna, siahu idauna ta, be lau dekenai ia henia. Iena siahu dekena amo inai harihari gauna lau dekenai ia henia, egu dagi lalonai do lau goada totona.  
\v 8 Dirava ena taudia ibounai edia huanai lau sibona be maragi herea momokani, to inai dagi idauna lau dekenai ia henia vadaeni. Dagi be inai: Sivarai Namona Iuda lasi taudia dekenai do lau harorolaia. Inai be Keriso ena gau namodia ena sivarai, taunimanima sibona edia aonega dekena amo idia davaria diba lasi gauna.  
\v 9 Dirava ese gau ibounai ia karaia, bona gunaguna iena palani, iena kara ibounai dohore ia karaia laloa gauna ia hunia, taunimanima dekena amo. Inai palani be gunaguna ia mai bona harihari ia hunia noho. To hari Dirava ese lau ia abia hidi, inai palani do lau gwauraia hedinarai totona.  
\v 10 Oibe, guna ia hunia, to hari Dirava ese gaukara badana ekalesia dekenai ia henia. Inai gaukara be, ekalesia ese Dirava ena aonega idauidau, be guba ena lohia taudia, bona guba ena siahu taudia dekenai do ia hedinaraia.  
\v 11 Dirava ese gunaguna inai bamona palani ia laloa karaia, bona hari iseda Lohiabada Keriso Iesu ena gaukara dekena amo, inai palani ia karaia haorea vadaeni.  
\v 12 Keriso lalonai ita noho dainai, bona ia dekenai ita abidadama henia dainai, ita be Dirava ena vairanai ita gini diba, gari ta lasi.  
\v 13 Unai dainai umui lau noia, lauegu hisihisi umui dainai do umui laloa momo lasi. Badina be umui emui mauri hanamoa totona lau karaia noho.   
\s1 Keriso ena lalokau bada  
\p
\v 14 Unai dainai Tamana ena vairanai lau tui diho.  
\v 15 Iena famili ibounai, guba dekenai bona tanobada dekenai, be Tamana dekena amo edia ladana idia abia.  
\v 16 Dirava lau noia, iena hairaina bona kohu momo dekena amo, umui dekenai Lauma Helaga ena siahu do ia henia. Vadaeni umui emui lalona bona kudouna do idia goada.  
\v 17 Bona Dirava lau noia, umui ese umui abidadama henia dainai, Keriso be umui emui kudouna lalonai do ia noho. Lau noia danu lalokau ese umui emui kudouna do ia hahonua, vadaeni do umui gini goada, ramu ese au badana ia dogoatao, ia gini goada bamona.  
\v 18 Vadaeni umui, bona Dirava ena taudia ibounai, ese emui goada bona aonega dekena amo, Keriso ena lalokau ena lababa, bona ena lata, bona ena ataiai, bona ena dobu, do umui diba momokani.  
\v 19 Oibe, lau ura Keriso ena lalokau do umui diba. Unai lalokau ese diba ibounai ia hereaia. Dirava lau noia, umui ese Keriso ena lalokau do umui diba momokani, unai neganai iena gau namodia dekenai ia honu dekena amo Dirava ese umui do ia hahonua.   
\p
\v 20 Dirava ese iena siahu be iseda lalona dekenai ia gaukaralaia noho. Inai siahu be goada momokani, bona iseda noinoi bona iseda laloa ibounai ia hereaia diba.  
\v 21 Vadaeni Dirava ese hairai bada herea do ia abia, ekalesia dainai, bona Keriso Iesu dainai, nega ibounai, ela bona hanaihanai. Amen.   
\c 4  
\s1 Ita Keristani taudia be tauanina tamona  
\p
\v 1 Unai dainai lau, Lohiabada ese iena hesiai gaukara lalonai lau ia guia tauna, umui lau sisiba henia inai: Dirava ese umui ia boiria vadaeni, unai dainai iena boiboi hegeregerena do umui noho, do umui noho maoromaoro.  
\v 2 Nega ibounai do umui manau, do umui manada, bona do umui haheauka. Bema haida ese metau umui dekenai idia henia neganai, idia do umui lalokau henia noho.  
\v 3 Lauma Helaga ese umui dekenai laloa tamona ia henia vadaeni, iena maino dekena amo. Inai maino be varo bamona umui ia guia hebou, orea tamona. Vadaeni do umui naria namonamo, inai maino do umui dogoatao noho.  
\v 4 Tauanina be tamona. Lauma Helaga danu be tamona. Dirava ese umui ia boiria totona ena davana namona naria kara danu be tamona.  
\v 5 Lohiabada be tamona, abidadama be tamona, bapatiso be tamona.  
\v 6 Dirava danu be tamona, ia be ita ibounai iseda Tamana. Ia be ibounai edia Lohiabada, bona ibounai edia lalona dekenai ia gaukara, bona ibounai edia lalona dekenai ia noho.   
\p
\v 7 Dirava ese ita ta ta ibounai dekenai harihari gauna idauna ta ia henia. Ia henia be Keriso ena hariharibada ena bada hegeregerena.  
\v 8 Buka Helaga lalonai ia torea hegeregerena, ia gwau:  
\q1 “Atai dekenai ia daekau lao neganai,  
\q1 abia mauri mai guia taudia momo ia danu ia abia lao.  
\q1 Bona harihari gaudia taunimanima dekenai ia henia.”   
\m
\v 9 Inai hereva “Ia daekau lao” ena anina be dahaka? Ena anina be inai: Guna ia diho mai tanobada dekenai, tanobada henuna kahanai.  
\v 10 Bona inai ia diho mai tauna be danu ia daekau lao. Guba ena ataiai momokani dekenai ia lao, guba bona tanobada edia gabu idauidau ibounai do ia hahonua totona.  
\v 11 Oibe, Keriso ese harihari gaudia taunimanima dekenai ia henia. Haida dekenai be aposetolo dagi ia henia, haida dekenai be peroveta dagi ia henia, haida be evanelia gaukara taudia, haida be haroro taudia, haida be hadibaia taudia.  
\v 12 Inai bamona harihari gaudia ia henia, be Dirava ena taudia ibounai do ia durua totona. Inai be Dirava ena hesiai gaukara do idia karaia namonamo, bona Keriso ena tauanina do ia gini goada totona.  
\v 13 Unai dekena amo ita ibounai iseda abidadama do ia tamona, bona iseda diba Dirava ena Natuna dekenai danu be tamona. Bona ita be tau badadia do ita halaoa, oibe, Keriso ena bada hegeregerena danu do ita abia gwauraia.   
\p
\v 14 Vadaeni namo ita be natuna maragidia bamona ita noho lasi, hadibaia hereva idauidau ese ita do idia koia lou lasi. Badina be koikoi taudia edia hadibaia hereva ese haida idia hakaua kerere vadaeni. Idia be vanagi bamona, bona unai koikoi hereva be lai bamona, idia ia doria lao, doria mai, vadaeni idia hure kava davara dekenai bamona.  
\v 15 To idia ese ita do idia koia lasi. Lasi momokani. Ita ese taunimanima do ita lalokau henia, bona inai lalokau dekena amo, hereva momokani do ita gwauraia. Vadaeni Keriso ena mauri dala lalonai do ita tubu daekau momokani, bona Keriso be iseda orea ena kwarana.  
\v 16 Keriso be kwarana dainai, tauanina ena kahana ibounai be ia dainai idia noho hebou bona idia gaukara hebou, bona kara ibounai be laloa tamona dekena amo idia karaia. Ta ta edia gaukara, edia gaukara korikori idia karaia noho. Unai dala dekenai tauanina be lalokau dekena amo ia tubu daekau noho.   
\s1 Keristani taudia edia mauri be matamata  
\p
\v 17 Unai dainai, Lohiabada ena ladana dainai umui lau sisiba henia, harihari ia lao, Dirava diba lasi taudia bamona umui noho lasi. Idia edia laloa be anina lasi.  
\v 18 Edia laloa be dibura. Dirava ena mauri be idia davaria diba lasi, badina be ia dekena amo edia laloa idia koua, bona iena dala idia diba lasi.  
\v 19 Idia be hemarai lasi momokani. Lebulebu daladia idia ura dikadika, bona matabodaga karadia idia tahua doko lasi.   
\p
\v 20 Keriso ena hadibaia hereva be unai bamona lasi, ani?  
\v 21 To umui ese Keriso ena gadona umui kamonai momokani, bona iena hereva momokani umui diba vadaeni.  
\v 22 Unai dainai lauegu sisiba be inai: Emui mauri gunana be dabua gunana bamona do umui kokia. Badina be iena dika bona iena koikoi dainai, ia be mase dekenai ia lao noho.  
\v 23 Umui emui laloa bona emui kudouna do umui hamatamataia, be gau badana.  
\v 24 Mauri matamata do umui atoa, dabua matamata umui atoa bamona. Inai mauri matamata dainai, emui toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.   
\p
\v 25 Unai dainai hereva koikoi do umui hadokoa momokani. Umui ibounai ta ta dekenai hereva momokani do umui gwauraia, badina ita ibounai be Keriso ena tauanina tamona ena kahana taudia.  
\v 26 Bema umui badu neganai, kara dika do umui karaia lasi. Bona dina do ia diho lasi neganai, emui badu do umui haorea.  
\v 27 Satani ena dala do umui kehoa lasi.  
\v 28 Henaoa tauna be do ia henaoa lou lasi. To gaukara namona iena imana dekena amo do ia karaia, vadaeni ia ese ogogami taudia do ia durua diba.  
\v 29 Hereva mirodia do umui gwauraia lasi, hereva namodia sibona. Vadaeni emui hereva idia kamonai taudia ese durua bona namo do idia davaria, bona emui hereva dekena amo manoka taudia do umui hagoadaia.  
\v 30 Bona Dirava ena Lauma Helaga ena lalona do umui hisihisi henia lasi. Badina Lauma Helaga be Dirava ena toana umui emui latanai, bona do ia noho ela bona hamauria Dinana dekenai. Inai toana ena anina be, Dirava ese iena gwauhamata gauna, emui hamauria, do ia badinaia momokani.  
\v 31 Heai, dagedage, bona badu do umui koua. Hereva dika, laloa dika, bona samania koikoi hereva ibounai do umui hadokoa.  
\v 32 Umui ibounai ta ta do umui durua, bona ibounai ta ta do umui bogahisihisi henia. Bona ibounai ta ta edia kara dika do umui gwauatao, Dirava ese Keriso dainai emui dika ia gwauatao hegeregerena.   
\c 5  
\s1 Diari lalonai do umui noho  
\p
\v 1 Umui be Dirava ena natuna taudia, iena lalokau. Unai dainai, Dirava ena kara bamona do umui karaia be namo.  
\v 2 Lalokau ena dala dekenai do umui mauri noho, Keriso ese ita ia lalokau henia bamona, bona ia sibona ena mauri ia atoa diho ita dainai. Iena mauri ia henia, be boubou gauna mai bonana namona Dirava ena vairanai.   
\p
\v 3 Umui be Dirava ena taudia dainai, heudahanai, sihari kava karadia, bona matabodaga, bona kohu ura dikadika kara, be do umui karaia lasi momokani.  
\v 4 Lebulebu hereva, hereva kavakava, hevaseha hereva mai miro danu be namo lasi, to Dirava do umui tanikiu henia be namo.  
\v 5 Bona do umui diba momokani, heudahanai tauna, sihari kava kara tauna, matabodaga tauna, bona kohu ura dikadika tauna, be gabu lasi, Keriso bona Dirava edia Basileia lalonai. Kohu ura dikadika kara be hegeregere kaivakuku tomadiho henia kara bamona.   
\p
\v 6 Umui naria namonamo, tau ta ese hereva kavakava dekena amo inai kara dikadia lalonai umui do ia veria garina. Badina be inai bamona idia karaia taudia edia latanai Dirava ena badu do ia ginidae momokani, idia kamonai henia lasi dainai.  
\v 7 Unai dainai unai bamona idia karaia taudia danu do umui turana karaia lasi.  
\v 8 Badina be gunaguna umui be dibura noho taudia, to harihari diari lalonai Dirava ese umui ia atoa vadaeni. Unai dainai diari taudia bamona do umui noho be namo.  
\v 9 Badina be diari ese inai bamona gau namodia ia havaraia: Kara namodia, kara maoromaoro, bona hereva momokani.  
\v 10 Lohiabada ia ura henia karadia do umui tahua.  
\v 11 Dibura karadia, idia be anina lasi karadia, dekena amo do umui raka siri, to unai kara idia karaia taudia do umui sisiba henia, bona edia dika do umui gwauraia hedinarai.  
\v 12 Edia hunia kara be mai hemaraina dainai, do lau gwauraia hedinarai lasi.  
\v 13 To bema diari ese kara ta ia hedinaraia neganai, unai kara ena badina momokani be ibounai ese idia itaia diba.  
\v 14 Bona diari ese ia hedinaraia gaudia ibounai be diari dekenai idia halaoa diba. Unai dainai hereva ta inai bamona ia gwau:  
\q1 “Mahuta tauna e, do oi noga.  
\q1 Mase taudia edia huanai dekena amo do oi toreisi,  
\q1 Keriso ese oi dekenai diari do ia henia.”   
\p
\v 15 Unai dainai umui emui kara do umui naria namonamo. Aonega taudia bamona do umui noho, kavakava taudia bamona lasi.  
\v 16 Harihari emui nega namona ia noho Dirava ena kara do umui karaia totona. Emui nega do umui haorea kava lasi, badina hari nega be nega dikana.  
\v 17 Unai dainai do umui kavakava lasi, to Lohiabada ena ura gaudia sibona do umui tahua.   
\p
\v 18 Inuinu dekena amo do umui kekero lasi, inai be emui mauri do ia hadikaia. To Lauma Helaga dekena amo do umui honu.  
\v 19 Keristani varavara taudia danu do umui herevahereva, salamo dekena amo, ane dekena amo, bona lauma anedia dekena amo. Ane do umui abia, bona Lohiabada do umui hanamoa emui kudouna lalonai.  
\v 20 Nega ibounai, gau ibounai ia henia dainai, Tamana Dirava do umui tanikiu henia, iseda Lohiabada Iesu Keriso ena ladana dainai.   
\s1 Tau bona hahine edia headava mauri  
\p
\v 21 Keriso umui matauraia dainai, umui ibounai ta ta dekenai do umui matauraia.   
\p
\v 22 Hahine e, emui adavana do umui kamonai henia, Lohiabada umui kamonai henia hegeregerena.  
\v 23 Badina tau be iena adavana ena kwarana, Keriso be ekalesia ena kwarana bamona. Bona Keriso be ekalesia ena Hamauria Tauna, ekalesia be iena tauanina.  
\v 24 Unai dainai hahine ese gau ibounai lalonai, edia adavana do idia kamonai henia, ekalesia ese Keriso ia kamonai henia bamona.   
\p
\v 25 Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai.  
\v 26 Keriso ia mase, ekalesia do ia hahelagaia totona. Ia ese Sivarai Namona ia gwauraia dekena amo, bona ranu lalonai ia huria dekena amo, ekalesia ia hagoevaia momokani.  
\v 27 Unai dainai ekalesia be Keriso ese do ia abia, iena. Ia ura iena ekalesia be iena vairanai nega ibounai, mai ena hairaina, miro lasi, makuku lasi bona bero ta lasi. Ia ura ekalesia be helaga bona goevagoeva momokani.  
\v 28 Unai bamona danu, namona be tatau ese edia adavana do idia lalokau henia, idia edia tauanina idia lalokau henia hegeregerena. Adavana ia lalokau henia tauna ese sibona ia lalokau henia noho.  
\v 29 Badina be tau ta ese sibona ena tauanina ia badu henia diba lasi. To ia ubua noho, bona ia naria noho, Keriso ese ekalesia ia ubua bona naria noho hegeregerena.  
\v 30 Ita be Keriso ena tauanina ena kahana ta ta taudia.  
\v 31 Buka Helaga lalonai ia torea hegeregerena, ia gwau: “Unai dainai tau ese iena tamana bona sinana do ia rakatania, vadaeni iena adavana sibona dekenai do ia hakapua. Bona idia ruaosi be tauanina tamona do idia noho hebou.”  
\v 32 Inai hereva ena anina be hunia bamona, to ia be hereva momokani badana ta. Bona lau laloa iena anina be, Keriso bona iena ekalesia do idia noho hebou totona.  
\v 33 To iena anina badana ta danu be inai: Tau ese iena adavana do ia lalokau henia, ia sibona ia lalokau henia hegeregerena. Hahine danu ese iena adavana do ia matauraia.   
\c 6  
\s1 Natuna mai edia tamana bona sinana  
\p
\v 1 Memero bona kekeni e, umui emui tamana bona sinana do umui kamonai henia. Kara maorona be unai.  
\v 2 “Emui tamana bona sinana do umui matauraia.” Inai be Buka Helaga ena Taravatu mai ena gwauhamata ginigunana.  
\v 3 Badina be inai bamona umui karaia neganai, gwauhamata be inai: “Mauri namona do umui abia, bona emui mauri do ia daudau tanobada dekenai.”   
\p
\v 4 Tamana bona sinana e, emui natudia do umui habadua lasi, to Lohiabada ena hadibaia hereva idia dekenai do umui hadibaia.   
\s1 Hesiai taudia bona biaguna taudia  
\p
\v 5 Hesiai mai guia taudia e, umui emui biaguna tanobada dekenai do umui kamonai henia mai gari bona mai heudeheude danu. Edia hesiai gaukara do umui karaia mai emui lalona ibounai danu, Keriso ena hesiai gaukara umui karaia bamona.  
\v 6 Edia matana dekenai umui idia itaia neganai sibona umui gaukara, a? Inai bamona umui karaia koikoi, umui do idia ura henia totona, a? Inai kara do umui karaia lasi, to do umui gaukara momokani, Keriso dekenai umui gaukara bamona. Mai emui lalona ibounai Dirava ena ura do umui karaia,  
\v 7 Emui hesiai gaukara do umui karaia mai emui lalona namo danu, tau ta ena gaukara lasi, to Lohiabada ena gaukara umui karaia bamona.  
\v 8 Badina be umui diba ita ta ta ese kara namodia ita karaia neganai, Lohiabada dekena amo davana namona do ita abia. Hesiai mai guia tauna bona ura kwalimu tauna danu, edia gaukara dainai, Lohiabada ena davana be tamona.   
\p
\v 9 Biaguna e, emui hesiai mai guia taudia dekenai kara namo do umui karaia, idia lau hamaoroa umui dekenai do idia kara namo bamona. Idia do umui hagaria lasi. Do umui laloaboio lasi, umui bona emui hesiai taudia danu, emui Biaguna guba dekenai be tamona. Ia ese taunimanima edia toana ia laloa lasi, to ibounai be maka tamona dekenai ia kota henidia noho.   
\s1 Keristani tauna be tuari tauna bamona  
\p
\v 10 Lauegu hereva dokona be inai: Lohiabada ena siahu dekena amo do umui siahu, bona Lohiabada ena goada dekena amo do umui goada.  
\v 11 Dirava ese ia henia tuari dabua ibounai do umui kwatua, vadaeni do umui goada, Satani ena koikoi karadia do umui koua.  
\v 12 Badina be iseda tuari be taunimanima danu lasi. Iseda tuari be lauma dikadia danu, guba dekenai idia noho. Ma danu inai tanobada ia gunalaia lauma dika badana, mai ena siahu taudia, bona tanobada ena dibura lohiadia, be ita ese ita tuari henidia noho.  
\v 13 Unai dainai Dirava ese ia henia tuari dabua ibounai do umui kwatua. Vadaeni nega dikana ia ginidae neganai, do umui tuari mai goada danu. Do umui tuari noho ela bona tuari ena dokona, bona unai neganai do umui gini goada noho.   
\p
\v 14 Vadaeni do umui gini goada, emui gabana dekenai hereva momokani ena beleta dekena amo do umui hagegea. Emui kemena dekenai kara maoromaoro ena auri dabuana do umui kwatua.  
\v 15 Emui aena dekenai maino ena Sivarai Namona do umui atoa, tamaka bamona.  
\v 16 Nega ibounai abidadama, emui kesi bamona, do umui abia loaloa. Abidadama dekena amo, Satani ena diba bona peva, lahi gaudia, be do umui habodoa diba.  
\v 17 Bona hamauria do umui abia dae, emui tuari kwara gauna bamona. Lauma Helaga ena tuari kaia danu do umui dogoatao. Ia be Dirava ena hereva.   
\p
\v 18 Nega ibounai Lauma Helaga ena siahu dekena amo guriguri bona noinoi do umui gwauraia. Do umui hesiku lasi, to nega ibounai guriguri totona do umui noho hegaegae. Dirava ena taudia totona do umui guriguri nega ibounai.  
\v 19 Lau dainai danu do umui noinoi, do lau haroro neganai, Sivarai Namona ena hunia hereva do lau hedinaraia, mai maoromaoro bona mai gari lasi danu.  
\v 20 Inai Sivarai Namona totona lau be Dirava ena hereva gwauraia tauna. Bona inai dainai lau be dibura ruma lalonai lau noho. Lau dainai do umui noinoi, Sivarai Namona do lau herevalaia goadagoada, Dirava ena ura hegeregerena.   
\s1 Bamahuta herevadia  
\p
\v 21 Lauegu noho, bona lauegu gaukara sivarai do umui diba totona, iseda varavara lalokauna Tukiko ese umui do ia hamaorolaia. Ia be Lohiabada ena hesiai tauna namona.  
\v 22 Ia lau siaia noho inai, umui dekenai, aiemai sivarai umui do ia hamaoroa, bona umui do ia hagoadaia totona.   
\p
\v 23 Namona be, Tamana Dirava bona Lohiabada Iesu Keriso ese maino, lalokau bona abidadama, be Keristani varavara taudia ibounai dekenai do idia henia.  
\v 24 Iseda Lohiabada Iesu Keriso idia lalokau henia hanaihanai taudia ibounai dekenai Dirava ese iena hariharibada do ia henia.